Adhikarana 1 (1-2) · Śloka 2
অথাতো বমনবিরেচনসাধ্যোপদ্রবচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो वमनविरेचनसाध्योपद्रवचिकित्सितं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
উপদ্রবো রোগঃ| চিকিত্সিতং চাত্র বমনবিরেচনরূপমেব, বমনবিরেচনসাধ্যত্বাদুপদ্রবাণাম্||১-২||
Adhikarana 2 (3) · Śloka 3
দোষাঃ ক্ষীণা বৃংহযিতব্যাঃ, কুপিতাঃ প্রশমযিতব্যাঃ, বৃদ্ধা নির্হর্তব্যাঃ, সমাঃ পরিপাল্যা ইতি সিদ্ধান্তঃ ||৩||
दोषाः क्षीणा बृंहयितव्याः, कुपिताः प्रशमयितव्याः, वृद्धा निर्हर्तव्याः, समाः परिपाल्या इति सिद्धान्तः ||३||
🔊 Audio coming soon
ন খলু দোষাণাং সর্বাবস্থাসু বমনবিরেচনে, কিং তর্হি কস্যাঞ্চিদেবেতি প্রতিপাদযন্নাহ- দোষা ইত্যাদি| ক্ষীণাঃ ক্ষযলক্ষণৈর্জ্ঞাতাঃ| কুপিতা অল্পতযা কোপমাপন্নাঃ সংশমনবিধানেনৈব প্রশমযিতব্যাঃ, প্রকর্ষেণ বৃদ্ধাঃ স্বস্থানাচ্চলিতাঃ সংশোধনবিধিনা নির্হর্তব্যাঃ| জেজ্জটাচার্যস্তু ‘প্রবৃদ্ধাঃ’ ইতি পঠতি, বৃদ্ধির্হি দ্বিবিধা- চযলক্ষণা প্রকোপলক্ষণা চ; তত্র সংহতিরূপাবৃদ্ধিঃ চযঃ, বিলযনরূপা বৃদ্ধিঃ প্রকোপঃ; তযোর্বিলযনরূপবৃদ্ধ্যা বৃদ্ধা দোষাঃ সংশোধনেন নির্হর্তব্যাঃ| কুপিতা ইতি কোপোঽত্র দ্বিবিধঃ- চযপূর্বকোঽচযপূর্বকশ্চ; তত্র চযপূর্বকং কোপমাগতাঃ সংশোধনবিধানেনৈব শমযিতব্যাঃ| স্বস্থানস্থাঃ রক্ষ্যা ইতি সিদ্ধান্তঃ| সমাঃ স্বাস্থ্যকরাঃ স্বস্থবৃত্তিবিধানেনৈব পরিপাল্যা ইতি| ক্ষীণবৃদ্ধকুপিতসংশমনং সমপরিপালনং চ প্রসঙ্গতন্ত্রযুক্তিবশাদত্রোক্তম্||৩||
Adhikarana 3 (4-5) · Śloka 5
প্রাধান্যেন বমনবিরেচনে বর্তেতে নির্হরণে দোষাণাম্ | তস্মাত্তযোর্বিধানমুচ্যমানমুপধারয ||৪|| অথাতুরং স্নিগ্ধং স্বিন্নমভিষ্যন্দিভিরাহারৈরনববদ্ধদোষমবলোক্য শ্বো বমনং পাযযিতাঽস্মীতি সম্ভোজযেত্তীক্ষ্ণাগ্নিং বলবন্তং বহুদোষং মহাব্যাধিপরীতং বমনসাত্ম্যং চ ||৫||
प्राधान्येन वमनविरेचने वर्तेते निर्हरणे दोषाणाम् | तस्मात्तयोर्विधानमुच्यमानमुपधारय ||४|| अथातुरं स्निग्धं स्विन्नमभिष्यन्दिभिराहारैरनवबद्धदोषमवलोक्य श्वो वमनं पाययिताऽस्मीति सम्भोजयेत्तीक्ष्णाग्निं बलवन्तं बहुदोषं महाव्याधिपरीतं वमनसात्म्यं च ||५||
🔊 Audio coming soon
পক্বাশযগতানেব বাতপিত্তকফানেকদ্বিত্রির্দত্তো বস্তিরপকর্ষতি, ধূমনস্যকবলগ্রহাদযঃ পুনরল্পাল্পতযা, ন তু বমনবিরেচনবত্ সকৃন্নাপি বাহুল্যেন, তস্মাদুক্তং- প্রাধান্যেন বমনবিরেচনে ইতি| ননু, বমনবিরেচনে কফপিত্তযোর্দোষযোর্নির্হরণে বর্তেতে, তত্কথং দোষাণামিতি? উচ্যতে- বাযোরপি স্বাশযক্ষোভলক্ষণতযা বিলীনস্য বিমার্গনির্হরণমূর্ধ্বাধোমার্গেণানুলোমনং বমনবিরেচনে কুর্বাতে, তস্মাদ্দোষাণামত্র বাহুল্যমুপপন্নম্; অন্যে তু ন্যাযভীরুতযা দোষযোরিতি পঠন্তি| শিষ্যবহুত্বেঽপি সুশ্রুতস্যৈব প্রশ্নেঽধিকৃতত্বাদুপধারযেত্যেকবচননির্দেশঃ||৪-৫||
Adhikarana 4 (6-7) · Śloka 7
ভবতি চাত্র- পেশলৈর্বিবিধৈরন্নৈর্দোষানুত্ক্লেশ্য দেহিনঃ | স্নিগ্ধস্বিন্নায বমনং দত্তং সম্যক্ প্রবর্ততে ||৬|| অথাপরেদ্যুঃ পূর্বাহ্ণে সাধারণে কালে বমনদ্রব্যকষাযকল্কচূর্ণস্নেহানামন্যতমস্য মাত্রাং পাযযিত্বা বামযেদ্যথাযোগং কোষ্ঠবিশেষমবেক্ষ্য; অসাত্ম্যবীভত্সদুর্গন্ধদুর্দর্শনানি চ বমনানি বিদধ্যাত্, অতো বিপরীতানি বিরেচনানি; তত্র সুকুমারং কৃশং বালং বৃদ্ধং ভীরুং বা বমনসাধ্যেষু বিকারেষু ক্ষীরদধিতক্রযবাগূনামন্যতমমাকণ্ঠং পাযযেত্, পীতৌষধং চ পাণিভিরগ্নিতপ্তৈঃ প্রতাপ্যমানং মুহূর্তমুপেক্ষেত; তস্য চ স্বেদপ্রাদুর্ভাবেণ শিথিলতামাপন্নং স্বেভ্যঃ স্থানেভ্যঃ প্রচলিতং কুক্ষিমনুসৃতং জানীযাত্, ততঃ প্রবৃত্তহৃল্লাসং জ্ঞাত্বা জানুমাত্রাসনোপবিষ্টমাপ্তৈর্ললাটে পৃষ্ঠে পার্শ্বযোঃ কণ্ঠে চ পাণিভিঃ সুপরিগৃহীতমঙ্গুলীগন্ধর্বহস্তোত্পলনালানামন্যতমেন কণ্ঠমভিস্পৃশন্তং বামযেত্তাবদ্যাবত্ সম্যগ্বান্তলিঙ্গানীতি ||৭||
भवति चात्र- पेशलैर्विविधैरन्नैर्दोषानुत्क्लेश्य देहिनः | स्निग्धस्विन्नाय वमनं दत्तं सम्यक् प्रवर्तते ||६|| अथापरेद्युः पूर्वाह्णे साधारणे काले वमनद्रव्यकषायकल्कचूर्णस्नेहानामन्यतमस्य मात्रां पाययित्वा वामयेद्यथायोगं कोष्ठविशेषमवेक्ष्य; असात्म्यबीभत्सदुर्गन्धदुर्दर्शनानि च वमनानि विदध्यात्, अतो विपरीतानि विरेचनानि; तत्र सुकुमारं कृशं बालं वृद्धं भीरुं वा वमनसाध्येषु विकारेषु क्षीरदधितक्रयवागूनामन्यतममाकण्ठं पाययेत्, पीतौषधं च पाणिभिरग्नितप्तैः प्रताप्यमानं मुहूर्तमुपेक्षेत; तस्य च स्वेदप्रादुर्भावेण शिथिलतामापन्नं स्वेभ्यः स्थानेभ्यः प्रचलितं कुक्षिमनुसृतं जानीयात्, ततः प्रवृत्तहृल्लासं ज्ञात्वा जानुमात्रासनोपविष्टमाप्तैर्ललाटे पृष्ठे पार्श्वयोः कण्ठे च पाणिभिः सुपरिगृहीतमङ्गुलीगन्धर्वहस्तोत्पलनालानामन्यतमेन कण्ठमभिस्पृशन्तं वामयेत्तावद्यावत् सम्यग्वान्तलिङ्गानीति ||७||
🔊 Audio coming soon
তত্র বমনস্য করণমাহ- অথেত্যাদি| সম্ভোজযেত্ সম্যক্ ভোজনং কারযেদ্ বৈদ্যঃ| কম্? আতুরং| কিং কৃত্বা? আলোক্য দৃষ্ট্বা| কিংবিশিষ্টং? স্নিগ্ধং স্বিন্নং চ| পুনঃ কিংবিশিষ্টম্? অনববদ্ধদোষম্| কৈঃ সম্ভোজযেত্? আহারৈঃ| কিংবিশিষ্টৈঃ? অভিষ্যন্দিভিঃ| কুতঃ কারণাদিত্যাহ- শ্বো বমনং পাযযিতাঽস্মীতি, ইতি হেতোঃ; যত আগামিনি অহনি অস্মি অহং পাযযিতা পাযযিষ্যামি| কিং তত্? বমনম্| ক্ব? শ্বঃ অপরেদ্যুঃ; অন্যস্মিন্নহনীতি সম্বন্ধঃ| আতুরং রোগিণম্| অভিষ্যন্দিভিরাহারৈঃ গ্রাম্যানূপৌদকমাংসপযোমাষাদিভিঃ| অনববদ্ধদোষং মুক্তস্রোতোবন্ধনত্বাত্ প্রচলিতদোষম্| ভোজনবিধিঃ কফোত্ক্লেশনার্থঃ; সম্ভোজযেত্ সমশনং কারযেত্, “পথ্যাপথ্যমিহৈকত্র ভুক্তং সমশনং স্মৃতম্” (চ. চি. ১৫) ইত্যুক্তত্বাত্| কিংবিশিষ্টমাতুরং সম্ভোজযেদিত্যাহ- তীক্ষ্ণাগ্নিং দীপ্তাগ্নিম্| বলবন্তমিতি প্রশস্তবলযুক্তোঽপি সম্ভোজনার্হঃ; যতঃ- “জগ্ধাঃ ষডধিগচ্ছন্তি বলিনো বশতাং রসাঃ” (সূ. ৪২) ইতি বচনাত্| বহুদোষঃ সম্ভোজনার্হ ইতি বহুদোষে ভোজনোত্ক্লিষ্টো দোষঃ সম্যগ্যোগেন প্রবর্ততে; অন্যথা পুনরযোগেনৈব, এবং দোষকার্যং মহাব্যাধিপরিগৃহীতেঽপি বাচ্যম্| বমনসাত্ম্যস্য তু অভিষ্যন্দিভিরাহারৈর্দোষোত্ক্লেশনম্ | তমেবার্থং সুখপাঠার্থং শ্লোকেনাপি দর্শযন্নাহ- পেশলৈরিত্যাদি| পেশলৈঃ কোমলৈরকঠিনৈঃ; অভিষ্যন্দিভিরিতি যাবত্| অথেতি মঙ্গলার্থে| অপরেদ্যুরিতি অন্যস্মিন্নহনি; ততশ্চাযং বাক্যার্থঃ- পূর্বেদ্যুঃ সম্ভোজিতমপরেদ্যুঃ অন্যস্মিন্নহনি বামযেত্, তচ্চ বমনমেকমহো বিশ্রাম্য| স্নেহাত্ স্নিগ্ধো গ্রাম্যৌদকমাংসরসৌদনেন ভুক্তোঽপরস্মিন্ প্রভাতে বমনং কুর্যাত্| তথা চ ভোজঃ- “একাহোপরতঃ স্নেহাত্ স্বিন্নঃ প্রচ্ছর্দনং পিবেত্| ভুক্ত্বা গ্রাম্যৌদকৈর্মাংসৈরানূপৈশ্চ সুসংস্কৃতৈঃ”- ইতি| পূর্বাহ্ণে অহ্নঃ পূর্বভাগে| সাধারণে কালে নাতিবর্ষশীতোষ্ণযুক্তে, অন্যে তু প্রাবৃট্শরদ্বসন্তাখ্য ইতি বিভজ্য ব্যাখ্যানযন্তি| স্নেহোঽত্র বমনদ্রব্যপক্বঃ স্নেহঃ| বমনদ্রব্যকষাযমাত্রাঃ প্রধানমধ্যমাধমভেদাত্তন্ত্রান্তরোক্তাঃ কথ্যন্তে| যদাহ চক্ষুষ্যঃ - “ক্বাথপানে নব প্রস্থা জ্যেষ্ঠা মাত্রা প্রকীর্তিতা| মধ্যমা ষণ্মিতা প্রোক্তা ত্রিপ্রস্থা চ কনীযসী”- ইতি| বমনবিষযে চ সার্ধত্রযোদশপলপ্রমাণং প্রস্থমামনন্তি বৃদ্ধাঃ| কল্কাদিমানং তু- “কল্কমোদকচূর্ণানাং কর্ষমদ্যাচ্চ লেহতঃ| কর্ষদ্বযং পলং বাঽপি বযোরোগাদ্যপেক্ষযা”- ইতি| বীভত্সো বিকৃতাকৃতিঃ; অতো বিপরীতানি বিরেচনানি সাত্ম্যাবীভত্সাদুর্দর্শনসুগন্ধীনীতি গম্যতে| কৃশসুকুমারবৃদ্ধবালভীরবো বমনসাধ্যাঃ কথং বামযিতব্যাঃ? ইত্যাহ- তত্র সুকুমারমিত্যাদি| ক্ষীরাদযো বমনদ্রব্যসংস্কৃতা জ্ঞেযাঃ; অথবা ক্ষীরাদীন্ পূর্বং পাযযেত্, অনন্তরং মাত্রযা বমনদ্রব্যমিতি| তথা চ বাগ্ভটঃ- “বৃদ্ধবালাবলক্লীবভীরূন্ রোগানুরোধতঃ| আকণ্ঠং পাযযেন্মদ্যং ক্ষীরমিক্ষুরসং রসম্|| যথাবিকারবিহিতাং মধুসৈন্ধবসংযুতাম্| কোষ্ঠং বিভজ্য ভৈষজ্যমাত্রাং মন্ত্রাভিমন্ত্রিতাম্||প্রাঙ্মুখং পাযযেত্” (বা. সূ. ১৮) ইতি| পীতৌষধস্য সম্যগ্যোগহেতুং বিধানমুপদিশন্নাহ- পীতেত্যাদি| মুহূর্তং ঘটিকাদ্বযম্| প্রচলিতং ‘দোষং’ ইতি শেষঃ| লোমহর্ষেণ তু স্বস্থানাদ্দোষপ্রচ্যবনমিতি নিশ্চযঃ| কুক্ষৌ সমাধ্মাপনাত্ কুক্ষিদেশানুগতং বিদ্যাত্| হৃল্লাসঃ থূত্করণং, ছর্দিরিত্যপরে||৬-৭||
Adhikarana 5 (8) · Śloka 8
ভবতশ্চাত্র- কফপ্রসেকং হৃদযাবিশুদ্ধিং কণ্ডূং চ দুশ্ছর্দিতলিঙ্গমাহুঃ | পিত্তাতিযোগং চ বিসঞ্জ্ঞতাং চ হৃত্কণ্ঠপীডামপি চাতিবান্তে ||৮||
भवतश्चात्र- कफप्रसेकं हृदयाविशुद्धिं कण्डूं च दुश्छर्दितलिङ्गमाहुः | पित्तातियोगं च विसञ्ज्ञतां च हृत्कण्ठपीडामपि चातिवान्ते ||८||
🔊 Audio coming soon
তত্র, অযোগাতিযোগযোরেব ব্যাপত্সম্ভাবনাযাং প্রাগ্লিঙ্গং দর্শযন্নাহ- কফপ্রসেকমিত্যাদি| পিত্তাতিযোগং পিত্তাতিপ্রবৃত্তিম্||৮||
Adhikarana 6 (9) · Śloka 9
পিত্তে কফস্যানু সুখং প্রবৃত্তে শুদ্ধেষু হৃত্কণ্ঠশিরঃসু চাপি | লঘৌ চ দেহে কফসংস্রবে চ স্থিতে সুবান্তং পুরুষং ব্যবস্যেত্ ||৯||
पित्ते कफस्यानु सुखं प्रवृत्ते शुद्धेषु हृत्कण्ठशिरःसु चापि | लघौ च देहे कफसंस्रवे च स्थिते सुवान्तं पुरुषं व्यवस्येत् ||९||
🔊 Audio coming soon
সুবান্তলক্ষণমাহ- পিত্তে কফস্যেত্যাদি| অনুশব্দঃ পশ্চাদর্থঃ| শুদ্ধেষু অগৌরবাদিলক্ষণযুক্তেষু| ব্যবস্যেত্ জানীযাত্| সম্যগ্বান্তলক্ষণং কার্যত্বেন, দুর্বান্তাতিবান্তলক্ষণং পরিহার্যত্বেন ব্যাপত্প্রতীকারার্থমুক্তম্| তত্র কৈশ্চিত্ত্রিধা শুদ্ধিরভিহিতা; যথা- লৈঙ্গিকী, বৈগিকী, মানিকী চেতি| তত্র লিঙ্গৈর্বান্তবিরিক্তসম্যক্চিহ্নৈর্জ্ঞাযত ইতি লৈঙ্গিকী, হীনমধ্যোত্তমৈর্বমনবেগৈশ্চতুঃষডষ্টভির্দশবিংশতিত্রিংশদ্ভির্বিরেচনবেগৈশ্চ জ্ঞাযত ইতি বৈগিকী, মানেন শ্লেষ্মপিত্তযোঃ প্রস্থার্ধাঢকাঢকমানেন হীনমধ্যমোত্তমেন জ্ঞাযত ইতি মানিকী| তত্র ন তাবন্মানিকী শুদ্ধিঃ, দীর্ঘহ্রস্বস্থূলকৃশদেহসংহতিপ্রকৃতিসারাদিভির্বিবিধলক্ষণশরীরাণাং প্রাণিনাং দোষধাতুমলানাং পরিমাণাভাবাত্; নাপি বৈগিকী, যতো বহুভির্বেগৈঃ কদাচিত্ কস্যচিন্ন শুদ্ধিঃ, প্রকৃতিবযোবলশরীরদোষব্যপেক্ষযা কস্যচিত্ কতিপযৈরপি বেগৈঃ শুদ্ধিরিতি; অতস্তৃতীযাং পিত্তে কফস্যেত্যাদিভির্লিঙ্গৈর্লৈঙ্গিকীং শুদ্ধিমত্রোক্তবান্ সুশ্রুতাচার্যঃ||৯||
Adhikarana 7 (10) · Śloka 10
সম্যগ্বান্তং চৈনমভিসমীক্ষ্য স্নেহনবিরেচনশমনানাং ধূমানামন্যতমং সামর্থ্যতঃ পাযযিত্বাঽঽচারিকমাদিশেত্ ||১০||
सम्यग्वान्तं चैनमभिसमीक्ष्य स्नेहनविरेचनशमनानां धूमानामन्यतमं सामर्थ्यतः पाययित्वाऽऽचारिकमादिशेत् ||१०||
🔊 Audio coming soon
সম্যগ্বান্তস্য পশ্চাত্কর্ম নির্দিশন্নাহ- সম্যগ্বান্তমিত্যাদি| বমনানন্তরং স্রোতোবিলগ্নকফহরণার্থং ধূমপানমত্রোক্তম্| বাতপ্রকৃতৌ স্নৈহিকং, কফপিত্তপ্রকৃতাবুত্ক্লিষ্টদোষে চ বৈরেচনিকং, সমদোষপ্রকৃতাবুপশমনীযং প্রাযোগিকং স্বস্থবৃত্তিকমিত্যর্থঃ | আচারিকমাদিশেদিতি চরতের্গতিভক্ষণার্থকত্বাদাহারো বিহারশ্চাচারঃ| তত্র বিহারো বহুবিধোঽপি ত্রিবিধ এব, কাযবাঙ্মনোভেদাত্; স ত্রিবিধোঽপ্যযুক্তোঽপবর্জ্যশ্চাতুরোপদ্রবীযে বক্ষ্যতে||১০||
Adhikarana 8 (11) · Śloka 11
ভবন্তি চাত্র- ততোঽপরাহ্ণে শুচিশুদ্ধদেহমুষ্ণাভিরদ্ভিঃ পরিষিক্তগাত্রম্ | কুলত্থমুদ্গাঢকিজাঙ্গলানাং যূষৈ রসৈর্বাঽপ্যুপভোজযেত্তু ||১১||
भवन्ति चात्र- ततोऽपराह्णे शुचिशुद्धदेहमुष्णाभिरद्भिः परिषिक्तगात्रम् | कुलत्थमुद्गाढकिजाङ्गलानां यूषै रसैर्वाऽप्युपभोजयेत्तु ||११||
🔊 Audio coming soon
আহারং সর্বমভিহিতং দর্শযন্নাহ- তত ইত্যাদি| বান্তস্য হি মন্দাগ্নেঃ পেযাদিক্রমযোগ্যস্য কথং যূষমাংসরসোপদেশঃ? অত্রোচ্যতে- অপিশব্দাত্ পেযাদিক্রমোঽত্রাপ্যুক্ত এব| তত্রাত্যন্তক্ষীণকফানাং পেযাদিঃ; তেষামপি বাতভূযিষ্ঠানাং দীপ্তাগ্নীনাং সাত্ম্যাপেক্ষযা মাংসরসোপযোগঃ; দোষর্তুপ্রকৃত্যপেক্ষযা কিঞ্চিত্কফযুক্তানাং যূষোপদেশঃ , নতু বিলেপীযবাগূনাম্; উক্তং চ,- “পাংশুধানে যথা বৃষ্টিঃ ক্লেদযত্যতি কর্দমম্| তথা শ্লেষ্মণি সন্দুষ্টে যবাগূঃ শ্লেষ্মবর্ধিনী”- ইতি||১১||
Adhikarana 9 (12) · Śloka 12
কাসোপলেপস্বরভেদনিদ্রাতন্দ্রাস্যদৌর্গন্ধ্যবিষোপসর্গাঃ | কফপ্রসেকগ্রহণীপ্রদোষা ন সন্তি জন্তোর্বমতঃ কদাচিত্ ||১২||
कासोपलेपस्वरभेदनिद्रातन्द्रास्यदौर्गन्ध्यविषोपसर्गाः | कफप्रसेकग्रहणीप्रदोषा न सन्ति जन्तोर्वमतः कदाचित् ||१२||
🔊 Audio coming soon
অতঃপরং বমনফলাভিধানং- কাসেত্যাদি| উপলেপঃ স্রোতঃসু মলবৃদ্ধিঃ| উপসর্গাঃ শীতলিকাদযঃ| কেচিত্ “কফপ্রসেকস্বরভেদতন্দ্রানিদ্রাস্যদৌর্গন্ধ্যকফোপসর্গাঃ| গুরুত্বকণ্ডূগ্রহণীপ্রদোষা ন সন্তি জন্তোর্বমতঃ কদাচিত্” ইতি পঠন্তি||১২||
Adhikarana 10 (13) · Śloka 13
ছিন্নে তরৌ পুষ্পফলপ্ররোহা যথা বিনাশং সহসা ব্রজন্তি | তথা হৃতে শ্লেষ্মণি শোধনেন তজ্জা বিকারাঃ প্রশমং প্রযান্তি ||১৩||
छिन्ने तरौ पुष्पफलप्ररोहा यथा विनाशं सहसा व्रजन्ति | तथा हृते श्लेष्मणि शोधनेन तज्जा विकाराः प्रशमं प्रयान्ति ||१३||
🔊 Audio coming soon
অস্যৈবার্থস্য দার্ঢ্যার্থং দৃষ্টান্তমাহ- ছিন্নে ইত্যাদি||১৩||
Adhikarana 11 (14-15) · Śloka 15
ন বামযেত্তৈমিরিকোর্ধ্ববাতগুল্মোদরপ্লীহকৃমিশ্রমার্তান্ | স্থূলক্ষতক্ষীণকৃশাতিবৃদ্ধমূত্রাতুরান্ কেবলবাতরোগান্ ||১৪|| স্বরোপঘাতাধ্যযনপ্রসক্তদুশ্ছর্দিদুঃকোষ্ঠতৃডার্তবালান্ | ঊর্ধ্বাস্রপিত্তিক্ষুধিতাতিরূক্ষগর্ভিণ্যুদাবর্তিনিরূহিতাংশ্চ ||১৫||
न वामयेत्तैमिरिकोर्ध्ववातगुल्मोदरप्लीहकृमिश्रमार्तान् | स्थूलक्षतक्षीणकृशातिवृद्धमूत्रातुरान् केवलवातरोगान् ||१४|| स्वरोपघाताध्ययनप्रसक्तदुश्छर्दिदुःकोष्ठतृडार्तबालान् | ऊर्ध्वास्रपित्तिक्षुधितातिरूक्षगर्भिण्युदावर्तिनिरूहितांश्च ||१५||
🔊 Audio coming soon
অতঃ পরমবম্যানাহ- নেত্যাদি| তৈমিরিকং তিমিররোগার্তম্| অত্র কেচিত্, “ন বামযেত্তৈমিরিকং চ গুল্মিনং ন চাপি পাণ্ডূদররোগপীডিতম্| স্থূলক্ষতক্ষীণকৃশাতিবৃদ্ধানর্শোর্দিতাক্ষেপকপীডিতাংশ্চ”- ইতি পঠন্তি| ঊর্ধ্ববাতং কেচিচ্ছ্বাসং মন্যন্তে; তন্ন, শ্বাসিনো বমনার্হত্বাত্; ঊর্ধ্ববাতস্তন্ত্রান্তরে প্রোক্ত এব- “অধঃপ্রতিহতো বাযুঃ শ্লেষ্মণা কুপিতেন চ| করোত্যনিশমুদ্গারমূর্ধ্ববাতঃ স উচ্যতে”- ইতি||১৪-১৫||
Adhikarana 12 (16) · Śloka 16
অবম্যবমনাদ্রোগাঃ কৃচ্ছ্রতাং যান্তি দেহিনাম্ | অসাধ্যতাং বা গচ্ছন্তি নৈতে বাম্যাস্ততঃ স্মৃতাঃ ||১৬||
अवम्यवमनाद्रोगाः कृच्छ्रतां यान्ति देहिनाम् | असाध्यतां वा गच्छन्ति नैते वाम्यास्ततः स्मृताः ||१६||
🔊 Audio coming soon
অবমনার্হস্য বমনে ব্যাধেঃ পরিবৃদ্ধিমসাধ্যতাং চ দর্শযন্নাহ- অবম্যেত্যাদি||১৬||
Adhikarana 13 (17) · Śloka 17
এতেঽপ্যজীর্ণব্যথিতা বাম্যা যে চ বিষাতুরাঃ | অতীব চোল্বণকফাস্তে চ স্যুর্মধুকাম্বুনা ||১৭||
एतेऽप्यजीर्णव्यथिता वाम्या ये च विषातुराः | अतीव चोल्बणकफास्ते च स्युर्मधुकाम्बुना ||१७||
🔊 Audio coming soon
এতেঽপ্যজীর্ণব্যথিতা ইত্যাদি| এষামজীর্ণপীডাযাং স্থাবরজঙ্গমকৃত্রিমবিষবাধাযাং চাত্যর্থোচ্ছ্রিতকফাশ্চৈতে বাম্যা বমনার্হাঃ| তত্রৈষামবমনে চিরাদ্বাধাঽজীর্ণে, বিষৈশ্চ সদ্য এব, উল্বণকফানাং চ গলামযাদিষু সদ্য এব বিনাশঃ| কেচিত্ ‘এতেঽপ্যজীর্ণ ...’ ইত্যাদি পাঠং ত্যক্ত্বা ‘সর্বেঽপ্যেতে বিরুদ্ধান্নবিষমার্তগরাতুরাঃ| কফপ্রবৃদ্ধে জীর্ণে চ বামযেত্’ ইতি পঠন্তি| অত্রাপি দ্রব্যবিশেষমুপদিশন্নাহ- মধুকাম্বুনেতি|- যষ্টীমধুকষাযেণ বমনাঙ্গপ্রধানেন বামযেত্| জেজ্জটঃ পুনরাহ- মধু এব মধুকং, স্বার্থে কঃ, তেন মধুকাম্বুনা| এতেন প্রতিপ্রসবো হ্যবাম্যানামপ্যুক্তঃ| “ন বামনীযস্তিমিরী দকোদরী ন গুল্মবান্ পাণ্ডুগদেন পীডিতঃ| স্থূলক্ষতক্ষীণকৃশাতিবৃদ্ধা নার্শোর্দিতাক্ষেপকপীডিতশ্চ|| রূক্ষে প্রমেহে তরুণে চ গর্ভে গচ্ছত্যথোর্ধ্বং রুধিরে চ তীব্রে| দুষ্টে চ কোষ্ঠে কৃমিভির্মনুষ্যং ন বামযেদ্বর্চসি সম্প্রবৃদ্ধে”- ইতি কেচিত্ পঠন্তি| শেষং সুগমম্||১৭||
Adhikarana 14 (18) · Śloka 18
বাম্যাস্তু- বিষশোষস্তন্যদোষমন্দাগ্ন্যুন্মাদাপস্মারশ্লীপদার্বুদবিদারিকামেদোমেহগরজ্বরারুচ্যপচ্যামাতীসারহৃদ্রোগ- চিত্তবিভ্রমবিসর্পবিদ্রধ্যজীর্ণমুখপ্রসেকহৃল্লাসশ্বাসকাসপীনসপূতীনাসকণ্ঠৌষ্ঠবক্ত্রপাক- কর্ণস্রাবাধিজিহ্বোপজিহ্বিকাগলশুণ্ডিকাধঃশোণিতপিত্তিনঃ কফস্থানজেষু বিকারেষ্বন্যে চ কফব্যাধিপরীতা ইতি ||১৮||
वाम्यास्तु- विषशोषस्तन्यदोषमन्दाग्न्युन्मादापस्मारश्लीपदार्बुदविदारिकामेदोमेहगरज्वरारुच्यपच्यामातीसारहृद्रोग- चित्तविभ्रमविसर्पविद्रध्यजीर्णमुखप्रसेकहृल्लासश्वासकासपीनसपूतीनासकण्ठौष्ठवक्त्रपाक- कर्णस्रावाधिजिह्वोपजिह्विकागलशुण्डिकाधःशोणितपित्तिनः कफस्थानजेषु विकारेष्वन्ये च कफव्याधिपरीता इति ||१८||
🔊 Audio coming soon
বাম্যা ইত্যাদি| জ্বরোঽত্র নবজ্বরো বিষমজ্বরশ্চ, ক্বচিত্ পূতীনাসাগ্রে কুষ্ঠগলগণ্ডপ্রমেহশোফাঃ পঠিতাঃ| কেচিত্ সুশ্রুতাধ্যাযিনো ন পঠন্ত্যমুং পাঠং, তেষামযমভিপ্রাযঃ- যথাস্বং তত্প্রত্যনীকব্যাধিষু বমননির্দেশান্নার্থোঽনেনেতি||১৮||
Adhikarana 15 (19) · Śloka 19
বিরেচনমপি স্নিগ্ধস্বিন্নায বান্তায চ দেযম্; অবান্তস্য হি সম্যগ্বিরীক্তস্যাপি সতোঽধঃ স্রস্তঃ শ্লেষ্মা গ্রহণীং ছাদযতি, গৌরবমাপাদযতি, প্রবাহিকাং বা জনযতি ||১৯||
विरेचनमपि स्निग्धस्विन्नाय वान्ताय च देयम्; अवान्तस्य हि सम्यग्विरीक्तस्यापि सतोऽधः स्रस्तः श्लेष्मा ग्रहणीं छादयति, गौरवमापादयति, प्रवाहिकां वा जनयति ||१९||
🔊 Audio coming soon
বিরেচনবিধানমাহ- বিরেচনমপীত্যাদি| বান্ন্তাযাপি পুনঃ স্নিগ্ধস্বিন্নায দেযং; তচ্চ পক্ষাদূর্ধ্বং, “পক্ষাদ্বিরেকো বান্তস্য” (চি. ৩৬) ইত্যুক্তত্বাত্| তত্রান্নসংসর্গেণ দিনানি ষট্, স্নেহেনাপি, ততঃ স্বিন্নং ত্র্যহমেব লঘূষ্ণভোজিনং রেচযেত্| “বান্তং ষডহসংসৃষ্টং পুনঃ সংস্নেহিতং ক্রমাত্| উষ্ণং লঘু ত্র্যহং ভুক্তং ষোডশেঽহ্নি বিরেচযেত্”- ইতি| তত্র বমনে স্নেহাদেকাহমেবোপরমো, বিরেকে ত্র্যহম্| তথা হি চরকঃ- “একাহোপরতঃ স্নেহাদ্ ভুক্ত্বা প্রচ্ছর্দনং পিবেত্| ত্রিরাত্রোপরতস্তদ্বত্ স্নেহাত্ প্রস্কন্দনং পিবেত্” (চ. সূ. ১৩) ইতি| অবান্তস্য হি বিরেকদানে কো দোষ ইত্যাহ- অবান্তস্যেত্যাদি| তস্মান্ স্নিগ্ধস্বিন্নায বান্তায দেযমিতি||১৯||
Adhikarana 16 (20) · Śloka 20
অথাতুরং শ্বো বিরেচনং পাযযিতাঽস্মীতি পূর্বাহ্ণে লঘু ভোজযেত্, ফলাম্লমুষ্ণোদকং চৈনমনুপাযযেত্ | অথাপরেঽহনি বিগতশ্লেষ্মধাতুমাতুরোপক্রমণীযাদবেক্ষ্যাতুরমথাস্মৈ ঔষধমাত্রাং পাতুং প্রযচ্ছেত্ ||২০||
अथातुरं श्वो विरेचनं पाययिताऽस्मीति पूर्वाह्णे लघु भोजयेत्, फलाम्लमुष्णोदकं चैनमनुपाययेत् | अथापरेऽहनि विगतश्लेष्मधातुमातुरोपक्रमणीयादवेक्ष्यातुरमथास्मै औषधमात्रां पातुं प्रयच्छेत् ||२०||
🔊 Audio coming soon
বিরেচনস্য প্রাক্কর্ম নির্দিশন্নাহ- অথেত্যাদি| পূর্বাহ্ণগ্রহণং সাযম্ভোজননিষেধার্থম্| ফলাম্লং বীজপূরাদি| ফলাম্লোষ্ণোদকানুপানং পিত্তবর্ধনার্থম্, অন্যে তু কফাবজযার্থমাহুঃ| বিগতশ্লেষ্মধাতুমিতি বিগতশ্লেষ্মাণমিতি কর্তব্যে ধাতুগ্রহণং শ্লেষ্মসহচরিতরসধাতূপলক্ষণং, রসাবশেষেঽপি সপ্রসেকত্বাত্ পুরুষস্য বিরেচনং ন দেযমিতি| মাত্রা পুরুষস্য বলাপেক্ষযা প্রধানমধ্যাদিভেদেন তন্ত্রান্তরোক্তা কথ্যতে- “দ্বে পলে জ্যেষ্ঠমাখ্যাতং মধ্যমং তু পলং ভবেত্| পলার্ধমুপযুঞ্জীত কনীযস্তু বিরেচনম্”- ইতি||২০||
Adhikarana 17 (21-22) · Śloka 22
তত্র মৃদুঃ, ক্রূরো, মধ্যম ইতি ত্রিবিধঃ কোষ্ঠো ভবতি | তত্র বহুপিত্তো মৃদুঃ, স দুগ্ধেনাপি বিরিচ্যতে; বহুবাতশ্লেষ্মা ক্রূরঃ, স দুর্বিরেচ্যঃ; সমদোষো মধ্যমঃ, স সাধারণ ইতি | তত্র মৃদৌ মাত্রা মৃদ্বী, তীক্ষ্ণা ক্রূরে, মধ্যে মধ্যা কর্তব্যেতি | পীতৌষধশ্চ তন্মনাঃ শয্যাভ্যাশে বিরেচ্যতে ||২১|| বিরেচনং পীতবাংস্তু ন বেগান্ ধারযেদ্বুধঃ | নিবাতশাযী শীতাম্বু ন স্পৃশেন্ন প্রবাহযেত্ ||২২||
तत्र मृदुः, क्रूरो, मध्यम इति त्रिविधः कोष्ठो भवति | तत्र बहुपित्तो मृदुः, स दुग्धेनापि विरिच्यते; बहुवातश्लेष्मा क्रूरः, स दुर्विरेच्यः; समदोषो मध्यमः, स साधारण इति | तत्र मृदौ मात्रा मृद्वी, तीक्ष्णा क्रूरे, मध्ये मध्या कर्तव्येति | पीतौषधश्च तन्मनाः शय्याभ्याशे विरेच्यते ||२१|| विरेचनं पीतवांस्तु न वेगान् धारयेद्बुधः | निवातशायी शीताम्बु न स्पृशेन्न प्रवाहयेत् ||२२||
🔊 Audio coming soon
দুগ্ধং চাত্রোপলক্ষণমাত্রং, তেনেক্ষুরসাম্লতক্রমস্তুগুডকৃশরাসর্পির্নবমদ্যোষ্ণোদকপীলুদ্রাক্ষারসাদিভিরপি বিরিচ্যতে, দুর্বিরেচ্যস্ত্রিবৃত্ত্রিফলাতিল্বকনীলিনীফলাদিভিরপি দুঃখেন বিরিচ্যতে| মৃদ্বী মৃদুগুণোপেতা, বৈরেচনিকদ্রব্যগুণানাং তীক্ষ্ণত্বাদীনামপকর্ষেণ; তীক্ষ্ণা তীক্ষ্ণগুণোপেতা, বৈরেচনিকদ্রব্যগুণানাং তীক্ষ্ণত্বাদীনাং প্রকর্ষেণ| তন্মনা বিরেকমনাঃ| অভ্যাশে সমীপে||২১-২২||
Adhikarana 18 (23) · Śloka 23
যথা চ বমনে প্রসেকৌষধকফপিত্তানিলাঃ ক্রমেণ গচ্ছন্তি, এবং বিরেচনে মূত্রপুরীষপিত্তৌষধকফা ইতি ||২৩||
यथा च वमने प्रसेकौषधकफपित्तानिलाः क्रमेण गच्छन्ति, एवं विरेचने मूत्रपुरीषपित्तौषधकफा इति ||२३||
🔊 Audio coming soon
প্রসেকঃ আস্যে লালাস্রবণম্| ঔষধং পীতং, কফঃ পুনরামাশযস্থঃ, তস্মিন্ বমনেন হৃতে তত্রৈব পিত্তং বমনাবধিসূচকং নিস্সরতি, বাতেন উদ্গাররূপেণানিলসংশুদ্ধিঃ| বিরেচনে মূত্রপুরীষপিত্তৌষধকফা ইতি, বাতগমনং পুনঃ ‘গতেঽনিলে চাপ্যনুলোমভাবং’ ইত্যনেন বক্ষ্যতি| কফোঽত্র পক্বাশযে বিরেকাবধিসূচকঃ স্ফটিকসমদ্যুতিঃ||২৩||
Adhikarana 19 (24) · Śloka 24
ভবন্তি চাত্র- হৃত্কুক্ষ্যশুদ্ধিঃ পরিদাহকণ্ডূবিণ্মূত্রসঙ্গাশ্চ ন সদ্বিরিক্তে | মূর্চ্ছাগুদভ্রংশকফাতিযোগাঃ শূলোদ্গমশ্চাতিবিরিক্তলিঙ্গম্ ||২৪||
भवन्ति चात्र- हृत्कुक्ष्यशुद्धिः परिदाहकण्डूविण्मूत्रसङ्गाश्च न सद्विरिक्ते | मूर्च्छागुदभ्रंशकफातियोगाः शूलोद्गमश्चातिविरिक्तलिङ्गम् ||२४||
🔊 Audio coming soon
পিত্তান্তকং সম্যগ্বমনজ্ঞানং কফান্তং চ সম্যগ্বিরেচনজ্ঞানমুদ্দিশ্য বিরেকস্যৈব লিঙ্গজ্ঞানেনাযোগাতিযোগৌ নির্দিশন্নাহ- ভবন্তি চাত্রেত্যাদি| হৃত্কুক্ষ্যশুদ্ধিরিতি অত্র “স্যাদ্দুর্বিরিক্তে কফপিত্তকোপো দাহোঽরুচির্গৌরবমগ্নিসাদঃ” ইতি কেচিত্পঠন্তি||২৪||
Adhikarana 20 (25) · Śloka 25
গতেষু দোষেষু কফান্বিতেষু নাভ্যা লঘুত্বে মনসশ্চ তুষ্টৌ | গতেঽনিলে চাপ্যনুলোমভাবং সম্যগ্বিরিক্তং মনুজং ব্যবস্যেত্ ||২৫||
गतेषु दोषेषु कफान्वितेषु नाभ्या लघुत्वे मनसश्च तुष्टौ | गतेऽनिले चाप्यनुलोमभावं सम्यग्विरिक्तं मनुजं व्यवस्येत् ||२५||
🔊 Audio coming soon
গতেষ্বিত্যাদি| দোষোঽত্র পিত্তস্থানগতং দোষোপলক্ষিতং পুরীষং কফপিত্তং চ||২৫||
Adhikarana 21 (26) · Śloka 26
মন্দাগ্নিমক্ষীণমসদ্বিরীক্তং ন পাযযেতাহনি তত্র পেযাম্ | ক্ষীণং তৃষার্তং সুবিরেচিতং চ তন্বীং সুখোষ্ণাং লঘু পাযযেচ্চ ||২৬||
मन्दाग्निमक्षीणमसद्विरीक्तं न पाययेताहनि तत्र पेयाम् | क्षीणं तृषार्तं सुविरेचितं च तन्वीं सुखोष्णां लघु पाययेच्च ||२६||
🔊 Audio coming soon
অত্রৈব পশ্চাত্কর্মণ্যবস্থাবিশেষেণ বিশেষমুদ্দিশন্নাহ- মন্দাগ্নিমক্ষীণমিত্যাদি| লঘ্বিতি মাত্রালঘু||২৬||
Adhikarana 22 (27) · Śloka 27
বুদ্ধেঃ প্রসাদং বলমিন্দ্রিযাণাং ধাতুস্থিরত্বং বলমগ্নিদীপ্তিম্ | চিরাচ্চ পাকং বযসঃ করোতি বিরেচনং সম্যগুপাস্যমানম্ ||২৭||
बुद्धेः प्रसादं बलमिन्द्रियाणां धातुस्थिरत्वं बलमग्निदीप्तिम् | चिराच्च पाकं वयसः करोति विरेचनं सम्यगुपास्यमानम् ||२७||
🔊 Audio coming soon
ইদানীং বিরেকস্য গুণমাহ- বুদ্ধেরিত্যাদি| কাথমনসোরন্যোন্যানুবিধানাত্ কাযমপি মনোঽনুবিধত্তে মনশ্চ কায ইতি| শরীরশুদ্ধিকারণং হি বিরেচনং, তচ্ছুদ্ধৌ মনসো বিশুদ্ধিঃ, মনঃশুদ্ধৌ বুদ্ধিপ্রসাদ উপপন্ন এবেত্যতো বুদ্ধিপ্রসাদং করোতীত্যুক্তম্| ধাতুস্থিরত্বমুপচযলক্ষণবলেন| অত্র বলশব্দেনোত্সাহলক্ষণবলম্| কেচিত্ ‘বিরেচনং সম্যগুপাস্যমেব’ ইতি পঠন্তি| কেচিদ্বুদ্ধিপ্রসাদাদযস্তাত্কালিকা বিরেচনস্য গুণাঃ, অগ্নিদীপ্তিপ্রভৃতযস্তু কেচিত্সংসর্জনক্রমানন্তরভাবিন ইতি কথযন্তি| উপস্তম্ভাদিকারিণো মলস্য ক্ষযকার্যপি বিরেকঃ স্রোতঃশুদ্ধ্যা বলমাদধাতি তক্রপানবত্| উক্তং চ- “স্রোতঃসু তক্রশুদ্ধেষু রসঃ সম্যগুপৈতি যঃ| তেন পুষ্টির্বলং বর্ণঃ প্রহর্ষশ্চোপজাযতে” (চ. চি. ১৪) ইতি||২৭||
Adhikarana 23 (28) · Śloka 28
যথৌদকানামুদকেঽপনীতে চরস্থিরাণাং ভবতি প্রণাশঃ | পিত্তে হৃতে ত্বেবমুপদ্রবাণাং পিত্তাত্মকানাং ভবতি প্রণাশঃ ||২৮||
यथौदकानामुदकेऽपनीते चरस्थिराणां भवति प्रणाशः | पित्ते हृते त्वेवमुपद्रवाणां पित्तात्मकानां भवति प्रणाशः ||२८||
🔊 Audio coming soon
দৃষ্টান্তমাহ- যথেত্যাদি| ঔদকানাং চরস্থিরাণাং স্থাবরজঙ্গমানাং পদ্মাদীনাং মত্স্যাদীনাং চ| উপদ্রবাণাং ব্যাধীনাম্| পিত্তাত্মকানাং পিত্তকারণানাম্||২৮||
Adhikarana 24 (29-30) · Śloka 31
মন্দাগ্ন্যতিস্নেহিতবালবৃদ্ধস্থূলাঃ ক্ষতক্ষীণভযোপতপ্তাঃ | শ্রান্তস্তৃষার্তোঽপরিজীর্ণভক্তো গর্ভিণ্যধো গচ্ছতি যস্য চাসৃক্ ||২৯|| নবপ্রবিশ্যাযমদাত্যযী চ নবজ্বরী যা চ নবপ্রসৃতা | শল্যার্দিতাশ্চাপ্যবিরেচনীযাঃ স্নেহাদিভির্যে ত্বনুপস্কৃতাশ্চ ||৩০|| অত্যর্থপিত্তাভিপরীতদেহান্ বিরেচযেত্তানপি মন্দমন্দম্ |৩১|
मन्दाग्न्यतिस्नेहितबालवृद्धस्थूलाः क्षतक्षीणभयोपतप्ताः | श्रान्तस्तृषार्तोऽपरिजीर्णभक्तो गर्भिण्यधो गच्छति यस्य चासृक् ||२९|| नवप्रविश्यायमदात्ययी च नवज्वरी या च नवप्रसृता | शल्यार्दिताश्चाप्यविरेचनीयाः स्नेहादिभिर्ये त्वनुपस्कृताश्च ||३०|| अत्यर्थपित्ताभिपरीतदेहान् विरेचयेत्तानपि मन्दमन्दम् |३१|
🔊 Audio coming soon
বিরেচনস্যাপ্রবৃত্তিবিষযমুদ্দিশন্নাহ- মন্দেত্যাদি| ‘মন্দমন্দম্’ ইত্যত্র কেচিত্ ‘মন্দবীর্যৈঃ’ ইত্যেবং পঠন্তি, তত্র ‘দ্রব্যৈঃ’ ইতি শেষঃ||২৯-৩০||-
Adhikarana 25 (31) · Śloka 31
বিরেচনৈর্যান্তি নরা বিনাশমজ্ঞপ্রযুক্তৈরবিরেচনীযাঃ ||৩১||
विरेचनैर्यान्ति नरा विनाशमज्ञप्रयुक्तैरविरेचनीयाः ||३१||
🔊 Audio coming soon
অবিরেচ্যানামবিরেকজ্ঞৈঃ কৃতং দোষং দর্শযন্নাহ- বিরেচনৈরিত্যাদি||৩১||
Adhikarana 26 (32) · Śloka 32
বিরেচ্যাস্তু- জ্বরগরারুচ্যর্শোঽর্বুদোদরগ্রন্থিবিদ্গাধিপাণ্ডুরোগাপস্মারহৃদ্রোগবাতরক্তভগন্দরচ্ছর্দিযোনিরোগবিসর্প- গুল্মপক্বাশযরুগ্বিবন্ধবিসূচিকালসকমূত্রাঘাতকুষ্ঠবিস্ফোটকপ্রমেহানাহপ্লীহশোফবৃদ্ধিশস্ত্রক্ষতক্ষারাগ্নিদগ্ধ- দুষ্টব্রণাক্ষিপাককাচতিমিরাভিষ্যন্দশিরঃকর্ণাক্ষিনাসাস্যগুদমেঢ্রদাহোর্ধ্বরক্তপিত্তকৃমিকোষ্ঠিনঃ পিত্তস্থানজেষ্বন্যেষু চ বিকারেষ্বন্যে চ পৈত্তিকব্যাধিপরীতা ইতি ||৩২||
विरेच्यास्तु- ज्वरगरारुच्यर्शोऽर्बुदोदरग्रन्थिविद्गाधिपाण्डुरोगापस्मारहृद्रोगवातरक्तभगन्दरच्छर्दियोनिरोगविसर्प- गुल्मपक्वाशयरुग्विबन्धविसूचिकालसकमूत्राघातकुष्ठविस्फोटकप्रमेहानाहप्लीहशोफवृद्धिशस्त्रक्षतक्षाराग्निदग्ध- दुष्टव्रणाक्षिपाककाचतिमिराभिष्यन्दशिरःकर्णाक्षिनासास्यगुदमेढ्रदाहोर्ध्वरक्तपित्तकृमिकोष्ठिनः पित्तस्थानजेष्वन्येषु च विकारेष्वन्ये च पैत्तिकव्याधिपरीता इति ||३२||
🔊 Audio coming soon
বিরেচ্যানাহ- বিরেচ্যাস্ত্বিত্যাদি||৩২||
Adhikarana 27 (33) · Śloka 33
সরত্বসৌক্ষ্ম্যতৈক্ষ্ণ্যৌষ্ণ্যবিকাশিত্বৈর্বিরেচনম্ | বমনং তু হরেদ্দোষং প্রকৃত্যা গতমন্যথা ||৩৩||
सरत्वसौक्ष्म्यतैक्ष्ण्यौष्ण्यविकाशित्वैर्विरेचनम् | वमनं तु हरेद्दोषं प्रकृत्या गतमन्यथा ||३३||
🔊 Audio coming soon
বিরেচনদ্রব্যেণ সহ গুণসাম্যে সতি কথং বমনদ্রব্যস্যোর্ধ্বভাগগামিত্বমিত্যাহ- সরত্বেত্যাদি| সরস্য ভাবঃ সরত্বমানুলোম্যং, গযী তু বিসরণস্বভাবত্বং সরত্বমাহ; সূক্ষ্মস্য ভাবঃ সৌক্ষ্ম্যং সূক্ষ্মস্রোতোঽনুসারিত্বং; তীক্ষ্ণস্য ভাবস্তৈক্ষ্ণ্যং শীঘ্রতরদোষস্রাবণকরত্বম্; উষ্ণস্য ভাব ঔষ্ণ্যং, সৌম্যদ্রব্যোপমর্দনকরণসামার্থ্যং; বিকাশিনো ভাবঃ বিকাশিত্বং, বিকাশিভাবেন ধাতোঃ শৈথিল্যকরণসামর্থ্যম্| অত্র প্রকৃতিঃ, স্বভাবঃ, শক্তিবিশেষঃ, প্রভাবো, বীর্যমিত্যনর্থান্তরম্| তেন প্রকৃত্যা বীর্যেণান্যথাগতমূর্ধ্বগতং, সত্যপি সরত্বাদিবিরেচনগুণসাম্যে বমনস্যোর্ধ্বগামিত্বং প্রভাববিভাবিতং, কুতঃ? যত উচ্যতে- “কটুকঃ কটুকঃ পাকে চিত্রকো বহ্নিদীপনঃ| তদ্বদ্দন্তী প্রভাবাত্তু বিরেচযতি সা নরম্”; তথাচ- “বিষং বিষঘ্নমুদ্দিষ্টং প্রভাবস্তত্র কারণম্”- ইতি; তথা- “ঊর্ধ্বানুলোমিকং যচ্চ তত্প্রভাবপ্রভাবিতম্” (চ. সূ. ২৬) ইতি| এতেনৈতদুক্তং ভবতি- সরত্বাদিভির্গুণৈর্বিরেচনমধো দোষানপহরেত্; বমনস্য তুল্যগুণত্বেঽপি বীর্যেণোর্ধ্বগামিত্বম্| পঞ্জিকাকারেণ ‘প্রকৃত্যা গতমন্যথা’ ইত্যত্র ‘সম্যগ্যুক্ত্যাঽতথাঽন্যথা’ ইতি পঠিত্বৈবং ব্যাখ্যাতং- সম্যগ্যুক্ত্যা সরত্বাদিগুণৈর্বিরেচনমধোভাগেন, বমনমূর্ধ্বভাগেন দোষানপহরেত্; অতথাঽন্যথেতি নঞত্র বৈপরীত্যে; অতথা অসম্যগ্যুক্ত্যা বিরেচনং চ বমনং চান্যথা দোষবিপরীতান্ গুণান্ হরেদিতি| কেচিত্তু ‘সম্যগ্যুক্তং বৃথাঽন্যথা’ ইতি পঠন্তি| অযমর্থো যুক্তঃ কিল; সরত্বাদযো গুণাঃ সুযুক্তা আশুতরদোষহরাঃ, তথৈব চান্যাযোপযুক্তা এব জীবশোণিতধাতুরসেন্দ্রিযমনওজঃপ্রভৃতীনাকৃষ্য মারযন্তীতি||৩৩||
Adhikarana 28 (34) · Śloka 34
যাত্যধো দোষমাদায পচ্যমানং বিরেচনম্ | গুণোত্কর্ষাদ্ব্রজত্যূর্ধ্বমপক্বং বমনং পুনঃ ||৩৪||
यात्यधो दोषमादाय पच्यमानं विरेचनम् | गुणोत्कर्षाद्व्रजत्यूर्ध्वमपक्वं वमनं पुनः ||३४||
🔊 Audio coming soon
কীদৃশং সত্ পুনর্বিরেচনং বমনদ্রব্যং চ দোষানাদায অধ ঊর্ধ্বং চ যাতীত্যাহ- যাত্যধো দোষমিত্যাদি| বিরেচনদ্রব্যাণি স্থিরগুর্ব্যোঃ পৃথিব্যম্ভসোর্গুণভূযিষ্ঠানি, অত এব স্থিরত্বাত্ পচ্যমানানি গুরুত্বাদধো যান্তি; বমনদ্রব্যাণি তু বায্বগ্ন্যোঃ শীঘ্রগলঘুগুণযোর্গুণভূযিষ্ঠানি, অতঃ শীঘ্রগত্বাদপক্বান্যেব লঘুত্বাদূর্ধ্বমুত্তিষ্ঠন্তি| দ্রব্যাণি হি দ্রব্যপ্রভাবাত্ গুণপ্রভাবাচ্চ কার্মুকাণি ভবন্তি||৩৪||
Adhikarana 29 (35) · Śloka 35
মৃদুকোষ্ঠস্য দীপ্তাগ্নেরতিতীক্ষ্ণং বিরেচনম্ | ন সম্যঙ্গির্হরেদ্দোষানতিবেগপ্রধাবিতম্ ||৩৫||
मृदुकोष्ठस्य दीप्ताग्नेरतितीक्ष्णं विरेचनम् | न सम्यङ्गिर्हरेद्दोषानतिवेगप्रधावितम् ||३५||
🔊 Audio coming soon
কথং পুনরস্যাসম্যক্প্রবৃত্তিঃ? অত্রোচ্যতে- মৃদুকোষ্ঠস্যেত্যাদি| অতিবেগপ্রধাবিতম্ অতিবেগপ্রবর্তিতম্| ন সম্যঙ্গির্হরেদ্দোষানিতি কুতঃ? কোষ্ঠমার্দবাদগ্নিদীপ্তেরতিতৈক্ষ্ণ্যাচ্চ| অযমভিপ্রাযঃ- মৃকুকোষ্ঠস্য কোষ্ঠমার্দবেন শীঘ্রপ্রবৃত্তিঃ, দীপ্তাগ্নেশ্চাগ্নিদীপ্ত্যা আশুপাকিত্বাদচিরস্থাযিনী পচ্যমানাবস্থা, অতস্তদ্ধেতুকাঽতিপ্রবৃত্তিরপি তথাভূতৈব; তথা বিরেচনস্য তীক্ষ্ণতযাঽপি শীঘ্রপ্রবৃত্তিরিতি হেতুত্রযেণ শীঘ্রং প্রবর্তনাদ্দোষাণাং ন নিঃশেষেণ দোষনির্হরণম্| তস্মান্মৃদ্বেব বিরেচনং স্বল্পমাত্রং দেযমিতি||৩৫||
Adhikarana 30 (36) · Śloka 36
পীতং যদৌষধং প্রাতর্ভুক্তপাকসমে ক্ষণে | পক্তিং গচ্ছতি দোষাংশ্চ নির্হরেত্তত্ প্রশস্যতে ||৩৬||
पीतं यदौषधं प्रातर्भुक्तपाकसमे क्षणे | पक्तिं गच्छति दोषांश्च निर्हरेत्तत् प्रशस्यते ||३६||
🔊 Audio coming soon
ইদানীং সম্যগ্যুক্তিমাহ- পীতমিত্যাদি| ভুক্তপাকসমে ক্ষণে ইতি ত্রিভির্যামৈর্মধ্যমাগ্নের্ভোজ্যভৈষজ্যযোঃ পাকঃ| অন্যে ত্বেবং পঠন্তি- “যাবতা জীর্যতে ভক্তং জরাং যদ্যাতি তাবতা| সুখেন দোষান্নির্হৃত্য ভেষজং তত্ প্রশস্যতে”- ইতি||৩৬||
Adhikarana 31 (37) · Śloka 37
দুর্বলস্য চলান্ দোষানল্পানল্পান্ পুনঃ পুনঃ | হরেত্ প্রভূতানল্পাংস্তু শমযেত্ প্রচ্যুতানপি ||৩৭||
दुर्बलस्य चलान् दोषानल्पानल्पान् पुनः पुनः | हरेत् प्रभूतानल्पांस्तु शमयेत् प्रच्युतानपि ||३७||
🔊 Audio coming soon
কুপিতাঃ শমযিতব্যা ইত্যস্যাপবাদমাহ- দুর্বলস্যেত্যাদি| দুর্বলস্য পুরুষস্য প্রভূতান্ চলান্ কুপিতান্ দোষান্ শনৈঃ শনৈরল্পানল্পান্ হরেত্, অতীক্ষ্ণৈঃ সংশোধনীযৈরিত্যর্থঃ| সরৈর্ভোজ্যৈর্ন তীক্ষ্ণৈঃ সংশোধনৈরিত্যধ্যাহার্যম্| তচ্চ দোষহরণং দোষাণাং পক্বানামেব| অল্পাংস্তর্হি কিং কুর্যাদিত্যাহ- অল্পাংস্তু শমযেত্| প্রচ্যুতানপি চলিতানপীত্যর্থঃ| ভোজনাপ্যুক্তম্- “দোষমল্পং চ শমযেচ্চলিতং চাপি দুর্বলে| বহুদোষং তু চলিতং সরৈর্ভোজ্যৈঃ প্রবাহযেত্”- ইতি||৩৭||
Adhikarana 32 (38) · Śloka 38
হরেদ্দোষাংশ্চলান্ পক্বান্ বলিনো দুর্বলস্য বা | চলা হ্যুপেক্ষিতা দোষাঃ ক্লেশযেযুশ্চিরং নরম্ ||৩৮||
हरेद्दोषांश्चलान् पक्वान् बलिनो दुर्बलस्य वा | चला ह्युपेक्षिता दोषाः क्लेशयेयुश्चिरं नरम् ||३८||
🔊 Audio coming soon
তে দোষা বলিনো দুর্বলস্যাপি পাকপ্রবণা বিপুলা নির্হর্তব্যা এবেত্যাহ- হরেদিত্যাদি||৩৮||
Adhikarana 33 (39) · Śloka 39
মন্দাগ্নিং ক্রূরকোষ্ঠং চ সক্ষারলবণৈর্ঘৃতৈঃ | সন্ধুক্ষিতাগ্নিং স্নিগ্ধং চ স্বিন্নং চৈব বিরেচযেত্ ||৩৯||
मन्दाग्निं क्रूरकोष्ठं च सक्षारलवणैर्घृतैः | सन्धुक्षिताग्निं स्निग्धं च स्विन्नं चैव विरेचयेत् ||३९||
🔊 Audio coming soon
মন্দাগ্নেঃ ক্রূরকোষ্ঠস্য সংশোধনবিধিমাহ- মন্দাগ্নিমিত্যাদি||৩৯||
Adhikarana 34 (40) · Śloka 40
স্নিগ্ধস্বিন্নস্য ভৈষজ্যৈর্দোষস্তূত্ক্লেশিতো বলাত্ | নিলীযতে ন মার্গেষু স্নিগ্ধে ভাণ্ড ইবোদকম্ ||৪০||
स्निग्धस्विन्नस्य भैषज्यैर्दोषस्तूत्क्लेशितो बलात् | निलीयते न मार्गेषु स्निग्धे भाण्ड इवोदकम् ||४०||
🔊 Audio coming soon
কুতঃ পুনঃ স্নেহস্বেদপূর্বকমেব শোধনমিত্যাহ- স্নিগ্ধেত্যাদি| স্নিগ্ধস্বিন্নস্য পুরুষস্য ভৈষজ্যৈর্ভোজনৌষধরূপৈঃ, যতো ভৈষজ্যগ্রহণেন ভোজনমপি গৃহ্যতে| বলাত্ পুরুষবলাদিকমভিসমীক্ষ্য দোষ উত্ক্লেশিতঃ| ন মার্গেষু নিলীযতে ন শ্লিষ্যতি, ন সংযুজ্যতে ন লগ্নো ভবতীত্যর্থঃ||৪০||
Adhikarana 35 (41) · Śloka 41
ন চাতিস্নেহপীতস্তু পিবেত্ স্নেহবিরেচনম্ | দোষাঃ প্রচলিতাঃ স্থানাদ্ভূযঃ শ্লিষ্যন্তি বর্ত্মসু ||৪১||
न चातिस्नेहपीतस्तु पिबेत् स्नेहविरेचनम् | दोषाः प्रचलिताः स्थानाद्भूयः श्लिष्यन्ति वर्त्मसु ||४१||
🔊 Audio coming soon
বিরেচনস্য স্নিগ্ধরূক্ষপুরুষবিশেষাবচারণমুদ্দিশন্নাহ- ন চাতিস্নেহেত্যাদি| ভূয ইত্যাদি পুনর্নিলীযন্তে মার্গেষ্বিত্যর্থঃ| “ন চাতিস্নিগ্ধকাযস্তু” ইতি কেচিত্ পঠন্তি||৪১||
Adhikarana 36 (42) · Śloka 42
বিষাভিঘাতপিডকাশোফপাণ্ডুবিসর্পিণঃ | নাতিস্নিগ্ধা বিশোধ্যাঃ স্যুস্তথা কুষ্ঠিপ্রমেহিণঃ ||৪২||
विषाभिघातपिडकाशोफपाण्डुविसर्पिणः | नातिस्निग्धा विशोध्याः स्युस्तथा कुष्ठिप्रमेहिणः ||४२||
🔊 Audio coming soon
কেষাঞ্চিদতিস্নিগ্ধানাং বিশোধনপ্রতিষেধমাহ- বিষাভিঘাতেত্যাদি| নাতিস্নিগ্ধা ইতি ঈষত্স্নিগ্ধা বিশোধ্যা ইত্যর্থঃ||৪২||
Adhikarana 37 (43) · Śloka 43
বিরূক্ষ্য স্নেহসাত্ম্যং তু ভূযঃ সংস্নেহ্য শোধযেত্ | তেন দোষা হৃতাস্তস্য ভবন্তি বলবর্ধনাঃ ||৪৩||
विरूक्ष्य स्नेहसात्म्यं तु भूयः संस्नेह्य शोधयेत् | तेन दोषा हृतास्तस्य भवन्ति बलवर्धनाः ||४३||
🔊 Audio coming soon
স্বভাবতঃ স্নিগ্ধতা ন শোধনহেতুরিত্যাহ- বিরূক্ষ্যেত্যাদি| ‘বলবর্ধনা’ ইত্যত্র ‘স্নেহবন্ধনা’ ইতি পঠন্তি, স্নেহবন্ধনাঃ স্নেহোপলিপ্তস্রোতোবন্ধনা ইত্যর্থঃ||৪৩||
Adhikarana 38 (44) · Śloka 44
প্রাগপীতং নরং শোধ্যং পাযযেতৌষধং মৃদু | ততো বিজ্ঞাতকোষ্ঠস্য কার্যং সংশোধনং পুনঃ ||৪৪||
प्रागपीतं नरं शोध्यं पाययेतौषधं मृदु | ततो विज्ञातकोष्ठस्य कार्यं संशोधनं पुनः ||४४||
🔊 Audio coming soon
অবিজ্ঞাতকোষ্ঠস্য মৃদু বিরেচনং দেযমিত্যাহ- প্রাগিত্যাদি| প্রাক্ পূর্বং ন পীতং বিরেচনং যেন সঃ তম্||৪৪||
Adhikarana 39 (45) · Śloka 45
সুখং দৃষ্টফলং হৃদ্যমল্পমাত্রং মহাগুণম্ | ব্যাপত্স্বল্পাত্যযং চাপি পিবেন্নৃপতিরৌষধম্ ||৪৫||
सुखं दृष्टफलं हृद्यमल्पमात्रं महागुणम् | व्यापत्स्वल्पात्ययं चापि पिबेन्नृपतिरौषधम् ||४५||
🔊 Audio coming soon
সুকুমারতরপুরুষবিশেষেণ বিরেচনবিশেষমাহ- সুখমিত্যাদি| ব্যাপত্স্বল্পাত্যযমিতি ব্যাপদাং স্বল্পানামপ্যত্যযো বিনাশো যস্মিন্নৌষধে তত্তথা||৪৫||
Adhikarana 40 (46) · Śloka 46
স্নেহস্বেদাবনভ্যস্য যস্তু সংশোধনং পিবেত্ | দারু শুষ্কমিবানামে দেহস্তস্য বিশীর্যতে ||৪৬||
स्नेहस्वेदावनभ्यस्य यस्तु संशोधनं पिबेत् | दारु शुष्कमिवानामे देहस्तस्य विशीर्यते ||४६||
🔊 Audio coming soon
রূক্ষস্যাকৃতস্নেহস্বেদস্য শোধনে দোষং দর্শযন্নাহ- স্নেহস্বেদাবিত্যাদি||৪৬||
Adhikarana 41 (47) · Śloka 47
স্নেহস্বেদপ্রচলিতা রসৈঃ স্নিগ্ধৈরুদীরিতাঃ | দোষাঃ কোষ্ঠগতা জন্তোঃ সুখা হর্তুং বিশোধনৈঃ ||৪৭||
स्नेहस्वेदप्रचलिता रसैः स्निग्धैरुदीरिताः | दोषाः कोष्ठगता जन्तोः सुखा हर्तुं विशोधनैः ||४७||
🔊 Audio coming soon
শাখাগতস্যাপি দোষস্য কোষ্ঠানযনহেতুঃ স্নেহঃ, স্বেদঃ কোষ্ঠমাগতস্য সুখেন প্রবৃত্তিকরশ্চেতি দর্শযন্নাহ- স্নেহস্বেদপ্রচলিতা ইত্যাদি| বিশোধনৈরিতি ‘শক্যন্তে’ ইত্যধ্যাহারঃ||৪৭||
Adhikarana puShpikA · Śloka 33
ইতি সুশ্রুতসংহিতাযাং চিকিত্সাস্থানে বমনবিরেচনসাধ্যোপদ্রবচিকিত্সিতং নাম ত্রযস্ত্রিংশোঽধ্যাযঃ ||৩৩||
इति सुश्रुतसंहितायां चिकित्सास्थाने वमनविरेचनसाध्योपद्रवचिकित्सितं नाम त्रयस्त्रिंशोऽध्यायः ||३३||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে ত্রযস্ত্রিংশত্তমোঽধ্যাযঃ||৩৩||