1. annapānarakṣākalpaḥ

Adhikarana 1 (1-2) · Śloka 2

অথাতোঽন্নপানরক্ষাকল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

চিকিত্সাস্থানানন্তরং কল্পস্থানমারভ্যতে; যতশ্চিকিত্সাস্থানাদিভূতে দ্বিব্রণীযাধ্যাযে `বিষজুষ্টস্য বিজ্ঞানং বিষনিশ্চযমেব চ| চিকিত্সিতং চ বক্ষ্যামি কল্পে তু প্রবিভাগশঃ’ ইত্যনেন শ্লোকেন বিষজুষ্টব্রণস্য কল্পস্থানে প্রতিপাদনং সূচিতং তস্মাত্, তত্রাপি স্বস্থস্য ব্যাধিক্ষীণস্য চান্নৈরেব প্রাণানাং ধারণং ক্রিযতেঽতঃ প্রাগন্নপানরক্ষাকল্পং ব্যাখ্যাতুকামঃ প্রাহ- অথাত ইত্যাদি| অন্নে ভক্ষ্যমবরুদ্ধং ঘনসাধর্ম্যাত্; পানে লেহ্যমবরুদ্ধং দ্রবসাধর্ম্যাত্; এবং চতুর্বিধস্যাপি রক্ষাকল্পঃ| রক্ষণং রক্ষা, সা পুনরদুষ্টস্য; দুষ্টস্য পুনর্বিষভেষজকল্পনাত্ কল্পঃ; রক্ষযা সহিতঃ কল্পো রক্ষাকল্পঃ| আদিশব্দোঽত্র লুপ্তনির্দিষ্টো দ্রষ্টব্যঃ, তেন দন্তকাষ্ঠাদীনামপি লক্ষণচিকিত্সিতকল্পনম্||১-২||

Adhikarana 2 (3) · Śloka 3

ধন্বন্তরিঃ কাশিপতিস্তপোধর্মভৃতাং বরঃ | সুশ্রুতপ্রভৃতীঞ্ছিষ্যাঞ্ছশাসাহতশাসনঃ ||৩||

অথ প্রথমমন্নাদীনাং রক্ষামেব নির্দিদিক্ষুরাহ- ধন্বন্তরিরিত্যাদি| ধন্বন্তরিঃ সুশ্রুতপ্রভৃতীন্ শিষ্যান্ শশাস শিক্ষিতবান্| তপোধর্মভৃতাং বর ইতি তপস্বিনাং ধার্মিকাণাং চ মধ্যে শ্রেষ্ঠঃ| অহতশাসনঃ অনভিভূতাজ্ঞ ইত্যর্থঃ| অন্যে ত্বেবং পঠন্তি- `দিবোদাসঃ ক্ষিতিপতিস্তপোধর্মশ্রুতাকরঃ| সুশ্রুতপ্রমুখাঞ্ছিষ্যাঞ্ছশাসাহতশাসনঃ’ ইতি| আকরঃ খনিঃ||৩||

Adhikarana 3 (4-6) · Śloka 6

রিপবো বিক্রমাক্রান্তা যে চ স্বে কৃত্যতাং গতাঃ | সিসৃক্ষবঃ ক্রোধবিষং বিবরং প্রাপ্য তাদৃশম্ ||৪|| বিষৈর্নিহন্যুর্নিপুণং নৃপতিং দুষ্টচেতসঃ | স্ত্রিযো বা বিবিধান্ যোগান্ কদাচিত্সুভগেচ্ছযা ||৫|| বিষকন্যোপযোগাদ্বা ক্ষণাজ্জহ্যাদসূন্নরঃ | তস্মাদ্বৈদ্যেন সততং বিষাদ্রক্ষ্যো নরাধিপঃ ||৬||

নৃপতিঃ কুতো রক্ষণীয ইত্যাহ- রিপব ইত্যাদি| সিসৃক্ষবঃ স্রষ্টুমিচ্ছবঃ| ক্রোধেন বিষং ক্রোধবিষম্| ন কেবলং রিপবঃ স্বে চাত্মীযা ভৃত্যাঃ, কৃত্যতাং গতাঃ বিদ্বেষং গতাঃ| তথা চ কৃত্যশব্দার্থোঽমরকোষে- “কৃত্যং ক্রিযাদেবতযোস্ত্রিষু বিদ্বিষ্টকার্যযোঃ”- ইতি| বিবরং ছিদ্রং প্রাপ্য, তাদৃশং নৃপতিং বধক্ষমং, স্ত্রিযো দুষ্টচিত্তা বিবিধান্ যোগান্ সংযোগবিষাণি প্রাপ্য, কদাচিদজ্ঞানাত্ সুভগেচ্ছযা বা বিবিধান্ যোগান্ সিসৃক্ষবো দাতুমিচ্ছন্ত্যো রাজানং নিহন্যুঃ| বিষকন্যোপযোগাদ্বা ক্ষণাজ্জহ্যাদসূন্নরঃ| উক্তং চ- “হন্তি স্পৃশন্তী স্বেদেন গম্যমানা চ মৈথুনে| পক্বং বৃন্তাদিব ফলং প্রশাতযতি মেহনম্”- ইতি| `কৃত্যতাং’ গতা ইত্যত্র `বিকৃতিং গতাঃ’ ইত্যন্যে পঠন্তি||৪-৬||

Adhikarana 4 (7) · Śloka 7

যস্মাচ্চ চেতোঽনিত্যত্বমশ্ববত্ প্রথিতং নৃণাম্ | ন বিশ্বস্যাত্ততো রাজা কদাচিদপি কস্যচিত্ ||৭||

ন পরং পূর্বোক্তেভ্যো রিপুপ্রভৃতিভ্যো রাজা রক্ষণীযোঽপি তু রাজ্ঞা কস্যাপি বিশ্বাসো ন বিধেযঃ, কুত ইত্যাহ- যস্মাচ্চেত্যাদি| অশ্ববদিতি আশুতমগত্যা অশ্বা উচ্যন্তে, এতেন শীঘ্রসঞ্চারিত্বোপলক্ষণার্থং চেতোঽনিত্যত্বমুক্তং, যস্মাদশ্বস্যেব শীঘ্রসঞ্চারিত্বং নানাভাবেন চেতসঃ, তস্মাত্ কদাচিদপি কস্যাপি বিশ্বাসং ন বিদধ্যান্মহীপতিঃ| বৈদ্যবিষযে চ বিশ্বাসহেতুঃ সূত্রস্থানে `বিসৃজত্যাত্মনাঽঽত্মানং’- ইত্যাদিশ্লোকেনাভিহিতঃ||৭||

Adhikarana 5 (8-11) · Śloka 11

কুলীনং ধার্মিকং স্নিগ্ধং সুভৃতং সন্ততোত্থিতম্ | অলুব্ধমশঠং ভক্তং কৃতজ্ঞং প্রিযদর্শনম্ ||৮|| ক্রোধপারুষ্যমাত্সর্যমাযালস্যবিবর্জিতম্ | জিতেন্দ্রিযং ক্ষমাবন্তং শুচিং শীলদযান্বিতম্ ||৯|| মেধাবিনমসংশ্রান্তমনুরক্তং হিতৈষিণম্ | পটুং প্রগল্ভং নিপুণং দক্ষমালস্যবর্জিতম্ ||১০|| পূর্বোক্তৈশ্চ গুণৈর্যুক্তং নিত্যং সন্নিহিতাগদম্ | মহানসে প্রযুঞ্জীত বৈদ্যং তদ্বিদ্যপূজিতম্ ||১১||

স চ বৈদ্যো গুণবানেব বিশ্বাসভাজনমিতি বৈদ্যস্য গুণান্ নির্দিশন্নাহ- কুলীনমিত্যাদি| কুলীনো হ্যদুষ্টবীজক্ষেত্রতযা নাকার্যেষু প্রবর্ততে, কুলমত্রাযুর্বেদাধ্যাযিকুলং ব্রাহ্মণক্ষত্রিযবৈশ্যভেদেন ত্রিবিধং, কুলগুণসম্পন্নশূদ্রেণ সহ চতুর্বিধমিত্যন্যে; `তদ্ভবং’ ইতি গযী| স্নিগ্ধঃ স্নেহেন মিত্রভাবেন রাজ্ঞা সহ ব্যবস্থিতঃ, এতেন মিত্রমিব সর্বথা রক্ষতি| সুভৃতং সম্যগ্ভৃতং যথা চ শরীরযাত্রা ভবতি| তথা চোক্তং- “সূপৌদনং ঘৃতমলং ব্যঞ্জনং দৃঢমমলিনং চ বাসঃ”- ইতি| সততোত্থিতঃ অহোরাত্রমধ্যযনাধ্যাপনতদর্থচিন্তানৃপশরীরস্বাস্থ্যাপাদানেষু তত্পরো নিত্যাভিযুক্ত ইতি| পরগুণবিধ্বংসো মাত্সর্যম্| মাযা পরবন্ধনবুদ্ধিঃ| অনুরক্তং সদাঽঽতুরলগ্নং রাগযুক্তম্| পটুং বক্তারং, প্রগল্ভং ধৃষ্টং, দক্ষং চতুরং, আলস্যবর্জনং দ্বিরুক্তমত্যন্তনিষেধার্থম্| পূর্বোক্তৈর্গুণৈঃ `তত্ত্বাধিগতশাস্ত্রার্থঃ’ ইত্যাদিকৈঃ| মহানসে রসবত্যাম্| তদ্বিদ্যপূজিতমিতি তদ্বিদ্যৈঃ পাকনিষ্ঠিততত্ত্বজ্ঞানৈঃ ভিষগ্ভিঃ পূজিতম্| গযী তু `অলুব্ধমশঠং ভক্তং’ ইত্যাদিকং `নিত্যং সন্নিহিতাগদম্’ ইত্যন্তং ন পঠতি, পুনরুক্তদোষত্বাত্||৮-১১||

Adhikarana 6 (12-13) · Śloka 13

প্রশস্তদিগ্দেশকৃতং শুচিভাণ্ডং মহচ্ছুচি | সজালকং গবাক্ষাঢ্যমাপ্তবর্গনিষেবিতম্ ||১২|| বিকক্ষসৃষ্টসংসৃষ্টং সবিতানং কৃতার্চনম্ | পরীক্ষিতস্ত্রীপুরুষং ভবেচ্চাপি মহানসম্ ||১৩||

তদেব মহানসং কীদৃশং কার্যমিত্যাহ- প্রশস্তেত্যাদি| প্রশস্তা দিক্ অত্রাগ্নেযী, দেশস্তু প্রশস্তগুণসম্পদা যুক্তঃ, মহত্ বিস্তীর্ণং, শুচি অনুপহতং, সজালকং জালকসংহিতং, গবাক্ষাঢ্যং বাতাযনসমৃদ্ধং, বিকক্ষসৃষ্টসংসৃষ্টং বিগততৃণস্থানসম্পর্কং, এতেন রসবতীসমীপে তৃণসঞ্চযো ন করণীয ইত্যুক্তং ভবতি, সবিতানং বিতানকসহিতং, কৃতার্চনং কৃতাগ্নিপূজনম্||১২-১৩||

Adhikarana 7 (14) · Śloka 14

তত্রাধ্যক্ষং নিযুঞ্জীত প্রাযো বৈদ্যগুণান্বিতম্ |১৪|

মহানসব্যাপারিণমাহ- তত্রাধ্যক্ষমিত্যাদি| অধ্যক্ষম্ অধিপতিম্| বৈদ্যগুণান্বিতং বৈদ্যগুণৈঃ কুলীনধার্মিকত্বাদিভির্যুক্তমিত্যর্থঃ|১৪|-

Adhikarana 8 (14-15) · Śloka 16

শুচযো দক্ষিণা দক্ষা বিনীতাঃ প্রিযদর্শনাঃ ||১৪|| সংবিভক্তাঃ সুমনসো নীচকেশনখাঃ স্থিরাঃ | স্নাতা দৃঢং সংযমিনঃ কৃতোষ্ণীষাঃ সুসংযতাঃ ||১৫|| তস্য চাজ্ঞাবিধেযাঃ স্যুর্বিবিধাঃ পরিকর্মিণঃ |১৬|

শুচয ইত্যাদি| দক্ষিণা অভিজাতাঃ, কুলীনা ইতি যাবত্| দক্ষাঃ চতুরাঃ| বিনীতা বিনযযুক্তাঃ, শক্তিবন্ত ইত্যর্থঃ| সংবিভক্তাঃ বিভজ্য কর্মণি নিযোজিতাঃ| স্থিরা অচপলাঃ| দৃঢং সংযমিনঃ সোপশমা ইত্যর্থঃ| সুসংযতাঃ সুষ্ঠু লৌল্যাদিদোষরহিতাঃ, আযত্তপরিধানাদিকা বা ইত্যর্থঃ| আজ্ঞাবিধেযা আদেশকারিণঃ| পরিকর্মিণঃ সূপকারাদযঃ||১৪-১৫||-

Adhikarana 9 (16) · Śloka 17

আহারস্থিতযশ্চাপি ভবন্তি প্রাণিনো যতঃ ||১৬|| তস্মান্মহানসে বৈদ্যঃ প্রমাদরহিতো ভবেত্ |১৭|

মহানসে বৈদ্যস্য সাবধানত্বং সহেতুকমাহ- আহারস্থিতয ইত্যাদি||১৬||-

Adhikarana 10 (17) · Śloka 18

মাহানসিকবোঢারঃ সৌপৌদনিকপৌপিকাঃ ||১৭|| ভবেযুর্বৈদ্যবশগা যে চাপ্যন্যেঽত্র কেচন |১৮|

তেষাং পরিকর্মিণাং বৈদ্যাধীনত্বমাহ- মাহানসিকবোঢার ইত্যাদি| মহানসে নিযুক্তা মাহানসিকা রসবতীপতয ইত্যর্থঃ; বোঢারো বোঢ্রাদযো বেষ্টিকর্মকরাঃ কাহারাদযো বা| সৌপা উপকরণভূতদ্রব্যসাধকাঃ সূপব্যঞ্জনাদিকারকাঃ, ঔদনিকা উপকার্যভূতভক্তস্য সাধকাঃ, পৌপিকাঃ পূপাদিভক্ষ্যাণাং সাধকাঃ কন্দূকা ইত্যর্থঃ| অন্যেঽত্র কেচনেতি বেসবারকারকাদযঃ||১৭||-

Adhikarana 11 (18-22) · Śloka 23

ইঙ্গিতজ্ঞো মনুষ্যাণাং বাক্চেষ্টামুখবৈকৃতৈঃ ||১৮|| বিদ্যাদ্বিষস্য দাতারমেভির্লিঙ্গৈশ্চ বুদ্ধিমান্ | ন দদাত্যুত্তরং পৃষ্টো বিবক্ষন্ মোহমেতি চ ||১৯|| অপার্থং বহু সঙ্কীর্ণং ভাষতে চাপি মূঢবত্ | স্ফোটযত্যঙ্গুলীর্ভূমিমকস্মাদ্বিলিখেদ্ধসেত্ ||২০|| বেপথুর্জাযতে তস্য ত্রস্তশ্চান্যোঽন্যমীক্ষতে | ক্ষামো বিবর্ণবক্ত্রশ্চ নখৈঃ কিঞ্চিচ্ছিনত্ত্যপি ||২১|| আলভেতাসকৃদ্দীনঃ করেণ চ শিরোরুহান্ | নির্যিযাসুরপদ্বারৈর্বীক্ষতে চ পুনঃ পুনঃ ||২২|| বর্ততে বিপরীতং তু বিষদাতা বিচেতনঃ |২৩|

তদধিকৃতস্যৈব বিষদাতৃজ্ঞানমুদ্দিশন্নাহ- ইঙ্গিতজ্ঞ ইত্যাদি| ইঙ্গিতজ্ঞো বৈদ্যঃ| এভির্লিঙ্গৈঃ বক্ষ্যমাণৈঃ| বিবক্ষন্ বক্তুমিচ্ছন্| অপার্থং নিরর্থকম্| ত্রস্তশ্চান্যোন্যমীক্ষত ইতি স্বপাপকর্মোপলম্ভভযেন অন্যমন্যমীক্ষত ইতি| ক্ষামঃ ক্ষীণঃ| বিবর্ণো মলিনবর্ণঃ| হস্তেন কেশান্ আলভেত স্পৃশেত্| অসকৃত্ অনেকবারম্| দীনো বিলক্ষঃ| নির্যিযাসুঃ নির্যাতুমিচ্ছুঃ| অপদ্বারৈঃ অমার্গৈঃ||১৮-২২||-

Adhikarana 12 (23-24) · Śloka 24

কেচিদ্ভযাত্ পার্থিবস্য ত্বরিতা বা তদাজ্ঞযা ||২৩|| অসতামপি সন্তোঽপি চেষ্টাং কুর্বন্তি মানবাঃ | তস্মাত্ পরীক্ষণং কার্যং ভৃত্যানামাদৃতৈর্নৃপৈঃ ||২৪||

বিষদপরীক্ষণে চ রাজ্ঞা আদরপরেণ ভবিতব্যমিতীমমর্থং সহেতুকং প্রতিপাদযন্নাহ- কেচিদিত্যাদি| অসতামপি অসাধূনামপি| আদৃতৈঃ সাদরৈরিত্যর্থঃ||২৩-২৪||

Adhikarana 13 (25-27) · Śloka 27

অন্নে পানে দন্তকাষ্ঠে তথাঽভ্যঙ্গেঽবলেখনে | উত্সাদনে কষাযে চ পরিষেকেঽনুলেপনে ||২৫|| স্রক্ষু বস্ত্রেষু শয্যাসু কবচাভরণেষু চ | পাদুকাপাদপীঠেষু পৃষ্ঠেষু গজবাজিনাম্ ||২৬|| বিষজুষ্টেষু চান্যেষু নস্যধূমাঞ্জনাদিষু | লক্ষণানি প্রবক্ষ্যামি চিকিত্সামপ্যনন্তরম্ ||২৭||

যেষ্বধিষ্ঠানেষু গরবিষং প্রযচ্ছন্তি তান্যদূষিতানি রক্ষিতুং, দূষিতেষু চিকিত্সার্থং চ লক্ষণানি নির্দেষ্টুকামঃ প্রাহ- অন্ন ইত্যাদি| দন্তকাষ্ঠসহচরিতং জিহ্বানির্লেখনং মুখশোধনকষাযশ্চ দন্তকাষ্ঠগ্রহণেন গৃহ্যতে| অবলেখনে কঙ্কতিকাদৌ কেশপ্রসাধনে| উত্সাহনে উদ্বর্তনে| পরিষেকে স্নানে| কষাযোঽত্র রোধ্রাদিকস্তৈলাপনযনায| স্রক্ষু পুষ্পমালাসু| কবচং সন্নাহম্| পাদপীঠেষু পাদাধারেষু| বিষজুষ্টেষু চান্যেষ্বিবত্যনেন শিরোভ্যঙ্গশিরস্ত্রাণাদযো গৃহ্যন্তে||২৫-২৭||

Adhikarana 14 (28-33) · Śloka 34

নৃপভক্তাদ্বলিং ন্যস্তং সবিষং ভক্ষযন্তি যে | তত্রৈব তে বিনশ্যন্তি মক্ষিকাবাযসাদযঃ ||২৮|| হুতভুক্ তেন চান্নেন ভৃশং চটচটাযতে | মযূরকণ্ঠপ্রতিমো জাযতে চাপি দুঃসহঃ ||২৯|| ভিন্নার্চিস্তীক্ষ্ণধূমশ্চ নচিরাচ্চোপশাম্যতি | চকোরস্যাক্ষিবৈরাগ্যং জাযতে ক্ষিপ্রমেব তু ||৩০|| দৃষ্ট্বাঽন্নং বিষসংসৃষ্টং ম্রিযন্তে জীবজীবকাঃ | কোকিলঃ স্বরবৈকৃত্যং ক্রৌঞ্চস্তু মদমৃচ্ছতি ||৩১|| হৃষ্যেন্মযূর উদ্বিগ্নঃ ক্রোশতঃ শুকসারিকে | হংসঃ ক্ষ্বেডতি চাত্যর্থং ভৃঙ্গরাজস্তু কূজতি ||৩২|| পৃষতো বিসৃজত্যশ্রুং বিষ্ঠাং মুঞ্চতি মর্কটঃ | সন্নিকৃষ্টাংস্ততঃ কুর্যাদ্রাজ্ঞস্তান্ মৃগপক্ষিণঃ ||৩৩|| বেশ্মনোঽথ বিভূষার্থং রক্ষার্থং চাত্মনঃ সদা |৩৪|

রসরূপাদিভিস্তল্লিঙ্গমুদ্দিশন্নাহ- নৃপভক্তাদিত্যাদি| নৃপভক্তাত্ রাজভোজনাত্| হুতভুগিত্যাদি| হুতভুক্ বহ্নিঃ| তেন সবিষেণান্নেন চটচটাযত ইতি শব্দেন বিষজ্ঞানং; মযূরকণ্ঠপ্রতিম ইতি রূপেণ বিষজ্ঞানং; তীক্ষ্ণধূমশ্চেতি গন্ধেন বিষজ্ঞানং; রসেন বিষজ্ঞানং বিনশ্যন্তি মক্ষিকাবাযসাদয ইত্যনেনাভিহিতম্| এবং শব্দাদিভিঃ পঞ্চভি(চতুর্ভি)র্বিষজ্ঞানং প্রতিপাদ্যাপরেণাপি প্রকারেণ চকোরাদিপক্ষিমৃগচক্ষুরাদিবিকারেণ বিষজ্ঞানমুদ্দিশতি- চকোরস্যেত্যাদি| অক্ষিবৈরাগ্যং রূপগ্রহণেঽলসত্বমিতি গযী, বিগতরাগে অক্ষিণী ভবত ইতি সঙ্গ্রহারুণৌ| জীবজীবকঃ পক্ষিবিশেষঃ, `ক্রুরিচ’ ইতি লোকে| মদমৃচ্ছতি হর্ষং যাতীত্যর্থঃ| হৃষ্যেন্মযূর উদ্বিগ্ন ইতি উদ্বিগ্নঃ চলিতঃ সন্ মযূরো হৃষ্যেত্ তুষ্যেদিত্যর্থঃ; বিজিরিহ চলনার্থো ন ভযার্থঃ; পরস্পরবিরোধাত্| ক্রোশতঃ শুকসারিকে ইতি ভযাদ্রোদনশব্দং কুরুত ইত্যর্থঃ| হংসঃ ক্ষ্বেডতি চাত্যর্থমিতি অতিশযেন শব্দাযত ইত্যর্থঃ| ভৃঙ্গরাজস্তু কূজতীতি ভৃঙ্গরাজো ভ্রমরকো ধূম্যাটসদৃশঃ পক্ষিরাজ ইতি লোকে, কূজতি অব্যক্তং শব্দাযতে| পৃষতঃ চিত্রবিন্দুঃ, `চিত্তল’ ইতি লোকে||২৮-৩৩||-

Adhikarana 15 (34-36) · Śloka 36

উপক্ষিপ্তস্য চান্নস্য বাষ্পেণোর্ধ্বং প্রসর্পতা ||৩৪|| হৃত্পীডা ভ্রান্তনেত্রত্বং শিরোদুঃখং চ জাযতে | তত্র নস্যাঞ্জনে কুষ্ঠং লামজ্জং নলদং মধু ||৩৫|| কুর্যাচ্ছিরীষরজনীচন্দনৈশ্চ প্রলেপনম্ | হৃদি চন্দনলেপস্তু তথা সুখমবাপ্নুযাত্ ||৩৬||

বিষদূষিতস্যান্নস্য ভোক্তুং দত্তস্য বাষ্পোষ্মণাঽন্তর্গতেন বাহ্যেন চ কিং স্যাত্তদাহ- উপক্ষিপ্তস্যেত্যাদি| উপক্ষিপ্তস্য ভোক্তুং দত্তস্যান্নস্য বাষ্পেণোর্ধ্বং প্রসর্পতা গচ্ছতা হৃত্পীডাদিকং জাযতে| নলদং মাংসী, লামজ্জম্ উশীরভেদঃ| অন্তঃপ্রবিষ্টে বাষ্পে নস্যাঞ্জনযোর্বিষযঃ| কুর্যাদিত্যাদি| চন্দনং রক্তং শুক্লং বা| এতৌ লেপৌ বাহ্যেন বাষ্পস্পর্শেন জাতে হৃত্পীডাদৌ জ্ঞেযৌ| উপক্ষিপ্তস্যেত্যত্র `উখাক্ষিপ্তস্য’ ইতি কেচিত্ পঠন্তি; উখা স্থালী||৩৪-৩৬||

Adhikarana 16 (37) · Śloka 37

পাণিপ্রাপ্তং পাণিদাহং নখশাতং করোতি চ | অত্র প্রলেপঃ শ্যামেন্দ্রগোপাসোমোত্পলানি চ ||৩৭||

পাণিপ্রাপ্তমিত্যাদি- নখশাতং নখপাতনম্| শ্যামা শ্যামালতা, প্রিযঙ্গুরিত্যপরে; ইন্দ্রা ইন্দ্রবারুণী; গোপা সুগন্ধমূলা সারিবা; `ইন্দ্রগোপ’ ইত্যন্যে পঠন্তি, তত্রেন্দ্রগোপঃ কীটবিশেষঃ; সোমা গুডূচী, সোমলতেত্যন্যে; উত্পলং নীলোত্পলম্||৩৭||

Adhikarana 17 (38-39) · Śloka 39

স চেত্ প্রমাদান্মোহাদ্বা তদন্নমুপসেবতে | অষ্ঠীলাবত্ততো জিহ্বা ভবত্যরসবেদিনী ||৩৮|| তুদ্যতে দহ্যতে চাপি শ্লেষ্মা চাস্যাত্ প্রসিচ্যতে | তত্র বাষ্পেরিতং কর্ম যচ্চ স্যাদ্দান্তকাষ্ঠিকম্ ||৩৯||

স চেদিত্যাদি| অষ্ঠীলা দীর্ঘবর্তুলপাষাণবিশেষঃ, অন্যে পুনঃ অষ্ঠীলবদিতি পঠন্তি, অষ্ঠীলশব্দোঽকারান্তোঽপ্যস্তীতি মন্তব্যম্| বাষ্পেরিতং কর্মেতি যত্ সবিষবাষ্পসম্পর্কে `কুর্যাচ্ছিরীষরজনী’ ইত্যাদিভিঃ প্রোক্তং কর্ম; দান্তকাষ্ঠিকমিতি ধাতকীপুষ্পাদিভিঃ প্রতিসারণং; তচ্চ প্রতিসারণমপ্রচ্ছিতে শোফে বিধেযম্||৩৮-৩৯||

Adhikarana 18 (40-41) · Śloka 41

মূর্চ্ছাং ছর্দিমতীসারমাধ্মানং দাহবেপথূ | ইন্দ্রিযাণাং চ বৈকৃত্যং কুর্যাদামাশযং গতম্ ||৪০|| তত্রাশু মদনালাবুবিম্বীকোশাতকীফলৈঃ | ছর্দনং দধ্যুদশ্বিদ্ভ্যামথবা তণ্ডুলাম্বুনা ||৪১||

মূর্চ্ছামিত্যাদি| অলাবুঃ তিক্তালাবুঃ; কোশাতকী ঘোষকঃ, ঘুসেণ্ডিকেতি লোকে| উদশ্বিত্ তক্রম্||৪০-৪১||

Adhikarana 19 (42-43) · Śloka 43

দাহং মূর্চ্ছামতীসারং তৃষ্ণামিন্দ্রিযবৈকৃতম্ | আটোপং পাণ্ডুতাং কার্শ্যং কুর্যাত্ পক্বাশযং গতম্ ||৪২|| বিরেচনং সসর্পিষ্কং তত্রোক্তং নীলিনীফলম্ | দধ্না দূষীবিষারিশ্চ পেযো বা মধুসংযুতঃ ||৪৩||

দাহমিত্যাদি| আটোপং বাতাদীনামপ্রবৃত্তিম্| তত্রোক্তমিতি তত্র বিষভেষজকল্পে| নীলিনীফলং নীলাঞ্জনিকাফলং, যস্য শ্রীফলেতি লোকে প্রসিদ্ধিঃ| পিপ্পল্যো ধ্যামকমিত্যাদিদূষীবিষারির্বক্ষ্যমাণঃ; দূষীবিষারিশ্চাক্ষপ্রমাণঃ, দধি পানযোগ্যপ্রমাণং জ্ঞেযং, মধু অষ্টমাষকপ্রমিতং প্রক্ষিপ্য দধ্না দূষীবিষারিঃ পাতব্যঃ| বাশব্দশ্চ প্রথমোক্তবিরেচনযোগাপেক্ষযা সমুচ্চযে||৪২-৪৩||

Adhikarana 20 (44-45) · Śloka 45

দ্রবদ্রব্যেষু সর্বেষু ক্ষীরমদ্যোদকাদিষু | ভবন্তি বিবিধা রাজ্যঃ ফেনবুদ্বুদজন্ম চ ||৪৪|| ছাযাশ্চাত্র ন দৃশ্যন্তে দৃশ্যন্তে যদি বা পুনঃ | ভবন্তি যমলাশ্ছিদ্রাস্তন্ব্যো বা বিকৃতাস্তথা ||৪৫||

দ্রবদ্রব্যেষু ক্ষীরাদিষু যত্ স্থূলং লক্ষণং তদাহ- দ্রবদ্রব্যেষ্বিত্যাদি| বিবিধা রাজ্যো নানাপ্রকারা লেখাঃ| বিবিধা রাজ্যঃ শ্রীবাগ্ভটেন ব্যাখ্যাতাঃ, তথা চ,- “নীলা রাজী রসে তাম্রা ক্ষীরে দধনি দৃশ্যতে| শ্যাবা পীতাঽসিতা তক্রে ঘৃতে পানীযসন্নিভা|| কালী মদ্যাম্ভসোঃ ক্ষৌদ্রে হরিত্তৈলেঽরুণোপমা” ইতি| ফেনেত্যাদি ফেনস্য বুদ্বুদস্য চোত্পত্তিরিত্যর্থঃ| যমলা যুগ্মাঃ| ছিদ্রাঃ সসুষিরাঃ| তন্ব্যঃ সূক্ষ্মাঃ| গযী তু তন্ব্য ইত্যত্র `অন্যা’ ইতি পঠিত্বা ব্যাখ্যাতি- অন্যতরেষাং পশূনামিব ছাযাঃ| বিকৃতাঃ সৌম্যস্যাপি রৌদ্রাঃ, রৌদ্রস্যাপি সৌম্যাঃ||৪৪-৪৫||

Adhikarana 21 (46-47) · Śloka 47

শাকসূপান্নমাংসানি ক্লিন্নানি বিরসানি চ | সদ্যঃ পর্যুষিতানীব বিগন্ধানি ভবন্তি চ ||৪৬|| গন্ধবর্ণরসৈর্হীনাঃ সর্বে ভক্ষ্যাঃ ফলানি চ | পক্বান্যাশু বিশীর্যন্তে পাকমামানি যান্তি চ ||৪৭||

শাকেত্যাদি| চকারোঽনুক্তসমুচ্চযার্থঃ; তেন তিক্তানি চ ভবন্তীত্যর্থঃ| গন্ধবর্ণরসৈরিত্যাদি| গন্ধবর্ণরসৈরিত্যত্র স্পর্শগ্রহণং লুপ্তনির্দিষ্টং দ্রষ্টব্যং, তেন স্পর্শেনাপি হীনা ভবন্তীত্যর্থঃ| পক্বান্যাশু বিশীর্যন্ত ইতি পক্বানি ফলান্যাশু শীঘ্রং বিশীর্যন্তে পূতিভাবং গচ্ছন্তি||৪৬-৪৭||

Adhikarana 22 (48-50) · Śloka 50

বিশীর্যতে কূর্চকস্তু দন্তকাষ্ঠগতে বিষে | জিহ্বাদন্তৌষ্ঠমাংসানাং শ্বযথুশ্চোপজাযতে ||৪৮|| অথাস্য ধাতকীপুষ্পপথ্যাজম্বূফলাস্থিভিঃ | সক্ষৌদ্রৈঃ প্রচ্ছিতে শোফে কর্তব্যং প্রতিসারণম্ ||৪৯|| অথবাঽঙ্কোঠমূলানি ত্বচঃ সপ্তচ্ছদস্য বা | শিরীষমাষকা বাঽপি সক্ষৌদ্রাঃ প্রতিসারণম্ ||৫০||

বিশীর্যত ইত্যাদি| কূর্চকো দন্তকাষ্ঠস্যাগ্রিমো ভাগঃ| বিশীর্যতে ত্রুট্যতি| অথাস্য ধাতকীত্যাদ্যেকো যোগঃ, প্রতিসারণং ঘর্ষণং; অথবাঽঙ্কোঠেত্যাদির্দ্বিতীযো যোগঃ; শিরীষমাষকা বাঽপীত্যাদিস্তৃতীযো যোগঃ; সপ্তচ্ছদত্বচঃ পৃথগ্যোগ ইতি গযী, তদা চত্বারো যোগাঃ| শিরীষমাষকাঃ শিরীষবীজানি||৪৮-৫০||

Adhikarana 23 (51) · Śloka 51

জিহ্বানির্লেখকবলৌ দন্তকাষ্ঠবদাদিশেত্ |৫১|

জিহ্বেত্যাদি| জিহ্বানির্লেখনস্য কবলস্য চ বিষদূষিতস্য লিঙ্গানি চিকিত্সিতং চ দন্তকাষ্ঠস্যেব ব্রূযাত্|৫১|-

Adhikarana 24 (51-54) · Śloka 54

পিচ্ছিলো বহুলোঽভ্যঙ্গো বিবর্ণো বা বিষান্বিতঃ ||৫১|| স্ফোটজন্মরুজাস্রাবত্বক্পাকঃ স্বেদনং জ্বরঃ | দরণং চাপি মাংসানামভ্যঙ্গে বিষসংযুতে ||৫২|| তত্র শীতাম্বুসিক্তস্য কর্তব্যমনুলেপনম্ | চন্দনং তগরং কুষ্ঠমুশীরং বেণুপত্রিকা ||৫৩|| সোমবল্ল্যমৃতা শ্বেতা পদ্মং কালীযকং ত্বচম্ | কপিত্থরসমূত্রাভ্যাং পানমেতচ্চ যুজ্যতে ||৫৪||

পিচ্ছিল ইত্যাদি| অভ্যঙ্গঃ অভ্যত্রাভ্যঞ্জনদ্রব্যং তৈলাদি| বহলো ঘনঃ| বেণুপত্রিকা বংশপত্রাণি; অন্যে বেণুপত্রিকাং বংশসদৃশপত্রিকাং দ্রব্যান্তরমাহুঃ| সোমবল্লী গুডূচী| অমৃতা অমৃতাসঙ্গঃ খর্পরিকাতুত্থকং, উত্তরপদলোপাত্| শ্বেতা শ্বেতস্যন্দঃ| কালীযকং দারুহরিদ্রা| ত্বচং বরাঙ্গম্| ইদমনুলেপনং শীততোযেন| মূত্রং গোমূত্রম্| এতচ্চেতি চন্দনাদিকম্||৫১-৫৪||

Adhikarana 25 (55) · Śloka 55

উত্সাদনে পরীষেকে কষাযে চানুলেপনে | শয্যাবস্ত্রতনুত্রেষু জ্ঞেযমভ্যঙ্গলক্ষণৈঃ ||৫৫||

উত্সাদন ইত্যাদি| তনুত্রে সন্নাহে| উত্সাদনাদিষু সপ্তসু অভ্যঙ্গলক্ষণানুবাদেন লিঙ্গং তথা চিকিত্সিতমপি তত্রোক্তমেব বেদিতব্যম্||৫৫||

Adhikarana 26 (56-58) · Śloka 58

কেশশাতঃ শিরোদুঃখং খেভ্যশ্চ রুধিরাগমঃ | গ্রন্থিজন্মোত্তমাঙ্গেষু বিষজুষ্টেঽবলেখনে ||৫৬|| প্রলেপো বহুশস্তত্র ভাবিতাঃ কৃষ্ণমৃত্তিকাঃ | ঋষ্যপিত্তঘৃতশ্যামাপালিন্দীতণ্ডুলীযকৈঃ ||৫৭|| গোমযস্বরসো বাঽপি হিতো বা মালতীরসঃ | রসো মূষিকপর্ণ্যা বা ধূমো বাঽগারসম্ভবঃ ||৫৮||

কেশশাত ইত্যাদি| ঋষ্যপিত্তঘৃতশ্যামাদিস্বরসৈঃ সপ্তাহং ভাবিতযা কৃষ্ণমৃদা বহুশঃ প্রলেপো হিত ইত্যর্থঃ| ঋষ্যো নীলাণ্ডঃ `রোরু’ ইতি প্রসিদ্ধঃ| কালখণ্ডলগ্ননলিকামধ্যগতজলং পিত্তম্| শ্যামা প্রিযঙ্গুঃ, পালিন্দী ত্রিবৃত্, মূষিকপর্ণী দ্রবন্তী, দ্রব্যান্তরমিত্যন্যে| প্রলেপশব্দো গোমযস্য রসো বেত্যত্র হিতশব্দেন সহ সম্বন্ধনীযঃ; তেন গোমযরসাদিপ্রলেপো বা হিতো ভবতীতি সম্বন্ধঃ স্যাত্||৫৬-৫৮||

Adhikarana 27 (59) · Śloka 59

শিরোঽভ্যঙ্গঃ শিরস্ত্রাণং স্নানমুষ্ণীষমেব চ | স্রজশ্চ বিষসংসৃষ্টাঃ সাধযেদবলেখনাত্ ||৫৯||

ইদানীং শিরোগতাবলেখনপ্রসঙ্গেন শিরোগতানামন্যেষামপি লিঙ্গং চিকিত্সিতং চ দর্শযন্নাহ- শিরোঽভ্যঙ্গ ইত্যাদি| অবলেখনাদিতি অবলেখনোক্তলিঙ্গচিকিত্সিতাত্||৫৯||

Adhikarana 28 (60-61) · Śloka 61

মুখালেপে মুখং শ্যাবং যুক্তমভ্যঙ্গলক্ষণৈঃ | পদ্মিনীকণ্টকপ্রখ্যৈঃ কণ্টকৈশ্চোপচীযতে ||৬০|| তত্র ক্ষৌদ্রঘৃতং পানং প্রলেপশ্চন্দনং ঘৃতম্ | পযস্যা মধুকং ফঞ্জী বন্ধুজীবঃ পুনর্নবা ||৬১||

মুখালেপ ইত্যাদি| পযস্যা অর্কপুষ্পী| ফঞ্জী ভার্গী| বন্ধুজীবো মধ্যাহ্নপুষ্পকঃ| তত্র মুখালেপে অতুল্যযোর্মধুঘৃতযোঃ পানং, শ্বেতচন্দনঘৃতাদিভিঃ পুনর্নবান্তৈর্লেপঃ||৬০-৬১||

Adhikarana 29 (62) · Śloka 63

অস্বাস্থ্যং কুঞ্জরাদীনাং লালাস্রাবোঽক্ষিরক্ততা | স্ফিক্পাযুমেঢ্রমুষ্কেষু যাতুশ্চ স্ফোটসম্ভবঃ ||৬২|| তত্রাভ্যঙ্গবদেবেষ্টা যাতৃবাহনযোঃ ক্রিযা |৬৩|

ইদানীং কুঞ্জরাদীনাং বিষজুষ্টানাং লক্ষণং চিকিত্সিতং চোদ্দিশন্নাহ- অস্বাস্থ্যমিত্যাদি| যাতুঃ আরোহকস্য| যাতৃবাহনযোঃ ক্রিযেতি অত্র যাতৃশব্দ আরোহকপর্যাযঃ||৬২||-

Adhikarana 30 (63-64) · Śloka 65

শোণিতাগমনং খেভ্যঃ শিরোরুক্কফসংস্রবঃ ||৬৩|| নস্যধূমগতে লিঙ্গমিন্দ্রিযাণাং চ বৈকৃতম্ | তত্র দুগ্ধৈর্গবাদীনাং সর্পিঃ সাতিবিষৈঃ শৃতম্ ||৬৪|| পানে নস্যে চ সশ্বেতং হিতং সমদযন্তিকম্ |৬৫|

শোণিতাগমনমিত্যাদি| সশ্বেতং বচাসহিতং; গযী তু শ্বেতাং কটভীমাহ| সমদযন্তিকং মল্লিকাসহিতম্| গবাদীনাং ক্ষীরৈরতিবিষাকল্কসিদ্ধং ঘৃতং পানে হিতং নস্যে চ| মদযন্তিকাবচাকল্কেন সিদ্ধং হিতমিত্যর্থঃ||৬৩-৬৪||-

Adhikarana 31 (65-66) · Śloka 66

গন্ধহানির্বিবর্ণত্বং পুষ্পাণাং ম্লানতা ভবেত্ ||৬৫|| জিঘ্রতশ্চ শিরোদুঃখং বারিপূর্ণে চ লোচনে | তত্র বাষ্পেরিতং কর্ম মুখালেপে চ যত্ স্মৃতম্ ||৬৬||

গন্ধহানিরিত্যাদি||৬৫-৬৬||

Adhikarana 32 (67-68) · Śloka 68

কর্ণতৈলগতে শ্রোত্রবৈগুণ্যং শোফবেদনে | কর্ণস্রাবশ্চ তত্রাশু কর্তব্যং প্রতিপূরণম্ ||৬৭|| স্বরসো বহুপুত্রাযাঃ সঘৃতঃ ক্ষৌদ্রসংযুতঃ | সোমবল্করসশ্চাপি সুশীতো হিত ইষ্যতে ||৬৮||

কর্ণেত্যাদি| বহুপুত্রা শতাবরী; বহুপত্রাযা ইতি কেচিত্ পঠন্তি, তে চ ব্যাখ্যানযন্তি- বহুপত্রা মযূরশিখা| সোমবল্কঃ কট্ফলঃ, তদ্রসঃ কর্ণপূরণে||৬৭-৬৮||

Adhikarana 33 (69-71) · Śloka 72

অশ্রূপদেহো দাহশ্চ বেদনা দৃষ্টিবিভ্রমঃ | অঞ্জনে বিষসংসৃষ্টে ভবেদান্ধ্যমথাপি চ ||৬৯|| তত্র সদ্যো ঘৃতং পেযং তর্পণং চ সমাগধম্ | অঞ্জনং মেষশৃঙ্গস্য নির্যাসো বরুণস্য চ ||৭০|| মুষ্ককস্যাজকর্ণস্য ফেনো গোপিত্তসংযুতঃ | কপিত্থমেষশৃঙ্গ্যোশ্চ পুষ্পং ভল্লাতকস্য বা ||৭১|| একৈকং কারযেত্ পুষ্পং বন্ধূকাঙ্কোটযোরপি |৭২|

অশ্রূপদেহ ইত্যাদি| উপদেহো মলবৃদ্ধিঃ| সদ্যো ঘৃতমিত্যত্র জেজ্জটস্তু সদ্য এব ঘৃতং পেযমিতি ব্যাখ্যানযতি| সমাগধমিতি আবর্তিতক্ষীরসাধিতপিপ্পলীকল্কসিদ্ধং ঘৃতং তর্পণমিতি বৃদ্ধবাগ্ভটঃ| তর্পণম্ অক্ষিতর্পণং, তদেব সপিপ্পলীকং পেযং পানার্হম্| তথৈব মেষশৃঙ্গীরসেনাঞ্জনম্| এবং বরুণাদীনাং রসেন পৃথক্ পৃথগঞ্জনম্| মুষ্ককঃ কালমুষ্ককঃ| অজকর্ণঃ সর্জঃ পূর্বদেশে প্রসিদ্ধঃ| ফেনঃ সমুদ্রফেনঃ| গোপিত্তং গোরোচনা| কপিত্থাদীনাং প্রত্যেকং পুষ্পমঞ্জনং, ন সমুদিতানাম্||৬৯-৭১||-

Adhikarana 34 (72-73) · Śloka 73

শোফঃ স্রাবস্তথা স্বাপঃ পাদযোঃ স্ফোটজন্ম চ ||৭২|| ভবন্তি বিষজুষ্টাভ্যাং পাদুকাভ্যামসংশযম্ | উপানত্পাদপীঠানি পাদুকাবত্ প্রসাধযেত্ ||৭৩||

শোফ ইত্যাদি| স্বাপঃ স্পর্শাজ্ঞানম্| উপানদিত্যাদি| পাদুকাবত্ প্রসাধযেত্ লক্ষণতঃ প্রতীকারতশ্চ||৭২-৭৩||

Adhikarana 35 (74) · Śloka 75

ভূষণানি হতার্চীংষি ন বিভান্তি যথা পুরা | স্বানি স্থানানি হন্যুশ্চ দাহপাকাবদারণৈঃ ||৭৪|| পাদুকাভূষণেষূক্তমভ্যঙ্গবিধিমাচরেত্ |৭৫|

ভূষণানীত্যাদি| হতার্চীংষি তেজোরহিতানি||৭৪||-

Adhikarana 36 (75-78) · Śloka 79

বিষোপসর্গো বাষ্পাদির্ভূষণান্তো য ঈরিতঃ ||৭৫|| সমীক্ষ্যোপদ্রবাংস্তস্য বিদধীত চিকিত্সিতম্ | মহাসুগন্ধিমগদং যং প্রবক্ষ্যামি তং ভিষক্ ||৭৬|| পানালেপননস্যেষু বিদধীতাঞ্জনেষু চ | বিরেচনানি তীক্ষ্ণানি কুর্যাত্ প্রচ্ছর্দনানি চ ||৭৭|| সিরাশ্চ ব্যধযেত্ ক্ষিপ্রং প্রাপ্তং বিস্রাবণং যদি | মূষিকাঽজরুহা বাঽপি হস্তে বদ্ধা তু ভূপতেঃ ||৭৮|| করোতি নির্বিষং সর্বমন্নং বিষসমাযুতম্ |৭৯|

আবস্থিকীং ক্রিযাং নির্দিশন্নাহ- বিষোপসর্গ ইত্যাদি| উপদ্রবান্ বীক্ষ্য চিকিত্সিতং বিদধীতেত্যাহ- মহাসুগন্ধিমিত্যাদি| মহাসুগন্ধিস্তু `চন্দনাগরুণী কুষ্ঠং’ ইত্যাদি যাবত্ `মহাসুগন্ধিনামৈষ পঞ্চাশীত্যঙ্গসম্ভবঃ’ ইতি| বিদধীতাঞ্জনেষু চেতি বহুবচনাদ্গুডিকাচূর্ণরসক্রিযারূপেষু; চকারেণ পরিষেককবলাদিষ্বপি| আশযানুরোধেন চিকিত্সাং নির্দিশন্নাহ- বিরেচনানীত্যাদি| প্রাপ্তং যুক্তম্| ইদানীং প্রভাবকৃতং চিকিত্সিতং নির্দিশন্নাহ- মূষিকেত্যাদি| অজরুহালক্ষণমুশনসা প্রোক্তম্- “কন্দঃ শ্বেতঃ সপিডকো ভেদে চাঞ্জনসন্নিভঃ| গন্ধলেপনপানৈস্তু বিষং জরযতে নৃণাম্|| দষ্টানাং বিষপীতানাং যে চান্যে বিষমোহিতাঃ| বিষং জরযতে তেষাং তস্মাদজরুহা স্মৃতা|| মূষিকা লোমশা কৃষ্ণা ভবেত্ সাঽপি চ তদ্গুণা”- ইতি||৭৫-৭৮||-

Adhikarana 37 (79-81) · Śloka 81

হৃদযাবরণং নিত্যং কুর্যাচ্চ মিত্রমধ্যগঃ ||৭৯|| পিবেদ্ধৃতমজেযাখ্যমমৃতাখ্যং চ বুদ্ধিমান্ | সর্পির্দধি পযঃ ক্ষৌদ্রং পিবেদ্বা শীতলং জলম্ ||৮০|| মযূরান্নকুলান্ গোধাঃ পৃষতান্ হরিণানপি | সততং ভক্ষযেচ্চপি রসাংস্তেষাং পিবেদপি ||৮১||

শরীরে বিষব্যাপ্তিপ্রতিষেধমভিধাযেদানীং চিতে বিষব্যাপ্তিপ্রতিষেধমাহ- হৃদযাবরণমিত্যাদি| হৃদযাবরণং হৃদযপ্রচ্ছাদনং হৃদযরক্ষাকারিভির্মূষিকাজরুহামৃতাজেযপুরাণঘৃতদূষীবিষারিমহাসুগন্ধিশিম্বীযূষতীক্ষ্ণবিষঘ্নধারণাদিভিঃ| মধুকং কুষ্ঠমিত্যাদিকমজেযাখ্যং, অপামার্গস্য বীজানি পিপ্পলীরিত্যাদ্যমৃতং ঘৃতং, সর্পিরাদীনি প্রত্যেকং চত্বারি পঞ্চ বা হৃদযাবরণানি পিবেদিতি||৭৯-৮১||

Adhikarana 38 (82-84) · Śloka 84

গোধানকুলমাংসেষু হরিণস্য চ বুদ্ধিমান্ | দদ্যাত্ সুপিষ্টাং পালিন্দীং মধুকং শর্করাং তথা ||৮২|| শর্করাতিবিষে দেযে মাযূরে সমহৌষধে | পার্ষতে চাপি দেযাঃ স্যুঃ পিপ্পল্যঃ সমহৌষধাঃ ||৮৩|| সক্ষৌদ্রঃ সঘৃতশ্চৈব শিম্বীযূষো হিতঃ সদা | বিষঘ্নানি চ সেবেত ভক্ষ্যভোজ্যানি বুদ্ধিমান্ ||৮৪||

গোধাদিমাংসানাং সংস্কারযৌগিকং বিশেষং নির্দিশন্নাহ- গোধেত্যাদি| মধুকমক্ষমাত্রং দদ্যাত্| পালিন্দী ত্রিবৃত্| শর্করেত্যাদি| মযূরস্য মাংসে তস্য রসে চ সুপিষ্টে শর্করাতিবিষে সশুণ্ঠ্যৌ দেযে| পার্ষত ইত্যাদি| পৃষতস্য মাংসে রসে চ পিপ্পল্যঃ সনাগরাঃ সুপিষ্টা দেযাঃ| সক্ষৌদ্র ইত্যাদি| অনুক্তানি চোদ্দিশন্নাহ- বিষঘ্নানীত্যাদি| বিষঘ্নানি বিষঘ্নৈর্দ্রব্যৈঃ সহ সিদ্ধানি||৮২-৮৪||

Adhikarana 39 (85) · Śloka 85

পিপ্পলীমধুকক্ষৌদ্রশর্করেক্ষুরসাম্বুভিঃ | ছর্দযেদ্গুপ্তহৃদযো ভক্ষিতং যদি বৈ বিষম্ ||৮৫||

আবৃতগুপ্তহৃদযস্য পীতবিষস্য শেষং নির্দিশন্নাহ- পিপ্পলীত্যাদি| শর্করেক্ষুরসাম্বূনি ত্রীণি দ্রবাণি, পিপ্পলীমধুকং কল্কং, ক্ষৌদ্রমিতি প্রক্ষেপঃ| গুপ্তহৃদযো বিষঘ্নৈঃ প্রচ্ছাদিতহৃদযঃ||৮৫||

Adhikarana puShpikA · Śloka 1

ইতি সুশ্রুতসংহিতাযাং কল্পস্থানেঽন্নপানরক্ষাকল্পো নাম প্রথমোঽধ্যাযঃ ||১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতটীকাযাং কল্পস্থানে প্রথমোঽধ্যাযঃ||১||