Adhikarana 1 (1-2) · Śloka 2
অথাতঃ কুষ্ঠনিদানং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
View original
अथातः कुष्ठनिदानं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথেত্যাদি||১-২||
5. kuṣṭhanidānam
Adhikarana 2 (3) · Śloka 3
মিথ্যাহারাচারস্য বিশেষাদ্গুরুবিরুদ্ধাসাত্ম্যাজীর্ণাহিতাশিনঃ স্নেহপীতস্য বান্তস্য বা ব্যাযামগ্রাম্যধর্মসেবিনো গ্রাম্যানূপৌদকমাংসানি বা পযসাঽভীক্ষ্ণমশ্নতো যো বা মজ্জত্যপ্সূষ্মাভিতপ্তঃ সহসা ছর্দিং বা প্রতিহন্তি, তস্য পিত্তশ্লেষ্মাণৌ প্রকুপিতৌ পরিগৃহ্যানিলঃ প্রবৃদ্ধস্তির্যগ্গাঃ সিরাঃ সম্প্রপদ্য সমুদ্ধূয বাহ্যং মার্গং প্রতি সমন্তাদ্বিক্ষিপতি, যত্র যত্র চ দোষো বিক্ষিপ্তো নিশ্চরতি তত্র তত্র মণ্ডলানি প্রাদুর্ভবন্তি, এবং সমুত্পন্নস্ত্বচি দোষস্তত্র তত্র চ পরিবৃদ্ধিং প্রাপ্যাপ্রতিক্রিযমাণোঽভ্যন্তরং প্রতিপদ্যতে ধাতূনভিদূষযন্ ||৩||
View original
मिथ्याहाराचारस्य विशेषाद्गुरुविरुद्धासात्म्याजीर्णाहिताशिनः स्नेहपीतस्य वान्तस्य वा व्यायामग्राम्यधर्मसेविनो ग्राम्यानूपौदकमांसानि वा पयसाऽभीक्ष्णमश्नतो यो वा मज्जत्यप्सूष्माभितप्तः सहसा छर्दिं वा प्रतिहन्ति, तस्य पित्तश्लेष्माणौ प्रकुपितौ परिगृह्यानिलः प्रवृद्धस्तिर्यग्गाः सिराः सम्प्रपद्य समुद्धूय बाह्यं मार्गं प्रति समन्ताद्विक्षिपति, यत्र यत्र च दोषो विक्षिप्तो निश्चरति तत्र तत्र मण्डलानि प्रादुर्भवन्ति, एवं समुत्पन्नस्त्वचि दोषस्तत्र तत्र च परिवृद्धिं प्राप्याप्रतिक्रियमाणोऽभ्यन्तरं प्रतिपद्यते धातूनभिदूषयन् ||३||
🔊 Audio coming soon
ইদানীং হেতুমাহ- মিথ্যেত্যাদি| মিথ্যাহারাচারস্য শাস্ত্রোক্তবিধিভ্রষ্টাহারাচারস্যেত্যর্থঃ| সম্প্রাপ্তিমাহ- তস্যেত্যাদি| তস্য মিথ্যাহারাচারস্যেত্যাদিকস্য| সমুদ্ভূয আক্ষিপ্য, সমন্তাত্ সর্বত্র; এতেন সর্বদেহগতত্বং রোগস্য সূচযতি||৩||
Adhikarana 3 (4) · Śloka 4
তস্য পূর্বরূপাণি- ত্বক্পারুষ্যমকস্মাদ্রোমহর্ষঃ কণ্ডূঃ স্বেদবাহুল্যমস্বেদনং বাঽঙ্গপ্রদেশানাং স্বাপঃ ক্ষতবিসর্পণমসৃজঃ কৃষ্ণতা চেতি ||৪||
View original
तस्य पूर्वरूपाणि- त्वक्पारुष्यमकस्माद्रोमहर्षः कण्डूः स्वेदबाहुल्यमस्वेदनं वाऽङ्गप्रदेशानां स्वापः क्षतविसर्पणमसृजः कृष्णता चेति ||४||
🔊 Audio coming soon
পূর্বরূপমাহ- তস্যেত্যাদি| অকস্মাত্ কারণং বিনা| স্বাপঃ স্পর্শাজ্ঞানম্||৪||
Adhikarana 4 (5) · Śloka 5
তত্র সপ্ত মহাকুষ্ঠানি, একাদশ ক্ষুদ্রকুষ্ঠানি, এবমষ্টাদশ কুষ্ঠানি ভবন্তি | তত্র মহাকুষ্ঠান্যরুণোদুম্বরর্ষ্য(র্ক্ষ)জিহ্বকপালকাকণকপুণ্ডরীকদদ্রুকুষ্ঠানীতি | ক্ষুদ্রকুষ্ঠান্যপি স্থূলারুষ্কং মহাকুষ্ঠমেককুষ্ঠং চর্মদলং বিসর্পঃ পরিসর্পঃ সিধ্মং বিচর্চিকা কিটিভং (মং) পামা রকসা চেতি ||৫||
View original
तत्र सप्त महाकुष्ठानि, एकादश क्षुद्रकुष्ठानि, एवमष्टादश कुष्ठानि भवन्ति | तत्र महाकुष्ठान्यरुणोदुम्बरर्ष्य(र्क्ष)जिह्वकपालकाकणकपुण्डरीकदद्रुकुष्ठानीति | क्षुद्रकुष्ठान्यपि स्थूलारुष्कं महाकुष्ठमेककुष्ठं चर्मदलं विसर्पः परिसर्पः सिध्मं विचर्चिका किटिभं (मं) पामा रकसा चेति ||५||
🔊 Audio coming soon
ইদানীং সঙ্খ্যামাহ- তত্রেত্যাদি| মহত্ত্বমুত্তরোত্তরধাত্বনুপ্রবেশাত্| একাদশকুষ্ঠানাং ক্ষুদ্রত্বমুত্তরোত্তরধাত্বননুপ্রবেশাত্| অষ্টাদশ কুষ্ঠানি ভবন্তীতি দিঙ্মাত্রমিদং দর্শিতং, কুষ্ঠানামনিযতসঙ্খ্যত্বাত্; তথা চ চরকঃ- “সপ্তবিধোঽষ্টাদশবিধোঽসঙ্খ্যেযবিধো বা” (চ. নি. ৫) ইতি| মহাকুষ্ঠানি নামতঃ প্রাহ- তত্র মহাকুষ্ঠানীত্যাদি| ক্ষুদ্রকুষ্ঠানি নামতঃ প্রাহ- ক্ষুদ্রকুষ্ঠান্যপীত্যাদি||৫||
Adhikarana 5 (6) · Śloka 6
সর্বাণি কুষ্ঠানি সবাতানি সপিত্তানি সশ্লেষ্মাণি সক্রিমীণি চ ভবন্তি, উত্সন্নতস্তু দোষগ্রহণমভিভবাত্ ||৬||
View original
सर्वाणि कुष्ठानि सवातानि सपित्तानि सश्लेष्माणि सक्रिमीणि च भवन्ति, उत्सन्नतस्तु दोषग्रहणमभिभवात् ||६||
🔊 Audio coming soon
সর্বেষ্বেব কুষ্ঠেষু সর্বেষামেব দোষাণাং ক্রিমীণাং চ সম্ভবং দর্শযন্নাহ- সর্বাণীত্যাদি| সর্বাণি ক্ষুদ্রাণি মহান্তি চ| কথং তর্হি বাতেনারুণমিত্যাদীত্যাশঙ্ক্যাহ- উত্সন্নতস্তু দোষগ্রহণমভিভবাদিতি; উত্সন্নত ঔত্কট্যাত্ দোষগ্রহণম্, অভিভবাত্ ‘ইতরদোষযোঃ’ ইতি শেষঃ||৬||
Adhikarana 6 (7) · Śloka 7
তত্র বাতেনারুণং, পিত্তেনোদুম্বরর্ষ্য(র্ক্ষ)জিহ্বকপালকাকণকানি, শ্লেষ্মণা পুণ্ডরীকং দদ্রুকুষ্ঠং চেতি | তেষাং মহত্ত্বং ক্রিযাগুরুত্বমুত্তরোত্তরং ধাত্বনুপ্রবেশাদসাধ্যত্বং চেতি ||৭||
View original
तत्र वातेनारुणं, पित्तेनोदुम्बरर्ष्य(र्क्ष)जिह्वकपालकाकणकानि, श्लेष्मणा पुण्डरीकं दद्रुकुष्ठं चेति | तेषां महत्त्वं क्रियागुरुत्वमुत्तरोत्तरं धात्वनुप्रवेशादसाध्यत्वं चेति ||७||
🔊 Audio coming soon
যস্য দোষস্য যস্মিন্ কুষ্ঠে ঔত্কট্যং তেন তদ্দর্শযন্নাহ- তত্রেত্যাদি| তত্রারুণাদীনাং সপ্তানাং মহত্ত্বাদিষু হেতুং দর্শযন্নাহ- তেষামিত্যাদি| অনুশব্দেন পশ্চাদর্থবাচিনা মহত্বেঽসাধ্যত্বেঽপি কাকণকবর্জং কালান্তরং চ সূচ্যতে; কাকণকং পুনরুত্পত্তাবেবাসাধ্যং, ব্যাধিস্বভাবাত্| অসাধ্যত্বং চেতি চকারো ধাত্বনুপ্রবেশাচ্চেত্যনন্তরং দ্রষ্টব্যঃ; তেনানুক্তমারম্ভকদোষমহত্ত্বং সমুচ্চিনোতি||৭||
Adhikarana 7 (8) · Śloka 8
তত্র, বাতেনারুণাভানি তনূনি বিসর্পীণি তোদভেদস্বাপযুক্তান্যরুণানি | পিত্তেন পক্বোদুম্বরফলাকৃতিবর্ণান্যৌদুম্বরাণি , ঋষ্য(ক্ষ)জিহ্বাপ্রকাশানি খরাণি ঋষ্য(ক্ষ)জিহ্বানি, কৃষ্ণকপালিকাপ্রকাশানি কপালকুষ্ঠানি, কাকণন্তিকাফলসদৃশান্যতীব রক্তকৃষ্ণানি কাকণকানি ; তেষাং চতুর্ণামপ্যোষচোষপরিদাহধূমাযনানি ক্ষিপ্রোত্থানপ্রপাকভেদিত্বানি ক্রিমিজন্ম চ সামান্যানি লিঙ্গানি | শ্লেষ্মণা পুণ্ডরীকপত্রপ্রকাশানি পৌণ্ডরীকাণি, অতসীপুষ্পবর্ণানি তাম্রাণি বা বিসর্পীণি পিডকাবন্তি চ দদ্রুকুষ্ঠানি; তযোর্দ্বযোরপ্যুত্সন্নতা পরিমণ্ডলতা কণ্ডূশ্চিরোত্থানত্বং চেতি সামান্যানি রূপাণি ||৮||
View original
तत्र, वातेनारुणाभानि तनूनि विसर्पीणि तोदभेदस्वापयुक्तान्यरुणानि | पित्तेन पक्वोदुम्बरफलाकृतिवर्णान्यौदुम्बराणि , ऋष्य(क्ष)जिह्वाप्रकाशानि खराणि ऋष्य(क्ष)जिह्वानि, कृष्णकपालिकाप्रकाशानि कपालकुष्ठानि, काकणन्तिकाफलसदृशान्यतीव रक्तकृष्णानि काकणकानि ; तेषां चतुर्णामप्योषचोषपरिदाहधूमायनानि क्षिप्रोत्थानप्रपाकभेदित्वानि क्रिमिजन्म च सामान्यानि लिङ्गानि | श्लेष्मणा पुण्डरीकपत्रप्रकाशानि पौण्डरीकाणि, अतसीपुष्पवर्णानि ताम्राणि वा विसर्पीणि पिडकावन्ति च दद्रुकुष्ठानि; तयोर्द्वयोरप्युत्सन्नता परिमण्डलता कण्डूश्चिरोत्थानत्वं चेति सामान्यानि रूपाणि ||८||
🔊 Audio coming soon
তত্র মহাকুষ্ঠানাং লক্ষণং দর্শযন্নাহ- তত্র বাতেনেত্যাদি| ঋষ্যজিহ্বাপ্রকাশানীতি ঋষ্যজিহ্বাযা ইব প্রকাশঃ সাদৃশ্যং যেষাং তানি খরত্বযুক্তানি, ঋষ্যো নীলাণ্ডঃ ‘রোরু ’ ইতি প্রসিদ্ধঃ; অন্যে ‘ঋক্ষ’ ইতি পঠন্তি, ঋক্ষো ‘রীছ’ ইতি লোকে| কৃষ্ণকপালিকা কৃষ্ণকর্করা| কাকণন্তিকা গুঞ্জা, ‘চিরহণ্টিকা’ ইতি প্রসিদ্ধা, তত্ফলবদ্রক্তানি মধ্যে কৃষ্ণানি| উদুম্বরাদীনাং পিত্তকৃতত্বং দর্শযন্নাহ- তেষামিত্যাদি| উষোঽনলসমীপ ইবোপতাপঃ, প্লুষ্টস্যেব বেদনাবিশেষ ইত্যন্যে; চোষ আচূষ্যত ইব বেদনাবিশেষঃ, পিপাসেত্যন্যে; পরিদাহঃ সর্বতো দাহঃ; ধূমাযনং ধূমোপহতস্যেব, ‘ধূমোদ্বমনমিবাঙ্গানাম্’ ইত্যেকে| পুণ্ডরীকদদ্রুকুষ্ঠযোর্লক্ষণং দর্শযন্নাহ- শ্লেষ্মণেত্যাদি| পুণ্ডরীকং শ্বেতপদ্মম্| দদ্রুকুষ্ঠং দ্বিবিধং- সিতমসিতং চ; অসিতস্য মহোপক্রমসাধ্যত্বাদনুবন্ধিত্বপ্রকর্ষাচ্চ মহাকুষ্ঠেষু মধ্যে সুশ্রুতে পাঠঃ, সিতদদ্রুকুষ্ঠস্য সুখসাধ্যত্বাদুত্তরোত্তরধাত্বনুপ্রবেশাভাবাত্তথাঽত্যর্থপীডারহিতত্বাচ্চ চরকে ক্ষুদ্রকুষ্ঠেষু মধ্যে পাঠ ইত্যদোষঃ| দদ্রুসিধ্মযোঃ সুশ্রুতচরকোদিতযোরভিধানভেদ ইতি জেজ্ঝটঃ সমাদধতি, তন্নেচ্ছতি গযী| তযোঃ পুণ্ডরীকদদ্রুকুষ্ঠযোঃ পিত্তকফকৃতত্বং দর্শযন্নাহ- তযোরিত্যাদি| পরিমণ্ডলতা পরিপূর্ণমণ্ডলতা||৮||
Adhikarana 8 (9) · Śloka 9
ক্ষুদ্রকুষ্ঠান্যত ঊর্ধ্বং বক্ষ্যামঃ- স্থূলানি সন্ধিষ্বতিদারুণানি স্থূলারুষি স্যুঃ কঠিনান্যরূংষি |৯|
View original
क्षुद्रकुष्ठान्यत ऊर्ध्वं वक्ष्यामः- स्थूलानि सन्धिष्वतिदारुणानि स्थूलारुषि स्युः कठिनान्यरूंषि |९|
🔊 Audio coming soon
ক্ষুদ্রকুষ্ঠেষু প্রাক্ স্থূলারুষ্কমাহ- স্থূলানীত্যাদি| স্থূলানি স্থূলমূলানি| দারুণানি কৃচ্ছ্রসাধ্যানি| অরূংষি ব্রণাঃ|৯|-
Adhikarana 9 (9) · Śloka 9
ত্বক্কোচভেদস্বপনাঙ্গসাদাঃ কুষ্ঠে মহত্পূর্বযুতে ভবন্তি ||৯||
View original
त्वक्कोचभेदस्वपनाङ्गसादाः कुष्ठे महत्पूर्वयुते भवन्ति ||९||
🔊 Audio coming soon
মহাকুষ্ঠলক্ষণমাহ- ত্বক্কোচেত্যাদি| ত্বক্শব্দঃ কোচভেদস্বপ্নৈঃ সহ প্রত্যেকং সম্বধ্যতে; তেন ত্বক্কোচঃ ত্বক্সঙ্কোচঃ, ত্বগ্ভেদঃ ত্বগ্বিদারণং, ত্বক্স্বপনং ত্বচোঽচেতনত্বম্, অঙ্গসাদোঽঙ্গগ্লানিঃ| কুষ্ঠে মহত্পূর্বযুত ইতি মহাকুষ্ঠ ইত্যর্থঃ||৯||
Adhikarana 10 (10) · Śloka 10
কৃষ্ণারুণং যেন ভবেচ্ছরীরং তদেককুষ্ঠং প্রবদন্তি কুষ্ঠম্ |১০|
View original
कृष्णारुणं येन भवेच्छरीरं तदेककुष्ठं प्रवदन्ति कुष्ठम् |१०|
🔊 Audio coming soon
এককুষ্ঠমাহ- কুষ্ণারুণমিত্যাদি|১০|-
Adhikarana 11 (10) · Śloka 10
স্যুর্যেন কণ্ডূব্যথনৌষচোষাস্তলেষু তচ্চর্মদলং বদন্তি ||১০||
View original
स्युर्येन कण्डूव्यथनौषचोषास्तलेषु तच्चर्मदलं वदन्ति ||१०||
🔊 Audio coming soon
চর্মদলমাহ- স্যুর্যেনেত্যাদি| চোষ আচূষণমিব| তলেষু হস্তপাদতলেষু||১০||
Adhikarana 12 (11) · Śloka 11
বিসর্পবত্ সর্পতি সর্বতো যস্ত্বগ্রক্তমাংসান্যভিভূয শীঘ্রম্ | মূর্চ্ছাবিদাহারতিতোদপাকান্ কৃত্বা বিসর্পঃ স ভবেদ্বিকারঃ ||১১||
View original
विसर्पवत् सर्पति सर्वतो यस्त्वग्रक्तमांसान्यभिभूय शीघ्रम् | मूर्च्छाविदाहारतितोदपाकान् कृत्वा विसर्पः स भवेद्विकारः ||११||
🔊 Audio coming soon
বিসর্পকুষ্ঠলক্ষণমাহ- বিসর্পবদিত্যাদি| অত্রোক্তবিসর্পাখ্যকুষ্ঠস্য বক্ষ্যমাণবিসর্পরোগস্য চ চিরবিসর্পণশীঘ্রবিসর্পণতো ভেদঃ||১১||
Adhikarana 13 (12) · Śloka 12
শনৈঃ শরীরে পিডকাঃ স্রবন্ত্যঃ সর্পন্তি যাস্তং পরিসর্পমাহুঃ |১২|
View original
शनैः शरीरे पिडकाः स्रवन्त्यः सर्पन्ति यास्तं परिसर्पमाहुः |१२|
🔊 Audio coming soon
পরিসর্পমাহ- শনৈরিত্যাদি|১২|-
Adhikarana 14 (12) · Śloka 12
কণ্ড্বন্বিতং শ্বেতমপাযি সিধ্ম বিদ্যাত্তনু প্রাযশ ঊর্ধ্বকাযে ||১২||
View original
कण्ड्वन्वितं श्वेतमपायि सिध्म विद्यात्तनु प्रायश ऊर्ध्वकाये ||१२||
🔊 Audio coming soon
সিধ্মকুষ্ঠমাহ- কুণ্ড্বন্বিতমিত্যাদি| অপাযি অকষ্টকারি | প্রাযশ ঊর্ধ্বকায ইতি প্রাযঃশব্দোপাদানাদধঃকাযেঽপি কদাচিদ্ভবতি| সিধ্মকুষ্ঠং দ্বিবিধং- পুষ্পিকাসিধ্মং, সিধ্মং চ; পুষ্পিকাসিধ্মস্য সুখসাধ্যত্বাত্ সুশ্রুতে ক্ষুদ্রকুষ্ঠেষু পাঠঃ, সিধ্মস্য দুঃখসাধ্যত্বাচ্চরকে মহাকুষ্ঠে পাঠ ইত্যদোষঃ||১২||
Adhikarana 15 (13) · Śloka 13
রাজ্যোঽতিকণ্ড্বর্তিরুজঃ সরূক্ষা ভবন্তি গাত্রেষু বিচর্চিকাযাম্ | কণ্ডূমতী দাহরুজোপপন্না বিপাদিকা পাদগতেযমেব ||১৩||
View original
राज्योऽतिकण्ड्वर्तिरुजः सरूक्षा भवन्ति गात्रेषु विचर्चिकायाम् | कण्डूमती दाहरुजोपपन्ना विपादिका पादगतेयमेव ||१३||
🔊 Audio coming soon
বিচর্চিকামাহ- রাজ্য ইত্যাদি| রাজ্যো রেখাঃ, তাশ্চ সরূক্ষা ভবন্তি| কণ্ড্বর্তিঃ খর্জূপীডা, রুজো বেদনাঃ, অতিশব্দঃ কণ্ড্বর্তিরুগ্ভ্যাং সম্বধ্যতে| গাত্রেষু পাণিপাদেষু| কণ্ডূমতীত্যাদি| ইযমেব বিচর্চিকা পাদগতা যদা স্যাত্তদা বিচর্চিকাসঞ্জ্ঞাং বিহায বিপাদিকাসঞ্জ্ঞাং প্রাপ্নোতীত্যর্থঃ||১৩||
Adhikarana 16 (14) · Śloka 14
যত্ স্রাবি বৃত্তং ঘনমুগ্রকণ্ডু তত্ স্নিগ্ধকৃষ্ণং কিটিভং(মং) বদন্তি |১৪|
View original
यत् स्रावि वृत्तं घनमुग्रकण्डु तत् स्निग्धकृष्णं किटिभं(मं) वदन्ति |१४|
🔊 Audio coming soon
কিটিভমাহ- যদিত্যাদি| ‘রক্তকৃষ্ণং’ ইতি কেচিত্ পঠন্তি|১৪|-
Adhikarana 17 (14) · Śloka 15
সাস্রাবকণ্ডূপরিদাহকাভিঃ পামাঽণুকাভিঃ পিডকাভিরূহ্যা ||১৪|| স্ফোটৈঃ সদাহৈরতি সৈব কচ্ছূঃ স্ফিক্পাণিপাদপ্রভবৈর্নিরূপ্যা |১৫|
View original
सास्रावकण्डूपरिदाहकाभिः पामाऽणुकाभिः पिडकाभिरूह्या ||१४|| स्फोटैः सदाहैरति सैव कच्छूः स्फिक्पाणिपादप्रभवैर्निरूप्या |१५|
🔊 Audio coming soon
অথ পামামাহ,- সাস্রাবেত্যাদি| সহাস্রাবকণ্ডূপরিদাহকৈর্বর্তন্তে যাঃ পিডকাস্তাস্তথাবিধাঃ, তাভিরূহ্যা পামেতি সম্বন্ধঃ; যে তু ‘সাস্রাবকণ্ডূপরিদাহবদ্ভিঃ’ ইতি পঠন্তি, তে তু ব্যাখ্যানযন্তি- সাস্রাবৌ যৌ কণ্ডূপরিদাহৌ তদ্যুক্তৈঃ পুরুষৈঃ কৃত্বা, অণুকাভিঃ পিডকাভিঃ কৃত্বা, পামা ঊহ্যা ‘বৈদ্যৈঃ’ ইতি শেষঃ| সৈব কচ্ছূরিতি সৈব পাণ্যোঃ স্ফিজোশ্চ তীব্রদাহৈঃ স্ফোটৈরুপগতা কচ্ছূরুচ্যতে||১৪||-
Adhikarana 18 (15) · Śloka 15
কণ্ড্বন্বিতা যা পিডকা শরীরে সংস্রাবহীনা রকসোচ্যতে সা ||১৫||
View original
कण्ड्वन्विता या पिडका शरीरे संस्रावहीना रकसोच्यते सा ||१५||
🔊 Audio coming soon
রকসামাহ- কণ্ড্বন্বিতেত্যাদি| শরীরে সকলে কাযে||১৫||
Adhikarana 19 (16) · Śloka 16
অরুঃ সসিধ্মং রকসা মহচ্চ যচ্চৈককুষ্ঠং কফজান্যমূনি | বাযোঃ প্রকোপাত্ পরিসর্পমেকং শেষাণি পিত্তপ্রভবাণি বিদ্যাত্ ||১৬||
View original
अरुः ससिध्मं रकसा महच्च यच्चैककुष्ठं कफजान्यमूनि | वायोः प्रकोपात् परिसर्पमेकं शेषाणि पित्तप्रभवाणि विद्यात् ||१६||
🔊 Audio coming soon
ইদানীং কস্মিন্ ক্ষুদ্রকুষ্ঠে কস্যাধিক্যমিত্যাহ- অরুরিত্যাদি| অরুঃ স্থূলারুষ্কম্| শেষাণি বিসর্পকিটিভবিচর্চিকাপামাচর্মদলানি| অরুঃ সসিধ্মমিত্যাদি| জেজ্ঝটেন স্বকপোলকল্পিতঃ শ্লোক ইতি গযদাসো ন মন্যতে, যস্মাদেককুষ্ঠং মহাকুষ্ঠং চ বাতাদেব ভবতি ন কফাত্, পরিসর্পং পিত্তাত্; পাঠান্তরং চাত্র ‘অরুষ্কং’ ইত্যাদি পঠতি, তচ্চাভাবান্ন লিখিতম্||১৬||
Adhikarana 20 (17) · Śloka 17
কিলাসমপি কুষ্ঠবিকল্প এব; তত্ত্রিবিধং- বাতেন, পিত্তেন, শ্লেষ্মণা চেতি | কুষ্ঠকিলাসযোরন্তরং- ত্বগ্গতমেব কিলাসমপরিস্রাবি চ | তদ্বাতেন মণ্ডলমরুণং পরুষং পরিধ্বংসি চ, পিত্তেন পদ্মপত্রপ্রতীকাশং সপরিদাহং চ, শ্লেষ্মণা শ্বেতং স্নিগ্ধং বহলং কণ্ডূমচ্চ | তেষু সম্বদ্ধমণ্ডলমন্তেজাতং রক্তরোম চাসাধ্যমগ্নিদগ্ধং চ ||১৭||
View original
किलासमपि कुष्ठविकल्प एव; तत्त्रिविधं- वातेन, पित्तेन, श्लेष्मणा चेति | कुष्ठकिलासयोरन्तरं- त्वग्गतमेव किलासमपरिस्रावि च | तद्वातेन मण्डलमरुणं परुषं परिध्वंसि च, पित्तेन पद्मपत्रप्रतीकाशं सपरिदाहं च, श्लेष्मणा श्वेतं स्निग्धं बहलं कण्डूमच्च | तेषु सम्बद्धमण्डलमन्तेजातं रक्तरोम चासाध्यमग्निदग्धं च ||१७||
🔊 Audio coming soon
কিলাসং নির্দিশন্নাহ- কিলাসমপীত্যাদি| অপিশব্দঃ সম্ভাবনাযাং, তেন কিলাসং কুষ্ঠবিকৃতিরিতি সম্ভাব্যতে; অন্যে তু, কিমপি কিলাসং কুষ্ঠবিকল্পো ন ভবতীত্যপিশব্দাদাহুঃ; কিং তত্ কিলাসং কুষ্ঠবিকল্পো ন ভবতি? উচ্যতে- ত্বগ্গতমপরিস্রাবি চেতি; অন্তরং ভেদঃ| ত্বগ্গতমিতি কুষ্ঠং ত্বগ্রক্তমাংসমধিষ্ঠায ত্বচি দর্শযত্যাত্মানং, কিলাসং তু ত্বচমেব কেবলামধিতিষ্ঠতীত্যর্থঃ| অন্যে তু ‘ত্বগ্গতমেব কিলাসসঞ্জ্ঞং, তদেব ধাত্বনুপ্রবেশাচ্ছ্বিত্রসঞ্জ্ঞম্’ ইত্যাহুঃ| তথা চ বিশ্বামিত্রঃ,- “ত্বগ্গতং তু যদস্রাবি কিলাসং তত্ প্রকীর্তিতম্| যদা ত্বচমতিক্রম্য তদ্ধাতূনবগাহতে|| হিত্বা কিলাসসঞ্জ্ঞাং চ শ্বিত্রসঞ্জ্ঞাং লভেত তত্”- ইতি| বাতাদিজানাং কিলাসানাং লক্ষণমাহ- তদ্বাতেনেত্যাদি| পরিধ্বংসীতি ঘৃষ্টং সদ্রজো বিমুঞ্চতীত্যর্থঃ| বহলং স্থূলম্| অতঃ পরমসাধ্যাবধারণং- তেষ্বিত্যাদি| তেষু বাতপিত্তশ্লেষ্মজেষু কিলাসেষু| সম্বদ্ধমণ্ডলমিতি পরস্পরমভিন্নমণ্ডলমিত্যর্থঃ| অন্তে জাতম্ ওষ্ঠপাণিপাদগুহ্যজম্; অন্যে ত্বত্র ‘অন্তর্জাতরক্তরোম চ’ ইতি পঠন্তি; অন্তর্মধ্যে জাতানি রক্তানি লোমানি যত্র তত্তথা; তে চাচার্যা ‘অগ্নিদগ্ধং চ’ ইতি চকারেণ পাণিপাদগুহ্যৌষ্ঠজমনুক্তমপ্যসাধ্যং সমুচ্চিন্বন্তি||১৭||
Adhikarana 21 (18) · Śloka 18
কুষ্ঠেষু তু ত্বক্সঙ্কোচস্বাপস্বেদশোফভেদকৌণ্যস্বরোপঘাতা বাতেন, পাকাবদরণাঙ্গুলিপতনকর্ণনাসাভঙ্গাক্ষিরাগসত্ত্বোত্পত্তযঃ পিত্তেন, কণ্ডূবর্ণভেদশোফাস্রাবগৌরবাণি শ্লেষ্মণা ||১৮||
View original
कुष्ठेषु तु त्वक्सङ्कोचस्वापस्वेदशोफभेदकौण्यस्वरोपघाता वातेन, पाकावदरणाङ्गुलिपतनकर्णनासाभङ्गाक्षिरागसत्त्वोत्पत्तयः पित्तेन, कण्डूवर्णभेदशोफास्रावगौरवाणि श्लेष्मणा ||१८||
🔊 Audio coming soon
কুষ্ঠানাং সঙ্ক্ষেপেণোক্তত্বাদনুক্তমপি দোষলিঙ্গং দর্শযন্নাহ- কুষ্ঠেষ্বিত্যাদি| বাতকার্যেষু স্বেদশ্চিন্ত্যঃ| ‘ত্বক্সঙ্কোচস্বাপাস্বেদৌ’ ইত্যন্যে পঠন্তি, তত্র নঞ্ স্বেদনিষেধার্থঃ; ‘ব্যাধিস্বভাবাত্ স্বেদোঽপি স্যাত্’ ইত্যপরে| কৌণ্যং নষ্টকরতা| সত্ত্বোত্পত্তযঃ ক্রিমীণাং জন্মানি ||১৮||
Adhikarana 22 (19) · Śloka 19
তত্রাদিবলপ্রবৃত্তং পৌণ্ডরীকং কাকণং চাসাধ্যম্ ||১৯||
View original
तत्रादिबलप्रवृत्तं पौण्डरीकं काकणं चासाध्यम् ||१९||
🔊 Audio coming soon
তেষামসাধ্যতাং দর্শযন্নাহ- তত্রেত্যাদি| পুণ্ডরীকমাদিবলপ্রবৃত্তং শুক্রশোণিতদোষজমসাধ্যম্| ননু চাদিবলপ্রবৃত্তমন্যদপি কুষ্ঠমসাধ্যমেব, যদাহ চরকঃ,- “যে চাপি কেচিত্ কুলজা বিকারাস্তাংশ্চাপ্যসাধ্যান্ প্রবদন্তি তজ্জ্ঞাঃ” (চ. চি. ৬) ইতি; কুলজা ইত্যনেন দুষ্টশুক্রশোণিতজা উচ্যন্তে| পুণ্ডরীকগ্রহণং সর্বেষামেব মহাকুষ্ঠানামুপলক্ষণং; তেষামেবোত্তরোত্তরধাত্বনুক্রমেণ শুক্রধাতোর্দুষ্টিজননসামর্থ্যাত্| এতেন ক্ষুদ্রকুষ্ঠেষ্বাদিবলপ্রবৃত্তত্বং নাস্তি, উত্তরোত্তরধাত্বননুক্রমণাভাবেন শুক্রদোষকরণেঽসামর্থ্যাত্| কাকণকং চাসাধ্যম্, উত্পত্তাবেব ত্রিদোষবলপ্রবৃত্তত্বাত্; ধাত্বনুক্রমণেন হি মহাকুষ্ঠানামস্থিমজ্জশুক্রগতানামসাধ্যত্বমুপরিষ্ঠাদেব বক্ষ্যতি||১৯||
Adhikarana 23 (20-21) · Śloka 21
ভবন্তি চাত্র- যথা বনস্পতির্জাতঃ প্রাপ্য কালপ্রকর্ষণম্ | অন্তর্ভূমিং বিগাহেত মূলৈর্বৃষ্টিবিবর্ধিতৈঃ ||২০|| এবং কুষ্ঠং সমুত্পন্নং ত্বচি কালপ্রকর্ষতঃ | ক্রমেণ ধাতূন্ ব্যাপ্নোতি নরস্যাপ্রতিকারিণঃ ||২১||
View original
भवन्ति चात्र- यथा वनस्पतिर्जातः प्राप्य कालप्रकर्षणम् | अन्तर्भूमिं विगाहेत मूलैर्वृष्टिविवर्धितैः ||२०|| एवं कुष्ठं समुत्पन्नं त्वचि कालप्रकर्षतः | क्रमेण धातून् व्याप्नोति नरस्याप्रतिकारिणः ||२१||
🔊 Audio coming soon
ইদানীমপ্রতিকারিণ উত্তরোত্তরধাত্বনুক্রমণে দৃষ্টান্তং দর্শযন্নাহ- ভবন্তি চাত্রেত্যাদি| যথা বনস্পতির্বৃক্ষঃ, কালপ্রকর্ষণং কালাধিক্যং প্রাপ্য, মূলৈঃ কৃত্বা, অন্তর্ভূমিং বিগাহেতেতি সম্বন্ধঃ| ত্বচীতি অত্র ত্বক্শব্দেন রস উক্তঃ, রসারব্ধত্বাত্; তেন রসস্থমিত্যর্থঃ||২০-২১||
Adhikarana 24 (22-28) · Śloka 28
স্পর্শহানিঃ স্বেদনত্বমীষত্কণ্ডূশ্চ জাযতে | বৈবর্ণ্যং রূক্ষভাবশ্চ কুষ্ঠে ত্বচি সমাশ্রিতে ||২২|| ত্বক্স্বাপো রোমহর্ষশ্চ স্বেদস্যাভিপ্রবর্তনম্ | কণ্ডূর্বিপূযকশ্চৈব কুষ্ঠে শোণিতসংশ্রিতে ||২৩|| বাহুল্যং বক্রশোষশ্চ কার্কশ্যং পিডকোদ্গমঃ | তোদঃ স্ফোটঃ স্থিরত্বং চ কুষ্ঠে মাংসসমাশ্রিতে ||২৪|| দৌর্গন্ধ্যমুপদেহশ্চ পূযোঽথ ক্রিমযস্তথা | গাত্রাণাং ভেদনং চাপি কুষ্ঠে মেদঃসমাশ্রিতে ||২৫|| নাসাভঙ্গোঽক্ষিরাগশ্চ ক্ষতে চ ক্রিমিসম্ভবঃ | ভবেত্ স্বরোপঘাতশ্চ হ্যস্থিমজ্জসমাশ্রিতে ||২৬|| কৌণ্যং গতিক্ষযোঽঙ্গানাং সম্ভেদঃ ক্ষতসর্পণম্ | শুক্রস্থানগতে লিঙ্গং প্রাগুক্তানি তথৈব চ ||২৭|| স্ত্রীপুংসযোঃ কুষ্ঠদোষাদ্দুষ্টশোণিতশুক্রযোঃ | যদপত্যং তযোর্জাতং জ্ঞেযং তদপি কুষ্ঠিতম্ ||২৮||
View original
स्पर्शहानिः स्वेदनत्वमीषत्कण्डूश्च जायते | वैवर्ण्यं रूक्षभावश्च कुष्ठे त्वचि समाश्रिते ||२२|| त्वक्स्वापो रोमहर्षश्च स्वेदस्याभिप्रवर्तनम् | कण्डूर्विपूयकश्चैव कुष्ठे शोणितसंश्रिते ||२३|| बाहुल्यं वक्रशोषश्च कार्कश्यं पिडकोद्गमः | तोदः स्फोटः स्थिरत्वं च कुष्ठे मांससमाश्रिते ||२४|| दौर्गन्ध्यमुपदेहश्च पूयोऽथ क्रिमयस्तथा | गात्राणां भेदनं चापि कुष्ठे मेदःसमाश्रिते ||२५|| नासाभङ्गोऽक्षिरागश्च क्षते च क्रिमिसम्भवः | भवेत् स्वरोपघातश्च ह्यस्थिमज्जसमाश्रिते ||२६|| कौण्यं गतिक्षयोऽङ्गानां सम्भेदः क्षतसर्पणम् | शुक्रस्थानगते लिङ्गं प्रागुक्तानि तथैव च ||२७|| स्त्रीपुंसयोः कुष्ठदोषाद्दुष्टशोणितशुक्रयोः | यदपत्यं तयोर्जातं ज्ञेयं तदपि कुष्ठितम् ||२८||
🔊 Audio coming soon
ধাতুগতকুষ্ঠানাং লক্ষণমাহ- স্পর্শহানিরিত্যাদি| “প্রাগেব রসধাতুং ক্রোডীকৃত্য দোষাঃ কুষ্ঠারম্ভকাঃ, অতো রসধাতুলক্ষণং নোক্তম্” ইত্যেকে; অপরে ত্বক্শব্দেন রসমাহুঃ| জাযত ইত্যত্রাপি সম্বধ্যতে| বিপূযকো দুর্গন্ধতা| শোণিতসংশ্রিতে ইতি ‘জাযতে’ ইত্যত্রাপি সম্বধ্যতে| বাহুল্যং স্থূলমণ্ডলতা| স্ফোটঃ ত্বচঃ স্ফুটনম্| স্থিরত্বং কঠিনমণ্ডলতা| কেচিদত্রান্যথা পঠন্তি, স চ পাঠোঽভাবান্ন লিখিতঃ| অত্রাপি ‘জাযতে’ ইত্যধ্যাহারঃ| উপদেহো মলবৃদ্ধিঃ| অত্রাপি কেচিদন্যথা শ্লোকং পঠন্তি, সোঽপি পাঠোঽভাবান্ন লিখিতঃ| শুক্রগতস্য কুষ্ঠস্য লিঙ্গং দর্শযন্নাহ- কৌণ্যমিত্যাদি| তদপীত্যপিশব্দাত্ পূর্বোক্তান্যপি রসাদিমজ্জান্তগতানি লিঙ্গানি ভবন্তি| কুষ্ঠিতং সঞ্জাতকুষ্ঠম্; অন্যে তু ‘কুষ্ঠবত্’ ইতি পঠন্তি, কুষ্ঠসহিতমিত্যর্থঃ; অন্যে ‘কুষ্ঠিলম্’ ইতি পঠন্তি, তত্রাপি স এবার্থঃ| যদা স্ত্রীপুংসযোঃ কুষ্ঠিনোর্বীজমুপহতং স্যাত্তদা তযোঃ প্রজা নোত্পদ্যতে; উপতপ্তমাত্রবীজযোঃ পুনঃ প্রজোপতাপ উত্পদ্যতে||২২-২৮||
Adhikarana 25 (29) · Śloka 29
কুষ্ঠমাত্মবতঃ সাধ্যং ত্বগ্রক্তপিশিতাশ্রিতম্ | মেদোগতং ভবেদ্যাপ্যমসাধ্যমত উত্তরম্ ||২৯||
View original
कुष्ठमात्मवतः साध्यं त्वग्रक्तपिशिताश्रितम् | मेदोगतं भवेद्याप्यमसाध्यमत उत्तरम् ||२९||
🔊 Audio coming soon
ইদানীং ধাত্বনুক্রমেঽপি সাধ্যাদিভেদং দর্শযন্নাহ- কুষ্ঠমিত্যাদি| আত্মবতো জিতেন্দ্রিযস্য||২৯||
Adhikarana 26 (30) · Śloka 30
ব্রহ্মস্ত্রীসজ্জনবধপরস্বহরণাদিভিঃ | কর্মভিঃ পাপরোগস্য প্রাহুঃ কুষ্ঠস্য সম্ভবম্ ||৩০||
View original
ब्रह्मस्त्रीसज्जनवधपरस्वहरणादिभिः | कर्मभिः पापरोगस्य प्राहुः कुष्ठस्य सम्भवम् ||३०||
🔊 Audio coming soon
কুষ্ঠস্য কর্মজত্বং দর্শযন্নাহ- ব্রহ্মস্ত্রীত্যাদি| সজ্জনঃ সত্পুরুষঃ| পরস্বং পরদ্রব্যম্||৩০||
Adhikarana 27 (31-32) · Śloka 32
ম্রিযতে যদি কুষ্ঠেন পুনর্জাতেঽপি গচ্ছতি | নাতঃ কষ্টতরো রোগো যথা কুষ্ঠং প্রকীর্তিতম্ ||৩১|| আহারাচারযোঃ প্রোক্তামাস্থায মহতীং ক্রিযাম্ | ঔষধীনাং বিশিষ্টানাং তপসশ্চ নিষেবণাত্ | যস্তেন মুচ্যতে জন্তুঃ স পুণ্যাং গতিমাপ্নুযাত্ ||৩২||
View original
म्रियते यदि कुष्ठेन पुनर्जातेऽपि गच्छति | नातः कष्टतरो रोगो यथा कुष्ठं प्रकीर्तितम् ||३१|| आहाराचारयोः प्रोक्तामास्थाय महतीं क्रियाम् | औषधीनां विशिष्टानां तपसश्च निषेवणात् | यस्तेन मुच्यते जन्तुः स पुण्यां गतिमाप्नुयात् ||३२||
🔊 Audio coming soon
কুষ্ঠং দীর্ঘরোগাণাং প্রধানমিতি জন্মান্তরেঽপি তদনুবন্ধং দর্শযন্নাহ- ম্রিযত ইত্যাদি| গচ্ছতি অনুগতং ভবতীত্যর্থঃ, কুষ্ঠজনকস্য কর্মণোঽক্ষীণত্বাত্| আস্থায আশ্রিত্য| স পুণ্যাং গতিমাপ্নুযাত্, ক্ষীণপাপত্বাত্||৩১-৩২||
Adhikarana 28 (33-34) · Śloka 34
প্রসঙ্গাদ্গাত্রসংস্পর্শান্নিশ্বাসাত্ সহভোজনাত্ | সহশয্যাসনাচ্চাপি বস্ত্রমাল্যানুলেপনাত্ ||৩৩|| কুষ্ঠং জ্বরশ্চ শোষশ্চ নেত্রাভিষ্যন্দ এব চ | ঔপসর্গিকরোগাশ্চ সঙ্ক্রামন্তি নরান্নরম্ ||৩৪||
View original
प्रसङ्गाद्गात्रसंस्पर्शान्निश्वासात् सहभोजनात् | सहशय्यासनाच्चापि वस्त्रमाल्यानुलेपनात् ||३३|| कुष्ठं ज्वरश्च शोषश्च नेत्राभिष्यन्द एव च | औपसर्गिकरोगाश्च सङ्क्रामन्ति नरान्नरम् ||३४||
🔊 Audio coming soon
সংসর্গসম্ভবপ্রধানং কুষ্ঠমাশ্রিত্য কুষ্ঠিপ্রভৃতীনাং সংসর্গপরিহারং দর্শযন্নাহ- প্রসঙ্গাদিত্যাদি| প্রসঙ্গাদিতি প্রসঙ্গেন অভ্যাসেন কৃতাত্, পুনঃ পুনঃ কৃতাদিত্যর্থঃ| ইদং বিশেষণং গাত্রসংস্পর্শাদিভিঃ সর্বৈঃ সহ প্রত্যেকং সম্বধ্যতে| সহশয্যাসনাদিতি একশয্যাসনস্থিতেঃ| মাল্যং পুষ্পম্| ঔপসর্গিকরোগাঃ শীতলিকাদযঃ| সঙ্ক্রামন্তি আবিশন্তি||৩৩-৩৪||
Adhikarana puShpikA · Śloka 5
ইতি সুশ্রুতসংহিতাযাং নিদানস্থানে কুষ্ঠনিদানং নাম পঞ্চমোঽধ্যাযঃ ||৫||
View original
इति सुश्रुतसंहितायां निदानस्थाने कुष्ठनिदानं नाम पञ्चमोऽध्यायः ||५||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং নিদানস্থানে পঞ্চমোঽধ্যাযঃ||৫||