Adhikarana 1 (1-3) · Śloka 3
অথাতঃ প্রমেহপিডকাচিকিত্সিতং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
শরাবিকাদ্যা নব পিডকাঃ প্রাগুক্তাঃ; তাঃ প্রাণবতোঽল্পাস্ত্বঙ্মাংসপ্রাপ্তা মৃদ্ব্যোঽল্পরুজঃ ক্ষিপ্রপাকভেদিন্যশ্চ সাধ্যাঃ ||৩||
View original
अथातः प्रमेहपिडकाचिकित्सितं व्याख्यास्यामः ||१||
यथोवाच भगवान् धन्वन्तरिः ||२||
शराविकाद्या नव पिडकाः प्रागुक्ताः; ताः प्राणवतोऽल्पास्त्वङ्मांसप्राप्ता मृद्व्योऽल्परुजः क्षिप्रपाकभेदिन्यश्च साध्याः ||३||
এতাঃ শরাবিকাদ্যাঃ প্রমেহপিডকাঃ প্রমেহং বিনাঽপি ভবন্তি; উক্তং চ- “বিনা প্রমেহমপ্যেতা জাযন্তে দুষ্টমেদসঃ” (চ. সূ. ১৭) ইতি, যদ্যপ্যেবং তথাঽপি প্রমেহানন্তরকালজাতানাং প্রমেহং বিনাঽপি জাতানাং চৈকমিহ চিকিত্সিতমাসাং, তুল্যদোষদূষ্যত্বাত্||১-৩||
Adhikarana 2 (4) · Śloka 4
তাভিরুপদ্রুতং প্রমেহিণমুপচরেত্ |
তত্র পূর্বরূপেষ্বপতর্পণং বনস্পতিকষাযং বস্তমূত্রং চোপদিশেত্; এবমকুর্বতস্তস্য মধুরাহারস্য মূত্রং স্বেদঃ শ্লেষ্মা চ মধুরীভবতি প্রমেহশ্চাভিব্যক্তো ভবতি, তত্রোভযতঃ সংশোধনমাসেবেত; এবমকুর্বতস্তস্য দোষাঃ প্রবৃদ্ধা মাংসশোণিতে প্রদূষ্য শোফং জনযন্ত্যুপদ্রবান্ বা কাংশ্চিত্, তত্রোক্তঃ প্রতীকারঃ সিরামোক্ষশ্চ; এবমকুর্বতস্তস্য শোফো বৃদ্ধোঽতিমাত্রং রুজো বিদাহমাপদ্যতে, তত্র শস্ত্রপ্রণিধানমুক্তং ব্রণক্রিযোপসেবা চ; এবমকুর্বতস্তস্য পূযোঽভ্যন্তরমবদার্যোত্সঙ্গং মহান্তমবকাশং কৃত্বা প্রবৃদ্ধো ভবত্যসাধ্যঃ; তস্মাদাদিত এব প্রমেহিণমুপক্রমেত্ ||৪||
View original
ताभिरुपद्रुतं प्रमेहिणमुपचरेत् |
तत्र पूर्वरूपेष्वपतर्पणं वनस्पतिकषायं बस्तमूत्रं चोपदिशेत्; एवमकुर्वतस्तस्य मधुराहारस्य मूत्रं स्वेदः श्लेष्मा च मधुरीभवति प्रमेहश्चाभिव्यक्तो भवति, तत्रोभयतः संशोधनमासेवेत; एवमकुर्वतस्तस्य दोषाः प्रवृद्धा मांसशोणिते प्रदूष्य शोफं जनयन्त्युपद्रवान् वा कांश्चित्, तत्रोक्तः प्रतीकारः सिरामोक्षश्च; एवमकुर्वतस्तस्य शोफो वृद्धोऽतिमात्रं रुजो विदाहमापद्यते, तत्र शस्त्रप्रणिधानमुक्तं व्रणक्रियोपसेवा च; एवमकुर्वतस्तस्य पूयोऽभ्यन्तरमवदार्योत्सङ्गं महान्तमवकाशं कृत्वा प्रवृद्धो भवत्यसाध्यः; तस्मादादित एव प्रमेहिणमुपक्रमेत् ||४||
তাভিরিত্যাদি| “পিডকানাং পূর্বরূপং প্রমেহা” ইতি তন্ত্রান্তরোক্তত্বাত্ পিডকাচিকিত্সিতেঽপি প্রমেহচিকিত্সিতমুক্তম্, অথবা প্রমেহচিকিত্সিতেনৈব পিডকোপশমো ভবতীতি| তত্রেত্যাদি| অপতর্পণমুপবাসাদি| বনস্পতযো বটাদযঃ, বস্তশ্ছাগঃ| এবমিত্যাদি এবমকুর্বতস্তস্য হীনপ্রথমকর্মগুণস্য মধুরাহারস্য মূত্রাদযো মধুরীভবন্তি| উভযতঃ সংশোধনমিতি বমনং বিরেচনং চ| এবমিত্যাদি এবমকুর্বতস্তস্য হীনদ্বিতীযকর্মগুণস্য, তত্রোক্তঃ প্রতীকারঃ তত্র শোফে উক্তঃ, প্রতীকারঃ সূত্রস্থানে দ্বিব্রণীযে চ, স পুনরপতর্পণাদিরেকাদশবিধো বিরেকান্তঃ| সিরামোক্ষশ্চেতি ন জলৌকাপাতনমধঃকাযস্য পিডকাধিষ্ঠানস্যাতিবিপুলত্বাত্| অত্র শোফপ্রতিপাদনেন তদনন্তরভাবিনী প্রমেহপিডকাঽপি প্রতিপাদিতা| এবমিত্যাদি|- এবমকুর্বতস্তস্য হীনতৃতীযকর্মগুণস্য শস্ত্রপ্রণিধানং ছেদ্যভেদ্যাদিনা, ব্রণক্রিযোপসেবা চেতি ষষ্টিব্রণোপক্রমাণাং চ যথাস্বমুপসেবনমিত্যতীতাবেক্ষণম্| অত্র শোফস্য বিদগ্ধস্য যাপ্যত্বেনাসাধ্যত্বম্| এবমিত্যাদি|- এবমকুর্বতস্তস্য হীনচতুর্থকর্মগুণস্য নাতিসকলোপদ্রবস্যানতিমহাশযোত্সঙ্গাদৌ ব্রণস্য শিলাজত্বাদ্যনভ্যাসে তু প্রযত্নাদ্যতিশযাদ্যাপ্যত্বেনাসাধ্যবত্ত্বম্| শিলাজত্বাদ্যভ্যাসে তু হীনপঞ্চকর্মগুণস্য অনুপক্রম্যত্বাদসাধ্যতমত্বম্| উত্সঙ্গ ইব উত্সঙ্গঃ, ব্রণাশযে হি চিরকালপূযাবস্থানেনাবদারিতমন্তঃপ্রদেশান্তরং নিম্নমুত্সঙ্গতুল্যত্বাত্ ‘উত্সঙ্গ’ ইত্যুচ্যতে, উত্ ঊর্ধ্বং পূযস্য সঙ্গ উত্সঙ্গ, ইত্যন্যে| তস্মাদিত্যাদি আদিত ইতি ল্যব্লোপে পঞ্চমী; তস্মাদাদ্যং পূর্বরূপমেব বীক্ষ্য প্রমেহিণমুপক্রমেতেত্যর্থঃ||৪||
Adhikarana 3 (5) · Śloka 5
ভল্লাতকবিল্বাম্বুপিপ্পলীমূলোদকীর্যাবর্ষাভূপুনর্নবাচিত্রকশটীস্নুহীবরুণকপুষ্করদন্তীপথ্যা দশপলোন্মিতা যবকোলকুলত্থাংশ্চ প্রাস্থিকান্ সলিলদ্রোণে নিষ্ক্বাথ্য চতুর্ভাগাবশিষ্টেঽবতার্য বচাত্রিবৃত্কম্পিল্লকভার্ঙ্গীনিচুলশুণ্ঠীগজপিপ্পলীবিডঙ্গরোধ্রশিরীষাণাং ভাগৈরর্ধপলিকৈর্ধৃতপ্রস্থং বিপাচযেন্মেহশ্বযথুকুষ্ঠগুল্মোদরার্শঃপ্লীহবিদ্রধিপিডকানাং নাশনং নাম্না ধান্বন্তরম্ ||৫||
View original
भल्लातकबिल्वाम्बुपिप्पलीमूलोदकीर्यावर्षाभूपुनर्नवाचित्रकशटीस्नुहीवरुणकपुष्करदन्तीपथ्या दशपलोन्मिता यवकोलकुलत्थांश्च प्रास्थिकान् सलिलद्रोणे निष्क्वाथ्य चतुर्भागावशिष्टेऽवतार्य वचात्रिवृत्कम्पिल्लकभार्ङ्गीनिचुलशुण्ठीगजपिप्पलीविडङ्गरोध्रशिरीषाणां भागैरर्धपलिकैर्धृतप्रस्थं विपाचयेन्मेहश्वयथुकुष्ठगुल्मोदरार्शःप्लीहविद्रधिपिडकानां नाशनं नाम्ना धान्वन्तरम् ||५||
ভল্লাতকেত্যাদি| অনার্ষোঽযং যোগঃ, জেজ্জটাচার্যেণ নোক্তত্বাত্; তস্মান্ন পঠনীযঃ||৫||
Adhikarana 4 (6) · Śloka 6
দুর্বিরেচ্যা হি মধুমেহিনো ভবন্তি মেদোঽভিব্যাপ্তশরীরত্বাত্, তস্মাত্তীক্ষ্ণমেতেষাং শোধনং কুর্বীত |
পিডকাপীডিতাঃ সোপদ্রবাঃ সর্ব এব প্রমেহা মূত্রাদিমাধুর্যে মধুগন্ধসামান্যাত্ পারিভাষিকীং মধুমেহাখ্যাং লভন্তে ||৬||
View original
दुर्विरेच्या हि मधुमेहिनो भवन्ति मेदोऽभिव्याप्तशरीरत्वात्, तस्मात्तीक्ष्णमेतेषां शोधनं कुर्वीत |
पिडकापीडिताः सोपद्रवाः सर्व एव प्रमेहा मूत्रादिमाधुर्ये मधुगन्धसामान्यात् पारिभाषिकीं मधुमेहाख्यां लभन्ते ||६||
দুর্বিরেচ্যা ইত্যাদি||৬||
Adhikarana 5 (7) · Śloka 7
ন চৈতান্ কথঞ্চিদপি স্বেদযেত্, মেদোবহুত্বাদেতেষাং বিশীর্যতে দেহঃ স্বেদেন ||৭||
View original
न चैतान् कथञ्चिदपि स्वेदयेत्, मेदोबहुत्वादेतेषां विशीर्यते देहः स्वेदेन ||७||
ন চেত্যাদি| স্বেদনং স্বেদাবচারণীযে প্রমেহিণাং নিষিদ্ধমপি মহাদোষত্বপ্রতিপাদনায পুনরপি নিষিদ্ধম্||৭||
Adhikarana 6 (8) · Śloka 8
রসাযনীনাং চ দৌর্বল্যান্নোর্ধ্বমুত্তিষ্ঠন্তি প্রমেহিণাং দোষাঃ, ততো মধুমেহিনামধঃকাযে পিডকাঃ প্রাদুর্ভবন্তি ||৮||
View original
रसायनीनां च दौर्बल्यान्नोर्ध्वमुत्तिष्ठन्ति प्रमेहिणां दोषाः, ततो मधुमेहिनामधःकाये पिडकाः प्रादुर्भवन्ति ||८||
কুতঃ পুনরধোদেহে এব পিডকাসম্ভব ইত্যাহ- রসাযনীনাং চ দৌর্বল্যাদিত্যাদি| রসাযনীনামিত্যত্রাদিশব্দো লুপ্তনির্দিষ্টো দ্রষ্টব্যঃ, তেন রসপিত্তকফশোণিতবহানাং ধমনীনামিত্যর্থঃ| দৌর্বল্যাদিতি সর্বশরীরগতস্য সর্বদ্রবধাতোরপানব্যনাভ্যামধোঽনুলোম্যমানত্বাদ্রসাদিবহানামপি ধমনীনামধ এব বলবত্ত্বং নতূর্ধ্বমিত্যর্থঃ; ‘রসহারিণীনাং’ ইতি কেচিত্ পঠন্তি||৮||
Adhikarana 7 (9) · Śloka 9
অপক্বানাং তু পিডকানাং শোফবত্ প্রতীকারঃ, পক্বানাং ব্রণবদিতি; তৈলং তু ব্রণরোপণমেবাদৌ কুর্বীত, আরগ্বধাদিকষাযমুত্সাদনার্থে, শালসারাদিকষাযং পরিষেচনে, পিপ্পল্যাদিকষাযং পানভোজনেষু, পাঠাচিত্রকশার্ঙ্গেষ্টাক্ষুদ্রাবৃহতীসারিবাসোমবল্কসপ্তপর্ণারগ্বধকুটজমূলচূর্ণানি মধুমিশ্রাণি প্রাশ্নীযাত্ ||৯||
View original
अपक्वानां तु पिडकानां शोफवत् प्रतीकारः, पक्वानां व्रणवदिति; तैलं तु व्रणरोपणमेवादौ कुर्वीत, आरग्वधादिकषायमुत्सादनार्थे, शालसारादिकषायं परिषेचने, पिप्पल्यादिकषायं पानभोजनेषु, पाठाचित्रकशार्ङ्गेष्टाक्षुद्राबृहतीसारिवासोमवल्कसप्तपर्णारग्वधकुटजमूलचूर्णानि मधुमिश्राणि प्राश्नीयात् ||९||
অপক্বানামিত্যাদি| ব্রণরোপণমিতি রোপণদ্রব্যসিদ্ধং মিশ্রকাদ্যুক্তং, রোপণাবস্থাযাং রোপণে কর্তব্যে আদৌ তৈলমেব, নান্যত্ কষাযাদিকং; সর্বেষ্বেব মেহেষ্বতিপ্রবৃত্ত্যা বাতবৃদ্ধেঃ, তৈলস্য বাতদোষপ্রত্যনীকত্বাত্, তথা বদ্ধমূত্রত্বেন প্রমেহব্যাধিপ্রত্যনীকত্বাচ্চ| অন্যে তু ‘এলাদৌ কুর্বীত’ ইতি পঠন্তি, “এলাতগরকুষ্ঠ” (সূ. ৩৮) ইত্যাদিরেলাদিঃ| উত্সাদনং নিম্নব্রণস্যোন্নতিকরণম্| উত্সাদনোপক্রমাবস্থাযামারগ্বধাদিনৈবোত্সাদনম্| এবং বক্ষ্যমাণেষু পরিষেচনাদিষ্বত্রোক্তবর্গেণৈব নিযমঃ| পাঠাচিত্রকেত্যাদি| শার্ঙ্গেষ্টা কাকতিক্তা ‘ভুম্ভুরুডক’ ইতি লোকে| ক্ষুদ্রা লঘুকণ্টকারিকা| সোমবল্কঃ কট্ফলঃ| অযং যোগঃ সামান্যচূর্ণযোজনপরিভাষযা যোজ্যঃ| তথাহি- “কর্ষশ্চূর্ণস্য কল্কস্য গুটিকানাং চ সর্বশঃ| দ্রবশুক্ত্যাঽবলেঢব্যঃ পাতব্যশ্চ চতুর্দ্রবঃ”- ইতি||৯||
Adhikarana 8 (10) · Śloka 10
শালসারাদিবর্গকষাযং চতুর্ভাগাবশিষ্টমবতার্য পরিস্রাব্য পুনরুপনীয সাধযেত্, সিধ্যতি চামলকরোধ্রপ্রিযঙ্গুন্দন্তীকৃষ্ণাযস্তাম্রচূর্ণান্যাবপেত্, এতদনুপদগ্ধং লেহীভূতমবতার্যানুগুপ্তং নিদধ্যাত্, ততো যথাযোগমুপযুঞ্জীত, এষ লেহঃ সর্বমেহানাং হন্তা ||১০||
View original
शालसारादिवर्गकषायं चतुर्भागावशिष्टमवतार्य परिस्राव्य पुनरुपनीय साधयेत्, सिध्यति चामलकरोध्रप्रियङ्गुन्दन्तीकृष्णायस्ताम्रचूर्णान्यावपेत्, एतदनुपदग्धं लेहीभूतमवतार्यानुगुप्तं निदध्यात्, ततो यथायोगमुपयुञ्जीत, एष लेहः सर्वमेहानां हन्ता ||१०||
শালসারেত্যাদি| শালসারাদিবর্গপলশতং ষোডশগুণে জলে ক্বথিতং পাদাবশেষং, তস্মিন্ সিধ্যত্যামলকাদিচূর্ণং পাদিকমিত্যেকে; অপরে চ কুটজাবলেহাবাপপ্রমাণোহেনামলকাদীনাং ষণ্ণাং প্রত্যেকং পলমাবাপঃ||১০||
Adhikarana 9 (11) · Śloka 11
ত্রিফলাচিত্রকত্রিকটুকবিডঙ্গমুস্তানাং নব ভাগাস্তাবন্ত এব কৃষ্ণাযশ্চূর্ণস্য, তত্সর্বমৈকধ্যং কৃত্বা যথাযোগং মাত্রাং সর্পির্মধুভ্যাং সংসৃজ্যোপযুঞ্জীত, এতন্নবাযসম্; এতেন জাঠর্যং ন ভবতি, সন্নোঽগ্নিরাপ্যাযতে, দুর্নামশোফপাণ্ডুকুষ্ঠরোগাবিপাককাসশ্বাসপ্রমেহাশ্চ ন ভবন্তি ||১১||
View original
त्रिफलाचित्रकत्रिकटुकविडङ्गमुस्तानां नव भागास्तावन्त एव कृष्णायश्चूर्णस्य, तत्सर्वमैकध्यं कृत्वा यथायोगं मात्रां सर्पिर्मधुभ्यां संसृज्योपयुञ्जीत, एतन्नवायसम्; एतेन जाठर्यं न भवति, सन्नोऽग्निराप्यायते, दुर्नामशोफपाण्डुकुष्ठरोगाविपाककासश्वासप्रमेहाश्च न भवन्ति ||११||
নবাযসমাহ- ত্রিফলেত্যাদি| কৃষ্ণাযশ্চূর্ণস্য কৃষ্ণলৌহচূর্ণস্য| জাঠর্যং স্থৌল্যম্||১১||
Adhikarana 10 (12-19) · Śloka 19
শালসারাদিনির্যূহে চতুর্থাংশাবশেষিতে |
পরিস্রুতে ততঃ শীতে মধু মাক্ষিকমাবপেত্ ||১২||
ফাণিতীভাবমাপন্নং গুডং শোধিতমেব চ |
শ্লক্ষ্ণপিষ্টানি চূর্ণানি পিপ্পল্যাদিগণস্য চ ||১৩||
ঐকধ্যমাবপেত্ কুম্ভে সংস্কৃতে ঘৃতভাবিতে |
পিপ্পলীচূর্ণমধুভিঃ প্রলিপ্তেঽন্তঃশুচৌ দৃঢে ||১৪||
শ্লক্ষ্ণানি তীক্ষ্ণলোহস্য তত্র পত্রাণি বুদ্ধিমান্ |
খদিরাঙ্গারতপ্তানি বহুশঃ সন্নিপাতযেত্ ||১৫||
সুপিধানং তু তং কৃত্বা যবপল্লে নিধাপযেত্ |
মাসাংস্ত্রীংশ্চতুরোবাঽপি যাবদালোহসঙ্ক্ষযাত্ ||১৬||
ততো জাতরসং তং তু প্রাতঃ প্রাতর্যথাবলম্ |
নিষেবেত যথাযোগমাহারং চাস্য কল্পযেত্ ||১৭||
কার্শ্যকৃদ্বলিনামেষ সন্নস্যাগ্নেঃ প্রসাধকঃ |
শোফনুদ্গুল্মহৃত্ কুষ্ঠমেহপাণ্ড্বামযাপহঃ ||১৮||
প্লীহোদরহরঃ শীঘ্রং বিষমজ্বরনাশনঃ |
অভিষ্যন্দাপহরণো লোহারিষ্টো মহাগুণঃ ||১৯||
View original
शालसारादिनिर्यूहे चतुर्थांशावशेषिते |
परिस्रुते ततः शीते मधु माक्षिकमावपेत् ||१२||
फाणितीभावमापन्नं गुडं शोधितमेव च |
श्लक्ष्णपिष्टानि चूर्णानि पिप्पल्यादिगणस्य च ||१३||
ऐकध्यमावपेत् कुम्भे संस्कृते घृतभाविते |
पिप्पलीचूर्णमधुभिः प्रलिप्तेऽन्तःशुचौ दृढे ||१४||
श्लक्ष्णानि तीक्ष्णलोहस्य तत्र पत्राणि बुद्धिमान् |
खदिराङ्गारतप्तानि बहुशः सन्निपातयेत् ||१५||
सुपिधानं तु तं कृत्वा यवपल्ले निधापयेत् |
मासांस्त्रींश्चतुरोवाऽपि यावदालोहसङ्क्षयात् ||१६||
ततो जातरसं तं तु प्रातः प्रातर्यथाबलम् |
निषेवेत यथायोगमाहारं चास्य कल्पयेत् ||१७||
कार्श्यकृद्बलिनामेष सन्नस्याग्नेः प्रसाधकः |
शोफनुद्गुल्महृत् कुष्ठमेहपाण्ड्वामयापहः ||१८||
प्लीहोदरहरः शीघ्रं विषमज्वरनाशनः |
अभिष्यन्दापहरणो लोहारिष्टो महागुणः ||१९||
শালসারাদীত্যাদি| শালসারাদিদ্রব্যপলশতস্য জলচতুর্দ্রোণে পক্বস্য চতুর্থাংশাবশেষিতো নির্যূহঃ ক্বাথঃ| তস্মিন্ পূতে শীতে পঞ্চশতপলপ্রমাণং মধু মদ্যং, মাক্ষিকস্যেদং মাক্ষিকং, মধ্বাসবং প্রক্ষিপেত্; গযী তু মধ্বেব মন্যতে| ফাণিতীভাবমাপন্নমিতি ক্রিযাবিশেষণম্| গুডং শোধিতমেব চেতি গুডস্তস্মিন্নেব কষাযে বিলাযিতঃ পূতঃ শোধিত উচ্যতে, তাদৃশস্য গুডস্যাপি পঞ্চাশত্পলানি| পিপ্পল্যাদিচূর্ণস্য পঞ্চবিংশতিপলানি, তাবন্ত্যেব লোহপত্রাণাম্| গযী তু তত্র পুরাণস্য মধুনঃ কষাযমধুরীভাবমাত্রং প্রমাণং, মধুমান এব জীর্ণগুডঃ, পিপ্পল্যাদিচূর্ণমানং তু যাবতা নাতিব্যক্তং কটুত্বং ভবতি| মধুপ্রমাণপাদিকং পিপ্পল্যাদিচূর্ণস্য মানং, লৌহপত্রপ্রমাণমপি তাবদেবেত্যন্যে| আহারং চাস্য কল্পযেদ্বিশিষ্টদোষারব্ধরোগজাতিপ্রত্যনীকম্| অত্রাভিষ্যন্দশব্দেন মূত্রনিঃস্যন্দোঽভিধীযতে||১২-১৯||
Adhikarana 11 (20) · Śloka 20
প্রমেহিণো যদা মূত্রমপিচ্ছিলমনাবিলম্ |
বিশদং তিক্তকটুকং তদাঽঽরোগ্যং প্রচক্ষতে ||২০||
View original
प्रमेहिणो यदा मूत्रमपिच्छिलमनाविलम् |
विशदं तिक्तकटुकं तदाऽऽरोग्यं प्रचक्षते ||२०||
প্রমেহিণ ইত্যাদি| অনাবিলং প্রসন্নম্| বিশদং রূক্ষম্| মূত্রস্য কটুতিক্তত্বং পিপীলিকামক্ষিকাদীনামপসর্পণেন জ্ঞাতব্যম্| অন্যে ত্বেবং পঠন্তি- “প্রমেহিণো যদা মূত্রমনাবিদ্ধমপিচ্ছিলম্”- ইতি; তত্রাপি অনাবিদ্ধং প্রসন্নম্||২০||
Adhikarana puShpikA · Śloka 12
ইতি সুশ্রুতসংহিতাযাং চিকিত্সাস্থানে প্রমেহপিডকাচিকিত্সিতং নাম দ্বাদশোঽধ্যাযঃ ||১২||
View original
इति सुश्रुतसंहितायां चिकित्सास्थाने प्रमेहपिडकाचिकित्सितं नाम द्वादशोऽध्यायः ||१२||
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে দ্বাদশোঽধ্যাযঃ||১২||