3. bhagnacikitsitam

Adhikarana 1 (1-2) · Śloka 2

অথাতো ভগ্নানাং চিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3) · Śloka 3

অল্পাশিনোঽনাত্মবতো জন্তোর্বাতাত্মকস্য চ | উপদ্রবৈর্বা জুষ্টস্য ভগ্নং কৃচ্ছ্রেণ সিধ্যতি ||৩||

তত্র প্রথমং ভগ্নস্য কৃচ্ছ্রসাধ্যত্বমাহ- অল্পাশিন ইত্যাদি| অনাত্মবতঃ অজিতেন্দ্রিযস্য অপথ্যরতস্যেত্যর্থঃ| বাতাত্মকস্য বাতপ্রকৃতেঃ| উপদ্রবৈরিতি উপদ্রবা জ্বরাধ্মানমূত্রপুরীষসঙ্গাদযঃ| অমুং পাঠং জেজ্জটো ন মন্যতে; গযী তু মন্যত ইত্যস্মাভিরঙ্গীকৃতঃ||৩||

Adhikarana 3 (4) · Śloka 4

লবণং কটুকং ক্ষারমম্লং মৈথুনমাতপম্ | ব্যাযামং চ ন সেবেত ভগ্নো রূক্ষান্নমেব চ ||৪||

ইদানীমসেব্যানাহ- লবণমিত্যাদি||৪||

Adhikarana 4 (5) · Śloka 5

শালির্মাংসরসঃ ক্ষীরং সর্পির্যূষঃ সতীনজঃ | বৃংহণং চান্নপানং স্যাদ্দেযং ভগ্নায জানতা ||৫||

ইদানীং সেব্যানাহ- শালিরিত্যাদি| ক্ষীরং ব্রণে সামান্যোক্ত্যা নিষিদ্ধমপি ভগ্নেঽপবাদত্বাত্ প্রযুজ্যতে; অন্যে পুনরব্রণে এব ভগ্নে ক্ষীরং দাতব্যমিত্যাহুঃ; কেচিত্তু ভগ্নে ক্ষীরদানং বিরুদ্ধং, নবধান্যাদিবর্গপঠিতত্বেন পাকপূযজনকত্বাদিত্যাহুঃ; কেচিত্ ক্ষীরসর্পিরিতি চ সমস্তমেকপদং পঠন্তি, ব্যাখ্যানযন্তি চ- ক্ষীরাদুত্থিতং সর্পিঃ ক্ষীরসর্পিরিতি| সতীনো বর্তুলকলাযঃ, সতীনানাং বাতকরাণামপি সর্পিরাদিসংস্কৃতত্বাদ্যূষো ভগ্নে যুজ্যত এব| বৃংহণং দেহবৃদ্ধিকরম্||৫||

Adhikarana 5 (6) · Śloka 6

মধূকোদুম্বরাশ্বত্থপলাশককুভত্বচঃ | বংশসর্জবটানাং চ কুশার্থমুপসংহরেত্ ||৬||

ভগ্নব্রণবন্ধনদ্রব্যং কুশা, তদর্থং দ্রব্যং নির্দিশন্নাহ- মধূকোদুম্বরাশ্বত্থেত্যাদি| উপসংহরেত্ একত্র কুর্যাত্| বংশসর্জবটানাং চেতি ‘ত্বচ’ ইতি শেষঃ| কুশাশব্দেন ভগ্নবন্ধনার্থং বংশবেত্রাদিকং প্রোচ্যতে; অন্যে কুশ্যমিতি পঠন্তি, তত্রাপি স এবার্থঃ||৬||

Adhikarana 6 (7) · Śloka 7

আলেপনার্থং মঞ্জিষ্ঠাং মধুকং রক্তচন্দনম্ | শতধৌতঘৃতোন্মিশ্রং শালিপিষ্টং চ সংহরেত্ ||৭||

ভগ্নে লেপনদ্রব্যাণি নির্দিশন্নাহ- আলেপনার্থমিত্যাদি| সংহরেত্ একত্র কুর্যাত্| শালিপিষ্টমিত্যস্য স্থানে ‘অম্লপেষিতমাহরেত্’ ইতি কেচিত্ পঠন্তি, অম্লপেষিতং কাঞ্জিকপিষ্টম্||৭||

Adhikarana 7 (8) · Śloka 9

সপ্তাহাদথ সপ্তাহাত্ সৌম্যেষ্বৃতুষু বন্ধনম্ | সাধারণেষু কর্তব্যং পঞ্চমে পঞ্চমেঽহনি ||৮|| আগ্নেযেষু ত্র্যহাত্ কুর্যাদ্ভগ্নদোষবশেন বা |৯|

ভগ্নব্রণবিশেষে বন্ধনকালাবধিং নির্দিশন্নাহ- সপ্তাহাদিত্যাদি||৮||-

Adhikarana 8 (9-10) · Śloka 10

তত্রাতিশিথিলং বদ্ধে সন্ধিস্থৈর্যং ন জাযতে ||৯|| গাঢেনাপি ত্বগাদীনাং শোফো রুক্ পাক এব চ | তস্মাত্ সাধারণং বন্ধং ভগ্নে শংসন্তি তদ্বিদঃ ||১০||

ইদানীং ত্রিবিধো বন্ধো ব্রণে নির্দিষ্টো গাঢঃ, সমঃ, শিথিল ইতি; তত্র ভগ্নেষু গাঢশিথিলযোর্বন্ধযোর্দোষাবহত্বাত্ সমমেব বন্ধং নির্দিশন্নাহ- তত্রাতিশিথিলমিত্যাদি| সন্ধিস্থৈর্যং সন্ধীনাং দৃঢতা ||৯-১০||

Adhikarana 9 (11) · Śloka 11

ন্যগ্রোধাদিকষাযং তু সুশীতং পরিষেচনে | পঞ্চমূলীবিপক্বং তু ক্ষীরং কুর্যাত্ সবেদনে ||১১||

তস্য পিত্তপ্রকৃতৌ কালে চোষ্ণে পরিষেকং নির্দিশন্নাহ- ন্যগ্রোধেত্যাদি| সন্ধানার্থং পাকাদিপরিহারার্থং চ| বাতোত্তরে সপিত্তে সশূলে চ পরিষেকান্তরমাহ- পঞ্চমূলীত্যাদি| পঞ্চমূলী স্বল্পা, তস্যাঃ শীতবীর্যত্বাত্||১১||

Adhikarana 10 (12) · Śloka 12

সুখোষ্ণমবচার্যং বা চক্রতৈলং বিজানতা |১২|

বাতকফপ্রকৃতৌ সশূলে সশীতে চ কালে চক্রতৈলমাহ- সুখোষ্ণমিত্যাদি| অবচার্যং ‘পরিষেকে’ ইতি শেষঃ| চক্রতৈলং সদ্যঃপীডিতোদ্ধৃতমেকে বদন্তি, অন্যে পুনরণুতৈলকল্পেন গৃহীতমপক্বং তৈলং চক্রতৈলমাহুঃ|১২|-

Adhikarana 11 (12) · Śloka 13

বিভজ্য কালং দোষং চ দোষঘ্নৌষধসংযুতম্ ||১২|| পরিষেকং প্রদেহং চ বিদধ্যাচ্ছীতমেব চ |১৩|

বিভজ্য কালমিত্যাদি| শীতমেব চেতি চকারাদ্দোষাদ্যপেক্ষযোষ্ণমপি||১২||-

Adhikarana 12 (13) · Śloka 14

গৃষ্টিক্ষীরং সসর্পিষ্কং মধুরৌষধসাধিতম্ ||১৩|| শীতলং লাক্ষযা যুক্তং প্রাতর্ভগ্নঃ পিবেন্নরঃ |১৪|

ভগ্নে আভ্যন্তরমৌষধং নির্দিশন্নাহ- গৃষ্টিক্ষীরমিত্যাদি| গৃষ্টিঃ প্রথমপ্রসূতা গৌঃ| মধুরৌষধানি কাকোল্যাদীনি| প্রাতঃ পিবেন্ন তু ভুক্তে| কল্পনা চেযং- কাকোল্যাদীনাং মধুরাণাং কর্ষমাত্রং দ্রব্যমষ্টগুণং ক্ষীরং চতুর্গুণোদকসিদ্ধং ক্ষীরশেষং সর্পির্লাক্ষাকর্ষমাত্রপ্রক্ষেপান্বিতং; তচ্চ লঘৌ কোষ্ঠে দেযম্, ইযং চ দিনং প্রতি মাত্রা||১৩||-

Adhikarana 13 (14) · Śloka 15

সব্রণস্য তু ভগ্নস্য ব্রণং সর্পির্মধূত্তরৈঃ ||১৪|| প্রতিসার্য কষাযৈস্তু শেষং ভগ্নবদাচরেত্ |১৫|

ইদানীং সব্রণস্য ভগ্নস্য চিকিত্সিতমাহ- সব্রণস্যেত্যাদি| ব্রণং প্রতিসার্য লেপযিত্বেত্যর্থঃ| কৈঃ প্রতিসার্য? কষাযৈঃ; কিংবিশিষ্টৈঃ? সর্পির্মধূত্তরৈঃ ঘৃতমধুপ্রধানৈঃ; কষাযোঽত্র ন্যগ্রোধাদিকল্কঃ| শেষম্ আহারবিহারাদিকমিত্যর্থঃ||১৪||-

Adhikarana 14 (15) · Śloka 16

প্রথমে বযসি ত্বেবং ভগ্নং সুকরমাদিশেত্ ||১৫|| অল্পদোষস্য জন্তোস্তু কালে চ শিশিরাত্মকে |১৬|

ইদানীং কালদোষাশ্রযং সাধ্যত্বং ভগ্নে নির্দিশন্নাহ- প্রথমে ইত্যাদি| এবমিতি উক্তাহারাচারেণেত্যর্থঃ| সুকরং সুখসাধ্যম্||১৫||-

Adhikarana 15 (16) · Śloka 17

প্রথমে বযসি ত্বেবং মাসাত্ সন্ধিঃ স্থিরো ভবেত্ ||১৬|| মধ্যমে দ্বিগুণাত্ কালাদুত্তরে ত্রিগুণাত্ স্মৃতঃ |১৭|

তস্যৈব সুকরত্বে কালাবধিং দর্শযন্নাহ- প্রথমে ইত্যাদি| স্থিরো দৃঢ ইত্যর্থঃ| দ্বিগুণাত্ কালাদ্ দ্বাভ্যাং মাসাভ্যামিত্যর্থঃ| ত্রিগুণাদিতি ত্রিভির্মাসৈরিত্যর্থঃ||১৬||-

Adhikarana 16 (17) · Śloka 18

অবনামিতমুন্নহ্যেদুন্নতং চাবপীডযেত্ ||১৭|| আঞ্ছেদতিক্ষিপ্তমধো গতং চোপরি বর্তযেত্ |১৮|

ইদানীং দ্বিবিধানামপি সন্ধিমুক্তকাণ্ডভগ্নানাং প্রতীকারোপাযানাহ- অবনামিতমিত্যাদি| অবনামিতম্ অধোগতম্| উন্নহ্যেত্ ঊর্ধ্বং কুর্যাদিত্যর্থঃ| অতিক্ষিপ্তম্ অতিপ্রেরিতম্, উপরি বর্তযেদুপরি নযেদিত্যর্থঃ| গযী তু অবনামিতমিত্যাদি পঠিত্বা পঞ্চ স্থাপনোপাযানাহ, স চ পাঠোঽভাবান্ন লিখিতঃ||১৭||-

Adhikarana 17 (18-19) · Śloka 19

আঞ্ছ্নৈঃ পীডনৈশ্চৈব সঙ্ক্ষেপৈর্বন্ধনৈস্তথা ||১৮|| সন্ধীঞ্ছরীরে সর্বাংস্তু চলানপ্যচলানপি | এতৈস্তু স্থাপনোপাযৈঃ স্থাপযেন্মতিমান্ ভিষক্ ||১৯||

ইদানীং সঙ্ক্ষেপতঃ স্থাপনোপাযানাহ- আঞ্ছ্নৈরিত্যাদি| পীডনগ্রহণেন নমনোন্নমনপরিবর্তনানি গৃহ্যন্তে| সঙ্ক্ষেপঃ সম্যক্ ক্ষেপঃ প্রেরণমিত্যর্থঃ, তস্য চ পিচ্চিতং বিষযঃ; এতেন, আঞ্ছ্নাদিভিরুপাযৈঃ প্রাক্ সন্ধায বন্ধনৈরুপাচরেদিত্যর্থঃ| সন্ধীনিতি বাহুল্যেন নির্দেশঃ, তেন কাণ্ডভগ্নানপ্যেতৈরুপাযৈঃ স্থাপযেত্| চলানপ্যচলানপীতি হস্তপাদকটীহনুগতাঃ সন্ধযশ্চলাঃ, তদ্বিপরীতা অচলাঃ| গযী তু সঙ্ক্ষেপশব্দেন আকুঞ্চনমাহ, পীডনগ্রহণেন চ নমনোন্নমনাকুঞ্চনানি গৃহ্যন্তে ইতি সঙ্ক্ষেপগ্রহণমনর্থকমিতি কৃত্বা জেজ্জটস্য পাঠং দূষযিত্বাঽঽপাতনিকাপূর্বকং পাঠান্তরং পঠতি| তথাহি- “তত্র স্থাপনমুক্তমেবোপসংহরন্ননুক্তং চ সন্ধিস্থানেষু নির্দিশন্নাহ- আঞ্ছ্নোত্পীডনোন্নামসঙ্ক্ষোভৈর্বন্ধনৈস্তথা” ইত্যাদি; শেষং পূর্ববত্||১৮-১৯||

Adhikarana 18 (20-21) · Śloka 22

উত্পিষ্টমথ বিশ্লিষ্টং সন্ধিং বৈদ্যো ন ঘট্টযেত্ | তস্য শীতান্ পরীষেকান্ প্রদেহাংশ্চাবচারযেত্ ||২০|| অভিঘাতে হৃতে সন্ধিঃ স্বাং যাতি প্রকৃতিং পুনঃ | ঘৃতদিগ্ধেন পট্টেন বেষ্টযিত্বা যথাবিধি ||২১|| পট্টোপরি কুশান্ দত্ত্বা যথাবদ্বন্ধমাচরেত্ |২২|

ইদানীমুত্পিষ্টবিশ্লিষ্টযোশ্চিকিত্সিতমাহ- উত্পিষ্টমিত্যাদি| উত্পিষ্টং বিশ্লিষ্টং চ সন্ধিং ন ঘট্টযেন্ন চালযেত্; উত্পিষ্টঃ চূর্ণিতঃ, বিশ্লিষ্টঃ বিঘটিতঃ স্বস্থানাচ্চ্যুত ইত্যর্থঃ| প্রদেহো লেপঃ||২০-২১||-

Adhikarana 19 (22) · Śloka 22

প্রত্যঙ্গভগ্নস্য বিধিরত ঊর্ধ্বং প্রবক্ষ্যতে ||২২||

প্রত্যঙ্গভগ্নচিকিত্সিতমাহ- প্রত্যঙ্গভগ্নস্যেত্যাদি| অঙ্গমঙ্গং প্রতি প্রত্যঙ্গং, নখাদারভ্য যাবচ্ছির ইতি||২২||

Adhikarana 20 (23) · Śloka 23

নখসন্ধিং সমুত্পিষ্টং রক্তানুগতমারযা | অবমথ্য স্রুতে রক্তে শালিপিষ্টেন লেপযেত্ ||২৩||

নখসন্ধিমিত্যাদি| সমুত্পিষ্টং চূর্ণিতম্| রক্তানুগতং দুষ্টরক্তসম্বদ্ধম্| আরযা চর্মকারাস্ত্রেণাবমথ্য রক্তং স্রাবযেদিত্যর্থঃ||২৩||

Adhikarana 21 (24) · Śloka 24

ভগ্নাং বা সন্ধিমুক্তাং বা স্থাপযিত্বাঽঙ্গুলীং সমাম্ | অণুনাঽঽবেষ্ট্য পট্টেন ঘৃতসেকং প্রদাপযেত্ ||২৪||

অঙ্গুলিভগ্নচিকিত্সিতমাহ- ভগ্নামিত্যাদি| স্থাপযিত্বা সংস্থাপনৈর্নমনোন্নমনাদিভিঃ| অণুনা সূক্ষ্মেণেত্যর্থঃ, স্থূলপট্টেন ত্বাবাধা স্যাত্||২৪||

Adhikarana 22 (25) · Śloka 25

অভ্যজ্য সর্পিষা পাদং তলভগ্নং কুশোত্তরম্ | বস্ত্রপট্টেন বধ্নীযান্ন চ ব্যাযামমাচরেত্ ||২৫||

তলভগ্নচিকিত্সিতমাহ- অভ্যজ্যেত্যাদি||২৫||

Adhikarana 23 (26) · Śloka 26

অভ্যজ্যাযামযেজ্জঙ্ঘামূরুং চ সুসমাহিতঃ | দত্ত্বা বৃক্ষত্বচঃ শীতা বস্ত্রপট্টেন বেষ্টযেত্ ||২৬||

জঙ্ঘাভগ্নোরুভগ্নযোশ্চিকিত্সামাহ- অভ্যজ্যেত্যাদি| জঙ্ঘাপাদস্যোপরি নলকাশ্রযা| (আযামযেত্ বধ্নীযাত্|) সুসমাহিতঃ সাবধানঃ| দত্ত্বা বৃক্ষত্বচঃ শীতা ইতি ন্যগ্রোধাদিশীতবৃক্ষাণাং কুশাং দত্ত্বেত্যর্থঃ||২৬||

Adhikarana 24 (27) · Śloka 27

মতিমাংশ্চক্রযোগেন হ্যাঞ্ছেদূর্বস্থি নির্গতম্ | স্ফুটিতং পিচ্চিতং চাপি বধ্নীযাত্ পূর্ববদ্ভিষক্ ||২৭||

চক্রযোগেনাঞ্ছেদিতি বর্তুলাং কুশাং দত্ত্বা নামযিত্বা চক্রবদাঞ্ছেদ্বধ্নীযাদিত্যর্থঃ| গযী তু সম্ভ্রমভ্রমদ্বলবত্তরপুরুষো হস্তদ্বযোপরি গৃহীতপার্ষ্ণিপাদদ্বযত্বাত্ তদ্ভ্রমণজবেন নিরন্তরভ্রান্তস্য ভগ্নবতঃ পুরুষকাযস্য চক্রাকারোপলম্ভাদ্যুক্তশ্চক্রযোগ ইত্যাহ| স্ফুটিতং পিচ্চিতং চাপীতি ঊর্বস্থীতি সম্বন্ধনীযম্| অপিশব্দাত্ স্ফুটিতপিচ্চিতসদৃশেষ্বন্যেষু ভগ্নেষু যদস্থিনির্মুক্তং ত্বগাদিভিরসংশ্লিষ্টং তদপনীয বধ্নীযাদিত্যর্থঃ| পূর্ববত্ সমমিত্যর্থঃ||২৭||

Adhikarana 25 (28) · Śloka 28

আঞ্ছেদূর্ধ্বমধো বাঽপি কটিভগ্নং তু মানবম্ | ততঃ স্থানস্থিতে সন্ধৌ বস্তিভিঃ সমুপাচরেত্ ||২৮||

কটিভগ্নচিকিত্সামাহ- আঞ্ছেদূর্ধ্বমিত্যাদি| আঞ্ছেদূর্ধ্বমধো বাঽপীতি ঊর্ধ্বগতমস্থি অধঃ কৃত্বা বধ্নীযাত্, অধোগতং তূর্ধ্বং কৃত্বা বধ্নীযাদিত্যর্থঃ| বস্তিভিঃ স্নেহবস্তিভিঃ| ননু কটিভগ্নমসাধ্যমুক্তং; তদ্যথা- “ভিন্নং কপালং কট্যাং তু সন্ধিমুক্তং তথা চ্যুতম্| জঘনং প্রতি পিষ্টং চ বর্জযেত্তু বিচক্ষণঃ” (নি. ১৫) ইতি ব্যর্থমেব চিকিত্সিতং? নৈবং, প্রতি পিষ্টং চেতি চকারো বর্জযেদিত্যত্র দ্রষ্টব্যঃ, তেনানেন যাপ্যত্বং সমুচ্চীযতে; এতদুক্তং ভবতি- কপালভেদো বর্জ্যঃ, সন্ধিমুক্তসন্ধিচ্যুতে তু যাপ্যে, তেন তদ্বিষযচিকিত্সিতমিদং সার্থকমিতি গযী; জেজ্জটস্তু বর্জযেদিত্যত্র বর্জনশব্দঃ কৃচ্ছ্রসাধ্যত্বপ্রতিপাদনার্থো ন তু নিষেধার্থ ইত্যাহ||২৮||

Adhikarana 26 (29-30) · Śloka 30

পর্শুকাস্বথ ভগ্নাসু ঘৃতাভ্যক্তস্য তিষ্ঠতঃ | দক্ষিণাস্বথবা বামাস্বনুমৃজ্য নিবন্ধনীঃ ||২৯|| ততঃ কবলিকাং দত্ত্বা বেষ্টযেত্ সুসমাহিতঃ | তৈলপূর্ণে কটাহে বা দ্রোণ্যাং বা শাযযেন্নরম্ ||৩০||

পর্শুকাভগ্নচিকিত্সিতমাহ- পর্শুকাস্বথেত্যাদি| পর্শুক্রাঃ পৃষ্ঠভাগনিবন্ধনান্যস্থীনি, তেষাং নমনমেব ভগ্নত্বম্| তিষ্ঠত ইতি ঊর্ধ্বস্থিতশরীরস্য, নোপবিষ্টস্যেত্যর্থঃ| দক্ষিণাস্বথবা বামাসু পর্শুকাস্বিতি সম্বন্ধঃ| অনুমৃজ্য ঘৃতাক্তহস্তেন সমীকরণার্থমবমৃজ্য| নিবন্ধনীঃ মাংসরজ্জব ইত্যর্থঃ | কবলিকা বংশাদিবিদলশকলা, বস্ত্রমযীত্যন্যে| বেষ্টযেদিতি ‘বেল্লিতকবন্ধেন’ ইতি শেষঃ| সুসমাহিতঃ সাবধানো বৈদ্যঃ| দ্রোণী কাষ্ঠবিরচিতা নৌরিব||২৯-৩০||

Adhikarana 27 (31) · Śloka 31

মুসলেনোত্ক্ষিপেত্ কক্ষামংসসন্ধৌ বিসংহতে | স্থানস্থিতং চ বধ্নীযাত্ স্বস্তিকেন বিচক্ষণঃ ||৩১||

স্কন্ধভগ্নচিকিত্সিতমাহ- মুসলেনেত্যাদি| উত্ক্ষিপেত্ ঊর্ধ্বং নযেত্| অংসসন্ধৌ বাহুশিরঃসন্ধৌ| বিসংহতে বিশ্লিষ্টে| স্বস্তিকেন বন্ধবিশেষেণেত্যর্থঃ||৩১||

Adhikarana 28 (32) · Śloka 33

কৌর্পরং তু তথা সন্ধিমঙ্গুষ্ঠেনানুমার্জযেত্ | অনুমৃজ্য ততঃ সন্ধিং পীডযেত্ কূর্পরাচ্চ্যুতম্ ||৩২|| প্রসার্যাকুঞ্চযেচ্চৈনং স্নেহসেকং চ দাপযেত্ |৩৩|

কূর্পরসন্ধিভগ্নচিকিত্সিতমাহ- কৌর্পরমিত্যাদি| বাহুমধ্যে কূর্পরসন্ধিঃ| অনুমার্জযেত্ অনুমর্দযেত্; প্রচ্যুতস্য সন্ধ্যস্থ্নো মার্গোপলম্ভার্থং মার্জনং বিধেযম্||৩২||-

Adhikarana 29 (33) · Śloka 33

এবং জানুনি গুল্ফে চ মণিবন্ধে চ কারযেত্ ||৩৩||

কূর্পরসন্ধিচিকিত্সিতং সঙ্ক্ষেপার্থমন্যত্রাতিদিশন্নাহ- এবমিত্যাদি| এবং কূর্পরসন্ধিচিকিত্সিতপ্রকারেণেত্যর্থঃ| গুল্ফঃ পার্ষ্ণ্যুপরিগ্রন্থিঃ| মণিবন্ধো হস্ততলস্যোপরিতনঃ সন্ধিঃ||৩৩||

Adhikarana 30 (34-35) · Śloka 35

উভে তলে সমে কৃত্বা তলভগ্নস্য দেহিনঃ | বধ্নীযাদামতৈলেন পরিষেকং চ কারযেত্ ||৩৪|| মৃত্পিণ্ডং ধারযেত্ পূর্বং লবণং চ ততঃ পরম্ | হস্তে জাতবলে চাপি কুর্যাত্ পাষাণধারণম্ ||৩৫||

প্রাক্ পাদতলচিকিত্সিতমুক্তম্, অথ হস্ততলচিকিত্সিতমাহ- উভে তলে ইত্যাদি| উভে তলে ইতি একং পাণিতলং, দ্বিতীযং পাদতলম্, ইত্যুভে তলে ইতি জেজ্জটঃ; গযী তু উমে অপি হস্ততলে; তত্রৈকস্য ভঙ্গে বামং দক্ষিণেন, দক্ষিণং বামেন, উভযোস্তু ভঙ্গে তত্সমেন কাষ্ঠমযেন উভে অপি বধ্নীযাদিত্যাহ| অন্যে তু ব্যাখ্যানযন্তি- হস্ততলং পাদতলং বা তত্সমেন কাষ্ঠমযেন মিত্বা দ্বে অপি সহ বধ্নীযাদেবং দার্ঢ্যং ভবতীতি| মৃত্পিণ্ডাদিধারণমাত্মকর্মপ্রাপ্ত্যর্থম্| জেজ্জটস্তু ‘মৃত্পিণ্ডং ধারযেত্ পূর্বং’ ইত্যাদি পাঠং ন মন্যতে, কিন্তু ‘প্রাগ্গোমযমযং পিণ্ডং ধারযেন্মৃন্মযং ততঃ| হস্তে জাতবলে পশ্চাত্ কুর্যাত্ পাষাণধারণম্’ ইতি পঠতি||৩৪-৩৫||

Adhikarana 31 (36) · Śloka 36

সন্নমুন্নমযেত্ স্বিন্নমক্ষকং মুসলেন তু | তথোন্নতং পীডযেচ্চ বধ্নীযাদ্গাঢমেব চ ||৩৬||

নতোন্নতযোরক্ষকযোশ্চিকিত্সিতমাহ- সন্নমিত্যাদি| সন্নম্ অধঃপ্রবিষ্টম্, উন্নমযেত্ মুসলেনেতি সম্বন্ধঃ; স্বিন্নমুন্নতং মুসলেনাধঃ পীডযেত্| অক্ষকোংঽসসন্ধেরুপরিষ্টাদ্ভবতি||৩৬||

Adhikarana 32 (37) · Śloka 37

ঊরুবচ্চাপি কর্তব্যং বাহুভগ্নচিকিত্সিতম্ |৩৭|

বাহুভগ্নচিকিত্সিতমূরুভগ্নচিকিত্সিতেনাতিদিশন্নাহ- ঊরুবদিত্যাদি| কূর্পরাংশযোর্মধ্যে বাহুঃ|৩৭|-

Adhikarana 33 (37-38) · Śloka 39

গ্রীবাযাং তু বিবৃত্তাযাং প্রবিষ্টাযামধোঽপি বা ||৩৭|| অবটাবথ হন্বোশ্চ প্রগৃহ্যোন্নমযেন্নরম্ | ততঃ কুশাং সমং দত্ত্বা বস্ত্রপট্টেন বেষ্টযেত্ ||৩৮|| উত্তানং শাযযেচ্চৈনং সপ্তরাত্রমতন্দ্রিতঃ |৩৯|

গ্রীবাযামিত্যাদি| বিবৃত্তাযাং বক্রাযাম্| কৃকাটিকাভাগসন্ধৌ গর্তোঽবটুঃ, হনূ মুখসন্ধী, অবটৌ হন্বোশ্চ গৃহীত্বা উন্নমযেদিতি জেজ্জটঃ; গযী তু, অধঃ প্রবিষ্টাযামবটৌ গৃহীত্বা, বিবৃত্তাযাং হন্বোরিতি ক্রমমাহ| কুশাং সমং দত্ত্বেতি সমমিতি দত্ত্বেত্যস্য বিশেষণং, বেষ্টযেদিত্যস্য বিশেষণমিদমিত্যন্যে; এতেন নাতিগাঢং নাতিশিথিলমিত্যর্থঃ| অতন্দ্রিতোঽনলসঃ, ‘বৈদ্য’ ইতি শেষঃ||৩৭-৩৮||-

Adhikarana 34 (39-40) · Śloka 40

হন্বস্থিনী সমানীয হনুসন্ধৌ বিসংহতে ||৩৯|| স্বেদযিত্বা স্থিতে সম্যক্ পঞ্চাঙ্গীং বিতরেদ্ভিষক্ | বাতঘ্নমধুরৈঃ সর্পিঃ সিদ্ধং নস্যে চ পূজিতম্ ||৪০||

হনুভগ্নচিকিত্সিতমাহ- হন্বস্থিনীত্যাদি| সমানীযেতি দক্ষিণং বামেন, বামং দক্ষিণেন সমমানীযেত্যর্থঃ| বিসংহতে বিশ্লিষ্টে স্বস্থানাচ্চ্যুতে ইত্যর্থঃ| পঞ্চাঙ্গী বন্ধবিশেষঃ পঞ্চপদচীরাঙ্গী| বাতঘ্নমধুরৈরিতি বাতঘ্নানি ভদ্রদার্বাদীনি, বিদারিগন্ধাদীনীত্যন্যে, মধুরাণি কাকোল্যাদীনি, তৈঃ সিদ্ধং সর্পির্ঘৃতং, কল্ককষাযাভ্যামিত্যর্থঃ||৩৯-৪০||

Adhikarana 35 (41-42) · Śloka 43

অভগ্নাংশ্চলিতান্ দন্তান্ সরক্তানবপীডযেত্ | তরুণস্য মনুষ্যস্য শীতৈরালেপযেদ্বহিঃ ||৪১|| সিক্ত্বাঽম্বুভিস্ততঃ শীতৈঃ সন্ধানীযৈরুপাচরেত্ | উত্পলস্য চ নালেন ক্ষীরপানং বিধীযতে ||৪২|| জীর্ণস্য তু মনুষ্যস্য বর্জযেচ্চলিতান্ দ্বিজান্ |৪৩|

দন্তভগ্নচিকিত্সিতমাহ- অভগ্নানিত্যাদি| সন্ধানীযৈরিতি মধুঘৃতাদিভিঃ, ন্যগ্রোধাদীনাং কষাযাণাং কল্কৈশ্চেত্যর্থঃ||৪১-৪২||-

Adhikarana 36 (43-44) · Śloka 44

নাসাং সন্নাং বিবৃত্তাং বা ঋজ্বীং কৃত্বা শলাকযা ||৪৩|| পৃথঙ্গাসিকযোর্নাড্যৌ দ্বিমুখ্যৌ সম্প্রবেশযেত্ | ততঃ পট্টেন সংবেষ্ট্য ঘৃতসেকং প্রদাপযেত্ ||৪৪||

নাসাভগ্নচিকিত্সিতমাহ- নাসামিত্যাদি| সন্নাম্ অভিঘাতেনান্তঃপ্রবিষ্টাম্| বিবৃত্তাং বক্রাম্| তত্র সন্নাং শলাকযোন্নম্য, বক্রাং পুনঃ ঋজূকৃত্বেত্যর্থঃ| দ্বিমুখ্যৌ নাড্যৌ অন্তর্বহির্মুখ্যৌ, নিঃশ্বাসোচ্ছ্বাসসিংহাণকাদিনির্গমার্থম্| ঘৃতসেকং ঘৃতপরিষেকম্||৪৩-৪৪||

Adhikarana 37 (45) · Śloka 45

ভগ্নং কর্ণং তু বধ্নীযাত্ সমং কৃত্বা ঘৃতপ্লুতম্ | সদ্যঃক্ষতবিধানং চ ততঃ পশ্চাত্ সমাচরেত্ ||৪৫||

কর্ণভগ্নচিকিত্সিতমাহ- ভগ্নমিত্যাদি| ভগ্নং কুটিলম্, অন্তঃপ্রবিষ্টং বা| সদ্যঃক্ষতবিধানমিতি মধুঘৃতাভ্যঙ্গশীতপরিষেকাদি| অত্র ‘সদ্যঃক্ষতবিধিশ্চাপি নযনে নির্গতে বহিঃ’- ইতি কেচিত্ পঠন্তি| তন্ন পঠনীযং, ভিন্নং নেত্রমকর্মণ্যমিত্যাদিনৈব সিদ্ধত্বাত্; অন্যে তু চক্ষুর্ভগ্নদ্বযপ্রতিপাদনার্থং পঠনীযমিতি মন্যন্তে||৪৫||

Adhikarana 38 (46) · Śloka 46

মস্তুলুঙ্গাদ্বিনা ভিন্নে কপালে মধুসর্পিষী | দত্ত্বা ততো নিবধ্নীযাত্ সপ্তাহং চ পিবেদ্ধৃতম্ ||৪৬||

কপালভগ্নচিকিত্সিতমাহ- মস্তুলুঙ্গাদ্বিনেত্যাদি| মস্তুলুঙ্গস্রাবে তু প্রাগভিহিতৈব বালবর্তিরিত্যভিপ্রাযঃ||৪৬||

Adhikarana 39 (47) · Śloka 47

পতনাদভিঘাতাদ্বা শূনমঙ্গং যদক্ষতম্ | শীতান্ প্রদেহান্ সেকাংশ্চ ভিষক্ তস্যাবচারযেত্ ||৪৭||

শীতান্ প্রদেহান্ সেকাংশ্চ শীতান্; নোষ্ণান্ কথমপি, অতিস্রুতরক্তত্বেন পাকভযাত্||৪৭||

Adhikarana 40 (48-49) · Śloka 49

অথ জঙ্ঘোরুভগ্নানাং কপাটশযনং হিতম্ | কীলকা বন্ধনার্থং চ পঞ্চ কার্যা বিজানতা ||৪৮|| যথা ন চলনং তস্য ভগ্নস্য ক্রিযতে তথা | সন্ধেরুভযতো দ্বৌ দ্বৌ তলে চৈকশ্চ কীলকঃ ||৪৯||

জঙ্ঘোরুভঙ্গেষু পশ্চাত্কর্মবিশেষং নির্দিশন্নাহ- অথ জঙ্ঘেত্যাদি| ভগ্নানাং কাণ্ডভগ্নানাং, দ্বিবিধানামপীত্যপরে| কপাটশযনমবশ্যং কার্যম্| কপাটশযনেনৈব সহ দেশাদ্দেশান্তরনযনার্থম্, আধারভূতশযনচালনার্থমিত্যন্যে| আধেযভূতশরীরাবযবচলনপরিহারার্থং কীলাঃ| কীলানাং পঞ্চসঙ্খ্যাত্বং জঙ্ঘোর্বোর্দ্বযোরেকতরস্য ভগ্নমপেক্ষ্য; তত্র জঙ্ঘাভগ্নে তু গুল্ফসন্ধেরুভযতো দ্বৌ, জানুসন্ধেরপ্যুভযতো দ্বৌ, একশ্চ তলে, এবং পঞ্চ; ঊরুভগ্নে জানুসন্ধেরুভযতো দ্বৌ, দ্বৌ বঙ্ক্ষণসন্ধেরুভযতঃ, তলে চৈক ইত্যত্রাপি পঞ্চ; উভযভঙ্গাপেক্ষযা তু সপ্তভিরেব কীলৈর্যন্ত্রণম্| তথাহি- উভযতো বহির্দ্বৌ গুল্ফযোঃ, দ্বৌ চ জানুনোঃ, দ্বৌ চ বঙ্ক্ষণযোঃ, তলে চৈক এবং সপ্ত| অত্র “জঙ্ঘোর্বোঃ পার্শ্বযোর্দ্বৌ দ্বৌ তলে চৈকশ্চ কীলক” ইতি কেচিত্ পঠন্তি; তচ্চ নিবন্ধকারৈর্ন পঠিতং, তস্মান্ন পঠনীযম্| গযদাসশ্চাত্র পাঠান্তরং কিমপি পঠতি; তচ্চাভাবান্ন লিখিতম্||৪৮-৪৯||

Adhikarana 41 (50) · Śloka 50

শ্রোণ্যাং বা পৃষ্ঠবংশে বা বক্ষস্যক্ষকযোস্তথা | ভগ্নসন্ধিবিমোক্ষেষু বিধিমেনং সমাচরেত্ ||৫০||

অমুমেব জঙ্ঘোরুভগ্নকপাটশযনাদিবিধিমন্যত্রাপি দর্শযন্নাহ- শ্রোণ্যামিত্যাদি| শ্রোণিঃ কটিঃ| বক্ষ উরঃ| অক্ষকৌ অংসসন্ধেরুপরি| ভগ্নসন্ধিবিমোক্ষেষ্বিতি কাণ্ডভগ্নেষু তথা সন্ধিবিমোক্ষেষ্বপি দ্বিবিধেষু ভগ্নেষু সমাচরেদিত্যর্থঃ| বিধিমেনমিতি কপাটশযনকীলকনিযমনাদিকম্||৫০||

Adhikarana 42 (51) · Śloka 51

সন্ধীংশ্চিরবিমুক্তাংস্তু স্নিগ্ধান্ স্বিন্নান্ মৃদূকৃতান্ উক্তৈর্বিধানৈর্বুদ্ধ্যা চ সম্যক্ প্রকৃতিমানযেত্ ||৫১||

সদ্যোভগ্নবিধানং নির্দিশ্য চিরভগ্নবিধানমাহ- সন্ধীনিত্যাদি| বুদ্ধ্যা চেতি ‘স্বযমপ্যূহ্য’ ইতি শেষঃ||৫১||

Adhikarana 43 (52) · Śloka 52

কাণ্ডভগ্নে প্ররূঢে তু বিষমোল্বণসংহিতে | আপোথ্য সমযেদ্ভগ্নং ততো ভগ্নবদাচরেত্ ||৫২||

চিরবিমুক্তসন্ধিমভিধায চিরকাণ্ডভগ্নবিধিমাহ- কাণ্ডভগ্ন ইত্যাদি| আপোথ্য বিশ্লেষ্য| সমযেত্ সমং কুর্যাদিত্যর্থঃ||৫২||

Adhikarana 44 (53) · Śloka 53

কল্পযেন্নির্গতং শুষ্ক্রং ব্রণান্তেঽস্থি সমাহিতঃ | সন্ধ্যন্তে বা ক্রিযাং কুর্যাত্ সব্রণে ব্রণভগ্নবত্ ||৫৩||

কল্পযেত্ ছিন্দ্যাত্| ব্রণান্তে ব্রণৈকদেশে| সমাহিতঃ সাবধানঃ; যথাঽন্যত্র ব্রণো ন ভবতি তথা ছিন্দ্যাদিত্যর্থঃ| সন্ধ্যন্তে সন্ধিসমীপ ইত্যর্থঃ| কিংবিশিষ্টে সন্ধ্যন্তে? সব্রণে ব্রণযুক্ত ইত্যর্থঃ||৫৩||

Adhikarana 45 (54) · Śloka 54

ঊর্ধ্বকাযে তু ভগ্নানাং মস্তিষ্ক্যং কর্ণপূরণম্ | ঘৃতপানং হিতং নস্যং প্রশাখাস্বনুবাসনম্ ||৫৪||

ইদানীমূর্ধ্বাধঃকাযবিশেষেণ ভগ্নক্রিযাবিশেষং নির্দিশন্নাহ- ঊর্ধ্বকায ইত্যাদি| মস্তিষ্ক্যং শিরোবস্তিপ্রকারঃ, স চ স্নেহাক্তপিচুপ্লোতাদিভিঃ| নস্যং প্রশাখাস্বিতি প্রকৃষ্টাঃ শাখাঃ প্রশাখাস্তাসু; জানুজঙ্ঘাবাহুদ্বযগতে ভগ্নে নস্যং, ঘৃতপানং বস্তিশ্চ সর্বত্রৈবেতি জেজ্জটঃ; গযী তু মস্তিষ্ক্যাদিকং নস্যান্তং সর্বমূর্ধ্বকাযগতভগ্ন এব, প্রশাখাসু বস্তিরিতি ব্যাখ্যানযতি||৫৪||

Adhikarana 46 (55-66) · Śloka 66

অত ঊর্ধ্বং প্রবক্ষ্যামি তৈলং ভগ্নপ্রসাধকম্ | রাত্রৌ রাত্রৌ তিলান্ কৃষ্ণান্ বাসযেদস্থিরে জলে ||৫৫|| দিবা দিবা শোষযিত্বা গবাং ক্ষীরেণ ভাবযেত্ | তৃতীযং সপ্তরাত্রং তু ভাবযেন্মধুকাম্বুনা ||৫৬|| ততঃ ক্ষীরং পুনঃ পীতান্ সুশুষ্কাংশ্চূর্ণযেদ্ভিষক্ | কাকোল্যাদিং সযষ্ট্যাহ্বং মঞ্জিষ্ঠাং সারিবাং তথা ||৫৭|| কুষ্ঠং সর্জরসং মাংসীং সুরদারু সচন্দনম্ | শতপুষ্পাং চ সঞ্চূর্ণ্য তিলচূর্ণেন যোজযেত্ ||৫৮|| পীডনার্থং চ কর্তব্যং সর্বগন্ধশৃতং পযঃ | চতুর্গুণেন পযসা তত্তৈলং বিপচেদ্ভিষক্ ||৫৯|| এলামংশুমতীং পত্রং জীবকং তগরং তথা | রোধ্রং প্রপৌণ্ডরীকং চ তথা কালানুসারি(বা)ণম্ ||৬০|| সৈরেযকং ক্ষীরশুক্লামনন্তাং সমধূলিকাম্ | পিষ্ট্বা শৃঙ্গাটকং চৈব পূর্বোক্তান্যৌষধানি চ ||৬১|| এভিস্তদ্বিপচেত্তৈলং শাস্ত্রবিন্মৃদুনাঽগ্নিনা | এতত্তৈলং সদা পথ্যং ভগ্নানাং সর্বকর্মসু ||৬২|| আক্ষেপকে পক্ষঘাতে তালুশোষে তথাঽর্দিতে | মন্যাস্তম্ভে শিরোরোগে কর্ণশূলে হনুগ্রহে ||৬৩|| বাধির্যে তিমিরে চৈব যে চ স্ত্রীষু ক্ষযং গতাঃ | পথ্যং পানে তথাঽভ্যঙ্গে নস্যে বস্তিষু ভোজনে ||৬৪|| গ্রীবাস্কন্ধোরসাং বৃদ্ধিরমুনৈবোপজাযতে | মুখং চ পদ্মপ্রতিমং সসুগন্ধিসমীরণম্ ||৬৫|| গন্ধতৈলমিদং নাম্না সর্ববাতবিকারনুত্ | রাজার্হমেতত্ কর্তব্যং রাজ্ঞামেব বিচক্ষণৈঃ ||৬৬||

তদেব বস্তিকর্ণপূরণপাননস্যানুবাসনসাধনতৈলং নির্দিশন্নাহ- অত ইত্যাদি| বাসযেদিতি প্রথমং সপ্তরাত্রং যাবত্| অস্থিরে জলে বহতি পানীযে| গবাং ক্ষীরেণেতি ‘ভাব্যদ্রব্যসমেন’ ইতি শেষঃ| ভাবযেদ্ দ্বিতীযং সপ্তরাত্রম্| মধুকাম্বুনেতি ‘ভাব্যদ্রব্যসমেন’ ইতি শেষঃ| ততঃ ক্ষীরং পুনঃ পীতানিতি ক্ষীরেণ ভাব্যদ্রব্যসমেন পুনর্ভাবিতান্, চতুর্থসপ্তরাত্রমিতি তাত্পর্যার্থঃ| কাকোল্যাদিং সযষ্ট্যাহ্বমিতি যষ্টিমধুনি কাকোল্যাদাবুক্তেঽপি পুনর্যষ্টীপাঠো দ্বিভাগার্থং, যথালাভপরিভাষাপরিহারেণাবশ্যং প্রক্ষেপার্থং বা| কাকোল্যাদিশতপুষ্পান্তানাং চূর্ণপাদং তিলচূর্ণপাদৈস্ত্রিভির্যোজযন্তি তন্ত্রান্তরদর্শিনো বৃদ্ধবৈদ্যা ইতি জেজ্জটঃ| গযী তু “তিলচূর্ণস্য চত্বারো ভাগাঃ, ভাগশ্চৈকঃ প্রকীর্তিতানাং (কাকোল্যাদীনাং), তথা যষ্ট্যাহ্বাদীনাং শতপুষ্পান্তানাং দ্বিতীযো ভাগ ইতি ষড্ভাগাঃ” ইতি ব্যাখ্যানযতি| বঙ্গদত্তস্তু তিলচূর্ণসমং তত্র মিলিতং চূর্ণমিষ্যত ইত্যাহ| সর্বগন্ধশৃতং পয ইত্যত্র সর্বগন্ধা এলাদযঃ, অন্যে চ কটুকফলাদযঃ, তৈঃ শৃতং ক্বথিতং, পযঃ ক্ষীরম্| অত্র চ ক্ষীরপাকে ইযং পরিভাষা স্মরণীযা- “ক্বাথ্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষং কর্তব্যং ক্ষীরপাকে ত্বযং বিধিঃ” ইতি| যাবতা চ ক্ষীরেণ তিলচূর্ণমুত্সাদনীযং ভবতি তাবন্মাত্রং শৃতং করণীযম্| ততঃ শৃতেন ক্ষীরেণোষ্ণেনৈব কাকোল্যাদিচূর্ণসহিতং তত্তিলচূর্ণমার্দ্রীকৃত্য চক্রেণ পীডযেত্| পীডনাদুত্পন্নং তৈলং যথা সংস্কার্যং তং প্রকারমাহ- চতুর্গুণেনেত্যাদি| অংশুমতী শালপর্ণী| কালানুসারিবা তগরং; তগরস্য দ্বিরুচ্চারণং ভাগদ্বযপ্রতিপাদনার্থম্| সৈরেযকং কণ্টশেলুকঃ| ক্ষীরশুক্লা ক্ষীরবিদারী| অনন্তা উত্পলসারিবা| মধূলিকা মর্কটতৃণবিশেষঃ| শৃঙ্গাটকং ত্রিকণ্টকং জলজং ফলম্| পূর্বোক্তান্যৌষধানি কাকোল্যাদীনি শতপুষ্পান্তানি, তানি সর্বাণি চ তাবতা ভাগেন সমেন কল্পযিতব্যানি, যাবতা তৈলপাদিকানি ভবন্তি| মৃদুনাঽগ্নিনেতি মৃদ্বগ্নের্মানমুচ্যতে- “পদ্মবিস্তরযুক্তেন মৃদুনা বহ্নিনা শনৈঃ| পচেত্ স্নেহমধশ্চোর্ধ্বং চালযিত্বা নিরন্তরম্|| সম্যক্পাকো ভবত্যেবমন্যথা দগ্ধতাং ব্রজেত্”- ইতি| সর্বকর্মসু পানাভ্যঙ্গাদিষু| গন্ধতৈলমিদং নাম্নেতি অস্য তৈলস্য গন্ধতৈলমিতি সঞ্জ্ঞা; বৈতরণে পুনরস্যাণুতৈলসঞ্জ্ঞা| রাজ্ঞামেবেতি রাজ্ঞামেবেদং তৈলং পণ্ডিতৈর্বিধাতব্যং, মহাসম্ভারসাধ্যত্বাত্; ন পুনরন্যেষাং নিষিদ্ধম্||৫৫-৬৬||

Adhikarana 47 (67-68) · Śloka 68

ত্রপুসাক্ষপ্রিযালানাং তৈলানি মধুরৈঃ সহ | বসাং দত্ত্বা যথালাভং ক্ষীরে দশগুণে পচেত্ ||৬৭|| স্নেহোত্তমমিদং চাশু কুর্যাদ্ভগ্নপ্রসাধনম্ | পানাভ্যঞ্জননস্যেষু বস্তিকর্মণি সেচনে ||৬৮||

ত্রপুসং কর্কটীভেদঃ, অক্ষো বিভীতকঃ, প্রিযালশ্চারঃ| মধুরৈঃ কাকোল্যাদিভিঃ| তানি চ স্নেহপাদিকানি| বসাং দত্ত্বা যথালাভমিতি যদি লভ্যতে তদা নিক্ষিপেদিত্যর্থঃ| সেচনে পরিষেকে| অমুং পাঠং কেচিদনার্ষং মন্যন্তে||৬৭-৬৮||

Adhikarana 48 (69) · Śloka 69

ভগ্নং নৈতি যথাপাকং প্রযতেত তথা ভিষক্ | পক্বমাংসসিরাস্নাযু তদ্ধি কৃচ্ছ্রেণ সিধ্যতি ||৬৯||

ইদানীং ভগ্নে বাহ্যানামাভ্যন্তরাণাং চ পাককারিণাং পরিহারায পাকপ্রশমকারিণাং চ সেবনাযাহ- ভগ্নং নৈতীত্যাদি| নৈতি ন গচ্ছতীত্যর্থঃ| প্রযতেত প্রযত্নং কুর্বীতেত্যর্থঃ||৬৯||

Adhikarana 49 (70) · Śloka 70

ভগ্নং সন্ধিমনাবিদ্ধমহীনাঙ্গমনুল্বণম্ | সুখচেষ্টাপ্রচারং চ সংহিতং সম্যগাদিশেত্ ||৭০||

সম্যগ্রূঢলক্ষণমাহ- ভগ্নমিত্যাদি| অনাবিদ্ধম্ অনাকুলম্| অনুল্বণম্ অনুন্নতম্| সুখচেষ্টাপ্রচারমিতি চেষ্টাপ্রচার আকুঞ্চনপ্রসারণাদিকঃ||৭০||

Adhikarana puShpikA · Śloka 3

ইতি সুশ্রুতসংহিতাযাং চিকিত্সাস্থানে ভগ্নচিকিত্সিতং নাম তৃতীযোঽধ্যাযঃ ||৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে তৃতীযোঽধ্যাযঃ||৩||