5. sarpadaṣṭaviṣacikitsitakalpaḥ

Adhikarana 1 (1-2) · Śloka 2

অথাতঃ সর্পদষ্টবিষচিকিত্সিতং কল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3-4) · Śloka 4

সর্বৈরেবাদিতঃ সর্পৈঃ শাখাদষ্টস্য দেহিনঃ | দংশস্যোপরি বধ্নীযাদরিষ্টাশ্চতুরঙ্গুলে ||৩|| প্লোতচর্মান্তবল্কানাং মৃদুনাঽন্যতমেন বৈ | ন গচ্ছতি বিষং দেহমরিষ্টাভির্নিবারিতম্ ||৪||

সর্পদষ্টচিকিত্সিতং দ্বিবিধং সামান্যং বিশিষ্টং চ; তত্র সামান্যমেব প্রথমং নির্দিশন্নাহ- সর্বৈরিত্যাদি| শাখা হস্তপাদকম্| অরিষ্টা বস্ত্রাদিভির্মন্ত্রপুরস্কৃতৈর্বন্ধঃ| প্লোতেত্যাদি| প্লোতং বস্ত্রং, চর্মান্তং চর্মৈকদেশঃ, বল্কং বৃক্ষাদিত্বক্, মৃদুনা কোমলেন, অন্যতমেন একতমেন, প্লোতেন চর্মান্তেন বল্কলেন বেত্যর্থঃ||৩-৪||

Adhikarana 3 (5) · Śloka 5

দহেদ্দংশমথোত্কৃত্য যত্র বন্ধো ন জাযতে | আচূষণচ্ছেদদাহাঃ সর্বত্রৈব তু পূজিতাঃ ||৫||

অরিষ্টামভিধায দাহমুদ্দিশন্নাহ- দহেদিত্যাদি| উত্কৃত্য ছিত্ত্বা| দহেদিতি অত্র `মণ্ডলিদংশং বর্জযিত্বা’ ইতি শেষঃ| ন জাযতে ন সম্ভবতি| সর্বত্রৈব সর্বস্মিন্ দেহে| পূজিতাঃ শ্লাঘিতাঃ| দাহস্য পুনরুপাদানমুত্কর্তনমন্তরেণাপি দাহবিধানার্থম্||৫||

Adhikarana 4 (6) · Śloka 6

প্রতিপূর্য মুখং বস্ত্রৈর্হিতমাচূষণং ভবেত্ | স দষ্টব্যোঽথবা সর্পো লোষ্টো বাঽপি হি তত্ক্ষণম্ ||৬||

প্রতিপূর্যেত্যাদি| বস্ত্রৈরিত্যুপলক্ষণং, তেন কৃষ্ণবল্মীকমৃত্পাংশুনাঽপি প্রতিপূর্যাচূষণং হিতং, বিষহরত্বাদ্বল্মীকস্য| স দষ্টব্য ইত্যাদি| দষ্টেন পুরুষেণ হস্তাভ্যামুপসঙ্গৃহ্য পুচ্ছে বক্ত্রে চ সর্পঃ সম্যগ্ দষ্টব্যঃ, তদভাবে লোষ্টো বা দষ্টব্যঃ| তদ্ভক্ষণং তু তত্রৈব সঙ্ক্রমণহেতুরিত্যর্থঃ||৬||

Adhikarana 5 (7) · Śloka 7

অথ মণ্ডলিনা দষ্টং ন কথঞ্চন দাহযেত্ | স পিত্তবাহুল্যবিষাদ্দংশো দাহাদ্বিসর্পতে ||৭||

কেনচিদ্দষ্টে দাহনিষেধমাহ- অথ মণ্ডলিনা দষ্টমিত্যাদি||৭||

Adhikarana 6 (8) · Śloka 8

অরিষ্টামপি মন্ত্রৈশ্চ বধ্নীযান্মন্ত্রকোবিদঃ | সা তু রজ্জ্বাদিভির্বদ্ধা বিষপ্রতিকরী মতা ||৮||

ন কেবলং প্লোতাদিভিঃ পরমরিষ্টেত্যাহ- অরিষ্টামিত্যাদি| মন্ত্রকোবিদো মন্ত্রজ্ঞঃ পুরুষঃ| কেবলৈরপি মন্ত্রৈররিষ্টাং বধ্নীযাত্| ন পরং মন্ত্রৈরেবারিষ্টেত্যাহ- সা ত্বিত্যাদি| সা পুনররিষ্টা মন্ত্ররহিতৈরপি রজ্জ্বাদিভির্বদ্ধা বিষপ্রতিকরী বিষপ্রতীকারহেতুঃ | এতেন মন্ত্রতন্ত্রাভ্যাং তু বিষপ্রতীকারঃ||৮||

Adhikarana 7 (9-10) · Śloka 10

দেবব্রহ্মর্ষিভিঃ প্রোক্তা মন্ত্রাঃ সত্যতপোমযাঃ | ভবন্তি নান্যথা ক্ষিপ্রং বিষং হন্যুঃ সুদুস্তরম্ ||৯|| বিষং তেজোমযৈর্মন্ত্রৈঃ সত্যব্রহ্মতপোমযৈঃ | যথা নিবার্যতে ক্ষিপ্রং প্রযুক্তৈর্ন তথৌষধৈঃ ||১০||

মন্ত্রস্য শক্তিং দর্শযন্নাহ- দেবব্রহ্মর্ষিভিরিত্যাদি| দেবর্ষিবিহিতত্বেন সত্যমযাঃ, ব্রহ্মর্ষিবিহিতত্বেন তপোমযাঃ| প্রোক্তাঃ কথিতা ন তু কৃতাঃ, মন্ত্রাণাং নিত্যত্বাত্| অন্যে তু `সত্যব্রহ্মতপোমযা’ ইতি পঠিত্বা ব্যাখ্যানযন্তি- দেবা ইন্দ্রাদযঃ, ব্রহ্মা স্বনামপ্রসিদ্ধঃ, ঋষযঃ দেবর্ষি-ব্রহ্মর্ষি-রাজর্ষযঃ| তত্র দেবকৃতত্বেন সত্যপ্রত্যযাঃ, ব্রহ্মকৃতত্বেন ব্রহ্মমযাঃ, ত্রিবিধর্ষিকৃতত্বেন তপোমযাঃ; মন্ত্রাঃ কুরুকুল্লাভেরুণ্ডাদযঃ পরতন্ত্রাভিহিতা ইহ নোপদিষ্টাঃ||৯-১০||

Adhikarana 8 (11) · Śloka 12

মন্ত্রাণাং গ্রহণং কার্যং স্ত্রীমাংসমধুবর্জিনা | মিতাহারেণ শুচিনা কুশাস্তরণশাযিনা ||১১|| গন্ধমাল্যোপহারৈশ্চ বলিভিশ্চাপি দেবতাঃ | পূজযেন্মন্ত্রসিদ্ধ্যর্থং জপহোমৈশ্চ যত্নতঃ ||১২||

মন্ত্রগ্রহণবিধানমাহ- মন্ত্রাণামিত্যাদি| অত্র মধু মদ্যং ক্ষৌদ্রং চোভযমপি বর্জনীযম্| যতাহারেণ সংযতাহারেণ হবিষ্যৈকাহারেণেত্যর্থঃ| শুচিনা বাহ্যাভ্যন্তরপবিত্রেণ| মাল্যং মালা, উপহারো ধূপদীপাদিকং পূজোপকরণং, বলিঃ সপশুনৈবৈদ্যম্| হোমশ্চেতি চকারেণ ধ্যানেনাপীত্যনুক্তং সমুচ্চীযতে||১১||১২||

Adhikarana 9 (13) · Śloka 13

মন্ত্রাস্ত্ববিধিনা প্রোক্তা হীনা বা স্বরবর্ণতঃ | যস্মান্ন সিদ্ধিমাযান্তি তস্মাদ্যোজ্যোঽগদক্রমঃ ||১৩||

বিধিহীনগৃহীতস্য হীনস্বরাদের্বা মন্ত্রস্যাসিদ্ধাবগদক্রমো যোজ্য ইত্যাহ- মন্ত্রাস্ত্বিত্যাদি| অবিধিনা স্ত্রীমাংসমধুবর্জনাদিবিধিং বিনা; প্রোক্তা `গুরুণা’ ইতি শেষঃ||১৩||

Adhikarana 10 (14-16) · Śloka 16

সমন্ততঃ সিরা দংশাদ্বিধ্যেত্তু কুশলো ভিষক্ | শাখাগ্রে বা ললাটে বা ব্যধ্যাস্তা বিসৃতে বিষে ||১৪|| রক্তে নির্হ্রিযমাণে তু কৃত্স্নং নির্হ্রিযতে বিষম্ | তস্মাদ্বিস্রাবযেদ্রক্তং সা হ্যস্য পরমা ক্রিযা ||১৫|| সমন্তাদগদৈর্দংশং প্রচ্ছযিত্বা প্রলেপযেত্ | চন্দনোশীরযুক্তেন বারিণা পরিষেচযেত্ ||১৬||

যতো রক্তমেব প্রাপ্য বিষং বিকারকার্যতস্তদপকর্ষণাযাহ- সমন্তত ইত্যাদি| সমন্ততঃ সর্বত্র| বাশব্দোঽত্র সমুচ্চযার্থে| বিসৃতে প্রসৃতে| প্রলেপযেদ্ রক্তসেচনাবশিষ্টবিপ্রশমায মহাগদাদিভিঃ| চন্দনেত্যাদি| চন্দনোশীরক্বাথেনেত্যর্থঃ, অন্যে তু চন্দনোশীরকল্কমিশ্রিতজলেনেত্যাহুঃ||১৪-১৬||

Adhikarana 11 (17) · Śloka 18

পাযযেতাগদাংস্তাংস্তান্ ক্ষীরক্ষৌদ্রঘৃতাদিভিঃ | তদলাভে হিতা বা স্যাত্ কৃষ্ণা বল্মীকমৃত্তিকা ||১৭|| কোবিদারশিরীষার্ককটভীর্বাঽপি ভক্ষযেত্ |১৮|

পাযযেতেত্যাদি| রক্তাবসেচনপূর্বং হৃদযাবরণার্থং তাংস্তান্ মহাগদাদীনক্ষমাত্রাপরিমিতান্ ক্ষীরাদিভির্যথাদোষং পাতুং প্রযোজযেত্| আদিশব্দাদ্দধিতক্রযোর্গ্রহণম্| কোবিদারঃ কাঞ্চনারঃ| কটভী শ্বেতস্যন্দঃ||১৭||-

Adhikarana 12 (18-19) · Śloka 19

ন পিবেত্তৈলকৌলত্থমদ্যসৌবীরকাণি চ ||১৮|| দ্রবমন্যত্তু যত্কিঞ্চিত্ পীত্বা পীত্বা তদুদ্বমেত্ | প্রাযো হি বমনেনৈব সুখং নির্হ্রিযতে বিষম্ ||১৯||

বিষে কানপি দ্রবান্ নিরস্যন্নাহ- ন পিবেত্তৈলকৌলত্থেত্যাদি| কুলত্থানামযং কৌলত্থো যূষঃ, সৌবীরকং কাঞ্জিকম্||১৮-১৯||

Adhikarana 13 (20-23) · Śloka 24

ফণিনাং বিষবেগে তু প্রথমে শোণিতং হরেত্ | দ্বিতীযে মধুসর্পির্ভ্যাং পাযযেতাগদং ভিষক্ ||২০|| নস্যকর্মাঞ্জনে যুঞ্জ্যাত্তৃতীযে বিষনাশনে | বান্তং চতুর্থে পূর্বোক্তাং যবাগূমথ দাপযেত্ ||২১|| শীতোপচারং কৃত্বাঽঽদৌ ভিষক্ পঞ্চমষষ্ঠযোঃ | পাযযেচ্ছোধনং তীক্ষ্ণং যবাগূং চাপি কীর্তিতাম্ ||২২|| সপ্তমে ত্ববপীডেন শিরস্তীক্ষ্ণেন শোধযেত্ | তীক্ষ্ণমেবাঞ্জনং দদ্যাত্, তীক্ষ্ণশস্ত্রেণ মূর্ধ্নি চ ||২৩|| কৃত্বা কাকপদং চর্ম সাসৃগ্বা পিশিতং ক্ষিপেত্ |২৪|

অত ঊর্ধ্বং দর্বীকরাদিবেগবিশেষেণ বৈশেষিকং চিকিত্সিতমাহ- ফণিনামিত্যাদি| শোণিতং হরেদিতি সিরযা প্রচ্ছন্নেন শৃঙ্গেণ বা| অগদং দর্বীকরবিষোদিতম্| বান্তং চতুর্থ ইত্যাদি| বমন মিহ সার্বকার্মিকাদিভিরগদৈঃ| পূর্বোক্তাং যবাগূমিতি স্থাবরবিষবিষযে কৃতবমনাদিকর্মণাং কোশাতক্যাদিদ্রব্যৈঃ কৃতামন্নসংসর্জনার্থম্| এবং পঞ্চমষষ্ঠযোঃ শোধনে কৃতেঽন্নসংসর্জনার্থং কীর্তিতাং যবাগূম্| সপ্তমে তু প্রত্যাখ্যাযাবপীডনাদিকম্||২০-২৩||-

Adhikarana 14 (24-27) · Śloka 27

পূর্বে মণ্ডলিনাং বেগে দর্বীকরবদাচরেত্ ||২৪|| অগদং মধুসর্পির্ভ্যাং দ্বিতীযে পাযযেত চ | বামযিত্বা যবাগূং চ পূর্বোক্তামথ দাপযেত্ ||২৫|| তৃতীযে শোধিতং তীক্ষ্ণৈর্যবাগূং পাযযেদ্ধিতাম্ | চতুর্থে পঞ্চমে চাপি দর্বীকরবদাচরেত্ ||২৬|| কাকোল্যাদির্হিতঃ ষষ্ঠে পেযশ্চ মধুরোঽগদঃ | হিতোঽবপীডে ত্বগদঃ সপ্তমে বিষনাশনঃ ||২৭||

পূর্বে মণ্ডলিনামিত্যাদি| পূর্বে মণ্ডলিনাং বেগে দর্বীকরবদিত্যনেনাতিদিষ্টং শোণিতমোক্ষণং জলৌকাভিঃ| অগদং মণ্ডলিবিষোদিতমেব| দ্বিতীযে বামযিত্বেতি বমনদ্রব্যক্বাথেন| শোধিতং বিরিক্তং, তীক্ষ্ণৈঃ বিরেচনদ্রব্যৈঃ| পেযশ্চেত্যত্র চকারেণ শোধনং তীক্ষ্ণমপি সমুচ্চীযতে| মধুরোঽগদ ইতি মহাগদাদিষু যোঽতীক্ষ্ণঃ স পেযঃ| সপ্তমে বেগে প্রত্যাখ্যায বিষপ্রত্যনীকাগদাবপীডেনোপচরেত্||২৪-২৭||

Adhikarana 15 (28-29) · Śloka 30

পূর্বে রাজিমতাং বেগেঽলাবুভিঃ শোণিতং হরেত্ | অগদং মধুসর্পির্ভ্যাং সংযুক্তং পাযযেত চ ||২৮|| বান্তং দ্বিতীযে ত্বগদং পাযযেদ্বিষনাশনম্ | তৃতীযাদিষু ত্রিষ্বেবং বিধির্দার্বীকরো হিতঃ ||২৯|| ষষ্ঠেঽঞ্জনং তীক্ষ্ণতমমবপীডশ্চ সপ্তমে |৩০|

পূর্বে রাজিমতামিত্যাদি| অবপীডোঽত্র সার্বকার্মিকাগদেন| অবপীডশ্চেতি চকারেণ নষ্টসঞ্জ্ঞবিধানং বক্ষ্যমাণং সূচ্যতে|||২৮-২৯||-

Adhikarana 16 (30) · Śloka 31

গর্ভিণীবালবৃদ্ধানাং সিরাব্যধনবর্জিতম্ ||৩০|| বিষার্তানাং যথোদ্দিষ্টং বিধানং শস্যতে মৃদু |৩১|

চিকিত্সিতস্য ক্বচিদেব কঞ্চিদ্বিশেষমুদ্দিশন্নাহ- গর্ভিণীত্যাদি||৩০||-

Adhikarana 17 (31) · Śloka 33

রক্তাবসেকাঞ্জনানি নরতুল্যান্যজাবিকে ||৩১|| ত্রিগুণং মহিষে সোষ্ট্রে গবাশ্বে দ্বিগুণং তু তত্ | চতুর্গুণং তু নাগানাং,... |৩৩|

সপ্তবেগপ্রসঙ্গেন পশুবেগবিশেষস্যোক্তত্বাচ্চিকিত্সিতে মাত্রাযাং বিশেষমুদ্দিশন্নাহ- রক্তেত্যাদি| রক্তাবসেকস্য মহতী মাত্রা প্রস্থপ্রমাণা; প্রস্থশ্চাত্র সার্ধত্রযোদশপলপ্রমাণঃ||৩১||-

Adhikarana 18 (32-33) · Śloka 33

...কেবলং সর্বপক্ষিণাম্ ||৩২|| পরিষেকান্ প্রদেহাংশ্চ সুশীতানবচারযেত্ | মাষকং ত্বঞ্জনস্যেষ্টং দ্বিগুণং নস্যতো হিতম্ | পানে চতুর্গুণং পথ্যং বমনেঽষ্টগুণং পুনঃ ||৩৩||

পক্ষিণাং চিকিত্সিতমুদ্দিশন্নাহ- কেবলমিত্যাদি| পরিষেকপ্রদেহৌ কেবলং নরবিষহরদ্রব্যেণ কার্যৌ, নতু রক্তাবসেকাঞ্জনানীত্যর্থঃ| অঞ্জনাদীনাং প্রমাণমাহ- মাষকমিত্যাদি| ইদমঞ্জনাদিপ্রমাণং গযদাসজেজ্জটাভ্যামঙ্গীকৃতম্| বযং তু বৃদ্ধবাগ্ভটোক্তসুশ্রুতোক্তবাক্যদর্শনাদঞ্জনাদিষু বিষবিষযে মহতীং মাত্রাং মন্যামহে| তথা চ তযোর্বাক্যম্,- “গুল্মোদাবর্তবীসর্পসর্পদংশাভিপীডিতৈঃ| উন্মত্তৈঃ কৃচ্ছ্রমূত্রৈশ্চ মহতী শীঘ্রমেব সা”- ইতি; সুশ্রুতে চ,- “অহোরাত্রাদসন্দুষ্টা যা মাত্রা পরিজীর্যতি| সা চ কুষ্ঠবিষোন্মাদগ্রহাপস্মারনাশিনী”- ইতি; তন্ত্রান্তরেঽপি- “বিষজুষ্টহতা যে চ কাসশ্বাসহতাশ্চ যে| তরুণা বলবন্তশ্চ বামযেদুত্তমেন তান্”- ইতি| এতদুদ্দেশেন কল্কাদীনাং মহত্যা মাত্রযাঽত্র যুক্তিরবসীযতে| মহত্যা মাত্রযা চ কল্কমোদকচূর্ণানাং পলং মাত্রাপ্রমাণম্| তথা চ,- কল্কমোদকচূর্ণানাং কর্ষ(পল)মদ্যাচ্চ লেহতঃ| কর্ষদ্বযং পলং বাঽপি বযোরোগাগ্ন্যপেক্ষযা”- ইতি| ক্বাথস্য পলচতুষ্টযং প্রমাণং; তথা চ- “ক্বাথদ্রব্যপলে বারি দ্বিরষ্টগুণমিষ্যতে| চতুর্ভাগাবশেষং তু পেযং পলচতুষ্টযম্”- ইতি| বমনবিষযে ক্বাথস্য নব প্রস্থাঃ প্রমাণং; তথা চ, “নব প্রস্থা তু জ্যেষ্ঠা স্যান্মধ্যমা ষট্ প্রকীর্তিতা| নিষ্ক্বাথস্য ত্রযঃ প্রস্থা মাগধাস্তু কনীযসী”- ইতি| বমনবিষযে কল্কস্য পলত্রযং প্রমাণম্| তথা চ,- “ত্রিপলং জ্যেষ্ঠমাখ্যাতং কনীযস্তু পলং ভবেত্| মধ্যমং দ্বে পলে বিদ্যাদিতি মে নিশ্চিতা মতিঃ”- ইতি| নস্যাঞ্জনযোশ্চ মাত্রা নস্যাঞ্জনবিধাবেব যা মহতী প্রতিপাদিতেতি||৩২-৩৩||

Adhikarana 19 (34) · Śloka 34

দেশপ্রকৃতিসাত্ম্যর্তুবিষবেগবলাবলম্ | প্রধার্য নিপুণং বুদ্ধ্যা ততঃ কর্ম সমাচরেত্ ||৩৪||

দেশেত্যাদি| দেশো ভূমিঃ আতুরশ্চ; তত্র ভূদেশঃ অশ্বত্থদেবতাযতনশ্মশানাদিকঃ, আতুরশরীরে চ মর্মদেশঃ; প্রকৃতিঃ কাযিকী মানসী চ; তত্র কাযিকী বাতাদিকৃতা, মানসী চ সত্ত্বদিজা| প্রধার্য আলোচ্য, বুদ্ধ্যা নিপুণং যথা ভবত্যেবং কর্ম সমাচরেত্||৩৪||

Adhikarana 20 (35) · Śloka 35

বেগানুপূর্ব্যা কর্মোক্তমিদং বিষবিনাশনম্ | কর্মাবস্থাবিশেষেণ বিষযোরুভযোঃ শৃণু ||৩৫||

বেগানুপূর্ব্যেত্যাদি| বেগানুপূর্ব্যা বেগানামনুক্রমেণেত্যর্থঃ| উভযোঃ স্থাবরজঙ্গমযোঃ||৩৫||

Adhikarana 21 (36) · Śloka 36

বিবর্ণে কঠিনে শূনে সরুজেঽঙ্গে বিষান্বিতে | তূর্ণং বিস্রবণং কার্যমুক্তেন বিধিনা ততঃ ||৩৬||

বিবর্ণে ইত্যাদি| তূর্ণং ত্বরিতম্| বিস্রাবণং রক্তমোক্ষণম্||৩৬||

Adhikarana 22 (37) · Śloka 37

ক্ষুধার্তমনিলপ্রাযং তদ্বিষার্তং সমাহিতঃ | পাযযেত রসং সর্পিঃ শুক্তং ক্ষৌদ্রং তথা দধি ||৩৭||

ক্ষুধার্তমিত্যাদি| তদ্বিষার্তমিতি বাতাধিকবিষবেদনার্তম্| অত্র মাংসরসাদিপানং বিষবেগপ্রাপ্তৌ সত্যাং সুখেন বমনার্থম্||৩৭||

Adhikarana 23 (38) · Śloka 38

তৃড্দাহঘর্মসম্মোহে পৈত্তং পৈত্তবিষাতুরম্ | শীতৈঃ সংবাহনস্নানপ্রদেহৈঃ সমুপাচরেত্ ||৩৮||

তৃড্দাহেত্যাদি| ঘর্ম ইত্যুষ্ণকালে, সম্মোহে মূর্চ্ছাযাম্| পৈত্তং পিত্তপ্রকৃতিম্| পৈত্তং পিত্তজনকং বিষম্| সংবাহনং সুখকরঃ স্পর্শঃ| প্রদেহঃ প্রলেপঃ||৩৮||

Adhikarana 24 (39) · Śloka 39

শীতে শীতপ্রসেকার্তং শ্লৈষ্মিকং কফকৃদ্বিষম্ | বামযেদ্বমনৈস্তীক্ষ্ণৈস্তথা মূর্চ্ছামদান্বিতম্ ||৩৯||

কফবিষাতুরস্য চিকিত্সামাহ- শীতে ইত্যাদি| শীতে শীতকালে| শ্লৈষ্মিকং পুরুষম্||৩৯||

Adhikarana 25 (40) · Śloka 40

কোষ্ঠদাহরুজাধ্মানমূত্রসঙ্গরুগন্বিতম্ | বিরেচযেচ্ছকৃদ্বাযুসঙ্গপিত্তাতুরং নরম্ ||৪০||

আমাশযগতস্য কফস্য বমনমুদ্দিশ্য পচ্যমানপক্বাশযগতযোঃ পিত্তবাতযোর্বিরেচনশব্দেন বিরেকবস্তী নির্দিশন্নাহ- কোষ্ঠেত্যাদি| কোষ্ঠদাহাদৌ তু বিরেচনশব্দো বিরেচন এব বর্ততে||৪০||

Adhikarana 26 (41) · Śloka 41

শূনাক্ষিকূটং নিদ্রার্তং বিবর্ণাবিললোচনম্ | বিবর্ণং চাপি পশ্যন্তমঞ্জনৈঃ সমুপাচরেত্ ||৪১||

শূনাক্ষিকূটমিত্যাদি| অক্ষিকূটো ভ্রুবোরধোভাগঃ| আবিলং দূষিকাস্রাভ্যাং মলিনং, বিবর্ণং বিবিধবর্ণম্||৪১||

Adhikarana 27 (42-49) · Śloka 50

শিরোরুগ্গৌরবালস্যহনুস্তম্ভগলগ্রহে | শিরো বিরেচযেত্ ক্ষিপ্রং মন্যাস্তম্ভে চ দারুণে ||৪২|| নষ্টসঞ্জ্ঞং বিবৃত্তাক্ষং ভগ্নগ্রীবং বিরেচনৈঃ | চূর্ণৈঃ প্রধমনৈস্তীক্ষ্ণৈর্বিষার্তং সমুপাচরেত্ ||৪৩|| তাডযেচ্চ সিরাঃ ক্ষিপ্রং তস্য শাখাললাটজাঃ | তাস্বপ্রসিচ্যমানাসু মূর্ধ্নি শস্ত্রেণ শস্ত্রবিত্ ||৪৪|| কুর্যাত্ কাকপদাকারং ব্রণমেবং স্রবন্তি তাঃ | সরক্তং চর্ম মাংসং বা নিক্ষিপেচ্চাস্য মূর্ধনি ||৪৫|| চর্মবৃক্ষকষাযং বা কল্কং বা কুশলো ভিষক্ | বাদযেচ্চাগদৈর্লিপ্ত্বা দুন্দুভীংস্তস্য পার্শ্বযোঃ ||৪৬|| লব্ধসঞ্জ্ঞং পুনশ্চৈনমূর্ধ্বং চাধশ্চ শোধযেত্ | নিঃশেষং নির্হরেচ্চৈবং বিষং পরমদুর্জযম্ ||৪৭|| অল্পমপ্যবশিষ্টং হি ভূযো বেগায কল্পতে | কুর্যাদ্বা সাদবৈবর্ণ্যজ্বরকাসশিরোরুজঃ ||৪৮|| শোফশোষপ্রতিশ্যাযতিমিরারুচিপীনসান্ | তেষু চাপি যথাদোষং প্রতিকর্ম প্রযোজযেত্ ||৪৯|| বিষার্তোপদ্রবাংশ্চাপি যথাস্বং সমুপাচরেত্ |৫০|

নষ্টসঞ্জ্ঞমিত্যাদি| বিবৃতাক্ষং ব্যাবর্তিতনেত্রম্| সরক্তমিতি| সরক্তং হি মাংসাদিকং শিরসি নিক্ষিপ্তং বিষসঙ্ক্রামণং ভবতি| চর্মবৃক্ষঃ পূর্বদেশে নৌবৃক্ষঃ| কষাযোঽত্র নির্যাসঃ| অসাবপি প্রযোগো বিষসঙ্ক্রমণহেতুঃ| দুন্দুভীন্ নিঃস্বানান্| এবং চ পরমদুর্জযং বিষং নির্হরেত্; কুত ইত্যাহ- অল্পমিত্যাদি| ভূযঃ পুনরপি বেগায কল্পতে বেগার্থং ভবতি| সাদঃ অঙ্গগ্লানিঃ| প্রতিশ্যাযস্থানে জেজ্জটাচার্যঃ স্তৈমিত্যং পঠতি, অত্র স্তৈমিত্যং নিশ্চলতা||৪২-৪৯||-

Adhikarana 28 (50) · Śloka 51

অথারিষ্টাং বিমুচ্যাশু প্রচ্ছযিত্বাঽঙ্কিতং তযা ||৫০|| দহ্যাত্তত্র বিষং স্কন্নং ভূযো বেগায কল্পতে |৫১|

অরিষ্টাস্থাপনবন্ধনবিষদূষিতশোণিতস্য চিকিত্সাং দূষ্যবিষপ্রত্যনীকামুদ্দিশন্নাহ- অথারিষ্টামিত্যাদি| অথ অনন্তরম্| তযা অঙ্কিতং দেশং প্রচ্ছযিত্বা দিহ্যাত্ `অগদৈঃ’ ইতি শেষঃ; অন্যথা তত্র বিষং স্কন্নং স্ত্যানীভূতং ভূযো বেগায কল্পতে পুনর্বেগার্থং প্রাদুর্ভবতীত্যর্থঃ||৫০||-

Adhikarana 29 (51-54) · Śloka 54

এবমৌষধিভির্মন্ত্রৈঃ ক্রিযাযোগৈশ্চ যত্নতঃ ||৫১|| বিষে হৃতগুণে দেহাদ্যদা দোষঃ প্রকুপ্যতি | তদা পবনমুদ্বৃত্তং স্নেহাদ্যৈঃ সমুপাচরেত্ ||৫২|| তৈলমত্স্যকুলত্থাম্লবর্জ্যৈর্বিষহরাযুতৈঃ | পিত্তজ্বরহরৈঃ পিত্তং কষাযস্নেহবস্তিভিঃ ||৫৩|| কফমারগ্বধাদ্যেন সক্ষৌদ্রেণ গণেন তু | শ্লেষ্মঘ্নৈরগদৈশ্চৈব তিক্তৈ রূক্ষৈশ্চ ভোজনৈঃ ||৫৪||

এবমিত্যাদি| ঔষধিভিঃ মহাগদাদিনির্দিষ্টাভিঃ, মন্ত্রৈঃ কুরুকুল্লাদিনির্দিষ্টৈঃ, ক্রিযাযোগৈঃ দূষ্যভূতশোণিতহরবহিঃপরিমার্জনসেচনালেপনাদিভিঃ; তথৈবান্তঃপরিমার্জনৈর্বমনবিরেচনাস্থাপনশিরোবিরেচনাখ্যৈঃ| বিষে হৃতগুণে অপহৃতবিষাদজননতীক্ষ্ণাদিগুণে| দোষঃ অনিলাদিঃ| উদ্বৃত্তম্ উচ্চলিতং পরস্থানমিতি যাবত্| স্নেহাদ্যৈরিতি আদ্যশব্দান্মৃদুসংশোধনস্বাদুভোজনাঙ্গবিমর্দনাদিভিঃ| পিত্তজ্বরহরৈরিত্যাদি সমুপাচরেদিত্যনুবর্ততে| কফমারগ্বধাদ্যেনেত্যাদি||৫১-৫৪||

Adhikarana 30 (55) · Śloka 55

বৃক্ষপ্রপাতবিষমপতিতং মৃতমম্ভসি | উদ্বদ্ধং চ মৃতং সদ্যশ্চিকিত্সেন্নষ্টসঞ্জ্ঞবত্ ||৫৫||

বৃক্ষেত্যাদি| প্রপাতো নদীতটাদিঃ, বিষমো নিম্নোন্নতপ্রদেশঃ, বৃক্ষাদিপতিতং প্রাণিনং; মৃতমম্ভসি অম্ভসি মৃতং, উদ্বদ্ধমুল্লম্বিতং চ মৃতং, সদ্যো ঝটিতি, নষ্টসঞ্জ্ঞবচ্চিকিত্সেত্| তত্র মৃতশব্দো মৃত্যুসমীপে বর্তমানো গৃহ্যতে; ন পুনর্মৃত এব, তস্য নিষ্ফলচিকিত্সিতত্বাত্| কেচিদাচার্যা অমুং পাঠং ন মন্যন্তে, যে তু মন্যন্তে তন্মতানুসারেণ লিখিতোঽযমিত্যদোষঃ||৫৫||

Adhikarana 31 (56) · Śloka 56

গাঢং বদ্ধেঽরিষ্টযা প্রচ্ছিতে বা তীক্ষ্ণৈর্লেপৈস্তদ্বিধৈর্বাঽবশিষ্টৈঃ | শূনে গাত্রে ক্লিন্নমত্যর্থপূতি জ্ঞেযং মাংসং তদ্বিষাত্ পূতি কষ্টম্ ||৫৬||

গাঢমিত্যাদি| গাঢমরিষ্টযা বদ্ধে, অথবা প্রচ্ছিতে, তীক্ষ্ণৈর্লেপৈস্তদ্বিধৈঃ শরীরবর্তিভিঃ, অবশিষ্টৈঃ অনুদ্ধৃতৈঃ, জ্ঞেযং জ্ঞাতব্যং, তন্মাংসং , বিষাত্ পূতি পূতিসঞ্জ্ঞকং, কষ্টং কৃচ্ছ্রসাধ্যম্||৫৬||

Adhikarana 32 (57) · Śloka 58

সদ্যো বিদ্ধং নিস্রবেত্ কৃষ্ণরক্তং পাকং যাযাদ্দহ্যতে চাপ্যভীক্ষ্ণম্ | কৃষ্ণীভূতং ক্লিন্নমত্যর্থপূতি শীর্ণং মাংসং যাত্যজস্রং ক্ষতাচ্চ ||৫৭|| তৃষ্ণা মূর্চ্ছা ভ্রান্তিদাহৌ জ্বরশ্চ যস্য স্যুস্তং দিগ্ধবিদ্ধং ব্যবস্যেত্ |৫৮|

সদ্যো বিদ্ধমিত্যাদি| অভীক্ষ্ণং পুনঃ পুনঃ, ক্লিন্নম্ আর্দ্রীভূতং, অত্যর্থং পূতি অতিশযেন দুর্গন্ধং, শীর্ণং শটিতম্, অজস্রম্ অনবরতং, ভ্রান্তিঃ বস্তূনামন্যথা প্রতীতিঃ, স্যুঃ ভবেযুঃ, দিগ্ধবিদ্ধং বিষলিপ্তবাণতাডিতং, ব্যবস্যেত্ জানীযাত্||৫৭||-

Adhikarana 33 (58) · Śloka 59

পূর্বোদ্দিষ্টং লক্ষণং সর্বমেতজ্জুষ্টং যস্যালং বিষেণ ব্রণাঃ স্যুঃ ||৫৮|| লূতাদষ্টা দিগ্ধবিদ্ধা বিষৈর্বা জুষ্টা প্রাযস্তে ব্রণাঃ পূতিমাংসাঃ |৫৯|

পূর্বোদ্দিষ্টমিত্যাদি| যস্য প্রাণিনোঽলমত্যর্থং শত্রূণামবচারিতেন বিষেণ জুষ্টা ব্রণাঃ স্যুর্ভবেযুঃ, তস্য এতত্ সর্বং পূর্বোদ্দিষ্টং লক্ষণং ভবতি; কুত ইত্যাহ- লূতাদষ্টা ইত্যাদি| যে ব্রণা লূতাদষ্টদিগ্ধবিদ্ধাদযস্তে প্রাযঃ পূতিমাংসা ভবন্তীত্যর্থঃ||৫৮||-

Adhikarana 34 (59-60) · Śloka 60

তেষাং যুক্ত্যা পূতিমাংসান্যপোহ্য বার্যোকোভিঃ শোণিতং চাপহৃত্য ||৫৯|| হৃত্বা দোষান্ ক্ষিপ্রমূর্ধ্বং ত্বধশ্চ সম্যক্ সিঞ্চেত্ ক্ষীরিণাং ত্বক্কষাযৈঃ | অন্তর্বস্ত্রং দাপযেচ্চ প্রদেহান্ শীতৈর্দ্রব্যৈরাজ্যযুক্তৈর্বিষঘ্নৈঃ ||৬০||

এষাং পূর্বোক্তানাং চিকিত্সামাহ- তেষামিত্যাদি| বার্যোকোভিঃ জলৌকোভিরিত্যর্থঃ| ক্ষীরিণাং ন্যগ্রোধোদুম্বরাশ্বত্থপ্লক্ষগর্দভাণ্ডানাম্| শীতৈরিত্যাদি| শীতবীর্যস্পর্শৈর্বিষঘ্নৈঃ পিত্তবিসর্পোক্তৈরিত্যর্থঃ| আজ্যমিশ্রৈঃ শতধৌতঘৃতযুক্তৈঃ||৫৯-৬০||

Adhikarana 35 (61) · Śloka 61

ভিন্নে ত্বস্থ্না দুষ্টজাতেন কার্যঃ পূর্বো মার্গঃ পৈত্তিকে যো বিষে চ |৬১|

ভিন্নে ইত্যাদি| দুষ্টজাতেন দুষ্টজীবসম্ভূতেন অস্থিবিষাণামস্থ্নেত্যর্থঃ| অস্থ্না দুষ্টজাতেনেত্যুপলক্ষণং, তেন তত্সদৃশশকৃন্মূত্রশুক্রস্পর্শপর্দনগুদাস্থিশূকশবৈঃ সবিষকণ্টকৈর্বৃশ্চিককণ্টকৈশ্চ কৃতে ব্রণে| পূর্বো মার্গঃ অনন্তরোক্তঃ `তেষাং যুক্ত্যা পূতিমাংসান্যপোহ্য’ ইত্যাদিকঃ; ন পরং দুষ্টাস্থ্যাদিভির্ভিন্নে ব্রণে পূর্বো মার্গঃ অনন্তরোক্তোঽপি যো ব্রণস্তস্মিন্নপি পূর্বো মার্গঃ কার্যঃ|৬১|-

Adhikarana 36 (61-62) · Śloka 63

ত্রিবৃদ্বিশল্যে মধুকং হরিদ্রে রক্তা নরেন্দ্রো লবণশ্চ বর্গঃ ||৬১|| কটুত্রিকং চৈব সুচূর্ণিতানি শৃঙ্গে নিদধ্যান্মধুসংযুতানি | এষোঽগদো হন্তি বিষং প্রযুক্তঃ পানাঞ্জনাভ্যঞ্জননস্যযোগৈঃ ||৬২|| অবার্যবীর্যো বিষবেগহন্তা মহাগদো নাম মহাপ্রভাবঃ |৬৩|

ইদানীমগদকোশমাহ- ত্রিবৃদ্বিশল্যেত্যাদি| বিশল্যা কাষ্ঠপাটলা, রক্তা মঞ্জিষ্ঠা, নরেন্দ্রঃ কিরমালকঃ| অবার্যবীর্যঃ অপ্রতিহতবীর্যঃ||৬১-৬২||-

Adhikarana 37 (63-64) · Śloka 65

বিডঙ্গপাঠত্রিফলাজমোদাহিঙ্গূনি বক্রং ত্রিকটূনি চৈব ||৬৩|| সর্বশ্চ বর্গো লবণঃ সুসূক্ষ্মঃ সচিত্রকঃ ক্ষৌদ্রযুতো নিধেযঃ | শৃঙ্গে গবাং শৃঙ্গমযেন চৈব প্রচ্ছাদিতঃ পক্ষমুপেক্ষিতশ্চ ||৬৪|| এষোঽগদঃ স্থাবরজঙ্গমানাং জেতা বিষাণামজিতো হি নাম্না |৬৫|

বিডঙ্গপাঠেত্যাদি| বক্রং তগরম্||৬৩-৬৪||-

Adhikarana 38 (65-67) · Śloka 68

প্রপৌণ্ডরীকং সুরদারু মুস্তা কালানুসার্যা কটুরোহিণী চ ||৬৫|| স্থৌণেযকধ্যামকগুগ্গুলূনি পুন্নাগতালীশসুবর্চিকাশ্চ | কুটন্নটৈলাসিতসিন্ধুবারাঃ শৈলেযকুষ্ঠে তগরং প্রিযঙ্গুঃ ||৬৬|| রোধ্রং জলং কাঞ্চনগৈরিকং চ সমাগধং চন্দনসৈন্ধবং চ | সূক্ষ্মাণি চূর্ণানি সমানি কৃত্বা শৃঙ্গে নিদধ্যান্মধুসংযুতানি ||৬৭|| এষোঽগদস্তার্ক্ষ্য ইতি প্রদিষ্টো বিষং নিহন্যাদপি তক্ষকস্য |৬৮|

প্রপৌণ্ডরীকমিত্যাদি| কালানুসার্যা কালানুসারিবা| ধ্যামকং কত্তৃণং, কুটন্নটঃ শ্যোনাকঃ, সিতসিন্ধুবারঃ শ্বেতনির্গুণ্ডী||৬৫-৬৭||-

Adhikarana 39 (68-72) · Śloka 73

মাংসীহরেণুত্রিফলামুরঙ্গীরক্তালতাযষ্টিকপদ্মকানি ||৬৮|| বিডঙ্গতালীশসুগন্ধিকৈলাত্বক্কুষ্ঠপত্রাণি সচন্দনানি | ভার্গী পটোলং কিণিহী সপাঠা মৃগাদনী কর্কটিকা পুরশ্চ ||৬৯|| পালিন্দ্যশোকৌ ক্রমুকং সুরস্যাঃ প্রসূনমারুষ্করজং চ পুষ্পম্ | সূক্ষ্মানি চূর্ণানি সমানি শৃঙ্গে ন্যসেত্ সপিত্তানি সমাক্ষিকাণি ||৭০|| বরাহগোধাশিখিশল্লকীনাং মার্জারজং পার্ষতনাকুলে চ | যস্যাগদোঽযং সুকৃতো গৃহে স্যান্নাম্নর্ষভো নাম নরর্ষভস্য ||৭১|| ন তত্র সর্পাঃ কুত এব কীটাস্ত্যজন্তি বীর্যাণি বিষাণি চৈব | এতেন ভের্যঃ পটহাশ্চ দিগ্ধা নানদ্যমানা বিষমাশু হন্যুঃ ||৭২|| দিগ্ধাঃ পতাকাশ্চ নিরীক্ষ্য সদ্যো বিষাভিভূতা হ্যবিষা ভবন্তি |৭৩|

মাংসীত্যাদি| মুরঙ্গী শোভাঞ্জনকঃ, রক্তা লতা মঞ্জিষ্ঠা, সুগন্ধিকা সর্পগন্ধিকা, কিণিহী কটভী, মৃগাদনী কর্কটিকা, ইন্দ্রবারুণীফলমিত্যন্যে, পুরঃ গুগ্গুলুঃ, পালিন্দী ত্রিবৃত্, কালবল্লীত্যপরে, ক্রমুকং পূগফলং, রুবুকমিত্যন্যে পঠন্তি স চৈরণ্ডঃ, সুরস্যাঃ প্রসূনং তুলসীপুষ্পং, শিখী মযূরঃ, কুক্কুট ইত্যন্যে, পৃষতানামিদং পার্ষতং, পৃষতঃ চিত্তলঃ| যস্য নরর্ষভস্য নরাধিপস্য, গৃহেঽযমগদো নাম্না সঞ্জ্ঞযা, ঋষভো নাম ঋষভ ইতি প্রসিদ্ধঃ, সুকৃতঃ স্যাত্ শোভনো নিষ্পাদিতো ভবেত্||৬৮-৭২||-

Adhikarana 40 (73-74) · Śloka 75

লাক্ষা হরেণুর্নলদং প্রিযঙ্গুঃ শিগ্রুদ্বযং যষ্টিকপৃথ্বিকাশ্চ ||৭৩|| চূর্ণীকৃতোঽযং রজনীবিমিশ্রো সর্পির্মধুভ্যাং সহিতো নিধেযঃ | শৃঙ্গে গবাং পূর্ববদাপিধানস্ততঃ প্রযোজ্যোঽঞ্জননস্যপানৈঃ ||৭৪|| সঞ্জীবনো নাম গতাসুকল্পানেষোঽগদো জীবযতীহ মর্ত্যান্ |৭৫|

লাক্ষেত্যাদি| পৃথ্বিকা এলা, হিঙ্গুপত্রিকেত্যন্যে| পূর্ববদাপিধানঃ গোশৃঙ্গিকাপিধানঃ||৭৩-৭৪||-

Adhikarana 41 (75) · Śloka 76

শ্লেষ্মাতকীকট্ফলমাতুলুঙ্গ্যঃ শ্বেতা গিরিহ্বা কিণিহী সিতা চ ||৭৫|| সতণ্ডুলীযোঽগদ এষ মুখ্যো বিষেষু দর্বীকররাজিলানাম্ |৭৬|

শ্লেষ্মাতকীত্যাদি| শ্লেষ্মাতকী `বহুবারঃ’ ইতি লোকে, কট্ফলং কাশ্মরী, মাতুলুঙ্গো বীজপূরকঃ, শ্বেতা গিরিহ্বা শ্বেতস্যন্দা, কিণিহী নীলস্যন্দা, সিতা শর্করা| অযং দর্বীকররাজিলবিষদষ্টাগদঃ||৭৫||-

Adhikarana 42 (76-77) · Śloka 78

দ্রাক্ষা সুগন্ধা নগবৃত্তিকা চ শ্বেতা সমঙ্গা সমভাগযুক্তা ||৭৬|| দেযো দ্বিভাগঃ সুরসাচ্ছদস্য কপিত্থবিল্বাদপি দাডিমাচ্চ | তথাঽর্ধভাগঃ সিতসিন্ধুবারাদঙ্কোঠমূলাদপি গৈরিকাচ্চ ||৭৭|| এষোঽগদঃ ক্ষৌদ্রযুতো নিহন্তি বিশেষতো মণ্ডলিনাং বিষাণি |৭৮|

দ্রাক্ষেত্যাদি| সুগন্ধা সর্পসুগন্ধা নাকুলীতি যাবত্, নগবৃত্তিকা শল্লকী, শ্বেতা শ্বেতস্যন্দঃ| দেযো দ্বিভাগ ইত্যাদি| অর্ধভাগঃ অর্ধপলং সিন্ধুবারাদিভ্যঃ| কেচিত্তু সুগন্ধা নগমৃত্তিকেতি পঠন্তি, তত্রাযমর্থঃ- শোভনগন্ধবতী পর্বতস্য মৃত্তিকা, পর্বতমৃত্তিকাযাঃ সামান্যতো বিষহরত্বাত্| সামান্যেন সর্বত্র বিষহরোঽযমগদঃ, বিশেষতো মণ্ডলিবিষহরো ভবতি| অযং তু মণ্ডলিবিষহরো নামাগদঃ||৭৬-৭৭||-

Adhikarana 43 (78-80) · Śloka 80

বংশত্বগার্দ্রাঽঽমলকং কপিত্থং কটুত্রিকং হৈমবতী সকুষ্ঠা ||৭৮|| করঞ্জবীজং তগরং শিরীষপুষ্পং চ গোপিত্তযুতং নিহন্তি | বিষাণি লূতোন্দুরপন্নগানাং কৈটং চ লেপাঞ্জননস্যপানৈঃ ||৭৯|| পুরীষমূত্রানিলগর্ভসঙ্গান্নিহন্তি বর্ত্যঞ্জননাভিলেপৈঃ | কাচার্মকোথান্ পটলাংশ্চ ঘোরান্ পুষ্পং চ হন্ত্যঞ্জননস্যযোগৈঃ ||৮০||

বংশত্বগার্দ্রেত্যাদি| বংশত্বগার্দ্রা আর্দ্রবংশস্য ত্বক্, হৈমবতী বচা| কোথঃ পূতিভাবঃ ক্লিন্নবর্ত্মাদিষু| অযং তু সার্বকার্মিকোঽগদঃ||৭৮-৮০||

Adhikarana 44 (81) · Śloka 81

সমূলপুষ্পাঙ্কুরবল্কবীজাত্ ক্বাথঃ শিরীষাত্ ত্রিকটুপ্রগাঢঃ | সলাবণঃ ক্ষৌদ্রযুতোঽথ পীতো বিশেষতঃ কীটবিষং নিহন্তি ||৮১||

সমূলপুষ্পাঙ্কুরেত্যাদি| অঙ্কুরো নবপত্রাঙ্কুরঃ, প্রবাল ইত্যর্থঃ| সহ লাবণেন লবণসমূহেন বর্ততে ইতি সলাবণঃ| কেচিদীদৃশং পঠন্তি- `ত্বক্পত্রপুষ্পাণি ফলং সমূলং পিষ্ট্বা শিরীষস্য কটুত্রিকং চ| সলাবণং ক্ষৌদ্রযুতং বিলীঢং বিশেষতঃ কীটবিষং নিহন্তি’| অযমগদঃ পঞ্চশিরীষনামা||৮১||

Adhikarana 45 (82-83) · Śloka 83

কুষ্ঠং ত্রিকটুকং দার্বী মধুকং লবণদ্বযম্ | মালতী নাগপুষ্পং চ সর্বাণি মধুরাণি চ ||৮২|| কপিত্থরসপিষ্টোঽযং শর্করাক্ষৌদ্রসংযুতঃ | বিষং হন্ত্যগদঃ সর্বং মূষিকাণাং বিশেষতঃ ||৮৩||

কুষ্ঠং ত্রিকটুকমিত্যাদি| লবণদ্বযং সৈন্ধবং সৌবর্চলং চ| মালতী জাতী, নাগপুষ্পং নাগকেশরং, সর্বাণি মধুরাণি কাকোল্যাদীনি| অযমপি সার্বকামিকনামাঽগদঃ||৮২-৮৩||

Adhikarana 46 (84-86) · Śloka 86

সোমরাজীফলং পুষ্পং কটভী সিন্ধুবারকঃ | চোরকো বরুণঃ কুষ্ঠং সর্পগন্ধা সসপ্তলা ||৮৪|| পুনর্নবা শিরীষস্য পুষ্পমারগ্বধার্কজম্ | শ্যামাঽম্বষ্ঠা বিডঙ্গানি তথাঽম্রাশ্মন্তকানি চ ||৮৫|| ভূমী কুরবকশ্চৈব গণ একসরঃ স্মৃতঃ | একশো দ্বিত্রিশো বাঽপি প্রযোক্তব্যো বিষাপহঃ ||৮৬||

সোমরাজীফলমিত্যাদি| সোমরাজী বাকুচী, সিন্ধুবারঃ শ্বেতপুষ্পা নির্গুণ্ডী, চোরকো গ্রন্থিপর্ণানুকারী, সর্পগন্ধা নাকুলী, সপ্তলা যবতিক্তাভেদঃ, শ্যামা শ্যামলতা, প্রিযঙ্গুরিত্যন্যে, অম্বষ্ঠা পাঠা, অশ্মন্তকো বৃক্ষোঽম্লোটকানুসারী, ভূমিঃ কৃষ্ণমৃত্তিকা, কুরবকঃ স্নিগ্ধপত্রঃ সিতকুসুমঃ স্বনামপ্রসিদ্ধঃ| গণ একসরঃ স্মৃত ইতি অযমৌষধগণ একসরঃ একসরসঞ্জ্ঞকঃ স্মৃতঃ| একশো দ্বিত্রিশো বাঽপি প্রযোক্তব্যো বিষাপহ ইতি স চৌষধগণ একৈকশঃ একমেকং দ্বৌ দ্বৌ ত্রীন্ ত্রীন্ বা প্রযোক্তব্যঃ, প্রযুক্তশ্চ বিষাপহো ভবতি||৮৪-৮৬||

Adhikarana puShpikA · Śloka 5

ইতি সুশ্রুতসংহিতাযাং কল্পস্থানে সর্পদষ্টবিষচিকিত্সিতং নাম পঞ্চমোঽধ্যাযঃ ||৫||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং কল্পস্থানে পঞ্চমোঽধ্যাযঃ||৫||