1. sarvabhūtacintāśārīram

Adhikarana 1 (1-2) · Śloka 2

অথাতঃ সর্বভূতচিন্তাশারীরং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

হেতুলক্ষণপ্রতিপাদকান্নিদানস্থানাদধিগতব্যাধিহেতুলক্ষণস্য বৈদ্যস্য চিকিত্সাযা অবসরঃ, চিকিত্সা চাধিষ্ঠানবিশেষজ্ঞানমন্তরেণ ন সম্ভবতীত্যধিষ্ঠানজ্ঞাপনায শারীরস্থানমারভ্যতে| শারীরস্থানেঽপি প্রতিপাদ্যে আদৌ সর্বশরীরকারণানাং ভূতানামেব চিন্তা কর্তুং যুজ্যত ইত্যাহ- অথাত ইত্যাদি| সর্বাণি ভূতানি স্থাবরজঙ্গমানি, মহাভূতানি পৃথিব্যাদীনি বা; তেষাং চিন্তা হেতুস্বলক্ষণকার্যৈশ্চিন্তনং; কুত উত্পন্নানি? কানি চৈষাং স্বলক্ষণানি? কানি কার্যাণীতি চিন্তনং; সৈব যস্মিন্নধ্যাযেঽস্তীতি মত্বর্থে পূর্ববচ্ছপ্রত্যযমুত্পাদ্য তল্লোপে প্রকৃতিভাবং চ প্রতিপাদ্য সর্বভূতচিন্তেতি নিষ্পাদ্যতে, সর্বভূতচিন্তা চ তচ্ছারীরং চেতি পশ্চাত্ কর্মধারযঃ| গযী তু ‘সর্বভূতচিন্তানাম শারীরং’ ইতি পঠতি||১-২||

Adhikarana 2 (3) · Śloka 3

সর্বভূতানাং কারণমকারণং সত্ত্বরজস্তমোলক্ষণমষ্টরূপমখিলস্য জগতঃ সম্ভবহেতুরব্যক্তং নাম | তদেকং বহূনাং ক্ষেত্রজ্ঞানামধিষ্ঠানং সমুদ্র ইবৌদকানাং ভাবানাম্ ||৩||

তত্রাদৌ হেতুচিন্তামাহ- সর্বভূতানামিত্যাদি| এবম্ভূতমব্যক্তং মূলপ্রকৃত্যপরপর্যাযং সর্বভূতানাং কারণমিতি পিণ্ডার্থঃ| কিংবিশিষ্টম্? অকারণং; ন বিদ্যতে কারণং যস্য তদকারণম্, অবিকৃতিরূপং ন কস্যচিত্ কার্যমিত্যর্থঃ| স্বরূপবিশেষণমাহ- সত্ত্বরজস্তমোলক্ষণং; সত্ত্বরজস্তমঃস্বরূপম্| পুনরপি কিম্ভূতমিত্যাহ- অষ্টরূপমিতি| প্রকৃতিভাবেনৈবাব্যক্তং মহানহঙ্কারঃ পঞ্চতন্মাত্রাণীত্যষ্টৌ রূপাণি যস্য তত্তথা; প্রকৃতিত্বং চাষ্টানামব্যক্তাদীনাং সাঙ্খ্যেঽপি প্রতিপাদিতমস্তি| শিলাপুত্রকন্যাযেন রূপত্বং রুপিত্বং চাব্যক্তস্য| অব্যক্তং মহানহঙ্কারঃ পঞ্চভূতানীত্যষ্টৌ রূপাণীত্যেকে; অন্যে তু ধর্মজ্ঞানবৈরাগ্যৈশ্বর্যাধর্মাজ্ঞানাবৈরাগ্যানৈশ্বর্যাণ্যষ্টৌ রূপাণ্যাহুঃ; অপরে তু মনোবুদ্ধ্যহঙ্কারমহাভূতান্যাহুঃ| পুনরপি কিম্ভূতম্? অখিলস্য জগতঃ সম্ভবহেতুঃ অভিব্যক্তিকারণম্| তত্র সর্বভূতানাং কারণমিত্যনেন কার্যকারণযোস্তাদাত্ম্যং দর্শিতম্, অখিলস্য জগতঃ সম্ভবহেতুরিত্যনেন চাভিব্যক্তিহেতুত্বমিতি ন পৌনরুক্ত্যম্| গযী ত্বন্যথা ব্যাখ্যাতি, যথা- সর্বভূতানাং কারণমিত্যস্যৈব ভাষ্যং নির্দিশন্নাহ- অখিলস্য জগতঃ সম্ভবহেতুরিতি; অনেনোপাদানকারণত্বমব্যক্তস্য জগদুত্পত্তৌ প্রতিপাদিতম্| ন ব্যজ্যতে স্মেত্যব্যক্তং; প্রকৃতিঃ প্রধানং মূলপ্রকৃতিরিতি যাবদব্যক্তপর্যাযাঃ| তত্ অব্যক্তম্; একং শিলাপট্টবদবিবেচ্যাবযবং, ন পুনস্ত্রিদণ্ডবদ্বিবেচ্যাবযবম্| ক্ষেত্রজ্ঞানাং কর্মপুরুষাণাম্| অধিষ্ঠানং শরীরভাবায বিষযঃ| অত্রোপমানমাহ- সমুদ্র ইবেত্যাদি| উদকভবা ঔদকা নদীনদসরস্তডাগাদযঃ; অন্যে ত্বৌদকা ভাবাশ্চরাচরা মত্স্যপদ্মাদয ইত্যাহুঃ||৩||

Adhikarana 3 (4) · Śloka 4

তস্মাদব্যক্তান্মহানুত্পদ্যতে তল্লিঙ্গ এব | তল্লিঙ্গাচ্চ মহতস্তল্লক্ষণ এবাহঙ্কার উত্পদ্যতে; স ত্রিবিধো বৈকারিকস্তৈজসো ভূতাদিরিতি | তত্র বৈকারিকাদহঙ্কারাত্তৈজসসহাযাত্তল্লক্ষণান্যেবৈকাদশেন্দ্রিযাণ্যুত্পদ্যন্তে, তদ্যথা- শ্রোত্রত্বক্চক্ষুর্জিহ্বাঘ্রাণবাগ্ঘস্তোপস্থপাযুপাদমনাংসীতি; তত্র পূর্বাণি পঞ্চ বুদ্ধীন্দ্রিযাণি, ইতরাণি পঞ্চ কর্মেন্দ্রিযাণি, উভযাত্মকং মনঃ; ভূতাদেরপি তৈজসসহাযাত্তল্লক্ষণান্যেব পঞ্চতন্মাত্রাণ্যুত্পদ্যন্তে- শব্দতন্মাত্রং, স্পর্শতন্মাত্রং, রূপতন্মাত্রং, রসতন্মাত্রং, গন্ধতন্মাত্রমিতি; তেষাং বিশেষাঃ- শব্দস্পর্শরূপরসগন্ধাঃ; তেভ্যো ভূতানি- ব্যোমানিলানলজলোর্ব্যঃ; এবমেষা তত্ত্বচতুর্বিংশতির্ব্যাখ্যাতা ||৪||

ননু কথমেকমব্যক্তমনেকধর্মণাং সর্বভূতানাং কারণমিত্যাশঙ্ক্যাব্যক্তাত্ সর্বভূতানামুত্পত্তিক্রমমাহ- তস্মাদিত্যাদি| তস্মাদিতি ক্ষেত্রজ্ঞাধিষ্ঠিতাদব্যক্তাত্| মহানিতি বুদ্ধিতত্ত্বং, তত্তু সত্ত্বসমুদ্রেকান্নির্মলস্ফটিকোপলপ্রখ্যং চিচ্ছাযাসঙ্ক্রান্তিপ্রাপ্তচৈতন্যং পুরুষবন্নানাত্মকমধ্যবসেযবিষযং নিশ্চিতার্থকারণমিত্যর্থঃ| উত্পদ্যতে ব্যক্তীভবতি| তল্লিঙ্গ এবেতি সত্ত্বরজস্তমঃস্বভাব এব| তল্লিঙ্গত্ সত্ত্বরজস্তমঃস্বভাবাত্| মহত ইতি বুদ্ধিতত্ত্বাত্| তল্লক্ষণ এবেতি সত্ত্বরজস্তমঃস্বভাব এবেত্যর্থঃ| অহঙ্কারোঽভিমানব্যাপারলক্ষণঃ| তল্লিঙ্গাদিতি বিশেষণেন শুদ্ধসত্ত্বস্বরূপান্মহত্তত্ত্বান্নাহঙ্কারস্যোত্পত্তিরিতি সূচ্যতে| তথা চ চরকেঽপ্যভিহিতং- “শুদ্ধসত্ত্বস্য যা শুদ্ধা সত্যা বুদ্ধিঃ প্রবর্ততে| যযা ভিনত্ত্যতিবলং মহামোহমযং তমঃ|| সর্বভাবস্বভাবজ্ঞো যযা ভবতি নিস্পৃহঃ| যযা নোপৈত্যহঙ্কারং নোপাস্তে কারণং যযা”- (চ. শা. ১) ইত্যাদি| বৈকারিকাদিসঞ্জ্ঞাস্তু পূর্বাচার্যৈঃ সংব্যবহারায কৃতাঃ| তত্র বৈকারিকঃ সাত্ত্বিকঃ, তৈজসো রাজসঃ, ভূতাদিস্তামসঃ| তস্য ত্রিবিধস্যাপি কার্যমাহ- তত্রেত্যাদি| তত্র সাত্ত্বিকাদহঙ্কারাদ্রাজসসহাযাত্তমোমাত্রযাঽনুবিদ্ধাদেকাদশেন্দ্রিযাণি; তল্লক্ষণানি প্রকাশলক্ষণানি, সত্ত্বস্য প্রকাশকত্বাত্| তান্যহঙ্কারাদুত্পন্নান্যাহঙ্কারকারিকাণীতি সাঙ্খ্যে, বৈদ্যকে তু ভৌতিকানি| পূর্বাণি পঞ্চ শ্রোত্রাদীনি বুদ্ধীন্দ্রিযাণি, বুদ্ধেরাশ্রযত্বাত্; ইতরাণি বাক্প্রভৃতীনি কর্মেন্দ্রিযাণি, কর্মণ আশ্রযত্বাত্তেষাম্; উভযাত্মকং বুদ্ধ্যাত্মকং কর্মাত্মকং চ মনঃ, বুদ্ধীন্দ্রিযাণাং কর্মেন্দ্রিযাণাং চ মনোঽধিষ্ঠিতানামেব প্রবৃত্তেঃ| ভূতাদেরিতি তামসাদহঙ্কারাদ্রাজসসহাযাত্ সত্ত্বমাত্রযাঽনুবিদ্ধাত্| তল্লক্ষণান্যেব মোহাদিলক্ষণান্যেব| তত্রানুদ্ভূতস্বভাবানি বাহ্যেন্দ্রিযাগ্রাহ্যাণি শব্দাদীন্যেব তন্মাত্রাণি, তানি চ যোগিভিরেব গ্রাহ্যাণি| সা মাত্রা যস্মিন্ তত্তন্মাত্রম্| তেষামিত্যাদি তেষাং তন্মাত্রাণাম্| বিশেষা ইতি অনুভবযোগ্যৈঃ সুখদুঃখমোহরূপৈর্ধর্মৈর্বিশিষ্যন্ত ইতি বিশেষাঃ শব্দাদযঃ; তন্মাত্রাণি ত্ববিশেষাণি, যতস্তান্যনুভবযোগ্যৈঃ সুখদুঃখাদিভির্বিশেষ্টুং ন শক্যন্তে, সূক্ষ্মত্বাত্| তেভ্যঃ পঞ্চভ্যঃ শব্দতন্মাত্রাদিভ্য একোত্তরপরিবৃদ্ধ্যা ব্যোমাদয উত্পদ্যন্তে| তদ্যথা- শব্দতন্মাত্রাচ্ছব্দগুণং ব্যোম, শব্দতন্মাত্রসহিতাত্ স্পর্শতন্মাত্রাচ্ছব্দস্পর্শগুণো বাযুঃ, শব্দস্পর্শতন্মাত্রসহিতাদ্রূপতন্মাত্রাচ্ছব্দস্পর্শরূপগুণং তেজঃ, শব্দস্পর্শরূপতন্মাত্রসহিতাদ্রসতন্মাত্রাচ্ছব্দস্পর্শরূপরসগুণা আপঃ, শব্দস্পর্শরূপরসতন্মাত্রসহিতাদ্গন্ধতন্মাত্রাচ্ছব্দস্পর্শরূপরসগন্ধগুণা পৃথিবী| পতঞ্জলিমতানুসারিণশ্চ শব্দাদিভ্য এব ব্যোমাদীনামুত্পত্তিমিচ্ছন্তি| শব্দাদীনাং ব্যোমাদিমহাভূতগুণানাং ধর্মিণোঽভিন্নত্বেন পৃথক্ত্বং নিরস্যন্নক্তস্যোপসংহারমাহ- এবমিত্যাদি||৪||

Adhikarana 4 (5) · Śloka 5

তত্র বুদ্ধীন্দ্রিযাণাং শব্দাদযো বিষযাঃ; কর্মেন্দ্রিযাণাং যথাসঙ্খ্যং বচনাদানানন্দবিসর্গবিহরণানি ||৫||

তত্রেত্যাদি| বিষযা গ্রাহ্যাঃ| বচনাদানানন্দবিসর্গবিহরণানীত্যত্র বিষযা ইতি সম্বধ্যতে; তেনোচ্যতে যত্তদ্বচনং বক্তব্যমুচ্যতে, এবং কর্মপ্রত্যযান্তত্বাদাদানমাদাতব্যম্, আনন্দ আনন্দনীযং, বিসর্গো বিসর্জিতব্যং, বিহরণং বিহর্তব্যং স্থানম্||৫||

Adhikarana 5 (6) · Śloka 6

অব্যক্তং মহানহঙ্কারঃ পঞ্চতন্মাত্রাণি চেত্যষ্টৌ প্রকৃতযঃ; শেষাঃ ষোডশ বিকারাঃ ||৬||

উক্তাযাস্তত্ত্বচতুর্বিংশতেরুক্তমেব ধর্মান্তরং ক্বচিত্ কিঞ্চিন্নিদর্শযন্নাহ- অব্যক্তমিত্যাদি| প্রকৃতয ইতি অপরেষাং কারণভূতা; অব্যক্তমিতি বিচ্ছিদ্য পাঠঃ কেবলহেতুভাবেনাব্যক্তং প্রকৃতিরেবেতি বোধনার্থম্| তন্মাত্রাণি চেতি চকারঃ প্রকৃতযশ্চেত্যত্র সম্বন্ধনীযঃ| তেন মহদাদযঃ সপ্ত কার্যত্বেন বিকৃতযোঽপি| শেষা ইতি একাদশেন্দ্রিযাণি পঞ্চমহাভূতানীতি ষোডশবিকারাঃ কার্যাণীত্যর্থঃ ||৬||

Adhikarana 6 (7) · Śloka 7

স্বঃ স্বশ্চৈষাং বিষযোঽধিভূতং; স্বযমধ্যাত্মম্; অধিদৈবতম্- অথ বুদ্ধের্ব্রহ্মা, অহঙ্কারস্যেশ্বরঃ, মনসশ্চন্দ্রমাঃ, দিশঃ শ্রোত্রস্য, ত্বচো বাযুঃ, সূর্যশ্চক্ষুষঃ, রসনস্যাপঃ, পৃথিবী ঘ্রাণস্য, বাচোঽগ্নিঃ, হস্তযোরিন্দ্রঃ, পাদযোর্বিষ্ণুঃ, পাযোর্মিত্রঃ, প্রজাপতিরুপস্থস্যেতি ||৭||

অস্মিংশ্চতুর্বিংশতিকে তত্ত্বরাশৌ প্রকাশকত্বেন বুদ্ধ্যাদযঃ প্রধানভূতাঃ, অতস্তে যত্রস্থং প্রকাশ্যং যত্র স্থিতা যদনুগ্রহেণ চ প্রকাশযন্তি, তত্প্রকারত্রযমধিভূতাদিভেদেনাহ- স্বঃ স্ব ইত্যাদি| এষাং বুদ্ধ্যহঙ্কারশ্রোত্রাদিবুদ্ধীন্দ্রিযাণাং বাগাদিকর্মেন্দ্রিযাণাং মনসশ্চ স্বঃ স্ব আত্মীয আত্মীযো বিষযোঽধ্যবসেযোঽভিমন্তব্যঃ স্বকল্পনীযাদিলক্ষণোঽধিভূতম্; অধিভূতং ভূতেষ্বধি; ভূতানি মহাভূতানি প্রাণিনো বা| এতেন বুদ্ধ্যাদেরধ্যবসাযাদিব্যাপারসাধ্যোঽধ্যবসেযাদিবিষযো ভূতেষ্বিতি প্রতিপাদিতম্| কেচিত্ ‘স্বঃ স্ব এষাং বিষযোঽধিভূতসঞ্জ্ঞ’ ইতি ব্যাখ্যানযন্তি| স্বযমিত্যাদি এতানি বুদ্ধ্যাদীনি ত্রযোদশ স্বযমধ্যাত্মম্| আত্মন্যধি অধ্যাত্মম্; আত্মশব্দোঽত্র স্বশরীরবচনঃ, তেন স্বশরীরে বুদ্ধ্যাদিকমাত্মনঃ পরমাত্মপর্যাযস্য বা যোগ্যো বিষযোঽধ্যাত্মম্| অন্যে তু বুদ্ধ্যাদিকং স্বযমধ্যাত্মসঞ্জ্ঞমিতি ব্যাখ্যানযন্তি| অধিদৈবতমিতি দেবতানামধিকৃতত্বমধিদৈবতম্| তদেব বুদ্ধ্যাদিষু প্রকটীকরোতি- অথ বুদ্ধের্ব্রহ্মেত্যাদি| যা যা দেবতা বিশ্বরূপস্য বিষ্ণোরবযবাদুত্পন্না সা সা তস্যাবযবস্যাধিদৈবত্বমাপন্না বোদ্ধব্যা| অযং চাধিভূতাদিভাবো বেদান্তেঽপি বর্ণিতঃ| যথা- বুদ্ধিরধ্যাত্মং, বোদ্ধব্যমধিভূতং, ব্রহ্মাঽধিদৈবতম্; অহঙ্কারোঽধ্যাত্মম্, অহঙ্কর্তব্যমধিভূতং, রুদ্রোঽধিদৈবতং; মনোঽধ্যাত্মং, মন্তব্যমধিভূতং, চন্দ্রোঽধিদৈবতং; শ্রোত্রমধ্যাত্মং, শ্রোতব্যমধিভূতং, দিশোঽধিদৈবতং; ত্বগধ্যাত্মং, স্পর্শনীযমধিভূতং, বাযুরধিদৈবতং; চক্ষুরধ্যাত্মং, দৃশ্যমধিভূতং, সূর্যোঽধিদৈবতং; রসনাঽধ্যাত্মং, রসনীযমধিভূতং, বরুণোঽধিদৈবতং; ঘ্রাণমধ্যাত্মং, ঘ্রাতব্যমধিভূতং, ভূমিরধিদৈবতং; বাগধ্যাত্মং, বক্তব্যমধিভূতম্, অগ্নিরধিদৈবতং; হস্তাবধ্যাত্মম্, আদাতব্যমধিভূতম্, ইন্দ্রোঽধিদৈবতং; পাদাবধ্যাত্মং, গন্তব্যমধিভূতং, বিষ্ণুরধিদৈবতং; পাযুরধ্যাত্মং, বিসর্জনীযমধিভূতং, মিত্রোঽধিদৈবতং; উপস্থোঽধ্যাত্মম্, আনন্দনীযমধিভূতং, প্রজাপতিরধিদৈবতমিত্যাদি||৭||

Adhikarana 7 (8) · Śloka 8

তত্র সর্ব এবাচেতন এষ বর্গঃ, পুরুষঃ পঞ্চবিংশতিতমঃ কার্যকারণসংযুক্তশ্চেতযিতা ভবতি | সত্যপ্যচৈতন্যে প্রধানস্য পুরুষকৈবল্যার্থং প্রবৃত্তিমুপদিশন্তি, ক্ষীরাদীংশ্চাত্র হেতূনুদাহরন্তি ||৮||

তত্র সর্ব এবেত্যাদি| সর্ব এবৈষ বর্গোঽব্যক্তাদিকোঽচেতনঃ, কারণস্যাব্যক্তস্যাচেতনত্বেন তত্কার্যস্য মহদাদেরপ্যচেতনত্বাত্| পুরুষঃ পঞ্চবিংশতিতমঃ কার্যকারণসংযুক্ত ইতি কার্যেণ মহদাদিবিকারগণেন, কারণেন মূলপ্রকৃত্যা, সংযুক্তঃ সংযোগী| তস্য কৈবল্যার্থং(র্থাং) মোক্ষার্থং(র্থাং), প্রধানস্য মূলপ্রকৃতেঃ, প্রবৃত্তিমুপদিশন্ত্যাচার্যাঃ| কথমচেতনঃ প্রবর্তত ইত্যাহ- ক্ষীরাদীনিত্যাদি| যথা ক্ষীরমজ্ঞং বত্সবিবৃদ্ধ্যর্থং প্রবর্ততে| আদিশব্দাচ্চ যথৈকান্তে কমনীযকামিনীসুরতমহোত্সবে তত্সুখাতিশযোত্পাদনার্থমজ্ঞং রেতঃ প্রবর্ততে, তদ্বদিত্যর্থঃ||৮||

Adhikarana 8 (9) · Śloka 9

অত ঊর্ধ্বং প্রকৃতিপুরুষযোঃ সাধর্ম্যবৈধর্ম্যে ব্যাখ্যাস্যামঃ | তদ্যথা- উভাবপ্যনাদী, উভাবপ্যনন্তৌ, উভাবপ্যলিঙ্গৌ, উভাবপি নিত্যৌ, উভাবপ্যনপরৌ , উভৌ চ সর্বগতাবিতি; একা তু প্রকৃতিরচেতনা ত্রিগুণা বীজধর্মিণী প্রসবধর্মিণ্যমধ্যস্থধর্মিণী চেতি, বহবস্তু পুরুষাশ্চেতনাবন্তোঽগুণা অবীজধর্মাণোঽপ্রসবধর্মাণো মধ্যস্থধর্মাণশ্চেতি ||৯||

অত ইত্যাদি| প্রকৃতিরব্যক্তং, পুরুষ আত্মা| সাধর্ম্যং সমানো ধর্মঃ, বৈধর্ম্যং বিসদৃশো ধর্মঃ, তে ব্যাখ্যাস্যামঃ কথযিষ্যামঃ| উভাবপ্যলিঙ্গাবিতি ন বিদ্যতে লিঙ্গং যযোস্তাবলিঙ্গৌ| নিত্যাবিতি উভাবপি লযং ক্বচিদপি ন গচ্ছত ইত্যর্থঃ| ন বিদ্যতেঽপরো যাভ্যাং তাবনপরৌ , যতস্তাবেব প্রকৃতিপুরুষৌ মহদাদিভ্যঃ পরৌ| সর্বগতৌ সর্বং ব্যাপ্য স্থিতৌ| সাধর্ম্যমুক্ত্ত্বা বৈধর্ম্যমাহ- একেত্যাদি| তযোর্মধ্যে একা প্রকৃতিরব্যক্তাপরপর্যাযা| সা চ ত্রিগুণা সত্ত্বরজস্তমোগুণা| সত্ত্বরজস্তমসাং গুণানাং সাম্যাবস্থাযাং স্থিতা সর্বেষাং মহদাদিবিকারাণাং বীজভাবেনাবস্থিতা বীজধর্মিণীত্যুচ্যতে; গযী তু সংহারে ভূতেন্দ্রিযতন্মাত্রাহঙ্কারমহদাদীনামাধারভূতেতি বীজধর্মিণী| সৈব সিসৃক্ষুণা বিভুনা পুরুষেণ সার্ধং ক্ষোভমাগম্য সাম্যাবস্থাতঃ প্রচ্যুতা মহদহঙ্কারাদিক্রমেণ চরাচরস্য জগতঃ প্রসবিত্রীতি প্রসবধর্মিণীত্যুচ্যতে| অমধ্যস্থধর্মিণীতি সত্ত্বাদিগুণরাশিতযা সুখাদিরূপত্বাত্, সুখী হি সুখমভিলিপ্সন্ দুঃখী দুঃখং বিদ্বিষন্ অমধ্যস্থো ভবতি; প্রকৃতিশ্চ সত্ত্বাদিরূপা, ততোঽমধ্যস্থা| বহব ইতি যুগপন্মরণাসম্ভবাদনেকে পুরুষাঃ, ‘পুর্’শব্দেন মহদাদিকৃতং সূক্ষ্মং লিঙ্গশরীরমুচ্যতে, তচ্চ যোগিনামেব দৃশ্যং, তত্র পুরি শেতে ইতি পুরুষঃ| অগুণা ইতি অবিদ্যমানসত্ত্বাদিগুণাঃ| অবীজধর্মাণ ইতি মহদাদীনাং মহাপ্রলযে প্রকৃতাবিব তেষ্বনবস্থানাত্| মধ্যস্থধর্মাণ ইতি প্রীত্যপ্রীতিবিষাদাযোগেনেচ্ছাদ্বেষশূন্যত্বাত্| তদুক্তং সাঙ্খ্যে- “তস্মাত্তু বিপর্যাসাত্ সিদ্ধং সাক্ষিত্বমস্য পুরুষস্য| কৈবল্যং মাধ্যস্থ্যং দ্রষ্টৃত্বমকর্তৃভাবশ্চ”- (সাং. কা. ৯) ইতি||৯||-

Adhikarana 9 (10) · Śloka 10

তত্র কারণানুরূপং কার্যমিতি কৃত্বা সর্ব এবৈতে বিশেষাঃ সত্ত্বরজস্তমোমযা ভবন্তি; তদঞ্জনত্বাত্তন্মযত্বাচ্চ তদ্গুণা এব পুরুষা ভবন্তীত্যেকে ভাষন্তে ||১০||

ইদানীমুক্তমেব তদুপসংহরন্নাহ- তত্রেত্যাদি| কারণস্য প্রকৃতেরনুরূপং সদৃশং কার্যং মহদাদিকম্| বিশেষাঃ প্রকারা মহদাদিকাঃ| সংযুক্তস্য পঞ্চবিংশতিতমস্য পুরুষস্যাপি সত্ত্বাদিগুণত্বং দর্শযন্নাহ- তদঞ্জনত্বাদিত্যাদি| তেষাং সত্ত্বরজস্তমসামঞ্জনং লক্ষণং ব্যক্তির্বা যেষু তে তদঞ্জনাঃ পুরুষাঃ; সত্ত্বাদিলক্ষণা ইত্যর্থঃ, তেষাং ভাবস্তত্ত্বং, তস্মাত্| তদেব কুত ইত্যাহ- তন্মযত্বাদিতি|- সত্ত্বাদিমযত্বাত্| সত্ত্বাদিমযত্বং পুনঃ পুরুষাণাং সত্ত্বাদিরূপে মহদাদৌ প্রতিবিম্বনাত্; যথা- তডাগোদকে প্রতিবিম্বিতো বিধুস্তডাগোদকপ্রকম্পনেন প্রকম্পাত্মকঃ কথ্যতে, এবং সত্ত্বাদিরূপে মহদাদৌ প্রতিবিম্বিতাঃ পুরুষাঃ সত্ত্বাদিমযা ইব ভবন্তি, ন তু বাস্তবং সত্ত্বাদিমযত্বং; তাদৃশাচ্চ তন্মযত্বাত্তল্লক্ষণত্বেন তদ্গুণাঃ সুখিনো দুঃখিনো মূঢাশ্চ পুরুষা ভবন্তি| গযী তু তৈঃ সত্ত্বাদিভিরঞ্জনং ব্যক্তির্যস্য মহদাদেস্তত্তদঞ্জনং, তদস্যাস্তীতি মত্বর্থীযোঽকারপ্রত্যয ইতি; তত্সম্বন্ধাত্ পুরুষস্য সত্ত্বাদিভিরেবাঞ্জনং মহদাদীনাং; কুত ইত্যাহ- তন্মযত্বাত্; সত্ত্বাদিপ্রকৃতিকারণত্বাত্| তেষাং তদঞ্জনত্বং চ নির্বিকারস্যাপি বিকারিবস্তুসংযোগাত্ ; যথা সন্ধ্যারাগিরবিকরনিকরসংযোগাদরুণগগনতলোপলম্ভ ইতি| পূর্বোক্তস্য সর্বস্যাপ্যেকীযমতত্বং দর্শযন্নাহ- ইত্যেকে ইত্যাদি||১০||

Adhikarana 10 (11) · Śloka 11

বৈদ্যকে তু- স্বভাবমীশ্বরং কালং যদৃচ্ছাং নিযতিং তথা | পরিণামং চ মন্যন্তে প্রকৃতিং পৃথুদর্শিনঃ ||১১||

স্বমতং দর্শযন্নাহ- বৈদ্যকে ত্বিত্যাদি| অত্রৈকে স্বভাববাদিনঃ স্বভাবং সর্বস্য প্রকৃতিং কারণমূচুঃ; তথাহি- “কঃ কণ্টকানাং প্রকরোতি তৈক্ষ্ণ্যং, চিত্রং বিচিত্রং মৃগপক্ষিণাং চ| মাধুর্যমিক্ষৌ, কটুতাং মরীচে, স্বভাবতঃ সর্বমিদং প্রবৃত্তম্”- ইতি| ঈশ্বর এবোর্বী পর্বততর্বাদের্জন্তূনাং স্বর্গনরকাদেশ্চ কারণমিত্যন্যে| উক্তং চ- “অজ্ঞো জন্তুরনীশোঽযমাত্মনঃ সুখদুঃখযোঃ| ঈশ্বরপ্রেরিতো গচ্ছেত্ স্বর্গং নরকমেব বা” ইতি| কাল এব জগতঃ সৃষ্টিস্থিতিপ্রলযনিমিত্তমিতি কালকারণিকাঃ; উক্তং চ জ্যোতিঃশাস্ত্রবিদা শ্রীপতিনা- “প্রভববিরতিমধ্যজ্ঞানবন্ধ্যা নিতান্তং বিদিতপরমতত্ত্বা যত্র তে যোগিনোঽপি| তমহমিহ নিমিত্তং বিশ্বজন্মাত্যযানামনুমিতমভিবন্দে ভগ্রহৈঃ কালমীশম্”- ইতি| যো যতো ভবতি তত্তন্নিমিত্তমিতি যাদৃচ্ছিকাঃ; যথা- তৃণারণিনিমিত্তো বহ্নিরিতি| পূর্বজন্মার্জিতৌ ধর্মাধর্মৌ নিযতিঃ, সৈব সর্বস্য কারণমিতি নিযতিবাদিনঃ| প্রধানমেব মহদহঙ্কারাদিরূপতযা পরিণতং সর্বস্য নিমিত্তমিতি পরিণামবাদিনঃ| এতত্ সর্বমত্রানুমতং, সর্ববেদপারিষদত্বাদাযুর্বেদস্য| সুশ্রুতাচার্যেণাপি স্বভাবাদিভেদভিন্নাযাঃ ষড্বিধাযা অপি প্রকৃতেরুদাহরণান্যভিহিতানি| তত্র স্বভাবস্য তাবত্ কারণত্বমাহ- “অঙ্গপ্রত্যঙ্গনির্বৃত্তিঃ স্বভাবাদেব জাযতে” (শা.৩); পুনশ্চ “সন্নিবেশঃ শরীরাণাং দন্তানাং পতনোদ্ভবৌ| তলেষ্বসম্ভবো যশ্চ রোম্ণামেতত্ স্বভাবতঃ”- (শা.২) ইতি; পুনশ্চোক্তং- “ধাতুষু ক্ষীযমাণেষু বর্ধেতে দ্বাবিমৌ সদা| স্বভাবং প্রকৃতিং কৃত্বা নখকেশাবিতি স্থিতিঃ” (শা.৪) ইতি; পুনরপ্যাহ- “নিদ্রাহেতুস্তমঃ সত্ত্বং বোধনে হেতুরুচ্যতে| স্বভাব এব বা হেতুর্গরীযানপি কীর্ত্যতে”- (শা.৪) ইতি; অন্যত্রাপ্যুক্তং- “স্বভাবাল্লঘবো মুদ্গাস্তথা লাবকপিঞ্জলাঃ| স্বভাবাদ্গুরবো মাষা বরাহমহিষাদযঃ”- (চ.সূ.২৭) ইতি| ঈশ্বরোঽপি বহ্নিরূপো জীবিতাদেঃ কারণত্বেনোদাহৃতঃ; তথাহি- “জাঠরো ভগবানগ্নিরীশ্বরোঽন্নস্য পাচকঃ| সৌক্ষ্ম্যাদ্রসানাদদানো বিবেক্তুং নৈব শক্যতে”|| (সূ. ৩৫); “অগ্নিমূলং বলং পুংসাং বলমূলং হি জীবিতম্”- ইতি| কালস্তু শীতোষ্ণলক্ষণঃ; উক্তং চ- “মহাভূতবিশেষাংস্তু শীতোষ্ণদ্বযভেদতঃ| কাল ইত্যধ্যবস্যন্তি ন্যাযমার্গানুসারিণঃ- ” ইতি; অযং চ ঋতুচর্যাধ্যাযে দোষাণাং সঞ্চযপ্রকোপোপশমদ্বারেণ হেতুরুক্তঃ| যদৃচ্ছা পুনরলক্ষিত আকস্মিকপদার্থাবির্ভাবঃ, উক্তং চ “যদৃচ্ছযা চোপগতানি পাকং পাকক্রমেণোপচরেদ্বিধিজ্ঞঃ”- (চি.১৮) ইত্যাদি| নিযতিরত্রাপি ধর্মাধর্মৌ, তদ্ধেতুত্বমাহ- “ব্রহ্মস্ত্রীসজ্জনবধপরস্বহরণাদিভিঃ| কর্মভিঃ পাপরোগস্য প্রাহুঃ কুষ্ঠস্য সম্ভবম্” ||(নি.৫); “কর্মজা ব্যাধযঃ কেচিত্”- (উ.৪০) ইতি চোক্তম্| পরিণামস্য হেতুত্বমাহ- “জাঠরাগ্নেস্তু সংযোগাদ্যদুদেতি রসান্তরম্| রসানাং পরিণামান্তে স বিপাক ইতি স্মৃতঃ” ||(বা. সূ. ৯) ইতি; “তা এবৌষধ্যঃ কালপরিণামাত্ পরিণতবীর্যা বলবত্যো হেমন্তে ভবন্ত্যাপশ্চ” (সূ.৬); “সম্যক্ পরিণতস্যাহারস্য সারো রসঃ” (সূ.১৪); “এবং বালানামপি বযঃপরিণামাচ্ছুক্রপ্রাদুর্ভাবো ভবতি”- (সূ.১৪) ইতি| ইত্থমেতাঃ ষট্প্রকৃতযো বৈদ্যকানুগতা দর্শিতাঃ| ননু, স্বভাবাদযঃ ষট্ পদার্থাঃ প্রকৃতেরষ্টরূপাযাঃ পর্যাযাঃ স্যুরথবাঽন্যার্থাভিধাযিত্বেন ভিন্নার্থাঃ? তত্র ভিন্নার্থত্বেঽপি বিকল্পদ্বযং; কিমেতৈঃ স্বভাবাদিভির্ভিন্নার্থৈঃ কিঞ্চিত্ স্বভাবেন কিঞ্চিদীশ্বরেণেত্যেবম্প্রকারেণ মিলিত্বা জগদারভ্যতে? উতৈত্তে স্বভাবাদযঃ পৃথক্ পৃথগেব বিশ্বজননসমর্থাঃ? ইত্যনেকধা বিকল্পমুত্পাদ্য জেজ্ঝটাচার্যেণশ্বরং বিহায স্বভাবাদযঃ প্রকৃতেরষ্টরূপাযাঃ পর্যাযত্বেনাভিহিতাঃ| যত্তু বৈদ্যকে “স্বভাবমীশ্বরং কালম্”- ইত্যাদিবাক্যেন বিপুলদর্শিভিঃ স্বভাবাদীনাং ভিন্নমেব প্রকৃতিত্বং প্রতিপাদিতং, তত্তথাস্বরূপেণ তেষামবভাসনাত্| পরমার্থতস্তু গুণত্রযাত্মিকা প্রকৃতিরেব কারণম্| যতঃ স্বভাবাদযশ্চত্বারঃ প্রকৃতিপরিণামস্য ধর্মবিশেষতযা প্রকৃতাবেবান্তর্ভবন্তি| তথাহি- স্বভাবস্তাবত্ সত্ত্বরজস্তমসাং তদ্বিকারাণাং পৃথিব্যাদিমহাভূতানাং চ পরিণামস্য তাদৃশো বিশেষ ইতি প্রকৃতিপরিণামাদন্যো ন ভবতি; নিযতেরপি পূর্বকৃতসদসত্কর্মরূপাযা রজোগুণপরিণামলক্ষণত্বেন ন প্রকৃতেরন্যত্বং; কালোঽপি চন্দ্রার্কাদিগতিক্রিযালক্ষণঃ, তত্র চ মহাভূতানাং পরিণামবিশেষাচ্ছীতোষ্ণাদযো ভবন্তি, তদুক্তং- “মহাভূতবিশেষাংস্তু শীতোষ্ণদ্বযভেদতঃ| কাল ইত্যধ্যবস্যন্তি ন্যাযমার্গানুসারিণঃ”- ইতি, ক্রিযাত্বেন রজোগুণপরিণামত্বান্মহাভূতপরিণামবিশেষত্বাচ্চ ন কালস্য প্রকৃতেরন্যত্বম্; ঈশ্বরশ্চ পঞ্চবিংশতিতমঃ পুরুষঃ প্রকৃতেঃ ক্ষোভকতযা কারণত্বেনোদাহৃত এব; যদৃচ্ছা চ কাদাচিত্কত্বাদ্ভূতপরিণামবিশেষান্নান্যা| কিঞ্চাস্মিঞ্ শাস্ত্রে প্রকৃতিপরিণামাত্মকং বিশ্বং পঠ্যতে| তথাহি- “সাত্ত্বিকং কাযলক্ষণং, রাজসং কাযলক্ষণং” (শা.৪) তথা ‘সত্ত্ববহুলমাকাশং’ ইত্যাদি| গযী ত্বন্যথা ব্যাখ্যাতি; যথাবৈদ্যকে তু বিপুলদর্শিনঃ স্বভাবাদীনাং ষণ্ণাং প্রকৃতিত্বং প্রতিপাদযন্তি, তে চ স্বভাবাদযঃ সমুচ্চযেন জগদুত্পত্তৌ কারণভূতাঃ; তত্রাপি প্রকৃতিপরিণামস্যোপাদানকারণত্বং, স্বভাবাদীনাং চ পঞ্চানাং নিমিত্তকারণত্বমিতি||১১||

Adhikarana 11 (12-14) · Śloka 14

তন্মযান্যেব ভূতানি তদ্গুণান্যেব চাদিশেত্ | তৈশ্চ তল্লক্ষণঃ কৃত্স্নো ভূতগ্রামো ব্যজন্যত ||১২|| তস্যোপযোগোঽভিহিতশ্চিকিত্সাং প্রতি সর্বদা | ভূতেভ্যো হি পরং যস্মান্নাস্তি চিন্তা চিকিত্সিতে ||১৩|| যতোঽভিহিতং- “তত্সম্ভবদ্রব্যসমূহো ভূতাদিরুক্তঃ” (সূ.১); ভৌতিকানি চেন্দ্রিযাণ্যাযুর্বেদে বর্ণ্যন্তে, তথেন্দ্রিযার্থাঃ ||১৪||

একীযমতেন কারণানুরূপং কার্যমিত্যাদিবাক্যাত্ কারণমযত্বং কার্যস্য প্রতিপাদ্য স্বমতেঽপি কারণমযত্বং প্রতিপাদযন্নাহ- তন্মযানীত্যাদি| তন্মযানীতি অবকাশচলোষ্ণদ্রবখরস্বভাবাদিধর্মবিশেষাক্রান্তপ্রকৃতিপরিণামমযানি; ভূতান্যাকাশাদীনি; তদ্গুণান্যেবেতি সত্ত্বরজস্তমোগুণান্যেবেত্যর্থঃ, সত্ত্ববহুলমাকাশমিত্যাদ্যুক্তত্বাত্| গযী তু ‘ততো জাতানি ভূতানি’ ইতি পঠিত্বা ব্যাখ্যাতি- ততঃ স্বভাবাদেঃ, নিমিত্তকারণত্বাত্ প্রকৃতিপরিণামাচ্চোপাদানকারণানি ভূতান্যাকাশাদীনি তদ্গুণানি কারণগুণানি| তৈশ্চেত্যাদি| তৈরাকাশাদিভির্ভূতৈঃ, তল্লক্ষণো ভূতলক্ষণঃ, কৃত্স্নঃ সমস্তঃ, ভূতগ্রামঃ স্থাবরজঙ্গমাত্মকঃ, ব্যজন্যত বিবিধো জনিতঃ| ভূতানাং পৃথিব্যাদীনাং পুনর্লক্ষণং স্থিরগুরুকঠিনত্বমিত্যাদি, তল্লক্ষণশ্চ স্থাবরজঙ্গমাত্মকো ভূতগ্রামঃ| তস্য পঞ্চমহাভূতারব্ধস্য ভূতগ্রামস্য পরস্পরোপকার্যোপকারকত্বেন ব্যবস্থিতস্য, উপযোগঃ প্রযোজনম্, অভিহিতঃ কথিতঃ, চিকিত্সাং প্রতি রোগাপনযনং লক্ষীকৃত্য, সর্বদা নিত্যগে আবস্থিকে চ কালে| কুতঃ? যস্মাত্তেভ্যঃ পঞ্চমহাভূতারব্ধভূতগ্রাম্যেভ্যঃ পরং চিকিত্সিতে চিন্তা নাস্তি| তদুক্তমাদ্যেঽধ্যাযে, “তত্রাস্মিন্ পঞ্চমহাভূতশরীরিসমবাযঃ পুরুষ ইত্যুচ্যতে; তস্মিন্ ক্রিযা, সোঽধিষ্টানং, কস্মাত্? লোকদ্বৈবিধ্যাত্, লোকো হি দ্বিবিধঃ- স্থাবরো জঙ্গমশ্চ, তস্মিন্ পুরুষঃ প্রধানং, তস্যোপকরণমন্যত্”- (সূ.১) ইতি| তেন পঞ্চমহাভূতারব্ধস্যৈব ভূতগ্রামস্য চিকিত্সোপকরণত্বম্| অতো ভূতেভ্যঃ পরং যদব্যক্তাদি তত্র চিন্তাঽপি নাস্তি| অযমেবার্থোঽন্যত্রাপিনির্দিষ্ট ইতি দর্শযন্নাহ- যত ইত্যাদি| এতত্সূত্রং বীজাধ্যাযে ব্যাখ্যাতম্, অত্রাপি কিঞ্চিচ্ছিষ্যবোধার্থং ব্যাখ্যাযতে- যতস্তস্য পুরুষস্য সম্ভবদ্রব্যাণি শুক্রশোণিতাদীনি তেষাং সমূহঃ সংযোগবিশেষঃ, কথম্ভূতঃ? ভূতাদিঃ ভূতং পৃথিব্যাদিকমাদির্মূলকারণং যস্য স তথা| ন পরং পুরুষসম্ভবদ্রব্যস্য ভূতাদিত্বাভিধানাদ্ভূতেভ্যঃ পরং চিন্তা নাস্তি, কিন্ত্বেতস্মাদপীত্যাশঙ্ক্যাহ- ভৌতিকানি চেত্যাদি| ইন্দ্রিযাণি শ্রবণস্পর্শনরসনঘ্রাণানি ভৌতিকানি| তথা চোক্তং পঞ্চভূতাত্মকত্বেঽপি- “খং শ্রোত্রে স্পর্শনে বাযুর্দর্শনে তেজ উত্কটম্| সলিলং রসনে ভূমির্ঘ্রাণে তজ্জ্ঞৈর্নিরূপিতম্”- ইতি| ইন্দ্রিযাণামর্থাঃ শব্দস্পর্শরূপরসগন্ধাঃ, তে চাযুর্বেদশাস্ত্রে তথা ভৌতিকা ইত্যর্থঃ| উক্তং চ- “শব্দো বৈহাযসঃ, স্পর্শো বাযবীযঃ প্রকীর্তিতঃ| রূপমাগ্নেযমাপ্যোঽত্র রসো, গন্ধস্তু পার্থিবঃ” ইতি||১২-১৪||

Adhikarana 12 (15) · Śloka 15

ভবতি চাত্র- ইন্দ্রিযেণেন্দ্রিযার্থং তু স্বং স্বং গৃহ্ণাতি মানবঃ | নিযতং তুল্যযোনিত্বান্নান্যেনান্যমিতি স্থিতিঃ ||১৫||

ইন্দ্রিযাণামিন্দ্রিযার্থানাং চ পাঞ্চভৌতিকত্বেঽপি যস্য ভূতস্য যত্র যত্রেন্দ্রিযে আধিক্যং তেন তেনেন্দ্রিযেণ তস্য তস্যৈব গুণাঃ শব্দাদযো গৃহ্যন্ত ইতি দর্শযিতুমাহ- ইন্দ্রিযেণেত্যাদি| ইন্দ্রিযেণ চক্ষুরাদিনা রূপাদিকমাত্মীযমাত্মীযং মানব উপাদত্তে; তদ্যথা- তৈজসং চক্ষুস্তৈজসমেব রূপমাদত্তে, পার্থিবং ঘ্রাণেন্দ্রিযং পার্থিবমেব গন্ধমাদত্তে, এবং শেষেষ্বপি বোদ্ধব্যম্| নিযতমাত্মীযমেব কুত ইত্যাহ- তুল্যযোনিত্বাদিতি; একভূতহেতুত্বাত্, ভূতং হি স্বযোনিমেবাভিধাবতি জলমিব জলম্| তমেব স্পষ্টীকুর্বন্নাহ- নান্যেনান্যমিতি||১৫||

Adhikarana 13 (16) · Śloka 16

ন চাযুর্বেদশাস্ত্রেষূপদিশ্যন্তে সর্বগতাঃ ক্ষেত্রজ্ঞা নিত্যাশ্চ; অসর্বগতেষু চ ক্ষেত্রজ্ঞেষু নিত্যপুরুষখ্যাপকান্ হেতূনুদাহরন্তি; আযুর্বেদশাস্ত্রেষ্বসর্বগতাঃ ক্ষেত্রজ্ঞা নিত্যাশ্চ, তির্যগ্যোনিমানুষদেবেষু সঞ্চরন্তি ধর্মাধর্মনিমিত্তং; ত এতেঽনুমানগ্রাহ্যাঃ পরমসূক্ষ্মাশ্চেতনাবন্তঃ শাশ্বতা লোহিতরেতসোঃ সন্নিপাতেষ্বভিব্যজ্যন্তে, যতোঽভিহিতং- ‘পঞ্চমহাভূতশরীরিসমবাযঃ পুরুষঃ’ (সূ.১) ইতি; স এষ কর্মপুরুষশ্চিকিত্সাধিকৃতঃ ||১৬||

অপরমপি সাঙ্খ্যাদিভ্যো ভেদমাযুর্বেদস্যাত্মনি দর্শযন্নাহ- ন চেত্যাদি| কিং তর্হ্যাযুর্বেদশাস্ত্রেষ্বসর্বগতাঃ পুরুষা উপদিশ্যন্তে সত্ত্বোপাধিবশাত্; সাঙ্খ্যাদিষু পুনঃ সর্বগতা এব ক্ষেত্রজ্ঞা উপদিশ্যন্তে| এবমাযুর্বেদপুরুষস্য প্রদেশবর্তিনোঽপি নিত্যত্বং স্যাদিত্যাহ- নিত্যাশ্চ; ‘উপদিশ্যন্তে’ ইতি শেষঃ| নিত্যত্বং চ কথমিত্যাহ- অসর্বগতেষ্বিত্যাদি| হেতূনিতি সদকারণবন্নিত্যমিত্যাদীন্| তথাহি- সন্নাত্মা, সুখাদিলিঙ্গোপলম্ভাত্; অবিষযোঽকারণশ্চ, অতো নিত্যঃ| তথাহি ভোজঃ- “শুভাশুভাভ্যাং কর্মভ্যাং প্রেরণান্মনসো গতেঃ| দেহাদ্দেহান্তরং যাতি ক্রিমিবচ্ছাশ্বতোঽব্যযঃ|| নিত্য ইত্যুচ্যতে সদ্ভিঃ সন্নকারণবান্ যতঃ”- ইতি| তদেবোপসংহরন্নাহ- আযুর্বেদেত্যাদি| অসর্বগতত্বেঽপি সর্বযোনিগমনং নির্দিশন্নাহ- তির্যগিত্যাদি| তত্র বহুশঃ সংসরণে তির্যগ্যোনীনাং প্রকৃষ্টত্বম্, অতস্তেষাং প্রাগুপাদানং; ততো মনুষ্যনির্দেশঃ; দেবাস্তু কদাচিত্ ক্বচিত্ সম্ভবন্তীতি পশ্চান্নির্দিষ্টাঃ| তত্র প্রাযেণাধর্মনিমিত্তং তির্যগ্যোনযঃ, ধর্মাধর্মনিমিত্তং মনুষ্যাঃ, ধর্মনিমিত্তং দেবাঃ| ননু, কথমপ্রত্যক্ষা অপ্যাত্মানোঽভ্যুপগম্যন্ত ইত্যাহ- ত এতেঽনুমানগ্রাহ্যা ইতি| সুখদুঃখাদ্যুপলব্ধিরূপেণ লিঙ্গেনাব্যভিচারিণৈতে আত্মান উপলব্ধারোঽনুমাতব্যাঃ | প্রত্যক্ষপ্রমাণেনাপি ক্ষেত্রজ্ঞাঃ কথং ন গৃহ্যন্তে? ইত্যাহ- পরমসূক্ষ্মা ইতি|- পরমসূক্ষ্মা হি পরমাণব ইব সন্তোঽপি তে প্রত্যক্ষেণ নৈবোপলভ্যন্তে| চেতনাবন্ত ইতি নিত্যং চেতনাযুক্তাঃ| শাশ্বতা ইতি নিত্যাঃ| কথং তর্হি জাযন্ত ইত্যুচ্যত ইত্যাহ- লোহিতরেতসোরিত্যাদি| আত্মানঃ পরমসূক্ষ্মাঃ পঞ্চভূতাত্মকযোঃ শুক্রশোণিতযোঃ সন্নিপাতেষু সংযোগেষ্বভিব্যজ্যন্তে| এষ এব চ সূক্ষ্মপুরুষাণাং পঞ্চমহাভূতানাং চ সংযোগো বৈদ্যকে ষড্ধাতুকঃ পুরুষঃ পরিভাষিতঃ| কুতঃ পরিভাষিত ইত্যাশঙ্ক্যাদ্যাধ্যাযোক্তং বাক্যং দর্শযতি- যত ইত্যাদি| তস্য চিকিত্সোপযোগিতাং নিদর্শযন্নাহ- স ইত্যাদি| কর্মপুরুষ ইতি কর্মফলভাগিত্যর্থঃ | তেন চিকিত্সিতকর্মফলমপ্যবাপ্নোতীত্যুক্তং ভবতি||১৬||

Adhikarana 14 (17) · Śloka 17

তস্য সুখদুঃখে ইচ্ছাদ্বেষৌ প্রযত্নঃ প্রাণাপানাবুন্মেষনিমেষৌ বুদ্ধির্মনঃ সঙ্কল্পো বিচারণা স্মৃতির্বিজ্ঞানমধ্যবসাযো বিষযোপলব্ধিশ্চ গুণাঃ ||১৭||

ইদানীং তস্যৈব কর্মপুরুষস্য শরীরাত্মনোঃ সংযোগকারকেণ মনসা সংযোগে যে গুণা উত্পদ্যন্তে তানাহ- তস্যেত্যাদি| তত্র সুখং স্বভাবতোঽনুকূলবেদনীযং; দুঃখং স্বভাবতঃ প্রতিকূলবেদনীযম্; ইচ্ছা অভিলাষঃ; দ্বেষোঽপ্রীতিলক্ষণঃ; প্রযত্নঃ কার্যারম্ভে উত্সাহঃ; প্রাণো বাযুর্বক্ত্রসঞ্চারী, অপানঃ পক্বাশযস্থিতিরধোগমনশীলঃ; উন্মেষনিমেষৌ চক্ষুষোরুন্মীলননিমীলনে; বুদ্ধির্নিশ্চযাত্মিকা; মনঃ সংশযাত্মকং, তস্য সঙ্কল্পো মনসঃ কর্ম; বিচারণা পুনরূহাপোহাভ্যাং বস্তুবিমর্শঃ; স্মৃতিঃ পূর্বানুভূতস্যার্থস্য স্মরণং; বিজ্ঞানং শিল্পশাস্ত্রাদিবোধঃ; অধ্যবসাযো বুদ্ধের্ব্যাপারঃ; বিষযাণাং শব্দাদীনামুপলব্ধিরবগতির্বিষযোপলব্ধিঃ| গযী তু সুখং প্রীতিঃ, দুঃখমপ্রীতিঃ, ইচ্ছা সুখহেতুরভিলাষঃ, দ্বেষো দুঃখহেতুর্মনঃপ্রতীঘাতঃ , প্রযত্নো মনঃ প্রবৃত্তিকর উত্সাহঃ, মনঃ সঙ্কলপাত্মকলক্ষণং, তস্য সঙ্কল্পো বিষযেষু দোষগুণকল্পনং; শেষং সমম্| এতে কর্মপুরুষস্য ষোডশ গুণাঃ| অত এব ‘কলা’ ইত্যুচ্যন্তে||১৭||

Adhikarana 15 (18) · Śloka 18

সাত্ত্বিকাস্তু- আনৃশংস্যং সংবিভাগরুচিতা তিতিক্ষা সত্যং ধর্ম আস্তিক্যং জ্ঞানং বুদ্ধির্মেধা স্মৃতির্ধৃতিরনভিষঙ্গশ্চ; রাজসাস্তু- দুঃখবহুলতাঽটনশীলতাঽধৃতিরহঙ্কার আনৃতিকত্বমকারুণ্যং দম্ভো মানো হর্ষঃ কামঃ ক্রোধশ্চ; তামসাস্তু- বিষাদিত্বং নাস্তিক্যমধর্মশীলতা বুদ্ধের্নিরোধোঽজ্ঞানং দুর্মেধস্ত্বমকর্মশীলতা নিদ্রালুত্বং চেতি ||১৮||

পুরুষগুণানভিধায শেষান্ সত্ত্বাদিযুক্তস্য মনসো গুণান্নির্দিশন্নাহ- সাত্ত্বিকা ইত্যাদি| আনৃশংস্যম্ অক্রূরকর্মকারিত্বম্| সংবিভাগরুচিতা সংবিভজ্য ভোক্তুমভিলাষুকতা| তিতিক্ষা ক্ষমা| সত্যং ভূতহিতং তথ্যং বচো বা| ধর্মঃ কাযবাঙ্মনোভিঃ সুচরিতম্| অস্তি ধর্মমোক্ষপরলোকাদিকমিতি বুদ্ধ্যা চরতীত্যাস্তিকঃ, তদ্ভাব আস্তিক্যম্| জ্ঞানম্ আত্মজ্ঞানম্| বুদ্ধিঃ তত্কালবিষযা| মেধা গ্রন্থাবধারণশক্তিঃ| ধৃতির্মনসো নিযমাত্মিকা বুদ্ধিঃ| পূর্বানুভূতস্যার্থস্য স্মরণং স্মৃতিঃ| ফলনিরপেক্ষযা বুদ্ধ্যা শ্রেযঃকর্মকরণমনভিষঙ্গঃ| রাজসাস্ত্বিত্যাদি| অধৃতির্মনসোঽধীরতা| আনৃতিকত্বং মিথ্যাবচনশীলতা; গযী তু ‘আবৃত্তিকত্বং’ ইতি পঠিত্বা মনসঃ শীলতেত্যাহ | অকারুণ্যং নির্দযত্বম্| দম্ভঃ কুহকবৃত্তিতা| মান আত্মন্যুত্কর্ষবুদ্ধিঃ| অহঙ্কারাদযঃ পূর্বং ব্যাখ্যাতাঃ| গযী তু ‘অটনশীলতা’ ইত্যত্র ‘তাডনশীলতা’ ইতি পঠতি, ‘মান’ ইত্যত্র ‘মদ’ ইতি পঠতি| তামসাস্ত্বিত্যাদি| বিষাদোঽস্যাস্তীতি বিষাদী, তদ্ভাবো বিষাদিত্বং মূঢতা| অধর্মে শীলং স্বভাবো যস্য তদ্ভাবোঽধর্মশীলত্বম্| দুর্মেধস্ত্বং দুষ্টবুদ্ধিত্বম্| অকর্মশীলতা কর্মণ্যনুত্সাহঃ||১৮||

Adhikarana 16 (19) · Śloka 19

আন্তরিক্ষাঃ- শব্দঃ শব্দেন্দ্রিযং সর্বচ্ছিদ্রসমূহো বিবিক্ততা চ; বাযব্যাস্তু- স্পর্শঃ স্পর্শেন্দ্রিযং সর্বচেষ্টাসমূহঃ সর্বশরীরস্পন্দনং লঘুতা চ; তৈজসাস্তু- রূপং রূপেন্দ্রিযং বর্ণঃ সন্তাপো ভ্রাজিষ্ণুতা পক্তিরমর্ষস্তৈক্ষ্ণ্যং শৌর্যং চ; আপ্যাস্তু- রসো রসনেন্দ্রিযং সর্বদ্রবসমূহো গুরুতা শৈত্যং স্নেহো রেতশ্চ; পার্থিবাস্তু- গন্ধো গন্ধেন্দ্রিযং সর্বমূর্তসমূহো গুরুতা চেতি ||১৯||

মহাভূতগুণান্নির্দিশন্নাহ- আন্তরিক্ষা ইত্যাদি| আন্তরিক্ষা আকাশভূতগুণাঃ| শব্দেন্দ্রিযং শ্রবণেন্দ্রিযম্| বিবিক্ততা শারীরাণাং ভাবানাং সিরাস্নায্বস্থিপেশীপ্রভৃতীনাং জাতিব্যক্তিভ্যাং মিথঃ পৃথক্ত্বং; গযী তু ‘বিবিক্ততা’ ইত্যস্য স্থানে ‘বিরিক্ততা’ ইতি পঠতি ব্যাখ্যানযতি চ- বিরিক্ততা শারীরাণাং ভাবানাং রিক্ততা| বাযব্যা ইত্যাদি| স্পর্শেন্দ্রিযং ত্বক্| সর্বচেষ্টাসমূহো নমনোন্নমনাদিসর্বক্রিযাসমূহঃ, কাযবাঙ্মনঃ ক্রিযাসমূহ ইত্যন্যে| স্পন্দনং চলনম্| তৈজসাস্ত্বিত্যাদি| রূপং লাবণ্যম্| রূপেন্দ্রিযং চক্ষুঃ| বর্ণো গৌরাদিঃ| সন্তাপ ঔষ্ণ্যম্| ভ্রাজিষ্ণুতা দীপ্ততা| পক্তিঃ অগ্নিকৃতাঽঽহারপরিণতিঃ| অমর্ষঃ ক্রোধঃ| তৈক্ষ্ণ্যম্ আশুক্রিযা| শৌর্যং বিক্রান্ততা| আপ্যাস্ত্বিত্যাদি| সর্বদ্রবসমূহঃ দোষধাতুমলেষু দ্রুতিমদ্দ্রব্যনিবহঃ | পার্থিবাস্ত্বিত্যাদি| সর্বমূর্তসমূহ দোষধাতুমলেষু যঃ কশ্চিত্ কাঠিন্যনিবহঃ||১৯||

Adhikarana 17 (20) · Śloka 20

তত্র সত্ত্ববহুলমাকাশং, রজোবহুলো বাযুঃ, সত্ত্বরজোবহুলোঽগ্নিঃ, সত্ত্বতমোবহুলা আপঃ, তমোবহুলা পৃথিবীতি ||২০||

অথাকাশাদিভূতানাং সত্ত্বাদিগুণমযত্বং দর্শযন্নাহ- তত্রেত্যাদি| সত্ত্ববহুলমাকাশং প্রকাশকত্বাত্, রজোবহুলো বাযুশ্চলত্বাত্, সত্ত্বরজোবহুলোঽগ্নিঃ প্রকাশকত্বাচ্চলত্বাচ্চ, সত্ত্বতমোবহুলা আপঃ স্বচ্ছত্বাত্ প্রকাশকত্বাদ্গুরুত্বাদাবরণত্বাচ্চ, তমোবহুলা পৃথিবী অত্যন্তাবরকত্বাত্||২০||

Adhikarana 18 (21) · Śloka 21

শ্লোকৌ চাত্র ভবতঃ- অন্যোঽন্যানুপ্রবিষ্টানি সর্বাণ্যেতানি নির্দিশেত্ | স্বে স্বে দ্রব্যে তু সর্বেষাং ব্যক্তং লক্ষণমিষ্যতে ||২১||

অন্যোঽন্যেত্যাদি| তত্র শব্দগুণমাকাশং মারুতে প্রবিষ্টং শব্দস্পর্শগুণত্বান্মারুতস্য; আকাশমারুতৌ তেজসি প্রবিষ্টৌ, শব্দস্পর্শরূপগুণত্বাত্তেজসঃ; আকাশমরুত্তেজাংসি তোযদ্রব্যে প্রবিষ্টানি, শব্দস্পর্শরূপরসগুণত্বাত্তোযস্য; আকাশমরুত্তেজস্তোযানি পৃথিব্যামনুপ্রবিষ্টানি, শব্দস্পর্শরূপরসগন্ধগুণত্বাত্ পৃথিব্যাঃ| এবং ব্যোমানিলানলজলোর্বীণাং পরস্পরমনুপ্রবেশকানুপ্রবেশ্যত্বেনাবস্থিতানামন্যোন্যানুপ্রবিষ্টত্বমুক্তম্| অন্যে পুনরন্যোঽন্যানুপ্রবিষ্টত্বমন্যথা ব্যাচক্ষতে- তত্রাকাশেঽপি ভূমিরণুরূপেণাবস্থিতা, সূক্ষ্মরূপতোযতেজোঽনুগতমারুতস্য সঞ্চরণাদাকাশে পবনদহনতোযান্যপি বোদ্ধব্যানি| তথা বাযাবপ্যাকাশং ব্যবস্থিতং ব্যাপকত্বাত্, “অনুষ্ণশীতস্পর্শোঽযং দ্রব্যজ্ঞৈর্বাযুরিষ্যতে| দাহকৃত্তেজসা যুক্তঃ শীতকৃত্ সোমসংশ্রযাত্”- ইত্যুক্তত্বাদ্বাযৌ তেজোঽম্বুনী অপি তিষ্ঠতঃ, ভূরপ্যণুনা বিশেষেণ মারুতে তিষ্ঠতি| তথা তেজোদ্রব্যেঽপ্যাকাশং ব্যবস্থিতং ব্যাপকত্বাত্, পবনোঽপি প্রেরণাত্মকত্বাত্; তেজোদ্রব্যে পানীযমপ্যনুমীযতে কার্যকারণোরৈক্যাত্, কারণং তোযং কার্যং চ তেজঃ, অদ্ভ্যোঽগ্নিরিত্যুক্তত্বাত্; ভূমিরপি ধূমাদিরূপেণ তেজসি ব্যবস্থিতা| অথ তোযদ্রব্যেঽপ্যাকাশং ব্যবস্থিতং, ব্যাপকত্বাত্; বাযুরপি তোযে ব্যবস্থিতঃ, তরঙ্গবুদ্বুদাদিকারণত্বাত্; বহ্নিরপি তোযে ব্যবস্থিতঃ, তত এবোত্পন্নত্বাত্, উক্তং চ- “অদ্ভ্যোঽগ্নির্ব্রহ্মতঃ ক্ষত্রমশ্মনো লোহমুত্থিতম্| এষাং সর্বত্রগং তেজঃ স্বাসু যোনিষু শাম্যতি” ইতি; ভূমিরপি তোযেঽণুরূপেণাবস্থিতা| তথা পৃথিব্যামপ্যাকাশপবনদহনতোযানি স্থিতান্যেব, ভূমিপ্রবিভাগীযে পঞ্চবিধাযা ভূমেঃ প্রোক্তত্বাত্| ইত্থমাকাশাদিভূতানামন্যোন্যানুপ্রবিষ্টত্বমাহুঃ| ব্যক্তেন তু লক্ষণেন পার্থিবাদিব্যপদেশং দর্শযন্নাহ- স্বে স্বে ইত্যাদি| স্বে স্বে স্বকীযে স্বকীযে দ্রব্যে, সর্বেষামাকাশাদীনাং, ব্যক্তং লক্ষণমিতি আকাশদ্রব্যে তল্লক্ষণং ব্যক্তমিত্যাদি বোদ্ধব্যম্||২১||

Adhikarana 19 (22) · Śloka 22

অষ্টৌ প্রকৃতযঃ প্রোক্তা বিকারাঃ ষোডশৈব তু | ক্ষেত্রজ্ঞশ্চ সমাসেন স্বতন্ত্রপরতন্ত্রযোঃ ||২২||

অষ্টাবিত্যাদি| অষ্টৌ প্রকৃতযঃ- অব্যক্তং মহানহঙ্কারঃ পঞ্চতন্মাত্রাণীত্যষ্টৌ| বিকারাঃ ষোডশৈবেতি শ্রোত্রত্বক্চক্ষুর্জিহ্বাঘ্রাণবাগ্ঘস্তোপস্থপাযুপাদমনাংসীত্যেবমেকাদশেন্দ্রিযাণি, আকাশপবনদহনতোযভূময ইতি পঞ্চভূতানীত্যেবং ষোডশ বিকারাঃ| ক্ষেত্রং স্থূলসূক্ষ্মদেহং জানাতীতি ক্ষেত্রজ্ঞঃ পুরুষঃ| সমাসেন সঙ্ক্ষেপেণ| এবং পঞ্চবিংশতিতত্ত্বান্যুক্তানি| স্বতন্ত্রে শল্যতন্ত্রে, পরতন্ত্রে শালাক্যতন্ত্রে সাঙ্খ্যে চ||২২||

Adhikarana puShpikA · Śloka 1

ইতি সুশ্রুতসংহিতাযাং শারীরস্থানে সর্বভূতচিন্তাশারীরং নাম প্রথমোঽধ্যাযঃ ||১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানে প্রথমোঽধ্যাযঃ||১||