3. jaṅgamaviṣavijñānīyakalpaḥ

Adhikarana 1 (1-2) · Śloka 2

অথাতো জঙ্গমবিষবিজ্ঞানীযং কল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3-4) · Śloka 4

জঙ্গমস্য বিষস্যোক্তান্যধিষ্ঠানানি ষোডশ | সমাসেন মযা যানি বিস্তরস্তেষু বক্ষ্যতে ||৩|| তত্র, দৃষ্টিনিঃশ্বাসদংষ্ট্রানখমূত্রপুরীষশুক্রলালার্তবমুখসন্দংশ- বিশর্ধিততুণ্ডাস্থিপিত্তশূকশবানীতি ||৪||

তান্যেবাধিষ্ঠানানি নির্দিশন্নাহ- তত্র দৃষ্টিনিঃশ্বাসেত্যাদি| নিঃশ্বাসঃ ফূত্কারঃ, বিশর্ধিতং পাযুকৃতঃ কুত্সিতশব্দঃ, শূকং কীটলোম, কীটানাং সর্পাণাং চ বিগতপ্রাণানাং দেহঃ শবঃ| বৃদ্ধবাগ্ভটস্তু তুণ্ডবিশর্ধিতস্থানে অল(আর)শোণিতে পঠতি||৩-৪||

Adhikarana 3 (5) · Śloka 5

তত্র, দৃষ্টিনিঃশ্বাসবিষা দিব্যাঃ সর্পাঃ, ভৌমাস্তু দংষ্ট্রাবিষাঃ, মার্জারশ্ববানরমকরমণ্ডূকপাকমত্স্যগোধাশম্বূকপ্রচলাকগৃহগোধিকাচতুষ্পাদকীটাস্তথাঽন্যে দংষ্ট্রানখবিষাঃ, চিপিটপিচ্চিটককষাযবাসিকসর্ষপকতোটকবর্চঃকীটকৌণ্ডিন্যকাঃ শকৃন্মূত্রবিষাঃ, মূষিকাঃ শুক্রবিষাঃ, লূতা লালামূত্রপুরীষমুখসন্দংশনখশুক্রার্তববিষাঃ , বৃশ্চিকবিশ্বম্ভরবরটীরাজীবমত্স্যোচ্চিটিঙ্গাঃ সমুদ্রবৃশ্চিকাশ্চাল(র)বিষাঃ, চিত্রশিরঃসরাবকুর্দিশতদারুকারিমেদকসারিকামুখা মুখসন্দংশবিশর্ধিতমূত্রপুরীষবিষাঃ, মক্ষিকাকণভজলাযুকা মুখসন্দংশবিষাঃ, বিষহতাস্থি সর্পকণ্টকবরটীমত্স্যাস্থি চেত্যস্থিবিষাণি, শকুলীমত্স্যরক্তরাজিবরকী(টী)মত্স্যাশ্চ পিত্তবিষাঃ, সূক্ষ্মতুণ্ডোচ্চিটিঙ্গবরটীশতপদীশূকবলভিকাশৃঙ্গিভ্রমরাঃ শূকতুণ্ডবিষাঃ, কীটসর্পদেহা গতাসবঃ শববিষাঃ; শেষাস্ত্বনুক্তা মুখসন্দংশবিষেষ্বেব গণযিতব্যাঃ ||৫||

তত্রেত্যাদি| দিবি ভবা দিব্যাঃ, ভূমৌ ভবা ভৌমাঃ; এতচ্চ প্রাযিকং, সর্বেঽপি সর্পা দংশাযতনবিষাঃ; তথা হি সাবিত্রে,- “সর্ব এব সর্পা দংশবিষা ভবন্তি, মলদশনদংষ্ট্রাচক্ষুর্লালানিঃশ্বাসেন্দ্রিযমূত্রপুরীষপুচ্ছৈঃ ”(?) ইতি| মার্জারেত্যাদি| অত্র মার্জারোক্ত্যৈব ব্যালা ব্যাঘ্রাদযোঽভিপ্রেতাঃ| মকরো জলজন্তুরিত্যেকে, অন্যে আগ্নেযকীটপঠিতং মকরাকারত্বেন মকরং, কর্কটবৃশ্চিকং মকরমন্যে| পাকমত্স্যোঽপি আগ্নেযেষ্বেব পঠিতঃ কীটবিশেষঃ| গোধা পঞ্চনখী পবিত্রা সৌম্যকীটপঠিতা; কৃষ্ণশব্দস্য লোপাত্ কৃষ্ণগোধাং বিদুরন্যে| প্রচলাকং সৌম্যকীটপঠিতং কীটবিশেষমাহুঃ| গৃহগোধিকা কোষ্ঠাগারী কোষ্ঠগৃহকারিকা| চতুষ্পদকীটাঃ প্রতিসূর্যকাদযঃ| তথাঽন্যে মশকমক্ষিকাদযশ্চ কীটাঃ| চিপিটপিচ্চিটকেত্যাদি এতে কীটবিশেষা দেশান্তরে লোকতো জ্ঞেযাঃ| বৃশ্চিকেত্যাদি| আরশব্দেনাত্র বৃশ্চিকলাঙ্গূলাদিস্থিতঃ কণ্টকো ভণ্যতে, তস্য চ স্থূলশূকরূপত্বাচ্ছূকগ্রহণেনৈব গ্রহণং, অত এব দৃষ্টিনিঃশ্বাসেত্যাদিসূত্রে পৃথঙ্নোদাহৃতমারগ্রহণম্ | গযদাসশ্চাত্র `আলালবিষা’ ইতি পঠতি, ব্যাখ্যানযতি চ- আলালং লালা| চিত্রশির ইত্যাদি| বরকীমত্স্যযোঃ স্থানে কেচিদেকমেব বরটী(কী)মত্স্যং পঠন্তি| গতাসবো গতপ্রাণাঃ||৫||

Adhikarana 4 (6) · Śloka 6

ভবন্তি চাত্র- রাজ্ঞোঽরিদেশে রিপবস্তৃণাম্বুমার্গান্নধূমশ্বসনান্ বিষেণ | সন্দূষযন্ত্যেভিরতিপ্রদুষ্টান্ বিজ্ঞায লিঙ্গৈরভিশোধযেত্তান্ ||৬||

রাজ্ঞ ইত্যাদি| অরিদেশে প্রবিষ্টস্য রাজ্ঞোঽপি রিপবঃ শত্রবঃ তৃণাদীন্ সন্দূষযন্তি| অন্নম্ অন্নরক্ষাযামুক্তমপি দেশাদিপ্রসঙ্গেণাত্র পুনরুক্তম্| শ্বসনো বাযুঃ| এভির্লিঙ্গৈঃ বক্ষ্যমাণৈরিত্যর্থঃ||৬||

Adhikarana 5 (7-8) · Śloka 8

দুষ্টং জলং পিচ্ছিলমুগ্রগন্ধি ফেনান্বিতং রাজিভিরাবৃতং চ | মণ্ডূকমত্স্যং ম্রিযতে বিহঙ্গা মত্তাশ্চ সানূপচরা ভ্রমন্তি ||৭|| মজ্জন্তি যে চাত্র নরাশ্বনাগাস্তে ছর্দিমোহজ্বরদাহশোফান্ | ঋ(গ)চ্ছন্তি তেষামপহৃত্য দোষান্ দুষ্টং জলং শোধযিতুং যতেত ||৮||

দুষ্টমিত্যাদি| রাজিভিঃ কৃষ্ণাভিঃ| বিহঙ্গা ইত্যাদি সানূপচরা অনূপচরসহিতা বিহঙ্গাঃ পক্ষিণো বিষবেগেন মত্তাঃ সন্তো ভ্রমন্তি| ঋচ্ছন্তি প্রাপ্নুবন্তি| যতেত যত্নং কুর্বীত||৭-৮||

Adhikarana 6 (9) · Śloka 10

ধবাশ্বকর্ণাসনপারিভদ্রান্ সপাটলান্ সিদ্ধকমোক্ষকৌ চ | দগ্ধ্বা সরাজদ্রুমসোমবল্কাংস্তদ্ভস্ম শীতং বিতরেত্ সরঃসু ||৯|| ভস্মাঞ্জলিং চাপি ঘটে নিধায বিশোধযেদীপ্সিতমেবমম্ভঃ |১০|

তদেব দুষ্টবারিপ্রশোধনৌষধং দর্শযন্নাহ- ধবাশ্বেত্যাদি| অশ্বকর্ণঃ পূর্বদেশে প্রসিদ্ধো গন্ধমুণ্ডঃ অশ্বত্থসদৃশঃ, অসনো বীজকঃ, পারিভদ্রঃ ফলভদ্রো রক্তকুসুমঃ কণ্টকী রোহিণীসদৃশপত্রঃ পূর্বদেশে প্রসিদ্ধঃ, রাজদ্রুমঃ কিরমালকঃ, সোমবল্কঃ কট্বলঃ| বিতরেত্ নিঃক্ষিপেত্| সরঃস্বিতি বহুবচনমবহজ্জলোপলক্ষণং; বহজ্জলানাং দূষণমেব দুষ্করণম্| সামান্যজনার্থং সরসাং সংশোধনমভিধায বিশিষ্টজনার্থমুদ্ধৃতজলস্য শোধনং দর্শযন্নাহ- ভস্মাঞ্জলিমিত্যাদি| অঞ্জলিং চতুঃপলং, তং চ ঘটে দ্রোণপ্রমিতে জলে, নিধায নিঃক্ষিপ্য, ঈপ্সিতং বাঞ্ছিতং শোধযেত্| জেজ্জটাচার্যস্তু ঘটং গর্গরীমাহ||৯||-

Adhikarana 7 (10-12) · Śloka 12

ক্ষিতিপ্রদেশং বিষদূষিতং তু শিলাতলং তীর্থমথেরিণং বা ||১০|| স্পৃশন্তি গাত্রেণ তু যেন যেন গোবাজিনাগোষ্ট্রখরা নরা বা | তচ্ছূনতাং যাত্যথ দহ্যতে চ বিশীর্যতে রোমনখং তথৈব ||১১|| তত্রাপ্যনন্তাং সহ সর্বগন্ধৈঃ পিষ্ট্বা সুরাভির্বিনিযোজ্য মার্গম্ | সিঞ্চেত্ পযোভিঃ সুমৃদন্বতৈস্তং বিডঙ্গপাঠাকটভীজলৈর্বা ||১২||

ক্ষিতিপ্রদেশমিত্যাদি| তীর্থং নদ্যাদিঘট্টম্| ঈরিণম্ ঊষরম্| অনন্তাং সর্বগন্ধৈঃ সহ সংযোজ্য সুরাভিঃ পিষ্ট্বা মার্গং সিঞ্চেদিতি সম্বন্ধঃ| সুরাভিরিতি বহুবচনান্মধুগুডপিষ্টকৃতাভিঃ| অনন্তা উত্পলসারিবা| সর্বগন্ধৈঃ এলাদিপরিপঠিতৈঃ| পযোভিঃ ক্ষীরৈঃ| মৃদন্বিতৈস্তং মার্গং সিঞ্চেত্, বিডঙ্গাদিজলৈর্বা মার্গং সিঞ্চেত্| মৃদিহ কৃষ্ণা প্রাধান্যকল্পনযা| অন্যে ত্বেবং পঠন্তি- “তত্রাপ্যনন্তাং সহ সর্বগন্ধৈর্বচাং তু পিষ্ট্বা সুরযাঽনুমার্গম্| সিঞ্চেত্তথা মৃত্সহিতাভিরদ্ভির্মার্গোঽস্তি নান্যো যদি তেন গচ্ছেত্” ইতি| `পযোভিস্তু মৃদন্বিতৈঃ’ ইত্যত্র `বল্মীকমৃদন্বিতাভিঃ’ ইতি কেচিত্ পঠন্তি, বিষঘ্নত্বাদ্বল্মীকস্য||১০-১২||

Adhikarana 8 (13-15) · Śloka 15

তৃণেষু ভক্তেষু চ দূষিতেষু সীদন্তি মূর্চ্ছন্তি বমন্তি চান্যে | বিড্ভেদমৃচ্ছন্ত্যথবা ম্রিযন্তে তেষাং চিকিত্সাং প্রণযেদ্যথোক্তাম্ ||১৩|| বিষাপহৈর্বাঽপ্যগদৈর্বিলিপ্য বাদ্যানি চিত্রাণ্যপি বাদযেত | তারঃ সুতারঃ সসুরেন্দ্রগোপঃ সর্বৈশ্চ তুল্যঃ কুরুবিন্দভাগঃ ||১৪|| পিত্তেন যুক্তঃ কপিলান্বযেন বাদ্যপ্রলেপো বিহিতঃ প্রশস্তঃ | বাদ্যস্য শব্দেন হি যান্তি নাশং বিষাণি ঘোরাণ্যপি যানি সন্তি ||১৫||

তৃণেষ্বিত্যাদি| সীদন্তি অঙ্গগ্লানিযুক্তা ভবন্তি| প্রণযেদিত্যাদি| অঙ্গসাদাদিষু যথোক্তাং চিকিত্সাং বিষাপহৈর্দ্রব্যৈর্যুক্তাং বিতরেত্| অগদৈর্বা দুন্দুভিস্বনীযোক্তৈঃ, বাদ্যানি ভেরীপটহাদীনি বিলিপ্য বাদযেত্| অপরমপি বাদ্যলেপমাহ- তার ইত্যাদি| তারো রূপ্যং, সুতারঃ পারদঃ; সুরেন্দ্রং সুবর্ণং, কুটজমন্যে; গোপা সারিবা; কুরুবিন্দো মুস্তা, নিশানপাষাণ ইত্যন্যে, উত্তমলোহিতরত্নং কুরুবিন্দ ইত্যেকে||১৩-১৫||

Adhikarana 9 (16-17) · Śloka 17

ধূমেঽনিলে বা বিষসম্প্রযুক্তে খগাঃ শ্রমার্তাঃ প্রপতন্তি ভূমৌ | কাসপ্রতিশ্যাযশিরোরুজশ্চ ভবন্তি তীব্রা নযনামযাশ্চ ||১৬|| লাক্ষাহরিদ্রাতিবিষাভযাব্দহরেণুকৈলাদলবক্রকুষ্ঠম্ | প্রিযঙ্গুকাং চাপ্যনলে নিধায ধূমানিলৌ চাপি বিশোধযেত ||১৭||

লাক্ষেত্যাদি| লাক্ষাদিদ্রব্যং বহ্নৌ নিধায ধূমং বিশোধযেত, চূর্ণমনিলে বিকীর্য পুনরনিলমিতি| প্রিযঙ্গুকামিত্যত্র `মধূলিকাং’ কেচিত্ পঠন্তি, গুডূচিকামিতি চ বিবৃণ্বন্তি||১৬-১৭||

Adhikarana 10 (18-22) · Śloka 22

প্রজামিমামাত্মযোনের্ব্রহ্মণঃ সৃজতঃ কিল | অকরোদসুরো বিঘ্নং কৈটভো নাম দর্পিতঃ ||১৮|| তস্য ক্রুদ্ধস্য বৈ বক্ত্রাদ্ব্রহ্মণস্তেজসো নিধেঃ | ক্রোধো বিগ্রহবান্ ভূত্বা নিপপাতাতিদারুণঃ ||১৯|| স তং দদাহ গর্জন্তমন্তকাভং মহাবলম্ | ততোঽসুরং ঘাতযিত্বা তত্তেজোঽবর্ধতাদ্ভুতম্ ||২০|| ততো বিষাদো দেবানামভবত্তং নিরীক্ষ্য বৈ | বিষাদজননত্বাচ্চ বিষমিত্যভিধীযতে ||২১|| ততঃ সৃষ্ট্বা প্রজাঃ শেষং তদা তং ক্রোধমীশ্বরঃ | বিন্যস্তবান্ স ভূতেষু স্থাবরেষু চরেষু চ ||২২||

চিকিত্সোপযোগি বিষস্য মূর্তিস্বরূপমাহ- প্রজামিত্যাদি| আত্মযোনেঃ আত্মা পরমপুরুষো যোনিঃ কারণং যস্য স তথা তস্য; এতেনেশ্বরাদিকারণং নিরস্য স্বযম্ভূত্বমুক্তম্| কিলেত্যাগমসংবাদে| তত ইত্যাদি| বিগ্রহবান্ শরীরবান্| নিঃপপাত নিঃসৃতঃ| স তমিত্যাদি|- স ক্রোধঃ পুরুষরূপঃ, তং কৈটভং, দদাহ ভস্মীকৃতবান্| কিংবিশিষ্টং কৈটভং? গর্জন্তমিত্যাদিবিশেষণযুক্তম্| তত্তেজঃ তস্য মূর্তিমতঃ ক্রোধস্য তেজ ইত্যর্থঃ| তত ইত্যাদি| বাক্কাযচিত্তাবসাদো বিষাদঃ| তত ইত্যাদি| বিন্যস্তবান্ বিনিঃক্ষিপ্তবান্||১৮-২২||

Adhikarana 11 (23-24) · Śloka 24

যথাঽব্যক্তরসং তোযমন্তরীক্ষান্মহীগতম্ | তেষু তেষু প্রদেশেষু রসং তং তং নিযচ্ছতি ||২৩|| এবমেব বিষং যদ্যদ্দ্রব্যং ব্যাপ্যাবতিষ্ঠতে | স্বভাবাদেব তং তস্য রসং সমনুবর্ততে ||২৪||

বিষস্য নানাবীর্যহেতুভূতমুদ্দিশন্নাহ- যথাঽব্যক্তরসমিত্যাদি| যথা জলমেকরসমপ্যন্তরীক্ষাত্ পতিতং ভূমিগতং তেষু তেষু প্রদেশেষ্বাকাশগুণভূযিষ্ঠাদিষু রসং তং তং নিযচ্ছতি নিশ্চযেন দদাতি, এবমেব বিষং যদ্যদ্দ্রব্যং ব্যাপ্যাবতিষ্ঠতে স্বভাবাদেব তস্য তস্য রসং সমনুবর্ততে||২৩-২৪||

Adhikarana 12 (25-27) · Śloka 27

বিষে যস্মাদ্গুণাঃ সর্বে তীক্ষ্ণাঃ প্রাযেণ সন্তি হি | বিষং সর্বমতো জ্ঞেযং সর্বদোষপ্রকোপণম্ ||২৫|| তে তু বৃত্তিং প্রকুপিতা জহতি স্বাং বিষার্দিতাঃ | নোপযাতি বিষং পাকমতঃ প্রাণান্ রুণদ্ধি চ ||২৬|| শ্লেষ্মণাঽঽবৃতমার্গত্বাদুচ্ছ্বাসোঽস্য নিরুধ্যতে | বিসঞ্জ্ঞঃ সতি জীবেঽপি তস্মাত্তিষ্ঠতি মানবঃ ||২৭||

বিষে যস্মাদিত্যাদি| যস্মাদ্বিষে যে গুণাঃ সন্তি তে সর্বে স্বভাবতঃ সর্বদেহধাতুবিরোধেন তীক্ষ্ণা আশুকারিণঃ, প্রাযেণ তেজোরূপক্রোধাত্মকত্বাদ্বিষস্য; অতঃ সর্বমেব বিষং সর্বদোষপ্রকোপণম্| তে তু বৃত্তিমিত্যাদি| তে প্রকুপিতা বাতাদযো বিষার্দিতা বিষপীডিতাঃ সন্তঃ, স্বাং বৃত্তিং বাতঃ প্রস্পন্দনাদিকাং, রাগপক্ত্যাদিকাং পিত্তং, সন্ধিসংশ্লেষাদিকাং কফঃ, ত্যজন্তি; তেন চ পিত্তস্য পক্ত্যভাবাদ্বিষং পাকং ন যাতি, অতোঽপক্বং বিষং প্রাণান্ রুণদ্ধি, বিষবিলীনেন শ্লেষ্মণা নিরুদ্ধোচ্ছ্বাসত্বাজ্জীবেঽপি প্রাণেঽপি সতি বিসঞ্জ্ঞো বিগতসম্যগ্জ্ঞানো মানবস্তিষ্ঠতি||২৫-২৭||

Adhikarana 13 (28-29) · Śloka 29

শুক্রবত্ সর্বসর্পাণাং বিষং সর্বশরীরগম্ | ক্রুদ্ধানামেতি চাঙ্গেভ্যঃ শুক্রং নির্মন্থনাদিব ||২৮|| তেষাং বডিশবদ্দংষ্ট্রাস্তাসু সজ্জতি চাগতম্ | অনুদ্বৃত্তা বিষং তস্মান্ন মুঞ্চন্তি চ ভোগিনঃ ||২৯||

শুক্রবদিত্যাদি| সর্বসর্পাণাং বিষং সর্বশরীরগম্| ক্রুদ্ধানামিত্যাদি ক্রুদ্ধানাং সর্পাণামঙ্গেভ্যোঽবযবেভ্যো বিষমাগচ্ছতি; কিমিব? শুক্রং নির্মন্থনাদিব, নির্মন্থনং বিশিষ্টস্ত্রীবরাঙ্গবিলোডনহেতুরেব হর্ষ উচ্যতে| তেষামিত্যাদি| বডিশং মত্স্যবন্ধনযন্ত্রম্| সজ্জতি সঙ্গং যাতি, সম্বদ্ধং ভবতীত্যর্থঃ| অনুদ্বৃত্তা অননুযোজিতা, অনুচ্ছলিতা ইতি যাবত্; কর্ষণকৃতপরাবৃত্ত্যা হি দংষ্ট্রাণামধোমুখতেতি| ভোগিনঃ সর্পাঃ||২৮-২৯||

Adhikarana 14 (30-31) · Śloka 32

যস্মাদত্যর্থমুষ্ণং চ তীক্ষ্ণং চ পঠিতং বিষম্ | অতঃ সর্ববিষেষূক্তঃ পরিষেকস্তু শীতলঃ ||৩০|| মন্দং কীটেষু নাত্যুষ্ণং বহুবাতকফং বিষম্ | অতঃ কীটবিষে চাপি স্বেদো ন প্রতিষিধ্যতে ||৩১|| কীটৈর্দষ্টানুগ্রবিষৈঃ সর্পবত্ সমুপাচরেত্ |৩২|

যস্মাদিত্যাদি| কীটেষু বিষং মন্দং নাত্যুষ্ণং বহুবাতকফং ভবতি; অপিশব্দাত্ কীটেষ্বপি কেষুচিদুগ্রবিষেষু ন স্বেদঃ, অপি তু শীতলমেব চিকিত্সিতম্| তথা চ বক্ষ্যতি,- `কীটৈর্দষ্টানুগ্রবিষৈঃ সর্পবত্সমুপাচরেত্’- ইতি||৩০-৩১||-

Adhikarana 15 (32-34) · Śloka 35

স্বভাবাদেব তিষ্ঠেত্তু প্রহারাদংশযোর্বিষম্ ||৩২|| ব্যাপ্য সাবযবং দেহং দিগ্ধবিদ্ধাহিদষ্টযোঃ | লৌল্যাদ্বিষান্বিতং মাংসং যঃ খাদেন্মৃতমাত্রযোঃ ||৩৩|| যথাবিষং স রোগেণ ক্লিশ্যতে ম্রিযতেঽপি বা | অতশ্চাপ্যনযোর্মাংসমভক্ষ্যং মৃতমাত্রযোঃ ||৩৪|| মুহূর্তাত্তদুপাদেযং প্রহারাদংশবর্জিতম্ |৩৫|

ইদানীং দিগ্ধবিদ্ধাহিদষ্টযোঃ প্রহারদংশদেশমাংসমভক্ষ্যং মুহূর্তাচ্চ তদুপাদেযমুদ্দিশন্নাহ- স্বভাবাদিত্যাদি| দিগ্ধবিদ্ধাহিদষ্টযোঃ `প্রাণিনোঃ’ ইতি শেষঃ| অত্র দিগ্ধবিদ্ধো বিষলিপ্তকাণ্ডাদিহতঃ, অহিদষ্টঃ সর্পদষ্টঃ| যথাবিষং বিষানুসারেণেত্যর্থঃ||৩২-৩৪||-

Adhikarana 16 (35-37) · Śloka 37

সবাতং গৃহধূমাভং পুরীষং যোঽতিসার্যতে ||৩৫|| আধ্মাতোঽত্যর্থমুষ্ণাস্রো বিবর্ণঃ সাদপীডিতঃ | উদ্বমত্যথ ফেনং চ বিষপীতং তমাদিশেত্ ||৩৬|| ন চাস্য হৃদযং বহ্নির্বিষজুষ্টং দহত্যপি | তদ্ধি স্থানং চেতনাযাঃ স্বভাবাদ্ব্যাপ্য তিষ্ঠতি ||৩৭||

ইদানীং বিষপীতস্য প্রাণৈঃ পরিত্যজ্যমানস্য মৃতস্য চ লক্ষণমাহ- সবাতমিত্যাদি| অস্রং নযনজলম্| বিবর্ণঃ অত্যর্থং কৃষ্ণশ্যামপীতবর্ণঃ| সাদঃ অঙ্গগ্লানিঃ| বিবর্ণ ইতি মৃতস্য লক্ষণং, শেষং সর্বং ম্রিযমাণস্য লক্ষণম্| অস্য বিষপানমৃতস্য বিষজুষ্টং হৃদযং বহ্নিরপি ন দহতি; কুতো হৃদযমেব বিষজুষ্টং? হি যস্মাত্তদ্বিষং চেতনাস্থানং হৃদযং স্বভাবাদ্ব্যাপ্য তিষ্ঠতি; অত এব চ বিষপানমৃতস্য হৃদযমদাহ্যং বিষব্যাপ্তত্বাত্||৩৫-৩৭||

Adhikarana 17 (38) · Śloka 38

অশ্বত্থদেবাযতনশ্মশানবল্মীকসন্ধ্যাসু চতুষ্পথেষু | যাম্যে সপিত্র্যে পরিবর্জনীযা ঋক্ষে নরা মর্মসু যে চ দষ্টাঃ ||৩৮||

ইদানীং বর্জ্যপ্রহারাদংশহৃদযপ্রসঙ্গেন বিশিষ্টদেশাদিদ্বারেণ বর্জনীযান্ দষ্টানাহ- অশ্বত্থেত্যাদি| যাম্যে ভরণ্যাং, পিত্র্যে মঘাযাং, ঋক্ষে নক্ষত্রে||৩৮||

Adhikarana 18 (39) · Śloka 40

দর্বীকরাণাং বিষমাশুঘাতি সর্বাণি চোষ্ণে দ্বিগুণীভবন্তি | অজীর্ণপিত্তাতপপীডিতেষু বালপ্রমেহিষ্বথ গর্ভিণীষু ||৩৯|| বৃদ্ধাতুরক্ষীণবুভুক্ষিতেষু রূক্ষেষু ভীরুষ্বথ দুর্দিনেষু |৪০|

দর্বীকরাণামিত্যাদি| দর্বীকরাণাং ফণিনাং, সর্বাণি অশেষবিষাণি, উষ্ণে উষ্ণকালে, দ্বিগুণীভবন্তি দ্বিগুণশক্তীনি ভবন্তি; `সর্বাণি চোর্ধ্বং দ্বিগুণীভবন্তি’ ইতি কেচিত্ পঠন্তি, ঊর্ধ্বম্ ঊর্ধ্বদেশে ইত্যর্থঃ| অজীর্ণপিত্তাদিষ্বপি দ্বিগুণত্বমাহ- অজীর্ণেত্যাদি||৩৯||-

Adhikarana 19 (40-44) · Śloka 44

শস্ত্রক্ষতে যস্য ন রক্তমেতি রাজ্যো লতাভিশ্চ ন সম্ভবন্তি ||৪০|| শীতাভিরদ্ভিশ্চ ন রোমহর্ষো বিষাভিভূতং পরিবর্জযেত্তম্ | জিহ্বা সিতা যস্য চ কেশশাতো নাসাবভঙ্গশ্চ সকণ্ঠভঙ্গঃ ||৪১|| কৃষ্ণঃ সরক্তঃ শ্বযথুশ্চ দংশে হন্বোঃ স্থিরত্বং চ স বর্জনীযঃ | বর্তির্ঘনা যস্য নিরেতি বক্ত্রাদ্রক্তং স্রবেদূর্ধ্বমধশ্চ যস্য ||৪২|| দংষ্ট্রানিপাতাঃ সকলাশ্চ যস্য তং চাপি বৈদ্যঃ পরিবর্জযেত্তু | উন্মত্তমত্যর্থমুপদ্রুতং বা হীনস্বরং বাঽপ্যথবা বিবর্ণম্ ||৪৩|| সারিষ্টমত্যর্থমবেগিনং চ জহ্যান্নরং তত্র ন কর্ম কুর্যাত্ ||৪৪||

শস্ত্রেত্যাদি| লতাভিরভিহতেঽঙ্গে রাজ্যো রেখা নোচ্ছলন্তি| জিহ্বেত্যাদি| সিতা শ্বেতা, অসিতা কৃষ্ণা বা ভবতীত্যর্থঃ| কেশশাতঃ কেশচ্যবনম্| নাসাবভঙ্গো নাসাস্রোতোবৈগুণ্যং, তচ্চানুনাসিকবাক্যত্বেন জ্ঞেযম্| কণ্ঠভঙ্গঃ স্বরসাদঃ| দংশো ভক্ষিতস্থানম্| হন্বোঃ মুখসন্ধ্যোঃ| স্থিরত্বম্ অচলনম্| বর্তিরিত্যাদি বর্তিঃ কফবর্তিঃ| উন্মত্তেত্যাদি| উন্মত্তং বাতুলম্| অত্যর্থমুপদ্রুতম্ উপদ্রববহুলম্| সারিষ্টং মরণলক্ষণসহিতম্| অবেগিনং লহরীবর্জিতম্| জহ্যাত্ ত্যজেত্||৪০-৪৪||

Adhikarana puShpikA · Śloka 3

ইতি সুশ্রুতসংহিতাযাং কল্পস্থানে জঙ্গমবিষবিজ্ঞানীযো নাম তৃতীযোঽধ্যাযঃ ||৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং কল্পস্থানে তৃতীযোঽধ্যাযঃ||৩||