7. mūṣikakalpaḥ

Adhikarana 1 (1-2) · Śloka 2

অথাতো মূষিককল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3-6) · Śloka 6

পূর্বং শুক্রবিষা উক্তা মূষিকা যে সমাসতঃ | নামলক্ষণভৈষজ্যৈরষ্টাদশ নিবোধ মে ||৩|| লালনঃ পুত্রকঃ কৃষ্ণো হংসিরশ্চিক্বি(ক্কি)রস্তথা | ছুচ্ছুন্দরোঽলসশ্চৈব কষাযদশনোঽপি চ ||৪|| কুলিঙ্গশ্চাজিতশ্চৈব চপলঃ কপিলস্তথা কোকিলোঽরুণসঞ্জ্ঞশ্চ মহাকৃষ্ণস্তথোন্দুরঃ ||৫|| শ্বেতেন মহতা সার্ধং কপিলেনাখুনা তথা | মূষিকশ্চ কপোতাভস্তথৈবাষ্টাদশ স্মৃতাঃ ||৬||

তানেবাষ্টাদশভেদান্ নির্দিশন্নাহ- লালন ইত্যাদি||৩-৬||

Adhikarana 3 (7) · Śloka 7

শুক্রং পততি যত্রৈষাং শুক্রস্পৃষ্টৈঃ স্পৃশন্তি বা | নখদন্তাদিভিস্তস্মিন্ গাত্রে রক্তং প্রদুষ্যতি ||৭||

ননু `দষ্টরূপং সমাসোক্তং’ ইতি বক্ষ্যতি তত্কথং শুক্রবিষত্বমেবেত্যাহ- শুক্রমিত্যাদি| নখদন্তাদিভিরিত্যাদিশব্দাত্ পুরীষমূত্রাভ্যাং চ; তথা চালম্বাযনে,- “শুক্রেণাথ পুরীষেণ মূত্রেণাপি নখৈস্তথা| দংষ্ট্রাভির্বা ক্ষিপন্তীহ মূষিকাঃ পঞ্চধা বিষম্”- ইতি| কস্মিংশ্চিত্তন্ত্রান্তরে বিশেষোঽস্তি, তথা চ,- “গর্ভিণ্যা মূষিকযা দষ্টে অম্লাদিদোহদঃ, ঋতুমত্যা দষ্টে রক্তমেহনমাধ্মানং রতিশীলতা চ” ইত্যাদি||৭||

Adhikarana 4 (8-9) · Śloka 10

জাযন্তে গ্রন্থযঃ শোফাঃ কর্ণিকা মণ্ডলানি চ | পীডকোপচযশ্চোগ্রো বিসর্পাঃ কিটিভানি চ ||৮|| পর্বভেদো রুজস্তীব্রা মূর্চ্ছাঽঙ্গসদনং জ্বরঃ | দৌর্বল্যমরুচিঃ শ্বাসো বমথুর্লোমহর্ষণম্ ||৯|| দষ্টরূপং সমাসোক্তমেতদ্ব্যাসমতঃ শৃণু |১০|

সামান্যং মূষিকদষ্টলক্ষণমভিধাতুমাহ- জাযন্তে গ্রন্থয ইত্যাদি| কর্ণিকা কমলমধ্যবীজকোশাকৃতিঃ| পর্বভেদঃ সন্ধেঃ স্ফোটঃ| অঙ্গসদনম্ অঙ্গগ্লানিঃ||৮-৯||-

Adhikarana 5 (10) · Śloka 11

লালাস্রাবো লালনেন হিক্কা ছর্দিশ্চ জাযতে ||১০|| তণ্ডুলীযককল্কং তু লিহ্যাত্তত্র সমাক্ষিকম্ |১১|

তেষাং বিশিষ্টং লক্ষণং চিকিত্সিতং চ নির্দিশন্নাহ- লালাস্রাব ইত্যাদি| লালাস্রাবচ্ছর্দিহিক্কা বাতকোপজা ভবন্তি| তণ্ডুলীযককল্কাদিকং ব্যাধিপ্রত্যনীকং চিকিত্সিতং, দোষপ্রত্যনীকং তু সামান্যচিকিত্সিতোক্তং `তপ্তঘৃতেন দগ্ধ্বা বিস্রাবযেদ্দংশং’ ইত্যাদিকম্; এবমন্যত্রাপি ব্যাধিদোষপ্রত্যনীকং চিকিত্সিতং স্বযমূহনীযং; প্রতিমূষিকোক্তং তু চিকিত্সিতং প্রাযো ব্যাধিপ্রত্যনীকমেব||১০||-

Adhikarana 6 (11-12) · Śloka 12

পুত্রকেণাঙ্গসাদশ্চ পাণ্ডুবর্ণশ্চ জাযতে ||১১|| চীযতে গ্রন্থিভিশ্চাঙ্গমাখুশাবকসন্নিভৈঃ | শিরীষেঙ্গুদকল্কং তু লিহ্যাত্তত্র সমাক্ষিকম্ ||১২||

পুত্রকেণাঙ্গেত্যাদি| আখুশাবকসন্নিভৈর্মূষিকপুত্রকতুল্যৈর্গ্রন্থিভিরঙ্গং চীযতে ব্যাপ্যত ইত্যর্থঃ| আখুশাবকনিভা গ্রন্থযঃ সর্বমূষিকদংশেষু জাযন্তে বিশেষেণ পুত্রকদষ্টে| নাগার্জুনোঽত্রাহ,- “তেন দর্শযতে দষ্টো ব্যক্তং মূষিকপুত্রকান্| এতত্ পুত্রকদষ্টস্য ব্যক্তং ভবতি লক্ষণম্”- ইতি| `শিরীষেঙ্গুদচূর্ণং তু’ ইতি পঠিত্বা গযদাসঃ অনযোঃ পত্রচূর্ণমিতি ব্যাখ্যানযতি; জেজ্জটাচার্যস্তু `শিরীষফলকল্কং তু’ ইতি পঠতি||১১-১২||

Adhikarana 7 (13) · Śloka 13

কৃষ্ণেন দংশে শোফোঽসৃক্ছর্দিঃ প্রাযশ্চ দুর্দিনে | শিরীষফলকুষ্ঠং তু পিবেত্ কিংশুকভস্মনা ||১৩||

কৃষ্ণেনেত্যাদি| গ্রন্থ্যাদীন্যত্রাপি সামান্যমূষিকলক্ষণানি বিজ্ঞেযানি; এবং সর্বত্রোন্নেযম্| প্রাযশ্চেতি বচনাদন্যত্রাপ্যসৃক্চ্ছর্দিঃ| কিংশুকভস্মনা কিংশুককুসুমভস্মোদকেনেত্যর্থঃ||১৩||

Adhikarana 8 (14) · Śloka 14

হংসিরেণান্নবিদ্বেষো জৃম্ভা রোম্ণাং চ হর্ষণম্ | পিবেদারগ্বধাদিং তু সুবান্তস্তত্র মানবঃ ||১৪||

হংসিরেণেত্যাদি| সুবান্তঃ সুষ্ঠু বান্তঃ||১৪||

Adhikarana 9 (15) · Śloka 16

চিক্বি(ক্কি)রেণ শিরোদুঃখং শোফো হিক্কা বমিস্তথা | জালিনীমদনাঙ্কোঠকষাযৈর্বামযেত্তু তম্ ||১৫|| যবনালর্ষভীক্ষারং বৃহত্যোশ্চাত্র দাপযেত্ |১৬|

চিক্বিরেণেত্যাদি| জালিনী কোশাতকী, ঋষভী কপিকচ্ছুঃ, বৃহত্যোশ্চেতি চকারেণ ক্ষারমিত্যত্রাপি সম্বন্ধনীযম্| ক্ষারশ্চাত্র ক্ষারোদকম্| গযদাসস্তু `জালিনীমদনাঙ্কোঠ’ ইত্যাদিস্থানে `সুবান্তো জালিনীক্বাথৈঃ সারমঙ্কোঠজং পিবেত্’ ইতি পঠতি ন যবনালাদি||১৫||-

Adhikarana 10 (16-17) · Śloka 18

ছুচ্ছুন্দরেণ তৃট্ ছর্দির্জ্বরো দৌর্বল্যমেব চ ||১৬|| গ্রীবাস্তম্ভঃ পৃষ্ঠশোফো গন্ধাজ্ঞানং বিসূচিকা | চব্যং হরীতকী শুণ্ঠী বিডঙ্গং পিপ্পলী মধু ||১৭|| অঙ্কোঠবীজং চ তথা পিবেদত্র বিষাপহম্ |১৮|

ছুচ্ছুন্দরেণেত্যাদি| ছুচ্ছুন্দরদষ্টলক্ষণং তচ্চিকিত্সিতং চ গযদাসোঽন্যথা পঠতি; যথা- “ভ্রমশ্ছুচ্ছুন্দরেণোগ্রো গ্রীবাস্তম্ভো বিসূচিকা| যবনালর্ষভীক্ষারং বৃহত্যোশ্চাত্র দাপযেত্” ইতি||১৬-১৭||-

Adhikarana 11 (18-20) · Śloka 21

গ্রীবাস্তম্ভোঽলসেনোর্ধ্ববাযুর্দংশে রুজা জ্বরঃ ||১৮|| মহাগদং সসর্পিষ্কং লিহ্যাত্তত্র সমাক্ষিকম্ | নিদ্রা কষাযদন্তেন হৃচ্ছোষঃ কার্শ্যমেব চ ||১৯|| ক্ষৌদ্রোপেতাঃ শিরীষস্য লিহ্যাত্ সারফলত্বচঃ | কুলিঙ্গেন রুজঃ শোফো রাজ্যশ্চ দংশমণ্ডলে ||২০|| সহে সসিন্ধুবারে চ লিহ্যাত্তত্র সমাক্ষিকে |২১|

গ্রীবাস্তম্ভ ইত্যাদি| সহে মুদ্গপর্ণীমাষপর্ণ্যৌ||১৮-২০||-

Adhikarana 12 (21) · Śloka 22

অজিতেনাঙ্গকৃষ্ণত্বং ছর্দির্মূর্চ্ছা চ হৃদ্গ্রহঃ ||২১|| স্নুক্ক্ষীরপিষ্টাং পালিন্দীং মঞ্জিষ্ঠাং মধুনা লিহেত্ |২২|

অজিতেনেত্যাদি| পালিন্দী ত্রিবৃত্||২১||-

Adhikarana 13 (22) · Śloka 23

চপলেন ভবেচ্ছর্দির্মূর্চ্ছা চ সহ তৃষ্ণযা ||২২|| ক্ষৌদ্রেণ ত্রিফলাং লিহ্যাদ্ভদ্রকাষ্ঠজটান্বিতাম্ |২৩|

চপলেনেত্যাদি| ভদ্রকাষ্ঠং দেবদারু, জটা জটামাংসী| `জটান্বিতাং’ ইত্যত্র `ঘনান্বিতাম্’ ইতি কেচিত্||২২||-

Adhikarana 14 (23-24) · Śloka 25

কপিলেন ব্রণে কোথো জ্বরো গ্রন্থ্যুদ্গমঃ সতৃট্ ||২৩|| লিহ্যান্মধুযুতাং শ্বেতাং শ্বেতাং চাপি পুনর্নবাম্ | গ্রন্থযঃ কোকিলেনোগ্রা জ্বরো দাহশ্চ দারুণঃ ||২৪|| বর্ষাভূনীলিনীক্বাথকল্কসিদ্ধং ঘৃতং পিবেত্ |২৫|

কপিলেনেত্যাদি| কোথঃ পূতিপ্রাদুর্ভাবঃ| শ্বেতাং শ্বেতস্যন্দাং, `শ্বেতাং’ ইত্যত্র গযদাসঃ `শ্রেষ্ঠাং’ ইতি পঠতি||২৩-২৪||

Adhikarana 15 (25-31) · Śloka 32

অরুণেনানিলঃ ক্রুদ্ধো বাতজান্ কুরুতে গদান্ ||২৫|| মহাকৃষ্ণেন পিত্তং চ শ্বেতেন কফ এব চ | মহতা কপিলেনাসৃক্ কপোতেন চতুষ্টযম্ ||২৬|| ভবন্তি চৈষাং দংশেষু গ্রন্থিমণ্ডলকর্ণিকাঃ | পিডকোপচযশ্চোগ্রঃ শোফশ্চ ভৃশদারুণঃ ||২৭|| দধিক্ষীরঘৃতপ্রস্থাস্ত্রযঃ প্রত্যেকশো মতাঃ | করঞ্জারগ্বধব্যোষবৃহত্যংশুমতীস্থিরাঃ ||২৮|| নিষ্ক্বাথ্য চৈষাং ক্বাথস্য চতুর্থোংঽশঃ পুনর্ভবেত্ | ত্রিবৃদ্গোজ্যমৃতাবক্রসর্পগন্ধাঃ সমৃত্তিকাঃ ||২৯|| কপিত্থদাডিমত্বক্ চ শ্লক্ষ্ণপিষ্টাঃ প্রদাপযেত্ | তত্ সর্বমেকতঃ কৃত্বা শনৈর্মৃদ্বগ্নিনা পচেত্ ||৩০|| পঞ্চানামরুণাদীনাং বিষমেতদ্ব্যপোহতি | কাকাদনীকাকমাচ্যোঃ স্বরসেষ্বথবা কৃতম্ ||৩১|| সিরাশ্চ স্রাবযেত্ প্রাপ্তাঃ কুর্যাত্ সংশোধনানি চ |৩২|

দধ্যাদীনি প্রস্থমাত্রাণি, করঞ্জাদিদ্রব্যাণাং দ্বিপলিকং ভাগং, সলিলাঢকেন নিষ্ক্বাথ্য, ক্বথিতং প্রস্থশেষং, তৈস্ত্রিভিঃ প্রস্থৈঃ সহ সংযোজ্য, ত্রিবৃন্মূলাদিকল্কপাদং চ বিপচেত্; পক্বং চ ঘৃতং বিরেচনং ভবতি| অংশুমতী শালপর্ণী, গোজী গোজিহ্বা, অমৃতা গুডূচী, বক্রং তগরং, সর্পগন্ধা সর্পচ্ছত্রিকা| সমৃত্তিকাঃ সকৃষ্ণমৃত্তিকাঃ, `অহিমৃত্তিকা’ ইতি কেচিত্ পঠন্তি, অত্রাহিমৃত্তিকা বল্মীকমৃত্তিকা; `অগবৃত্তিকা’ ইতি জেজ্জটাচার্যঃ পঠতি, তত্রাগবৃত্তিকা শল্লকী| দ্বিতীযং ঘৃতমাহ- কাকাদনীত্যাদি| কাকাদনী কৃষ্ণশ্রীফলিকা, কৃতং সংস্কৃতং, ঘৃতমিতি শেষঃ| সিরা ইত্যাদি| প্রাপ্তা যুক্তা মর্মানাশ্রিতাঃ| সংশোধনানি বমনাদীনি নস্যপর্যন্তানি, তান্যপি প্রাপ্তানি; তেনাবম্যাবিরেচ্যযোরবরোধঃ| অন্যে তু বিষাতুরা অবম্যা অপি বম্যা এব, `এতেঽপ্যজীর্ণব্যথিতা বাম্যা যে চ বিষাতুরা’ ইতি||২৫-৩১||-

Adhikarana 16 (32) · Śloka 32

সর্বেষাং চ বিধিঃ কার্যো মূষিকাণাং বিষেষ্বযম্ ||৩২||

অরুণাদ্যাশ্রিতং সিরাব্যধাদিকং সামান্যতঃ সর্বত্রাতিদিশন্নাহ- সর্বেষামিত্যাদি| অযং বিধিঃ সিরাব্যধাদিকঃ কর্তব্য ইত্যর্থঃ||৩২||

Adhikarana 17 (33) · Śloka 33

দগ্ধ্বা বিস্রাবযেদ্দংশং প্রচ্ছিতং চ প্রলেপযেত্ | শিরীষরজনীকুষ্ঠকুঙ্কুমৈরমৃতাযুতৈঃ ||৩৩||

দগ্ধ্বেত্যাদি| দগ্ধ্বা `ঘৃতেনাগ্নিতপ্তেন’ ইতি শেষঃ| বিস্রাবযেত্ প্রচ্ছন্নেন প্রচ্ছিতং দংশম্| শিরীষাদিভিঃ কল্কৈরালেপযেত্| তথৈব কেচিত্ প্রচ্ছিতং দংশং বিস্রাবযেচ্ছোণিতং শিরীষাদিকল্কৈরালেপযেচ্চেত্যাহুঃ||৩৩||

Adhikarana 18 (34) · Śloka 34

ছর্দনং জালিনীক্বাথৈঃ শুকাখ্যাঙ্কোঠযোরপি ||৩৪||

শোধনং সূত্রিতং দ্রব্যৈর্বিবৃণ্বন্নাহ- ছর্দনমিত্যাদি| শুকাখ্যঃ চর্মকারবটঃ||৩৪||-

Adhikarana 19 (34-36) · Śloka 36

শুকাখ্যাকোষবত্যোশ্চ মূলং মদন এব চ | দেবদালীফলং চৈব দধ্না পীত্বা বিষং বমেত্ | সর্বমূষিকদষ্টানামেষ যোগঃ সুখাবহঃ ||৩৫|| ফলং বচা দেবদালী কুষ্ঠং গোভূত্রপেষিতম্ | পূর্বকল্পেন যোজ্যাঃ স্যুঃ সর্বোন্দুরুবিষচ্ছিদঃ ||৩৬||

অপরাবপি বমনযোগাবাহ- শুকাখ্যেত্যাদি| কোষবতী ঘোষকঃ| মূলমিত্যত্র ফলমিত্যন্যে| ফলমিত্যাদি| পূর্বকল্পেন দধ্না লেহমিত্যর্থঃ||৩৪-৩৬||

Adhikarana 20 (37) · Śloka 37

বিরেচনে ত্রিবৃদ্দন্তীত্রিফলাকল্ক ইষ্যতে |৩৭|

বিরেচনমাহ- বিরেচনে ইত্যাদি| দন্তীস্থানে কেচিন্নীলীং পঠন্তি|৩৭|

Adhikarana 21 (37) · Śloka 38

শিরোবিরেচনে সারঃ শিরীষস্য ফলানি চ ||৩৭|| হিতস্ত্রিকটুকাঢ্যশ্চ গোমযস্বরসোঽঞ্জনে |৩৮|

শিরোবিরেচনে ইত্যাদি| সারঃ শিরীষস্য, গযদাসস্তু শালতমালমধূকানামাহ| ফলানি চেতি শিরীষস্যেতি সম্বন্ধঃ| ত্রিকটুকাঢ্যঃ ত্রিকটুকোত্কট ইত্যর্থঃ| এতচ্চ যোগান্তরম্||৩৭||-

Adhikarana 22 (38-40) · Śloka 40

কপিত্থগোমযরসৌ লিহ্যান্মাক্ষিকসংযুতৌ ||৩৮|| রসাঞ্জনহরিদ্রেন্দ্রযবকট্বীষু বা কৃতম্ | প্রাতঃ সাতিবিষং কল্কং লিহ্যান্মাক্ষিকসংযুতম্ ||৩৯|| তণ্ডুলীযকমূলেষু সর্পিঃ সিদ্ধং পিবেন্নরঃ | আস্ফোতমূলসিদ্ধং বা পঞ্চকাপিত্থমেব বা ||৪০||

সংশমনযোগানাহ- কপিত্থেত্যাদি| প্রত্যেকং কপিত্থরসো গোমযরসশ্চ সমধুর্লেহঃ| রসাঞ্জনেত্যাদি| কট্বী কটুরোহিণী| তণ্ডুলীযকেত্যাদি| কপিত্থফলমূলপুষ্পত্বক্পত্রকল্ককষাযসিদ্ধং পঞ্চকাপিত্থং ঘৃতং সর্বমূষিকবিষহরম্||৩৮-৪০||

Adhikarana 23 (41) · Śloka 41

মূষিকাণাং বিষং প্রাযঃ কুপ্যত্যভ্রেষ্বনির্হৃতম্ | তত্রাপ্যেষ বিধিঃ কার্যো যশ্চ দূষীবিষাপহঃ ||৪১||

প্রশান্তকোপস্যাপ্যবশ্যং বমনাদিশোধনং করণীযমিতি দর্শযন্নাহ- মূষিকাণামিত্যাদি| এষ বিধিঃ বমনবিরেচনশিরোবিরেচননযনাঞ্জনাদিঃ| যশ্চ দূষীবিষাপহো বিধিঃ সোঽপ্যত্র কার্যঃ; এতেন দূষীবিষতুল্যতা মূষিকবিষস্যোক্তা||৪১||

Adhikarana 24 (42) · Śloka 42

স্থিরাণাং রুজতাং বাঽপি ব্রণানাং কর্ণিকাং ভিষক্ | পাটযিত্বা যথাদোষং ব্রণবচ্চাপি শোধযেত্ ||৪২||

ইদানীমাখুবিষব্রণে কর্ণিকা ভবন্তি তথাঽন্যবিষদুষ্টব্রণেঽপি, তচ্চিকিত্সামুদ্দিশন্নাহ- স্থিরাণামিত্যাদি| স্থৈর্যেণ কফাত্মকতা, রুজতামিত্যনেন বাতাত্মকতা ব্রণানামুক্তা| কর্ণিকাং মাংসকর্ণীকম্| পাটযিত্বা বিদার্য, পাটযিত্বেত্যত্র পাচযিত্বেতি কেচিত্, পাতযিত্বেত্যপরে| লালনপুত্রকাদিমূষিকজাতিবিশেষজ্ঞানং নানাদেশীযলোকেভ্যোঽবগন্তব্যম্||৪২||

Adhikarana 25 (43-45) · Śloka 46

শ্বশৃগালতরক্ষ্বৃক্ষব্যাঘ্রাদীনাং যদাঽনিলঃ | শ্লেষ্মপ্রদুষ্টো মুষ্ণাতি সঞ্জ্ঞাং সঞ্জ্ঞাবহাশ্রিতঃ ||৪৩|| তদা প্রস্রস্তলাঙ্গূলহনুস্কন্ধোঽতিলালবান্ | অত্যর্থবধিরোঽন্ধশ্চ সোঽন্যোন্যমভিধাবতি ||৪৪|| তেনোন্মত্তেন দষ্টস্য দংষ্ট্রিণা সবিষেণ তু | সুপ্ততা জাযতে দংশে কৃষ্ণং চাতিস্রবত্যসৃক্ ||৪৫|| দিগ্ধবিদ্ধস্য লিঙ্গেন প্রাযশশ্চোপলক্ষিতঃ |৪৬|

ইদানীং মূষকস্য চতুষ্পদজরাযুজহিংস্রত্বসামান্যাচ্ছ্বাদীনাং বিষং লক্ষণচিকিত্সিতৈরুদ্দিশন্নাহ- শ্বশৃগালতরক্ষ্বৃক্ষেত্যাদি| শ্বা কুক্কুরঃ, শৃগালঃ প্রসিদ্ধঃ, তরক্ষুঃ মৃগশত্রুর্ব্যাঘ্রবিশেষঃ `জরখ’ ইতি লোকে, ঋক্ষো ভল্লূকোঽতিলোমশঃ `রীচ্ছ’ ইতি প্রসিদ্ধঃ; আদিশব্দাদ্বৃকচিত্রকাদযো হিংস্রাঃ পশবো গ্রাহ্যাঃ| শ্বাদীনাং যদাঽনিলো বাযুঃ শ্লেষ্মপ্রদুষ্টঃ সন্, সঞ্জ্ঞাবহাশ্রিতো সঞ্জ্ঞাবহস্রোতোগতঃ, সঞ্জ্ঞাং সম্যগ্জ্ঞানং, মুষ্ণাতি হরতি| সম্যগ্জ্ঞানহরণাচ্চ কীদৃশো ভবতীত্যাহ- তদেত্যাদি| প্রস্রস্তং স্থানচ্যুতং লাঙ্গূলং বালধির্মেহনং বা হনুঃ স্কন্ধশ্চ যস্য সঃ; প্রস্রস্তশব্দো লাঙ্গূলাদিভিঃ প্রত্যেকং সম্বন্ধনীযঃ| অতিলালবান্ অতিশযেন লালাস্রাবযুক্তঃ| অত্যর্থবধিরোঽন্ধশ্চ অতিশযেন বধিরোঽন্ধো বেত্যর্থঃ| অন্যোন্যমভিধাবতি পরস্পরং দষ্টুমভিধাবতি| হনুস্কন্ধস্থানে `গলস্কন্ধ ’ ইতি কেচিত্ পঠন্তি| `প্রমূঢোঽন্যতমস্তেষাং খাদন্ বিপরিধাবতি’ ইতি অত্র উত্তরার্ধং কেচিত্ পঠন্তি| এষাং মধ্যেঽন্যতম একতমঃ প্রমূঢঃ সন্ খাদন্ বিশেষেণ পরিধাবতি| তেনোন্মত্তেন দষ্টস্যেত্যাদি| তেন দংষ্ট্রিণা সবিষেণোন্মত্তেন দষ্টস্য পুরুষস্য দংশে সুপ্ততা বাধির্য জাযতে| উপলক্ষিতো যুক্ত ইত্যর্থঃ||৪৩-৪৫||-

Adhikarana 26 (46) · Śloka 47

যেন চাপি ভবেদ্দষ্টস্তস্য চেষ্টাং রুতং নরঃ ||৪৬|| বহুশঃ প্রতিকুর্বাণঃ ক্রিযাহীনো বিনশ্যতি |৪৭|

অত্রৈবারিষ্টমুদ্দিশন্নাহ- যেন চাপি ভবেদিত্যাদি| চেষ্টা ক্রিযা, রুতং শব্দঃ, বহুশঃ অনেকবারং, প্রতিকুর্বাণঃ অনুকুর্বন্, ক্রিযাহীনঃ স্বকীযকাযাদিব্যাপাররহিতঃ||৪৬||-

Adhikarana 27 (47) · Śloka 48

দংষ্ট্রিণা যেন দষ্টশ্চ তদ্রূপং যস্তু পশ্যতি ||৪৭|| অপ্সু বা যদি বাঽঽদর্শেঽরিষ্টং তস্য বিনির্দিশেত্ |৪৮|

ইদানীমপরমপ্যরিষ্টং নির্দিশন্নাহ- দংষ্ট্রিণা যেনেত্যাদি| তদ্দংষ্ট্রিরূপদর্শনমরিষ্টং মরণলক্ষণম্||৪৭||-

Adhikarana 28 (48) · Śloka 49

ত্রস্যত্যকস্মাদ্যোঽভীক্ষ্ণং দৃষ্ট্বা স্পৃষ্ট্বাঽপি বা জলম্ ||৪৮|| জলত্রাসং তু বিদ্যাত্তং রিষ্টং তদপি কীর্তিতম্ |৪৯|

পুনরপরমপ্যরিষ্টং নির্দিশন্নাহ- ত্রস্যতীত্যাদি| অকস্মাত্ জলত্রাসহেতুং বিনা| অপিশব্দাচ্ছ্রুত্বাঽপি| জলত্রাসং জলত্রাসরোগং জানীযাত্তস্যেতি সম্বন্ধঃ| রিষ্টমিত্যাদি| তদপি জলত্রসনমরিষ্টং মরণলক্ষণং কীর্তিতং; এতচ্চারিষ্টং দষ্টস্য, অদষ্টে জলত্রসনারিষ্টস্য বক্ষ্যমাণত্বাত্| অত্রার্থে তন্ত্রান্তরম্,- “ব্যাধিতেন শ্বাদিনা দষ্টস্য শ্লেষ্মা প্রকুপিতশ্চেতোবাহিনীর্ধমনীরনুপ্রবিশ্য সঞ্জ্ঞানাশমাপাদযতি সদ্যঃ কালান্তরাদ্বা”; অবভৃতে বিশেষতঃ- “ততো নরঃ স্পৃষ্ট্বা দৃষ্ট্বা শ্রুত্বা বা জলং ত্রস্যতি, তস্যাপি তদরিষ্টং জানীযাত্” ইতি| গযদাসস্তু `যদি ত্রস্যত্যদষ্টোঽপি’ ইত্যাদি পঠতি||৪৮||-

Adhikarana 29 (49) · Śloka 50

অদষ্টো বা জলত্রাসী ন কথঞ্চন সিধ্যতি ||৪৯|| প্রসুপ্তোঽথোত্থিতো বাঽপি স্বস্থস্ত্রস্তো ন সিধ্যতি |৫০|

এবমদষ্টস্যাপি জলত্রাসোঽরিষ্টমেবেতি দর্শযন্নাহ- অদষ্ট ইত্যাদি| অস্মিন্নর্থে তন্ত্রান্তরম্,- “অদষ্টস্যাপি জন্তোর্হি জলত্রাসো ভবেদ্যদি| তস্য রিষ্টং হি ভিষজো ব্রুবতে বিষচিন্তকাঃ” ইতি| জলং বিনাঽপি জলত্রাসো জাযতে শ্লেষ্মসঞ্চযাত্| তথা চোক্তং,- “বুদ্ধিস্থানং যদা শ্লেষ্মা কেবলং প্রতিপদ্যতে| তদা বুদ্ধৌ নিরুদ্ধাযাং শ্লেষ্মণাঽধিষ্ঠিতো নরঃ|জাগ্রত্ সুপ্তোঽথবাঽঽত্মানং মজ্জন্তমিব মন্যতে| সলিলে ত্রস্যতি তদা জলত্রাসং তু তং বিদুঃ|| শ্লেষ্মঘ্নং তত্র কর্তব্যং শোধনং শমনানি চ| আহারস্য বিধানেন যাবত্ স প্রকৃতিং ব্রজেত্”- ইতি| অযং জলত্রাসঃ কুপিতকফস্য ভবতীতি রিষ্টং ন ভবতি, অত এবাত্র চিকিত্সোপদেশঃ, দষ্টস্য তু রিষ্টমেব| তথা স্বস্থস্য সুপ্তস্য জাগ্রতো বা জলমন্তরেণ ত্রাসোঽরিষ্টমেবেতি দর্শযন্নাহ- প্রসুপ্তোঽথোত্থিতো বাঽপীত্যাদি||৪৯||-

Adhikarana 30 (50-52) · Śloka 53

দংশং বিস্রাব্য তৈর্দষ্টে সর্পিষা পরিদাহিতম্ ||৫০|| প্রদিহ্যাদগদৈঃ, সর্পিঃ পুরাণং পাযযেত চ | অর্কক্ষীরযুতং হ্যস্য দদ্যাচ্চাপি বিশোধনম্ ||৫১|| শ্বেতাং পুনর্নবাং চাস্য দদ্যাদ্ধত্তূরকাযুতাম্ | পললং তিলতৈলং চ রূপিকাযাঃ পযো গুডঃ ||৫২|| নিহন্তি বিষমালর্কং মেঘবৃন্দমিবানিলঃ |৫৩|

ইদানীং চিকিত্সাবসরঃ- দংশং বিস্রাব্যেত্যাদি| বিস্রাব্য নিষ্পীডনেন স্রাবযিত্বা বীজভূতস্য বিষস্য নাশনার্থং, সর্পিষা দাহস্তু তচ্ছেষনাশনার্থম্| অগদৈঃ মহাগদাদিভিঃ, প্রদিহ্যাত্ লিম্পেত্| বিস্রাবিতশোণিতস্য বাতশমনার্থং বাহ্যমৌষধমুদ্দিশ্যাভ্যন্তরমুদ্দিশন্নাহ- সর্পিরিত্যাদি| বিশোধনং বিশোধনদ্রব্যং, তত্র কফাধিক্যে বমনদ্রব্যযুতং পিত্তাধিক্যে বিরেচনদ্রব্যযুতমর্কক্ষীরং দদ্যাত্| জেজ্জটস্তু `অর্কক্ষীরং ঘৃতং বাঽস্য’ ইতি পঠতি| অন্যে `দদ্যাচ্ছীর্ষবিরেচনং’ ইতি পঠন্তি| শ্বেতামিত্যাদি|- শ্বেতামিতি পুনর্নবাবিশেষণম্; অন্যে শ্বেতাং কটভীমাহুঃ| ধত্তূরকাযুতাং ধত্তূরমূলান্বিতাম্| গযী তু `ধত্তূরার্ধসমাযুতাম্’ ইতি পঠিত্বা, ধত্তূরমূলস্যার্ধেন যুতামিতি ব্যাখ্যানযতি| অন্যে তু ধত্তূরফলসংযুতামিত্যাহুঃ||৫০-৫২||-

Adhikarana 31 (53-58) · Śloka 59

মূলস্য শরপুঙ্খাযাঃ কর্ষং ধত্তূরকার্ধিকম্ ||৫৩|| তণ্ডুলোদকমাদায পেষযেত্তণ্ডুলৈঃ সহ | উন্মত্তকস্য পত্রৈস্তু সংবেষ্ট্যাপূপকং পচেত্ ||৫৪|| খাদেদৌষধকালে তমলর্কবিষদূষিতঃ | করোতি শ্ববিকারাংস্তু তস্মিঞ্জীর্যতি চৌষধে ||৫৫|| বিকারাঃ শিশিরে যাপ্যা গৃহে বারিবিবর্জিতে | ততঃ শান্তবিকারস্তু স্নাত্বা চৈবাপরেঽহনি ||৫৬|| শালিষষ্টিকযোর্ভক্তং ক্ষীরেণোষ্ণেন ভোজযেত্ | দিনত্রযে পঞ্চমে বা বিধিরেষোঽর্ধমাত্রযা ||৫৭|| কর্তব্যো ভিষজাঽবশ্যমলর্কবিষনাশনঃ | কুপ্যেত্ স্বযং বিষং যস্য ন স জীবতি মানবঃ ||৫৮|| তস্মাত্ প্রকোপযেদাশু স্বযং যাবত্ প্রকুপ্যতি |৫৯|

মূলমিত্যাদি| ধত্তূরকার্ধিকমিতি ধত্তূরকজটাযাঃ কর্ষার্ধং দেযম্| উন্মত্তকস্য পত্রৈস্ত্বিত্যাদি| ধত্তূরকস্য সপ্ত পর্ণানি গ্রাহ্যাণি, তন্ত্রান্তরদর্শনাত্| তস্য ভক্ষিতস্য জরণকালে যোগপ্রভবাদাতুরঃ কুক্কুরচেষ্টা এব করোতি| ঔষধপরিণতিকালে যাংশ্চ বিকারানাতুরঃ করোতি তেষু প্রতীকারমাহ- বিকারা ইত্যাদি| বিকারা উন্মত্তশ্বাদিদষ্টোত্পন্নাঃ| শিশিরে শীতলে বারিবিবর্জিতে গৃহে যাপ্যাঃ শমনীযাঃ | তত ইত্যাদি| ক্ষীরেণোষ্ণেন ভোজযেদিতি অন্নং গব্যেনাজ্যে(জে)ন বা ভোজযেদিতি গযদাসাচার্যঃ| এষ বিধিঃ শ্বেতাং পুনর্নবামিত্যাদিকঃ| অর্ধমাত্রযা প্রাগুক্তমাত্রাতঃ| কস্মাদেষ বিধিঃ কার্যো দিনত্রযে পঞ্চমে বেত্যাহ- কুপ্যেদিত্যাদি||৫৩-৫৮||-

Adhikarana 32 (59-61) · Śloka 62

বীজরত্নৌষধীগর্ভৈঃ কুম্ভৈঃ শীতাম্বুপূরিতৈঃ ||৫৯|| স্নাপযেত্তং নদীতীরে সমন্ত্রৈর্বা চতুষ্পথে | বলিং নিবেদ্য তত্রাপি পিণ্যাকং পললং দধি ||৬০|| মাল্যানি চ বিচিত্রাণি মাংসং পক্বামকং তথা | অলকাধিপতে যক্ষ সারমেযগণাধিপ ! ||৬১|| অলর্কজুষ্টমেতন্মে নির্বিষং কুরু মাচিরাত্ |৬২|

ইদানীমলর্কবিষে ভূতানুবন্ধো ভবতীতি তচ্চিকিত্সার্থং সবিধিবৈদিকং মন্ত্রমুদ্দিশন্নাহ- বীজরত্নৌষধীত্যাদি| তমলর্কজুষ্টম্ অলর্কবিষজুষ্টম্| পিণ্যাকঃ তিলখলী, পললঃ সস্নেহস্তিলকল্কঃ| অলকাযা নগর্যা অধিপতিঃ ধনদঃ, যক্ষো দেবযোনিঃ, সারমেযগণাধিপঃ কুক্কুরসমূহপতিঃ, তস্য সম্বোধনে| অলকাধিপতির্যক্ষ এব সারমেযগণাধিপতিঃ| অলর্কং উন্মত্তকুক্কুরঃ||৫৯-৬১||-

Adhikarana 33 (62) · Śloka 63

দদ্যাত্ সংশোধনং তীক্ষ্ণমেবং স্নাতস্য দেহিনঃ ||৬২|| অশুদ্ধস্য সুরূঢেঽপি ব্রণে কুপ্যতি তদ্বিষম্ |৬৩|

দদ্যাদিত্যাদি||৬২||-

Adhikarana 34 (63-64) · Śloka 64

শ্বাদযোঽভিহিতা ব্যালা যেঽত্র দংষ্ট্রাবিষা মযা ||৬৩|| অতঃ করোতি দষ্টস্তু তেষাং চেষ্টাং রুতং নরঃ | বহুশঃ প্রতিকুর্বাণো ন চিরান্ম্রিযতে চ সঃ ||৬৪||

ইদানীমুন্মত্তশ্বাদিবিষং প্রতিপাদযিতুমুন্মত্তব্যালানামুন্মত্ততাসূচকশ্বপ্রকারেণাভিহিতত্বমাহ- শ্বাদযোঽভিহিতা ব্যালা ইত্যাদি| যেঽত্র দংষ্ট্রাবিষা ব্যালাঃ তে শ্বাদযঃ শ্বপ্রকারা উন্মত্তশ্বসদৃশা মযা প্রতিপাদিতাঃ, তে তু বাতপিত্তপ্রকোপণদংশাসৃক্কৃষ্ণত্বেন পুরাণসর্পিঃপানেন চানুমিতাঃ||৬৩-৬৪||

Adhikarana 35 (65) · Śloka 65

নখদন্তক্ষতং ব্যালৈর্যত্কৃতং তদ্বিমর্দযেত্ | সিঞ্চেত্তৈলেন কোষ্ণেন তে হি বাতপ্রকোপকাঃ ||৬৫||

উন্মত্তশ্বাদিচিকিত্সিতং সহেতুকং দর্শযন্নাহ- নখদন্তক্ষতমিত্যাদি||৬৫||

Adhikarana puShpikA · Śloka 7

ইতি সুশ্রুতসংহিতাযাং কল্পস্থানে মূষিককল্পো নাম সপ্তমোঽধ্যাযঃ ||৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতটীকাযাং কল্পস্থানে সপ্তমোঽধ্যাযঃ||৭||