3. bhagnacikitsitam

Adhikarana 1 (1-2) · Śloka 2

অথাতো ভগ্নানাং চিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

অল্পাশিনোঽনাত্মবতো জন্তোর্বাতাত্মকস্য চ | উপদ্রবৈর্বা জুষ্টস্য ভগ্নং কৃচ্ছ্রেণ সিধ্যতি ||৩||

Adhikarana 3 (4) · Śloka 4

লবণং কটুকং ক্ষারমম্লং মৈথুনমাতপম্ | ব্যাযামং চ ন সেবেত ভগ্নো রূক্ষান্নমেব চ ||৪||

Adhikarana 4 (5) · Śloka 5

শালির্মাংসরসঃ ক্ষীরং সর্পির্যূষঃ সতীনজঃ | বৃংহণং চান্নপানং স্যাদ্দেযং ভগ্নায জানতা ||৫||

Adhikarana 5 (6) · Śloka 6

মধূকোদুম্বরাশ্বত্থপলাশককুভত্বচঃ | বংশসর্জবটানাং চ কুশার্থমুপসংহরেত্ ||৬||

Adhikarana 6 (7) · Śloka 7

আলেপনার্থং মঞ্জিষ্ঠাং মধুকং রক্তচন্দনম্ | শতধৌতঘৃতোন্মিশ্রং শালিপিষ্টং চ সংহরেত্ ||৭||

Adhikarana 7 (8) · Śloka 9

সপ্তাহাদথ সপ্তাহাত্ সৌম্যেষ্বৃতুষু বন্ধনম্ | সাধারণেষু কর্তব্যং পঞ্চমে পঞ্চমেঽহনি ||৮|| আগ্নেযেষু ত্র্যহাত্ কুর্যাদ্ভগ্নদোষবশেন বা |৯|

Adhikarana 8 (9-10) · Śloka 10

তত্রাতিশিথিলং বদ্ধে সন্ধিস্থৈর্যং ন জাযতে ||৯|| গাঢেনাপি ত্বগাদীনাং শোফো রুক্ পাক এব চ | তস্মাত্ সাধারণং বন্ধং ভগ্নে শংসন্তি তদ্বিদঃ ||১০||

Adhikarana 9 (11) · Śloka 11

ন্যগ্রোধাদিকষাযং তু সুশীতং পরিষেচনে | পঞ্চমূলীবিপক্বং তু ক্ষীরং কুর্যাত্ সবেদনে ||১১||

Adhikarana 10 (12) · Śloka 12

সুখোষ্ণমবচার্যং বা চক্রতৈলং বিজানতা |১২|

Adhikarana 11 (12) · Śloka 13

বিভজ্য কালং দোষং চ দোষঘ্নৌষধসংযুতম্ ||১২|| পরিষেকং প্রদেহং চ বিদধ্যাচ্ছীতমেব চ |১৩|

Adhikarana 12 (13) · Śloka 14

গৃষ্টিক্ষীরং সসর্পিষ্কং মধুরৌষধসাধিতম্ ||১৩|| শীতলং লাক্ষযা যুক্তং প্রাতর্ভগ্নঃ পিবেন্নরঃ |১৪|

Adhikarana 13 (14) · Śloka 15

সব্রণস্য তু ভগ্নস্য ব্রণং সর্পির্মধূত্তরৈঃ ||১৪|| প্রতিসার্য কষাযৈস্তু শেষং ভগ্নবদাচরেত্ |১৫|

Adhikarana 14 (15) · Śloka 16

প্রথমে বযসি ত্বেবং ভগ্নং সুকরমাদিশেত্ ||১৫|| অল্পদোষস্য জন্তোস্তু কালে চ শিশিরাত্মকে |১৬|

Adhikarana 15 (16) · Śloka 17

প্রথমে বযসি ত্বেবং মাসাত্ সন্ধিঃ স্থিরো ভবেত্ ||১৬|| মধ্যমে দ্বিগুণাত্ কালাদুত্তরে ত্রিগুণাত্ স্মৃতঃ |১৭|

Adhikarana 16 (17) · Śloka 18

অবনামিতমুন্নহ্যেদুন্নতং চাবপীডযেত্ ||১৭|| আঞ্ছেদতিক্ষিপ্তমধো গতং চোপরি বর্তযেত্ |১৮|

Adhikarana 17 (18-19) · Śloka 19

আঞ্ছ্নৈঃ পীডনৈশ্চৈব সঙ্ক্ষেপৈর্বন্ধনৈস্তথা ||১৮|| সন্ধীঞ্ছরীরে সর্বাংস্তু চলানপ্যচলানপি | এতৈস্তু স্থাপনোপাযৈঃ স্থাপযেন্মতিমান্ ভিষক্ ||১৯||

Adhikarana 18 (20-21) · Śloka 22

উত্পিষ্টমথ বিশ্লিষ্টং সন্ধিং বৈদ্যো ন ঘট্টযেত্ | তস্য শীতান্ পরীষেকান্ প্রদেহাংশ্চাবচারযেত্ ||২০|| অভিঘাতে হৃতে সন্ধিঃ স্বাং যাতি প্রকৃতিং পুনঃ | ঘৃতদিগ্ধেন পট্টেন বেষ্টযিত্বা যথাবিধি ||২১|| পট্টোপরি কুশান্ দত্ত্বা যথাবদ্বন্ধমাচরেত্ |২২|

Adhikarana 19 (22) · Śloka 22

প্রত্যঙ্গভগ্নস্য বিধিরত ঊর্ধ্বং প্রবক্ষ্যতে ||২২||

Adhikarana 20 (23) · Śloka 23

নখসন্ধিং সমুত্পিষ্টং রক্তানুগতমারযা | অবমথ্য স্রুতে রক্তে শালিপিষ্টেন লেপযেত্ ||২৩||

Adhikarana 21 (24) · Śloka 24

ভগ্নাং বা সন্ধিমুক্তাং বা স্থাপযিত্বাঽঙ্গুলীং সমাম্ | অণুনাঽঽবেষ্ট্য পট্টেন ঘৃতসেকং প্রদাপযেত্ ||২৪||

Adhikarana 22 (25) · Śloka 25

অভ্যজ্য সর্পিষা পাদং তলভগ্নং কুশোত্তরম্ | বস্ত্রপট্টেন বধ্নীযান্ন চ ব্যাযামমাচরেত্ ||২৫||

Adhikarana 23 (26) · Śloka 26

অভ্যজ্যাযামযেজ্জঙ্ঘামূরুং চ সুসমাহিতঃ | দত্ত্বা বৃক্ষত্বচঃ শীতা বস্ত্রপট্টেন বেষ্টযেত্ ||২৬||

Adhikarana 24 (27) · Śloka 27

মতিমাংশ্চক্রযোগেন হ্যাঞ্ছেদূর্বস্থি নির্গতম্ | স্ফুটিতং পিচ্চিতং চাপি বধ্নীযাত্ পূর্ববদ্ভিষক্ ||২৭||

Adhikarana 25 (28) · Śloka 28

আঞ্ছেদূর্ধ্বমধো বাঽপি কটিভগ্নং তু মানবম্ | ততঃ স্থানস্থিতে সন্ধৌ বস্তিভিঃ সমুপাচরেত্ ||২৮||

Adhikarana 26 (29-30) · Śloka 30

পর্শুকাস্বথ ভগ্নাসু ঘৃতাভ্যক্তস্য তিষ্ঠতঃ | দক্ষিণাস্বথবা বামাস্বনুমৃজ্য নিবন্ধনীঃ ||২৯|| ততঃ কবলিকাং দত্ত্বা বেষ্টযেত্ সুসমাহিতঃ | তৈলপূর্ণে কটাহে বা দ্রোণ্যাং বা শাযযেন্নরম্ ||৩০||

Adhikarana 27 (31) · Śloka 31

মুসলেনোত্ক্ষিপেত্ কক্ষামংসসন্ধৌ বিসংহতে | স্থানস্থিতং চ বধ্নীযাত্ স্বস্তিকেন বিচক্ষণঃ ||৩১||

Adhikarana 28 (32) · Śloka 33

কৌর্পরং তু তথা সন্ধিমঙ্গুষ্ঠেনানুমার্জযেত্ | অনুমৃজ্য ততঃ সন্ধিং পীডযেত্ কূর্পরাচ্চ্যুতম্ ||৩২|| প্রসার্যাকুঞ্চযেচ্চৈনং স্নেহসেকং চ দাপযেত্ |৩৩|

Adhikarana 29 (33) · Śloka 33

এবং জানুনি গুল্ফে চ মণিবন্ধে চ কারযেত্ ||৩৩||

Adhikarana 30 (34-35) · Śloka 35

উভে তলে সমে কৃত্বা তলভগ্নস্য দেহিনঃ | বধ্নীযাদামতৈলেন পরিষেকং চ কারযেত্ ||৩৪|| মৃত্পিণ্ডং ধারযেত্ পূর্বং লবণং চ ততঃ পরম্ | হস্তে জাতবলে চাপি কুর্যাত্ পাষাণধারণম্ ||৩৫||

Adhikarana 31 (36) · Śloka 36

সন্নমুন্নমযেত্ স্বিন্নমক্ষকং মুসলেন তু | তথোন্নতং পীডযেচ্চ বধ্নীযাদ্গাঢমেব চ ||৩৬||

Adhikarana 32 (37) · Śloka 37

ঊরুবচ্চাপি কর্তব্যং বাহুভগ্নচিকিত্সিতম্ |৩৭|

Adhikarana 33 (37-38) · Śloka 39

গ্রীবাযাং তু বিবৃত্তাযাং প্রবিষ্টাযামধোঽপি বা ||৩৭|| অবটাবথ হন্বোশ্চ প্রগৃহ্যোন্নমযেন্নরম্ | ততঃ কুশাং সমং দত্ত্বা বস্ত্রপট্টেন বেষ্টযেত্ ||৩৮|| উত্তানং শাযযেচ্চৈনং সপ্তরাত্রমতন্দ্রিতঃ |৩৯|

Adhikarana 34 (39-40) · Śloka 40

হন্বস্থিনী সমানীয হনুসন্ধৌ বিসংহতে ||৩৯|| স্বেদযিত্বা স্থিতে সম্যক্ পঞ্চাঙ্গীং বিতরেদ্ভিষক্ | বাতঘ্নমধুরৈঃ সর্পিঃ সিদ্ধং নস্যে চ পূজিতম্ ||৪০||

Adhikarana 35 (41-42) · Śloka 43

অভগ্নাংশ্চলিতান্ দন্তান্ সরক্তানবপীডযেত্ | তরুণস্য মনুষ্যস্য শীতৈরালেপযেদ্বহিঃ ||৪১|| সিক্ত্বাঽম্বুভিস্ততঃ শীতৈঃ সন্ধানীযৈরুপাচরেত্ | উত্পলস্য চ নালেন ক্ষীরপানং বিধীযতে ||৪২|| জীর্ণস্য তু মনুষ্যস্য বর্জযেচ্চলিতান্ দ্বিজান্ |৪৩|

Adhikarana 36 (43-44) · Śloka 44

নাসাং সন্নাং বিবৃত্তাং বা ঋজ্বীং কৃত্বা শলাকযা ||৪৩|| পৃথঙ্গাসিকযোর্নাড্যৌ দ্বিমুখ্যৌ সম্প্রবেশযেত্ | ততঃ পট্টেন সংবেষ্ট্য ঘৃতসেকং প্রদাপযেত্ ||৪৪||

Adhikarana 37 (45) · Śloka 45

ভগ্নং কর্ণং তু বধ্নীযাত্ সমং কৃত্বা ঘৃতপ্লুতম্ | সদ্যঃক্ষতবিধানং চ ততঃ পশ্চাত্ সমাচরেত্ ||৪৫||

Adhikarana 38 (46) · Śloka 46

মস্তুলুঙ্গাদ্বিনা ভিন্নে কপালে মধুসর্পিষী | দত্ত্বা ততো নিবধ্নীযাত্ সপ্তাহং চ পিবেদ্ধৃতম্ ||৪৬||

Adhikarana 39 (47) · Śloka 47

পতনাদভিঘাতাদ্বা শূনমঙ্গং যদক্ষতম্ | শীতান্ প্রদেহান্ সেকাংশ্চ ভিষক্ তস্যাবচারযেত্ ||৪৭||

Adhikarana 40 (48-49) · Śloka 49

অথ জঙ্ঘোরুভগ্নানাং কপাটশযনং হিতম্ | কীলকা বন্ধনার্থং চ পঞ্চ কার্যা বিজানতা ||৪৮|| যথা ন চলনং তস্য ভগ্নস্য ক্রিযতে তথা | সন্ধেরুভযতো দ্বৌ দ্বৌ তলে চৈকশ্চ কীলকঃ ||৪৯||

Adhikarana 41 (50) · Śloka 50

শ্রোণ্যাং বা পৃষ্ঠবংশে বা বক্ষস্যক্ষকযোস্তথা | ভগ্নসন্ধিবিমোক্ষেষু বিধিমেনং সমাচরেত্ ||৫০||

Adhikarana 42 (51) · Śloka 51

সন্ধীংশ্চিরবিমুক্তাংস্তু স্নিগ্ধান্ স্বিন্নান্ মৃদূকৃতান্ উক্তৈর্বিধানৈর্বুদ্ধ্যা চ সম্যক্ প্রকৃতিমানযেত্ ||৫১||

Adhikarana 43 (52) · Śloka 52

কাণ্ডভগ্নে প্ররূঢে তু বিষমোল্বণসংহিতে | আপোথ্য সমযেদ্ভগ্নং ততো ভগ্নবদাচরেত্ ||৫২||

Adhikarana 44 (53) · Śloka 53

কল্পযেন্নির্গতং শুষ্ক্রং ব্রণান্তেঽস্থি সমাহিতঃ | সন্ধ্যন্তে বা ক্রিযাং কুর্যাত্ সব্রণে ব্রণভগ্নবত্ ||৫৩||

Adhikarana 45 (54) · Śloka 54

ঊর্ধ্বকাযে তু ভগ্নানাং মস্তিষ্ক্যং কর্ণপূরণম্ | ঘৃতপানং হিতং নস্যং প্রশাখাস্বনুবাসনম্ ||৫৪||

Adhikarana 46 (55-66) · Śloka 66

অত ঊর্ধ্বং প্রবক্ষ্যামি তৈলং ভগ্নপ্রসাধকম্ | রাত্রৌ রাত্রৌ তিলান্ কৃষ্ণান্ বাসযেদস্থিরে জলে ||৫৫|| দিবা দিবা শোষযিত্বা গবাং ক্ষীরেণ ভাবযেত্ | তৃতীযং সপ্তরাত্রং তু ভাবযেন্মধুকাম্বুনা ||৫৬|| ততঃ ক্ষীরং পুনঃ পীতান্ সুশুষ্কাংশ্চূর্ণযেদ্ভিষক্ | কাকোল্যাদিং সযষ্ট্যাহ্বং মঞ্জিষ্ঠাং সারিবাং তথা ||৫৭|| কুষ্ঠং সর্জরসং মাংসীং সুরদারু সচন্দনম্ | শতপুষ্পাং চ সঞ্চূর্ণ্য তিলচূর্ণেন যোজযেত্ ||৫৮|| পীডনার্থং চ কর্তব্যং সর্বগন্ধশৃতং পযঃ | চতুর্গুণেন পযসা তত্তৈলং বিপচেদ্ভিষক্ ||৫৯|| এলামংশুমতীং পত্রং জীবকং তগরং তথা | রোধ্রং প্রপৌণ্ডরীকং চ তথা কালানুসারি(বা)ণম্ ||৬০|| সৈরেযকং ক্ষীরশুক্লামনন্তাং সমধূলিকাম্ | পিষ্ট্বা শৃঙ্গাটকং চৈব পূর্বোক্তান্যৌষধানি চ ||৬১|| এভিস্তদ্বিপচেত্তৈলং শাস্ত্রবিন্মৃদুনাঽগ্নিনা | এতত্তৈলং সদা পথ্যং ভগ্নানাং সর্বকর্মসু ||৬২|| আক্ষেপকে পক্ষঘাতে তালুশোষে তথাঽর্দিতে | মন্যাস্তম্ভে শিরোরোগে কর্ণশূলে হনুগ্রহে ||৬৩|| বাধির্যে তিমিরে চৈব যে চ স্ত্রীষু ক্ষযং গতাঃ | পথ্যং পানে তথাঽভ্যঙ্গে নস্যে বস্তিষু ভোজনে ||৬৪|| গ্রীবাস্কন্ধোরসাং বৃদ্ধিরমুনৈবোপজাযতে | মুখং চ পদ্মপ্রতিমং সসুগন্ধিসমীরণম্ ||৬৫|| গন্ধতৈলমিদং নাম্না সর্ববাতবিকারনুত্ | রাজার্হমেতত্ কর্তব্যং রাজ্ঞামেব বিচক্ষণৈঃ ||৬৬||

Adhikarana 47 (67-68) · Śloka 68

ত্রপুসাক্ষপ্রিযালানাং তৈলানি মধুরৈঃ সহ | বসাং দত্ত্বা যথালাভং ক্ষীরে দশগুণে পচেত্ ||৬৭|| স্নেহোত্তমমিদং চাশু কুর্যাদ্ভগ্নপ্রসাধনম্ | পানাভ্যঞ্জননস্যেষু বস্তিকর্মণি সেচনে ||৬৮||

Adhikarana 48 (69) · Śloka 69

ভগ্নং নৈতি যথাপাকং প্রযতেত তথা ভিষক্ | পক্বমাংসসিরাস্নাযু তদ্ধি কৃচ্ছ্রেণ সিধ্যতি ||৬৯||

Adhikarana 49 (70) · Śloka 70

ভগ্নং সন্ধিমনাবিদ্ধমহীনাঙ্গমনুল্বণম্ | সুখচেষ্টাপ্রচারং চ সংহিতং সম্যগাদিশেত্ ||৭০||

Adhikarana puShpikA · Śloka 3

ইতি সুশ্রুতসংহিতাযাং চিকিত্সাস্থানে ভগ্নচিকিত্সিতং নাম তৃতীযোঽধ্যাযঃ ||৩||