Adhikarana 1 (1-2) · Śloka 2
অথাতঃ সর্বোপঘাতশমনীযং রসাযনং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
View original
अथातः सर्वोपघातशमनीयं रसायनं व्याख्यास्यामः ||१||
यथोवाच भगवान् धन्वन्तरिः ||२||
রসাদিধাতূনামযনমাপ্যাযনম্, অথবা ভেষজাশ্রিতানাং রসবীর্যবিপাকপ্রভাবাণামাযুর্বলবীর্যদার্ঢ্যাণাং বযঃস্থৈর্যকরাণামযনং লাভোপাযো রসাযনম্; বর্ধকং স্থাপকমপ্রাপ্তপ্রাপকং বেত্যর্থঃ| দ্বিবিধং রসাযনং- কুটীপ্রাবেশিকং, বাতাতপিকং চ; পুনশ্চ ত্রিবিধং- কাম্যং, নৈমিত্তিকম্, আজস্রিকং চ; ‘প্রাণমেধাকামঃ শ্রীকাম’ ইত্যাদিকং কাম্যং, নৈমিত্তিকং ব্যাধিনিমিত্তং শিলাজতুভল্লাতকতুবরকাদ্যম্, আজস্রিকং ক্ষীরঘৃতাভ্যাসাদিকম্; পুনশ্চ দ্বিবিধং- সংশোধনসংশমনভেদেন; দোষস্য সংশোধনাত্ সংশোধনং সস্যাদিরসাযনং (?), সংশমনং নাগবলাপ্রযোগাদিকমিতি||১-২||
Adhikarana 2 (3-5) · Śloka 5
পূর্বে বযসি মধ্যে বা মনুষ্যস্য রসাযনম্ |
প্রযুঞ্জীত ভিষক্ প্রাজ্ঞঃ স্নিগ্ধশুদ্ধতনোঃ সদা ||৩||
নাবিশুদ্ধশরীরস্য যুক্তো রাসাযনো বিধিঃ |
ন ভাতি বাসসি ক্লিষ্টে রঙ্গযোগ ইবাহিতঃ ||৪||
শরীরস্যোপঘাতা যে দোষজা মানসাস্তথা |
উপদিষ্টাঃ প্রদেশেষু তেষাং বক্ষ্যামি বারণম্ ||৫||
View original
पूर्वे वयसि मध्ये वा मनुष्यस्य रसायनम् |
प्रयुञ्जीत भिषक् प्राज्ञः स्निग्धशुद्धतनोः सदा ||३||
नाविशुद्धशरीरस्य युक्तो रासायनो विधिः |
न भाति वाससि क्लिष्टे रङ्गयोग इवाहितः ||४||
शरीरस्योपघाता ये दोषजा मानसास्तथा |
उपदिष्टाः प्रदेशेषु तेषां वक्ष्यामि वारणम् ||५||
ন ভাতি ন দীপ্যতে| আহিতঃ প্রযুক্তঃ| শরীরদোষা বাতাদযঃ; মানসৌ তু রজস্তমসী||৩-৫||
Adhikarana 3 (6) · Śloka 6
শীতোদকং পযঃ ক্ষৌদ্রং সর্পিরিত্যেকশো দ্বিশঃ |
ত্রিশঃ সমস্তমথবা প্রাক্ পীতং স্থাপযেদ্বযঃ ||৬||
View original
शीतोदकं पयः क्षौद्रं सर्पिरित्येकशो द्विशः |
त्रिशः समस्तमथवा प्राक् पीतं स्थापयेद्वयः ||६||
শরীরস্য প্রকৃতিভেদেন চতুর্বিধং বযঃস্থাপনমুপদিশন্নাহ- শীতোদকমিত্যাদি| শীতোদকপযঃক্ষৌদ্রসর্পিষামেকশশ্চত্বারঃ প্রযোগাঃ, দ্বিশঃ ষট্, ত্রিশশ্চত্বারঃ, চতুর্ভিরেকঃ, এবং পঞ্চদশ প্রযোগাঃ| উদকং পযঃ ক্ষৌদ্রং সর্পিরিত্যেকশশ্চত্বারঃ; উদকপযসী, উদকক্ষৌদ্রে, উদকসর্পিষী, পযঃক্ষৌদ্রে, পযঃসর্পিষী, ক্ষৌদ্রসর্পিষীত্যেবং দ্বিশঃ ষট্; উদকপযঃসর্পীংষি, উদকক্ষৌদ্রসর্পীংষি, পযঃক্ষৌদ্রসর্পীংষি, উদকপযঃক্ষৌদ্রাণীত্যেবং চত্বারঃ; উদকপযঃক্ষৌদ্রসর্পির্ভিরেক এব চ প্রযোগঃ| মানাবিরুদ্ধানামেষাং বিষমাণামুপযোগঃ কার্য ইতি জ্ঞেযম্| শীতোদকং সমপিত্তবাতকফপ্রকৃতৌ, পযঃ পুনরধিকপিত্তপ্রকৃতাবেব, ক্ষৌদ্রং কফপ্রকৃতৌ, সর্পিঃ পুনরধিকবাতপ্রকৃতৌ; অত্রৈবৈকদ্বিত্রিচতুর্দ্রব্যসংযোগো হিতাহিতবাতাদিদোষভেদপ্রকৃতিষু স্ববুদ্ধ্যা বিভজনীযঃ||৬||
Adhikarana 4 (7) · Śloka 7
তত্র বিডঙ্গতণ্ডুলচূর্ণমাহৃত্য যষ্টীমধুকমধুযুক্তং যথাবলং শীততোযেনোপযুঞ্জীত শীততোযং চানুপিবেদেবমহরহর্মাসং, তদেব মধুযুক্তং ভল্লাতকক্বাথেন বা, মধুদ্রাক্ষাক্বাথযুক্তং বা, মধ্বামলকরসাভ্যাং বা, গুডূচীক্বাথেন বা, এবমেতে পঞ্চ প্রযোগা ভবন্তি; জীর্ণে মুদ্গামলকযূষেণালবণেনাল্পস্নেহেন ঘৃতবন্তমোদনমশ্নীযাত্; এতে খল্বর্শাংসি ক্ষপযন্তি, কৃমীনুপঘ্নন্তি, গ্রহণধারণশক্তিং জনযন্তি, মাসে মাসে চ প্রযোগে বর্ষশতং বর্ষশতমাযুষোঽভিবৃদ্ধির্ভবতি ||৭||
View original
तत्र विडङ्गतण्डुलचूर्णमाहृत्य यष्टीमधुकमधुयुक्तं यथाबलं शीततोयेनोपयुञ्जीत शीततोयं चानुपिबेदेवमहरहर्मासं, तदेव मधुयुक्तं भल्लातकक्वाथेन वा, मधुद्राक्षाक्वाथयुक्तं वा, मध्वामलकरसाभ्यां वा, गुडूचीक्वाथेन वा, एवमेते पञ्च प्रयोगा भवन्ति; जीर्णे मुद्गामलकयूषेणालवणेनाल्पस्नेहेन घृतवन्तमोदनमश्नीयात्; एते खल्वर्शांसि क्षपयन्ति, कृमीनुपघ्नन्ति, ग्रहणधारणशक्तिं जनयन्ति, मासे मासे च प्रयोगे वर्षशतं वर्षशतमायुषोऽभिवृद्धिर्भवति ||७||
অতশ্চোর্ধ্বমাযুর্বর্ধনমুপদিশন্নাহ- তত্রেত্যাদি| যষ্টীমধু মধু চ বিডঙ্গতণ্ডুলমানেন গ্রাহ্যম্; এতত্ পিত্তরক্তার্শস্সু তত্প্রকৃতৌ বা| তদেব বিডঙ্গতণ্ডুলচূর্ণং মধুপ্রক্ষেপং ভল্লাতকক্বাথেন পেযং, যথাবলমত্রাপি সম্বধ্যতে; এতদ্বাতজেষু শুষ্কার্শঃসু তত্প্রকৃতাবপি| মধুদ্রাক্ষাক্বাথযুক্তং বা ‘বিডঙ্গতণ্ডুলচূর্ণম্’ ইতি শেষঃ| মধ্বিত্যাদি অত্রাপি বিডঙ্গতণ্ডুলচূর্ণম্| গুডূচীত্যাদি অত্রাপি বিডঙ্গতণ্ডুলচূর্ণম্| ঘৃতবন্তং বহুঘৃতমিত্যর্থঃ| তেষাং ফলমাহ- এতে ইত্যাদি| তস্য ভল্লাতকবিধানবদাহারঃ পরিহারশ্চ||৭||
Adhikarana 5 (8-10) · Śloka 10
বিডঙ্গতণ্ডুলানাং দ্রোণং পিষ্টপচনে পিষ্টবদুপস্বেদ্য বিগতকষাযং স্বিন্নমবতার্য দৃষদি পিষ্টমাযসে দৃঢে কুম্ভে মধূদকোত্তরং প্রাবৃষি ভস্মরাশাবন্তর্গৃহে চতুরো মাসান্নিদধ্যাত্, বর্ষাবিগমে চোদ্ধৃত্যোপসংস্কৃতশরীরঃ সহস্রসম্পাতাভিহুতং কৃত্বা প্রাতঃ- প্রাতর্যথাবলমুপযুঞ্জীত, জীর্ণে মুদ্গামলকযূষেণালবণেন ঘৃতবন্তমোদনমশ্নীযাত্, পাংশুশয্যাযাং শযীত, তস্য মাসাদূর্ধ্বং সর্বাঙ্গেভ্যঃ কৃমযো নিষ্ক্রামন্তি, তানণুতৈলেনাভ্যক্তস্য বংশবিদলেনাপহরেত্, দ্বিতীযে পিপীলিকাস্তৃতীযে যূকাস্তথৈবাপহরেত্, চতুর্থে দন্তনখরোমাণ্যবশীর্যন্তে; পঞ্চমে প্রশস্তগুণলক্ষণানি জাযন্তে, অমানুষং চাদিত্যপ্রকাশং বপুরধিগচ্ছতি, দূরাচ্ছ্রবণানি দর্শনা নিচাস্য ভবন্তি, রজস্তমসী চাপোহ্য সত্ত্বমধিতিষ্ঠতি, শ্রুতনিগাদ্যপূর্বোত্পাদী গজবলোঽশ্বজবঃ পুনর্যুবাঽষ্টৌ বর্ষশতান্যাযুরবাপ্নোতি; তস্যাণুতৈলমভ্যঙ্গার্থে, অজকর্ণকষাযমুত্সাদনার্থে, সোশীরং কূপোদকং স্নানার্থে, চন্দনমুপলেপনার্থে, ভল্লাতকবিধানবদাহারঃ পরিহারশ্চ ||৮||
কাশ্মর্যাণাং নিষ্কুলীকৃতানামেষ এব কল্পঃ পাংশুশয্যাভোজনবর্জং; অত্র হি পযসা শৃতেন ভোক্তব্যং, সমানমন্যত্ পূর্বেণাশিষশ্চ |
শোণিতপিত্তনিমিত্তেষু বিকারেষ্বেতেষামুপযোগঃ ||৯||
যথোক্তমাগারং প্রবিশ্য বলামূলার্ধপলং পলং বা পযসাঽঽলোড্য পিবেত্, জীর্ণে পযঃ সর্পিরোদন ইত্যাহারঃ, এবং দ্বাদশরাত্রমুপযুজ্য দ্বাদশ বর্ষাণি বযস্তিষ্ঠতি; এবং দিবসশতমুপযুজ্য বর্ষশতং বযস্তিষ্ঠতি |
এবমেবাতিবলানাগবলাবিদারীশতাবরীণামুপযোগঃ |
বিশেষতস্ত্বতিবলামুদকেন, নাগবলাচূর্ণং মধুনা, বিদারীচূর্ণং ক্ষীরেণ, শতাবরীমপ্যেবং, পূর্বেণান্যত্ সমানমাশিষশ্চ সমাঃ |
এতাস্ত্বৌষধযো বলকামানাং শোষিণাং রক্তপিত্তোপসৃষ্টানাং শোণিতং ছর্দযতাং বিরিচ্যমানানাং চোপদিশ্যন্তে ||১০||
View original
विडङ्गतण्डुलानां द्रोणं पिष्टपचने पिष्टवदुपस्वेद्य विगतकषायं स्विन्नमवतार्य दृषदि पिष्टमायसे दृढे कुम्भे मधूदकोत्तरं प्रावृषि भस्मराशावन्तर्गृहे चतुरो मासान्निदध्यात्, वर्षाविगमे चोद्धृत्योपसंस्कृतशरीरः सहस्रसम्पाताभिहुतं कृत्वा प्रातः- प्रातर्यथाबलमुपयुञ्जीत, जीर्णे मुद्गामलकयूषेणालवणेन घृतवन्तमोदनमश्नीयात्, पांशुशय्यायां शयीत, तस्य मासादूर्ध्वं सर्वाङ्गेभ्यः कृमयो निष्क्रामन्ति, तानणुतैलेनाभ्यक्तस्य वंशविदलेनापहरेत्, द्वितीये पिपीलिकास्तृतीये यूकास्तथैवापहरेत्, चतुर्थे दन्तनखरोमाण्यवशीर्यन्ते; पञ्चमे प्रशस्तगुणलक्षणानि जायन्ते, अमानुषं चादित्यप्रकाशं वपुरधिगच्छति, दूराच्छ्रवणानि दर्शना निचास्य भवन्ति, रजस्तमसी चापोह्य सत्त्वमधितिष्ठति, श्रुतनिगाद्यपूर्वोत्पादी गजबलोऽश्वजवः पुनर्युवाऽष्टौ वर्षशतान्यायुरवाप्नोति; तस्याणुतैलमभ्यङ्गार्थे, अजकर्णकषायमुत्सादनार्थे, सोशीरं कूपोदकं स्नानार्थे, चन्दनमुपलेपनार्थे, भल्लातकविधानवदाहारः परिहारश्च ||८||
काश्मर्याणां निष्कुलीकृतानामेष एव कल्पः पांशुशय्याभोजनवर्जं; अत्र हि पयसा शृतेन भोक्तव्यं, समानमन्यत् पूर्वेणाशिषश्च |
शोणितपित्तनिमित्तेषु विकारेष्वेतेषामुपयोगः ||९||
यथोक्तमागारं प्रविश्य बलामूलार्धपलं पलं वा पयसाऽऽलोड्य पिबेत्, जीर्णे पयः सर्पिरोदन इत्याहारः, एवं द्वादशरात्रमुपयुज्य द्वादश वर्षाणि वयस्तिष्ठति; एवं दिवसशतमुपयुज्य वर्षशतं वयस्तिष्ठति |
एवमेवातिबलानागबलाविदारीशतावरीणामुपयोगः |
विशेषतस्त्वतिबलामुदकेन, नागबलाचूर्णं मधुना, विदारीचूर्णं क्षीरेण, शतावरीमप्येवं, पूर्वेणान्यत् समानमाशिषश्च समाः |
एतास्त्वौषधयो बलकामानां शोषिणां रक्तपित्तोपसृष्टानां शोणितं छर्दयतां विरिच्यमानानां चोपदिश्यन्ते ||१०||
পিষ্টপচনে তৃণাদিকৃতাস্তারে কটাহে| দৃষদি শিলাযাম্| মধূদকোত্তরং মধূদকপ্রধানম্; উদকমত্র বিডঙ্গকষায এব, শীতোদকমিত্যন্যে| নিদধ্যাত্ স্থাপযেত্| উপসংস্কৃতশরীরো বিশুদ্ধদেহঃ| সহস্রসম্পাতাভিহুতং কৃত্বা সহস্রসম্পাতাধ্যাযো ঋগ্বেদে পঠ্যতে, তৈর্মন্ত্রৈঃ সহস্রং হুত্বোপযুঞ্জীতেত্যর্থঃ| জেজ্জটস্তু সম্পাতশব্দেন যাজ্ঞিকানাং স্রবণং, তথা হ্যাহার্য সংস্কৃত্য দ্রব্যাণি হূযন্তে, হুত্বা হুত্বা চ পানীযাদিপূর্ণপাত্রে সংস্রাব্যন্তে| এতদুক্তং ভবতি- সহস্রসম্পতনং যস্মিন্নভিহুতে তত্তথা; তত্ কৃত্বোপযুঞ্জীতেত্যর্থঃ| গযী তু অথর্ববিদ্ভিঃ সম্পাতক্রমেণৌষধাধিকারিণা মন্ত্রেণ ত্রিপদা গাযত্র্যা বা প্রাক্তনকর্মক্ষযার্থং বিঘ্নশান্ত্যর্থমভিমতাশীঃপ্রাপ্ত্যর্থং বা সহস্রাভিহুতং কৃত্বা প্রযুজ্যন্তে| পাংশুঃ ধূলিঃ| বংশবিদলেন বংশকম্বিকযা| দ্বিতীযে ইতি মাসে| অবশীর্যন্তে পতন্তীত্যর্থঃ| চতুর্থেঽতীতে ইত্যর্থঃ| অপূর্বোত্পাদীতি অপূর্বশ্লোকাদিকং করোতীত্যর্থঃ| অজকর্ণো মহাসর্জঃ, ‘গন্ধমুণ্ড’ ইতি লোকে| কষাযোঽত্র কল্কঃ| সস্নেহকল্কেনোদ্ধর্ষণমুত্সাদনম্| চন্দনং রক্তচন্দনং, সিতচন্দনমিত্যপরে| ভল্লাতকবিধানবদিতি বিবৃতাগারপ্রবেশাদিভিরিত্যর্থঃ; সমানমন্যত্| আশিষ ইতি গুণা ইত্যর্থঃ||৮-১০||
Adhikarana 6 (11) · Śloka 11
বারাহীমূলতুলাচূর্ণং কৃত্বা ততো মাত্রাং মধুযুক্তাং পযসাঽঽলোড্য পিবেত্, জীর্ণে পযঃ সর্পিরোদন ইত্যাহারঃ, প্রতিষেধোঽত্র পূর্ববত্ ; প্রযোগমিমমুপসেবমানো বর্ষশতমাযুরবাপ্নোতি স্ত্রীষু চাক্ষযতাম্, এতেনৈব চূর্ণেন পযোঽবচূর্ণ্য শৃতশীতমভিমথ্যাজ্যমুত্পাদ্য মধুযুতমুপযুঞ্জীত সাযম্প্রাতরেককালং বা, জীর্ণে পযঃ সর্পিরোদন ইত্যাহারঃ, এবং মাসমুপযুজ্য বর্ষশতাযুর্ভবতি ||১১||
View original
वाराहीमूलतुलाचूर्णं कृत्वा ततो मात्रां मधुयुक्तां पयसाऽऽलोड्य पिबेत्, जीर्णे पयः सर्पिरोदन इत्याहारः, प्रतिषेधोऽत्र पूर्ववत् ; प्रयोगमिममुपसेवमानो वर्षशतमायुरवाप्नोति स्त्रीषु चाक्षयताम्, एतेनैव चूर्णेन पयोऽवचूर्ण्य शृतशीतमभिमथ्याज्यमुत्पाद्य मधुयुतमुपयुञ्जीत सायम्प्रातरेककालं वा, जीर्णे पयः सर्पिरोदन इत्याहारः, एवं मासमुपयुज्य वर्षशतायुर्भवति ||११||
বারাহীত্যাদি| প্রতিষেধো নিবৃত্তিঃ| এতেনৈব চূর্ণেন বারাহীচূর্ণেন ক্ষীরপাকবিধিনা শৃতং ক্ষীরমবচূর্ণ্য, তচ্চ শীতমভিমথ্য, আজ্যমুত্পাদযেত্, বারাহীশতপাকং বা সর্পির্দ্রোণমুপযুজ্য বর্ষশতাযুর্ভবতি| জীর্ণে পযঃ সর্পিরোদন ইত্যাহারঃ| কল্পনামাহ- বারাহীকন্দকল্কং ক্ষীরচতুর্গুণং ঘৃতদ্রোণং পচেত্; অনেন ক্রমেণ শতপাকং ঘৃতং দ্রোণমুপযুজ্য বর্ষশতাযুর্ভবতি| অন্যে পুনরনুক্তং জলমেব চতুর্গুণমাহুঃ| যদ্যপি স্নেহপানানন্তরং স্নেহভোজনং নিষিদ্ধং, তথাঽপ্যত্র বারাহ্যা শতপাকসংস্কৃতস্য স্বভাবশমনীযরূপস্য সর্পিষঃ পানানন্তরং রসাযনবিধিনা সর্পিষা ভোজনং যুজ্যতে ইতি ন দোষঃ||১১||
Adhikarana 7 (12-13) · Śloka 13
চক্ষুঃকামঃ প্রাণকামো বা বীজকসারাগ্নিমন্থমূলং নিষ্ক্বাথ্য মাষপ্রস্থং সাধযেত্, তস্মিন্ সিধ্যতি চিত্রকমূলানামক্ষমাত্রং কল্কং দদ্যাদামলকরসচতুর্থভাগং, ততঃ স্বিন্নমবতার্য সহস্রসম্পাতাভিহুতং কৃত্বা শীতীভূতং মধুসর্পির্ভ্যাং সংসৃজ্যোপযুঞ্জীত যথাবলং, যথাসাত্ম্যং চ লবণং পরিহরন্ ভক্ষযেত্ |
জীর্ণে মুদ্গামলকযূষেণালবণেন ঘৃতবন্তমোদনমশ্নীযাত্ পযসা বা মাসত্রযম্; এবমাভ্যাং প্রযোগাভ্যাং চক্ষুঃ সৌপর্ণং ভবত্যনল্পবলঃ স্ত্রীষু চাক্ষযো বর্ষশতাযুর্ভবতীতি ||১২||
ভবতি চাত্র- পযসা সহ সিদ্ধানি নরঃ শণফলানি যঃ |
ভক্ষযেত্ পযসা সার্ধং বযস্তস্য ন শীর্যতে ||১৩||
View original
चक्षुःकामः प्राणकामो वा बीजकसाराग्निमन्थमूलं निष्क्वाथ्य माषप्रस्थं साधयेत्, तस्मिन् सिध्यति चित्रकमूलानामक्षमात्रं कल्कं दद्यादामलकरसचतुर्थभागं, ततः स्विन्नमवतार्य सहस्रसम्पाताभिहुतं कृत्वा शीतीभूतं मधुसर्पिर्भ्यां संसृज्योपयुञ्जीत यथाबलं, यथासात्म्यं च लवणं परिहरन् भक्षयेत् |
जीर्णे मुद्गामलकयूषेणालवणेन घृतवन्तमोदनमश्नीयात् पयसा वा मासत्रयम्; एवमाभ्यां प्रयोगाभ्यां चक्षुः सौपर्णं भवत्यनल्पबलः स्त्रीषु चाक्षयो वर्षशतायुर्भवतीति ||१२||
भवति चात्र- पयसा सह सिद्धानि नरः शणफलानि यः |
भक्षयेत् पयसा सार्धं वयस्तस्य न शीर्यते ||१३||
বীজকসারাগ্নিমন্থমূলং পলং সলিলাঢকে নিষ্ক্বাথ্য, অর্ধাবশিষ্টে তত্র পূতে ষোডশপলানি মাষাণি সাধ্যানি, তস্মিংশ্চ সিধ্যতি চিত্রমূলকল্কাক্ষং প্রক্ষিপেত্, আমলকরসস্য মাষপ্রস্থাপেক্ষযা চতুর্থভাগং কুডবমষ্টৌ পলানি| পযসা বেতি যোগদ্বযমেতত্, যোজনাবিশেষত্বাত্| সৌপর্ণং গরুডচক্ষুষা তুল্যং চক্ষুর্ভবতি| গযী তু ‘সহস্রসম্পাতাভিহুতং কৃত্বা’ ইতি ন পঠতি| অন্যে তু সুশ্রুতাধ্যাযিনোঽত্র বক্ষ্যমাণং যোগং পঠন্তি; যথা- পযসা সহ সিদ্ধানীত্যাদি| অযং যোগোঽনার্ষঃ, জেজ্জটেনাপ্যনুক্তত্বাত্; তস্মান্ন পঠনীযঃ||১২-১৩||
Adhikarana puShpikA · Śloka 27
ইতি সুশ্রুতসংহিতাযাং চিকিত্সাস্থানে সর্বোপঘাতশমনীযং রসাযনচিকিত্সিতং নাম সপ্তবিংশোঽধ্যাযঃ ||২৭||
View original
इति सुश्रुतसंहितायां चिकित्सास्थाने सर्वोपघातशमनीयं रसायनचिकित्सितं नाम सप्तविंशोऽध्यायः ||२७||
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে সপ্তবিংশতিতমোঽধ্যাযঃ|||২৭||