24. anāgatabādhāpratiṣēdhaḥ

Adhikarana 1 (1-2) · Śloka 2

অথাতোঽনাগতাবাধাপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

উত্থাযোত্থায সততং স্বস্থেনারোগ্যমিচ্ছতা | ধীমতা যদনুষ্ঠেযং তত্ সর্বং সম্প্রবক্ষ্যতে ||৩||

Adhikarana 3 (4-12) · Śloka 12

তত্রাদৌ দন্তপবনং দ্বাদশাঙ্গুলমাযতম্ | কনিষ্ঠিকাপরীণাহমৃজ্বগ্রন্থিতমব্রণম্ ||৪|| অযুগ্মগ্রন্থি যচ্চাপি প্রত্যগ্রং শস্তভূমিজম্ | অবেক্ষ্যর্তুং চ দোষং চ রসং বীর্যং চ যোজযেত্ ||৫|| কষাযং মধুরং তিক্তং কটুকং প্রাতরুত্থিতঃ | নিম্বশ্চ তিক্তকে শ্রেষ্ঠঃ কষাযে খদিরস্তথা ||৬|| মধূকো মধুরে শ্রেষ্ঠঃ করঞ্জঃ কটুকে তথা | ক্ষৌদ্রব্যোষত্রিবর্গাক্তং সতৈলং সৈন্ধবেন চ ||৭|| চূর্ণেন তেজোবত্যাশ্চ দন্তান্নিত্যং বিশোধযেত্ | একৈকং ঘর্ষযেদ্দন্তং মৃদুনা কূর্চকেন চ ||৮|| দন্তশোধনচূর্ণেন দন্তমাংসান্যবাধযন্ | তদ্দৌর্গন্ধ্যোপদেহৌ তু শ্লেষ্মাণং চাপকর্ষতি ||৯|| বৈশদ্যমন্নাভিরুচিং সৌমনস্যং করোতি চ | ন খাদেদ্গলতাল্বোষ্ঠজিহ্বারোগসমুদ্ভবে ||১০|| অথাস্যপাকে শ্বাসে চ কাসহিক্কাবমীষু চ | দুর্বলোঽজীর্ণভক্তশ্চ মূর্চ্ছার্তো মদপীডিতঃ ||১১|| শিরোরুজার্তস্তৃষিতঃ শ্রান্তঃ পানক্লমান্বিতঃ | অর্দিতী কর্ণশূলী চ দন্তরোগী চ মানবঃ ||১২||

Adhikarana 4 (13-14) · Śloka 14

জিহ্বানির্লেখনং রৌপ্যং সৌবর্ণং বার্ক্ষমেব চ | তন্মলাপহরং শস্তং মৃদু শ্লক্ষ্ণং দশাঙ্গুলম্ ||১৩|| মুখবৈরস্যদৌর্গন্ধ্যশোফজাড্যহরং সুখম্ | দন্তদার্ঢ্যকরং রুচ্যং স্নেহগণ্ডূষধারণম্ ||১৪||

Adhikarana 5 (15-16) · Śloka 17

ক্ষীরবৃক্ষকষাযৈর্বা ক্ষীরেণ চ বিমিশ্রিতৈঃ | ভিল্লোটককষাযেণ তথৈবামলকস্য বা ||১৫|| প্রক্ষালযেন্মুখং নেত্রে স্বস্থঃ শীতোদকেন বা | নীলিকাং মুখশোষং চ পিডকাং ব্যঙ্গমেব চ ||১৬|| রক্তপিত্তকৃতান্ রোগান্ সদ্য এব বিনাশযেত্ |১৭|

Adhikarana 6 (17-20) · Śloka 20

সুখং লঘু নিরীক্ষেত দৃঢং পশ্যতি চক্ষুষা ||১৭|| মতং স্রোতোঞ্জনং শ্রেষ্ঠং বিশুদ্ধং সিন্ধুসম্ভবম্ | দাহকণ্ডূমলঘ্নং চ দৃষ্টিক্লেদরুজাপহম্ ||১৮|| তেজোরূপাবহং চৈব সহতে মারুতাতপৌ | ন নেত্ররোগা জাযন্তে তস্মাদঞ্জনমাচরেত্ ||১৯|| ভুক্তবাঞ্ছিরসা স্নাতঃ শ্রান্তশ্ছর্দনবাহনৈঃ | রাত্রৌ জাগরিতশ্চাপি নাঞ্জ্যাজ্বরিত এব চ ||২০||

Adhikarana 7 (21-24) · Śloka 24

কর্পূরজাতীকঙ্কোললবঙ্গকটুকাহ্বযৈঃ | সচূর্ণপূগৈঃ সহিতং পত্রং তাম্বূলজং শুভম্ ||২১|| মুখবৈশদ্যসৌগন্ধ্যকান্তিসৌষ্ঠবকারকম্ | হনুদন্তস্বরমলজিহ্বেন্দ্রিযবিশোধনম্ ||২২|| প্রসেকশমনং হৃদ্যং গলামযবিনাশনম্ | পথ্যং সুপ্তোত্থিতে ভুক্তে স্নাতে বান্তে চ মানবে ||২৩|| রক্তপিত্তক্ষতক্ষীণতৃষ্ণামূর্চ্ছাপরীতিনাম্ | রূক্ষদুর্বলমর্ত্যানাং ন হিতং চাস্যশোষিণাম্ ||২৪||

Adhikarana 8 (25-26) · Śloka 26

শিরোগতাংস্তথা রোগাঞ্ছিরোভঙ্গোঽপকর্ষতি | কেশানাং মার্দবং দৈর্ধ্যং বহুত্বং স্নিগ্ধকৃষ্ণতাম্ ||২৫|| করোতি শিরসস্তৃপ্তিং সুত্বক্কমপি চাননম্ | সন্তর্পণং চেন্দ্রিযাণাং শিরসঃ প্রতিপূরণম্ ||২৬||

Adhikarana 9 (27-28) · Śloka 28

মধুকং ক্ষীরশুক্লা চ সরলং দেবদারু চ | ক্ষুদ্রকং পঞ্চনামানং সমভাগানি সংহরেত্ ||২৭|| তেষাং কল্ককষাযাভ্যাং চক্রতৈলং বিপাচযেত্ | সদৈব শীতলং জন্তোর্মূর্ধ্নি তৈলং প্রদাপযেত্ ||২৮||

Adhikarana 10 (29) · Śloka 29

কেশপ্রসাধনী কেশ্যা রজোজন্তুমলাপহা |২৯|

Adhikarana 11 (29) · Śloka 29

হনুমন্যাশিরঃকর্ণশূলঘ্নং কর্ণপূরণম্ ||২৯||

Adhikarana 12 (30) · Śloka 30

অভ্যঙ্গো মার্দবকরঃ কফবাতনিরোধনঃ | ধাতূনাং পুষ্টিজননো মৃজাবর্ণবলপ্রদঃ ||৩০||

Adhikarana 13 (31-32) · Śloka 32

সেকঃ শ্রমঘ্নোঽনিলহৃদ্ভগ্নসন্ধিপ্রসাধকঃ | ক্ষতাগ্নিদগ্ধাভিহতবিঘৃষ্টানাং রুজাপহঃ ||৩১|| জলসিক্তস্য বর্ধন্তে যথা মূলেঽঙ্কুরাস্তরোঃ | তথা ধাতুবিবৃদ্ধির্হি স্নেহসিক্তস্য জাযতে ||৩২||

Adhikarana 14 (33) · Śloka 33

সিরামুখৈ রোমকূপৈর্ধমনীভিশ্চ তর্পযন্ | শরীরবলমাধত্তে যুক্তঃ স্নেহোঽবগাহনে ||৩৩||

Adhikarana 15 (34) · Śloka 34

তত্র প্রকৃতিসাত্ম্যর্তুদেশদোষবিকারবিত্ | তৈলং ঘৃতং বা মতিমান্ যুঞ্জ্যাদভ্যঙ্গসেকযোঃ ||৩৪||

Adhikarana 16 (35-37) · Śloka 37

কেবলং সামদোষেষু ন কথঞ্চন যোজযেত্ | তরুণজ্বর্যজীর্ণী চ নাভ্যক্তব্যৌ কথঞ্চন ||৩৫|| তথা বিরিক্তো বান্তশ্চ নিরূঢো যশ্চ মানবঃ | পূর্বযোঃ কৃচ্ছ্রতা ব্যাধেরসাধ্যত্বমথাপি বা ||৩৬|| শেষাণাং তদহঃ প্রোক্তা অগ্নিমান্দ্যাদযো গদাঃ | সন্তর্পণসমুত্থানাং রোগাণাং নৈব কারযেত্ ||৩৭||

Adhikarana 17 (38-50) · Śloka 51

শরীরাযাসজননং কর্ম ব্যাযামসঞ্জ্ঞিতম্ | তত্ কৃত্বা তু সুখং দেহং বিমৃদ্গীযাত্ সমন্ততঃ ||৩৮|| শরীরোপচযঃ কান্তির্গাত্রাণাং সুবিভক্ততা | দীপ্তাগ্নিত্বমনালস্যং স্থিরত্বং লাঘবং মৃজা ||৩৯|| শ্রমক্লমপিপাসোষ্ণশীতাদীনাং সহিষ্ণুতা | আরোগ্যং চাপি পরমং ব্যাযামাদুপজাযতে ||৪০|| ন চাস্তি সদৃশং তেন কিঞ্চিত্ স্থৌল্যাপকর্ষণম্ | ন চ ব্যাযামিনং মর্ত্যমর্দযন্ত্যরযো বলাত্ ||৪১|| ন চৈনং সহসাঽঽক্রম্য জরা সমধিরোহতি | স্থিরীভবতি মাংসং চ ব্যাযামাভিরতস্য চ ||৪২|| ব্যাযামস্বিন্নগাত্রস্য পদ্ভ্যামুদ্বর্তিতস্য চ | ব্যাধযো নোপসর্পন্তি সিংহং ক্ষুদ্রমৃগা ইব ||৪৩|| বযোরূপগুণৈর্হীনমপি কুর্যাত্ সুদর্শনম্ | ব্যাযামং কুর্বতো নিত্যং বিরুদ্ধমপি ভোজনম্ ||৪৪|| বিদগ্ধমবিদগ্ধং বা নির্দোষং পরিপচ্যতে | ব্যাযামো হি সদা পথ্যো বলিনাং স্নিগ্ধভোজিনাম্ ||৪৫|| স চ শীতে বসন্তে চ তেষাং পথ্যতমঃ স্মৃতঃ | সর্বেষ্বৃতুষ্বহরহঃ পুম্ভিরাত্মহিতৈষিভিঃ ||৪৬|| বলস্যার্ধেন কর্তব্যো ব্যাযামো হন্ত্যতোঽন্যথা | হৃদি স্থানস্থিতো বাযুর্যদা বক্ত্রং প্রপদ্যতে ||৪৭|| ব্যাযামং কুর্বতো জন্তোস্তদ্বলার্ধস্য লক্ষণম্ | বযোবলশরীরাণি দেশকালাশনানি চ ||৪৮|| সমীক্ষ্য কুর্যাদ্ব্যাযামমন্যথা রোগমাপ্নুযাত্ | ক্ষযতৃষ্ণারুচিচ্ছর্দিরক্তপিত্তভ্রমক্লমাঃ ||৪৯|| কাসশোষজ্বরশ্বাসা অতিব্যাযামসম্ভবাঃ | রক্তপিত্তী কৃশঃ শোষী শ্বাসকাসক্ষতাতুরঃ ||৫০|| ভুক্তবান্ স্ত্রীষু চ ক্ষীণস্তৃড্ভ্রমার্তশ্চ বর্জযেত্ |৫১|

Adhikarana 18 (51) · Śloka 52

উদ্বর্তনং বাতহরং কফমেদোবিলাপনম্ ||৫১|| স্থিরীকরণমঙ্গানাং ত্বক্প্রসাদকরং পরম্ |৫২|

Adhikarana 19 (52-56) · Śloka 56

সিরামুখবিবিক্তত্বং ত্বক্স্থস্যাগ্নেশ্চ তেজনম্ ||৫২|| উদ্ধর্ষণোত্সাদনাভ্যাং জাযেযাতামসংশযম্ | উত্সাদনাদ্ভবেত্ স্ত্রীণাং বিশেষাত্ কান্তিমদ্বপুঃ ||৫৩|| প্রহর্ষসৌভাগ্যমৃজালাঘবাদিগুণান্বিতম্ | উদ্ধর্ষণং তু বিজ্ঞেযং কণ্ডূকোঠানিলাপহম্ ||৫৪|| ঊর্বোঃ সঞ্জনযত্যাশু ফেনকঃ স্থৈর্যলাঘবে | কণ্ডূকোঠানিলস্তম্ভমলরোগাপহশ্চ সঃ ||৫৫|| তেজনং ত্বগ্গতস্যাগ্নেঃ সিরামুখবিবেচনম্ | উদ্ধর্ষণং ত্বিষ্টিকযা কণ্ডূকোঠবিনাশনম্ ||৫৬||

Adhikarana 20 (57-63) · Śloka 64

নিদ্রাদাহশ্রমহরং স্বেদকণ্ডূতৃষাপহম্ | হৃদ্যং মলহরং শ্রেষ্ঠং সর্বেন্দ্রিযবিবোধনম্ ||৫৭|| তন্দ্রাপাপ্মোপশমনং তুষ্টিদং পুংস্ত্ববর্ধনম্ | রক্তপ্রসাদনং চাপি স্নানমগ্নেশ্চ দীপনম্ ||৫৮|| উষ্ণেন শিরসঃ স্নানমহিতং চক্ষুষঃ সদা | শীতেন শিরসঃ স্নানং চক্ষুষ্যমিতি নির্দিশেত্ ||৫৯|| শ্লেষ্মমারুতকোপে তু জ্ঞাত্বা ব্যাধিবলাবলম্ | কামমুষ্ণং শিরঃস্নানং ভৈষজ্যার্থং সমাচরেত্ ||৬০|| অতিশীতাম্বু শীতে চ শ্লেষ্মমারুতকোপনম্ | অত্যুষ্ণমুষ্ণকালে চ পিত্তশোণিতকোপনম্ ||৬১|| তচ্চাতিসারজ্বরিতকর্ণশূলানিলার্তিষু | আধ্মানারোচকাজীর্ণভুক্তবত্সু চ গর্হিতম্ ||৬২|| সৌভাগ্যদং বর্ণকরং প্রীত্যোজোবলবর্ধনম্ | স্বেদদৌর্গন্ধ্যবৈবর্ণ্যশ্রমঘ্নমনুলেপনম্ ||৬৩|| স্নানং যেষাং নিষিদ্ধং তু তেষামপ্যনুলেপনম্ |৬৪|

Adhikarana 21 (64) · Śloka 65

রক্ষোঘ্নমথ চৌজস্যং সৌভাগ্যকরমুত্তমম্ ||৬৪|| সুমনোম্বররত্নানাং ধারণং প্রীতিবর্ধনম্ |৬৫|

Adhikarana 22 (65) · Śloka 66

মুখালেপাদ্দৃঢং চক্ষুঃ পীনগণ্ডং তথাঽঽননম্ ||৬৫|| অব্যঙ্গপিডকং কান্তং ভবত্যম্বুজসন্নিভম্ |৬৬|

Adhikarana 23 (66-67) · Śloka 68

পক্ষ্মলং বিশদং কান্তমমলোজ্জ্বলমণ্ডলম্ ||৬৬|| নেত্রমঞ্জনসংযোগাদ্ভবেচ্চামলতারকম্ | যশস্যং স্বর্গ্যমাযুষ্যং ধনধান্যবিবর্ধনম্ ||৬৭|| দেবতাতিথিবিপ্রাণাং পূজনং গোত্রবর্ধনম্ |৬৮|

Adhikarana 24 (68) · Śloka 69

আহারঃ প্রীণনঃ সদ্যো বলকৃদ্দেহধারকঃ ||৬৮|| আযুস্তেজঃসমুত্সাহস্মৃত্যোজোগ্নিবিবর্ধনঃ |৬৯|

Adhikarana 25 (69) · Śloka 70

পাদপ্রক্ষালনং পাদমলরোগশ্রমাপহম্ ||৬৯|| চক্ষুঃপ্রসাদনং বৃষ্যং রক্ষোঘ্নং প্রীতিবর্ধনম্ |৭০|

Adhikarana 26 (70) · Śloka 71

নিদ্রাকরো দেহসুখশ্চক্ষুষ্যঃ শ্রমসুপ্তিনুত্ ||৭০|| পাদত্বঙ্মৃদুকারী চ পাদাভ্যঙ্গঃ সদা হিতঃ |৭১|

Adhikarana 27 (71-74) · Śloka 74

পাদরোগহরং বৃষ্যং রক্ষোঘ্নং প্রীতিবর্ধনম্ ||৭১|| সুখপ্রচারমোজস্যং সদা পাদত্রধারণম্ | অনারোগ্যমনাযুষ্যং চক্ষুষোরুপঘাতকৃত্ ||৭২|| পাদাভ্যামনুপানদ্ভ্যাং সদা চঙ্ক্রমণং নৃণাম্ | পাপ্মোপশমনং কেশনখরোমাপমার্জনম্ ||৭৩|| হর্ষলাঘবসৌভাগ্যকরমুত্সাহবর্ধনম্ | বাণবারং মৃজাবর্ণতেজোবলবিবর্ধনম্ ||৭৪||

Adhikarana 28 (75) · Śloka 75

পবিত্রং কেশ্যমুষ্ণীষং বাতাতপরজোপহম্ |৭৫|

Adhikarana 29 (75) · Śloka 76

বর্ষানিলরজোঘর্মহিমাদীনাং নিবারণম্ ||৭৫|| বর্ণ্যং চক্ষুষ্যমৌজস্যং শঙ্করং ছত্রধারণম্ |৭৬|

Adhikarana 30 (76-77) · Śloka 78

শুনঃ সরীসৃপব্যালবিষাণিভ্যো ভযাপহম্ ||৭৬|| শ্রমস্খলনদোষঘ্নং স্থবিরে চ প্রশস্যতে | সত্ত্বোত্সাহবলস্থৈর্যধৈর্যবীর্যবিবর্ধনম্ ||৭৭|| অবষ্টম্ভকরং চাপি ভযঘ্নং দণ্ডধারণম্ |৭৮|

Adhikarana 31 (78) · Śloka 78

আস্যা বর্ণকফস্থৌল্যসৌকুমার্যকরী সুখা ||৭৮||

Adhikarana 32 (79-80) · Śloka 80

অধ্বা বর্ণকফস্থৌল্যসৌকুমার্যবিনাশনঃ | অত্যধ্বা বিপরীতোঽস্মাজ্জরাদৌর্বল্যকৃচ্চ সঃ ||৭৯|| যত্তু চঙ্ক্রমণং নাতিদেহপীডাকরং ভবেত্ | তদাযুর্বলমেধাগ্নিপ্রদমিন্দ্রিযবোধনম্ ||৮০||

Adhikarana 33 (81-82) · Śloka 82

শ্রমানিলহরং বৃষ্যং পুষ্টিনিদ্রাধৃতিপ্রদম্ | সুখং শয্যাসনং, দুঃখং বিপরীতগুণং মতম্ ||৮১|| বালব্যজনমৌজস্যং মক্ষিকাদীনপোহতি | শোষদাহশ্রমস্বেদমূর্চ্ছাঘ্নো ব্যজনানিলঃ ||৮২||

Adhikarana 34 (83) · Śloka 83

প্রীতিনিদ্রাকরং বৃষ্যং কফবাতশ্রমাপহম্ | সংবাহনং মাংসরক্তত্বক্প্রসাদকরং সুখম্ ||৮৩||

Adhikarana 35 (84-88) · Śloka 88

প্রবাতং রৌক্ষ্যবৈবর্ণ্যস্তম্ভকৃদ্দাহপক্তিনুত্ | স্বেদমূর্চ্ছাপিপাসাঘ্নমপ্রবাতমতোঽন্যথা ||৮৪|| সুখং বাতং প্রসেবেত গ্রীষ্মে শরদি মানবঃ | নিবাতং হ্যাযুষে সেব্যমারোগ্যায চ সর্বদা ||৮৫|| আতপঃ পিত্ততৃষ্ণাগ্নিস্বেদমূর্চ্ছাভ্রমাস্রকৃত্ | দাহবৈবর্ণ্যকারী চ ছাযা চৈতানপোহতি ||৮৬|| অগ্নির্বাতকফস্তম্ভশীতবেপথুনাশনঃ | আমাভিষ্যন্দজরণো রক্তপিত্তপ্রদূষণঃ ||৮৭|| পুষ্টিবর্ণবলোত্সাহমগ্নিদীপ্তিমতন্দ্রিতাম্ | করোতি ধাতুসাম্যং চ নিদ্রা কালে নিষেবিতা ||৮৮||

Adhikarana 36 (89) · Śloka 89

তত্রাদিত এব নীচনখরোম্ণা শুচিনা শুক্লবাসসা লঘূষ্ণীষচ্ছত্রোপানত্কেন দণ্ডপাণিনা কালে হিতমিতমধুরপূর্বাভিভাষিণা বন্ধুভূতেন ভূতানাং গুরুবৃদ্ধানুমতেন সুসহাযেনানন্যমনসা খলূপচরিতব্যং, তদপি ন রাত্রৌ, ন কেশাস্থিকণ্টকাশ্মতুষভস্মোত্করকপালাঙ্গারামেধ্যস্নানবলিভূমিষু, ন বিষমেন্দ্রকীলচতুষ্পথশ্বভ্রাণামুপরিষ্টাত্ ||৮৯||

Adhikarana 37 (90) · Śloka 90

ন রাজদ্বিষ্টপরুষপৈশুন্যানৃতানি বদেত্, ন দেবব্রাহ্মণপিতৃপরিবাদাংশ্চ; ন নরেন্দ্রদ্বিষ্টোন্মত্তপতিতক্ষুদ্রনীচানুপাসীত ||৯০||

Adhikarana 38 (91) · Śloka 91

বৃক্ষপর্বতপ্রপাতবিষমবল্মীকদুষ্টবাজিকুঞ্জরাদ্যধিরোহণানি পরিহরেত্, পূর্ণনদীসমুদ্রাবিদিতপল্বলশ্বভ্রকূপাবতরণানি, ভিন্নশূন্যাগারশ্মশানবিজনারণ্যবাসাগ্নিসম্ভ্রমব্যালভুজঙ্গকীটসেবাশ্চ, গ্রামাঘাতকলহশস্ত্রসন্নিপাতব্যালসরীসৃপশৃঙ্গিসন্নিকর্ষাংশ্চ ||৯১||

Adhikarana 39 (92) · Śloka 92

নাগ্নিগোগুরুব্রাহ্মণপ্রেঙ্খাদম্পত্যন্তরেণ যাযাত্ | ন শবমনুযাযাত্ | দেবগোব্রাহ্মণচৈত্যধ্বজরোগিপতিতপাপকারিণাং চ ছাযাং নাক্রমেত | নাস্তং গচ্ছন্তমুদ্যন্তং বাঽঽদিত্যং বীক্ষেত | গাং ধাপযন্তীং ধযন্তীং পরশস্যং বা চরন্তীং ন কস্মৈচিদাচক্ষীত, ন চোল্কাপাতোত্পাতেন্দ্রধনূংষি | নাগ্নিং মুখেনোপধমেত্ | নাপো ভূমিং বা পাণিপাদেনাভিহন্যাত্ ||৯২||

Adhikarana 40 (93) · Śloka 93

ন বেগান্ ধারযেদ্ বাতমূত্রপুরীষাদীনাম্ | ন বহির্বেগান্ গ্রামনগরদেবতাযতনশ্মশানচতুষ্পথসলিলাশযপথি সন্নিকৃষ্টানুত্সৃজেন্ন প্রকাশং ন বায্বগ্নিসলিলসোমার্কগোগুরুপ্রতিমুখম্ ||৯৩||

Adhikarana 41 (94) · Śloka 94

ন ভূমিং বিলিখেত্, নাসংবৃতমুখঃ সদসি জৃম্ভোদ্গারকাসশ্বাসক্ষবথূনুত্সৃজেত্, ন পর্যঙ্কিকাবষ্টম্ভপাদপ্রসারণানি গুরুসন্নিধৌ কুর্যাত্ ||৯৪||

Adhikarana 42 (95) · Śloka 95

ন বালকর্ণনাসাস্রোতোদশনাক্ষিবিবরাণ্যভিকুষ্ণীযাত্ , ন বীজযেত্ কেশমুখনখবস্ত্রগাত্রাণি, ন গাত্রনখবক্ত্রবাদিত্রং কুর্যাত্, ন কাষ্ঠলোষ্টতৃণাদীনভিহন্যাচ্ছিন্দ্যাদ্ভিন্দ্যাদ্বা ||৯৫||

Adhikarana 43 (96) · Śloka 96

ন প্রতিবাতাতপং সেবেত, ন ভুক্তমাত্রোঽগ্নিমুপাসীত, নোত্কটকাল্পকাষ্ঠাসনমধ্যাসীত, ন গ্রীবাং বিষমং ধারযেত্, ন বিষমকাযঃ ক্রিযাং ভজেত ভুঞ্জীত বা, ন প্রততমীক্ষেত বিশেষাজ্জ্যোতির্ভাস্করসূক্ষ্মচলভ্রান্তানি, ন ভারং শিরসা বহেত্, ন স্বপ্নজাগরণশযনাসনস্থানচঙ্ক্রমণযানবাহনপ্রধাবনলঙ্ঘনপ্লবনপ্রতরণহাস্যভাষ্যব্যবাযব্যাযামাদীনুচিতানপ্যতিসেবেত ||৯৬||

Adhikarana 44 (97) · Śloka 97

উচিতাদপ্যহিতাত্ ক্রমশো বিরমেত্, হিতমনুচিতমপ্যাসেবেত ক্রমশঃ, ন চৈকান্ততঃ পাদহীনাত্ ||৯৭||

Adhikarana 45 (98) · Śloka 98

নাবাক্শিরাঃ শযীত, ন ভিন্নপাত্রে ভুঞ্জীত, ন বিনা পাত্রেণ, নাঞ্জলিপুটেনাপঃ পিবেত্, কালে হিতমিতস্নিগ্ধমধুরপ্রাযমাহারং বৈদ্যপ্রত্যবেক্ষিতমশ্নীযাত্, গ্রামগণগণিকাপণিকশত্রুসত্রশঠপতিতভোজনানি পরিহরেত্, শেষাণ্যপি চানিষ্টরূপরসগন্ধস্পর্শশব্দমানসানি, অন্যান্যেবঙ্গুণান্যপি সম্ভ্রমদত্তানি, (তান্যপি) মক্ষিকাবালোপহতানি , নাপ্রক্ষালিতপাদো ভুঞ্জীত ন মূত্রোচ্চারপীডিতো ন সন্ধ্যযোর্নানুপাশ্রিতো নাতীতকালং হীনমতিমাত্রং (নোদ্ধৃতস্নেহং) চেতি ||৯৮||

Adhikarana 46 (99-100) · Śloka 100

ন ভুঞ্জীতোদ্ধৃতস্নেহং নষ্টং পর্যুষিতং পযঃ | ন নক্তং দধি ভুঞ্জীত ন চাপ্যঘৃতশর্করম্ ||৯৯|| নামুদ্গযূষং নাক্ষৌদ্রং নোষ্ণং নামলকৈর্বিনা | অন্যথা জনযেত্ কুষ্ঠবিসর্পাদীন্ গদান্ বহূন্ | নাত্মানমুদকে পশ্যেন্ন নগ্নঃ প্রবিশেজ্জলম্ ||১০০||

Adhikarana 47 (101) · Śloka 101

দ্যূতমদ্যাতিসেবাপ্রতিভূত্বসাক্ষিত্বসমাহ্বানগোষ্ঠীবাদিত্রাণি ন সেবেত, স্রজং ছত্রোপানহৌ কনকমতীতবাসাংসি ন চান্যৈর্ধৃতানি ধারযেত্, ব্রাহ্মণমগ্নিং গাং চ নোচ্ছিষ্টঃ স্পৃশেত্ ||১০১||

Adhikarana 48 (102-106) · Śloka 107

ভবন্তি চাত্র- যস্মিন্ যস্মিন্নৃতৌ যে যে দোষাঃ কুপ্যন্তি দেহিনাম্ | তেষু তেষু প্রদাতব্যা রসাস্তে তে বিজানতা ||১০২|| বর্ষাসু ন পিবেত্তোযং পিবেচ্ছরদি মাত্রযা | বর্ষাসু চতুরো মাসান্ মাত্রাবদুদকং পিবেত্ ||১০৩|| উষ্ণং হৈমে বসন্তে চ কামং গ্রীষ্মে তু শীতলম্ | হেমন্তে চ বসন্তে চ সীধ্বরিষ্টৌ পিবেন্নরঃ ||১০৪|| শৃতশীতং পযো গ্রীষ্মে প্রাবৃট্কালে রসং পিবেত্ | যূষং বর্ষতি, তস্যান্তে প্রপিবেচ্ছীতলং জলম্ ||১০৫|| স্বস্থ এবমতোঽন্যস্তু দোষাহারগতানুগঃ | স্নেহং সৈন্ধবচূর্ণেন পিপ্পলীভিশ্চ সংযুতম্ ||১০৬|| পিবেদগ্নিবিবৃদ্ধ্যর্থং ন চ বেগান্ বিধারযেত্ |১০৭|

Adhikarana 49 (107-109) · Śloka 109

অগ্নিদীপ্তিকরং নৄণাং রোগাণাং শমনং প্রতি ||১০৭|| প্রাবৃট্শরদ্বসন্তেষু সম্যক্ স্নেহাদিমাচরেত্ | কফে প্রচ্ছর্দনং পিত্তে বিরেকো বস্তিরীরণে ||১০৮|| শস্যতে ত্রিষ্বপি সদা ব্যাযামো দোষনাশনঃ | ভুক্তং বিরুদ্ধমপ্যন্নং ব্যাযামান্ন প্রদুষ্যতি ||১০৯||

Adhikarana 50 (110-129) · Śloka 130

উত্সর্গমৈথুনাহারশোধনে স্যাত্তু তন্মনাঃ | নেচ্ছেদ্দোষচযাত্ প্রাজ্ঞঃ পীডাং বা কাযমানসীম্ ||১১০|| অতিস্ত্রীসম্প্রযোগাচ্চ রক্ষেদাত্মানমাত্মবান্ | শূলকাসজ্বরশ্বাসকার্শ্যপাণ্ড্বামযক্ষযাঃ ||১১১|| অতিব্যবাযাজ্জাযন্তে রোগাশ্চাক্ষেপকাদযঃ | আযুষ্মন্তো মন্দজরা বপুর্বর্ণবলান্বিতাঃ ||১১২|| স্থিরোপচিতমাংসাশ্চ ভবন্তি স্ত্রীষু সংযতাঃ | ত্রিভিস্ত্রিভিরহোভির্বা সমীযাত্ প্রমদাং নরঃ ||১১৩|| সর্বেষ্বৃতুষু, ঘর্মেষু পক্ষাত্ পক্ষাদ্ব্রজেদ্বুধঃ | রজস্বলামকামাং চ মলিনামপ্রিযাং তথা ||১১৪|| বর্ণবৃদ্ধাং বযোবৃদ্ধাং তথা ব্যাধিপ্রপীডিতাম্ | হীনাঙ্গীং গর্ভিণীং দ্বেষ্যাং যোনিদোষসমন্বিতাম্ ||১১৫|| সগোত্রাং গুরুপত্নীং চ তথা প্রব্রজিতামপি | সন্ধ্যাপর্বস্বগম্যাং চ নোপেযাত্ প্রমদাং নরঃ ||১১৬|| গোসর্গে চার্ধরাত্রে চ তথা মধ্যন্দিনেষু চ | লজ্জাসমাবহে দেশে বিবৃতেঽশুদ্ধ এব চ ||১১৭|| ক্ষুধিতো ব্যাধিতশ্চৈব ক্ষুব্ধচিত্তশ্চ মানবঃ | বাতবিণ্মূত্রবেগী চ পিপাসুরতিদুর্বলঃ ||১১৮|| তির্যগ্যোনাবযোনৌ চ প্রাপ্তশুক্রবিধারণম্ | দুষ্টযোনৌ বিসর্গং তু বলবানপি বর্জযেত্ ||১১৯|| রেতসশ্চাতিমাত্রং তু মূর্ধাবরণমেব চ | স্থিতাবুত্তানশযনে বিশেষেণৈব গর্হিতম্ ||১২০|| ক্রীডাযামপি মেধাবী হিতার্থী পরিবর্জযেত্ | রজস্বলাং প্রাপ্তবতো নরস্যানিযতাত্মনঃ ||১২১|| দৃষ্ট্যাযুস্তেজসাং হানিরধর্মশ্চ ততো ভবেত্ | লিঙ্গিনীং গুরুপত্নীং চ সগোত্রামথ পর্বসু ||১২২|| বৃদ্ধাং চ সন্ধ্যযোশ্চাপি গচ্ছতো জীবিতক্ষযঃ | গর্ভিণ্যা গর্ভপীডা স্যাদ্ ব্যাধিতাযাং বলক্ষযঃ ||১২৩|| হীনাঙ্গীং মলিনাং দ্বেষ্যাং কামং বন্ধ্যামসংবৃতে | দেশেঽশুদ্ধে চ শুক্রস্য মনসশ্চ ক্ষযো ভবেত্ ||১২৪|| ক্ষুধিতঃ ক্ষুব্ধচিত্তশ্চ মধ্যাহ্নে তৃষিতোঽবলঃ | স্থিতশ্চ হানিং শুক্রস্য বাযোঃ কোপং চ বিন্দতি ||১২৫|| অতিপ্রসঙ্গাদ্ভবতি শোষঃ শুক্রক্ষযাবহঃ | ব্যাধিতস্য রুজা প্লীহ্নি মৃত্যুর্মূর্চ্ছা চ জাযতে ||১২৬|| প্রত্যূষস্যর্ধরাত্রে চ বাতপিত্ত প্রকুপ্যতঃ | তির্যগ্যোনাবযোনৌ চ দুষ্টযোনৌ তথৈব চ ||১২৭|| উপদংশস্তথা বাযোঃ কোপঃ শুক্রস্য চ ক্ষযঃ | উচ্চারিতে মূত্রিতে চ রেতসশ্চ বিধারণে ||১২৮|| উত্তানে চ ভবেচ্ছীধ্রং শুক্রাশ্মর্যাস্তু সম্ভবঃ | সর্বং পরিহরেত্তস্মাদেতল্লোকদ্বযেঽহিতম্ ||১২৯|| শুক্রং চোপস্থিতং মোহান্ন সন্ধার্যং কথঞ্চন |১৩০|

Adhikarana 51 (130-132) · Śloka 132

বযোরূপগুণোপেতাং তুল্যশীলাং কুলান্বিতাম্ ||১৩০|| অভিকামোঽভিকামাং তু হৃষ্টো হৃষ্টামলঙ্কৃতাম্ | সেবেত প্রমদাং যুক্ত্যা বাজীকরণবৃংহিতঃ ||১৩১|| ভক্ষ্যাঃ সশর্করাঃ ক্ষীরং সসিতং রস এব চ | স্নানং সব্যজনং স্বপ্নো ব্যবাযান্তে হিতানি তু ||১৩২||

Adhikarana 52 (133) · Śloka 133

মুখমাত্রং সমাসেন সদ্বৃত্তস্যৈতদীরিতম্ | আরোগ্যমাযুরর্থো বা নাসদ্ভিঃ প্রাপ্যতে নৃভিঃ ||১৩৩||

Adhikarana puShpikA · Śloka 24

ইতি সুশ্রুতসংহিতাযাং চিকিত্সাস্থানেঽনাগতাবাধচিকিত্সিতং নাম চতুর্বিংশোঽধ্যাযঃ ||২৪||