13. kṣudrarōganidānam

Adhikarana 1 (1-2) · Śloka 2

অথাতঃ ক্ষুদ্ররোগাণাং নিদানং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| যদ্যপি ক্ষুদ্ররোগেষু রোহিণীবল্মীকাদযো মহাব্যাধযঃ সন্তি, তথাঽপি ক্ষুদ্ররোগাণাং বহুত্বাত্তৈরেব ব্যপদেশঃ; যথা বহুষু ছত্রিষু গচ্ছত্সু অচ্ছত্রিষ্বপি কেষুচিচ্ছত্রিণো যান্তীতি ব্যপদেশঃ, তথাঽত্রাপীতি ন দোষঃ| অন্যে তু ক্ষুদ্রা লঘবস্তিলকাদ্যপেক্ষযা, অগ্নিরোহিণীবল্মীকাদ্যপেক্ষযা ক্ষুদ্রাস্তীক্ষ্ণাঃ ; অথবা পূর্বাচার্যপ্রসিদ্ধা নির্হেতুকেযং সঞ্জ্ঞা||১-২||

Adhikarana 2 (3) · Śloka 3

সমাসেন চতুশ্চত্বারিংশত্ ক্ষুদ্ররোগা ভবন্তি | তদ্যথা,- অজগল্লিকা, যবপ্রখ্যা, অন্ধালজী, বিবৃতা, কচ্ছপিকা, বল্মীকং, ইন্দ্রবৃদ্ধা , পনসিকা, পাষাণগর্দভঃ, জালগর্দভঃ, কক্ষা , বিস্ফোটকঃ, অগ্নিরোহিণী, চিপ্পং, কুনখঃ, অনুশযী, বিদারিকা শর্করার্বুদং, পামা, বিচর্চিকা, রকসা, পাদদারিকা, কদরং, অলসেন্দ্রলুপ্তৌ , দারুণকঃ, অরুংষিকা, পলিতং, মসূরিকা, যৌবনপিডকা, পদ্মিনীকণ্টকঃ, জতুমণিঃ, মশকঃ, চর্মকীলঃ , তিলকালকঃ, ন্যচ্ছং, ব্যঙ্গঃ, পরিবর্তিকা, অবপাটিকা, নিরুদ্ধপ্রকশঃ সন্নিরুদ্ধগুদঃ, অহিপূতনং, বৃষণকচ্ছ্রঃ, গুদভ্রংশশ্চেতি ||৩||

সঙ্খ্যামাহ- সমাসেনেত্যাদি| সমাসেন সঙ্ক্ষেপেণ, বিস্তরেণ প্রমাণং তু নাস্ত্যেব| শ্রীব্রহ্মদেবস্তু গর্দভিকেরিবেল্লিকাগন্ধপিডিকানীলিকানাং সঙ্গ্রহণেনাষ্টচত্বারিংশদিতি পঠতি| শ্রীজেজ্ঝটেন তু গর্দভিকাদযশ্চত্বারো ন পঠিতাঃ| পূর্বব্যাখ্যাতারোঽপি সুবীরনন্দিবারাহাদযঃ সমানতন্ত্রাপাঠাত্ গর্দভিকাদীনাং চতুর্ণাং পাঠং গর্হিতং মন্যন্তে| গযদাসাচাযস্তু সমানতন্ত্রাদর্শনেঽপি সর্বেষ্বেব পাঠেষু পাতাদ্ গর্দভিকাদীন্ পঠতি, পামাদীংশ্চ ক্ষুদ্রত্বেঽপি চতুরঃ কুষ্ঠ এব পঠতি||৩||

Adhikarana 3 (4) · Śloka 4

স্নিগ্ধা সবর্ণা গ্রথিতা নীরুজা মুদ্গসন্নিভা | কফবাতোত্থিতা জ্ঞেযা বালানামজগল্লিকা ||৪||

তেষাং প্রত্যেকং লক্ষণমাহ- স্নিগ্ধেত্যাদি| “প্রাযোগ্রহণমত্র লুপ্তনির্দিষ্টং দ্রষ্টব্যং, তেন ক্বচিদবালেষ্বপি” ইত্যেকে মন্যন্তে||৪||

Adhikarana 4 (5) · Śloka 5

যবাকারা সুকঠিনা গ্রথিতা মাংসসংশ্রিতা | পিডকা শ্লেষ্মবাতাভ্যাং যবপ্রখ্যেতি সোচ্যতে ||৫||

যবেত্যাদি| যবাকারা স্থূলমধ্যনিম্নান্তত্বেন ||৫||

Adhikarana 5 (6) · Śloka 6

ঘনামবক্ত্রাং পিডকামুন্নতাং পরিমণ্ডলাম্ | অন্ধালজীমল্পপূযাং তাং বিদ্যাত্ কফবাতজাম্ ||৬||

ঘনামিত্যাদি| অবক্ত্রামিতি অল্পমুখীম্| পরিমণ্ডলাং বর্তুলামিত্যর্থঃ| অন্ধালজীং স্নাযুপ্রসৃতান্তর্মুখীম্||৬||

Adhikarana 6 (7) · Śloka 7

বিবৃতাস্যাং মহাদাহাং পক্বোদুম্বরসন্নিভাম্ | বিবৃতামিতি তাং বিদ্যাত্ পিত্তোত্থাং পরিমণ্ডলাম্ ||৭||

বিবৃতাস্যামিত্যাদি| বিবৃতাস্যামিতি ব্যাত্তমুখীম্||৭||

Adhikarana 7 (8) · Śloka 8

গ্রথিতাঃ পঞ্চ বা ষড্বা দারুণাঃ কচ্ছপোন্নতাঃ | কফানিলাভ্যাং পিডকা জ্ঞেযা কচ্ছপিকা বুধৈঃ ||৮||

দারুণাঃ কঠিনাঃ||৮||

Adhikarana 8 (9-10) · Śloka 10

পাণিপাদতলে সন্ধৌ গ্রীবাযামূর্ধ্বজত্রুণি | গ্রন্থির্বল্মীকবদ্যস্তু শনৈঃ সমুপচীযতে ||৯|| তোদক্লেদপরীদাহকণ্ডূমদ্ভির্মুখৈর্বৃতঃ | ব্যাধির্বল্মীক ইত্যেষ কফপিত্তানিলোদ্ভবঃ ||১০||

গ্রন্থয ইত্যাদি||৯-১০||

Adhikarana 9 (11) · Śloka 12

পদ্মপুষ্করবন্মধ্যে পিডকাভিঃ সমাচিতাম্ | ইন্দ্রবৃদ্ধাং তু তাং বিদ্যাদ্বাতপিত্তোত্থিতাং ভিষক্ ||১১|| মণ্ডলং বৃত্তমুত্সন্নং সরক্তং পিডকাচিতম্ | রুজাকরীং গদর্ভিকাং তাং বিদ্যাদ্বাতপিত্তজাম্ |১২|

পদ্মেত্যাদি| পদ্মপুষ্করং পদ্মকর্ণিকা| গযী ত্বত্র গর্দভিকাং পঠতি; যথা- “মণ্ডলাং বৃত্তমুত্সন্নাং সরক্তাং পিডকাচিতাম্| রুজাকরীং গর্দভিকাং তাং বিদ্যাদ্বাতপিত্তজাম্”||১১||-

Adhikarana 10 (12) · Śloka 12

কর্ণৌ পরি সমন্তাদ্বা পৃষ্ঠে বা পিডকোগ্ররুক্ | শালূকবত্পনসিকাং তাং বিদ্যাচ্ছ্লেষ্মবাতজাম্ ||১২||

কর্ণস্যাভ্যন্তরে দেশে জাতা বাতকফাত্মিকা| সমন্তত ইতি বচনাত্ কর্ণাদ্বহিরপীতি ব্যাচক্ষতে, তন্ন, সর্বেষু পাদেষু বহিরিতি অপ্রাপ্তেঃ| ন চ সমানতন্ত্রেষু বহিরিতি লভ্যতে| তথাহি ভোজঃ- “কফবাতৌ প্রকুপিতৌ মাংসমাশ্রিত্য কর্ণযোঃ| সমন্ততঃ পরিস্তব্ধাং কুরুতঃ পিডকাং স্থিরাম্|| বিষমাং দাহসংযুক্তাং বিদ্যাত্ পনসিকাং তু তাম্” ইতি| ভোজেঽস্যাং বাতকফজাযাং দাহঃ পঠিতঃ, স হি বিকৃতিবিষমসমবাযারম্ভাদধিষ্ঠানপ্রভাবাদ্বাঽবগন্তব্যঃ||১২||

Adhikarana 11 (13) · Śloka 13

হনুসন্ধৌ সমুদ্ভূতং শোফমল্পরুজং স্থিরম্ | পাষাণগর্দভং বিদ্যাদ্বলাসপবনাত্মকম্ ||১৩||

হনুসন্ধিসমুদ্ভূতমিত্যাদিনা পাষাণগর্দভঃ| স্থিরকঠিনপাষাণবত্ কাঠিন্যেন পাষাণগর্দভঃ||১৩||

Adhikarana 12 (14) · Śloka 14

বিসর্পবত্ সর্পতি যো দাহজ্বরকরস্তনুঃ | অপাকঃ শ্বযথুঃ পিত্তাত্ স জ্ঞেযো জালগর্দভঃ ||১৪||

বিসর্পবত্ সর্পতি য ইত্যাদিনা জালগর্দভঃ| অপাকবান্ ঈষত্পাকবান্, ঈষদর্থে নঞ্; পিত্তকৃতত্বেনাত্যর্থং পাকাভাবস্যাযুক্তত্বাদল্পপাক ইত্যঙ্গীক্রিযতে| প্রতনুস্তোকপাকপিডিকাজালাভত্বাজ্ জালগর্দভঃ| পিত্তাদিত্যুদ্ভূতপিত্তাত্, পিত্তোত্কটৈস্ত্রিভিরেব দোষৈরন্যত্র পঠ্যতে| তথাহি ভোজঃ- “পিত্তোত্কটাস্ত্রযো দোষা জনযন্তি ত্বগাশ্রিতাঃ| শ্যাবরক্ততনুশোথপ্রপাকং বহুবেদনম্|| বিসর্পিণং সদাহং চ তৃষ্ণাজ্বরসমন্বিতম্| বিসর্পমাহুস্তং ব্যাধিমপরে জালগর্দভম্” ইতি||১৪||

Adhikarana 13 (15) · Śloka 15

পিডিকামুত্তমাঙ্গস্থাং বৃত্তামুগ্ররুজাজ্বরাম্ | সর্বাত্মকাং সর্বলিঙ্গাং জানীযাদিরিবেল্লিকাম্ ||১৫||

পিডকামুত্তমাঙ্গস্থামিত্যাদিনা ইরিবেল্লিকা| সা চ সর্বজা সর্বদোষারব্ধেত্যর্থঃ| সর্বেষাং বাতাদিদোষাণাং স্বভাবকার্যাণাং লিঙ্গদর্শনং সন্নিপাতেন প্রকৃতিসমবাযারব্ধত্বান্মন্যন্তে| ইযং সর্বেষ্বেব পাঠেষু পঠ্যতে, ন তু সমানতন্ত্রেষ্বিতি পূর্বব্যাখ্যাতারো মন্যন্তে||১৫||

Adhikarana 14 (16) · Śloka 16

বাহুপার্শ্বাংসকক্ষাসু কৃষ্ণস্ফোটাং সবেদনাম্ | পিত্তপ্রকোপসম্ভূতাং কক্ষামিতি বিনির্দিশেত্ ||১৬||

বাহুপার্শ্বাংসকক্ষেত্যাদিনা কক্ষা||১৬||

Adhikarana 15 (17) · Śloka 17

একামেবংবিধাং দৃষ্ট্বা পিটিকাং স্ফোটসন্নিভাম্ | ত্বগ্গতাং পিত্তকোপেন গন্ধনামাং প্রচক্ষতে ||১৭||

একামেতাদৃশীং কক্ষানির্দিষ্টস্ফোটসদৃশীং গন্ধনামাং বদন্তি||১৭||

Adhikarana 16 (18) · Śloka 18

অগ্নিদগ্ধনিভাঃ স্ফোটাঃ সজ্বরাঃ পিত্তরক্ততঃ | ক্বচিত্ সর্বত্র বা দেহে স্মৃতা বিস্ফোটকা ইতি ||১৮||

অগ্নিদগ্ধনিভাঃ| স্ফোটা ইত্যাদিনা বিস্ফোটকাঃ| অন্যৈঃ পুনরমী বিসর্পভেদত্বাদেষাং ন পঠ্যন্তে| অত এবান্যতন্ত্রীযৈর্বিসর্পভেদত্বাদেষাং দোষভেদেন লক্ষণং পঠ্যতে| ক্ষুদ্ররোগপাঠে তু দোষভেদোঽত্র ন যুজ্যতে| অত্রার্থে ভোজঃ “পিত্তং রক্তং চ কুপিতং বাতেনাতুগতং ত্বচি| অগ্নিদগ্ধনিভান্ স্ফোটান্ কুরুতে সর্বদেহগান্|| সজ্বরান্ সপরীদাহান্ বিদ্যাদ্বিস্ফোটকাংস্তু তান্” ইতি||১৮||

Adhikarana 17 (19-20) · Śloka 20

কক্ষাভাগেষু যে স্ফোটা জাযন্তে মাংসদারু(র)ণাঃ | অন্তর্দাহজ্বরকরা দীপ্তপাবকসন্নিভাঃ ||১৯|| সপ্তাহাদ্বা দশাহাদ্বা পক্ষাদ্বা ন্ঘন্তি মানবম্ | তামগ্নিরোহিণীং বিদ্যাদসাধ্যাং সন্নিপাততঃ ||২০||

কক্ষাভাগেষ্বিত্যাদি| অসাধ্যামিতি অত এবাস্যাশ্চিকিত্সিতেষু ন চিকিত্সাভিধানম্| ‘মাংসদারণা” ইত্যপি পাঠঃ| তথাহি তন্ত্রান্তরম্,- “পিত্তোত্কটা নৃণাং দোষাঃ প্রদীপ্তাঙ্গারসন্নিভান্| কক্ষাভাগেষু কুর্বন্তি তীব্রদাহরুজাজ্বরান্|| মাংসাবদারণান্ স্ফোটান্ যে হন্যুরনুপক্রমাত্| পক্ষাদ্দশাহাদর্বাগ্বা সা জ্ঞেযা বহ্নিরোহিণী” ইতি| তত্র বাতাধিকৈঃ সপ্তাহাত্, পিত্তাধিকৈর্দশাহাত্, কফাধিকৈঃ পক্ষাত্||১৯-২০||

Adhikarana 18 (20-22) · Śloka 23

নখমাংসমধিষ্ঠায পিত্তং বাতশ্চ বেদনাম্ | করোতি দাহপাকৌ চ তং ব্যাধিং চিপ্পমাদিশেত্ ||২১|| তদেবাক্ষতরোগাখ্যং তথোপনখমিত্যপি | অভিঘাতাত্ প্রদুষ্টো যো নখো রূক্ষোঽসিতঃ খরঃ ||২২|| ভবেত্তং কুনখং বিদ্যাত্ কুলীনমিতি সঞ্জ্ঞিতম্ |২৩|

নখেত্যাদি| চিপ্পমিতি তন্ত্রান্তরেঽঙ্গুলীবেষ্ঠকমিতি প্রসিদ্ধম্||২০-২২||-

Adhikarana 19 (23) · Śloka 24

গম্ভীরামল্পসংরম্ভাং সবর্ণামুপরিস্থিতাম্ ||২৩|| কফাদন্তঃপ্রপাকাং তাং বিদ্যাদনুশযীং ভিষক্ |২৪|

গম্ভীরামিত্যাদি| অন্তঃপাকেন গম্ভীরাম্| অল্পসংরম্ভাম্ অল্পশোথাম্| উপরিস্থিতাং মস্তকে স্থিতাম্||২৩||-

Adhikarana 20 (24) · Śloka 25

বিদারীকন্দবদ্বৃত্তাং কক্ষাবঙ্ক্ষণসন্ধিষু ||২৪|| রক্তাং বিদারিকাং বিদ্যাত্ সর্বজাং সর্বলক্ষণাম্ |২৫|

বিদারীকন্দবদিত্যাদি| বঙ্ক্ষণসন্ধিঃ গণ্ডকঃ| রক্তাং লোহিতাম্| সর্বজাং সন্নিপাতজাং; পরং তথাঽপি সাধ্যা, ন হি সর্ব এব সন্নিপাতজা ব্যাধযোঽসাধ্যাঃ| সর্বলক্ষণাং দোষসমুদাযলক্ষণাং, ন তু প্রত্যেকদোষলক্ষণাং, দোষেভ্যো দোষসমুদাযস্যান্যত্বাত্, চূর্ণহরিদ্রাসংযোগস্যেব| অন্যে তু “সর্বেভ্যো বাতপিত্তকফেভ্যঃ পৃথক্ দ্বিশস্ত্রিশো বা জাযত ইতি সর্বজা ইত্যস্যাঃ সাপ্তবিধ্যং দোষলিঙ্গৈঃ সূক্ষ্মমতিনাঽনুক্তমপ্যূহ্যম্” ইত্যাচক্ষতে; তন্নেচ্ছতি গযী “যেন ক্ষুদ্ররোগসামান্যন্যাযেনাস্যাঃ সাপ্তবিধ্যং ন প্রপদ্যতে, ন হি ক্ষুদ্ররোগেষু কোঽপি ব্যাধিঃ পঠিতো যঃ প্রত্যেকাদিদোষজঃ, অপি চ যদ্যাচার্যস্য সাপ্তবিধ্যমভিপ্রেতং স্যাত্তদা ‘দোষৈঃ সপ্তবিধা তু সা’ ইতি পাঠং কুর্যাত্; তন্ত্রান্তরে চেযং বাতকফান্বিতা পঠিতা, তস্মাদ্বাতকফাধিক্যেন হীনপিত্ততযা অস্যা উত্পত্তির্জ্ঞেযা” ইতি||২৪||-

Adhikarana 21 (25-27) · Śloka 28

প্রাপ্য মাংসসিরাস্নাযু শ্লেষ্মা মেদস্তথাঽনিলঃ ||২৫|| গ্রন্থিং কুর্বন্তি ভিন্নোঽসৌ মধুসর্পির্বসানিভম্ | স্রবত্যাস্রাবমত্যর্থং তত্র বৃদ্ধিং গতোঽনিলঃ ||২৬|| মাংসং বিশোষ্য গ্রথিতাং শর্করাং জনযেত্ পুনঃ | দুর্গন্ধং ক্লিন্নমত্যর্থং নানাবর্ণং ততঃ সিরাঃ ||২৭|| স্রবন্তি সহসা রক্তং তদ্বিদ্যাচ্ছর্করার্বুদম্ |২৮|

প্রাপ্যেত্যাদি| ইযং শর্করাসম্প্রাপ্তিরুক্তা, সা চ শর্করা হেতুঃ শর্করার্বুদস্য| কাঠিন্যাদেব শর্করাসাদৃশ্যেন শর্করা| অত্যগাধোচ্ছ্রাযাভ্যামর্বুদম্| নানাবর্ণং মধুঘৃতবসাসন্নিভম্| তত ইত্যাদি ততঃ শর্করাযাঃ সিরা রক্তং স্রবন্তীত্যর্থঃ| কেচিত্ শর্করা শর্করার্বুদং চেতি ব্যাধিদ্বযং বদন্তি; তন্নেচ্ছতি গযী, সঙ্খ্যাতিরেকাচ্ছর্করাযাঃ পৃথক্ত্বেনোক্তেরদর্শনাচ্চ||২৫-২৭||-

Adhikarana 22 (28) · Śloka 28

পামাবিচর্চ্যৌ কুষ্ঠেষু রকসা চ প্রকীর্তিতা ||২৮||

পামেত্যাদি| কুষ্ঠেষ্বিতি কুষ্ঠনিদানে ইত্যর্থঃ||২৮||

Adhikarana 23 (29) · Śloka 29

পরিক্রমণশীলস্য বাযুরত্যর্থরূক্ষযোঃ | পাদযোঃ কুরুতে দারীং সরুজাং তলসংশ্রিতঃ ||২৯||

পরীত্যাদি| পরিক্রমণশীলস্য সর্বতো ভ্রমণস্বভাবস্য| দারীমিতি বিপাদিকাং; ‘বিশ্রাবাকু’ ইতি লোকে||২৯||

Adhikarana 24 (30-31) · Śloka 31

শর্করোন্মথিতে পাদে ক্ষতে বা কণ্টকাদিভিঃ | মেদোরক্তানুগৈশ্চৈব দোষৈর্বা জাযতে নৃণাম্ ||৩০|| সকীলকঠিনো গ্রন্থির্নিম্নমধ্যোন্নতোঽপি বা | কোলমাত্রঃ সরুক্ স্রাবী জাযতে কদরস্তু সঃ ||৩১||

শর্করেত্যাদি| শর্করা ঘটকর্পরখণ্ডাদযঃ, তাভিরুন্মথিতে পীডিতে| কীলেন সদৃশং সকীলমিত্যব্যযীভাবঃ, সকীলং চাসৌ কঠিনশ্চ সকীলকঠিনঃ| ‘হস্তযোরপি’ ইতি ভোজঃ||৩০-৩১||

Adhikarana 25 (32) · Śloka 32

ক্লিন্নাঙ্গুল্যন্তরৌ পাদৌ কণ্ডূদাহরুগন্বিতৌ | দুষ্টকর্দমসংস্পর্শাদলসং তং বিনির্দিশেত্ ||৩২||

ক্লিন্নেত্যাদি| অযং কফেন সশোণিতেন||৩২||

Adhikarana 26 (33-34) · Śloka 34

রোমকূপানুগং পিত্তং বাতেন সহ মূর্চ্ছিতম্ | প্রচ্যাবযতি রোমাণি ততঃ শ্লেষ্মা সশোণিতঃ ||৩৩|| রুণদ্ধি রোমকূপাংস্তু ততোঽন্যেষামসম্ভবঃ | তদিন্দ্রলুপ্তং খালিত্যং রুজ্যেতি চ বিভাব্যতে ||৩৪||

রোমকূপানুগমিত্যাদি| খালিত্যং পুংসামেব ন তু যোষিতাম্| তথাচ বিদেহঃ- “অত্যন্তসুকুমারাঙ্গ্যো রজো দুষ্টং স্রবন্তি চ| অব্যাযামরতা যস্মাত্তস্মান্ন খলিতিঃ স্ত্রিযাঃ” ইতি||৩৩-৩৪||

Adhikarana 27 (35) · Śloka 35

দারুণা কণ্ডুরা রূক্ষা কেশভূমিঃ প্রপাট্যতে | কফবাতপ্রকোপেণ বিদ্যাদ্দারুণকং তু তম্ ||৩৫||

দারুণেন্যাদি| দারুণা কঠিনা| কণ্ডুরা কণ্ডূযুক্তা| প্রপাট্যতে প্রকর্ষেণ পাট্যতে | পিত্তরুধিরযোরপ্যনুবন্ধো জ্ঞেযঃ, বিদেহবচনান্| দারুণকং ‘পহা ’ ইতি লোকে||৩৫||

Adhikarana 28 (36) · Śloka 36

অরূংষি বহুবক্ত্রাণি বহুক্লেদীনি মূর্ধনি | কফাসৃক্কৃমিকোপেন নৃণাং বিদ্যাদরুংষিকাম্ ||৩৬||

অরূংষীত্যাদি| অরূংষি ব্রণান্||৩৬||

Adhikarana 29 (37) · Śloka 37

ক্রোধশোকশ্রমকৃতঃ শরীরোষ্মা শিরোগতঃ | পিত্তং চ কেশান্ পচতি পলিতং তেন জাযতে ||৩৭||

ক্রোধেত্যাদি| ক্রোধাদিকৃতেন শরীরোষ্মণা শিরোগতেন বৈকৃতং, পিত্তেন পুনঃ প্রাকৃতং পলিতম্; অন্যথা পিত্তোষ্মণোরভেদাত্ পুনরুক্তিদোষঃ স্যাত্; পঞ্জিকাকারস্তু “শরীরোষ্মা পাবকঃ, পিত্তং তদাশ্রযঃ, এতৌ পিত্তপাবকাবেকীভূয কেশান্ পচতঃ; এতেন কেবলোষ্মকৃতস্য বৈকৃতস্যাদোষজপ্রসঙ্গো নিরাকৃতঃ” ইতি মন্যতে||৩৭||

Adhikarana 30 (38) · Śloka 38

দাহজ্বররুজাবন্তস্তাম্রাঃ স্ফোটাঃ সপীতকাঃ | গাত্রেষু বদনে চান্তর্বিজ্ঞেযাস্তা মসূরিকাঃ ||৩৮||

দাহেত্যাদি| তাম্রত্বেন শোণিতানুবন্ধোঽপ্যেষাং; তথাহি তন্ত্রান্তরং- “পিত্তং শোণিতসংসৃষ্টং যদা দূষযতি ত্বচম্| তদা করোতি পিডকাঃ সর্বগাত্রেষু দেহিনঃ|| মসূরমুদ্গমাষাণাং তুল্যাঃ কোলোপমা অপি| মসূরিকাস্তু বিজ্ঞেযাঃ পিডকা রক্তপিত্তজাঃ”- ইতি| এতাসাং ‘শীতলিকা’ ইতি লোকাশ্রযা সঞ্জ্ঞা||৩৮||

Adhikarana 31 (39) · Śloka 39

শাল্মলীকণ্টকপ্রখ্যাঃ কফমারুতশোণিতৈঃ | জাযন্তে পিডকা যূনাং বক্ত্রে যা মুখদূষিকাঃ ||৩৯||

শাল্মলীত্যাদি| শাল্মলীকণ্টকপ্রখ্যাঃ শাল্মলীকণ্টকসদৃশাঃ| যূনাং তরুণানাম্||৩৯||

Adhikarana 32 (40) · Śloka 40

কণ্টকৈরাচিতং বৃত্তং কণ্ডূমত্ পাণ্ডুমণ্ডলম্ | পদ্মিনীকণ্টকপ্রখ্যৈস্তদাখ্যং কফবাতজম্ ||৪০||

কণ্টকৈরিত্যাদি| পদ্মিনীকণ্টকপ্রখ্যৈঃ পদ্মিনীকণ্টকসদৃশৈঃ| আচিতং ব্যাপ্তম্| তদাখ্যং পদ্মিনীকণ্টকাখ্যম্||৪০||

Adhikarana 33 (41) · Śloka 41

নীরুজং সমমুত্সন্নং মণ্ডলং কফরক্তজম্ | সহজং রক্তমীষচ্চ শ্লক্ষ্ণং জতুমণিং বিদুঃ ||৪১||

নীরুজমিত্যাদি| সমং সূক্ষ্মম্| উত্সন্নমুন্নতম্| সহজং জন্মবলপ্রবৃত্তম্| শ্লক্ষ্ণমকর্কশম্| জতুমণিঃ ‘জদুল’ ইতি লোকাশ্রযা তত্সঞ্জ্ঞা||৪১||

Adhikarana 34 (42) · Śloka 42

অবেদনং স্থিরং চৈব যস্য গাত্রেষু দৃশ্যতে | মাষবত্কৃষ্ণমুত্সন্নমনিলান্মষকং বদেত্ ||৪২||

অবেদনমিত্যাদি| স্থিরং কঠিনম্||৪২||

Adhikarana 35 (43) · Śloka 43

কৃষ্ণানি তিলমাত্রাণি নীরুজানি সমানি চ | বাতপিত্তকফোচ্ছোষাত্তান্ বিদ্যাত্তিলকালকান্ ||৪৩||

কৃষ্ণানীত্যাদি| বাতপিত্তকফোচ্ছোষাদিতি বাতপিত্তাভ্যাং কফস্য শোষাদিত্যর্থঃ| অন্যে তু “বাতপিত্তাসৃগুচ্ছোষাত্” ইতি পঠন্তি, ব্যাখ্যানযন্তি চ- বাতপিত্তাভ্যাং রক্তস্য শোষাদিত্যর্থঃ; অত এব তিলকালকে কার্ষ্ণ্যম্| ‘বাতপিত্তকফোদ্রেকাত্’ ইতি ক্বচিত্ পাঠঃ, তস্মিন্ পাঠে কফোদ্রেকলক্ষণং তিলকালকে নাস্তি||৪৩||

Adhikarana 36 (44) · Śloka 44

মণ্ডলং মহদল্পং বা শ্যামং বা যদি বা সিতম্ | সহজং নীরুজং গাত্রে ন্যচ্ছমিত্যভিধীযতে ||৪৪||

মণ্ডলমিত্যাদি| সহজং জন্মবলপ্রবৃত্তম্| ন্যচ্ছং লোকা লাঞ্ছনমিতি বদন্তি; পিত্তরক্তান্বিতো বাযুরস্য কারণম্||৪৪||

Adhikarana 37 (45) · Śloka 45

সমুত্থাননিদানাভ্যাং চর্মকীলং প্রকীর্তিতম্ |৪৫|

সমুত্থানেত্যাদি| সমুত্থানং সম্প্রাপ্তিঃ, নিদানং হেতুলক্ষণনির্দেশঃ| গযী তু সমুত্থাননিদানাভ্যামিত্যাদি চর্মকীলপ্রতিপাদকং বাক্যমেব ন পঠতি|৪৫|-

Adhikarana 38 (45-46) · Śloka 47

ক্রোধাযাসপ্রকুপিতো বাযুঃ পিত্তেন সংযুতঃ ||৪৫|| সহসা মুখমাগত্য মণ্ডলং বিসৃজত্যতঃ | নীরুজং তনুকং শ্যাবং মুখে ব্যঙ্গং তমাদিশেত্ ||৪৬|| কৃষ্ণমেবঙ্গুণং গাত্রে মুখে বা নীলিকাং বিদুঃ |৪৭|

ক্রোধেত্যাদি| “ব্যঙ্গমেব স্থানান্তরেণ বর্ণান্তরেণ চ নীলিকা” ইত্যন্যে||৪৫-৪৬||-

Adhikarana 39 (47-49) · Śloka 50

মর্দনাত্ পীডনাচ্চাতি তথৈবাপ্যভিঘাততঃ | মেঢ্রচর্ম যদা বাযুর্ভজতে সর্বতশ্চরঃ ||৪৭|| তদা বাতোপসৃষ্টং তু চর্ম প্রতিনিবর্ততে | মণেরধস্তাত্ কোশশ্চ গ্রন্থিরূপেণ লম্বতে ||৪৮|| সবেদনঃ সদাহশ্চ পাকং চ ব্রজতি ক্বচিত্ | মারুতাগন্তুসম্ভূতাং বিদ্যাত্তাং পরিবর্তিকাম্ ||৪৯|| সকণ্ডূঃ কঠিনা চাপি সৈব শ্লেষ্মসমুত্থিতা |৫০|

মর্দনাদিত্যাদি| অতীতি মর্দনপীডনাভ্যাং প্রত্যেকং সম্বধ্যতে; সম্যক্কৃতৌ হি মর্দনপীডনৌ বাযুপ্রশান্তিকরাবেব ভবতঃ| ভজতে আশ্রযতি| সর্বতশ্চরো বাযুর্ব্যানঃ| চর্ম প্রতিনিবর্তত ইতি মণিং বিহায সর্বতো ব্যাঘুটতীত্যর্থঃ| কোশঃ চর্মকোশঃ| সৈব পরিবর্তিকেত্যর্থঃ||৪৭-৪৯||-

Adhikarana 40 (50-51) · Śloka 52

অল্পীযঃখাং যদা হর্ষাদ্বালাং গচ্ছেত্ স্ত্রিযং নরঃ ||৫০|| হস্তাভিঘাতাদথবা চর্মণ্যুদ্বর্তিতে বলাত্ | মর্দনাত্পীডনাদ্বাঽপি শুক্রবেগবিঘাততঃ ||৫১|| যস্যাবপাট্যতে চর্ম তাং বিদ্যাদবপাটিকাম্ |৫২|

অল্পীযঃখামিত্যাদি| অল্পীযঃখাম্ অল্পতরযোনিদ্বারাম্| চর্মণ্যুদ্বর্তিতে উত্তানীভূয ব্যাঘুটিতে| যস্য চর্ম মর্দনাদিভিরবপাট্যতে বিদীর্যতে তস্য তামবপাটিকাং বিদ্যাদিত্যর্থঃ| চর্ম কর্তৃ| উদ্বর্ততে নিশ্চিতমূর্ধ্বং প্রবর্তত ইত্যন্যে||৫০-৫১||-

Adhikarana 41 (52-54) · Śloka 54

বাতোপসৃষ্টমেবং তু চর্ম সংশ্রযতে মণিম্ ||৫২|| মণিশ্চর্মোপনদ্ধস্তু মূত্রস্রোতো রুণদ্ধি চ | নিরুদ্ধপ্রকশে তস্মিন্মন্দধারমবেদনম্ ||৫৩|| মূত্রং প্রবর্ততে জন্তোর্মণির্ন চ বিদীর্যতে | নিরুদ্ধপ্রকশং বিদ্যাদ্দুরূঢাং চাবপাটিকাম্ ||৫৪||

বাতোপসৃষ্টমিত্যাদি| এবমিতি মর্দনপীডনাভিঘাতাদিনেত্যর্থঃ| সংশ্রযতে সমগ্রং শ্রযতে| দুরূঢাং চাবপাটিকামিতি অবপাটিকাঽপি দুরূঢা নিরুদ্ধপ্রকাশাখ্যাং লভতে||৫২-৫৪||

Adhikarana 42 (55-56) · Śloka 56

বেগসন্ধারণাদ্বাযুর্বিহতো গুদমাশ্রিতঃ | নিরুণদ্ধি মহত্স্রোতঃ সূক্ষ্মদ্বারং করোতি চ ||৫৫|| মার্গস্য সৌক্ষ্ম্যাত্ কৃচ্ছ্রেণ পুরীষং তস্য গচ্ছতি | সন্নিরুদ্ধগুদং ব্যাধিমেনং বিদ্যাত্ সুদুস্তরম্ ||৫৬||

বেগসন্ধারণাদিত্যাদি| বিহতো নিরুদ্ধগতিঃ| মহত্স্রোতো গুদম্||৫৫-৫৬||

Adhikarana 43 (57-58) · Śloka 58

শকৃন্মূত্রসমাযুক্তেঽধৌতেঽপানে শিশোর্ভবেত্ | স্বিন্নস্যাস্নাপ্যমানস্য কণ্ডূ রক্তকফোদ্ভবা ||৫৭|| কণ্ডূযনাত্ততঃ ক্ষিপ্রং স্ফোটাঃ স্রাবশ্চ জাযতে | একীভূতং ব্রণৈর্ঘোরং তং বিদ্যাদহিপূতনম্ ||৫৮||

শকৃদিত্যাদি| শকৃন্মূত্রসমাযুক্তেঽপানে গুদে, অধৌতে অক্রিযমাণশৌচে, শিশো রক্তকফোদ্ভবা কণ্ডূর্ভবেদিতি সম্বন্ধঃ| কথম্ভূতস্য? স্বিন্নস্য অস্নাপ্যমানস্য চ| একীভূতমপানং ব্রণৈঃ ‘সহ’ ইত্যধ্যাহার্যম্| অহিপূতনং কফরক্তজং জ্ঞেযম্||৫৭-৫৮||

Adhikarana 44 (59-60) · Śloka 60

স্নানোত্সাদনহীনস্য মলো বৃষণসংশ্রিতঃ | যদা প্রক্লিদ্যতে স্বেদাত্ কণ্ডূং সঞ্জনযেত্তদা ||৫৯|| তত্র কণ্ডূযনাত্ ক্ষিপ্রং স্ফোটাঃ স্রাবশ্চ জাযতে | প্রাহুর্বৃষণকচ্ছূং তাং শ্লেষ্মরক্তপ্রকোপজাম্ ||৬০||

স্নানোত্সাদনেত্যাদি| উত্সাদনম্ উদ্বর্তনম্||৫৯-৬০||

Adhikarana 45 (61) · Śloka 61

প্রবাহণাতিসারাভ্যাং নির্গচ্ছতি গুদং বহিঃ | রূক্ষদুর্বলদেহস্য তং গুদভ্রংশমাদিশেত্ ||৬১||

প্রবাহণেত্যাদি| প্রবাহণং প্রকর্ষেণ নির্বাহণম্| অযং বাতকোপজঃ||৬১||

Adhikarana puShpikA · Śloka 13

ইতি সুশ্রুতসংহিতাযাং নিদানস্থানে ক্ষুদ্ররোগনিদানং নাম ত্রযোদশোঽধ্যাযঃ ||১৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং নিদানস্থানে ত্রযোদশোঽধ্যাযঃ||১৩||