2. sadyōvraṇacikitsitam

Adhikarana 1 (1-2) · Śloka 2

অথাতঃ সদ্যোব্রণচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

ধন্বন্তরির্ধর্মভৃতাং বরিষ্ঠো বাগ্বিশারদঃ | বিশ্বামিত্রসুতং শিষ্যমৃষিং সুশ্রুতমন্বশাত্ ||৩||

Adhikarana 3 (4) · Śloka 4

নানাধারামুখৈঃ শস্ত্রৈর্নানাস্থাননিপাতিতৈঃ | নানারূপা ব্রণা যে স্যুস্তেষাং বক্ষ্যামি লক্ষণম্ ||৪||

Adhikarana 4 (5-6) · Śloka 7

আযতাশ্চতুরস্রাশ্চ ত্র্যস্রা মণ্ডলিনস্তথা | অর্ধচন্দ্রপ্রতীকাশা বিশালাঃ কুটিলাস্তথা ||৫|| শরাবনিম্নমধ্যাশ্চ যবমধ্যাস্তথাঽপরে | এবম্প্রকারাকৃতযো ভবন্ত্যাগন্তবো ব্রণাঃ ||৬|| দোষজা বা স্বযং ভিন্না, ন তু বৈদ্যনিমিত্তজাঃ |৭|

Adhikarana 5 (7) · Śloka 8

ভিষগ্ব্রণাকৃতিজ্ঞো হি ন মোহমধিগচ্ছতি ||৭|| ভৃশং দুর্দর্শরূপেষু ব্রণেষু বিকৃতেষ্বপি |৮|

Adhikarana 6 (8) · Śloka 9

অনন্তাকৃতিরাগন্তুঃ স ভিষগ্ভিঃ পুরাতনৈঃ ||৮|| সমাসতো লক্ষণতঃ ষড্বিধঃ পরিকীর্তিতঃ |৯|

Adhikarana 7 (9) · Śloka 10

ছিন্নং ভিন্নং তথা বিদ্ধং ক্ষতং পিচ্চিতমেব চ ||৯|| ঘৃষ্টমাহুস্তথা ষষ্ঠং তেষাং বক্ষ্যামি লক্ষণম্ |১০|

Adhikarana 8 (10) · Śloka 11

তিরশ্চীন ঋজুর্বাঽপি যো ব্রণশ্চাযতো ভবেত্ ||১০|| গাত্রস্য পাতনং চাপি ছিন্নমিত্যুপদিশ্যতে |১১|

Adhikarana 9 (11) · Śloka 12

কুন্তশক্ত্যৃষ্টিখঙ্গাগ্রবিষাণাদিভিরাশযঃ ||১১|| হতঃ কিঞ্চিত্ স্রবেত্তদ্ধি ভিন্নলক্ষণমুচ্যতে |১২|

Adhikarana 10 (12) · Śloka 13

স্থানান্যামাগ্নিপক্বানাং মূত্রস্য রুধিরস্য চ ||১২|| হৃদুণ্ডুকঃ ফুপ্ফুসশ্চ কোষ্ঠ ইত্যভিধীযতে |১৩|

Adhikarana 11 (13-15) · Śloka 16

তস্মিন্ ভিন্নে রক্তপূর্ণে জ্বরো দাহশ্চ জাযতে ||১৩|| মূত্রমার্গগুদাস্যেভ্যো রক্তং ঘ্রাণাচ্চ গচ্ছতি | মূর্চ্ছাশ্বাসতৃডাধ্মানমভক্তচ্ছন্দ এব চ ||১৪|| বিণ্মূত্রবাতসঙ্গশ্চ স্বেদাস্রাবোঽক্ষিরক্ততা | লোহগন্ধিত্বমাস্যস্য গাত্রদৌর্গন্ধ্যমেব চ ||১৫|| হৃচ্ছূলং পার্শ্বযোশ্চাপি... |১৬|

Adhikarana 12 (16-17) · Śloka 18

... বিশেষং চাত্র মে শৃণু | আমাশযস্থে রুধিরে রুধিরং ছর্দযেত্ পুনঃ ||১৬|| আধ্মানমতিমাত্রং চ শূলং চ ভৃশদারুণম্ | পক্বাশযগতে চাপি রুজো গৌরবমেব চ ||১৭|| শীততা চাপ্যধো নাভেঃ খেভ্যো রক্তস্য চাগমঃ |১৮|

Adhikarana 13 (18) · Śloka 19

অভিন্নেঽপ্যাশযেঽন্ত্রাণাং খৈঃ সূক্ষ্মৈরন্ত্রপূরণম্ ||১৮|| পিহিতাস্যে ঘটে যদ্বল্লক্ষ্যতে তস্য গৌরবম্ |১৯|

Adhikarana 14 (19) · Śloka 20

সূক্ষ্মাস্যশল্যাভিহতং যদঙ্গং ত্বাশযাদ্বিনা ||১৯|| উত্তুণ্ডিতং নির্গতং বা তদ্বিদ্ধমিতি নির্দিশেত্ |২০|

Adhikarana 15 (20) · Śloka 21

নাতিচ্ছিন্নং নাতিভিন্নমুভযোর্লক্ষণান্বিতম্ ||২০|| বিষমং ব্রণমঙ্গে যত্তত্ ক্ষতং ত্বভিনির্দিশেত্ |২১|

Adhikarana 16 (21) · Śloka 22

প্রহারপীডনাভ্যাং তু যদঙ্গং পৃথুতাং গতম্ ||২১|| সাস্থি তত্ পিচ্চিতং বিদ্যান্মজ্জরক্তপরিপ্লুতম্ |২২|

Adhikarana 17 (22) · Śloka 23

বিগতত্বগ্যদঙ্গং হি সঙ্ঘর্ষাদন্যথাঽপি বা ||২২|| উষাস্রাবান্বিতং তত্তু ঘৃষ্টমিত্যুপদিশ্যতে |২৩|

Adhikarana 18 (23-25) · Śloka 26

ছিন্নে ভিন্নে তথা বিদ্ধে ক্ষতে বাঽসৃগতিস্রবেত্ ||২৩|| রক্তক্ষযাদ্রুজস্তত্র করোতি পবনো ভৃশম্ | স্নেহপানং হিতং তত্র তত্সেকো বিহিতস্তথা ||২৪|| বেশবারৈঃ সকৃশরৈঃ সুস্নিগ্ধৈশ্চোপনাহনম্ | ধান্যস্বেদাংশ্চ কুর্বীত স্নিগ্ধান্যালেপনানি চ ||২৫|| বাতঘ্নৌষধসিদ্ধৈশ্চ স্নেহৈর্বস্তির্বিধীযতে |২৬|

Adhikarana 19 (26-27) · Śloka 28

পিচ্চিতে চ বিঘৃষ্টে চ নাতিস্রবতি শোণিতম্ ||২৬|| অগচ্ছতি ভৃশং তস্মিন্ দাহঃ পাকশ্চ জাযতে | তত্রোষ্মণো নিগ্রহার্থং তথা দাহপ্রপাকযোঃ ||২৭|| শীতমালেপনং কার্যং পরিষেকশ্চ শীতলঃ |২৮|

Adhikarana 20 (28) · Śloka 29

ষট্স্বেতেষু যথোক্তেষু ছিন্নাদিষু সমাসতঃ ||২৮|| জ্ঞেযং সমর্পিতং সর্বং সদ্যোব্রণচিকিত্সিতম্ |২৯|

Adhikarana 21 (29-30) · Śloka 30

অত ঊর্ধ্বং প্রবক্ষ্যামি ছিন্নানাং তু চিকিত্সিতম্ ||২৯|| যে ব্রণা বিবৃতাঃ কেচিচ্ছিরঃপার্শ্বাবলম্বিনঃ | তান্ সীব্যেদ্বিধিনোক্তেন বধ্নীযাদ্গাঢমেব চ ||৩০||

Adhikarana 22 (31-33) · Śloka 33

কর্ণং স্থানাদপহৃতং স্থাপযিত্বা যথাস্থিতম্ | সীব্যেদ্যথোক্তং তৈলেন স্রোতশ্চাভিপ্রতর্পযেত্ ||৩১|| কৃকাটিকান্তে ছিন্নে তু গচ্ছত্যপি সমীরণে | সম্যঙ্নিবেশ্য বধ্নীযাত্ সীব্যেচ্চাপি নিরন্তরম্ ||৩২|| আজেন সর্পিষা চৈবং পরিষেকং তু কারযেত্ | উত্তানোঽন্নং সমশ্নীযাচ্ছযীত চ সুযন্ত্রিতঃ ||৩৩||

Adhikarana 23 (34-35) · Śloka 35

শাখাসু পতিতাংস্তির্যক্ প্রহারান্ বিবৃতান্ ভৃশম্ | সীব্যেত্ সম্যঙ্নিবেশ্যাশু সন্ধ্যস্থীন্যনুপূর্বশঃ ||৩৪|| বদ্ধ্বা বেল্লিতকেনাশু ততস্তৈলেন সেচযেত্ | চর্মণা গোফণাবন্ধঃ কার্যো যো বা হিতো ভবেত্ ||৩৫||

Adhikarana 24 (36) · Śloka 36

পৃষ্ঠে ব্রণো যস্য ভবেদুত্তানং শাযযেত্তু তম্ | অতোঽন্যথা চোরসিজে শাযযেত্ পুরুষং ব্রণে ||৩৬||

Adhikarana 25 (37) · Śloka 37

ছিন্নাং নিঃশেষতঃ শাখাং দগ্ধ্বা তৈলেন বুদ্ধিমান্ | বধ্নীযাত্ কোশবন্ধেন প্রাপ্তং কার্যং চ রোপণম্ ||৩৭||

Adhikarana 26 (38) · Śloka 39

চন্দনং পদ্মকং রোধ্রমুত্পলানি প্রিযঙ্গবঃ | হরিদ্রা মধুকং চৈব পযঃ স্যাদত্র চাষ্টমম্ ||৩৮|| তৈলমেভির্বিপক্বং তু প্রধানং ব্রণরোপণম্ |৩৯|

Adhikarana 27 (39-40) · Śloka 41

চন্দনং কর্কটাখ্যা চ সহে মাংস্যাহ্বযাঽমৃতা ||৩৯|| হরেণবো মৃণালং চ ত্রিফলা পদ্মকোত্পলে | ত্রযোদশাঙ্গং ত্রিবৃতমেতদ্বা পযসাঽন্বিতম্ ||৪০|| তৈলং বিপক্বং সেকার্থে হিতং তু ব্রণরোপণে |৪১|

Adhikarana 28 (41-43) · Śloka 43

অত ঊর্ধ্বং প্রবক্ষ্যামি ভিন্নানাং তু চিকিত্সিতম্ ||৪১|| ভিন্নং নেত্রমকর্মণ্যমভিন্নং লম্বতে তু যত্ | তন্নিবেশ্য যথাস্থানমব্যাবিদ্ধসিরং শনৈঃ ||৪২|| পীডযেত্ পাণিনা সম্যক্ পদ্মপত্ত্রান্তরেণ তু | ততোঽস্য তর্পণং কার্যং নস্যং চানেন সর্পিষা ||৪৩||

Adhikarana 29 (44) · Śloka 45

আজং ঘৃতং ক্ষীরপাত্রং মধুকং চোত্পলানি চ | জীবকর্ষভকৌ চৈব পিষ্ট্বা সর্পির্বিপাচযেত্ ||৪৪|| সর্বনেত্রাভিঘাতে তু সর্পিরেতত্ প্রশস্যতে |৪৫|

Adhikarana 30 (45-49) · Śloka 49

উদরান্মেদসো বর্তির্নির্গতা যস্য দেহিনঃ ||৪৫|| কষাযভস্মমৃত্কীর্ণাং বদ্ধ্বা সূত্রেণ সূত্রবিত্ | অগ্নিতপ্তেন শস্ত্রেণ ছিন্দ্যান্মধুসমাযুতম্ ||৪৬|| বদ্ধ্বা ব্রণং সুজীর্ণেঽন্নে সর্পিষঃ পানমিষ্যতে | স্নেহপানাদৃতে চাপি পযঃপানং বিধীযতে ||৪৭|| শর্করামধুযষ্টিভ্যাং লাক্ষযা বা শ্বদংষ্ট্রযা | চিত্রাসমন্বিতং চৈব রুজাদাহবিনাশনম্ ||৪৮|| আটোপো মরণং বা স্যাচ্ছূলো বাঽচ্ছিদ্যমানযা | মেদোগ্রন্থৌ তু যত্তৈলং বক্ষ্যতে তচ্চ যোজযেত্ ||৪৯||

Adhikarana 31 (50) · Śloka 50

ত্বচোঽতীত্য সিরাদীনি ভিত্ত্বা বা পরিহৃত্য বা | কোষ্ঠে প্রতিষ্ঠিতং শল্যং কুর্যাদুক্তানুপদ্রবান্ ||৫০||

Adhikarana 32 (51) · Śloka 51

তত্রান্তর্লোহিতং পাণ্ডুং শীতপাদকরাননম্ | শীতোচ্ছ্বাসং রক্তনেত্রমানদ্ধং চ বিবর্জযেত্ ||৫১||

Adhikarana 33 (52-54) · Śloka 54

আমাশযস্থে রুধিরে বমনং পথ্যমুচ্যতে | পক্বাশযস্থে দেযং চ বিরেচনমসংশযম্ ||৫২|| আস্থাপনং চ নিঃস্নেহং কার্যমুষ্ণৈর্বিশোধনৈঃ | যবকোলকুলত্থানাং নিঃস্নেহেন রসেন চ ||৫৩|| ভুঞ্জীতান্নং যবাগূং বা পিবেত্ সৈন্ধবসংযুতাম্ | অতিনিঃস্রুতরক্তো বা ভিন্নকোষ্ঠঃ পিবেদসৃক্ ||৫৪||

Adhikarana 34 (55) · Śloka 55

স্বমার্গপ্রতিপন্নাস্তু যস্য বিণ্মূত্রমারুতাঃ | ব্যুপদ্রবঃ স ভিন্নেঽপি কোষ্ঠে জীবতি মানবঃ ||৫৫||

Adhikarana 35 (56-65) · Śloka 66

অভিন্নমন্ত্রং নিষ্ক্রান্তং প্রবেশ্যং নান্যথা ভবেত্ | পিপীলিকাশিরোগ্রস্তং তদপ্যেকে বদন্তি তু ||৫৬|| প্রক্ষাল্য পযসা দিগ্ধং তৃণশোণিতপাংশুভিঃ | প্রবেশযেত্ কৃত্তনখো ঘৃতেনাক্তং শনৈঃ শনৈঃ ||৫৭|| প্রবেশযেত্ ক্ষীরসিক্তং শুষ্কমন্ত্রং ঘৃতাপ্লুতম্ | অঙ্গুল্যাঽভিমৃশেত্ কণ্ঠং জলেনোদ্বেজযেদপি ||৫৮|| হস্তপাদেষু সঙ্গৃহ্য সমুত্থাপ্য মহাবলাঃ | ভবত্যন্তঃপ্রবেশস্তু যথা নির্ধুনুযুস্তথা ||৫৯|| তথাঽন্ত্রাণি বিশন্ত্যন্তঃ স্বাং কলাং পীডযন্তি চ | ব্রণাল্পত্বাদ্বহুত্বাদ্বা দুষ্প্রবেশং ভবেত্তু যত্ ||৬০|| তদাপাট্য প্রমাণেন ভিষগন্ত্রং প্রবেশযেত্ | যথাস্থানং নিবিষ্টে চ ব্রণং সীব্যেদতন্দ্রিতঃ ||৬১|| স্থানাদপেতমাদত্তে প্রাণান্ গুপিতমেব বা | বেষ্টযিত্বা তু পট্টেন ঘৃতসেকং প্রদাপযেত্ ||৬২|| ঘৃতং পিবেত্ সুখোষ্ণং চ চিত্রাতৈলসমন্বিতম্ | মৃদুক্রিযার্থং শকৃতো বাযোশ্চাধঃপ্রবৃত্তযে ||৬৩|| ততস্তৈলমিদং কুর্যাদ্রোপণার্থং চিকিত্সকঃ | ত্বচোঽশ্বকর্ণধবযোর্মোচকীমেষশৃঙ্গযোঃ ||৬৪|| শল্লক্যর্জুনযোশ্চাপি বিদার্যাঃ ক্ষীরিণাং তথা | বলামূলানি চাহৃত্য তৈলমেতৈর্বিপাচযেত্ ||৬৫|| ব্রণং সংরোপযেত্তেন বর্ষমাত্রং যতেত চ |৬৬|

Adhikarana 36 (66-68) · Śloka 69

পাদৌ নিরস্তমুষ্কস্য জলেন প্রোক্ষ্য চাক্ষিণী ||৬৬|| প্রবেশ্য তুন্নসেবন্যা মুষ্কৌ সীব্যেত্ততঃ পরম্ | কার্যো গোফণিকাবন্ধঃ কট্যামাবেশ্য যন্ত্রকম্ ||৬৭|| ন কুর্যাত্ স্নেহসেকং চ তেন ক্লিদ্যতি হি ব্রণঃ | কালানুসার্যাগুর্বেলাজাতীচন্দনপদ্মকৈঃ ||৬৮|| শিলাদার্ব্যমৃতাতুত্থৈস্তৈলং কুর্বীত রোপণম্ |৬৯|

Adhikarana 37 (69-70) · Śloka 71

শিরসোঽপহৃতে শল্যে বালবর্তিং নিবেশযেত্ ||৬৯|| বালবর্ত্যামদত্তাযাং মস্তুলুঙ্গং ব্রণাত্ স্রবেত্ | হন্যাদেনং ততো বাযুস্তস্মাদেবমুপাচরেত্ ||৭০|| ব্রণে রোহতি চৈকৈকং শনৈর্বালমপক্ষিপেত্ |৭১|

Adhikarana 38 (71) · Śloka 72

গাত্রাদপহৃতেঽন্যস্মাত্ স্নেহবর্তিং প্রবেশযেত্ ||৭১|| কৃতে নিঃশোণিতে চাপি বিধিঃ সদ্যঃক্ষতে হিতঃ |৭২|

Adhikarana 39 (72) · Śloka 73

দূরাবগাঢাঃ সূক্ষ্মাঃ স্যুর্যে ব্রণাস্তান্ বিশোণিতান্ ||৭২|| কৃত্বা সূক্ষ্মেণ নেত্রেণ চক্রতৈলেন তর্পযেত্ |৭৩|

Adhikarana 40 (73-74) · Śloka 74

সমঙ্গাং রজনীং পদ্মাং ত্রিবর্গং তুত্থমেব চ ||৭৩|| বিডঙ্গং কটুকাং পথ্যাং গুডূচীং সকরঞ্জিকাম্ | সংহৃত্য বিপচেত্ কালে তৈলং রোপণমুত্তমম্ ||৭৪||

Adhikarana 41 (75) · Śloka 76

তালীশং পদ্মকং মাংসী হরেণ্বগুরুচন্দনম্ | হরিদ্রে পদ্মবীজানি সোশীরং মধুকং চ তৈঃ ||৭৫|| পক্বং সদ্যোব্রণেষূক্তং তৈলং রোপণমুত্তমম্ |৭৬|

Adhikarana 42 (76) · Śloka 76

ক্ষতে ক্ষতবিধিঃ কার্যঃ পিচ্চিতে ভগ্নবদ্বিধিঃ ||৭৬||

Adhikarana 43 (77) · Śloka 77

ঘৃষ্টে রুজো নিগৃহ্যাশু চূর্ণৈরুপচরেদ্ব্রণম্ |৭৭|

Adhikarana 44 (77-78) · Śloka 78

বিশ্লিষ্টদেহং পতিতং মথিতং হতমেব চ ||৭৭|| বাসযেত্তৈলপূর্ণাযাং দ্রোণ্যাং মাংসরসাশনম্ | অযমেব বিধিঃ কার্যঃ ক্ষীণে মর্মহতে তথা ||৭৮||

Adhikarana 45 (79) · Śloka 79

রোপণে সপরীষেকে পানে চ ব্রণিনাং সদা | তৈলং ঘৃতং বা সংযোজ্যং শরীরর্তূনবেক্ষ্য হি ||৭৯||

Adhikarana 46 (80) · Śloka 80

ঘৃতানি যানি বক্ষ্যামি যত্নতঃ পিত্তবিদ্রধৌ | সদ্যোব্রণেষু দেযানি তানি বৈদ্যেন জানতা ||৮০||

Adhikarana 47 (81) · Śloka 81

সদ্যঃক্ষতব্রণং বৈদ্যঃ সশূলং পরিষেচযেত্ | সর্পিষা নাতিশীতেন বলাতৈলেন বা পুনঃ ||৮১||

Adhikarana 48 (82-84) · Śloka 85

সমঙ্গাং রজনীং পদ্মাং পথ্যাং তুত্থং সুবর্চলাম্ | পদ্মকং রোধ্রমধুকং বিডঙ্গানি হরেণুকাম্ ||৮২|| তালীশপত্রং নলদং চন্দনং পদ্মকেশরম্ | মঞ্জিষ্ঠোশীরলাক্ষাশ্চ ক্ষীরিণাং চাপি পল্লবান্ ||৮৩|| প্রিযালবীজং তিন্দুক্যাস্তরুণানি ফলানি চ | যথালাভং সমাহৃত্য তৈলমেভির্বিপাচযেত্ ||৮৪|| সদ্যোব্রণানাং সর্বেষামদুষ্টানাং তু রোপণম্ |৮৫|

Adhikarana 49 (85) · Śloka 86

কষাযমধুরাঃশীতাঃ ক্রিযাঃ স্নিগ্ধাশ্চ যোজযেত্ ||৮৫|| সদ্যোব্রণানাং সপ্তাহং পশ্চাত্ পূর্বোক্তমাচরেত্ |৮৬|

Adhikarana 50 (86-88) · Śloka 88

দুষ্টব্রণেষু কর্তব্যমূর্ধ্বং চাধশ্চ শোধনম্ ||৮৬|| বিশোষণং তথাঽঽহারঃ শোণিতস্য চ মোক্ষণম্ | কষাযং রাজবৃক্ষাদৌ সুরসাদৌ চ ধাবনম্ ||৮৭|| তযোরেব কষাযেণ তৈলং শোধনমিষ্যতে | ক্ষারকল্পেন বা তৈলং ক্ষারদ্রব্যেষু সাধিতম্ ||৮৮||

Adhikarana 51 (89-92) · Śloka 92

দ্রবন্তী চিরবিল্বশ্চ দন্তী চিত্রকমেব চ | পৃথ্বীকা নিম্বপত্রাণি কাসীসং তুত্থমেব চ ||৮৯|| ত্রিবৃত্তেজোবতী নীলী হরিদ্রে সৈন্ধবং তিলাঃ | ভূমিকদম্বঃ সুবহা শুকাখ্যা লাঙ্গলাহ্বযা ||৯০|| নৈপালী জালিনী চৈব মদযন্তী মৃগাদনী | সুধামূর্বার্ককীটারিহরিতালকরঞ্জিকাঃ ||৯১|| যথোপপত্তি কর্তব্যং তৈলমেতৈস্তু শোধনম্ | ঘৃতং বা যদি বা প্রাপ্তং কল্কাঃ সংশোধনাস্তথা ||৯২||

Adhikarana 52 (93-94) · Śloka 94

সৈন্ধবত্রিবৃদেরণ্ডপত্রকল্কস্তু বাতিকে | ত্রিবৃদ্ধরিদ্রামধুককল্কঃ পৈত্তে তিলৈর্যুতঃ ||৯৩|| কফজে তিলতেজোহ্বাদন্তীস্বর্জিকচিত্রকাঃ | দুষ্টব্রণবিধিঃ কার্যো মেহকুষ্ঠব্রণেষ্বপি ||৯৪||

Adhikarana 53 (95) · Śloka 95

ষড্বিধঃ প্রাক্ প্রদিষ্টো যঃ সদ্যোব্রণবিনিশ্চযঃ | নাতঃ শক্যং পরং বক্তুমপি নিশ্চিতবাদিভিঃ ||৯৫||

Adhikarana 54 (96-97) · Śloka 97

উপসর্গৈর্নিপাতৈশ্চ তত্তু পণ্ডিতমানিনঃ | কেচিত্ সংযোজ্য ভাষন্তে বহুধা মানগর্বিতাঃ ||৯৬|| বহু তদ্ভাষিতং তেষাং ষট্স্বেষ্বেবাবতিষ্ঠতে | বিশেষা ইব সামান্যে ষট্ত্বং তু পরমং মতম্ ||৯৭||

Adhikarana puShpikA · Śloka 2

ইতি সুশ্রুতসংহিতাযাং চিকিত্সাস্থানে সদ্যোব্রণচিকিত্সিতং নাম দ্বিতিযোঽধ্যাযঃ ||২||