Adhikarana 1 (1-2) · Śloka 2
অথাতঃ স্নেহোপযৌগিকচিকিত্সিতং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
View original
अथातः स्नेहोपयौगिकचिकित्सितं व्याख्यास्यामः ||१||
यथोवाच भगवान् धन्वन्तरिः ||२||
সর্বোপঘাতশমনীযে রসাযনে ‘নাবিশুদ্ধশরীরস্য যুক্তো রাসাযনো বিধিঃ’ ইত্যুক্তত্বাচ্ছোধনং প্রতিপাদযিতুকামঃ তত্প্রাক্কর্মণী স্নেহস্বেদৌ নির্দিশতি; তত্রাপি স্নেহপূর্বকত্বাত্ স্বেদস্য প্রথমং স্নেহোপযৌগিকং চিকিত্সিতমাহ- অথাত ইত্যাদি| স্নেহস্য উপযোগো যস্মিন্ কর্মণি তত্স্নেহোপযৌগিকং তদেব চিকিত্সিতম্| উপযোজনম্ উপযোগো বাহ্য আভ্যন্তরশ্চ; তত্র বাহ্যোঽভ্যঙ্গাদিঃ, আভ্যন্তরঃ পানাদিঃ||১-২||
Adhikarana 2 (3) · Śloka 3
স্নেহসারোঽযং পুরুষঃ, প্রাণাশ্চ স্নেহভূযিষ্ঠাঃ স্নেহসাধ্যাশ্চ ভবন্তি |
স্নেহো হি পানানুবাসনমস্তিষ্কশিরোবস্ত্যুত্তরবস্তিনস্যকর্ণপূরণগাত্রাভ্যঙ্গভোজনেষূপযোজ্যঃ ||৩||
View original
स्नेहसारोऽयं पुरुषः, प्राणाश्च स्नेहभूयिष्ठाः स्नेहसाध्याश्च भवन्ति |
स्नेहो हि पानानुवासनमस्तिष्कशिरोबस्त्युत्तरबस्तिनस्यकर्णपूरणगात्राभ्यङ्गभोजनेषूपयोज्यः ||३||
তত্র পানাদি প্রধানমিহ বক্তব্যম্, অপ্রধানং পুনরনাগতাবাধে ইন্দ্রিযানুপালনপ্রসঙ্গেনোক্তম্||৩||
Adhikarana 3 (4) · Śloka 4
তত্র দ্বিযোনিশ্চতুর্বিকল্পোঽভিহিতঃ স্নেহঃ স্নেহগুণাশ্চ |
তত্র জঙ্গমেভ্যো গব্যং ঘৃতং প্রধানং, স্থাবরেভ্যস্তিলতৈলং প্রধানমিতি ||৪||
View original
तत्र द्वियोनिश्चतुर्विकल्पोऽभिहितः स्नेहः स्नेहगुणाश्च |
तत्र जङ्गमेभ्यो गव्यं घृतं प्रधानं, स्थावरेभ्यस्तिलतैलं प्रधानमिति ||४||
দ্বিযোনিঃ দ্বিকারণিকঃ স্থাবরো জঙ্গমশ্চ| তত্র তৈলং স্থাবরযোনি, ঘৃতবসামজ্জানস্তু জঙ্গমযোনযঃ| তত্র তৈলং তিলাদিফলোদ্ভবত্বাত্ ফলস্থং, দেবদারুশিংশপাগুর্বাদিসারোত্থং চ; ঘৃতমপি দ্বিবিধং ক্ষীরোত্থং, দধ্যুত্থং চ; শুদ্ধমাংসস্নেহো বসা, অস্থ্যাশ্রযা মজ্জা| চত্বারো বিকল্পাঃ সর্পিস্তৈলবসামজ্জানো যস্য স্নেহস্যেতি চতুর্বিকল্পঃ; স্বাভাবিকগুণেনাপ্যত্র পানবিধাবুক্তঃ| তত্র জঙ্গমেভ্যো গব্যং ঘৃতং প্রধানং, স্থাবরেভ্যস্তিলতৈলমিতি||৪||
Adhikarana 4 (5) · Śloka 5
অত ঊর্ধ্বং যথাপ্রযোজনং যথাপ্রধানং চ স্থাবরস্নেহানুপদেক্ষ্যামঃ- তত্র তিল্বকৈরণ্ডকোশাম্রদন্তীদ্রবন্তীসপ্তলাশঙ্খিনীপলাশবিষাণিকাগবাক্ষীকম্পিল্লকশম্পাকনীলিনীস্নেহা বিরেচযন্তি, জীমূতককুটজকৃতবেধনেক্ষ্বাকুধামার্গবমদনস্নেহা বামযন্তি, বিডঙ্গখরমঞ্জরীমধুশিগ্রুসূর্যবল্লীপীলুসিদ্ধার্থকজ্যোতিষ্মতীস্নেহাঃ শিরো বিরেচযন্তি, করঞ্জপূতীককৃতমালমাতুলুঙ্গেঙ্গুদীকিরাততিক্তকস্নেহা দুষ্টব্রণেষূপযুজ্যন্তে, তুবরককপিত্থকম্পিল্লকভল্লাতকপটোলস্নেহা মহাব্যাধিষু, ত্রপুসৈর্বারুককর্কারুকতুম্বীকূষ্মাণ্ডস্নেহা মূত্রসঙ্গেষু, কপোতবঙ্কাবল্গুজহরীতকীস্নেহাঃ শর্করাশ্মরীষু, কুসুম্ভসর্ষপাতসীপিচুমর্দাতিমুক্তকভাণ্ডীকটুতুম্বীকটভীস্নেহাঃ প্রমেহেষু, তালনারিকেলপনসমোচপ্রিযালবিল্বমধূকশ্লেষ্মাতকাম্রাতকফলস্নেহাঃ পিত্তসংসৃষ্টে বাযৌ, বিভীতকভল্লাতকপিণ্ডীতকস্নেহাঃ কৃষ্ণীকরণে, শ্রবণকঙ্গুকটুণ্টুকস্নেহাঃ পাণ্ডূকরণে, সরলপীতদারুশিংশপাগুরুসারস্নেহা দদ্রুকুষ্ঠকিটিভেষু, সর্ব এব স্নেহা বাতমুপঘ্নন্তি, তৈলগুণাশ্চ সমাসেন ব্যাখ্যাতাঃ ||৫||
View original
अत ऊर्ध्वं यथाप्रयोजनं यथाप्रधानं च स्थावरस्नेहानुपदेक्ष्यामः- तत्र तिल्वकैरण्डकोशाम्रदन्तीद्रवन्तीसप्तलाशङ्खिनीपलाशविषाणिकागवाक्षीकम्पिल्लकशम्पाकनीलिनीस्नेहा विरेचयन्ति, जीमूतककुटजकृतवेधनेक्ष्वाकुधामार्गवमदनस्नेहा वामयन्ति, विडङ्गखरमञ्जरीमधुशिग्रुसूर्यवल्लीपीलुसिद्धार्थकज्योतिष्मतीस्नेहाः शिरो विरेचयन्ति, करञ्जपूतीककृतमालमातुलुङ्गेङ्गुदीकिराततिक्तकस्नेहा दुष्टव्रणेषूपयुज्यन्ते, तुवरककपित्थकम्पिल्लकभल्लातकपटोलस्नेहा महाव्याधिषु, त्रपुसैर्वारुककर्कारुकतुम्बीकूष्माण्डस्नेहा मूत्रसङ्गेषु, कपोतवङ्कावल्गुजहरीतकीस्नेहाः शर्कराश्मरीषु, कुसुम्भसर्षपातसीपिचुमर्दातिमुक्तकभाण्डीकटुतुम्बीकटभीस्नेहाः प्रमेहेषु, तालनारिकेलपनसमोचप्रियालबिल्वमधूकश्लेष्मातकाम्रातकफलस्नेहाः पित्तसंसृष्टे वायौ, बिभीतकभल्लातकपिण्डीतकस्नेहाः कृष्णीकरणे, श्रवणकङ्गुकटुण्टुकस्नेहाः पाण्डूकरणे, सरलपीतदारुशिंशपागुरुसारस्नेहा दद्रुकुष्ठकिटिभेषु, सर्व एव स्नेहा वातमुपघ्नन्ति, तैलगुणाश्च समासेन व्याख्याताः ||५||
প্রযোজনস্যানতিক্রমেণেতি যথাপ্রযোজনং, প্রযোজনং প্রযোজনং বীক্ষ্যেতি বা| প্রধানং প্রধানং বীক্ষ্য যথাপ্রধানম্| তত্র স্থাবরস্য প্রাযেণ পার্থিবদ্রব্যারব্ধত্বাত্তস্য চ স্বভাবেনাধোগামিত্বাদ্বিরেচনস্নেহানেব প্রথমমাহ- তত্রেত্যাদি| তিল্বকো রোধ্রাকারো বৃহত্পত্রো রক্তত্বগ্বৈরেচনিকঃ, সপ্তলা যবতিক্তাভেদঃ, শঙ্খিন্যপি তদ্ভেদঃ, বিষাণিকা মেষশৃঙ্গী, গবাক্ষী ইন্দ্রবারুণী, কম্পিল্লকো রেচনিকা স্বনামখ্যাতঃ, শম্পাকঃ কিরমালকঃ, নীলিনী নীলাঞ্জনিকা শারদং ফলম্| জীমূতো দেবদালী, কৃতবেধনঃ কোশাতকী, ইক্ষ্বাকুঃ কটুতুম্বী, ধামার্গবো মহাকোশাতকী| তত্র তিল্বকাদিস্নেহা বিরেচযন্তি, জীমূতকাদিস্নেহা বামযন্তি| পিত্তকফহরং কর্মদ্বযং প্রতিপাদ্য স্থানাশ্রযং কফস্যৈব কর্ম দর্শযন্নাহ- বিডঙ্গেত্যাদি| খরমঞ্জরী অপামার্গঃ, মধুশিগ্রুঃ শোভাঞ্জনকঃ, সূর্যবল্লী পটোলসদৃশা বল্লী, জ্যোতিষ্মতী কাকমর্দনিকা, শিরো বিরেচযন্তি নস্যপ্রযোগেণ শিরঃস্থং শ্লেষ্মাণং বিরেচযন্তি স্রাবযন্তীত্যর্থঃ| ইদানীং শল্যতন্ত্রত্বাদ্ব্রণযোগিনঃ স্নেহান্নির্দিশন্নাহ- করঞ্জেত্যাদি| পূতীকঃ চিরবিল্বঃ, কৃতমালঃ কিরমালঃ| তুবরকঃ পশ্চিমসমুদ্রভূমিষু পলাশানুকারী বৃক্ষঃ| মহাব্যাধিষু মহাকুষ্ঠমেহাদিষ্বষ্টাসু, বাতামযাদিষ্বিত্যন্যে; উপযুজ্যন্ত ইতি পূর্বশ্লোকাত্ সম্বন্ধনীযম্; এবমুত্তরত্র| ত্রপুসঃ সুধাবাসঃ, ত্রপুসীতি লোকে, এর্বারুর্লোমশা কর্কটী, কর্কারুঃ বাডবং ত্রপুসং ‘খেরসা’ ইতি লোকে| মূত্রসঙ্গেষু মূত্রকৃচ্ছ্রাধ্মানাশ্মরীষ্বিত্যর্থঃ| কপোতবঙ্কা ব্রহ্মসুবর্চলা, অবল্গুজো বাকুচী; গযদাসস্তু ‘কপোতবঙ্কাহরীতকীস্নেহৌ শর্করাশ্মরীষু’ ইতি পঠিত্বা ব্যাখ্যানযতি- কপোতবঙ্কাদিস্নেহৌ বাতভিন্নমূর্তিষ্বশ্মরীষ্বিতি| পিচুমর্দো নিম্বঃ, অতিমুক্তকঃ অবন্তকঃ, ভাণ্ডী ‘ভাণ্ডনী’ ইতি লোকে প্রসিদ্ধো বিটপো ভাণ্ডধাবনার্থমাসুতীবলাঃ সমাহরন্তি| প্রিযালঃ চারঃ| পিণ্ডীতকো মদনঃ| শ্রবণঃ তাপসবৃক্ষঃ ‘ইঙ্গুদী’ ইতি লোকে, কঙ্গুকং প্রিযঙ্গুঃ, টুণ্টুকঃ স্যোনাকঃ| পীতদারু দেবদারু| বিশেষেণ দদ্রূকিটিভৌ ঘ্নন্তীতি নিযমার্থং পুনঃ কুষ্ঠত্বাবিশেষেঽপি তযোর্গ্রহণম্| সর্বস্নেহসামান্যকর্ম নির্দিশন্নাহ- সর্ব এবেত্যাদি| স্থাবরতৈলপ্রাধান্যেন তিলতৈলগুণা দ্রবদ্রব্যবিধাবুক্তাঃ| সমাসেনেতি বর্গেণৈব গুণোপদেশাত্ সঙ্ক্ষেপেণেত্যর্থঃ||৫||
Adhikarana 5 (6) · Śloka 6
অত ঊর্ধ্বং কষাযস্নেহপাকক্রমমুপদেক্ষ্যামঃ |
তত্র কেচিদাহুঃ- ত্বক্পত্রফলমূলাদীনাং ভাগস্তচ্চতুর্গুণং জলং চতুর্ভাগাবশেষং নিষ্ক্বাথ্যাপহরেদিত্যেষ কষাযপাককল্পঃ; স্নেহপ্রসৃতেষু ষট্সু চতুর্গুণং দ্রবমাবাপ্য চতুরশ্চাক্ষসমান্ ভেষজপিণ্ডানিত্যেষ স্নেহপাককল্পঃ |
এতত্তু ন সম্যক্; কস্মাত্? আগমাসিদ্ধত্বাত্ ||৬||
View original
अत ऊर्ध्वं कषायस्नेहपाकक्रममुपदेक्ष्यामः |
तत्र केचिदाहुः- त्वक्पत्रफलमूलादीनां भागस्तच्चतुर्गुणं जलं चतुर्भागावशेषं निष्क्वाथ्यापहरेदित्येष कषायपाककल्पः; स्नेहप्रसृतेषु षट्सु चतुर्गुणं द्रवमावाप्य चतुरश्चाक्षसमान् भेषजपिण्डानित्येष स्नेहपाककल्पः |
एतत्तु न सम्यक्; कस्मात्? आगमासिद्धत्वात् ||६||
স চ স্নেহঃ প্রাযশঃ সংস্কৃত উপযুজ্যতে, অতস্তত্সংস্কারার্থমাহ- অত ঊর্ধ্বমিত্যাদি| আদিশব্দাত্ কন্দাদযো গৃহ্যন্তে| ভাগ ইতি একবচনান্তত্বাদেক এবাকৃতপলাদিমানবিশেষস্তুলাধারণমাত্রেণাবধারিতঃ| তস্মাত্ত্বগাদিভাগাচ্চতুর্গুণমুদকম্| তদুক্তম্- চতুর্ভাগাবশেষং ক্বাথমুপহরেদিতি| কষাযস্নেহকল্কমানং দর্শযন্নাহ- স্নেহপ্রসৃতেষ্বিত্যাদি| প্রসৃতোঽত্র সংযুক্তপঞ্চাঙ্গুলিরীষদ্বিস্তৃতপাণিরেকঃ, ন পুনঃ পলদ্বযম্| চতুরশ্চাক্ষসমান্ ভেষজকল্কপিণ্ডান্ বিভীতকফলমানান্ পিষ্টভেষজকল্কান্; ইত্যেষ স্নেহপাককল্প ইতি কেচিদাহুঃ||৬||
Adhikarana 6 (7) · Śloka 7
পলকুডবাদীনামতো মানং তু ব্যাখ্যাস্যামঃ- তত্র দ্বাদশ ধান্যমাষা মধ্যমাঃ সুবর্ণমাষকঃ, তে ষোডশ সুবর্ণম্; অথবা মধ্যমনিষ্পাবা একোনবিংশতির্ধরণং, তান্যর্ধতৃতীযানি কর্ষঃ; ততশ্চোর্ধ্বং চতুর্গুণমভিবর্ধযন্তঃ পলকুডবপ্রস্থাঢকদ্রোণা ইত্যভিনিষ্পদ্যন্তে, তুলা পুনঃ পলশতং, তাঃ পুনর্বিংশতির্ভারঃ; শুষ্কাণামিদং মানম্, আর্দ্রদ্রবাণাং চ দ্বিগুণমিতি ||৭||
View original
पलकुडवादीनामतो मानं तु व्याख्यास्यामः- तत्र द्वादश धान्यमाषा मध्यमाः सुवर्णमाषकः, ते षोडश सुवर्णम्; अथवा मध्यमनिष्पावा एकोनविंशतिर्धरणं, तान्यर्धतृतीयानि कर्षः; ततश्चोर्ध्वं चतुर्गुणमभिवर्धयन्तः पलकुडवप्रस्थाढकद्रोणा इत्यभिनिष्पद्यन्ते, तुला पुनः पलशतं, ताः पुनर्विंशतिर्भारः; शुष्काणामिदं मानम्, आर्द्रद्रवाणां च द्विगुणमिति ||७||
স্নেহপাককল্পমুপদিদিক্ষুঃ পূর্বং পলাদিপরিমাণমেবাহ- পলেত্যাদি| কুতঃ? তত্পূর্বকত্বাত্ তত্পরিমেযার্থপ্রবিভাগসিদ্ধেঃ, পরিমাণসিদ্ধৌ পরিমেযকষাযস্নেহপাকাদিসম্ভারদ্রব্যপ্রবিভাগপ্রসিদ্ধিঃ; অতস্তদুপযোগি মানমভিধীযতে| পলাদীনাং পঙ্ক্তৌ পৃথক্ কুডবগ্রহণাত্ পলকুডবযোরদ্বৈগুণ্যং প্রতিপাদযতি| তদাহ- তত্র কুডবাদৌ দ্রবস্যার্দ্রস্য চ দ্বৈগুণ্যমেব, পলমানেষু তু পুনরদ্বৈগুণ্যমেব| মধ্যমা মধ্যমপ্রমাণাঃ, তেন নাতিস্থূলা নাতিতনবশ্চ গ্রাহ্যাঃ| তৈর্দ্বাদশভিরেকঃ সুবর্ণমাষকঃ| তে ষোডশ সুবর্ণমাষকাঃ সুবর্ণকর্ষ ইত্যর্থঃ| অন্যে পুনরন্যথা মানসূত্রং পঠন্তি; তদ্যথা- অথবা মধ্যমনিষ্পাবা ইত্যাদি| অর্ধং তৃতীযং যেষাং তান্যর্ধতৃতীযানি সার্ধদ্বযমিত্যর্থঃ| উভযং চৈতত্ প্রসিদ্ধম্| ততশ্চেত্যাদি| অযমর্থঃ- ততঃ কর্ষাচ্চতুর্গুণবর্ধমানাত্ পলম্, এবং পলাত্ চতুর্গুণবর্ধমানাত্ কুডবঃ, কুডবাত্ প্রস্থঃ, প্রস্থাদাঢকম্, আঢকাদ্ দ্রোণঃ; তুলা পুনঃ পলশতমেব| তাঃ পুনরিতি তুলা ইত্যর্থঃ| প্রসঙ্গেন ভারোঽপ্যভিহিতো ন পুনরত্রানেন ব্যবহারো দৃশ্যতে| শুষ্কাণামিদং প্রমাণং, সার্দ্রাণাং সরসানাং দ্রবাণাং সলিলক্ষীরাদীনাং কুডবাদৌ দ্বৈগুণ্যং; তেন শুষ্কাণাং চতুর্ভিঃ পলৈঃ কুডবঃ, আর্দ্রাণাং দ্রবাণাং চাষ্টভিরিতি; জেজ্জটস্ত্বার্দ্রাণাং দ্রবাণাং চ চতুঃপলং কুডবমাহ| বৃদ্ধবৈদ্যব্যবহারাত্ কানিচিদ্দ্রব্যাণ্যার্দ্রাণ্যপি ন দ্বিগুণানি গ্রাহ্যাণি| তান্যেবাহ- “বাসাকুটজকূষ্মাণ্ডশতমূলীসহামৃতাঃ | প্রসারণ্যশ্বগন্ধা চ শতপুষ্পা সহাচরাঃ|| নিত্যমার্দ্রাঃ প্রযোক্তব্যা ন তাসাং দ্বিগুণং ভবেত্”- ইতি| কেচিত্ প্রস্থবিষযে এবং প্রবদন্তি- “দ্বাত্রিংশতাঽত্র বিংশত্যা পলৈঃ ষোডশভিঃ ক্রমাত্| তোযস্নেহবিশুষ্কাণাং দ্রব্যাণাং প্রস্থমাদিশেত্”- ইতি| তত্র দ্বাদশ ধান্যমাষা মধ্যমাঃ সুবর্ণমাষক ইতি মাগধানুমতং সুশ্রুতাচার্যসম্মতং মানম্| উক্তং চ- “মানং তু দ্বিবিধং প্রাহুঃ কালিঙ্গং মাগধং তথা| কালিঙ্গান্মাগধং শ্রেষ্ঠমিতি মানবিদো বিদুঃ|| কালিঙ্গমপি মানং চ চরকাচার্যসম্মতম্”- ইতি| সুশ্রুতাচার্যঃ প্রাহ- অথবা মধ্যমনিষ্পাবা একোনবিংশতিরিত্যাদিকম্||৭||
Adhikarana 7 (8) · Śloka 8
তত্রান্যতমপরিমাণসম্মিতানাং যথাযোগং ত্বক্পত্রফলমূলাদীনামাতপপরিশোষিতানাং ছেদ্যানি খণ্ডশশ্ছেদযিত্বা ভেদ্যান্যণুশো ভেদযিত্বাঽবকুট্যাষ্টগুণেন ষোডশগুণেন বাঽম্ভসাঽভিষিচ্য স্থাল্যাং চতুর্ভাগাবশিষ্টং ক্বাথযিত্বাঽপহরেদিত্যেষ কষাযপাককল্পঃ |
স্নেহাচ্চতুর্গুণো দ্রবঃ, স্নেহচতুর্থাংশো ভেষজকল্কঃ, তদৈকধ্যং সংসৃজ্য বিপচেদিত্যেষ স্নেহপাককল্পঃ |
অথবা তত্রোদকদ্রোণে ত্বক্পত্রফলমূলাদীনাং তুলামাবাপ্য চতুর্ভাগাবশিষ্টং নিষ্ক্বাথ্যাপহরেদিত্যেষ কষাযপাককল্পঃ; স্নেহকুডবে ভেষজপলং পিষ্টং কল্কং চতুর্গুণং দ্রবমাবাপ্য বিপচেদিত্যেষ স্নেহপাককল্পঃ ||৮||
View original
तत्रान्यतमपरिमाणसम्मितानां यथायोगं त्वक्पत्रफलमूलादीनामातपपरिशोषितानां छेद्यानि खण्डशश्छेदयित्वा भेद्यान्यणुशो भेदयित्वाऽवकुट्याष्टगुणेन षोडशगुणेन वाऽम्भसाऽभिषिच्य स्थाल्यां चतुर्भागावशिष्टं क्वाथयित्वाऽपहरेदित्येष कषायपाककल्पः |
स्नेहाच्चतुर्गुणो द्रवः, स्नेहचतुर्थांशो भेषजकल्कः, तदैकध्यं संसृज्य विपचेदित्येष स्नेहपाककल्पः |
अथवा तत्रोदकद्रोणे त्वक्पत्रफलमूलादीनां तुलामावाप्य चतुर्भागावशिष्टं निष्क्वाथ्यापहरेदित्येष कषायपाककल्पः; स्नेहकुडवे भेषजपलं पिष्टं कल्कं चतुर्गुणं द्रवमावाप्य विपचेदित्येष स्नेहपाककल्पः ||८||
পলাদিমানমভিধায ক্বাথপাকপরিভাষামাহ- তত্রেত্যাদি| তত্রেতি তযোর্মধ্যে| অন্যতমেন একতমেন, পরিমীযতেঽনেনেতি পরিমাণং পলাদিকং, তেন সম্যঙ্মিতানাং ত্বক্পত্রাদীনাম্| ষোডশগুণেনাষ্টগুণেন বেতি বাশব্দঃ সমুচ্চযে চতুর্গুণেনেত্যস্য| উদকদ্রোণবিষযে তুলাদ্রব্যস্যাবাপেনৈতজ্জ্ঞাপযতি- নিষ্ক্বাথ্যং দ্রব্যং জলে পঞ্চগুণে নিষ্ক্বাথযেত্| স্নেহপাকপরিভাষামাহ- স্নেহাদিত্যাদি| স্নেহকুডবে প্রস্থং দ্রবং ভেষজপলং চ দত্ত্বা পক্তব্যমিত্যর্থঃ| অন্যে সুশ্রুতাধ্যাযিনঃ ক্বাথস্নেহপাককল্পনমন্যথা পঠন্তি| ত্রযাণামপি কষাযপাকবিষযমাহ- “কর্ষাদৌ তু পলং যাবদ্দদ্যাত্ ষোডশিকং জলম্| ততস্তু কুডবং যাবত্তোযমষ্টগুণং ভবেত্||চতুর্গুণমতশ্চোর্ধ্বং যাবত্ প্রস্থাদিকং ভবেত্”- ইতি| প্রকারান্তরেণ বিষযমাহ- “মৃদৌ চতুর্গুণং দেযং কঠিনেঽষ্টগুণং জলম্| কঠিনাত্ কঠিনে দেযং জলং ষোডশিকং মতম্”- ইতি| বাহুল্যেন ষোডশগুণেন জলেন ক্বাথকল্পনা পানবিষযে, স্নেহপাকে তু পূর্বৈব| বৃদ্ধসুশ্রুতাধ্যাযিমতে স্নেহপাককল্পনং- স্নেহাচ্চতুর্গুণো দ্রবঃ, স্নেহচতুর্থাংশো ভেষজকল্কঃ, তদৈকধ্যং সংসৃজ্য বিপচেদিত্যেষ স্নেহপাককল্পঃ| স্নেহাচ্চতুর্গুণো দ্রব ইতি বচনাত্ সর্বেঽপ্যুদকক্ষীরাদযো গৃহ্যন্তে| কেচিদেবং পঠন্তি- “যত্রৈকদ্বিত্রিচতুরাণি দ্রবদ্রব্যাণি তত্র সর্বাণ্যেব স্নেহাচ্চতুর্গুণানি, পঞ্চ প্রভৃতীনি স্নেহসমানানি”- ইতি| তথা চোক্তম্,- “পঞ্চপ্রভৃতি যত্র স্যুর্দ্রবাণি স্নেহসংবিধৌ| তত্র স্নেহসমান্যাহুরর্বাক্ চ স্যাচ্চতুর্গুণম্”- ইতি||৮||
Adhikarana 8 (9-10) · Śloka 10
ভবতশ্চাত্র- স্নেহভেষজতোযানাং প্রমাণং যত্র নেরিতম্ |
তত্রাযং বিধিরাস্থেযো নির্দিষ্টে তদ্বদেব তু ||৯||
অনুক্তে দ্রবকার্যে তু সর্বত্র সলিলং মতম্ |
কল্কক্বাথাবনির্দেশে গণাত্তস্মাত্ প্রযোজযেত্ ||১০||
View original
भवतश्चात्र- स्नेहभेषजतोयानां प्रमाणं यत्र नेरितम् |
तत्रायं विधिरास्थेयो निर्दिष्टे तद्वदेव तु ||९||
अनुक्ते द्रवकार्ये तु सर्वत्र सलिलं मतम् |
कल्कक्वाथावनिर्देशे गणात्तस्मात् प्रयोजयेत् ||१०||
কষাযস্নেহপাকপরিভাষেযং, পরিভাষা চানিযমে নিযমকারিণীতি, তদেব দর্শযন্নাহ- স্নেহভেষজতোযানামিত্যাদি| অনুক্তে দ্রবাদৌ পুনঃ কা পরিভাষেত্যাহ- অনুক্তে ইত্যাদি| যস্মাদেব গণাত্ স্নেহপাকোঽভিপ্রেতস্তস্মাদেব গণাত্ ক্বাথকল্কপ্রকারাভ্যাং সমাচরণীযঃ||৯-১০||
Adhikarana 9 (11) · Śloka 11
অত ঊর্ধ্বং স্নেহপাকক্রমমুপদেক্ষ্যামঃ |
স তু ত্রিবিধঃ; তদ্যথা- মৃদুঃ, মধ্যমঃ, খর ইতি |
তত্র স্নেহৌষধিবিবেকমাত্রং যত্র ভেষজং স মৃদুরিতি, মধূচ্ছিষ্টমিব বিশদমবিলেপি যত্র ভেষজং স মধ্যমঃ, কৃষ্ণমবসন্নমীষদ্বিশদং চিক্কণং চ যত্র ভেষজং স খর ইতি; অত ঊর্ধ্বং দগ্ধস্নেহো ভবতি, তং পুনঃ সাধু সাধযেত্ |
তত্র পানাভ্যবহারযোর্মৃদুঃ, নস্যাভ্যঙ্গযোর্মধ্যমঃ, বস্তিকর্ণপূরণযোস্তু খর ইতি ||১১||
View original
अत ऊर्ध्वं स्नेहपाकक्रममुपदेक्ष्यामः |
स तु त्रिविधः; तद्यथा- मृदुः, मध्यमः, खर इति |
तत्र स्नेहौषधिविवेकमात्रं यत्र भेषजं स मृदुरिति, मधूच्छिष्टमिव विशदमविलेपि यत्र भेषजं स मध्यमः, कृष्णमवसन्नमीषद्विशदं चिक्कणं च यत्र भेषजं स खर इति; अत ऊर्ध्वं दग्धस्नेहो भवति, तं पुनः साधु साधयेत् |
तत्र पानाभ्यवहारयोर्मृदुः, नस्याभ्यङ्गयोर्मध्यमः, बस्तिकर्णपूरणयोस्तु खर इति ||११||
স্নেহৌষধযোর্বিবেকমাত্রং পৃথগ্ভাবমাত্রং যস্মিন্ ভেষজে তত্ তাদৃশং ভেষজং যত্র স্নেহপাকে স মৃদুঃ| পৃথক্ত্বমুভযগতমপি ভেষজেঽভিহিতং, ভেষজস্যাগ্রেঽপি লক্ষণত্বেন নির্দেশাত্| মধূচ্ছিষ্টমিব বিশদমপিচ্ছিলমেব| অত এব অবিলেপি অঙ্গুল্যাদেঃ| এবংবিধং ভেষজং কল্করূপং যত্র স মধ্যমঃ| অবসন্নমীষদিতি ভর্জনাত্ কিঞ্চিদ্ভৃষ্টপ্রাযম্| অত ঊর্ধ্বমতিকৃষ্ণমত্যবসন্নমতিবিশদং চ যত্র ভেষজং স দগ্ধঃ| তস্য সাধনোপদেশাদৌষধগুণা এব নষ্টা ন স্নেহগুণা ইতি গম্যতে| চরকে পুনরন্যথোক্তং,- “খরোঽভ্যঙ্গে মৃদুর্নস্যে পানে বস্তৌ চ মধ্যমঃ” (চ. ক. ১২) ইতি; তদত্র দ্বযমপি প্রমাণং; “শ্রুতিদ্বৈধং তু যত্র স্যাত্তত্র ধর্মাবুভৌ স্মৃতৌ” (মনু. ২-১৪)- ইতি| অন্যত্রাপি- “উদিতানুদিতে চাপি সমযাধ্যুষিতে তথা| সর্বথা বর্ততে যজ্ঞ ইতীযং বৈদিকী শ্রুতিঃ” (মনু. স্মৃ.২-১৫) ইতি||১১||
Adhikarana 10 (12-13) · Śloka 13
ভবতশ্চাত্র- শব্দস্যোপরমে প্রাপ্তে ফেনস্যোপশমে তথা |
গন্ধবর্ণরসাদীনাং সম্পত্তৌ সিদ্ধিমাদিশেত্ ||১২||
ঘৃতস্যৈবং বিপক্বস্য জানীযাত্ কুশলো ভিষক্ |
ফেনোঽতিমাত্রং তৈলস্য শেষং ঘৃতবদাদিশেত্ ||১৩||
View original
भवतश्चात्र- शब्दस्योपरमे प्राप्ते फेनस्योपशमे तथा |
गन्धवर्णरसादीनां सम्पत्तौ सिद्धिमादिशेत् ||१२||
घृतस्यैवं विपक्वस्य जानीयात् कुशलो भिषक् |
फेनोऽतिमात्रं तैलस्य शेषं घृतवदादिशेत् ||१३||
তত্র ভেষজস্পর্শেন মৃদুবিশদাদিনা প্রাধান্যেন পাকলক্ষণং নিশ্চিত্য শেষেন্দ্রিযার্থৈরুপদিশন্নাহ- ভবতশ্চাত্রেত্যাদি| দ্বিবিধঃ পচ্যমানস্নেহস্য শব্দো দ্রবানুগতঃ, অদ্রবানুগতশ্চ| তত্র শব্দস্যোপরমে প্রাপ্তে ইত্যত্র প্রাপ্তশব্দেন যুক্তার্থবাচিনা দ্রবানুগতশব্দস্যোপরমো ন কৃত্স্নশব্দব্যুপরম ইতি জ্ঞেযম্| সম্পত্তৌ সমৃদ্ধৌ||১২-১৩||
Adhikarana 11 (14) · Śloka 14
অত ঊর্ধ্বং স্নেহপানক্রমমুপদেক্ষ্যামঃ- অথ খলু লঘুকোষ্ঠাযাতুরায কৃতমঙ্গলস্বস্তিবাচনাযোদযগিরিশিখরসংস্থিতে প্রতপ্তকনকনিকরপীতলোহিতে সবিতরি যথাবলং তৈলস্য ঘৃতস্য বা মাত্রাং পাতুং প্রযচ্ছেত্ |
পীতমাত্রে চোষ্ণোদকেনোপস্পৃশ্য সোপানত্কো যথাসুখং বিহরেত্ ||১৪||
View original
अत ऊर्ध्वं स्नेहपानक्रममुपदेक्ष्यामः- अथ खलु लघुकोष्ठायातुराय कृतमङ्गलस्वस्तिवाचनायोदयगिरिशिखरसंस्थिते प्रतप्तकनकनिकरपीतलोहिते सवितरि यथाबलं तैलस्य घृतस्य वा मात्रां पातुं प्रयच्छेत् |
पीतमात्रे चोष्णोदकेनोपस्पृश्य सोपानत्को यथासुखं विहरेत् ||१४||
অত ঊর্ধ্বং স্নেহপানক্রমমিতি স্নেহপানপরিপাটীমিত্যর্থঃ| অথশব্দোঽযং পঞ্চকর্মাদৌ মঙ্গলার্থঃ| খলুশব্দো বাক্যশোভার্থঃ| লঘুকোষ্ঠবচনং জীর্ণাহারপ্রদর্শনার্থং; গযী তু লঘুকোষ্ঠায যথাক্রমমামাশযপক্বাশযহৃদযেষু পক্বতাপগতান্নমলরসামতাগৌরবাযেতি ব্যাখ্যানযতি | কৃতং মঙ্গলং পূর্ণোদককুম্ভাদি সর্বলোকপ্রসিদ্ধং স্বস্তিবাচনং চ যস্য স তথা, তস্মৈ| অত্রোদযগিরিসংস্থিতসবিতুর্গ্রহণং প্রাতঃকালজ্ঞাপনায| প্রাতর্হি সংশোধনার্থং স্নেহপানং তন্ত্রান্তরেঽপ্যুক্তং- “শুদ্ধ্যর্থং পুনরাহারে নৈশে জীর্ণে পিবেন্নরঃ| পিবেত্ সংশমনং স্নেহমন্নকালে প্রকাঙ্ক্ষিতঃ” (চ. সূ. অ. ১৩) ইতি| যথাবলমিতি দোষপুরুষামযানাং হীনমধ্যোত্তমবলমাশ্রিত্য যামদ্বযচতুর্যামসকলাহঃপরিণামসাপেক্ষিণীং মাত্রাম্| সর্বস্নেহনেষু প্রধানতযা ঘৃততৈলে প্রাহ- ঘৃতস্য তৈলস্য বেতি| উপস্পৃশ্য আচমনং কৃত্বেত্যর্থঃ||১৪||
Adhikarana 12 (15-18) · Śloka 18
রূক্ষক্ষতবিষার্তানাং বাতপিত্তবিকারিণাম্ |
হীনমেধাস্মৃতীনাং চ সর্পিঃপানং প্রশস্যতে ||১৫||
কৃমিকোষ্ঠানিলাবিষ্টাঃ প্রবৃদ্ধকফমেদসঃ |
পিবেযুস্তৈলসাত্ম্যাশ্চ তৈলং দার্ঢ্যার্থিনশ্চ যে ||১৬||
ব্যাযামকর্শিতাঃ শুষ্করেতোরক্তা মহারুজঃ |
মহাগ্নিমারুতপ্রাণা বসাযোগ্যা নরাঃ স্মৃতাঃ ||১৭||
ক্রূরাশযাঃ ক্লেশসহা বাতার্তা দীপ্তবহ্নযঃ |
মজ্জানমাপ্নুযুঃ সর্বে সর্পির্বা স্বৌষধান্বিতম্ ||১৮||
View original
रूक्षक्षतविषार्तानां वातपित्तविकारिणाम् |
हीनमेधास्मृतीनां च सर्पिःपानं प्रशस्यते ||१५||
कृमिकोष्ठानिलाविष्टाः प्रवृद्धकफमेदसः |
पिबेयुस्तैलसात्म्याश्च तैलं दार्ढ्यार्थिनश्च ये ||१६||
व्यायामकर्शिताः शुष्करेतोरक्ता महारुजः |
महाग्निमारुतप्राणा वसायोग्या नराः स्मृताः ||१७||
क्रूराशयाः क्लेशसहा वातार्ता दीप्तवह्नयः |
मज्जानमाप्नुयुः सर्वे सर्पिर्वा स्वौषधान्वितम् ||१८||
সর্বে রূক্ষক্ষতবিষার্তাদযঃ| স্বৌষধান্বিতমিতি যস্য যত্ স্বমাত্মীযমৌষধং তেন যুক্তম্||১৫-১৮||
Adhikarana 13 (19) · Śloka 19
কেবলং পৈত্তিকে সর্পির্বাতিকে লবণান্বিতম্ |
দেযং বহুকফে চাপি ব্যোষক্ষারসমাযুতম্ ||১৯||
View original
केवलं पैत्तिके सर्पिर्वातिके लवणान्वितम् |
देयं बहुकफे चापि व्योषक्षारसमायुतम् ||१९||
ইদানীং তস্যৈব ঘৃতস্য প্রতিদোষং কেবলস্য সংযুক্তস্য চ প্রযোগমাহ- কেবলমিত্যাদি| কেবলম্ অসহাযম্, অন্যদ্রবৈরসংযুক্তমিত্যর্থঃ, তচ্চ সংস্কৃতমসংস্কৃতং বা; সত্যপ্যন্যদ্রব্যসংযোগে সংস্কৃতত্বং লভ্যত এব, সংযোগসংস্কারযোর্গুণযোর্ভিন্নত্বাত্| এতেন সংস্কৃতমসংস্কৃতং বা কেবলং ক্বাথচূর্ণাদিপ্রক্ষেপরহিতং সর্পিঃ পাতব্যমিতি জ্ঞেযম্| গযী তু- পিত্তহরদ্রব্যসাধিতমেব কেবলমিত্যাহ||১৯||
Adhikarana 14 (20) · Śloka 20
দোষাণামল্পভূযস্ত্বং সংসর্গং সমবেক্ষ্য চ |
যুঞ্জ্যাত্ত্রিষষ্টিধাভিন্নৈঃ সমাসব্যাসতো রসৈঃ ||২০||
View original
दोषाणामल्पभूयस्त्वं संसर्गं समवेक्ष्य च |
युञ्ज्यात्त्रिषष्टिधाभिन्नैः समासव्यासतो रसैः ||२०||
ন কেবলমুক্তৈর্লবণাদিভিরেব সংযুক্তং সর্পির্যোজ্যং, কিং তর্হি ত্রিষষ্টিভেদভিন্নৈ রসৈরপীত্যাহ- দোষাণামিত্যাদি||২০||
Adhikarana 15 (21) · Śloka 21
স্নেহসাত্ম্যঃ ক্লেশসহঃ কালে নাত্যুষ্ণশীতলে |
অচ্ছমেব পিবেত্ স্নেহমচ্ছপানং হি পূজিতম্ ||২১||
View original
स्नेहसात्म्यः क्लेशसहः काले नात्युष्णशीतले |
अच्छमेव पिबेत् स्नेहमच्छपानं हि पूजितम् ||२१||
অচ্ছপানবিষযমুদ্দিশন্নাহ- স্নেহসাত্ম্য ইত্যাদি| ক্লেশসহঃ শক্তিলক্ষণবলযুক্তঃ, অতো বিপরীতং ভক্তেন সহ পাযযেত্| অচ্ছঃ কেবলস্নেহঃ| কেচিত্ ‘কালে নাত্যুষ্ণশীতলে’ ইত্যস্য স্থানে ‘দৃঢং কালে চ শীতলে’ ইতি পঠন্তি, ব্যাখ্যানযন্তি চ- দৃঢমিত্যুপচযলক্ষণবলযুক্তং, কালে চ শীতল ইতি চকারো বাতকফযোঃ শৈত্যাদ্দোষে চ শীতল ইতি গমযতি||২১||
Adhikarana 16 (22) · Śloka 22
শীতকালে দিবা স্নেহমুষ্ণকালে পিবেন্নিশি |
বাতপিত্তাধিকো রাত্রৌ বাতশ্লেষ্মাধিকো দিবা ||২২||
View original
शीतकाले दिवा स्नेहमुष्णकाले पिबेन्निशि |
वातपित्ताधिको रात्रौ वातश्लेष्माधिको दिवा ||२२||
উক্তমেবাচ্ছপানং দোষকালভেদেন বিবৃণ্বন্নাহ- শীতকাল ইত্যাদি| নিশীতি সংশমনমেব, ‘উষ্ণকালে চ সহ ভক্তেন পাযযেত্’ ইতি বচনাত্| বাতপিত্তাধিক ইতি বাতপিত্তে অধিকে যস্য সঃ বাতপিত্তাধিকঃ| বাতপিত্তযোর্ব্যস্তসমস্তযোর্গ্রহণাদ্বাতাধিকঃ পিত্তাধিকো বাতপিত্তাধিকশ্চ রাত্রৌ সংশমনং স্নেহং পিবেত্| তত্রাপি বাতপিত্তাখ্যসংসর্গস্যাপরসংসর্গোপলক্ষণত্বাত্ পিত্তশ্লেষ্মাধিকোঽপি রাত্রৌ পিবেদিতি গম্যতে| বাতশ্লেষ্মাধিক ইতি বাতশ্লেষ্মা চ শ্লেষ্মা চ বাতশ্লেষ্মাণৌ, সমাসেঽন্তঃপদলোপঃ, তাবধিকৌ যস্য স বাতশ্লেষ্মাধিকঃ| এতেন বাতকফাধিকঃ কফাধিকশ্চ দিবা স্নেহং পিবেদিতি গম্যতে| অত্রার্থে চ বৃদ্ধবাগ্ভটঃ- “সর্বং সর্বস্য চ স্নেহং যুঞ্জ্যাদ্ভাস্বতি নির্মলে| ঋতৌ সাধারণে দোষসাম্যেঽনিলকফে কফে|| দিবা নিশ্যনিলে পিত্তে সংসর্গে পিত্তবত্যতি” (অ. সং. সূ. ২৫) ইতি| যদা চ গ্রীষ্মে বাতকফোত্থো রোগঃ স্নেহসাধ্যস্তদা কালমাশ্রিত্য তদনুবিহিতঃ স্নেহো নিশি প্রযোজ্যো দোষাদীন্ বীক্ষ্য চ, তথা চ বৃদ্ধবাগ্ভটঃ- “ত্বরমাণে তু শীতেঽপি দিবা তৈলং প্রযোজযেত্| উষ্ণেঽপি রাত্রৌ সর্পিস্তু দোষাদীন্ বীক্ষ্য চান্যথা” (অ. সং. সূ. ২৫) ইতি||২২||
Adhikarana 17 (23) · Śloka 23
বাতপিত্তাধিকস্যোষ্ণে তৃণ্মূর্চ্ছোন্মাদকারকঃ |
শীতে বাতকফার্তস্য গৌরবারুচিশূলকৃত্ ||২৩||
View original
वातपित्ताधिकस्योष्णे तृण्मूर्च्छोन्मादकारकः |
शीते वातकफार्तस्य गौरवारुचिशूलकृत् ||२३||
উক্তাদন্যথাকরণে উভযত্রাপি দোষং দর্শযন্নাহ- বাতপিত্তাধিকস্যেত্যাদি||২৩||
Adhikarana 18 (24) · Śloka 25
স্নেহপীতস্য চেত্তৃষ্ণা পিবেদুষ্ণোদকং নরঃ |
এবং চানুপশাম্যন্ত্যাং স্নেহমুষ্ণাম্বুনা বমেত্ ||২৪||
দিহ্যাচ্ছীতৈঃ শিরঃ শীতং তোযং চাপ্যবগাহযেত্ |২৫|
View original
स्नेहपीतस्य चेत्तृष्णा पिबेदुष्णोदकं नरः |
एवं चानुपशाम्यन्त्यां स्नेहमुष्णाम्बुना वमेत् ||२४||
दिह्याच्छीतैः शिरः शीतं तोयं चाप्यवगाहयेत् |२५|
তত্র তৃষ্ণাপ্রতীকারমুদ্দিশন্নাহ- স্নেহপীতস্যেত্যাদি| দিহ্যাত্ লিম্পেত্||২৪||-
Adhikarana 19 (25-29) · Śloka 30
যা মাত্রা পরিজীর্যেত চতুর্ভাগগতেঽহনি ||২৫||
সা মাত্রা দীপযত্যগ্নিমল্পদোষে চ পূজিতা |
যা মাত্রা পরিজীর্যেত তথাঽর্ধদিবসে গতে ||২৬||
সা বৃষ্যা বৃংহণী যা চ মধ্যদোষে চ পূজিতা |
যা মাত্রা পরিজীর্যেত চতুর্ভাগাবশেষিতে ||২৭||
স্নেহনীযা চ সা মাত্রা বহুদোষে চ পূজিতা |
যা মাত্রা পরিজীর্যেত্তু তথা পরিণতেঽহনি ||২৮||
গ্লানিমূর্চ্ছামদান্ হিত্বা সা মাত্রা পূজিতা ভবেত্ অহোরাত্রাদসন্দুষ্টা যা মাত্রা পরীজীর্যতি ||২৯||
সা তু কুষ্ঠবিষোন্মাদগ্রহাপস্মারনাশিনী |৩০|
View original
या मात्रा परिजीर्येत चतुर्भागगतेऽहनि ||२५||
सा मात्रा दीपयत्यग्निमल्पदोषे च पूजिता |
या मात्रा परिजीर्येत तथाऽर्धदिवसे गते ||२६||
सा वृष्या बृंहणी या च मध्यदोषे च पूजिता |
या मात्रा परिजीर्येत चतुर्भागावशेषिते ||२७||
स्नेहनीया च सा मात्रा बहुदोषे च पूजिता |
या मात्रा परिजीर्येत्तु तथा परिणतेऽहनि ||२८||
ग्लानिमूर्च्छामदान् हित्वा सा मात्रा पूजिता भवेत् अहोरात्रादसन्दुष्टा या मात्रा परीजीर्यति ||२९||
सा तु कुष्ठविषोन्मादग्रहापस्मारनाशिनी |३०|
গ্লান্যাদিকং হিত্বা যা পরিজীর্যেদিতি বচনাত্ স্নেহবাহুল্যেন পরিপাককালে গ্লান্যাদযো ভবন্তীত্যবগম্যতে| পূজিতা ভবেদিতি বচনাত্ ‘স্নেহনে’ ইত্যাহরণীযম্||২৫-২৯||-
Adhikarana 20 (30-33) · Śloka 33
যথাগ্নি প্রথমাং মাত্রাং পাযযেত বিচক্ষণঃ ||৩০||
পীতো হ্যতিবহুঃ স্নেহো জনযেত্ প্রাণসংশযম্ |
মিথ্যাচারাদ্বহুত্বাদ্বা যস্য স্নেহো ন জীর্যতি ||৩১||
বিষ্টভ্য চাপি জীর্যেত্তং বারিণোষ্ণেন বামযেত্ |
ততঃ স্নেহং পুনর্দদ্যাল্লঘুকোষ্ঠায দেহিনে |
জীর্ণাজীর্ণবিশঙ্কাযাং স্নেহস্যোষ্ণোদকং পিবেত্ ||৩২||
তেনোদ্গারো ভবেচ্ছুদ্ধো ভক্তং প্রতি রুচিস্তথা |
স্যুঃ পচ্যমানে তৃড্দাহভ্রমসাদারতিক্লমাঃ ||৩৩||
View original
यथाग्नि प्रथमां मात्रां पाययेत विचक्षणः ||३०||
पीतो ह्यतिबहुः स्नेहो जनयेत् प्राणसंशयम् |
मिथ्याचाराद्बहुत्वाद्वा यस्य स्नेहो न जीर्यति ||३१||
विष्टभ्य चापि जीर्येत्तं वारिणोष्णेन वामयेत् |
ततः स्नेहं पुनर्दद्याल्लघुकोष्ठाय देहिने |
जीर्णाजीर्णविशङ्कायां स्नेहस्योष्णोदकं पिबेत् ||३२||
तेनोद्गारो भवेच्छुद्धो भक्तं प्रति रुचिस्तथा |
स्युः पच्यमाने तृड्दाहभ्रमसादारतिक्लमाः ||३३||
তাস্বাদ্যামেব মাত্রামদোষত্বেন নির্দিশতি- যথাগ্নীত্যাদি| অগ্ন্যনতিক্রমেণ একযামপরিণামাং মাত্রাং পাতুং প্রযোজযেত্, পলমিত্যর্থঃ| কুতঃ পুনর্নেতরা ইত্যাহ- পীতো হ্যতিবহুরিত্যাদি| মিথ্যাচারাত্ শীতসেবাদিলক্ষণাত্| মিথ্যাচারাদিজস্য স্নেহাজীর্ণস্য প্রতীকার উক্তঃ| স্নেহসাধ্যে ব্যাধৌ পুনরপ্যস্য স্নেহো দেয ইত্যাহ- ততঃ স্নেহমিতি| জীর্ণাজীর্ণবিশঙ্কাযাং পরিণতাপরিণতশঙ্কাযাম্| অস্যাগ্রে পচ্যমানলক্ষণং কেচিত্পঠন্তি- স্যুরিত্যাদি| স্যুঃ ভবেযুঃ| এতচ্চানার্ষশ্লোকার্ধমিতি জেজ্জটাচার্যোক্তত্বান্ন পঠনীযম্||৩০-৩৩||
Adhikarana 21 (34-35) · Śloka 35
পরিষিচ্যাদ্ভিরুষ্ণাভির্জীর্ণস্নেহং ততো নরম্ |
যবাগূং পাযযেচ্চোষ্ণাং কামং ক্লিন্নাল্পতণ্ডুলাম্ ||৩৪||
দেযৌ যূষরসৌ বাঽপি সুগন্ধী স্নেহবর্জিতৌ |
কৃতৌ বাঽত্যল্পসর্পিষ্কৌ বিলেপী বা বিধীযতে ||৩৫||
View original
परिषिच्याद्भिरुष्णाभिर्जीर्णस्नेहं ततो नरम् |
यवागूं पाययेच्चोष्णां कामं क्लिन्नाल्पतण्डुलाम् ||३४||
देयौ यूषरसौ वाऽपि सुगन्धी स्नेहवर्जितौ |
कृतौ वाऽत्यल्पसर्पिष्कौ विलेपी वा विधीयते ||३५||
স্নেহবর্জিতাবিত্যনেনাকৃতাবিতি গম্যতে| কৃতৌ স্নেহাদিসংস্কৃতৌ| যূষরসাবিতি অত্র যূষঃ কফে তৈলপানে চ দেযঃ, রসো বাতে ঘৃতপানে চ, বিলেপী চ পুনর্বিলেপীসাত্ম্যায মধ্যমাগ্নযে দেযা||৩৪-৩৫||
Adhikarana 22 (36) · Śloka 36
পিবেত্ত্র্যহং চতুরহং পঞ্চাহং ষডহং তথা |
সপ্তরাত্রাত্ পরং স্নেহঃ সাত্ম্যীভবতি সেবিতঃ ||৩৬||
View original
पिबेत्त्र्यहं चतुरहं पञ्चाहं षडहं तथा |
सप्तरात्रात् परं स्नेहः सात्म्यीभवति सेवितः ||३६||
তস্য স্নেহপানস্য কোষ্ঠাপেক্ষযা কালনিযমং দর্শযন্নাহ- পিবেদিত্যাদি| তত্র ত্র্যহং মৃদুকোষ্ঠাপেক্ষযা, মধ্যমকোষ্ঠাপেক্ষযা তু চতুঃ- পঞ্চষডহানি, ক্রূরকোষ্ঠাপেক্ষযা তু সপ্তরাত্রম্| অন্যে তু মৃদুতমমৃদুতরমৃদুকোষ্ঠাপেক্ষযা একদ্বিত্র্যহম্, এবং মধ্যমকোষ্ঠতরতমমধ্যাত্ চতুঃপঞ্চষডহানি, ক্রূরক্রূরতরক্রূরতমকোষ্ঠাপেক্ষযা সপ্তাষ্টনবাপি দিবসানীতি| সাত্ম্যীভবতীতি আত্মনা সহ বর্তত ইতি সাত্ম্যম্, অসাত্ম্যং যত্র সাত্ম্যং ভবতি সাত্ম্যীভবতি; আত্মশব্দোঽত্র দেহপর্যাযঃ, অযমর্থঃ- আত্মনি কাযে যদ্বর্ততে, যদুপশেতে, ন বিকারায ভবতি, সুখং চ করোতীত্যর্থঃ, তত্ সাত্ম্যীভবতীত্যুচ্যতে; এতেন স্নেহকার্যমুত্ক্লেশনাদিকং ন করোতি আহারবচ্চ সাত্ম্যীভবতি, অত এব সেবিত ইত্যুক্তং; বিষমপি স্বল্পং প্রতিদিনমুপযুজ্যমানং ন মারণাত্মকং ভবতি| তচ্চ সাত্ম্যীভবনং বাতপ্রকৃতাবূর্ধ্বাঙ্গমারুতে বোদ্ধব্যং, বাতকফপ্রকৃতৌ পুনরনুত্ক্লেশ এব||৩৬||
Adhikarana 23 (37) · Śloka 37
সুকুমারং কৃশং বৃদ্ধং শিশুং স্নেহদ্বিষং তথা |
তৃষ্ণার্তমুষ্ণকালে চ সহ ভক্তেন পাযযেত্ ||৩৭||
View original
सुकुमारं कृशं वृद्धं शिशुं स्नेहद्विषं तथा |
तृष्णार्तमुष्णकाले च सह भक्तेन पाययेत् ||३७||
ইদানীমবচারণামাবস্থিকে নিত্যগে চ কালে নির্দিশন্নাহ- সুকুমারমিত্যাদি| ভক্তশব্দেন সর্বে বিলেপ্যাদযোঽভিপ্রেতাঃ| তচ্চ পানং দ্বিবিধম্- অশনাত্ পৃথক্, অশনব্যামিশ্রং বা; তত্র যত্ পৃথক্ তদচ্ছপানমেব||৩৭||
Adhikarana 24 (38-44) · Śloka 44
পিপ্পল্যো লবণং স্নেহাশ্চত্বারো দধিমস্তুকঃ |
পীতমৈকধ্যমেতদ্ধি সদ্যঃস্নেহনমুচ্যতে ||৩৮||
ভৃষ্টা মাংসরসে স্নিগ্ধা যবাগূঃ সূপকল্পিতা |
প্রক্ষুদ্রা পীযমানা তু সদ্যঃস্নেহনমুচ্যতে ||৩৯||
সর্পিষ্মতী পযঃসিদ্ধা যবাগূঃ স্বল্পতণ্ডুলা |
সুখোষ্ণা সেব্যমানা তু সদ্যঃস্নেহনমুচ্যতে ||৪০||
পিপ্পল্যো লবণং সর্পিস্তিলপিষ্টং বরাহজা |
বসা চ পীতমৈকধ্যং সদ্যঃস্নেহনমুচ্যতে ||৪১||
শর্করাচূর্ণসংসৃষ্টে দোহনস্থে ঘৃতে তু গাম্ |
দুগ্ধ্বা ক্ষীরং পিবেদ্রূক্ষঃ সদ্যঃস্নেহনমুচ্যতে ||৪২||
যবকোলকুলত্থানাং ক্বাথো মাগধিকান্বিতঃ |
পযো দধি সুরা চেতি ঘৃতমপ্যষ্টমং ভবেত্ ||৪৩||
সিদ্ধমেতৈর্ঘৃতং পীতং সদ্যঃস্নেহনমুত্তমম্ |
রাজ্ঞে রাজসমেভ্যো বা দেযমেতদ্ধৃতোত্তমম্ ||৪৪||
View original
पिप्पल्यो लवणं स्नेहाश्चत्वारो दधिमस्तुकः |
पीतमैकध्यमेतद्धि सद्यःस्नेहनमुच्यते ||३८||
भृष्टा मांसरसे स्निग्धा यवागूः सूपकल्पिता |
प्रक्षुद्रा पीयमाना तु सद्यःस्नेहनमुच्यते ||३९||
सर्पिष्मती पयःसिद्धा यवागूः स्वल्पतण्डुला |
सुखोष्णा सेव्यमाना तु सद्यःस्नेहनमुच्यते ||४०||
पिप्पल्यो लवणं सर्पिस्तिलपिष्टं वराहजा |
वसा च पीतमैकध्यं सद्यःस्नेहनमुच्यते ||४१||
शर्कराचूर्णसंसृष्टे दोहनस्थे घृते तु गाम् |
दुग्ध्वा क्षीरं पिबेद्रूक्षः सद्यःस्नेहनमुच्यते ||४२||
यवकोलकुलत्थानां क्वाथो मागधिकान्वितः |
पयो दधि सुरा चेति घृतमप्यष्टमं भवेत् ||४३||
सिद्धमेतैर्घृतं पीतं सद्यःस्नेहनमुत्तमम् |
राज्ञे राजसमेभ्यो वा देयमेतद्धृतोत्तमम् ||४४||
তত্রাবচারণাং প্রযোগেণ দর্শযন্নাহ- পিপ্পল্য ইত্যাদি| লবণমত্র প্রধানকল্পনযা সৈন্ধবম্| স্নেহাশ্চত্বারঃ সর্পিস্তৈলবসামজ্জানঃ| দধিমস্তুকো দধিসরঃ| পিপ্পলীলবণযোর্যাবত্যা মাত্রযা নাতিকটুত্বং নাতিলবণত্বং চ তাবতী মাত্রা| প্রক্ষুদ্রা ক্ষুদ্রাবগাঢা; ক্ষুদ্রং ফাণিতং ‘কাকবী’ ইতি লোকে| ঘৃতে ত্বিতি তুশব্দঃ পুনরর্থে| মাগধিকাযা অযং মাগধিকোঽত্র কল্কঃ, দ্রবাঃ ষট্, স্নেহসমা পিপ্পলী সপ্তমী, ঘৃতমষ্টমম্| এতত্সিদ্ধং নৃপাদিভিঃ সুখোচিতৈরন্নাত্ প্রাঙ্মধ্যেঽন্তে বা পেযম্| সদ্যঃস্নেহনমিতি তদহরেব||৩৮-৪৪||
Adhikarana 25 (45) · Śloka 45
বলহীনেষু বৃদ্ধেষু মৃদ্বগ্নিস্ত্রীহতাত্মসু |
অল্পদোষেষু যোজ্যাঃ স্যুর্যে যোগাঃ সম্যগীরিতাঃ ||৪৫||
View original
बलहीनेषु वृद्धेषु मृद्वग्निस्त्रीहतात्मसु |
अल्पदोषेषु योज्याः स्युर्ये योगाः सम्यगीरिताः ||४५||
এষাং যোগানাং বিষযং দর্শযন্নাহ- বলহীনেষ্বিত্যাদি| যে যোগাঃ পূর্বং কথিতাঃ||৪৫||
Adhikarana 26 (46-50) · Śloka 51
বিবর্জযেত্ স্নেহপানমজীর্ণী তরুণজ্বরী |
দুর্বলোঽরোচকী স্থূলো মূর্চ্ছার্তো মদপীডিতঃ ||৪৬||
ছর্দ্যর্দিতঃ পিপাসার্তঃ শ্রান্তঃ পানক্লমান্বিতঃ |
দত্তবস্তির্বিরিক্তশ্চ বান্তো যশ্চাপি মানবঃ ||৪৭||
অকালে দুর্দিনে চৈব ন চ স্নেহং পিবেন্নরঃ |
অকালে চ প্রসূতা স্ত্রী স্নেহপানং বিবর্জযেত্ ||৪৮||
স্নেহপানাদ্ভবন্ত্যেষাং নৄণাং নানাবিধা গদাঃ |
গদা বা কৃচ্ছ্রতাং যান্তি ন সিধ্যন্ত্যথবা পুনঃ ||৪৯||
গর্ভাশযেঽবশেষাঃ স্যূ রক্তক্লেদমলাস্ততঃ |
স্নেহং জহ্যান্নিষেবেত পাচনং রূক্ষমেব চ ||৫০||
দশরাত্রাত্ততঃ স্নেহং যথাবদবচারযেত্ |৫১|
View original
विवर्जयेत् स्नेहपानमजीर्णी तरुणज्वरी |
दुर्बलोऽरोचकी स्थूलो मूर्च्छार्तो मदपीडितः ||४६||
छर्द्यर्दितः पिपासार्तः श्रान्तः पानक्लमान्वितः |
दत्तबस्तिर्विरिक्तश्च वान्तो यश्चापि मानवः ||४७||
अकाले दुर्दिने चैव न च स्नेहं पिबेन्नरः |
अकाले च प्रसूता स्त्री स्नेहपानं विवर्जयेत् ||४८||
स्नेहपानाद्भवन्त्येषां नॄणां नानाविधा गदाः |
गदा वा कृच्छ्रतां यान्ति न सिध्यन्त्यथवा पुनः ||४९||
गर्भाशयेऽवशेषाः स्यू रक्तक्लेदमलास्ततः |
स्नेहं जह्यान्निषेवेत पाचनं रूक्षमेव च ||५०||
दशरात्रात्ततः स्नेहं यथावदवचारयेत् |५१|
বিবর্জযেদিত্যাদি| অজীর্ণেঽজীর্ণমেব চ পচন্নগ্নিঃ স্তোকং স্নেহং পক্ষ্যতি, তরুণজ্বরেঽপ্যেবং স্রোতোরোধশ্চ, দুর্বলে অঙ্গগ্লান্যাদযঃ, অরোচকেঽরোচকাভিবৃদ্ধিঃ, স্থূলস্যাতিস্থৌল্যং স্রোতোরোধশ্চ, মূর্চ্ছার্তানাং মূর্চ্ছাভিবৃদ্ধিঃ, দত্তবস্তিবিরিক্তবান্তানাং সদ্যঃশুদ্ধত্বেনাগ্নিমান্দ্যতৃষ্ণাক্লমাদ্যতিযোগাশ্চ, অকালে প্রসূতাযা গর্ভাশযেঽবশেষা রক্তক্লেদমলাঃ স্নেহকোপিতা অসাধ্যং রোগং কুর্যুঃ| অন্যে ‘তরুণজ্বরী’ ইত্যত্র ‘চোদরী জ্বরী’ ইতি পঠিত্বা ব্যাখ্যানযন্তি- উদরিণাং স্নেহপানং প্রাগবস্থাযামুদরচিকিত্সিতে প্রোক্তং, ছিদ্রোদকোদরিণঃ পুনরত্র নিষেধঃ| জ্বরিণস্তরুণাবস্থাযাং প্রতিষেধঃ| অমুমেব নিষেধং দর্শযন্নাহ- স্নেহপানাদিত্যাদি||৪৬-৫০||-
Adhikarana 27 (51-52) · Śloka 52
পুরীষং গ্রথিতং রূক্ষং কৃচ্ছ্রাদন্নং বিপচ্যতে ||৫১||
উরো বিদহতে বাযুঃ কোষ্ঠাদুপরি ধাবতি |
দুর্বর্ণো দুর্বলশ্চৈব রূক্ষো ভবতি মানবঃ ||৫২||
View original
पुरीषं ग्रथितं रूक्षं कृच्छ्रादन्नं विपच्यते ||५१||
उरो विदहते वायुः कोष्ठादुपरि धावति |
दुर्वर्णो दुर्बलश्चैव रूक्षो भवति मानवः ||५२||
স্নেহস্য বিহিতস্য দানায রূক্ষলক্ষণমাহ- পুরীষমিত্যাদি| উপরি ধাবতি ঊর্ধ্বং গচ্ছতীত্যর্থঃ| ইদং কৃতপাচনস্য রূক্ষস্য লক্ষণমুক্তমিতি বৃদ্ধবৈদ্যাঃ||৫১-৫২||
Adhikarana 28 (53) · Śloka 53
সুস্নিগ্ধা ত্বগ্বিট্শৈথিল্যং দীপ্তোঽগ্নির্মৃদুগাত্রতা |
গ্লানির্লাঘবমঙ্গানামধস্তাত্ স্নেহদর্শনম্ |
সম্যক্স্নিগ্ধস্য লিঙ্গানি স্নেহোদ্বেগস্তথৈব চ ||৫৩||
View original
सुस्निग्धा त्वग्विट्शैथिल्यं दीप्तोऽग्निर्मृदुगात्रता |
ग्लानिर्लाघवमङ्गानामधस्तात् स्नेहदर्शनम् |
सम्यक्स्निग्धस्य लिङ्गानि स्नेहोद्वेगस्तथैव च ||५३||
সুস্নিগ্ধস্য লক্ষণমাহ- সুস্নিগ্ধেত্যাদি| স্নেহোদ্বেগ ইতি স্নেহারুচিঃ উদকাদিতৃপ্তস্যেবোদকাদ্যরুচিঃ| অন্যে তু ‘গ্লানিঃ সদনমঙ্গানামধস্তাত্ স্নেহদর্শনম্| সম্যক্স্নিগ্ধস্য লিঙ্গানি স্নেহোদ্বেগস্তথৈব বা’|| ইতি পঠন্তি||৫৩||
Adhikarana 29 (54) · Śloka 54
ভক্তদ্বেষো মুখস্রাবো গুদদাহঃ প্রবাহিকা |
পুরীষাতিপ্রবৃত্তিশ্চ ভৃশস্নিগ্ধস্য লক্ষণম্ ||৫৪||
View original
भक्तद्वेषो मुखस्रावो गुददाहः प्रवाहिका |
पुरीषातिप्रवृत्तिश्च भृशस्निग्धस्य लक्षणम् ||५४||
প্রবাহিকা অতিসারভেদঃ| কেচিত্ অস্নিগ্ধাতিস্নিগ্ধলক্ষণযোর্মধ্যে জীর্ণাজীর্ণস্নেহলক্ষণমধীযতে- “গ্লানিঃ সদনমঙ্গানামধস্তাত্ স্নেহদর্শনম্| স্নেহে জীর্যতি লিঙ্গানি জীর্ণস্তৈঃ শান্তিমাগতৈঃ” ইতি| তৈর্গ্লান্যাদিভিঃ শান্তিমাগতৈঃ উপশমং গতৈঃ স্নেহো জীর্ণ ইতি জ্ঞাযতে ইতি||৫৪||
Adhikarana 30 (55) · Śloka 55
রূক্ষস্য স্নেহনং স্নেহৈরতিস্নিগ্ধস্য রূক্ষণম্ |
শ্যামাককোরদূষান্নতক্রপিণ্যাকশক্তুভিঃ ||৫৫||
View original
रूक्षस्य स्नेहनं स्नेहैरतिस्निग्धस्य रूक्षणम् |
श्यामाककोरदूषान्नतक्रपिण्याकशक्तुभिः ||५५||
তত্রাস্নিগ্ধাতিস্নিগ্ধযোঃ প্রতীকারং দর্শযন্নাহ- রূক্ষস্যেত্যাদি||৫৫||
Adhikarana 31 (56) · Śloka 56
দীপ্তান্তরগ্নিঃ পরিশুদ্ধকোষ্ঠঃ প্রত্যগ্রধাতুর্বলবর্ণযুক্তঃ |
দৃঢেন্দ্রিযো মন্দজরঃ শতাযুঃ স্নেহোপসেবী পুরুষো ভবেত্তু ||৫৬||
View original
दीप्तान्तरग्निः परिशुद्धकोष्ठः प्रत्यग्रधातुर्बलवर्णयुक्तः |
दृढेन्द्रियो मन्दजरः शतायुः स्नेहोपसेवी पुरुषो भवेत्तु ||५६||
ইদানীং স্বস্থবিষযে স্নেহকর্মফলং দর্শযন্নাহ- দীপ্তেত্যাদি| অন্তরগ্নিঃ জঠরাগ্নিঃ| পরিশুদ্ধকোষ্ঠঃ নির্দোষোদরঃ| প্রত্যগ্রা নবাঃ| দৃঢানি স্বকার্যকরণক্ষমানীন্দ্রিযাণি যস্য সঃ| স্নেহোপসেবী যো নর আভীক্ষ্ণ্যেন স্নেহং সেবতে সঃ| অন্যে তু অনেন শ্লোকেন সংশমনীযপ্রাগ্ভক্তসেবিতস্নেহগুণানাহুঃ||৫৬||
Adhikarana 32 (57) · Śloka 57
স্নেহো হিতো দুর্বলবহ্নিদেহসন্ধুক্ষণে ব্যাধিনিপীডিতস্য |
বলান্বিতৌ ভোজনদোষজাতৈঃ প্রমর্দিতুং তৌ সহসা ন সাধ্যৌ ||৫৭||
View original
स्नेहो हितो दुर्बलवह्निदेहसन्धुक्षणे व्याधिनिपीडितस्य |
बलान्वितौ भोजनदोषजातैः प्रमर्दितुं तौ सहसा न साध्यौ ||५७||
ব্যাধিপরিমোক্ষণমপি স্নেহফলং দর্শযন্নাহ- স্নেহ ইত্যাদি| স্নেহো হিতো ভবতি; কস্য? ব্যাধিনিপীডিতস্য পুরুষস্য, কস্মিন্ বিষযে? দুর্বলদেহবহ্নিসন্ধুক্ষণে| স্নেহকৃতযোস্তযোর্বহ্নিদেহবলযোঃ ফলং দর্শযন্নাহ- বলান্বিতাবিত্যাদি| তৌ বহ্নিদেহৌ| কিংবিশিষ্টৌ? স্নেহপানবলান্বিতৌ| ন সাধ্যৌ ন শক্যৌ| কিং কর্তুং? প্রমর্দযিতুম্| কৈঃ স্ফোটযিতুং ন শক্যাবিত্যাহ- ভোজনদোষজাতৈঃ, দুর্ভক্তস্বভাবগুণভূতদোষসমূহৈরিত্যর্থঃ| দুর্বলস্য দেহসন্ধুক্ষণে বহ্নিসন্ধুক্ষণে চ; দেহসন্ধুক্ষণং শক্ত্যুপচযলক্ষণবলসন্দীপনং পুষ্ট্যাবহমিত্যর্থঃ, অগ্নিপক্ষে সন্ধুক্ষণং সুবোধম্||৫৭||
Adhikarana puShpikA · Śloka 31
ইতি সুশ্রুতসংহিতাযাং চিকিত্সাস্থানে স্নেহোপযৌগিকচিকিত্সিতং নামৈকত্রিংশত্তমোঽধ্যাযঃ ||৩১||
View original
इति सुश्रुतसंहितायां चिकित्सास्थाने स्नेहोपयौगिकचिकित्सितं नामैकत्रिंशत्तमोऽध्यायः ||३१||
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে একত্রিংশত্তমোঽধ্যাযঃ||৩১||