37. anuvāsanōttarabasticikitsitam

Adhikarana 1 (1-3) · Śloka 3

অথাতোঽনুবাসনোত্তরবস্তিচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| বিরেচনাত্ সপ্তরাত্রে গতে জাতবলায বৈ | কৃতান্নাযানুবাস্যায সম্যগ্দেযোঽনুবাসনঃ ||৩||

অনুবাস্যঃ সপ্তরাত্রাদ্বিরেচিত ইতি যদুক্তং তদ্বললাভে এব নান্যথেতি দর্শযন্নাহ- বিরেচনাদিত্যাদি| জাতবলাযেতি জাতবলস্যৈবানুবাসনং দেযং, যত উত্পন্নবলস্যৈবাগ্নির্বলবাননুবাসনহেতুঃ| তথা চোক্তং- “পশ্চাদগ্নিবলং জ্ঞাত্বা সম্যগ্দেযোঽনুবাসনঃ”| ‘কৃতাহারায সাযহ্নে’ ইতি কেচিত্ পঠন্তি, ‘কৃতাহারায সততম্’ ইত্যন্যে| তত্র ন কদাচিদপ্যকৃতাহারাযেতি সততগ্রহণার্থঃ||১-৩||

Adhikarana 2 (4) · Śloka 4

যথাবযো নিরূহাণাং যা মাত্রাঃ পরিকীর্তিতাঃ | পাদাবকৃষ্টাস্তাঃ কার্যাঃ স্নেহবস্তিষু দেহিনাম্ ||৪||

বযোবিশেষানুরূপমাত্রামুপদিশন্নাহ - যথাবযো নিরূহাণামিত্যাদি| বয ইহ সাংবত্সরিকাদীনাং শরীরাবস্থাবিশেষঃ| পাদাপকৃষ্টাঃ চতুর্ভাগাবশিষ্টাঃ| চরকেঽপ্যুক্তং- “নিরূহপাদাংশসমেন তৈলেনাম্লানিলঘ্নৌষধসাধিতেন” (চ.সি.অ.৩) ইতি| তন্ত্রান্তরেঽপি- “ষট্পলী তু ভবেচ্ছ্রেষ্ঠা ত্রিপলী মধ্যমা ভবেত্| কনীযস্যর্ধপলিকা ত্রিধা মাত্রাঽনুবাসনে”- ইতি| ‘অর্ধার্ধকৃষ্টাস্তাঃ কার্যা’ ইতি অন্যে পঠন্তি, তত্রাপি অর্ধস্যার্ধশ্চতুর্থো ভাগ এবেতি স এবার্থঃ||৪||

Adhikarana 3 (5-6) · Śloka 6

উত্সৃষ্টানিলবিণ্মূত্রে নরে বস্তিং বিধাপযেত্ | এতৈর্হি বিহতঃ স্নেহো নৈবান্তঃ প্রতিপদ্যতে ||৫|| স্নেহবস্তির্বিধেযস্তু নাবিশুদ্ধস্য দেহিনঃ | স্নেহবীর্যং তথা দত্তে দেহং চানুবিসর্পতি ||৬||

বস্তেঃ পূর্বকর্ম নির্দিশন্নাহ- উত্সৃষ্টেত্যাদি| যস্মাদেতৈঃ কারণৈরনুত্সৃষ্টৈরনিলবিণ্মূত্রৈর্নেত্রদ্বারাবরকৈরন্তর্বিহতঃ| অবরুদ্ধো দত্তঃ স্নেহো নৈবান্তঃ প্রতিপদ্যতে নৈবান্তঃ প্রবিশতীত্যর্থঃ| ‘এতৈর্হি বিহত’ ইত্যত্র ‘অন্যথা বিহত’ ইতি কেচিত্ পঠন্তি, তত্রান্যথা অন্যেন প্রকারেণ, অনুত্সৃষ্টানিলবিণ্মূত্রত্বেনাবিশুদ্ধস্য দেহিন ইত্যর্থঃ| অতো বিণ্মূত্রনির্হরণে কৃতে স্নেহবস্তির্বিধীযতে ইতি দর্শযন্নাহ- স্নেহেত্যাদি| তথা তেন প্রকারেণ শুদ্ধে শরীরে স্নেহবস্তিঃ স্নেহবীর্যং দত্তে দদাতীত্যর্থঃ| “স্নেহো দোষৈরপিহিতঃ স্রোতঃস ন বিসর্পতি”- ইতি কেচিদর্ধং পঠন্তি| অপিহিত আচ্ছাদিত ইত্যর্থঃ||৫-৬||

Adhikarana 4 (7-14) · Śloka 14

অত ঊর্ধ্বং প্রবক্ষ্যামি তৈলানীহ যথাক্রমম্ | পানান্বাসননস্যেষু যানি হন্যুর্গদান্ বহূন্ ||৭|| শটীপুষ্করকৃষ্ণাহ্বামদনামরদারুভিঃ | শতাহ্বাকুষ্ঠযষ্ট্যাহ্ববচাবিল্বহুতাশনৈঃ ||৮|| সুপিষ্টৈর্দ্বিগুণক্ষীরং তৈলং তোযচতুর্গুণম্ | পক্ত্বা বস্তৌ বিধাতব্যং মূঢবাতানুলোমনম্ ||৯|| অর্শাংসি গ্রহণীদোষমানাহং বিষমজ্বরম্ | কট্যূরুপৃষ্ঠকোষ্ঠস্থান্ বাতরোগাংশ্চ নাশযেত্ ||১০|| বচাপুষ্করকুষ্ঠৈলামদনামরসিন্ধুজৈঃ | কাকোলীদ্বযযষ্ট্যাহ্বমেদাযুগ্মনরাধিপৈঃ ||১১|| পাঠাজীবকজীবন্তীভার্গীচন্দনকট্ফলৈঃ | সরলাগুরুবিল্বাম্বুবাজিগন্ধাগ্নিবৃদ্ধিভিঃ ||১২|| বিডঙ্গারগ্বধশ্যামাত্রিবৃন্মাগধিকর্ধিভিঃ | পিষ্টৈস্তৈলং পচেত্ ক্ষীরপঞ্চমূলরসান্বিতম্ ||১৩|| গুল্মানাহাগ্নিষঙ্গার্শোগ্রহণীমূত্রসঙ্গিনাম্ | অন্বাসনবিধৌ যুক্তং শস্যতেঽনিলরোগিণাম্ ||১৪||

কেচিদত্র বৃদ্ধসুশ্রুতাধ্যাযিন আমস্নেহস্য গুদোপদেহেনাপি ব্যাপত্করত্বমালোক্য পক্বতৈলানি প্রতিপাদযিতুকামাঃ প্রতিজ্ঞাং কুর্বন্তি- অত ঊর্ধ্বমিত্যাদি| যথাক্রমমিতি বাতাদিদোষক্রমেণেত্যর্থঃ| যত্র শট্যাদৌ পৌষ্করং কুষ্ঠং চ যত্পঠ্যতে তত্র পৌষ্করং মূলং, তদ্বিটপশাখাশ্চ কুষ্ঠমিতি জ্ঞেযম্| অমরদারুঃ দেবদারুঃ| সিন্ধুজং সৈন্ধবম্| নরাধিপঃ কৃতমালকঃ| সরতীতি সরলা ত্রিবৃত্, বিরেচনীযত্বাত্| শ্যামা বৃদ্ধদারুকঃ| পঞ্চমূলং বিল্বাদিপঞ্চমূলং, তস্য রসঃ ক্বাথঃ| অত্র তৈলে নরাধিপারগ্বধপাঠাত্ সরলাত্রিবৃত্পাঠাচ্চ এতযোর্দ্বিগুণা মাত্রা দেযা| উক্তং চ- “ঘৃতে তৈলে চ যোগে চ যদ্ দ্রব্যং পুনরুচ্যতে| তদ্দাতব্যমিহাচার্যৈর্ভাগতো দ্বিগুণং মতম্”- ইতি||৭-১৪||

Adhikarana 5 (15-18) · Śloka 18

চিত্রকাতিবিষাপাঠাদন্তীবিল্ববচামিষৈঃ | সরলাংশুমতীরাস্নানীলিনীচতুরঙ্গুলৈঃ ||১৫|| চব্যাজমোদকাকোলীমেদাযুগ্মসুরদ্রুমৈঃ | জীবকর্ষভবর্ষাভূবস্তগন্ধাশতাহ্বযৈঃ ||১৬|| রেণ্বশ্বগন্ধামঞ্জিষ্ঠাশটীপুষ্করতস্করৈঃ | সক্ষীরং বিপচেত্তৈলং মারুতামযনাশনম্ ||১৭|| গৃধ্রসীখঞ্জকুব্জাঢ্যমূত্রোদাবর্তরোগিণাম্ | শস্যতেঽল্পবলাগ্নীনাং বস্তাবাশু নিযোজিতম্ ||১৮||

আমিষং গুগ্গুলুঃ| সুরদ্রুমো দেবদারুঃ| তস্করঃ চোরকঃ||১৫-১৮||

Adhikarana 6 (19-26) · Śloka 26

ভূতিকৈরণ্ডবর্ষাভূরাস্নাবৃষকরোহিষৈঃ | দশমূলসহাভার্গীষড্গ্রন্থামরদারুভিঃ ||১৯|| বলানাগবলামূর্বাবাজিগন্ধামৃতাদ্বযৈঃ | সহাচরবরীবিশ্বাকাকনাসাবিদারিভিঃ ||২০|| যবমাষাতসীকোলকুলত্থৈঃ ক্বথিতৈঃ শৃতম্ | জীবনীযপ্রতীবাপং তৈলং ক্ষীরচতুর্গুণম্ ||২১|| জঙ্ঘোরুত্রিকপার্শ্বাংসবাহুমন্যাশিরঃস্থিতান্ | হন্যাদ্বাতবিকারাংস্তু বস্তিযোগৈর্নিষেবিতম্ ||২২|| জীবন্ত্যতিবলামেদাকাকোলীদ্বযজীবকৈঃ | ঋষভাতিবিষাকৃষ্ণাকাকনাসাবচামরৈঃ ||২৩|| রাস্নামদনযষ্ট্যাহ্বসরলাভীরুচন্দনৈঃ | স্বযঙ্গুপ্তাশটীশৃঙ্গীকলসীসারিবাদ্বযৈঃ ||২৪|| পিষ্টৈস্তৈলঘৃতং পক্বং ক্ষীরেণাষ্টগুণেন তু | তচ্চানুবাসনে দেযং শুক্রাগ্নিবলবর্ধনম্ ||২৫|| বৃংহণং বাতপিত্তঘ্নং গুল্মানাহহরং পরম্ | নস্যে পানে চ সংযুক্তমূর্ধ্বজত্রুগদাপহম্ ||২৬||

ভূতিকং কত্তৃণং গন্ধতৃণাপরপর্যাযম্| গুডূচী হরীতকী চেতি অমৃতাদ্বযম্| সহাচরঃ সৈরীযঃ , বরী শতাবরী, বিশ্বা শুণ্ঠী, কাকনাসা বাযসফলা||১৯-২৬||

Adhikarana 7 (27-29) · Śloka 29

মধুকোশীরকাশ্মর্যকটুকোত্পলচন্দনৈঃ | শ্যামাপদ্মকজীমূতশক্রাহ্বাতিবিষাম্বুভিঃ ||২৭|| তৈলপাদং পচেত্ সর্পিঃ পযসাঽষ্টগুণেন চ | ন্যগ্রোধাদিগণক্বাথযুক্তং বস্তিষু যোজিতম্ ||১৮|| দাহাসৃগ্দরবীসর্পবাতশোণিতবিদ্রধীন্ | পিত্তরক্তজ্বরাদ্যাংশ্চ হন্যাত্ পিত্তকৃতান্ গদান্ ||২৯||

শ্যামা প্রিযঙ্গুঃ| জীমূতো মুস্তকঃ| তৈলস্য পাদশ্চতুর্থাংশো যস্মিন্ সর্পিষি তত্ তৈলপাদম্||২৭-২৯||

Adhikarana 8 (30-32) · Śloka 32

মৃণালোত্পলশালূকসারিবাদ্বযকেশরৈঃ | চন্দনদ্বযভূনিম্বপদ্মবীজকসেরুকৈঃ ||৩০|| পটোলকটুকারক্তাগুন্দ্রাপর্পটবাসকৈঃ | পিষ্টৈস্তৈলঘৃতং পক্বং তৃণমূলরসেন চ ||৩১|| ক্ষীরদ্বিগুণসংযুক্তং বস্তিকর্মণি যোজিতম্ | নস্যেঽভ্যঞ্জনপানে বা হন্যাত্ পিত্তগদান্ বহূন্ ||৩২||

রক্তা মঞ্জিষ্ঠা, গুন্দ্রা পট্টোরকভেদঃ| তৃণমূলং কুশকাশাদিতৃণপঞ্চমূলম্||৩০-৩২||

Adhikarana 9 (33-42) · Śloka 42

ত্রিফলাতিবিষামূর্বাত্রিবৃচ্চিত্রকবাসকৈঃ | নিম্বারগ্বধষড্গ্রন্থাসপ্তপর্ণনিশাদ্বযৈঃ ||৩৩|| গুডূচীন্দ্রসুরাকৃষ্ণাকুষ্ঠসর্ষপনাগরৈঃ | তৈলমেভিঃ সমৈঃ পক্বং সুরসাদিরসাপ্লুতম্ ||৩৪|| পানাভ্যঞ্জনগণ্ডূষনস্যবস্তিষু যোজিতম্ | স্থূলতালস্যকণ্ড্বাদীন্ জযেত্কফকৃতান্ গদান্ ||৩৫|| পাঠাজমোদাশার্ঙ্গেষ্টাপিপ্পলীদ্বযনাগরৈঃ | সরলাগুরুকালীযভার্গীচব্যামরদ্রুমৈঃ ||৩৬|| মরিচৈলাভযাকট্বীশটীগ্রন্থিককট্ফলৈঃ | তৈলমেরণ্ডতৈলং বা পক্বমেভিঃ সমাযুতম্ ||৩৭|| বল্লীকণ্টকমূলাভ্যাং ক্বাথেন দ্বিগুণেন চ | হন্যাদন্বাসনৈর্দত্তং সর্বান্ কফকৃতান্ গদান্ ||৩৮|| বিডঙ্গোদীচ্যসিন্ধূত্থশটীপুষ্করচিত্রকৈঃ | কট্ফলাতিবিষাভার্ঙ্গীবচাকুষ্ঠসুরাহ্বযৈঃ ||৩৯|| মেদামদনযষ্ট্যাহ্বশ্যামানিচুলনাগরৈঃ | শতাহ্বানীলিনীরাস্নাকলসীবৃষরেণুভিঃ ||৪০|| বিল্বাজমোদকৃষ্ণাহ্বাদন্তীচব্যনরাধিপৈঃ | তৈলমেরণ্ডতৈলং বা মুষ্ককাদিরসাপ্লুতম্ ||৪১|| প্লীহোদাবর্তবাতাসৃগ্গুল্মানাহকফামযান্ | প্রমেহশর্করার্শাংসি হন্যাদাশ্বনুবাসনৈঃ ||৪২||

ইন্দ্রসুরা ইন্দ্রবারুণী| শার্ঙ্গেষ্টা ভুম্ভুরুট্টাকো বেষ্টিতফলঃ কাকমাচ্যনুকারঃ| কট্বী কটুকা| বিদার্যাদিকং পঞ্চমূলং বল্লীসঞ্জ্ঞকম্| করমর্দাদিকং তু কণ্টকসঞ্জ্ঞং পঞ্চমূলম্| শ্যামা বৃদ্ধদারুকঃ| নিচুলো জলবেতসঃ| রেণুঃ পর্পটকঃ| মুষ্ককাদিরসেন “মুষ্ককপলাশধব- ” (সূ.অ.৩৮) ইত্যাদিগণস্য রসেন ক্বাথেন চতুর্গুণেন, প্লুতং মিশ্রিতং তিলতৈলমেরণ্ডতৈলং বেতি তৈলদ্বযং কল্প্যতে| তত্র শট্যাদিবচাদিচিত্রকাদিভূতীকাদিতৈলানি প্রাযশো বাতরোগেষু, জীবন্ত্যাদিমধুকাদিমৃণালাদিতৈলানি পিত্তরক্তরোগার্দিতেষু, ত্রিফলাদিপাঠাদিতৈলদ্বযং কফগ্রস্তেষু, বিডঙ্গাদিতৈলং বাতে কফভূযিষ্ঠে, সংসর্গসন্নিপাতেষু পুনরেতান্যেব যথাযথমভ্য্হ্যূ যোজ্যানীতি জ্ঞেযম্| এতানি শট্যাদিতৈলানি সামান্যস্নেহপাকপরিভাষযা সাধনীযানি||৩৩-৪২||

Adhikarana 10 (43) · Śloka 43

অশুদ্ধমপি বাতেন কেবলেনাতিপীডিতম্ | অহোরাত্রস্য কালেষু সর্বেষ্বেবানুবাসযেত্ ||৪৩||

পূর্বং বিশুদ্ধদেহস্য স্নেহবস্তিং প্রদর্শ্য ক্বচিদশুদ্ধস্যাপি দর্শযন্নাহ- অশুদ্ধমিত্যাদি| কেবলেন ধাতুক্ষযহেতুনা| রিক্তে হি শরীরে প্রাযেণ বিবৃতস্রোতোমুখমেব শরীরং, তত্র শুদ্ধ্যা পুনরতিধাতুক্ষযেণাতিতরামেব বাতরোগঃ স্যাত্, তেনাশুদ্ধেঽপি তত্র স্নেহবস্তিরিতি| অহোরাত্রস্য কালেষু পূর্বাহ্ণাদিষু, ‘জীর্ণান্নং ভোজযিত্বাঽনুবাসযেত্’ ইতি বক্ষ্যমাণেন পূরণীযম্||৪৩||

Adhikarana 11 (44) · Śloka 44

রূক্ষস্য বহুবাতস্য দ্বৌ ত্রীনপ্যনুবাসনান্ | দত্ত্বা স্নিগ্ধতনুং জ্ঞাত্বা ততঃ পশ্চান্নিরূহযেত্ ||৪৪||

রূক্ষস্য বাতাধিকস্য বাতবেগবিধারণায প্রাগেব স্নেহবস্তিং দত্ত্বা পশ্চাচ্ছোধনো বস্তির্দেয ইতি দর্শযন্নাহ- রূক্ষস্যেত্যাদি||৪৪||

Adhikarana 12 (45) · Śloka 45

অস্নিগ্ধমপি বাতেন কেবলেনাতিপীডিতম্ | স্নেহপ্রগাঢৈর্মতিমান্নিরূহৈঃ সমুপাচরেত্ ||৪৫||

কিঞ্চিদস্নিগ্ধোঽপি যথাঽঽস্থাপনবিশেষেণাস্থাপনীযস্তথা দর্শযন্নাহ- অস্নিগ্ধমপীত্যাদি|- অস্নিগ্ধং ঈষত্স্নিগ্ধং, নঞ্ ঈষদর্থে, অনুদরা কন্যেতি যথা| স্নেহপ্রগাঢৈঃ স্নেহবহুলৈঃ| এতেন প্রাক্ স্নেহবিধিবিরহিতে স্নিগ্ধমাস্থাপনং বিগম্যতে||৪৫||

Adhikarana 13 (46) · Śloka 46

অথ সম্যঙ্নিরূঢং তু বাতাদিষ্বনুবাসযেত্ | বিল্বযষ্ট্যাহ্বমদনফলতৈলৈর্যথাক্রমম্ ||৪৬||

নিরূহস্য পশ্চাত্কর্ম নির্দিশন্নাহ- অথেত্যাদি| বিল্বমূলমধুযষ্টীমদনফলক্বাথসিদ্ধৈস্তৈলৈঃ; কেচিত্তু বিল্বমূলাদীনাং কল্কৈরিতি বদন্তি; অন্যে তু বিল্বতৈলং- “শতাহ্বাফলবিল্বাখ্যৈস্তৈলং সিদ্ধং সমীরণে”- ইতি তন্ত্রান্তরোক্তং বিল্বাদিপঞ্চমূলেন বা সিদ্ধং তৈলং বিল্বতৈলম্| যষ্ট্যাহ্বতৈলং জীবনীযং, তচ্চ তন্ত্রান্তরে ‘দশমূলীবলারাস্না’ ইত্যাদিপাঠেনোক্তম্; অত্রাপি তদেব ভূতীকাদিদ্রব্যজীবনীযযুক্তমভিহিতং; ফলবিল্বতিবৃত্কৃষ্ণারাস্নাভূনিম্বদারুভিঃ সিদ্ধং তৈলং ফলতৈলং, কেচিত্তু মদনফলৈরণ্ডতৈলং ফলতৈলমিত্যাহুঃ||৪৬||

Adhikarana 14 (47) · Śloka 47

রাত্রৌ বস্তিং ন দদ্যাত্তু দোষোত্ক্লেশো হি রাত্রিজঃ | স্নেহবীর্যযুতঃ কুর্যাদাধ্মানং গৌরবং জ্বরম্ ||৪৭||

রাত্রৌ বস্তিদাননিষেধমাহ- রাত্রাবিত্যাদি| দোষোত্ক্লেশ ইতি যস্মাদ্রাত্রাবাহারবিদাহেন কালশৈত্যাত্ স্রোতোমুখসংবৃতত্বেন চ দোষধাতুমলেষু বিক্লেদনলক্ষণ উত্ক্লেশো ভবতি| অন্যত্রাপ্যুক্তম্- “অবিশুদ্ধে তু হৃদযে নিশি ক্লিন্নেষু ধাতুষু| বিদগ্ধেঽন্নরসে স্রোতঃসূপলিপ্তেষু দেহিনাম্||ব্যাপারেভ্যো নিবৃত্তানাং দোষোত্ক্লেশো ভবেদিতি”||৪৭||

Adhikarana 15 (48) · Śloka 48

অহ্নি স্থানস্থিতে দোষে বহ্নৌ চান্নরসান্বিতে | স্ফুটস্রোতোমুখে দেহে স্নেহৌজঃ পরিসর্পতি ||৪৮||

দিবা বস্তিপ্রদানগুণং সকারণং নির্দিশন্নাহ- অহ্নীত্যাদি| অহ্নি দিবা| বিবৃতস্রোতোমুখে শরীরে, তথা স্থানস্থিতেষু দোষেষু, তথা নিঃশেষপরিপক্বস্যান্নস্য রসেন বীর্যেণাগ্নিসংবর্ধিতেনোপচিতে পক্তুং সমর্থে চ বহ্নৌ, স্নেহৌজঃ স্নেহবীর্যং, শরীরং পরিসর্পতি অনুক্রামতি||৪৮||

Adhikarana 16 (49-50) · Śloka 50

পিত্তেঽধিকে কফে ক্ষীণে রূক্ষে বাতরুগর্দিতে | নরে রাত্রৌ তু দাতব্যং কালে চোষ্ণেঽনুবাসনম্ ||৪৯|| উষ্ণে পিত্তাধিকে বাঽপি দিবা দাহাদযো গদাঃ | সম্ভবন্তি যতস্তস্মাত্ প্রদোষে যোজযেদ্ভিষক্ ||৫০||

রাত্রাবপি প্রতিপ্রসবমুদ্দিশন্নাহ- পিত্তে ইত্যাদি| রাত্রিশব্দোঽত্র প্রথমপ্রহরবাচকঃ, প্রদোষে যোজযেদ্ভিষগিতি বক্ষ্যমাণবচনাত্| কুতঃ পুনরুষ্ণকালে পিত্তেঽধিকে বা দিবা ন দেযমিত্যাহ- উষ্ণ ইত্যাদি| প্রদোষশব্দাত্ সন্ধ্যাপরনিশানিবৃত্তিঃ||৪৯-৫০||

Adhikarana 17 (51) · Śloka 51

শীতে বসন্তে চ দিবা গ্রীষ্মপ্রাবৃড্ঘনাত্যযে | স্নেহ্যো দিনান্তে পানোক্তান্ দোষান্ পরিজিহীর্ষতা ||৫১||

ইদানীমহ্নি স্থানস্থিতে দোষ ইত্যাদিবাক্যৈর্যুক্তিপ্রাপ্তং কালনিযমং প্রকটযন্নাহ- শীত ইত্যাদি| পরিজিহীর্ষতা পরিহর্তুমিচ্ছতা||৫১||

Adhikarana 18 (52) · Śloka 52

অহোরাত্রস্য কালেষু সর্বেষ্বেবানিলাধিকম্ | তীব্রাযাং রুজি জীর্ণান্নং ভোজযিত্বাঽনুবাসযেত্ ||৫২||

বিশিষ্টাবস্থাযামস্যাপবাদমাহ- অহোরাত্রস্যেত্যাদি| কালেষু সর্বেষ্বিতি ‘তত্তত্কালবিরুদ্ধকৃত্রিমগুণোপধানং কৃত্বৈব’ ইতি শেষঃ | প্রাগশুদ্ধস্য কেবলবাতপীডিতস্য সর্বেষ্বপ্যহোরাত্রাবযবেষ্বনুবাসনমভিহিতম্, ইহ তু শুদ্ধস্যেতি ন পৌনরুক্ত্যম্||৫২||

Adhikarana 19 (53) · Śloka 53

ন চাভুক্তবতঃ স্নেহঃ প্রণিধেযঃ কথঞ্চন | শুদ্ধত্বাচ্ছূন্যকোষ্ঠস্য স্নেহ ঊর্ধ্বং সমুত্পতেত্ ||৫৩||

অভুক্তবতঃ প্রতিষেধমাহ- ন চেত্যাদি| স্নেহ ঊর্ধ্বং সমুত্পতেত্ সম্যগূর্ধ্বং গচ্ছেত্| ততশ্চাতিপীডিতবদ্ ব্যাপত্ স্যাত্| শুদ্ধত্বাদিত্যত্র সূক্ষ্মত্বাদিতি পঠিত্বা গযদাসঃ সূক্ষ্মমার্গানুসরণশীলত্বাত্তস্যেতি ব্যাখ্যানযতি||৫৩||

Adhikarana 20 (54-57) · Śloka 57

সদাঽনুবাসযেচ্চাপি ভোজযিত্বাঽঽর্দ্রপাণিনম্ | জ্বরং বিদগ্ধভুক্তস্য কুর্যাত্ স্নেহঃ প্রযোজিতঃ ||৫৪|| ন চাতিস্নিগ্ধমশনং ভোজযিত্বাঽনুবাসযেত্ | মদং মূর্চ্ছাং চ জনযেদ্ দ্বিধা স্নেহঃ প্রযোজিতঃ ||৫৫|| রূক্ষং ভুক্তবতো হ্যন্নং বলং বর্ণং চ হাপযেত্ | যুক্তস্নেহমতো জন্তুং ভোজযিত্বাঽনুবাসযেত্ ||৫৬|| যূষক্ষীররসৈস্তস্মাদ্যথাব্যাধি সমীক্ষ্য বা | যথোচিতাত্ পাদহীনং ভোজযিত্বাঽনুবাসযেত্ ||৫৭||

ভোজনোত্তরকালমেবানুবাসনমবিলম্বিতমাহ- সদেত্যাদি| ভোজনাদ্বিলম্বিতদানে দোষং দর্শযন্নাহ- জ্বরমিত্যাদি| কীদৃশমন্নং ভুক্তবন্তমনুবাসযেত্তদাহ- ন চেত্যাদি| হাপযেদিত্যত্র স্নেহঃ প্রযোজিত ইতি সম্বধ্যতে| যুক্তস্নেহম্ অল্পস্নেহম্| যথাব্যাধীতি রোগানতিক্রমেণ, রোগানুরূপমিতি যাবত্| অত্রৈবানুক্তমপ্যবেক্ষমাণ আহ- সমীক্ষ্য বেতি|- সম্যগীক্ষিত্বা ‘সাত্ম্যং দোষং চ’ ইতি শেষঃ| অত্র যূষো মুদ্গযূষঃ, স চ কৃতো গ্রাহ্যঃ; ক্ষীরং গব্যং, রসো মাংসরসঃ, তৈর্যথাসঙ্খ্যং কফপিত্তবাতপ্রত্যনীকৈর্ভোজযিত্বা, যথোচিতাত্ পাদহীনমিতি প্রাক্সংশুদ্ধস্য কৃতসংসর্জনস্য উচিতাদ্ভক্তাত্ পাদহীনমুত্তমমধ্যমমন্দাগ্নিবিশেষেণ পাদেন পাদাভ্যাং পাদৈর্বা হীনমিতি জ্ঞেযং, “অর্ধহীনং ত্রিভাগং বা ভোজযিত্বাঽনুবাসযেত্” ইতি মুনিনা প্রোক্তত্বাত্||৫৪-৫৭||

Adhikarana 21 (58-59) · Śloka 59

অথানুবাস্যং স্বভ্যক্তমুষ্ণাম্বুস্বেদিতং শনৈঃ | ভোজযিত্বা যথাশাস্ত্রং কৃতচঙ্ক্রমণং ততঃ ||৫৮|| বিসৃজ্য চ শকৃন্মূত্রং যোজযেত্ স্নেহবস্তিনা | প্রণিধানবিধানং তু নিরূহে সম্প্রবক্ষ্যতে ||৫৯||

অনুবাসনবিধিং দর্শযন্নাহ- অথানুবাস্যমিত্যাদি||৫৮-৫৯||

Adhikarana 22 (60-62) · Śloka 62

ততঃ প্রণিহিতস্নেহ উত্তানো বাক্শতং ভবেত্ | প্রসারিতৈঃ সর্বগাত্রৈস্তথা বীর্যং বিসর্পতি ||৬০|| তাডযেত্তলযোরেনং ত্রীংস্ত্রীন্ বারাঞ্ছনৈঃ শনৈঃ | স্ফিচোশ্চৈনং ততঃ শয্যাং ত্রীন্ বারানুত্ক্ষিপেত্ততঃ ||৬১|| এবং প্রণিহিতে বস্তৌ মন্দাযাসোঽথ মন্দবাক্ | স্বাস্তীর্ণে শযনে কামমাসীতাচারিকে রতঃ ||৬২||

প্রণিহিতস্নেহস্য পশ্চাত্কর্ম নির্দিশন্নাহ- তত ইত্যাদি| আতুরস্য করণীযমভিধায বৈদ্যস্য করণীযং নির্দিশন্নাহ- তাডযেদিত্যাদি| তলযোঃ হস্তপাদতলযোঃ, শনৈঃ শনৈস্ত্রীন্ ত্রীন্ বারান্ হন্যাত্ স্নেহশীঘ্রাগমননিষেধার্থং স্ফিচোশ্চৈনমিতি তাডযেদিতি সম্বন্ধঃ| স্ফিচোশ্চেতি চকারো ভিন্নক্রমে, তেন তাডযেদিত্যত্র দ্রষ্টব্যঃ| অতস্তলযোর্গৃহীতত্বাত্ কূর্পরে জানুনী চোত্ক্ষিপেদিত্যনুক্তো বৃদ্ধবৈদ্যব্যবহারঃ শুদ্ধো ভবতি| শয্যামুত্ক্ষিপেদিতি কাষ্ঠফলকাদিকৃতাং সহাতুরেণোর্ধ্বং নযেদিত্যর্থঃ, ‘শয্যাস্থমাতুরং স্ফিগ্দেশে’ ইত্যন্যে| আসীতাচারিকে রত ইতি ক্রোধাদীন্ বর্জযেদিত্যর্থঃ||৬০-৬২||

Adhikarana 23 (63-66) · Śloka 66

স তু সৈন্ধবচূর্ণেন শতাহ্বেন চ যোজিতঃ | দেযঃ সুখোষ্ণশ্চ তথা নিরেতি সহসা সুখম্ ||৬৩|| যস্যানুবাসনো দত্তঃ সকৃদন্বক্ষমাব্রজেত্ | অত্যৌষ্ণ্যাদতিতৈক্ষ্ণ্যাদ্বা বাযুনা বা প্রপীডিতঃ ||৬৪|| সবাতোঽধিকমাত্রো বা গুরুত্বাদ্বা সভেষজঃ | তস্যান্যোঽল্পতরো দেযো ন হি স্নিহ্যত্যতিষ্ঠতি ||৬৫|| বিষ্টব্ধানিলবিণ্মূত্রঃ স্নেহহীনেঽনুবাসনে | দাহক্লমপ্রবাহার্তিকরশ্চাত্যনুবাসনঃ ||৬৬||

সর্বস্নেহবস্তিদ্রব্যপূর্বকর্ম নির্দিশন্নাহ- স ইত্যাদি| স স্নেহঃ, তু পুনঃ, পক্বোঽপি সৈন্ধবশতপুষ্পাসমন্বিতো দেযঃ| মধ্যমবযস্কমাশ্রিত্য চূর্ণস্য মাত্রামাহ- “চূর্ণমাষঃ পলে স্নেহে সিন্ধুজন্ম শতাহ্বযোঃ”- ইতি| তস্যানুবাসনস্নেহস্য প্রণিধানমাত্রপ্রত্যাবৃত্ত্যাঽস্য নিদানপরিহারার্থং হেতুং পুনঃ করণীযং চ দর্শযন্নাহ- যস্যেত্যাদি| সকৃত্ একবারম্| অক্ষস্য যন্ত্রস্যানুপশ্চাদন্বক্ষম্| আব্রজেত্ আগচ্ছেত্| কুতঃ? অত্যৌষ্ণ্যাত্ উষ্ণগুণাতিরেকাত্| অতিতৈক্ষ্ণ্যাত্ অতিতীক্ষ্ণৈঃ সংস্কারকদ্রব্যৈরাহিতাত্| অনুচ্ছ্বাস্য বন্ধনাত্ বাযুনা প্রপীডিতঃ সবাতো বস্তিঃ স্যাত্; অতিমাত্রোঽতিভেষজশ্চ গুরুত্বাত্| তস্যান্যোঽল্পতর ইতি অন্যোঽত্যৌষ্ণ্যাদিগুণবিপরীতঃ, অল্পতরঃ প্রাচীনমাত্রাতঃ, প্রথমস্নেহেনৈব কিঞ্চিত্স্নিগ্ধত্বাত্| কুতঃ পুনরপি দেয ইত্যাহ- ন হি স্নিহ্যত্যতিষ্ঠতীতি; হি যতোঽতিষ্ঠতি স্নেহে ন স্নিহ্যতি নরঃ| স্নেহহীনেঽনুবাসনে বিষ্টব্ধানিলবিণ্মূত্রো ‘ভবতি’ ইতি শেষঃ| হীন ইতি হীনগুণমানে ইত্যর্থঃ| দাহক্লমপ্রবাহার্তিকরশ্চেতি চকারাদ্ধীনানুবাসিতবিষ্টব্ধানিলবিণ্মূত্রলিঙ্গবিপরীতাতিসৃষ্টানিলবিণ্মূত্রার্তিকরশ্চেতি সমুচ্চিনোতি| প্রবাহস্থানে পিপাসেতি কেচিত্ পঠন্তি||৬৩-৬৬||

Adhikarana 24 (67-69) · Śloka 69

সানিলঃ সপুরীষশ্চ স্নেহঃ প্রত্যেতি যস্য তু | ওষচোষৌ বিনা শীঘ্রং স সম্যগনুবাসিতঃ ||৬৭|| জীর্ণান্নমথ সাযাহ্নে স্নেহে প্রত্যাগতে পুনঃ | লঘ্বন্নং ভোজযেত্ কামং দীপ্তাগ্নিস্তু নরো যদি ||৬৮|| প্রাতরুষ্ণোদকং দেযং ধান্যনাগরসাধিতম্ | তেনাস্য দীপ্যতে বহ্নির্ভক্তাকাঙ্ক্ষা চ জাযতে ||৬৯||

যাদৃশঃ স্নেহঃ সম্যগনুবাসিতস্তমাহ- সানিল ইত্যাদি| সপুরীষশ্চেতি চকারেণ সমূত্রশ্চেত্যনুক্তং সমুচ্চীযতে| প্রত্যেতি প্রত্যাগচ্ছতি| ওষ ঈষদ্দাহঃ| চোষ আকৃষ্যমাণস্যেব দাহপ্রকারঃ| গযী তু- ওষচোষৌ বিনেতি দাহপিপাসে বিনেত্যর্থ ইত্যাহ| শীঘ্রমিতি ত্রিচতুরাদিযামাত্| অপরেদ্যুরাহারং নিযমযন্নাহ- জীর্ণান্নমিত্যাদি| জীর্ণান্নং পরিণতাহারং, সাযাহ্নগ্রহণং পূর্বাহ্ণভোজননিষেধার্থম্| লঘ্বন্নমিতি মাত্রালঘুং দ্রব্যলঘুং চ; কামং দীপ্তাগ্নিস্ত্বিতি দীপ্তাগ্নিশ্চেন্নরো ভবতি তদা কামং যথেষ্টং লঘ্বেব ভোজযেত্||৬৭-৬৯||

Adhikarana 25 (70) · Śloka 70

স্নেহবস্তিক্রমেষ্বেবং বিধিমাহুর্মনীষিণঃ |৭০|

ইদানীং শল্যতন্ত্রস্য কর্তা সুশ্রুতাচার্যঃ কাযচিকিত্সাপ্রধানস্য বস্তেরুক্তবিধৌ কাযচিকিত্সিতমনুমতমিতি দর্শযন্নাহ- স্নেহেত্যাদি| মনীষিণঃ স্নেহবস্তিক্রমবিদঃ কাযচিকিত্সকা ইত্যর্থঃ|৭০|-

Adhikarana 26 (70) · Śloka 71

অনেন বিধিনা ষড্ বা সপ্ত বাঽষ্টৌ নবৈব বা ||৭০|| বিধেযা বস্তযস্তেষামন্তরা তু নিরূহণম্ |৭১|

তমেব ক্রমং দীযমানাশেষবস্তিষূপদিশন্নাহ- অনেনেত্যাদি| ষড্বেত্যাদিসঙ্খ্যাবিকল্পা বক্ষ্যমাণস্নেহাদিধাত্বন্তরগতদোষাপেক্ষযা| তত্র দীযমানেষু স্নেহবস্তিষু তৃতীযে চতুর্থে পঞ্চমে বা স্নেহেঽগ্ন্যাদ্যপেক্ষযা স্নেহস্যোপরতিং কৃত্বা (স্নেহস্বেদাবধিকৃত্য ) সংসর্জনবিধানেনোপবৃংহিতবলায অন্তরা নিরূহণং দদ্যাদ্ দোষসঞ্চযসংশোধনায| তথা চ চরকঃ- “ত্রীন্ পঞ্চ বারাংশ্চতুরোঽথ ষড্বা বাতাধিকানামনুবাসনীযান্| স্নেহান্ প্রদত্বাঽঽশু ভিষগ্ বিদধ্যাত্ স্রোতোবিশুদ্ধ্যর্থমতো নিরূহান্” (চ.সি.অ.১) ইতি||৭০||-

Adhikarana 27 (71-74) · Śloka 74

দত্তস্তু প্রথমো বস্তিঃ স্নেহযেদ্বস্তিবঙ্ক্ষণৌ ||৭১|| সম্যগ্দত্তো দ্বিতীযস্তু মূর্ধস্থমনিলং জযেত্ | জনযেদ্বলবর্ণৌ চ তৃতীযস্তু প্রযোজিতঃ ||৭২|| রসং চতুর্থো রক্তং তু পঞ্চমঃ স্নেহযেত্তথা | ষষ্ঠস্তু স্নেহযেন্মাংসং মেদঃ সপ্তম এব চ ||৭৩|| অষ্টমো নবমশ্চাস্থি মজ্জানং চ যথাক্রমম্ | এবং শুক্রগতান্ দোষান্ দ্বিগুণঃ সাধু সাধযেত্ ||৭৪||

ইদানীং স্নেহবস্তেঃ প্রথমাদিদানেন কার্যং নির্দিশন্নাহ- দত্ত ইত্যাদি| বস্তিবঙ্ক্ষণাবিত্যুপলক্ষণমধঃকাযস্য| মূর্ধস্থমনিলং জযেদিতি মূর্ধস্থমূর্ধ্বকাযস্থং, জৈজ্জটাচাযস্তু আদিপদলোপাদ্ বস্তিমূর্ধস্থমনিলং জযেদিতি ব্যাখ্যানযতি| এবমনেন ক্রমেণ| শুক্রগতান্ দোষান্ ব্যাধিসমুদ্দেশীযোক্তান্ ক্লৈব্যাপ্রহর্ষজনকান্| দ্বিগুণঃ স্নেহবস্তিরষ্টাদশসঙ্খ্যঃ| সাধু সম্যগ্দত্তঃ সাধযেদিতি| বস্ত্যাদিদেশরসাদিধাতুস্নেহনমাশ্রিত্য দত্তস্নেহবস্তেঃ প্রথমাদিদানমাভিহিতম্| দোষসমাশ্রিতস্নেহদানং তন্ত্রান্তরাজ্জ্ঞেযম্| যথা- “একং ত্রীন্ বা বলাসে তু স্নেহবস্তীন্ প্রকল্পযেত্| পঞ্চ বা সপ্ত বা পিত্তে নবৈকাদশ বাঽনিলে” (বা.সূ.অ.১৯) ইতি||৭১-৭৪||

Adhikarana 28 (75-76) · Śloka 76

অষ্টাদশাষ্টাদশকান্ বস্তীনাং যো নিষেবতে | যথোক্তেন বিধানেন পরিহারক্রমেণ চ ||৭৫|| স কুঞ্জরবলোঽশ্বস্য জবৈস্তুল্যোঽমরপ্রভঃ | বীতপাপ্মা শ্রুতধরঃ সহস্রাযুর্নরো ভবেত্ ||৭৬||

এবমেতৈরষ্টাদশভিঃ স্নেহবস্তিভির্ধাতুগতদোষহরণমভিধায পুনঃ পুনরভ্যস্তৈরেতৈরেব বিশিষ্টং রসাযনফলং দর্শযন্নাহ- অষ্টাদশেত্যাদি| যথোক্তেনেতি ইহ চানন্তরাতিক্রান্তেন| পরিহারক্রমেণেতি আতুরোপদ্রবীযে বক্ষ্যমাণেন| কুঞ্জরবল ইতি উপচযশক্তিলক্ষণবলযুক্তঃ| অশ্বস্য জবৈস্তুল্য ইতি গজ ইবোপচিতধাতুরপি ক্রিযাবিশেষপ্রভাবাত্তুরঙ্গবত্তরস্বী| অমরবত্ প্রকর্ষেণ ভাতীতি অমরপ্রভঃ অত্যদ্ভুতবর্ণাদ্যুপেত ইত্যর্থঃ| বীতপাপ্মা ক্রিযাবিশেষপ্রভাবাদেব গতপ্রাক্তনজন্মকৃতসকলকল্মষঃ| শ্রুতধর ইতি চিত্তস্য শক্ত্যুত্কর্ষযুক্তঃ| সহস্রাযুরিতি শরীরেন্দ্রিযসত্ত্বাত্মসংযোগোত্কর্ষঃ| যদ্যপ্যত্র স্নেহবস্তীনামষ্টাদশকম্, অন্তরা তু নিরূহণমিতি পূর্ববাক্যাদনিযতনিরূহান্বিতোঽভিহিতস্তথাঽপি তন্ত্রান্তরদর্শনান্নিযতদ্বাদশযাপনাখ্যনিরূহোপেতো জ্ঞেযঃ, তাদৃশস্য চ তন্ত্রান্তরে কর্ম ইতি সঞ্জ্ঞা| তথাহি- “ত্রিংশন্মতাঃ কর্মতু বস্তযো হি কালস্ততোঽর্ধেন ততশ্চ যোগঃ| সান্বাসনা দ্বাদশ বৈ নিরূহাঃ প্রাক্ স্নেহ একঃ পরতস্তু পঞ্চ” (চ.সি.অ.১) ইতি; ততশ্চ “অষ্টাদশাষ্টাদশকান্ বস্তীনাং যো নিষেবতে”- ইত্যনেন কর্মবস্তীনষ্টাদশবারান্ যো নিষেবতে ইত্যর্থো গম্যতে| তথা শ্রীবাগ্ভটেনাপি কর্মকালযোগবস্তযোঽভিহিতাঃ| তথা চ- “প্রাক্ স্নেহ একঃ পঞ্চান্তে দ্বাদশাস্থাপনানি চ| সান্বাসনানি কর্মৈবং বস্তযস্ত্রিংশদীরিতাঃ||কালঃ পঞ্চদশৈকোঽত্র প্রাক্স্নেহোঽন্তে ত্রযস্তথা| ষট্ পঞ্চবস্ত্যন্তরিতাঃ, যোগোঽষ্টৌ বস্তযোঽত্র তু||ত্রযো নিরূহাঃ স্নেহাশ্চ স্নেহাবাদ্যন্তযোরুভৌ” (বা.সূ.অ.১৯) ইতি| যাপনবস্তিবিষযোঽযং গ্রন্থঃ, নিরূহা এব যাপনবস্তযঃ; অত এবৈকান্তরিতাঃ স্নেহাঃ, যাপনবস্তযো হি নাতিস্নিগ্ধরূক্ষা ‘নপুংসকবস্তযঃ’ ইত্যুচ্যন্তে| কর্মকালযোগসঞ্জ্ঞযা যথাসঙ্খ্যং বাতপিত্তকফহরো বস্তিপ্রযোগো জ্ঞেযঃ| গযদাসস্তু বলবদ্বিগ্রহাদিজনিতোপচযপূর্বকবাতাদিদোষপ্রকোপে বলীযসি ত্রিংশদ্বস্তযঃ, স্বস্থে পুনঃ কালৈকপ্রভাবজনিতবাতাদিপ্রকোপে মধ্যবলে পঞ্চদশ, কালেনাপ্যকৃতদোষকোপস্য স্বস্থস্যাপূর্ববৃষ্যত্বাদিলাভার্থমষ্টৌ||৭৫-৭৬||

Adhikarana 29 (77-78) · Śloka 78

স্নেহবস্তিং নিরূহং বা নৈকমেবাতিশীলযেত্ | স্নেহাদগ্নিবধোত্ক্লেশৌ নিরূহাত্ পবনাদ্ভযম্ ||৭৭|| তস্মান্নিরূঢোঽনুবাস্যো নিরূহ্যশ্চানুবাসিতঃ | নৈবং পিত্তকফোত্ক্লেশৌ স্যাতাং ন পবনাদ্ভযম্ ||৭৮||

দ্বযোরেকস্যাতিশীলননিষেধায দোষং দর্শযন্নাহ- স্নেহবস্তিমিত্যাদি| অন্যে ত্বেবং পঠন্তি- “স্যাতামগ্নিবধোত্ক্লেশাবত্যভ্যস্তেঽনুবাসনে| নিরূহসেবনাচ্চাপি ভবেযুর্বাতজা গদাঃ”- ইতি||৭৭-৭৮||

Adhikarana 30 (79) · Śloka 79

রূক্ষায বহুবাতায স্নেহবস্তিং দিনে দিনে | দদ্যাদ্বৈদ্যস্ততোঽন্যেষামগ্ন্যাবাধভযাত্ত্র্যহাত্ ||৭৯||

স্নেহবস্তেরবস্থাবিশেষেণ প্রতিদিনং বিধানমুদ্দিশন্নাহ- রূক্ষাযেত্যাদি||৭৯||

Adhikarana 31 (80) · Śloka 80

স্নেহোঽল্পমাত্রো রূক্ষাণাং দীর্ঘকালমনত্যযঃ | তথা নিরূহঃ স্নিগ্ধানামল্পমাত্রঃ প্রশস্যতে ||৮০||

অভ্যাসেঽপি স্নেহবস্তির্যথা নিরাপদস্তথোপদিশন্নাহ- স্নেহোঽল্পমাত্র ইত্যাদি| অর্ধহীনতা চতুর্ভাগাবশিষ্টতা বাঽল্পশব্দার্থঃ, তেন ষট্পলপ্রমাণাস্ত্রিপলপ্রমাণো বা স্নেহবস্তির্দীর্ঘকালমভ্যস্তো রূক্ষাণাং নিরত্যযঃ নির্গতব্যাপত্| তথা নিরূহোঽপি দীর্ঘকালং স্নিগ্ধানামল্পমাত্র এব পাদহীনোঽর্ধভাগহীনা বা শস্যতে, অনত্যযত্বাদিত্যর্থঃ||৮০||

Adhikarana 32 (81-85) · Śloka 85

অত ঊর্ধ্বং প্রবক্ষ্যামি ব্যাপদঃ স্নেহবস্তিজাঃ | বলবন্তো যদা দোষাঃ কোষ্ঠে স্যুরনিলাদযঃ ||৮১|| অল্পবীর্যং তদা স্নেহমভিভূয পৃথগ্বিধান্ | কুর্বন্ত্যুপদ্রবান্ স্নেহঃ, স চাপি ন নিবর্ততে ||৮২|| তত্র বাতাভিভূতে তু স্নেহে মুখকষাযতা | জৃম্ভা বাতরুজস্তাস্তা বেপথুর্বিষমজ্বরঃ ||৮৩|| পিত্তাভিভূতে স্নেহে তু মুখস্য কটুতা ভবেত্ | দাহস্তৃষ্ণা জ্বরঃ স্বেদো নেত্রমূত্রাঙ্গপীততা ||৮৪|| শ্লেষ্মাভিভূতে স্নেহে তু প্রসেকো মধুরাস্যতা | গৌরবং ছর্দিরুচ্ছ্বাসঃ কৃচ্ছ্রাচ্ছীতজ্বরোঽরুচিঃ ||৮৫||

স্নেহবস্তিব্যাপল্লক্ষণং সচিকিত্সিতং প্রতিপাদযিতুকামঃ স্নেহবস্তিব্যাপদ্ব্যাখ্যানপ্রতিজ্ঞামাহ- অত ঊর্ধ্বমিত্যাদি| দোষাভিভূতস্নেহব্যাপদাং সামান্যাং সম্প্রাপ্তিমুদ্দিশন্নাহ- বলবন্ত ইত্যাদি| স স্নেহঃ| ন নিবর্ততে ন নির্গচ্ছতীত্যর্থঃ||৮১-৮৫||

Adhikarana 33 (86) · Śloka 86

তত্র দোষাভিভূতে তু স্নেহে বস্তিং নিধাপযেত্ | যথাস্বং দোষশমনান্যুপযোজ্যানি যানি চ ||৮৬||

তত্র প্রতীকারমাহ- তত্র দোষাভিভূতে ইত্যাদি| বস্তিমিতি মারুতাদিহরকষাযং সংশোধনদ্রব্যাবাপং চ নিরূহং স্নেহস্যাপকর্ষণং দদ্যাত্| যানি চ দোষশমনানি তানি চ যথাস্বমুপযোজ্যানি| এতদ্যথাস্বং বস্তিদানমজীর্ণজ্বরাদিকামামাশযস্থদোষজাং ব্যাপদং পরিত্যজ্য জ্ঞেযম্| তত্রামান্বযে লঙ্ঘনাদিকমেব||৮৬||

Adhikarana 34 (87-92) · Śloka 92

অত্যাশিতেঽন্নাভিভবাত্ স্নেহো নৈতি যদা তদা | গুরুরামাশযঃ শূলং বাযোশ্চাপ্রতিসঞ্চরঃ ||৮৭|| হৃত্পীডা মুখবৈরস্যং শ্বাসো মূর্চ্ছা ভ্রমোঽরুচিঃ | তত্রাপতর্পণস্যান্তে দীপনো বিধিরিষ্যতে ||৮৮|| অশুদ্ধস্য মলোন্মিশ্রঃ স্নেহো নৈতি যদা পুনঃ | তদাঽঙ্গসদনাধ্মানে শ্বাসঃ শূলং চ জাযতে ||৮৯|| পক্বাশযগুরুত্বং চ তত্র দদ্যান্নিরূহণম্ | তীক্ষ্ণং তীক্ষ্ণৌষধৈরেব সিদ্ধং চাপ্যনুবাসনম্ ||৯০|| শুদ্ধস্য দূরানুসৃতে স্নেহে স্নেহস্য দর্শনম্ | গাত্রেষু সর্বেন্দ্রিযাণামুপলেপাঽবসাদনম্ ||৯১|| স্নেহগন্ধি মুখং চাপি কাসশ্বাসাবরোচকঃ | অতিপীডিতবত্তত্র সিদ্ধিরাস্থাপনং তথা ||৯২||

অশুদ্ধস্য অকৃতবিরেচননিরূহস্য| শুদ্ধস্য দূরানুসৃতে উদরানুসৃতে| উপলেপো মলবৃদ্ধিঃ| অবসাদনং গ্লানিঃ| অতিপীডিতবত্তত্র সিদ্ধিঃ সাধনং চিকিত্সিতমিত্যর্থঃ| তত্ পুনর্গলাবপীডাদিশীতসেকান্তং, তথাঽঽস্থাপনমবস্থাযাং স্নেহাপকর্ষকশোধনদ্রব্যকষাযগোমূত্রাবাপম্||৮৭-৯২||

Adhikarana 35 (93-94) · Śloka 94

অস্বিন্নস্যাবিশুদ্ধস্য স্নেহোঽল্পঃ সম্প্রযোজিতঃ | শীতো মৃদুশ্চ নাভ্যেতি ততো মন্দং প্রবাহতে ||৯৩|| বিবন্ধগৌরবাধ্মানশূলাঃ পক্বাশযং প্রতি | তত্রাস্থাপনমেবাশু প্রযোজ্যং সানুবাসনম্ ||৯৪||

অস্বিন্নস্যেত্যাদি| মন্দং প্রবাহতে মন্দবেগং প্রবর্ততে; তত্র যথাদোষপ্রত্যনীকমাস্থাপনমনুবাসনং চ তীক্ষ্ণং শীঘ্রং প্রযোক্তব্যম্||৯৩-৯৪||

Adhikarana 36 (95-96) · Śloka 96

অল্পং ভুক্তবতোঽল্পো হি স্নেহো মন্দগুণস্তথা | দত্তো নৈতি ক্লমোত্ক্লেশৌ ভৃশং চারতিমাবহেত্ ||৯৫|| তত্রাপ্যাস্থাপনং কার্যং শোধনীযেন বস্তিনা | (অন্বাসনং চ স্নেহেন শোধনীযেন শস্যতে ) ||৯৬||

অল্পমিত্যাদি| নৈতি ন প্রত্যাগচ্ছতি||৯৫-৯৬||

Adhikarana 37 (97) · Śloka 97

অহোরাত্রাদপি স্নেহঃ প্রত্যাগচ্ছন্ন দুষ্যতি | কুর্যাদ্বস্তিগুণাংশ্চাপি জীর্ণস্ত্বল্পগুণো ভবেত্ ||৯৭||

স্নেহস্তু অষ্টভিঃ কারণৈর্ন নিবর্তত ইতি অনিবৃত্তির্ব্যাপদুক্তা, তত্ কিযতঃ কালাদিত্যাহ- অহোরাত্রাদিত্যাদি| অপিশব্দাত্ত্রিচতুরাদিযামনিবৃত্তিস্তাবন্ন দুষ্যত্যেবাহোরাত্রাদপীত্যপিশব্দার্থঃ| ন দুষ্যতি ন দোষং করোতি, ন ব্যাপদ্যত ইত্যর্থঃ||৯৭||

Adhikarana 38 (98) · Śloka 98

যস্য নোপদ্রবং কুর্যাত্ স্নেহবস্তিরনিঃসৃতঃ | সর্বোঽল্পোবাঽঽবৃতো রৌক্ষ্যাদুপেক্ষ্যঃ স বিজানতা ||৯৮||

সর্বথাঽনিবৃত্তোঽপ্যবযবেন বা নিরুপদ্রবো ন ব্যাপদ্যত ইতি বোধযন্নাহ- যস্যেত্যাদি| আবৃতো রৌক্ষ্যাদিতি আভ্যাং বাশব্দঃ প্রত্যেকং সম্বন্ধনীযঃ; তেনাবৃতো বা রৌক্ষ্যাদ্বা স্নেহবস্তিরনিঃসৃত ইতি সম্বন্ধনীযম্| তত্রাবৃতো দোষত্রযেণ, অত্যশনেন, মলসঞ্চযেন বেত্যর্থঃ; রৌক্ষ্যাদিত্যনেন দূরানুসৃতো অস্বিন্নস্যাল্পং ভুক্তবতোঽল্পশ্চেতি ত্রিতযমপি গৃহীতম্, এষু ত্রিষ্বপ্যতিরৌক্ষ্যেণ বাযুরেব বিধারযতীতি; এবমষ্টৌ ব্যাপদো গৃহীতাঃ| উপেক্ষ্যঃ উপেক্ষণীযঃ, তদাঽঽকৃষ্ট্যাং যত্নং ন কুর্যাদিত্যর্থঃ||৯৮||

Adhikarana 39 (99) · Śloka 99

অনাযান্তং ত্বহোরাত্রাত্ স্নেহং সংশোধনৈর্হরেত্ |৯৯|

অনাযান্তমিত্যাদি| সোপদ্রবং তু স্নেহমহোরাত্রাদনাগচ্ছন্তং হরেত্ নির্হরেচ্ছোধনৈরেব বস্তিভিঃ|৯৯|-

Adhikarana 40 (99) · Śloka 99

স্নেহবস্তাবনাযাতে নান্যঃ স্নেহো বিধীযতে ||৯৯||

স্নেহবস্তাবনাযতে ইত্যাদি| অনাযাতে সোপদ্রবস্নেহে নিরূহবস্তিরেব শোধনার্থং দীযতে, নেতর ইত্যর্থঃ||৯৯||

Adhikarana 41 (100) · Śloka 100

ইত্যুক্তা ব্যাপদঃ সর্বা সলক্ষণচিকিত্সিতাঃ |১০০|

উক্তং হি নিযমযন্নাহ- ইত্যুক্তা ব্যাপদ ইত্যাদি| সর্বা ইতি ব্যাপদঃ সলক্ষণচিকিত্সিতা ‘স্নেহবস্তেশ্চ বক্ষ্যন্তে তচ্চিকিত্সিতে’ ইত্যনেন যাঃ প্রাগুদ্দিষ্টাস্তা অশেষা ইত্যর্থঃ|১০০|-

Adhikarana 42 (100-101) · Śloka 101

বস্তেরুত্তরসঞ্জ্ঞস্য বিধিং বক্ষ্যাম্যতঃ পরম্ ||১০০|| চতুর্দশাঙ্গুলং নেত্রমাতুরাঙ্গুলসম্মিতম্ | মালতীপুষ্পবৃন্তাগ্রং ছিদ্রং সর্ষপনির্গমম্ ||১০১||

উত্তরবস্তেরিদানীমবসরঃ- বস্তেরুত্তরসঞ্জ্ঞস্যেত্যাদি| তত্র নেত্রস্য প্রাক্ প্রমাণমাহ- চতুর্দশেত্যাদি| তচ্চ নেত্রং পুংসাং চতুর্দশাঙ্গুলং জাতীপুষ্পবৃন্তসদৃশাগ্রং সর্ষপচ্ছিদ্রং মধ্যসন্নিবিষ্টকর্ণিকং সুবর্ণাদিমযং মূলে দ্বিকর্ণিকং চ| উক্তং চ তন্ত্রান্তরে- “তত্ সৌবর্ণং রাজতং বা শ্লক্ষ্ণং গোপুচ্ছবত্ সমম্| অশ্মঘ্নকুন্দসুমনঃপুষ্পবৃন্তাগ্রমণ্ডলম্||সিদ্ধার্থকপ্রবেশাগ্রং মূলে মধ্যে সকর্ণিকম্| চতুর্দশাঙ্গুলং নেত্রং তত্র কার্যং বিজানতা”- ইতি| সপ্তাঙ্গুলং চ পরমং প্রণিধানং; তথা চ ক্ষারপাণিঃ,- “অঙ্গুলান্যথ চত্বারি পঞ্চ ষট্ সপ্ত বা তথা| সপ্তাঙ্গুলং পরং নেত্রং প্রণিধেযং ভিষগ্বিদা||হিংস্যাদ্বস্তিং নরং চেহ প্রমাণাদধিকং ততঃ”- ইতি||১০০-১০১||

Adhikarana 43 (102) · Śloka 102

স্নেহপ্রমাণং পরমং প্রকুঞ্চশ্চাত্র কীর্তিতঃ | পঞ্চবিংশাদধো মাত্রাং বিদধ্যাদ্বুদ্ধিকল্পিতাম্ ||১০২||

নেত্রমানমভিধায স্নৈহিকনৈরূহিকভেদাভ্যাং দ্বিবিধে উত্তরবস্তৌ বক্তব্যে স্নৈহিকস্য প্রাক্ প্রযোজ্যত্বাত্ স্নেহমানমাহ- স্নেহপ্রমাণমিত্যাদি| অত্রেতি সুশ্রুতমতে| প্রকুঞ্চঃ পলং, পঞ্চবিংশাদধ ইত্যাদি বক্ষ্যমাণবাক্যাত্ পঞ্চবিংশদ্বর্ষমারভ্য স্নেহপ্রমাণং পরমং প্রকীর্তিতম্| চরকাচার্যঃ পুনরর্ধপলম্| পঞ্চবিংশাদিত্যাদি| অধঃ অর্বাক্| মাত্রাং বুদ্ধিকল্পিতামিতি| অযমর্থঃ- সাংবত্সরিকবালকে স্নেহপলস্য পঞ্চবিংশতিতমমংশমারভ্য দ্বিসাংবত্সরিকাদৌ প্রতিবত্সরং পঞ্চবিংশতিতমস্যাংশস্য বৃদ্ধিং বিদধ্যাদ্ যাবত্ পঞ্চবিংশতিবার্ষিকস্য পলমিতি||১০২||

Adhikarana 44 (103) · Śloka 104

নিবিষ্টকর্ণিকং মধ্যে, নারীণাং চতুরঙ্গুলে | মূত্রস্রোতঃপরীণাহং মুদ্গবাহি দশাঙ্গুলম্ ||১০৩|| মেঢ্রাযামসমং কেচিদিচ্ছন্তি খলু তদ্বিদঃ |১০৪|

পুরুষাণাং নেত্রাদিমানমুক্ত্বা, ইদানীং পুরুষনেত্রেঽনুক্তং কর্ণিকানিবেশস্থানং, তথা স্ত্রীণাং নেত্রকর্ণিকাস্থানং পরিণাহাযামৈর্দর্শযন্নাহ- নিবিষ্টকর্ণিকং মধ্যে ইতি; পুরুষস্য ‘নেত্রম্’ ইতি বাক্যশেষঃ| নারীণাং চতুরঙ্গুলে ইতি নিবিষ্টকর্ণিকমিত্যত্রাপি সম্বন্ধনীযম্| স্থৌল্যমাহ- মূত্রস্রোতঃপরীণাহং মূত্রস্রোতঃস্থৌল্যম্| মুদ্গবাহীতি অন্তশ্ছিদ্রমানম্ | দশাঙ্গুলমিতি দৈর্ধ্যেণ| মেঢ্রাযামসমমিতি অপত্যমার্গে পুরুষেন্দ্রিযস্থূলং নেত্রং কিঞ্চিদধিকচ্ছিদ্রং চ||১০৩||-

Adhikarana 45 (104-105) · Śloka 105

তাসামপত্যমার্গে তু নিদধ্যাচ্চতুরঙ্গুলম্ ||১০৪|| দ্ব্যঙ্গুলং মূত্রমার্গে তু কন্যানাং ত্বেকমঙ্গুলম্ | বিধেযং চাঙ্গুলং তাসাং বিধিবদ্ধক্ষ্যতে যথা ||১০৫||

নেত্রমানমভিধায মার্গভেদেন প্রণিধানবিধানমাহ- তাসামিত্যাদি| তাসাং প্রসূতানামপ্রসূতানাং চ প্রাপ্তগর্ভগ্রহণকালানাং গর্ভাশযশোধনার্থমপত্যমার্গে চতুরঙ্গুলং নিদধ্যাত্; মূত্রকৃচ্ছ্রাদিবিকারেষু তাসামুভযরূপাণামপি মূত্রবর্ত্মনি দ্ব্যঙ্গুলং নিদধ্যাত্| কন্যানামপ্রাপ্তদ্বাদশবর্ষাণাং মূত্রকৃচ্ছ্রাদৌ মূত্রবর্ত্মনি একমঙ্গুলং নিদধ্যাত্||১০৪-১০৫||

Adhikarana 46 (106) · Śloka 106

স্নেহস্য প্রসৃতং চাত্র স্বাঙ্গুলীমূলসম্মিতম্ | দেযং প্রমাণং পরমমর্বাগ্ বুদ্ধিবিকল্পিতম্ ||১০৬||

স্ত্রীণামুত্তরবস্তৌ স্নেহমানমাহ- স্নেহস্যেত্যাদি| অত্র স্ত্রীবিষযে| স্বাঙ্গুলীমূলসম্মিতঃ প্রসৃতো দেযঃ; তচ্চ পরমমুত্তমং প্রমাণং সর্ববযোঽবস্থাসু বলীযসি রোগে; মধ্যহীনবলরোগে তু সর্বাস্বপি বযোঽবস্থাসূত্তমপ্রমাণাদর্বাঙ্মধ্যং হীনং চ বুদ্ধ্যা বিকল্পিতং মানং জ্ঞেযম্| গর্ভাশযশোধনার্থং চ স্নেহমাত্রাদ্বৈগুণ্যমগ্রে বক্ষ্যতি||১০৬||

Adhikarana 47 (107) · Śloka 108

ঔরভ্রঃ শৌকরো বাঽপি বস্তিরাজশ্চ পূজিতঃ | তদলাভে প্রযুঞ্জীত গলচর্ম তু পক্ষিণাম্ ||১০৭|| (তস্যালাভে দৃতেঃ পাদো মৃদুচর্ম ততোঽপি বা ) |১০৮|

ঔরভ্রো মেষস্য, শৌকরো বন্যশূকরস্য, আজঃ ছাগস্য, বস্তিঃ পূজিতঃ||১০৭||-

Adhikarana 48 (108-113) · Śloka 114

অথাতুরমুপস্নিগ্ধং স্বিন্নং প্রশিথিলাশযম্ ||১০৮|| যবাগূং সঘৃতক্ষীরাং পীতবন্তং যথাবলম্ | নিষণ্ণমাজানুসমে পীঠে সোপাশ্রযে সমম্ ||১০৯|| স্বভ্যক্তবস্তিমূর্ধানং তৈলেনোষ্ণেন মানবম্ | ততঃ সমং স্থাপযিত্বা নালমস্য প্রহর্ষিতম্ ||১১০|| পূর্বং শলাকযাঽন্বিষ্য ততো নেত্রমনন্তরম্ | শনৈঃ শনৈর্ঘৃতাভ্যক্তং বিদধ্যালানি ষট্ ||১১১|| মেঢ্রযামসমং কেচিদিচ্ছন্তি প্রণিধানকম্ | ততোঽবপীডযেদ্বস্তিং শনৈর্নেত্রং চ নির্হরেত্ ||১১২|| ততঃ প্রত্যাগতস্নেহমপরাহ্ণে বিচক্ষণঃ | ভোজযেত্ পযসা মাত্রাং যূষেণাথ রসেন বা ||১১৩|| অনেন বিধিনা দদ্যাদ্বস্তীংস্ত্রীংশ্চতুরোঽপি বা |১১৪|

পরং প্রণিধানমাহ- অথাতুরমিত্যাদি| স্নৈহিকস্যোত্তরবস্তেঃ সঘৃতক্ষীরযবাগূভোজনং পূর্বকর্ম, পযোযূষরসৈরপরাহ্ণে ভোজনং পশ্চাত্কর্ম; তেন পূর্বাহ্ণে চোত্তরবস্তিপ্রণিধানম্| প্রশিথিলাশযমিতি বাতমূত্রপুরীষনির্গমেন| সোপাশ্রযে সাবষ্টম্ভকে, সমং যথা স্যাদেবং নিষণ্ণম্| স্বভ্যক্তেত্যাদি স্বভ্যক্তো বস্তের্মূত্রাধারস্য মূর্ধা উপরিতনভাগো যস্য তং তথা, সমম্ ঋজুম্| নালং মেহনম্| প্রহর্ষিতং স্তব্ধম্| অঙ্গুলানি ষডিতি মধ্যমপ্রমাণমেঢ্রস্য মধ্যমং প্রণিধানমানমবেক্ষ্য| নিবিষ্টকর্ণিকং মধ্য ইতি সূত্রমুত্তমং প্রণিধানমবেক্ষ্য| তথা চ প্রাগুক্তং- সপ্তাঙ্গুলং পরং নেত্রমিত্যাদি| একীযমতেন প্রণিধানমাহ- মেঢ্রাযামসমমিত্যাদি| পযোযূষরসৈর্ভোজনং কফপিত্তবাতাপেক্ষযা| অনেন বিধিনেতি অনন্তরোক্তেন| বস্তীংস্ত্রিশ্চতুরোঽপি বেতি| অযমর্থঃ- প্রাগ্দত্তস্নেহপ্রত্যাগমনে কালান্তরিতস্তদহরেব ত্রিশ্চতুর্বা মাত্রাং বর্ধযিত্বা স্নেহো দেযঃ, এবং ত্রীণি দিনানি স্নৈহিকমুত্তরবস্তিং দত্ত্বা ত্র্যহমেব বিশ্রম্য পুনস্ত্র্যহং দদ্যাদাব্যাধিনিবৃত্তেঃ| তথাচ বাগ্ভটঃ- “বস্তীংস্ত্রিরাত্রমেবং চ স্নেহমাত্রাং বিবর্ধযেত্| ত্র্যহমেব চ বিশ্রম্য প্রণিদধ্যাত্ পুনস্ত্র্যহম্” (বা.সূ. অ.১৯) ইতি||১০৮-১১৩||

Adhikarana 49 (114-115) · Śloka 115

ঊর্ধ্বজান্বৈ স্ত্রিযৈ দদ্যাদুত্তানাযৈ বিচক্ষণঃ ||১১৪|| সম্যক্ প্রপীডযেদ্যোনিং দদ্যাত্ সুমৃদুপীডিতম্ | ত্রিকর্ণিকেন নেত্রেণ দদ্যাদ্যোনিমুখং প্রতি ||১১৫||

স্ত্রীণামুত্তরবস্তিপ্রণিধানে বিশেষমাহ- ঊর্ধ্বেত্যাদি| ‘বিচক্ষণঃ’ ইত্যত্র কেচিত্ ‘সমাহিন’ ইতি পঠন্তি; কামসঙ্কল্পরহিতত্বেনাঽচলিতচিত্তপ্রকৃতিরিত্যর্থঃ, ‘বস্তিং দদ্যাত্’ ইতি শেষঃ| ত্রিকর্ণিকেন নেত্রেণেত্যনেনাত্রাপি বস্তিনিবন্ধনং কর্ণিকাদ্বযমিতি সূচযতি||১১৪-১১৫||

Adhikarana 50 (116) · Śloka 116

গর্ভাশযবিশুদ্ধ্যর্থং স্নেহেন দ্বিগুণেন তু |১১৬|

কার্যবিশেষে দ্বিগুণস্নেহেন স্নেহপ্রকারমাহ - গর্ভাশযেত্যাদি| স্নেহেন দ্বিগুণেন তু পূর্বোক্তবদত্রাঙ্গুলীমূলসম্মিতপ্রসৃত্যপেক্ষযা দ্বিগুণেনেতি জ্ঞেযম্|১১৬|-

Adhikarana 51 (116) · Śloka 117

ক্বাথপ্রমাণং প্রসৃতং, স্ত্রিযা দ্বিপ্রসৃতং ভবেত্ ||১১৬|| কন্যেতরস্যাঃ, কন্যাযাস্তদ্বদ্বস্তিপ্রমাণকম্ |১১৭|

স্নৈহিকোত্তরবস্তেঃ প্রমাণং নির্দিশ্যাবসরপ্রাপ্তং নিরূহোত্তরবস্তিপ্রমাণমাহ- ক্বাথপ্রমাণমিত্যাদি| ক্বাথপ্রমাণং প্রসৃতমিতি ‘পুরুষস্য’ ইতি শেষঃ, তেনাতুরপুরুষস্য যথাবযঃ স্বহস্তসম্মিতং প্রসৃতং মাত্রাপ্রমাণম্| স্ত্রিযা ইত্যাদি প্রসূতাযাঃ প্রসূতিরহিতাযা বা গর্ভগ্রহণযোগ্যাযা গর্ভাশযশোধনার্থম্| প্রসূতানামপ্রসূতানাং চ বস্তিশোধনার্থমাহ- কন্যেতরস্যা ইত্যাদি| কন্যেতরস্যা অপ্রসূতাযাঃ প্রসূতাযা বা গর্ভগ্রহণাযোগ্যাযাঃ| কন্যাযা অপ্রাপ্তদ্বাদশবর্ষাযাঃ| তদ্বদিতি পুরুষবদ্ যথাবযঃ স্বহস্তসম্মিতং প্রসৃতং প্রমাণং বস্তিশোধনার্থং, নতু দ্বিপ্রসৃতং তস্য গর্ভাশযশোধনার্থং বিহিতত্বাদিতি||১১৬||-

Adhikarana 52 (117-122) · Śloka 123

অপ্রত্যাগচ্ছতি ভিষগ্ বস্তাবুত্তরসঞ্জ্ঞিতে ||১১৭|| ভূযো বস্তিং নিদধ্যাত্তু সংযুক্তং শোধনৈর্গণৈঃ | গুদে বর্তিং নিদধ্যাদ্বা শোধনদ্রব্যসম্ভৃতাম্ ||১১৮|| প্রবেশযেদ্বা মতিমান্ বস্তিদ্বারমথৈষণীম্ | পীডযেদ্বাঽপ্যধো নাভের্বলেনোত্তরমুষ্টিনা ||১১৯|| আরগ্বধস্য পত্রৈস্তু নির্গুণ্ড্যাঃ স্বরসেন চ | কুর্যাদ্গোমূত্রপিষ্টেষু বর্তীর্বাঽপি সসৈন্ধবাঃ ||১২০|| মুদ্গৈলাসর্ষপসমাঃ প্রবিভজ্য বযাংসি তু | বস্তেরাগমনার্থায তা নিদধ্যাচ্ছলাকযা ||১২১|| আগারধূমবৃহতীপিপ্পলীফলসৈন্ধবৈঃ | কৃতা বা শুক্তগোমূত্রসুরাপিষ্টৈঃ সনাগরৈঃ ||১২২|| অনুবাসনসিদ্ধিং চ বীক্ষ্য কর্ম প্রযোজযেত্ |১২৩|

অনাগচ্ছতি স্নেহে প্রত্যাগমনোপাযমাহ- অপ্রত্যাগচ্ছতীত্যাদি| অত্র গযদাসঃ স্নৈহিকস্যোত্তরবস্তের্ভালুকিদর্শনান্মাত্রাশতাদূর্ধ্বং প্রত্যাগমনকালং বর্ণযতি| তথাহি ভালুকিঃ,- “বস্তির্মাত্রাশতাদূর্ধ্বং প্রত্যাগচ্ছতি, অনাগচ্ছতি বর্তিং পাযৌ নালে প্রদাপযেত্- ” ইতি| দৃঢবলস্তু প্রত্যাগমনকালমনুবাসনোত্তরবস্তেরিতি মন্যতে| তথা চ তদ্বাক্যম্- “প্রত্যাগতে দ্বিতীযং চ তৃতীযং চৈব দাপযেত্| অনাগচ্ছন্নুপেক্ষ্যস্তু রজনীম্- ” ইত্যাদি| ‘তত্রোপদ্রবকারী মাত্রাশতাদূর্ধ্বং স্নেহো যত্নেনানযিতব্যঃ, নত্বনুবাসনবত্ত্রিযামাত্পরত ইতি, অনাগচ্ছন্নিরুপদ্রবশ্চাহোরাত্রমুপেক্ষণীয ইতি মতদ্বযমপ্যবস্থাবশেন প্রমাণযিতব্যম্| এবংবিধে চ প্রত্যাগমনকালে অনাগচ্ছতি স্নৈহিকে নিরূহোত্তরবস্তিঃ সংশোধনৈস্ত্রিবৃদাদিভির্বস্তিশোধনৈশ্চ তৃণপঞ্চমূলাদিগণদ্রব্যৈঃ ক্বাথরূপৈর্যুক্তং বস্তিং প্রসৃতিমাত্রং মূত্রমার্গেণ, স্ত্রিযা দ্বিপ্রসৃতিমাত্রমপত্যমার্গেণ স্নেহাপকর্ষণং দদ্যাত্| গুদ ইত্যাদি শোধনদ্রব্যসম্ভৃতামিতি বিরেচনদ্রব্যনির্মিতাম্| এষণীং শলাকাম্| যচ্চাবশেষং তদ্বলেন সামর্থ্যেন, উত্তরমুষ্টিনা মুষ্টেরগ্রভাগেন| গুদবর্তিমভিধায মূত্রমার্গে বযোভেদেন দর্শযন্নাহ- আরগ্বধেত্যাদি| তা বর্তীঃ তন্ত্রান্তরদর্শনাচ্ছাযাশুষ্কা ঘৃতাক্তাঃ স্রোতসি মূত্রমার্গে শলাকযা নিদধ্যাত্ প্রবেশযেত্ স্নেহাপকর্ষণার্থং, অপত্যমার্গে স্থূলা বর্তিশ্চতুরঙ্গুলা প্রণিধেযা| প্রকারান্তরেণ বর্তিমাহ- আগারেত্যাদি| ফলং মদনফলম্| কৃতা বর্তীঃ মুদ্গাদিপ্রমাণাঃ| শুক্তং চুক্রম্| অনুবাসনচিকিত্সাবেক্ষণমাহ- অনুবাসনসিদ্ধিমিত্যাদি| স্নৈহিকোত্তরবস্তিদানানন্তরং যদনুক্তং স্ফিক্তাডনাদিকং কর্ম তদনুবাসনচিকিত্সিতং বীক্ষ্য প্রযোজযেত্; তথা চ বাগ্ভটঃ,- “পীডিতেঽন্তর্গতে স্নেহে স্নেহবস্তিক্রমো হিতঃ” (বা.সূ. অ.১৯) ইতি||১১৭-১২২||

Adhikarana 53 (123-124) · Śloka 124

শর্করামধুমিশ্রেণ শীতেন মধুকাম্বুনা ||১২৩|| দহ্যমানে তদা বস্তৌ দদ্যাদ্বস্তিং বিচক্ষণঃ | ক্ষীরবৃক্ষকষাযেণ পযসা শীতলেন চ ||১২৪||

তত্র স্নেহপ্রদানকুপিতপিত্তেনানির্গচ্ছতঃ স্নেহস্য নির্গমনার্থং দত্ততীক্ষ্ণোষ্ণনিরূহকুপিতপিত্তেন বা দহ্যমানে বস্তৌ বস্তিবিশেষমুপদিশন্নাহ- শর্করেত্যাদি| শর্করামধুমিশ্রেণেতি ত্রিষ্বপি যোগেষু যোজনীযমিতি||১২৩-১২৪||

Adhikarana 54 (125-126) · Śloka 126

শুক্রং দুষ্টং শোণিতং চাঙ্গনানাং পুষ্পোদ্রেকং তস্য নাশং চ কষ্টম্ | মূত্রাঘাতান্মূত্রদোষান্ প্রবৃদ্ধান্ যোনিব্যাধিং সংস্থিতিং চাপরাযাঃ ||১২৫|| শুক্রোত্সেকং শর্করামশ্মরীং চ শূলং বস্তৌ বঙ্ক্ষণে মেহনে চ | ঘোরানন্যান্ বস্তিজাংশ্চাপি রোগান্ হিত্বা মেহানুত্তরো হন্তি বস্তিঃ ||১২৬||

ইদানীমুত্তরবস্তের্বিষযং দর্শযন্নাহ- শুক্রমিত্যাদি| পুষ্পং ঋতুস্তস্যোদ্রেকোঽকালপ্রবৃত্তিঃ, কষ্টং কষ্টসাধ্যম্| মূত্রাঘাতান্ মূত্রাবরোধান্| মূত্রদোষান্ মূত্রকৃচ্ছ্রান্| সংস্থিতিং নির্গমরোধমিত্যর্থঃ| অপরা গর্ভাবরণবিশেষঃ, যস্যা ‘উল্ব’ ইতি লোকে প্রসিদ্ধিঃ| অশেষবস্তিরোগপরিহারার্থমাহ- বস্তিজাংশ্চাপি রোগানিতি||১২৫-১২৬||

Adhikarana 55 (127) · Śloka 127

সম্যগ্দত্তস্য লিঙ্গানি ব্যাপদঃ ক্রম এব চ | বস্তেরুত্তরসঞ্জ্ঞস্য সমানং স্নেহবস্তিনা ||১২৭||

ক্রমঃ চিকিত্সিতমিত্যর্থঃ||১২৭||

Adhikarana puShpikA · Śloka 37

ইতি সুশ্রুতসংহিতাযাং চিকিত্সাস্থানেঽনুবাসনোত্তরবস্তিচিকিত্সিতং নাম সপ্তত্রিংশোঽধ্যাযঃ ||৩৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে সপ্তত্রিংশত্তমোঽধ্যাযঃ||৩৭||