Adhikarana 1 (1-2) · Śloka 3
অথাতো বিসর্পনাডীস্তনরোগচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| সাধ্যা বিসর্পাস্ত্রয আদিতো যে ন সন্নিপাতক্ষতজৌ হি সাধ্যৌ |৩|
अथातो विसर्पनाडीस्तनरोगचिकित्सितं व्याख्यास्यामः ||१|| यथोवाच भगवान् धन्वन्तरिः ||२|| साध्या विसर्पास्त्रय आदितो ये न सन्निपातक्षतजौ हि साध्यौ |३|
🔊 Audio coming soon
সাধ্যা ইত্যাদি| সাধ্যাসাধ্যবিভাগকরণং পুনশ্চিকিত্সিতপ্রক্রমাত্||১-২||-
Adhikarana 2 (3) · Śloka 3
সাধ্যেষু তত্পথ্যগণৈর্বিদধ্যাদ্ধৃতানি সেকাংশ্চ তথোপদেহান্ ||৩||
साध्येषु तत्पथ्यगणैर्विदध्याद्धृतानि सेकांश्च तथोपदेहान् ||३||
🔊 Audio coming soon
তেষাং সর্বেষামেব সামান্যচিকিত্সিতসূত্রং নির্দিশন্নাহ- সাধ্যেষ্বিত্যাদি| তত্পথ্যগণৈর্যথাক্রমং বাতপিত্তকফজেষু বাতাদিদোষহরগণৈঃ||৩||
Adhikarana 3 (4-5) · Śloka 5
মুস্তাশতাহ্বাসুরদারুকুষ্ঠবারাহিকুস্তুম্বুরুকৃষ্ণগন্ধাঃ | বাতাত্মকে চোষ্ণগণাঃ প্রযোজ্যাঃ সেকেষু লেপেষু তথা শৃতেষু ||৪|| যত্ পঞ্চমূলং খলু কণ্টকাখ্যমল্পং মহচ্চাপ্যথ বল্লিজং চ | তচ্চোপযোজ্যং ভিষজা প্রদেহে সেকে ঘৃতে চাপি তথৈব তৈলে ||৫||
मुस्ताशताह्वासुरदारुकुष्ठवाराहिकुस्तुम्बुरुकृष्णगन्धाः | वातात्मके चोष्णगणाः प्रयोज्याः सेकेषु लेपेषु तथा शृतेषु ||४|| यत् पञ्चमूलं खलु कण्टकाख्यमल्पं महच्चाप्यथ वल्लिजं च | तच्चोपयोज्यं भिषजा प्रदेहे सेके घृते चापि तथैव तैले ||५||
🔊 Audio coming soon
মুস্তেত্যাদি| কৃষ্ণগন্ধা শোভাঞ্জনকঃ, শমীত্যপরে| উষ্ণগণা ভদ্রদার্বাদযঃ পিপ্পল্যাদযশ্চ| যদিত্যাদি তৃণাখ্যং পঞ্চমূলমপহায শেষাণি চত্বারি পঞ্চমূলানি গ্রাহ্যাণি||৪-৫||
Adhikarana 4 (6-9) · Śloka 9
কসেরুশৃঙ্গাটকপদ্মগুন্দ্রাঃ সশৈবলাঃ সোত্পলকর্দমাশ্চ | বস্ত্রান্তরাঃ পিত্তকৃতে বিসর্পে লেপা বিধেযাঃ সঘৃতাঃ সুশীতাঃ ||৬|| হ্রীবেরলামজ্জকচন্দনানি স্রোতোজমুক্তামণিগৈরিকাশ্চ | ক্ষীরেণ পিষ্টাঃ সঘৃতাঃ সুশীতা লেপাঃ প্রযোজ্যাস্তনবঃ সুখায ||৭|| প্রপৌণ্ডরীকং মধুকং পযস্যা মঞ্জিষ্ঠিকা পদ্মকচন্দনে চ | সুগন্ধিকা চেতি সুখায লেপঃ পৈত্তে বিসর্পে ভিষজা প্রযোজ্যঃ ||৮|| ন্যগ্রোধবর্গৈঃ পরিষেচনং চ ঘৃতং চ কুর্যাত্ স্বরসেন তস্য | শীতৈঃ পযোভিশ্চ মধূদকৈশ্চ সশর্করৈরিক্ষুরসৈশ্চ সেকান্ ||৯||
कसेरुशृङ्गाटकपद्मगुन्द्राः सशैवलाः सोत्पलकर्दमाश्च | वस्त्रान्तराः पित्तकृते विसर्पे लेपा विधेयाः सघृताः सुशीताः ||६|| ह्रीवेरलामज्जकचन्दनानि स्रोतोजमुक्तामणिगैरिकाश्च | क्षीरेण पिष्टाः सघृताः सुशीता लेपाः प्रयोज्यास्तनवः सुखाय ||७|| प्रपौण्डरीकं मधुकं पयस्या मञ्जिष्ठिका पद्मकचन्दने च | सुगन्धिका चेति सुखाय लेपः पैत्ते विसर्पे भिषजा प्रयोज्यः ||८|| न्यग्रोधवर्गैः परिषेचनं च घृतं च कुर्यात् स्वरसेन तस्य | शीतैः पयोभिश्च मधूदकैश्च सशर्करैरिक्षुरसैश्च सेकान् ||९||
🔊 Audio coming soon
পিত্তবিসর্পচিকিত্সিতমাহ- কসের্বিত্যাদি| শৃঙ্গাটকং জলমধ্যে ত্রিকণ্টকম্| গুন্দ্রা পহরকভেদঃ| সশৈবলাঃ শৈবালযুক্তা ইত্যর্থঃ| কর্দমঃ পঙ্ক ইত্যর্থঃ| বস্ত্রান্তরা বস্ত্রেণান্তরীকৃতাঃ, তে হি সুখেনাপনেতুং শক্যন্তে| হ্রীবেরেত্যাদি হ্রীবেরঃ বালকম্| লামজ্জক উশীরমূলম্ | স্রোতোজং সৌবীরাঞ্জনম্| তনবঃ অচ্ছাঃ| সুখাযেতি তনুত্বান্নোষ্মাণমন্তঃ প্রবেশযতীত্যর্থঃ| শ্রীবাগ্ভট আহ- “শ্লক্ষ্ণশুষ্কঘনো লেপশ্চন্দনস্যাপি দাহকৃত্| ত্বগ্গতস্যোষ্মণো রোধাচ্ছীতকৃচ্চান্যথাঽগুরোঃ”- ইতি| প্রপৌণ্ডরীকমিত্যাদি পযস্যা ক্ষীরবিদারী ; জেজ্জটাচার্যস্তু অর্কপুষ্পীমাহ| সুগন্ধিকা উত্পলসারিবা| ন্যগ্রোধেত্যাদি| মধূদকং মধুমিশ্রমুদকম্||৬-৯||
Adhikarana 5 (10-13) · Śloka 13
ঘৃতস্য গৌরীমধুকারবিন্দরোধ্রাম্বুরাজাদনগৈরিকেষু | তথর্ষভে পদ্মকসারিবাসু কাকোলিমেদাকুমুদোত্পলেষু ||১০|| সচন্দনাযাং মধুশর্করাযাং দ্রাক্ষাস্থিরাপৃশ্নিশতাহ্বযাসু | কল্কীকৃতাসূদকমত্র দত্ত্বা ন্যগ্রোধবর্গস্য তথা স্থিরাদেঃ ||১১|| গণস্য বিল্বাদিকপঞ্চমূল্যাশ্চতুর্গুণং ক্ষীরমথাপি তদ্বত্ | প্রস্থং বিপক্বং পরিষেচনেন পৈত্তীর্নিহন্যাত্তু বিসর্পনাডীঃ ||১২|| বিস্ফোটদুষ্টব্রণশীর্ষরোগান্ পাকং তথাঽঽস্যস্য নিহন্তি পানাত্ | গ্রহার্দিতে শোষিণি চাপি বালে ঘৃতং হি গৌর্যাদিকমেতদিষ্টম্ ||১৩||
घृतस्य गौरीमधुकारविन्दरोध्राम्बुराजादनगैरिकेषु | तथर्षभे पद्मकसारिवासु काकोलिमेदाकुमुदोत्पलेषु ||१०|| सचन्दनायां मधुशर्करायां द्राक्षास्थिरापृश्निशताह्वयासु | कल्कीकृतासूदकमत्र दत्त्वा न्यग्रोधवर्गस्य तथा स्थिरादेः ||११|| गणस्य बिल्वादिकपञ्चमूल्याश्चतुर्गुणं क्षीरमथापि तद्वत् | प्रस्थं विपक्वं परिषेचनेन पैत्तीर्निहन्यात्तु विसर्पनाडीः ||१२|| विस्फोटदुष्टव्रणशीर्षरोगान् पाकं तथाऽऽस्यस्य निहन्ति पानात् | ग्रहार्दिते शोषिणि चापि बाले घृतं हि गौर्यादिकमेतदिष्टम् ||१३||
🔊 Audio coming soon
গৌর্যাদিঘৃতমাহ- ঘৃতস্যেত্যাদি| গৌরী হরিদ্রা, গোরোচনেত্যন্যে| অরবিন্দং পদ্মম্| অম্বু বালকম্| রাজাদনং ক্ষীরিকা| ঋষভঃ কূর্চশীর্ষকঃ স্বনামপ্রসিদ্ধঃ| মধুনঃ শর্করা মধুশর্করা| স্থিরা শালপর্ণী| গৌর্যাদিশতাহ্বান্তানাং কল্কীকৃতানাং চত্বারি পলানি, ন্যগ্রোধাদের্বিদারিগন্ধাদের্মহতোঽপি পঞ্চমূলস্য ত্রযাণামুদকং ক্বাথং চতুর্গুণং ঘৃতস্য, ক্ষীরমপি গব্যং চতুর্গুণমিতি; প্রস্থং ঘৃতস্যেতি দ্বাত্রিংশত্পলানি দ্রবদ্রব্যত্বাত্; অন্যে পুনঃ কল্কমানমষ্টপলমাহুঃ||১০-১৩||
Adhikarana 6 (14-15) · Śloka 15
অজাঽশ্ববগন্ধা সরলা সকালা সৈকৈষিকা চাপ্যথবাঽজশৃঙ্গী | গোমূত্রপিষ্টো বিহিতঃ প্রদেহো হন্যাদ্বিসর্পং কফজং স শীঘ্রম্ ||১৪|| কালানুসার্যাগুরুচোচগুঞ্জারাস্নাবচাশীতশিবেন্দ্রপর্ণ্যঃ | পালিন্দিমুঞ্জাতমহীকদম্বা হিতা বিসর্পেষু কফাত্মকেষু ||১৫||
अजाऽश्ववगन्धा सरला सकाला सैकैषिका चाप्यथवाऽजशृङ्गी | गोमूत्रपिष्टो विहितः प्रदेहो हन्याद्विसर्पं कफजं स शीघ्रम् ||१४|| कालानुसार्यागुरुचोचगुञ्जारास्नावचाशीतशिवेन्द्रपर्ण्यः | पालिन्दिमुञ्जातमहीकदम्बा हिता विसर्पेषु कफात्मकेषु ||१५||
🔊 Audio coming soon
কফবিসর্পচিকিত্সামাহ- অজেত্যাদি| অজা অজগন্ধা ‘বোবঈ’ ইতি লোকে| সরলা ত্রিবৃত্| কালা কাসমর্দঃ | একৈষিকা শতাবরী , অন্যে ত্রিবৃদ্ভেদমাহুঃ| অজশৃঙ্গী ছাগলবিষাণিকা, ‘উত্তমারণী’ ইতি লোকে; গযদাসাচার্যেণ কর্কটশৃঙ্গী ব্যাখ্যাতা| কালানুসার্যেত্যাদি- কালানুসার্যা তগরং, চোচঃ ত্বক্, গুঞ্জা চিরহিণ্টিকা, শীতশিবং শতপুষ্পাভেদঃ, ইন্দ্রপর্ণী ইন্দ্রবারুণী, অত্র গযদাসাচার্যেণ ইন্দ্রপুষ্পী পঠিতা ব্যাখ্যাতা চ; ইন্দ্রপুষ্পী লাঙ্গলকী| পালিন্দিঃ কালবল্লী, মুঞ্জাত উত্তরাপথজঃ স্বল্পকন্দঃ, মহীকদম্বোঽলম্বুষা মুণ্ডিতিকেতি লোকে, জেজ্জটাচার্যো ভূকদম্বমাহ||১৪-১৫||
Adhikarana 7 (16) · Śloka 17
গণস্তু যোজ্যো বরুণপ্রবৃত্তঃ ক্রিযাসু সর্বাসু বিচক্ষণেন | সংশোধনং শোণিতমোক্ষণং চ শ্রেষ্ঠং বিসর্পেষু চিকিত্সিতং হি ||১৬|| সর্বাংশ্চ পক্বান্ পরিশোধ্য ধীমান্ ব্রণক্রমেণোপচরেদ্যথোক্তম্ |১৭|
गणस्तु योज्यो वरुणप्रवृत्तः क्रियासु सर्वासु विचक्षणेन | संशोधनं शोणितमोक्षणं च श्रेष्ठं विसर्पेषु चिकित्सितं हि ||१६|| सर्वांश्च पक्वान् परिशोध्य धीमान् व्रणक्रमेणोपचरेद्यथोक्तम् |१७|
🔊 Audio coming soon
গণ ইত্যাদি| বরুণপ্রবৃত্তো গণো বরুণাদিঃ| ক্রিযাসু সর্বাসু পানাদিকাসু| আরম্ভে সর্বেষাং সামান্যচিকিত্সিতে সংশমনমভিধায সম্প্রাপ্তৌ সংশোধনমুদ্দিশন্নাহ- সংশোধনমিত্যাদি| রক্তাবসেচনং জলৌকাভিঃ, সর্বেষামেব রক্তপিত্তপ্রধানত্বাদলাবুশৃঙ্গযোস্তত্র দুরবচারত্বাত্||১৬||-
Adhikarana 8 (17-19) · Śloka 20
নাডী ত্রিদোষপ্রভবা ন সিধ্যেচ্ছেষাশ্চতস্নঃ খলু যত্নসাধ্যাঃ ||১৭|| তত্রানিলোত্থামুপনাহ্য পূর্বমশেষতঃ পূযগতিং বিদার্য | তিলৈরপামার্গফলৈশ্চ পিষ্ট্বা সসৈন্ধবৈর্বন্ধনমত্র কুর্যাত্ ||১৮|| প্রক্ষালনে চাপি সদা ব্রণস্য যোজ্যং মহদ্যত্ খলু পঞ্চমূলম্ | হিংস্রাং হরিদ্রাং কটুকাং বলাং চ গোজিহ্বিকাং চাপি সবিল্বমূলাম্ ||১৯|| সংহৃত্য তৈলং বিপচেদ্ব্রণস্য সংশোধনং পূরণরোপণং চ |২০|
नाडी त्रिदोषप्रभवा न सिध्येच्छेषाश्चतस्नः खलु यत्नसाध्याः ||१७|| तत्रानिलोत्थामुपनाह्य पूर्वमशेषतः पूयगतिं विदार्य | तिलैरपामार्गफलैश्च पिष्ट्वा ससैन्धवैर्बन्धनमत्र कुर्यात् ||१८|| प्रक्षालने चापि सदा व्रणस्य योज्यं महद्यत् खलु पञ्चमूलम् | हिंस्रां हरिद्रां कटुकां बलां च गोजिह्विकां चापि सबिल्वमूलाम् ||१९|| संहृत्य तैलं विपचेद्व्रणस्य संशोधनं पूरणरोपणं च |२०|
🔊 Audio coming soon
নাডীনামবসরঃ- নাডীত্যাদি| তত্রেত্যাদি| উপনাহ্য পাচনদ্রব্যৈরববদ্ধ্বা; তন্নেচ্ছতি গযী, কস্মাত্? নাডীবচনাত্, নহ্যপক্বে ব্রণে নাডীতি; তস্মাদ্বাতহরদ্রব্যৈরেবোপনাহঃ| প্রক্ষালন ইত্যাদি| সংহৃত্য একীকৃত্য| স্নেহচতুর্থাংশো ভেষজকল্কঃ, স্নেহাচ্চতুর্গুণো দ্রবঃ, অনেন ন্যাযেন পক্তব্যম্| দ্রবোঽত্র জলম্, “অনুক্তে দ্রবকার্যে তু সর্বত্র সলিলং স্মৃতম্” (চি. ৩১) ইতি বচনাত্||১৭-১৯||-
Adhikarana 9 (20-21) · Śloka 21
পিত্তাত্মিকাং প্রাগুপনাহ্য ধীমানুত্কারিকাভিঃ সপযোঘৃতাভিঃ ||২০|| নিপাত্য শস্ত্রং তিলনাগদন্তীযষ্ট্যাহ্বকল্কৈঃ পরিপূরযেত্তাম্ | প্রক্ষালনে চাপি সসোমনিম্বা নিশা প্রযোজ্যা কুশলেন নিত্যম্ ||২১||
पित्तात्मिकां प्रागुपनाह्य धीमानुत्कारिकाभिः सपयोघृताभिः ||२०|| निपात्य शस्त्रं तिलनागदन्तीयष्ट्याह्वकल्कैः परिपूरयेत्ताम् | प्रक्षालने चापि ससोमनिम्बा निशा प्रयोज्या कुशलेन नित्यम् ||२१||
🔊 Audio coming soon
পিত্তেত্যাদি| উত্কারিকাভিঃ লপ্সিকাভিঃ| নাগদন্তী দন্তী| সোমঃ সোমসঞ্জ্ঞঃ , সোমলতেত্যন্যে; কট্ফল ইতি জেজ্জটাচার্যঃ; তন্নেচ্ছতি গযী, তস্য তীক্ষ্ণোষ্ণত্বাত্||২০-২১||
Adhikarana 10 (22) · Śloka 22
শ্যামাত্রিভণ্ডীত্রিফলাসু সিদ্ধং হরিদ্রযো রোধ্রকবৃক্ষযোশ্চ | ঘৃতং সদুগ্ধং ব্রণতর্পণেন হন্যাদ্গতিং কোষ্ঠগতাঽপি যা স্যাত্ ||২২||
श्यामात्रिभण्डीत्रिफलासु सिद्धं हरिद्रयो रोध्रकवृक्षयोश्च | घृतं सदुग्धं व्रणतर्पणेन हन्याद्गतिं कोष्ठगताऽपि या स्यात् ||२२||
🔊 Audio coming soon
শ্যামেত্যাদি|- শ্যামা বৃদ্ধদারুকঃ| ত্রিভণ্ডী ত্রিবৃত্| বৃক্ষকঃ কুটজঃ||২২||
Adhikarana 11 (23-25) · Śloka 25
নাডীং কফোত্থামুপনাহ্য সম্যক্ কুলত্থসিদ্ধার্থকশক্তুকিণ্বৈঃ | মৃদূকৃতামেষ্য গতিং বিদিত্বা নিপাতযেচ্ছস্ত্রমশেষকারী ||২৩|| দদ্যাদ্ব্রণে নিম্বতিলান্ সদন্তীন্ সুরাষ্ট্রজাসৈন্ধবসম্প্রযুক্তান্ | প্রক্ষালনে চাপি করঞ্জনিম্ব জাত্যক্ষপীলুস্বরসাঃ প্রযোজ্যাঃ ||২৪|| সুবর্চিকাসৈন্ধবচিত্রকেষু নিকুম্ভতালীতলরূপিকাসু | ফলেষ্বপামার্গভবেষু চৈব কুর্যাত্ সমূত্রেষু হিতায তৈলম্ ||২৫||
नाडीं कफोत्थामुपनाह्य सम्यक् कुलत्थसिद्धार्थकशक्तुकिण्वैः | मृदूकृतामेष्य गतिं विदित्वा निपातयेच्छस्त्रमशेषकारी ||२३|| दद्याद्व्रणे निम्बतिलान् सदन्तीन् सुराष्ट्रजासैन्धवसम्प्रयुक्तान् | प्रक्षालने चापि करञ्जनिम्ब जात्यक्षपीलुस्वरसाः प्रयोज्याः ||२४|| सुवर्चिकासैन्धवचित्रकेषु निकुम्भतालीतलरूपिकासु | फलेष्वपामार्गभवेषु चैव कुर्यात् समूत्रेषु हिताय तैलम् ||२५||
🔊 Audio coming soon
নাডীমিত্যাদি| কিণ্বঃ সুরাবীজম্| অশেষকারী বৈদ্যঃ| দদ্যাদিত্যাদি| সুরাষ্ট্রজা তুবরমৃত্তিকা| প্রক্ষালনে ইত্যাদি| নিকুম্ভো দন্তী| তালীতলং মুশলীমূলং ; নলমিত্যন্যে পঠন্তি, তত্র নলঃ শুষিরপর্বা স্বনামপ্রসিদ্ধঃ| রূপিকা শ্বেতার্কঃ| ‘নীলীফলরূপিকাভিঃ’ ইতি কেচিত্ পঠন্তি; নীলীফলং শারদং ফলং, শ্রীফলিকেতি লোকে||২৩-২৫||
Adhikarana 12 (26-28) · Śloka 28
নাডীং তু শল্যপ্রভবাং বিদার্য নির্হৃত্য শল্যং প্রবিশোধ্য মার্গম্ | সংশোধযেত্ ক্ষৌদ্রঘৃতপ্রগাঢৈস্তিলৈস্ততো রোপণমাশু কুর্যাত্ ||২৬|| কুম্ভীকখর্জূরকপিত্থবিল্ববনস্পতীনাং চ শলাটুবর্গৈঃ | কৃত্বা কষাযং বিপচেত্তু তৈলমাবাপ্য মুস্তাসরলাপ্রিযঙ্গূঃ ||২৭|| সুগন্ধিকামোচরসাহিপুষ্পং রোধ্রং বিদধ্যাদপি ধাতকীং চ | এতেন শল্যপ্রভবা তু নাডী রোহেদ্ব্রণো বা সুখমাশু চৈব ||২৮||
नाडीं तु शल्यप्रभवां विदार्य निर्हृत्य शल्यं प्रविशोध्य मार्गम् | संशोधयेत् क्षौद्रघृतप्रगाढैस्तिलैस्ततो रोपणमाशु कुर्यात् ||२६|| कुम्भीकखर्जूरकपित्थबिल्ववनस्पतीनां च शलाटुवर्गैः | कृत्वा कषायं विपचेत्तु तैलमावाप्य मुस्तासरलाप्रियङ्गूः ||२७|| सुगन्धिकामोचरसाहिपुष्पं रोध्रं विदध्यादपि धातकीं च | एतेन शल्यप्रभवा तु नाडी रोहेद्व्रणो वा सुखमाशु चैव ||२८||
🔊 Audio coming soon
নাডীমিত্যাদি| কুম্ভীকঃ স্থলকুম্ভিকা, বনস্পতযো বটাদ্যাঃ, কুম্ভিকাদীনাং শলাটূনি কোমলফলানি গ্রাহ্যাণি| সরলা ত্রিবৃত্| সুগন্ধিকা উত্পলসারিবা| মোচরসঃ শাল্মলীচুম্পঃ| অহিপুষ্পং নাগকেশরম্||২৬-২৮||
Adhikarana 13 (29-33) · Śloka 33
কৃশদুর্বলভীরূণাং নাডী মর্মাশ্রিতা চ যা | ক্ষারসূত্রেণ তাং চ্ছিন্দ্যান্ন তু শস্ত্রেণ বুদ্ধিমান্ ||২৯|| এষণ্যা গতিমন্বিষ্য ক্ষারসূত্রানুসারিণীম্ | সূচীং নিদধ্যাদ্গত্যন্তে তথোন্নম্যাশু নির্হরেত্ ||৩০|| সূত্রস্যান্তং সমানীয গাঢং বন্ধং সমাচরেত্ | ততঃ ক্ষারবলং বীক্ষ্য সূত্রমন্যত্ প্রবেশযেত্ ||৩১|| ক্ষারাক্তং মতিমান্ বৈদ্যো যাবন্ন ছিদ্যতে গতিঃ | ভগন্দরেঽপ্যেষ বিধিঃ কার্যো বৈদ্যেন জানতা ||৩২|| অর্বুদাদিষু চোত্ক্ষিপ্য মূলে সূত্রং নিধাপযেত্ | সূচীভির্যববক্রাভিরাচিতান্ বা সমন্ততঃ | মূলে সূত্রেণ বধ্নীযাচ্ছিন্নে চোপচরেদ্ব্রণম্ ||৩৩||
कृशदुर्बलभीरूणां नाडी मर्माश्रिता च या | क्षारसूत्रेण तां च्छिन्द्यान्न तु शस्त्रेण बुद्धिमान् ||२९|| एषण्या गतिमन्विष्य क्षारसूत्रानुसारिणीम् | सूचीं निदध्याद्गत्यन्ते तथोन्नम्याशु निर्हरेत् ||३०|| सूत्रस्यान्तं समानीय गाढं बन्धं समाचरेत् | ततः क्षारबलं वीक्ष्य सूत्रमन्यत् प्रवेशयेत् ||३१|| क्षाराक्तं मतिमान् वैद्यो यावन्न छिद्यते गतिः | भगन्दरेऽप्येष विधिः कार्यो वैद्येन जानता ||३२|| अर्बुदादिषु चोत्क्षिप्य मूले सूत्रं निधापयेत् | सूचीभिर्यववक्राभिराचितान् वा समन्ततः | मूले सूत्रेण बध्नीयाच्छिन्ने चोपचरेद्व्रणम् ||३३||
🔊 Audio coming soon
কৃশেত্যাদি| ক্ষারসূত্রেণ ক্ষারাক্তসূত্রেণ| তত্র ক্ষারসূত্রাবচারণাপ্রকারং নির্দিশন্নাহ- এষণ্যেত্যাদি| অর্বুদাদিষ্বিতি আদিশব্দাদ্গ্রন্থ্যাদীনাং গ্রহণম্| তনুমূলেষু অর্বুদাদিষু, উত্ক্ষিপ্য মূলে ক্ষারসূত্রং নিধাপযেত্; বিশালমূলাংশ্চার্বুদাদীন্ ক্ষারসূত্রপ্রতিষ্ঠাপনার্থে সর্বতঃ সূচীভিরাবিধ্য , মূলে ক্ষারসূত্রেণ বধ্নীযাত্||২৯-৩৩||
Adhikarana 14 (34-41) · Śloka 42
যা দ্বিব্রণীযেঽভিহিতাস্তু বর্ত্যস্তাঃ সর্বনাডীষু ভিষগ্বিদধ্যাত্ | ঘোণ্টাফলত্বগ্লবণানি লাক্ষাপূগীফলং চালবণং চ পত্রম্ ||৩৪|| স্নুহ্যর্কদুগ্ধেন তু কল্ক এষ বর্তীকৃতো হন্ত্যচিরেণ নাডীঃ | বিভীতকাম্রাস্থিবটপ্রবালা হরেণুকাশঙ্খিনিবীজমস্যঃ ||৩৫|| বারাহিকন্দশ্চ তথা প্রদেযো নাডীষু তৈলেন চ মিশ্রযিত্বা ||৩৬|| ধত্তূরজং মদনকোদ্রবজং চ বীজং কোশাতকী শুকনসা মৃগভোজিনী চ | অঙ্কোটবীজকুসুমং গতিষু প্রযোজ্যং লাক্ষোদকাহৃতমলাসু বিকৃত্য চূর্ণম্ ||৩৭|| তথা চ গোমাংসমসীং হিতায কোষ্ঠাশ্রিতস্যাদরতো দিশন্তি | বর্তীকৃতং মাক্ষিকসম্প্রযুক্তং নাডীঘ্নমুক্তং লবণোত্তমং বা ||৩৮|| দুষ্টব্রণে যদ্বিহিতং চ তৈলং তত্ সর্বনাডীষু ভিষগ্বিদধ্যাত্ | চূর্ণীকৃতৈরথ বিমিশ্রিতমেভিরেব তৈলং প্রযুক্তমচিরেণ গতিং নিহন্তি ||৩৯|| এষ্বেব মূত্রসহিতেষু বিধায তৈলং তত্ সাধিতং গতিমপোহতি সপ্তরাত্রাত্ | পিণ্ডীতকস্য তু বরাহবিভাবিতস্য মূলেষু কন্দশকলেষু চ সৌবহেষু ||৪০|| তৈলং কৃতং গতিমপোহতি শীঘ্রমেতত্ কন্দেষু চামরবরাযুধসাহ্বযেষু | ভল্লাতকার্কমরিচৈর্লবণোত্তমেন সিদ্ধং বিডঙ্গরজনীদ্বযচিত্রকৈশ্চ ||৪১|| স্যান্মার্কবস্য চ রসেন নিহন্তি তৈলং নাডীং কফানিলকৃতামপচীং ব্রণাংশ্চ |৪২|
या द्विव्रणीयेऽभिहितास्तु वर्त्यस्ताः सर्वनाडीषु भिषग्विदध्यात् | घोण्टाफलत्वग्लवणानि लाक्षापूगीफलं चालवणं च पत्रम् ||३४|| स्नुह्यर्कदुग्धेन तु कल्क एष वर्तीकृतो हन्त्यचिरेण नाडीः | बिभीतकाम्रास्थिवटप्रवाला हरेणुकाशङ्खिनिबीजमस्यः ||३५|| वाराहिकन्दश्च तथा प्रदेयो नाडीषु तैलेन च मिश्रयित्वा ||३६|| धत्तूरजं मदनकोद्रवजं च बीजं कोशातकी शुकनसा मृगभोजिनी च | अङ्कोटबीजकुसुमं गतिषु प्रयोज्यं लाक्षोदकाहृतमलासु विकृत्य चूर्णम् ||३७|| तथा च गोमांसमसीं हिताय कोष्ठाश्रितस्यादरतो दिशन्ति | वर्तीकृतं माक्षिकसम्प्रयुक्तं नाडीघ्नमुक्तं लवणोत्तमं वा ||३८|| दुष्टव्रणे यद्विहितं च तैलं तत् सर्वनाडीषु भिषग्विदध्यात् | चूर्णीकृतैरथ विमिश्रितमेभिरेव तैलं प्रयुक्तमचिरेण गतिं निहन्ति ||३९|| एष्वेव मूत्रसहितेषु विधाय तैलं तत् साधितं गतिमपोहति सप्तरात्रात् | पिण्डीतकस्य तु वराहविभावितस्य मूलेषु कन्दशकलेषु च सौवहेषु ||४०|| तैलं कृतं गतिमपोहति शीघ्रमेतत् कन्देषु चामरवरायुधसाह्वयेषु | भल्लातकार्कमरिचैर्लवणोत्तमेन सिद्धं विडङ्गरजनीद्वयचित्रकैश्च ||४१|| स्यान्मार्कवस्य च रसेन निहन्ति तैलं नाडीं कफानिलकृतामपचीं व्रणांश्च |४२|
🔊 Audio coming soon
ততঃ পরং সর্বনাডীনাং সামান্যবিধিমাহ- যা ইত্যাদি| মিশ্রকোক্তাতীতাবেক্ষণেন দ্বিব্রণীযেঽভিহিতা ‘অন্তঃশল্যানণুমুখান্’ (চি. ১) ইত্যাদিবাক্যে বর্ত্যঃ শোধনাঃ প্রযোজ্যাঃ| ইহাপি বর্তিং নির্দিশন্নাহ- ঘোণ্টেত্যাদি| ঘোণ্টাফলং বদরীফলং, তস্য ত্বক্ বল্কলম্| লবণানি সৈন্ধবাদীনি| অলবণা কাকমর্দনিকা , তস্যা ইদং পত্রমালবণম্| বিভীতকেত্যাদি শঙ্খিনী যবতিক্তা| বিভীতকাম্রাস্থ্যাদীনাং দাহেন মস্যঃ ক্ষারা ইত্যর্থঃ| বারাহিকন্দো গৃষ্টিকাকন্দঃ| তথেত্যাদি তেনৈব প্রকারেণ গোমাংসস্যাপি মসীং কোষ্ঠাশ্রিতাসু নাডীষু হিতায আদরেণ প্রতিপাদযন্তি| বর্তীকৃতমিত্যাদি পক্বমধুসৈন্ধববর্তিরপি নাডীহরা| দুষ্টেত্যাদি|- দুষ্টব্রণে যদ্বিহিতং চ তৈলমিতি সর্বব্রণে “দ্রবন্তী চিরবিল্বং” ইত্যাদিনা বর্গেণ “যথোপপত্তি কর্তব্যং তৈলমেতেষু শোধনম্” (চি. ২) ইত্যভিহিতম্| ধত্তূরজমিত্যাদি ধত্তূরজং বীজম্| মদোত্পাদকাঃ কোদ্রবা মদনকোদ্রবাঃ; অন্যে তু ব্যাখ্যানযন্তি- মদনং কোদ্রবজং বীজং চেতি| কোশাতকী দেবদালী| শুকনসা চর্মকারবটঃ| মৃগভোজিনী ইন্দ্রবারুণী| অঙ্কোটবীজপুষ্পযুক্তৈঃ কৃতং চূর্ণং গতিষু দেযম্| লাক্ষোদকাহৃতমলাসু লাক্ষাদিগণক্বাথপ্রক্ষালনেন আসমন্তাত্ হৃতমলাসু, দোষাপনযনাচ্ছুদ্ধাস্বিত্যর্থঃ; অন্যে তু লাক্ষোদকপ্রক্ষালনেন ভেদনপীডনাভ্যাং চ হৃতমলাসু গতিষু, ধত্তূরমদনকোদ্রবাদিচূর্ণং বিকৃত্যালোড্য লাক্ষোদকেনৈব প্রযোজ্যমিতি সম্বন্ধং কথযন্তি| চূর্ণীকৃতৈরিত্যাদি| এভিরেব ধত্তূরকাদিভিশ্চূর্ণীকৃতৈর্মিশ্রীকৃত্য তৈলং প্রযুক্তমচিরেণ গতিং নিহন্তীতি জেজ্জটঃ; গযী তু, ‘তৈলং কৃতং গতিমপোহতি শীঘ্রমেব’ ইতি পঠিত্বা কৃতগ্রহণাত্তৈলং সামান্যপাকপরিভাষযা কৃতং সাধিতং গতিমপোহতীতি ব্যাখ্যাতি| এষ্বিত্যাদি|- এষ্বেব ধত্তূরকাদিবীজাদিষ্বিত্যর্থঃ| পিণ্ডীতকস্যেত্যাদি| বরাহপিণ্ডীতকমূলসুবহকাদিশকলেষু বজ্রকন্দেষু চ স্নেহপাকসামান্যপরিভাষযা সিদ্ধং তৈলং নাডীহরম্| বিস্তরমাহ- পিণ্ডীতকস্ত্রিবিধঃ কৃষ্ণপুষ্পঃ, শ্বেতপুষ্পঃ, পীতপুষ্পশ্চ; তেষ্বত্র বরাহবর্ণপুষ্পৈর্বিভাব্যত ইতি বরাহবিভাবিতঃ কৃষ্ণপুষ্পো গ্রাহ্যঃ; সুবহা গন্ধনাকুলী নাপিণীতি লোকে, গোধাপদীত্যপরে, কন্দালীত্যন্যে, তস্যাঃ কন্দশকলেষু কন্দখণ্ডেষু; কৃতং সংস্কৃতম্| ‘কন্দেষু চামরবরাযুধসাহ্বযেষু’ ইত্যত্র অমরবর ইন্দ্রস্তস্যাযুধং বজ্রং তেন সমান আহ্বযঃ সঞ্জ্ঞা যেষাং তে অমরবরাযুধসাহ্বযা বজ্রকন্দাস্তেষু| চকারাত্ ‘তৈলং কৃতম্’ ইত্যনুবর্ততে| ভল্লাতকেত্যাদি মার্কবরসেন ভৃঙ্গরাজরসেন||৩৪-৪১||-
Adhikarana 15 (42-44) · Śloka 45
স্তন্যে গতে বিকৃতিমাশু ভিষক্ তু ধাত্রীং পীতাং ঘৃতং পরিণতেঽহনি বামযেত্তু ||৪২|| নিম্বোদকেন মধুমাগধিকাযুতেন বান্তাগতেঽহনি চ মুদ্গরসাশনা স্যাত্ | এবং ত্র্যহং চতুরহং ষডহং বমেদ্বা সর্পিঃ পিবেত্ত্রিফলযা সহ সংযুতং বা ||৪৩|| ভার্গীং বচামতিবিষাং সুরদারু পাঠাং মুস্তাদিকং মধুরসাং কটুরোহিণীং চ | ধাত্রী পিবেত্তু পযসঃ পরিশোধনার্থ মারগ্বধাদিষু বরং মধুনা কষাযম্ ||৪৪|| সামান্যমেতদুপদিষ্টমতো বিশেষাদ্দোষান্ পযোনিপতিতান্ শমযেদ্যথাস্বম্ |৪৫|
स्तन्ये गते विकृतिमाशु भिषक् तु धात्रीं पीतां घृतं परिणतेऽहनि वामयेत्तु ||४२|| निम्बोदकेन मधुमागधिकायुतेन वान्तागतेऽहनि च मुद्गरसाशना स्यात् | एवं त्र्यहं चतुरहं षडहं वमेद्वा सर्पिः पिबेत्त्रिफलया सह संयुतं वा ||४३|| भार्गीं वचामतिविषां सुरदारु पाठां मुस्तादिकं मधुरसां कटुरोहिणीं च | धात्री पिबेत्तु पयसः परिशोधनार्थ मारग्वधादिषु वरं मधुना कषायम् ||४४|| सामान्यमेतदुपदिष्टमतो विशेषाद्दोषान् पयोनिपतितान् शमयेद्यथास्वम् |४५|
🔊 Audio coming soon
স্তন্য ইত্যাদি| স্তন্যে দোষৌর্বিকৃতিং গতে পরিগতে| পরিণতেঽহনি সাযঙ্কাল , পীতাং ঘৃতং সংশমনমেব ঘৃতং পীতবতীং, এতচ্চ প্রতপ্তকনকনিকরপীতলোহিতে সবিতরি স্নেহপানকল্পস্যাপবাদঃ| সামান্যোক্তমপি কফঘ্নদ্রব্যসংস্কৃতং ঘৃতম্| জেজ্জটাদযস্তু পরিণতে নিষ্পন্নে স্নেহফলে সতি স্নিগ্ধামিত্যর্থঃ, অহনি তস্মিন্নেব দিবসে| তন্নেচ্ছতি গযী, সামান্যবাক্যেনৈব স্নিগ্ধায বমনস্য বিহিতত্বাত্| স্বেদস্য পূর্বকর্মত্বাত্ স্বিন্নাং, নিম্বোদকেন নিম্বক্বাথেন বামযেত্| বান্তাগতেঽহনি চ মুদ্গরসাশনা স্যাত্ নতু বমনদিবসে ভোজযেদিত্যর্থঃ| তত্র প্রথমবমনেন কফস্য নিঃশেষমনপহৃতত্বাদশুদ্ধদেহাং স্নেহস্বেদাবন্তরাঽন্তরা সেবযিত্বা ষডহং বা চতুরহং ত্র্যহং বা যাবদ্বিশুদ্ধিরিতি, শুদ্ধদেহাযাস্তু পুনর্বমনং ত্যাজ্যম্, অন্যথা গ্লানিঃ স্তন্যক্ষযশ্চ| তস্মাচ্ছুদ্ধদেহা বাতপিত্তানুবন্ধে স্নেহপাকপরিভাষযা ত্রিফলাসিদ্ধং সর্পিঃ পিবেদেবেতি বাশব্দাদ্ব্যবস্থিতার্থাল্লভ্যতে| সংশোধনমভিধায সংশমনমাহ- ভার্গীমিত্যাদি| মুস্তাদিকং দ্রব্যসঙ্গ্রহণীযোক্তম্| মধুরসা মূর্বা ‘চোরস্নাযুঃ’ ইতি লোকে| ভার্গ্যাদিভিঃ সহ মুস্তাদের্গণস্য কষাযপানং বরং শ্রেষ্ঠম্| পযোনিপতিতান্ স্তন্যনিপতিতান্| শমযেদ্যথাস্বমিতি যস্য যদাত্মকং প্রত্যনীকং তেন শমযেদিতি||৪২-৪৪||-
Adhikarana 16 (45-47) · Śloka 47
রোগং স্তনোত্থিতমবেক্ষ্য ভিষগ্বিদধ্যা দ্যদ্বিদ্রধাবভিহিতং বহুশো বিধানম্ ||৪৫|| সম্পচ্যমানমপি তং তু বিনোপনাহৈঃ সম্ভোজনেন খলু পাচযিতুং যতেত | শীঘ্রং স্তনো হি মৃদুমাংসতযোপনদ্ধঃ সর্বং প্রকোথমুপযাত্যবদীর্যতে চ ||৪৬|| পক্বে তু দুগ্ধহরিণীঃ পরিহৃত্য নাডীঃ কৃষ্ণং চ চূচুকযুগং বিদধীত শস্ত্রম্ | আমে বিদাহিনি তথৈব গতে চ পাকং ধাত্র্যাঃ স্তনৌ সততমেব চ নির্দুহীত ||৪৭||
रोगं स्तनोत्थितमवेक्ष्य भिषग्विदध्या द्यद्विद्रधावभिहितं बहुशो विधानम् ||४५|| सम्पच्यमानमपि तं तु विनोपनाहैः सम्भोजनेन खलु पाचयितुं यतेत | शीघ्रं स्तनो हि मृदुमांसतयोपनद्धः सर्वं प्रकोथमुपयात्यवदीर्यते च ||४६|| पक्वे तु दुग्धहरिणीः परिहृत्य नाडीः कृष्णं च चूचुकयुगं विदधीत शस्त्रम् | आमे विदाहिनि तथैव गते च पाकं धात्र्याः स्तनौ सततमेव च निर्दुहीत ||४७||
🔊 Audio coming soon
সম্ভোজনেনেতি যথেষ্টভোজনেনেত্যর্থঃ| উপনাহো হ্যত্যর্থং পাককারি, তস্মাদুপনাহনিষেধমাহ- শীঘ্রমিত্যাদি| হি স্ফুটং, প্রকোথং পূতিমাংসতাম্| আমেত্যাদি আমে বিদগ্ধতাপরিহারায, বিদাহিনি বিপাকপরিহারায, পক্বে নাডীব্রণপরিহারায, স্তনৌ নির্দুহীত||৪৫-৪৭||
Adhikarana puShpikA · Śloka 17
ইতি সুশ্রুতসংহিতাযাং চিকিত্সাস্থানে বিসর্পনাডীস্তনরোগচিকিত্সিতং নাম সপ্তদশোঽধ্যাযঃ ||১৭||
इति सुश्रुतसंहितायां चिकित्सास्थाने विसर्पनाडीस्तनरोगचिकित्सितं नाम सप्तदशोऽध्यायः ||१७||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে সপ্তদশোঽধ্যাযঃ||১৭||