Adhikarana 1 (1-2) · Śloka 2
অথাতো দুন্দুভিস্বনীযং কল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो दुन्दुभिस्वनीयं कल्पं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথাত ইত্যাদি| দুন্দুভিস্বনোঽস্মিন্নধ্যাযেঽস্তীতি দুন্দুভিস্বনীযস্তং; দুন্দুভিরত্র নিস্বানঃ||১-২||
Adhikarana 2 (3-7) · Śloka 7
ধবাশ্বকর্ণশিরীষতিনিশপলাশপিচুমর্দপাটলিপারিভদ্রকাম্রোদুম্বরকরহাটকার্জুনককুভসর্জ- কপীতনশ্লেষ্মাতকাঙ্কোঠামলকপ্রগ্রহকুটজশমীকপিত্থাশ্মন্তকার্কচিরবিল্বমহাবৃক্ষারুষ্করারলু- মধুকমধুশিগ্রুশাকগোজীমূর্বাভূর্জতিল্বকেক্ষুরকগোপঘোণ্টারিমেদানাং ভস্মান্যাহৃত্য গবাং মূত্রেণ ক্ষারকল্পেন পরিস্রাব্য বিপচেত্, দদ্যাচ্চাত্র পিপ্পলীমূলতণ্ডুলীযকবরাঙ্গচোচমঞ্জিষ্ঠাকরঞ্জিকাহস্তিপিপ্পলীমরিচবিডঙ্গগৃহধূমানন্তা- সোমসরলাবাহ্লীকগুহাকোশাম্রশ্বেতসর্ষপবরুণলবণপ্লক্ষনিচুলকবঞ্জুলবক্রালবর্ধমানপুত্রশ্রেণী- সপ্তপর্ণটুণ্টুকৈলবালুকনাগদন্ত্যতিবিষাভযাভদ্রদারুকুষ্ঠহরিদ্রাবচাচূর্ণানি লোহানাং চ সমভাগানি, ততঃ ক্ষারবদাগতপাকমবতার্য লোহকুম্ভে নিদধ্যাত্ ||৩|| অনেন দুন্দুভিং লিম্পেত্ পতাকাং তোরণানি চ | শ্রবণাদ্দর্শনাত্ স্পর্শাত্ বিষাত্ সম্প্রতিমুচ্যতে ||৪|| এষ ক্ষারাগদো নাম শর্করাস্বশ্মরীষু চ | অর্শঃসু বাতগুল্মেষু কাসশূলোদরেষু চ ||৫|| অজীর্ণে গ্রহণীদোষে ভক্তদ্বেষে চ দারুণে | শোফে সর্বসরে চাপি দেযঃ শ্বাসে চ দারুণে ||৬|| সদা সর্ববিষার্তানাং সর্বথৈবোপযুজ্যতে | এষ তক্ষকমুখ্যানামপি দর্পাঙ্কুশোঽগদঃ ||৭||
धवाश्वकर्णशिरीषतिनिशपलाशपिचुमर्दपाटलिपारिभद्रकाम्रोदुम्बरकरहाटकार्जुनककुभसर्ज- कपीतनश्लेष्मातकाङ्कोठामलकप्रग्रहकुटजशमीकपित्थाश्मन्तकार्कचिरबिल्वमहावृक्षारुष्करारलु- मधुकमधुशिग्रुशाकगोजीमूर्वाभूर्जतिल्वकेक्षुरकगोपघोण्टारिमेदानां भस्मान्याहृत्य गवां मूत्रेण क्षारकल्पेन परिस्राव्य विपचेत्, दद्याच्चात्र पिप्पलीमूलतण्डुलीयकवराङ्गचोचमञ्जिष्ठाकरञ्जिकाहस्तिपिप्पलीमरिचविडङ्गगृहधूमानन्ता- सोमसरलाबाह्लीकगुहाकोशाम्रश्वेतसर्षपवरुणलवणप्लक्षनिचुलकवञ्जुलवक्रालवर्धमानपुत्रश्रेणी- सप्तपर्णटुण्टुकैलवालुकनागदन्त्यतिविषाभयाभद्रदारुकुष्ठहरिद्रावचाचूर्णानि लोहानां च समभागानि, ततः क्षारवदागतपाकमवतार्य लोहकुम्भे निदध्यात् ||३|| अनेन दुन्दुभिं लिम्पेत् पताकां तोरणानि च | श्रवणाद्दर्शनात् स्पर्शात् विषात् सम्प्रतिमुच्यते ||४|| एष क्षारागदो नाम शर्करास्वश्मरीषु च | अर्शःसु वातगुल्मेषु कासशूलोदरेषु च ||५|| अजीर्णे ग्रहणीदोषे भक्तद्वेषे च दारुणे | शोफे सर्वसरे चापि देयः श्वासे च दारुणे ||६|| सदा सर्वविषार्तानां सर्वथैवोपयुज्यते | एष तक्षकमुख्यानामपि दर्पाङ्कुशोऽगदः ||७||
🔊 Audio coming soon
ধবাশ্বকর্ণতিনিশেত্যাদি| অশ্বকর্ণঃ পূর্বদেশে প্রসিদ্ধঃ, তিনিশঃ স্যন্দনঃ, পলাশঃ কিংশুকঃ, পিচুমর্দো নিম্বঃ, পারিভদ্রকো রক্তকুসুমঃ কণ্টকী ফলভদ্রাখ্যঃ, অর্জুনঃ স্বনামপ্রসিদ্ধো বৃক্ষবিশেষঃ, ককুভঃ সুগন্ধমূলো বিটপবিশেষঃ, সর্জকঃ স্বনামপ্রসিদ্ধো বৃক্ষবিশেষঃ, কপীতনো গর্দভাণ্ডঃ, শ্লেষ্মাতকো বহুবারঃ, প্রগ্রহঃ কিরমালকঃ, মহাবৃক্ষঃ সেহুণ্ডঃ, অরুষ্করো ভল্লাতকঃ, মধুকং যষ্টীমধু, মধুশিগ্রুঃ শাকবিটপঃ, রক্তশোভাঞ্জনক ইত্যপরে, শাকো মহাপত্রঃ `শ্রীপর্ণ’ ইতি লোকে, গোজী গোজিহ্বা, ইক্ষুরকঃ কোকিলাক্ষকঃ, গোপঘোণ্টা কর্কোটী, অরিমেদো রামকঃ; এষাং ধবাদীনামরিমেদান্তানাং সমূলদলকাণ্ডশাখানাং সমেন ভাগেন গৃহীতানাং ভস্মান্যাহৃত্য গবাং মূত্রেণ ক্ষারষড্গুণেন ক্ষারকল্পেন পরিস্রাব্য একবিংশতিবারান্ গালযিত্বেত্যর্থঃ, বিপচেত্ সাধযেত্, তাবদ্যাবদচ্ছো রক্তঃ পিচ্ছিলশ্চ ভবতি| দদ্যাচ্চাত্রেত্যাদি| মূলং পিপ্পলীমূলং, বরাঙ্গং বনবাসিকাত্বক্, চোচং দ্বিতীযা স্থূলা ত্বক্ যাং শাল্মলকমিত্যাচক্ষতে, করঞ্জিকা নক্তমালঃ, অনন্তা উত্পলসারিবা, সোমঃ সোমবল্কঃ কট্ফলাখ্যঃ, বাহ্লীকং কুঙ্কুমং, গুহা শালপর্ণী, প্লক্ষঃ পর্কটী, নিচুলকো জলবেতসঃ, বক্রং তগরং, আলং হরিতালং, বর্ধমান এরণ্ডঃ, পুত্রশ্রেণী দ্রবন্তী, টুণ্টুকঃ শ্যোনাকঃ, এলবালুকঃ স্বনামপ্রসিদ্ধঃ, নাগদন্তী ইন্দ্রবারুণীভেদঃ, জেজ্জটাচার্যমতে তু দন্তী; এষাং পিপ্পল্যাদীনাং চূর্ণানি লোহানাং চ সর্বেষাং যথালাভং ক্ষারোদকাত্ ত্রিংশত্তমভাগেন, অত্র অস্মিন্ ক্ষারোদকে, দদ্যাত্ নিক্ষিপেদিত্যর্থঃ| তদনু পুনর্বিপচেদ্ যাবন্নাতিদ্রবং নাতিসান্দ্রং চ ভবতি| গযদাসস্তু শিরীষপিচুমর্দককুভারুষ্করমধুকেক্ষুরকান্ পরিত্যজ্য ত্রিংশদেব পঠতি; পিপ্পল্যাদিষ্বাবাপেষু চ মরিচসোমগুহালবণবক্রালান্ পরিত্যজ্য ত্রিংশদ্দ্রব্যাণি পঠতি||৩-৭||
Adhikarana 3 (8-11) · Śloka 11
বিডঙ্গত্রিফলাদন্তীভদ্রদারুহরেণবঃ | তালীশপত্রমঞ্জিষ্ঠাকেশরোত্পলপদ্মকম্ ||৮|| দাডিমং মালতীপুষ্পং রজন্যৌ সারিবে স্থিরে | প্রিযঙ্গুস্তগরং কুষ্ঠং বৃহত্যৌ চৈলবালুকম্ ||৯|| সচন্দনগবাক্ষীভিরেতৈঃ সিদ্ধং বিষাপহম্ | সর্পিঃ কল্যাণকং হ্যেতদ্গ্রহাপস্মারনাশনম্ ||১০|| পাণ্ড্বামযগরশ্বাসমন্দাগ্নিজ্বরকাসনুত্ | শোষিণামল্পশুক্রাণাং বন্ধ্যানাং চ প্রশস্যতে ||১১||
विडङ्गत्रिफलादन्तीभद्रदारुहरेणवः | तालीशपत्रमञ्जिष्ठाकेशरोत्पलपद्मकम् ||८|| दाडिमं मालतीपुष्पं रजन्यौ सारिवे स्थिरे | प्रियङ्गुस्तगरं कुष्ठं बृहत्यौ चैलवालुकम् ||९|| सचन्दनगवाक्षीभिरेतैः सिद्धं विषापहम् | सर्पिः कल्याणकं ह्येतद्ग्रहापस्मारनाशनम् ||१०|| पाण्ड्वामयगरश्वासमन्दाग्निज्वरकासनुत् | शोषिणामल्पशुक्राणां वन्ध्यानां च प्रशस्यते ||११||
🔊 Audio coming soon
বিডঙ্গত্রিফলেত্যাদি| ইদং কল্যাণকং ঘৃতং ভূতবিদ্যাযাং পঠিতত্বাত্ কেচিন্ন পঠন্তি||৮-১১||
Adhikarana 4 (12-13) · Śloka 13
অপামার্গস্য বীজানি শিরীষস্য চ মাষকান্ | শ্বেতে দ্বে কাকমাচীং চ গবাং মূত্রেণ পেষযেত্ ||১২|| সর্পিরেতৈস্তু সংসিদ্ধং বিষসংশমনং পরম্ | অমৃতং নাম বিখ্যাতমপি সঞ্জীবযেন্মৃতম্ ||১৩||
अपामार्गस्य बीजानि शिरीषस्य च माषकान् | श्वेते द्वे काकमाचीं च गवां मूत्रेण पेषयेत् ||१२|| सर्पिरेतैस्तु संसिद्धं विषसंशमनं परम् | अमृतं नाम विख्यातमपि सञ्जीवयेन्मृतम् ||१३||
🔊 Audio coming soon
অপামার্গস্যেত্যাদি| শিরীষস্য চ মাষকানিতি মাষকা ইব মাষকাঃ তান্, বীজানীত্যর্থঃ| শ্বেতে দ্বে ইতি শ্বেতা মহাশ্বেতা চ কটভীদ্বযমিত্যর্থঃ; অন্যে তু শ্বেতে দ্বে শ্বেতস্যন্দঃ শ্বেতবচেতি ভাষন্তে| অত্র শ্রুতত্বাদ্ ঘৃতাদ্ গোমূত্রং চতুর্গুণং দেযম্||১২-১৩||
Adhikarana 5 (14-27) · Śloka 27
চন্দনাগুরুণী কুষ্ঠং তগরং তিলপর্ণিকম্ | প্রপৌণ্ডরীকং নলদং সরলং দেবদারু চ ||১৪|| ভদ্রশ্রিযং যবফলাং ভার্গী নীলীং সুগন্ধিকাম্ | কালেযকং পদ্মকং চ মধুকং নাগরং জটাম্ ||১৫|| পুন্নাগৈলৈলবালূনি গৈরিকং ধ্যামকং বলাম্ | তোযং সর্জরসং মাংসীং শতপুষ্পাং হরেণুকাম্ ||১৬|| তালীশপত্রং ক্ষুদ্রৈলাং প্রিযঙ্গুং সকুটন্নটম্ | শিলাপুষ্পং সশৈলেযং পত্রং কালানুসারিবাম্ ||১৭|| কটুত্রিকং শীতশিবং কাশ্মর্যং কটুরোহিণীম্ | সোমরাজীমতিবিষাং পৃথ্বিকামিন্দ্রবারুণীম্ ||১৮|| উশীরং বরুণং মুস্তং কুস্তুম্বুরু নখং তথা | শ্বেতে হরিদ্রে স্থৌণেযং লাক্ষাং চ লবণানি চ ||১৯|| কুমুদোত্পলপদ্মানি পুষ্পং চাপি তথাঽর্কজম্ | চম্পকাশোকসুমনস্তিল্বকপ্রসবানি চ ||২০|| পাটলীশাল্মলীশৈলুশিরীষাণাং তথৈব চ | কুসুমং তৃণমূল্যাশ্চ সুরভীসিন্ধুবারজম্ ||২১|| ধবাশ্বকর্ণপার্থানাং পুষ্পাণি তিনিশস্য চ | গুগ্গুলুং কুঙ্কুমং বিম্বীং সর্পাক্ষীং গন্ধনাকুলীম্ ||২২|| এতত্ সম্ভৃত্য সম্ভারং সূক্ষ্মচূর্ণানি কারযেত্ | গোপিত্তমধুসর্পির্ভির্যুক্তং শৃঙ্গে নিধাপযেত্ ||২৩|| ভগ্নস্কন্ধং বিবৃতাক্ষং মৃত্যোর্দংষ্ট্রান্তরং গতম্ | অনেনাগদমুখ্যেন মনুষ্যং পুনরাহরেত্ ||২৪|| এষোঽগ্নিকল্পং দুর্বারং ক্রুদ্ধস্যামিততেজসঃ | বিষং নাগপতের্হন্যাত্ প্রসভং বাসুকেরপি ||২৫|| মহাসুগন্ধিনামাঽযং পঞ্চাশীত্যঙ্গসংযুতঃ | রাজাঽগদানাং সর্বেষাং রাজ্ঞো হস্তে ভবেত্ সদা ||২৬|| স্নাতানুলিপ্তস্তু নৃপো ভবেত্ সর্বজনপ্রিযঃ | ভ্রাজিষ্ণুতাং চ লভতে শত্রুমধ্যগতোঽপি সন্ ||২৭||
चन्दनागुरुणी कुष्ठं तगरं तिलपर्णिकम् | प्रपौण्डरीकं नलदं सरलं देवदारु च ||१४|| भद्रश्रियं यवफलां भार्गी नीलीं सुगन्धिकाम् | कालेयकं पद्मकं च मधुकं नागरं जटाम् ||१५|| पुन्नागैलैलवालूनि गैरिकं ध्यामकं बलाम् | तोयं सर्जरसं मांसीं शतपुष्पां हरेणुकाम् ||१६|| तालीशपत्रं क्षुद्रैलां प्रियङ्गुं सकुटन्नटम् | शिलापुष्पं सशैलेयं पत्रं कालानुसारिवाम् ||१७|| कटुत्रिकं शीतशिवं काश्मर्यं कटुरोहिणीम् | सोमराजीमतिविषां पृथ्विकामिन्द्रवारुणीम् ||१८|| उशीरं वरुणं मुस्तं कुस्तुम्बुरु नखं तथा | श्वेते हरिद्रे स्थौणेयं लाक्षां च लवणानि च ||१९|| कुमुदोत्पलपद्मानि पुष्पं चापि तथाऽर्कजम् | चम्पकाशोकसुमनस्तिल्वकप्रसवानि च ||२०|| पाटलीशाल्मलीशैलुशिरीषाणां तथैव च | कुसुमं तृणमूल्याश्च सुरभीसिन्धुवारजम् ||२१|| धवाश्वकर्णपार्थानां पुष्पाणि तिनिशस्य च | गुग्गुलुं कुङ्कुमं बिम्बीं सर्पाक्षीं गन्धनाकुलीम् ||२२|| एतत् सम्भृत्य सम्भारं सूक्ष्मचूर्णानि कारयेत् | गोपित्तमधुसर्पिर्भिर्युक्तं शृङ्गे निधापयेत् ||२३|| भग्नस्कन्धं विवृताक्षं मृत्योर्दंष्ट्रान्तरं गतम् | अनेनागदमुख्येन मनुष्यं पुनराहरेत् ||२४|| एषोऽग्निकल्पं दुर्वारं क्रुद्धस्यामिततेजसः | विषं नागपतेर्हन्यात् प्रसभं वासुकेरपि ||२५|| महासुगन्धिनामाऽयं पञ्चाशीत्यङ्गसंयुतः | राजाऽगदानां सर्वेषां राज्ञो हस्ते भवेत् सदा ||२६|| स्नातानुलिप्तस्तु नृपो भवेत् सर्वजनप्रियः | भ्राजिष्णुतां च लभते शत्रुमध्यगतोऽपि सन् ||२७||
🔊 Audio coming soon
চন্দনাগুরুণীত্যাদি| তিলপর্ণিকং `হুলহুল’ ইতি লোকে, গযী তু তৈলপর্ণিকঃ সরলরসঃ নবনীতখোটিরিতি প্রসিদ্ধঃ, নলদম্ উশীরভেদঃ লামজ্জকং, ভদ্রশ্রিযং শ্বেতচন্দনং, যবফলা দুগ্ধিকা, নীলী নীলাঞ্জনিকা শারদং ফলং, সুগন্ধিকা সর্পসুগন্ধা, কালেযকং পীতচন্দনং, জটা দ্বিতীযা মাংসী, পুন্নাগঃ স্বনামপ্রসিদ্ধঃ, এলা স্থূলৈলা, এলবালুকং স্বনামপ্রসিদ্ধং, ধ্যামকং কত্তৃণং, তোযং বালকং, হরেণুঃ রেণুকা, ক্ষুদ্রৈলা সূক্ষ্মৈলা, কুটন্নটঃ বন্যকঃ, `ফঞ্জীমদনক’ ইতি লোকে, শিলাপুষ্পং শিলা মনঃশিলা, পুষ্পং পুষ্পকাসীসং, কালানুসারিবা তগরভেদঃ, কাশ্মরী শ্রীপর্ণী, শীতশীবং কর্পূরং, শমীত্যপরে, সোমরাজী বাকুচী, পৃথ্বিকা শ্যামবর্ণঃ স্থূলজীরকঃ, হিঙ্গুপত্রিকেত্যপরে, শ্বেতে ইতি কটভীদ্বযং, শ্বেতামিতি কেচিত্ পঠন্তি তত্র শ্বেতা বচা, স্থৌণেযং গ্রন্থিপর্ণকং, লবণানি পঞ্চৈব, প্রসবশব্দেনাত্র কুসুমানি ফলানি চ গ্রাহ্যাণি প্রসবস্যোভযবাচিত্বাত্, তৃণশূন্যাঃ কেতক্যাঃ, মল্লিকাযা ইত্যপরে, সুরসীসিন্ধুবারাভ্যাং জাতং কুসুমমিত্যর্থঃ, সিন্ধুবারো নির্গুণ্ডীভেদঃ, অশ্বকর্ণঃ সর্জভেদঃ, তিনিশঃ স্যন্দনঃ, বিম্বী কুন্দুরিকা, সর্পাক্ষী রক্তপুষ্পা পূর্বদেশে প্রসিদ্ধা, গন্ধনাকুলী সুগন্ধমূলা রাস্না, শিলাপুষ্পমিত্যত্র তিলপুষ্পমিতি কেচিত্ পঠন্তি তচ্চ প্রসিদ্ধং, তন্মতে শৃঙ্গেণাধারেণ পঞ্চাশীতিঃ পূর্যতে| অষ্টৌ লবণানীতি জেজ্জটাচার্যঃ, তন্নেচ্ছতি গযী, যতঃ পঞ্চাশীতেরঙ্গানামাধিক্যং স্যাত্| `কুমুদোত্পলপদ্মানি পুষ্পং বাঽপি তথাঽর্কজং’ ইত্যত্র স্থানে `পাটলাকাশ্মরীশেলুশিরীষপ্রসবানি চ’ ইতি গযদাসাচার্যঃ পঠতি| এষোঽগ্নিকল্পমিত্যাদি| এষঃ অগদঃ, অগ্নিকল্পং দুর্বারং বিষং বাসুকেরপি ক্রুদ্ধস্য অমিততেজসো নাগপতেঃ প্রসভং হঠেন হন্যাদিতি সম্বন্ধঃ| রাজাঽগদানাং সর্বেষাং রাজ্ঞো হস্তে ভবেত্ সদেতি যতোঽযং সর্বাগদানাং রাজা অত এব রাজ্ঞো হস্তে সদা নিত্যং ভবিতুমর্হতি; তেন হস্তস্থিতাগদেন পাণিনা স্পৃষ্টমন্নপানং নির্বিষং ভবতি; হস্তস্থাপনপ্রযোজনমিদম্| স্নাতানুলিপ্ত ইত্যাদি| স্নানানুলেপনাভ্যাং বশীকরণম্||১৪-২৭||
Adhikarana 6 (28) · Śloka 28
উষ্ণবর্জ্যো বিধিঃ কার্যো বিষার্তানাং বিজানতা | মুক্ত্বা কীটবিষং তদ্ধি শীতেনাভিপ্রবর্ধতে ||২৮||
उष्णवर्ज्यो विधिः कार्यो विषार्तानां विजानता | मुक्त्वा कीटविषं तद्धि शीतेनाभिप्रवर्धते ||२८||
🔊 Audio coming soon
বিষার্তানাং শোধনাঙ্গত্বেনাপি স্বেদো ন ক্রিযত ইত্যর্থমাহ- উষ্ণবর্জ্য ইত্যাদি||২৮||
Adhikarana 7 (29-31) · Śloka 31
অন্নপানবিধাবুক্তমুপধার্য শুভাশুভম্ | শুভং দেযং বিষার্তেভ্যো বিরুদ্ধেভ্যশ্চ বারযেত্ ||২৯|| ফাণিতং শিগ্রুসৌবীরমজীর্ণাধ্যশনং তথা | বর্জযেচ্চ সমাসেন নবধান্যাদিকং গণম্ ||৩০|| দিবাস্বপ্নং ব্যবাযং চ ব্যাযামং ক্রোধমাতপম্ | সুরাতিলকুলত্থাংশ্চ বর্জযেদ্ধি বিষাতুরঃ ||৩১||
अन्नपानविधावुक्तमुपधार्य शुभाशुभम् | शुभं देयं विषार्तेभ्यो विरुद्धेभ्यश्च वारयेत् ||२९|| फाणितं शिग्रुसौवीरमजीर्णाध्यशनं तथा | वर्जयेच्च समासेन नवधान्यादिकं गणम् ||३०|| दिवास्वप्नं व्यवायं च व्यायामं क्रोधमातपम् | सुरातिलकुलत्थांश्च वर्जयेद्धि विषातुरः ||३१||
🔊 Audio coming soon
উপধার্য জ্ঞাত্বেত্যর্থঃ, শুভাশুভং হিতাহিতং, বারযেদ্বিষার্তানেব| ফাণিতমিত্যাদি| কুলত্থাংশ্চেত্যত্র চকারেণ পিণ্যাকমূলকলসুনকলাযকুসুম্ভাতসীশিশুমারকূর্মনিষ্পাবজম্ব্বাম্রাতকচূতাদিকানি চ বর্জযেত্||২৯-৩১||
Adhikarana 8 (32) · Śloka 32
প্রসন্নদোষং প্রকৃতিস্থধাতুমন্নাভিকাঙ্ক্ষং সমসূত্রজিহ্বম্ | প্রসন্নবর্ণেন্দ্রিযচিত্তচেষ্টং বৈদ্যোঽবগচ্ছেদবিষং মনুষ্যম্ ||৩২||
प्रसन्नदोषं प्रकृतिस्थधातुमन्नाभिकाङ्क्षं समसूत्रजिह्वम् | प्रसन्नवर्णेन्द्रियचित्तचेष्टं वैद्योऽवगच्छेदविषं मनुष्यम् ||३२||
🔊 Audio coming soon
অবিষশ্চ কীদৃশ ইত্যাহ- প্রসন্নদোষমিত্যাদি| প্রসন্নদোষং স্বভাবাবস্থিতবাতাদিকং, প্রকৃতিস্থধাতুং দধতীতি ধাতবো রসাদযো মলাশ্চ| অন্নাভিকাঙ্ক্ষং ভোজনাভিলাষিণং, এতেন সমাগ্নিত্বমুক্তম্| সমসূত্রজিহ্বমিতি সমসূত্রা জিহ্বা যস্য স তথা তম্| এতদুক্তং ভবতি- নির্বিষস্য হি পুরুষস্য চিত্তেন সহ সমসূত্রতযা জিহ্বা রসবেদিনী ভবতি, সবিষস্য বিষপ্রভাবেণ দূষিতচিত্তত্বাজ্জিহ্বা রসবেদিনী ন ভবতীত্যর্থঃ| অনেন শ্লোকেন `সমদোষঃ সমাগ্নিশ্চ’ ইত্যাদিশ্লোকস্য সর্ব এবার্থো নিবদ্ধঃ| বৈদ্যোঽবগচ্ছেদবিষং মনুষ্যমিতি উক্তলক্ষণঃ পুরুষোঽবিষো ভবতি, বিপরীতলক্ষণস্তু বিষাতুরঃ| তথা হি,- “প্রবৃদ্ধদোষং বিকৃতিস্থধাতুমনন্নকাঙ্ক্ষং ক্ষতসূত্রজিহ্বম্| বিরুদ্ধবর্ণেন্দ্রিযচিত্তচেষ্টং বৈদ্যোঽবগচ্ছেত্ সবিষং মনুষ্যম্”- ইতি| `সমমূত্রবিট্কং’ ইতি কেচিত্ পঠন্তি, তচ্চ সুবোধম্| ইদং সবিষাবিষলক্ষণং তীক্ষ্ণতমে স্থাবরবিষে সর্পদষ্টে চ দ্রষ্টব্যং, নতু মন্দবিষে চিরেণ ধাতুদূষণকরে মূষিকবিষে কীটবিষেষু চ; অত এবোত্তরত্র মূষিককীটবিকল্পাবিতি| জেজ্জটস্তু মূষিককল্পানন্তরং দুন্দুভিস্বনীযং কল্পং পঠতি||৩২||
Adhikarana puShpikA · Śloka 6
ইতি সুশ্রুতসংহিতাযাং কল্পস্থানে দুন্দুভিস্বনীযকল্পো নাম ষষ্ঠোঽধ্যাযঃ ||৬||
इति सुश्रुतसंहितायां कल्पस्थाने दुन्दुभिस्वनीयकल्पो नाम षष्ठोऽध्यायः ||६||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং কল্পস্থানে ষষ্ঠোঽধ্যাযঃ||৬||