11. granthyapacyarbudagalagaṇḍanidānam

Adhikarana 1 (1-2) · Śloka 2

অথাতো গ্রন্থপচ্যর্বুদগলগণ্ডানাং নিদানং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3) · Śloka 3

বাতাদযো মাংসমসৃক্ চ দুষ্টাঃ সন্দূষ্য মেদশ্চ কফানুবিদ্ধম্ | বৃত্তোন্নতং বিগ্রথিতং তু শোফং কুর্বন্ত্যতো গ্রন্থিরিতি প্রদিষ্টঃ ||৩||

তেষাং হেতুসম্প্রাপ্তিলক্ষণনিরুক্তীরাহ- বাতাদয ইত্যাদি| বাতাদযো দোষা দুষ্টা মাংসমসৃক্ চ সন্দূষ্য শোফং কুর্বন্তীতি সম্বন্ধঃ| এতেন ত্রযো গ্রন্থয উক্তাঃ| মেদশ্চ কফানুবিদ্ধং কফসংসৃষ্টং বাযুদূষিতত্বাচ্ছোফং করোতীতি সম্বন্ধঃ| ভোজেঽপি বাতকর্তৃত্বং মেদোগ্রন্থাবভিহিতম্| তথা চ,- “বাযুর্মেদো যদা মাংসে সঙ্ক্ষিপেদথবা ত্বচি| তত্র মেদোভবো গ্রন্থিঃ শ্যাবো ভবতি কণ্ডুলঃ”- ইত্যাদি| অযং চতুর্থো গ্রন্থিঃ| চকারাত্ সিরাজো গ্রন্থিঃ পঞ্চমো গ্রাহ্যঃ| দুষ্টা বৃদ্ধিং গতা ইত্যর্থঃ| বৃত্তো বর্তুলঃ, উন্নত উচ্ছ্রিতঃ| বিগ্রথিতোঽত্যর্থং কঠিনঃ| বাতাদযো দুষ্টা ইত্যনেন হেতূপদেশঃ, মাংসমসৃক্ চ সন্দূষ্যেতি সম্প্রাপ্তিঃ, বৃত্তোন্নতং বিপ্রথিতং তু শোফমিতি লক্ষণোপদেশঃ, অতো গ্রন্থিরিতি প্রদিষ্ট ইতি নিরুক্তিঃ||৩||

Adhikarana 3 (4) · Śloka 4

আযম্যতে ব্যথ্যত এতি তোদং প্রত্যস্যতে কৃত্যত এতি ভেদম্ | কৃষ্ণোঽমৃদুর্বস্তিরিবাততশ্চ ভিন্নঃ স্রবেচ্চানিলজোঽস্রমচ্ছম্ ||৪||

তেষাং বাতাদিজানাং প্রত্যেকং বিশিষ্টং লক্ষণমাহ- আযম্যত ইত্যাদি| আযম্যতে বাযোরাকর্ষণেন দীর্ঘ ইব ক্রিযতে, ‘গ্রন্থিঃ’ ইতি শেষঃ| ব্যথ্যতে বিধূযতে| এতি গচ্ছতি| তোদং ব্যথাম্| প্রত্যস্যতে ক্ষিপ্যতে| কৃত্যতে ছিদ্যতে| এতি ভেদমিতি ভেদং চ গচ্ছতি| অমৃদুঃ কর্কশঃ| বস্তিরিবাততশ্চেতি মূত্রাশযবদ্দীর্ঘঃ| অস্রং রুধিরম্||৪||

Adhikarana 4 (5) · Śloka 5

দন্দহ্যতে ধূপ্যতি চূষ্যতে চ পাপচ্যতে প্রজ্বলতীব চাপি | রক্তঃ সপীতোঽপ্যথবাঽপি পিত্তাদ্ভিন্নঃ স্রবেদুষ্ণমতীব চাস্রম্ ||৫||

দন্দহ্যতে ভৃশং দহ্যত ইব| ধূপ্যতি চাতিমাত্রম্ অতিশযেন সন্তাপং করোতি| পাপচ্যতে ভৃশং পচ্যত ইব| প্রজ্বলতীব ভস্মীভবতীব||৫||

Adhikarana 5 (6) · Śloka 6

শীতোঽবিবর্ণোঽল্পরুজোঽতিকণ্ডূঃ পাষাণবত্ সংহননোপপন্নঃ | চিরাভিবৃদ্ধিশ্চ কফপ্রকোপাদ্ভিন্নঃ স্রবেচ্ছুক্লঘনং চ পূযম্ ||৬||

অবিবর্ণ ঈষদ্বিবর্ণঃ| পাষাণবত্ পাষাণ ইব ‘কঠিন’ ইত্যধ্যাহারঃ| সংহননোপপন্নঃ সঙ্ঘাতান্বিতো মহানিত্যর্থঃ||৬||

Adhikarana 6 (7) · Śloka 7

শরীরবৃদ্ধিক্ষযবৃদ্ধিহানিঃ স্নিগ্ধো মহানল্পরুজোঽতিকণ্ডূঃ | মেদঃকৃতো গচ্ছতি চাত্র ভিন্নে পিণ্যাকসর্পিঃপ্রতিমং তু মেদঃ ||৭||

শরীরবৃদ্ধিক্ষযবৃদ্ধিহানিরিতি দেহাপ্যাযনহ্রাসাভ্যামাপ্যাযনহ্রাসৌ যস্য স তথা| গচ্ছতি স্রবতি মেদ ইতি সম্বন্ধঃ| অত্র মেদোগ্রন্থৌ ভিন্নে সতি, পিণ্যাকসর্পিঃপ্রতিমং তিলকল্কস্ত্যানঘৃতসদৃশম্||৭||

Adhikarana 7 (8-9) · Śloka 9

ব্যাযামজাতৈরবলস্য তৈস্তৈরাক্ষিপ্য বাযুর্হি সিরাপ্রতানম্ | সম্পীড্য সঙ্কোচ্য বিশোষ্য চাপি গ্রন্থিং করোত্যুন্নতমাশু বৃত্তম্ ||৮|| গ্রন্থিঃ সিরাজঃ স তু কৃচ্ছ্রসাধ্যো ভবেদ্যদি স্যাত্ সরুজশ্চলশ্চ | অরুক্ স এবাপ্যচলো মহাংশ্চ মর্মোত্থিতশ্চাপি বিবর্জনীযঃ ||৯|| ইতি গ্রন্থীনাং নিদানং সমাপ্তম্ |

সিরাজস্য গ্রন্থেঃ সম্প্রাপ্তিং দর্শযন্নাহ- ব্যাযামজাতৈরিত্যাদি| ব্যাযামজাতৈঃ ব্যাযামসমূহৈঃ| অবলস্য পুরুষস্য| সিরাপ্রতানং সিরাবিস্তারম্| সিরাজস্য কৃচ্ছ্রসাধ্যত্বমাহ- স তু কৃচ্ছ্রসাধ্য ইত্যাদি| তস্যাসাধ্যত্বমাহ- অরুগিত্যাদি| মহাংশ্চেতি চকারেণ বাতাদিজা অপ্যেবংরূপা বর্জনীযাঃ| মর্মোত্থিতশ্চেতি চকারেণ অরুজোঽপি বিবর্জনীযঃ| অন্যে পুনরত্র “মাংসাস্রজং চার্বুদলক্ষণেন তুল্যং হি দৃষ্টং ত্বথ লক্ষণজ্ঞৈঃ”- ইতি ষষ্ঠং গ্রন্থিং পঠন্তি| তন্ন, জেজ্জটাদিভিঃ পরিহৃতত্বাত্||৮-৯||

Adhikarana 8 (10-12) · Śloka 12

হন্বস্থিকক্ষাক্ষকবাহুসন্ধিমন্যাগলেষূপচিতং তু মেদঃ | গ্রন্থিং স্থিরং বৃত্তমথাযতং বা স্নিগ্ধং কফশ্চাল্পরুজং করোতি ||১০|| তং গ্রন্থিভিস্ত্বামলকাস্থিমাত্রৈর্মত্স্যাণ্ডজালপ্রতিমৈস্তথাঽন্যৈঃ | অনন্যবর্ণৈরুপচীযমানং চযপ্রকর্ষাদপচীং বদন্তি ||১১|| কণ্ডূযুতাস্তেঽল্পরুজঃ প্রভিন্নাঃ স্রবন্তি নশ্যন্তি ভবন্তি চান্যে | মেদঃকফাভ্যাং খলু রোগ এষ সুদুস্তরো বর্ষগণানুবন্ধী ||১২||

ইদানীমপচ্যাঃ সম্প্রাপ্ত্যাদীনাহ- হন্বস্থীত্যাদি| হন্বোরস্থি হন্বস্থি; সন্ধিশব্দো হন্বস্থ্যাদিভির্বাহ্বন্তৈঃ প্রত্যেকং সম্বধ্যতে; বাহুসন্ধিশব্দেন কূর্পসন্ধিরুচ্যতে; অক্ষকং কোষ্ঠকং তস্য সন্ধিঃ, এতেন গ্রীবাগ্রকসন্ধিরুচ্যতে ; মন্যা গ্রীবাপশ্চিমভাগস্থা ধমনী| হন্বস্থীত্যাদিসম্প্রাপ্তিঃ, গ্রন্থিং স্থিরং বৃত্তমিত্যাদিলক্ষণম্| তং গ্রন্থিভিরিত্যাদি তং পূর্বোক্তং গ্রন্থিম্| অনন্যবর্ণৈঃ সমানবর্ণৈঃ| উপচীযমানং বর্ধমানম্| চযপ্রকর্ষাদিতি উপচযাতিশযাদিত্যর্থঃ| চযপ্রকর্ষাদপচীমিতি নিরুক্তিঃ| খলুশব্দোঽপ্যর্থঃ| তেন মেদঃকফৌ বাতাদিদোষান্তরানুবিদ্ধৌ জ্ঞেযৌ| তথাহি ভোজঃ,- “বাতপিত্তকফা বৃদ্ধা মেদশ্চাপি সমাচিতম্| জঙ্ঘযোঃ কণ্ডরাঃ প্রাপ্য মত্স্যাণ্ডসদৃশান্ বহূন্|| কুর্বন্তি গ্রথিতাংস্তেভ্যঃ পুনঃ প্রকুপিতোঽনিলঃ| তান্ দোষানূর্ধ্বগো বক্ষঃকক্ষামন্যাগলাশ্রিতঃ|| নানাপ্রকারান্ কুরুতে গ্রন্থীন্ সা ত্বপচী স্মৃতা| ব্যামিশ্রদোষজাতা সা কৃচ্ছ্রসাধ্যা প্রকীর্তিতা|| তাসাং বাতোত্তরা রূক্ষা বাতবেদনযাঽন্বিতা| ক্ষিপ্রপাকসমুত্থানা দাহযুক্তা তু পৈত্তিকী|| গূঢা বাঽপাককঠিনা কফাত্ স্নিগ্ধাঽল্পরুক্করা| মেদোঽধিকা শ্লৈষ্মিকী চ বিশেষাদতিমার্দবা|| অপচী কণ্ঠমন্যাসু কক্ষাবঙ্ক্ষণসন্ধিসু| তাং তু মালাকৃতিং বিদ্যাত্ কণ্ঠহৃদ্ধনুসন্ধিষু|| গণ্ডমালাং বিজানীযাদপচীতুল্যলক্ষণাম্”- ইতি| চরকে গণ্ডমালা গণ্ডে এব পঠিতা “মেদঃকফাচ্ছোণিতসঞ্চযোত্থো গণ্ডস্য পার্শ্বে গলগণ্ড একঃ| স্যাদ্গণ্ডমালা বহুভিস্তু গণ্ডৈর্দীপ্তানলে যূনি বলান্বিতে চ|| সাধ্যা স্মৃতা পীনসপার্শ্বশূলকাসজ্বরচ্ছর্দিযুতা ত্বসাধ্যা” (চ. চি. ১২)- ইতি| অন্যে তু ‘মেদঃকফাভ্যাং পুনরেষ রোগঃ’ ইতি পঠন্তি; পুনঃশব্দাদধিকার্থাদ্দোষান্তরসম্বন্ধঃ স্থাপিতো ভবতীতি চ বদন্তি| তত্রাপি স এবার্থঃ| বর্ষগণানুবন্ধী বর্ষসমূহসম্বন্ধীত্যর্থঃ| এতেন দীর্ঘরোগিত্বং সূচিতম্| মেদঃকফাভ্যামিতি হেতূদ্দেশঃ||১০-১২||

Adhikarana 9 (13) · Śloka 14

গাত্রপ্রদেশে ক্বচিদেব দোষাঃ সম্মূর্চ্ছিতা মাংসমভিপ্রদূষ্য | বৃত্তং স্থিরং মন্দরুজং মহান্তমনল্পমূলং চিরবৃদ্ধ্যপাকম্ ||১৩|| কুর্বন্তি মাংসোপচযং তু শোফং তমর্বুদং শাস্ত্রবিদো বদন্তি |১৪|

ইদানীমর্বুদাদীনাং সম্প্রাপ্ত্যাদীনাহ- গাত্রপ্রদেশে ইত্যাদি| ক্বচিদেব গাত্রপ্রদেশে দোষাঃ শোফং কুর্বন্তীতি সম্বন্ধঃ| সম্মূর্চ্ছিতা বৃদ্ধিং গতাঃ| ক্বচিদেবানিযতপ্রদেশে, ন পুনরপচীবদ্ধন্বস্থ্যাদিসন্ধিষ্বেব| অপাকম্ অবিদ্যমানপাকম্| মাংসোপচযং মাংসসঙ্ঘাতম্| গাত্রপ্রদেশে ক্বচিদেবেতি সম্প্রাপ্তিঃ| সম্মূর্চ্ছিতা দোষা ইতি হেতুঃ| বৃত্তং স্থিরমিত্যাদি স্বলক্ষণম্| গযী তু ‘কুর্বন্তি মাংসোচ্ছ্রযমত্যগাধম্’ ইতি পঠতি||১৩||-

Adhikarana 10 (14) · Śloka 15

বাতেন পিত্তেন কফেন চাপি রক্তেন মাংসেন চ মেদসা চ ||১৪|| তজ্জাযতে তস্য চ লক্ষণানি গ্রন্থেঃ সমানানি সদা ভবন্তি |১৫|

তজ্জাযতে তদর্বুদং ভবতীত্যর্থঃ| তস্য চ লক্ষণানি তস্য বাতপিত্তকফমেদোজস্য||১৪||-

Adhikarana 11 (15-16) · Śloka 17

দোষঃ প্রদুষ্টো রুধিরং সিরাস্তু সম্পীড্য সঙ্কোচ্য গতস্ত্বপাকম্ ||১৫|| সাস্রাবমুন্নহ্যতি মাংসপিণ্ডং মাংসাঙ্কুরৈরাচিতমাশুবৃদ্ধিম্ | স্রবত্যজস্রং রুধিরং প্রদুষ্টমসাধ্যমেতদ্রুধিরাত্মকং স্যাত্ ||১৬|| রক্তক্ষযোপদ্রবপীডিতত্বাত্ পাণ্ডুর্ভবেত্ সোঽর্বুদপীডিতস্তু |১৭|

রক্তজস্যার্বুদস্য লক্ষণমাহ- দোষঃ প্রদুষ্ট ইত্যাদি| প্রদুষ্টো দোষঃ সিরাসু গতো রুধিরং সম্পীড্য সঙ্কোচ্য মাংসপিণ্ডমুন্নহ্যতীতি সম্বন্ধঃ| উন্নহ্যতি উদ্বধ্নাতীব; অন্যে তু ‘প্রদুষ্টো দোষ উন্নহ্যতি উচ্ছ্রিতো ভবতি, মাংসপিণ্ডমাশুবৃদ্ধিং শীঘ্রবর্ধনশীলং করোতি’ ইতি ব্যাখ্যানযন্তি| অপাকম্ ঈষত্পাকম্||১৫-১৬||-

Adhikarana 12 (17-18) · Śloka 19

মুষ্টিপ্রহারাদিভিরর্দিতেঽঙ্গে মাংসং প্রদুষ্টং প্রকরোতি শোফম্ ||১৭|| অবেদনং স্নিগ্ধমনন্যবর্ণমপাকমশ্মোপমমপ্রচাল্যম্ | প্রদুষ্টমাংসস্য নরস্য বাঢমেতদ্ভবেন্মাংসপরাযণস্য ||১৮|| মাংসার্বুদং ত্বেতদসাধ্যমুক্তং... |১৯|

মাংসজস্য সম্প্রাপ্তিং দর্শযন্নাহ- মুষ্টিপ্রহারাদিভিরিত্যাদি| সমুপৈতি সম্যগ্গচ্ছতি| বাঢম্ অতিশযেন| মাংসপরাযণস্য মাংসভক্ষণশীলস্য| ‘মুষ্টিপ্রহারাদিভিঃ’ ইত্যত্র কেচিত্ ‘কাষ্ঠপ্রহারাদিভিঃ’ ইতি পঠন্তি||১৭-১৮||-

Adhikarana 13 (19-20) · Śloka 20

...সাধ্যেষ্বপীমানি বিবর্জযেত্তু | সম্প্রস্রুতং মর্মণি যচ্চ জাতং স্রোতঃসু বা যচ্চ ভবেদচাল্যম্ ||১৯|| যজ্জাযতেঽন্যত্ খলু পূর্বজাতে জ্ঞেযং তদধ্যর্বুদমর্বুদজ্ঞৈঃ | যদ্দ্বন্দ্বজাতং যুগপত্ ক্রমাদ্বা দ্বিরর্বুদং তচ্চ ভবেদসাধ্যম্ ||২০||

সাধ্যেষ্বপীত্যাদি| সাধ্যেষ্বপীমানি বিবর্জযেদিতি সাধ্যেষু মধ্যে ইমানি বক্ষ্যমাণানি বিবর্জযেদিত্যর্থঃ| অধ্যর্বুদমপি দ্বিরর্বুদমেব, অন্যে ‘অত্যর্বুদং’ ইতি পঠন্তি| যদ্দ্বন্দ্বজাতমিত্যাদি দ্বন্দ্বেন যুগ্মেন জাতং দ্বন্দ্বজাতং; ন কেবলমধ্যর্বুদং দ্বিরর্বুদং, যদ্দ্বন্দ্বজাতং তদপি দ্বিরর্বুদমিত্যর্থঃ| ভেদশ্চ তযোরুপরিজাতত্বেন পার্শ্বজাতত্বেন চ| এতেন দ্বিরর্বুদদ্বিতযমপ্যসাধ্যমুক্তম্||১৯-২০||

Adhikarana 14 (21) · Śloka 21

ন পাকমাযান্তি কফাধিকত্বান্মেদোবহুত্বাচ্চ বিশেষতস্তু | দোষস্থিরত্বাদ্গ্রথনাচ্চ তেষাং সর্বার্বুদান্যেব নিসর্গতস্তু ||২১||

তেষাং পাকাভাবে হেতুং দর্শযন্নাহ- ন পাকমিত্যাদি| গ্রন্থ্যাদিষ্বপি কফাদযশ্চত্বারো হেতবঃ সন্তি, পরমর্বুদেষু বিশেষতঃ কফস্য মেদসশ্চাধিক্যং তস্মাত্, তথা বিশেষতো দোষস্থিরত্বাদ্ দোষকার্যস্য মাংসোচ্ছ্রযস্য তেনৈব স্বরূপেণ চিরকালাবস্থিতিশীলত্বাত্, তথা গ্রথনাদ্ গ্রন্থিরূপত্বাত্তেষাং মেদঃপ্রভৃতীনাং; নিসর্গতস্ত্বিতি তুশব্দোঽপ্যর্থঃ, তেন স্বভাবাদপ্যর্বুদানি পাকং ন গচ্ছতীত্যর্থঃ||২১||

Adhikarana 15 (22) · Śloka 22

বাতঃ কফশ্চৈব গলে প্রবৃদ্ধৌ মন্যে তু সংসৃত্য তথৈব মেদঃ | কুর্বন্তি গণ্ডং ক্রমশঃ স্বলিঙ্গৈঃ সমন্বিতং তং গলগণ্ডমাহুঃ ||২২||

ইদানীং গলগণ্ডসম্প্রাপ্তিং দর্শযন্নাহ- বাত ইত্যাদি| বাতাদযো গণ্ডং ক্রমশঃ কুর্বন্তীতি সম্বন্ধঃ| কিংবিশিষ্টং গণ্ডং? স্বলিঙ্গৈঃ সমন্বিতম্| বাতেন কফেন চ গলগণ্ডো ভবতি, ন পিত্তেন; স্বভাবেন পিত্তজস্য গলগণ্ডস্যাভাবাত্||২২||

Adhikarana 16 (23-27) · Śloka 27

তোদান্বিতঃ কৃষ্ণসিরাবনদ্ধঃ কৃষ্ণোঽরুণো বা পবনাত্মকস্তু | মেদোন্বিতশ্চোপচিতশ্চ কালাদ্ভবেদতিস্নিগ্ধতরোঽরুজশ্চ ||২৩|| পারুষ্যযুক্তশ্চিরবৃদ্ধ্যপাকো যদৃচ্ছযা পাকমিযাত্ কদাচিত্ বৈরস্যমাস্যস্য চ তস্য জন্তোর্ভবেত্তথা তালুগলপ্রশোষঃ ||২৪|| স্থিরঃ সবর্ণোঽল্পরুগুগ্রকণ্ডূঃ শীতো মহাংশ্চাপি কফাত্মকস্তু | চিরাভিবৃদ্ধিং কুরুতে চিরাচ্চ প্রপচ্যতে মন্দরুজঃ কদাচিত্ ||২৫|| মাধুর্যমাস্যস্য চ তস্য জন্তোর্ভবেত্তথা তালুগলপ্রলেপঃ | স্নিগ্ধো মৃদুঃ পাণ্ডুরনিষ্টগন্ধো মেদঃকৃতো নীরুগথাতিকণ্ডূঃ ||২৬|| প্রলম্বতেঽলাবুবদল্পমূলো দেহানুরূপক্ষযবৃদ্ধিযুক্তঃ | স্নিগ্ধাস্যতা তস্য ভবেচ্চ জন্তোর্গলেঽনুশব্দং কুরুতে চ নিত্যম্ ||২৭||

তস্যৈব বাতাদিবিশেষলিঙ্গানি নির্দিশন্নাহ- তোদান্বিত ইত্যাদি| অরুজ ইতি সোঽপি বাতগলগণ্ডো যদা কালাত্ কালেন কৃত্বা মেদোঽন্বিতো ভবতি, তদা অরুজো ভবতীত্যর্থঃ| যদৃচ্ছযা অজ্ঞাতহেতুনিযমেন, পাকমিযাত্ গচ্ছেত্| কদাচিত্ ন সর্বকালম্| বাতজং কফজং চোক্ত্বা মেদোজমাহ- স্নিগ্ধ ইত্যাদি| গলেঽনুশব্দমনুনাদং প্রতিশব্দমিত্যর্থঃ||২৩-২৭||

Adhikarana 17 (28) · Śloka 28

কৃচ্ছ্রাচ্ছ্বসন্তং মৃদুসর্বগাত্রং সংবত্সরাতীতমরোচকার্তম্ | ক্ষীণং চ বৈদ্যো গলগণ্ডিনং তু ভিন্নস্বরং চৈব বিবর্জযেত্তু ||২৮||

ইদানীং গলগণ্ডস্যাসাধ্যতামাহ- কৃচ্ছ্রাদিত্যাদি||২৮||

Adhikarana 18 (29) · Śloka 29

নিবদ্ধঃ শ্বযথুর্যস্য মুষ্কবল্লম্বতে গলে | মহান্ বা যদি বা হ্রস্বো গলগণ্ডং তমাদিশেত্ ||২৯||

ন সর্ব এব গলাশ্রযো গণ্ডো গলগণ্ডঃ, কিং তর্হি কশ্চিদেব বক্ষ্যমাণস্বরূপ ইতি দর্শযন্নাহ- নিবদ্ধ ইত্যাদি| নিযমেন বদ্ধো নিবদ্ধঃ| মুষ্কবত্ অণ্ডবত্||২৯||

Adhikarana puShpikA · Śloka 11

ইতি সুশ্রুতসংহিতাযাং নিদানস্থানে গলগণ্ডগণ্ডমালাপচ্যর্বুদনিদানং নামৈকাদশোঽধ্যাযঃ ||১১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং নিদানস্থানে একাদশোঽধ্যাযঃ||১১||