4. vātavyādhicikitsitam

Adhikarana 1 (1-4) · Śloka 4

অথাতো বাতব্যাধিচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| আমাশযগতে বাতে চ্ছর্দযিত্বা যথাক্রমম্ | দেযঃ ষড্ধরণো যোগঃ সপ্তরাত্রং সুখাম্বুনা ||৩|| চিত্রকেন্দ্রযবে পাঠা কটুকাঽতিবিষাঽভযা | বাতব্যাধিপ্রশমনো যোগঃ ষড্ধরণঃ স্মৃতঃ ||৪||

প্রথমমামাশযগতবাযোশ্চিকিত্সিতমাহ- আমাশযেত্যাদি| ছর্দযিত্বা বমনং কারযিত্বা| বমনং চ সোত্ক্লেশে পুরুষে বহুদোষে বলবতি জ্ঞেযম্| আমাশযগতে ছর্দনং কফস্থানত্বাত্| যথাক্রমমিতি অত্র যথাক্রমশব্দেন পূর্বকালাপরকালকর্তব্যতাঃ সর্বৈবাক্ষিপ্তাঃ স্নেহস্বেদনপানলৈঙ্গিকবৈগিকমানিককাযশুদ্ধিসম্সর্জনভোজনাদযঃ| দেয ইতি দাতুমর্হঃ| ষড্ধরণ ইতি ষণ্ণাং চিত্রকাদীনাং ধরণা মানবিশেষা যত্র যোগে স ষড্ধরণো যোগঃ| তত্র ধরণপ্রমাণং মধ্যমৈরেকবিংশতিভির্নিষ্পাবৈর্ভবতি| সুখাম্বুনা ঈষদুষ্ণাম্বুনেত্যর্থঃ| ষড্ধরণানি কথং সপ্তদিনান্যুপযুজ্যন্তে? উচ্যতে- একস্মিন্ দিনে কর্ষযোগঃ, স চাষ্টাদশনিষ্পাবৈর্ভবতি, তত্র ষড্ধরণেভ্যঃ প্রতিদিনং ত্রযস্ত্রযো নিষ্পাবা উচ্ছ্রিতা ভবন্তি, ততঃ ষড্ভিস্ত্রিকৈরষ্টাদশনিষ্পাবাঃ, তৈরষ্টাদশভিঃ সপ্তমং দিনং পূর্যতে; অথবা সঞ্জ্ঞৈষা ষড্ধরণ ইতি| ইদানীং ষড্ধরণযোগমাহ- চিত্রকেত্যাদি| ‘কটুকাঽতিবিষা ক্ষপা’ ইতি কেচিত্ পঠন্তি| বাতব্যাধিপ্রশমন ইতি আমাশযগত এব বাতব্যাধির্গৃহীতব্যো ন পুনরাক্ষেপকাদযঃ, রূক্ষবিষযত্বেন বাতকারিত্বাদস্য| অন্যে তু ‘মহাব্যাধিপ্রশমন’ ইতি পঠন্তি, মহাব্যাধিরিহ মেদোযুতোঽনিলো নান্যঃ||১-৪||হ্

Adhikarana 2 (5) · Śloka 5

পক্বাশযগতে চাপি দেযং স্নেহবিরেচনম্ | বস্তযঃ শোধনীযাশ্চ প্রাশাশ্চ লবণোত্তরাঃ ||৫||

পক্বাশযগতবাযোশ্চিকিত্সামাহ- পক্বাশযেত্যাদি| স্নেহবিরেচনং তিল্বকসর্পিরাদিবিরেচনম্| বস্তযঃ শোধনীযাশ্চেতি “শোধনদ্রব্যনিষ্ক্বাথাস্তত্কল্কস্নেহসংযুতাঃ” (চি. ৩৮) ইত্যাদ্যাঃ| প্রাশাশ্চ লবণোত্তরা ইতি স্নেহলবণকল্যাণকলবণাদযঃ; অন্যে তু প্রাশ্যন্ত ইতি প্রাশা আহারাঃ, ন তু লেহাঃ; লবণোত্তরা লবণপ্রধানাঃ| গযী ত্বত্রাহ- পক্বাশযঃ পুনরিহ দ্বিবিধঃ- পিত্তবাতাশযভেদেন; তযোর্মধ্যে পিত্তাশযগতে বাযৌ স্নেহবিরেচনং তিল্বকসিদ্ধমেরণ্ডতৈলাদিভির্বা, বাতাশযগতস্য তু বাযোর্মলকফপিত্তৈরাবৃতস্য যথাদোষং কষাযকল্কস্নেহবস্তযঃ; তত্র মলাবৃতবাযৌ বিদারীকল্কসিদ্ধঃ স্নেহযুক্তো ব্যক্তোষ্ণক্ষারশ্চ বস্তিঃ, শ্লেষ্মাবৃতবাযৌ ব্যক্তক্ষারোষ্ণো বস্তিঃ; (ত্রিবৃদাদিদ্রব্যমূত্রবিদারীকল্কসিদ্ধঃ ) পিত্তাবৃতে পুনরক্ষারবস্তিঃ শীতঃ; শেষং সমম্||৫||

Adhikarana 3 (6) · Śloka 6

কার্যো বস্তিগতে চাপি বিধির্বস্তিবিশোধনঃ |৬|

বস্তিগতস্য বাযোশ্চিকিত্সিতমাহ- কার্য ইত্যাদি| বস্তিবিশোধনো বিধিরিতি অশ্মরীচিকিত্সিতোক্তো মূত্রাঘাতাদ্যুক্তশ্চ|৬|-

Adhikarana 4 (6) · Śloka 6

শ্রোত্রাদিষু প্রকুপিতে কার্যশ্চানিলহা ক্রমঃ ||৬||

শ্রোত্রাদিষু প্রকুপিতবাযোশ্চিকিত্সিতমাহ- শ্রোত্রেত্যাদি| আদিশব্দাত্ত্বগ্ঘ্রাণজিহ্বানেত্রাণীন্দ্রিযাণি গৃহ্যন্তে| অত্র ক্রমঃ “স্নেহঃ স্বেদস্তথাঽভ্যঙ্গ” ইত্যাদিকো দোষদূষ্যপ্রত্যনীকো যথাযথং কার্যঃ, স চেন্দ্রিযসাত্ম্যমপেক্ষ্য কর্তব্যঃ; তেন স্নেহশব্দসামান্যেঽপি নেত্রযোঃ ক্ষীরসর্পিস্তর্পণং, তৈলতর্পণং পুনঃ কর্ণাদিষ্বিতি||৬||

Adhikarana 5 (7) · Śloka 7

স্নেহাভ্যঙ্গোপনাহাশ্চ মর্দনালেপনানি চ | ত্বঙ্মাংসাসৃক্সিরাপ্রাপ্তে কুর্যাত্ চাসৃগ্বিমোক্ষণম্ ||৭||

ধাতূপধাতুগস্য বাযোশ্চিকিত্সিতমাহ- স্নেহেত্যাদি| স্নেহাভ্যঙ্গোপনাহাংশ্চেত্যত্র চকারেণ ত্বগ্গতবাযৌ হৃদ্যমপ্যন্নপানমনুক্তং সমুচ্চীযতে| ত্বগত্র রসঃ, সিরাঃ পুনরসৃজ উপধাতুঃ, প্রাপ্তে গতে ইত্যর্থঃ| রক্তগতে বাযৌ রক্তস্রাবো রক্তাধিষ্ঠানবাতনিবৃত্ত্যর্থঃ| যদা দ্রব্যপ্রভাববিশেষেণ খর্জূরমাতুলুঙ্গসৌবর্চলাদিস্নেহাভ্যঙ্গাদিভির্ন প্রশমমেতি তদা নিযমেন রক্তাবরণং পরিজ্ঞায রক্তমোক্ষণং কর্তব্যং, ন পুনরন্যথা| মেদোগতে পুনরিহানিলে চিকিত্সা নোপদিষ্টা, তস্য স্নেহাবিষযত্বেন বাতব্যাধিকর্মণামবিষযত্বাত্; মহাবাতব্যাধৌ পুনরাবরণপ্রসঙ্গেন মেদোগতমনিলং বক্ষ্যতি||৭||

Adhikarana 6 (8) · Śloka 8

স্নেহোপনাহাগ্নিকর্মবন্ধনোন্মর্দনানি চ | স্নাযুসন্ধ্যস্থিসম্প্রাপ্তে কুর্যাদ্বাযাবতন্দ্রিতঃ ||৮||

স্নাযুগতস্য সন্ধ্যস্থিগতস্য চ বাযোশ্চিকিত্সামাহ- স্নেহেত্যাদি| স্নেহোঽত্র বাহ্য আভ্যন্তরশ্চ| অতন্দ্রিতঃ অনলসঃ; এতেন চিরকালং নিরন্তরং ক্রিযেতি দর্শযতি||৮||

Adhikarana 7 (9) · Śloka 9

নিরুদ্ধেঽস্থনি বা বাযৌ পাণিমন্থেন দারিতে | নাডীং দত্ত্বাঽস্থনি ভিষক্ চূষযেত্পবনং বলী ||৯||

অস্থনি গতে মজ্জস্থে চ কর্ম নির্দিশন্নাহ- নিরুদ্ধে ইত্যাদি| ত্বঙ্মাংসং শস্ত্রেণ বিপাট্য, অস্থি পাণিমন্থেন আরাশস্ত্রেণ বিদ্ধ্বা, তত্র রন্ধ্রে দ্বিমুখীং নাডীং প্রণিধায, মুখমারুতা চূষণেন পবনাপকর্ষণং করণীযমিতি| বলী বলযুক্তঃ| ‘বাহ্যাভ্যন্তরস্নেহৈশ্চ’ ইত্যাদি কেচিত্ পঠন্তি| তত্র বাহ্যস্নেহঃ পরিষেকাবগাহাভ্যঙ্গমস্তিষ্ক্যশিরোবস্ত্যাদিঃ, আভ্যন্তরস্তু পানবস্ত্যাদিঃ; অস্য পাঠস্যাভাবান্নির্ণযো ন কৃতঃ||৯||

Adhikarana 8 (10) · Śloka 10

শুক্রপ্রাপ্তেঽনিলে কার্যং শুক্রদোষচিকিত্সিতম্ |১০|

শুক্রগতস্য বাযোশ্চিকিত্সামাহ- শুক্রেত্যাদি| শুক্রদোষচিকিত্সিতমিতি শুক্রশোণিতশুদ্ধ্যুক্তং চিকিত্সিতং বাজীকরণোক্তং মূত্রদোষচিকিত্সিতোক্তং চ কার্যং; “তেষ্বাদ্যান্ শুক্রদোষাংস্ত্রীন্” (শা. ২) ইত্যাদিকম্|১০|-

Adhikarana 9 (10-11) · Śloka 11

অবগাহকুটীকর্ষূপ্রস্তরাভ্যঙ্গবস্তিভিঃ ||১০|| জযেত্ সর্বাঙ্গজং বাতং সিরামোক্ষৈশ্চ বুদ্ধিমান্ | একাঙ্গগং চ মতিমাঞ্ছৃঙ্গৈশ্চাবস্থিতং জযেত্ ||১১||

ধাতূপধাতুগতমভিধায সর্বাঙ্গগতস্য বাযোশ্চিকিত্সামাহ- অবগাহেত্যাদি| তত্র বাতহরক্বাথপূর্ণদ্রোণ্যাদিষ্ববগাহো দ্রবস্বেদঃ| কুটী চতুর্দ্বারা ভূমাবারোপিতাঽপনীতবিধূমাঙ্গারবাতহরদ্রবসিক্তা, সা চোষ্মস্বেদঃ| কর্ষূঃ পুরুষাযামমাত্রনিখাতদগ্ধাবনিপ্রদেশে বাতহরদ্রবসিক্তে শযনং, স চোষ্মস্বেদবিশেষঃ| স্বিন্নতুষধান্যাদিভিরাস্তৃতাযাং ভূমৌ পরিশযনং প্রস্তরঃ, সোঽপি চোষ্মস্বেদবিশেষ এব| স্নেহপূর্বা অবগাহাদযঃ | এতে চ সর্বাঙ্গগতে বাতে সর্বাঙ্গযোগিনঃ, উপনাহস্বেদস্ত্ববযবগেঽপি বাতে ; তাপস্বেদস্ত্বত্র রূক্ষত্বাদযুক্ত এব| যদ্যপি সর্বাঙ্গগো বাতপ্রকোপঃ প্রাযো ধাতুক্ষযনিমিত্তঃ, তথাঽপি শোণিতাধিষ্ঠানত্বাদ্রক্তমোক্ষোঽপি যুক্তঃ| সিরামোক্ষৈরিতি বহুবচনাত্ পঞ্চানাং সিরাণাং মোক্ষণং স্নেহাদিভিরপ্রশাম্যতি বাতে| একাঙ্গগতস্য বাযোশ্চিকিত্সিতমাহ- একাঙ্গগমিত্যাদি| শৃঙ্গৈশ্চেতি বহুবচনমসকৃত্প্রযোগজ্ঞাপনায| চকারেণ সর্বাঙ্গবাতোক্তাবগাহাদযোঽপ্যনুকৃষ্যন্তে| তৈশ্চাবগাহাদিভিরেকাঙ্গগতমনবস্থিতমেব বাতং জযেত্, অবস্থিতং শৃঙ্গৈরেব||১০-১১||

Adhikarana 10 (12) · Śloka 12

বলাসপিত্তরক্তৈস্তু সংসৃষ্টমবিরোধিভিঃ |১২|

সংসর্গস্য চিকিত্সামাহ- বলাসপিত্তেত্যাদি| সুগমম্|১২|-

Adhikarana 11 (12) · Śloka 13

সুপ্তিবাতে ত্বসৃঙ্মোক্ষং কুর্যাত্তু বহুশো ভিষক্ ||১২|| দিহ্যাচ্চ লবণাগারধূমৈস্তৈলসমন্বিতৈঃ |১৩|

রক্তাবৃতস্য বাযোশ্চিকিত্সামাহ- সুপ্তীত্যাদি| রক্তাবরণকৃতযা সুপ্ত্যা লক্ষিতো বাতঃ সুপ্তিবাতঃ| সুপ্তিঃ স্পর্শাজ্ঞানম্| ন পুনা রসাবরণকৃতযা সুপ্ততযা লক্ষিতো বাতঃ, তস্য স্নেহোপনাহাদিবিষযত্বাত্; অন্যধাতুগতে বাযৌ রক্তাপকর্ষণস্যাযুক্তত্বাত্| বহুশো বহূন্ বারান্, অল্পাল্পস্রাবণাত্; অন্যথা বাতকোপঃ স্যাত্| দিহ্যাত্ লেপযেত্| অন্যে তু সুপ্তবাতস্ত্বগ্গতবাতঃ, ‘বৈবর্ণ্যং স্ফুরণং রৌক্ষ্যং সুপ্তিং চুমচুমাযনম্” (নি. ১) ইত্যুক্তত্বাত্| তেষাং মতে ত্বঙ্মাংসেত্যাদিনা প্রাগুক্তমপি শোণিতমোক্ষণমিহ পুনরুক্তং; লবণাগারধূমৈরিত্যাদিপ্রদেহোঽধিক উক্তঃ||১২||-

Adhikarana 12 (13) · Śloka 14

পঞ্চমূলীশৃতং ক্ষীরং ফলাম্লো রস এব চ ||১৩|| সুস্নিগ্ধো ধান্যযূষো বা হিতো বাতবিকারিণাম্ |১৪|

সর্ববাতবিকারিণাং ভোজনান্যাহ- পঞ্চমূলীত্যাদি| পঞ্চমূলী আদ্যা দ্বিতীযা বা| ফলৈর্দাডিমাদিভিরম্লঃ| রসো মাংসরসঃ| ধান্যযূষঃ কুলত্থাদিবাতহরধান্যযূষঃ| সুস্নিগ্ধশব্দো যূষরসাভ্যাং সহ সম্বধ্যতে| দোষপ্রকৃতিসাত্ম্যাপেক্ষযা ক্ষীরাদি প্রযোজ্যম্| ‘বাতিভ্যো ভোজনং হিতম্’ ইতি কেচিত্ পঠন্তি||১৩||-

Adhikarana 13 (14-15) · Śloka 16

কাকোল্যাদিঃ সবাতঘ্নঃ সর্বাম্লদ্রব্যসংযুতঃ ||১৪|| সানূপৌদকমাংসস্তু সর্বস্নেহসমন্বিতঃ | সুখোষ্ণঃ স্পষ্টলবণঃ সাল্বণঃ পরিকীর্তিতঃ ||১৫|| তেনোপনাহং কুর্বীত সর্বদা বাতরোগিণাম্ |১৬|

উপনাহস্বেদমাহ- কাকোল্যাদিরিত্যাদি| কাকোল্যাদিঃ প্রসিদ্ধঃ| সবাতঘ্ন ইতি সহ বাতঘ্নৈর্ভদ্রদার্বাদিভির্বিদারিগন্ধাদিভির্বর্তত ইতি সবাতঘ্নঃ| সর্বাম্লদ্রব্যসংযুত ইতি অম্লদ্রব্যাণি শুক্তকাঞ্জিকসুরাসৌবীরকদধিমস্ত্বাদীনি; কেচিদাচার্যা এবং বদন্তি- অম্লদ্রব্যাণি দাডিমাদীনি| আনূপৌদকমাংসেন সহ বর্তত ইতি সানূপৌদকমাংসঃ; অত্রানূপশব্দোঽযং কূলচরেষ্বেব বর্ততে, ঔদকশব্দেন তু কোশস্থাঃ পাদিনো মত্স্যাশ্চ গৃহ্যন্তে; যে পুনরৌদকগ্রহণং ন পঠন্তি তে তু পঞ্চস্বপি বর্তযন্তি| সর্বস্নেহা ঘৃততৈলবসামজ্জানস্তৈঃ সমন্বিতঃ| সুখোষ্ণ ঈষদুষ্ণঃ| স্পষ্টলবণ ইতি স্পষ্টানি ব্যক্তানি সৈন্ধবাদীনি লবণানি যত্র সঃ স্পষ্টলবণঃ| সহ আসমন্তাল্লবণেন বর্তত ইতি সাল্বণঃ| উপনাহো বন্ধনম্| এষাং চ ভাগমানমাহ- “মাংসেনাত্রৌষধং তুল্যং যাবতাঽম্লেন চাম্লতা| তাবন্তশ্চ চতুঃস্নেহাঃ স্নিগ্ধত্বং চ যথা ভবেত্”- ইতি| দ্রব্যস্বভাবং স্বেদ্যদেশমপ্যবেক্ষ্য কল্পনীয ইত্যেকে বদন্তি||১৪-১৫||-

Adhikarana 14 (16-17) · Śloka 18

কুঞ্চ্যমানং রুজার্তং বা গাত্রং স্তব্ধমথাপি বা ||১৬|| গাঢং পট্টৈর্নিবধ্নীযাত্ ক্ষৌমকার্পাসিকৌর্ণিকৈঃ | বিডালনকুলোন্দ্রাণাং চর্মগোণ্যাং মৃগস্য বা ||১৭|| প্রবেশযেদ্বা স্বভ্যক্তং সাল্বণেনোপনাহিতম্ |১৮|

অনগ্নিমেব স্বেদং দর্শযন্নাহ- কুঞ্চ্যমানমিত্যাদি| কুঞ্চ্যমানং সঙ্কোচ্যমানং, তচ্চ সিরাগতেন বাযুনা; যদাহ- “কুর্যাত্ সিরাগতঃ শূলং সিরাকুঞ্চনপূরণম্” (নি. ১) ইতি| রুজার্তং বেদনার্তম্, অত্র প্রধানেন বাযুনা; এতেন পিত্তরক্তাবৃতে বাতে বন্ধনবিধির্নিষিদ্ধঃ| অন্যে তু ‘বাল্ককার্পাসিকৌর্ণিকৈঃ’ ইতি পঠন্তি; তত্র বাল্কং বল্কলমযম্| উন্দ্রঃ পানীযবিডালঃ| চর্মগোণী চর্মপ্রসেবকঃ , ছগলাদিগল্ল ইত্যর্থঃ||১৬-১৭||-

Adhikarana 15 (18) · Śloka 19

স্কন্ধবক্ষস্ত্রিকপ্রাপ্তং বাযুং মন্যাগতং তথা ||১৮|| বমনং হন্তি নস্যং চ কুশলেন প্রযোজিতম্ |১৯|

অবযববিশেষগতে বাযৌ ক্রিযাবিশেষমাহ- স্কন্ধেত্যাদি| বক্ষঃ স্তনান্তরালম্| ত্রিকম্ ঊর্ধ্বত্রিকম্| নস্যমত্র শিরোবিরেচনম্| কুশলেন ক্রিযাবিদা অবস্থাবিদা ভিষজেত্যর্থঃ||১৮||-

Adhikarana 16 (19) · Śloka 20

শিরোগতং শিরোবস্তির্হন্তি বাঽসৃগ্বিমোক্ষণম্ ||১৯|| স্নেহং মাত্রাসহস্রং তু ধারযেত্তত্র যোগতঃ |২০|

শিরোগতেঽপি বিশেষমাহ- শির ইত্যাদি| চকারোঽত্র বমনং শিরোবিরেচনং চানুক্তমপি সমুচ্চিনোতি| রক্তমোক্ষণং পুনরত্র ক্রিযান্তরেণাপ্রশাম্যতি বাতে কর্তব্যম্| শিরোবস্তিধারণে কালাবধারণং নির্দিশন্নাহ- স্নেহমিত্যাদি| মাত্রা কালবিশেষঃ| তথাহি- “নিমিষোন্মেষণে পুংসাং স্ফোটনং বা তথাঽঙ্গুলেঃ| অক্ষরস্য লঘোর্বাঽপি মাত্রা তূচ্চারণং ভবেত্”- ইতি| যোগতো যুক্তিতঃ| যুক্তিং চোত্তরতন্ত্রে ক্রিযাকল্পে ব্যাখ্যাস্যামঃ| ননু বাতে দশসহস্রাণ্যুক্তানি, অত্র তু সহস্রমাত্রাধারণমুক্তমিতি বিরোধঃ? সত্যম্, অত্রাক্ষিণি স্থিতানাং সিরাণামত্যন্তসূক্ষ্মত্বাত্তাবতৈব কালেন গুণো ভবতীতি জেজ্জটঃ; গযী তু যোগত ইতি যোগে স্বস্থবৃত্তে মাত্রাসহস্রধারণোপদেশং মন্যতে| তত্র হি শালাক্যক্রিযাকল্পোক্তে শিরোবস্তৌ যথাদোষং ষডষ্টদশসহস্রাণি ধারণমাত্রোক্তা, ন স্বস্থস্য শিরোবস্তিধারণমাত্রা তত্রোক্তা, অত ইহ স্বস্থস্য মাত্রাসহস্রধারণোপদেশঃ কৃত ইতি||১৯||-

Adhikarana 17 (20) · Śloka 21

সর্বাঙ্গগতমেকাঙ্গস্থিতং বাঽপি সমীরণম্ ||২০|| রুণদ্ধি কেবলো বস্তির্বাযুবেগমিবাচলঃ |২১|

তত্র স্নেহবস্তিমেব বাতব্যাধৌ দর্শযন্নাহ- সর্বাঙ্গেত্যাদি||২০||-

Adhikarana 18 (21-26) · Śloka 26

স্নেহস্বেদস্তথাঽভ্যঙ্গো বস্তিঃ স্নেহবিরেচনম্ ||২১|| শিরোবস্তিঃ শিরঃস্নেহো ধূমঃ স্নৈহিক এব চ | সুখোষ্ণঃ স্নেহগণ্ডূষো নস্যং স্নৈহিকমেব চ ||২২|| রসাঃ ক্ষীরাণি মাংসানি স্নেহাঃ স্নেহান্বিতং চ যত্ | ভোজনানি ফলাম্লানি স্নিগ্ধানি লবণানি চ ||২৩|| সুখোষ্ণাশ্চ পরীষেকাস্তথা সংবাহনানি চ | কুঙ্কুমাগুরুপত্রাণি কুষ্ঠৈলাতগরাণি চ ||২৪|| কৌশেযৌর্ণিকরৌমাণি কার্পাসানি গুরূণি চ | নিবাতাতপযুক্তানি তথা গর্ভগৃহাণি চ ||২৫|| মৃদ্বী শয্যাঽগ্নিসন্তাপো ব্রহ্মচর্যং তথৈব চ | সমাসেনৈবমাদীনি যোজ্যান্যনিলরোগিষু ||২৬||

ইদানীং সর্ববাতব্যাধীনামুক্তানামনুক্তানাং চ সামান্যেন সকলং প্রত্যনীকং দর্শযন্নাহ- স্নেহস্বেদ ইত্যাদি| স্নেহস্বেদ ইতি স্নেহস্বেদো ন রূক্ষস্বেদঃ, তস্য বাতকারিত্বাত্; অন্যে তু স্নেহঃ স্বেদ ইতি বিচ্ছিদ্য পঠন্তি, তন্মতে স্নেহান্বিতং চ যদিতি স্নেহগ্রহণং পুনরুক্তম্| রসা মাংসরসাঃ| স্নেহা ঘৃতাদযঃ| স্নেহান্বিতং চ যদিতি যত্ কিচ্চিদ্বস্তু ঘৃতাদিযুক্তমিত্যর্থঃ, অথবা স্নেহগুণযুক্তং যত্ কিঞ্চিদ্বস্তু| ফলাম্লানি দাডিমাদ্যম্লীকৃতানি| সংবাহনং সুখকরস্পর্শঃ| কৌশেযেত্যাদি ‘আবরণানি’ ইতি শেষঃ| কৌশেযং কোশকারকৃমিলালোদ্গতং ‘তসর’ ইতি লোকে, রৌমণি মূষকাদিরোমজাতানি রৌমাণীত্যর্থঃ| গর্ভগৃহাণি অপবরকাদীনীত্যর্থঃ| এতানি চ যথাবস্থং যথাব্যাধি চ প্রযোজ্যানি||২১-২৬||-

Adhikarana 19 (27) · Śloka 27

ত্রিবৃদ্দন্তীসুবর্ণক্ষীরীসপ্তলাশঙ্খিনীত্রিফলাবিডঙ্গানামক্ষসমাঃ ভাগাঃ , বিল্বমাত্রঃ কল্কস্তিল্বকমূলকম্পিল্লকযোঃ, ত্রিফলারসদধিপাত্রে দ্বে দ্বে, ঘৃতপাত্রমেকং, তদৈকধ্যং সংসৃজ্য বিপচেত্; তিল্বকসর্পিরেতত্ স্নেহবিরেচনমুপদিশন্তি বাতরোগিষু | তিল্বকবিধিরেবাশোকরম্যকযোর্দ্রষ্টব্যঃ ||২৭||

তিল্বকসর্পিরুত্পাদযতি- ত্রিবৃদিত্যাদি| ত্রিবৃদাদযো বিডঙ্গান্তা অক্ষসমাঃ কর্ষপ্রমাণা ইত্যর্থঃ| সুবর্ণক্ষীরী কঙ্কুষ্ঠম্| সপ্তলা যবতিক্তাভেদঃ, শঙ্খিন্যপি তদ্ভেদঃ| বিল্বমাত্র ইত্যাদি| তিল্বকঃ পট্টিকারোধ্রঃ| কম্পিল্লকো রোচনিকাবৃক্ষঃ ফলারুণরেণুঃ| এতযোঃ প্রত্যেকং কল্কো বিল্বমাত্রো বিল্বপ্রমাণ ইত্যর্থঃ| ত্রিফলেত্যাদি| ত্রিফলাক্বাথপাত্রে দ্বে, দধিপাত্রে অপি দ্বে; পাত্রমাঢকশ্চতুঃষষ্টিপলানি, স চ দ্রবত্বাদ্ দ্বিগুণো জ্ঞেযঃ; ঘৃতপাত্রমপ্যেবম্| তিল্বকবিধিমতিদিশন্নাহ- তিল্বকেত্যাদি| কল্পনা চেযং- তিল্বকস্থানেঽশোকঃ, অন্যত্র রম্যকঃ; শেষং পুনঃ কম্পিল্লকত্রিবৃদ্দন্ত্যাদি ত্রিফলারসাদি সমানং পূর্বেণ| রম্যকো দ্রেক্কা পর্বতনিম্বঃ ‘রাজনিম্ব’ ইতি লোকে||২৭||

Adhikarana 20 (28) · Śloka 28

তিলপরিপীডনোপকরণকাষ্ঠান্যাহৃত্যানল্পকালং তৈলপরিপীতান্যণূনি খণ্ডশঃ কল্পযিত্বাঽবক্ষুদ্য মহতি কটাহে পানীযেনাভিপ্লাব্য ক্বাথযেত্, ততঃ স্নেহমম্বুপৃষ্ঠাদ্যদুদেতি তত্ সরকপাণ্যোরন্যতরেণাদায বাতঘ্নৌষধপ্রতীবাপং স্নেহপাককল্পেন বিপচেত্, এতদণুতৈলমুপদিশন্তি বাতরোগিষু; অণুভ্যস্তৈলদ্রব্যেভ্যো নিষ্পাদ্যত ইত্যণুতৈলম্ ||২৮||

অণুতৈলমুত্পাদযন্নাহ- তিলেত্যাদি| তিলপরিপীডনোপকরণকাষ্ঠানি চক্রযষ্টিমর্কটিকাপ্রভৃতীনি| অনল্পকালং তৈলপরিপীতানি চিরকালং তৈলভাবিতানীত্যর্থঃ| অণূনি সূক্ষ্মাণি| খণ্ডশঃ কল্পযিত্বা কৃত্বেত্যর্থঃ| অবক্ষুদ্য সুষ্ঠু পিষ্ট্বা চূর্ণযিত্বা চ| অভিপ্লাব্য প্রক্ষিপ্য| অম্বুপৃষ্ঠাত্ পানীযোপরি, যদুদেতি যদুত্পদ্যতে, তত্ সরকপাণ্যোরন্যতরেণৈকেন, আদায গৃহীত্বা; সরকং মৃন্মযং পাত্রং ‘শরাব’ ইতি লোকে, গযী তু সরকং কাংস্যতাম্রাদিভাজনং; পাণির্হস্তঃ| বাতঘ্নৌষধানি ভদ্রদার্বাদীনি| প্রতিবাপঃ কল্কঃ| স্নেহপাককল্পেন বিপচেদিতি স্নেহচতুর্থাংশো ভেষজকল্কঃ, স্নেহাচ্চতুর্গুণো দ্রব ইত্যর্থঃ| দ্রবাঃ পুনরত্র বক্ষ্যমাণতৈলোদিতাঃ ক্বাথমাংসরসক্ষীরাম্লানি চত্বারি সমভাগানি; দ্রবানুক্তেশ্চতুর্গুণমেবাত্র জলমিত্যন্যে| অণুভ্য ইত্যাদি কারণাণুত্বেন কার্যেষ্বণুত্বব্যপদেশ ইত্যর্থঃ||২৮||

Adhikarana 21 (29) · Śloka 29

অথ মহাপঞ্চমূলকাষ্ঠৈর্বহুভিরবদহ্যাবনিপ্রদেশমসিতমুষিতমেকরাত্রমুপশান্তেঽগ্নাবপোহ্য ভস্ম নিবৃত্তাং ভূমিং বিদারিগন্ধাদিসিদ্ধেন তৈলঘটশতেন তুল্যপযসাঽভিষিচ্যৈকরাত্রমবস্থাপ্য ততো যাবতী মৃত্তিকা স্নিগ্ধা স্যাত্তামাদাযোষ্ণোদকেন মহতি কটাহেঽভ্যাসিঞ্চেত্, তত্র যত্তৈলমুত্তিষ্ঠেত্তত্ পাণিভ্যাং পর্যাদায স্বনুগুপ্তং নিদধ্যাত্; ততস্তৈলং বাতহরৌষধক্বাথমাংসরসক্ষীরাম্লভাগসহস্রেণ সহস্রপাকং বিপচেদ্যাবতা কালেন শক্নুযাত্ পক্তুং, প্রতিবাপশ্চাত্র হৈমবতা দক্ষিণাপথগাশ্চ গন্ধা বাতঘ্নানি চ, তস্মিন্ সিধ্যতি শঙ্খানাধ্মাপযেদ্দুন্দুভীনাঘাতযেচ্ছত্রং ধারযেদ্বালব্যজনৈশ্চ বীজযেদ্ব্রাহ্মণসহস্রং ভোজযেত্, তত্ সাধু সিদ্ধমবতার্য সৌবর্ণে রাজতে মৃন্মযে বা পাত্রে স্বনুগুপ্তং নিদধ্যাত্, তদেতত্ সহস্রপাকমপ্রতিবারবীর্যং রাজার্হং তৈলম্; এবং ভাগশতবিপক্বং শতপাকম্ ||২৯||

সহস্রপাকং ব্যুত্পাদযন্নাহ- অথেত্যাদি| পঞ্চমূলপ্রমাণং তৈলং পরিপ্লাব্য ভূমিভাগপ্রমাণেন| অসিতং কৃষ্ণভূমিপ্রদেশমিত্যর্থঃ| উষিতং স্থিতম্| অপোহ্য স্ফোটযিত্বা| নিবৃত্তাং ভূমিম্ উপশান্ততাপামিত্যর্থঃ| বিদারিগন্ধাদীত্যাদি| কল্ককষাযকল্পেন বিদারিগন্ধাদিপক্বেন তৈলঘটশতেন তুল্যপযসা ভূমিমভিসিঞ্চযেত্| তৈলমত্র তিলতৈলম্| স্নিগ্ধেতি তৈলক্ষীরাভ্যামার্দ্রীকৃতেত্যর্থঃ| মহতি কটাহে অত্রৈকবচনং জাত্যপেক্ষযা| তেনৈকস্মিন্ দ্বযোস্ত্রিষু বা| অভ্যাষিঞ্চেত্ প্লাবযেত্| বাতহরৌষধানি ভদ্রদার্বাদীনি, তেষাং ক্বাথঃ ক্বাথকল্পেন সিদ্ধঃ, মাংসরসঃ জাঙ্গলমাংসরসকল্পেন সিদ্ধঃ, ক্ষীরং গোক্ষীরম্, অম্লং কাঞ্জিকম্| ভাগসহস্রেণেতি অত্র ভাগশ্চতুর্থাংশঃ; তেন বাতহরক্বাথমাংসরসক্ষীরাম্লানাং প্রত্যেকং ভাগসহস্রং; তেনৈতদুক্তং ভবতি- প্রতিপাকং ক্বাথাদিভিস্তৈলাপেক্ষযা প্রত্যেকং পাদিকৈঃ সমুদাযতস্তৈলসমৈঃ সহস্রপাকং যথা ভবত্যেবং বারসহস্রং পচেদিতি গযী| জেজ্জটস্তু ক্বাথাদীনাং সমুদাযতস্তৈলাপেক্ষযা চতুর্থাংশানাং সহস্রমপ্যেকবারমেব নিক্ষিপ্য বিপচেদিতি মন্যতে, সহস্রপাকমিতি তু সঞ্জ্ঞা, প্রত্যেকং সহস্রবারান্ পাকে সতি তৈলোপক্ষযঃ স্যাত্| এতচ্চ গযদাসেন দূষিতং; তদ্যথা- নহি সর্বতৈলোপক্ষযো ভবতি, কিন্তু কিঞ্চিদেব, প্রতিপাকং ক্ষীরস্য পাদিকস্য প্রবেশাত্, অল্পঃ পুনরুপক্ষযো রাজ্ঞাং মহাধনানাং যত্কিঞ্চিদেবেতি| তস্মাত্ মহাচার্যাভ্যাং ব্যাখ্যাতত্বাত্ পাকপ্রকারদ্বযমপি প্রমাণম্| যদ্যপি দ্রবসহস্রভাগেন শতং বারান্ বিপচেদিতি কেনচিদুক্তং, তথাঽপীদৃশং ন বোদ্ধব্যং, প্রমাদব্যাখ্যানত্বাত্| প্রতিবাপশ্চাত্র গন্ধকল্কস্যাবাপ ইত্যর্থঃ| হৈমবতা ইতি হৈমবতা উত্তরাপথসম্ভূতাঃ, তে পুনঃ কস্তূরীশটীকুষ্ঠমাংসীসরলসুরদারুমুরাদযঃ| দক্ষিণপথগাঃ চন্দনজাতীফলকঙ্কোললবঙ্গাদযঃ| তৈঃ কল্কীকৃতৈস্তৈলপাদিকৈঃ| বাতঘ্নানি চেতি বাতঘ্নৈরপি শতপুষ্পামিশ্রিপ্রভৃতিভির্বাতহরগণপরিপঠিতৈঃ| তত্র শঙ্খাধ্মাপনাদ্যচিন্ত্যশক্তিত্বাদতিশযব্যুত্পাদনার্থম্| অন্যে তু “তৈলঘটশতেন দুগ্ধবসাভ্যামভ্যাষিঞ্চেত্” ইতি পঠন্তি; তন্ন পঠিতব্যং, বিবেককর্তৃভিরুপাধ্যাযৈরব্যাখ্যাতত্বাত্| শতপাকমুত্পাদযন্নাহ- এবং ভাগশতেত্যাদি| এতত্ সুবোধম্||২৯||হ্

Adhikarana 22 (30) · Śloka 30

গন্ধর্বহস্তমুষ্ককনক্তমালাটরূষকপূতীকারগ্বধচিত্রকাদীনাং পত্রাণ্যার্দ্রাণি লবণেন সহোদূখলেঽবক্ষুদ্য স্নেহঘটে প্রক্ষিপ্যাবলিপ্য গোশকৃদ্ভির্দাহযেত্; এতত্পত্রলবণমুপদিশন্তি বাতরোগেষু ||৩০||

বাতপ্রধানেষু কফপ্রধানেষু বা তথা স্তব্ধসঙ্কুচিতাধ্মাতাদিষু ভোজনোপযোগীনি লবণান্যুত্পাদযন্নাহ- গন্ধর্বেত্যাদি| গন্ধর্বহস্ত এরণ্ডঃ, মুষ্ককঃ কৃষ্ণপুষ্পমুষ্ককঃ, নক্তমালঃ করঞ্জঃ, পূতীকশ্চিরবিল্বঃ, সর্বপত্রসমং লবণং সৈন্ধবং দেযমিতি বৃদ্ধবৈদ্যাঃ| এতদ্বাতরোগেষু কফপ্রাযেষু||৩০||

Adhikarana 23 (31) · Śloka 31

এবং স্নুহীকাণ্ডবার্তাকুশিগ্রুলবণানি সঙ্ক্ষুদ্য ঘটং পূরযিত্বা সর্পিস্তৈলবসামজ্জভিঃ প্রক্ষিপ্যাবলিপ্য গোশকৃদ্ভির্দাহযেত্; এতত্ স্নেহলবণমুপদিশন্তি বাতরোগেষু | (ইতি কাণ্ডলবণম্) ||৩১||

এবমিত্যাদি| স্নুহীকাণ্ডঃ সেহুণ্ডযষ্টিঃ| চতুঃস্নেহস্য লবণস্য সৈন্ধবস্য চ সর্বদ্রব্যেণ সমত্বং বোদ্ধব্যম্| বাতরোগেষু বাতপ্রাযেষু||৩১||

Adhikarana 24 (32) · Śloka 32

গণ্ডীরপলাশকুটজবিল্বার্কস্নুহ্যপামার্গপাটলাপারিভদ্রকনাদেযীকৃষ্ণগন্ধানীপনিম্বনির্দহন্যটরূষকনক্তমালক- পূতিকবৃহতীকণ্টকারিকাভল্লাতকেঙ্গুদীবৈজযন্তীকদলীবাষ্পদ্বযেক্ষুরকেন্দ্রবারুণীশ্বেতমোক্ষকাশোকা ইত্যেবং বর্গং সমূলপত্রশাখমার্দ্রমাহৃত্য লবণেন সহ সংসৃজ্য পূর্ববদ্দগ্ধ্বা ক্ষারকল্পেন পরিস্রাব্য বিপচেত্, প্রতিবাপশ্চাত্র হিঙ্গ্বাদিভিঃ পিপ্পল্যাদিভির্বা | ইত্যেতত্ কল্যাণকলবণং বাতরোগগুল্মপ্লীহাগ্নিষঙ্গাজীর্ণার্শোঽরোচকার্তানাং কাসাদিভিঃ কৃমিভিরুপদ্রুতানাং চোপদিশন্তি পানভোজনেষ্বপীতি ||৩২||

গণ্ডীরেত্যাদি| গণ্ডীরো দ্বিবিধঃ স্থলজো জলজশ্চ; তত্র স্থলজো হরিতশাকপঠিতঃ, জলজো জলপিপ্পলীগণ্ডীরঃ; পলাশঃ শটী; নাদেযী জলজম্বূঃ; কৃষ্ণগন্ধা শোভাঞ্জনকঃ; নীপো মহাকদম্বঃ; নির্দহনী মোরটঃ, অগ্নিমন্থ ইত্যেকে, অপরে চিত্রকমাহুঃ; বৈজযন্তী অরণিকা; বাষ্পদ্বযং বাষ্পিকাদ্বযং তচ্চ লোহিতং কৃষ্ণং চ সিন্ধুবিষযে, কেচিদ্বর্ষাভূদ্বযমিতি পঠন্তি; ইক্ষুরকস্তালমখানা ; সর্বদ্রব্যসমং সৈন্ধবলবণম্; এতত্ সর্বমুদূখলে সঙ্ক্ষুদ্য দহেত্| তদ্ভস্ম পৃথক্ কৃত্বা লবণাত্, ক্ষারকল্পেন পরিস্রাব্য, তত্র লবণং প্রক্ষিপ্য, ক্ষারবন্মৃদ্বগ্নিনা পচেত্| প্রতিবাপশ্চাত্র লবণপাদঃ পিপ্পল্যাদের্হিঙ্গ্বাদের্বা| অগ্নিসঙ্গোঽগ্নিমান্দ্যম্| অজীর্ণম্ অলসকবিসূচিকাদি| কাসাদিভিরিত্যাদিশব্দাচ্ছ্বাসহিক্কাদযঃ কফবাতজাঃ| কেচিত্ প্রতিবাপং পিপ্পল্যাদিং মন্যন্তে, হিঙ্গ্বাদিমপরে, হিঙ্গ্বাদিং পিপ্পল্যাদিং চান্যে, এতত্ত্রযমপি প্রমাণং, পূর্বেষামাচার্যাণাং সম্মতত্বাত্||৩২||

Adhikarana 25 (33) · Śloka 33

ভবতি চাত্র- বিষ্যন্দনাদুষ্ণভাবাদ্দোষাণাং চ বিপাচনাত্ | সংস্কারপাচনাচ্চেদং বাতরোগেষু শস্যতে ||৩৩||

লবণফলানুশংসামাহ- বিষ্যন্দনাদিত্যাদি| বিষ্যন্দনাত্ স্রবণাত্| লবণফলানুশংসাং কেচিদভিদধতি, অন্যেঽনার্ষমাহুরিমং পাঠম্||৩৩||

Adhikarana puShpikA · Śloka 4

ইতি সুশ্রুতসংহিতাযাং চিকিত্সাস্থানে বাতব্যাধিচিকিত্সিতং নাম চতুর্থোঽধ্যাযঃ ||৪||

ইতি শ্রীডল্হণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে চতুর্থোঽধ্যাযঃ||৪||