2. sadyōvraṇacikitsitam

Adhikarana 1 (1-2) · Śloka 2

অথাতঃ সদ্যোব্রণচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3) · Śloka 3

ধন্বন্তরির্ধর্মভৃতাং বরিষ্ঠো বাগ্বিশারদঃ | বিশ্বামিত্রসুতং শিষ্যমৃষিং সুশ্রুতমন্বশাত্ ||৩||

গুরুপূর্বক্রমং নির্দিশন্নাহ- ধন্বন্তরিরিত্যাদি| ধর্মভৃতামন্যেষামপি রাজর্ষীণাং মধ্যে বরিষ্ঠঃ প্রধানতমঃ| বাগ্বিশারদ ইতি অর্থবতীং সলক্ষণাং হৃদযগ্রাহিণীমপুনরুক্তাং বাচং বদতীতি বাগ্বিশারদঃ| অন্বশাত্ শিক্ষিতবান্||৩||

Adhikarana 3 (4) · Śloka 4

নানাধারামুখৈঃ শস্ত্রৈর্নানাস্থাননিপাতিতৈঃ | নানারূপা ব্রণা যে স্যুস্তেষাং বক্ষ্যামি লক্ষণম্ ||৪||

ব্রণাকৃতিমাত্রে বিশেষহেতুং নির্দিশন্নাহ- নানাধারামুখৈরিত্যাদি| নানাস্থানানি দেহস্থানানি, তেষু নিপাতিতৈর্নিক্ষিপ্তৈরিত্যর্থঃ| অনেন শ্লোকেন নানাপ্রকারশস্ত্রধারা, নানাপ্রকারশস্ত্রমুখানি, নানাপ্রকারদেহস্থানানি চেতি ত্রীণি ব্রণাকৃতিকারণান্যুক্তানি||৪||

Adhikarana 4 (5-6) · Śloka 7

আযতাশ্চতুরস্রাশ্চ ত্র্যস্রা মণ্ডলিনস্তথা | অর্ধচন্দ্রপ্রতীকাশা বিশালাঃ কুটিলাস্তথা ||৫|| শরাবনিম্নমধ্যাশ্চ যবমধ্যাস্তথাঽপরে | এবম্প্রকারাকৃতযো ভবন্ত্যাগন্তবো ব্রণাঃ ||৬|| দোষজা বা স্বযং ভিন্না, ন তু বৈদ্যনিমিত্তজাঃ |৭|

ইদানীং ব্রণাকৃতিমাহ- আযতা ইত্যাদি| চতুরস্রাশ্চতুষ্কোণাঃ| ত্র্যস্রাস্ত্রিকোণাঃ| মণ্ডলিনো বর্তুলাঃ| বিশালা বিস্তীর্ণাঃ| কুটিলা বক্রাঃ| স্বযং ভিন্নাঃ স্বযং পক্বভিন্না ইত্যর্থঃ| ন তু বৈদ্যনিমিত্তজাঃ তেষামাযতবিশালসমপ্রবিভক্তলক্ষণা আকৃতযো ব্রণগুণত্বেনৈবোক্তাঃ, যতস্তা আকৃতীর্ভিষজঃ প্রদেশবিশেষ এব কুর্বন্তি||৫-৬||-

Adhikarana 5 (7) · Śloka 8

ভিষগ্ব্রণাকৃতিজ্ঞো হি ন মোহমধিগচ্ছতি ||৭|| ভৃশং দুর্দর্শরূপেষু ব্রণেষু বিকৃতেষ্বপি |৮|

ব্রণাকৃতিজ্ঞানফলমাহ - ভিষগ্ব্রণাকৃতিজ্ঞ ইত্যাদি| দুর্দর্শরূপেষু গোশৃঙ্গবদুদ্গতমাংসপ্ররোহাদিষু||৭||-

Adhikarana 6 (8) · Śloka 9

অনন্তাকৃতিরাগন্তুঃ স ভিষগ্ভিঃ পুরাতনৈঃ ||৮|| সমাসতো লক্ষণতঃ ষড্বিধঃ পরিকীর্তিতঃ |৯|

আগন্তুব্রণাকৃতিমাহ- অনেকাকৃতিরিত্যাদি||৮||-

Adhikarana 7 (9) · Śloka 10

ছিন্নং ভিন্নং তথা বিদ্ধং ক্ষতং পিচ্চিতমেব চ ||৯|| ঘৃষ্টমাহুস্তথা ষষ্ঠং তেষাং বক্ষ্যামি লক্ষণম্ |১০|

তদেব ষড্বিধত্বমাহ- ছিন্নমিত্যাদি| ছিন্নং ভিন্নং চ সধারেণ শস্ত্রেণ, বিদ্ধং পুনরণুমুখেন শস্ত্রেণ, ক্ষতাদীনি তু পাষাণলগুডাদিভিরপি স্যুঃ||৯||-

Adhikarana 8 (10) · Śloka 11

তিরশ্চীন ঋজুর্বাঽপি যো ব্রণশ্চাযতো ভবেত্ ||১০|| গাত্রস্য পাতনং চাপি ছিন্নমিত্যুপদিশ্যতে |১১|

তেষাং প্রত্যেকং লক্ষণমাহ- তিরশ্চীন ইত্যাদি| তিরশ্চীনঃ তির্যগ্ব্যবস্থিত ইত্যর্থঃ; ঋজুরবক্রঃ; অনযোর্দ্বযোরপি আযত ইতি বিশেষণম্| গাত্রপাতনং শস্ত্রাদিপ্রহারেণ হস্তাদিপাতনং, চকারাদপাতনং চ কিঞ্চিচ্ছিন্নমাত্রম্||১০||-

Adhikarana 9 (11) · Śloka 12

কুন্তশক্ত্যৃষ্টিখঙ্গাগ্রবিষাণাদিভিরাশযঃ ||১১|| হতঃ কিঞ্চিত্ স্রবেত্তদ্ধি ভিন্নলক্ষণমুচ্যতে |১২|

ভিন্নমাহ- কুন্তেত্যাদি| শক্তিস্ত্রিমুখী, ঋষ্টিঃ শর্বলা, বিষাণং শৃঙ্গম্; অগ্রশব্দঃ কুন্তাদিভিঃ প্রত্যেকং সম্বধ্যতে| আশয আমাদিস্থানম্| কিঞ্চিত্ স্রবেদিতি কিমপ্যনির্দিষ্টমিত্যর্থঃ| তত্রোদরং যকৃত্ প্লীহা চ রক্তং, বস্তির্মূত্রং, পুরীষাশযঃ পুরীষমিতি||১১||-

Adhikarana 10 (12) · Śloka 13

স্থানান্যামাগ্নিপক্বানাং মূত্রস্য রুধিরস্য চ ||১২|| হৃদুণ্ডুকঃ ফুপ্ফুসশ্চ কোষ্ঠ ইত্যভিধীযতে |১৩|

কে পুনরাশযা ইত্যাহ- স্থানান্যামাগ্নিপক্বানামিত্যাদি| স্থানশব্দ আমাদিভিঃ প্রত্যেকমভিসম্বধ্যতে||১২||-

Adhikarana 11 (13-15) · Śloka 16

তস্মিন্ ভিন্নে রক্তপূর্ণে জ্বরো দাহশ্চ জাযতে ||১৩|| মূত্রমার্গগুদাস্যেভ্যো রক্তং ঘ্রাণাচ্চ গচ্ছতি | মূর্চ্ছাশ্বাসতৃডাধ্মানমভক্তচ্ছন্দ এব চ ||১৪|| বিণ্মূত্রবাতসঙ্গশ্চ স্বেদাস্রাবোঽক্ষিরক্ততা | লোহগন্ধিত্বমাস্যস্য গাত্রদৌর্গন্ধ্যমেব চ ||১৫|| হৃচ্ছূলং পার্শ্বযোশ্চাপি... |১৬|

তস্মিন্নিত্যাদি| তস্মিন্ কোষ্ঠে ইত্যর্থঃ| রক্তপূর্ণ ইতি সর্বত্রৈব রক্তস্য বিদ্যমানত্বাত্| অত্রাধো নাভে রক্তং গুদমূত্রমার্গাভ্যাং প্রবর্ততে, নাভেরূর্ধ্বং মুখঘ্রাণাভ্যামিতি| অভক্তচ্ছন্দো ভোজনানভিলাষঃ| বিডাদিসঙ্গঃ পুরীষাদিনিরোধঃ| স্বেদাস্রাবঃ স্বেদস্রুতিঃ| লোহগন্ধিত্বং লোহগন্ধিভাবো মুখস্য||১৩-১৫||-

Adhikarana 12 (16-17) · Śloka 18

... বিশেষং চাত্র মে শৃণু | আমাশযস্থে রুধিরে রুধিরং ছর্দযেত্ পুনঃ ||১৬|| আধ্মানমতিমাত্রং চ শূলং চ ভৃশদারুণম্ | পক্বাশযগতে চাপি রুজো গৌরবমেব চ ||১৭|| শীততা চাপ্যধো নাভেঃ খেভ্যো রক্তস্য চাগমঃ |১৮|

বিশেষমিত্যাদি| পক্বাশযগতে পক্বাশযস্থে, ‘রুধিরে’ ইতি শেষঃ| খেভ্যঃ স্রোতোভ্যঃ||১৬-১৭||-

Adhikarana 13 (18) · Śloka 19

অভিন্নেঽপ্যাশযেঽন্ত্রাণাং খৈঃ সূক্ষ্মৈরন্ত্রপূরণম্ ||১৮|| পিহিতাস্যে ঘটে যদ্বল্লক্ষ্যতে তস্য গৌরবম্ |১৯|

অভিন্নে ইত্যাদি| কথমভিন্নেঽপ্যন্ত্রাশযে রক্তেনান্ত্রপূরণং যুজ্যত ইত্যাহ- পিহিতাস্য ইত্যাদি| যথা পিহিতাস্যে আচ্ছাদিতমুখে ঘটে সূক্ষ্মৈঃ খৈ রন্ধ্রৈরুদকপূরণং লক্ষ্যত ইত্যর্থঃ| তস্য চান্ত্রাশযস্য, গৌরবং ‘ভবতি’ ইতি শেষঃ||১৮||-

Adhikarana 14 (19) · Śloka 20

সূক্ষ্মাস্যশল্যাভিহতং যদঙ্গং ত্বাশযাদ্বিনা ||১৯|| উত্তুণ্ডিতং নির্গতং বা তদ্বিদ্ধমিতি নির্দিশেত্ |২০|

বিদ্ধলক্ষণমাহ- সূক্ষ্মাস্যেত্যাদি| আশযাদ্বিনেতি আশযম্ আমাদিস্থানম্| উত্তুণ্ডিতম্ উন্নমিতমুখং, নির্গতং নির্গতশল্যম্||১৯||-

Adhikarana 15 (20) · Śloka 21

নাতিচ্ছিন্নং নাতিভিন্নমুভযোর্লক্ষণান্বিতম্ ||২০|| বিষমং ব্রণমঙ্গে যত্তত্ ক্ষতং ত্বভিনির্দিশেত্ |২১|

ক্ষতলক্ষণমাহ- নাতিচ্ছিন্নমিত্যাদি| নাতিচ্ছিন্নং নাত্যর্থদ্বিধাভূতম্| নাতিভিন্নং নাত্যর্থবিদীর্ণম্| উভযোরিতি চ্ছিন্নভিন্নযোরিত্যর্থঃ| বিষমং ব্রণমিতি ব্রণস্য বৈষম্যং নিম্নোন্নতত্বং, ন তু কৃচ্ছ্রসাধ্যত্বম্||২০||-

Adhikarana 16 (21) · Śloka 22

প্রহারপীডনাভ্যাং তু যদঙ্গং পৃথুতাং গতম্ ||২১|| সাস্থি তত্ পিচ্চিতং বিদ্যান্মজ্জরক্তপরিপ্লুতম্ |২২|

পিচ্চিতলক্ষণমাহ- প্রহারেত্যাদি| প্রহারো মুদ্গরাদ্যভিঘাতঃ, পীডনং কপাটাদিযন্ত্রেণ| পৃথুতাং বিস্তীর্ণতাং গতমিতি| সাস্থি অস্থিযুক্তম্| মজ্জরক্তপরিপ্লুতমিতি মজ্জরক্তাভিব্যাপ্তমিত্যর্থঃ||২১||-

Adhikarana 17 (22) · Śloka 23

বিগতত্বগ্যদঙ্গং হি সঙ্ঘর্ষাদন্যথাঽপি বা ||২২|| উষাস্রাবান্বিতং তত্তু ঘৃষ্টমিত্যুপদিশ্যতে |২৩|

ঘৃষ্টলক্ষণমাহ- বিগতত্বগিত্যাদি| বিগতত্বক্ ত্বগ্রহিতম্| সঙ্ঘর্ষাদ্ দ্রব্যান্তরেণ সঙ্ঘর্ষণাত্| অন্যথা অন্যেন প্রকারেণেত্যর্থঃ| ‘অন্যথাঽপি বা’ ইত্যস্য স্থানে কেচিত্ ‘অন্যজাদপি’ ইতি পঠন্তি, তত্রান্যজাত্ সঙ্ঘর্ষাত্ দ্রব্যান্তরজাত্ সঙ্ঘর্ষণাদিত্যর্থঃ| উষা দাহবিশেষঃ||২২||-

Adhikarana 18 (23-25) · Śloka 26

ছিন্নে ভিন্নে তথা বিদ্ধে ক্ষতে বাঽসৃগতিস্রবেত্ ||২৩|| রক্তক্ষযাদ্রুজস্তত্র করোতি পবনো ভৃশম্ | স্নেহপানং হিতং তত্র তত্সেকো বিহিতস্তথা ||২৪|| বেশবারৈঃ সকৃশরৈঃ সুস্নিগ্ধৈশ্চোপনাহনম্ | ধান্যস্বেদাংশ্চ কুর্বীত স্নিগ্ধান্যালেপনানি চ ||২৫|| বাতঘ্নৌষধসিদ্ধৈশ্চ স্নেহৈর্বস্তির্বিধীযতে |২৬|

লক্ষণৈঃ ষঙ্বিধং সদ্যোব্রণং নির্দিশ্যেদানীং চতুর্ষু ছিন্নাদিষু চিকিত্সামাহ- ছিন্নে ইত্যাদি| তত্সেকো বিহিত ইতি কোষ্ণস্নেহসেক ইত্যর্থঃ| বেশবারৈর্নিরস্থিস্বিন্নস্নিগ্ধপিষ্টমাংসৈঃ| কৃশরা তিলতণ্ডুমাষকৃতা যবাগূঃ| উপনাহনং বন্ধনম্| ধান্যস্বেদানিত্যাদি ধান্যস্বেদো মাষাদিকোষ্ণধান্যস্বেদ ইত্যেকে; অন্যে তু ধান্যং ধান্যাম্লম্, অম্লশব্দোত্তরপদলোপেন| আলেপনশব্দো লেপনে| স্নেহপানমূর্ধ্বনাভিজেষু ব্রণেষু, নাভেরধোগতেষু বস্তিরিতি||২৩-২৫||-

Adhikarana 19 (26-27) · Śloka 28

পিচ্চিতে চ বিঘৃষ্টে চ নাতিস্রবতি শোণিতম্ ||২৬|| অগচ্ছতি ভৃশং তস্মিন্ দাহঃ পাকশ্চ জাযতে | তত্রোষ্মণো নিগ্রহার্থং তথা দাহপ্রপাকযোঃ ||২৭|| শীতমালেপনং কার্যং পরিষেকশ্চ শীতলঃ |২৮|

ইদানীং পিচ্চিতঘৃষ্টযোরস্রুতশোণিতত্বেন সমানধর্মণোরেকমেব চিকিত্সিতমাহ- পিচ্চিত ইত্যাদি| অগচ্ছতি অস্রবতি সতি| তস্মিন্ রুধিরে| ভৃশম্ অত্যর্থম্| অন্যে তু ‘শীতমালেপনং কার্যং পরিষেকশ্চ শীতলঃ’- ইত্যস্য স্থানে ‘শীতমালেপনং সেকঃ শুদ্ধী রক্তবিমোক্ষণম্’ ইতি পঠন্তি| শুদ্ধির্বমনাদিঃ; তত্রোর্ধ্বনাভিজেষু বমনং, দাহোত্তরে মধ্যকাযজে রেচনম্, অধোনাভিজেষু পুনরাস্থাপনং, স্ত্যানরক্তেষু রক্তমোক্ষণম্||২৬-২৭||-

Adhikarana 20 (28) · Śloka 29

ষট্স্বেতেষু যথোক্তেষু ছিন্নাদিষু সমাসতঃ ||২৮|| জ্ঞেযং সমর্পিতং সর্বং সদ্যোব্রণচিকিত্সিতম্ |২৯|

উক্তমেবোপসংহরন্নাহ- ষট্স্বেতেষ্বিত্যাদি| সমর্পিতং সম্যগর্পিতম্| জ্ঞেযং জ্ঞাতব্যম্||২৮||-

Adhikarana 21 (29-30) · Śloka 30

অত ঊর্ধ্বং প্রবক্ষ্যামি ছিন্নানাং তু চিকিত্সিতম্ ||২৯|| যে ব্রণা বিবৃতাঃ কেচিচ্ছিরঃপার্শ্বাবলম্বিনঃ | তান্ সীব্যেদ্বিধিনোক্তেন বধ্নীযাদ্গাঢমেব চ ||৩০||

অথ মূর্ধাদ্যবযবাশ্রযং চিকিত্সাবিশেষমাহ- অত ঊর্ধ্বমিত্যাদি| বিবৃতা ব্যাত্তমুখাঃ| শিরঃপার্শ্বাবলম্বিনো মস্তকপার্শ্বাবলম্বনশীলাঃ, অন্যে তু শিরোঽবলম্বিনস্তথা পার্শ্বাবলম্বিনশ্চেত্যেবং ব্যাখ্যানযন্তি| বিধিনোক্তেন ঋজুগ্রন্থিসেবনাদিনা সীব্যেদিত্যর্থঃ||২৯-৩০||

Adhikarana 22 (31-33) · Śloka 33

কর্ণং স্থানাদপহৃতং স্থাপযিত্বা যথাস্থিতম্ | সীব্যেদ্যথোক্তং তৈলেন স্রোতশ্চাভিপ্রতর্পযেত্ ||৩১|| কৃকাটিকান্তে ছিন্নে তু গচ্ছত্যপি সমীরণে | সম্যঙ্নিবেশ্য বধ্নীযাত্ সীব্যেচ্চাপি নিরন্তরম্ ||৩২|| আজেন সর্পিষা চৈবং পরিষেকং তু কারযেত্ | উত্তানোঽন্নং সমশ্নীযাচ্ছযীত চ সুযন্ত্রিতঃ ||৩৩||

কর্ণমিত্যাদি| স্থানাদপহৃতং নিঃশেষতশ্ছিন্নম্| তৈলেন বাতঘ্নৌষধসিদ্ধেন| কৃকাটিকান্তে গ্রীবাযাঃ পশ্চাত্ কৃকাটিকাপর্যন্তে| গচ্ছত্যপি সমীরণে ইতি বাতে নির্বহত্যপি সীব্যেদিত্যর্থঃ, ‘অসাধ্যা বাযুনির্বাহিণ’ (সূ. ২৩) ইত্যস্যাযমপবাদঃ| সম্যঙ্নিবেশ্য যথাস্থানং স্থাপযিত্বা| উত্তানোঽন্নং সমশ্নীযাদিতি তথৈব কৃকাটিকাযাঃ সুস্থিতত্বাত্; অন্নমিত্যুপলক্ষণং, তেন শযনমূত্রপুরীষোত্সর্গাদি চোত্তানস্যৈবেতি| শযীত চ সুযন্ত্রিত ইতি যথা কৃকাটিকা স্থিরা ভবতি||৩১-৩৩||

Adhikarana 23 (34-35) · Śloka 35

শাখাসু পতিতাংস্তির্যক্ প্রহারান্ বিবৃতান্ ভৃশম্ | সীব্যেত্ সম্যঙ্নিবেশ্যাশু সন্ধ্যস্থীন্যনুপূর্বশঃ ||৩৪|| বদ্ধ্বা বেল্লিতকেনাশু ততস্তৈলেন সেচযেত্ | চর্মণা গোফণাবন্ধঃ কার্যো যো বা হিতো ভবেত্ ||৩৫||

শাখাসু পতিতানিত্যাদি| শাখাসু চতসৃষু| সম্যঙ্নিবেশ্যেত্যাদি আশু সন্ধ্যস্থীনি সম্যঙ্নিবেশ্য যথাস্থানং স্থাপযিত্বা সীব্যেত্| অনুপূর্বশ ইতি অনুশব্দঃ সদৃশার্থঃ; তেন পূর্বসদৃশেন| বেল্লিতকেনেতি ‘বন্ধেন’ ইতি শেষঃ||৩৪-৩৫||

Adhikarana 24 (36) · Śloka 36

পৃষ্ঠে ব্রণো যস্য ভবেদুত্তানং শাযযেত্তু তম্ | অতোঽন্যথা চোরসিজে শাযযেত্ পুরুষং ব্রণে ||৩৬||

পৃষ্ঠে ইত্যাদি| উত্তানং শাযযেদিতি দোষস্রুত্যর্থম্, অন্যথাঽনির্গচ্ছন্ অন্তরবস্থিতো দোষ উত্সঙ্গং কৃত্বা বিকরোতি; অন্যথেতি অধোমুখমিত্যর্থঃ| উক্তং চ- “উরোব্রণী উত্তানশয্যাং পরিহরেত্, পৃষ্ঠব্রণী তু স্তনোরোঽবষ্টভ্য, দোষস্ত্বন্যথা ন প্রসিচ্যতে, অনির্গচ্ছন্ বিকারানুত্পাদযতি”- ইতি জেজ্জটঃ| গযী তু “পৃষ্ঠে ব্রণো যস্য ভবেদনুত্তানঃ শযীত সঃ| অতোঽন্যথা চোরসিজে শযীত পুরুষো ব্রণে”- ইতি পঠতি, ব্যাখ্যানযতি চ- অনুত্তানোঽবাঙ্মুখোঽধোমুখঃ শযীত, উরসিজেষু ব্রণেষ্বন্যথা উত্তান এব শযীতেতি||৩৬||

Adhikarana 25 (37) · Śloka 37

ছিন্নাং নিঃশেষতঃ শাখাং দগ্ধ্বা তৈলেন বুদ্ধিমান্ | বধ্নীযাত্ কোশবন্ধেন প্রাপ্তং কার্যং চ রোপণম্ ||৩৭||

শাখানাং নিঃশেষচ্ছেদে বিধানান্তরমাহ- ছিন্নামিত্যাদি| কোশবন্ধেন স্থগিকাবন্ধেন| প্রাপ্তং যুক্তম্| রোপণমিতি শোধনস্যাগ্নিনৈব কৃতত্বাত্||৩৭||

Adhikarana 26 (38) · Śloka 39

চন্দনং পদ্মকং রোধ্রমুত্পলানি প্রিযঙ্গবঃ | হরিদ্রা মধুকং চৈব পযঃ স্যাদত্র চাষ্টমম্ ||৩৮|| তৈলমেভির্বিপক্বং তু প্রধানং ব্রণরোপণম্ |৩৯|

অস্য রোপণার্থং তৈলমাহ- চন্দনমিত্যাদি| পযো দুগ্ধং, স্যাত্ ভবেত্, তচ্চতুর্গুণমানম্| ননু সঙ্খ্যেযনির্দেশাদেব সঙ্খ্যাসিদ্ধাবষ্টমগ্রহণং কিমর্থম্? উচ্যতে- নাত্র পাকো জলেনেষ্যতে, পযসৈব পাকং মন্যতে; অন্যে ত্বষ্টমগ্রহণেনাষ্টাঙ্গসঞ্জ্ঞকমিদং তৈলমিতি কথযন্তি ||৩৮||-

Adhikarana 27 (39-40) · Śloka 41

চন্দনং কর্কটাখ্যা চ সহে মাংস্যাহ্বযাঽমৃতা ||৩৯|| হরেণবো মৃণালং চ ত্রিফলা পদ্মকোত্পলে | ত্রযোদশাঙ্গং ত্রিবৃতমেতদ্বা পযসাঽন্বিতম্ ||৪০|| তৈলং বিপক্বং সেকার্থে হিতং তু ব্রণরোপণে |৪১|

অস্য রোপণার্থং দ্বিতীযং চন্দনাদিতৈলমাহ- চন্দনমিত্যাদি| কর্কটাখ্যা কর্কটশৃঙ্গী| সহে মাষপর্ণী মুদ্গপর্ণী চ| অমৃতা গুডূচী| হরেণবঃ কলাযাঃ| মৃণালম্ উশীরম্| উত্পলং নীলোত্পলম্| ত্রিবৃতমিতি ত্রিভির্ঘৃতবসামজ্জভির্বৃতং তৈলং ত্রিবৃতম্| এতত্ ত্রযোদশাঙ্গং তৈলম্| পযসা ক্ষীরেণ চতুর্গুণেন পক্বম্| বাশব্দঃ পূর্বোক্ততৈলাপেক্ষযা| ‘মাংস্যাহ্বযা’ ইত্যস্য স্থানে ‘সোমাহ্বযা’ ইতি কেচিত্ পঠন্তি; সোমাহ্বযা ত্রিসন্ধিকা, ‘সোমলতা’ ইত্যপরে| গযী তু মজ্জবর্জং ত্রযঃ স্নেহাস্ত্রিবৃতমিত্যাহ, তন্মতে ত্রিবৃতং পযসা বিপক্বং ব্রণরোপণমিতি ব্যাখ্যানম্||৩৯-৪০||-

Adhikarana 28 (41-43) · Śloka 43

অত ঊর্ধ্বং প্রবক্ষ্যামি ভিন্নানাং তু চিকিত্সিতম্ ||৪১|| ভিন্নং নেত্রমকর্মণ্যমভিন্নং লম্বতে তু যত্ | তন্নিবেশ্য যথাস্থানমব্যাবিদ্ধসিরং শনৈঃ ||৪২|| পীডযেত্ পাণিনা সম্যক্ পদ্মপত্ত্রান্তরেণ তু | ততোঽস্য তর্পণং কার্যং নস্যং চানেন সর্পিষা ||৪৩||

অত ঊর্ধ্বমিত্যাদি| যদ্যপি আশযবিষযে ভিন্নলক্ষণং প্রাগুক্তং, তথাঽপি নেত্রমপ্যাশয এব ব্যবহর্তব্যমত আহ- ভিন্নং নেত্রমিত্যাদি| অকর্মণ্যম্ অবলোকনাদিস্বকর্মণোঽসম্পাদকম্; অন্যে তু, অকর্মণ্যমসাধ্যমাহুঃ| তচ্চাভিন্নং কর্মণ্যং চ সাধ্যং চিকিত্সিতব্যম্| নিবেশ্য স্থাপযিত্বা| অব্যাবিদ্ধসিরম্ অনাকুলিতসিরম্; অন্যে তু ‘অব্যাবিদ্ধশিরং’ ইতি পঠিত্বা অকুটিলমস্তকমিতি ব্যাখ্যানযন্তি| পাণিনা হস্তেন| পদ্মপত্রাণামন্তরত্বমূষ্মত্বব্যুদাসার্থং মার্দবার্থং চ| ততো মধুসর্পির্দানানন্তরং তর্পণং পূরণং কার্যম্| অনেন বক্ষ্যমাণেনেত্যর্থঃ| অন্যে তু ‘অনেন’ ইত্যস্য স্থানে ‘আজেন’ ইতি পঠন্তি||৪১-৪৩||

Adhikarana 29 (44) · Śloka 45

আজং ঘৃতং ক্ষীরপাত্রং মধুকং চোত্পলানি চ | জীবকর্ষভকৌ চৈব পিষ্ট্বা সর্পির্বিপাচযেত্ ||৪৪|| সর্বনেত্রাভিঘাতে তু সর্পিরেতত্ প্রশস্যতে |৪৫|

তদেবাজং ঘৃতমুত্পাদযন্নাহ- আজং ঘৃতমিত্যাদি| অজাঘৃতং মধুকাদিভিঃ সমাংশং পিষ্ট্বা সর্পির্গব্যং ক্ষীরপাত্রং ক্ষীরাঢকং দত্ত্বা বিপাচযেত্| ননু চাজঘৃতস্য কিং পেষণেন? উচ্যতে- যথাসম্ভবং পেষণং কার্যম্| দ্রব্যসমত্বমত্রাভিধীযতে যথাঽন্যেষু যোগেষ্বর্কক্ষীরাদীনাং; ততশ্চ পঞ্চদ্রব্যাণি যথা মাত্রযাঽষ্টৌ পলানি ভবন্তি তথা মাত্রাং পরিকল্প্য ঘৃতস্য প্রস্থং ক্ষীরাঢকমাবাপ্য বিপচেদিত্যেষ শাস্ত্রবৃদ্ধব্যবহারঃ| অন্যে তু আজং ঘৃতং গব্যং চ তুল্যং কৃত্বা মধুকাদিকল্কেন পচেত্, শেষং পূর্ববত্; নৈবম্, বৃদ্ধা আঢকশব্দেন দ্রবদ্রব্যস্য দ্বিগুণতযা পরিভাষিতত্বাদষ্টাবিংশত্যধিকপলশতং গৃহ্ণন্তি| পিষ্ট্বা সর্পির্বিপাচযেদিতি সর্পিরিতি চ সর্পিষো দ্বিরুচ্চারণং নিযমার্থং; তেন, অনেনৈব ঘৃতেন তর্পণং নস্যং চ প্রশস্তং ন ত্বন্যেনেতি| গযী তু, “অজাঘৃতস্য প্রস্থং, ক্ষীরস্য পুনরাঢকং, মধুকাদীনি চত্বারি দ্বিপলিকান্যষ্টপলত্বেন ঘৃতস্য পাদিকানি” ইত্যাহ||৪৪||-

Adhikarana 30 (45-49) · Śloka 49

উদরান্মেদসো বর্তির্নির্গতা যস্য দেহিনঃ ||৪৫|| কষাযভস্মমৃত্কীর্ণাং বদ্ধ্বা সূত্রেণ সূত্রবিত্ | অগ্নিতপ্তেন শস্ত্রেণ ছিন্দ্যান্মধুসমাযুতম্ ||৪৬|| বদ্ধ্বা ব্রণং সুজীর্ণেঽন্নে সর্পিষঃ পানমিষ্যতে | স্নেহপানাদৃতে চাপি পযঃপানং বিধীযতে ||৪৭|| শর্করামধুযষ্টিভ্যাং লাক্ষযা বা শ্বদংষ্ট্রযা | চিত্রাসমন্বিতং চৈব রুজাদাহবিনাশনম্ ||৪৮|| আটোপো মরণং বা স্যাচ্ছূলো বাঽচ্ছিদ্যমানযা | মেদোগ্রন্থৌ তু যত্তৈলং বক্ষ্যতে তচ্চ যোজযেত্ ||৪৯||

উদরভেদচিকিত্সিতমাহ- উদরাদিত্যাদি| কষাযভস্মমৃত্কীর্ণাং ‘তাং বর্তিম্’ ইতি শেষঃ; কষাযাঃ সর্জকার্জুনাদযঃ, তেষাং ভস্ম ক্ষারঃ , মৃত্ কৃষ্ণমৃত্, কীর্ণাং গুণ্ডিতাম্ ; অন্যে তু ‘কষাযচূর্ণমৃত্কীর্ণাম্’ ইতি পঠন্তি| বদ্ধ্বেতি মূলমিতি শেষঃ| সূত্রবিত্ শাস্ত্রবিত্| অগ্নিতপ্তেন শস্ত্রেণ ছিন্দ্যাত্, অন্যথা অতপ্তশস্ত্রচ্ছেদনে পাকভযং স্যাত্| সা পুনঃ ক্ষতং যদা প্রবেশ্যমানা ন প্রবিশতি প্রবিষ্টা বা নাবতিষ্ঠতে তদা তস্যাশ্ছেদঃ| চিত্রা এরণ্ডঃ, দন্তীত্যন্যে| কল্পনা চেযং- ক্ষীরস্য যষ্টিমধুক্বথিতস্য সশর্করৈরণ্ডতৈলপ্রক্ষেপস্য পানমিত্যেকো যোগঃ, শ্বদংষ্ট্রাক্বথিতং ক্ষীরং সলাক্ষাচিত্রাতিলতৈলপ্রক্ষেপং পীযত ইতি দ্বিতীযো যোগঃ| বাশব্দাত্ কেচিদেকমেব যোগমামনন্তি, তথা চ বৃদ্ধবাগ্ভটঃ- “সক্ষৌদ্রে চ ব্রণে বদ্ধে সুজীর্ণেঽন্নে ঘৃতং পিবেত্| ক্ষীরং বা শর্করাচিত্রালাক্ষাগোক্ষুরকৈঃ শৃতম্|| রুগ্দাহজিত্ সযষ্ট্যাহ্বৈঃ পরং পূর্বোদিতো বিধিঃ” (অ. সং. উ. ৩১) ইতি| ক্ষীরপাকবিধিরযং- “দ্রব্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষঃ কর্তব্যঃ ক্ষীরপাকে ত্বযং বিধিঃ”- ইতি| প্রতিদিনং ক্ষীরচতুষ্পলং পেযং, শর্করৈরণ্ডতৈলং তু প্রত্যেকং কার্ষিকম্; এবং দ্বিতীযযোগেঽপি| রুজাদাহবিনাশনমিতি পযঃ- পানমিতি সম্বন্ধঃ| মেদোবর্তেরচ্ছেদে ফলমাহ- আটোপ ইত্যাদি| অচ্ছিদ্যমানযা অকৃত্তমানযা| মেদোগ্রন্থৌ তু যত্তৈলমিতি “দ্বিকরঞ্জ” (চি. ১৮) ইত্যাদিকম্||৪৫-৪৯||

Adhikarana 31 (50) · Śloka 50

ত্বচোঽতীত্য সিরাদীনি ভিত্ত্বা বা পরিহৃত্য বা | কোষ্ঠে প্রতিষ্ঠিতং শল্যং কুর্যাদুক্তানুপদ্রবান্ ||৫০||

মেদোবর্তিপ্রত্যাসত্ত্যা জঠরগতশল্যলক্ষণমাহ- ত্বচোঽতীত্যেত্যাদি| ত্বচোঽতীত্য ত্বচোঽতিক্রম্য, ত্বচঃ সপ্ত; সিরাদীনি সিরামাংসস্নাযুসন্ধ্যস্থীনি| সিরাচ্ছেদলিঙ্গং তু “সুরেন্দ্রগোপপ্রতিমং” (সূ. ২৫) ইত্যাদি পূর্বমুক্তম্| প্রতিষ্ঠিতম্ অবস্থিতম্| উক্তানুপদ্রবানিতি প্রণষ্টশল্যবিজ্ঞানীযে “কোষ্ঠগতে ত্বাটোপানাহবিদ্রধ্যাদীন্” (সূ. ২৬) ইতি||৫০||

Adhikarana 32 (51) · Śloka 51

তত্রান্তর্লোহিতং পাণ্ডুং শীতপাদকরাননম্ | শীতোচ্ছ্বাসং রক্তনেত্রমানদ্ধং চ বিবর্জযেত্ ||৫১||

কোষ্ঠগতশল্যস্যাসাধ্যস্য লক্ষণমাহ- তত্রান্তর্লোহিতমিত্যাদি| অন্তর্লোহিতং কোষ্ঠমধ্যপতিতরুধিরমিত্যর্থঃ| পাণ্ডুং শ্বেতম্| শীতপাদকরাননং শীতচরণহস্তমুখম্| আনদ্ধং স্বমার্গাদপ্রবর্তমানদোষমলম্| এবংবিধং শল্যবন্তং পুমাংসং বিবর্জযেত্ পরিহরেদিত্যর্থঃ||৫১||

Adhikarana 33 (52-54) · Śloka 54

আমাশযস্থে রুধিরে বমনং পথ্যমুচ্যতে | পক্বাশযস্থে দেযং চ বিরেচনমসংশযম্ ||৫২|| আস্থাপনং চ নিঃস্নেহং কার্যমুষ্ণৈর্বিশোধনৈঃ | যবকোলকুলত্থানাং নিঃস্নেহেন রসেন চ ||৫৩|| ভুঞ্জীতান্নং যবাগূং বা পিবেত্ সৈন্ধবসংযুতাম্ | অতিনিঃস্রুতরক্তো বা ভিন্নকোষ্ঠঃ পিবেদসৃক্ ||৫৪||

সাধ্যস্য চিকিত্সিতমাহ- আমাশযস্থে ইত্যাদি| পক্বাশযস্থে পিত্তাশযস্থে ইত্যর্থঃ| বাতাশযস্থে পুনরাস্থাপনমেব; আস্থাপনং নিরূহঃ| উষ্ণৈর্বিশোধনৈর্গোমূত্রাদিভিরাস্থাপনং কার্যমিতি সম্বন্ধঃ| বিশুদ্ধস্য রক্তানুলোমনমন্নমাহ- যবকোলেত্যাদি| অনিঃস্রুতরক্তস্য চিকিত্সামভিধাযাতিনিঃস্রুতরক্তস্য চিকিত্সাং নির্দিশন্নাহ- অতিনিঃস্রুতেত্যাদি| পিবেদসৃগিতি জীবিতানুবন্ধনার্থম্||৫২-৫৪||

Adhikarana 34 (55) · Śloka 55

স্বমার্গপ্রতিপন্নাস্তু যস্য বিণ্মূত্রমারুতাঃ | ব্যুপদ্রবঃ স ভিন্নেঽপি কোষ্ঠে জীবতি মানবঃ ||৫৫||

ভিন্নকোষ্ঠস্য সাধ্যস্য লক্ষণমাহ- স্বমার্গেত্যাদি| ব্যুপদ্রবঃ বিগতা উপদ্রবা যস্য সঃ, উপদ্রবা জ্বরাধ্মানাদযঃ||৫৫||

Adhikarana 35 (56-65) · Śloka 66

অভিন্নমন্ত্রং নিষ্ক্রান্তং প্রবেশ্যং নান্যথা ভবেত্ | পিপীলিকাশিরোগ্রস্তং তদপ্যেকে বদন্তি তু ||৫৬|| প্রক্ষাল্য পযসা দিগ্ধং তৃণশোণিতপাংশুভিঃ | প্রবেশযেত্ কৃত্তনখো ঘৃতেনাক্তং শনৈঃ শনৈঃ ||৫৭|| প্রবেশযেত্ ক্ষীরসিক্তং শুষ্কমন্ত্রং ঘৃতাপ্লুতম্ | অঙ্গুল্যাঽভিমৃশেত্ কণ্ঠং জলেনোদ্বেজযেদপি ||৫৮|| হস্তপাদেষু সঙ্গৃহ্য সমুত্থাপ্য মহাবলাঃ | ভবত্যন্তঃপ্রবেশস্তু যথা নির্ধুনুযুস্তথা ||৫৯|| তথাঽন্ত্রাণি বিশন্ত্যন্তঃ স্বাং কলাং পীডযন্তি চ | ব্রণাল্পত্বাদ্বহুত্বাদ্বা দুষ্প্রবেশং ভবেত্তু যত্ ||৬০|| তদাপাট্য প্রমাণেন ভিষগন্ত্রং প্রবেশযেত্ | যথাস্থানং নিবিষ্টে চ ব্রণং সীব্যেদতন্দ্রিতঃ ||৬১|| স্থানাদপেতমাদত্তে প্রাণান্ গুপিতমেব বা | বেষ্টযিত্বা তু পট্টেন ঘৃতসেকং প্রদাপযেত্ ||৬২|| ঘৃতং পিবেত্ সুখোষ্ণং চ চিত্রাতৈলসমন্বিতম্ | মৃদুক্রিযার্থং শকৃতো বাযোশ্চাধঃপ্রবৃত্তযে ||৬৩|| ততস্তৈলমিদং কুর্যাদ্রোপণার্থং চিকিত্সকঃ | ত্বচোঽশ্বকর্ণধবযোর্মোচকীমেষশৃঙ্গযোঃ ||৬৪|| শল্লক্যর্জুনযোশ্চাপি বিদার্যাঃ ক্ষীরিণাং তথা | বলামূলানি চাহৃত্য তৈলমেতৈর্বিপাচযেত্ ||৬৫|| ব্রণং সংরোপযেত্তেন বর্ষমাত্রং যতেত চ |৬৬|

ইদানীং কোষ্ঠগতান্ত্রভেদমাহ- অভিন্নেত্যাদি| নান্যথেতি যথৈব স্থিতানি তথৈব প্রবেশ্যানি তেনৈব প্রকারেণেত্যর্থঃ| অপরে ত্বন্যথা ব্যাখ্যানযন্তি, যথা- অভিন্নাদন্যথা অপরপ্রকারং ভিন্নমন্ত্রং প্রবেশ্যং ন ভবেত্; তথাচ বৃদ্ধবাগ্ভটঃ- “অভিন্নমন্ত্রং নিষ্ক্রান্তং প্রবেশ্যং নহ্যতোঽন্যথা” (অ. সং. উ. ৩২)- ইতি| ভিন্নমপি মতান্তরেণ প্রবেশ্যমিতি নির্দিশন্নাহ- পিপীলিকাশিরোগ্রস্তমিত্যাদি| তদপি ভিন্নমপি, অন্ত্রং প্রবেশ্যমিতি সম্বন্ধঃ| পিপীলিকাশিরোগ্রস্তমিত্যনেন পিপীলিকাবদনসন্দংশসংহিতে অন্ত্রে তাসাং কবন্ধচ্ছেদঃ কার্য ইতি ব্যাখ্যানযন্তি | গযী তু ‘অলাঙ্গুলশিরোগ্রস্তম্’ ইতি পঠতি; তত্র অলাঙ্গুলঃ স্থূলপিপীলিকঃ| প্রক্ষাল্যেত্যাদি| পযসা ক্ষীরেণ, দিগ্ধং গুণ্ডিতং, আবৃতমিত্যর্থঃ | পাংশুঃ ধূলিঃ| কৃত্তনখঃ ছিন্ননখঃ| প্রবিষ্টেঽন্ত্রে স্বস্থাননযনার্থমন্ত্রস্যোপাযত্রযমাহ- অঙ্গুল্যেত্যাদি| অভিমৃশেত্ স্পৃশেত্| উদ্বেজযেত্ ত্রাসযেত্| সমুত্থাপ্য ঊর্ধ্বং নীত্বা অন্ত্রভেদবন্তং পুরুষং মহাবলাঃ পুরুষাস্তথা নির্ধুনুযুর্যথাঽন্ত্রস্যান্তঃপ্রবেশো ভবতীতি সম্বন্ধঃ; নির্ধুনুযুঃ আলোডযেযুরিত্যর্থঃ | এভিঃ প্রযোগৈঃ কিং ভবতীত্যাহ- তথাঽন্ত্রাণীত্যাদি| (অন্ত্রাণি যথাঽন্তঃ বিশন্তি তথা) স্বাং কলাং পীডযন্তি স্বকীযা কলা পঞ্চমী মলধরা তাং পীডযন্তি স্বস্থানং নির্বিশন্তীত্যর্থঃ| দুঃপ্রবেশস্য চিকিত্সামাহ- ব্রণাল্পত্বাদিত্যাদি| ব্রণাল্পত্বাত্ ব্রণসূক্ষ্মত্বাত্, বহুত্বাদ্ ব্রণস্য বহুলত্বাত্, তত্র বিপুলত্বে সতি স ব্রণঃ সীব্যঃ| কেচিদ্বহুত্বাদিত্যন্ত্রবিশেষণমঙ্গীকৃত্য ব্রণসূক্ষ্মত্বে অন্ত্রবহুত্বে চোভযত্রাপি পাটনপূর্বং প্রবেশং মন্যন্তে; তচ্চ পাটনং যাবতাঽন্ত্রং প্রবিশতি তাবত্ কার্যম্| অতন্দ্রিতঃ অনলসঃ| স্বস্থানেঽনিবিষ্টং ব্যাকুলিতং চান্ত্রং কিং করোতীত্যাহ- স্থানাদপেতমিত্যাদি| অপেতম্ অপগতম্| প্রাণানাদত্তে গৃহ্ণাতি মারযতীত্যর্থঃ| গুপিতং ব্যাকুলিতং পরস্পরমতিক্রান্তমিত্যর্থঃ| অতঃ পরং ক্রিযাবিধিঃ- বেষ্টযিত্বেত্যাদি| মধুঘৃতাভ্যক্তং পট্টবেষ্টিতং ঘৃতেন কোষ্ণেন সিঞ্চেত্| চিত্রাতৈলসমন্বিতমিতি চিত্রাতৈলম্ এরণ্ডতৈলং, তত্ফলং পুরীষমার্দবং বাতানুলোমনং চ| ইদং বক্ষ্যমাণম্| ত্বচোঽশ্বকর্ণেত্যাদি| অশ্বকর্ণঃ পূর্বদেশপ্রসিদ্ধোঽশ্বত্থসদৃশঃ; মোচকী শাল্মলী, মেষশৃঙ্গং কর্কটশৃঙ্গং, পুত্রঞ্জীবকভেদ ইত্যন্যে, ক্ষীরিণ্যো ন্যগ্রোধোদুম্বরাশ্বত্থপ্লক্ষগর্দভাণ্ডাঃ, এষাং ত্বগ্ভির্বলামূলৈশ্চ তৈলপাদেন কল্কীকৃতৈর্জলং দত্ত্বা চতুর্গুণং তৈলপ্রস্থং পাচযেদিতি জেজ্জটঃ; গযী তু “এষাং দ্রব্যাণামাঢকং সলিলাঢকৈশ্চতুর্ভিঃ ক্বথিতমাঢকশেষং, তেন কষাযেণাশ্বকর্ণাদিত্বক্পাদকল্কং তৈলপ্রস্থং পাচযেত্” ইত্যাহ| বর্ষমাত্রং যতেতেতি মৈথুনব্যাযামাদি পরিহরন্ যত্নং কুর্বীতেত্যর্থঃ||৫৬-৬৫||

Adhikarana 36 (66-68) · Śloka 69

পাদৌ নিরস্তমুষ্কস্য জলেন প্রোক্ষ্য চাক্ষিণী ||৬৬|| প্রবেশ্য তুন্নসেবন্যা মুষ্কৌ সীব্যেত্ততঃ পরম্ | কার্যো গোফণিকাবন্ধঃ কট্যামাবেশ্য যন্ত্রকম্ ||৬৭|| ন কুর্যাত্ স্নেহসেকং চ তেন ক্লিদ্যতি হি ব্রণঃ | কালানুসার্যাগুর্বেলাজাতীচন্দনপদ্মকৈঃ ||৬৮|| শিলাদার্ব্যমৃতাতুত্থৈস্তৈলং কুর্বীত রোপণম্ |৬৯|

মুষ্কভেদচিকিত্সিতমাহ- পাদৌ নিরস্তমুষ্কস্যেত্যাদি| পাদাবক্ষিণী চ জলেন প্রোক্ষ্য সিক্ত্বেত্যর্থঃ; ‘মুষ্কফলে’ ইত্যধ্যাহারঃ| মুষ্কৌ অণ্ডকোষৌ, তুন্নসেবন্যা সেবনীবিশেষেণ, সীব্যেত্| গোফণিকা কৌপীনং কচ্ছোটক ইত্যর্থঃ| কট্যামাবেশ্য যন্ত্রকমিত্যাদি| পট্টযন্ত্রমাবেশ্য, চলনভযাদিত্যর্থঃ| কালানুসার্যেত্যাদি| কালানুসার্যা তগরং, শিলা মনঃশিলা||৬৬-৬৮||-

Adhikarana 37 (69-70) · Śloka 71

শিরসোঽপহৃতে শল্যে বালবর্তিং নিবেশযেত্ ||৬৯|| বালবর্ত্যামদত্তাযাং মস্তুলুঙ্গং ব্রণাত্ স্রবেত্ | হন্যাদেনং ততো বাযুস্তস্মাদেবমুপাচরেত্ ||৭০|| ব্রণে রোহতি চৈকৈকং শনৈর্বালমপক্ষিপেত্ |৭১|

অতঃ পরং বিদ্ধচিকিত্সারম্ভঃ, তত্র প্রাগেবোত্তমাঙ্গে বিদ্ধচিকিত্সিতমাহ- শিরস ইত্যাদি| অপহৃতে কর্ষিতে| বালবর্তিমিতি কেশরচিতবর্তিং ব্রণমুখপিধানার্থং নিবেশযেত্ নিরবশেষেণ প্রবেশযেত্| বালবর্ত্যদানে দোষমাহ- বালবর্ত্যামিত্যাদি| মস্তুলুঙ্গমিতি শিরসো বলাধানং স্ত্যানঘৃতাকারং মস্তুলুঙ্গমুচ্যতে| এনম্ আতুরম্| ততো মস্তুলুঙ্গস্রবণাত্| এবমিতি পূর্বোক্তপ্রকারেণ| উপাচরেত্ চিকিত্সাং কুর্যাত্| অপক্ষিপেত্ কর্ষেত্||৬৯-৭০||-

Adhikarana 38 (71) · Śloka 72

গাত্রাদপহৃতেঽন্যস্মাত্ স্নেহবর্তিং প্রবেশযেত্ ||৭১|| কৃতে নিঃশোণিতে চাপি বিধিঃ সদ্যঃক্ষতে হিতঃ |৭২|

সামান্যশরীরাবযবস্য চিকিত্সামাহ- গাত্রাদপহৃতে ইত্যাদি| গাত্রাদিতি স্ফুটম্| অন্যস্মাদ্ গাত্রাদবযবাত্, অপহৃতে ‘শল্যে’ ইতি শেষঃ| স্নেহাক্তা পট্টবর্তিঃ স্নেহবর্তিঃ; স্নেহোঽত্র তৈলম্, উপরিষ্টাচ্চক্রতৈলোপদেশাত্| প্রবেশযেদিতি অপহৃতশল্যে গাত্র ইতি বিভক্তিবিপরিণামেন সম্বন্ধঃ| তস্মিন্নপি গাত্রে পাকভযান্নিঃশোণিতে কৃতে, বিধিঃ সদ্যঃক্ষতে হিত ইতি সদ্যঃক্ষতবিষযে যো বিধিঃ সোঽত্রাপি হিতো মধুঘৃতাদিঃ সন্ধানার্থম্||৭১||-

Adhikarana 39 (72) · Śloka 73

দূরাবগাঢাঃ সূক্ষ্মাঃ স্যুর্যে ব্রণাস্তান্ বিশোণিতান্ ||৭২|| কৃত্বা সূক্ষ্মেণ নেত্রেণ চক্রতৈলেন তর্পযেত্ |৭৩|

বিষযবিশেষেণ বিদ্ধচিকিত্সিতমাহ- দূরাবগাঢা ইত্যাদি| দূরাবগাঢা দূরানুপ্রবিষ্টা ইত্যর্থঃ| সূক্ষ্মেণ নেত্রেণেতি| নেত্রেণ ব্রণপ্রক্ষালনযন্ত্রেণ, তচ্চাষ্টাঙ্গুলং মুদ্গতুল্যস্রোতঃ| চক্রতৈলেনেতি তিলতৈলপীডনোপকরণকাষ্ঠেভ্যোঽণুতৈলন্যাযেন গৃহীতং তৈলং চক্রতৈলং, সদ্যঃপীডনোদ্ধৃতমাত্রং বা| তর্পযেত্ পূরযেত্||৭২||-

Adhikarana 40 (73-74) · Śloka 74

সমঙ্গাং রজনীং পদ্মাং ত্রিবর্গং তুত্থমেব চ ||৭৩|| বিডঙ্গং কটুকাং পথ্যাং গুডূচীং সকরঞ্জিকাম্ | সংহৃত্য বিপচেত্ কালে তৈলং রোপণমুত্তমম্ ||৭৪||

সমঙ্গামিত্যাদি| সমঙ্গা মঞ্জিষ্ঠা, রজনী হরিদ্রা, পদ্মা ভার্গী, ত্রিবর্গঃ ত্রিফলা, পথ্যা হরীতকী, ত্রিবর্গগ্রহণেনৈব পথ্যাযাং লব্ধাযাং পুনঃ পথ্যাগ্রহণং ভাগদ্বযপ্রক্ষেপার্থং; (যথা পুষ্যানুগে মধুকস্য দ্বিঃ পাঠঃ) যদুক্তং- “ঘৃতে তৈলে চ যোগে চ যদ্দ্রব্যং পুনরুচ্যতে| তজ্জ্ঞাতব্যমিহাচার্যৈর্ভাগতো দ্বিগুণং ভবেত্”- ইতি| করঞ্জিকা নক্তমালফলমিত্যর্থঃ| কালে ইতি অদোষোপপ্লবকালে ব্রণসংরোহণকালে ইত্যর্থঃ||৭৩-৭৪||

Adhikarana 41 (75) · Śloka 76

তালীশং পদ্মকং মাংসী হরেণ্বগুরুচন্দনম্ | হরিদ্রে পদ্মবীজানি সোশীরং মধুকং চ তৈঃ ||৭৫|| পক্বং সদ্যোব্রণেষূক্তং তৈলং রোপণমুত্তমম্ |৭৬|

অপরমপি রোপণতৈলমাহ- তালীশমিত্যাদি| হরেণু রেণুকানাম গন্ধদ্রব্যম্||৭৫||-

Adhikarana 42 (76) · Śloka 76

ক্ষতে ক্ষতবিধিঃ কার্যঃ পিচ্চিতে ভগ্নবদ্বিধিঃ ||৭৬||

ক্ষতপিচ্চিতযোশ্চিকিত্সিতমাহ- ক্ষতে ক্ষতবিধিরিত্যাদি| ক্ষতে ইতি “নাতিচ্ছিন্নং নাতিভিন্নং” ইত্যাদিনা পরিভাষিতে, ক্ষতবিধিঃ সামান্যক্ষতবিধিঃ ক্ষৌদ্রঘৃততৈলাভ্যঙ্গাদিরিত্যর্থঃ| পিচ্চিতে ভগ্নবদ্বিধিঃ ভগ্নাভিহিতো বন্ধসেকরূক্ষভোজনাদিঃ (অত্র পাঠাত্তু বন্ধাদিচিকিত্সিতসমাবেশঃ)||৭৬||

Adhikarana 43 (77) · Śloka 77

ঘৃষ্টে রুজো নিগৃহ্যাশু চূর্ণৈরুপচরেদ্ব্রণম্ |৭৭|

ঘৃষ্টচিকিত্সিতমাহ- ঘৃষ্টে ইত্যাদি| রুজো নিগৃহ্য মধুকশীতাদিভির্নিগৃহ্য নির্বাপ্য, গযী তু মধুঘৃতসেকাদিনা নির্বাপ্যেতি ব্যাখ্যাতি| চূর্ণৈঃ শালসর্জার্জুনাদীনাম্||৭৭|-

Adhikarana 44 (77-78) · Śloka 78

বিশ্লিষ্টদেহং পতিতং মথিতং হতমেব চ ||৭৭|| বাসযেত্তৈলপূর্ণাযাং দ্রোণ্যাং মাংসরসাশনম্ | অযমেব বিধিঃ কার্যঃ ক্ষীণে মর্মহতে তথা ||৭৮||

ইদানীং সদ্যোব্রণপ্রসঙ্গেন বিশ্লিষ্টাদিদেহস্য সদ্যঃক্ষতব্রণসামান্যেন চিকিত্সাং নির্দিশন্নাহ- বিশ্লিষ্টদেহমিত্যাদি| বিশ্লিষ্টদেহমিতি নমনাকর্ষণারোহণপতনবধসাহসাদিভিঃ স্বস্থানচ্যুতাবযবদেহং, পতিতং বৃক্ষাদিভ্যঃ, মথিতং বলীযসা বিলোডিতং, হতং বেগবতা দ্রব্যেণ দণ্ডমুষ্ট্যাদিভির্বা| বাসযেত্ স্থাপযেত্| দ্রোণী দারুরচিতা নৌসদৃশী| অযমেবেত্যাদি| ক্ষীণে অধ্বাদিক্ষীণে| মর্মহত ইতি| মর্মাণি হৃদযাদীনি||৭৭-৭৮||

Adhikarana 45 (79) · Śloka 79

রোপণে সপরীষেকে পানে চ ব্রণিনাং সদা | তৈলং ঘৃতং বা সংযোজ্যং শরীরর্তূনবেক্ষ্য হি ||৭৯||

ইদানীং বিষযবিশেষোক্তস্যাপি তৈলস্য সদ্যোব্রণেষু নিষেধমনুক্তস্যাপি ঘৃতস্য বিধিং দর্শযন্নাহ- রোপণে ইত্যাদি| বাতকফপ্রকৃতিকং শরীরং কালং শিশিরাদিকমপেক্ষ্য তৈলং প্রযোজ্যং, রক্তপিত্তপ্রকৃতিকং শরীরং কালং শরদাদিকং পুনরবেক্ষ্য ঘৃতং প্রযোজ্যমিতি||৭৯||

Adhikarana 46 (80) · Śloka 80

ঘৃতানি যানি বক্ষ্যামি যত্নতঃ পিত্তবিদ্রধৌ | সদ্যোব্রণেষু দেযানি তানি বৈদ্যেন জানতা ||৮০||

অথ সঙ্ক্ষেপার্থং ঘৃতান্যন্যাতিদেশেন নির্দিশন্নাহ- ঘৃতানীত্যাদি| তানীতি “প্রপৌণ্ডরীকমঞ্জিষ্ঠামধুকোশীরপদ্মকৈঃ” (চি. ১৬) ইত্যাদীনি||৮০||

Adhikarana 47 (81) · Śloka 81

সদ্যঃক্ষতব্রণং বৈদ্যঃ সশূলং পরিষেচযেত্ | সর্পিষা নাতিশীতেন বলাতৈলেন বা পুনঃ ||৮১||

অথ যস্যামবস্থাযাং ঘৃততৈলপরিষেকাঃ কার্যাস্তাং নির্দিশন্নাহ- সদ্য ইত্যাদি| সর্পিষা নাতিশীতেনেতি পিত্তরক্তপ্রকৃতিকে শরীরে কালে চ শরদাদিকে পরিষেকঃ; বলাতৈলেন বাতকফপ্রকৃতৌ দেহে কালে চ শীতে ইতি||৮১||

Adhikarana 48 (82-84) · Śloka 85

সমঙ্গাং রজনীং পদ্মাং পথ্যাং তুত্থং সুবর্চলাম্ | পদ্মকং রোধ্রমধুকং বিডঙ্গানি হরেণুকাম্ ||৮২|| তালীশপত্রং নলদং চন্দনং পদ্মকেশরম্ | মঞ্জিষ্ঠোশীরলাক্ষাশ্চ ক্ষীরিণাং চাপি পল্লবান্ ||৮৩|| প্রিযালবীজং তিন্দুক্যাস্তরুণানি ফলানি চ | যথালাভং সমাহৃত্য তৈলমেভির্বিপাচযেত্ ||৮৪|| সদ্যোব্রণানাং সর্বেষামদুষ্টানাং তু রোপণম্ |৮৫|

সামান্যেন সর্বব্রণানামদুষ্টানাং রোপণার্থং তৈলমাহ- সমঙ্গামিত্যাদি| সমঙ্গা মঞ্জিষ্ঠা | পদ্মা ভার্গী| সুবর্চলা সূর্যভক্তা| হরেণুকা রেণুকা| তরুণানি আমানি||৮২-৮৪||

Adhikarana 49 (85) · Śloka 86

কষাযমধুরাঃশীতাঃ ক্রিযাঃ স্নিগ্ধাশ্চ যোজযেত্ ||৮৫|| সদ্যোব্রণানাং সপ্তাহং পশ্চাত্ পূর্বোক্তমাচরেত্ |৮৬|

অথ কিযন্তং কালং সদ্যোব্রণক্রিযেত্যাহ- কষাযেত্যাদি| পূর্বোক্তং দ্বিব্রণীযোক্তম্| অমুং শ্লোকং জেজ্জটাচার্যোঽনার্ষমাহ; গযী ত্বার্ষম্, ইত্যস্মাভিরপ্যঙ্গীকৃতঃ||৮৫||-

Adhikarana 50 (86-88) · Śloka 88

দুষ্টব্রণেষু কর্তব্যমূর্ধ্বং চাধশ্চ শোধনম্ ||৮৬|| বিশোষণং তথাঽঽহারঃ শোণিতস্য চ মোক্ষণম্ | কষাযং রাজবৃক্ষাদৌ সুরসাদৌ চ ধাবনম্ ||৮৭|| তযোরেব কষাযেণ তৈলং শোধনমিষ্যতে | ক্ষারকল্পেন বা তৈলং ক্ষারদ্রব্যেষু সাধিতম্ ||৮৮||

সর্বেষামদুষ্টানাং রোপণমুক্তং, দুষ্টানাং কিং বিধানমিতি তদাহ- দুষ্টব্রণেষ্বিত্যাদি| ঊর্ধ্বং শোধনং বমনশিরোবিরেচনে, অধঃশোধনং বিরেচনাস্থাপনং, বিশোষণং লঙ্ঘনম্| আহারোঽপি বিশোষণ এব তিক্তকটুকষাযাদিঃ| তত্রোর্ধ্বনাভিজেষু কফজেষু বমনং, পিত্তজেষু পিত্তাশযজেষু চ বিরেচনং, বাতাশযাধঃকাযজেষু মলেন মার্গাবরণদুষ্টসমীরণদূষিতেষু পুনরাস্থাপনং, শিরসিজেষু তু কফজেষু শিরোবিরেচনম্| রাজবৃক্ষাদাবিতি আরগ্বধাদাবিত্যর্থঃ| তযোরেব গণযোঃ কষাযেণ পাদকল্কং তৈলং শোধনং সাধ্যতে| ক্ষারকল্পেন বেতি ক্ষারপ্রস্থমুদকপ্রস্থৈঃ ষড্ভিরেকবিংশতিবারান্ স্রাবিতং তস্মিংস্তৈলপ্রস্থাচ্চতুর্গুণে ক্ষারোদকে তৈলং পাচযেত্; অত্র তু ‘ক্ষারদ্রব্যাণ্যেব কল্কানি’ ইত্যেকে, ‘অকল্কমেবৈতত্তৈলম্’ ইত্যন্যে| ক্ষারদ্রব্যেষু মুষ্ককপলাশাদিষু||৮৬-৮৮||

Adhikarana 51 (89-92) · Śloka 92

দ্রবন্তী চিরবিল্বশ্চ দন্তী চিত্রকমেব চ | পৃথ্বীকা নিম্বপত্রাণি কাসীসং তুত্থমেব চ ||৮৯|| ত্রিবৃত্তেজোবতী নীলী হরিদ্রে সৈন্ধবং তিলাঃ | ভূমিকদম্বঃ সুবহা শুকাখ্যা লাঙ্গলাহ্বযা ||৯০|| নৈপালী জালিনী চৈব মদযন্তী মৃগাদনী | সুধামূর্বার্ককীটারিহরিতালকরঞ্জিকাঃ ||৯১|| যথোপপত্তি কর্তব্যং তৈলমেতৈস্তু শোধনম্ | ঘৃতং বা যদি বা প্রাপ্তং কল্কাঃ সংশোধনাস্তথা ||৯২||

ইদানীং সর্বদুষ্টব্রণানাং তৈলঘৃতযোগিতযা ব্রণকল্কদ্রব্যযোগিদ্রব্যং নির্দিশন্নাহ- দ্রবন্তীত্যাদি| দ্রবন্তী চীরিতপত্রা| দন্তী চিরবিল্বো বৃক্ষকরঞ্জকঃ| দন্তী উদুম্বরপর্ণী| পৃথ্বীকা স্থূলজীরকঃ, এলেত্যন্যে, হিঙ্গুপত্রিকেত্যপরে| তেজোবতী কাকমর্দনিকা, নীলি নিলাঞ্জনিকা শারদা| ভূমিকদম্বো মুণ্ডিতিকা| সুবহা গোধাপদী| শুকাখ্যা চর্মকারবটঃ| লাঙ্গলাহ্বযা কলিহারিকা| নৈপালী মনঃশিলা| জালিনী কোশাতকী| মদযন্তী মেন্দিকা নখরঞ্জনী| মৃগাদনী ইন্দ্রবারুণী| সুধা সেহুণ্ডঃ| মূর্বা চোরস্নাযুঃ| কীটারিঃ বিডঙ্গঃ, কীটমারিণীত্যন্যে; করঞ্জিকা নক্তমালফলম্| যথোপপত্তি যথালাভম্| প্রাপ্তমিতি যুক্তং পূর্বোক্তশরীরকালাদ্যপেক্ষযা| কল্কা ইতি ‘প্রাপ্তা’ ইতি শেষঃ| তৈলং প্রাপ্তমেষু “উত্সন্নমাংসানস্নিগ্ধানল্পস্রাবান্ ব্রণাংস্তথা” (চি. ১) ইত্যাদিষু, ঘৃতং পুনরেষু প্রাপ্তং “পিত্তপ্রদুষ্টান্ গম্ভীরান্ দাহপাকপ্রপীডিতান্” (চি. ১) ইত্যাদিষু, কল্কাঃ পুনরেষু যুক্তাঃ “পূতিমাংসপ্রতিচ্ছন্নান্ মহাদোষাংশ্চ” (চি. ১) ইত্যাদিষু||৮৯-৯২||

Adhikarana 52 (93-94) · Śloka 94

সৈন্ধবত্রিবৃদেরণ্ডপত্রকল্কস্তু বাতিকে | ত্রিবৃদ্ধরিদ্রামধুককল্কঃ পৈত্তে তিলৈর্যুতঃ ||৯৩|| কফজে তিলতেজোহ্বাদন্তীস্বর্জিকচিত্রকাঃ | দুষ্টব্রণবিধিঃ কার্যো মেহকুষ্ঠব্রণেষ্বপি ||৯৪||

অথ বাতাদিভেদেন কল্কানাহ- সৈন্ধবমিত্যাদি||৯৩-৯৪||

Adhikarana 53 (95) · Śloka 95

ষড্বিধঃ প্রাক্ প্রদিষ্টো যঃ সদ্যোব্রণবিনিশ্চযঃ | নাতঃ শক্যং পরং বক্তুমপি নিশ্চিতবাদিভিঃ ||৯৫||

ইদানীং ছিন্নাদিষট্কে কস্যচিদ্বিপ্রতিপত্তিং নিরাকুর্বন্নাহ- ষড্বিধ ইত্যাদি| অতঃ ষড্বিধত্বাত্ পরং সপ্তবিধত্বাদি; নিযমেন বক্তুং শীলৈরপি বক্তুং ন শক্যমিত্যর্থঃ||৯৫||

Adhikarana 54 (96-97) · Śloka 97

উপসর্গৈর্নিপাতৈশ্চ তত্তু পণ্ডিতমানিনঃ | কেচিত্ সংযোজ্য ভাষন্তে বহুধা মানগর্বিতাঃ ||৯৬|| বহু তদ্ভাষিতং তেষাং ষট্স্বেষ্বেবাবতিষ্ঠতে | বিশেষা ইব সামান্যে ষট্ত্বং তু পরমং মতম্ ||৯৭||

উপসর্গৈরিত্যাদি- উপসর্গাঃ প্রপরাদযঃ, নিপাতাশ্চাদযঃ, তৈঃ সংযোজ্য ভাষন্তে; যথা- সম্যক্ ছিন্নং সঞ্ছিন্নং, পরিতঃ ছিন্নং পরিচ্ছিন্নম্, অল্পং হি ছিন্নমাচ্ছিন্নমিতি; নিপাতৈর্যথা- অতিক্রম্য চ্ছিন্নমতিচ্ছিন্নং, পূজিতং ছিন্নং সুচ্ছিন্নম্, অল্পং ছিন্নমীষচ্ছিন্নমিতি| তদিতি ছিন্নাদিষট্কম্| তথাঽপি ষট্কমেবেতি দৃষ্টান্তেন দর্শযন্নাহ- বহু তদ্ভাষিতমিত্যাদি| তেষাং বাদিনাম্| তত্ পূর্বোক্তং বহুভাষিতম্, এষু ষট্সু চ্ছিন্নাদিষু, অবতিষ্ঠতে অন্তর্ভবতীত্যর্থঃ| বিশেষা ইব সামান্যে ইতি যথৈব হি কর্মসামান্যে নমনোন্নমনপ্রসারণাকুঞ্চনাদীনাং কর্মবিশেষাণামবরোধঃ, তথা ছেদসামান্যে সর্বেষামেব সঞ্চ্ছিন্নপরিচ্ছিন্নাতিচ্ছিন্নাদীনাং ছেদবিশেষাণামবরোধঃ, এবং শেষেষ্বপি পঞ্চসু| ষট্কং তু ইতি তুশব্দোঽবধারণে, তেন ষট্কমেবেত্যর্থঃ||৯৬-৯৭||

Adhikarana puShpikA · Śloka 2

ইতি সুশ্রুতসংহিতাযাং চিকিত্সাস্থানে সদ্যোব্রণচিকিত্সিতং নাম দ্বিতিযোঽধ্যাযঃ ||২||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সিতস্থানে দ্বিতীযোঽধ্যাযঃ||২||