Adhikarana 1 (1-3) · Śloka 3
অথাতো মূঢগর্ভচিকিত্সিতং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
নাতোঽন্যত্ কষ্টতমমস্তি যথা মূঢগর্ভশল্যোদ্ধরণম্; অত্র হি যোনিযকৃত্প্লীহান্ত্রবিবরগর্ভাশযানাং মধ্যে কর্ম কর্তব্যং স্পর্শেন, উত্কর্ষণাপকর্ষণস্থানাপবর্তনোত্কর্তনভেদনচ্ছেদনপীডনর্জূকরণদারণানি চৈকহস্তেন গর্ভং গর্ভিণীং চাহিংসতা, তস্মাদধিপতিমাপৃচ্ছ্য পরং চ যত্নমাস্থাযোপক্রমেত ||৩||
View original
अथातो मूढगर्भचिकित्सितं व्याख्यास्यामः ||१||
यथोवाच भगवान् धन्वन्तरिः ||२||
नातोऽन्यत् कष्टतममस्ति यथा मूढगर्भशल्योद्धरणम्; अत्र हि योनियकृत्प्लीहान्त्रविवरगर्भाशयानां मध्ये कर्म कर्तव्यं स्पर्शेन, उत्कर्षणापकर्षणस्थानापवर्तनोत्कर्तनभेदनच्छेदनपीडनर्जूकरणदारणानि चैकहस्तेन गर्भं गर्भिणीं चाहिंसता, तस्मादधिपतिमापृच्छ्य परं च यत्नमास्थायोपक्रमेत ||३||
উত্কর্ষণম্ অধোগতস্যোর্ধ্বীকরণম্, অপকর্ষণম্ ঊর্ধ্বগতস্যাধঃ কর্ষণং, স্থানাপবর্তনং স্থানেষু সক্তস্য গর্ভশয্যাত উত্তানস্যাবাঙ্মুখীকরণম্, উদ্বর্তনম্ অবাঙ্মুখস্যোত্তানীকরণম্; অত্র কেচিত্ ‘স্থানব্যাবর্তনং’ ইতি পঠন্তি; তত্র স্থানং স্থিতিঃ; স্থানে গর্ভশয্যাযাং তির্যগাদিস্থিতস্যোত্তানস্যাধোব্যাবৃত্ত্যা স্থাপনম্; ঊর্ধ্বস্য কস্যচিদঙ্গস্য ছেদনমুত্কর্তনং, ছেদনমিতি মৃতস্য তু তেষু তেষু স্থানেষু সক্তস্য তস্য তস্যাঙ্গস্য ছেদনং দ্বৈধীকরণং, গর্ভকুক্ষ্যাদেরাধ্মাতস্য বিদারণং ভেদনং, পীডনং চম্পনং (বলনম্), ঋজূকরণং বক্রস্য প্রাঞ্জলীকরণং, দারণং বিদারণম্||১-৩||
Adhikarana 2 (4) · Śloka 4
তত্র সমাসেনাষ্টবিধা মূঢগর্ভগতিরুদ্দিষ্টা; স্বভাবগতা অপি ত্রযঃ সঙ্গা ভবন্তি- শিরসো বৈগুণ্যাদংসযোর্জঘনস্য বা ||৪||
View original
तत्र समासेनाष्टविधा मूढगर्भगतिरुद्दिष्टा; स्वभावगता अपि त्रयः सङ्गा भवन्ति- शिरसो वैगुण्यादंसयोर्जघनस्य वा ||४||
তত্রেত্যাদি| শিরসো বৈগুণ্যাত্ বক্রত্বাত্, অংসযোর্জঘনস্য চ বৈগুণ্যাদিত্যনুবর্ততে; বৈগুণ্যং বক্রতা| অংসো বাহুশিরঃ, জঘনং কটেরগ্রভাগঃ||৪||
Adhikarana 3 (5-8) · Śloka 8
জীবতি তু গর্ভে সূতিকাগর্ভনির্হরণে প্রযতেত |
নির্হর্তুমশক্যে চ্যাবনান্ মন্ত্রানুপশৃণুযাত্; তান্ বক্ষ্যামঃ ||৫||
‘ইহামৃতং চ সোমশ্চ চিত্রভানুশ্চ ভামিনি |
উচ্চৈঃশ্রবাশ্চ তুরগো মন্দিরে নিবসন্তু তে ||৬||
ইদমমৃতমপাং সমুদ্ধৃতং বৈ তব লঘু গর্ভমিমং প্রমুঞ্চতু স্ত্রি |
তদনলপবনার্কবাসবাস্তে সহ লবণাম্বুধরৈর্দিশন্তু শান্তিম্ ||৭||
মুক্তাঃ পশোর্বিপাশাশ্চ মুক্তাঃ সূর্যেণ রশ্মযঃ |
মুক্তঃ সর্বভযাদ্গর্ভ এহ্যেহি বিরমাবিতঃ ||৮||
View original
जीवति तु गर्भे सूतिकागर्भनिर्हरणे प्रयतेत |
निर्हर्तुमशक्ये च्यावनान् मन्त्रानुपशृणुयात्; तान् वक्ष्यामः ||५||
‘इहामृतं च सोमश्च चित्रभानुश्च भामिनि |
उच्चैःश्रवाश्च तुरगो मन्दिरे निवसन्तु ते ||६||
इदममृतमपां समुद्धृतं वै तव लघु गर्भमिमं प्रमुञ्चतु स्त्रि |
तदनलपवनार्कवासवास्ते सह लवणाम्बुधरैर्दिशन्तु शान्तिम् ||७||
मुक्ताः पशोर्विपाशाश्च मुक्ताः सूर्येण रश्मयः |
मुक्तः सर्वभयाद्गर्भ एह्येहि विरमावितः ||८||
জীবতীত্যাদি| প্রযতেত যত্নং কুর্বীত| কেচিদাচার্যা মন্ত্রব্যাখ্যানং ন কুর্বন্তি, কেচিত্ কুর্বন্তি তদাহ- ইহেত্যাদি| অমৃতং সমুদ্রমন্থনোদ্ভূতং, চিত্রভানুরাদিত্যঃ, ভামিনি হে বরস্ত্রি, উচ্চৈঃশ্রবা অমৃতমন্থনোত্পন্নস্তুরগঃ শক্রবাহনঃ, লঘু শীঘ্রং, দিশন্তু প্রযচ্ছন্তু||৫-৮||
Adhikarana 4 (9-11) · Śloka 11
ঔষধানি চ বিদধ্যাদ্যথোক্তানি |
মৃতে চোত্তানাযা আভুগ্নসক্থ্যা বস্ত্রাধারকোন্নমিতকট্যা ধন্বননগবৃত্তিকাশাল্মলীমৃত্স্নঘৃতাভ্যাং ম্রক্ষযিত্বা হস্তং যোনৌ প্রবেশ্য গর্ভমুপহরেত্ |
তত্র সক্থিভ্যামাগতমনুলোমমেবাঞ্ছেত্, একসক্থ্না প্রতিপন্নস্যেতরসক্থি প্রসার্যাপহরেত্, স্ফিগ্দেশেনাগতস্য স্ফিগ্দেশং প্রপীড্যোর্ধ্বমুত্ক্ষিপ্য সক্থিনী প্রসার্যাপহরেত্, তির্যগাগতস্য পরিঘস্যেব তিরশ্চীনস্য পশ্চাদর্ধমূর্ধ্বমুত্ক্ষিপ্য পূর্বার্ধমপত্যপথং প্রত্যার্জবমানীযাপহরেত্, পার্শ্বাপবৃত্তশিরসমংসং প্রপীড্যোর্ধ্বমুত্ক্ষিপ্য শিরোঽপত্যপথমানীযাপহরেত্, বাহুদ্বযপ্রতিপন্নস্যোর্ধ্বমুত্পীড্যাংসৌ শিরোঽনুলোমমানীযাপহরেত্, দ্বাবন্ত্যাবসাধ্যৌ মূঢগর্ভৌ, এবমশক্যে শস্ত্রমবচারযেত্ ||৯||
সচেতনং চ শস্ত্রেণ ন কথঞ্চন দারযেত্ |
দার্যমাণো হি জননীমাত্মানং চৈব ঘাতযেত্ ||১০||
অবিষহ্যে বিকারে তু শ্রেযো গর্ভস্য পাতনম্ |
ন গর্ভিণ্যা বিপর্যাসস্তস্মাত্প্রাপ্তং ন হাপযেত্ ||১১||
View original
औषधानि च विदध्याद्यथोक्तानि |
मृते चोत्तानाया आभुग्नसक्थ्या वस्त्राधारकोन्नमितकट्या धन्वननगवृत्तिकाशाल्मलीमृत्स्नघृताभ्यां म्रक्षयित्वा हस्तं योनौ प्रवेश्य गर्भमुपहरेत् |
तत्र सक्थिभ्यामागतमनुलोममेवाञ्छेत्, एकसक्थ्ना प्रतिपन्नस्येतरसक्थि प्रसार्यापहरेत्, स्फिग्देशेनागतस्य स्फिग्देशं प्रपीड्योर्ध्वमुत्क्षिप्य सक्थिनी प्रसार्यापहरेत्, तिर्यगागतस्य परिघस्येव तिरश्चीनस्य पश्चादर्धमूर्ध्वमुत्क्षिप्य पूर्वार्धमपत्यपथं प्रत्यार्जवमानीयापहरेत्, पार्श्वापवृत्तशिरसमंसं प्रपीड्योर्ध्वमुत्क्षिप्य शिरोऽपत्यपथमानीयापहरेत्, बाहुद्वयप्रतिपन्नस्योर्ध्वमुत्पीड्यांसौ शिरोऽनुलोममानीयापहरेत्, द्वावन्त्यावसाध्यौ मूढगर्भौ, एवमशक्ये शस्त्रमवचारयेत् ||९||
सचेतनं च शस्त्रेण न कथञ्चन दारयेत् |
दार्यमाणो हि जननीमात्मानं चैव घातयेत् ||१०||
अविषह्ये विकारे तु श्रेयो गर्भस्य पातनम् |
न गर्भिण्या विपर्यासस्तस्मात्प्राप्तं न हापयेत् ||११||
মন্ত্রান্নির্দিশ্যৌষধানি নির্দিশন্নাহ- ঔষধানীত্যাদি| তানি পুনঃ শারীরে অপরাপাতনোদিতানি পাণিপাদলেপা যোনিধূপনমাতুরপানাদিকং চ| নিষ্ফলে মন্ত্রে তন্ত্রে চ বৃথাভূতেষু সূতীজনব্যাপারেষু ভিষজাং শল্যাহরণোপাযং নির্দিশন্নাহ- মৃতে চেতি| চকারাদফলীভূতেষু মন্ত্রতন্ত্রপ্রসূতীজননব্যাপারেষু জীবত্যপীত্যনুক্তং সমুচ্চিনোতি| আভুগ্নসক্থ্যা ইতি সঙ্কুচিতসক্থ্যাঃ| ধন্বনো ধনুর্বৃক্ষো বদরীসদৃশপত্রঃ, নগবৃত্তিকা শল্লকী, যদ্যপি মৃত্স্নশব্দঃপ্রশস্তাযাং মৃদি বর্ততে তথাঽপ্যত্র ধনুর্বৃক্ষশল্লকীশাল্মলীনাং পিচ্ছিলে চুম্পে মৃত্স্নশব্দো বোদ্ধব্যঃ| ঘৃতং গব্যং ঘৃতং, তাভ্যাং পাণিং ম্রক্ষযিত্বা বিলিপ্য, মূঢগর্ভমপহরেদিতি সামান্যো বিধিঃ| মৃতং চেতি চকারাদপহরণে বিশেষেণ বিধিমাহ- তত্রেত্যাদি| আঞ্ছেত্ আকর্ষেত্| একসক্থ্নেতি প্রথমমেকসক্থিপ্রতিপন্নং, দ্বিতীযসক্থি পুনরাভুগ্নং স্থিত্বাঽঽগতমিত্যর্থঃ, তদপি প্রসার্য প্রগুণীভূতসক্থিদ্বযমপহরণার্থমাঞ্ছেদিতি পূর্বস্মাদ্বিশেষঃ; সক্থি জঙ্ঘোচ্যতে, অযং দ্বিতীযঃ| স্ফিগিত্যাদি| অযং তৃতীযঃ| তির্যগিত্যাদি| পরিঘোঽর্গলাদণ্ডঃ| আর্জবমানীয ঋজুভাবমানীযাপহরেদিতি, অযং চতুর্থঃ| পার্শ্বেত্যাদি| পার্শ্বাপবৃত্তং পার্শ্ববলিতং শিরো যস্য, অপত্যপথো যোনিঃ; অযং পঞ্চমঃ| বাহুদ্বযেত্যাদি| অযং ষষ্ঠঃ| তত্র আদ্যং মূঢগর্ভত্রিতযং পাদাভ্যামাহরণীযং, তদিতরত্তু ত্রিতযং শিরসা, দ্বাবিতি শেষং তু মূঢগর্ভদ্বযমসাধ্যম্, এবমষ্টৌ মূঢগর্ভাঃ| দার্যমাণঃ ছিদ্যমানো গর্ভো মাতরমাত্মানং চ ব্যাপাদযেত্| ঘাতযেদিতি সর্বথৈবাশক্যহস্তাকর্ষে দ্বযোরপি গর্ভগর্ভিণ্যোর্বিপত্তিসিদ্ধেঃ| শস্ত্রমন্ত্রাদিনোপাযেনাসিদ্ধৌ গর্ভচ্যাবনং গর্ভিণীরক্ষার্থং কার্যমিত্যাহ- অবিষহ্য ইতি| সোঢুমশক্যে বিকারে ব্যাধৌ সতি কিং কর্তব্যমিত্যাহ- শ্রেযো গর্ভস্যেতি; শ্রেযো ভবতীত্যর্থঃ| গর্ভপাতনফলমাহ- ন গর্ভিণ্যা বিপর্যাস ইতি; বিপর্যাসো মৃত্যুরিত্যর্থঃ| তস্মাত্ প্রাপ্তকালং ন হাপযেত্ নোল্লঙ্ঘযেদিত্যর্থঃ||৯-১১||
Adhikarana 5 (12-19) · Śloka 20
ততঃ স্ত্রিযমাশ্বাস্য মণ্ডলাগ্রেণাঙ্গুলীশস্ত্রেণ বা শিরো বিদার্য, শিরঃকপালান্যাহৃত্য, শঙ্কুনা গৃহীত্বোরসি কক্ষাযাং বাঽপহরেত্; অভিন্নশিরসমক্ষিকূটে গণ্ডে বা, অংসসংসক্তস্যাংসদেশে বাহূ ছিত্ত্বা, দৃতিমিবাততং বাতপূর্ণোদরং বা বিদার্য নিরস্যান্ত্রাণি শিথিলীভূতমাহরেত্, জঘনসক্তস্য বা জঘনকপালানীতি ||১২||
কিম্বহুনা- যদ্যদঙ্গং হি গর্ভস্য তস্য সজ্জতি তদ্ভিষক্ |
সম্যগ্বিনির্হরেচ্ছিত্ত্বা রক্ষেন্নারীং চ যত্নতঃ ||১৩||
গর্ভস্য গতযশ্চিত্রা জাযন্তেঽনিলকোপতঃ |
তত্রানল্পমতির্বৈদ্যো বর্তেত বিধিপূর্বকম্ ||১৪||
নোপেক্ষেত মৃতং গর্ভং মুহূর্তমপি পণ্ডিতঃ |
স হ্যাশু জননীং হন্তি নিরুচ্ছ্বাসং পশুং যথা ||১৫||
মণ্ডলাগ্রেণ কর্তব্যং ছেদ্যমন্তর্বিজানতা |
বৃদ্ধিপত্রং হি তীক্ষ্ণাগ্রং নারীং হিংস্যাত্ কদাচন ||১৬||
অথাপতন্তীমপরাং পাতযেত্ পূর্ববদ্ভিষক্ |
হস্তেনাপহরেদ্বাঽপি পার্শ্বভ্যাং পরিপীড্য বা ||১৭||
ধুনুযাচ্চ মুহুর্নারীং পীডযেদ্বাংঽসপিণ্ডিকাম্ |
তৈলাক্তযোনেরেবং তাং পাতযেন্মতিমান্ ভিষক্ ||১৮||
এবং নির্হৃতশল্যাং তু সিঞ্চেদুষ্ণেন বারিণা |
ততোঽভ্যক্তশরীরাযা যোনৌ স্নেহং নিধাপযেত্ ||১৯||
এবং মৃদ্বী ভবেদ্যোনিস্তচ্ছূলং চোপশাম্যতি |২০|
View original
ततः स्त्रियमाश्वास्य मण्डलाग्रेणाङ्गुलीशस्त्रेण वा शिरो विदार्य, शिरःकपालान्याहृत्य, शङ्कुना गृहीत्वोरसि कक्षायां वाऽपहरेत्; अभिन्नशिरसमक्षिकूटे गण्डे वा, अंससंसक्तस्यांसदेशे बाहू छित्त्वा, दृतिमिवाततं वातपूर्णोदरं वा विदार्य निरस्यान्त्राणि शिथिलीभूतमाहरेत्, जघनसक्तस्य वा जघनकपालानीति ||१२||
किम्बहुना- यद्यदङ्गं हि गर्भस्य तस्य सज्जति तद्भिषक् |
सम्यग्विनिर्हरेच्छित्त्वा रक्षेन्नारीं च यत्नतः ||१३||
गर्भस्य गतयश्चित्रा जायन्तेऽनिलकोपतः |
तत्रानल्पमतिर्वैद्यो वर्तेत विधिपूर्वकम् ||१४||
नोपेक्षेत मृतं गर्भं मुहूर्तमपि पण्डितः |
स ह्याशु जननीं हन्ति निरुच्छ्वासं पशुं यथा ||१५||
मण्डलाग्रेण कर्तव्यं छेद्यमन्तर्विजानता |
वृद्धिपत्रं हि तीक्ष्णाग्रं नारीं हिंस्यात् कदाचन ||१६||
अथापतन्तीमपरां पातयेत् पूर्ववद्भिषक् |
हस्तेनापहरेद्वाऽपि पार्श्वभ्यां परिपीड्य वा ||१७||
धुनुयाच्च मुहुर्नारीं पीडयेद्वांऽसपिण्डिकाम् |
तैलाक्तयोनेरेवं तां पातयेन्मतिमान् भिषक् ||१८||
एवं निर्हृतशल्यां तु सिञ्चेदुष्णेन वारिणा |
ततोऽभ्यक्तशरीराया योनौ स्नेहं निधापयेत् ||१९||
एवं मृद्वी भवेद्योनिस्तच्छूलं चोपशाम्यति |२०|
মৃতে তু গর্ভে শস্ত্রাবচরণং নির্দিশন্নাহ- তত ইতি| মণ্ডলাগ্রেণাঙ্গুলীশস্ত্রেণেতি অন্তর্মুখসঞ্জ্ঞিতেন কৃশতরশশধরকানুকারিণাঽর্ধদ্বযসংহিতমধ্যকীলিতেন মধ্যমাঙ্গুল্যঙ্গুষ্ঠপ্রবিষ্টলোহকটকনিযমিতেন, অন্যে পুনরেকাবযবেন মধ্যমাঙ্গুলীপ্রবিষ্টলোহকণ্টকেনেত্যাহুঃ| তদ্ধি শস্ত্রমন্তদ্বারং হস্তান্তর্গতং যোনৌ সুপ্রদেশপ্রবেশিতমপি সুখচ্ছেদকরং গর্ভিণীং ন হিনস্তি| শঙ্কুনা আকুঞ্চিতাকারেণ বডিশবিশেষেণ সম্যগ্গৃহীতং হৃদযে কক্ষে বাঽপহরেত্| শিরসঃ পুনরবৈগুণ্যেন নির্গতশিরসো বিপুলাংসদেশসক্তস্য বিধিমুপদিশন্নাহ- অভিন্নশিরসমিতি; কূটে গণ্ডে বা সঙ্গৃহ্য শঙ্কুনাঽপহরণম্| মৃতস্যাধ্মাতোদরস্য ক্রমাগতমুদরসঙ্গং নির্দিশন্নাহ- দৃতিমিবেত্যাদি|- দৃতিঃ পানীযপূর্ণখল্লী| জঘনসক্তস্যেত্যাদি|- জঘনসক্তং জঘনকপালানি বিদার্য, অপহৃত্যাপহরেত্| এবমুদ্দিষ্টানামাহরণোপাযং নির্দিশ্যানুক্তানামপি নানাপ্রকারাণাং নির্দিশতি- গর্ভস্যেত্যাদি| মৃতে তু দোষং নির্দিশন্নাহ- নোপেক্ষেতেত্যাদি| সঃ গর্ভঃ, হি যস্মাদর্থে| মণ্ডলাগ্রেণেতি মণ্ডলাগ্রাবচারণমুক্তমপি বৃদ্ধিপত্রনিষেধোপদেশার্থং পুনরুচ্যতে| অথাপতন্তীমিত্যাদি| অপরাং গর্ভাবরণং জরাযুসঞ্জ্ঞং যং লোকা আবলমিত্যাচক্ষতে| পূর্ববত্ শারীরোক্তবিধিনা||১২-১৯||-
Adhikarana 6 (20-27) · Śloka 28
কৃষ্ণাতন্মূলশুণ্ঠ্যেলাহিঙ্গুভার্গীঃ সদীপ্যকাঃ ||২০||
বচামতিবিষাং রাস্নাং চব্যং সঞ্চূর্ণ্য পাযযেত্ |
স্নেহেন দোষস্যন্দার্থং বেদনোপশমায চ ||২১||
ক্বাথং চৈষাং তথা কল্কং চূর্ণং বা স্নেহবর্জিতম্ |
শাকত্বগ্ঘিঙ্গ্বতিবিষাপাঠাকটুকরোহিণীঃ ||২২||
তথা তেজোবতীং চাপি পাযযেত্ পূর্ববদ্ভিষক্ |
ত্রিরাত্রং পঞ্চসপ্তাহং ততঃ স্নেহং পুনঃ পিবেত্ ||২৩||
পাযযেতাসবং নক্তমরিষ্টং বা সুসংস্কৃতম্ |
শিরীষককুভাভ্যাং চ তোযমাচমনে হিতম্ ||২৪||
উপদ্রবাশ্চ যেঽন্যে স্যুস্তান্ যথাস্বমুপাচরেত্ |
সর্বতঃ পরিশুদ্ধা চ স্নিগ্ধপথ্যাল্পভোজনা ||২৫||
স্বেদাভ্যঙ্গপরা নিত্যং ভবেত্ ক্রোধবিবর্জিতা |
পযো বাতহরৈঃ সিদ্ধং দশাহং ভোজনে হিতম্ ||২৬||
রসং দশাহং শেষে তু যথাযোগমুপাচরেত্ |
ব্যুপদ্রবাং বিশুদ্ধাং চ জ্ঞাত্বা চ বরবর্ণিনীম্ ||২৭||
ঊর্ধ্বং চতুর্ভ্যো মাসেভ্যো বিসৃজেত্ পরিহারতঃ |২৮|
View original
कृष्णातन्मूलशुण्ठ्येलाहिङ्गुभार्गीः सदीप्यकाः ||२०||
वचामतिविषां रास्नां चव्यं सञ्चूर्ण्य पाययेत् |
स्नेहेन दोषस्यन्दार्थं वेदनोपशमाय च ||२१||
क्वाथं चैषां तथा कल्कं चूर्णं वा स्नेहवर्जितम् |
शाकत्वग्घिङ्ग्वतिविषापाठाकटुकरोहिणीः ||२२||
तथा तेजोवतीं चापि पाययेत् पूर्ववद्भिषक् |
त्रिरात्रं पञ्चसप्ताहं ततः स्नेहं पुनः पिबेत् ||२३||
पाययेतासवं नक्तमरिष्टं वा सुसंस्कृतम् |
शिरीषककुभाभ्यां च तोयमाचमने हितम् ||२४||
उपद्रवाश्च येऽन्ये स्युस्तान् यथास्वमुपाचरेत् |
सर्वतः परिशुद्धा च स्निग्धपथ्याल्पभोजना ||२५||
स्वेदाभ्यङ्गपरा नित्यं भवेत् क्रोधविवर्जिता |
पयो वातहरैः सिद्धं दशाहं भोजने हितम् ||२६||
रसं दशाहं शेषे तु यथायोगमुपाचरेत् |
व्युपद्रवां विशुद्धां च ज्ञात्वा च वरवर्णिनीम् ||२७||
ऊर्ध्वं चतुर्भ्यो मासेभ्यो विसृजेत् परिहारतः |२८|
ব্যবস্থিতবিকল্পা হ্যেতে দেশপ্রকৃতিসাত্ম্যাপেক্ষযা| কৃষ্ণা পিপ্পলী, তন্মূলং পিপ্পলীমূলং, দীপ্যকঃ অজমোদা| প্রসবকাল এব জাতমূঢগর্ভাযাঃ কৃতকর্মণাঽপহৃতাপরাযাঃ পার্শ্বযোনিশূলকাঠিন্যশান্ত্যর্থং রক্তক্লেদাদিদোষপ্রসেকার্থং চ তৈলাক্তযোনেস্তৈলেন কৃষ্ণাদিপানম্; অকালমূঢগর্ভাযাস্তু লঙ্ঘিতাযাঃ পুনরন্নকালে উদ্দালকাদীনামন্নানামস্নেহলবণাভির্যবাগূভিরুপচারো যাবন্তো মাসা গর্ভস্য তাবন্ত্যেবাহানি; অনন্তরমাসে তু স্নেহাদিবিধানমকালমূঢগর্ভাযা অপি পূর্ববত্| শাকঃ কর্কশপত্রবৃক্ষঃ, ‘সাগবন’ ইতি লোকে| ত্রিরাত্রমিত্যাদি|- এবং ত্রিরাত্রং কৃষ্ণাদিচূর্ণপানেন শাকত্বগাদিচূর্ণপানেন বাঽঽহৃতকোষ্ঠরক্তক্লেদাদিদোষাযাঃ সপ্তাহং হ্রস্বমাত্রযা স্নেহপানম্| তেন বিশুদ্ধবাতাশযাযা দশাহাদূর্ধ্বং স্নিগ্ধপথ্যাল্পভোজনম্| তত্র নিত্যং বাহ্যাবপি স্বেদাভ্যঙ্গাববশ্যং কার্যৌ, তত্র দ্বিতীযদশাহে বাতহরসিদ্ধং পযো বক্ষ্যমাণং, তৃতীযে মাংসরসঃ| ককুভঃ সুগন্ধিমূলো বিটপঃ| আচমনস্নানাদৌ ষডঙ্গকল্পনাকল্পিতশিরীষককুভসলিলম্| উপদ্রবা ইতি উপদ্রবা বাতরোগজ্বরাদ্যাঃ| বাতহরৈঃ শতপুষ্পাদিভিঃ| যথাযোগমিতি সাত্ম্যাদ্যপক্ষযেতি ভাবঃ||২০-২৭||-
Adhikarana 7 (28-39) · Śloka 39
যোনিসন্তর্পণেঽভ্যঙ্গে পানে বস্তিষু ভোজনে ||২৮||
বলাতৈলমিদং চাস্যৈ দদ্যাদনিলবারণম্ |
বলামূলকষাযস্য দশমূলীশৃতস্য চ ||২৯||
যবকোলকুলত্থানাং ক্বাথস্য পযসস্তথা |
অষ্টাবষ্টৌ শুভা ভাগাস্তৈলাদেকস্তদেকতঃ ||৩০||
পচেদাবাপ্য মধুরং গণং সৈন্ধবসংযুতম্ |
তথাঽগুরুং সর্জরসং সরলং দেবদারু চ ||৩১||
মঞ্জিষ্ঠাং চন্দনং কুষ্ঠমেলাং কালানুসারিবাম্ |
মাংসীং শৈলেযকং পত্রং তগরং সারিবাং বচাম্ ||৩২||
শতাবরীমশ্বগন্ধাং শতপুষ্পাং পুনর্নবাম্ |
তত্ সাধুসিদ্ধং সৌবর্ণে রাজতে মৃন্মযেঽপি বা ||৩৩||
প্রক্ষিপ্য কলশে সম্যক্ স্বনুগুপ্তং নিধাপযেত্ |
বলাতৈলমিদং খ্যাতং সর্ববাতবিকারনুত্ ||৩৪||
যথাবলমতো মাত্রাং সূতিকাযৈ প্রদাপযেত্ |
যা চ গর্ভার্থিনী নারী ক্ষীণশুক্রশ্চ যঃ পুমান্ ||৩৫||
বাতক্ষীণে মর্মহতে মথিতেঽভিহতে তথা |
ভগ্নে শ্রমাভিপন্নে চ সর্বথৈবোপযুজ্যতে ||৩৬||
এতদাক্ষেপকাদীন্ বৈ বাতব্যাধীনপোহতি |
হিক্কাং কাসমধীমন্থং গুল্মং শ্বাসং চ দুস্তরম্ ||৩৭||
ষণ্মাসানুপযুজ্যৈতদন্ত্রবৃদ্ধিমপোহতি |
প্রত্যগ্রধাতুঃ পুরুষো ভবেচ্চ স্থিরযৌবনঃ ||৩৮||
রাজ্ঞামেতদ্ধি কর্তব্যং রাজমাত্রাশ্চ যে নরাঃ |
সুখিনঃ সুকুমারাশ্চ ধনিনশ্চাপি যে নরাঃ ||৩৯||
View original
योनिसन्तर्पणेऽभ्यङ्गे पाने बस्तिषु भोजने ||२८||
बलातैलमिदं चास्यै दद्यादनिलवारणम् |
बलामूलकषायस्य दशमूलीशृतस्य च ||२९||
यवकोलकुलत्थानां क्वाथस्य पयसस्तथा |
अष्टावष्टौ शुभा भागास्तैलादेकस्तदेकतः ||३०||
पचेदावाप्य मधुरं गणं सैन्धवसंयुतम् |
तथाऽगुरुं सर्जरसं सरलं देवदारु च ||३१||
मञ्जिष्ठां चन्दनं कुष्ठमेलां कालानुसारिवाम् |
मांसीं शैलेयकं पत्रं तगरं सारिवां वचाम् ||३२||
शतावरीमश्वगन्धां शतपुष्पां पुनर्नवाम् |
तत् साधुसिद्धं सौवर्णे राजते मृन्मयेऽपि वा ||३३||
प्रक्षिप्य कलशे सम्यक् स्वनुगुप्तं निधापयेत् |
बलातैलमिदं ख्यातं सर्ववातविकारनुत् ||३४||
यथाबलमतो मात्रां सूतिकायै प्रदापयेत् |
या च गर्भार्थिनी नारी क्षीणशुक्रश्च यः पुमान् ||३५||
वातक्षीणे मर्महते मथितेऽभिहते तथा |
भग्ने श्रमाभिपन्ने च सर्वथैवोपयुज्यते ||३६||
एतदाक्षेपकादीन् वै वातव्याधीनपोहति |
हिक्कां कासमधीमन्थं गुल्मं श्वासं च दुस्तरम् ||३७||
षण्मासानुपयुज्यैतदन्त्रवृद्धिमपोहति |
प्रत्यग्रधातुः पुरुषो भवेच्च स्थिरयौवनः ||३८||
राज्ञामेतद्धि कर्तव्यं राजमात्राश्च ये नराः |
सुखिनः सुकुमाराश्च धनिनश्चापि ये नराः ||३९||
বলামূলক্বাথস্য তথা দশমূলক্বাথস্য যবকোলকুলত্থানাং ক্বাথস্য পযসশ্চ প্রত্যেকমষ্টাবষ্টৌ ভাগাঃ, একঃ স্নেহাত্; এবং স্নেহাদ্দ্বাত্রিংশদ্গুণো দ্রবঃ, স্নেহচতুর্থাংশো ভেষজকল্কঃ| মধুরঃ কাকোল্যাদিগণঃ| কালানুসারিবা কৃষ্ণসারিবা, ‘কালানুসারি বা’ ইত্যত্র কেচিদাচার্যা অস্মিন্ তৈলে ক্ষীরশুক্লকং পঠন্তি, ক্ষীরশুক্লকং ক্ষীরবিদারী| স্বনুগুপ্তে নিরুপদ্রবস্থানে| অধীমন্থঃ অক্ষিরোগোঽভিষ্যন্দপূর্বকঃ| ষণ্মাসোপযোগাত্ কোশমপ্রাপ্তামন্ত্রবৃদ্ধিং হন্তি, কোশপ্রাপ্তাং পুনরন্ত্রবৃদ্ধিমসাধ্যামাহুঃ||২৮-৩৯||
Adhikarana 8 (40-43) · Śloka 43
বলাকষাযপীতেভ্যস্তিলেভ্যো বাঽপ্যনেকশঃ |
তৈলমুত্পাদ্য তত্ক্বাথশতপাকং কৃতং শুভম্ ||৪০||
নিবাতে নিভৃতাগারে প্রযুঞ্জীত যথাবলম্ |
জীর্ণেঽস্মিন্ পযসা স্নিগ্ধমশ্নীযাত্ ষষ্টিকৌদনম্ ||৪১||
অনেন বিধিনা দ্রোণমুপযুজ্যান্নমীরিতম্ |
ভুঞ্জীত দ্বিগুণং কালং বলবর্ণান্বিতস্ততঃ ||৪২||
সর্বপাপৈর্বিনির্মুক্তঃ শতাযুঃ পুরুষো ভবেত্ |
শতং শতং তথোত্কর্ষো দ্রোণে দ্রোণে প্রকীর্তিতঃ ||৪৩||
View original
बलाकषायपीतेभ्यस्तिलेभ्यो वाऽप्यनेकशः |
तैलमुत्पाद्य तत्क्वाथशतपाकं कृतं शुभम् ||४०||
निवाते निभृतागारे प्रयुञ्जीत यथाबलम् |
जीर्णेऽस्मिन् पयसा स्निग्धमश्नीयात् षष्टिकौदनम् ||४१||
अनेन विधिना द्रोणमुपयुज्यान्नमीरितम् |
भुञ्जीत द्विगुणं कालं बलवर्णान्वितस्ततः ||४२||
सर्वपापैर्विनिर्मुक्तः शतायुः पुरुषो भवेत् |
शतं शतं तथोत्कर्षो द्रोणे द्रोणे प्रकीर्तितः ||४३||
বলাতৈলানন্তরং বলাসংস্কারেণ শতপাকবিধানমাহ- বলেত্যাদি| পীতেভ্যো ভাবিতেভ্যঃ সপ্তকৃত্বঃ| তিলতুল্যবলামূলাষ্টগুণসলিলাষ্টাংশশেষিতকষাযভাবিতানাং তিলানাং তৈলমাদায তত্ক্বাথং বলাক্বাথং সামান্যক্বাথপরিভাষার্থকৃতক্বাথেন চতুর্গুণেন শতশঃ পচেত্; তত্ ক্বথং তত্কল্কমেব বেত্যেকে; পূর্ববলাতৈলসমুদ্দিষ্টৈর্মধুরাদিকল্কৈরেবেত্যন্যে||৪০-৪৩||
Adhikarana 9 (44) · Śloka 45
বলাকল্পেনাতিবলাগুডূচ্যাদিত্যপর্ণিষু |
সৈরেযকে বীরতরৌ শতাবর্যাং ত্রিকণ্টকে ||৪৪||
তৈলানি মধুকে কুর্যাত্ প্রসারিণ্যাং চ বুদ্ধিমান্ |৪৫|
View original
बलाकल्पेनातिबलागुडूच्यादित्यपर्णिषु |
सैरेयके वीरतरौ शतावर्यां त्रिकण्टके ||४४||
तैलानि मधुके कुर्यात् प्रसारिण्यां च बुद्धिमान् |४५|
উক্তবলাতৈলদ্বযকল্পেন সঙ্ক্ষেপার্থং দ্রব্যান্তরেষ্বতিদেশমুদ্দিশন্নাহ- বলেত্যাদি| আদিত্যপর্ণী সূর্যাবর্তঃ| বীরতরুঃ স্বনামপ্রসিদ্ধঃ, অর্জুন ইত্যেকে, কোকিলাক্ষ ইত্যপরে| অতিবলাদিতৈলেষু চ বলাতৈলোক্তকল্কপ্রক্ষেপঃ; অথবাঽতিবলাদীনামেব ক্বাথকল্কাভ্যাং তৈলানি পক্তব্যানীতি||৪৪||-
Adhikarana 10 (45-47) · Śloka 47
নীলোত্পলং বরীমূলং গব্যে ক্ষীরে বিপাচযেত্ ||৪৫||
শতপাকং ততস্তেন তিলতৈলং পচেদ্ভিষক্ |
বলাতৈলস্য কল্কাংস্তু সুপিষ্টাংস্তত্র দাপযেত্ ||৪৬||
সর্বেষামেব জানীযাদুপযোগং চিকিত্সকঃ |
বলাতৈলবদেতেষাং গুণাংশ্চৈব বিশেষতঃ ||৪৭||
View original
नीलोत्पलं वरीमूलं गव्ये क्षीरे विपाचयेत् ||४५||
शतपाकं ततस्तेन तिलतैलं पचेद्भिषक् |
बलातैलस्य कल्कांस्तु सुपिष्टांस्तत्र दापयेत् ||४६||
सर्वेषामेव जानीयादुपयोगं चिकित्सकः |
बलातैलवदेतेषां गुणांश्चैव विशेषतः ||४७||
নীলোত্পলমিত্যাদি| বরী শতাবরী||৪৫-৪৭||
Adhikarana puShpikA · Śloka 15
ইতি সুশ্রুতসংহিতাযাং চিকিত্সাস্থানে মূঢগর্ভচিকিত্সিতং নাম পঞ্চদশোঽধ্যাযঃ ||১৫||
View original
इति सुश्रुतसंहितायां चिकित्सास्थाने मूढगर्भचिकित्सितं नाम पञ्चदशोऽध्यायः ||१५||
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে পঞ্চদশোঽধ্যাযঃ||১৫||