18. granthyapacyarbudagalagaṇḍacikitsitam

Adhikarana 1 (1-3) · Śloka 3

অথাতো গ্রন্থ্যপচ্যর্বুদগলগণ্ডচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| গ্রন্থিষ্বথামেষু ভিষগ্বিদধ্যাচ্ছোফক্রিযাং বিস্তরশো বিধিজ্ঞঃ | রক্ষেদ্বলং চাপি নরস্য নিত্যং তদ্রক্ষিতং ব্যাধিবলং নিহন্তি ||৩||

গ্রন্থিষ্বিত্যাদি| শোফক্রিযামপতর্পণাদিকাং বিরেচনান্তাম্| বিস্তরশো ভূযিষ্ঠম্||১-৩||

Adhikarana 2 (4) · Śloka 4

তৈলং পিবেত্ সর্পিরথো দ্বযং বা দত্ত্বা বসাং বা ত্রিবৃতং বিদধ্যাত্ | অপেহিবাতাদশমূলসিদ্ধং বৈদ্যশ্চতুঃস্নেহমথো দ্বযং বা ||৪||

ইদানীমামে গ্রন্থৌ বিস্রাবণশোধনযোঃ স্নেহনাঙ্গস্নেহং নির্দিশন্নাহ- তৈলমিত্যাদি| তৈলং পিবেত্, সর্পির্বা পিবেত্, অথবা দ্বযং তৈলসর্পিষী পিবেত্| বসাতৈলসর্পিষা চ সাধ্যত্বাত্ ত্রিবৃতং বিদধ্যাত্; ত্রিভিস্তৈলসর্পির্বসাভির্বৃতো ব্যাপ্তঃ স্নেহসংযোগস্ত্রিবৃতসঞ্জ্ঞঃ স্যাত্, তং বিদধ্যাত্ কুর্যাত্; ‘বৈদ্যো গ্রন্থিরোগিণঃ পানায’ ইতি শেষঃ; অথবা চতুঃস্নেহং ঘৃততৈলবসামজ্জাসংযোগজং; দ্বযং বা পিবেত্, দ্বযমিতি তৈলসর্পিষী, তৈলবসে, তৈলমজ্জানৌ, ঘৃতবসে, ঘৃতমজ্জানৌ, বসামজ্জানৌ চেতি এবম্প্রকারং দ্বযং, চতুঃস্নেহং বা একীভূতং পিবেত্| কিম্ভূতং পিবেত্? অপেহিবাতাদশমূলসিদ্ধমিতি অপেহিবাতা প্রসারিণী| তত্রাদ্যং তৈলং সর্পির্দ্বযং বা যত্ প্রোক্তং তদসংস্কৃতমেব, উত্তরার্ধোক্তং চ চতুঃস্নেহং দ্বযং বা প্রসারিণীদশমূলকল্কক্বাথসংস্কৃতম্, অন্যথা বাশব্দেন পুনরুক্তিদোষঃ স্যাত্| যদ্যপি পৃথঙ্নির্দিষ্টরসবীর্যবিপাকপ্রভাবাণাং তৈলসর্পির্বসামজ্জানাং সংস্কৃতানাং গ্রন্থিরোগিণঃ সামান্যেনাত্র প্রযোগোঽভিহিতঃ, তথাঽপি বাতপিত্তশ্লেষ্মসংসৃষ্টসন্নিপাতারব্ধগ্রন্থিষু হেতুপ্রকৃতিদেশকালসাত্ম্যানুবন্ধানবেক্ষ্য যথাবচ্চ পানার্থমুপযোজ্যা ইতি জ্ঞেযম্| গযী তু ‘অপেহিবাতা- ’ ত্যত্র ‘আমে বিদধ্যাদ্দশমূলসিদ্ধং’ ইতি পঠতি ব্যাখ্যানযতি চ- তৈলং পিবেদিত্যাদি; তত্র গ্রন্থৌ বাতভবে আমে তৈলং বাতহরক্বাথকল্কসিদ্ধং, পিত্তভবে ঘৃতং পিত্তহরক্বাথকল্কসিদ্ধং, তৈলমেব কফহরক্বাথসিদ্ধং কফজে, সংসর্গসন্নিপাতে চ দ্বিত্রিচতুঃস্নেহাদিসিদ্ধং বিকল্প্যং; তদেব বাতহরং নির্দিশন্নাহ- আমে বিদধ্যাদ্দশমূলসিদ্ধমিত্যাদি||৪||

Adhikarana 3 (5-7) · Śloka 8

হিংস্রাঽথ রোহিণ্যমৃতাঽথ ভার্গী শ্যোনাকবিল্বাগুরুকৃষ্ণগন্ধাঃ | গোজী চ পিষ্টা সহ তালপত্র্যা গ্রন্থৌ বিধেযোঽনিলজে প্রলেপঃ ||৫|| স্বেদোপনাহান্ বিবিধাংশ্চ কুর্যাত্তথা প্রসিদ্ধানপরাংশ্চ লেপান্ | বিদার্য বা পক্বমপোহ্য পূযং প্রক্ষাল্য বিল্বার্কনরেন্দ্রতোযৈঃ ||৬|| তিলৈঃ সপঞ্চাঙ্গুলপত্রমিশ্রৈঃ সংশোধযেত্ সৈন্ধবসম্প্রযুক্তৈঃ | শুদ্ধং ব্রণং বাঽপ্যুপরোপযেত্তু তৈলেন রাস্নাসরলান্বিতেন ||৭|| বিডঙ্গযষ্টীমধুকামৃতাভিঃ সিদ্ধেন বা ক্ষীরসমন্বিতেন |৮|

ইদানীং বাতাদিজনিতগ্রন্থিবিশেষেণ প্রলেপাদীনাহ- হিংস্রেত্যাদি| রোহিণী কটুকা| অমৃতা গুডূচী| কৃষ্ণগন্ধা শোভাঞ্জনকঃ, শমীত্যপরে| গোজী গোজিহ্বিকা, শাখোটক ইত্যন্যে| তালপত্রী মুসলী| স্বেদেত্যাদি| প্রসিদ্ধা লেপা মিশ্রকোক্তা মাতুলুঙ্গ্যাদযঃ| বিদার্যেত্যাদি| নরেন্দ্রঃ কিরমালকঃ| তোযশব্দোঽত্র ক্বাথে বর্ততে| পঞ্চাঙ্গুল এরণ্ডঃ| অন্যে ‘বিল্বার্কগণাদিতোযৈঃ’ ইতি পঠন্তি; তত্র বিল্বাদিগণঃ, অর্কাদিগণশ্চ, তযোঃ ক্বাথৈরিত্যর্থঃ| শুদ্ধমিত্যাদি| সরলা ত্রিবৃত্, কেচিত্ সরলং শালতরুমাহুঃ, তযোশ্চূর্ণান্বিতেন তৈলেন রোপযেত্, তথা চতুর্গুণগোক্ষীরসমন্বিতেন তৈলেন বিডঙ্গাদিভিঃ কল্কীকৃতৈঃ সিদ্ধেন বা রোপযেত্||৫-৭||-

Adhikarana 4 (8-11) · Śloka 11

জলৌকসঃ পিত্তকৃতে হিতাস্তু ক্ষীরোদকাভ্যাং পরিষেচনং চ ||৮|| কাকোলিবর্গস্য চ শীতলানি পিবেত্ কষাযাণি সশর্করাণি | দ্রাক্ষারসেনেক্ষুরসেন বাঽপি চূর্ণং পিবেচ্চাপি হরীতকীনাম্ ||৯|| মধূকজম্ব্বর্জুনবেতসানাং ত্বগ্ভিঃ প্রদেহানবচারযেত | সশর্করৈর্বা তৃণশূন্যকন্দৈর্দিহ্যাদভীক্ষ্ণং মুচুলুন্দজৈর্বা ||১০|| বিদার্য বা পক্বমপোহ্য পূযং ধাবেত্ কষাযেণ বনস্পতীনাম্ | তিলৈঃ সযষ্টীমধুকৈর্বিশোধ্য সর্পিঃ প্রযোজ্যং মধুরৈর্বিপক্বম্ ||১১||

জলৌকস ইত্যাদি| তৃণশূন্যকন্দৈঃ কেতকীমূলৈঃ| দিহ্যাত্ লিম্পেত্| অভীক্ষ্ণং সততম্| মুচুলুন্দঃ কণ্টকীমদনঃ, অন্যে মুচুকুন্দমাহুঃ| বিদার্যেত্যাদি| বনস্পতীনাং বটপ্লক্ষপিপ্পলোদুম্বরাণাম্| তিলৈরিত্যাদি| মধুরৈঃ কাকোল্যাদিভির্দ্রব্যৈঃ||৮-১১||

Adhikarana 5 (12-13) · Śloka 13

হৃতেষু দোষেষু যথানুপূর্ব্যা গ্রন্থৌ ভিষক্ শ্লেষ্মসমুত্থিতে তু | স্বিন্নস্য বিম্লাপনমেব কুর্যাদঙ্গুষ্ঠলোহোপলবেণুদণ্ডৈঃ ||১২|| বিকঙ্কতারগ্বধকাকণন্তীকাকাদনীতাপসবৃক্ষমূলৈঃ | আলেপযেত্ পিণ্ডফলার্কভার্গীকরঞ্জকালামদনৈশ্চ বিদ্বান্ ||১৩||

হৃতেষ্বিত্যাদি| যথানুপূর্ব্যা স্নেহস্বেদাদিক্রমেণ| বমনবিরেচনাস্থাপনশিরোবিরেচনশোণিতস্রাবণৈর্দোষেষু কফপিত্তবাতেষু হৃতেষু তথা শোণিতে চ হৃতে স্বিন্নস্য বিম্লাপনং কার্যমিত্যাহ- অঙ্গুষ্ঠলোহোপলবেণুদণ্ডৈঃ; বিম্লাপনমঙ্গুষ্ঠাদিভির্মর্দনেন শ্বযথুবিম্লাপনং কুর্যাত্| বিকঙ্কতেত্যাদি| বিকঙ্কতবৃক্ষঃ কটাযিকা| আরগ্বধঃ কিরমালকঃ| কাকণন্তী গুঞ্জা| কাকাদনী বাযসতিন্দুকা, অহিংস্রেত্যন্যে| তাপসবৃক্ষ ইঙ্গুদঃ| পিণ্ডফলা তিক্তালাবুঃ| কালা কটুহিংস্রা||১২-১৩||

Adhikarana 6 (14) · Śloka 14

অমর্মজাতং শমমপ্রযান্তমপক্বমেবাপহরেদ্বিদার্য | দহেত্ স্থিতে চাসৃজি সিদ্ধকর্মা সদ্যঃক্ষতোক্তং চ বিধিং বিদধ্যাত্ ||১৪||

অমর্মেত্যাদি| শ্লেষ্মসমুত্থমেব গ্রন্থিমর্মণ্যুত্পন্নং শমমপ্রযান্তং পূর্বোক্তক্রমৈঃ শান্তিমগচ্ছন্তমপক্বমেব বিদার্য অপহরেত্| সদ্যঃক্ষতোক্তবিধির্মধুঘৃতাদিপ্রযোগঃ| কেচিত্ ‘অমর্মজং চৈবমপচ্যমানং’ ইতি পঠন্তি||১৪||

Adhikarana 7 (15-16) · Śloka 16

যা মাংসকন্দ্যঃ কঠিনা বৃহত্যস্তাস্বেষ যোজ্যশ্চ বিধির্বিধিজ্ঞৈঃ | শস্ত্রেণ বাঽঽপাট্য সুপক্বমাশু প্রক্ষালযেত্ পথ্যতমৈঃ কষাযৈঃ ||১৫|| সংশোধনৈস্তং চ বিশোধযেত্তু ক্ষারোত্তরৈঃ ক্ষৌদ্রগুডপ্রগাঢৈঃ | শুদ্ধে চ তৈলং ত্ববচারণীযং বিডঙ্গপাঠারজনীবিপক্বম্ ||১৬||

যা ইত্যাদি| যাশ্চ মহত্যো মাংসকন্দ্যো মাংসপ্ররোহাঃ, তাস্বিযমেব ক্রিযা| শস্ত্রেণেত্যাদি শস্ত্রেণ পাটনং অমর্মজে, মর্মজে তু ভেষজৈঃ| পথ্যতমৈরিতি কফোত্থব্রণহরৈঃ| সংশোধনৈরিত্যাদি| ক্ষারোত্তরৈর্যবক্ষারপ্রধানৈঃ| ‘ক্ষৌদ্রঘৃতপ্রগাঢৈঃ’ ইতি পাঠান্তরম্||১৫-১৬||

Adhikarana 8 (17-19) · Śloka 20

মেদঃসমুত্থে তিলকল্কদিগ্ধং দত্ত্বোপরিষ্টাদ্দ্বিগুণং পটান্তম্ | হুতাশতপ্তেন মুহুঃ প্রমৃজ্যাল্লোহেন ধীমানদহন্ হিতায ||১৭|| প্রলিপ্য দার্বীমথ লাক্ষযা বা প্রতপ্তযা স্বেদনমস্য কার্যম্ | নিপাত্য বা শস্ত্রমপোহ্য মেদো দহেত্ সুপক্বং ত্বথবা বিদার্য ||১৮|| প্রক্ষাল্য মূত্রেণ তিলৈঃ সুপিষ্টৈঃ সুবর্চিকাদ্যৈর্হরিতালমিশ্রৈঃ | সসৈন্ধবৈঃ ক্ষৌদ্রঘৃতপ্রগাঢৈঃ ক্ষারোত্তরৈরেনমভিপ্রশোধ্য ||১৯|| তৈলং বিদদ্যাদ্দ্বিকরঞ্জগুঞ্জাবংশাবলেখেঙ্গুদমূত্রসিদ্ধম্ |২০|

অতো মেদোগ্রন্থিচিকিত্সিতমাহ- মেদ ইত্যাদি| দার্বী দারুহস্তকঃ| অপক্বমেদোজে শস্ত্রং নিপাত্য মেদোঽপকৃষ্য দহেত্, পক্বং বা মেদোগ্রন্থিং বিদার্য গবাদিমূত্রৈঃ প্রক্ষাল্য তিলৈঃ সুবর্চিকাযবক্ষারসৈন্ধবহরিতালক্ষৌদ্রঘৃতপ্রধানৈরভিপ্রশোধ্য বক্ষ্যমাণতৈলাবচারণম্| তৈলমিত্যাদি দ্বিকরঞ্জাদিকল্কসিদ্ধেন চতুর্গুণগোমূত্রদ্রবেণ তৈলেন রোপযেত্| বংশাবলেখো বংশত্বক্||১৭-১৯||-

Adhikarana 9 (20-23) · Śloka 23

জীমূতকৈঃ কোশবতীফলৈশ্চ দন্তীদ্রবন্তীত্রিবৃতাসু চৈব ||২০|| সর্পিঃ কৃতং হন্ত্যপচীং প্রবৃদ্ধাং দ্বিধা প্রবৃত্তং তদুদারবীর্যম্ | নির্গুণ্ডিজাতীবরিহিষ্ঠযুক্তং জীমূতকং মাক্ষিকসৈন্ধবাঢ্যম্ ||২১|| অভিপ্রতপ্তং বমনং প্রগাঢং দুষ্টাপচীষূত্তমমাদিশন্তি | কৈডর্যবিম্বীকরবীরসিদ্ধং তৈলং হিতং মূর্ধবিরেচনং চ ||২২|| শাখোটকস্য স্বরসেন সিদ্ধং তৈলং হিতং নস্যবিরেচনেষু | মধূকসারশ্চ হিতোঽবপীডে ফলানি শিগ্রোঃ খরমঞ্জরের্বা ||২৩||

ইদানীমপচীচিকিত্সামাহ- জীমূতকৈরিত্যাদি| জীমূতকো দেবদালী| কোশবতী কটুকোশাতকী| দ্বিধাপ্রবৃত্তম্ উভযতোভাগদোষহরম্| উদারবীর্যম্ উত্কটবীর্যম্| জীমূতককোশবত্যোঃ ফলকল্কং দন্ত্যাদীনাং তিসৄণাং মূলস্য চ স্নেহচতুর্থাংশেন কৃত্বা, জলং চতুর্গুণং দত্ত্বা, বিপচেত্; কল্কক্বাথাভ্যামিত্যপরে| নির্গুণ্ডীত্যাদি| বরিহিষ্ঠং বালকম্| জীমূতকো দেবদালী| নির্গুণ্ডীজাতীবরিহিষ্ঠানামঞ্জলিং সলিলাঢকেন নিঃক্বাথ্য পাদশেষং বিধায ততঃ পুরুষাপেক্ষযা জলমুষ্ণমাদায, তচ্চ জীমূতকফলকল্পেন প্রত্যেকং মাক্ষিকসৈন্ধবাঢ্যং কৃত্বা, যুক্তং বমনবিধিনা, দুষ্টাস্বপচীষূত্তমমাদিশন্তি বমনদ্রব্যমুত্তমমাদিশন্তি| কৈডর্যেত্যাদি কৈডর্যঃ পর্বতনিম্বঃ| কৈডর্যাদিকল্কচতুর্থাংশং জলচতুর্গুণং তৈলং সাধ্যম্| অন্যে তু কৈডর্যেত্যত্র নির্গুণ্ডীতি পঠন্তি| নির্গুণ্ডীস্বরসে চতুর্গুণে বিম্বীকরবীরকল্কং তৈলং সাধ্যম্| শাখোটকস্যেত্যাদি| শাখোটকবল্কলানাং চতুর্গুণে স্বরসে তৈলং সিদ্ধং; নস্যে তু অকল্কমিত্যেকে, তত্কল্ককষাযমেবেত্যন্যে| মধূকেত্যাদি| অবপীড্য দীযতে ইত্যবপীডঃ, নস্যভেদ ইত্যর্থঃ| খরমঞ্জরিঃ অপামার্গঃ| মধূকসারশিগ্রুফলাপামার্গতণ্ডুলা উষ্ণোদকেন পিষ্ট্বা অবপীডোঽরূক্ষলক্ষণ এব||২০-২৩||

Adhikarana 10 (24) · Śloka 24

গ্রন্থীনমর্মপ্রভবানপক্বানুদ্ধৃত্য চাগ্নিং বিদধীত পশ্চাত্ | ক্ষারেণ বাঽপি প্রতিসারযেত্তু সংলিখ্য শস্ত্রেণ যথোপদেশম্ ||২৪||

গ্রন্থীনিত্যাদি| উদ্ধৃত্য চ শস্ত্রেণ পরং যদা ঔষধেনাসাধ্যত্বম্||২৪||

Adhikarana 11 (25-26) · Śloka 26

পার্ষ্ণিং প্রতি দ্বে দশ চাঙ্গুলানি মিত্বেন্দ্রবস্তিং পরিবর্জ্য ধীমান্ | বিদার্য মত্স্যাণ্ডনিভানি বৈদ্যো নিষ্কৃষ্য জালান্যনলং বিদধ্যাত্ ||২৫|| আ গুল্ফকর্ণাত্ সুমিতস্য জন্তোস্তস্যাষ্টভাগং খুডকাদ্বিভজ্য | ঘোণর্জুবেধঃ সুররাজবস্তের্হিত্বাঽক্ষিমাত্রং ত্বপরে বদন্তি ||২৬||

স্থানকর্মাভিধায স্থানান্তরকর্মাণি নির্দিশন্নাহ- পার্ষ্ণিমিত্যাদি| পার্ষ্ণিঃ গুল্ফস্য পশ্চাদ্ভাগঃ| দ্বাদশাঙ্গুলানি মিত্বোর্ধ্বমিন্দ্রবস্তিং পরিত্যজ্য, ছিত্ত্বা, মেদোজালানি মত্স্যাণ্ডেন নিভানি আকৃষ্য অগ্নিমবচারযেত্| জঙ্ঘামধ্যে দ্ব্যঙ্গুলমিন্দ্রবস্তিঃ, জেজ্জটাচার্যস্তু অর্ধাঙ্গুলমাহ| অন্যে তু পার্ষ্ণিং প্রতীত্যত্র প্রতিশব্দং বিপরীতার্থকমাহুঃ, তেন বিপরীতাযাং পার্ষ্ণ্যামিত্যর্থঃ; তেন দক্ষিণভাগগতাযামপচ্যাং বামজঙ্ঘাযাং, বামভাগগতাযামপচ্যাং দক্ষিণজঙ্ঘাযাম্, অভযতোভাগগতাযামুভযতঃ কর্ম কর্তব্যমিতি জ্ঞেযম্| ‘ভাগে চ পরিপ্রতী’ ইত্যুক্তত্বাদ্ভাগার্থোঽপি প্রতিশব্দো ব্যাখ্যাতব্যঃ; তেন পার্ষ্ণিভাগে জঙ্ঘাযাঃ পাশ্চাত্যভাগে ব্যধঃ কার্যঃ| দ্বে দশ চাঙ্গুলানীতি মিত্বেত্যত্র পৃথগ্বিভক্তিনির্দেশাত্ পার্ষ্ণিতো দশাঙ্গুলানি বিহাযাঙ্গুলদ্বযমাত্রো ব্যধঃ কার্য ইতি জ্ঞেযম্| ইন্দ্রবস্তিং ত্রযোদশেঽঙ্গুলে স্থিতমর্ধাঙ্গুলপ্রমাণং পরিত্যজ্য হিত্বা, ধীমান্ বুদ্ধিমান্ ঊহাপোহযোগ্যো দৃষ্টকর্মেত্যর্থঃ, বৈদ্যঃ যঃ সম্যগাযুর্বেদবিদ্যাং বেত্তি, জালানি মেদোজালানি, অনলং বিদধ্যাত্ অপুনর্ভবাযাগ্নিতপ্তযা শলাকযা দহেদিত্যর্থঃ; এবং হি মূলোচ্ছেদাদপচ্যুপশম ইতি বদন্তি| অমুমেবার্থং কেচিদন্যেন পাঠেন পঠন্তি- আ গুল্ফেত্যাদি| আ খুল(ড)কাত্ গুল্ফকর্ণাত্ গুল্ফৌ কর্ণাবিব যস্য স তথা; খুলকো জঙ্ঘাপাদযোঃ সন্ধিঃ| সুররাজবস্তেরিন্দ্রবস্তেরষ্টভাগং জঙ্ঘাযাশ্চরণহীনাযা বিংশত্যঙ্গুলাযা অষ্টমো ভাগঃ সার্ধমঙ্গুলদ্বযং হিত্বা, যদ্যপি দ্ব্যঙ্গুল ইন্দ্রবস্তিস্তথাঽপি তদুপঘাতপরিহারার্থং সার্ধমেবাঙ্গুলদ্বযং জ্ঞে(হে)যম্| অন্যে তু অক্ষিমাত্রমেব দ্ব্যঙ্গুলং নেত্রপ্রমাণং হিত্বেতি বদন্তি| ঘোণর্জুবেধ ইতি গুল্ফকর্ণস্য, খুলকস্য , ঘোণা নাসা ইব ঘোণা, যথোত্তরীযকণ্ডরা তস্যাঃ ঋজুরবক্রো বেধো ব্যধঃ, ‘কুর্যাত্’ ইত্যত্রাপি পাঠে স এবার্থঃ| অপচ্যাস্তু জঙ্ঘাকণ্ডরাগতমেদোমূলতাযাং ভোজবচনং- “বাতপিত্তকফা বৃদ্ধা মেদশ্চাপি সমাচিতম্| জঙ্ঘযোঃ কণ্ডরাং প্রাপ্য মত্স্যাণ্ডসদৃশান্ বহূন্”- ইত্যাদীতি গযী; জেজ্জটস্যাপ্যযমভিপ্রাযঃ| গূঢপদভঙ্গটিপ্পনেঽন্যথা ব্যাখ্যাতম্- আ গুল্ফকর্ণাদিতি গুল্ফকর্ণাবভিব্যাপ্য, আঙত্রাভিবিধৌ ন মর্যাদাযাং, সুমিতস্য সুনিশ্চিতং মিতস্য তস্য প্রমাণস্য ষট্সপ্তত্যঙ্গুলমিতস্যাষ্টমভাগঃ সার্ধনবাঙ্গুলমাত্রং, খুলকাত্ পার্ষ্ণিভাগাদ্ দ্ব্যঙ্গুলপ্রমাণাত্ , বিভজ্য পৃথক্কৃত্য, ঘোণা নাসা তস্যা ঋজু যথা ভবতি তথাঽবক্রো বেধঃ কর্তব্যঃ| তচ্চ বিধ বিধানে ইতি ধাতো রূপম্, তথাঽপি বেধশব্দোঽত্র ব্যধনে বর্ততে, ধাতূনামনেকার্থত্বাত্| স চ খুলকস্যাঙ্গুলত্রিতযমষ্টমভাগস্য চ সার্ধনবাঙ্গুলকমেবং সার্ধদ্বাদশাঙ্গুলপরিমাণেনেন্দ্রবস্তির্মর্মাপি পরিহৃতং ভবত্যেবমুক্তমিন্দ্রবস্তিং হিত্বেতি| তথা চোক্তং- “ত্রযোদশাঙ্গুলে পার্ষ্ণিং প্রতি কালান্তরাসুহৃত্| ইন্দ্রবস্তিরসৃক্স্রাবী মাংসগোঽর্ধাঙ্গুলো ভবেত্”- ইতি| অক্ষিমাত্রমঙ্গুলদ্বযপ্রমাণমপরে ভিষজ ইতি বদন্তি| এবং প্রথমশ্লোকেনাধস্তাদ্দ্বিতীযশ্লোকেনেন্দ্রবস্তেরুপরিষ্টাজ্জঙ্ঘাযাঃ পাশ্চাত্যভাগগতকণ্ডরাযা দ্ব্যঙ্গুলমাত্রো ব্যধঃ কার্য ইতি স্থিতম্; এবমনুপশমে বামপার্শ্বজাযাং দক্ষিণজঙ্ঘাপৃষ্ঠমধ্যাদিন্দ্রবস্তেরধস্তাদূর্ধ্বং বা শস্ত্রেণাক্ষিমাত্রং ব্রণং কৃত্বা, মত্স্যাণ্ডজালনিভং মেদোঽপনীযগ্নিনা দহেত্, অনেনেতরপার্শ্বজা ব্যাখ্যাতা, এবমুভযপার্শ্বজাতাযামুভযত ইতি| ভোজাঽত্রাহ- “বাতপিত্তকফা বৃদ্ধা মেদশ্চাপি সমাচিতম্| জঙ্ঘযোঃ কণ্ডরাং প্রাপ্য মত্স্যাণ্ডসদৃশান্ বহূন্|| কুর্বন্তি গ্রন্থীন্ যস্তেভ্যঃ পুনঃ প্রকুপিতোঽনিলঃ| দোষস্তৈরূর্ধ্বগো বক্ষঃকক্ষামন্যাগলাশ্রিতঃ|| নানাপ্রকারান্ কুরুতে গ্রন্থীন্ সা ত্বপচী মতা| ব্যামিশ্রদোষোত্পন্নাং তু কৃচ্ছ্রসাধ্যাং বিনির্দিশেত্|| তাসাং বাতোত্তরা কৃষ্ণা বাতিকীবেদনাযুতা|| ক্ষিপ্রপাকসমুত্থানা দাহযুক্তা চ পৈত্তিকী|| গূঢাঽবিপাকা কঠিনা কফাত্ স্নিগ্ধা রুজাকরী|| মেদোধিকা শ্লৈষ্মিকী চ বিশেষাত্ সা সমার্দবা|| তাং তু মালাকৃতিং মন্যাকণ্ঠহৃদ্ধনুসন্ধিষু|| গলমালাং বিজানীযাদপচীতুল্যলক্ষণাম্”- ইতি| “তস্মাজ্জঙ্ঘাযামেব কর্মণা মূলোচ্ছেদঃ কার্যঃ” ইতি গূঢপদভঙ্গাত্| বাগ্ভটেন চোভযত্রাপি ব্যধো দর্শিতঃ| যথা- “ইত্যশান্তৌ গদস্যান্যপার্শ্বজঙ্ঘাসমাশ্রিতম্| বস্তেরূর্ধ্বমধস্তাদ্বা মেদো হৃত্বাঽগ্নিনা দহেত্”- (বা. উ. ৩০) ইতি||২৫-২৬||

Adhikarana 12 (27) · Śloka 27

মণিবন্ধোপরিষ্টাদ্বা কুর্যাদ্রেখাত্রযং ভিষক্ | অঙ্গুল্যন্তরিতং সম্যগপচীনাং নিবৃত্তযে ||২৭||

হন্বস্থিসন্ধিমন্যাগলস্থিতাপচ্যাং জঙ্ঘাগতং কর্মাভিধায কক্ষাকূর্পরসন্ধিগতাস্বপচীষু বাহুগতমেব কর্ম বিনির্দিশন্নাহ- মণিবন্ধেত্যাদি| অত্রাপি পূর্ববত্, “এতেনেতরসক্থি বাহূ চ ব্যাখ্যাতৌ” (শা. ৮) ইতি বচনাদিন্দ্রবস্তেরষ্টভাগমক্ষিমাত্রং বা বিহাযাগ্রে রেখাত্রযং কুর্যাত্| তত্রাপি বিংশত্যঙ্গুলজঙ্ঘাযা দ্বাদশাঙ্গুলানি কিঞ্চিদধিকো ভাগেন, এবং ষোডশাঙ্গুলকূর্পরমণিবন্ধমধ্যে কিঞ্চিদধিকানি নবাঙ্গুলানি মিত্বা রেষাত্রযমঙ্গুলান্তরমিতি||২৭||

Adhikarana 13 (28) · Śloka 29

চূর্ণস্য কালে প্রচলাককাকগোধাহিকূর্মপ্রভবাং মসীং তু | দদ্যাচ্চ তৈলেন সহেঙ্গুদীনাং যদ্বক্ষ্যতে শ্লীপদিনাং চ তৈলম্ ||২৮|| বিরেচনং ধূমমুপাদদীত ভবেচ্চ নিত্যং যবমুদ্গভোজী |২৯|

বমনবিরেচনশিরোবিরেচনৈস্তথা স্থানান্তরগতশস্ত্রক্ষারানলৈরন্তর্বহিঃপ্রমার্জনাভ্যামন্তর্বহিঃশুদ্ধীর্নির্দিশ্য সংশমনং নির্দিশন্নাহ- চূর্ণস্যেত্যাদি|- চূর্ণস্য কালে রোপণকালে, প্রচলাকাদীনাং মসীর্দদ্যাত্ ক্ষারমিত্যর্থঃ| প্রচলাকো মযূরঃ, কৃকলাসমন্যে প্রাহুঃ| ইঙ্গুদীনাং তৈলেন ক্ষারমেব দদ্যাত্| যানি চ তৈলানি শ্লীপদে তানি চ দদ্যাত্||২৮||-

Adhikarana 14 (29-31) · Śloka 31

কর্কারুকৈর্বারুকনারিকেলপ্রিযালপঞ্চাঙ্গুলবীজচূর্ণৈঃ ||২৯|| বাতার্বুদং ক্ষীরঘৃতাম্বুসিদ্ধৈরুষ্ণৈঃ সতৈলৈরুপনাহযেত্তু | কুর্যাচ্চ মুখ্যান্যুপনাহনানি সিদ্ধৈশ্চ মাংসৈরথ বেসবারৈঃ ||৩০|| স্বেদং বিদধ্যাত্ কুশলস্তু নাড্যা শৃঙ্গেণ রক্তং বহুশো হরেচ্চ | বাতঘ্ননির্যূহপযোম্লভাগৈঃ সিদ্ধং শতাখ্যং ত্রিবৃতং পিবেদ্বা ||৩১||

কর্কারুকৈরিত্যাদি| কর্কারুকং কূষ্মাণ্ডং, এর্বারুঃ গ্রীষ্মকর্কটী, প্রিযালশ্চারঃ, পঞ্চাঙ্গুল এরণ্ডঃ| ক্ষীরঘৃতসিদ্ধৈ রক্তপিত্তানুবন্ধে| উপনাহযেত্ বধ্নীযাত্| বাতঘ্নেত্যাদি| বাতঘ্না দেবদার্বাদযঃ| তত্ক্বাথক্ষীরসৌবীরভাগৈস্ত্রিভিঃ স্নেহচতুর্গুণৈরকল্কৈস্তৈলপাকঃ, এবমেব শতধা পক্বং শতপাকম্, এবং ত্রিবৃতং বা মজ্জবর্জং ঘৃততৈলবসাভির্বৃতং পূর্বকল্কবাতহরক্বাথপযোম্লৈঃ সিদ্ধম্; এবমেব শতধাঽপতানকবিধানেন বা সিদ্ধং ত্রিবৃতং, তত্রাপ্যযমেব সাধনবিধিঃ||২৯-৩১||

Adhikarana 15 (32-34) · Śloka 34

স্বেদোপনাহা মৃদবস্তু কার্যাঃ পিত্তার্বুদে কাযবিরেচনং চ | বিঘৃষ্য চোদুম্বরশাকগোজীপত্রৈর্ভৃশং ক্ষৌদ্রযুতৈঃ প্রলিম্পেত্ ||৩২|| শ্লক্ষ্ণীকৃতৈঃ সর্জরসপ্রিযঙ্গুপত্তঙ্গরোধ্রাঞ্জনযষ্টিকাহ্বৈঃ | বিস্রাব্য চারগ্বধগোজিসোমাঃ শ্যামা চ যোজ্যা কুশলেন লেপে ||৩৩|| শ্যামাগিরিহ্বাঞ্জনকীরসেষু দ্রাক্ষারসে সপ্তলিকারসে চ | ঘৃতং পিবেত্ ক্লীতকসম্প্রসিদ্ধং পিত্তার্বুদী তজ্জঠরী চ জন্তুঃ ||৩৪||

স্বেদোপনাহা ইত্যাদি| মৃদুঃ স্বেদো দ্রবস্বেদঃ, উপনাহো বন্ধঃ কাকোল্যাদিমৃদুদ্রব্যকৃতঃ ক্ষীরাম্লপিষ্টশ্চ নাত্যুষ্ণঃ| মৃদুকাযবিরেচনং ন শিরোবিরেচনমিতি ব্যবচ্ছেদবিষযঃ| ভৃশং বিঘৃষ্য উদুম্বরাদিপত্রৈঃ| তত্র শাকঃ খরমসৃণপত্রো মহাতরুঃ; গোজী দার্বীপত্রিকা, শাখোটক ইত্যন্যে| বিস্রাব্যেত্যাদি| সোমঃ সোমলতা, কট্ফলমিত্যপরে| শ্যামেত্যাদি| শ্যামা ত্রিবৃত্, গিরিহ্বা শ্বেতস্যন্দঃ, অঞ্জনকী নীলাঞ্জনিকা শারদং ফলং, শ্রীফলিকেতি লোকে| সপ্তলিকা যবতিক্তা| ক্লীতকেত্যাদি| যষ্টীমধুকল্কেন সামান্যস্নেহপরিভাষযা সিদ্ধং ঘৃতং শোধনং পিত্তার্বুদী পিত্তোদরী চ পিবেত্||৩২-৩৪||

Adhikarana 16 (35-36) · Śloka 36

শুদ্ধস্য জন্তোঃ কফজেঽর্বুদে তু রক্তেঽবসিক্তে তু ততোঽর্বুদং তত্ | দ্রব্যাণি যান্যূর্ধ্বমধশ্চ দোষান্ হরন্তি তৈঃ কল্ককৃতৈঃ প্রদিহ্যাত্ ||৩৫|| কপোতপারাবতবিড্বিমিশ্রৈঃ সকাংস্যনীলৈঃ শুকলাঙ্গলাখ্যৈঃ | মূত্রৈস্তু কাকাদনিমূলমিশ্রৈঃ ক্ষারপ্রদিগ্ধৈরথবা প্রদিহ্যাত্ ||৩৬||

শুদ্ধস্যেতি বমনেন| অলাব্বা রক্তেঽবসিক্তেঽপচ্যা দোষানূর্ধ্বমধশ্চ যানি দ্রব্যাণি জীমূতকীঘোষবতীফলদন্তীদ্রবন্তীত্রিবৃদাদীনি হরন্তি তেষাং কল্কৈর্লিম্পেত্| কাংস্যনীলঃ কাংস্যমসী| শুকঃ গ্রন্থিপর্ণঃ , লাঙ্গলাখ্যা কলিকারিকা| কাকাদনী বাযসতিন্দুকা| কপোতাদিবিড্বিমিশ্রৈঃ কাংস্যনীলাদিসহিতৈর্বাযসতিন্দুকাযা মূলযুক্তৈর্মূত্রৈর্বিলিম্পেত্; অথবা ক্ষারপ্রদিগ্ধৈঃ ক্ষারসংযুক্তৈর্মূত্রৈঃ প্রলিম্পেত্; ‘ক্ষারপ্রঘৃষ্টৈরথবা’ ইত্যন্যে; তত্র ক্ষারোদকেন প্রঘৃষ্টৈর্বা কপোতবিডাদিভিঃ প্রদিহ্যাদিত্যর্থঃ||৩৫-৩৬||

Adhikarana 17 (37-40) · Śloka 40

নিষ্পাবপিণ্যাককুলত্থকল্কৈর্মাংসপ্রগাঢৈর্দধিমস্তুযুক্তৈঃ | লেপং বিদধ্যাত্ কৃমযো যথাঽত্র মূর্চ্ছন্তি মুঞ্চন্ত্যথ মক্ষিকাশ্চ ||৩৭|| অল্পাবশিষ্টে কৃমিভক্ষিতে চ লিখেত্ততোঽগ্নিং বিদধীত পশ্চাত্ | যদল্পমূলং ত্রপুতাম্রসীসপট্টৈঃ সমাবেষ্ট্য তদাযসৈর্বা ||৩৮|| ক্ষারাগ্নিশস্ত্রাণ্যসকৃদ্বিদধ্যাত্ প্রাণানহিংসন্ ভিষগপ্রমত্তঃ | আস্ফোতজাতীকরবীরপত্রৈঃ কষাযমিষ্টং ব্রণশোধনার্থম্ ||৩৯|| শুদ্ধে চ তৈলং বিদধীত ভার্গীবিডঙ্গপাঠাত্রিফলাবিপক্বম্ | যদৃচ্ছযা চোপগতানি পাকং পাকক্রমেণোপচরেদ্বিধিজ্ঞঃ ||৪০||

নিষ্পাবেত্যাদি|- নিষ্পাবঃ শিম্বঃ| বিদধ্যাত্ কুর্যাত্| মূর্চ্ছন্তি পতন্তি| মুঞ্চন্ত্যথ মক্ষিকাশ্চেতি ‘কৃমীন্’ ইতি শেষঃ| শিখরাণাং চ কৃমিভির্ভক্ষিতত্বাদল্পাবশিষ্টত্বম্| অসকৃত্ অনেকবারম্| অপ্রমত্তঃ সাবধানঃ| আস্ফোতা সারিবা| শুদ্ধ ইত্যাদি| শুদ্ধে চ রোপণার্থং ভার্গ্যাদিতৈলং তৈলপাককল্পেন| যদৃচ্ছযেত্যাদি| যদৃচ্ছযা পুনরাকস্মিকোত্পাদে অভিঘাতাদিনিমিত্তেঽবুদ্ধিপূর্বকে বা||৩৭-৪০||

Adhikarana 18 (41-42) · Śloka 43

মেদোর্বুদং স্বিন্নমথো বিদার্য বিশোধ্য সীব্যেদ্গতরক্তমাশু | ততো হরিদ্রাগৃহধূমরোধ্রপতঙ্গচূর্ণৈঃ সমনঃশিলালৈঃ ||৪১|| ব্রণং প্রতিগ্রাহ্য মধুপ্রগাঢৈঃ করঞ্জতৈলং বিদধীত শুদ্ধে | সশেষদোষাণি হি যোঽর্বূদানি করোতি তস্যাশু পুনর্ভবন্তি ||৪২|| তস্মাদশেষাণি সমুদ্ধরেত্তু হন্যুঃ সশেষাণি যথা হি বহ্নিঃ |৪৩|

মেদ ইত্যাদি| পতঙ্গো রক্তকাষ্ঠম্ | আলং হরিতালম্| করঞ্জতৈলং বিদ্রধ্যুক্তং, তত্ফলতৈলমেবেত্যন্যে||৪১-৪২||-

Adhikarana 19 (43-47) · Śloka 47

সংস্বেদ্য গণ্ডং পবনোত্থমাদৌ নাড্যাঽনিলঘ্নৌষধপত্রভঙ্গৈঃ ||৪৩|| অম্লৈঃ সমূত্রৈর্বিবিধৈঃ পযোভিরুষ্ণৈঃ সতৈলৈঃ পিশিতৈশ্চ বিদ্বান্ | বিস্রাবযেত্ স্বিন্নমতন্দ্রিতশ্চ শুদ্ধং ব্রণং চাপ্যুপনাহযেত্তু ||৪৪|| শণাতসীমূলকশিগ্রুকিণ্বপ্রিযালমজ্জানুযুতৈস্তিলৈস্তু | কালামৃতাশিগ্রুপুনর্নবার্কগজাদিনামাকরহাটকুষ্ঠৈঃ ||৪৫|| একৈষিকাবৃক্ষকতিল্বকৈশ্চ সুরাম্লপিষ্টৈরসকৃত্ প্রদিহ্যাত্ ||৪৬|| তৈলং পিবেচ্চামৃতবল্লিনিম্বহংসাহ্বযাবৃক্ষকপিপ্পলীভীঃ | সিদ্ধং বলাভ্যাং চ সদেবদারু হিতায নিত্যং গলগণ্ডরোগে ||৪৭||

সংস্বেদ্যেত্যাদি| পত্রভঙ্গৈঃ পল্লবৈঃ| অনিলঘ্নং বাতহরম্| এরণ্ডাদিপল্লবযুতং তু শুদ্ধবাতে, অম্লৈঃ কাঞ্জিকাদিভিঃ পিত্তাবৃতে বাযৌ, কফাবৃতে মূত্রক্বথিতৈঃ; রক্তাবৃতে পযোভিঃ ক্ষীরৈঃ, পিশিতৈশ্চেতি পিশিতরসৈঃ ক্বথিতৈঃ, অথবা পিশিতৈর্মাংসৈঃ পল্লবৈঃ সহ ক্বথিতৈর্ধাতুক্ষযজে বাযৌ| বিস্রাবযেত্ জলৌকাদিভিঃ, ঊরুমূলসংশ্রিতসিরাব্যধেন বা| রক্তাদিহরণশুদ্ধং গলগণ্ডং নিরন্তরং শণাদিবীজৈরুপনাহযেত্| শুদ্ধমিতি বচনাত্ সৌশ্রুতেঽপি রক্তাহরণস্য শুদ্ধিসঞ্জ্ঞা; তেন “চতুষ্প্রকারা সংশুদ্ধিঃ” (চ. সূ. ২২) ইতি চরকবচনং তু প্রাযিকং স্মৃতম্| কিণ্বং সুরাবীজম্| কালেত্যাদি| কালা হিংস্রা, গজাদিনামা হস্তিপিপ্পলী, করহাটং মদনফলম্| একৈষিকা অম্বষ্ঠা, ত্রিবৃদিত্যেকে; বৃক্ষকঃ কুটজঃ| অসকৃত্ অনেকবারম্| প্রদিহ্যাত্ লিম্পেত্| তৈলমিত্যাদি| হংসাহ্বযা হংসপদী| তৈলং পিবেত্ সিদ্ধমিতি সম্বন্ধঃ||৪৩-৪৭||

Adhikarana 20 (48-50) · Śloka 50

স্বেদোপনাহৈঃ কফসম্ভবং তু সংস্বেদ্য বিস্রাবণমেব কুর্যাত্ | ততোঽজগন্ধাতিবিষাবিশল্যাবিষাণিকাকুষ্ঠশুকাহ্বযাভিঃ ||৪৮|| পলাশভস্মোদকপেষিতাভির্দিহ্যাত্ সুগুঞ্জাভিরশীতলাভিঃ | দশার্ধসঙ্খ্যৈর্লবণৈশ্চ যুক্তং তৈলং পিবেন্মাগধিকাদিসিদ্ধম্ ||৪৯|| প্রচ্ছর্দনং মূর্ধবিরেচনং চ ধূমশ্চ বৈরেচনিকো হিতস্তু | পাকক্রমো বাঽপি সদা বিধেযো বৈদ্যেন পাকঙ্গতযোঃ কথঞ্চিত্ ||৫০||

পিত্তগলগণ্ডাভাবাদনন্তরং কফজস্য চিকিত্সিতং দর্শযন্নাহ- স্বেদেত্যাদি| স্বেদোঽত্র রূক্ষঃ, উপনাহশ্চ সক্ষারমূত্রঃ| অজগন্ধা বোবযিকা, বিশল্যা অগ্নিশিখবৃক্ষঃ , বিষাণিকা আবর্তনিকা, শুকাহ্বযঃ চর্মকারবটঃ| দশেত্যাদি দশার্ধসঙ্খ্যৈর্লবণৈরিতি পঞ্চলবণৈঃ| মাগধিকাদিসিদ্ধং পিপ্পল্যাদিক্বাথকল্কাভ্যাং সিদ্ধম্| পাকঙ্গতযোঃ পাকং প্রাপ্তযোর্বাতকফজযোঃ||৪৮-৫০||

Adhikarana 21 (51) · Śloka 51

কটুত্রিকক্ষৌদ্রযুতাঃ সমূত্রা ভক্ষ্যা যবান্নানি রসাশ্চ মৌদ্গাঃ | সশৃঙ্গবেরাঃ সপটোলনিম্বা হিতায দেযা গলগণ্ডরোগে ||৫১||

সর্বগলগণ্ডবিষযে যোগং নির্দিশন্নাহ- কটুত্রিকেত্যাদি| ভক্ষ্যা ধানোল্লুম্বাদযঃ| যবান্নানি গৃঞ্জনাদীনি| সমূত্রা ইতি মূত্রস্বিন্নশুষ্কাণাং ভক্ষ্যযবাণামিতি বোদ্ধব্যম্| কটুত্রিকমধুভ্যাং যোজনা| রসাশ্চ মৌদ্গা মুদ্গযূষাঃ| সশৃঙ্গবেরাঃ সার্দ্রকা দেযাঃ||৫১||

Adhikarana 22 (52-55) · Śloka 55

মেদঃসমুত্থে তু যথোপদিষ্টাং বিধ্যেত্ সিরাং স্নিগ্ধতনোর্নরস্য | শ্যামাসুধালোহপুরীষদন্তীরসাঞ্জনৈশ্চাপি হিতঃ প্রদেহঃ ||৫২|| মূত্রেণ বাঽঽলোড্য হিতায সারং প্রাতঃ পিবেত্ সালমহীরুহাণাম্ | শস্ত্রেণ বাঽঽপাট্য বিদার্য চৈনং মেদঃ সমুদ্ধৃত্য হিতায সীব্যেত্ ||৫৩|| মজ্জাজ্যমেদোমধুভির্দহেদ্বা দগ্ধে চ সর্পির্মধু চাবচার্যম্ | কাসীসতুত্থে চ ততোঽত্র দেযে চূর্ণীকৃতে রোচনযা সমেতে ||৫৪|| তৈলেন চাভ্যজ্য হিতায দদ্যাত্ সারোদ্ভবং গোমযজং চ ভস্ম | হিতশ্চ নিত্যং ত্রিফলাকষাযো গাঢশ্চ বন্ধো যবভোজনং চ ||৫৫||

মেদঃসমুত্থ ইত্যাদি| যথোপদিষ্টামিতি ঊরুসন্ধিনির্দিষ্টাম্| শ্যামেত্যাদি|- শ্যামা ত্রিবৃত্, সুধা সেহুণ্ডঃ, লোহপুরীষং লোহমলম্; অন্যে তু লোহমগরুং বদন্তি, তথা পুরীষং কপোতপারাবতবিট্| মূত্রেণেত্যাদি| সালসারাদিতরূণাং সারকল্কং কর্ষমাত্রং গোমূত্রেণ পিবেত্| জেজ্জটস্তু সারোদ্ভবং ভস্ম মূত্রেণালোড্য পিবেদিতি বদতি| শস্ত্রেণেত্যাদি| দাহে চ মধুঘৃতাবচারণং পশ্চাত্কর্ম| কাসীসেত্যাদি| ততোঽনন্তরং কাসীসতুত্থগোরোচনাচূর্ণাবচারণং ব্রণে| সারোদ্ভবং সালসারাদিসারোদ্ভবম্| প্রক্ষালনে ত্রিফলাকষাযশ্চ||৫২-৫৫||

Adhikarana puShpikA · Śloka 18

ইতি সুশ্রুতসংহিতাযাং চিকিত্সাস্থানে গ্রন্থ্যপচ্যর্বুদগলগণ্ডচিকিত্সিতং নামাষ্টাদশোঽধ্যাযঃ ||১৮||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতটীকাযাং চিকিত্সাস্থানেঽষ্টাদশোঽধ্যাযঃ|