13. madhumēhacikitsitam

Adhikarana 1 (1-4) · Śloka 5

অথাতো মধুমেহচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| মধুমেহিত্বমাপন্নং ভিষগ্ভিঃ পরিবর্জিতম্ | যোগেনানেন মতিমান্ প্রমেহিণমুপাচরেত্ ||৩|| মাসে শুক্রে শুচৌ চৈব শৈলাঃ সূর্যাংশুতাপিতাঃ | জতুপ্রকাশং স্বরসং শিলাভ্যঃ প্রস্রবন্তি হি ||৪|| শিলাজত্বিতি বিখ্যাতং সর্বব্যাধিবিনাশনম্ |৫|

মধুমেহিত্বমিত্যাদি| শুক্রো মাসো জ্যেষ্ঠঃ| শুচিরাষাঢঃ| যদ্যপ্যন্যস্মিন্ কালে শিলাজতুপ্রস্রবণং দৃশ্যতে, তথাঽপি শুচিশুক্রমাসপরিগৃহীতং খরতরতরণিকিরণতাপিতাভ্যঃ শিলাভ্যো গুণবত্তরং ভবতি| জতুপ্রকাশং লাক্ষাপ্রকাশম্| সর্বব্যাধিঃ মধুমেহাদিঃ||১-৪||-

Adhikarana 2 (5) · Śloka 6

ত্রপ্বাদীনাং তু লোহানাং ষণ্ণামন্যতমান্বযম্ ||৫|| জ্ঞেযং স্বগন্ধতশ্চাপি ষড্যোনি প্রথিতং ক্ষিতৌ |৬|

ননু শিলানাং রূক্ষকঠিনানাং কথং স্নিগ্ধদ্রবঃ স্বরসঃ সম্ভবতীত্যাহ- ত্রপ্বাদীনামিত্যাদি| ত্রপ্বাদীনি ত্রপুসীসতাম্ররূপ্যসুবর্ণকৃষ্ণলৌহানি ষট্, তেষামন্যতমান্বযমেকতমান্বযম্| ষড্যোনি ষট্কারণকম্| যত্তু শিলাজতুচতুষ্টযং তন্ত্রান্তরে প্রোক্তং, তত্তেষাং চতুর্ণামপি মুখ্যানাং গুণখ্যাপনায, নান্যযোনিশিলাজতুনিবারণায||৫||-

Adhikarana 3 (6) · Śloka 7

লোহাদ্ভবতি তদ্যস্মাচ্ছিলাজতু জতুপ্রভম্ ||৬|| তস্য লোহস্য তদ্বীর্যং রসং চাপি বিভর্তি তত্ |৭|

লোহাদিত্যাদি| রসং চাপীতি চকারেণ বর্ণপ্রভাবং চ বিভর্তীত্যনুক্তং সমুচ্চীযতে| তত্র যল্লৌহজাতং স্যাত্, তল্লৌহস্যৈব বীর্যরসৌ বিভর্তি| তানি চ লৌহানি সুবর্ণাদীনি, তদ্গুণাস্তু সুশ্রুতাধ্যাযিনোঽন্নপানবিধ্যধ্যাযান্তে পঠন্তি| যদ্যপি জতুপ্রকাশো লাক্ষাসদৃশঃ শিলাস্রাবঃ শিলাজতুশব্দেনোক্তঃ, তথাঽপি সুবর্ণাদিনির্যাসেঽপি শিলাজত্বিতি প্রযোগঃ সর্ষপাদিতৈলবদৌপচারিকো দ্রষ্টব্যঃ||৬||-

Adhikarana 4 (7) · Śloka 8

ত্রপুসীসাযসাদীনি প্রধানান্যুত্তরোত্তরম্ ||৭|| যথা তথা প্রযোগেঽপি শ্রেষ্ঠে শ্রেষ্ঠগুণাঃ স্মৃতাঃ |৮|

তেষাং পরস্পরাপেক্ষং প্রাধান্যং নির্দিশন্নাহ- ত্রপ্বিত্যাদি| ত্রপুসীসযোর্লোহত্বস্য নাতিপ্রসিদ্ধত্বাদয ইতি বিশেষণম্| ত্রপুসীসাযঃসমুদ্ভবং শিলাজতু ত্রপুসীসাযসং, তদাদিভূতং যেষাং তানি ত্রপুসীসাযসাদীনি ত্রপুসীসতাম্ররূপ্যসুবর্ণকৃষ্ণলোহজানি| প্রাধান্যং তেষাং কুত ইত্যাহ- শ্রেষ্ঠে শ্রেষ্ঠগুণা ইতি|- শ্রেষ্ঠে শ্রেষ্ঠদ্রব্যে||৭||-

Adhikarana 5 (8) · Śloka 9

তত্সর্বং তিক্তকটুকং কষাযানুরসং সরম্ ||৮|| কটুপাক্যুষ্ণবীর্যং চ শোষণং ছেদনং তথা |৯|

ইদানীং সামান্যলক্ষণাভিধানমাহ- তত্সর্বমিত্যাদি শোষণং দুষ্টরক্তাদেঃ| ছেদনং কফগ্রন্থ্যাদিচ্ছেদকৃত্||৮||-

Adhikarana 6 (9) · Śloka 10

তেষু যত্ কৃষ্ণমলঘু স্নিগ্ধং নিঃশর্করং চ যত্ ||৯|| গোমূত্রগন্ধি যচ্চাপি তত্ প্রধানং প্রচক্ষতে |১০|

তেষাং প্রধানলক্ষণমুপাদানার্থমুপদিশন্নাহ- তেষ্বিত্যাদি||৯||

Adhikarana 7 (10-16) · Śloka 17

তদ্ভাবিতং সারগণৈর্হৃতদোষো দিনোদযে ||১০|| পিবেত্ সারোদকেনৈব শ্লক্ষ্ণপিষ্টং যথাবলম্ | জাঙ্গলেন রসেনান্নং তস্মিঞ্জীর্ণে তু ভোজযেত্ ||১১|| উপযুজ্য তুলামেবং গিরিজাদমৃতোপমাত্ | বপুর্বর্ণবলোপেতো মধুমেহবিবর্জিতঃ ||১২|| জীবেদ্বর্ষশতং পূর্ণমজরোঽমরসন্নিভঃ | শতং শতং তুলাযাং তু সহস্রং দশতৌলিকে ||১৩|| ভল্লাতকবিধানেন পরিহারবিধিঃ স্মৃতঃ | মেহং কুষ্ঠমপস্মারমুন্মাদং শ্লীপদং গরম্ ||১৪|| শোষং শোফার্শসী গুল্মং পাণ্ডুতাং বিষমজ্বরম্ | অপোহত্যচিরাত্কালাচ্ছিলাজতু নিষেবিতম্ ||১৫|| ন সোঽস্তি রোগো যং চাপি নিহন্যান্ন শিলাজতু | শর্করাং চিরসম্ভূতাং ভিনত্তি চ তথাঽশ্মরীম্ ||১৬|| ভাবনালোডনে চাস্য কর্তব্যে ভেষজৈর্হিতৈঃ |১৭|

ইদানীমস্যোপযোগবিধিং নির্দিশন্নাহ- তদ্ভাবিতমিত্যাদি| সারগণৈঃ শালসারাদিভিঃ| তত্র ভাব্যদ্রব্যসমং ক্বথনীযমষ্টগুণে জলে নিষ্ক্বাথ্যাষ্টভাগাবশিষ্টেন কষাযমানম্| দশাহং বিংশতিদিনানি ত্রিংশদ্দিনানি বা ভাবযেত্| হৃতদোষঃ সংশুদ্ধদেহঃ| দিনোদযে প্রভাতে এব, সারোদকেনৈব পিবেত্| জাঙ্গলেন রসেন ভোজযেত্, অন্যথা শোষণচ্ছেদনত্বাদ্বাতকোপঃ স্যাত্| তুলা পলশতম্| গিরিজাচ্ছিলাজতুনঃ| ন সোঽস্তি রোগ ইত্যত্র রোগশব্দো দোষেষু বর্ততে, অথবা শস্ত্রসাধ্যেষ্বশ্মর্যাদিষু| নানাবিধস্বাস্থ্যকরদ্রব্যভাবনাং চোপদিশন্নাহ- ভাবনালোডনে ইত্যাদি||১০-১৬||-

Adhikarana 8 (17-18) · Śloka 19

এবং চ মাক্ষিকং ধাতুং তাপীজমমৃতোপমম্ ||১৭|| মধুরং কাঞ্চনাভাসমম্লং বা রজতপ্রভম্ | পিবন্ হন্তি জরাকুষ্ঠমেহপাণ্ড্বামযক্ষযান্ ||১৮|| তদ্ভাবিতঃ কপোতাংশ্চ কুলত্থাংশ্চ বিবর্জযেত্ |১৯|

শিলাজতুপ্রযোগেণৈব মাক্ষিকধাতুপ্রযোগমতিদিশন্নাহ- এবং চ মাক্ষিকমিত্যাদি| তাপীজং তাপীনদীজং সুবর্ণমাক্ষিকং রজতমাক্ষিকং চ| তদ্ভাবিত ইত্যাদি তাভ্যাং শিলাজতুমাক্ষিকধাতুভ্যাং ভাবিতো ব্যাপ্তদেহঃ| কুলত্থকপোতৌ যাবজ্জীবং বিবর্জযেত্||১৭-১৮||-

Adhikarana 9 (19) · Śloka 20

পঞ্চকর্মগুণাতীতং শ্রদ্ধাবন্তং জিজীবিষুম্ ||১৯|| যোগেনানেন মতিমান্ সাধযেদপি কুষ্ঠিনম্ |২০|

ইদানীং মধুমেহহরমপি যোগমুদ্দিশন্নাহ- পঞ্চেত্যাদি| পঞ্চকর্মগুণাতীতমিত্যত্র বমনাদীনাং পঞ্চকর্মগুণানামপ্রাপ্তফলমিত্যেকে; তত্তু ন সম্যক্, যতঃ পঞ্চশব্দেন পঞ্চমধাত্বস্থিস্থিতং কুষ্ঠমুক্তং, তত্র কর্মাণি সংশোধনসংশমনাভ্যঙ্গগুগ্গুলুশিলাজতুপ্রভৃতীনি, তেষাং গুণাঃ ফলানি, তান্যতীতম্; এতদুক্তং ভবতি- অস্থিগতং কুষ্ঠং সংশোধনাদিভিরপ্যপ্রাপ্তবিশেষং সাধযেদিতি; অন্যে তু, পূর্বরূপক্রিযযা সহ রসাদিধাতূনাং চতুর্ণাং ক্রিযাসমূহঃ পঞ্চকর্মাণীতি মন্যন্তে; প্রমেহস্য তু পঞ্চ গুণাঃ পশ্চিমাধ্যাযে কথিতাঃ| জিজীবিষুঃ জীবিতুমিচ্ছুঃ| প্রমেহিণং তাবত্সাধযেদেব কুষ্ঠিনমপীত্যপিশব্দার্থঃ||১৯||-

Adhikarana 10 (20-34) · Śloka 34

বৃক্ষাস্তুবরকা যে স্যুঃ পশ্চিমার্ণবভূমিষু ||২০|| বীচীতরঙ্গবিক্ষেপমারুতোদ্ধূতপল্লবাঃ | তেষাং ফলানি গৃহ্ণীযাত্ সুপক্বান্যম্বুদাগমে ||২১|| মজ্জাং তেভ্যোঽপি সংহৃত্য শোষযিত্বা বিচূর্ণ্য চ | তিলবত্ পীডযেদ্দ্রোণ্যাং স্রাবযেদ্বা কুসুম্ভবত্ ||২২|| তত্তৈলং সংহৃতং ভূযঃ পচেদাতোযসম্ক্ষযাত্ | অবতার্য করীষে চ পক্ষমাত্রং নিধাপযেত্ ||২৩|| স্নিগ্ধঃ স্বিন্নো হৃতমলঃ পক্ষাদূর্ধ্বং প্রযত্নবান্ | চতুর্থভক্তান্তরিতঃ শুক্লাদৌ দিবসে শুভে ||২৪|| মন্ত্রপূতস্য তৈলস্য পিবেন্মাত্রাং যথাবলম্ | তত্র মন্ত্রং প্রবক্ষ্যামি যেনেদমভিমন্ত্র্যতে ||২৫|| ‘মজ্জসার মহাবীর্য সর্বান্ ধাতূন্ বিশোধয | শঙ্খচক্রগদাপাণিস্ত্বামাজ্ঞাপযতেঽচ্যুতঃ’ ||২৬|| তেনাস্যোর্ধ্বমধশ্চাপি দোষা যান্ত্যসকৃত্ততঃ | অস্নেহলবণাং সাযং যবাগূং শীতলাং পিবেত্ ||২৭|| পঞ্চাহং প্রপিবেত্তৈলমনেন বিধিনা নরঃ | পক্ষং পরিহরেচ্চাপি মুদ্গযূষৌদনাশনঃ ||২৮|| পঞ্চভির্দিবসৈরেবং সর্বকুষ্ঠৈর্বিমুচ্যতে | তদেব খদিরক্বাথে ত্রিগুণে সাধু সাধিতম্ ||২৯|| নিহিতং পূর্ববত্ পক্ষাত্ পিবেন্মাসমতন্দ্রিতঃ | তেনাভ্যক্তশরীরশ্চ কুর্বীতাহারমীরিতম্ ||৩০|| ভিন্নস্বরং রক্তনেত্রং বিশীর্ণং কৃমিভক্ষিতম্ | অনেনাশু প্রযোগেণ সাধযেত্ কুষ্ঠিনং নরম্ ||৩১|| সর্পির্মধুযুতং পীতং তদেব খদিরাম্বুনা | পক্ষিমাংসরসাহারং করোতি দ্বিশতাযুষম্ ||৩২|| তদেব নস্যে পঞ্চাশদ্দিবসানুপযোজিতম্ | বপুষ্মন্তং শ্রুতিধরং করোতি ত্রিশতাযুষম্ ||৩৩|| শোধযন্তি নরং পীতা মজ্জানস্তস্য মাত্রযা | মহাবীর্যস্তুবরকঃ কুষ্ঠমেহাপহঃ পরঃ ||৩৪||

ইদানীং জন্মভূমিমারভ্য তুবরকরসাযনকল্পং প্রস্তৌতি- বৃক্ষা ইত্যাদি| পশ্চিমার্ণবভূমিষু পশ্চিমসমুদ্রভূমিষু| বীচীতরঙ্গেত্যাদি| ঊর্মিপরম্পরাবিক্ষেপপবনোত্কম্পিতপল্লবাঃ সমুদ্রোদকস্যাত্যাসন্না ইত্যর্থঃ| তেষাং ফলেভ্যো মজ্জানমাদায; কুসুম্ভবত্ কুসুম্ভকুসুমবত্তৈলং বা গালযেত্, তত্তৈলগালনং সলিলাপচযং যাবত্| তত্তু করীষরাশৌ পক্ষং নিধাতুং প্রযোজযেত্, বিশিষ্টতমশক্ত্যুত্পাদনার্থম্| হৃতং মলং পুরীষং কফাদযোঽপি যস্য স তথা; তত্র কফে বমনমেব, বমনাত্ পক্ষাদেব বিরেচনং; যদাহুঃ- “পক্ষাদ্বিরেকো বান্তস্য” (চি. ৩৬) ইতি; বিরেচনাদপি পক্ষাদেব তৌবরকং তৈলং, তস্যাপি শোধনত্বাত্; এতেন পেযাদিসংসর্জনক্রমেণ সঞ্জাতবলস্তুবরকস্নেহং পিবেদিত্যর্থঃ| চতুর্থভক্তান্তরিত ইতি পক্ষাদূর্ধ্বং প্রথমেঽহ্নি সাযম্প্রাতঃ প্রকৃতিভোজনদ্বযং, দ্বিতীযেঽহ্নি প্রাতর্ভুক্ত্বা সাযং ভোজনং ন কার্যং, ফলাম্লমুষ্ণোদকং বা পাযযেত্ সাযং ভোজনস্থানে, ততস্তৃতীযেঽহনি লঘুকোষ্ঠায প্রাতঃ স্নেহং দদ্যাত্, এবং চতুর্থভক্তমন্তরিতং ভবতীত্যর্থঃ| তৈলস্যাপি পিবেন্মাত্রাং পাণিতলপ্রমাণাং, কর্ষপ্রমাণামিত্যর্থঃ| অস্নেহলবণাম্ অল্পস্নেহলবণাং, যতো নঞ্ ঈষদর্থে| পক্ষং পরিহরেত্, ‘ক্রোধাদীন্’ ইতি শেষঃ| মহাবীর্যো মহাপ্রভাবঃ| পর উত্কৃষ্টতমঃ||২০-৩৪||

Adhikarana 11 (35) · Śloka 35

সান্তর্ধূমস্তস্য মজ্জা তু দগ্ধঃ ক্ষিপ্তস্তৈলে সৈন্ধবং চাঞ্জনং চ | পৈল্ল্যং হন্যাদর্মনক্তান্ধ্যকাচান্ নীলীরোগং তৈমিরং চাঞ্জনেন ||৩৫||

সান্তর্ধূম ইত্যাদি| তৈলে তুবরকোত্থে| সৈন্ধবং লবণম্| অঞ্জনং স্রোতোঞ্জনং, তস্যোত্পত্তিস্থানং বর্ণসা সিন্ধুশ্চ মহানদঃ; অথবা বর্ণসোদ্ভবাঞ্জনপরিহারায সৈন্ধবমুক্তং, তেন সিন্ধুমহানদোদ্ভবমেবাঞ্জনং গ্রাহ্যম্| মজ্জাদিকং ত্রিতযমন্তর্ধূমেন দগ্ধম্| এতেন তুবরকস্য ষড্বিধঃ প্রযোগ উক্তঃ; তদ্যথা- তৈলং পঞ্চাহিকপ্রযোগেণ কুষ্ঠহর একঃ, তথা তদেব খদিরাম্বুসিদ্ধং বিশিষ্টাবস্থকুষ্ঠে দ্বিতীযঃ, তথা তদেব সর্পির্মধুখদিরকষাযবিধিনা তৃতীযঃ, তথা পরোঽপি পঞ্চাশদাহ্নিকো নস্যপ্রযোগো রাসাযনিকশ্চতুর্থঃ, মজ্জপ্রযোগঃ পঞ্চমঃ, তথাহি ‘শোধযন্তি নরং পীতাঃ’ ইত্যাদি, অঞ্জনপ্রযোগঃ ষষ্ঠঃ ‘সান্তর্ধূম’ ইত্যাদি||৩৫||

Adhikarana puShpikA · Śloka 13

ইতি সুশ্রুতসংহিতাযাং চিকিত্সাস্থানে মধুমেহচিকিত্সিতং নাম ত্রযোদশোঽধ্যাযঃ ||১৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সস্থানে ত্রযোদশোঽধ্যাযঃ||১৩||