Adhikarana 1 (1-2) · Śloka 2
অথাতো বাতব্যাধিনিদানং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
View original
अथातो वातव्याधिनिदानं व्याख्यास्यामः ||१||
यथोवाच भगवान् धन्वन्तरिः ||२||
হেতুলিঙ্গৌষধজ্ঞানবীজভূতেন সূত্রস্থানেন সঙ্ক্ষেপোদ্দিষ্টস্য হেতুলিঙ্গৌষধস্য বিবরণে সর্বাণ্যেব স্থানানি প্রস্তুতানি, তেষু চ প্রস্তুতেষু স্বাধিকারিণাং শল্যতন্ত্রব্যাধীনাং হেতুলক্ষণপ্রতিপাদকতযা নিদানস্থানস্যারম্ভঃ, তত্রাপি দোষাণাং বাতস্য প্রধানত্বাত্তদ্ব্যাধীনাং হেতুলক্ষণাভ্যাং প্রাক্ প্রতিপাদনং যুজ্যত ইত্যাহ- অথাত ইত্যাদি| বাতব্যাধেরাক্ষেপকাদের্নিদানং হেতুলক্ষণনির্দেশঃ| অথাতো বাতব্যাধিনিদানমিত্যাদি যদ্যপি প্রথমমেব সূত্রমস্তি তথাঽপি ‘প্রাব্রবীদ্ভিষজাংবরঃ’ ইত্যনন্তরং দ্রষ্টব্যম্, অনুপাসিতাপ্রার্থিতগুরোঃ শিষ্যাণাং ব্যাখ্যানেঽনধিকারাত্||১-২||
Adhikarana 2 (3-4) · Śloka 4
ধন্বন্তরিং ধর্মভৃতাং বরিষ্ঠমমৃতোদ্ভবম্ |
চরণাবুপসঙ্গৃহ্য সুশ্রুতঃ পরিপৃচ্ছতি ||৩||
বাযোঃ প্রকৃতিভূতস্য ব্যাপন্নস্য চ কোপনৈঃ |
স্থানং কর্ম চ রোগাংশ্চ বদ মে বদতাং বর ||৪||
View original
धन्वन्तरिं धर्मभृतां वरिष्ठममृतोद्भवम् |
चरणावुपसङ्गृह्य सुश्रुतः परिपृच्छति ||३||
वायोः प्रकृतिभूतस्य व्यापन्नस्य च कोपनैः |
स्थानं कर्म च रोगांश्च वद मे वदतां वर ||४||
কঃ পুনরেবং প্রতিজ্ঞাতবানিতি তমেব প্রকারেণ দর্শযন্নাহ- ধন্বন্তরিমিত্যাদি| ধর্মভৃতাং ধার্মিকাণাং, বরিষ্ঠং শ্রেষ্ঠম্| অমৃতেন সহ উদ্ভব উত্পতির্যস্য তম্| চরণাবুপসঙ্গৃহ্যেতি পাদপতনং কৃত্বেত্যর্থঃ| কিং পরিপৃচ্ছতীত্যাহ- বাযোরিত্যাদি| প্রকৃতিভূতস্য স্বভাবাবস্থিতস্য, ব্যাপন্নস্য বিকৃতস্য| কোপনৈঃ দ্রব্যগুণকর্মভির্বাযুসমানৈঃ| স্থানং শ্রোণিগুদাদি, তচ্চ প্রকৃতিভূতস্য বাযোঃ; বিকৃতস্য তু সর্বশরীরম্| কর্ম সামান্যং বিশিষ্টং চ; সামান্যম্ ‘ইন্দ্রিযার্থোপসম্প্রাপ্তিং’ ইত্যাদি, বিশিষ্টং ‘স প্রাণো নাম দেহধৃক্’ ইত্যাদি| রোগাংশ্চেতি হিক্কাশ্বাসাদিকান্| যদাহ- “প্রাযশঃ কুরুতে দুষ্টো হিক্কাশ্বাসাদিকান্ গদান্” ইতি| চকারান্নাম চ| বদতাং বর ব্যাখ্যাতৄণাং মধ্যে শ্রেষ্ঠ! ‘কোপনৈঃ’ ইত্যত্র ‘ভূপতে’ ইতি কেচিত্ পঠন্তি; ‘বদ মে’ ইত্যত্র চ ‘বদস্ব’ ইতি পঠন্তি; তত্র ভূপতে ইতি ধন্বন্তরিসম্বোধনং; বদস্ব বদেতি চৈক এবার্থঃ| মে মম| কর্মগ্রহণং কেচিন্নাধীযতে; তন্মতে, ‘স্থানং রোগবিভাগং চ’ ইতি পাঠঃ||৩-৪||
Adhikarana 3 (5-8) · Śloka 9
তস্য তদ্বচনং শ্রুত্বা প্রাব্রবীদ্ভিষজাং বরঃ |
স্বযম্ভূরেষ ভগবান্ বাযুরিত্যভিশব্দিতঃ ||৫||
স্বাতন্ত্র্যান্নিত্যভাবাচ্চ সর্বগত্বাত্তথৈব চ |
সর্বেষামেব সর্বাত্মা সর্বলোকনমস্কৃতঃ ||৬||
স্থিত্যুত্পত্তিবিনাশেষু ভূতানামেষ কারণম্ |
অব্যক্তো ব্যক্তকর্মা চ রূক্ষঃ শীতো লঘুঃ খরঃ ||৭||
তির্যগ্গো দ্বিগুণশ্চৈব রজোবহুল এব চ |
অচিন্ত্যবীর্যো দোষাণাং নেতা রোগসমূহরাট্ ||৮||
আশুকারী মুহুশ্চারী পক্বাধানগুদালযঃ |৯|
View original
तस्य तद्वचनं श्रुत्वा प्राब्रवीद्भिषजां वरः |
स्वयम्भूरेष भगवान् वायुरित्यभिशब्दितः ||५||
स्वातन्त्र्यान्नित्यभावाच्च सर्वगत्वात्तथैव च |
सर्वेषामेव सर्वात्मा सर्वलोकनमस्कृतः ||६||
स्थित्युत्पत्तिविनाशेषु भूतानामेष कारणम् |
अव्यक्तो व्यक्तकर्मा च रूक्षः शीतो लघुः खरः ||७||
तिर्यग्गो द्विगुणश्चैव रजोबहुल एव च |
अचिन्त्यवीर्यो दोषाणां नेता रोगसमूहराट् ||८||
आशुकारी मुहुश्चारी पक्वाधानगुदालयः |९|
তস্যেত্যাদি| তস্য সুশ্রুতস্য| তত্ পূর্বোক্তম্| ভিষজাং বরো ধন্বন্তরিঃ| ‘ভিষজাং গুরুঃ’ ইতি কেচিত্ পঠন্তি| প্রাব্রবীত্ জগাদ| এষ বাযুরিতি সম্বন্ধঃ| ভগবান্ সমস্তৈশ্বর্যগুণযুক্তঃ, অণিমাদিগুণযুক্ত ইত্যর্থঃ| অভিশব্দিতঃ কীর্ত্তিতঃ| স্বযম্ভূত্বে হেতুত্রিতযমাহ- স্বাতন্ত্র্যাদিত্যাদি| স্বাতন্ত্র্যাদিতি স্বকর্মবিষযে নান্যেন প্রের্যত ইত্যর্থঃ| নিত্যভাবাত্ নিত্যস্য হি কারণরহিতত্বেন স্বতন্ত্রত্বং, ততশ্চ স্বযম্ভূত্বমিত্যর্থঃ; সর্বগত্বাচ্চেতি যো হি সর্বগতঃ স স্বযম্ভূঃ, আকাশবত্| চকারাত্ সূক্ষ্মত্বমপি পরমাণোরিব স্বযম্ভূত্বে হেতুঃ সমুচ্চীযতে| কথং পুনরস্য সর্বগত্বং যাবতা পার্থিবদ্রব্যমূর্ত্তিষু বাযুর্নাস্তীত্যাহ- সর্বেষামিত্যাদি| সর্বেষাং স্থাবরজঙ্গমানাং, সর্বাত্মা কারণকার্যাত্মকত্বেন সর্বস্বরূপঃ, ‘সর্বপ্রযোজনহেতুঃ’ ইতি কেচিত্| সর্বলোকনমস্কৃত ইতি কুত ইত্যাহ- স্থিত্যুত্পত্তিবিনাশেষ্বিত্যাদি| স্থিতিঃ জীবনম্| অব্যক্তোঽদৃশ্যমূর্তিঃ| ব্যক্তকর্মা প্রকটক্রিযঃ| শীত ইতি অসংযুক্তস্য বাযোর্গুণোঽযং সংযুক্তস্তূষ্ণোঽপি| খরঃ খরস্পর্শঃ, কর্কোটকফলবত্| তির্যগ্গঃ তির্যগ্গামী| দ্বিগুণঃ শব্দস্পর্শগুণঃ| রজোবহুল ইতি ত্রিগুণত্বেঽপ্যুত্কর্ষবিশেষাদ্রজঃ প্রবলত্বমস্য| অচিন্ত্যবীর্যোঽচিন্ত্যশক্তিঃ, সা চাস্য শক্তিঃ শরীরদোষমূত্রপুরীষাদিবিভাগোঽবযবাদিসংস্থানকা(ক)রণং দোষধাতুমলসংবহনাদিশ্চ, শরীরাদ্বহিস্তু সঞ্চরতো ধরণীধারণাদিঃ| দোষাণাং নেতা দোষধাতুমলানাং প্রেরক ইত্যর্থঃ, অন্যে তু বাযোরপি বাযুরেব নেতেতি বহুবচনং সমর্থযন্তি| রোগসমূহরাডিতি রোগসমূহে রোগহেতুবৃন্দে পিত্তকফরক্তাদৌ রাজতে শোভতে ইতি রোগসমূহরাট্; ন তু রাট্শব্দো রাজপর্যাযঃ, ‘স রোগানীকরাট্ স্মৃত’ ইত্যগ্রেতনেন সহ বিরোধাপত্তেঃ| আশুকারী শীঘ্রমত্যযকারিত্বাত্| মুহুর্মুহুঃ প্রকৃতিভূতোঽপি চরতীতি মুহুশ্চারী| পক্বাধানগুদালয ইতি পক্বাশযগুদৌ স্থানমস্যেত্যর্থঃ||৫-৮||-
Adhikarana 4 (9-10) · Śloka 10
দেহে বিচরতস্তস্য লক্ষণানি নিবোধ মে ||৯||
দোষধাত্বগ্নিসমতাং সম্প্রাপ্তিং বিষযেষু চ |
ক্রিযাণামানুলোম্যং চ করোত্যকুপিতোঽনিলঃ ||১০||
(ইন্দ্রিযার্থোপসম্প্রাপ্তিং দোষধাত্বগ্ন্যবৈকৃতম্|
ক্রিযাণামানুলোম্যং চ কুর্যাদ্বাযুরদূষিতঃ ||১০||) |
View original
देहे विचरतस्तस्य लक्षणानि निबोध मे ||९||
दोषधात्वग्निसमतां सम्प्राप्तिं विषयेषु च |
क्रियाणामानुलोम्यं च करोत्यकुपितोऽनिलः ||१०||
(इन्द्रियार्थोपसम्प्राप्तिं दोषधात्वग्न्यवैकृतम्|
क्रियाणामानुलोम्यं च कुर्याद्वायुरदूषितः ||१०||) |
নিবোধ মে ইতি নিবোধ জানীহি, মে মত্সকাশাত্| ধাতুশব্দানন্তরমাদিশব্দো লুপ্তো দ্রষ্টব্যঃ| তেন মলোপধাতূনামপি গ্রহণম্; অথবা ধাতুশব্দেন মলোপধাতব উচ্যন্তে, শরীরধারণকারণাত্| বিষযেষু শব্দস্পর্শরূপরসগন্ধেষু| ক্রিযাণাং কাযবাঙ্মানসীনাম্| আনুলোম্যং প্রবর্ত্তকত্বম্| গযদাসাচার্যস্তু ইমং শ্লোকম্ ‘ইন্দ্রিযার্থোপসম্প্রাপ্তিং’ ইত্যাদি কৃত্বা পঠতি, স চ বিস্তরভযান্ন লিখিতঃ||৯-১০||
Adhikarana 5 (11) · Śloka 11
যথাঽগ্নিঃ পঞ্চধা ভিন্নো নামস্থানক্রিযামযৈঃ |
ভিন্নোঽনিলস্তস্থা হ্যেকো নামস্থানক্রিযামযৈঃ ||১১||
View original
यथाऽग्निः पञ्चधा भिन्नो नामस्थानक्रियामयैः |
भिन्नोऽनिलस्तस्था ह्येको नामस्थानक्रियामयैः ||११||
তদেবং সর্বানিলস্য সামান্যেন স্বাস্থ্যহেতুত্বং প্রদর্শ্য স্থানোপাধিভেদেন ভিন্নস্য নামান্তরবিশিষ্টস্য প্রতিস্থানং বিশিষ্টস্বস্থক্রিযা রোগাংশ্চ দর্শযন্নাহ- যথাঽগ্নিরিত্যাদি| যথাঽগ্নিঃ পিত্তগ এক এব পাচকরঞ্জকালোচকভ্রাজকসাধকেতি নাম্না, স্থানেনামপক্বাশযাদিনা, ক্রিযযা অন্নপাচনাদিকযা, আমযেনাম্লপাকাদিনা পঞ্চবিধঃ; এবমনিলোঽপ্যেক এব নামাদিভিঃ পঞ্চবিধঃ| অন্যে তু পুনরত্র বাহ্যাগ্নের্গার্হপত্যাহবনীযদক্ষিণাগ্ন্যাবসথ্যসভ্যলক্ষণান্ পঞ্চ ভেদানাহুঃ, তন্নেচ্ছতি গযদাসাচার্যঃ||১১||
Adhikarana 6 (12) · Śloka 12
প্রাণোদানৌ সমানশ্চ ব্যানশ্চাপান এব চ |
স্থানস্থা মারুতাঃ পঞ্চ যাপযন্তি শরীরিণম্ ||১২||
View original
प्राणोदानौ समानश्च व्यानश्चापान एव च |
स्थानस्था मारुताः पञ्च यापयन्ति शरीरिणम् ||१२||
তত্র বাযোর্নামান্যাহ- প্রাণোদানাবিত্যাদি| স্থানস্থাঃ স্থানশব্দেনাত্র সাম্যমুচ্যতে| যাপযন্তি ধারযন্তি||১২||
Adhikarana 7 (13) · Śloka 14
যো বাযুর্বক্ত্রসঞ্চারী স প্রাণো নাম দেহধৃক্ |
সোঽন্নং প্রবেশযত্যন্তঃ প্রাণাংশ্চাপ্যবলম্বতে ||১৩||
প্রাযশঃ কুরুতে দুষ্টো হিক্কাশ্বাসাদিকান্ গদান্ |১৪|
View original
यो वायुर्वक्त्रसञ्चारी स प्राणो नाम देहधृक् |
सोऽन्नं प्रवेशयत्यन्तः प्राणांश्चाप्यवलम्बते ||१३||
प्रायशः कुरुते दुष्टो हिक्काश्वासादिकान् गदान् |१४|
বক্ত্রসঞ্চারিত্বং চাস্যোপলক্ষণং, তেন মূর্ধোরঃকণ্ঠনাসিকা অপি প্রাণস্য স্থানম্| অন্তঃ অভ্যন্তরমন্নং প্রবেশযতি দেহধারণায | প্রাণাংশ্চাপ্যবলম্বত ইতি প্রাণানগ্ন্যাদীন্, অবলম্বতে স্বক্রিযাসু যোজযতি| গযদাসাচার্যস্ত্বেবং মন্যতে- প্রাণানামগ্নীষোমাদীনামবলম্বনবচনেনাধারভূতহৃদযাবলম্বনমেবোচ্যতে, এতেন প্রাণাধারহৃদযধারণেন প্রাণধারণমেবোক্তম্| অত এব প্রাণানামবলম্বনেন মরণমূলত্বমুচ্যতে| যদুক্তং শ্রুতৌ- “যথা হি সৈন্ধবোঽশ্বঃ শঙ্কুমুত্পাট্য ধাবতি, তদ্বত্ প্রাণো রুদ্ধঃ সর্বান্ বাযূনুত্পাট্য প্রযাণকালে ধাবতি”- ইতি| শ্বাসাদিকানিত্যাদিশব্দাত্ প্রতিশ্যাযস্বরভেদকাসাদযঃ||১৩||-
Adhikarana 8 (14-15) · Śloka 15
উদানো নাম যস্তূর্ধ্বমুপৈতি পবনোত্তমঃ ||১৪||
তেন ভাষিতগীতাদিবিশেষোঽভিপ্রবর্ততে |
ঊর্ধ্বজত্রুগতান্ রোগান্ করোতি চ বিশেষতঃ ||১৫||
View original
उदानो नाम यस्तूर्ध्वमुपैति पवनोत्तमः ||१४||
तेन भाषितगीतादिविशेषोऽभिप्रवर्तते |
ऊर्ध्वजत्रुगतान् रोगान् करोति च विशेषतः ||१५||
উদানস্য প্রকৃতিভূতস্য নামাদি ব্যাপন্নস্য চ রোগান্নির্দিশন্নাহ- উদান ইত্যাদি| উপৈতি গচ্ছতি| স্থানং পুনরনুক্তমপ্যস্য নাভ্যুরঃকণ্ঠাদি | ভাষিতগীতাদিরিতি আদিশব্দাদুচ্ছ্বাসাদি| ‘বিশেষোঽভিপ্রবর্ততে’ ইত্যত্র কেচিত্ ‘বিষযোঽভিপ্রবর্ততে’ ইতি পঠন্তি| ঊর্ধ্বজত্রুগতানিতি নযনবদনঘ্রাণশ্রবণশিরঃসংশ্রযান্| চকারাদন্যানপি কাসাদীন্ করোতি||১৪-১৫||
Adhikarana 9 (16) · Śloka 17
আমপক্বাশযচরঃ সমানো বহ্নিসঙ্গতঃ |
সোঽন্নং পচতি তজ্জাংশ্চ বিশেষান্বিবিনক্তি হি ||১৬||
গুল্মাগ্নিসাদাতীসারপ্রভৃতীন্ কুরুতে গদান্ |১৭|
View original
आमपक्वाशयचरः समानो वह्निसङ्गतः |
सोऽन्नं पचति तज्जांश्च विशेषान्विविनक्ति हि ||१६||
गुल्माग्निसादातीसारप्रभृतीन् कुरुते गदान् |१७|
পাকঃ পক্বং, নপুংসকে ভাবে ক্তঃ; আমস্য পক্বমামপক্বং, তস্যাশযঃ পচ্যমানাহারাশয ইত্যর্থঃ; তত্র চরতীতি আমপক্বাশযচরঃ| ‘বহ্নিসঙ্গত’ ইত্যত্র ‘অগ্নিসহাযবান্’ ইতি কেচিত্ পঠন্তি, তত্রাপি স এবার্থঃ| সোঽন্নং পচতীতি অগ্নিসন্ধুক্ষণাদ্ভক্তকার ইব| তজ্জান্ অন্নপাকজান্| বিশেষান্ রসদোষমূত্রপুরীষাণি| বিবিনক্তি পৃথক্ করোতি||১৬||-
Adhikarana 10 (17-18) · Śloka 18
কৃত্স্নদেহচরো ব্যানো রসসংবহনোদ্যতঃ ||১৭||
স্বেদাসৃক্স্রাবণশ্চাপি পঞ্চধা চেষ্টযত্যপি |
ক্রুদ্ধশ্চ কুরুতে রোগান্ প্রাযশঃ সর্বদেহগান্ ||১৮||
View original
कृत्स्नदेहचरो व्यानो रससंवहनोद्यतः ||१७||
स्वेदासृक्स्रावणश्चापि पञ्चधा चेष्टयत्यपि |
क्रुद्धश्च कुरुते रोगान् प्रायशः सर्वदेहगान् ||१८||
রসসংবহনোদ্যত ইত্যত্রাদিশব্দো দ্রষ্টব্যঃ, তেন রসাদিসংবহনোদ্যত ইত্যর্থঃ; সংবহনং প্রেরণম্| পঞ্চধা চেষ্টযত্যপীতি প্রসারণাকুঞ্চনবিনমনোন্নমনতির্যগ্গমনানি পঞ্চ চেষ্টাঃ; অন্যে তু ‘গতিপ্রসারণোত্ক্ষেপণনিমেষোন্মেষৈঃ পঞ্চভিঃ প্রকারৈঃ পঞ্চধা’ ইতি ব্যাখ্যানযন্তি| সর্বদেহগান্ জ্বরাতীসাররক্তপিত্তপ্রভৃতীন্||১৭-১৮||
Adhikarana 11 (19) · Śloka 20
পক্বাধানালযোঽপানঃ কালে কর্ষতি চাপ্যধঃ |
সমীরণঃ শকৃন্মূত্রং শুক্রগর্ভার্তবানি চ ||১৯||
ক্রুদ্ধশ্চ কুরুতে রোগান্ ঘোরান্ বস্তিগুদাশ্রযান্ |২০|
View original
पक्वाधानालयोऽपानः काले कर्षति चाप्यधः |
समीरणः शकृन्मूत्रं शुक्रगर्भार्तवानि च ||१९||
क्रुद्धश्च कुरुते रोगान् घोरान् बस्तिगुदाश्रयान् |२०|
পক্বাধানালযঃ পক্বাশযস্থান ইত্যর্থঃ| বস্ত্যাশ্রযান্ অশ্মর্যাদীন্, গুদাশ্রযান্ ভগন্দরাদীন্||১৯||-
Adhikarana 12 (20) · Śloka 20
শুক্রদোষপ্রমেহাস্তু ব্যানাপানপ্রকোপজাঃ ||২০||
View original
शुक्रदोषप्रमेहास्तु व्यानापानप्रकोपजाः ||२०||
ইদানীমুপলক্ষণার্থং বিকৃতবাতদ্বযাদিকর্ম দর্শযন্নাহ- শুক্রদোষেত্যাদি| শুক্রস্য সর্বাঙ্গগতত্বাত্ প্রমেহস্য সর্বদেহগতরসাদিদূষ্যপ্রভবত্বাদ্ব্যানকৃতত্বং, মেঢ্রদ্বারসংশ্রিতত্বাদপানকৃতত্বং চ||২০||
Adhikarana 13 (21) · Śloka 21
যুগপত্ কুপিতাশ্চাপি দেহং ভিন্দ্যুরসংশযম্ |২১|
View original
युगपत् कुपिताश्चापि देहं भिन्द्युरसंशयम् |२१|
তেষাং পঞ্চানাং যুগপত্ প্রকোপে নিযমেন দেহনাশং দর্শযন্নাহ- যুগপদিত্যাদি| যুগপত্ এককালমিত্যর্থঃ| ভিন্দ্যুরিতি ভেদোঽত্র দেহবিনাশোঽভিপ্রেতঃ|২১|-
Adhikarana 14 (21-24) · Śloka 24
অত ঊর্ধ্বং প্রবক্ষ্যামি নানাস্থানান্তরাশ্রিতঃ ||২১||
বহুশঃ কুপিতো বাযুর্বিকারান্ কুরুতে হি যান্ |
বাযুরামাশযে ক্রুদ্ধশ্ছর্দ্যাদীন্ কুরুতে গদান্ ||২২||
মোহং মূর্চ্ছাং পিপাসাং চ হৃদ্গ্রহং পার্শ্ববেদনাম্ |
পক্বাশযস্থোঽন্ত্রকূজং শূলং নাভৌ করোতি চ ||২৩||
কৃচ্ছ্রমূত্রপুরীষত্বমানাহং ত্রিকবেদনাম্ |
শ্রোত্রাদিষ্বিন্দ্রিযবধং কুর্যাত্ ক্রুদ্ধঃ সমীরণঃ ||২৪||
View original
अत ऊर्ध्वं प्रवक्ष्यामि नानास्थानान्तराश्रितः ||२१||
बहुशः कुपितो वायुर्विकारान् कुरुते हि यान् |
वायुरामाशये क्रुद्धश्छर्द्यादीन् कुरुते गदान् ||२२||
मोहं मूर्च्छां पिपासां च हृद्ग्रहं पार्श्ववेदनाम् |
पक्वाशयस्थोऽन्त्रकूजं शूलं नाभौ करोति च ||२३||
कृच्छ्रमूत्रपुरीषत्वमानाहं त्रिकवेदनाम् |
श्रोत्रादिष्विन्द्रियवधं कुर्यात् क्रुद्धः समीरणः ||२४||
অত ইত্যাদি| নানাস্থানান্তরাশ্রিতঃ কুপিতঃ সন্ বাযুর্বহুশো যান্ বিকারান্ কুরুতে তান্ প্রবক্ষ্যামীতি সম্বন্ধঃ| ছর্দ্যাদীনিতি আদিশব্দাদ্রুজঃ পার্শ্বোদরহৃত্স্তম্ভতোদাদিকা গ্রাহ্যাঃ, অথবা ঊর্ধ্বগরক্তপিত্তাদিকাঃ| মোহো নৈবাত্যন্তং চিত্তনাশঃ| মূর্চ্ছা চেতনাচ্যুতিঃ| পক্বেত্যাদি অন্ত্রকূজং অন্ত্রেঽব্যক্তশব্দম্| চকারাদ্বাতবিণ্মূত্রসঙ্গং জঙ্ঘোরুত্রিকপার্শ্বপৃষ্ঠাদীন্ প্রতি শূলং চ কুরুতে| ‘শূলং নাভৌ’ ইত্যত্র ‘শূলানাহৌ’ ইতি কেচিত্ পঠন্তি, ব্যাখ্যানযন্তি চ- পক্বাশয আনহ্যতে সমন্তাদ্বিবধ্যত ইবেতি বেদনাপ্রকার এক আনাহঃ, দ্বিতীযস্তু বিসূচিকাপ্রতিষেধে প্রোক্তলক্ষণ এব| শ্রোত্রাদিষু ক্রুদ্ধঃ সন্ সমীরণ ইন্দ্রিযবধং কুর্যাদিতি সম্বন্ধঃ| শ্রোত্রাদিষু শ্রোত্রঘ্রাণদর্শনরসনত্বক্ষু| ইন্দ্রিযবধমিত্যনেনাশ্রুত্যঘ্রাণাদর্শনারসনাস্পর্শানি বেদিতব্যানি||২১-২৪||
Adhikarana 15 (25-29) · Śloka 29
বৈবর্ণ্যং স্ফুরণং রৌক্ষ্যং সুপ্তিং চুমুচুমাযনম্ |
ত্বক্স্থো নিস্তোদনং কুর্যাত্ ত্বগ্ভেদং পরিপোটনম্ ||২৫||
ব্রণাংশ্চ রক্তগো, গ্রন্থীন্ সশূলান্ মাংসসংশ্রিতঃ |
তথা মেদঃশ্রিতঃ কুর্যাদ্গ্রন্থীন্মন্দরুজোঽব্রণান্ ||২৬||
কুর্যাত্ সিরাগতঃ শূলং সিরাকুঞ্চনপূরণম্ |
স্নাযুপ্রাপ্তঃ স্তম্ভকম্পৌ শূলমাক্ষেপণং তথা ||২৭||
হন্তি সন্ধিগতঃ সন্ধীন্ শূলশোফৌ করোতি চ |
অস্থিশোষং প্রভেদং চ কুর্যাচ্ছূলং চ তচ্ছ্রিতঃ ||২৮||
তথা মজ্জগতে রুক্ চ ন কদাচিত্ প্রশাম্যতি |
অপ্রবৃত্তিঃ প্রবৃত্তির্বা বিকৃতা শুক্রগেঽনিলে ||২৯||
View original
वैवर्ण्यं स्फुरणं रौक्ष्यं सुप्तिं चुमुचुमायनम् |
त्वक्स्थो निस्तोदनं कुर्यात् त्वग्भेदं परिपोटनम् ||२५||
व्रणांश्च रक्तगो, ग्रन्थीन् सशूलान् मांससंश्रितः |
तथा मेदःश्रितः कुर्याद्ग्रन्थीन्मन्दरुजोऽव्रणान् ||२६||
कुर्यात् सिरागतः शूलं सिराकुञ्चनपूरणम् |
स्नायुप्राप्तः स्तम्भकम्पौ शूलमाक्षेपणं तथा ||२७||
हन्ति सन्धिगतः सन्धीन् शूलशोफौ करोति च |
अस्थिशोषं प्रभेदं च कुर्याच्छूलं च तच्छ्रितः ||२८||
तथा मज्जगते रुक् च न कदाचित् प्रशाम्यति |
अप्रवृत्तिः प्रवृत्तिर्वा विकृता शुक्रगेऽनिले ||२९||
ত্বক্স্থো রসস্থঃ সমীরণো বৈবর্ণ্যাদি কুর্যাদিতি সম্বন্ধঃ| সুপ্তিং স্পর্শাজ্ঞানম্| চুমুচুমাযনং সর্ষপকল্কাবলিপ্তানামিবাঙ্গানাং বেদনাম্| ত্বগ্ভেদং ত্বচো ভেদমেব| পরিপোটনং সর্বতঃ পুটনং ত্বচ এব| ব্রণাংশ্চ রক্তগঃ ‘কুর্যাত্’ ইতি শেষঃ| অমুং পাঠং কেচিন্ন পঠন্তি; তন্ন, গযদাসাচার্যস্য সম্মতত্বাত্| গ্রন্থীন্ সশূলান্ মাংসসমাশ্রিতঃ সমীরণ ইতি সম্বন্ধঃ| অব্রণান্ ব্রণরহিতান্| সিরাকুঞ্চনং ‘কুটিলা সিরা’ ইতি লোকে বদন্তি | স্তম্ভো নিশ্চলীকরণম্| আক্ষেপণং চালনম্| হন্তীত্যাদি এতেনাকুঞ্চনপ্রসারণযোরভাব উক্তঃ| তচ্ছ্রিত ইতি অস্থ্যাশ্রিত ইত্যর্থঃ| তথা মজ্জগতে যথা অস্থ্যাশ্রিতোঽস্থিশোষং, তথা মজ্জাশ্রিতো মজ্জশোষং কুর্যাদিত্যর্থঃ| কিংবিশিষ্টা প্রবৃত্তিরিত্যাহ- বিকৃতা; অতিশীঘ্রাতিমন্দগ্রথিতবিবর্ণাদিযুক্তেত্যর্থঃ||২৫-২৯||
Adhikarana 16 (30) · Śloka 30
হস্তপাদশিরোধাতূংস্তথা সঞ্চরতি ক্রমাত্ |
ব্যাপ্নুযাদ্বাঽখিলং দেহং বাযুঃ সর্বগতো নৃণাম্ ||৩০||
View original
हस्तपादशिरोधातूंस्तथा सञ्चरति क्रमात् |
व्याप्नुयाद्वाऽखिलं देहं वायुः सर्वगतो नृणाम् ||३०||
একাঙ্গগত একধাতুগতো বাঽপ্যুপেক্ষিতঃ সর্বাঙ্গগতঃ সর্বধাতুগতো বা ভবতীতি দর্শযন্নাহ- হস্তেত্যাদি| বাযুস্তথা হস্তপাদশিরঃ ক্রমাত্ সঞ্চরতি যথা উপেক্ষিতঃ সন্নখিলং দেহং ব্যাপ্নুযাত্, তথা ধাতূন্ ক্রমাত্ সঞ্চরতি যথা সর্বগতো বা ভবতি সর্বধাতুগতো বা ভবতীত্যর্থঃ| ব্যাপ্নুযাদ্বেতি বাশব্দো ভিন্নক্রমে, সর্বগতো বেত্যত্র দ্রষ্টব্যঃ||৩০||
Adhikarana 17 (31) · Śloka 31
স্তম্ভনাক্ষেপণস্বাপশোফশূলানি সর্বগঃ |৩১|
View original
स्तम्भनाक्षेपणस्वापशोफशूलानि सर्वगः |३१|
তস্যেদানীং সর্বাঙ্গগতস্য লিঙ্গং দর্শযন্নাহ- স্তম্ভনেত্যাদি| সর্বগো বাযুঃ সর্বস্মিঞ্ শরীরে স্তম্ভনাদিকং করোতি|৩১|-
Adhikarana 18 (31) · Śloka 31
স্থানেষূক্তেষু সম্মিশ্রঃ সম্মিশ্রাঃ কুরুতে রুজঃ ||৩১||
View original
स्थानेषूक्तेषु सम्मिश्रः सम्मिश्राः कुरुते रुजः ||३१||
তস্য বাযোঃ প্রসরণে পিত্তাদিসংযুক্তস্য পিত্তাদ্যাবরণপ্রতিপত্তিহেতুং দর্শযন্নাহ- স্থানেষ্বিত্যাদি| মিশ্রঃ পিত্তাদিভিঃ| পিত্তাদীনামৌষ্ণ্যাদিস্বভাবলিঙ্গদর্শনাদ্দাহাদিকার্যলিঙ্গদর্শনাচ্চ পিত্তাদ্যাবরণং জ্ঞেযং; কেবলস্য বাযোঃ শীতস্বভাবত্বাদ্দাহঃ পিত্তং বিনা নোত্পদ্যত ইতি||৩১||
Adhikarana 19 (32) · Śloka 32
কুর্যাদবযবপ্রাপ্তো মারুতস্ত্বমিতান্ গদান্ |৩২|
View original
कुर्यादवयवप्राप्तो मारुतस्त्वमितान् गदान् |३२|
তস্যেদানীমবযবগতস্যানেকরোগকারণত্বং দর্শযন্নাহ- কুর্যাদিত্যাদি|৩২|-
Adhikarana 20 (32-39) · Śloka 39
দাহসন্তাপমূর্চ্ছাঃ স্যুর্বাযৌ পিত্তসমন্বিতে ||৩২||
শৈত্যশোফগুরুত্বানি তস্মিন্নেব কফাবৃতে |
সূচীভিরিব নিস্তোদঃ স্পর্শদ্বেষঃ প্রসুপ্ততা ||৩৩||
শেষাঃ পিত্তবিকারাঃ স্যুর্মারুতে শোণিতান্বিতে |
প্রাণে পিত্তাবৃতে ছর্দির্দাহশ্চৈবোপজাযতে ||৩৪||
দৌর্বল্যং সদনং তন্দ্রা বৈবর্ণ্যং চ কফাবৃতে |
উদানে পিত্তসংযুক্তে মূর্চ্ছাদাহভ্রমক্লমাঃ ||৩৫||
অস্বেদহর্ষৌ মন্দোঽগ্নিঃ শীতস্তম্ভৌ কফাবৃতে |
সমানে পিত্তসংযুক্তে স্বেদদাহৌষ্ণ্যমূর্চ্ছনম্ ||৩৬||
কফাধিকং চ বিণ্মূত্রং রোমহর্ষঃ কফাবৃতে |
অপানে পিত্তসংযুক্তে দাহৌষ্ণ্যে স্যাদসৃগ্দরঃ ||৩৭||
অধঃকাযগুরুত্বং চ তস্মিন্নেব কফাবৃতে |
ব্যানে পিত্তাবৃতে দাহো গাত্রবিক্ষেপণং ক্লমঃ ||৩৮||
গুরূণি সর্বগাত্রাণি স্তম্ভনং চাস্থিপর্বণাম্ |
লিঙ্গং কফাবৃতে ব্যানে চেষ্টাস্তম্ভস্তথৈব চ ||৩৯||
View original
दाहसन्तापमूर्च्छाः स्युर्वायौ पित्तसमन्विते ||३२||
शैत्यशोफगुरुत्वानि तस्मिन्नेव कफावृते |
सूचीभिरिव निस्तोदः स्पर्शद्वेषः प्रसुप्तता ||३३||
शेषाः पित्तविकाराः स्युर्मारुते शोणितान्विते |
प्राणे पित्तावृते छर्दिर्दाहश्चैवोपजायते ||३४||
दौर्बल्यं सदनं तन्द्रा वैवर्ण्यं च कफावृते |
उदाने पित्तसंयुक्ते मूर्च्छादाहभ्रमक्लमाः ||३५||
अस्वेदहर्षौ मन्दोऽग्निः शीतस्तम्भौ कफावृते |
समाने पित्तसंयुक्ते स्वेददाहौष्ण्यमूर्च्छनम् ||३६||
कफाधिकं च विण्मूत्रं रोमहर्षः कफावृते |
अपाने पित्तसंयुक्ते दाहौष्ण्ये स्यादसृग्दरः ||३७||
अधःकायगुरुत्वं च तस्मिन्नेव कफावृते |
व्याने पित्तावृते दाहो गात्रविक्षेपणं क्लमः ||३८||
गुरूणि सर्वगात्राणि स्तम्भनं चास्थिपर्वणाम् |
लिङ्गं कफावृते व्याने चेष्टास्तम्भस्तथैव च ||३९||
ইদানীং সম্মিশ্রাঃ কুরুতে রুজ ইতি সূত্রিতমাবরণং বিবৃণ্বন্নাহ- দাহেত্যাদি| দাহোঽগ্নিদগ্ধস্যেব, সন্তাপো ঘর্মাদিসংস্থিতস্যেব| শৈত্যশোফেত্যাদি| তস্মিন্নেব বাযৌ| সূচীভিরিত্যাদি| সদনম্ অঙ্গগ্লানিঃ| ক্লমোঽনাযাসশ্রমঃ| হর্ষো রোমহর্ষঃ| কফাধিকং শ্লেষ্মবহুলং বিষ্ঠামূত্রম্| অসৃগ্দরঃ স্ত্রীণামেব| অস্থিপর্বণাম্ অস্থিসন্ধীনাম্| চেষ্টা গমনাদিকাঃ||৩২-৩৯||
Adhikarana 21 (40-41) · Śloka 41
(প্রাযশঃ সুকুমারাণাং মিথ্যাঽঽহারবিহারিণাম্ |
রোগাধ্বপ্রমদামদ্যব্যাযামৈশ্চাতিপীডনাত্ ||৪০||
ঋতুসাত্ম্যবিপর্যাসাত্ স্নেহাদীনাং চ বিভ্রমাত্ |
অব্যবাযে তথা স্থূলে বাতরক্তং প্রকুপ্যতি ) ||৪১||
View original
(प्रायशः सुकुमाराणां मिथ्याऽऽहारविहारिणाम् |
रोगाध्वप्रमदामद्यव्यायामैश्चातिपीडनात् ||४०||
ऋतुसात्म्यविपर्यासात् स्नेहादीनां च विभ्रमात् |
अव्यवाये तथा स्थूले वातरक्तं प्रकुप्यति ) ||४१||
সূচীভিরিব নিস্তোদ ইত্যাদিবাক্যেনাপ্রকুপিতশোণিতাবৃতবাতস্য লক্ষণমুক্ত্বা, ইদানীং প্রকুপিতশোণিতাবৃতবাতজন্যস্য বাতরক্তস্য প্রকোপকারণং দর্শযন্নাহ- প্রাযশ ইত্যাদি| সুকুমারাণাং বাতরক্তং প্রকুপ্যতীতি সম্বন্ধঃ| মিথ্যাহারবিহারিণামিতি মিথ্যা অনুচিতঃ, বিহারঃ কাযবাঙ্মনোব্যাপারঃ| অধ্বা মার্গঃ, ব্যাযামঃ শরীরাযাসজননং কর্ম| বিভ্রমঃ অন্যথাকরণম্| অব্যবাযে মৈথুনবর্জিতে| কেচিত্ ‘প্রাযশঃ সুকুমারাণাং’ ইত্যাদিগ্রন্থং ‘বাতরক্তং প্রকুপ্যতি’ ইতি যাবন্ন পঠন্তি, চিকিত্সিতে পঠিষ্যমাণত্বাত্||৪০-৪১||
Adhikarana 22 (42-44) · Śloka 44
হস্ত্যশ্বোষ্ট্রৈর্গচ্ছতোঽন্যৈশ্চ বাযুঃ কোপং যাতঃ কারণৈ সেবিতৈঃ স্বৈঃ |
তীক্ষ্ণোষ্ণাম্লক্ষারশাকাদিভোজ্যৈঃ সন্তাপাদ্যৈর্ভূযসা সেবিতৈশ্চ ||৪২||
ক্ষিপ্রং রক্তং দুষ্টিমাযাতি তচ্চ বাযোর্মার্গং সংরুণদ্ধ্যাশু যাতঃ |
ক্রুদ্ধোঽত্যর্থং মার্গরোধাত্ স বাযুরত্যুদ্রিক্তং দূষযেদ্রক্তমাশু ||৪৩||
তত্ সম্পৃক্তং বাযুনা দূষিতেন তত্প্রাবল্যাদুচ্যতে বাতরক্তম্ |
তদ্বত্ পিত্তং দূষিতেনাসৃজাঽঽক্তং শ্লেষ্মা দুষ্টো দূষিতেনাসৃজাঽঽক্তঃ ||৪৪||
View original
हस्त्यश्वोष्ट्रैर्गच्छतोऽन्यैश्च वायुः कोपं यातः कारणै सेवितैः स्वैः |
तीक्ष्णोष्णाम्लक्षारशाकादिभोज्यैः सन्तापाद्यैर्भूयसा सेवितैश्च ||४२||
क्षिप्रं रक्तं दुष्टिमायाति तच्च वायोर्मार्गं संरुणद्ध्याशु यातः |
क्रुद्धोऽत्यर्थं मार्गरोधात् स वायुरत्युद्रिक्तं दूषयेद्रक्तमाशु ||४३||
तत् सम्पृक्तं वायुना दूषितेन तत्प्राबल्यादुच्यते वातरक्तम् |
तद्वत् पित्तं दूषितेनासृजाऽऽक्तं श्लेष्मा दुष्टो दूषितेनासृजाऽऽक्तः ||४४||
তস্য সম্প্রাপ্তিং দর্শযন্নাহ- হস্তীত্যাদি| অন্যৈশ্চেতি অপরৈর্ভারহরণাদিভিঃ কারণৈরিত্যর্থঃ| কোপং যাতঃ কোপং গত ইত্যর্থঃ| কারণৈঃ সেবিতৈঃ স্বৈর্বিদাহ্যাদিভিঃ| তচ্চ রক্তং বাযোর্মার্গং সংরুণদ্ধি| কথম্ভূতস্য বাযোরিত্যাহ- আশু যাতঃ, শীঘ্রং গচ্ছত ইত্যর্থঃ| অত্যুদ্রিক্তম্ অতিশযেন বৃদ্ধিঙ্গতং রক্তম্| তত্ সম্পৃক্তমিতি তদ্রক্তং, সম্পৃক্তং সংসৃষ্টম্| বাযুনা দূষিতেনেতি দূষিতেন বাযুনা সহ| তত্প্রাবল্যাত্ বাতপ্রাবল্যাচ্ছোণিতস্যাপ্রাবল্যাত্, তযোর্বাতরক্তযোঃ প্রাবল্যাদিতি কেচিত্| তদ্বত্ পিত্তমিতি দুষ্টং পিত্তমিত্যর্থঃ, দূষিতেনাসৃজাঽঽক্তমিতি দূষিতেন রক্তেন মিশ্রম্||৪২-৪৪||
Adhikarana 23 (45-46) · Śloka 46
স্পর্শোদ্বিগ্নৌ তোদভেদপ্রশোষস্বাপোপেতৌ বাতরক্তেন পাদৌ |
পিত্তাসৃগ্ভ্যামুগ্রদাহৌ ভবেতামত্যর্থোষ্ণৌ রক্তশোফৌ মৃদূ চ ||৪৫||
কণ্ডূমন্তৌ শ্বেতশীতৌ সশোফৌ পীনস্তব্ধৌ শ্লেষ্মদুষ্টে তু রক্তে |
সর্বৈর্দুষ্টে শোণিতে চাপি দোষাঃ স্বং স্বং রূপং পাদযোর্দর্শযন্তি ||৪৬||
View original
स्पर्शोद्विग्नौ तोदभेदप्रशोषस्वापोपेतौ वातरक्तेन पादौ |
पित्तासृग्भ्यामुग्रदाहौ भवेतामत्यर्थोष्णौ रक्तशोफौ मृदू च ||४५||
कण्डूमन्तौ श्वेतशीतौ सशोफौ पीनस्तब्धौ श्लेष्मदुष्टे तु रक्ते |
सर्वैर्दुष्टे शोणिते चापि दोषाः स्वं स्वं रूपं पादयोर्दर्शयन्ति ||४६||
তস্যেদানীং বাতাদিবিশেষেণ বিশিষ্টলিঙ্গং দর্শযন্নাহ- স্পর্শোদ্বিগ্নাবিত্যাদি| স্পর্শোদ্বিগ্নৌ স্পর্শাসহৌ পাদাবিতি সম্বন্ধঃ| প্রশোষঃ শুষ্কতা, স্বাপঃ স্পর্শাজ্ঞানম্| এতেন বাতপ্রবলবাতরক্তলক্ষণমুক্তম্| পিত্তাসৃগ্ভ্যামিতি বাতশোণিত এব যদা পিত্তমসৃক্ চ বলবত্তরং ভবতি তদেত্যর্থঃ| রক্তশোফৌ রক্তবর্ণশোফৌ| কণ্ডূমন্তৌ পাদাবিতি সম্বন্ধঃ| পীনৌ স্থূলৌ||৪৫-৪৬||
Adhikarana 24 (47) · Śloka 47
প্রাগ্রূপে শিথিলৌ স্বিন্নৌ শীতলৌ সবিপর্যযৌ |
বৈবর্ণ্যতোদসুপ্তত্বগুরুত্বৌষসমন্বিতৌ ||৪৭||
View original
प्राग्रूपे शिथिलौ स्विन्नौ शीतलौ सविपर्ययौ |
वैवर्ण्यतोदसुप्तत्वगुरुत्वौषसमन्वितौ ||४७||
তস্য পূর্বরূপমাহ- প্রাগ্রূপে ইত্যাদি| সবিপর্যযাবিতি কঠিনাস্বিন্নোষ্ণৌ, ‘পাদৌ’ ইত্যধ্যাহারঃ| ওষো দাহঃ| কেচিদত্র পূর্বরূপং ন পঠন্তি, চিকিত্সাযাং পঠিষ্যমাণত্বাত্||৪৭||
Adhikarana 25 (48) · Śloka 48
পাদযোর্মূলমাস্থায কদাচিদ্ধস্তযোরপি |
আখোর্বিষমিব ক্রুদ্ধং তদ্দেহমনুসর্পতি ||৪৮||
View original
पादयोर्मूलमास्थाय कदाचिद्धस्तयोरपि |
आखोर्विषमिव क्रुद्धं तद्देहमनुसर्पति ||४८||
তস্যেদানীং পাদমাত্রেঽভিজাতস্য কালেনাবযবান্তরানুসরণং নির্দিশন্নাহ- পাদযোরিত্যাদি| মূলমাস্থায তলং প্রাপ্য| আখোরিত্যাদি উন্দুরস্য বিষং মূলমাস্থায পশ্চাত্ কুপিতং সদ্দেহং সকলমেবানুযাতি||৪৮||
Adhikarana 26 (49) · Śloka 50
আজানুস্ফুটিতং যচ্চ প্রভিন্নং প্রস্রুতং চ যত্ |
উপদ্রবৈশ্চ যজ্জুষ্টং প্রাণমাংসক্ষযাদিভিঃ ||৪৯||
শোণিতং তদসাধ্যং স্যাদ্যাপ্যং সংবত্সরোত্থিতম্ |৫০|
View original
आजानुस्फुटितं यच्च प्रभिन्नं प्रस्रुतं च यत् |
उपद्रवैश्च यज्जुष्टं प्राणमांसक्षयादिभिः ||४९||
शोणितं तदसाध्यं स्याद्याप्यं संवत्सरोत्थितम् |५०|
তস্যেদানীমসাধ্যাদিলক্ষণং দর্শযন্নাহ- আজানুস্ফুটিতমিত্যাদি| আজানুস্ফুটিতং জানুপর্যন্তমুচ্চটিতম্| প্রভিন্নং বিদীর্ণম্| প্রস্রুতং স্রাবযুক্তম্| উপদ্রবৈঃ প্রাণমাংসক্ষযাদিভিরবারণীযোক্তৈঃ | আদিগ্রহণাদঙ্গুলিবক্রতার্বুদাদযোঽপি গ্রাহ্যাঃ| জুষ্টং সহিতম্| যজ্জানুপর্যন্তং স্ফুটিতং বাতপ্রাবল্যাত্, যচ্চ জানুপর্যন্তং প্রভিন্নং প্রস্রুতং চ পিত্তরক্তপ্রাবল্যাত্, তদপ্যসাধ্যমেব||৪৯||-
Adhikarana 27 (50-51) · Śloka 51
যদা তু ধমনীঃ সর্বাঃ কুপিতোঽভ্যেতি মারুতঃ ||৫০||
তদাক্ষিপত্যাশু মুহুর্মুহুর্দেহং মুহুশ্চরঃ |
মুহুর্মুহুস্তদাক্ষেপাদাক্ষেপক ইতি স্মৃতঃ ||৫১||
View original
यदा तु धमनीः सर्वाः कुपितोऽभ्येति मारुतः ||५०||
तदाक्षिपत्याशु मुहुर्मुहुर्देहं मुहुश्चरः |
मुहुर्मुहुस्तदाक्षेपादाक्षेपक इति स्मृतः ||५१||
ইদানীং বাতরক্তমভিধাযাক্ষেপকমাহ- যদেত্যাদি| ধমন্যো নাড্যঃ| অভ্যেতি ব্যাপ্নোতি| আক্ষিপতি চালযতি| মুহুশ্চর ইতি বারংবারং চলনশীলো বাযুঃ, মুহুশ্চরত্বেনৈব মুহুর্মুহুরাক্ষেপণং যুক্তম্; অন্যে তু ‘বহিশ্চর’ ইতি পঠন্তি, তন্নেচ্ছতি গযদাসাচার্যঃ| তদাক্ষেপাত্ দেহাক্ষেপাত্| ইদমাক্ষেপকস্য সামান্যলক্ষণমুক্তম্||৫০-৫১||
Adhikarana 28 (52-58) · Śloka 58
সোঽপতানকসঞ্জ্ঞো যঃ পাতযত্যন্তরাঽন্তরা |
কফান্বিতো ভৃশং বাযুস্তাস্বেব যদি তিষ্ঠতি ||৫২||
স দণ্ডবত্ স্তম্ভযতি কৃচ্ছ্রো দণ্ডাপতানকঃ |
হনুগ্রহস্তদাঽত্যর্থং সোঽন্নং কৃচ্ছ্রান্নিষেবতে ||৫৩||
ধনুস্তুল্যং নমেদ্যস্তু স ধনুঃস্তম্ভসঞ্জ্ঞকঃ |
অঙ্গুলীগুল্ফজঠরহৃদ্বক্ষোগলসংশ্রিতঃ ||৫৪||
স্নাযুপ্রতানমনিলো যদাঽঽক্ষিপতি বেগবান্ |
বিষ্টব্ধাক্ষঃ স্তব্ধহনুর্ভগ্নপার্শ্বঃ কফং বমন্ ||৫৫||
অভ্যন্তরং ধনুরিব যদা নমতি মানবঃ |
তদাঽস্যাভ্যন্তরাযামং কুরুতে মারুতো বলী ||৫৬||
বাহ্যস্নাযুপ্রতানস্থো বাহ্যাযামং করোতি চ |
তমসাধ্যং বুধাঃ প্রাহুর্বক্ষঃকট্যূরুভঞ্জনম্ ||৫৭||
কফপিত্তান্বিতো বাযুর্বাযুরেব চ কেবলঃ |
কুর্যাদাক্ষেপকং ত্বন্যং চতুর্থমভিঘাতজম্ ||৫৮||
View original
सोऽपतानकसञ्ज्ञो यः पातयत्यन्तराऽन्तरा |
कफान्वितो भृशं वायुस्तास्वेव यदि तिष्ठति ||५२||
स दण्डवत् स्तम्भयति कृच्छ्रो दण्डापतानकः |
हनुग्रहस्तदाऽत्यर्थं सोऽन्नं कृच्छ्रान्निषेवते ||५३||
धनुस्तुल्यं नमेद्यस्तु स धनुःस्तम्भसञ्ज्ञकः |
अङ्गुलीगुल्फजठरहृद्वक्षोगलसंश्रितः ||५४||
स्नायुप्रतानमनिलो यदाऽऽक्षिपति वेगवान् |
विष्टब्धाक्षः स्तब्धहनुर्भग्नपार्श्वः कफं वमन् ||५५||
अभ्यन्तरं धनुरिव यदा नमति मानवः |
तदाऽस्याभ्यन्तरायामं कुरुते मारुतो बली ||५६||
बाह्यस्नायुप्रतानस्थो बाह्यायामं करोति च |
तमसाध्यं बुधाः प्राहुर्वक्षःकट्यूरुभञ्जनम् ||५७||
कफपित्तान्वितो वायुर्वायुरेव च केवलः |
कुर्यादाक्षेपकं त्वन्यं चतुर्थमभिघातजम् ||५८||
আক্ষেপকবিশেষানাহ- সোঽপতানক ইত্যাদি| য আক্ষেপকোঽন্তরাঽন্তরা পাতযতি সোঽপতানক ইত্যর্থঃ| ইদং সামান্যাপতানকলক্ষণমুক্তং; গযদাসেনাপতানকলক্ষণং ‘যেনাপতাম্যতে’ ইত্যাদিবাক্যেনাভিধায ব্যাখ্যাতং, যথা- “যেন বাযুনা কর্তৃভূতেন হেতুভূতেন বা পুমানপতাম্যতে তমো দৃশ্যতে মোহ্যতে ইতি যাবত্ সোঽপতানক ইতি; সোঽযং হৃদিস্থমনোঽধিষ্ঠানেন সকফেন বাযুনা জন্যতে” ইতি| স এবাপতানকস্ত্রিধা- দণ্ডাপতানকঃ, অন্তরাযামঃ, বহিরাযামশ্চ; তত্র দণ্ডাপতানকলক্ষণমাহ- কফান্বিত ইত্যাদি| তাস্বেব সর্বাসু ধমনীষু, ভৃশং তিষ্ঠতীতি সম্বন্ধঃ| কৃচ্ছ্রঃ কষ্টসাধ্যঃ| হনুগ্রহস্তু দণ্ডাপতানকেঽন্যত্রাপি বাযৌ স্যাত্| স দণ্ডাপতানকবান্ পুরুষঃ| ধনুঃস্তম্ভসঞ্জ্ঞকমন্তরাযামং দর্শযন্নাহ- ধনুস্তুল্যমিত্যাদি| তস্যৈব ভাষ্যং বক্তুমাহ- অঙ্গুলীত্যাদি| অঙ্গুল্যোঽত্র পাদগতাঃ, গুল্ফঃ পার্ষ্ণেরুপরি গ্রন্থিঃ, জঠরমুদরং, হৃত্ হৃদযং, বক্ষঃ স্তনযোরন্তরালং, গলঃ কণ্ঠঃ; এতেষু স্থানেষু সংশ্রিত আশ্রিতো বাযুঃ| স্নাযুপ্রতানং স্নাযুবিস্তারম্| বহিরাযামং নির্দিশন্নাহ- বাহ্যস্নাযুপ্রতানস্থ ইত্যাদি| বাহ্যস্নাযুপ্রতানস্থো বাহ্যস্নাযুবিস্তারস্থঃ, বাহ্যস্নাযবঃ পাদমূলপিণ্ডিকাকটীপৃষ্ঠগ্রীবাপশ্চিমভাগাশ্রযাঃ| বক্ষঃকট্যূরুভঞ্জনমিতি বক্ষঃকট্যূরুভঞ্জনত্বে সত্যেবাসাধ্যত্বম্, অভগ্নবক্ষঃকট্যাদিকস্তু নব উপক্রম্য এব| তস্যাক্ষেপকস্যেতরদোষসংসর্গেণ নিদানবিশেষাচ্চ সঙ্খ্যাভেদং দর্শযন্নাহ- কফপিত্তান্বিত ইত্যাদি| একঃ কফান্বিতঃ, দ্বিতীযঃ পিত্তান্বিতঃ, তৃতীযঃ কেবলবাতকৃতঃ, চতুর্থোঽভিঘাতজঃ| চতুর্থমভিঘাতজমিতি নিদানবিশেষাত্| দণ্ডাপতানকাদযস্ত্রযশ্চতুর্থঃ পুনরভিঘাতজ ইতি শ্রীজেজ্ঝটঃ; তন্নেচ্ছতি গযী, গর্ভপাতাদিনিমিত্তভেদেন সঙ্খ্যাতিরেকাত্| শ্রীবহ্মদেবস্তু “আক্ষেপকশ্চতুর্ধা- অপতানকঃ, সংসৃষ্টাক্ষেপকঃ, কেবলাক্ষেপকঃ, অভিঘাতজশ্চ; তত্রাপতানকঃ ‘সোঽপতানক’ ইত্যাদিনা ‘বক্ষঃকট্যূরুভঞ্জনম্’ ইতি পর্যন্তেনোক্তঃ, ‘কফান্বিতো বাযুঃ’ ইতি সংসৃষ্টাক্ষেপকঃ, ‘বাযুরেব চ কেবলঃ’ ইতি কেবলাক্ষেপকঃ, চতুর্থঃ পুনরভিঘাতজঃ” ইত্যাহ||৫২-৫৮||
Adhikarana 29 (59) · Śloka 59
গর্ভপাতনিমিত্তশ্চ শোণিতাতিস্রবাচ্চ যঃ |
অভিঘাতনিমিত্তশ্চ ন সিধ্যত্যপতানকঃ ||৫৯||
View original
गर्भपातनिमित्तश्च शोणितातिस्रवाच्च यः |
अभिघातनिमित्तश्च न सिध्यत्यपतानकः ||५९||
তস্যৈবাক্ষেপকস্যাপতানকসঞ্জ্ঞাং প্রাপ্তস্যাসাধ্যত্বং দর্শযন্নাহ- গর্ভপাতনিমিত্তশ্চেত্যাদি| গর্ভপাতাদিনিমিত্তাস্ত্রযোঽপ্যাগন্তবোঽসাধ্যাঃ; যদি কথঞ্চিদ্দৈবযোগাত্ সিধ্যন্তি তদা বৈকল্যং জনযন্তি||৫৯||
Adhikarana 30 (60-62) · Śloka 62
অধোগমাঃ সতির্যগ্গা ধমনীরূর্ধ্বদেহগাঃ |
যদা প্রকুপিতোঽত্যর্থং মাতরিশ্বা প্রপদ্যতে ||৬০||
তদাঽন্যতরপক্ষস্য সন্ধিবন্ধান্ বিমোক্ষযন্ |
হন্তি পক্ষং তমাহুর্হি পক্ষাঘাতং ভিষগ্বরাঃ ||৬১||
যস্য কৃত্স্নং শরীরার্ধমকর্মণ্যমচেতনম্ |
ততঃ পতত্যসূন্ বাঽপি ত্যজত্যনিলপীডিতঃ ||৬২||
View original
अधोगमाः सतिर्यग्गा धमनीरूर्ध्वदेहगाः |
यदा प्रकुपितोऽत्यर्थं मातरिश्वा प्रपद्यते ||६०||
तदाऽन्यतरपक्षस्य सन्धिबन्धान् विमोक्षयन् |
हन्ति पक्षं तमाहुर्हि पक्षाघातं भिषग्वराः ||६१||
यस्य कृत्स्नं शरीरार्धमकर्मण्यमचेतनम् |
ततः पतत्यसून् वाऽपि त्यजत्यनिलपीडितः ||६२||
পক্ষাঘাতমাহ- অধোগমা ইত্যাদি| একতরশরীরার্ধধমনীরূর্ধ্বাধস্তির্যগ্গতা যদা স মাতরিশ্বা বাযুঃ, প্রপদ্যতে আশ্রযতীত্যর্থঃ, তদাঽন্যতরপক্ষস্যৈকতরশরীরার্ধস্য, সন্ধিবন্ধান্ বিমোক্ষযন্ বিমোচযন্, পক্ষং শরীরার্ধং হন্তি| যস্য কৃত্স্নমিত্যাদি| অকর্মণ্যম্ ঈষত্কর্মক্ষমম্, অচেতনম্ অল্পচেতনম্; যদা অকর্মণ্যং ভবতি তদা পততি; যদা অচেতনং ভবতি তদা অসূন্ প্রাণান্ পরিত্যজতি||৬০-৬২||
Adhikarana 31 (63) · Śloka 63
শুদ্ধবাতহতং পক্ষং কৃচ্ছ্রসাধ্যতমং বিদুঃ |
সাধ্যমন্যেন সংসৃষ্টমসাধ্যং ক্ষযহেতুকম্ ||৬৩||
View original
शुद्धवातहतं पक्षं कृच्छ्रसाध्यतमं विदुः |
साध्यमन्येन संसृष्टमसाध्यं क्षयहेतुकम् ||६३||
পক্ষাঘাতস্য সাধ্যাসাধ্যত্বং দর্শযন্নাহ- শুদ্ধবাতহতমিত্যাদি| শুদ্ধঃ কফাদ্যসংসৃষ্টঃ| অন্যেন সংসৃষ্টম্ ইতরদোষসম্বদ্ধম্||৬৩||
Adhikarana 32 (64-66) · Śloka 66
বাযুরূর্ধ্বং ব্রজেত্ স্থানাত্ কুপিতো হৃদযং শিরঃ |
শঙ্খৌ চ পীডযত্যঙ্গান্যাক্ষিপেন্নমযেচ্চ সঃ ||৬৪||
নিমীলিতাক্ষো নিশ্চেষ্টঃ স্তব্ধাক্ষো বাঽপি কূজতি |
নিরুচ্ছ্বাসোঽথবা কৃচ্ছ্রাদুচ্ছ্বস্যান্নষ্টচেতনঃ ||৬৫||
স্বস্থঃ স্যাদ্ধৃদযে মুক্তে হ্যাবৃতে তু প্রমুহ্যতি |
কফান্বিতেন বাতেন জ্ঞেয এষোঽপতন্ত্রকঃ ||৬৬||
View original
वायुरूर्ध्वं व्रजेत् स्थानात् कुपितो हृदयं शिरः |
शङ्खौ च पीडयत्यङ्गान्याक्षिपेन्नमयेच्च सः ||६४||
निमीलिताक्षो निश्चेष्टः स्तब्धाक्षो वाऽपि कूजति |
निरुच्छ्वासोऽथवा कृच्छ्रादुच्छ्वस्यान्नष्टचेतनः ||६५||
स्वस्थः स्याद्धृदये मुक्ते ह्यावृते तु प्रमुह्यति |
कफान्वितेन वातेन ज्ञेय एषोऽपतन्त्रकः ||६६||
অপতন্ত্রকমাহ- বাযুরূর্ধ্বমিত্যাদি| হৃদযং শিরঃ শঙ্খৌ চ পীডযতীতি হৃদযং কমলমুকুলাকারমধোমুখং, ভ্রুবোরন্তোপরি কর্ণললাটযোর্মধ্যে শঙ্খৌ, অঙ্গানি হস্তপাদাদীনি| আক্ষিপেত্ পাতযেত্ | কূজতি কপোত ইব শব্দং করোতি; অথবা কৃচ্ছ্রাদুচ্ছ্বস্যাদিতি কষ্টেনোচ্ছ্বাসং কুর্যাত্| কেচিদপতন্ত্রকমমুং ন পঠন্তি, অপতন্ত্রকাপতানকযোরৈক্যাত্||৬৪-৬৬||
Adhikarana 33 (67) · Śloka 67
দিবাস্বপ্নাসনস্থানবিবৃতাধ্বনিরীক্ষণৈঃ |
মন্যাস্তম্ভং প্রকুরুতে স এব শ্লেষ্মণাঽঽবৃতঃ ||৬৭||
View original
दिवास्वप्नासनस्थानविवृताध्वनिरीक्षणैः |
मन्यास्तम्भं प्रकुरुते स एव श्लेष्मणाऽऽवृतः ||६७||
মন্যাস্তম্ভমাহ- দিবাস্বপ্নেত্যাদি| আসনম্ উপবেশনং, স্থানম্ ঊর্ধ্বীভবনং| বিবৃতাধ্বনিরীক্ষণৈঃ বক্রমার্গাবলোকনৈঃ| স এব বাযুঃ| মন্যাস্তম্ভং কেচিদপতানকপূর্বরূপং মন্যন্তে||৬৭||
Adhikarana 34 (68-72) · Śloka 72
(গর্ভিণীসূতিকাবালবৃদ্ধক্ষীণেষ্বসৃক্ক্ষযে |) উচ্চৈর্ব্যাহরতোঽত্যর্থং খাদতঃ কঠিনানি বা |
হসতো জৃম্ভতো ভারাদ্বিষমাচ্ছযনাদপি ||৬৮||
শিরোনাসৌষ্ঠচিবুকললাটেক্ষণসন্ধিগঃ |
অর্দযিত্বাঽনিলো বক্ত্রমর্দিতং জনযত্যতঃ ||৬৯||
বক্রীভবতি বক্ত্রার্ধং গ্রীবা চাপ্যপবর্ততে |
শিরশ্চলতি বাক্সঙ্গো নেত্রাদীনাং চ বৈকৃতম্ ||৭০||
গ্রীবাচিবুকদন্তানাং তস্মিন্ পার্শ্বে তু বেদনা |
যস্যাগ্রজো রোমহর্ষো বেপথুর্নেত্রমাবিলম্ ||৭১||
বাযুরূর্ধ্বং ত্বচি স্বাপস্তোদো মন্যাহনুগ্রহঃ |
তমর্দিতমিতি প্রাহুর্ব্যাধিং ব্যাধিবিশারদাঃ ||৭২||
View original
(गर्भिणीसूतिकाबालवृद्धक्षीणेष्वसृक्क्षये |) उच्चैर्व्याहरतोऽत्यर्थं खादतः कठिनानि वा |
हसतो जृम्भतो भाराद्विषमाच्छयनादपि ||६८||
शिरोनासौष्ठचिबुकललाटेक्षणसन्धिगः |
अर्दयित्वाऽनिलो वक्त्रमर्दितं जनयत्यतः ||६९||
वक्रीभवति वक्त्रार्धं ग्रीवा चाप्यपवर्तते |
शिरश्चलति वाक्सङ्गो नेत्रादीनां च वैकृतम् ||७०||
ग्रीवाचिबुकदन्तानां तस्मिन् पार्श्वे तु वेदना |
यस्याग्रजो रोमहर्षो वेपथुर्नेत्रमाविलम् ||७१||
वायुरूर्ध्वं त्वचि स्वापस्तोदो मन्याहनुग्रहः |
तमर्दितमिति प्राहुर्व्याधिं व्याधिविशारदाः ||७२||
অর্দিতমাহ- গর্ভিণীত্যাদি| সূতিকা প্রসূতা স্ত্রী| ব্যাহরতঃ শব্দং কুর্বতঃ| ভারাদ্বিষমাচ্ছযনাদপীতি বিষমাদ্ভারাত্, বিষমাচ্ছযনাচ্চেত্যর্থঃ| অন্যে তু ‘বিষমোচ্ছ্বসনাত্’ ইতি পঠন্তি| অর্দযিত্বা ব্যথযিত্বা| অপবর্ততে বক্রীভবতি| বাক্সঙ্গো বাচোঽনির্গমঃ| নেত্রাদীনামিত্যাদিশব্দাদ্ ভ্রূগণ্ডাদ্যুপসঙ্গ্রহঃ| তস্মিন্ পার্শ্বে ইতি যস্মিন্ পার্শ্বেঽর্দিতং ভবতি তস্মিন্ পার্শ্বে গ্রীবাদযো বক্রীভবন্তি| চিবুকং মুখকুহরস্যাধোভাগঃ| তস্য (পূর্ব)রূপমাহ- যস্যেত্যাদি| অগ্রজঃ পূর্বভাবী| আবিলং সমলম্| বাযুরূর্ধ্বং ‘প্রসর্পতি’ ইতি শেষঃ| ত্বচি স্বাপঃ ত্বচঃ স্পর্শাজ্ঞানম্||৬৮-৭২||
Adhikarana 35 (73) · Śloka 73
ক্ষীণস্যানিমিষাক্ষস্য প্রসক্তং সক্তভাষিণঃ |
ন সিধ্যত্যর্দিতং বাঢং ত্রিবর্ষং বেপনস্য চ ||৭৩||
View original
क्षीणस्यानिमिषाक्षस्य प्रसक्तं सक्तभाषिणः |
न सिध्यत्यर्दितं बाढं त्रिवर्षं वेपनस्य च ||७३||
তস্যাসাধ্যত্বমাহ- ক্ষীণস্যেত্যাদি| অনিমিষাক্ষস্য স্তব্ধাক্ষস্য| প্রসক্তং সততং, সক্তভাষিণঃ পীডিতাব্যক্তপদভাষিণঃ; অন্যে তু ‘প্রসক্তাব্যক্তভাষিণঃ’ ইতি পঠন্তি, প্রসক্তং প্রকর্ষেণ লগ্নমিতি তত্রার্থঃ| বাঢমতিশযেন ন সিধ্যতীতি সম্বন্ধঃ| ত্রিবর্ষমিতি সংবত্সরত্রযাতীতম্; অন্যে তু নাসাক্ষিমুখস্রাবিণং ত্রিবর্ষমাহুঃ| বেপনস্য কম্পনশীলস্য| “গর্ভিণীসূতিকাবালবৃদ্ধক্ষীণেষ্বসৃক্ক্ষযে” ইত্যমুং পাঠং জেজ্ঝটাদয আচার্যা ন পঠন্তি| ‘উচ্চৈর্ব্যাহরতোঽত্যর্থং’ ইত্যাদৌ কৃত্বা পঠন্তি, বহুবৈদ্যপঠিতত্বাদস্মাভিঃ পঠিতঃ||৭৩||
Adhikarana 36 (74) · Śloka 74
পার্ষ্ণিপ্রত্যঙ্গুলীনাং তু কণ্ডরা যাঽনিলার্দিতা |
সক্থ্নঃ ক্ষেপং নিগৃহ্ণীযাদ্গৃধ্রসীতি হি সা স্মৃতা ||৭৪||
View original
पार्ष्णिप्रत्यङ्गुलीनां तु कण्डरा याऽनिलार्दिता |
सक्थ्नः क्षेपं निगृह्णीयाद्गृध्रसीति हि सा स्मृता ||७४||
গৃধ্রসীমাহ- পার্ষ্ণীত্যাদি| যা কণ্ডরা সক্থ্নঃ ক্ষেপং নিগৃহ্ণীযাত্ সা গৃধ্রসীতি স্মৃতেতি সম্বন্ধঃ| পার্ষ্ণির্গুল্ফস্য পাশ্চাত্যাধোভাগঃ, প্রত্যঙ্গুল্যোঽঙ্গুল্য এব; এতেনোপর্যধোভাগগতং কণ্ডরাদ্বযং গৃহ্যতে| কণ্ডরা মহাস্নাযুঃ| গুল্ফাদিবিটপান্তং সক্থি, তস্য ক্ষেপঃ প্রসারণং, তং নিগৃহ্ণীযাদবরুন্ধ্যাদিত্যর্থঃ| গৃধ্রসী ‘রঙ্ঘিণী’ ইতি লোকে| সা চ বাতাদ্ বাতকফাচ্চ| খঞ্জনবাতে ন সাতিশযা ব্যথা যথা গৃধ্রস্যাম্| কেচিত্ ‘পার্ষ্ণিং প্রত্যঙ্গুলীনাম্’ ইতি দ্বিতীযান্তং পঠন্তি; তত্রাপি পার্ষ্ণিং লক্ষীকৃত্য যা কণ্ডরা, অঙ্গুলীনাং চ যা কণ্ডরেতি কণ্ডরাদ্বযম্||৭৪||
Adhikarana 37 (75) · Śloka 75
তলপ্রত্যঙ্গুলীনাং তু কণ্ডরা বাহুপৃষ্ঠতঃ |
বাহ্বোঃ কর্মক্ষযকরী বিশ্বাচীতি হি সা স্মৃতা ||৭৫||
View original
तलप्रत्यङ्गुलीनां तु कण्डरा बाहुपृष्ठतः |
बाह्वोः कर्मक्षयकरी विश्वाचीति हि सा स्मृता ||७५||
গৃধ্রসীসদৃশীমেকবাহুগতাং বিশ্বাচীমাহ- তলেত্যাদি| তলশব্দোঽযমুপরি বর্ততে, তেন করস্যাভ্যন্তরকণ্ডরা গৃহীতা, বাহুপৃষ্ঠত ইত্যনেন বাহ্যকণ্ডরা গৃহীতা| বাহ্বোরিতি দ্বিবচনং সামান্যাপেক্ষযা , কদাচিত্ কস্মিংশ্চিদ্বাহৌ ভবতি| ‘অনিলার্দিতা’ ইত্যত্রাপি সম্বধ্যতে| চকারোঽত্র গৃধ্রসীবিশ্বাচ্যোর্নামান্তরমনুক্তং খল্ল্যভিধানং সমুচ্চিনোতি| অন্যে ত্বত্রাপি ‘তলং প্রত্যঙ্গুলীনাম্’ ইতি পূর্ববদ্দ্বিতীযান্তং পঠন্তি, তেন তলং লক্ষীকৃত্য যা কণ্ডরা বাহুপৃষ্ঠতশ্চ যা কণ্ডরেতি কণ্ডরাদ্বযং গৃহ্যতে||৭৫||
Adhikarana 38 (76) · Śloka 76
বাতশোণিতজঃ শোফো জানুমধ্যে মহারুজঃ |
শিরঃ ক্রোষ্টুকপূর্বং তু স্থূলঃ ক্রোষ্টুকমূর্ধবত্ ||৭৬||
View original
वातशोणितजः शोफो जानुमध्ये महारुजः |
शिरः क्रोष्टुकपूर्वं तु स्थूलः क्रोष्टुकमूर्धवत् ||७६||
ক্রোষ্টুকশির আহ- বাতেত্যাদি| যো জানুমধ্যে বাতশোণিতজো মহারুজঃ ক্রোষ্টুকমূর্ধবত্ স্থূলঃ শোফো ভবতি স ক্রোষ্টুকশির ইতি জ্ঞেযঃ| বাতশোণিতজ ইতি বাতশোণিতাভ্যাং জাতো বাতশোণিতজঃ, ন পুনর্বাতরক্তেন ব্যাধিনা জনিতঃ; অন্যে তু বাতেন শোণিতেন চ জাত ইতি নেচ্ছন্তি, কিং তর্হি বাতরক্তজ ইতি রোগকারণমেব রোগমিচ্ছন্তি| শিরঃ ক্রোষ্টুকপূর্বমিতি ক্রোষ্টুকশব্দপূর্বং শিরঃ, তস্য রোগস্য ‘ক্রোষ্টুকশির’ ইতি নামেত্যর্থঃ| ক্রোষ্টুকমূর্ধবত্ শৃগালমস্তকবত্||৭৬||
Adhikarana 39 (77) · Śloka 77
বাযুঃ কট্যাং স্থিতঃ সক্থ্নঃ কণ্ডরামাক্ষিপেদ্যদা |
খঞ্জস্তদা ভবেজ্জন্তুঃ, পঙ্গুঃ সক্থ্নোর্দ্বযোর্বধাত্ ||৭৭||
View original
वायुः कट्यां स्थितः सक्थ्नः कण्डरामाक्षिपेद्यदा |
खञ्जस्तदा भवेज्जन्तुः, पङ्गुः सक्थ्नोर्द्वयोर्वधात् ||७७||
খঞ্জপঙ্গুলবাতাবাহ- বাযুরিত্যাদি| আক্ষিপেদিতি ঈষত্ ক্ষিপেত্, খঞ্জে বিকলগতের্দর্শনাত্| সক্থ্নোর্দ্বযোর্বধাদিতি সর্বথা গতিবিঘাতাত্ পঙ্গুরিত্যর্থঃ| দ্বযোরিতি পুনরুক্তিপ্রসঙ্গাদ্যুগপত্ সক্থিদ্বযবধাদিত্যর্থঃ||৭৭||
Adhikarana 40 (78) · Śloka 78
প্রক্রামন্ বেপতে যস্তু খঞ্জন্নিব চ গচ্ছতি |
কলাযখঞ্জং তং বিদ্যান্মুক্তসন্ধিপ্রবন্ধনম্ ||৭৮||
View original
प्रक्रामन् वेपते यस्तु खञ्जन्निव च गच्छति |
कलायखञ्जं तं विद्यान्मुक्तसन्धिप्रबन्धनम् ||७८||
কলাযখঞ্জমাহ- প্রক্রামন্নিত্যাদি| প্রক্রামন্ পাদবিক্রমং কুর্বন্, গমনারম্ভ এব বেপতে কলাযখঞ্জ ইত্যযং খঞ্জাদ্বিশেষঃ| মুক্তসন্ধিপ্রবন্ধনমিতি শিথিলসন্ধিবন্ধনমিত্যর্থঃ||৭৮||
Adhikarana 41 (79) · Śloka 79
ন্যস্তে তু বিষমং(মে) পাদে রুজঃ কুর্যাত্ সমীরণঃ |
বাতকণ্টক ইত্যেষ বিজ্ঞেযঃ খডু(ল)কাশ্রিতঃ ||৭৯||
View original
न्यस्ते तु विषमं(मे) पादे रुजः कुर्यात् समीरणः |
वातकण्टक इत्येष विज्ञेयः खडु(ल)काश्रितः ||७९||
বাতকণ্টকমাহ- ন্যস্ত ইত্যাদি| ন্যস্তে তু বিষমং পাদ ইতি বিষমস্থানে নিক্ষিপ্তে পাদে ইত্যর্থঃ| খুডু(ল)কাশ্রিত ইতি পাদজঙ্ঘাসন্ধিসংশ্রয ইত্যর্থঃ, ‘পার্ষ্ণ্যাশ্রযঃ’ ইত্যন্যে||৭৯||
Adhikarana 42 (80) · Śloka 80
পাদযোঃ কুরুতে দাহং পিত্তাসৃক্সহিতোঽনিলঃ |
বিশেষতশ্চঙ্ক্রমণাত্ পাদদাহং তমাদিশেত্ ||৮০||
View original
पादयोः कुरुते दाहं पित्तासृक्सहितोऽनिलः |
विशेषतश्चङ्क्रमणात् पाददाहं तमादिशेत् ||८०||
পাদদাহমাহ- পাদযোরিত্যাদি| বিশেষতশ্চঙ্ক্রমণাদিতি বিশেষেণ গচ্ছতঃ, তিষ্ঠতস্তু সামান্যেন||৮০||
Adhikarana 43 (81) · Śloka 81
হৃষ্যতশ্চরণৌ যস্য ভবতশ্চ প্রসুপ্তবত্ |
পাদহর্ষঃ স বিজ্ঞেযঃ কফবাতপ্রকোপজঃ ||৮১||
View original
हृष्यतश्चरणौ यस्य भवतश्च प्रसुप्तवत् |
पादहर्षः स विज्ञेयः कफवातप्रकोपजः ||८१||
পাদহর্ষমাহ- হৃষ্যত ইত্যাদি| হৃষত ইতি হর্ষো রোমাঞ্চপ্রাযো বেদনাবিশেষোঽন্তঃশীতকরঃ| ভবতশ্চ প্রসুপ্তবদিতি স্পর্শাজ্ঞানাত্ সুপ্তাবিব ভবত ইত্যর্থঃ||৮১||
Adhikarana 44 (82) · Śloka 82
অংসদেশস্থিতো বাযুঃ শোষযিত্বাংঽসবন্ধনম্ |
সিরাশ্চাকুঞ্চ্য তত্রস্থো জনযত্যববাহুকম্ ||৮২||
View original
अंसदेशस्थितो वायुः शोषयित्वांऽसबन्धनम् |
सिराश्चाकुञ्च्य तत्रस्थो जनयत्यवबाहुकम् ||८२||
অংসশোষাববাহুকাবাহ- অংসদেশেত্যাদি| অংসসমীপোপলক্ষিতো দেশোংঽসদেশঃ; অংসো বাহুশিরঃ| অংসবন্ধনং শ্লেষ্মাণমিত্যর্থঃ| অংসবন্ধনং শোষযিত্বা ‘অংসশোষং রোগং করোতি’ ইতি বাক্যশেষো জ্ঞেযঃ| তত্রস্থঃ অংসদেশস্থিত ইত্যর্থঃ||৮২||
Adhikarana 45 (83) · Śloka 83
যদা শব্দবহং স্রোতো বাযুরাবৃত্য তিষ্ঠতি |
শুদ্ধঃ শ্লেষ্মান্বিতো বাঽপি বাধির্যং তেন জাযতে ||৮৩||
View original
यदा शब्दवहं स्रोतो वायुरावृत्य तिष्ठति |
शुद्धः श्लेष्मान्वितो वाऽपि बाधिर्यं तेन जायते ||८३||
বাধির্যমাহ- যদেত্যাদি| শুদ্ধঃ কেবলঃ| অপিশব্দাদ্রক্তপিত্তাবরণযোরুপসঙ্গ্রহঃ| যদ্যপ্যযং ব্যাধিঃ শালাক্যেঽপি পঠ্যতে, তথাঽপ্যত্রাপি পঠনীযঃ, বৃদ্ধসম্মতত্বাত্||৮৩||
Adhikarana 46 (84) · Śloka 84
হনুশঙ্খশিরোগ্রীবং যস্য ভিন্দন্নিবানিলঃ |
কর্ণযোঃ কুরুতে শূলং কর্ণশূলং তদুচ্যতে ||৮৪||
View original
हनुशङ्खशिरोग्रीवं यस्य भिन्दन्निवानिलः |
कर्णयोः कुरुते शूलं कर्णशूलं तदुच्यते ||८४||
কর্ণশূলমাহ- হনুশঙ্খেত্যাদি||৮৪||
Adhikarana 47 (85) · Śloka 85
আবৃত্য সকফো বাযুর্ধমনীঃ শব্দবাহিনীঃ |
নরান্ করোত্যক্রিযকান্মূকমিন্মিণগদ্গদান্ ||৮৫||
View original
आवृत्य सकफो वायुर्धमनीः शब्दवाहिनीः |
नरान् करोत्यक्रियकान्मूकमिन्मिणगद्गदान् ||८५||
জিহ্বাগতবাতরোগং দর্শযন্নাহ- আবৃত্যেত্যাদি| আবৃত্য অবরুন্ধ্যেত্যর্থঃ| মূকো বচনরহিতঃ, মিন্মিণঃ সানুনাসিকবাক্, গদ্গদোঽব্যক্তবাক্||৮৫||
Adhikarana 48 (86-87) · Śloka 87
অধো যা বেদনা যাতি বর্চোমূত্রাশযোত্থিতা |
ভিন্দতীব গুদোপস্থং সা তূনীত্যভিধীযতে ||৮৬||
গুদোপস্থোত্থিতা সৈব প্রতিলোমবিসর্পিণী |
বেগৈঃ পক্বাশযং যাতি প্রতিতূনীতি সা স্মৃতা ||৮৭||
View original
अधो या वेदना याति वर्चोमूत्राशयोत्थिता |
भिन्दतीव गुदोपस्थं सा तूनीत्यभिधीयते ||८६||
गुदोपस्थोत्थिता सैव प्रतिलोमविसर्पिणी |
वेगैः पक्वाशयं याति प्रतितूनीति सा स्मृता ||८७||
তূনীবাতমাহ- অধো যেত্যাদি| ভিন্দতীব গুদোপস্থমিতি ভেদং কুর্বতীব গুদোপস্থস্যেত্যর্থঃ| প্রতিলোমবিসর্পিণী অধ-উত্থিতোর্ধ্বগামিনী| বেগৈরিতি বেদনাবেগৈর্মুহুর্মুহুঃ স্বভাবোপশমোপলক্ষিতৈঃ, ‘প্রতিলোমং প্রধাবিতা ’ ইতি কেচিত্||৮৬-৮৭||
Adhikarana 49 (88) · Śloka 88
সাটোপমত্যুগ্ররুজমাধ্মাতমুদরং ভৃশম্ |
আধ্মানমিতি জানীযাদ্ঘোরং বাতনিরোধজম্ ||৮৮||
View original
साटोपमत्युग्ररुजमाध्मातमुदरं भृशम् |
आध्मानमिति जानीयाद्घोरं वातनिरोधजम् ||८८||
আধ্মানমাহ- সাটোপমিত্যাদি| আটোপং সঞ্চলনং, তেন সহ বর্তত ইতি সাটোপম্| উদরমত্র পক্বাশযঃ| ঘোরং কষ্টকারি||৮৮||
Adhikarana 50 (89) · Śloka 89
বিমুক্তপার্শ্বহৃদযং তদেবামাশযোত্থিতম্ |
প্রত্যাধ্মানং বিজানীযাত্ কফব্যাকুলিতানিলম্ ||৮৯||
View original
विमुक्तपार्श्वहृदयं तदेवामाशयोत्थितम् |
प्रत्याध्मानं विजानीयात् कफव्याकुलितानिलम् ||८९||
প্রত্যাধ্মানমাহ- বিমুক্তেত্যাদি| তদেব আধ্মানমেব| আমাশযোত্থিতং নাভিস্তনান্তরোত্থিতম্| অত এব হৃদযপার্শ্বযোরপ্যধিষ্ঠানমস্য প্রাপ্তং নিরসন্নাহ- বিমুক্তপার্শ্বহৃদযমিতি| ব্যাকুলিত আবৃতঃ||৮৯||
Adhikarana 51 (90-91) · Śloka 91
অষ্ঠীলাবদ্ঘনং গ্রন্থিমূর্ধ্বমাযতমুন্নতম্ |
বাতাষ্ঠীলাং বিজানীযাদ্বহির্মার্গাবরোধিনীম্ ||৯০||
এনামেব রুজাযুক্তাং বাতবিণ্মূত্ররোধিনীম্ |
প্রত্যষ্ঠীলামিতি বদেজ্জঠরে তির্যগুত্থিতাম্ ||৯১||
View original
अष्ठीलावद्घनं ग्रन्थिमूर्ध्वमायतमुन्नतम् |
वाताष्ठीलां विजानीयाद्बहिर्मार्गावरोधिनीम् ||९०||
एनामेव रुजायुक्तां वातविण्मूत्ररोधिनीम् |
प्रत्यष्ठीलामिति वदेज्जठरे तिर्यगुत्थिताम् ||९१||
বাতাষ্ঠীলামাহ- অষ্ঠীলাবদিত্যাদি| “অষ্ঠীলা উত্তরাপথে দীর্ঘবর্তুলপাষাণবিশেষঃ” ইত্যেকে, “চর্মকারাণাং বর্তুলদীর্ঘা লৌহী ভাণ্ডিঃ” ইত্যপরে| ঘনঃ সংহতাবযবঃ| আযতো দীর্ঘঃ| বহির্মার্গাণি বাতবিণ্মূত্রাণি| অন্যেঽত্র ‘নাভেরধস্তাত্ সঞ্জাতং চলং বা যদি বাঽচলম্’ ইতি পঠন্তি| প্রত্যষ্ঠীলামাহ- এনামেবেত্যাদি| এনামেব অষ্ঠীলাম্| তির্যগুত্থিতত্বেনাষ্ঠীলাযাঃ সকাশাত্ প্রত্যষ্ঠীলাযা ভেদঃ| অস্যাগ্রে কেচিদূরুস্তম্ভং পঠন্তি, তন্ন, চিকিত্সাযাং পঠিষ্যমাণত্বান্নিবন্ধকারাণামসম্মতত্বাচ্চ||৯০-৯১||
Adhikarana puShpikA · Śloka 1
ইতি সুশ্রুতসংহিতাযাং নিদানস্থানে বাতব্যাধিনিদানং নাম প্রথমোঽধ্যাযঃ ||১||
View original
इति सुश्रुतसंहितायां निदानस्थाने वातव्याधिनिदानं नाम प्रथमोऽध्यायः ||१||
ইতি শ্রীডল্হণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং নিদানস্থানে প্রথমোঽধ্যাযঃ||১||