Adhikarana 1 (1-2) · Śloka 2
অথাতঃ সিরাবর্ণবিভক্তিশারীরং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
View original
अथातः सिरावर्णविभक्तिशारीरं व्याख्यास्यामः ||१||
यथोवाच भगवान् धन्वन्तरिः ||२||
“মর্মসিরাস্নাযুসন্ধ্যস্থিধমনীঃ পরিহরন্” (সূ.৫) ইত্যাদৌ মর্মানন্তরং সিরাণাং নির্দেশাত্ প্রত্যেকমর্মনির্দেশশারীরানন্তরং সিরাবর্ণবিভাগশারীরারম্ভো যুজ্যত ইত্যাহ- অথেত্যাদি| বিভক্তির্বিভাগঃ সমুদাযাত্ পৃথক্করণমিত্যর্থঃ| সিরাণাং বাতাদিবহানাং তদ্বর্ণানাং চারুণনীলশুক্ললোহিতানাং বিভক্তির্যস্মিন্ শারীরে তত্তথাবিধম্||১-২||
Adhikarana 2 (3) · Śloka 3
সপ্ত সিরাশতানি ভবন্তি; যাভিরিদং শরীরমারাম ইব জলহারিণীভিঃ কেদার ইব চ কুল্যাভিরুপস্নিহ্যতেঽনুগৃহ্যতে চাকুঞ্চনপ্রসারণাদিভির্বিশেষৈঃ; দ্রুমপত্রসেবনীনামিব তাসাং প্রতানাঃ; তাসাং নাভির্মূলং, ততশ্চ প্রসরন্ত্যূর্ধ্বমধস্তির্যক্ চ ||৩||
View original
सप्त सिराशतानि भवन्ति; याभिरिदं शरीरमाराम इव जलहारिणीभिः केदार इव च कुल्याभिरुपस्निह्यतेऽनुगृह्यते चाकुञ्चनप्रसारणादिभिर्विशेषैः; द्रुमपत्रसेवनीनामिव तासां प्रतानाः; तासां नाभिर्मूलं, ततश्च प्रसरन्त्यूर्ध्वमधस्तिर्यक् च ||३||
তাসামণুশোঽপরিসঙ্খ্যাতানামপি ভূযস্ত্বাশ্রযাং সমুদাযসঙ্খ্যাং নির্দিশন্নাহ- সপ্তেত্যাদি| তাসাং সর্বাসামপি সামান্যং কর্ম নির্দিশন্নাহ- যাভিরিত্যাদি| যাভিঃ সিরাভিঃ| আরামো নানাবৃক্ষসমুদাযবিশেষঃ| জলহারিণীভিঃ প্রণালীভিঃ, কুল্যাভিঃ কৃত্রিমাল্পসরিদ্ভিঃ; এতদ্দৃষ্টান্তদ্বযং স্থূলসূক্ষ্মসিরাপ্রাপণার্থম্| উপস্নিহ্যতে পুষ্টিং নীযতে তরুণানাং শরীরং, বৃদ্ধানাং শরীরপরিণামাত্তেনোপস্নেহেন শরীরং যাপ্যতে; উক্তং চ- “স এবান্নরসো বৃদ্ধানাং জরাপরিপক্বশরীরত্বাদপ্রীণনো ভবতি” (সূ.১৪) ইতি| অনুগৃহ্যতে পরিপাল্যতে| আকুঞ্চনাদিভিরিত্যত্রাদিশব্দাদ্ভাষণস্বপ্নাববোধাদযো গৃহ্যন্তে| সিরাণাং সূক্ষ্মবিশেষপ্রদর্শনায দৃষ্টান্তমাহ- দ্রুমেত্যাদি| প্রতানা বিস্তারাঃ| তত ইতি নাভিত ইত্যর্থঃ||৩||
Adhikarana 3 (4) · Śloka 4
ভবতশ্চাত্র শ্লোকৌ- যাবত্যস্তু সিরাঃ কাযে সম্ভবন্তি শরীরিণাম্ |
নাভ্যাং সর্বা নিবদ্ধাস্তাঃ প্রতন্বন্তি সমন্ততঃ ||৪||
View original
भवतश्चात्र श्लोकौ- यावत्यस्तु सिराः काये सम्भवन्ति शरीरिणाम् |
नाभ्यां सर्वा निबद्धास्ताः प्रतन्वन्ति समन्ततः ||४||
প্রতন্বন্তি ঊর্ধ্বমধস্তির্যক্ চ কাযে ইতি সম্বধ্যতে||৪||
Adhikarana 4 (5) · Śloka 5
নাভিস্থাঃ প্রাণিনাং প্রাণাঃ প্রাণান্নাভির্ব্যুপাশ্রিতা |
সিরাভিরাবৃতা নাভিশ্চক্রনাভিরিবারকৈঃ ||৫||
View original
नाभिस्थाः प्राणिनां प्राणाः प्राणान्नाभिर्व्युपाश्रिता |
सिराभिरावृता नाभिश्चक्रनाभिरिवारकैः ||५||
ইদানীং সিরাণাং প্রাণানাং চাধারাধেযত্বং প্রতিপাদযন্নাহ- নাভিস্থা ইত্যাদি| নাভিস্থা ইত্যনেন নাভ্যাবরকাসু সিরাস্ববস্থিতাঃ| প্রাণা ইতি সিরাণাং প্রাণাধারত্বং প্রতিপাদিতম্||৫||
Adhikarana 5 (6) · Śloka 6
তাসাং মূলসিরাশ্চত্বারিংশত্; তাসাং বাতবাহিন্যো দশ, পিত্তবাহিন্যো দশ, কফবাহিন্যো দশ, দশ রক্তবাহিন্যঃ |
তাসাং তু বাতবাহিনীনাং বাতস্থানগতানাং পঞ্চসপ্ততিশতং ভবতি, তাবত্য এব পিত্তবাহিন্যঃ পিত্তস্থানে, কফবাহিন্যশ্চ কফস্থানে, রক্তবাহিন্যশ্চ যকৃত্প্লীহ্নোঃ; এবমেতানি সপ্ত সিরাশতানি ||৬||
View original
तासां मूलसिराश्चत्वारिंशत्; तासां वातवाहिन्यो दश, पित्तवाहिन्यो दश, कफवाहिन्यो दश, दश रक्तवाहिन्यः |
तासां तु वातवाहिनीनां वातस्थानगतानां पञ्चसप्ततिशतं भवति, तावत्य एव पित्तवाहिन्यः पित्तस्थाने, कफवाहिन्यश्च कफस्थाने, रक्तवाहिन्यश्च यकृत्प्लीह्नोः; एवमेतानि सप्त सिराशतानि ||६||
ইদানীং সিরাপিণ্ডমভিধায বিভজন্নাহ- তাসামিত্যাদি||৬||
Adhikarana 6 (7) · Śloka 7
তত্র বাতবাহিন্যঃ সিরা একস্মিন্ সক্থ্নি পঞ্চবিংশতিঃ; এতেনেতরসক্থি বাহূ চ ব্যাখ্যাতৌ |
বিশেষতস্তু কোষ্ঠে চতুস্ত্রিংশত্; তাসাং গুদমেঢ্রাশ্রিতাঃ শ্রোণ্যামষ্টৌ, দ্বে দ্বে পার্শ্বযোঃ, ষট্ পৃষ্ঠে, তাবত্য এবোদরে, দশ বক্ষসি |
একচত্বারিংশজ্জত্রুণ ঊর্ধ্বং; তাসাং চতুর্দশ গ্রীবাযাং, কর্ণযোশ্চতস্রঃ, নব জিহ্বাযাং, ষণ্ নাসিকাযাং, অষ্টৌ নেত্রযোঃ, এবমেতত্ পঞ্চসপ্ততিশতং বাতবাহিনীনাং সিরাণাং ব্যাখ্যাতং ভবতি |
এষ এব বিভাগঃ শেষাণামপি |
বিশেষতস্তু পিত্তবাহিন্যো নেত্রযোর্দশ, কর্ণযোর্দ্বে; এবং রক্তবহাঃ কফবহাশ্চ |
এবমেতানি সপ্ত সিরাশতানি সবিভাগানি ব্যাখ্যাতানি ||৭||
View original
तत्र वातवाहिन्यः सिरा एकस्मिन् सक्थ्नि पञ्चविंशतिः; एतेनेतरसक्थि बाहू च व्याख्यातौ |
विशेषतस्तु कोष्ठे चतुस्त्रिंशत्; तासां गुदमेढ्राश्रिताः श्रोण्यामष्टौ, द्वे द्वे पार्श्वयोः, षट् पृष्ठे, तावत्य एवोदरे, दश वक्षसि |
एकचत्वारिंशज्जत्रुण ऊर्ध्वं; तासां चतुर्दश ग्रीवायां, कर्णयोश्चतस्रः, नव जिह्वायां, षण् नासिकायां, अष्टौ नेत्रयोः, एवमेतत् पञ्चसप्ततिशतं वातवाहिनीनां सिराणां व्याख्यातं भवति |
एष एव विभागः शेषाणामपि |
विशेषतस्तु पित्तवाहिन्यो नेत्रयोर्दश, कर्णयोर्द्वे; एवं रक्तवहाः कफवहाश्च |
एवमेतानि सप्त सिराशतानि सविभागानि व्याख्यातानि ||७||
বাতাদিবহাঃ সিরাঃ সামান্যতঃ সঙ্খ্যযাঽভিধায প্রত্যঙ্গবিভাগেন তা এব প্রতিপাদযিতুমাহ- তত্র বাতবাহিন্য ইত্যাদি| কোষ্ঠে চতুস্ত্রিংশদিতি যাঃ প্রতিপাদিতাস্তাসাং বিবরণমাহ- তাসামিত্যাদি| একচত্বারিংশজ্জত্রুণ ঊর্ধ্বমিত্যুদ্দিষ্টানাং বিবরণমাহ- তাসাং চতুর্দশেত্যাদি| পঞ্চসপ্ততিশতমিতি পঞ্চসপ্তত্যধিকং শতমিত্যর্থঃ| এষ ইত্যাদি| এষ এব বিভাগঃ পূর্বোক্তো বাতবাহিসিরাবিভাগ ইত্যর্থঃ| শেষাণামিতি পিত্তশ্লেষ্মরক্তবহানামিত্যর্থঃ| এতেন পিত্তাদিবাহিনীনামপি সিরাণাং প্রত্যেকং পঞ্চসপ্তত্যধিকং শতং ভবতীত্যুক্তম্| উপসংহারমাহ- এবমিত্যাদি||৭||
Adhikarana 7 (8-15) · Śloka 15
ভবন্তি চাত্র- ক্রিযাণামপ্রতীঘাতমমোহং বুদ্ধিকর্মণাম্ |
করোত্যন্যান্ গুণাংশ্চাপি স্বাঃ সিরাঃ পবনশ্চরন্ ||৮||
যদা তু কুপিতো বাযুঃ স্বাঃ সিরাঃ প্রতিপদ্যতে |
তদাঽস্য বিবিধা রোগা জাযন্তে বাতসম্ভবাঃ ||৯||
ভ্রাজিষ্ণুতামন্নরুচিমগ্নিদীপ্তিমরোগতাম্ |
সংসর্পত্ স্বাঃ সিরাঃ পিত্তং কুর্যাচ্চান্যান্ গুণানপি ||১০||
যদা প্রকুপিতং পিত্তং সেবতে স্ববহাঃ সিরাঃ |
তদাঽস্য বিবিধা রোগা জাযন্তে পিত্তসম্ভবাঃ ||১১||
স্নেহমঙ্গেষু সন্ধীনাং স্থৈর্যং বলমুদীর্ণতাম্ |
করোত্যন্যান্ গুণাংশ্চাপি বলাসঃ স্বাঃ সিরাশ্চরন্ ||১২||
যদা তু কুপিতঃ শ্লেষ্মা স্বাঃ সিরাঃ প্রতিপদ্যতে |
তদাঽস্য বিবিধা রোগা জাযন্তে শ্লেষ্মসম্ভবাঃ ||১৩||
ধাতূনাং পূরণং বর্ণং স্পর্শজ্ঞানমসংশযম্ |
স্বাঃ সিরাঃ সঞ্চরদ্রক্তং কুর্যাচ্চান্যান্ গুণানপি ||১৪||
যদা তু কুপিতং রক্তং সেবতে স্ববহাঃ সিরাঃ |
তদাঽস্য বিবিধা রোগা জাযন্তে রক্তসম্ভবাঃ ||১৫||
View original
भवन्ति चात्र- क्रियाणामप्रतीघातममोहं बुद्धिकर्मणाम् |
करोत्यन्यान् गुणांश्चापि स्वाः सिराः पवनश्चरन् ||८||
यदा तु कुपितो वायुः स्वाः सिराः प्रतिपद्यते |
तदाऽस्य विविधा रोगा जायन्ते वातसम्भवाः ||९||
भ्राजिष्णुतामन्नरुचिमग्निदीप्तिमरोगताम् |
संसर्पत् स्वाः सिराः पित्तं कुर्याच्चान्यान् गुणानपि ||१०||
यदा प्रकुपितं पित्तं सेवते स्ववहाः सिराः |
तदाऽस्य विविधा रोगा जायन्ते पित्तसम्भवाः ||११||
स्नेहमङ्गेषु सन्धीनां स्थैर्यं बलमुदीर्णताम् |
करोत्यन्यान् गुणांश्चापि बलासः स्वाः सिराश्चरन् ||१२||
यदा तु कुपितः श्लेष्मा स्वाः सिराः प्रतिपद्यते |
तदाऽस्य विविधा रोगा जायन्ते श्लेष्मसम्भवाः ||१३||
धातूनां पूरणं वर्णं स्पर्शज्ञानमसंशयम् |
स्वाः सिराः सञ्चरद्रक्तं कुर्याच्चान्यान् गुणानपि ||१४||
यदा तु कुपितं रक्तं सेवते स्ववहाः सिराः |
तदाऽस्य विविधा रोगा जायन्ते रक्तसम्भवाः ||१५||
ইদানীং বাতাদিবহসিরাসু বাতাদীনাং প্রকৃতিভূতানাং প্রাকৃতং কর্ম বিকৃতিভূতানাং বৈকৃতং চ কর্ম নির্দিশন্নাহ- ক্রিযাণামিত্যাদি| ক্রিযাণাং কাযক্রিযাণাং প্রসারণাকুঞ্চনাদীনাং, বাক্ক্রিযাণাং ভাষিতাদীনাম্| অপ্রতীঘাতম্ অপ্রতিহননম্| বুদ্ধিকর্মণামিতি পঞ্চানাং বুদ্ধীন্দ্রিযাণাং, মনসো বুদ্ধেশ্চ স্বে স্বে বিষযে প্রাকৃতাযাং প্রবৃত্তৌ মোহস্যাভাবং করোতি| অন্যান্ গুণান্ “তত্র প্রস্পন্দনোদ্বহনপূরণ” (সূ.১৫) ইত্যাদিকান্| ভ্রাজিষ্ণুতাং দীপ্তিমত্ত্বম্| সংসর্পত্ গচ্ছত্| অন্যান্ গুণান্ “রাগপক্ত্যোজ” (সূ.১৫) ইত্যাদিকান্| যদেত্যাদি| অন্যান্ গুণান্ সন্ধিশ্লেষণাদিকান্| যদা ত্বিত্যাদি| অন্যান্ গুণান্ “রক্তং বর্ণপ্রসাদং” (সূ.১৫) ইত্যাদ্যুক্তান্||৮-১৫||
Adhikarana 8 (16) · Śloka 16
ন হি বাতং সিরাঃ কাশ্চিন্ন পিত্তং কেবলং তথা |
শ্লেষ্মাণং বা বহন্ত্যেতা অতঃ সর্ববহাঃ স্মৃতাঃ ||১৬||
View original
न हि वातं सिराः काश्चिन्न पित्तं केवलं तथा |
श्लेष्माणं वा वहन्त्येता अतः सर्ववहाः स्मृताः ||१६||
প্রাকৃতবাতাদিবহানামপি সিরাণাং সর্বত্র সর্বকার্যোপলম্ভাত্ সর্ববহত্বং দর্শযন্নাহ- ন হি বাতমিত্যাদি||১৬||
Adhikarana 9 (17) · Śloka 17
প্রদুষ্টানাং হি দোষাণাং মূর্চ্ছিতানাং প্রধাবতাম্ |
ধ্রুবমুন্মার্গগমনমতঃ সর্ববহাঃ স্মৃতাঃ ||১৭||
View original
प्रदुष्टानां हि दोषाणां मूर्च्छितानां प्रधावताम् |
ध्रुवमुन्मार्गगमनमतः सर्ववहाः स्मृताः ||१७||
ইদানীং প্রকুপিতবাতাদিবহানামপি সিরাণাং সর্ববহত্বং দর্শযন্নাহ- প্রদুষ্টানামিত্যাদি| মূর্চ্ছিতানামিতি পরস্পরং মিশ্রিতানামিত্যর্থঃ||১৭||
Adhikarana 10 (18) · Śloka 18
তত্রারুণা বাতবহাঃ পূর্যন্তে বাযুনা সিরাঃ |
পিত্তাদুষ্ণাশ্চ নীলাশ্চ, শীতা গৌর্যঃ স্থিরাঃ কফাত্ অসৃগ্বহাস্তু রোহিণ্যঃ সিরা নাত্যুষ্ণশীতলাঃ ||১৮||
View original
तत्रारुणा वातवहाः पूर्यन्ते वायुना सिराः |
पित्तादुष्णाश्च नीलाश्च, शीता गौर्यः स्थिराः कफात् असृग्वहास्तु रोहिण्यः सिरा नात्युष्णशीतलाः ||१८||
সিরাবিভক্তিং প্রতিপাদ্য তদ্বর্ণবিভক্তিং প্রতিপাদযন্নাহ- তত্রেত্যাদি||১৮||
Adhikarana 11 (19-21) · Śloka 21
অত ঊর্ধ্বং প্রবক্ষ্যামি ন বিধ্যেদ্যাঃ সিরা ভিষক্ |
বৈকল্যং মরণং চাপি ব্যধাত্তাসাং ধ্রুবং ভবেত্ ||১৯||
সিরাশতানি চত্বারি বিদ্যাচ্ছাখাসু বুদ্ধিমান্ |
ষট্ত্রিংশচ্চ শতং কোষ্ঠে চতুঃষষ্টং চ মূর্ধনি ||২০||
শাখাসু ষোডশ সিরাঃ কোষ্ঠে দ্বাত্রিংশদেব তু |
পঞ্চাশজ্জত্রুণশ্চোর্ধ্বমব্যধ্যাঃ পরিকীর্তিতাঃ ||২১||
View original
अत ऊर्ध्वं प्रवक्ष्यामि न विध्येद्याः सिरा भिषक् |
वैकल्यं मरणं चापि व्यधात्तासां ध्रुवं भवेत् ||१९||
सिराशतानि चत्वारि विद्याच्छाखासु बुद्धिमान् |
षट्त्रिंशच्च शतं कोष्ठे चतुःषष्टं च मूर्धनि ||२०||
शाखासु षोडश सिराः कोष्ठे द्वात्रिंशदेव तु |
पञ्चाशज्जत्रुणश्चोर्ध्वमव्यध्याः परिकीर्तिताः ||२१||
তত্র ব্যধ্যাব্যধ্যবিভাগজ্ঞানায পূর্বোক্তানি সপ্তসিরাশতানি ষডঙ্গেষ্বনূদ্য প্রতিজ্ঞাতা অব্যধ্যাঃ সিরাঃ প্রাহ- সিরাশতানীত্যাদি| সিরাশতানি চত্বারীতি একৈকশাখাগতবাতাদিবহানাং সিরাণাং পঞ্চবিংশত্যা চত্বারি শতানি ভবন্তি| চতুঃষষ্টং চেতি শতমিত্যত্রাপি যোজনীযং, তেন চতুঃষষ্ট্যধিকং শতং মূর্ধনি জ্ঞাতব্যম্||১৯-২১||
Adhikarana 12 (22) · Śloka 22
তত্র সিরাশতমেকস্মিন্ সক্থ্নি ভবতি; তাসাং জালধরা ত্বেকা, তিস্রশ্চাভ্যন্তরাঃ- তত্রোর্বীসঞ্জ্ঞে দ্বে, লোহিতাক্ষসঞ্জ্ঞা চৈকা, তাস্ত্বব্যধ্যাঃ; এতেনেতরসক্থি বাহূ চ ব্যাখ্যাতৌ; এবমশস্ত্রকৃত্যাঃ ষোডশ শাখাসু |
দ্বাত্রিংশচ্ছ্রোণ্যাং, তাসামষ্টাবশস্ত্রকৃত্যাঃ- দ্বে দ্বে বিটপযোঃ , কটীকতরুণযোশ্চ; অষ্টাবষ্টাবেকৈকস্মিন্ পার্শ্বে, তাসামেকৈকামূর্ধ্বগাং পরিহরেত্, পার্শ্বসন্ধিগতে চ দ্বে; চতস্রো বিংশতিশ্চ পৃষ্ঠে পৃষ্ঠবংশমুভযতঃ, তাসামূর্ধ্বগামিন্যৌ দ্বে দ্বে পরিহরেদ্বৃহতীসিরে; তাবত্য এবোদরে, তাসাং মেঢ্রোপরি রোমরাজীমুভযতো দ্বে দ্বে পরিহরেত্; চত্বারিংশদ্বক্ষসি, তাসাং চতুর্দশাশস্ত্রকৃত্যাঃ- হৃদযে দ্বে, দ্বে দ্বে স্তনমূলে, স্তনরোহিতাপলাপস্তম্ভেষূভযতোঽষ্টৌ; এবং দ্বাত্রিংশদশস্ত্রকৃত্যাঃ পৃষ্ঠোদরোরঃসু ভবন্তি |
চতুঃষষ্টং সিরাশতং জত্রুণ ঊর্ধ্বং ভবতি; তত্র ষট্পঞ্চাশচ্ছিরোধরাযাং , তাসামষ্টৌ চতস্রশ্চ মর্মসঞ্জ্ঞাঃ পরিহরেত্, দ্বে কৃকাটিকযোঃ, দ্বে বিধুরযোঃ, এবং গ্রীবাযাং ষোডশাব্যধ্যাঃ; হন্বোরুভযতোঽষ্টাবষ্টৌ, তাসাং তু সন্ধিধমন্যৌ দ্বে দ্বে পরিহরেত্; ষট্ত্রিংশজ্জিহ্বাযাং, তাসামধঃ ষোডশাশস্ত্রকৃত্যাঃ, রসবহে দ্বে, বাগ্বহে চ দ্বে; দ্বির্দ্বাদশ নাসাযাং, তাসামৌপনাসিক্যশ্চতস্রঃ পরিহরেত্, তাসামেব চ তালুন্যেকাং মৃদাবুদ্দেশে; অষ্টত্রিংশদুভযোর্নেত্রযোঃ , তাসামেকৈকামপাঙ্গযোঃ পরিহরেত্; কর্ণযোর্দশ, তাসাং শব্দবাহিনীমেকৈকাং পরিহরেত্; নাসানেত্রগতাস্তু ললাটে ষষ্টিঃ, তাসাং কেশান্তানুগতাশ্চতস্র, আবর্তযোরেকৈকা, স্থপন্যাং চৈকা পরিহর্তব্যা; শঙ্খযোর্দশ, তাসাং শঙ্খসন্ধিগতামেকৈকাং পরিহরেত্; দ্বাদশ মূর্ধ্নি, তাসামুত্ক্ষেপযোর্দ্বে পরিহরেত্, সীমন্তেষ্বেকৈকাম্, একামধিপতাবিতি; এবমশস্ত্রকৃত্যাঃ পঞ্চাশজ্জত্রুণ ঊর্ধ্বমিতি ||২২||
View original
तत्र सिराशतमेकस्मिन् सक्थ्नि भवति; तासां जालधरा त्वेका, तिस्रश्चाभ्यन्तराः- तत्रोर्वीसञ्ज्ञे द्वे, लोहिताक्षसञ्ज्ञा चैका, तास्त्वव्यध्याः; एतेनेतरसक्थि बाहू च व्याख्यातौ; एवमशस्त्रकृत्याः षोडश शाखासु |
द्वात्रिंशच्छ्रोण्यां, तासामष्टावशस्त्रकृत्याः- द्वे द्वे विटपयोः , कटीकतरुणयोश्च; अष्टावष्टावेकैकस्मिन् पार्श्वे, तासामेकैकामूर्ध्वगां परिहरेत्, पार्श्वसन्धिगते च द्वे; चतस्रो विंशतिश्च पृष्ठे पृष्ठवंशमुभयतः, तासामूर्ध्वगामिन्यौ द्वे द्वे परिहरेद्बृहतीसिरे; तावत्य एवोदरे, तासां मेढ्रोपरि रोमराजीमुभयतो द्वे द्वे परिहरेत्; चत्वारिंशद्वक्षसि, तासां चतुर्दशाशस्त्रकृत्याः- हृदये द्वे, द्वे द्वे स्तनमूले, स्तनरोहितापलापस्तम्भेषूभयतोऽष्टौ; एवं द्वात्रिंशदशस्त्रकृत्याः पृष्ठोदरोरःसु भवन्ति |
चतुःषष्टं सिराशतं जत्रुण ऊर्ध्वं भवति; तत्र षट्पञ्चाशच्छिरोधरायां , तासामष्टौ चतस्रश्च मर्मसञ्ज्ञाः परिहरेत्, द्वे कृकाटिकयोः, द्वे विधुरयोः, एवं ग्रीवायां षोडशाव्यध्याः; हन्वोरुभयतोऽष्टावष्टौ, तासां तु सन्धिधमन्यौ द्वे द्वे परिहरेत्; षट्त्रिंशज्जिह्वायां, तासामधः षोडशाशस्त्रकृत्याः, रसवहे द्वे, वाग्वहे च द्वे; द्विर्द्वादश नासायां, तासामौपनासिक्यश्चतस्रः परिहरेत्, तासामेव च तालुन्येकां मृदावुद्देशे; अष्टत्रिंशदुभयोर्नेत्रयोः , तासामेकैकामपाङ्गयोः परिहरेत्; कर्णयोर्दश, तासां शब्दवाहिनीमेकैकां परिहरेत्; नासानेत्रगतास्तु ललाटे षष्टिः, तासां केशान्तानुगताश्चतस्र, आवर्तयोरेकैका, स्थपन्यां चैका परिहर्तव्या; शङ्खयोर्दश, तासां शङ्खसन्धिगतामेकैकां परिहरेत्; द्वादश मूर्ध्नि, तासामुत्क्षेपयोर्द्वे परिहरेत्, सीमन्तेष्वेकैकाम्, एकामधिपताविति; एवमशस्त्रकृत्याः पञ्चाशज्जत्रुण ऊर्ध्वमिति ||२२||
কাস্তা অব্যধ্যাঃ? ইত্যাহ- তত্র সিরাশতমিত্যাদি| জালধরা ইতি জালানীব জালানি মাংসসিরাস্নায্বস্থিসন্ধিজানি কূর্চশিরোব্যাপীনি তানি ধারযন্তি যাস্তা জালধরা ইত্যর্থঃ| কাস্তাস্তিস্রোঽভ্যন্তরা ইত্যাহ- তত্রোর্বীসঞ্জ্ঞে দ্বে ইত্যাদি| দ্বে অপি তে উর্বীসঞ্জ্ঞে অতিসান্নিধ্যাত্ প্রাঙ্মর্মবিভাগীযে শারীরে উর্বীসঞ্জ্ঞৈকমর্মতযা নির্দিষ্টে| কটীকতরুণযোশ্চেতি অত্রাপি দ্বে দ্বে ইতি সম্বন্ধঃ| পার্শ্বসন্ধিগতে দ্বে ইতি জঘনপার্শ্বমধ্যযোর্যে পার্শ্বসন্ধিসঞ্জ্ঞকে মর্মণী তত্সঞ্জ্ঞাং প্রাপ্তে দ্বে| চতস্র ইত্যাদি| পৃষ্ঠগতচতুর্বিংশতিসিরাসু মধ্যে দ্বে দ্বে বৃহতীসিরে পরিহরেদিত্যর্থঃ| তাবত্য ইতি চতুর্বিংশতিরিত্যর্থঃ| চত্বারিংশদিত্যাদি| উভযতোঽষ্টাবিতি উভযত্রেত্যর্থে উভযত ইতি স্তনমূলাদিষু যোজনীযং, তেনোভযত্র স্তনমূলে বামদক্ষিণাশ্রিতে দ্বে দ্বে ইতি চতস্রঃ| তথোভযত্র স্তনরোহিতাপলাপস্তম্ভেষ্বষ্টৌ; তত্র স্তনরোহিতযোর্দ্বে দ্বে, অপলাপযোরেকৈকা, অপস্তম্ভযোরপ্যেকৈকা, এবমষ্টাবিত্যর্থঃ| উপসংহারমাহ- এবমিত্যাদি| পৃষ্ঠোদরোরঃস্বিত্যত্র পৃষ্ঠশব্দেন শ্রোণিপার্শ্বানামপি গ্রহণং; তেন শ্রোণিগতা অষ্টৌ, পার্শ্বগতা একৈকা, চতস্রঃ পৃষ্ঠে, চতস্র উদরে, চতুর্দশ বক্ষসি, এবং দ্বাত্রিংশদব্যধ্যাঃ| চতুঃষষ্টমিত্যাদি| চতুঃষষ্টং সিরাশতমিতি চতুঃষষ্ট্যধিকং সিরাশতমিত্যর্থঃ| তত্রেতি চতুঃষষ্ট্যধিকসিরাশতমধ্যে| অষ্টৌ চতস্রশ্চ মর্মসঞ্জ্ঞা ইতি তত্রাষ্টৌ মাতৃকাঃ, দ্বে নীলে, দ্বে চ মন্যে, এতা দ্বাদশ মর্মসঞ্জ্ঞা ইত্যর্থঃ; তথা দ্বে কৃকাটিকযোঃ, দ্বে বিধুরযোঃ, এবং গ্রীবাযাং ষোডশাব্যধ্যাঃ| গযী তু বাতাদিবহানাং চতুর্ভিরষ্টকৈদ্বাত্রিংশদ্গ্রীবাযাং, তত্র ষোডশাব্যধ্যা ইতি প্রতিপাদযতি| সন্ধিধমন্যাবিতি হনুসন্ধিধমন্যাবিত্যর্থঃ| হন্বোঃ ষোডশ সিরা গ্রীবাসিরাস্বেবান্তর্ভবন্তীত্যতো ন পৃথগ্গণনীযাঃ| গযী তু “হনুগতাঃ পৃথগেব ষোডশ, তত্র দ্বে সন্ধিবন্ধনকর্মণী পরিহরেত্” ইত্যাহ| ষট্ত্রিংশদিত্যাদি| তাসামধঃ ষোডশেতি তাসাং জিহ্বাগতষট্ত্রিংশত্সিরাণাং মধ্যেঽধোজিহ্বাযাঃ ষোডশসিরা ভবন্তি, শেষা বিংশতিশ্চ জিহ্বাযা ঊর্ধ্বং ভবন্তি| অশস্ত্রকৃত্যা রসবহে বাগ্বহে চেতি রসবহে দ্বে, বাগ্বহে চ দ্বে| গযী তু “অষ্টাবিংশতির্জিহ্বাযাং, তাসু রসবাহিন্যঃ ষডশস্ত্রকৃত্যাঃ” ইতি ব্রূতে| দ্বির্দ্বাদশেতি চতুর্বিংশতিরিত্যর্থঃ| ঔপনাসিক্যঃ নাসাসমীপবর্তিন্যঃ| মৃদাবুদ্দেশে ইতি ঘণ্টাসমীপে ইত্যর্থঃ| গযী তু “ষোডশ নাসাযাং, তাসু পঞ্চাব্যধ্যা” ইত্যাহ| অষ্টত্রিংশদিতি গযী তু “চতুর্বিংশতিরুভযোর্নেত্রযোঃ; তাসামেকৈকামপাঙ্গযোঃ পরিহরেত্” ইত্যাচষ্টে| কর্ণযোরিত্যাদি গযী তু “কর্ণযোঃ ষোডশ, তাসামেকৈকাং শব্দবহাং পরিহরেত্” ইতি ব্রূতে| নাসানেত্রেত্যাদি যাশ্চতুর্বিংশতির্নাসাগতা যাশ্চ ষট্ত্রিংশন্নেত্রগতাস্তা এব ষষ্টির্ললাটে জ্ঞাতব্যাঃ, অতো ন পৃথগ্গণনীযাঃ | কেশান্তানুগতা ইতি আবর্তমর্মসমীপকেশান্তানুগতা ইত্যর্থঃ| গযী তু “ললাটস্থিতাভিঃ সিরাভিঃ সহ নাসানেত্রগতাঃ সিরা ললাটে ষষ্টিঃ, তাসু সপ্তাব্যধ্যাঃ” ইতি ব্রূতে| শঙ্খযোরিত্যাদি| শঙ্খযোর্দশেতি এতা অপি নাসানেত্রগতা বোদ্ধব্যাঃ, অতো ন পৃথগ্গণনীযাঃ| গযী তু শঙ্খযোরষ্টৌ পৃথগেব পঠতি; তাসু দ্বে শঙ্খসন্ধিগতে অব্যধ্যে, ইতি প্রতিপাদযতি| দ্বাদশ মূর্ধ্নীত্যাদি| সীমন্তেষু পঞ্চস্বেকৈকাং পরিহরেত্, তথাঽধিপতাবেকাং পরিহরেত্, এতাসামপি নাসানেত্রগতত্বাত্ পৃথগ্গণনা ন কর্তব্যা| গযী তু মূর্ধ্নি পৃথগেব দ্বাদশ পঠিত্বা তাস্বষ্টাবব্যধ্যা ইত্যাহ||২২||
Adhikarana 13 (23) · Śloka 23
ভবতি চাত্র- ব্যাপ্নুবন্ত্যভিতো দেহং নাভিতঃ প্রসৃতাঃ সিরাঃ |
প্রতানাঃ পদ্মিনীকন্দাদ্বিসাদীনাং যথা জলম্ ||২৩||
View original
भवति चात्र- व्याप्नुवन्त्यभितो देहं नाभितः प्रसृताः सिराः |
प्रतानाः पद्मिनीकन्दाद्बिसादीनां यथा जलम् ||२३||
ইদানীং সর্বত্র সিরাসম্ভবত্বেন ব্যাখ্যাতসঙ্খ্যাব্যভিচারোঽস্তীতি দর্শযন্নাহ- ব্যাপ্নুবন্তীত্যাদি| যথা বিসাদীনাং প্রতানা বিস্তারা পদ্মিনীকন্দাত্ প্রসৃতা জলং ব্যাপ্নুবন্তি, তথা নাভিতঃ প্রসৃতাঃ সিরাঃ সর্বতঃ শরীরং ব্যাপ্নুবন্তি||২৩||
Adhikarana puShpikA · Śloka 7
ইতি সুশ্রুতসংহিতাযাং শারীরস্থানে সিরাবর্ণবিভক্তিশারীরং নাম সপ্তমোঽধ্যাযঃ ||৭||
View original
इति सुश्रुतसंहितायां शारीरस्थाने सिरावर्णविभक्तिशारीरं नाम सप्तमोऽध्यायः ||७||
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানে সপ্তমোঽধ্যাযঃ||৭||