8. kīṭakalpaḥ

Adhikarana 1 (1-4) · Śloka 4

অথাতঃ কীটকল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| সর্পাণাং শুক্রবিণ্মূত্রশবপূত্যণ্ডসম্ভবাঃ | বায্বগ্ন্যম্বুপ্রকৃতযঃ কীটাস্তু বিবিধাঃ স্মৃতাঃ ||৩|| সর্বদোষপ্রকৃতিভির্যুক্তাস্তে পরিণামতঃ | কীটত্বেঽপি সুঘোরাঃ স্যুঃ, সর্ব এব চতুর্বিধাঃ ||৪||

তত্র কীটান্ হেতুলক্ষণসঙ্খ্যাকর্মচিকিত্সিতৈর্নির্দিশন্নাহ- সর্পাণামিত্যাদি| সর্পাণাং দর্বীকরমণ্ডলিরাজিমতাং শুক্রাদিপঞ্চসম্ভবা যথাসঙ্খ্যং বায্বগ্ন্যম্বুপ্রকৃতযঃ কীটাঃ| শবো মৃতসর্পশরীরং, তস্য পূতিঃ শটনম্| ত্রীন্ কীটান্ দর্বীকরমণ্ডলিরাজিলসম্বন্ধেন বায্বাদিপ্রকৃতিক্রমান্নির্দিশ্য চতুর্থং স্বভাবেন কর্মণা চ নির্দিশন্নাহ- সর্বদোষেত্যাদি| সর্বদোষস্বভাবৈর্যুক্তাঃ; পরিণামতঃ পরিণামো নাম ভিন্নজাতীযৈরনেকৈরেকীভাবেন কার্যস্যারম্ভঃ, স চাত্র দর্বীকরাদিভিন্নজাতীযৈর্বৈকরঞ্জাখ্যাপত্যোত্পাদনলক্ষণঃ, তস্মাত্| সুঘোরাঃ ত্রিদোষকোপনাঃ, বৈকরঞ্জসর্পজাতিশুক্রাদিসম্ভবত্বেন| একীকৃত্য সঙ্খ্যামাহ- সর্ব এবেত্যাদি||১-৪||

Adhikarana 2 (5-7) · Śloka 8

কুম্ভীনসস্তুণ্ডিকেরী শৃঙ্গী শতকুলীরকঃ | উচ্চিটিঙ্গোঽগ্নিনামা চ চিচ্চিটিঙ্গো মযূরিকা ||৫|| আবর্তকস্তথোরভ্রঃ সারিকামুখবৈদলৌ | শরাবকুর্দোঽভীরাজিঃ পরুষশ্চিত্রশীর্ষকঃ ||৬|| শতবাহুশ্চ যশ্চাপি রক্তরাজিশ্চ কীর্তিতঃ | অষ্টাদশেতি বাযব্যাঃ কীটাঃ পবনকোপনাঃ ||৭|| তৈর্ভবন্তীহ দষ্টানাং রোগা বাতনিমিত্তজাঃ |৮|

তানেব চতুঃপ্রকারান্ বাতাদিস্বভাবৈর্নির্দিশন্নাহ - কুম্ভীনস ইত্যাদি| এতে কীটকভেদা নানাদেশীযলোকাদবগন্তব্যাঃ, যতঃ সুবীরনন্দিবরাহজেজ্জটগযদাসাদিভিঃ টীকাকারৈর্ন ব্যাখ্যাতাঃ| বাতনিমিত্তজা রোগাস্তোদাদযো জ্বরাদযশ্চ| বাতপ্রকোপণানাং কুম্ভীনসাদীনাং মধ্যে শৃঙ্গ্যুচ্চিটিঙ্গশরাবকুর্দচিত্রশীর্ষকান্ বর্জযিত্বা শেষাশ্চতুর্দশ মুখসন্দংশবিষাঃ||৫-৭||-

Adhikarana 3 (8-11) · Śloka 12

কৌণ্ডিন্যকঃ কণভকো বরটী পত্রবৃশ্চিকঃ ||৮|| বিনাসিকা ব্রাহ্মণিকা বিন্দুলো ভ্রমরস্তথা | বাহ্যকী পিচ্চিটঃ কুম্ভী বর্চঃকীটোঽরিমেদকঃ ||৯|| পদ্মকীটো দুন্দুভিকো মকরঃ শতপাদকঃ | পঞ্চালকঃ পাকমত্স্যঃ কৃষ্ণতুণ্ডোঽথ গর্দভী ||১০|| ক্লীতঃ কৃমিসরারী চ যশ্চাপ্যুত্ক্লেশকস্তথা | এতে হ্যগ্নিপ্রকৃতযশ্চতুর্বিংশতিরেব চ ||১১|| তৈর্ভবন্তীহ দষ্টানাং রোগাঃ পিত্তনিমিত্তজাঃ |১২|

কৌণ্ডিন্যক ইত্যাদি| বিন্দুলস্থানে `বিলুট’ ইতি কেচিত্| পিত্তনিমিত্তজা দাহাদযো জ্বরাদযশ্চ| পিত্তপ্রকোপণানাং মধ্যে কৌণ্ডিন্যকবরটীভ্রমরপিচ্চিটবর্চঃকীটমকরশতপদপঞ্চালকপাকমত্স্যকৃষ্ণতুণ্ডান্ বিহায শেষাশ্চতুর্দশ মুখসন্দংশবিষাঃ||৮-১১||-

Adhikarana 4 (12-14) · Śloka 15

বিশ্বম্ভরঃ পঞ্চশুক্লঃ পঞ্চকৃষ্ণোঽথ কোকিলঃ ||১২|| সৈরেযকঃ প্রচলকো বলভঃ কিটিভস্তথা | সূচীমুখঃ কৃষ্ণগোধা যশ্চ কাষাযবাসিকঃ ||১৩|| কীটো গর্দভকশ্চৈব তথা ত্রোটক এব চ | ত্রযোদশৈতে সৌম্যাঃ স্যুঃ কীটাঃ শ্লেষ্মপ্রকোপণাঃ ||১৪|| তৈর্ভবন্তীহ দষ্টানাং রোগাঃ কফনিমিত্তজাঃ |১৫|

বিশ্বম্ভর ইত্যাদি| শ্লেষ্মনিমিত্তজা রোগাঃ কণ্ড্বাদযো জ্বরাদযশ্চ| শ্লেষ্মপ্রকোপিণাং মধ্যে বিশ্বম্ভরপ্রচলাককৃষ্ণগোধাকাষাযবাসিকাংশ্চতুরো বর্জযিত্বা নবান্যে মুখসন্দংশবিষাঃ||১২-১৪||-

Adhikarana 5 (15-18) · Śloka 18

তুঙ্গীনাসো বিচিলকস্তালকো বাহকস্তথা ||১৫|| কোষ্ঠাগারী ক্রিমিকরো যশ্চ মণ্ডলপুচ্ছকঃ | তুণ্ড(ঙ্গ)নাভঃ সর্ষপিকো বল্গুলিঃ শম্বুকস্তথা ||১৬|| অগ্নিকীটশ্চ বিজ্ঞেযা দ্বাদশ প্রাণনাশনাঃ | তৈর্ভবন্তীহ দষ্টানাং বেগজ্ঞানানি সর্পবত্ ||১৭|| তাস্তাশ্চ বেদনাস্তীব্রা রোগা বৈ সান্নিপাতিকাঃ | ক্ষারাগ্নিদগ্ধবদ্দংশো রক্তপীতসিতারুণঃ ||১৮||

সর্বদোষপ্রকৃতিকানাহ- তুঙ্গীনাস ইত্যাদি| তৈঃ সর্বদোষপ্রকৃতিকৈঃ প্রাণনাশনৈঃ কীটৈঃ| তাস্তাঃ তোদদাহকণ্ড্বাদিকা বেদনাঃ, রোগা জ্বরাদযঃ| দংশ ইত্যাদি| রক্তপীতঃ পিত্তেন, সিতঃ কফেন, অরুণো বাতেন| সর্বদোষপ্রকৃতিকানাং মধ্যে বাহকসর্ষপশম্বূকান্ বর্জযিত্বা নব মুখসন্দংশবিষাঃ||১৫-১৮||

Adhikarana 6 (19-22) · Śloka 23

জ্বরাঙ্গমর্দরোমাঞ্চবেদনাভিঃ সমন্বিতঃ | ছর্দ্যতীসারতৃষ্ণাশ্চ দাহো মূর্চ্ছা বিজৃম্ভিকা ||১৯|| বেপথুশ্বাসহিক্কাশ্চ দাহঃ শীতং চ দারুণম্ | পিডকোপচযঃ শোফো গ্রন্থযো মণ্ডলানি চ ||২০|| দদ্রবঃ কর্ণিকাশ্চৈব বিসর্পাঃ কিটিভানি চ | তৈর্ভবন্তীহ দষ্টানাং যথাস্বং চাপ্যুপদ্রবাঃ ||২১|| যেঽন্যে তেষাং বিশেষাস্তু তূর্ণং তেষাং সমাদিশেত্ | দূষীবিষপ্রকোপাচ্চ তথৈব বিষলেপনাত্ ||২২|| লিঙ্গং তীক্ষ্ণবিষেষ্বেত... |২৩|

ইদানীং চতুর্বিধানপি তাংস্তীক্ষ্ণমন্দবিষভেদেন নির্দিশন্নাহ- জ্বরাঙ্গেত্যাদি| শীতং চ দারুণমিত্যত্র চকারাদ্দাহোঽপি দারুণ এব| যথাস্বং যথাকীটদোষমিত্যর্থঃ| যেঽন্যে ইত্যাদি| তেষাং তীক্ষ্ণবিষাণাং কীটানামত্রোক্তেভ্যো যেঽন্যে বিশেষা উপদ্রবাস্তেষাং ভেদাংস্তূর্ণং সমাদিশেদিতি| তেষামিতি কর্মণি ষষ্ঠী, তেন তান্ ক্ষিপ্রং কথযেত্, কথং? দূষীবিষপ্রকোপাত্ দূষীবিষপ্রকোপং বীক্ষ্য| যপি লুপ্তে পঞ্চমীযম্| তথৈব বিষলেপনাদিতি লেপনমত্রাহারস্তেন বিষালেপনং বিষাহারং বীক্ষ্যেত্যর্থঃ||১৯-২২||

Adhikarana 7 (23) · Śloka 24

...চ্ছৃণু মন্দবিষেষ্বতঃ | প্রসেকারোচকচ্ছর্দিশিরোগৌরবশীতকাঃ ||২৩|| পিডকাকোঠকণ্ডূনাং জন্ম দোষবিভাগতঃ |২৪|

শৃণু মন্দবিষেষ্বিত্যাদি| শীতকো অল্পং শীতং, কোঠাদীনাং জন্ম যথা কীটদোষবিভাগেন||২৩||-

Adhikarana 8 (24) · Śloka 25

যোগৈর্নানাবিধৈরেষাং চূর্ণানি গরমাদিশেত্ ||২৪|| দূষীবিষপ্রকারাণাং তথা চাপ্যনুলেপনাত্ |২৫|

ইদানীং কীটদেহচূর্ণানাং নানৌষধযোগাত্তথাঽনুলেপনতোঽপি গরত্বমাহ- যোগৈরিত্যাদি| অথালম্বাযনোক্তঃ কীটানাং সামান্যজ্ঞানোপাযো লিখ্যতে,- “কৃষ্ণাভির্বিন্দুলেখাভিঃ পক্ষৈঃ পাদৈর্মুখৈর্নখৈঃ| শূকৈঃ কণ্টকলাঙ্গূলৈঃ সংশ্লিষ্টৈঃ পক্ষরোমভিঃ| স্বনৈঃ প্রমাণৈঃ সংস্থানৈর্লিঙ্গৈশ্চাপি শরীরগৈঃ| বিষবীর্যৈশ্চ কীটানাং রূপজ্ঞানং বিভাব্যতে”- ইতি| তথা কতিচিত্ কীটা বিশিষ্টাকৃতিবর্ণাদিভিস্তদুক্তা এব লিখ্যন্তে,- “অজাপ্রতিমরূপো যঃ শূকহীনস্ত্বরোমশঃ| সিতঃ শরকুলীরস্তু ক্ষ্বেডচূর্ণবিষঃ স্মৃতঃ|| গৈরিকাভো মহাকীটঃ সপক্ষো মার্জিতোদরঃ| খেচরো গুদশূকশ্চ কৌণ্ডিন্য ইতি স স্মৃতঃ|| কুরণ্টপুষ্পবর্ণাভঃ সপক্ষো মার্জিতোদরঃ| তুণ্ডশূকবিষঃ কীটঃ কোষ্ঠাগারীতি সঞ্জ্ঞিতঃ|| লাক্ষারুধিরবর্ণাভঃ শ্বেতবিন্দুবিচিত্রিতঃ| ক্ষুদ্রকো হ্যগ্নিসঙ্কাশো ভ্রাজতে নিশি চাগ্নিবত্|| কীটঃ খদ্যোত ইত্যুক্তো দষ্টস্তেনাপি দহ্যতে| দংষ্ট্রাবিষঃ শ্বেতবিন্দুঃ সপক্ষঃ ষট্পদঃ খগঃ|| স তু বৈ শম্বূকো নাম কালকঃ সপ্তমণ্ডলঃ| চতুষ্পাদো দীর্ঘপত্র উল্ললাটো বহুপ্রজঃ|| বৃক্ষালযো দন্তবিষঃ কৃকলাস ইতি স্মৃতঃ| চন্দ্রাভঃ কৃকলাসোঽন্যস্তদ্ভেদস্তু ত্রিকণ্টকঃ”- ইতি| তেষাং ন কেবলং নিযমেন শূকাদিদংশেন বিষপ্রাদুর্ভাবঃ, কিং তর্হি অভ্যবহারচূর্ণানুলেপনৈশ্চ দূষীবিষলিঙ্গপ্রাদুর্ভাব ইত্যাহ- “যশ্চৈতানত্তি চূর্ণৈর্বা চূর্ণ্যতে লিপ্যতেঽথবা| মূত্রাদিভিস্তস্য দূষীবিষলিঙ্গং সমাদিশেত্”- ইতি| জেজ্জটগযদাসাবত্র আপাতনিকাপূর্বকং পাঠং পঠতঃ, স চ বর্তমানপুস্তকেষু ন দৃশ্যতে||২৪||-

Adhikarana 9 (25-27) · Śloka 27

একজাতীনতস্তূর্ধ্বং কীটান্ বক্ষ্যামি ভেদতঃ ||২৫|| সামান্যতো দষ্টলিঙ্গৈঃ সাধ্যাসাধ্যক্রমেণ চ | ত্রিকণ্টঃ করিণী চাপি হস্তিকক্ষোঽপরাজিতঃ | চত্বার এতে কণভা ব্যাখ্যাতাস্তীব্রবেদনাঃ ||২৬|| তৈর্দষ্টস্য শ্বযথুরঙ্গমর্দো গুরুতা গাত্রাণাং দংশঃ কৃষ্ণশ্চ ভবতি ||২৭||

ইদানীং বাতপিত্তকফসন্নিপাতপ্রকৃতীন্ কীটান্ নির্দিশ্য, একজাতীযানপ্যেকলক্ষণচিকিত্সার্থং নির্দিশন্নাহ- একজাতীনতস্তূর্ধ্বমিত্যাদি| ভেদত ইতি ভেদং বীক্ষ্য| ত্রিকণ্টকাদযশ্চত্বারঃ কণভাঃ; কণভত্বমেকজাতিত্বং, ত্রিকণ্টকাদিস্তু ভেদঃ, `কৃকণ্টক’ ইতি কেচিত্| সর্ব এব কণভাশ্চতুষ্পদাঃ কীটাঃ সাধ্যাশ্চ||২৫-২৭||

Adhikarana 10 (28) · Śloka 28

প্রতিসূর্যকঃ , পিঙ্গাভাসো, বহুবর্ণো, নিরূপমো গোধেরেক ইতি পঞ্চ গোধেরকাঃ ; তৈর্দষ্টস্য শোফো দাহরুজৌ চ ভবতঃ, গোধেরকেণৈতদেব গ্রন্থিপ্রাদুর্ভাবো জ্বরশ্চ ||২৮||

প্রতিসূর্যক ইত্যাদি| কেচিত্তু প্রতিসূর্যক ইত্যাদিস্থানে এবং পঠন্তি- “প্রতিসূর্যঃ পিঙ্গনাসো বহুলোমা মহাশিরাঃ| তথা নিরূপমশ্চেতি পঞ্চ গৌধেরকাঃ স্মৃতাঃ|| তৈর্ভবন্তীহ দৃষ্টানাং বেগজ্ঞানানি সর্পবত্| রুজশ্চ বিবিধাকারা গ্রন্থযশ্চ সুদারুণাঃ” ইতি| গৌধেরকলক্ষণং তন্ত্রান্তরে,- “কৃষ্ণসর্পেণ গোধাযাং ভবেদ্যস্তু চতুষ্পদঃ| সর্পো গৌধেরকো নাম তেন দষ্টো ন জীবতি”- ইতি||২৮||

Adhikarana 11 (29-31) · Śloka 31

গলগোলিকা - শ্বেতা, কৃষ্ণা, রক্তরাজী, রক্তমণ্ডলা, সর্বশ্বেতা, সর্ষপিকেত্যেবং ষট্; তাভির্দষ্টে সর্ষপিকাবর্জং দাহশোফক্লেদা ভবন্তি, সর্ষপিকযা হৃদযপিডাঽতিসারশ্চ, তাসু মধ্যে সর্ষপিকা প্রাণহরী ||২৯|| শতপদ্যস্তু- পরুষা, কৃষ্ণা, চিত্রা, কপিলা, পীতিকা, রক্তা, শ্বেতা, অগ্নিপ্রভা, ইত্যষ্টৌ; তাভির্দষ্টে শোফো বেদনা দাহশ্চ হৃদযে, শ্বেতাগ্নিপ্রভাভ্যামেতদেব দাহো মূর্চ্ছা চাতিমাত্রং শ্বেতপিডকোত্পত্তিশ্চ ||৩০|| মণ্ডূকাঃ- কৃষ্ণঃ, সারঃ, কুহকো, হরিতো, রক্তো, যববর্ণাভো, ভৃকুটী, কোটিকশ্চেত্যষ্টৌ; তৈর্দষ্টস্য দংশে কণ্ডূর্ভবতি পীতফেনাগমশ্চ বক্ত্রাত্, ভৃকুটীকোটিকাভ্যামেতদেব দাহশ্ছর্দির্মূর্চ্ছা চাতিমাত্রম্ ||৩১||

মণ্ডূকা ইত্যাদি| অত্র ভৃকুটীকোটিকাবসাধ্যৌ| অথ মণ্ডূকোত্পত্তিঃ ভৃকুটীলক্ষণং চ তন্ত্রান্তরোক্তং পঠ্যতে,- “বর্ষমাণে সৃজেচ্ছুক্রং প্রাবৃট্কালে মহোরগঃ| ততঃ শরত্প্রতপ্তাযাং ভূমৌ মণ্ডো জলস্য হি| তস্মিন্ মণ্ডোদকে জাতা মণ্ডূকাস্তেন সঞ্জ্ঞিতাঃ|| মণ্ডূকো গোগতিস্তজ্জ্ঞৈঃ কোটিকঃ পরিকীর্তিতঃ| তেন দষ্টস্য মরণং, নাস্তি তস্য প্রতিক্রিযা”- ইতি||২৯-৩১||

Adhikarana 12 (32) · Śloka 32

বিশ্বম্ভরাভির্দষ্টে দংশঃ সর্ষপাকারাভিঃ পিডকাভিঃ সরুজাভিশ্চীযতে, শীতজ্বরার্তশ্চ পুরুষো ভবতি ||৩২||

বিশ্বম্ভরাভির্দষ্ট ইত্যাদি| বিশ্বম্ভরাশ্চ ত্রযঃ||৩২||

Adhikarana 13 (33) · Śloka 33

অহিণ্ডুকাভির্দষ্টে তোদদাহকণ্ডুশ্বযথবো ভবন্তি মোহশ্চ; কণ্ডূমকাভির্দষ্টে পীতাঙ্গশ্ছর্দ্যতীসারজ্বরাদিভিরভিহন্যতে; শূকবৃন্তাভির্দষ্টে কণ্ডূকোঠাঃ প্রবর্ধন্তে শূকং চাত্র লক্ষ্যতে ||৩৩||

অহিণ্ডুকাভির্দষ্ট ইত্যাদি| অহিণ্ডুকাকণ্ডূমকশূকবৃন্তানাং দষ্টলক্ষণং কেচিন্ন পঠন্তি, বিশ্বম্ভরাভেদত্বেন বিশ্বম্ভরাগ্রহেণ গ্রহণাত্; অন্যে তু অহিণ্ডুকাদীনাং পৃথগ্দষ্টলক্ষণং পঠন্তি, পৃথক্চিকিত্সিতোপাদানাত্||৩৩||

Adhikarana 14 (34-38) · Śloka 38

পিপীলিকাঃ- স্থূলশীর্ষা, সংবাহিকা, ব্রাহ্মণিকা, অঙ্গুলিকা; কপিলিকা, চিত্রবর্ণেতি ষট্; তাভির্দষ্টে দংশে শ্বযথুরগ্নিস্পর্শবদ্দাহশোফৌ ভবতঃ ||৩৪|| মক্ষিকাঃ- কান্তারিকা, কৃষ্ণা, পিঙ্গলা, মধূলিকা, কাষাযী, স্থালিকেত্যেবং ষট্; তাভির্দষ্টস্য কণ্ডুশোফদাহরুজো ভবন্তি, স্থালিকাকাষাযীভ্যামেতদেব শ্যাবপিডকোত্পত্তিরুপদ্রবাশ্চ জ্বরাদযো ভবন্তি, কাষাযী স্থালিকা চ প্রাণহরে ||৩৫|| মশকাঃ- সামুদ্রঃ, পরিমণ্ডলো, হস্তিমশকঃ, কৃষ্ণঃ, পার্বতীয ইতি পঞ্চ; তৈর্দষ্টস্য তীব্রা কণ্ডূর্দংশশোফশ্চ, পার্বতীযস্তু কীটৈঃ প্রাণহরৈস্তুল্যলক্ষণঃ ||৩৬|| নখাবকৃষ্টেঽত্যর্থং পিডকাদাহপাকা ভবন্তি | জলৌকসাং দষ্টলক্ষণমুক্তং চিকিত্সিতং চ ||৩৭|| ভবন্তি চাত্র- গোধেরকঃ স্থালিকা চ যে চ শ্বেতাগ্নিসপ্রভে | ভৃকুটী কোটিকশ্চৈব ন সিধ্যন্ত্যেকজাতিষু ||৩৮||

ইদানীমিহৈকজাত্যেষু পঞ্চস্বসাধ্যান্ নির্দিশন্নাহ- গোধেরক ইত্যাদি| স্থালিকা চেতি চকারেণ কাষাযী সমুচ্চীযতে| যে চেতি চকারেণ গলগোলিকেষু সর্ষপিকাঽপ্যনুক্তা সমুচ্চীযতে| ভৃকুটী কোটিকশ্চৈবেতি চকারেণানুক্তা জলৌকঃস্বিন্দ্রাযুধা সমুচ্চীযতে||৩৪-৩৮||

Adhikarana 15 (39-40) · Śloka 40

শবমূত্রপুরীষৈস্তু সবিষৈরবমর্শনাত্ | স্যুঃ কণ্ডূদাহকোঠারুঃপিডকাতোদবেদনাঃ ||৩৯|| প্রক্লেদবাংস্তথা স্রাবো ভৃশং সম্পাচযেত্ত্বচম্ | দিগ্ধবিদ্ধক্রিযাস্তত্র যথাবদবচারযেত্ ||৪০||

এষাং বহিশ্চূর্ণাবচূর্ণনাদৌ লিঙ্গমুদ্দিশ্য চিকিত্সামুদ্দিশন্নাহ- শবমূত্রপুরীষৈরিত্যাদি| প্রক্লেদবানিতি সবিষচূর্ণাবমৃষ্টপ্রদেশে ইত্যর্থঃ||৩৯-৪০||

Adhikarana 16 (41) · Śloka 41

নাবসন্নং ন চোত্সন্নমতিসংরম্ভবেদনম্ | দংশাদৌ বিপরীতার্তি কীটদষ্টং সুবাধকম্ ||৪১||

ইদানীং কীটদষ্টস্য দংশলক্ষণেন কৃচ্ছ্রতামুদ্দিশন্নাহ- নাবসন্নমিত্যাদি| নাবসন্নং নাতিভিন্নং, ন চোত্সন্নং নাত্যুন্নতম্, ইত্থম্ভূতমপি যদতিসংরম্ভবেদনম্ অতিশযব্যথং, দংশাদৌ বিপরীতার্তি অনুগ্রবিষদষ্টে তীব্রার্তির্ভবতি, উগ্রবিষদষ্টে তু মন্দার্তিরিতি বিপরীতার্তিঃ| সুবাধকং কৃচ্ছ্রসাধ্যম্||৪১||

Adhikarana 17 (42) · Śloka 42

দষ্টানুগ্রবিষৈঃ কীটৈঃ সর্পবত্ সমুপাচরেত্ | ত্রিবিধানাং তু পূর্বেষাং ত্রৈবিধ্যেন ক্রিযা হিতাঃ ||৪২||

ইদানীমুগ্রবিষকীটানাং চিকিত্সামুদ্দিশন্নাহ- কীটৈর্দষ্টানুগ্রেত্যাদি| উগ্রবিষৈঃ প্রাণহরৈস্ত্রিদোষপ্রকৃতিভিঃ| সর্পবত্ সর্পদষ্টানিব, সর্পদষ্টস্য সর্পবেগোক্তাভিঃ ক্রিযাভিরিত্যর্থঃ| ত্রিবিধানামিতি দর্বীকরমণ্ডলিরাজিলশুক্রাদিযোনিভেদাত্ত্রিপ্রকারাণাম্| পূর্বেষাম্ আদ্যুক্তানাম্| ত্রৈবিধ্যেনেতি বাতাদিভেদেনেত্যর্থঃ||৪২||

Adhikarana 18 (43) · Śloka 44

স্বেদমালেপনং সেকং চোষ্ণমত্রাবচারযেত্ | অন্যত্র মূর্চ্ছিতাদ্দংশাত্ পাককোথপ্রপীডিতাত্ ||৪৩|| বিষঘ্নং চ বিধিং সর্বং বহুশঃ শোধনানি চ |৪৪|

ইদানীং সামান্যং চিকিত্সিতমাহ- স্বেদমালেপনমিত্যাদি| অন্যত্র মূর্চ্ছিতাদিতি মূর্চ্ছিতং বর্জযিত্বা, মূর্চ্ছিতে ন কুর্যাদিত্যর্থঃ| বিষঘ্নং চ বিধিং সর্বমিত্যাদি| সংশমনবিধিং পাননস্যাভ্যঙ্গালেপনপরিষেকাঞ্জনাদিকং বাতাদিবিষহরদ্রব্যকল্পিতম্| সংশোধনানি চেতি বমনবিরেকাস্থাপনানি, `যথাদোষম্’ ইত্যধ্যাহারঃ||৪৩||-

Adhikarana 19 (44-45) · Śloka 45

শিরীষকটুকাকুষ্ঠবচারজনিসৈন্ধবৈঃ ||৪৪|| ক্ষীরমজ্জবসাসর্পিঃশুণ্ঠীপিপ্পলিদারুষু | উত্কারিকা স্থিরাদৌ বা সুকৃতা স্বেদনে হিতা ||৪৫||

ইদানীং বাতাদিদোষবিষহরস্বেদদ্রব্যসূত্রমুদ্দিশন্নাহ- শিরীষেত্যাদি| উত্কারিকা লপ্সিকা| স্থিরাদৌ শালপর্ণ্যাদৌ| সুকৃতা শোভনা কৃতা| এতেন ক্ষীরাদিদ্রবৈঃ শিরীষাদিদ্রব্যাণাং শ্লক্ষ্ণপেষিতানাং মাত্রাক্রমেণ নাতিদ্রবো নাল্পদ্রবঃ পাক ইতি সর্বং বোধ্যতে||৪৪-৪৫||

Adhikarana 20 (46) · Śloka 46

ন স্বেদযেত চাদংশং ধূমং বক্ষ্যামি বৃশ্চিকে |৪৬|

মুক্ত্বা কীটবিষমিত্যনেন হেতুনা সর্বেষ্বেব কীটেষু স্বেদং প্রসক্তং ক্বচিন্নিরস্যন্নাহ- ন স্বেদযেতেত্যাদি| বৃশ্চিকবিষে দংশং ন স্বেদযেত, আঙো ব্যবহিতস্যাপি ক্রিযাপদেন সম্বন্ধাত্| তত্রাপি কিঞ্চিদূষ্মস্বেদমাহ- ধূমমিত্যাদি| ধূমশ্চ `শিখিকুক্কুটবর্হাণি’ ইত্যাদিনাঽগ্রে বক্তব্যঃ| ন স্বেদযেত চাদংশমিত্যত্র চকারো ভিন্নক্রমে ধূমং চেত্যত্র দ্রষ্টব্যঃ; তেন মন্দবিষবৃশ্চিকদষ্টস্যোত্কারিকাস্বেদ উক্তো ন বিরুধ্যতে|৪৬|-

Adhikarana 21 (46-47) · Śloka 47

অগদানেকজাতীষু প্রবক্ষ্যামি পৃথক্ পৃথক্ ||৪৬|| কুষ্ঠং বক্রং বচা পাঠা বিল্বমূলং সুবর্চিকা | গৃহধূমং হরিদ্রে দ্বে ত্রিকণ্টকবিষে হিতাঃ ||৪৭||

ইদানীং বাতাদিভেদেন চতুর্বিধপ্রকৃতীনাং সপ্তষষ্টিসঙ্খ্যোপেতানাং চিকিত্সিতমভিধায বৃশ্চিকলূতাবর্জং চতুঃপঞ্চাশতামেকজাতীনাং চিকিত্সিতং নির্দিশন্নাহ- অগদানেকজাতীষ্বিত্যাদি| বক্রং তগরং, সুবর্চিকা স্বর্জিকাক্ষারঃ| ত্রিকণ্টকগ্রহণমপরসজাতীযানাং কণভপ্রভৃতীনাং প্রাধান্যাদুপলক্ষণম্| হিত ইতি অগদ ইতি শেষঃ||৪৬-৪৭||

Adhikarana 22 (48) · Śloka 48

রজন্যাগারধূমশ্চ বক্রং কুষ্ঠং পলাশজম্ | গলগোলিকদ্ষ্টানামগদো বিষনাশনঃ ||৪৮||

প্রতিসূর্যকাদিচিকিত্সাযা বক্ষ্যমাণত্বাদ্গলগোলিকোপক্রমমাহ- রজনীত্যাদি| পলাশজং `বীজম্’ ইত্যধ্যাহার্যম্||৪৮||

Adhikarana 23 (49-50) · Śloka 50

কুঙ্কুমং তগরং শিগ্রু পদ্মকং রজনীদ্বযম্ | অগদো জলপিষ্টোঽযং শতপদ্বিষনাশনঃ ||৪৯|| মেষশৃঙ্গী বচা পাঠা নিচুলো রোহিণী জলম্ | সর্বমণ্ডূকদষ্টানামগদোঽযং বিষাপহঃ ||৫০||

নিচুলো বেতসঃ, জলং বালকম্||৪৯-৫০||

Adhikarana 24 (51) · Śloka 51

ধবাশ্বগন্ধাতিবলাবলাসাতিগুহাগুহাঃ | বিশ্বম্ভরাভিদষ্টানামগদোঽযং বিষাপহঃ ||৫১||

ধবাশ্বেত্যাদি| বিশ্বম্ভরাভিঃ তিসৃভিঃ| অতিবলা কঙ্কতিকা, অতিগুহা শালিপর্ণী, গুহা পৃশ্নিপর্ণী||৫১||

Adhikarana 25 (52) · Śloka 52

শিরীষং তগরং কুষ্ঠং শালিপর্ণী সহা নিশে | অহিণ্ডুকাভির্দষ্টানামগদো বিষনাশনঃ ||৫২||

শিরীষমিত্যাদি| সহা মুদ্গপর্ণী| নিশে পিণ্ডহরিদ্রাদারুহরিদ্রে||৫২||

Adhikarana 26 (53-55) · Śloka 56

কণ্ডূমকাভির্দষ্টানাং রাত্রৌ শীতাঃ ক্রিযা হিতাঃ | দিবা তে নৈব সিধ্যন্তি সূর্যরশ্মিবলার্দিতাঃ ||৫৩|| বক্রং কুষ্ঠমপামার্গঃ শূকবৃন্তবিষেঽগদঃ | ভৃঙ্গস্বরসপিষ্টা বা কৃষ্ণবল্মীকমৃত্তিকা ||৫৪|| পিপীলিকাভির্দষ্টানাং মক্ষিকামশকৈস্তথা | গোমূত্রেণ যুতো লেপঃ কৃষ্ণবল্মীকমৃত্তিকা ||৫৫|| নখাবঘৃষ্টসঞ্জাতে শোফে ভৃঙ্গরসো হিতঃ |৫৬|

কণ্ডূমকাভিরিত্যাদি| কণ্ডূমকাভির্দষ্টাঃ পুরুষাঃ| সূর্যরশ্মিভির্বলং যেষাং তে সূর্যরশ্মিবলাঃ কণ্ডূমকাঃ, তৈরর্দিতাঃ পীডিতাঃ| পিপীলিকাদিভিস্ত্রিভির্দষ্টে গোমূত্রযুক্তা কৃষ্ণবল্মীকমৃত্তিকা| নখেত্যাদি নখাবকৃষ্টে নখোদ্ঘৃষ্টে সতি সঞ্জাতশোফে মার্কবস্য ভৃঙ্গরাজস্য রসো লেপে হিতঃ স্যাত্| গযদাসস্তু ভৃঙ্গস্বরসপিষ্টা স্যাদিত্যাদি পঠিত্বা পিপীলিকাদিত্রযে দষ্টে ভৃঙ্গরাজপিষ্টকৃষ্ণবল্মীকমৃত্তিকালেপং প্রতিপাদযতি; গোমূত্রযুতকৃষ্ণবল্মীকমৃত্তিকালেপনং তু নখাবকৃষ্টে তথা মার্কবস্বরসালেপনং চ||৫৩-৫৫||-

Adhikarana 27 (56) · Śloka 56

প্রতিসূর্যকদষ্টানাং সর্পদষ্টবদাচরেত্ |৫৬|

প্রতিসূর্যকেত্যাদি| আচরেত্ `চিকিত্সিতং’ ইত্যধ্যাহারঃ|৫৬|-

Adhikarana 28 (56) · Śloka 56

ত্রিবিধা বৃশ্চিকাঃ প্রোক্তা মন্দমধ্যমহাবিষাঃ ||৫৬||

এবমেকজাতীযান্ কীটানভিধায বৃশ্চিকান্নির্দেষ্টুমাহ- ত্রিবিধা বৃশ্চিকা ইত্যাদি| নন্বেকজাতিভ্যঃ পৃথগ্ভূতা বৃশ্চিকা লূতাশ্চ কস্মান্নির্দিশ্যন্তে ইতি? উচ্যতে-বিষচিকিস্তিতবিশেষাপেক্ষঃ পৃথগারম্ভঃ||৫৬||

Adhikarana 29 (57) · Śloka 57

গোশকৃত্কোথজা মন্দা মধ্যাঃ কাষ্ঠেষ্টিকোদ্ভবাঃ | সর্পকোথোদ্ভবাস্তীক্ষ্ণা যে চান্যে বিষসম্ভবাঃ ||৫৭||

তানেব ত্রীনপি কারণধর্মচিকিত্সিতভেদৈর্ভিন্নান্ প্রথমং কারণাদেবাহ- গোশকৃদিত্যাদি| গোশকৃদিত্যত্র গোশব্দস্যাপরপশূপলক্ষণত্বাচ্ছকৃচ্ছব্দস্যাপরমলোপলক্ষণত্বাদ্গোমহিষ্যাদিশকৃন্মূত্রকোথজা মন্দাঃ| যে চান্যে ইত্যাদি| অন্যেঽপি যে বিষসম্ভবাস্তেঽপি তীব্রাঃ| অন্যে ত্বেবং পঠন্তি,- “সর্পকোথোদ্ভবাস্তীব্রা দিগ্ধবিদ্ধবিষৈর্হতে| কোথে মধ্যা গবাদীনাং শকৃত্কোথেঽবরাঃ স্মৃতাঃ”- ইতি||৫৭||

Adhikarana 30 (58) · Śloka 58

মন্দা দ্বাদশ মধ্যাস্তু ত্রযঃ পঞ্চদশোত্তমাঃ | দশ বিংশতিরিত্যেতে সঙ্খ্যযা পরিকীর্তিতাঃ ||৫৮||

ইদানীং তেষাং পৃথক্ সঙ্খ্যামাহ- মন্দা দ্বাদশেত্যাদি| গযদাসস্তু- “ত্রযোদশ প্রাণহরাস্ত্রযো মধ্যাস্তথাঽপরে| মন্দবীর্যা দশৈকশ্চ বৃশ্চিকা বিষবেদিভিঃ|| সপ্তবিংশতিরিত্যেতে সঙ্খ্যযা পরিকীর্তিতাঃ”- ইতি পঠতি||৫৮||

Adhikarana 31 (59-60) · Śloka 61

কৃষ্ণঃ শ্যাবঃ কর্বুরঃ পাণ্ডুবর্ণো গোমূত্রাভঃ কর্কশো মেচকশ্চ | পীতো ধূম্রো রোমশঃ শাড্বলাভো রক্তঃ শ্বেতেনোদরেণেতি মন্দাঃ ||৫৯|| যুক্তাশ্চৈতে বৃশ্চিকাঃ পুচ্ছদেশে স্যুর্ভূযোভিঃ পর্বভিশ্চেতরেভ্যঃ | এভির্দষ্টে বেদনা বেপথুশ্চ গাত্রস্তম্ভঃ কৃষ্ণরক্তাগমশ্চ ||৬০|| শাখাদষ্টে বেদনা চোর্ধ্বমেতি দাহস্বেদৌ দংশশোফো জ্বরশ্চ |৬১|

ইদানীং মন্দবিষাণাং লক্ষণকর্মাণ্যাহ- কৃষ্ণ ইত্যাদি| কৃষ্ণাদযো দ্বাদশাপি শ্বেতেনোদরেণোপলক্ষিতাঃ| বেদনা চোর্ধ্বমেতীতি ত্রিবিধানামপি বৃশ্চিকানাং সামান্যলক্ষণমত্র প্রাযোবৃত্ত্যাঽভিহিতম্| স্যুর্ভূযোভিঃ পর্বভিশ্চেতরেভ্য ইতি ইতরেভ্যো বৃশ্চিকেভ্যো মন্দবিষা বৃশ্চিকা ভূযোভির্বহুতরৈঃ পর্বভিরুপলক্ষিতা ভবেযুঃ||৫৯-৬০||-

Adhikarana 32 (61-62) · Śloka 63

রক্তঃ পীতঃ কাপিলেনোদরেণ সর্বে ধূম্রাঃ পর্বভিশ্চ ত্রিভিঃ স্যুঃ ||৬১|| এতে মূত্রোচ্চারপূত্যণ্ডজাতা মধ্যা জ্ঞেযাস্ত্রিপ্রকারোরগাণাম্ | যস্যৈতেষামন্বযাদ্যঃ প্রসূতো দোষোত্পত্তিং তত্স্বরূপাং স কুর্যাত্ ||৬২|| জিহ্বাশোফো ভোজনস্যাবরোধো মূর্চ্ছা চোগ্রা মধ্যবীর্যাভিদষ্টে |৬৩|

মধ্যবিষাণাং লক্ষণকর্মাণ্যাহ- রক্ত ইত্যাদি| কপিলেন সহ রক্তঃ পীতশ্চেতি ত্রযঃ| এতে চ ত্রযোঽপ্যুদরেণ ধূম্রাঃ| পূর্বত্র কাষ্ঠেষ্টিকোদ্ভবত্বমিহ তু সর্পমূত্রোচ্চারাদিসম্ভবত্বমিত্যুভযহেতূপাদানাদ্ ব্যস্তসমস্তোভযহেতূদ্ভবত্বং মধ্যানাং বোদ্ধব্যম্| দিগ্ধবিদ্ধসর্পদষ্টানাং চ শরীরকোথে মধ্যানাং জন্ম মতান্তরেণ প্রতিপাদিতমেব| ত্রিপ্রকারোরগাণামিত্যাদি দর্বীকরাদিভেদেন ত্রিপ্রকারাণামেতেষাং যস্যান্বযাদ্যো যাদৃক্ প্রসূতঃ স তত্স্বরূপাং দোষোত্পত্তিং কুর্যাত্||৬১-৬২||-

Adhikarana 33 (63-66) · Śloka 66

শ্বেতশ্চিত্রঃ শ্যামলো লোহিতাভো রক্তঃ শ্বেতো রক্তনীলোদরৌ চ ||৬৩|| পীতোঽরক্তো নীলপীতোঽপরস্তু রক্তো নীলো নীলশুক্লস্তথা চ | রক্তো বভ্রুঃ পূর্ববচ্চৈকপর্বা যশ্চাপর্বা পর্বণী দ্বে চ যস্য ||৬৪|| নানারূপা বর্ণতশ্চাপি ঘোরা জ্ঞেযাশ্চৈতে বৃশ্চিকাঃ প্রাণচৌরাঃ | জন্মৈতেষাং সর্পকোথাত্ প্রদিষ্টং দেহেভ্যো বা ঘাতিতানাং বিষেণ ||৬৫|| এভির্দষ্টে সর্পবেগপ্রবৃত্তিঃ স্ফোটোত্পত্তির্ভ্রান্তিদাহৌ জ্বরশ্চ | খেভ্যঃ কৃষ্ণং শোণিতং যাতি তীব্রং তস্মাত্ প্রাণৈস্ত্যজ্যতে শীঘ্রমেব ||৬৬||

তীক্ষ্ণবিষাণাং লক্ষণকর্মাণ্যাহ- শ্বেতশ্চিত্র ইত্যাদি| পূর্ববচ্চেতি পূর্বে মধ্যবিষা যথা জিহ্বাশোফাদিকারকাস্তথৈবৈতেঽপি জিহ্বাশোফাদি কুর্বন্তীত্যর্থঃ| একপর্বেতি দ্বযোরস্থ্নোঃ সঙ্ঘাতঃ পর্ব, একং পর্ব যস্য স তথা| পর্বণী দ্বে চ যস্যেতি চকারেণ বহুপর্বাণোঽপি ভবন্তীতি সমুচ্চীযতে| খেভ্য ইতি খেভ্যঃ স্রোতোভ্যঃ| অরিষ্টমিদম্||৬৩-৬৬||

Adhikarana 34 (67) · Śloka 68

উগ্রমধ্যবিষৈর্দষ্টং চিকিত্সেত্ সর্পদষ্টবত্ | আদংশং স্বেদিতং চূর্ণৈঃ প্রচ্ছিতং প্রতিসারযেত্ ||৬৭|| রজনীসৈন্ধবব্যোষশিরীষফলপুষ্পজৈঃ |৬৮|

ইদানীং চিকিত্সা প্রস্তূযতে- উগ্রমধ্যেত্যাদি| মূর্চ্ছা চোগ্রা চেত্যনেন সর্পদষ্টষষ্ঠসপ্তমবেগলক্ষণস্য বচনান্মধ্যবিষেঽপি সর্পদষ্টচিকিত্সা কার্যা| ইহাপরামপি চিকিত্সামাহ- আদংশমিত্যাদি| প্রতিসারণং ঘর্ষণং, তচ্চ দুষ্টরক্তপ্রবর্তনার্থম্| মাতুলুঙ্গাম্লেত্যাদি| মাতুলুঙ্গাম্লং বীজপূরকরসঃ| সুরসাগ্রজং তুলসীপল্লবং, মল্লিকাকুসুমমিতি কেচিত্| স্বেদে ইত্যাদি বাতকফাবজযায| পানে সর্পিরিত্যাদি| বহুবাতস্য সর্পিঃপানং মধুযুতং, বহুপিত্তস্য ক্ষীরং বহুশর্করং চেতি যোগদ্বযম্||৬৭||-

Adhikarana 35 (68-74) · Śloka 74

মাতুলুঙ্গাম্লগোমূত্রপিষ্টং চ সুরসাগ্রজম্ ||৬৮|| লেপে, স্বেদে সুখোষ্ণং চ গোমযং হিতমিষ্যতে | পানে ক্ষৌদ্রযুতং সর্পিঃ ক্ষীরং বা বহুশর্করম্ ||৬৯|| দংশং মন্দবিষাণাং তু চক্রতৈলেন সেচযেত্ | বিদারীগণসিদ্ধেন সুখোষ্ণেনাথবা পুনঃ ||৭০|| কুর্যাচ্চোত্কারিকাস্বেদং বিষঘ্নৈরুপনাহযেত্ | গুডোদকং বা সুহিমং চাতুর্জাতকসংযুতম্ ||৭১|| পানমস্মৈ প্রদাতব্যং ক্ষীরং বা সগুডং হিমম্ | শিখিকুক্কুটবর্হাণি সৈন্ধবং তৈলসর্পিষী ||৭২|| ধূমো হন্তি প্রযুক্তস্তু শীঘ্রং বৃশ্চিকজং বিষম্ | কুসুম্ভপুষ্পং রজনী নিশা বা কোদ্রবং তৃণম্ ||৭৩|| এভির্ঘৃতাক্তৈর্ধূপস্তু পাযুদেশে প্রযোজিতঃ | নাশযেদাশু কীটোত্থং বৃশ্চিকস্য চ যদ্বিষম্ ||৭৪||

ইদানীং মন্দবিষাণাং চিকিত্সামাহ- দংশমিত্যাদি| চক্রতৈলং চক্রপীডিতং তিলতৈলং, অত্র চক্রশব্দোপাদানং হস্তাদিযন্ত্রপীডননিষেধার্থম্| বিদারিগণসিদ্ধেনেত্যাদিশব্দস্য লোপাদ্বিদার্যাদিগণসিদ্ধেন, `তৈলেন’ ইতি শেষঃ| কুর্যাচ্চোত্কারিকেত্যাদি| উত্কারিকা লপ্সিকা| উত্কারিকা তু শিরীষাদিবিষহরদ্রব্যৈঃ পূর্বোক্তা পূর্বকল্পিতা চ| উপনাহযেদ্ বিষঘ্নদ্রব্যৈরুপনাহস্বেদং কুর্যাত্| গুডোদকমিত্যাদি| বর্হাণি পিচ্ছানি||৬৮-৭৪||

Adhikarana 36 (75-76) · Śloka 76

লূতাবিষং ঘোরতমং দুর্বিজ্ঞেযতমং চ তত্ | দুশ্চিকিত্স্যতমং চাপি ভিষগ্ভির্মন্দবুদ্ধিভিঃ ||৭৫|| সবিষং নির্বিষং চৈতদিত্যেবং পরিশঙ্কিতে | বিষঘ্নমেব কর্তব্যমবিরোধি যদৌষধম্ ||৭৬||

লূতাবিষমাদিকারণলক্ষণচিকিত্সিতৈর্নির্দিশন্নাহ- লূতেত্যাদি| ঘোরতমং কষ্টসাধ্যং, দুর্বিজ্ঞেযতমম্ অতিদুঃখেন বিজ্ঞাতুং শক্যম্| তস্য দুর্বিজ্ঞেযত্বাদেব সংশযে সতি বিষহরমেব করণীযমিত্যাহ- সবিষমিত্যাদি| অবিরোধি ধাতুভিঃ সহ যন্ন বিরুধ্যতেঽন্নপানং তত্; ন পুনরগদকরণং, ধাতুবিরোধাত্||৭৫-৭৬||

Adhikarana 37 (77-78) · Śloka 78

অগদানাং হি সংযোগো বিষজুষ্টস্য যুজ্যতে | নির্বিষে মানবে যুক্তোঽগদঃ সম্পদ্যতেঽসুখম্ ||৭৭|| তস্মাত্ সর্বপ্রযত্নেন জ্ঞাতব্যো বিষনিশ্চযঃ | অজ্ঞাত্বা বিষসদ্ভাবং ভিষগ্ব্যাপাদযেন্নরম্ ||৭৮||

তমেব ধাতুবিরোধং দর্শযন্নাহ- অগদানামিত্যাদি| অসুখং কষ্টম্||৭৭-৭৮||

Adhikarana 38 (79) · Śloka 79

প্রোদ্ভিদ্যমানস্তু যথাঽঙ্কুরেণ ন ব্যক্তজাতিঃ প্রবিভাতি বৃক্ষঃ | তদ্বদ্দুরালক্ষ্যতমং হি তাসাং বিষং শরীরে প্রবিকীর্ণমাত্রম্ ||৭৯||

লূতাবিষদুর্বিজ্ঞেযতাযামুপমানপ্রমাণং নির্দিশন্নাহ- প্রোদ্ভিদ্যমান ইত্যাদি| প্রবিকীর্ণমাত্রং প্রথমং বিক্ষিপ্তমাত্রম্, অল্পবিস্তৃতমিত্যর্থঃ||৭৯||

Adhikarana 39 (80-82) · Śloka 82

ঈষত্সকণ্ডু প্রচলং সকোঠমব্যক্তবর্ণং প্রথমেঽহনি স্যাত্ | অন্তেষু শূনং পরিনিম্নমধ্যং প্রব্যক্তরূপং চ দিনে দ্বিতীযে ||৮০|| ত্র্যহেণ তদ্দর্শযতীহ রূপং বিষং চতুর্থেঽহনি কোপমেতি | অতোঽধিকেঽহ্নি প্রকরোতি জন্তোর্বিষপ্রকোপপ্রভবান্ বিকারান্ ||৮১|| ষষ্ঠে দিনে বিপ্রসৃতং তু সর্বান্ মর্মপ্রদেশান্ ভৃশমাবৃণোতি | তত্ সপ্তমেঽত্যর্থপরীতগাত্রং ব্যাপাদযেন্মর্ত্যমতিপ্রবৃদ্ধম্ ||৮২||

ঈষত্সকণ্ডু প্রচলমিত্যাদি| ঈষত্সকণ্ডু কিঞ্চিত্কণ্ডূযুক্তং, প্রচলং প্রচলনশীলম্| গযদাসস্তু প্রবলমিতি পঠিত্বা ব্যাখ্যানযতি- প্রবলম্ ঈষত্ প্রথমদিনে, দ্বিতীযাদিষু দিনেষু তু প্রবলতরং ক্রমেণ প্রবলতমং চ; যদাহ,- “ষষ্ঠে দিনে বিপ্রসৃতং তু সর্বান্ মর্মপ্রদেশান্ ভৃশমাবৃণোতি”- ইতি| সকোঠং কিঞ্চিত্ কোঠযুক্তং, কোঠশ্চ বরটীদংশস্থানঃ| দর্শযতীহ রূপমিতি রূপং চাত্র তন্ত্রান্তরোক্তং জ্বররোমহর্ষরক্তমণ্ডলাদিকম্| তথা চ বৃদ্ধবাগ্ভটঃ- “তৃতীযে সজ্বরো রোমহর্ষকৃদ্রক্তমণ্ডলঃ| শরাবরূপস্তোদাঢ্যো রোমকূপেষু সাস্রবঃ”- ইতি| কোপমেতি উন্মার্গপ্রবৃত্তং ভবতি, ততোঽধিকে পঞ্চমদিনে উন্মার্গপ্রবৃত্তং সত্ বিষকোপপ্রভবান্ বিকারান্ করোতি| `তৃড্দাহকণ্ডূপ্রবলং’ ইতি কেচিত্||৮০-৮২||

Adhikarana 40 (83-84) · Śloka 84

যাস্তীক্ষ্ণচণ্ডোগ্রবিষা হি লূতাস্তাঃ সপ্তরাত্রেণ নরং নিহন্যুঃ | অতোঽধিকেনাপি নিহন্যুরন্যা যাসাং বিষং মধ্যমবীর্যমুক্তম্ ||৮৩|| যাসাং কনীযো বিষবীর্যমুক্তং তাঃ পক্ষমাত্রেণ বিনাশযন্তি | তস্মাত্ প্রযত্নং ভিষগত্র কুর্যাদাদংশপাতাদ্বিষঘাতিযোগৈঃ ||৮৪||

তাসাং তীক্ষ্ণমধ্যমন্দবিষাণাং কালাবধিমাহ- যাস্তীক্ষ্ণচণ্ডোগ্রেত্যাদি| তীক্ষ্ণং দাহপাকস্রাবকরং, চণ্ডম্ অতিকোপাটোপকরং; তীক্ষ্ণচণ্ডত্বেনোগ্রমসহ্যং বিষং যাসাং তাস্তথা| অতোঽনেনৈকাদশাহাত্ পরত ইতি সামর্থ্যাদ্ গ্রাহ্যম্| তথা চালম্বাযনঃ,- “লূতাস্তীক্ষ্ণবিষা হন্যুঃ সপ্তাষ্টনবভির্দিনৈঃ| একাদশাহাত্ পরতো বিষং যাসাং তু মধ্যমম্”- ইতি||৮৩-৮৪||

Adhikarana 41 (85-87) · Śloka 88

বিষং তু লালানখমূত্রদংষ্ট্রারজঃপুরীষৈরথ চেন্দ্রিযেণ | সপ্তপ্রকারং বিসৃজন্তি লূতাস্তদুগ্রমধ্যাবরবীর্যযুক্তম্ ||৮৫|| সকণ্ডুকোঠং স্থিরমল্পমূলং লালাকৃতং মন্দরুজং বদন্তি | শোফশ্চ কণ্ডূশ্চ পুলালিকা চ ধূমাযনং চৈব নখাগ্রদংশে ||৮৬|| দংশং তু মূত্রেণ সকৃষ্ণমধ্যং সরক্তপর্যন্তমবেহি দীর্ণম্ | দংষ্ট্রাভিরুগ্রং কঠিনং বিবর্ণং জানীহি দংশং স্থিরমণ্ডলং চ ||৮৭|| রজঃপুরীষেন্দ্রিযজং হি বিদ্ধি স্ফোটং বিপক্বামলপীলুপাণ্ডুম্ |৮৮|

অধিষ্ঠানবিশেষাদপি তাসাং বিষং বিষে চ লিঙ্গং দর্শযন্নাহ- বিষং তু লালেত্যাদি| রজ আর্তবম্, ইন্দ্রিযং শুক্রম্| সকণ্ডুকোঠমিত্যাদি| কোঠঃ কোঠপিডকাঃ| শোফ ইত্যাদি| পুলালিকা রোমাঞ্চঃ| ধূমাযনং ধূমোদ্বমনমিবাঙ্গানাম্| দংশং তু মূত্রেণেত্যাদি| রজঃপ্রভৃতিজে `দংশে’ ইত্যধ্যাহারঃ| বিদ্ধি জানীহি||৮৫-৮৭||

Adhikarana 42 (88-89) · Śloka 89

এতাবদেতত্ সমুদাহৃতং তু বক্ষ্যামি লূতাপ্রভবং পুরাণম্ ||৮৮|| সামান্যতো দষ্টমসাধ্যসাধ্যং চিকিত্সিতং চাপি যথাবিশেষম্ ||৮৯||

ইদানীমতীতানাগতোক্তৈঃ সমানতাং বিশিষ্টতাং চ বিভজন্নাহ- এতাবদেতদিত্যাদি| ইযত্প্রমাণমেতত্ প্রথমাদিদিবসাশ্রযং লালাদ্যধিষ্ঠানাশ্রযং চ সর্বলূতাবিষযং সমুদাহৃতমাগমপ্রসিদ্ধমুক্তমিত্যর্থঃ| বক্ষ্যামীত্যাদি| লূতাপ্রভবং লূতানামাদ্যুত্পত্তিকারণং, পুরাণং পুরাভবং, সামান্যতো বক্ষ্যামীতি সম্বন্ধঃ; তথা দষ্টং দংশমপ্যসাধ্যং সাধ্যং চ সামান্যতো বক্ষ্যামীতি| চিকিত্সিতং চেত্যাদি| চিকিত্সিতং যথাবিশেষং বিশেষানতিক্রমেণ; চকারাল্লক্ষণমপি বিশেষানতিক্রমেণ বক্ষ্যামীতি সম্বন্ধঃ||৮৮-৮৯||

Adhikarana 43 (90-93) · Śloka 93

বিশ্বামিত্রো নৃপবরঃ কদাচিদৃষিসত্তমম্ | বশিষ্ঠং কোপযামাস গত্বাঽঽশ্রমপদং কিল ||৯০|| কুপিতস্য মুনেস্তস্য ললাটাত্ স্বেদবিন্দবঃ | অপতন্ দর্শনাদেব রবেস্তত্সমতেজসঃ ||৯১|| তৃণে মহর্ষিণা লূনে ধেন্বর্থং সম্ভৃতেঽপি চ | ততো জাতাস্ত্বিমা ঘোরা নানারূপা মহাবিষাঃ | অপকারায বর্তন্তে নৃপসাধনবাহনে ||৯২|| যস্মাল্লূনং তৃণং প্রাপ্তা মুনেঃ প্রস্বেদবিন্দবঃ | তস্মাল্লূতেতি ভাষ্যন্তে সঙ্খ্যযা তাশ্চ ষোডশ ||৯৩||

তত্প্রভবমুদ্দিশন্নাহ- বিশ্বামিত্র ইত্যাদি| কিলেত্যাগমসংবাদে| তত্সমতেজসো রবিসমানতেজসো বশিষ্ঠস্য স্বেদবিন্দবঃ অপতন্ পতিতাঃ| ধেন্বর্থং সম্ভৃতে গবাদিচরণার্থং সঞ্চিতে| মতান্তরেণোত্পত্তিরন্যথা বর্ণ্যতে,- “অন্যে বদন্তি ভুক্তস্য দুষ্টস্যান্নস্য মূর্চ্ছনাত্| সম্ভবন্তি বিষস্ফোটা যে লূতাকীটলক্ষণম্| যথাস্বং ধারযন্তস্তে লূতাকীটাশ্চ কীর্তিতাঃ”- ইত্যাদি||৯০-৯৩||

Adhikarana 44 (94-99) · Śloka 100

কৃচ্ছ্রসাধ্যাস্তথাঽসাধ্যা লূতাস্তু দ্বিবিধাঃস্মৃতাঃ | তাসামষ্টৌ কৃচ্ছ্রসাধ্যা বর্জ্যাস্তাবত্য এব তু ||৯৪|| ত্রিমণ্ডলা তথা শ্বেতা কপিলা পীতিকা তথা | আলমূত্রবিষা রক্তা কসনা চাষ্টমী স্মৃতা ||৯৫|| তাভির্দষ্টে শিরোদুঃখং কণ্ডূর্দংশে চ বেদনা | ভবন্তি চ বিশেষেণ গদাঃ শ্লৈষ্মিকবাতিকাঃ ||৯৬|| সৌবর্ণিকা লাজবর্ণা জালিন্যেণীপদী তথা | কৃষ্ণাঽগ্নিবর্ণা কাকাণ্ডা মালাগুণাঽষ্টমী তথা ||৯৭|| তাভির্দষ্টে দংশকোথঃ প্রবৃত্তিঃ ক্ষতজস্য চ | জ্বরো দাহোঽতিসারশ্চ গদাঃ স্যুশ্চ ত্রিদোষজাঃ ||৯৮|| পিডকা বিবিধাকারা মণ্ডলানি মহান্তি চ | মহান্তো মৃদবঃ শোফা রক্তাঃ শ্যাবাশ্চলাস্তথা ||৯৯|| সামান্যং সর্বলূতানামেতদাদংশলক্ষণম্ |১০০|

আলাবিষা মূত্রবিষা চেতি দ্বে||৯৪-৯৯||

Adhikarana 45 (100-115) · Śloka 115

বিশেষলক্ষণং তাসাং বক্ষ্যামি সচিকিত্সিতম্ ||১০০|| ত্রিমণ্ডলাযা দংশেঽসৃক্ কৃষ্ণং স্রবতি দীর্যতে | বাধির্যং কলুষা দৃষ্টিস্তথা দাহশ্চ নেত্রযোঃ ||১০১|| তত্রার্কমূলং রজনী নাকুলী পৃশ্নিপর্ণিকা | পানকর্মণি শস্যন্তে নস্যালেপাঞ্জনেষু চ ||১০২|| শ্বেতাযাঃ পিডকা দংশে শ্বেতা কণ্ডূমতী ভবেত্ | দাহমূর্চ্ছাজ্বরবতী বিসর্পক্লেদরুক্করী ||১০৩|| তত্র চন্দনরাস্নৈলাহরেণুনলবঞ্জুলাঃ | কুষ্ঠং লামজ্জকং বক্রং নলদং চাগদো হিতঃ ||১০৪|| আদংশে পিডকা তাম্রা কপিলাযাঃ স্থিরা ভবেত্ | শিরসো গৌরবং দাহস্তিমিরং ভ্রম এব চ ||১০৫|| তত্র পদ্মককুষ্ঠৈলাকরঞ্জককুভত্বচঃ | স্থিরার্কপর্ণ্যপামার্গদূর্বাব্রাহ্ম্যো বিষাপহাঃ ||১০৬|| আদংশে পীতিকাযাস্তু পিডকা পীতিকা স্থিরা | ভবেচ্ছর্দির্জ্বরঃ শূলং মূর্ধ্নি রক্তে তথাঽক্ষিণী ||১০৭|| তত্রেষ্টাঃ কুটজোশীরতুঙ্গপদ্মকবঞ্জুলাঃ | শিরীষকিণিহীশেলুকদম্বককুভত্বচঃ ||১০৮|| রক্তমণ্ডনিভে দংশে পিডকাঃ সর্ষপা ইব | জাযন্তে তালুশোষশ্চ দাহশ্চালবিষার্দিতে ||১০৯|| তত্র প্রিযঙ্গুহ্রীবেরকুষ্ঠলামজ্জবঞ্জুলাঃ | অগদঃ শতপুষ্পা চ সপিপ্পলবটাঙ্কুরাঃ ||১১০|| পূতির্মূত্রবিষাদংশো বিসর্পী কৃষ্ণশোণিতঃ | কাসশ্বাসবমীমূর্চ্ছাজ্বরদাহসমন্বিতঃ ||১১১|| মনঃশিলালমধুককুষ্ঠচন্দনপদ্মকৈঃ | মধুমিশ্রৈঃ সলামজ্জৈরগদস্তত্র কীর্তিতঃ ||১১২|| আপাণ্ডুপিডকো দংশো দাহক্লেদসমন্বিতঃ | রক্তাযা রক্তপর্যন্তো বিজ্ঞেযো রক্তসংযুতঃ ||১১৩|| কার্যস্তত্রাগদস্তোযচন্দনোশীরপদ্মকৈঃ | তথৈবার্জুনশেলুভ্যাং ত্বগ্ভিরাম্রাতকস্য চ ||১১৪|| পিচ্ছিলং কসনাদংশাদ্রুধিরং শীতলং স্রবেত্ | কাসশ্বাসৌ চ তত্রোক্তং রক্তলূতাচিকিত্সিতম্ ||১১৫||

সামান্যলক্ষণমভিধায তাসাং বিশেষলক্ষণং চিকিত্সিতে চ ভেদং দর্শযন্নাহ- বিশেষলক্ষণমিত্যাদি| চকারাত্ পরিষেকেঽপি| শ্বেতাযা ইত্যাদি| রাস্না গন্ধনাকুলী| আদংশে ইত্যাদি| তুঙ্গং পদ্মকেশরং, পুন্নাগ ইত্যপরে| বঞ্জুলো জলবেতসঃ; জেজ্জটস্তু কম্বুকেতি পঠিত্বা কিণিহীতি ব্যাখ্যানযতি| রক্তমণ্ডনিমে ইত্যাদি| `রক্তপাদ্যা’ ইতি ক্বচিত্, তত্রাপি রক্তাযা এব গ্রহণম্| পিচ্ছিলমিত্যাদি| রক্তলূতাচিকিত্সিতং তোযচন্দনাদিকম্||১০০-১১৫||

Adhikarana 46 (116-119) · Śloka 119

পুরীষগন্ধিরল্পাসৃক্ কৃষ্ণাযা দংশ এব তু | জ্বরমূর্চ্ছাবমীদাহকাসশ্বাসসমন্বিতঃ ||১১৬|| তত্রৈলাবক্রসর্পাক্ষীগন্ধনাকুলিচন্দনৈঃ | মহাসুগন্ধিসহিতৈঃ প্রত্যাখ্যাযাগদঃ স্মৃতঃ ||১১৭|| দংশো দাহোঽগ্নিবক্রাযাঃ স্রাবোঽত্যর্থং জ্বরস্তথা | চোষকণ্ডূরোমহর্ষা দাহবিস্ফোটসংযুতঃ ||১১৮|| কৃষ্ণাপ্রশমনং চাত্র প্রত্যাখ্যায প্রযোজযেত্ | সারিবোশীরযষ্ট্যাহ্বচন্দনোত্পলপদ্মকম্ ||১১৯||

ইদানীং সৌবর্ণিকাদিষ্বসাধ্যেষু দ্বযোঃ কৃষ্ণাগ্নিবক্রযোঃ কদাচিত্কৃচ্ছ্রসাধ্যত্বাত্ কৃচ্ছ্রসাধ্যানন্তরং লক্ষণং প্রত্যাখ্যানপূর্বকং চিকিত্সিতং চাহ- পুরীষগন্ধিরিত্যাদি| সর্পাক্ষী লোহিতপুষ্পা শঙ্খপুষ্পীভেদঃ| মহাসুগন্ধিঃ দুন্দুভিস্বনীযোক্তোঽগদঃ| দংশে ইত্যাদি| চোষস্থানে তৃষ্ণেতি ক্বচিত্, সংযুত ইত্যত্র দংশ ইতি বিভক্তিবিপরিণামেন যোজনীযম্| গযদাসস্তু কৃষ্ণাগ্নিবক্রযোর্নিযতাসাধ্যত্বমঙ্গীকুর্বন্ সৌবর্ণিকাদিক্রমেণাগ্রে লক্ষণমাত্রমেব পঠতি||১১৬-১১৯||

Adhikarana 47 (120) · Śloka 120

সর্বাসামেব যুঞ্জীত বিষে শ্লেষ্মাতকত্বচম্ | ভিষক্ সর্বপ্রকারেণ তথা চাক্ষীবপিপ্পলম্ ||১২০||

তাসামুক্তানাং দশানামপি লূতানাং বিশিষ্টং চিকিত্সিতমভিধায সামান্যমপ্যাহ সর্বাসামিত্যাদি| সর্বপ্রকারেণ পানাভ্যঞ্জনাদযঃ| অক্ষীবপিপ্পলমিতি অক্ষীবাত্ মহানিম্বাজ্জাতঃ পিপ্পল অক্ষীবপিপ্পলঃ, অন্যে শোভাঞ্জনাজ্জাত ইতি মন্যন্তে| অন্যত্রাপ্যুক্তং- “অক্ষীবাজ্জাতস্য পিপ্পলস্য মণিঃ সর্ববিষাপহঃ| শেলুত্বচো বা” ইতি| আলম্বাযনোঽপ্যত্রাহ,- “লূতাবিষেষু সর্বেষু পাননস্যাঞ্জনাদিনা| প্রযোজ্যঃ পিপ্পলোঽক্ষীবজ্জাতঃ শেলুত্বচোঽথবা” ইতি||১২০||

Adhikarana 48 (121-127) · Śloka 127

কৃচ্ছ্রসাধ্যবিষা হ্যষ্টৌ প্রোক্তা দ্বে চ যদৃচ্ছযা | অবার্যবিষবীর্যাণাং লক্ষণানি নিবোধ মে ||১২১|| ধ্যামঃ সৌবর্ণিকাদংশঃ সফেনো মত্স্যগন্ধকঃ | শ্বাসঃ কাসো জ্বরস্তৃষ্ণা মূর্চ্ছা চাত্র সুদারুণা ||১২২|| আদংশে লাজবর্ণাযা ধ্যামং পূতি স্রবেদসৃক্ | দাহো মূর্চ্ছাঽতিসারশ্চ শিরোদুঃখং চ জাযতে ||১২৩|| ঘোরো দংশস্তু জালিন্যা রাজিমানবদীর্যতে | স্তম্ভঃ শ্বাসস্তমোবৃদ্ধিস্তালুশোষশ্চ জাযতে ||১২৪|| এণীপদ্যাস্তথা দংশো ভবেত্ কৃষ্ণতিলাকৃতিঃ | তৃষ্ণামূর্চ্ছাজ্বরচ্ছর্দিকাসশ্বাসসমন্বিতঃ ||১২৫|| দংশঃ কাকাণ্ডিকাদষ্টে পাণ্ডুরক্তোঽতিবেদনঃ | তৃণ্মূর্চ্ছাশ্বাসহৃদ্রোগহিক্কাকাসাঃ স্যুরুচ্ছ্রিতাঃ ||১২৬|| রক্তো মালাগুণাদংশো ধূমগন্ধোঽতিবেদনঃ | বহুধা চ বিশীর্যেত দাহমূর্চ্ছাজ্বরান্বিতঃ ||১২৭||

ইদানীমসাধ্যানামপি পরিহারার্থং লক্ষণমাহ- কুচ্ছ্রসাধ্যেত্যাদি| দ্বে যদৃচ্ছযেতি অবার্যবিষবীর্যাণাং মধ্যে দ্বে চ যদৃচ্ছযা সিধ্যতঃ| শেষাণামবার্যবিষবীর্যাণাং ষট্সঙ্খ্যকানাং, নিবোধ জানীহি| ধ্যাম ইত্যাদি| ধ্যামো দগ্ধেষ্টকাদিবর্ণঃ| ঘোরো দংশ ইত্যাদি| তমোবৃদ্ধিঃ পুনঃ পুনস্তমোদর্শনম্| এণীপদ্যা ইত্যাদি| বিশীর্যেত শটতীত্যর্থঃ||১২১-১২৭||

Adhikarana 49 (128) · Śloka 128

অসাধ্যাস্বপ্যভিহিতং প্রত্যাখ্যাযাশু যোজযেত্ | দোষোচ্ছ্রাযবিশেষেণ দাহচ্ছেদবিবর্জিতম্ ||১২৮||

কেচিদসাধ্যানামপি চিকিত্সিতং পঠন্তি- অসাধ্যাস্বিত্যাদি||১২৮||

Adhikarana 50 (129) · Śloka 129

সাধ্যাভিরাভির্লূতাভির্দষ্টমাত্রস্য দেহিনঃ | বৃদ্ধিপত্রেণ মতিমান্ সম্যগাদংশমুদ্ধরেত্ ||১২৯||

ইদানীং কৃচ্ছ্রসাধ্যানাং তাত্কালিকং চিকিত্সিতমাহ- সাধ্যাভিরাভিরিত্যাদি| অস্যাগ্রে কেচিদমুং পাঠং পঠন্তি- `জাম্ব্বৌষ্ঠেনাগ্নিতপ্তেন দহেদাকরবারণাত্ ’- ইতি||১২৯||

Adhikarana 51 (130-133) · Śloka 133

অমর্মণি বিধানজ্ঞো বর্জিতস্য জ্বরাদিভিঃ | দংশস্যোত্কর্তনং কুর্যাদল্পশ্বযথুকস্য চ ||১৩০|| মধুসৈন্ধবসংযুক্তৈরগদৈর্লেপযেত্ততঃ | প্রিযঙ্গুরজনীকুষ্ঠসমঙ্গামধুকৈস্তথা ||১৩১|| সারিবাং মধুকং দ্রাক্ষাং পযস্যাং ক্ষীরমোরটম্ | বিদারীগোক্ষুরক্ষৌদ্রমধুকং পাযযেত বা ||১৩২|| ক্ষীরিণাং ত্বক্কষাযেণ সুশীতেন চ সেচযেত্ | উপদ্রবান্ যথাদোষং বিষঘ্নৈরেব সাধযেত্ ||১৩৩||

কীদৃশস্য দংশস্য ছেদং কুর্যাদিত্যাহ- অমর্মণি বিধানজ্ঞ ইত্যাদি| জ্বরাদিভিঃ অসাধ্যলূতোক্তৈঃ, `অসাধ্যানাং ভিষক্ প্রাজ্ঞো ন যুঞ্জীত চিকিত্সিতম্’ ইতি| মধুসৈন্ধবেত্যাদি| অগদৈঃ মহাসুগন্ধ্যাদিভিঃ| তত্ ইতি ছেদাদনন্তরম্| সমঙ্গা বরাহক্রান্তা| তথেতি প্রিযঙ্গ্বাদিভিরপি লেপযেদিত্যর্থঃ| সারিবামিত্যাদি| সারিবা উত্পলসারিবা, পযস্যা অর্কপুষ্পী, ক্ষীরমোরটং মোরট এব| একত্র যোগে মধুকদ্বযং স্থলজজলজভেদেন| ক্ষীরিণামিত্যাদি||১৩০-১৩৩||

Adhikarana 52 (134) · Śloka 134

নস্যাঞ্জনাভ্যঞ্জনপানধূমং তথাঽবপীডং কবলগ্রহং চ | সংশোধনং চোভযতঃ প্রগাঢং কুর্যাত্সিরামোক্ষণমেব চাত্র ||১৩৪||

লূতাসু দশবিধমুপক্রমমাহ- নস্যাঞ্জনাভ্যঞ্জনেত্যাদি| অভ্যঞ্জনস্থানে আলেপনমিতি কেচিত্| সংশোধনমুভযতো বমনবিরেচনাখ্যং কুর্যাত্| সিরামোক্ষণমিত্যত্র `রক্তং হরেচ্চাপি জলাযুকাভিঃ’ ইতি কেচিত্| এতচ্চ সর্বং বিষহরৈরেব দশবিধমপি||১৩৪||

Adhikarana 53 (135) · Śloka 135

কীটদষ্টব্রণান্ সর্বানহিদষ্টব্রণানপি | আদাহপাকাত্তান্ সর্বাঞ্চিকিত্সেদ্দুষ্টবদ্ভিষগ্ ||১৩৫||

লূতানামপি কীটত্বাত্ সামান্যেনৈব কীটবিষোত্থব্রণানাং তথা তাদৃশানামহিদষ্টব্রণানামপি দুষ্টব্রণবচ্চিকিত্সামাহ- কীটদষ্টব্রণানিত্যাদি| আদাহপাকাদিতি যাবদ্দাহপাকৌ তিষ্ঠতঃ; বিনিবৃত্তযোশ্চ দাহপাকযোর্বক্ষ্যমাণো বিধির্ভবিষ্যতি| ক্বচিত্ `সদাহপাকান্’ ইতি পাঠঃ| দুষ্টবত্ দুষ্টব্রণবত্; দুষ্টব্রণোক্তং চ `দুষ্টব্রণেষু কর্তব্যমূর্ধ্বং চাধশ্চ শোধনম্’ ইত্যাদি| তত্র শোধনং বিষহরদ্রব্যৈঃ, তথা লেপাদিকমপি বিষহরমেব দুষ্টব্রণচিকিত্সিতেন||১৩৫||

Adhikarana 54 (136-137) · Śloka 137

বিনিবৃত্তে ততঃ শোফে কর্ণিকাপাতনং হিতম্ | নিম্বপত্রং ত্রিবৃদ্দন্তী কুসুম্ভং কুসুমং মধু ||১৩৬|| গুগ্গুলুঃ সৈন্ধবং কিণ্বং বর্চঃ পারাবতস্য চ | বিষবৃদ্ধিকরং চান্নং হিত্বা সম্ভোজনং হিতম্ ||১৩৭||

নিবৃত্তদাহাদৌ ব্রণে যা বিষোত্পন্না কর্ণিকা তস্যাশ্চিকিত্সামাহ- বিনিবৃত্তে ইত্যাদি| কর্ণিকা মাংসকন্দী, পদ্মকর্ণিকাকারত্বাত্ কর্ণিকা ভণ্যতে| তস্যাশ্চ শোণিতপিত্তোত্থাযা মৃদুরুজাযাঃ প্রচ্ছনমন্তরেণৈব পাতনং সুকরম্| তান্যেব পাতনদ্রব্যাণ্যাহ- নিম্বপত্রমিত্যাদি| কিণ্বং সুরাবীজম্| এতন্নিম্বপত্রাদিকং দ্রব্যং লেপনেন কর্ণিকাপাতনে হিতং, তথা বিষবৃদ্ধিকরং তিলকুলত্থাদ্যন্নং বর্জযিত্বা যদন্যত্ পাতনম্ সম্ভোজনং তত্ কর্ণিকাযাঃ পাতনে হিতম্| গযদাসস্তু নিম্বপত্রমিত্যস্য স্থানে `শিখীবংশ’ ইতি পঠিত্বা ব্যাখ্যানযতি- শিখী লাঙ্গলকী, বংশো বংশত্বক্| কিণ্বস্থানে দন্তং পঠতি, দন্তো গোদন্তো গবাং দন্তঃ||১৩৬-১৩৭||

Adhikarana 55 (138) · Śloka 138

বিষেভ্যঃ খলু সর্বেভ্যঃ কর্ণিকামরুজাং স্থিরাম্ | প্রচ্ছযিত্বা মধূন্মিশ্রৈঃ শোধনীযৈরুপাচরেত্ ||১৩৮||

কফবাতোত্থাযাঃ কর্ণিকাযাশ্চিকিত্সামাহ- বিষেভ্য ইত্যাদি| অরুজাম্ অবিদ্যমানরুজাং, স্থিরাং কঠিনাং| শোধনীযৈঃ নিম্বপত্রত্রিবৃতাদিভিঃ, দন্তীমূলমদনফলকল্কাদিভির্বা||১৩৮||

Adhikarana 56 (139) · Śloka 139

সপ্তষষ্ঠস্য কীটানাং শতস্যৈতদ্বিভাগশঃ | দষ্টলক্ষণমাখ্যাতং চিকিত্সা চাপ্যনন্তরম্ ||১৩৯||

ইদানীং পরতন্ত্রোদিতসঙ্খ্যাবিপ্রতিপত্তিনিরাসার্থং স্বতন্ত্রে ব্যাসোক্তসঙ্খ্যাঃ সুখবোধার্থং চ কীটেষু দষ্টলক্ষণচিকিত্সিতোপদেশেন পরিমাণমুদ্দিশন্নাহ- সপ্তষষ্ঠস্যেত্যাদি| সপ্তষষ্ঠশতস্য কীটানাং দষ্টলক্ষণমাখ্যাতং কথিতং, বিভাগশঃ প্রত্যেকং দষ্টলক্ষণাদনন্তরং চিকিত্সিতমপি সমাখ্যাতম্||১৩৯||

Adhikarana 57 (140) · Śloka 140

সবিংশমধ্যাযশতমেতদুক্তং বিভাগশঃ |১৪০|

ইদানীং পূর্বতন্ত্রস্যাধ্যাযসঙ্খ্যাযাঃ পরিমাণং যদুদ্দিষ্টং তন্নির্দিষ্টমিতি দর্শযন্নাহ- সবিংশমিত্যাদি| এতত্ সবিংশমধ্যাযশতং, বিভাগশঃ সূত্রস্থানাদিবিভাগেনোক্তম্|১৪০|-

Adhikarana 58 (140) · Śloka 140

ইহোদ্দিষ্টাননির্দিষ্টানর্থান্ বক্ষ্যাম্যথোত্তরে ||১৪০||

শালাক্যকৌমারকাযচিকিত্সাভূতবিদ্যানাং নামমাত্রেণেহোদ্দিষ্টানাং নির্দেশাভাবাত্ কথং জ্ঞানমিত্যাহ- ইহোদ্দিষ্টানিত্যাদি| ইহ বিংশত্যধিকাধ্যাযশতে যেঽর্থাঃ শালাক্যাদযো নামমাত্রেণোদ্দিষ্টা নতু প্রপঞ্চেন নির্দিষ্টাঃ, তানথ অনন্তরমুত্তরে বক্ষ্যামি||১৪০||

Adhikarana 59 (141-143) · Śloka 143

সনাতনত্বাদ্বেদানামক্ষরত্বাত্তথৈব চ | তথা দৃষ্টফলত্বাচ্চ হিতত্বাদপি দেহিনাম্ ||১৪১|| বাক্সমূহার্থবিস্তারাত্ পূজিতত্বাচ্চ দেহিভিঃ | চিকিত্সিতাত্ পুণ্যতমং ন কিঞ্চিদপি শুশ্রুমঃ ||১৪২|| ঋষেরিন্দ্রপ্রভাবস্যামৃতযোনের্ভিষগ্গুরোঃ | ধারযিত্বা তু বিমলং মতং পরমসম্মতম্ | উক্তাহারসমাচার ইহ প্রেত্য চ মোদতে ||১৪৩||

চিকিত্সিতস্যোপাদেযতামাগমপ্রত্যক্ষফলত্বাভ্যামেব নির্দিশন্নাহ- সনাতনত্বাদিত্যাদি| চিকিত্সিতাদন্যত্ পুণ্যতমং ন কিমপি শুশ্রুমঃ ন কিমপি অনু গুরুপারম্পর্যেণ শ্রুতবন্তঃ| কুত ইত্যাহ- সনাতনত্বাদ্বেদানামিতি|- আযুর্বেদাঙ্গানাং শল্যাদীনাং সনাতনত্বান্নিত্যভবত্বাদকৃতকত্বাদিত্যর্থঃ| এতেনাকৃতকত্বাখ্যহেতুকেন দোষাভাবেণ তত্প্রোক্তস্য চিকিত্সিতস্য পুণ্যতমত্বম্| তথা অক্ষরত্বাদাযুর্বেদাঙ্গানাং শল্যাদীনাং ন ক্ষরতীত্যক্ষরমবিচলনাত্মকমুচ্যতে, এতানি চাযুর্বেদাঙ্গান্যক্ষরাণি অবিচলনাত্মকানি যাথাতথ্যাদিত্যর্থঃ, এতস্মাদপি চিকিত্সিতং পুণ্যতমম্| আগমপ্রমাণমভিধায প্রত্যক্ষং প্রমাণমাহ- তথা দৃষ্টফলত্বাচ্চেতি| দৃষ্টফলমপি কিঞ্চিদপুণ্যতমং যথা স্তেযাদীত্যাহ- হিতত্বাদপি দেহিনামিতি| চিকিত্সিতাদিত্যস্য স্বরূপবিশেষণমাহ- বাক্সমূহার্থবিস্তারাদিতি|- বাক্সমূহেঽর্থবিস্তারো যস্মিন্; অত এব পূজিতত্বাচ্চ দেহিভিরিতি দেহিনঃ ব্যাধিপরিমোক্ষং স্বস্থরক্ষণমিচ্ছন্ত আযুর্বেদং বিশিষ্টপদপদার্থরূপং স্বসুখকামাঃ পূজযন্তি| যতশ্চিকিত্সিতমুক্তৈর্হেতুভিঃ পবিত্রতমং; তস্মাদিন্দ্রপ্রভাবস্য মুনেস্তং বেদমবিদ্যমানপাপলক্ষণমমলং, পরমাণাং মহতাং সম্যড্যতং পূজিতং হৃদযে ধারণাত্| উক্তাহারসমাচার উক্তব্যাধিপরিমোক্ষস্বস্থরক্ষণাহারাচারঃ| ইহ ইহলোকে, প্রেত্য পরলোকেঽপি, মোদতে হৃষ্যতি| গযদাসস্তু `সনাতনত্বাদ্বেদানামক্ষরত্বাত্তথৈব চ’ ইতীদৃশং ব্যাখ্যানযতি- সনাতনত্বাত্ নিত্যভবত্বাদাযুষঃ সন্তানস্যোপকার্যস্য নিত্যসদ্ভাবাত্তদুপহিতকারকোঽপ্যাযুর্বেদো নিত্যঃ| তত্রাযুষঃ সন্তানস্যৈব সন্ততিনিত্যতামুদ্দিশন্নাহ অক্ষরত্বাদিতি|- ন ক্ষরন্তীতি অক্ষরাণি অকারাদযঃ স্বরাঃ কাদীনি চ ব্যঞ্জনানি; তদ্ঘটিতত্বাদাযুর্বেদস্যাপি নিত্যত্বং কারণানুরূপং কার্যমিতি কৃত্বা||১৪১-১৪৩||

Adhikarana puShpikA · Śloka 8

ইতি সুশ্রুতসংহিতাযাং কল্পস্থানে কীটকল্পো নামাষ্টমোঽধ্যাযঃ ||৮|| ইতি ভগবতা শ্রীধন্বন্তরিণোপদিষ্টাযাং তচ্ছিষ্যেণ মহর্ষিণা সুশ্রুতেন বিরচিতাযাং সুশ্রুতসংহিতাযাং পঞ্চমং কল্পস্থানং সমাপ্তম্ |

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং কল্পস্থানেঽষ্টমোঽধ্যাযঃ||৮||