Adhikarana 1 (1-2) · Śloka 2
অথাতো নেত্রবস্তিপ্রমাণপ্রবিভাগচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो नेत्रबस्तिप्रमाणप्रविभागचिकित्सितं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
নেত্রং যন্ত্রং; বস্তিরেণাদীনাং মূত্রাধারঃ, তদাধেযং দ্রব্যমপি; তযোঃ প্রমাণং প্রবিভাগশ্চ , স এব চিকিত্সিতং ব্যাধেঃ প্রতীকারো যস্মিংস্তত্||১-২||
Adhikarana 2 (3-4) · Śloka 4
তত্র স্নেহাদীনাং কর্মণাং বস্তিকর্ম প্রধানতমমাহুরাচার্যাঃ | কস্মাত্? অনেককর্মকরত্বাদ্বস্তেঃ; ইহ খলু বস্তির্নানাবিধদ্রব্যসংযোগাদ্দোষাণাং সংশোধনসংশমনসঙ্গ্রহণানি করোতি, ক্ষীণশুক্রং বাজীকরোতি, কৃশং বৃংহযতি, স্থূলং কর্শযতি, চক্ষুঃ প্রীণযতি, বলীপলিতমপহন্তি, বযঃ স্থাপযতি ||৩|| শরীরোপচযং বর্ণং বলমারোগ্যমাযুষঃ | কুরুতে পরিবৃদ্ধিং চ বস্তিঃ সম্যগুপাসিতঃ ||৪||
तत्र स्नेहादीनां कर्मणां बस्तिकर्म प्रधानतममाहुराचार्याः | कस्मात्? अनेककर्मकरत्वाद्बस्तेः; इह खलु बस्तिर्नानाविधद्रव्यसंयोगाद्दोषाणां संशोधनसंशमनसङ्ग्रहणानि करोति, क्षीणशुक्रं वाजीकरोति, कृशं बृंहयति, स्थूलं कर्शयति, चक्षुः प्रीणयति, वलीपलितमपहन्ति, वयः स्थापयति ||३|| शरीरोपचयं वर्णं बलमारोग्यमायुषः | कुरुते परिवृद्धिं च बस्तिः सम्यगुपासितः ||४||
🔊 Audio coming soon
বস্তিকর্ম তু মূত্রাধারপুটকেন সাধ্যং কর্ম; বস্তিশব্দো হি সামান্যো নিরূহে স্নেহবস্তৌ চ| বমনবিরেচনে তু প্রধানতরে, বস্তিকর্ম তু প্রধানতমম্| সঙ্গ্রহণানীতি দোষাণামেবাতিপ্রবর্তমানানামিত্যর্থঃ| ক্ষীণশুক্রং বাজীকরোতি অনেনাশ্ব ইব বলকারিণী হর্ষজা শক্তিরুক্তা| কৃশং বৃংহযতীত্যুপচযলক্ষণা শক্তিরুক্তা| বযঃ স্থাপযতীত্যনেন আযুর্বৃদ্ধিকরত্বং সূচযতি| এতদেব প্রধানতমত্বসাধনং শ্লোকেনাপি দর্শযন্নাহ- শরীরোপচযমিত্যাদি||৩-৪||
Adhikarana 3 (5) · Śloka 5
তথা জ্বরাতীসারতিমিরপ্রতিশ্যাযশিরোরোগাধিমন্থার্দিতাক্ষেপকপক্ষাঘাতৈকাঙ্গসর্বাঙ্গরোগাধ্মানোদর- যোনিশূলশর্করাশূলবৃদ্ধ্যুপদংশানাহমূত্রকৃচ্ছ্রগুল্মবাতশোণিতবাতমূত্রপুরীষোদাবর্ত- শুক্রার্তবস্তন্যনাশহৃদ্ধনুমন্যাগ্রহশর্করাশ্মরীমূঢগর্ভপ্রভৃতিষু চাত্যর্থমুপযুজ্যতে ||৫||
तथा ज्वरातीसारतिमिरप्रतिश्यायशिरोरोगाधिमन्थार्दिताक्षेपकपक्षाघातैकाङ्गसर्वाङ्गरोगाध्मानोदर- योनिशूलशर्कराशूलवृद्ध्युपदंशानाहमूत्रकृच्छ्रगुल्मवातशोणितवातमूत्रपुरीषोदावर्त- शुक्रार्तवस्तन्यनाशहृद्धनुमन्याग्रहशर्कराश्मरीमूढगर्भप्रभृतिषु चात्यर्थमुपयुज्यते ||५||
🔊 Audio coming soon
অনেকব্যাধিনির্ঘাতকত্বং দর্শযন্নাহ- তথা জ্বরাতীসারেত্যাদি| জ্বরাদিষু চাবস্থাবিশেষো বস্তের্বিষযঃ, স চ শাস্ত্রাদেব জ্ঞেযঃ||৫||
Adhikarana 4 (6) · Śloka 6
ভবতি চাত্র- বস্তির্বাতে চ পিত্তে চ কফে রক্তে চ শস্যতে | সংসর্গে সন্নিপাতে চ বস্তিরেব হিতঃ সদা ||৬||
भवति चात्र- बस्तिर्वाते च पित्ते च कफे रक्ते च शस्यते | संसर्गे सन्निपाते च बस्तिरेव हितः सदा ||६||
🔊 Audio coming soon
দোষকার্যে জ্বরাদৌ বস্তিপ্রযোগমভিধায জ্বরাদিকারণে দোষেঽপি বস্তের্হিতত্বং দর্শযন্নাহ- ভবতি চাত্রেত্যাদি| সংসর্গো দোষদ্বযপ্রকোপঃ, প্রকৃতিসমসমবেতজ্বরাদ্যারম্ভকদোষত্রযপ্রকোপঃ সন্নিপাতোঽত্রাভিপ্রেতঃ||৬||
Adhikarana 5 (7-9) · Śloka 9
তত্র সাংবত্সরিকাষ্টদ্বিরষ্টবর্ষাণাং ষডষ্টদশাঙ্গুলপ্রমাণানি কনিষ্ঠিকানামিকামধ্যমাঙ্গুলিপরিণাহান্যগ্রেঽধ্যর্ধাঙ্গুলদ্ব্যঙ্গুলার্ধতৃতীযাঙ্গুলসন্নিবিষ্টকর্ণিকানি কঙ্কশ্যেনবর্হিণপক্ষনাডীতুল্যপ্রবেশানি মুদ্গমাষকলাযমাত্রস্রোতাংসি বিদধ্যান্নেত্রাণি | তেষু চাস্থাপনদ্রব্যপ্রমাণমাতুরহস্তসম্মিতেন প্রসৃতেন সম্মিতৌ প্রসৃতৌ দ্বৌ চত্বারোঽষ্টৌ চ বিধেযাঃ ||৭|| বর্ষান্তরেষু নেত্রাণাং বস্তিমানস্য চৈব হি | বযোবলশরীরাণি সমীক্ষ্যোত্কর্ষযেদ্বিধিম্ ||৮|| পঞ্চবিংশতেরূর্ধ্বং দ্বাদশাঙ্গুলং, মূলেঽঙ্গুষ্ঠোদরপরীণাহম্, অগ্রে কনিষ্ঠিকোদরপরীণাহম্, অগ্রে ত্র্যঙ্গুলসন্নিবিষ্টকর্ণিকং, গৃধ্রপক্ষনাডীতুল্যপ্রবেশং, কোলাস্থিমাত্রছিদ্রং, ক্লিন্নকলাযমাত্রছিদ্রমিত্যেকে; সর্বাণি মূলে বস্তিনিবন্ধনার্থং দ্বিকর্ণিকানি | আস্থাপনদ্রব্যপ্রমাণং তু বিহিতং দ্বাদশপ্রসৃতাঃ | সপ্ততেস্তূর্ধ্বং নেত্রপ্রমাণমেতদেব, দ্রব্যপ্রমাণং তু দ্বিরষ্টবর্ষবত্ ||৯||
तत्र सांवत्सरिकाष्टद्विरष्टवर्षाणां षडष्टदशाङ्गुलप्रमाणानि कनिष्ठिकानामिकामध्यमाङ्गुलिपरिणाहान्यग्रेऽध्यर्धाङ्गुलद्व्यङ्गुलार्धतृतीयाङ्गुलसन्निविष्टकर्णिकानि कङ्कश्येनबर्हिणपक्षनाडीतुल्यप्रवेशानि मुद्गमाषकलायमात्रस्रोतांसि विदध्यान्नेत्राणि | तेषु चास्थापनद्रव्यप्रमाणमातुरहस्तसम्मितेन प्रसृतेन सम्मितौ प्रसृतौ द्वौ चत्वारोऽष्टौ च विधेयाः ||७|| वर्षान्तरेषु नेत्राणां बस्तिमानस्य चैव हि | वयोबलशरीराणि समीक्ष्योत्कर्षयेद्विधिम् ||८|| पञ्चविंशतेरूर्ध्वं द्वादशाङ्गुलं, मूलेऽङ्गुष्ठोदरपरीणाहम्, अग्रे कनिष्ठिकोदरपरीणाहम्, अग्रे त्र्यङ्गुलसन्निविष्टकर्णिकं, गृध्रपक्षनाडीतुल्यप्रवेशं, कोलास्थिमात्रछिद्रं, क्लिन्नकलायमात्रछिद्रमित्येके; सर्वाणि मूले बस्तिनिबन्धनार्थं द्विकर्णिकानि | आस्थापनद्रव्यप्रमाणं तु विहितं द्वादशप्रसृताः | सप्ततेस्तूर्ध्वं नेत्रप्रमाणमेतदेव, द्रव्यप्रमाणं तु द्विरष्टवर्षवत् ||९||
🔊 Audio coming soon
নেত্রপ্রমাণমাস্থাপনদ্রব্যপ্রমাণং চ বযোভেদেন প্রদর্শযিতুমাহ- তত্র সাংবত্সরিকেত্যাদি| তত্র সাংবত্সরিকাষ্টদ্বিরষ্টবর্ষাণামিত্যত্র যথাসঙ্খ্যব্যাখ্যানেন সাংবত্সরিকবালস্য নিরূহযন্ত্রং ষডঙ্গুলপ্রমাণং, তত্কনিষ্ঠিকাপরিণাহম্, অগ্রেঽধ্যর্ধাঙ্গুলসন্নিবিষ্টকর্ণিকং , কঙ্কপক্ষনাডীতুল্যপ্রবেশং মূলে, মুদ্গবাহিস্রোতশ্চাগ্রে বিদধ্যাত্| ছত্রাকারা গুদেঽধিকান্তঃপ্রবেশরোধিনী কর্ণিকা কথ্যতে| কঙ্কঃ বক্রচঞ্চুঃ কৃষ্ণবর্ণঃ প্রসিদ্ধ এব| অষ্টবর্ষস্য পুনরষ্টাঙ্গুলপ্রমাণং, তদনামিকাপরিণাহম্, অগ্রে দ্ব্যঙ্গুলসন্নিবিষ্টকর্ণিকং, শ্যেনপক্ষনাডীতুল্যপ্রবেশং মূলে, মাষবাহিস্রোতশ্চাগ্রে বিদধ্যাত্| দ্বিরষ্টবর্ষস্য ষোডশবর্ষস্যেত্যর্থঃ| কিম্ভূতং যন্ত্রং? দশাঙ্গুলপ্রমাণং, তন্মধ্যাঙ্গুলিপরিণাহম্, অর্ধতৃতীযাঙ্গুলসন্নিবিষ্টকর্ণিকং , বর্হী মযূরস্তত্পক্ষনাডীতুল্যপ্রবেশং মূলে, কলাযবাহিস্রোতশ্চাগ্রে বিদধ্যাত্| তেষ্বিতি সাংবত্সরিকাষ্টদ্বিরষ্টবর্ষেষু বালেষু যথাসঙ্খ্যমাতুরহস্তেন দ্বৌ চত্বারোঽষ্টৌ চ প্রসৃতা বিধেযাঃ| প্রসৃতোঽত্র কুঞ্চিতাঙ্গুলিঃ পাণিঃ, ন তু পলদ্বযমিতি গযদাসাচার্যঃ| জেজ্জটাচার্যস্তু আতুরহস্তগ্রহণং মধ্যমপুরুষহস্তোপলক্ষণং, তেন তত্প্রসৃতেন পলদ্বযপ্রমিতেনেতি ব্যাখ্যানযতি| অত্র মধ্যবর্তিবর্ষাণাং নেত্রদ্রব্যমানং নির্দিশন্নাহ- বর্ষান্তরেষ্বিত্যাদি| পঞ্চবিংশতিং যাবত্ সমীক্ষ্য যথাযথমভ্যূহ্য নেত্রপ্রমাণং বস্তিদ্রব্যপ্রমাণং চোত্কর্ষযেত্| পঞ্চবিংশতেরিত্যাদি| গৃধ্রপক্ষনাডীতুল্যপ্রবেশং মূলে| ক্লিন্নকলাযমাত্রচ্ছিদ্রমগ্রে| সর্বাণি তু মূলে বস্তিনিবন্ধনার্থং দ্বিকর্ণিকানি দ্ব্যঙ্গুলান্তরাণি কুর্যাত্ দ্ব্যঙ্গুলমধ্যানীত্যর্থঃ||৭-৯||
Adhikarana 6 (10) · Śloka 10
মৃদুর্বস্তিঃ প্রযোক্তব্যো বিশেষাদ্বালবৃদ্ধযোঃ | তযোস্তীক্ষ্ণঃ প্রযুক্তস্তু বস্তির্হিংস্যাদ্ বলাযুষী ||১০||
मृदुर्बस्तिः प्रयोक्तव्यो विशेषाद्बालवृद्धयोः | तयोस्तीक्ष्णः प्रयुक्तस्तु बस्तिर्हिंस्याद् बलायुषी ||१०||
🔊 Audio coming soon
বালবৃদ্ধযোর্হীনোপচযশক্তিলক্ষণবলত্বেনাস্থাপনস্য মাত্রাকৃতং হীনত্বং প্রদর্শ্য তীক্ষ্ণাদিগুণহীনত্বং দর্শযন্নাহ- মৃদুর্বস্তিঃ প্রযোক্তব্য ইত্যাদি| তত্র মৃদুদ্রব্যকৃতো বস্তির্মৃদুঃ, তীক্ষ্ণশ্চ তদ্বিপর্যযঃ||১০||
Adhikarana 7 (11) · Śloka 11
(ব্রণনেত্রমষ্টাঙ্গুলং মুদ্গবাহিস্রোতঃ; ব্রণমবেক্ষ্য যথাস্বং স্নেহকষাযে বিদধীত) ||১১||
(व्रणनेत्रमष्टाङ्गुलं मुद्गवाहिस्रोतः; व्रणमवेक्ष्य यथास्वं स्नेहकषाये विदधीत) ||११||
🔊 Audio coming soon
শল্যতন্ত্রত্বাদস্য শাস্ত্রস্য ব্রণনেত্রপ্রমাণমাহ- ব্রণনেত্রমষ্টাঙ্গুলমিত্যাদি||১১||
Adhikarana 8 (12) · Śloka 12
তত্র নেত্রাণি সুবর্ণরজততাম্রাযোরীতিদন্তশৃঙ্গমণিতরুসারমযানি শ্লক্ষ্ণানি দৃঢানি গোপুচ্ছাকৃতীন্যৃজূনি গুটিকামুখানি চ ||১২||
तत्र नेत्राणि सुवर्णरजतताम्रायोरीतिदन्तशृङ्गमणितरुसारमयानि श्लक्ष्णानि दृढानि गोपुच्छाकृतीन्यृजूनि गुटिकामुखानि च ||१२||
🔊 Audio coming soon
তানি চ নেত্রাণি কিম্মযানি কিমাকৃতীনি বা তদাহ- তত্র নেত্রাণীত্যাদি| রীতিঃ পিত্তলং, মণিঃ স্ফটিকাদিঃ| শ্লক্ষ্ণানি অকর্কশানি| দৃঢানি অজর্জরাণি| গুটিকামুখানি অতীক্ষ্ণাগ্রাণি||১২||
Adhikarana 9 (13-14) · Śloka 14
বস্তযশ্চ বন্ধ্যা মৃদবো নাতিবহলা দৃঢাঃ প্রমাণবন্তো গোমহিষবরাহাজোরভ্রাণাম্ ||১৩|| নেত্রালাভে হিতা নাডী নলবংশাস্থিসম্ভবা | বস্ত্যলাভে হিতং চর্ম সূক্ষ্মং বা তান্তবং ঘনম্ ||১৪||
बस्तयश्च बन्ध्या मृदवो नातिबहला दृढाः प्रमाणवन्तो गोमहिषवराहाजोरभ्राणाम् ||१३|| नेत्रालाभे हिता नाडी नलवंशास्थिसम्भवा | बस्त्यलाभे हितं चर्म सूक्ष्मं वा तान्तवं घनम् ||१४||
🔊 Audio coming soon
কীদৃশা বস্তযো বন্ধ্যা ইত্যাহ- বস্তযশ্চ বন্ধ্যা ইত্যাদি| নাতিবহলা নাত্যুপচিতাঃ, নাতিদীর্ঘা ইত্যন্যে| তান্তবং বস্ত্রম্||১৩-১৪||
Adhikarana 10 (15-17) · Śloka 17
বস্তিং নিরুপদিগ্ধং তু শুদ্ধং সুপরিমার্জিতম্ | মৃদ্বনুদ্ধতহীনং চ মুহুঃ স্নেহবিমর্দিতম্ ||১৫|| নেত্রমূলে প্রতিষ্ঠাপ্য ন্যুব্জং তু বিবৃতাননম্ | বদ্ধ্বা লোহেন তপ্তেন চর্মস্রোতসি নির্দহেত্ ||১৬|| পরিবর্ত্য ততো বস্তিং বদ্ধ্বা গুপ্তং নিধাপযেত্ | আস্থাপনং চ তৈলং চ যথাবত্তেন দাপযেত্ ||১৭||
बस्तिं निरुपदिग्धं तु शुद्धं सुपरिमार्जितम् | मृद्वनुद्धतहीनं च मुहुः स्नेहविमर्दितम् ||१५|| नेत्रमूले प्रतिष्ठाप्य न्युब्जं तु विवृताननम् | बद्ध्वा लोहेन तप्तेन चर्मस्रोतसि निर्दहेत् ||१६|| परिवर्त्य ततो बस्तिं बद्ध्वा गुप्तं निधापयेत् | आस्थापनं च तैलं च यथावत्तेन दापयेत् ||१७||
🔊 Audio coming soon
গ্রহণযোগ্যবস্তেঃ পরিকর্ম বন্ধবিধিং চ দর্শযন্নাহ- বস্তিং নিরুপদিগ্ধমিত্যাদি| নিরুপদিগ্ধং মাংসাদ্যুপলেপবর্জিতম্| শুদ্ধং কষাযরঞ্জিতম্| সুপরিমার্জিতং সুষ্ঠুনির্মার্জিতম্| অনুদ্ধতহীনং নাধিকং ন হীনম্; এতেনাধেযদ্রব্যমানং সমীক্ষ্যাধারভূতস্য বস্তেঃ প্রমাণং বিধেযমিত্যর্থঃ| প্রতিষ্ঠাপ্য সংযোজ্য| ন্যুব্জম্ অধোমুখম্| গোমহিষাদিবস্তযো নিরূহযন্ত্রে যথালাভং সংযোজ্যাঃ; উত্তরবস্তিযন্ত্রে পুনরজোরভ্রবস্তী এব যোজনীযাবিতি||১৫-১৭||
Adhikarana 11 (18) · Śloka 18
তত্র দ্বিবিধো বস্তিঃ- নৈরূহিকঃ, স্নৈহিকশ্চ | আস্থাপনং, নিরূহ ইত্যনর্থান্তরং; তস্য বিকল্পো মাধুতৈলিকঃ; তস্য পর্যাযশব্দো যাপনো, যুক্তরথঃ, সিদ্ধবস্তিরিতি | স দোষনির্হরণাচ্ছরীরনীরোহণাদ্বা নিরূহঃ, বযঃস্থাপনাদাযুঃস্থাপনাদ্বা আস্থাপনম্ | মাধুতৈলিকবিধানং চ নিরূহোপক্রমচিকিত্সিতে বক্ষ্যামঃ | যথাপ্রমাণগুণবিহিতঃ স্নেহবস্তিবিকল্পোঽনুবাসনঃ পাদাব(প)কৃষ্টঃ | অনুবসন্নপি ন দুষ্যত্যনুদিবসং বা দীযত ইত্যনুবাসনঃ | তস্যাপি বিকল্পোঽর্ধার্ধমাত্রাবকৃষ্টোঽপরিহার্যো মাত্রাবস্তিরিতি ||১৮||
तत्र द्विविधो बस्तिः- नैरूहिकः, स्नैहिकश्च | आस्थापनं, निरूह इत्यनर्थान्तरं; तस्य विकल्पो माधुतैलिकः; तस्य पर्यायशब्दो यापनो, युक्तरथः, सिद्धबस्तिरिति | स दोषनिर्हरणाच्छरीरनीरोहणाद्वा निरूहः, वयःस्थापनादायुःस्थापनाद्वा आस्थापनम् | माधुतैलिकविधानं च निरूहोपक्रमचिकित्सिते वक्ष्यामः | यथाप्रमाणगुणविहितः स्नेहबस्तिविकल्पोऽनुवासनः पादाव(प)कृष्टः | अनुवसन्नपि न दुष्यत्यनुदिवसं वा दीयत इत्यनुवासनः | तस्यापि विकल्पोऽर्धार्धमात्रावकृष्टोऽपरिहार्यो मात्राबस्तिरिति ||१८||
🔊 Audio coming soon
অনর্থান্তরমিতি একার্থমিত্যর্থঃ| বস্তের্নৈরূহিকস্নৈহিকভেদাভ্যাং যৌ দ্বৌ বিকল্পৌ তৌ নিরূহস্নেহবস্ত্যাখ্যৌ, তযোর্নৈরূহিকমভিধায স্নৈহিকং বস্তিবিকল্পমভিধত্তে- যথেত্যাদি| যস্য যত্ প্রমাণং যো যো গুণস্তাভ্যাং বিহিতঃ স্নেহবস্ত্যাখ্যোঽনুবাসনসঞ্জ্ঞ ইত্যর্থঃ| যথাবযোনিরূহাণামিত্যাদিনা বিধাস্যমানোঽপি স্নেহবস্তিবিকল্পোঽনাগতাবেক্ষণতন্ত্রযুক্ত্যা বিহিত ইতি প্রদিষ্টঃ| যথাপ্রমাণমিত্যনেন সূচিতং প্রমাণং প্রকটযন্নাহ- পাদাব(প)কৃষ্ট ইতি|- যথাবয ইত্যাদিবক্ষ্যমাণবাক্যদর্শনাদাস্থাপনস্য পাদৈস্ত্রিভিরপকৃষ্টো হীনঃ পাদাব(প)কৃষ্টঃ| অযমর্থঃ- সাংবত্সরিকাদিকালাদ্যপেক্ষং যত্ প্রকুঞ্চাদি চতুর্বিংশতিপলাবসানং নিরূহপ্রমাণং তচ্চতুর্থাংশেন কর্ষমারভ্য ষট্পলানি যাবদনুবাসনস্য প্রমাণমিতি| তন্ত্রান্তরে চ মধ্যবযস্কমাশ্রিত্যানুবাসনস্যোত্তমাদিমাত্রাভেদেন ত্রৈবিধ্যমুক্তং, যথা- “ষট্পলী তু ভবেচ্ছ্রেষ্ঠা মধ্যমা ত্রিপলী ভবেত্| কনীযস্যধ্যর্ধপলা ত্রিধা মাত্রাঽনুবাসনে-” ইতি| তস্যাপি বিকল্প ইত্যাদি তস্যাপ্যনুবাসনস্য, ষট্পলপ্রমাণস্যার্ধার্ধমাত্রাবশিষ্টঃ পাদাবশিষ্টোঽধ্যর্ধপলমাত্র ইত্যর্থঃ| অপরিহার্যঃ অবিদ্যমানপরিহরণার্হঃ| গযী তু যথাপ্রমাণবিহিতাচ্চ বস্তেঃ পাদাংশঃ স্নেহবস্তিঃ, স্নেহবিকল্পোঽর্ধমাত্রাপকৃষ্টোঽনুবাসনং, তস্যাপি বিকল্পোঽর্ধমাত্রাপকৃষ্টোঽপরিহার্যো মাত্রাবস্তিরিতি| এতেন তন্মতে ষট্পলপ্রমাণঃ স্নেহবস্তিঃ, তদর্ধেন পলত্রযপ্রমাণমনুবাসনং, তস্যার্ধেন সার্ধপলপ্রমাণো মাত্রাবস্তিরিতি||১৮||
Adhikarana 12 (19) · Śloka 19
নিরূহঃ শোধনো লেখী স্নৈহিকো বৃংহণো মতঃ |১৯|
निरूहः शोधनो लेखी स्नैहिको बृंहणो मतः |१९|
🔊 Audio coming soon
ফলেনাপি তযোর্ভেদং দর্শযন্নাহ- নিরূহ ইত্যাদি| শোধনদ্রব্যসংযুক্তঃ শোধনো নিরূহঃ| সর্বনিরূহানুবাসনধর্মোঽযং, দ্রব্যবিশেষসংযোগাত্তু ক্বচিচ্ছোধনাদীনামুত্কর্ষাপকর্ষৌ| জেজ্জটাচার্যস্তু ‘স্নেহনো বৃংহণো মত’ ইতি পঠিত্বা শোধনাদিচতুষ্কং নিরূহস্য কর্মেতি বর্ণযতি|১৯|-
Adhikarana 13 (19-20) · Śloka 20
নিরূহশোধিতান্মার্গান্ সম্যক্ স্নেহোঽনুগচ্ছতি | অপেতসর্বদোষাসু নাডীষ্বিব বহজ্জলম্ ||১৯|| সর্বদোষহরশ্চাসৌ শরীরস্য চ জীবনঃ | তস্মাদ্বিশুদ্ধদেহস্য স্নেহবস্তির্বিধীযতে ||২০||
निरूहशोधितान्मार्गान् सम्यक् स्नेहोऽनुगच्छति | अपेतसर्वदोषासु नाडीष्विव वहज्जलम् ||१९|| सर्वदोषहरश्चासौ शरीरस्य च जीवनः | तस्माद्विशुद्धदेहस्य स्नेहबस्तिर्विधीयते ||२०||
🔊 Audio coming soon
নিরূহশোধিতমার্গেষু সম্যক্ স্নেহবীর্যানুসরণং দর্শযন্নাহ- নিরূহেত্যাদি||১৯-২০||
Adhikarana 14 (21) · Śloka 21
তত্রোন্মাদভযশোকপিপাসারোচকাজীর্ণার্শঃপাণ্ডুরোগভ্রমমদমূর্চ্ছাচ্ছর্দিকুষ্ঠমেহোদরস্থৌল্য- শ্বাসকাসকণ্ঠশোষশোফোপসৃষ্টক্ষতক্ষীণচতুস্ত্রিমাসগর্ভিণীদুর্বলাগ্ন্যসহা বালবৃদ্ধৌ চ বাতরোগাদৃতে ক্ষীণা নানুবাস্যা নাস্থাপযিতব্যাঃ ||২১||
तत्रोन्मादभयशोकपिपासारोचकाजीर्णार्शःपाण्डुरोगभ्रममदमूर्च्छाच्छर्दिकुष्ठमेहोदरस्थौल्य- श्वासकासकण्ठशोषशोफोपसृष्टक्षतक्षीणचतुस्त्रिमासगर्भिणीदुर्बलाग्न्यसहा बालवृद्धौ च वातरोगादृते क्षीणा नानुवास्या नास्थापयितव्याः ||२१||
🔊 Audio coming soon
তত্রেত্যাদি| ভ্রমঃ চক্রারূঢস্যেব ভ্রমণম্| মদঃ পূগফলেনেব মত্ততা| মূর্চ্ছা চেতনাচ্যুতিঃ| উপসৃষ্টশব্দ উন্মাদাদিভিঃ শোফান্তৈঃ সহ সম্বন্ধনীযঃ| ক্ষতঃ ক্ষতোরস্কঃ, ক্ষীণঃ কৃশঃ| চতুস্ত্রিমাসগর্ভিণীতি সপ্তমাসান্ যাবদ্গর্ভিণী; তথাচ বাগ্ভটঃ- “মাসান্ সপ্ত চ গর্ভিণী” (বা. সূ. ১৯)| বাতরোগাদৃতে ক্ষীণা ইতি ক্ষীণশব্দস্য পুনরুপাদানাদতিকৃশা বাতরোগং বিনা ক্ষীণা নানুবাস্যা ইতি| উন্মাদাদিষু সামান্যেন বস্তিনিষেধোঽত্রাভিহিতঃ; কেচিত্তু কেষাঞ্চিত্প্রতিপ্রসবমপবাদরূপেণাহুঃ| তত্রোন্মাদাপস্মারভ্রমমদমূর্চ্ছাসু সঞ্জ্ঞানাশাপগমে শুদ্ধস্যাতুরস্য অনুবন্ধোপচরণায বস্তির্দেযঃ, কুষ্ঠিনামর্শসাং চ মূঢবাতানাং প্রযোজ্যঃ, বাতাদ্যুদরিষু ত্রিষু নিষিদ্ধোঽপি শেষেষু পঞ্চসু বস্তিঃ প্রযোক্তব্যঃ, শোথক্ষতোরস্কযোরনুবাসননিষেধো ন নিরূহস্য; বর্ষাদর্বাগ্ বালস্য, নবত্যূর্ধ্বং বৃদ্ধস্য মৃদুরপি বস্তির্নিষিদ্ধঃ, অতোঽন্যথা তীক্ষ্ণ এব; এতেনাবস্থাবশান্নিষিদ্ধমপি কার্যং স্যাত্ “উত্পদ্যতে হি সাঽবস্থা দেশকালবলং প্রতি| যস্যাং কার্যমকার্যং স্যাত্ কর্ম কার্যং চ গর্হিতম্”- ইতি||২১||
Adhikarana 15 (22) · Śloka 22
উদরী চ প্রমেহী চ কুষ্ঠী স্থূলশ্চ মানবঃ | অবশ্যং স্থাপনীযাস্তে নানুবাস্যাঃ কথঞ্চন ||২২||
उदरी च प्रमेही च कुष्ठी स्थूलश्च मानवः | अवश्यं स्थापनीयास्ते नानुवास्याः कथञ्चन ||२२||
🔊 Audio coming soon
ক্বচিদেবাস্থাপনস্যাবস্থাযাং প্রতিপ্রসবমুদ্দিশন্নাহ- উদরী চেত্যাদি| সা চাবস্থা তন্ত্রান্তরাদনুসর্তব্যা| তত্রোদরে বাগ্ভটঃ- “সুবিরিক্তস্য যস্য স্যাদাধ্মানং পুনরেব তম্| সুস্নিগ্ধৈরম্ললবণৈর্নিরূহৈঃ সমুপাচরেত্-” (বা. চি. ১৫) ইতি; এবং প্রমেহাদিষু চিকিত্সিতমালোক্যাস্থাপনাবস্থা জ্ঞাতব্যা||২২||
Adhikarana 16 (23) · Śloka 23
অসাধ্যতা বিকারাণাং স্যাদেষামনুবাসনাত্ | অসাধ্যত্বেঽপি ভূযিষ্ঠং গাত্রাণাং সদনং ভবেত্ ||২৩||
असाध्यता विकाराणां स्यादेषामनुवासनात् | असाध्यत्वेऽपि भूयिष्ठं गात्राणां सदनं भवेत् ||२३||
🔊 Audio coming soon
নিষিদ্ধাচরণদোষমুদ্দিশন্নাহ- অসাধ্যতেত্যাদি| এষাং বিকারাণাম্ উদরাদীনাম্| গাত্রসদনম্ অঙ্গগ্লানিঃ||২৩||
Adhikarana 17 (24-25) · Śloka 25
পক্বাশযে তথা শ্রোণ্যাং নাভ্যধস্তাচ্চ সর্বতঃ | সম্যক্প্রণিহিতো বস্তিঃ স্থানেষ্বেতেষু তিষ্ঠতি ||২৪|| পক্বাশযাদ্বস্তিবীর্যং খৈর্দেহমনুসর্পতি | বৃক্ষমূলে নিষিক্তানামপাং বীর্যমিব দ্রুমম্ ||২৫||
पक्वाशये तथा श्रोण्यां नाभ्यधस्ताच्च सर्वतः | सम्यक्प्रणिहितो बस्तिः स्थानेष्वेतेषु तिष्ठति ||२४|| पक्वाशयाद्बस्तिवीर्यं खैर्देहमनुसर्पति | वृक्षमूले निषिक्तानामपां वीर्यमिव द्रुमम् ||२५||
🔊 Audio coming soon
সম্যক্ প্রদত্তো বস্তির্যেষু স্থানেষ্ববতিষ্ঠতে তান্যাহ- পক্বাশযে ইত্যাদি| কথং তর্হি পক্বাশযাদিমাত্রগতো বস্তিঃ ক্বচিত্ সর্বেষামবযবানামবসাদং, ক্বচিত্ সর্বাঙ্গগতানাং দোষাণাং হরণং শমনং চ জনযতীত্যাহ- পক্বাশয ইত্যাদি| পক্বাশযাদ্বস্তিবীর্যং খৈঃ স্রোতোভিরনুসর্পতি কৃত্স্নদেহে; বীর্যং, শক্তিঃ, প্রভাব ইত্যনর্থান্তরম্||২৪-২৫||
Adhikarana 18 (26) · Śloka 26
স চাপি সহসা বস্তিঃ কেবলঃ সমলোঽপি বা | প্রত্যেতি বীর্যং ত্বনিলৈরপানাদ্যৈর্বিনীযতে ||২৬||
स चापि सहसा बस्तिः केवलः समलोऽपि वा | प्रत्येति वीर्यं त्वनिलैरपानाद्यैर्विनीयते ||२६||
🔊 Audio coming soon
তিষ্ঠংস্তাবদ্বস্তির্গুণকারী ভবতু, কথং নির্গতোঽপি তাদৃশঃ স্যাদিত্যাহ- স চাপীত্যাদি| প্রত্যেতি প্রত্যাগচ্ছতি| বীর্যং স্নেহাদিগুণঃ| অপানাদ্যৈরিতি আদ্যপদেনোদানাদযো বোদ্ধব্যাঃ| অপানেনাধঃ, উদানেনোর্ধ্বং, ব্যানেন সর্বত্র, বিনীযতে বিশেষেণ সর্বশরীরাবযবেষু নীযতে||২৬||
Adhikarana 19 (27-28) · Śloka 28
বীর্যেণ বস্তিরাদত্তে দোষানাপাদমস্তকাত্(ন্) | পক্বাশযস্থোঽম্বরগো ভূমেরর্কো রসানিব ||২৭|| স কটীপৃষ্ঠকোষ্ঠস্থান্ বীর্যেণালোড্য সঞ্চযান্ | উত্খাতমূলান্ হরতি দোষাণাং সাধুযোজিতঃ ||২৮||
वीर्येण बस्तिरादत्ते दोषानापादमस्तकात्(न्) | पक्वाशयस्थोऽम्बरगो भूमेरर्को रसानिव ||२७|| स कटीपृष्ठकोष्ठस्थान् वीर्येणालोड्य सञ्चयान् | उत्खातमूलान् हरति दोषाणां साधुयोजितः ||२८||
🔊 Audio coming soon
সকলাবযবগতদোষহরণং বস্তেরেকস্থানস্থিতস্যোপমানেন দর্শযন্নাহ- বীর্যেণেত্যাদি| অন্যে ত্বত্রামুং শ্লোকং ন পঠন্তি||২৭-২৮||
Adhikarana 20 (29-31) · Śloka 31
দোষত্রযস্য যস্মাচ্চ প্রকোপে বাযুরীশ্বরঃ | তস্মাত্তস্যাতিবৃদ্ধস্য শরীরমভিনিঘ্নতঃ ||২৯|| বাযোর্বিষহতে বেগং নান্যা বস্তেরৃতে ক্রিযা | পবনাবিদ্ধতোযস্য বেলা বেগমিবোদধেঃ ||৩০|| শরীরোপচযং বর্ণং বলমারোগ্যমাযুষঃ | কুরুতে পরিবৃদ্ধিং চ বস্তিঃ সম্যগুপাসিতঃ ||৩১||
दोषत्रयस्य यस्माच्च प्रकोपे वायुरीश्वरः | तस्मात्तस्यातिवृद्धस्य शरीरमभिनिघ्नतः ||२९|| वायोर्विषहते वेगं नान्या बस्तेरृते क्रिया | पवनाविद्धतोयस्य वेला वेगमिवोदधेः ||३०|| शरीरोपचयं वर्णं बलमारोग्यमायुषः | कुरुते परिवृद्धिं च बस्तिः सम्यगुपासितः ||३१||
🔊 Audio coming soon
দোষত্রযস্যেত্যাদি| যথা উদধেঃ সমুদ্রস্য, পবনাবিদ্ধতোযস্য অনিলেনাভুগ্নসলিলস্য , বেলা কূলমর্যাদা, বেগং বিষহতে বিশেষেণ সহতে||২৯-৩১||
Adhikarana 21 (32) · Śloka 32
অত ঊর্ধ্বং ব্যাপদো বক্ষ্যামঃ | তত্র নেত্রং বিচলিতং, বিবর্তিতং, পার্শ্বাবপীডিতম্, অত্যুত্ক্ষিপ্তম্, অবসন্নং, তির্যক্প্রক্ষিপ্তমিতি ষট্ প্রণিধানদোষাঃ; অতিস্থূলং, কর্কশম্, অবনতং, অণুভিন্নং , সন্নিকৃষ্টবিপ্রকৃষ্টকর্ণিকং, সূক্ষ্মাতিচ্ছিদ্রম্, অতিদীর্ঘম্, অতিহ্রস্বম্ , অস্রিমদিত্যেকাদশ নেত্রদোষাঃ; বহলতা, অল্পতা, সচ্ছিদ্রতা , প্রস্তীর্ণতা, দুর্বদ্ধতেতি পঞ্চ বস্তিদোষাঃ; অতিপীডিততা, শিথিলপীডিততা, ভূযো ভূযোঽবপীডনং, কালাতিক্রম ইতি চত্বারঃ পীডনদোষাঃ; আমতা, হীনতা, অতিমাত্রতা, অতিশীততা, অত্যুষ্ণতা, অতিতীক্ষ্ণতা, অতিমৃদুতা, অতিস্নিগ্ধতা, অতিরূক্ষতা, অতিসান্দ্রতা, অতিদ্রবতা, ইত্যেকাদশ দ্রব্যদোষাঃ; অবাক্শীর্ষোচ্ছীর্ষন্যুব্জোত্তানসঙ্কুচিতদেহস্থিতদক্ষিণপার্শ্বশাযিনঃ প্রদানমিতি সপ্ত শয্যাদোষাঃ; এবমেতাশ্চতুশ্চত্বারিংশদ্ব্যাপদো বৈদ্যনিমিত্তাঃ | আতুরনিমিত্তাঃ পঞ্চদশ আতুরোপদ্রবচিকিত্সিতে বক্ষ্যন্তে | স্নেহস্ত্বষ্টভিঃ কারণৈঃ প্রতিহতো ন প্রত্যাগচ্ছতি ত্রিভির্দোষৈঃ, অশনাভিভূতো, মলব্যামিশ্রো, দূরানুপ্রবিষ্টো, অস্বিন্নস্য, অনুষ্ণো, অল্পম্ভুক্তবতো, অল্পশ্চেতি বৈদ্যাতুরনিমিত্তা ভবন্তি | অযোগস্তূভযোঃ, আধ্মানং, পরিকর্তিকা, পরিস্রাবঃ, প্রবাহিকা, হৃদযোপসরণম্, অঙ্গপ্রগ্রহো, অতিযোগো, জীবাদানমিতি নব ব্যাপদো বৈদ্যনিমিত্তা ভবন্তি ||৩২||
अत ऊर्ध्वं व्यापदो वक्ष्यामः | तत्र नेत्रं विचलितं, विवर्तितं, पार्श्वावपीडितम्, अत्युत्क्षिप्तम्, अवसन्नं, तिर्यक्प्रक्षिप्तमिति षट् प्रणिधानदोषाः; अतिस्थूलं, कर्कशम्, अवनतं, अणुभिन्नं , सन्निकृष्टविप्रकृष्टकर्णिकं, सूक्ष्मातिच्छिद्रम्, अतिदीर्घम्, अतिह्रस्वम् , अस्रिमदित्येकादश नेत्रदोषाः; बहलता, अल्पता, सच्छिद्रता , प्रस्तीर्णता, दुर्बद्धतेति पञ्च बस्तिदोषाः; अतिपीडितता, शिथिलपीडितता, भूयो भूयोऽवपीडनं, कालातिक्रम इति चत्वारः पीडनदोषाः; आमता, हीनता, अतिमात्रता, अतिशीतता, अत्युष्णता, अतितीक्ष्णता, अतिमृदुता, अतिस्निग्धता, अतिरूक्षता, अतिसान्द्रता, अतिद्रवता, इत्येकादश द्रव्यदोषाः; अवाक्शीर्षोच्छीर्षन्युब्जोत्तानसङ्कुचितदेहस्थितदक्षिणपार्श्वशायिनः प्रदानमिति सप्त शय्यादोषाः; एवमेताश्चतुश्चत्वारिंशद्व्यापदो वैद्यनिमित्ताः | आतुरनिमित्ताः पञ्चदश आतुरोपद्रवचिकित्सिते वक्ष्यन्ते | स्नेहस्त्वष्टभिः कारणैः प्रतिहतो न प्रत्यागच्छति त्रिभिर्दोषैः, अशनाभिभूतो, मलव्यामिश्रो, दूरानुप्रविष्टो, अस्विन्नस्य, अनुष्णो, अल्पम्भुक्तवतो, अल्पश्चेति वैद्यातुरनिमित्ता भवन्ति | अयोगस्तूभयोः, आध्मानं, परिकर्तिका, परिस्रावः, प्रवाहिका, हृदयोपसरणम्, अङ्गप्रग्रहो, अतियोगो, जीवादानमिति नव व्यापदो वैद्यनिमित्ता भवन्ति ||३२||
🔊 Audio coming soon
বিচলিতং বিশেষেণ কম্পিতম্| বিবর্তিতং প্রবিষ্টমেব মোটিতম্| পার্শ্বাবপীডিতং পার্শ্বযোর্বামদক্ষিণযোরবপীডনম্| অত্যুত্ক্ষিপ্তম্ অতিশযেনোর্ধ্বপ্রেরিতম্| অবসন্নম্ অধোভাগগতিকম্| প্রণিধানদোষা দানদোষাঃ| সূক্ষ্মাতিচ্ছিদ্রং সূক্ষ্মমুখং, বৃহন্মুখমিত্যর্থঃ| অস্রিমদিতি অস্রিঃ কোটিঃ পালিরিত্যর্থঃ, ধারাযুক্তমিত্যন্যে| নেত্রদোষা নিরূহযন্ত্রদোষাঃ| বহলতা মাংসোপচিতত্বম্, অন্যে বিপুলতামাহুঃ| প্রস্তীর্ণতা স্নাযুজালবত্ত্বম্| কালাতিক্রম ইতি কালস্যাতিদ্রুতবিলম্বিতস্যাতিক্রমো বিলম্বিতদানেনোল্লঙ্ঘনম্ | তত্রাতিশিথিলপীডনে সম্যক্পীডনকালস্যেষদতিক্রমঃ, কালাতিক্রমে চ সম্যক্পীডনকালস্য মহানতিক্রম ইতি ভেদঃ| আমতেত্যাদি| আমঃ অপক্বস্নেহঃ| একাদশ দ্রব্যদোষা যথাসম্ভবং স্নেহবস্তিনিরূহোভযাশ্রিতা জ্ঞাতব্যাঃ| অবাক্শীর্ষেত্যাদি| অবাক্শীর্ষ অধোমস্তকঃ, উচ্ছীর্ষক ঊর্ধ্বমস্তকঃ, ন্যুব্জঃ অধোমুখঃ, স্থিত উপবিষ্টঃ| অবাক্শীর্ষাদযঃ সপ্ত শয্যাস্থিতপুরুষস্য দোষাঃ, উপচারেণ শয্যাযাঃ প্রতিপাদ্যন্তে| স্নেহ ইত্যাদি| উভযোরিতি নিরূহানুবাসনযোঃ| এতদুক্তং ভবতি- অযোগাদিব্যাপত্সু কাশ্চিদ্ব্যাপন্নিরূহাশ্রিতাঃ, কাশ্চিদনুবাসনাশ্রিতাঃ, কাশ্চিদুভযাশ্রিতা ইতি||৩২||
Adhikarana 22 (33) · Śloka 33
ভবতি চাত্র- ষট্সপ্ততিঃ সমাসেন ব্যাপদঃ পরিকীর্তিতাঃ | তাসাং বক্ষ্যামি বিজ্ঞানং সিদ্ধিং চ তদনন্তরম্ ||৩৩||
भवति चात्र- षट्सप्ततिः समासेन व्यापदः परिकीर्तिताः | तासां वक्ष्यामि विज्ञानं सिद्धिं च तदनन्तरम् ||३३||
🔊 Audio coming soon
বিজ্ঞানং লক্ষণম্| সিদ্ধিং চিকিত্সিতম্||৩৩||
Adhikarana puShpikA · Śloka 35
ইতি সুশ্রুতসংহিতাযাং চিকিত্সাস্থানে নেত্রবস্তিপ্রমাণপ্রবিভাগচিকিত্সিতং নাম পঞ্চত্রিংশোঽধ্যাযঃ ||৩৫||
इति सुश्रुतसंहितायां चिकित्सास्थाने नेत्रबस्तिप्रमाणप्रविभागचिकित्सितं नाम पञ्चत्रिंशोऽध्यायः ||३५||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে পঞ্চত্রিংশত্তমোঽধ্যাযঃ||৩৫||