Adhikarana 1 (1-2) · Śloka 2
অথাতঃ প্রত্যেকমর্মনির্দেশং শারীরং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातः प्रत्येकमर्मनिर्देशं शारीरं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
শরীরসঙ্খ্যাব্যাকরণে হি মাংসসিরাদিব্যাকরণমভিহিতং, মর্মাণি চ মাংসসিরাদিসংশ্রিতানি, অতস্তদনন্তরং মর্মণাং নির্দেশো যুজ্যত ইত্যাহ- অথাত ইত্যাদি| প্রত্যেকশব্দাদগ্রে মাংসাদিশব্দো লুপ্তো দ্রষ্টব্যঃ, তেন প্রত্যেকং মাংসাদিমর্মণাং নির্দেশো বিবরণং যস্মিন্ তং তথা||১-২||
Adhikarana 2 (3) · Śloka 3
সপ্তোত্তরং মর্মশতম্ | তানি মর্মাণি পঞ্চাত্মকানি ভবন্তি; তদ্যথা- মাংসমর্মাণি, সিরামর্মাণি, স্নাযুমর্মাণি, অস্থিমর্মাণি, সন্ধিমর্মাণি চেতি | ন খলু মাংসসিরাস্নায্বস্থিসন্ধিব্যতিরেকেণান্যানি মর্মাণি ভবন্তি, যস্মান্নোপলভ্যন্তে ||৩||
सप्तोत्तरं मर्मशतम् | तानि मर्माणि पञ्चात्मकानि भवन्ति; तद्यथा- मांसमर्माणि, सिरामर्माणि, स्नायुमर्माणि, अस्थिमर्माणि, सन्धिमर्माणि चेति | न खलु मांससिरास्नाय्वस्थिसन्धिव्यतिरेकेणान्यानि मर्माणि भवन्ति, यस्मान्नोपलभ्यन्ते ||३||
🔊 Audio coming soon
তেষাং সঙ্খ্যামাহ- সপ্তোত্তরমিত্যাদি| পঞ্চাত্মকানি পঞ্চপ্রকারাণি| তান্যেব পঞ্চপ্রকারাণ্যাহ- তদ্যথেত্যাদি| ননু, কথং মাংসাদীনি পঞ্চৈব মর্মাণি নাধিকানীতি দর্শযন্নাহ- ন খল্বিত্যাদি| ননু, স্রোতঃপ্রভৃতীনামপি মারণাত্মকত্বান্মর্মত্বমস্ত্যেব, তত্ কথং মাংসাদিব্যতিরেকেণান্যানি মর্মাণি নোপলভ্যন্ত ইত্যুক্তম্? উচ্যতে- মারযন্তীতি মর্মাণ্যুচ্যন্তে, স্রোতসি চ ক্ষতেঽপি নাবশ্যতযা মরণং; যতো বক্ষ্যতি- “স্রোতোবিদ্ধং তু প্রত্যাখ্যাযোপচরেত্” (শা.৯) ইতি| যদ্যেবং তর্হি রুক্করবৈকল্যকরণামমারণাত্মকত্বান্মর্মত্বং ন স্যাদিতি চেত্? তন্ন, রুক্করবৈকল্যকরেষ্বপ্যগ্নীষোমাদিপ্রাণানাং মধ্যে কস্যচিত্ প্রাণস্য হানেঃ; অথবা স্রোতঃপ্রভৃতীনি মাংসাদীন্যব্যতিরিচ্য বর্তন্তে, যতো মাংসাদিষ্বেব স্রোতঃপ্রভৃতীনি সন্তি, তস্মান্মাংসাদীনি পঞ্চৈব মর্মাণীতি||৩||
Adhikarana 3 (4) · Śloka 4
তত্রৈকাদশ মাংসমর্মাণি, একচত্বারিংশত্ সিরামর্মাণি, সপ্তবিংশতিঃ স্নাযুমর্মাণি, অষ্টাবস্থিমর্মাণি, বিংশতিঃ সন্ধিমর্মাণি চেতি | তদেতত্ সপ্তোত্তরং মর্মশতম্ ||৪||
तत्रैकादश मांसमर्माणि, एकचत्वारिंशत् सिरामर्माणि, सप्तविंशतिः स्नायुमर्माणि, अष्टावस्थिमर्माणि, विंशतिः सन्धिमर्माणि चेति | तदेतत् सप्तोत्तरं मर्मशतम् ||४||
🔊 Audio coming soon
ইদানীং মাংসাদিভেদেন মর্মসঙ্খ্যাং নির্দিশন্নাহ- তত্রেত্যাদি| একাদশেতি চত্বারি তলহৃদযানি, তাবন্ত্যেবেন্দ্রবস্তীনি, গুদমেকং, দ্বে স্তনরোহিতে, এবমেকাদশ মাংসমর্মাণি| একচত্বারিংশদিতি চতস্রো ধমন্যঃ, অষ্টৌ মাতৃকাঃ, চত্বারি শৃঙ্গাটকানি, দ্বে অপাঙ্গে, একা স্থপনী, দ্বে ফণে , দ্বে স্তনমূলে, দ্বাবপস্তম্ভৌ , দ্বাবপলাপৌ, একং হৃদযং, একা নাভিঃ, দ্বৌ পার্শ্বসন্ধী, দ্বে বৃহত্যৌ, চত্বারি লোহিতাক্ষাণি, চতস্র উর্ব্যঃ, এবমেকচত্বারিংশত্ সিরামর্মাণি| সপ্তবিংশতিরিতি চতস্র আণ্যঃ , দ্বৌ বিটপৌ, দ্বৌ কক্ষধরৌ, চত্বারঃ কূর্চাঃ, চত্বারি কূর্চশিরাংসি, একো বস্তিঃ, চত্বারি ক্ষিপ্রাণি, দ্বাবংসৌ, দ্বে বিধুরে, দ্বাবুত্ক্ষেপৌ, এবং সপ্তবিংশতিঃ স্নাযুমর্মাণি| অষ্টাবিতি দ্বে কটীকতরুণে, দ্বৌ নিতম্বৌ, দ্বে অংসফলকে, দ্বৌ শঙ্খৌ, এবমষ্টাবস্থিমর্মাণি| বিংশতিরিতি দ্বে জানুনী, দ্বৌ কূর্পরৌ, পঞ্চ সীমন্তাঃ, একোঽধিপতিঃ, দ্বৌ গুল্ফৌ, দ্বৌ মণিবন্ধৌ, দ্বে কুকুন্দরে, দ্বাবাবর্তৌ, দ্বে কৃকাটিকে, এবং বিংশতিঃ সন্ধিমর্মাণি| পুনঃ সপ্তোত্তরং মর্মশতমিতি বচনমুপসংহারে প্রযুক্তমতো ন পৌনরুক্ত্যম্||৪||
Adhikarana 4 (5) · Śloka 5
তেষামেকাদশৈকস্মিন্ সক্থ্নি ভবন্তি, এতেনেতরসক্থি বাহূ চ ব্যাখ্যাতৌ, উদরোরসোর্দ্বাদশ, চতুর্দশ পৃষ্ঠে, গ্রীবাং প্রত্যূর্ধ্বং সপ্তত্রিংশত্ ||৫||
तेषामेकादशैकस्मिन् सक्थ्नि भवन्ति, एतेनेतरसक्थि बाहू च व्याख्यातौ, उदरोरसोर्द्वादश, चतुर्दश पृष्ठे, ग्रीवां प्रत्यूर्ध्वं सप्तत्रिंशत् ||५||
🔊 Audio coming soon
মাংসাদিমর্মণাং সপ্তোত্তরশতসঙ্খ্যাকানাং প্রদেশবিশেষজ্ঞাপনার্থং সঙ্খ্যযা বিভজ্য শাখাদ্যাশ্রযং নির্দিশন্নাহ- তেষামিত্যাদি||৫||
Adhikarana 5 (6) · Śloka 6
তত্র সক্থিমর্মাণি ক্ষিপ্রতলহৃদযকূর্চকূর্চশিরোগুল্ফেন্দ্রবস্তিজান্বাণ্যুর্বিলোহিতাক্ষাণি বিটপং চেতি, এতেনেতরত্সক্থি ব্যাখ্যাতম্ | উদরোরসোস্তু গুদবস্তিনাভিহৃদযস্তনমূলস্তনরোহিতাপলাপান্যপস্তম্ভৌ চেতি | পৃষ্ঠমর্মাণি তু কটীকতরুণকুকুন্দরনিতম্বপার্শ্বসন্ধিবৃহত্যংসফলকান্যংসৌ চেতি | বাহুমর্মাণি তু শিপ্রতলহৃদযকূর্চকূর্চশিরোমণিবন্ধেন্দ্রবস্তিকূর্পরাণ্যুর্বীলোহিতাক্ষাণি কক্ষধরং চেতি; এতেনেতরো বাহুর্ব্যাখ্যাতঃ | জত্রুণ ঊর্ধ্বং চতস্রো ধমন্যোঽষ্টৌ মাতৃকা দ্বে কৃকাটিকে দ্বে বিধুরে দ্বে ফণে দ্বাবপাঙ্গৌ দ্বাবাবর্তৌ দ্বাবুত্ক্ষেপৌ দ্বৌ শঙ্খাবেকা স্থপনী পঞ্চ সীমন্তাশ্চত্বারি শৃঙ্গাটকান্যেকোঽধিপতিরিতি ||৬||
तत्र सक्थिमर्माणि क्षिप्रतलहृदयकूर्चकूर्चशिरोगुल्फेन्द्रबस्तिजान्वाण्युर्विलोहिताक्षाणि विटपं चेति, एतेनेतरत्सक्थि व्याख्यातम् | उदरोरसोस्तु गुदबस्तिनाभिहृदयस्तनमूलस्तनरोहितापलापान्यपस्तम्भौ चेति | पृष्ठमर्माणि तु कटीकतरुणकुकुन्दरनितम्बपार्श्वसन्धिबृहत्यंसफलकान्यंसौ चेति | बाहुमर्माणि तु शिप्रतलहृदयकूर्चकूर्चशिरोमणिबन्धेन्द्रबस्तिकूर्पराण्युर्वीलोहिताक्षाणि कक्षधरं चेति; एतेनेतरो बाहुर्व्याख्यातः | जत्रुण ऊर्ध्वं चतस्रो धमन्योऽष्टौ मातृका द्वे कृकाटिके द्वे विधुरे द्वे फणे द्वावपाङ्गौ द्वावावर्तौ द्वावुत्क्षेपौ द्वौ शङ्खावेका स्थपनी पञ्च सीमन्ताश्चत्वारि शृङ्गाटकान्येकोऽधिपतिरिति ||६||
🔊 Audio coming soon
শাখাদিষু সঙ্খ্যযা বিভক্তানাং মর্মণাং নামান্যাহ- তত্রেত্যাদি| অত্র ক্ষিপ্রাদ্যেকৈকং গণযিতব্যম্, এবমেকাদশ| ক্ষিপ্রাদীনাং লক্ষণমাচার্যঃ স্বযমেবাগ্রে করিষ্যতি, অতোঽত্রেমানি ন ব্যাখ্যাতানি| উদরেত্যাদি গুদাদিহৃদযান্তমেকৈকং গণযিতব্যং, স্তনমূলাদীনি দ্বে দ্বে, এবং দ্বাদশ| পৃষ্ঠেত্যাদি কটীকতরুণাদীনি দ্বে দ্বে, এবং চতুর্দশ| বাহ্বিত্যাদি অত্রাপি ক্ষিপ্রাদিকমেকৈকং গণযিতব্যম্||৬||
Adhikarana 6 (7) · Śloka 7
তত্র তলহৃদযেন্দ্রবস্তিগুদস্তনরোহিতানি মাংসমর্মাণি, নীলধমনীমাতৃকাশৃঙ্গাটকাপাঙ্গস্থপনীফণস্তনমূলাপলাপাপস্তম্ভহৃদযনাভিপার্শ্বসন্ধিবৃহতীলোহিতাক্ষোর্ব্যঃ সিরামর্মাণি, আণী(ণি)বিটপকক্ষধরকূর্চকূর্চশিরোবস্তিক্ষিপ্রাংসবিধুরোত্ক্ষেপাঃ স্নাযুমর্মাণি, কটীকতরুণনিতম্বাংসফলকশঙ্খাস্ত্বস্থিমর্মাণি, জানুকূর্পরসীমন্তাধিপতিগুল্ফমণিবন্ধকুকুন্দরাবর্তকৃকাটিকাশ্চেতি সন্ধিমর্মাণি ||৭||
तत्र तलहृदयेन्द्रबस्तिगुदस्तनरोहितानि मांसमर्माणि, नीलधमनीमातृकाशृङ्गाटकापाङ्गस्थपनीफणस्तनमूलापलापापस्तम्भहृदयनाभिपार्श्वसन्धिबृहतीलोहिताक्षोर्व्यः सिरामर्माणि, आणी(णि)विटपकक्षधरकूर्चकूर्चशिरोबस्तिक्षिप्रांसविधुरोत्क्षेपाः स्नायुमर्माणि, कटीकतरुणनितम्बांसफलकशङ्खास्त्वस्थिमर्माणि, जानुकूर्परसीमन्ताधिपतिगुल्फमणिबन्धकुकुन्दरावर्तकृकाटिकाश्चेति सन्धिमर्माणि ||७||
🔊 Audio coming soon
তত্রৈকাদশ মাংসমর্মাণীত্যাদিবাক্যৈঃ প্রাগুদ্দিষ্টানাং মাংসাদিমর্মণাং নামান্যাহ- তত্রেত্যাদি| এতেষাং মাংসাদিমর্মণাং সঙ্খ্যা প্রাগত্রৈবাধ্যাযে ব্যাখ্যাতা, তেনাত্র ন ব্যাখ্যাযতে||৭||
Adhikarana 7 (8-14) · Śloka 14
তান্যেতানি পঞ্চবিকল্পানি ভবন্তি; তদ্যথা- সদ্যঃপ্রাণহরাণি, কালান্তরপ্রাণহরাণি, বিশল্যঘ্নানি, বৈকল্যকরাণি, রুজাকরাণি চেতি | তত্র সদ্যঃপ্রাণহরাণ্যেকোনবিংশতিঃ, কালান্তরপ্রাণহরাণি ত্রযস্ত্রিংশত্, ত্রীণি বিশল্যঘ্নানি, চতুশ্চত্বারিংশদ্বৈকল্যকরাণি, অষ্টৌ রুজাকরাণীতি ||৮|| ভবন্তি চাত্র- শৃঙ্গাটকান্যধিপতিঃ শঙ্খৌ কণ্ঠসিরা গুদম্ | হৃদযং বস্তিনাভ্যৌ(ভী) চ ঘ্নন্তি সদ্যো হতানি তু ||৯|| বক্ষোমর্মাণি সীমন্ততলক্ষিপ্রেন্দ্রবস্তযঃ | কটীকতরুণে সন্ধী পার্শ্বজৌ বৃহতী চ যা ||১০|| নিতম্বাবিতি চৈতানি কালান্তরহরাণি তু | উত্ক্ষেপৌ স্থপনী চৈব বিশল্যঘ্নানি নির্দিশেত্ ||১১|| লোহিতাক্ষাণি জানূর্বীকূর্চবিটপকূর্পরাঃ | কুকুন্দরে কক্ষধরে বিধুরে সকৃকাটিকে ||১২|| অংসাংসফলকাপাঙ্গা নীলে মন্যে ফণৌ তথা | বৈকল্যকরণান্যাহুরাবর্তৌ দ্বৌ তথৈব চ ||১৩|| গুল্ফৌ দ্বৌ মণিবন্ধৌ দ্বৌ দ্বে দ্বে কূর্চশিরাংসি চ | রুজাকরাণি জানীযাদষ্টাবেতানি বুদ্ধিমান্ | ক্ষিপ্রাণি বিদ্ধমাত্রাণি ঘ্নন্তি কালান্তরেণ চ ||১৪||
तान्येतानि पञ्चविकल्पानि भवन्ति; तद्यथा- सद्यःप्राणहराणि, कालान्तरप्राणहराणि, विशल्यघ्नानि, वैकल्यकराणि, रुजाकराणि चेति | तत्र सद्यःप्राणहराण्येकोनविंशतिः, कालान्तरप्राणहराणि त्रयस्त्रिंशत्, त्रीणि विशल्यघ्नानि, चतुश्चत्वारिंशद्वैकल्यकराणि, अष्टौ रुजाकराणीति ||८|| भवन्ति चात्र- शृङ्गाटकान्यधिपतिः शङ्खौ कण्ठसिरा गुदम् | हृदयं बस्तिनाभ्यौ(भी) च घ्नन्ति सद्यो हतानि तु ||९|| वक्षोमर्माणि सीमन्ततलक्षिप्रेन्द्रबस्तयः | कटीकतरुणे सन्धी पार्श्वजौ बृहती च या ||१०|| नितम्बाविति चैतानि कालान्तरहराणि तु | उत्क्षेपौ स्थपनी चैव विशल्यघ्नानि निर्दिशेत् ||११|| लोहिताक्षाणि जानूर्वीकूर्चविटपकूर्पराः | कुकुन्दरे कक्षधरे विधुरे सकृकाटिके ||१२|| अंसांसफलकापाङ्गा नीले मन्ये फणौ तथा | वैकल्यकरणान्याहुरावर्तौ द्वौ तथैव च ||१३|| गुल्फौ द्वौ मणिबन्धौ द्वौ द्वे द्वे कूर्चशिरांसि च | रुजाकराणि जानीयादष्टावेतानि बुद्धिमान् | क्षिप्राणि विद्धमात्राणि घ्नन्ति कालान्तरेण च ||१४||
🔊 Audio coming soon
তান্যেব সুখপাঠার্থং শ্লোকৈর্দর্শযন্নাহ,- ভবন্তীত্যাদি| চত্বারি শৃঙ্গাটকানি, একোঽধিপতিঃ; শঙ্খৌ দ্বৌ, কণ্ঠসিরা অষ্টৌ মাতৃকাঃ, গুদং হৃদযং বস্তির্নাভী চেত্যেকৈকম্, এবমেকোনবিংশতিঃ সদ্যোঘ্নানি| বক্ষোমর্মাণীতি স্তনমূলে দ্বে, স্তনরোহিতে দ্বে, অপলাপৌ দ্বৌ, অপস্তম্ভৌ দ্বৌ, এবমষ্টৌ বক্ষোমর্মাণি; সীমন্তাঃ পঞ্চ, তলানি চত্বারি, ক্ষিপ্রাণি চত্বারি, ইন্দ্রবস্তযশ্চত্বারঃ, দ্বে কটীকতরুণে, দ্বৌ পার্শ্বসন্ধী, দ্বে বৃহত্যৌ, দ্বৌ নিতম্বৌ, এবং ত্রযস্ত্রিংশত্ কালান্তরপ্রাণহরাণি| উত্ক্ষেপাবিতি উত্ক্ষেপৌ দ্বৌ, একা স্থপনী, এবং ত্রীণি বিশল্যঘ্নানি| লোহিতেত্যাদি চত্বারি লোহিতাক্ষনামধেযানি, আণযশ্চতস্রঃ, জানুনী দ্বে, চতস্র উর্ব্যঃ, চত্বারঃ কূর্চাঃ, বিটপাদীনামাবর্তান্তানাং ত্রযোদশানাং প্রত্যেকং দ্বৌ দ্বৌ, ইতি চতুশ্চত্বারিংশদ্বৈকল্যকরণানি| গুল্ফাবিত্যাদি দ্বৌ গুল্ফৌ, দ্বৌ মণিবন্ধৌ; দ্বে দ্বে কূর্চশিরাংসি চেতি দ্বে কূর্চশিরসী হস্তযোঃ, দ্বে কূর্চশিরসী পাদযোঃ, এবং চত্বারি কূর্চশিরাংসি, ইত্যষ্টৌ রুজাকরাণি| ভেদেন যত্ পঞ্চপ্রকারত্বমুক্তং তদ্যদ্যপি বক্ষ্যমাণেন ‘মর্মাণি শল্যবিষযার্ধমুদাহরন্তি’ ইত্যাদিশ্লোকপ্রতিপাদিতেন প্রাণহরবৈকল্যকরেতি দ্বিত্বেন বাধ্যতে, তথাঽপি ন দোষো ভিষজামাদরখ্যাপনার্থত্বাদ্দ্বিত্বস্যেতি||৮-১৪||
Adhikarana 8 (15) · Śloka 15
মর্মাণি মাংসসিরাস্নায্বস্থিসন্ধিসন্নিপাতাঃ; তেষু স্বভাবত এব বিশেষেণ প্রাণাস্তিষ্ঠন্তি; তস্মান্মর্মস্বভিহতাস্তাংস্তান্ ভাবানাপদ্যন্তে ||১৫||
मर्माणि मांससिरास्नाय्वस्थिसन्धिसन्निपाताः; तेषु स्वभावत एव विशेषेण प्राणास्तिष्ठन्ति; तस्मान्मर्मस्वभिहतास्तांस्तान् भावानापद्यन्ते ||१५||
🔊 Audio coming soon
ইদানীং প্রাণহরাদিকং কর্ম মর্মণাং সযুক্তিকং দর্শযন্নাহ- মর্মাণীত্যাদি| সন্নিপাতঃ সংশ্লেষোঽত্যন্তমিশ্রীভাব ইতি যাবত্| সর্বেষাং সর্বত্র মর্মণি সংশ্লেষেঽপি মাংসমর্ম সিরামর্মাদিব্যবহার আধিক্যমাশ্রিত্য, পার্থিবাদিব্যবহারবত্| স্বভাবত ইতি হেত্বন্তরনিরপেক্ষতযা| প্রাণা অগ্ন্যাদযঃ| তাংস্তানিতি ‘ইন্দ্রিযার্থেষ্বসম্প্রাপ্তির্মনোবুদ্ধিবিপর্যয’ ইত্যাদিকানত্রৈবোক্তান্| অন্যে তু “ভ্রমঃ প্রলাপঃ পতনং প্রমোহ” (সূ.২৫) ইত্যাদিকান্ সূত্রস্থানোক্তানাহুঃ||১৫||
Adhikarana 9 (16) · Śloka 16
তত্র সদ্যঃপ্রাণহরাণ্যাগ্নেযানি, অগ্নিগুণেষ্বাশু ক্ষীণেষু ক্ষপযন্তি; কালান্তরপ্রাণহরাণি সৌম্যাগ্নেযানি, অগ্নিগুণেষ্বাশু ক্ষীণেষু ক্রমেণ চ সোমগুণেষু কালান্তরেণ ক্ষপযন্তি; বিশল্যপ্রাণহরাণি বাযব্যানি, শল্যমুখাবরুদ্ধো যাবদন্তর্বাযুস্তিষ্ঠতি তাবজ্জীবতি, উদ্ধৃতমাত্রে তু শল্যে মর্মস্থানাশ্রিতো বাযুর্নিষ্ক্রামতি, তস্মাত্ সশল্যো জীবত্যুদ্ধৃতশল্যো ম্রিযতে (পাকাত্পতিতশল্যো বা জীবতি); বৈকল্যকরাণি সৌম্যানি, সোমো হি স্থিরত্বাচ্ছৈত্যাচ্চ প্রাণাবলম্বনং করোতি; রুজাকরাণ্যগ্নিবাযুগুণভূযিষ্ঠানি, বিশেষতশ্চ তৌ রুজাকরৌ; পাঞ্চভৌতিকীং চ রুজামাহুরেকে ||১৬||
तत्र सद्यःप्राणहराण्याग्नेयानि, अग्निगुणेष्वाशु क्षीणेषु क्षपयन्ति; कालान्तरप्राणहराणि सौम्याग्नेयानि, अग्निगुणेष्वाशु क्षीणेषु क्रमेण च सोमगुणेषु कालान्तरेण क्षपयन्ति; विशल्यप्राणहराणि वायव्यानि, शल्यमुखावरुद्धो यावदन्तर्वायुस्तिष्ठति तावज्जीवति, उद्धृतमात्रे तु शल्ये मर्मस्थानाश्रितो वायुर्निष्क्रामति, तस्मात् सशल्यो जीवत्युद्धृतशल्यो म्रियते (पाकात्पतितशल्यो वा जीवति); वैकल्यकराणि सौम्यानि, सोमो हि स्थिरत्वाच्छैत्याच्च प्राणावलम्बनं करोति; रुजाकराण्यग्निवायुगुणभूयिष्ठानि, विशेषतश्च तौ रुजाकरौ; पाञ्चभौतिकीं च रुजामाहुरेके ||१६||
🔊 Audio coming soon
কস্মাত্ পুনরত্র সমানেঽপি প্রাণোপঘাতে সদ্যঃপ্রাণহরকালান্তরপ্রাণহরাদিবিশেষ ইত্যাহ- তত্রেত্যাদি| আগ্নেযানীতি যদ্যপি “সোমমারুততেজাংসি রজঃসত্ত্বতমাংসি চ| মর্মসু প্রাযশঃ পুংসাং ভূতাত্মা চাবতিষ্ঠতে” ইত্যুক্তং, তথাঽপ্যাগ্নেযেষু মর্মস্বধিকং তেজঃ, সৌম্যেষু সোম ইত্যাদি জ্ঞেযম্| অগ্নিগুণেষ্বাশুক্ষীণেষ্বিতি অগ্নেরাশুকারিত্বাদিত্যর্থঃ| তাবিতি অগ্নিবাযূ বিশেষেণ রুজাকরৌ; সামান্যেন পুনঃ সোমোঽপি, কফব্রণে বেদনাসম্ভবাত্| রুজাযামেব দ্বিতীযমেকীযমতং দর্শযন্নাহ- পাঞ্চভৌতিকীমিত্যাদি||১৬||
Adhikarana 10 (17) · Śloka 17
কেচিদাহুর্মাংসাদীনাং পঞ্চানামপি সমস্তানাং বিবৃদ্ধানাং সমবাযাত্ সদ্যঃপ্রাণহরাণি, একহীনানামল্পানাং বা কালান্তরপ্রাণহরাণি, দ্বিহীনানাং বিশল্যপ্রাণহরাণি , ত্রিহীনানাং বৈকল্যকরাণি, একস্মিন্নেব রুজাকরাণীতি | নৈবং, যতোঽস্থিমর্মস্বপ্যভিহতেষু শোণিতাগমনং ভবতি ||১৭||
केचिदाहुर्मांसादीनां पञ्चानामपि समस्तानां विवृद्धानां समवायात् सद्यःप्राणहराणि, एकहीनानामल्पानां वा कालान्तरप्राणहराणि, द्विहीनानां विशल्यप्राणहराणि , त्रिहीनानां वैकल्यकराणि, एकस्मिन्नेव रुजाकराणीति | नैवं, यतोऽस्थिमर्मस्वप्यभिहतेषु शोणितागमनं भवति ||१७||
🔊 Audio coming soon
সদ্যঃপ্রাণহরাদিবিশেষস্য দ্বিতীযদর্শনে ব্যবস্থাং দর্শযন্নাহ- কেচিদিত্যাদি| যদ্যপি গুদবস্তিনাভিহৃদযেষু সদ্যঃপ্রাণহরমর্মস্বস্থীনি ন ব্যক্তানি তথাঽপ্যব্যক্তানামস্থ্নাং শক্তিরূপেণাবস্থানাত্ পঞ্চানাং সমবায উত্পদ্যত এব | একহীনানামিত্যত্র হীনশব্দোঽত্যন্তাভাবে বর্ততে, ন তু ন্যূনত্বে| একহীনানি পুনঃ স্তনমূলাপলাপাপস্তম্ভস্রীমন্তকটীকতরুণপার্শ্বসন্ধিবৃহতীনিতম্বানি মাংসহীনানি, স্তনরোহিততলহৃদযক্ষিপ্রেন্দ্রবস্তযোঽস্থিহীনাঃ; দ্বিহীনানি পুনরুত্ক্ষেপৌ মাংসসন্ধিহীনৌ; ত্রিহীনানি পুনর্লোহিতাক্ষাণি স্নাযুসন্ধ্যস্থিহীনানি, স্থপনী মাংসসিরাস্নাযুহীনা, জানুনী মাংসসিরাস্নাযুহীনে, উর্ব্যোঽস্থিমাংসস্নাযুহীনাঃ, বিটপে মাংসসিরাস্থিহীনে, কূর্পরৌ মাংসসিরাস্নাযুহীনৌ, কুকুন্দরে মাংসস্নাযুসিরাহীনে , কক্ষধরে সিরাস্থিসন্ধিহীনে, বিধুরে মাংসসিরাসন্ধিহীনে, কৃকাটিকে মাংসসিরাস্নাযুহীনে, অংসৌ মাংসসিরাসন্ধিহীনৌ, অংসফলকে মাংসস্নাযুসন্ধিহীনে, নীলে মন্যে ফণে চ মাংসসন্ধ্যস্থিহীনে, আবর্তৌ মাংসসিরাস্নাযুহীনৌ, অপাঙ্গৌ মাংসস্নাযুসন্ধিহীনৌ| একস্মিন্নিতি মাংসাদিসন্ধ্যন্তাদেকস্মিন্নবশিষ্টে রুজাকরাণি ভবন্তি, গুল্ফমণিবন্ধাস্তথা কূর্চশিরাংসি মাংসসিরাস্নায্বস্থিহীনানি| নৈবমিতি স্বদর্শনে সর্বমর্মণাং মাংসসিরাস্নায্বস্থিসন্ধিসন্নিপাতত্বাদেব দ্বিত্র্যাদিহীনমসম্যগিত্যর্থঃ| কুতঃ স্বদর্শনে সর্বাণি সর্বত্র সন্তীত্যাহ- যত ইত্যাদি| যতশ্চাস্থিবিদ্ধেষ্বপি শোণিতদর্শনং ভবত্যতঃ প্রত্যক্ষাত্ প্রমাণাত্ সর্বাণি মাংসাদীনি সর্বত্র মর্মণি ভবন্তীতি জ্ঞাতব্যম্||১৭||
Adhikarana 11 (18) · Śloka 18
চতুর্বিধা যাস্তু সিরাঃ শরীরে প্রাযেণ তা মর্মসু সন্নিবিষ্টাঃ | স্নায্বস্থিমাংসানি তথৈব সন্ধীন্ সন্তর্প্য দেহং প্রতিযাপযন্তি ||১৮||
चतुर्विधा यास्तु सिराः शरीरे प्रायेण ता मर्मसु सन्निविष्टाः | स्नाय्वस्थिमांसानि तथैव सन्धीन् सन्तर्प्य देहं प्रतियापयन्ति ||१८||
🔊 Audio coming soon
এতদেব দর্শযন্নাহ- চতুরিত্যাদি| চতুর্বিধা ইতি বাতপিত্তশ্লেষ্মরক্তবহাঃ| মর্মস্বিত্যাদি| এতেন সিরাণাং স্নায্বস্থিমাংসসন্ধিগতত্বং বোধিতম্, অত এবাস্থিবিদ্ধেঽপি শোণিতাগমনমিত্যর্থঃ||১৮||
Adhikarana 12 (19-20) · Śloka 20
ততঃ ক্ষতে মর্মণি তাঃ প্রবৃদ্ধঃ সমন্ততো বাযুরভিস্তৃণোতি | বিবর্ধমানস্তু স মাতরিশ্বা রুজঃ সুতীব্রাঃ প্রতনোতি কাযে ||১৯|| রুজাভিভূতং তু ততঃ শরীরং প্রলীযতে নশ্যতি চাস্য সঞ্জ্ঞা | অতো হি শল্যং বিনিহর্তুমিচ্ছন্মর্মাণি যত্নেন পরীক্ষ্য কর্ষেত্ ||২০||
ततः क्षते मर्मणि ताः प्रवृद्धः समन्ततो वायुरभिस्तृणोति | विवर्धमानस्तु स मातरिश्वा रुजः सुतीव्राः प्रतनोति काये ||१९|| रुजाभिभूतं तु ततः शरीरं प्रलीयते नश्यति चास्य सञ्ज्ञा | अतो हि शल्यं विनिहर्तुमिच्छन्मर्माणि यत्नेन परीक्ष्य कर्षेत् ||२०||
🔊 Audio coming soon
ইদানীং যথৈকদেশজেঽপি প্রহারে মর্মবিদ্ধস্য ক্রমেণ সকলশরীরে বাতাদিদোষব্যাপ্ত্যা রুজাবেগেন চেতনাধাতোর্বিযোগস্তথা দর্শযন্নাহ- তত ইত্যাদি| তাঃ সিরাঃ, প্রবৃদ্ধো বাযুঃ, সমন্ততঃ সর্বতঃ, অভিস্তৃণোতি সঞ্ছাদযতি| শরীরং প্রলীযতে প্রলযং গচ্ছতি শরীরযন্ত্রং বিঘট্টযতীত্যর্থঃ| তস্মিন্ পাঞ্চভৌতিকে শরীরে প্রলীনে সঞ্জ্ঞাষষ্ঠশ্চেতনাধাতুরপি নশ্যতি| ‘তাঃ প্রবৃদ্ধ’ ইত্যত্র ‘তাসু বৃদ্ধ’ ইতি কেচিত্ পঠন্তি ব্যাখ্যানযন্তি চ- তাসু সিরাসু বৃদ্ধো বাযুঃ সমন্ততঃ সকলং শরীরমভিস্তৃণোতি সঞ্ছাদযতীত্যর্থঃ||১৯-২০||
Adhikarana 13 (21) · Śloka 21
এতেন শেষং ব্যাখ্যাতম্ ||২১||
एतेन शेषं व्याख्यातम् ||२१||
🔊 Audio coming soon
এতেনেতি রুগাদিরূপেণ বাযোর্লক্ষণেন, শেষমিতি দাহাদি স্রোতোনিরোধাদি চ পিত্তশ্লেষ্মণোর্লক্ষণং ব্যাখ্যাতমেবেত্যর্থঃ||২১||
Adhikarana 14 (22) · Śloka 22
তত্র সদ্যঃপ্রাণহরমন্তে বিদ্ধং কালান্তরেণ মারযতি, কালান্তরপ্রাণহরমন্তে বিদ্ধং বৈকল্যমাপাদযতি, বিশল্যঘ্নং বৈকল্যকরং চ ভবতি, বৈকল্যকরং কালান্তরেণ ক্লেশযতি রুজাং চ করোতি, রুজাকরমতীব্রবেদনং ভবতি ||২২||
तत्र सद्यःप्राणहरमन्ते विद्धं कालान्तरेण मारयति, कालान्तरप्राणहरमन्ते विद्धं वैकल्यमापादयति, विशल्यघ्नं वैकल्यकरं च भवति, वैकल्यकरं कालान्तरेण क्लेशयति रुजां च करोति, रुजाकरमतीव्रवेदनं भवति ||२२||
🔊 Audio coming soon
তেষাং সদ্যঃপ্রাণহরাদীনাং স্বকর্ম যন্নিযতং তত্কারণবিকল্পাদ্ ব্যভিচারযন্নাহ- তত্রেত্যাদি| অন্তে বিদ্ধং সমীপে বিদ্ধং, মধ্যে বিদ্ধং তু সদ্য এবেত্যর্থঃ; এতেন পূর্বং পূর্বং মর্ম কারণবৈকল্যাত্ পরস্য পরস্য কার্যং করোতি, এবং পরং পরমপি মর্মাতিবিদ্ধাদিকারণবশাত্ পূর্বস্য পূর্বস্য কর্ম করোতি| অত এব তেষ্বিত্যাদিনা ক্ষিপ্রাণি কদাচিদাশু মারযন্তীত্যগ্রে বক্ষ্যতি||২২||
Adhikarana 15 (23) · Śloka 23
তত্র সদ্যঃপ্রাণহরাণি সপ্তরাত্রাভ্যন্তরান্মারযন্তি, কালান্তরপ্রাণহরাণি পক্ষান্মাসাদ্বা, তেষ্বপি তু ক্ষিপ্রাণি কদাচিদাশু মারযন্তি, বিশল্যপ্রাণহরাণি বৈকল্যকরাণি চ কদাচিদত্যভিহতানি মারযন্তি ||২৩||
तत्र सद्यःप्राणहराणि सप्तरात्राभ्यन्तरान्मारयन्ति, कालान्तरप्राणहराणि पक्षान्मासाद्वा, तेष्वपि तु क्षिप्राणि कदाचिदाशु मारयन्ति, विशल्यप्राणहराणि वैकल्यकराणि च कदाचिदत्यभिहतानि मारयन्ति ||२३||
🔊 Audio coming soon
ইদানীং সদ্যঃপ্রাণহরাদিমর্মণাং মারণে কালাবধিং দর্শযন্নাহ- তত্র সদ্য ইত্যাদি| যদ্যপি সদ্যঃশব্দস্তত্ক্ষণবাচী তথাঽপি সদ্যঃপ্রাণহরাণীত্যত্র সদ্যঃশব্দঃ সপ্তাহাভ্যন্তরপরো জ্ঞাতব্যঃ, সপ্তরাত্রান্মারযন্তীত্যুক্তত্বাত্| তেষ্বপীতি কালান্তরপ্রাণহরেষ্বপীত্যর্থঃ| কদাচিদাশু মারযন্তি ‘অতিহতানি’ ইতি শেষঃ, অনতিহতানি তু কালান্তরেণৈব মারযন্তি; এতচ্চোপলক্ষণং, তেন রুজাকরাণ্যেবং বৈকল্যং জনযন্তি; এবং বৈকল্যাদিষ্বপি স্বনিযতকর্মব্যভিচারঃ||২৩||
Adhikarana 16 (24) · Śloka 24
অত ঊর্ধ্বং সক্থিমর্মাণি ব্যাখ্যাস্যামঃ- তত্র পাদস্যাঙ্গুষ্ঠাঙ্গুল্যোর্মধ্যে ক্ষিপ্রং নাম মর্ম, তত্র বিদ্ধস্যাক্ষেপকেণ মরণং; মধ্যমাঙ্গুলীমনুপূর্বেণ মধ্যে পাদতলস্য তলহৃদযং নাম , তত্র রুজাভির্মরণং; ক্ষিপ্রস্যোপরিষ্টাদুভযতঃ কূর্চো নাম, তত্র পাদস্য ভ্রমণবেপনে ভবতঃ; গুল্ফসন্ধেরধ উভযতঃ কূর্চশিরঃ, তত্র রুজাশোফৌ; পাদজঙ্ঘযোঃ সন্ধানে গুল্ফঃ, তত্র রুজঃ স্তব্ধপাদতা খঞ্জতা বা; পার্ষ্ণিং প্রতি জঙ্ঘামধ্যে ইন্দ্রবস্তিঃ, তত্র শোণিতক্ষযেণ মরণং; জঙ্ঘোর্বোঃ সন্ধানে জানু, তত্র খঞ্জতা; জানুন ঊর্ধ্বমুভযতস্ত্র্যঙ্গুলমাণী , তত্র শোফাভিবৃদ্ধিঃ স্তব্ধসক্থিতা চ; ঊরুমধ্যে উর্বী, তত্র শোণিতক্ষযাত্ সক্থিশোষঃ; উর্ব্যা ঊর্ধ্বমধো বঙ্ক্ষণসন্ধেরূরুমূলে লোহিতাক্ষং, তত্র লোহিতক্ষযেণ মরণং পক্ষাঘাতো বা; বঙ্ক্ষণবৃষণযোরন্তরে বিটপং, তত্র ষাণ্ঢ্যমল্পশুক্রতা বা ভবতি; এবমেতান্যেকাদশ সক্থিমর্মাণি ব্যাখ্যাতানি | এতেনেতরসক্থি বাহূ চ ব্যাখ্যাতৌ | বিশেষতস্তু যানি সক্থ্নি গুল্ফজানুবিটপানি, তানি বাহৌ মণিবন্ধকূর্পরকক্ষধরাণি ; যথা বঙ্ক্ষণবৃষণযোরন্তরে বিটপমেবং বক্ষঃকক্ষযোর্মধ্যে কক্ষধরং, তস্মিন্ বিদ্ধে ত এবোপদ্রবাঃ; বিশেষতস্তু মণিবন্ধে কুণ্ঠতা, কূর্পরাখ্যে কুণিঃ, কক্ষধরে পক্ষাঘাতঃ | এবমেতানি চতুশ্চত্বারিংশচ্ছাখাসু মর্মাণি ব্যাখ্যাতানি ||২৪||
अत ऊर्ध्वं सक्थिमर्माणि व्याख्यास्यामः- तत्र पादस्याङ्गुष्ठाङ्गुल्योर्मध्ये क्षिप्रं नाम मर्म, तत्र विद्धस्याक्षेपकेण मरणं; मध्यमाङ्गुलीमनुपूर्वेण मध्ये पादतलस्य तलहृदयं नाम , तत्र रुजाभिर्मरणं; क्षिप्रस्योपरिष्टादुभयतः कूर्चो नाम, तत्र पादस्य भ्रमणवेपने भवतः; गुल्फसन्धेरध उभयतः कूर्चशिरः, तत्र रुजाशोफौ; पादजङ्घयोः सन्धाने गुल्फः, तत्र रुजः स्तब्धपादता खञ्जता वा; पार्ष्णिं प्रति जङ्घामध्ये इन्द्रबस्तिः, तत्र शोणितक्षयेण मरणं; जङ्घोर्वोः सन्धाने जानु, तत्र खञ्जता; जानुन ऊर्ध्वमुभयतस्त्र्यङ्गुलमाणी , तत्र शोफाभिवृद्धिः स्तब्धसक्थिता च; ऊरुमध्ये उर्वी, तत्र शोणितक्षयात् सक्थिशोषः; उर्व्या ऊर्ध्वमधो वङ्क्षणसन्धेरूरुमूले लोहिताक्षं, तत्र लोहितक्षयेण मरणं पक्षाघातो वा; वङ्क्षणवृषणयोरन्तरे विटपं, तत्र षाण्ढ्यमल्पशुक्रता वा भवति; एवमेतान्येकादश सक्थिमर्माणि व्याख्यातानि | एतेनेतरसक्थि बाहू च व्याख्यातौ | विशेषतस्तु यानि सक्थ्नि गुल्फजानुविटपानि, तानि बाहौ मणिबन्धकूर्परकक्षधराणि ; यथा वङ्क्षणवृषणयोरन्तरे विटपमेवं वक्षःकक्षयोर्मध्ये कक्षधरं, तस्मिन् विद्धे त एवोपद्रवाः; विशेषतस्तु मणिबन्धे कुण्ठता, कूर्पराख्ये कुणिः, कक्षधरे पक्षाघातः | एवमेतानि चतुश्चत्वारिंशच्छाखासु मर्माणि व्याख्यातानि ||२४||
🔊 Audio coming soon
অত ঊর্ধ্বমিত্যাদি| তত্র পাদাঙ্গুষ্ঠেত্যাদি স্নাযুমর্মেদমর্ধাঙ্গুলং কালান্তরপ্রাণহরং চ| মধ্যমাঙ্গুলীমিত্যাদি মধ্যমাঙ্গুলিমনুলক্ষীকৃত্য ক্রমেণ পাদতলস্য মধ্যে তলহৃদযং, মাংসমর্মেদমর্ধাঙ্গুলং কালান্তরপ্রাণহরং চ| উপরিষ্টাদিত্যত্র ‘দ্ব্যঙ্গুলে’ ইতি শেষঃ, উভযত ইতি ঊর্ধ্বমধশ্চ, তত্র কূর্চে, ‘বিদ্ধে’ ইতি শেষঃ; স্নাযুমর্মেদং চতুরঙ্গুলং বৈকল্যকরং চ| গুল্ফেত্যাদি ইদমপি স্নাযুমর্ম একাঙ্গুলং বৈকল্যকরং চ| পাদেত্যাদি| সন্ধিমর্মেদং দ্ব্যঙ্গুলপ্রমাণং বৈকল্যকরং চ| পার্ষ্ণিমিত্যাদি| মাংসমর্মেদমর্ধাঙ্গুলং পার্ষ্ণিং প্রতি ত্রযোদশাঙ্গুলে স্থিতং কালান্তরপ্রাণহরং চ; ভোজস্তু দ্ব্যঙ্গুলপ্রমাণমাহ, ভোজদর্শনাদ্গযদাসোঽপি মর্মমানসূত্রে “দ্ব্যঙ্গুলমিন্দ্রবস্তিমর্ম” ইতি পঠিত্বা ব্যাখ্যাযতি| জঙ্ঘেত্যাদি সন্ধিমর্মেদং ত্র্যঙ্গুলপ্রমাণং বৈকল্যকরং চ| জানুন ইত্যাদি জানুন ঊর্ধ্বং ত্র্যঙ্গুলে উভযত ঊর্ধ্বমধশ্চ, স্নাযুমর্মেদমর্ধাঙ্গুলং বৈকল্যকরং চ, গযী তু ত্র্যঙ্গুলমানমেতদাহ- ঊরুমধ্যে ইত্যাদি| সিরামর্মেদমেকাঙ্গুলং বৈকল্যকরং চ| বঙ্ক্ষণেত্যাদি স্নাযুমর্মেদমেকাঙ্গুলং বৈকল্যকরং চ| এবমিত্যাদি| এতেনৈকাদশমর্মনির্দেশেন| বিশেষত ইত্যাদি| মণিবন্ধঃ পাণিমূলং, কর্পূরঃ কফোণিঃ ‘কুহুণী’ ইতি লোকে| তস্মিন্নিত্যাদি| তস্মিন্নিতি মণিবন্ধাদৌ| ত এবেতি গুল্ফাদিবধজাতাঃ| বিশেষতস্ত্বিত্যাদি| কুণ্ঠতা করস্যাকর্মণ্যত্বম্| কুণিঃ সঙ্কুচিতবাহুমধ্যঃ| এতেনেতরো বাহুর্ব্যাখ্যাতঃ| উপসংহারমাহ- এবমিত্যাদি||২৪||
Adhikarana 17 (25) · Śloka 25
অত ঊর্ধ্বমুদরোরসোর্মর্মাণ্যনুব্যাখ্যাস্যামঃ - তত্র বাতবর্চোনিরসনং স্থূলান্ত্রপ্রতিবদ্ধং গুদং নাম মর্ম, তত্র সদ্যোমরণং; অল্পমাংসশোণিতোঽভ্যন্তরতঃ কট্যাং মূত্রাশযো বস্তিঃ, তত্রাপি সদ্যোমরণমশ্মরীব্রণাদৃতে, তত্রাপ্যুভযতো ভিন্নে ন জীবতি, একতো ভিন্নে মূত্রস্রাবী ব্রণো ভবতি, স তু যত্নেনোপক্রান্তো রোহতি; পক্বামাশযযোর্মধ্যে সিরাপ্রভবা নাভিঃ, তত্রাপি সদ্যো মরণং; স্তনযোর্মধ্যমধিষ্ঠাযোরস্যামাশযদ্বারং সত্ত্বরজস্তমসামধিষ্ঠানং হৃদযং, তত্রাপি সদ্য এব মরণং; স্তনযোরধস্তাদ্ দ্ব্যঙ্গুলমুভযতঃ স্তনমূলে, তত্র কফপূর্ণকোষ্ঠতযা (কাসশ্বাসাভ্যাং ) ম্রিযতে; স্তনচূচুকযোরূর্ধ্বং দ্ব্যঙ্গুলমুভযতঃ স্তনরোহিতৌ , তত্র লোহিতপূর্ণকোষ্ঠতযা কাসশ্বাসাভ্যাং চ ম্রিযতে; অংসকূটযোরধস্তাত্ পার্শ্বোপরিভাগযোরপলাপৌ নাম, তত্র রক্তেন পূযভাবং গতেন মরণং; উভযত্রোরসো নাড্যৌ বাতবহে অপস্তম্ভৌ নাম, তত্র বাতপূর্ণকোষ্ঠতযা কাসশ্বাসাভ্যাং চ মরণম্; এবমেতান্যুদরোরসোর্দ্বাদশ মর্মাণি ব্যাখ্যাতানি ||২৫||
अत ऊर्ध्वमुदरोरसोर्मर्माण्यनुव्याख्यास्यामः - तत्र वातवर्चोनिरसनं स्थूलान्त्रप्रतिबद्धं गुदं नाम मर्म, तत्र सद्योमरणं; अल्पमांसशोणितोऽभ्यन्तरतः कट्यां मूत्राशयो बस्तिः, तत्रापि सद्योमरणमश्मरीव्रणादृते, तत्राप्युभयतो भिन्ने न जीवति, एकतो भिन्ने मूत्रस्रावी व्रणो भवति, स तु यत्नेनोपक्रान्तो रोहति; पक्वामाशययोर्मध्ये सिराप्रभवा नाभिः, तत्रापि सद्यो मरणं; स्तनयोर्मध्यमधिष्ठायोरस्यामाशयद्वारं सत्त्वरजस्तमसामधिष्ठानं हृदयं, तत्रापि सद्य एव मरणं; स्तनयोरधस्ताद् द्व्यङ्गुलमुभयतः स्तनमूले, तत्र कफपूर्णकोष्ठतया (कासश्वासाभ्यां ) म्रियते; स्तनचूचुकयोरूर्ध्वं द्व्यङ्गुलमुभयतः स्तनरोहितौ , तत्र लोहितपूर्णकोष्ठतया कासश्वासाभ्यां च म्रियते; अंसकूटयोरधस्तात् पार्श्वोपरिभागयोरपलापौ नाम, तत्र रक्तेन पूयभावं गतेन मरणं; उभयत्रोरसो नाड्यौ वातवहे अपस्तम्भौ नाम, तत्र वातपूर्णकोष्ठतया कासश्वासाभ्यां च मरणम्; एवमेतान्युदरोरसोर्द्वादश मर्माणि व्याख्यातानि ||२५||
🔊 Audio coming soon
অত ইত্যাদি| নিরসনং প্রেরকং, মাংসমর্মেদং চতুরঙ্গুলং সদ্যোঘাতি চ| অল্পেত্যাদি কট্যামিত্যুপলক্ষণং, তেন নাভিপৃষ্ঠমুষ্কগুদবঙ্ক্ষণশেফাংসি গৃহ্যন্তে; তদুক্তং- “নাভিপৃষ্ঠকটীমুষ্কগুদবঙ্ক্ষণশেফসাম্| একদ্বারস্তনুত্বক্কো মধ্যে বস্তিরধোমুখঃ” (নি.৩) ইতি| সদ্যোমরণমশ্মরীব্রণাদৃতে ভবতীতি সম্বন্ধঃ| তত্রাপীতি অশ্মরীনিমিত্তে ইত্যর্থঃ| উভযতো ভিন্নে ‘বস্তৌ’ ইতি শেষঃ| স্নাযুমর্মেদং চতুরঙ্গুলং সদ্যোঘাতি চ| পক্বেত্যাদি সিরামর্মেদং চতুরঙ্গুলং চ| স্তনযোরিত্যাদি সিরামর্মেদং কমলমুকুলাকারমধোমুখং চতুরঙ্গুলং চ| স্তনযোরধস্তাদিত্যাদি উভযতঃ স্তনযোরধস্তাদ্ দ্ব্যঙ্গুলপ্রদেশে স্তনমূলে মর্মণী, উভযতোগ্রহণাত্ পৃথক্ পৃথক্ স্তনস্যাধঃ স্তনমূলং মর্মেতি গম্যতে, অন্যথা স্তনযোরধস্তাদিত্যুক্তে মিলিতযোরেব স্তনযোরধস্তাদিতীদৃশেঽর্থে স্তনযুগমধ্যস্যাধস্তাত্ স্তনমূলাখ্যং মর্মদ্বযমিত্যনিষ্টং স্যাত্, ইমে সিরামর্মণী দ্ব্যঙ্গুলে কালান্তরপ্রাণহরে চ| স্তনচূচুকযোরিত্যাদি স্তনযোশ্চূচুকে স্তনচূচুকে; পূর্ববাক্যাত্ ‘দ্ব্যঙ্গুলে’ ইত্যনুবর্ততে, তেন স্তনচূচুকযোরূর্ধ্বং দ্ব্যঙ্গুলে স্তনরোহিতে দ্বে মর্মণী; তদুক্তং- “স্তনচূচুকযোরূর্ধ্বং দ্ব্যঙ্গুলাত্ স্তনরোহিতে| অর্ধাঙ্গুলমিতে মাংসমর্মণী পরিকীর্তিতে|| রক্তপূরিতকোষ্ঠস্য কালান্মরণকারিণী” ইতি; বৃদ্ধবাগ্ভটেন “স্তনচূচুকযোরূর্ধ্বং দ্ব্যঙ্গুলমুভযতঃ স্তনরোহিতে” (অ.সং.শা.৭) ইত্যুক্তং; মাংসমর্মণী সদ্যোঘাতিনী| অংসেত্যাদি সিরামর্মণী অর্ধাঙ্গুলে কালান্তরপ্রাণহরে চ| উভযত্রোরস ইতি উরসো দ্বযোঃ পার্শ্বযোরিত্যর্থঃ, সিরামর্মণী অর্ধাঙ্গুলপ্রমাণে কালান্তরপ্রাণহরে চ||২৫||
Adhikarana 18 (26) · Śloka 26
অত ঊর্ধ্বং পৃষ্ঠমর্মাণি ব্যাখ্যাস্যামঃ - তত্র পৃষ্ঠবংশমুভযতঃ প্রতিশ্রোণিকাণ্ডমস্থিনী কটীকতরুণে, তত্র শোণিতক্ষযাত্ পাণ্ডুর্বিবর্ণো হীনরূপশ্চ ম্রিযতে; পার্শ্বযোর্জঘনবহির্ভাগে পৃষ্ঠবংশমুভযতো কুকুন্দরে, তত্র স্পর্শাজ্ঞানমধঃকাযে চেষ্টোপঘাতশ্চ; শ্রোণীকাণ্ডযোরুপর্যাশযাচ্ছাদনৌ পার্শ্বান্তরপ্রতিবদ্ধৌ নিতম্বৌ, তত্রাধঃকাযশোষো দৌর্বল্যাচ্চ মরণং; অধঃপার্শ্বান্তরপ্রতিবদ্ধৌ জঘনপার্শ্বমধ্যযোস্তির্যগূর্ধ্বং চ জঘনাত্ পার্শ্বসন্ধী, তত্র লোহিতপূর্ণকোষ্ঠতযা ম্রিযতে; স্তনমূলাদৃজূভযতঃ পৃষ্ঠবংশস্য বৃহতী, তত্র শোণিতাতিপ্রবৃত্তিনিমিত্তৈরুপদ্রবৈর্ম্রিযতে; পৃষ্ঠোপরি পৃষ্ঠবংশমুভযতস্ত্রিকসম্বদ্ধে অংসফলকে, তত্র বাহ্বোঃ স্বাপশোষৌ ; বাহুমূর্ধগ্রীবামধ্যেংঽসপীঠস্কন্ধবন্ধনাবংসৌ, তত্র স্তব্ধবাহুতা; এবমেতানি চতুর্দশ পৃষ্ঠমর্মাণি ব্যাখ্যাতানি ||২৬||
अत ऊर्ध्वं पृष्ठमर्माणि व्याख्यास्यामः - तत्र पृष्ठवंशमुभयतः प्रतिश्रोणिकाण्डमस्थिनी कटीकतरुणे, तत्र शोणितक्षयात् पाण्डुर्विवर्णो हीनरूपश्च म्रियते; पार्श्वयोर्जघनबहिर्भागे पृष्ठवंशमुभयतो कुकुन्दरे, तत्र स्पर्शाज्ञानमधःकाये चेष्टोपघातश्च; श्रोणीकाण्डयोरुपर्याशयाच्छादनौ पार्श्वान्तरप्रतिबद्धौ नितम्बौ, तत्राधःकायशोषो दौर्बल्याच्च मरणं; अधःपार्श्वान्तरप्रतिबद्धौ जघनपार्श्वमध्ययोस्तिर्यगूर्ध्वं च जघनात् पार्श्वसन्धी, तत्र लोहितपूर्णकोष्ठतया म्रियते; स्तनमूलादृजूभयतः पृष्ठवंशस्य बृहती, तत्र शोणितातिप्रवृत्तिनिमित्तैरुपद्रवैर्म्रियते; पृष्ठोपरि पृष्ठवंशमुभयतस्त्रिकसम्बद्धे अंसफलके, तत्र बाह्वोः स्वापशोषौ ; बाहुमूर्धग्रीवामध्येंऽसपीठस्कन्धबन्धनावंसौ, तत्र स्तब्धबाहुता; एवमेतानि चतुर्दश पृष्ठमर्माणि व्याख्यातानि ||२६||
🔊 Audio coming soon
অত ঊর্ধ্বমিত্যাদি| তত্র পৃষ্ঠেত্যাদি| প্রতিশ্রোণিকাণ্ডমিত্যত্র ‘প্রতিশ্রোণিকর্ণৌ’ ইতি কেচিত্ পঠন্তি, তত্র শ্রোণিকর্ণৌ লক্ষীকৃত্য ত্রিকসন্নিধানে শ্রোণ্যামুপরি; অস্থিমর্মণী অর্ধাঙ্গুলে কালান্তরপ্রাণহরে চ| পার্শ্বেত্যাদি| পার্শ্বযোর্বামদক্ষিণসঞ্জ্ঞকযোঃ, জঘনবহির্ভাগ ইতি কট্যাঃ পশ্চাদ্ভাগে, গযী তু ‘পার্শ্বজঘনভাগে’ ইতি পঠিত্বা পার্শ্বযোর্জঘনভাগেঽধোভাগে নিতম্বে নিম্নে কুকুন্দরে ইতি ব্যাখ্যাতি, সন্ধিমর্মণী অর্ধাঙ্গুলে ঈষন্নিম্নাকারে বৈকল্যকরে চ| শ্রোণীত্যাদি| পূর্বোক্তযোঃ শ্রোণিকাণ্ডযোরুপরি, আশযাচ্ছাদনৌ আমাশযপিধাযকৌ , পার্শ্বান্তরপ্রতিবদ্ধৌ পার্শ্বমধ্যে প্রতিবদ্ধৌ নিতম্বৌ; অস্থিমর্মণী অর্ধাঙ্গুলে কালান্তরপ্রাণহরে চ| অধ ইত্যাদি অধঃপার্শ্বান্তরপ্রতিবদ্ধাবিতি অধোভাগে যত্ পার্শ্বযোরন্তরং মধ্যং তত্র প্রতিবদ্ধৌ, জঘনপার্শ্বমধ্যযোরিতি পশ্চাদ্ভাগপার্শ্বভাগযোর্যৌ মধ্যৌ বামদক্ষিণৌ তযোঃ; কথং স্থিতাবিত্যাহ- তির্যগূর্ধ্বং চেতি, উপর্যুপরি পর্শুকানাং ক্রমবৃদ্ধেঃ সন্ধেরপি তির্যগূর্ধ্বত্বং ; জঘনাদিতি ল্যপি লুপ্তে পঞ্চমীযং, তেন জঘনপশ্চাদ্ভাগমাশ্রিত্য স্থিতৌ পার্শ্বসন্ধী, সিরামর্মণি অর্ধাঙ্গুলে কালান্তরমৃত্যুপ্রদে চ| স্তনমূলাদিত্যাদি সিরামর্মণী অর্ধাঙ্গুলে কালান্তরপ্রাণহরে চ| পৃষ্ঠোপরীত্যাদি পৃষ্ঠবংশস্যাযতত্বাত্ প্রদেশনিযমার্থং পৃষ্ঠোপরীত্যুক্তং, ত্রিকসম্বদ্ধে ইতি গ্রীবাযা অংসদ্বযস্য চ যঃ সংযোগঃ স ত্রিকঃ, তত্র সম্বদ্ধে অংসফলকে; অস্থিমর্মণী অর্ধাঙ্গুলে বৈকল্যকারিণী চ| বাহ্বিত্যাদি| বাহুমূর্ধা বাহুশিরঃ, গ্রীবা তু কন্ধরা, তযোর্মধ্যে অংসফলকভুজশিখরযোর্বন্ধনৌ অংসৌ, স্নাযুমর্মণী অর্ধাঙ্গুলে বৈকল্যকারিণী চ||২৬||
Adhikarana 19 (27) · Śloka 27
অত ঊর্ধ্বমূর্ধ্বজত্রুগতানি ব্যাখ্যাস্যামঃ- তত্র কণ্ঠনাডীমুভযতশ্চতস্রো ধমন্যো দ্বে নীলে দ্বে চ মন্যে ব্যত্যাসেন , তত্র মূকতা স্বরবৈকৃতমরসগ্রাহিতা চ; গ্রীবাযামুভযতশ্চতস্রঃ সিরা মাতৃকাঃ, তত্র সদ্যোমরণং; শিরোগ্রীবযোঃ সন্ধানে কৃকাটিকে, তত্র চলমূর্ধতা; কর্ণপৃষ্ঠতোঽধঃসংশ্রিতে বিধুরে, তত্র বাধির্যং; ঘ্রাণমার্গমুভযতঃ স্রোতোমার্গপ্রতিবদ্ধে অভ্যন্তরতঃ ফণে, তত্র গন্ধাজ্ঞানং; ভ্রূপুচ্ছান্তযোরধোঽক্ষ্ণোর্বাহ্যতোঽপাঙ্গৌ, তত্রান্ধ্যং দৃষ্টযুপঘাতো বা; ভ্রুবোরুপরি নিম্নযোরাবর্তৌ নাম, তত্রাপ্যান্ধ্যং দৃষ্টযুপঘাতো বা; ভ্রুবোরন্তযোরুপরি কর্ণললাটযোর্মধ্যে শঙ্খৌ, তত্র সদ্যোমরণং; শঙ্খযোরুপরি কেশান্ত উত্ক্ষেপৌ, তত্র সশল্যো জীবেত্ পাকাত্ পতিতশল্যো বা নোদ্ধৃতশল্যঃ; ভ্রুবোর্মধ্যে স্থপনী, তত্রোত্ক্ষেপবত্; পঞ্চ সন্ধযঃ শিরসি বিভক্তাঃ সীমন্তা নাম, তত্রোন্মাদভযচিত্তনাশৈর্মরণং; ঘ্রাণশ্রোত্রাক্ষিজিহ্বাসন্তর্পণীনাং সিরাণাং মধ্যে সিরাসন্নিপাতঃ শৃঙ্গাটকানি , তানি চত্বারি মর্মাণি, তত্রাপি সদ্যোমরণং ; মস্তকাভ্যন্তরোপরিষ্ঠাত্ সিরাসন্ধিসন্নিপাতো রোমাবর্তোঽধিপতিঃ, তত্রাপি সদ্য এব | এবমেতানি সপ্তত্রিংশদূর্ধ্বজত্রুগতানি মর্মাণি ব্যাখ্যাতানি ||২৭||
अत ऊर्ध्वमूर्ध्वजत्रुगतानि व्याख्यास्यामः- तत्र कण्ठनाडीमुभयतश्चतस्रो धमन्यो द्वे नीले द्वे च मन्ये व्यत्यासेन , तत्र मूकता स्वरवैकृतमरसग्राहिता च; ग्रीवायामुभयतश्चतस्रः सिरा मातृकाः, तत्र सद्योमरणं; शिरोग्रीवयोः सन्धाने कृकाटिके, तत्र चलमूर्धता; कर्णपृष्ठतोऽधःसंश्रिते विधुरे, तत्र बाधिर्यं; घ्राणमार्गमुभयतः स्रोतोमार्गप्रतिबद्धे अभ्यन्तरतः फणे, तत्र गन्धाज्ञानं; भ्रूपुच्छान्तयोरधोऽक्ष्णोर्बाह्यतोऽपाङ्गौ, तत्रान्ध्यं दृष्टयुपघातो वा; भ्रुवोरुपरि निम्नयोरावर्तौ नाम, तत्राप्यान्ध्यं दृष्टयुपघातो वा; भ्रुवोरन्तयोरुपरि कर्णललाटयोर्मध्ये शङ्खौ, तत्र सद्योमरणं; शङ्खयोरुपरि केशान्त उत्क्षेपौ, तत्र सशल्यो जीवेत् पाकात् पतितशल्यो वा नोद्धृतशल्यः; भ्रुवोर्मध्ये स्थपनी, तत्रोत्क्षेपवत्; पञ्च सन्धयः शिरसि विभक्ताः सीमन्ता नाम, तत्रोन्मादभयचित्तनाशैर्मरणं; घ्राणश्रोत्राक्षिजिह्वासन्तर्पणीनां सिराणां मध्ये सिरासन्निपातः शृङ्गाटकानि , तानि चत्वारि मर्माणि, तत्रापि सद्योमरणं ; मस्तकाभ्यन्तरोपरिष्ठात् सिरासन्धिसन्निपातो रोमावर्तोऽधिपतिः, तत्रापि सद्य एव | एवमेतानि सप्तत्रिंशदूर्ध्वजत्रुगतानि मर्माणि व्याख्यातानि ||२७||
🔊 Audio coming soon
অত ঊর্ধ্বমিত্যাদি| ব্যত্যাসেন বৈপরীত্যেন, একা নীলা একা মন্যা চৈকস্মিন্ পার্শ্বে, অন্যা নীলা অন্যা মন্যা চাপরস্মিন্ পার্শ্বে; সিরামর্মণী চতুরঙ্গুলে বৈকল্যকারিণী চ| গ্রীবাযামিত্যাদি উভযতশ্চতস্র ইতি একস্মিন্ একস্মিন্ পার্শ্বে চতস্রশ্চতস্র ইত্যর্থঃ; সিরামর্মাণি চতুরঙ্গুলপ্রমাণানি মাতৃকাঃ| শির ইত্যাদি সন্ধিমর্মণী অর্ধাঙ্গুলে বৈকল্যকারিণী চ| কর্ণেত্যাদি স্নাযুমর্মণী কিঞ্চিন্নিম্নাকারে বৈকল্যকারিণী চ| ঘ্রাণেত্যাদি ঘ্রাণমার্গস্য দ্বযোঃ পার্শ্বযোরভ্যন্তরবিবরসম্বদ্ধে ফণে, সিরামর্মণী অর্ধাঙ্গুলে বৈকল্যকারিণী চ| ভ্রূপুচ্ছেত্যাদি সিরামর্মণী অর্ধাঙ্গুলে বৈকল্যকারিণী চ| ভ্রুবোরুপরীত্যাদি ভ্রুবোরুপরি নিম্নযোরিতি প্রদেশকথনং, সন্ধিমর্মণী অর্ধাঙ্গুলে বৈকল্যকারিণী চ| ভ্রুবোরিত্যাদি অস্থিমর্মণী অর্ধাঙ্গুলে| শঙ্খযোরিত্যাদি কেশান্তে কেশপর্যন্তে, স্নাযুমর্মণী অর্ধাঙ্গুলে বিশল্যপ্রাণহরে চ| ভ্রুবোর্মধ্যে ইত্যাদি তত্রোত্ক্ষেপবদিতি সশল্যঃ স্বযং পতিতশল্যো বা জীবত্যুদ্ধৃতশল্যো ম্রিযত ইত্যর্থঃ, সিরামর্ম অর্ধাঙ্গুলং বিশল্যঘ্নং চ| পঞ্চেত্যাদি পঞ্চ সন্ধযো যে শিরসি বিভক্তাঃ শরীরসঙ্খ্যাব্যাকরণে তে সীমন্তা ইত্যর্থঃ, ইমানি সন্ধিমর্মাণী চতুরঙ্গুলপ্রমাণানি কালান্তরপ্রাণহরাণি চ| ঘ্রাণশ্রোত্রেত্যাদি ঘ্রাণাদীন্দ্রিযচতুষ্কতর্পণীনাং সিরাণাং সিরামুখানাং সন্নিপাতঃ সংযোগস্থানং শৃঙ্গাটকানি, তানি চত্বারি ঘ্রাণাদিতর্পণসিরাণাং চতুর্ভেদাত্; ইমানি সিরামর্মাণি চতুরঙ্গুলপ্রমাণানি| মস্তকেত্যাদি মস্তকাভ্যন্তরোপরিষ্ঠাদিতি মস্তকস্যাভ্যন্তরোর্ধ্বমিত্যর্থঃ, সিরাসন্ধ্যোঃ সন্নিপাতো রোমাবর্তঃ, বহিরস্য লক্ষণমুপরিষ্ঠাদ্রোমাবর্তঃ; এতত্ সন্ধিমর্ম অর্ধাঙ্গুলপ্রমাণং চ||২৭||
Adhikarana 20 (28-29) · Śloka 29
ভবন্তি চাত্র শ্লোকাঃ- উর্ব্যঃ শিরাংসি বিটপে চ সকক্ষপার্শ্বে একৈকমঙ্গুলমিতং স্তনপূর্বমূলম্ | বিদ্ধ্যঙ্গুলদ্বযমিতং মণিবন্ধগুল্ফং ত্রীণ্যেব জানু সপরং সহ কূর্পরাভ্যাম্ ||২৮|| হৃদ্বস্তিকূর্চগুদনাভি বদন্তি মূর্ধ্নি চত্বারি পঞ্চ চ গলে দশ যানি চ দ্বে | তানি স্বপাণিতলকুঞ্চিতসম্মিতানি শেষাণ্যবেহি পরিবিস্তরতোঽঙ্গুলার্ধম্ ||২৯||
भवन्ति चात्र श्लोकाः- उर्व्यः शिरांसि विटपे च सकक्षपार्श्वे एकैकमङ्गुलमितं स्तनपूर्वमूलम् | विद्ध्यङ्गुलद्वयमितं मणिबन्धगुल्फं त्रीण्येव जानु सपरं सह कूर्पराभ्याम् ||२८|| हृद्बस्तिकूर्चगुदनाभि वदन्ति मूर्ध्नि चत्वारि पञ्च च गले दश यानि च द्वे | तानि स्वपाणितलकुञ्चितसम्मितानि शेषाण्यवेहि परिविस्तरतोऽङ्गुलार्धम् ||२९||
🔊 Audio coming soon
ইদানীং সর্বেষামেব মর্মণাং সূত্রেণ মানমাহ- ভবন্তি চাত্রেত্যাদিনা| শিরাংসি কূর্চশিরাংসি| কক্ষপার্শ্বে কক্ষধরে ইত্যর্থঃ| একৈকমঙ্গুলমিতমিতি একৈকং যথা ভবতি তথোর্ব্যাদযো মর্মবিশেষা অঙ্গুলমিতা জ্ঞেযাঃ| স্তনপূর্বমূলমিত্যাদি মণিবন্ধগুল্ফং স্তনমূলং চাঙ্গুলদ্বযমিতং বিদ্ধি জানীহীতি সম্বন্ধঃ| ত্রীণ্যেব জানু সপরমিতি সপরং দ্বিতীযজানুসহিতং জানু ত্রীণি ত্র্যঙ্গুলানি বিদ্ধীত্যর্থঃ| মূর্ধ্নি চত্বারি পঞ্চ চেতি যানি মূর্ধ্নি চত্বারি মর্মাণি শৃঙ্গাটকসঞ্জ্ঞকানি, তথা তত্রৈব পঞ্চ সীমন্তসঞ্জ্ঞকানি, গলে দশ যানি চ দ্বে ইতি গলে কণ্ঠে যানি দশ দ্বে চ কথিতানি তত্রাষ্টৌ মাতৃকাঃ দ্বে নীলে দ্বে চ মন্যে, এতানি মর্মাণি স্বপাণিতলকুঞ্চিতসম্মিতানি চতুরঙ্গুলপ্রমাণানীত্যর্থঃ| শেষাণি ষট্পঞ্চাশন্মর্মাণি| অবেহি জানীহি| অন্যে তু, ইমানি ষট্পঞ্চাশন্মর্মাণি তলপ্রমাণান্যাহুঃ| গযী তু, অন্যাদৃশং সূত্রং পঠিত্বা স্তনমূলে দ্বে গুল্ফে চ, ইন্দ্রবস্তযশ্চত্বারো, দ্বৌ মণিবন্ধাবিতি দশ মর্মাণি দ্ব্যঙ্গুলানি ভোজদর্শনাদ্ব্যাখ্যাতি, তথা জানু সপরমিত্যত্র সহ পরেণ পরপ্রদেশাবস্থিতেনাণিমর্মণা বর্ততে যত্ তত্ সপরং; তেন জানুনি দ্বে, আণযশ্চতস্রঃ, কূর্পরে দ্বে, ইত্যষ্টৌ ত্র্যঙ্গুলানি ব্যাখ্যাতি| শেষং সমম্||২৮-২৯||
Adhikarana 21 (30) · Śloka 30
এতত্প্রমাণমভিবীক্ষ্য বদন্তি তজ্জ্ঞাঃ শস্ত্রেণ কর্মকরণং পরিহৃত্য কার্যম্ | পার্শ্বাভিঘাতিতমপীহ নিহন্তি মর্ম তস্মাদ্ধি মর্মসদনং পরিবর্জনীযম্ ||৩০||
एतत्प्रमाणमभिवीक्ष्य वदन्ति तज्ज्ञाः शस्त्रेण कर्मकरणं परिहृत्य कार्यम् | पार्श्वाभिघातितमपीह निहन्ति मर्म तस्माद्धि मर्मसदनं परिवर्जनीयम् ||३०||
🔊 Audio coming soon
মানকথনপ্রযোজনমাহ- এতদিত্যাদিনা| মর্মসদনমিতি মর্মস্থানম্||৩০||
Adhikarana 22 (31-32) · Śloka 33
ছিন্নেষু পাণিচরণেষু সিরা নরাণাং সঙ্কোচমীযুরসৃগল্পমতো নিরেতি | প্রাপ্যামিতব্যসনমুগ্রমতো মনুষ্যাঃ সঞ্চ্ছিন্নশাখতরুবন্নিধনং ন যান্তি ||৩১|| ক্ষিপ্রেষু তত্র সতলেষু হতেষু রক্তং গচ্ছত্যতীব পবনশ্চ রুজং করোতি | এবং বিনাশমুপযান্তি হি তত্র বিদ্ধা বৃক্ষা ইবাযুধনিপাতনিকৃত্তমূলাঃ ||৩২|| তস্মাত্তযোরভিহতস্য তু পাণিপাদং ছেত্তব্যমাশু মণিবন্ধনগুল্ফদেশে |৩৩|
छिन्नेषु पाणिचरणेषु सिरा नराणां सङ्कोचमीयुरसृगल्पमतो निरेति | प्राप्यामितव्यसनमुग्रमतो मनुष्याः सञ्च्छिन्नशाखतरुवन्निधनं न यान्ति ||३१|| क्षिप्रेषु तत्र सतलेषु हतेषु रक्तं गच्छत्यतीव पवनश्च रुजं करोति | एवं विनाशमुपयान्ति हि तत्र विद्धा वृक्षा इवायुधनिपातनिकृत्तमूलाः ||३२|| तस्मात्तयोरभिहतस्य तु पाणिपादं छेत्तव्यमाशु मणिबन्धनगुल्फदेशे |३३|
🔊 Audio coming soon
করচরণচ্ছেদে জীবন্তি তদবযবভূতমর্মচ্ছেদে তু ন জীবন্তীতি বিশেষং দর্শযন্নাহ- ছিন্নেষ্বিত্যাদি| সঙ্কোচমীযুঃ সঙ্কোচং জগ্মুরতোঽল্পং রুধিরং প্রবর্ততে| ক্ষিপ্রেষ্বিত্যাদি তত্র পাণ্যোশ্চরণযোর্বা| গযী তু, বৃক্ষা ইবাযুধনিপাতেত্যাদিস্থানে ‘কিঞ্জল্কপত্রমথনাদিব পঙ্কজানি’ ইতি পঠতি||৩১-৩২||-
Adhikarana 23 (33) · Śloka 34
মর্মাণি শল্যবিষযার্ধমুদাহরন্তি যস্মাচ্চ মর্মসু হতা ন ভবন্তি সদ্যঃ ||৩৩|| জীবন্তি তত্র যদি বৈদ্যগুণেন কেচিত্তে প্রাপ্নুবন্তি বিকলত্বমসংশযং হি |৩৪|
मर्माणि शल्यविषयार्धमुदाहरन्ति यस्माच्च मर्मसु हता न भवन्ति सद्यः ||३३|| जीवन्ति तत्र यदि वैद्यगुणेन केचित्ते प्राप्नुवन्ति विकलत्वमसंशयं हि |३४|
🔊 Audio coming soon
মর্মমানকথনপ্রযোজনং পূর্বতরবাক্যে প্রতিপাদ্য মর্মস্থানবিষযং নির্দিশন্নাহ- মর্মাণীত্যাদি| শল্যস্য মনঃশরীরাবাধকরস্য বিষযঃ শল্যবিষযঃ; স চ শস্ত্রাদিপ্রণিধানান্মরণামরণকারকত্বেন দ্বিবিধঃ; তত্র মরণকারকঃ শল্যবিষযো মর্মাখ্যঃ শরীরদেশঃ, যস্মাত্তত্র হতাঃ সদ্য এব ন ভবন্তি সপ্তাহাভ্যন্তর এব ম্রিযন্ত ইত্যর্থঃ, তস্মান্মরণকারকত্বেন মর্মাণি শল্যবিষযার্ধমুদাহরন্তি, ‘পূর্বাচার্যাঃ’ ইতি শেষঃ| ননু, কেচিন্মর্মহতা অপি জীবন্তো দৃশ্যন্তে তত্ কথং মরণকারকত্বেন মর্মাণি শল্যবিষযার্ধমিত্যাশঙ্ক্যাহ- জীবন্তীত্যাদি||৩৩||-
Adhikarana 24 (34) · Śloka 35
সম্ভিন্নজর্জরিতকোষ্ঠশিরঃকপালা জীবন্তি শস্ত্রনিহতৈশ্চ শরীরদেশৈঃ ||৩৪|| ছিন্নৈশ্চ সক্থিভুজপাদকরৈরশেষৈর্যেষাং ন মর্মসু কৃতা বিবিধাঃ প্রহারাঃ |৩৫|
सम्भिन्नजर्जरितकोष्ठशिरःकपाला जीवन्ति शस्त्रनिहतैश्च शरीरदेशैः ||३४|| छिन्नैश्च सक्थिभुजपादकरैरशेषैर्येषां न मर्मसु कृता विविधाः प्रहाराः |३५|
🔊 Audio coming soon
প্রসঙ্গতোঽপরং শল্যবিষযার্ধং প্রতিপাদযিতুকামোঽমর্মহতাস্তু বিবিধৈরপি ছেদভেদাদিভির্ন ম্রিযন্ত ইতি দর্শযন্নাহ- সম্ভিন্নেত্যাদি||৩৪||
Adhikarana 25 (35) · Śloka 36
সোমমারুততেজাংসি রজঃসত্ত্বতমাংসি চ | মর্মসু প্রাযশঃ পুংসাং ভূতাত্মা চাবতিষ্ঠতে ||৩৫|| মর্মস্বভিহতাস্তস্মান্ন জীবন্তি শরীরিণঃ |৩৬|
सोममारुततेजांसि रजःसत्त्वतमांसि च | मर्मसु प्रायशः पुंसां भूतात्मा चावतिष्ठते ||३५|| मर्मस्वभिहतास्तस्मान्न जीवन्ति शरीरिणः |३६|
🔊 Audio coming soon
ইদানীং মর্মণাং শরীরমনোদোষনিবাসভূতানাং শরীরমনোদোষৈরেব মর্মবিদ্ধকুপিতৈর্মনঃ শরীরং চ নশ্যতি, তযোরাধারভূতযোর্নাশাদাধেযভূতো ভূতাত্মাঽপি নশ্যতীতি দর্শযিতুমাহ- সোমেত্যাদি||৩৫||-
Adhikarana 26 (36-40) · Śloka 40
ইন্দ্রিযার্থেষ্বসম্প্রাপ্তির্মনোবুদ্ধিবিপর্যযঃ ||৩৬|| রুজশ্চ বিবিধাস্তীব্রা ভবন্ত্যাশুহরে হতে | হতে কালান্তরঘ্নে তু ধ্রুবং ধাতুক্ষযো নৃণাম্ ||৩৭|| ততো ধাতুক্ষযাজ্জন্তুর্বেদনাভিশ্চ নশ্যতি | হতে বৈকল্যজননে কেবলং বৈদ্যনৈপুণাত্ ||৩৮|| শরীরং ক্রিযযা যুক্তং বিকলত্বমবাপ্নুযাত্ | বিশল্যঘ্নে তু বিজ্ঞেযং পূর্বোক্তং যচ্চ কারণম্ ||৩৯|| রুজাকরাণি মর্মাণি ক্ষতানি বিবিধা রুজঃ | কুর্বন্ত্যন্তে চ বৈকল্যং কুবৈদ্যবশগো যদি ||৪০||
इन्द्रियार्थेष्वसम्प्राप्तिर्मनोबुद्धिविपर्ययः ||३६|| रुजश्च विविधास्तीव्रा भवन्त्याशुहरे हते | हते कालान्तरघ्ने तु ध्रुवं धातुक्षयो नृणाम् ||३७|| ततो धातुक्षयाज्जन्तुर्वेदनाभिश्च नश्यति | हते वैकल्यजनने केवलं वैद्यनैपुणात् ||३८|| शरीरं क्रियया युक्तं विकलत्वमवाप्नुयात् | विशल्यघ्ने तु विज्ञेयं पूर्वोक्तं यच्च कारणम् ||३९|| रुजाकराणि मर्माणि क्षतानि विविधा रुजः | कुर्वन्त्यन्ते च वैकल्यं कुवैद्यवशगो यदि ||४०||
🔊 Audio coming soon
সদ্যঃপ্রাণহরাদিমর্মপঞ্চকস্য লক্ষণং নির্দিশন্নাহ- ইন্দ্রিযার্থেষ্বিত্যাদি| আশুহরে সদ্যঃপ্রাণহরে| পূর্বোক্তমিতি ‘শল্যমুখাবরুদ্ধো যাবদন্তর্বাযুস্তিষ্ঠতি তাবজ্জীবতি’ ইত্যাদ্যুক্তমেব কারণং জ্ঞেযং লক্ষণত্বেনেত্যর্থঃ||৩৬-৪০||
Adhikarana 27 (41) · Śloka 41
ছেদভেদাভিঘাতেভ্যো দহনাদ্দারণাদপি | উপঘাতং বিজানীযান্মর্মণাং তুল্যলক্ষণম্ ||৪১||
छेदभेदाभिघातेभ्यो दहनाद्दारणादपि | उपघातं विजानीयान्मर्मणां तुल्यलक्षणम् ||४१||
🔊 Audio coming soon
ইদানীং মর্মঘাততুল্যং মর্মসমীপস্যাপি দেশস্য ঘাতং মহানর্থকরং দর্শযন্নাহ- ছেদেত্যাদি| উপঘাতং সমীপঘাতম্||৪১||
Adhikarana 28 (42) · Śloka 42
মর্মাভিঘাতস্তু ন কশ্চিদস্তি যোঽল্পাত্যযো বাঽপি নিরত্যযো বা | প্রাযেণ মর্মস্বভিতাডিতাস্তু বৈকল্যমৃচ্ছন্ত্যথবা ম্রিযন্তে ||৪২||
मर्माभिघातस्तु न कश्चिदस्ति योऽल्पात्ययो वाऽपि निरत्ययो वा | प्रायेण मर्मस्वभिताडितास्तु वैकल्यमृच्छन्त्यथवा म्रियन्ते ||४२||
🔊 Audio coming soon
মর্মাভিঘাতে বৈদ্যস্য যত্নপরতাং দর্শযন্নাহ- মর্মাভিঘাত ইত্যাদি| অল্পাত্যয ইতি অল্পব্যাপত্| নিরত্যয ইতি নির্গতব্যাপত্| গযী ত্বেতদ্বাক্যং ন পঠতি||৪২||
Adhikarana 29 (43) · Śloka 43
মর্মাণ্যধিষ্ঠায হি যে বিকারা মূর্চ্ছন্তি কাযে বিবিধা নরাণাম্ | প্রাযেণ তে কৃচ্ছ্রতমা ভবন্তি নরস্য যত্নৈরপি সাধ্যমানাঃ ||৪৩||
मर्माण्यधिष्ठाय हि ये विकारा मूर्च्छन्ति काये विविधा नराणाम् | प्रायेण ते कृच्छ्रतमा भवन्ति नरस्य यत्नैरपि साध्यमानाः ||४३||
🔊 Audio coming soon
শরীরদোষেণাপি মর্মণাং মর্মসমীপদেশস্যাপি নিযতং মহানর্থং দর্শযন্নাহ- মর্মাণ্যধিষ্ঠাযেত্যাদি| মূর্চ্ছন্তি সমুচ্ছ্রাযং গচ্ছন্তি| যস্মাদেবংবিধো মর্মাভিঘাতস্তস্মাদ্বৈদ্যেন যত্নঃ কার্য ইতি সূচিতম্||৪৩||
Adhikarana puShpikA · Śloka 6
ইতি সুশ্রুতসংহিতাযাং শারীরস্থানে প্রত্যেকমর্মনির্দেশশারীরং নাম ষষ্ঠোঽধ্যাযঃ ||৬||
इति सुश्रुतसंहितायां शारीरस्थाने प्रत्येकमर्मनिर्देशशारीरं नाम षष्ठोऽध्यायः ||६||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানে ষষ্ঠোঽধ্যাযঃ||৬||