Adhikarana 1 (1-2) · Śloka 2
ಅಥಾತೋಽಧ್ಯಯನಸಮ್ಪ್ರದಾನೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||
अथातोऽध्ययनसम्प्रदानीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
ಅಥಾತ ಇತ್ಯಾದಿ| ಅಧೀಯತ ಇತ್ಯಧ್ಯಯನಂ ಶಾಸ್ತ್ರಮ್| ಸಮ್ಯಕ್ ಪ್ರವಿಭಜ್ಯ ದಾನಂ ಸಮ್ಪ್ರದಾನಮ್||೧-೨||
Adhikarana 2 (3) · Śloka 3
ಪ್ರಾಗಭಿಹಿತಂ ಸವಿಂಶಮಧ್ಯಾಯಶತಂ ಪಞ್ಚಸು ಸ್ಥಾನೇಷು | ತತ್ರ ಸೂತ್ರಸ್ಥಾನಮಧ್ಯಾಯಾಃ ಷಟ್ಚತ್ವಾರಿಂಶತ್, ಷೋಡಶ ನಿದಾನಾನಿ, ದಶ ಶಾರೀರಾಣಿ, ಚತ್ವಾರಿಂಶಚ್ಚಿಕಿತ್ಸಿತಾನಿ, ಅಷ್ಟೌ ಕಲ್ಪಾಃ, ತದುತ್ತರಂ ಷಟ್ಷಷ್ಟಿಃ ||೩||
प्रागभिहितं सविंशमध्यायशतं पञ्चसु स्थानेषु | तत्र सूत्रस्थानमध्यायाः षट्चत्वारिंशत्, षोडश निदानानि, दश शारीराणि, चत्वारिंशच्चिकित्सितानि, अष्टौ कल्पाः, तदुत्तरं षट्षष्टिः ||३||
🔊 Audio coming soon
ಅವಿಭಕ್ತಮಧ್ಯಯನಂ ದಾತುಮಶಕ್ಯಮ್, ಅತಸ್ತದ್ವಿಭಾಗಾಯಾಹ- ಪ್ರಾಗಿತ್ಯಾದಿ| ಅಸ್ಯ ಚ ವಾಕ್ಯಸ್ಯಾರ್ಥ ಆದ್ಯಾಧ್ಯಾಯೇ ಉಕ್ತಃ| ಪ್ರತಿಸ್ಥಾನಮಧ್ಯಾಯಾನ್ ಸಙ್ಖ್ಯಾತುಮಾಹ- ತತ್ರೇತ್ಯಾದಿ||೩||
Adhikarana 3 (4-12) · Śloka 12
ವೇದೋತ್ಪತ್ತಿಃ ಶಿಷ್ಯನಯಸ್ತಥಾಽಧ್ಯಯನದಾನಿಕಃ | ಪ್ರಭಾಷಣಾಗ್ರಹರಣಾವೃತುಚರ್ಯಾಽಥ ಯಾನ್ತ್ರಿಕಃ ||೪|| ಶಸ್ತ್ರಾವಚಾರಣಂ ಯೋಗ್ಯಾ ವಿಶಿಖಾ ಕ್ಷಾರಕಲ್ಪನಮ್ | ಅಗ್ನಿಕರ್ಮ ಜಲೌಕಾಖ್ಯೋ ಹ್ಯಧ್ಯಾಯೋ ರಕ್ತವರ್ಣನಮ್ ||೫|| ದೋಷಧಾತುಮಲಾದ್ಯಾನಾಂ ವಿಜ್ಞಾನಾಧ್ಯಾಯ ಏವ ಚ | ಕರ್ಣವ್ಯಧಾಮಪಕ್ವೈಷಾವಾಲೇಪೋ ವ್ರಣ್ಯುಪಾಸನಮ್ ||೬|| ಹಿತಾಹಿತೋ ವ್ರಣಪ್ರಶ್ನೋ ವ್ರಣಾಸ್ರಾವಶ್ಚ ಯಃ ಪೃಥಕ್ | ಕೃತ್ಯಾಕೃತ್ಯವಿಧಿರ್ವ್ಯಾಧಿಸಮುದ್ದೇಶೀಯ ಏವ ಚ ||೭|| ವಿನಿಶ್ಚಯಃ ಶಸ್ತ್ರವಿಧೌ ಪ್ರನಷ್ಟಜ್ಞಾನಿಕಸ್ತಥಾ | ಶಲ್ಯೋದ್ಧೃತಿರ್ವ್ರಣಜ್ಞಾನಂ ದೂತಸ್ವಪ್ನನಿದರ್ಶನಮ್ ||೮|| ಪಞ್ಚೇನ್ದ್ರಿಯಂ ತಥಾ ಛಾಯಾ ಸ್ವಭಾವಾದ್ವೈಕೃತಂ ತಥಾ | ಅವಾರಣೋ ಯುಕ್ತಸೇನೀಯ ಆತುರಕ್ರಮಭೂಮಿಕೌ ||೯|| ಮಿಶ್ರಕಾಖ್ಯೋ ದ್ರವ್ಯಗಣಃ ಸಂಶುದ್ಧೌ ಶಮನೇ ಚ ಯಃ | ದ್ರವ್ಯಾದೀನಾಂ ಚ ವಿಜ್ಞಾನಂ ವಿಶೇಷೋ ದ್ರವ್ಯಗೋಽಪರಃ ||೧೦|| ರಸಜ್ಞಾನಂ ವಮನಾರ್ಥಮಧ್ಯಾಯೋ ರೇಚನಾಯ ಚ | ದ್ರವದ್ರವ್ಯವಿಧಿಸ್ತದ್ವದನ್ನಪಾನವಿಧಿಸ್ತಥಾ ||೧೧|| ಸೂಚನಾತ್ ಸೂತ್ರಣಾಚ್ಚೈವ ಸವನಾಚ್ಚಾರ್ಥಸನ್ತತೇಃ | ಷಟ್ಚತ್ವಾರಿಂಶದಧ್ಯಾಯಂ ಸೂತ್ರಸ್ಥಾನಂ ಪ್ರಚಕ್ಷತೇ ||೧೨||
वेदोत्पत्तिः शिष्यनयस्तथाऽध्ययनदानिकः | प्रभाषणाग्रहरणावृतुचर्याऽथ यान्त्रिकः ||४|| शस्त्रावचारणं योग्या विशिखा क्षारकल्पनम् | अग्निकर्म जलौकाख्यो ह्यध्यायो रक्तवर्णनम् ||५|| दोषधातुमलाद्यानां विज्ञानाध्याय एव च | कर्णव्यधामपक्वैषावालेपो व्रण्युपासनम् ||६|| हिताहितो व्रणप्रश्नो व्रणास्रावश्च यः पृथक् | कृत्याकृत्यविधिर्व्याधिसमुद्देशीय एव च ||७|| विनिश्चयः शस्त्रविधौ प्रनष्टज्ञानिकस्तथा | शल्योद्धृतिर्व्रणज्ञानं दूतस्वप्ननिदर्शनम् ||८|| पञ्चेन्द्रियं तथा छाया स्वभावाद्वैकृतं तथा | अवारणो युक्तसेनीय आतुरक्रमभूमिकौ ||९|| मिश्रकाख्यो द्रव्यगणः संशुद्धौ शमने च यः | द्रव्यादीनां च विज्ञानं विशेषो द्रव्यगोऽपरः ||१०|| रसज्ञानं वमनार्थमध्यायो रेचनाय च | द्रवद्रव्यविधिस्तद्वदन्नपानविधिस्तथा ||११|| सूचनात् सूत्रणाच्चैव सवनाच्चार्थसन्ततेः | षट्चत्वारिंशदध्यायं सूत्रस्थानं प्रचक्षते ||१२||
🔊 Audio coming soon
ಪ್ರತಿಸ್ಥಾನೋಕ್ತಾನಾಮಧ್ಯಾಯಾನಾಂ ನಾಮಾನಿ ನಿರ್ದೇಷ್ಟುಮಾಹ- ವೇದೋತ್ಪತ್ತಿರಿತ್ಯಾದಿ| ಶಿಷ್ಯನಯಃ ಶಿಷ್ಯೋಪನಯನೀಯಃ| ಅಧ್ಯಯನದಾನಿಕಃ ಅಧ್ಯಯನಸಮ್ಪ್ರದಾನೀಯಃ| ಪ್ರಭಾಷಣಃ ಪ್ರಭಾಷಣೀಯಃ| ಅಗ್ರಹರಣಃ ಅಗ್ರೋಪಹರಣೀಯಃ| ಋತುಚರ್ಯಾ ಋತುಚರ್ಯಾಧ್ಯಾಯಃ| ಯಾನ್ತ್ರಿಕಃ ಯನ್ತ್ರವಿಧಿಃ| ಶಸ್ತ್ರಾವಚಾರಣಃ ಶಸ್ತ್ರಾವಚಾರಣೀಯಃ| ಯೋಗ್ಯಾ ಯೋಗ್ಯಾಸೂತ್ರೀಯಃ| ವಿಶಿಖಾ ವಿಶಿಖಾನುಪ್ರವೇಶನೀಯಃ| ಕ್ಷಾರಕಲ್ಪನಂ ಕ್ಷಾರಪಾಕವಿಧಿಃ| ಅಗ್ನಿಕರ್ಮ ಅಗ್ನಿಕರ್ಮವಿಧಿಃ| ಜಲೌಕಾಖ್ಯಃ ಜಲೌಕೋವಚಾರಣೀಯಃ| ಅಧ್ಯಾಯೋ ರಕ್ತವರ್ಣನಂ ಶೋಣಿತವರ್ಣನೀಯೋಽಧ್ಯಾಯಃ| ದೋಷಧಾತುಮಲಾದ್ಯಾನಾಂ ವಿಜ್ಞಾನಾಧ್ಯಾಯಃ ದೋಷಧಾತುಮಲಕ್ಷಯವೃದ್ಧಿವಿಜ್ಞಾನೀಯಃ| ಕರ್ಣವ್ಯಧಃ ಕರ್ಣವ್ಯಧಬನ್ಧವಿಧಿಃ| ಆಮಪಕ್ವೈಷಃ ಆಮಪಕ್ವೈಷಣೀಯಃ| ಆಲೇಪಃ ವ್ರಣಾಲೇಪನಬನ್ಧವಿಧಿಃ| ವ್ರಣ್ಯುಪಾಸನಂ ವ್ರಣಿತೋಪಾಸನೀಯಃ| ಹಿತಾಹಿತಃ ಹಿತಾಹಿತೀಯಾಧ್ಯಾಯಃ| ವ್ರಣಾಸ್ರಾವಃ ವ್ರಣಾಸ್ರಾವವಿಜ್ಞಾನೀಯಃ| ವಿನಿಶ್ಚಯಃ ಶಸ್ತ್ರವಿಧೌ ಅಷ್ಟವಿಧಶಸ್ತ್ರಕರ್ಮೀಯಃ| ಪ್ರನಷ್ಟಜ್ಞಾನಿಕಃ ಪ್ರನಷ್ಟಶಲ್ಯವಿಜ್ಞಾನೀಯಃ| ಶಲ್ಯೋದ್ಧೃತಿಃ ಶಲ್ಯಾಪನಯನೀಯಃ| ವ್ರಣಜ್ಞಾನಂ ವಿಪರೀತಾವಿಪರೀತವ್ರಣವಿಜ್ಞಾನೀಯಃ| ದೂತಸ್ವಪ್ನನಿದರ್ಶನಂ ವಿಪರೀತಾವಿಪರೀತದೂತಸ್ವಪ್ನನಿದರ್ಶನೀಯಃ| ಪಞ್ಚೇನ್ದ್ರಿಯಂ ಪಞ್ಚೇನ್ದ್ರಿಯಾರ್ಥವಿಪ್ರತಿಪತ್ತಿಃ| ಛಾಯಾ ಛಾಯಾವಿಪ್ರತಿಪತ್ತಿಃ| ಸ್ವಭಾವಾದ್ವೈಕೃತಂ ಸ್ವಭಾವವಿಪ್ರತಿಪತ್ತಿಃ| ಅವಾರಣಃ ಅವಾರಣೀಯಾಧ್ಯಾಯಃ| ಆತುರಕ್ರಮಃ ಆತುರೋಪಕ್ರಮಣೀಯಾಧ್ಯಾಯಃ| ಭೂಮಿಕೋ ಭೂಮಿಪ್ರವಿಭಾಗೀಯಃ| ದ್ರವ್ಯಗಣಃ ದ್ರವ್ಯಸಙ್ಗ್ರಹಣೀಯಃ| ಸಂಶುದ್ಧೌ ಶಮನೇ ಚ ಯಃ ಸಂಶೋಧನಸಂಶಮನೀಯಃ| ದ್ರವ್ಯಾದೀನಾಂ ಚ ವಿಜ್ಞಾನಂ ದ್ರವ್ಯಗುಣರಸವೀರ್ಯವಿಪಾಕವಿಜ್ಞಾನೀಯಃ| ವಿಶೇಷೋ ದ್ರವ್ಯಗೋಽಪರಃ ದ್ರವ್ಯವಿಶೇಷವಿಜ್ಞಾನೀಯಃ| ರಸಜ್ಞಾನಂ ರಸವಿಶೇಷವಿಜ್ಞಾನೀಯಃ| ವಮನಾರ್ಥಮಧ್ಯಾಯಃ ವಮನದ್ರವ್ಯವಿಕಲ್ಪವಿಜ್ಞಾನೀಯಃ| ರೇಚನಾಯ ಚ ವಿರೇಚನದ್ರವ್ಯವಿಕಲ್ಪವಿಜ್ಞಾನೀಯಃ| ಶೇಷಾಸ್ತು ನಿರ್ದಿಷ್ಟನಾಮಪ್ರಸಿದ್ಧಾ ಇತಿ ನೋಕ್ತಾಃ| ‘ಆತುರಕ್ರಮಮಿಶ್ರಕೌ’ ಇತಿ ಕೇಚಿತ್ ಪಠನ್ತಿ; ತನ್ನ, ಯತಃ ಪೂರ್ವನಿಬನ್ಧಕಾರೈರೇಷ ಕ್ರಮೋ ನಾಙ್ಗೀಕೃತಃ| ಸೂತ್ರಸ್ಥಾನಸ್ಯ ನಿರುಕ್ತಿಂ ಕರ್ತುಮಾಹ- ಸೂಚನಾದಿತಿ| ಸೂಚನಾತ್ ಲೇಶತೋಽರ್ಥಪ್ರಕಾಶನಾತ್| ಸೂತ್ರಣಾತ್ ಅರ್ಥಾನಾಂ ಯಥಾಸ್ಥಾನಂ ನಿವೇಶನಾತ್| ಸವನಾತ್ ಜನನಾತ್| ಅರ್ಥಸನ್ತತೇಃ ಅರ್ಥಸಮೂಹಸ್ಯ| ಸೂತ್ರಸ್ಥಾನಮಧ್ಯಾಯಾಃ ಷಟ್ಚತ್ವಾರಿಂಶದಿತಿ ಪ್ರಾಗೇವ ಸಙ್ಖ್ಯಾನಿರ್ದೇಶಾತ್ ಪುನಃ ಷಟ್ಚತ್ವಾರಿಂಶದಧ್ಯಾಯಂ ಸೂತ್ರಸ್ಥಾನಮಿತಿ ಸಙ್ಖ್ಯಾಕರಣಂ ನಿಯಮಾರ್ಥಂ; ತೇನ ದ್ರವದ್ರವ್ಯಾನ್ನಪಾನಿಕಾನಾಮುದಕಗೋರಸತೈಲಾದಿಪ್ರಕರಣಾನಾಂ ಪ್ರತ್ಯೇಕಮಧ್ಯಾಯತ್ವಂ ನಿರಾಕೃತಮ್||೪-೧೨||
Adhikarana 4 (13-14) · Śloka 14
ವಾತವ್ಯಾಧಿಕಮರ್ಶಾಂಸಿ ಸಾಶ್ಮರಿಶ್ಚ ಭಗನ್ದರಃ | ಕುಷ್ಠಮೇಹೋದರಂ ಮೂಢೋ ವಿದ್ರಧಿಃ ಪರಿಸರ್ಪಣಮ್ ||೧೩|| ಗ್ರನ್ಥಿವೃದ್ಧಿಕ್ಷುದ್ರಶೂಕಭಗ್ನಾಶ್ಚ ಮುಖರೋಗಿಕಮ್ | ಹೇತುಲಕ್ಷಣನಿರ್ದೇಶಾನ್ನಿದಾನಾನೀತಿ ಷೋಡಶ ||೧೪||
वातव्याधिकमर्शांसि साश्मरिश्च भगन्दरः | कुष्ठमेहोदरं मूढो विद्रधिः परिसर्पणम् ||१३|| ग्रन्थिवृद्धिक्षुद्रशूकभग्नाश्च मुखरोगिकम् | हेतुलक्षणनिर्देशान्निदानानीति षोडश ||१४||
🔊 Audio coming soon
ಕಾನಿ ಪುನಸ್ತಾನಿ ಷೋಡಶ ನಿದಾನಾನೀತ್ಯಾಹ- ವಾತವ್ಯಾಧಿಕಮಿತ್ಯಾದಿ| ಮೂಢಗರ್ಭಾದೀನಾಮೇಕದೇಶೇನ ಸಮುದಾಯಸೂಚನಂ ಲಾಘವಾರ್ಥಮ್; ಏವಮುತ್ತರತ್ರಾಪಿ ಬೋದ್ಧವ್ಯಮ್| ಮೂಢಃ ಮೂಢಗರ್ಭನಿದಾನಮ್| ಪರಿಸರ್ಪಣಂ ವಿಸರ್ಪನಾಡೀಸ್ತನರೋಗನಿದಾನಮ್| ಗ್ರನ್ಥಿರಿತಿ ಗ್ರನ್ಥ್ಯಪಚ್ಯರ್ಬುದಗಲಗಣ್ಡನಿದಾನಮ್| ವೃದ್ಧಿರಿತಿ ವೃದ್ಧ್ಯುಪದಂಶಶ್ಲೀಪದನಿದಾನಮ್| ಶೂಕಃ ಶೂಕದೋಷನಿದಾನಮ್| ನಿದಾನನಿರುಕ್ತಿಂ ಪ್ರತಿಪಾದಯನ್ನಾಹ- ಹೇತ್ವಿತ್ಯಾದಿ| ಹೇತವ ಇತಿ ಕಾರಕಹೇತವೋ ಬಲವದ್ವಿಗ್ರಹಕ್ರೋಧದಿವಾಸ್ವಪ್ನಾದಯಃ; ಲಕ್ಷಣಾನಿ ಜ್ಞಾಪಕಹೇತವಃ, ತೇ ಚ ಪೂರ್ವರೂಪರೂಪೋಪಶಯಸಮ್ಪ್ರಾಪ್ತಯಃ| ನಿರ್ದೇಶಾತ್ ವಿವರಣಾತ್||೧೩-೧೪||
Adhikarana 5 (15-17) · Śloka 17
ಭೂತಚಿನ್ತಾ ರಜಃಶುದ್ಧಿರ್ಗರ್ಭಾವಕ್ರಾನ್ತಿರೇವ ಚ | ವ್ಯಾಕರಣಂ ಚ ಗರ್ಭಸ್ಯ ಶರೀರಸ್ಯ ಚ ಯತ್ಸ್ಮೃತಮ್ ||೧೫|| ಪ್ರತ್ಯೇಕಂ ಮರ್ಮನಿರ್ದೇಶಃ ಸಿರಾವರ್ಣನಮೇವ ಚ | ಸಿರಾವ್ಯಧೋ ಧಮನೀನಾಂ ಗರ್ಭಿಣ್ಯಾ ವ್ಯಾಕೃತಿಸ್ತಥಾ ||೧೬|| ನಿರ್ದಿಷ್ಟಾನಿ ದಶೈತಾನಿ ಶಾರೀರಾಣಿ ಮಹರ್ಷಿಣಾ | ವಿಜ್ಞಾನಾರ್ಥಂ ಶರೀರಸ್ಯ ಭಿಷಜಾಂ ಯೋಗಿನಾಮಪಿ ||೧೭||
भूतचिन्ता रजःशुद्धिर्गर्भावक्रान्तिरेव च | व्याकरणं च गर्भस्य शरीरस्य च यत्स्मृतम् ||१५|| प्रत्येकं मर्मनिर्देशः सिरावर्णनमेव च | सिराव्यधो धमनीनां गर्भिण्या व्याकृतिस्तथा ||१६|| निर्दिष्टानि दशैतानि शारीराणि महर्षिणा | विज्ञानार्थं शरीरस्य भिषजां योगिनामपि ||१७||
🔊 Audio coming soon
ಕಾನಿ ಪುನಃ ಶಾರೀರಾಣೀತ್ಯಾಹ- ಭೂತಚಿನ್ತೇತ್ಯಾದಿ| ಭೂತಚಿನ್ತಾ ಸರ್ವಭೂತಚಿನ್ತಾಶಾರೀರಮ್| ರಜಃಶುದ್ಧಿಃ ಶುಕ್ರಶೋಣಿತಶುದ್ಧಿಶಾರೀರಮ್| ಗರ್ಭಾವಕ್ರಾನ್ತಿರಿತಿ ಅನೇನೈವ ನಾಮ್ನಾ ಪ್ರಸಿದ್ಧಃ, ಗರ್ಭಾವಕ್ರಾನ್ತಿಃ ಗರ್ಭಾನ್ತಃ(ನು)ಪ್ರವೇಶ ಇತ್ಯರ್ಥಃ| ವ್ಯಾಕರಣಂ ಚ ಗರ್ಭಸ್ಯ ಗರ್ಭವ್ಯಾಕರಣಂ ಶಾರೀರಂ, ವ್ಯಾಕರಣಂ ವಿವರಣಮ್| ಶರೀರಸ್ಯ ಚ ಯತ್ ಸ್ಮೃತಂ ಶರೀರಸಙ್ಖ್ಯಾವ್ಯಾಕರಣಂ ಶಾರೀರಮ್| ಸಿರಾವರ್ಣನಂ ಸಿರಾವರ್ಣನವಿಭಕ್ತಿಶಾರೀರಮ್| ಸಿರಾವ್ಯಧಃ ಸಿರಾವ್ಯಧವಿಧಿಶಾರೀರಮ್| ವ್ಯಾಕೃತಿಶಬ್ದೋ ಧಮನೀಗರ್ಭಿಣೀಭ್ಯಾಂ ಪ್ರತ್ಯೇಕಂ ಸಮ್ಬಧ್ಯತೇ; ತೇನ ಧಮನೀವ್ಯಾಕೃತಿಃ ಧಮನೀವ್ಯಾಕರಣಂ ಶಾರೀರಂ, ಗರ್ಭಿಣೀವ್ಯಾಕೃತಿಃ ಗರ್ಭಿಣೀವ್ಯಾಕರಣಂ ಶಾರೀರಮ್| ಮಹರ್ಷಿಣೇತಿ ಮಹಚ್ಛಬ್ದಃ ಪೂಜಾವಚನಃ; ತೇನ ಪೂಜ್ಯೇನ ಧನ್ವನ್ತರಿಣಾ| ವಿಜ್ಞಾನಾರ್ಥಂ ವಿಶಿಷ್ಟಜ್ಞಾನಾರ್ಥಮ್| ಯೋಗಃ ಸಮಾಧಿಃ, ಸ ವಿದ್ಯತೇ ಯೇಷಾಂ ತೇ ಯೋಗಿನಃ, ತೇಷಾಮ್||೧೫-೧೭||
Adhikarana 6 (18-26) · Śloka 26
ದ್ವಿವ್ರಣೀಯೋ ವ್ರಣಃ ಸದ್ಯೋ ಭಗ್ನಾನಾಂ ವಾತರೋಗಿಕಮ್ | ಮಹಾವಾತಿಕಮರ್ಶಾಂಸಿ ಸಾಶ್ಮರಿಶ್ಚ ಭಗನ್ದರಃ ||೧೮|| ಕುಷ್ಠಾನಾಂ ಮಹತಾಂ ಚಾಪಿ ಮೈಹಿಕಂ ಪೈಡಿಕಂ ತಥಾ | ಮಧುಮೇಹಚಿಕಿತ್ಸಾ ಚ ತಥಾ ಚೋದರಿಣಾಮಪಿ ||೧೯|| ಮೂಢಗರ್ಭಚಿಕಿತ್ಸಾ ಚ ವಿದ್ರಧೀನಾಂ ವಿಸರ್ಪಿಣಾಮ್ | ಗ್ರನ್ಥಿವೃದ್ಧ್ಯುಪದಂಶಾನಾಂ ತಥಾ ಚ ಕ್ಷುದ್ರರೋಗಿಣಾಮ್ ||೨೦|| ಶೂಕದೋಷಚಿಕಿತ್ಸಾ ಚ ತಥಾ ಚ ಮುಖರೋಗಿಣಾಮ್ | ಶೋಫಸ್ಯಾನಾಗತಾನಾಂ ಚ ನಿಷೇಧೋ ಮಿಶ್ರಕಂ ತಥಾ ||೨೧|| ವಾಜೀಕರಂ ಚ ಯತ್ ಕ್ಷೀಣೇ ಸರ್ವಾಬಾಧಶಮೋಽಪಿ ಚ | ಮೇಧಾಯುಷ್ಕರಣಂ ಚಾಪಿ ಸ್ವಭಾವವ್ಯಾಧಿವಾರಣಮ್ ||೨೨|| ನಿವೃತ್ತಸನ್ತಾಪಕರಂ ಕೀರ್ತಿತಂ ಚ ರಸಾಯನಮ್ | ಸ್ನೇಹೋಪಯೌಗಿಕಃ ಸ್ವೇದೋ ವಮನೇ ಸವಿರೇಚನೇ ||೨೩|| ತಯೋರ್ವ್ಯಾಪಚ್ಚಿಕಿತ್ಸಾ ಚ ನೇತ್ರಬಸ್ತಿವಿಭಾಗಿಕಃ | ನೇತ್ರಬಸ್ತಿವಿಪತ್ಸಿದ್ಧಿಸ್ತಥಾ ಚೋತ್ತರಬಸ್ತಿಕಃ ||೨೪|| ನಿರೂಹಕ್ರಮಸಞ್ಜ್ಞಶ್ಚ ತಥೈವಾತುರಸಞ್ಜ್ಞಕಃ | ಧೂಮನಸ್ಯವಿಧಿಶ್ಚಾನ್ತ್ಯಶ್ಚತ್ವಾರಿಂಶದಿತಿ ಸ್ಮೃತಾಃ ||೨೫|| ಪ್ರಾಯಶ್ಚಿತ್ತಂ ಪ್ರಶಮನಂ ಚಿಕಿತ್ಸಾ ಶಾನ್ತಿಕರ್ಮ ಚ | ಪರ್ಯಾಯಾಸ್ತಸ್ಯ ನಿರ್ದೇಶಾಚ್ಚಿಕಿತ್ಸಾಸ್ಥಾನಮುಚ್ಯತೇ ||೨೬||
द्विव्रणीयो व्रणः सद्यो भग्नानां वातरोगिकम् | महावातिकमर्शांसि साश्मरिश्च भगन्दरः ||१८|| कुष्ठानां महतां चापि मैहिकं पैडिकं तथा | मधुमेहचिकित्सा च तथा चोदरिणामपि ||१९|| मूढगर्भचिकित्सा च विद्रधीनां विसर्पिणाम् | ग्रन्थिवृद्ध्युपदंशानां तथा च क्षुद्ररोगिणाम् ||२०|| शूकदोषचिकित्सा च तथा च मुखरोगिणाम् | शोफस्यानागतानां च निषेधो मिश्रकं तथा ||२१|| वाजीकरं च यत् क्षीणे सर्वाबाधशमोऽपि च | मेधायुष्करणं चापि स्वभावव्याधिवारणम् ||२२|| निवृत्तसन्तापकरं कीर्तितं च रसायनम् | स्नेहोपयौगिकः स्वेदो वमने सविरेचने ||२३|| तयोर्व्यापच्चिकित्सा च नेत्रबस्तिविभागिकः | नेत्रबस्तिविपत्सिद्धिस्तथा चोत्तरबस्तिकः ||२४|| निरूहक्रमसञ्ज्ञश्च तथैवातुरसञ्ज्ञकः | धूमनस्यविधिश्चान्त्यश्चत्वारिंशदिति स्मृताः ||२५|| प्रायश्चित्तं प्रशमनं चिकित्सा शान्तिकर्म च | पर्यायास्तस्य निर्देशाच्चिकित्सास्थानमुच्यते ||२६||
🔊 Audio coming soon
ಕಾನಿ ಪುನಶ್ಚಿಕಿತ್ಸಿತಾನೀತ್ಯಾಹ- ದ್ವಿವ್ರಣೀಯ ಇತ್ಯಾದಿ| ವ್ರಣಃ ಸದ್ಯಃ ಸದ್ಯೋವ್ರಣಚಿಕಿತ್ಸಿತಮ್| ಭಗ್ನಾನಾಂ ಭಗ್ನಚಿಕಿತ್ಸಿತಮ್| ವಾತರೋಗಿಕಂ ವಾತವ್ಯಾಧಿಚಿಕಿತ್ಸಿತಮ್| ಮಹಾವಾತಿಕಂ ಮಹಾವಾತವ್ಯಾಧಿಚಿಕಿತ್ಸಿತಮ್| ಮಹತಾಂ ಚಾಪಿ ಮಹಾಕುಷ್ಠಚಿಕಿತ್ಸಿತಮ್| ಮೈಹಿಕಂ ಪ್ರಮೇಹಚಿಕಿತ್ಸಿತಮ್| ಪೈಡಿಕಂ ಪ್ರಮೇಹಪಿಡಕಾಚಿಕಿತ್ಸಿತಮ್| ವಿಸರ್ಪಿಣಾಂ ವಿಸರ್ಪನಾಡೀಸ್ತನರೋಗಚಿಕಿತ್ಸಿತಮ್| ಗ್ರನ್ಥಿರಿತಿ ಗ್ರನ್ಥ್ಯಪಚ್ಯರ್ಬುದಗಲಗಣ್ಡಚಿಕಿತ್ಸಿತಮ್| ವೃದ್ಧ್ಯುಪದಂಶಾನಾಂ ವೃದ್ಧ್ಯುಪದಂಶಶ್ಲೀಪದಚಿಕಿತ್ಸಿತಮ್| ಅನಾಗತಾನಾಂ ನಿಷೇಧಃ ಅನಾಗತಾಬಾಧಪ್ರತಿಷೇಧಚಿಕಿತ್ಸಿತಮ್| ಮಿಶ್ರಕಂ ಮಿಶ್ರಕಚಿಕಿತ್ಸಿತಮ್| ವಾಜೀಕರಂ ಚ ಯತ್ ಕ್ಷೀಣೇ ಕ್ಷೀಣಬಲೀಯವಾಜೀಕರಣಚಿಕಿತ್ಸಿತಮ್| ಸರ್ವಾಬಾಧಶಮೋಽಪಿ ಸರ್ವಾಬಾಧಶಮನೀಯಂ ರಸಾಯನಮ್| ಮೇಧಾಯುಷ್ಕರಣಂ ಚಾಪಿ ಮೇಧಾಯುಷ್ಕಾಮೀಯಂ ರಸಾಯನಮ್| ಸ್ವಭಾವವ್ಯಾಧಿವಾರಣಂ ಸ್ವಭಾವವ್ಯಾಧಿಪ್ರತಿಷೇಧನೀಯಂ ರಸಾಯನಮ್| ನಿವೃತ್ತಸನ್ತಾಪಕರಂ ಕೀರ್ತಿತಂ ಚ ರಸಾಯನಂ ನಿವೃತ್ತಸನ್ತಾಪೀಯಂ ರಸಾಯನಮ್| ಸ್ವೇದಃ ಸ್ವೇದಾವಚಾರಣೀಯಂ ಚಿಕಿತ್ಸಿತಮ್| ವಮನೇ ಸವಿರೇಚನೇ ವಮನವಿರೇಚನಸಾಧ್ಯೋಪದ್ರವಚಿಕಿತ್ಸಿತಮ್| ತಯೋರ್ವ್ಯಾಪಚ್ಚಿಕಿತ್ಸಾ ಚ ವಮನವಿರೇಚನವ್ಯಾಪಚ್ಚಿಕಿತ್ಸಿತಮ್| ನೇತ್ರಬಸ್ತಿವಿಭಾಗಿಕಃ ನೇತ್ರಬಸ್ತಿಪ್ರಮಾಣಪ್ರವಿಭಾಗಚಿಕಿತ್ಸಿತಮ್| ನೇತ್ರಬಸ್ತಿವಿಪತ್ಸಿದ್ಧಿಃ ನೇತ್ರಬಸ್ತಿವ್ಯಾಪಚ್ಚಿಕಿತ್ಸಿತಮ್| ತಥಾ ಚೋತ್ತರಬಸ್ತಿಕಃ ಅನುವಾಸನೋತ್ತರಬಸ್ತಿಚಿಕಿತ್ಸಿತಮ್| ನಿರೂಹಕ್ರಮಸಞ್ಜ್ಞಶ್ಚ ನಿರೂಹೋಪಕ್ರಮಚಿಕಿತ್ಸಿತಮ್| ತಥೈವಾತುರಸಞ್ಜ್ಞಿತಃ ಆತುರೋಪದ್ರವಚಿಕಿತ್ಸಿತಮ್| ಧೂಮನಸ್ಯವಿಧಿಶ್ಚಾನ್ತ್ಯಃ ಧೂಮನಸ್ಯಕವಡ(ಲ)ಗ್ರಹಚಿಕಿತ್ಸಿತಮ್; ಅನ್ತೇ ಭವೋಽನ್ತ್ಯಃ| ಚಿಕಿತ್ಸಿತಸ್ಯ ಪರ್ಯಾಯಾನ್ತರಂ ದರ್ಶಯಿತುಮಾಹ- ಪ್ರಾಯಶ್ಚಿತ್ತಮಿತ್ಯಾದಿ| ಏತೇ ಪ್ರಾಯಶ್ಚಿತ್ತಾದಯಸ್ತಸ್ಯ ಚಿಕಿತ್ಸಿತಸ್ಯ ಪರ್ಯಾಯಾಃ| ತಸ್ಯೈವಮ್ಪರ್ಯಾಯವಿನಿರ್ದಿಷ್ಟಸ್ಯ ಚಿಕಿತ್ಸಿತಸ್ಯ ನಿರ್ದೇಶಾದ್ ವಿವರಣಾಚ್ಚಿಕಿತ್ಸಾಸ್ಥಾನಂ ಕಥ್ಯತೇ||೧೮-೨೬||
Adhikarana 7 (27-28) · Śloka 28
ಅನ್ನಸ್ಯ ರಕ್ಷಾ ವಿಜ್ಞಾನಂ ಸ್ಥಾವರಸ್ಯೇತರಸ್ಯ ಚ | ಸರ್ಪದಷ್ಟವಿಷಜ್ಞಾನಂ ತಸ್ಯೈವ ಚ ಚಿಕಿತ್ಸಿತಮ್ ||೨೭|| ದುನ್ದುಭೇರ್ಮೂಷಿಕಾಣಾಂ ಚ ಕೀಟಾನಾಂ ಕಲ್ಪ ಏವ ಚ | ಅಷ್ಟೌ ಕಲ್ಪಾಃ ಸಮಾಖ್ಯಾತಾ ವಿಷಭೇಷಜಕಲ್ಪನಾತ್ ||೨೮||
अन्नस्य रक्षा विज्ञानं स्थावरस्येतरस्य च | सर्पदष्टविषज्ञानं तस्यैव च चिकित्सितम् ||२७|| दुन्दुभेर्मूषिकाणां च कीटानां कल्प एव च | अष्टौ कल्पाः समाख्याता विषभेषजकल्पनात् ||२८||
🔊 Audio coming soon
ಕೇ ಪುನಃ ಕಲ್ಪಾ ಇತ್ಯಾಹ- ಅನ್ನಸ್ಯೇತ್ಯಾದಿ| ಅನ್ನಸ್ಯ ರಕ್ಷಾ ಅನ್ನಪಾನರಕ್ಷಾಕಲ್ಪಃ | ವಿಜ್ಞಾನಂ ಸ್ಥಾವರಸ್ಯ ಸ್ಥಾವರವಿಷವಿಜ್ಞಾನೀಯಃ ಕಲ್ಪಃ| ಇತರಸ್ಯ ಚ ಜಙ್ಗಮವಿಷವಿಜ್ಞಾನೀಯಃ ಕಲ್ಪಃ| ತಸ್ಯೈವ ಚ ಚಿಕಿತ್ಸಿತಂ ಸರ್ಪದಷ್ಟಚಿಕಿತ್ಸಾಕಲ್ಪಃ| ದುನ್ದುಭೇಃ ದುನ್ದುಭಿಸ್ವನೀಯಃ ಕಲ್ಪಃ| ಮೂಷಿಕಾಣಾಂ ಚ ಮೂಷಿಕಕಲ್ಪಃ| ಕಲ್ಪನಿರುಕ್ತಿಂ ಪ್ರತಿಪಾದಯನ್ನಾಹ- ವಿಷಭೇಷಜಕಲ್ಪನಾದಿತಿ; ವಿಷೌಷಧವಿಜ್ಞಾನಾತ್||೨೭-೨೮||
Adhikarana 8 (29) · Śloka 29
ಅಧ್ಯಾಯಾನಾಂ ಶತಂ ವಿಂಶಮೇವಮೇತದುದೀರಿತಮ್ |೨೯|
अध्यायानां शतं विंशमेवमेतदुदीरितम् |२९|
🔊 Audio coming soon
ಪೂರ್ವಪ್ರತಿಜ್ಞಾತಮುಪಸಂಹರನ್ನಾಹ- ಅಧ್ಯಾಯಾನಾಮಿತ್ಯಾದಿ| ಏವಮೇತದಿತಿ ಅನನ್ತರೋಕ್ತಮ್|೨೯|-
Adhikarana 9 (29-34) · Śloka 35
ಅತಃ ಪರಂ ಸ್ವನಾಮ್ನೈವ ತನ್ತ್ರಮುತ್ತರಮುಚ್ಯತೇ ||೨೯|| ಅಧಿಕೃತ್ಯ ಕೃತಂ ಯಸ್ಮಾತ್ತನ್ತ್ರಮೇತದುಪದ್ರವಾನ್ | ಔಪದ್ರವಿಕ ಇತ್ಯೇಷ ತಸ್ಯಾಗ್ರ್ಯತ್ವಾನ್ನಿರುಚ್ಯತೇ ||೩೦|| ಸನ್ಧೌ ವರ್ತ್ಮನಿ ಶುಕ್ಲೇ ಚ ಕೃಷ್ಣೇ ಸರ್ವತ್ರ ದೃಷ್ಟಿಷು | ಸಂವಿಜ್ಞಾನಾರ್ಥಮಧ್ಯಾಯಾ ಗದಾನಾಂ ತು ಪ್ರತಿ ಪ್ರತಿ ||೩೧|| ಚಿಕಿತ್ಸಾಪ್ರವಿಭಾಗೀಯೋ ವಾತಾಭಿಷ್ಯನ್ದವಾರಣಃ | ಪೈತ್ತಸ್ಯ ಶ್ಲೈಷ್ಮಿಕಸ್ಯಾಪಿ ರೌಧಿರಸ್ಯ ತಥೈವ ಚ ||೩೨|| ಲೇಖ್ಯಭೇದ್ಯನಿಷೇಧೌ ಚ ಛೇದ್ಯಾನಾಂ ವರ್ತ್ಮದೃಷ್ಟಿಷು | ಕ್ರಿಯಾಕಲ್ಪೋಽಭಿಘಾತಶ್ಚ ಕರ್ಣೋತ್ಥಾಸ್ತಚ್ಚಿಕಿತ್ಸಿತಮ್ ||೩೩|| ಘ್ರಾಣೋತ್ಥಾನಾಂ ಚ ವಿಜ್ಞಾನಂ ತದ್ಗದಪ್ರತಿಷೇಧನಮ್ | ಪ್ರತಿಶ್ಯಾಯನಿಷೇಧಶ್ಚ ಶಿರೋಗದವಿವೇಚನಮ್ ||೩೪|| ಚಿಕಿತ್ಸಾ ತದ್ಗದಾನಾಂ ಚ ಶಾಲಾಕ್ಯಂ ತನ್ತ್ರಮುಚ್ಯತೇ |೩೫|
अतः परं स्वनाम्नैव तन्त्रमुत्तरमुच्यते ||२९|| अधिकृत्य कृतं यस्मात्तन्त्रमेतदुपद्रवान् | औपद्रविक इत्येष तस्याग्र्यत्वान्निरुच्यते ||३०|| सन्धौ वर्त्मनि शुक्ले च कृष्णे सर्वत्र दृष्टिषु | संविज्ञानार्थमध्याया गदानां तु प्रति प्रति ||३१|| चिकित्साप्रविभागीयो वाताभिष्यन्दवारणः | पैत्तस्य श्लैष्मिकस्यापि रौधिरस्य तथैव च ||३२|| लेख्यभेद्यनिषेधौ च छेद्यानां वर्त्मदृष्टिषु | क्रियाकल्पोऽभिघातश्च कर्णोत्थास्तच्चिकित्सितम् ||३३|| घ्राणोत्थानां च विज्ञानं तद्गदप्रतिषेधनम् | प्रतिश्यायनिषेधश्च शिरोगदविवेचनम् ||३४|| चिकित्सा तद्गदानां च शालाक्यं तन्त्रमुच्यते |३५|
🔊 Audio coming soon
ಶಲ್ಯತನ್ತ್ರಂ ಪ್ರತಿಪಾದ್ಯ ತದುತ್ತರಮರ್ಥವಶಾದಾಗತಂ ಪ್ರತಿಪಾದಯನ್ನಾಹ- ಅತಃ ಪರಮಿತಿ| ಅತಃ ಪರಮ್ ಉಕ್ತಸ್ಥಾನಪಞ್ಚಕಾದನನ್ತರಂ, ಸ್ವನಾಮ್ನೈವ ಸ್ವಸಞ್ಜ್ಞಯೈವ ತನ್ತ್ರಮುಚ್ಯತೇ| ಕಿಂ ತದಾತ್ಮೀಯಮಸ್ಯ ನಾಮ ಯೇನೋಚ್ಯತೇ ತತ್ತನ್ತ್ರಮಿತ್ಯಾಹ- ಉತ್ತರತನ್ತ್ರಮಿತಿ; ನ ಶಲ್ಯತನ್ತ್ರಸಞ್ಜ್ಞಯಾ| ಕುತಃ ಪುನರೌಪದ್ರವಿಕಾಧ್ಯಾಯಸ್ಯೋತ್ತರತನ್ತ್ರಸ್ಯಾದೌ ಸ್ಥಿತಸ್ಯ ‘ಔಪದ್ರವಿಕ’ ಇತಿ ನಾಮ ಕೃತಮಿತ್ಯಾಹ- ಅಧಿಕೃತ್ಯೇತ್ಯಾದಿ| ಅಧಿಕೃತ್ಯ ಅಙ್ಗೀಕೃತ್ಯ, ಉಪದ್ರವಾನ್ ರೋಗಾನ್, ಯಸ್ಮಾತ್ತನ್ತ್ರಮೇತದುತ್ತರತನ್ತ್ರಂ ಕೃತಮ್, ಅತಸ್ತಸ್ಯೋತ್ತರತನ್ತ್ರಸ್ಯಾಗ್ರ್ಯತ್ವಾತ್ ಪ್ರಥಮತ್ವಾತ್, ‘ಔಪದ್ರವಿಕ’ ಇತ್ಯಧ್ಯಾಯೋ ನಿರುಚ್ಯತೇ ನಿರುಕ್ತ್ಯಾ ಕಥ್ಯತೇ; ಉಪದ್ರವಾಧಿಕೃತತನ್ತ್ರಸ್ಯ ಪ್ರಥಮತ್ವಾದಧ್ಯಾಯಸ್ಯ ‘ಔಪದ್ರವಿಕ’ ಇತಿ ನಾಮ ಕೃತಮಿತ್ಯರ್ಥಃ| ಸನ್ಧೌ ವರ್ತ್ಮನೀತ್ಯಾದಿಷು ಗತಾನಾಂ ಗದಾನಾಂ ತು ಪ್ರತಿ ಪ್ರತಿ ಸಮ್ಯಗ್ವಿಜ್ಞಾನಾರ್ಥಮಧ್ಯಾಯಾ ಇತಿ ಸಮ್ಬನ್ಧಃ| ತೇನಾಯಮರ್ಥಃ- ಸನ್ಧಾವಿತಿ ಸನ್ಧಿಗತರೋಗವಿಜ್ಞಾನೀಯಾಧ್ಯಾಯಃ, ವರ್ತ್ಮನೀತಿ ವರ್ತ್ಮಗತರೋಗವಿಜ್ಞಾನೀಯಾಧ್ಯಾಯಃ, ಶುಕ್ಲೇ ಚೇತಿ ಶುಕ್ಲಗತರೋಗವಿಜ್ಞಾನೀಯಾಧ್ಯಾಯಃ, ಕೃಷ್ಣೇ ಇತಿ ಕೃಷ್ಣಗತರೋಗವಿಜ್ಞಾನೀಯಾಧ್ಯಾಯಃ, ಸರ್ವತ್ರೇತಿ ಸರ್ವಗತರೋಗವಿಜ್ಞಾನೀಯಾಧ್ಯಾಯಃ ದೃಷ್ಟಿಷ್ವಿತಿ ದೃಷ್ಟಿಗತರೋಗವಿಜ್ಞಾನೀಯಾಧ್ಯಾಯಃ| ಪೈತ್ತಸ್ಯೇತ್ಯಾದಿಷು ಅಭಿಷ್ಯನ್ದವಾರಣ ಇತಿ ಸಮ್ಬನ್ಧಃ, ತೇನ ಪೈತ್ತಸ್ಯೇತಿ ಪಿತ್ತಾಭಿಷ್ಯನ್ದಪ್ರತಿಷೇಧಾಧ್ಯಾಯಃ, ಶ್ಲೇಷ್ಮಿಕಸ್ಯೇತಿ ಶ್ಲೇಷ್ಮಾಭಿಷ್ಯನ್ದಪ್ರತಿಷೇಧಾಧ್ಯಾಯಃ, ರೌಧಿರಸ್ಯೇತಿ ರಕ್ತಾಭಿಷ್ಯನ್ದಪ್ರತಿಷೇಧಾಧ್ಯಾಯಃ| ಲೇಖ್ಯಭೇದ್ಯನಿಷೇಧೌ ಚೇತಿ ಲೇಖ್ಯರೋಗಪ್ರತಿಷೇಧಾಧ್ಯಾಯಃ, ಭೇದ್ಯರೋಗಪ್ರತಿಷೇಧಾಧ್ಯಾಯಃ| ಛೇದ್ಯಾನಾಮಿತಿ ಛೇದ್ಯರೋಗಪ್ರತಿಷೇಧಾಧ್ಯಾಯಃ| ವರ್ತ್ಮದೃಷ್ಟಿಷ್ವಿತಿ ವರ್ತ್ಮಗತರೋಗಪ್ರತಿಷೇಧಾಧ್ಯಾಯಃ, ದೃಷ್ಟಿಗತರೋಗಪ್ರತಿಷೇಧಾಧ್ಯಾಯಃ| ಅಭಿಘಾತಶ್ಚೇತಿ ನಯನಾಭಿಘಾತಪ್ರತಿಷೇಧಾಧ್ಯಾಯಃ| ಕರ್ಣೋತ್ಥಾ ಇತಿ ಕರ್ಣಗತರೋಗವಿಜ್ಞಾನೀಯಾಧ್ಯಾಯಃ| ತಚ್ಚಿಕಿತ್ಸಿತಮಿತಿ ಕರ್ಣಗತರೋಗಪ್ರತಿಷೇಧಾಧ್ಯಾಯಃ| ಘ್ರಾಣೋತ್ಥಾನಾಂ ಚ ವಿಜ್ಞಾನಮಿತಿ ನಾಸಾಗತರೋಗವಿಜ್ಞಾನಜ್ಞಾನೀಯಧ್ಯಾಯಃ| ತದ್ಗದಪ್ರತಿಷೇಧನಮಿತಿ ನಾಸಾಗತರೋಗಪ್ರತಿಷೇಧಾಧ್ಯಾಯಃ| ಪ್ರತಿಶ್ಯಾಯನಿಷೇಧಶ್ಚೇತಿ ಪ್ರತಿಶ್ಯಾಯಪ್ರತಿಷೇಧಾಧ್ಯಾಯಃ| ಶಿರೋಗದವಿವೇಚನಮಿತಿ ಶಿರೋರೋಗವಿಜ್ಞಾನೀಯಾಧ್ಯಾಯಃ| ಚಿಕಿತ್ಸಾ ತದ್ಗದಾನಾಂ ಚೇತಿ ಶಿರೋರೋಗಪ್ರತಿಷೇಧಾಧ್ಯಾಯಃ||೨೯-೩೪||-
Adhikarana 10 (35-37) · Śloka 37
ನವಗ್ರಹಾಕೃತಿಜ್ಞಾನಂ ಸ್ಕನ್ದಸ್ಯ ಚ ನಿಷೇಧನಮ್ ||೩೫|| ಅಪಸ್ಮಾರಶಕುನ್ಯೋಶ್ಚ ರೇವತ್ಯಾಶ್ಚ ಪುನಃ ಪೃಥಕ್ | ಪೂತನಾಯಾಸ್ತಥಾಽನ್ಧಾಯಾಃ ಶೀತಪೂತನಮಣ್ಡಿಕಾ ||೩೬|| ನೈಗಮೇಷಚಿಕಿತ್ಸಾ ಚ ಗ್ರಹೋತ್ಪತ್ತಿಃ ಸಯೋನಿಜಾ | ಕುಮಾರತನ್ತ್ರಮಿತ್ಯೇತಚ್ಛಾರೀರೇಷು ಚ ಕೀರ್ತಿತಮ್ ||೩೭||
नवग्रहाकृतिज्ञानं स्कन्दस्य च निषेधनम् ||३५|| अपस्मारशकुन्योश्च रेवत्याश्च पुनः पृथक् | पूतनायास्तथाऽन्धायाः शीतपूतनमण्डिका ||३६|| नैगमेषचिकित्सा च ग्रहोत्पत्तिः सयोनिजा | कुमारतन्त्रमित्येतच्छारीरेषु च कीर्तितम् ||३७||
🔊 Audio coming soon
ಶಾಲಾಕ್ಯತನ್ತ್ರಂ ಸಮಾಪ್ಯ ಕುಮಾರತನ್ತ್ರಂ ದರ್ಶಯನ್ನಾಹ- ನವಗ್ರಹೇತ್ಯಾದಿ| ಸ್ಕನ್ದಸ್ಯ ಚ ನಿಷೇಧನಂ ಸ್ಕನ್ದಗ್ರಹಪ್ರತಿಷೇಧಾಧ್ಯಾಯಃ| ಅಪಸ್ಮಾರಶಕುನ್ಯೋಶ್ಚೇತಿ ಸ್ಕನ್ದಾಪಸ್ಮಾರಪ್ರತಿಷೇಧಾಧ್ಯಾಯಃ, ಶಕುನಿಪ್ರತಿಷೇಧಾಧ್ಯಾಯಃ| ರೇವತ್ಯಾಶ್ಚ ಪುನಃ ಪೃಥಗಿತಿ ರೇವತೀಪ್ರತಿಷೇಧಾಧ್ಯಾಯಃ| ಪೂತನಾಯಾ ಇತಿ ಪೂತನಾಪ್ರತಿಷೇಧಾಧ್ಯಾಯಃ| ತಥಾಽನ್ಧಾಯಾ ಇತ್ಯತ್ರಾಪಿ ಪೂತನಾಶಬ್ದಃ ಸಮ್ಬಧ್ಯತೇ; ತೇನ ಅನ್ಧಪೂತನಾಪ್ರತಿಷೇಧಾಧ್ಯಾಯಃ| ಶೀತಪೂತನೇತಿ ಶೀತಪೂತನಾಪ್ರತಿಷೇಧಾಧ್ಯಾಯಃ, ಮಣ್ಡಿಕೇತಿ ಮುಖಮಣ್ಡಿಕಾಪ್ರತಿಷೇಧಾಧ್ಯಾಯಃ| ನೈಗಮೇಷಚಿಕಿತ್ಸಾ ಚೇತಿ ನೈಗಮೇಷಪ್ರತಿಷೇಧಾಧ್ಯಾಯಃ| ಗ್ರಹೋತ್ಪತ್ತಿರಿತಿ ಗ್ರಹೋತ್ಪತ್ತ್ಯಧ್ಯಾಯಃ| ಸಯೋನಿಜೇತಿ ಯೋನಿವ್ಯಾಪತ್ಪ್ರತಿಷೇಧಾಧ್ಯಾಯಃ, ಸಶಬ್ದಃ ಸಹಾರ್ಥಃ| ಕುಮಾರತನ್ತ್ರಮಿತಿ ಅತ್ರೇತಿಶಬ್ದಃ ಕುಮಾರತನ್ತ್ರಪರಿಸಮಾಪ್ತೌ| ಕಿಮೇತಾವದೇವ ಕುಮಾರತನ್ತ್ರಮಥವಾಽನ್ಯದಪ್ಯಸ್ತೀತಿ ಪೃಷ್ಟ ಆಹ- ಶಾರೀರೇಷು ಚ ಕೀರ್ತಿತಮಿತಿ| ಕಿಂ ತಚ್ಛರೀರೇಷೂಕ್ತಂ? ತದ್ಯಥಾ- ರಜಃಶುದ್ಧಿಃ, ಗರ್ಭಾವಕ್ರಾನ್ತಿರಿತ್ಯಾದಿ||೩೫-೩೭||
Adhikarana 11 (38-40) · Śloka 40
ಜ್ವರಾತಿಸಾರಶೋಷಾಣಾಂ ಗುಲ್ಮಹೃದ್ರೋಗಿಣಾಮಪಿ | ಪಾಣ್ಡೂನಾಂ ರಕ್ತಪಿತ್ತಸ್ಯ ಮೂರ್ಚ್ಛಾಯಾಃ ಪಾನಜಾಶ್ಚ ಯೇ ||೩೮|| ತೃಷ್ಣಾಯಾಶ್ಛರ್ದಿಹಿಕ್ಕಾನಾಂ ನಿಷೇಧಃ ಶ್ವಾಸಕಾಸಯೋಃ | ಸ್ವರಭೇದಚಿಕಿತ್ಸಾ ಚ ಕೃಮ್ಯುದಾವರ್ತಿನೋಃ ಪೃಥಕ್ ||೩೯|| ವಿಸೂಚಿಕಾರೋಚಕಯೋರ್ಮೂತ್ರಾಘಾತವಿಕೃಚ್ಛ್ರಯೋಃ | ಇತಿ ಕಾಯಚಿಕಿತ್ಸಾಯಾಃ ಶೇಷಮತ್ರ ಪ್ರಕೀರ್ತಿತಮ್ ||೪೦||
ज्वरातिसारशोषाणां गुल्महृद्रोगिणामपि | पाण्डूनां रक्तपित्तस्य मूर्च्छायाः पानजाश्च ये ||३८|| तृष्णायाश्छर्दिहिक्कानां निषेधः श्वासकासयोः | स्वरभेदचिकित्सा च कृम्युदावर्तिनोः पृथक् ||३९|| विसूचिकारोचकयोर्मूत्राघातविकृच्छ्रयोः | इति कायचिकित्सायाः शेषमत्र प्रकीर्तितम् ||४०||
🔊 Audio coming soon
ಕಾ ಪುನರುತ್ತರತನ್ತ್ರೇ ಕಾಯಚಿಕಿತ್ಸೇತಿ ದರ್ಶಯನ್ನಾಹ- ಜ್ವರೇತ್ಯಾದಿ| ನಿಷೇಧಃ ಪ್ರತಿಷೇಧಃ, ಸ ಚ ಜ್ವರಾದಿಭಿಃ ಸಹ ಪ್ರತ್ಯೇಕಂ ಸಮ್ಬಧ್ಯತೇ; ತೇನ ಜ್ವರಪ್ರತಿಷೇಧೋಽತೀಸಾರಪ್ರತಿಷೇಧ ಇತ್ಯಾದಿ ದ್ರಷ್ಟವ್ಯಮ್| ಪಾನಜಾಶ್ಚ ಯ ಇತಿ ಮದ್ಯಪಾನಜಾಶ್ಚ ಯೇ ರೋಗಾಸ್ತೇಷಾಂ ಪ್ರತಿಷೇಧಃ, ಏತೇನ ಪಾನಾತ್ಯಯಪ್ರತಿಷೇಧ ಇತ್ಯುಕ್ತಮ್| ಸ್ವರಭೇದಚಿಕಿತ್ಸಾ ಚೇತಿ ಸ್ವರಭೇದಪ್ರತಿಷೇಧಃ| ಮೂತ್ರಾಘಾತವಿಕೃಚ್ಛ್ರಯೋರಿತಿ ವಿಶಬ್ದಶ್ಛನ್ದಃ ಪೂರ್ತಯೇ; ತೇನ ಮೂತ್ರಾಘಾತಪ್ರತಿಷೇಧಃ, ಮೂತ್ರಕೃಚ್ಛ್ರಪ್ರತಿಷೇಧಃ| ಇತಿ ಕಾಯಚಿಕಿತ್ಸಾಯಾಃ ಶೇಷಮತ್ರ ಪ್ರಕೀರ್ತಿತಮಿತಿ ಇತಿಶಬ್ದಃ ಸಮಾಪ್ತೌ; ಅತ್ರ ಉತ್ತರತನ್ತ್ರೇ, ಕಾಯಚಿಕಿತ್ಸಾಯಾಃ ಶೇಷಂ ಪ್ರಕೀರ್ತಿತಂ ನಿರ್ದಿಷ್ಟಂ; ಶೇಷಶಬ್ದೇನ ಶಲ್ಯೇಽಪಿ ನಿರ್ದಿಷ್ಟಮಿತಿ ಬೋಧಯತಿ||೩೮-೪೦||
Adhikarana 12 (41) · Śloka 41
ಅಮಾನುಷನಿಷೇಧಶ್ಚ ತಥಾಽಽಪಸ್ಮಾರಿಕೋಽಪರಃ | ಉನ್ಮಾದಪ್ರತಿಷೇಧಶ್ಚ ಭೂತವಿದ್ಯಾ ನಿರುಚ್ಯತೇ ||೪೧||
अमानुषनिषेधश्च तथाऽऽपस्मारिकोऽपरः | उन्मादप्रतिषेधश्च भूतविद्या निरुच्यते ||४१||
🔊 Audio coming soon
ಕಾಯಚಿಕಿತ್ಸಾಂ ಸಮಾಪ್ಯ ಭೂತವಿದ್ಯಾಂ ಪ್ರತಿಪಾದಯನ್ನಾಹ- ಅಮಾನುಷೇತ್ಯಾದಿ| ಅಮಾನುಷನಿಷೇಧಃ ಅಮಾನುಷೋಪಸರ್ಗಪ್ರತಿಷೇಧಃ | ಆಪಸ್ಮಾರಿಕಃ ಅಪಸ್ಮಾರಪ್ರತಿಷೇಧಃ||೪೧||
Adhikarana 13 (42) · Śloka 42
ರಸಭೇದಾಃ ಸ್ವಸ್ಥವೃತ್ತಂ ಯುಕ್ತಯಸ್ತಾನ್ತ್ರಿಕಾಶ್ಚ ಯಾಃ | ದೋಷಭೇದಾ ಇತಿ ಜ್ಞೇಯಾ ಅಧ್ಯಾಯಾಸ್ತನ್ತ್ರಭೂಷಣಾಃ ||೪೨||
रसभेदाः स्वस्थवृत्तं युक्तयस्तान्त्रिकाश्च याः | दोषभेदा इति ज्ञेया अध्यायास्तन्त्रभूषणाः ||४२||
🔊 Audio coming soon
ತನ್ತ್ರಭೂಷಣಾಧ್ಯಾಯಾನಾಹ- ರಸಭೇದಾ ಇತ್ಯಾದಿ| ರಸಭೇದಾಃ ರಸಭೇದವಿಕಲ್ಪಃ| ಇತಿಶಬ್ದಃ ಸಮಾಪ್ತೌ| ಏತೇ ಅಧ್ಯಾಯಾಸ್ತನ್ತ್ರಭೂಷಣಾಃ ಶಾಸ್ತ್ರಸ್ಯಾಲಙ್ಕರಣಾಃ||೪೨||
Adhikarana 14 (43) · Śloka 43
ಶ್ರೇಷ್ಠತ್ವಾದುತ್ತರಂ ಹ್ಯೇತತ್ತನ್ತ್ರಮಾಹುರ್ಮಹರ್ಷಯಃ | ಬಹ್ವರ್ಥಸಙ್ಗ್ರಹಾಚ್ಛ್ರೇಷ್ಠಮುತ್ತರಂ ವಾಽಪಿ ಪಶ್ಚಿಮಮ್ ||೪೩||
श्रेष्ठत्वादुत्तरं ह्येतत्तन्त्रमाहुर्महर्षयः | बह्वर्थसङ्ग्रहाच्छ्रेष्ठमुत्तरं वाऽपि पश्चिमम् ||४३||
🔊 Audio coming soon
ಉತ್ತರತನ್ತ್ರಸ್ಯ ನಿರುಕ್ತಿಂ ಪ್ರತಿಪಾದಯನ್ನಾಹ- ಶ್ರೇಷ್ಠತ್ವಾದಿತ್ಯಾದಿ| ಶ್ರೇಷ್ಠತ್ವಾದಿತಿ ಏತತ್ತನ್ತ್ರಂ ಮಹರ್ಷಯಃ ಶ್ರೇಷ್ಠತ್ವಾದುತ್ತರಂ ಬ್ರುವನ್ತಿ| ಕುತಃ ಪುನರಸ್ಯ ಶ್ರೇಷ್ಠತ್ವಮಿತ್ಯಾಹ- ಬಹ್ವರ್ಥಸಙ್ಗ್ರಹಾಚ್ಛ್ರೇಷ್ಠಮಿತಿ| ಶಾಲಕ್ಯಕುಮಾರಾಬಾಧಕಾಯಚಿಕಿತ್ಸಾಭೂತವಿದ್ಯಾತನ್ತ್ರಭೂಷಣಾಧ್ಯಾಯನಿರ್ದಿಷ್ಟಾನಾಮರ್ಥಾನಾಂ ಸಙ್ಗ್ರಹಾಚ್ಛ್ರೇಷ್ಠಮುತ್ತರತನ್ತ್ರಮ್| ತಸ್ಯ ನಿರುಕ್ತಿಪಕ್ಷಾನ್ತರಂ ವಕ್ತುಮಾಹ- ಉತ್ತರಂ ವಾಽಪಿ ಪಶ್ಚಿಮಮಿತಿ|- ಪಶ್ಚಿಮತ್ವಾದ್ವಾ ಇದಂ ತನ್ತ್ರಮುತ್ತರಮ್| ‘ಶೇಷತ್ವಾದುತ್ತರಂ ಹ್ಯೇತತ್’- ಇತಿ ಕೇಚಿತ್ ಪಠನ್ತಿ, ಪೂರ್ವತನ್ತ್ರಶೇಷತ್ವಾದಿದಂ ತನ್ತ್ರಮುತ್ತರಂ ಶ್ರೈಷ್ಠ್ಯಾದ್ವೇತಿ ವ್ಯಾಖ್ಯಾನಯನ್ತಿ||೪೩||
Adhikarana 15 (44-46) · Śloka 46
ಶಾಲಾಕ್ಯತನ್ತ್ರಂ ಕೌಮಾರಂ ಚಿಕಿತ್ಸಾ ಕಾಯಿಕೀ ಚ ಯಾ | ಭೂತವಿದ್ಯೇತಿ ಚತ್ವಾರಿ ತನ್ತ್ರೇ ತೂತ್ತರಸಞ್ಜ್ಞಿತೇ ||೪೪|| ವಾಜೀಕರಂ ಚಿಕಿತ್ಸಾಸು ರಸಾಯನವಿಧಿಸ್ತಥಾ | ವಿಷತನ್ತ್ರಂ ಪುನಃ ಕಲ್ಪಾಃ ಶಲ್ಯಜ್ಞಾನಂ ಸಮನ್ತತಃ ||೪೫|| ಇತ್ಯಷ್ಟಾಙ್ಗಮಿದಂ ತನ್ತ್ರಮಾದಿದೇವಪ್ರಕಾಶಿತಮ್ | ವಿಧಿನಾಽಧೀತ್ಯ ಯುಞ್ಜಾನಾ ಭವನ್ತಿ ಪ್ರಾಣದಾ ಭುವಿ ||೪೬||
शालाक्यतन्त्रं कौमारं चिकित्सा कायिकी च या | भूतविद्येति चत्वारि तन्त्रे तूत्तरसञ्ज्ञिते ||४४|| वाजीकरं चिकित्सासु रसायनविधिस्तथा | विषतन्त्रं पुनः कल्पाः शल्यज्ञानं समन्ततः ||४५|| इत्यष्टाङ्गमिदं तन्त्रमादिदेवप्रकाशितम् | विधिनाऽधीत्य युञ्जाना भवन्ति प्राणदा भुवि ||४६||
🔊 Audio coming soon
ಅಷ್ಟಾಙ್ಗಸ್ಯಾಯುರ್ವೇದಸ್ಯ ವಿಸ್ತರೇಣ ಪ್ರತಿಪಾದಿತಸ್ಯ ಸಙ್ಕ್ಷೇಪೇಣ ತನ್ತ್ರದ್ವಯೇಽವಸ್ಥಾನಂ ನಿಯಮಯನ್ನಾಹ- ಶಾಲಾಕ್ಯತನ್ತ್ರಮಿತ್ಯಾದಿ| ಇತಿ ಚತ್ವಾರಿ ತನ್ತ್ರಾಣಿ ಉತ್ತರಸಞ್ಜ್ಞಕೇ ತನ್ತ್ರೇ ಸನ್ತಿ| ಉತ್ತರತನ್ತ್ರೇ ಚತುರ್ಣಾಂ ತನ್ತ್ರಾಣಾಮವಸ್ಥಾನಂ ಪ್ರತಿಪಾದ್ಯ ಪೂರ್ವೇಽಪಿ ಶಲ್ಯತನ್ತ್ರೇ ಚತುರ್ಣಾಂ ತನ್ತ್ರಾಣಾಮವಸ್ಥಾನಂ ಪ್ರತಿಪಾದಯನ್ನಾಹ- ವಾಜೀಕರಮಿತ್ಯಾದಿ|- ವಾಜೀಕರಂ ತನ್ತ್ರಂ ಚಿಕಿತ್ಸಾಸು ಯದುಕ್ತಂ, ತಥಾ ರಸಾಯನವಿಧಿಶ್ಚ ಯಶ್ಚಿಕಿತ್ಸಾಸೂಕ್ತಃ, ತಥಾ ವಿಷತನ್ತ್ರಂ ಕಲ್ಪಾಃ ಕಲ್ಪಸ್ಥಾನೋಕ್ತಂ ವಿಷತನ್ತ್ರಮ್, ಏತತ್ತ್ರಯಂ ಪೂರ್ವೇ ಶಲ್ಯತನ್ತ್ರೇ ಪ್ರತಿಪಾದಿತಮ್| ಶಲ್ಯಜ್ಞಾನಂ ಶಲ್ಯಾಙ್ಗಜ್ಞಾನಂ, ಸಮನ್ತತಃ ಸರ್ವತ್ರ| ಇತ್ಯಷ್ಟಾಙ್ಗಮಿದಮಿತ್ಯಾದಿ ಇತ್ಯನೇನ ಪ್ರಕಾರೇಣ| ಆದಿದೇವಪ್ರಕಾಶಿತಂ ಧನ್ವನ್ತರಿಣಾ ಪ್ರಕಟೀಕೃತಮ್| ಯುಞ್ಜಾನಾಃ ಪ್ರಯೋಗಂ ಕುರ್ವಾಣಾಃ||೪೪-೪೬||
Adhikarana 16 (47) · Śloka 47
ಏತದ್ಧ್ಯವಶ್ಯಮಧ್ಯೇಯಮ್, ಅಧೀತ್ಯ ಚ ಕರ್ಮಾಪ್ಯವಶ್ಯಮುಪಾಸಿತವ್ಯಮ್, ಉಭಯಜ್ಞೋ ಹಿ ಭಿಷಗ್ ರಾಜಾರ್ಹೋ ಭವತಿ ||೪೭||
एतद्ध्यवश्यमध्येयम्, अधीत्य च कर्माप्यवश्यमुपासितव्यम्, उभयज्ञो हि भिषग् राजार्हो भवति ||४७||
🔊 Audio coming soon
ಏತದ್ಧೀತಿ ಏತತ್ ತನ್ತ್ರಂ, ಹಿ ಸ್ಫುಟಮ್, ಅವಶ್ಯಮಧ್ಯೇಯಮಿತಿ ನಿಶ್ಚಯೇನ ಪಠನೀಯಮ್| ಉಪಾಸಿತವ್ಯಮಿತಿ ಅಭ್ಯಸನೀಯಮ್| ಹಿ ಯಸ್ಮಾದರ್ಥೇ| ರಾಜಾರ್ಹಃ ರಾಜಯೋಗ್ಯೋ ಭವತಿ ರಾಜಪೂಜ್ಯ ಇತ್ಯರ್ಥಃ||೪೭||
Adhikarana 17 (48-50) · Śloka 50
ಭವನ್ತಿ ಚಾತ್ರ- ಯಸ್ತು ಕೇವಲಶಾಸ್ತ್ರಜ್ಞಃ ಕರ್ಮಸ್ವಪರಿನಿಷ್ಠಿತಃ | ಸ ಮುಹ್ಯತ್ಯಾತುರಂ ಪ್ರಾಪ್ಯ ಪ್ರಾಪ್ಯ ಭೀರುರಿವಾಹವಮ್ ||೪೮|| ಯಸ್ತು ಕರ್ಮಸು ನಿಷ್ಣಾತೋ ಧಾರ್ಷ್ಟ್ಯಾಚ್ಛಾಸ್ತ್ರಬಹಿಷ್ಕೃತಃ | ಸ ಸತ್ಸು ಪೂಜಾಂ ನಾಪ್ನೋತಿ ವಧಂ ಚರ್ಚ್ಛತಿ ರಾಜತಃ ||೪೯|| ಉಭಾವೇತಾವನಿಪುಣಾವಸಮರ್ಥೌ ಸ್ವಕರ್ಮಣಿ | ಅರ್ಧವೇದಧರಾವೇತಾವೇಕಪಕ್ಷಾವಿವ ದ್ವಿಜೌ ||೫೦||
भवन्ति चात्र- यस्तु केवलशास्त्रज्ञः कर्मस्वपरिनिष्ठितः | स मुह्यत्यातुरं प्राप्य प्राप्य भीरुरिवाहवम् ||४८|| यस्तु कर्मसु निष्णातो धार्ष्ट्याच्छास्त्रबहिष्कृतः | स सत्सु पूजां नाप्नोति वधं चर्च्छति राजतः ||४९|| उभावेतावनिपुणावसमर्थौ स्वकर्मणि | अर्धवेदधरावेतावेकपक्षाविव द्विजौ ||५०||
🔊 Audio coming soon
ಭವನ್ತಿ ಚಾತ್ರೇತ್ಯಾದಿ| ಕರ್ಮಸ್ವಪರಿನಿಷ್ಠಿತ ಇತಿ ಕರ್ಮಸು ವಿಷಯೇ ಅನಿಷ್ಪನ್ನಃ ಅಶಿಕ್ಷಿತ ಇತ್ಯರ್ಥಃ, ಅದೃಷ್ಟಕರ್ಮೇತ್ಯನ್ಯೇ| ಆಹವಂ ಸಙ್ಗ್ರಾಮಮ್| ಯಸ್ತು ಕರ್ಮಸು ನಿಷ್ಣಾತ ಇತಿ ಯಃ ಪುನಃ ಕರ್ಮಸು ವಿಷಯೇ ಸುಶಿಕ್ಷಿತಃ, ಶಾಸ್ತ್ರಬಹಿಷ್ಕೃತಃ ಶಾಸ್ತ್ರೇ ಚ ಬಹಿರ್ಭೂತಃ, ಧಾರ್ಷ್ಟ್ಯಾತ್ ಪ್ರಾಗಲ್ಭ್ಯಾತ್, ಕರ್ಮ ಕರೋತಿ, ಸ ರಾಜತಃ ರಾಜ್ಞಃ ಸಕಾಶಾತ್, ವಧಂ ಚರ್ಚ್ಛತಿ ವಧಂ ಪ್ರಾಪ್ನೋತಿ| ಉಭಾವೇತಾವನಿಪುಣೌ ಉಭೌ ದ್ವೌ, ಏತೌ ಇಮೌ, ಅನಿಪುಣೌ ಅಶಿಕ್ಷಿತೌ, ಸ್ವಕರ್ಮಣಿ ಚಿಕಿತ್ಸಾಯಾಮ್| ಅರ್ಧವೇದಧರಾವಿತಿ ವೇದಶಬ್ದೋಽತ್ರ ಜ್ಞಾನಾರ್ಥಃ; ತೇನ, ಅರ್ಧಜ್ಞಾನಧರೌ ಶಾಸ್ತ್ರಜ್ಞಃ ಕರ್ಮಜ್ಞೋ ವಾ| ಕಾವಿವೈತಾವರ್ಧವೇದಧರೌ ಸ್ವಕರ್ಮಣ್ಯಸಮರ್ಥೌ? ಆಹ- ಏತಾವೇಕಪಕ್ಷಾವಿವ ದ್ವಿಜಾವಿತಿ|- ಯಥೈಕಪಕ್ಷೌ ದ್ವಿಜೌ ಪಕ್ಷಿಣೌ, ಏತೌ ಸರ್ವತೋ ಗಮನೇಽಸಮರ್ಥೌ ತದ್ವದಿತ್ಯರ್ಥಃ||೪೮-೫೦||
Adhikarana 18 (51) · Śloka 51
ಓಷಧ್ಯೋಽಮೃತಕಲ್ಪಾಸ್ತು ಶಸ್ತ್ರಾಶನಿವಿಷೋಪಮಾಃ | ಭವನ್ತ್ಯಜ್ಞೈರುಪಹೃತಾಸ್ತಸ್ಮಾದೇತಾನ್ ವಿವರ್ಜಯೇತ್ ||೫೧||
ओषध्योऽमृतकल्पास्तु शस्त्राशनिविषोपमाः | भवन्त्यज्ञैरुपहृतास्तस्मादेतान् विवर्जयेत् ||५१||
🔊 Audio coming soon
ಕುತಃ ಕಾರಣಾಚ್ಛಾಸ್ತ್ರಬಹಿಷ್ಕೃತೋ ವಧಮೃಚ್ಛತಿ ರಾಜತ ಇತಿ ಹೇತುಂ ಪ್ರತಿಪಾದಯನ್ನಾಹ- ಓಷಧ್ಯ ಇತ್ಯಾದಿ| ಅಮೃತಕಲ್ಪಾಃ ಅಮೃತತುಲ್ಯಾಃ| ಅಜ್ಞೈರುಪಹೃತಾಃ ಔಷಧವಿಷಯಾಜ್ಞೈಃ ಪ್ರಯುಕ್ತಾಃ, ಓಷಧೇರಜ್ಞಾನಂ ಚ ಶಾಸ್ತ್ರವಿಹೀನತ್ವಾತ್| ತಥಾಚೋಕ್ತಂ- ಯಸ್ತು ಕರ್ಮಸು ನಿಷ್ಣಾತೋ ಧಾರ್ಷ್ಟ್ಯಾಚ್ಛಾಸ್ತ್ರಬಹಿಷ್ಕೃತ ಇತಿ| ಓಷಧೀನಾಂ ಜ್ಞಾನಮಪಿ ನಾಮರೂಪಯೋಗಭೇದಾತ್ತ್ರಿವಿಧಂ; ತತ್ರ ನಾಮಾದಿಷು ಮಧ್ಯೇ ಯೋಗಜ್ಞಾನಂ ಪ್ರಧಾನಮ್, ಇದಂ ಚ ಯೋಗಜ್ಞಾನಂ ಶಾಸ್ತ್ರಜ್ಞಾನೇ ಸತಿ ಭವತಿ| ತಸ್ಮಾದೇತಾನ್ ವಿವರ್ಜಯೇದಿತಿ ಏತಾಞ್ಛಾಸ್ತ್ರಜ್ಞಾನಬಹಿಷ್ಕೃತಾನ್ ವಿಶೇಷೇಣ ಪರಿಹರೇತ್| ದೃಷ್ಟಾನ್ತತ್ರಯೋಪಾದಾನಂ ಚೋರ್ಧ್ವಾಧೋಭಯಭಾಗವ್ಯಾಪನ್ನಿದರ್ಶನಾರ್ಥಮಿತ್ಯೇಕೇ; ಸಂಶೋಧನಪಾಚನಸಂಶಮನೀಯೌಷಧವ್ಯಾಪನ್ನಿದರ್ಶನಾರ್ಥಮಿತ್ಯಪರೇ, ಅನೇಕಕಾಲಾನೇಕಾವಸ್ಥಾನತ್ವಸೂಚನಾರ್ಥಮಿತ್ಯನ್ಯೇ| ಇತರೇ ತ್ವತ್ರ ಶ್ಲೋಕಾಭ್ಯಾಮನ್ಯಥಾ ಸಮಾಧಾನಂ ದಧತಿ| ತಥಾಹಿ- “ಅಥವೈತತ್ತ್ರಯಂ ಯದ್ವನ್ಮಿಲಿತಂ ಮೃತ್ಯುಕಾರಣಮ್| ದುಷ್ಪ್ರಯುಕ್ತಾಸ್ತು ತಾಸ್ತದ್ವನ್ನಿಯತಂ ಮೃತ್ಯುಕಾರಣಮ್|| ಅಪ್ರಸಿದ್ಧಂ ಕ್ವಚಿತ್ ಕಿಞ್ಚಿದಿತ್ಯರ್ಥಂ ವ್ಯಾಪ್ಯ ತತ್ತ್ರಯಮ್| ಗರುಡಾಧಿಷ್ಠಿತೇ ದೇಶೇ ವಿಷಮಪ್ಯವಿಷಂ ಯಥಾ”- ಇತಿ| ಅನ್ಯೇ ತು ಪುನಾರೋಷಧ್ಯೋಽಮೃತಕಲ್ಪಾಸ್ತಥಾ ಸ್ನೇಹಾದಿಷ್ವನಭಿಜ್ಞೋ ಯ ಇತ್ಯುಭಯತ್ರ ಉಭಾವಪಿ ಕರ್ಮಶಾಸ್ತ್ರಾನಭಿಜ್ಞಾವಧಿಕುರ್ವತೇ, ‘ತಸ್ಮಾದೇತೌ ವಿವರ್ಜಯೇತ್’- ಇತಿ ಚ ಪಠನ್ತಿ, ಏತೌ ಪೂರ್ವೋಕ್ತೌ ಕೇವಲಶಾಸ್ತ್ರಜ್ಞಕರ್ಮಜ್ಞೌ ವಿವರ್ಜಯೇದಿತಿ ವ್ಯಾಖ್ಯಾನಯನ್ತಿ| ಏಷ ಪಕ್ಷಃ ಪಞ್ಜಿಕಾಯಾಂ ವಿಸ್ತರೇಣಾಪ್ಯಾದೃತಃ | ಯದ್ಯಪ್ಯೋಷಧಿಶಬ್ದಃ ಫಲಪಾಕಾನ್ತೇಷು ದ್ರವ್ಯೇಷು ವರ್ತತೇ, ತಥಾಽಪ್ಯತ್ರ ಸಮಸ್ತದ್ರವ್ಯವಾಚೀ ಗ್ರಹೀತವ್ಯಃ, ಕುತಃ? ವಿಶೇಷಸ್ಯಾನುಪಾದಾನಾತ್||೫೧||
Adhikarana 19 (52) · Śloka 52
ಸ್ನೇಹಾದಿಷ್ವನಭಿಜ್ಞೋ ಯಶ್ಛೇದ್ಯಾದಿಷು ಚ ಕರ್ಮಸು | ಸ ನಿಹನ್ತಿ ಜನಂ ಲೋಭಾತ್ ಕುವೈದ್ಯೋ ನೃಪದೋಷತಃ ||೫೨||
स्नेहादिष्वनभिज्ञो यश्छेद्यादिषु च कर्मसु | स निहन्ति जनं लोभात् कुवैद्यो नृपदोषतः ||५२||
🔊 Audio coming soon
ಇದಾನೀಂ ಶಾಸ್ತ್ರಜ್ಞಂ ಕರ್ಮಾನಭಿಜ್ಞಮಧಿಕೃತ್ಯಾಹ- ಸ್ನೇಹಾದಿಷ್ವಿತ್ಯಾದಿ| ಛೇದ್ಯಾದಿಭ್ಯಃ ಸ್ನೇಹಾದೀನಿ ಕರ್ಮಾಣಿ ಪ್ರಾಗುಪಯುಜ್ಯನ್ತ ಇತಿ ಸ್ನೇಹಾದೀನಾಂ ಪ್ರಾಗುಪಾದಾನಂ; ಕೇಚಿಚ್ಛೇದ್ಯಾದೀನಾಂ ಗ್ರಹಣಂ ಪ್ರಾಕ್ ಪಠನ್ತಿ| ಕುವೈದ್ಯ ಇತಿ ಕುಶಬ್ದಃ ಕುತ್ಸಾವಚನಃ, ತೇನ ಶಾಸ್ತ್ರಜ್ಞಸ್ಯಾಪಿ ಕರ್ಮಾಜ್ಞಾನೇನ ಕುತ್ಸಿತತ್ವಂ ಪ್ರತಿಪಾದಯತಿ| ನೃಪದೋಷತ ಇತಿ ರಾಜ್ಞಾಮಯಂ ದೋಷೋ ಯೇನ ನಾಜ್ಞಾತಕರ್ಮಣಿ ಪ್ರವರ್ತಯಿತುಂ ವೈದ್ಯಾನ್ನಿವಾರಯನ್ತಿ ಭೂಪಾ ಇತಿ| ಕೇಚಿತ್ ಕರ್ತೃಪದಂ ಸರ್ವತ್ರ ಬಹುವಚನಾನ್ತಂ ಪಠನ್ತಿ ‘ಸ್ನೇದಾದಿಷ್ವನಭಿಜ್ಞಾ ಯೇ’ ಇತ್ಯಾದಿ||೫೨||
Adhikarana 20 (53) · Śloka 53
ಯಸ್ತೂಭಯಜ್ಞೋ ಮತಿಮಾನ್ ಸ ಸಮರ್ಥೋಽರ್ಥಸಾಧನೇ | ಆಹವೇ ಕರ್ಮ ನಿರ್ವೋಢುಂ ದ್ವಿಚಕ್ರಃ ಸ್ಯನ್ದನೋ ಯಥಾ ||೫೩||
यस्तूभयज्ञो मतिमान् स समर्थोऽर्थसाधने | आहवे कर्म निर्वोढुं द्विचक्रः स्यन्दनो यथा ||५३||
🔊 Audio coming soon
ಇದಾನೀಂ ಶಾಸ್ತ್ರಜ್ಞಕರ್ಮಜ್ಞಸ್ಯ ಗುಣಂ ನಿದರ್ಶಯನ್ನಾಹ- ಯಸ್ತೂಭಯಜ್ಞ ಇತ್ಯಾದಿ| ಉಭಯಜ್ಞಃ ಶಾಸ್ತ್ರಜ್ಞಃ ಕರ್ಮಜ್ಞಶ್ಚ| ಮತಿವಾನ್ ಊಹಾಪೋಹಕ್ಷಮ ಇತ್ಯರ್ಥಃ| ಅರ್ಥಸಾಧನೇ ಆರೋಗ್ಯಕರಣೇ| ದೃಷ್ಟಾನ್ತಮಾಹ- ಆಹವೇ ಕರ್ಮನಿರ್ವೋಢುಮಿತ್ಯಾದಿ|- ಆಹವೇ ಸಙ್ಗ್ರಾಮೇ, ಕರ್ಮ ನಿರ್ವೋಢುಂ ಕರ್ಮ ಪ್ರವರ್ತಯಿತುಂ, ಸ್ಯನ್ದನಃ ರಥಃ||೫೩||
Adhikarana 21 (54) · Śloka 54
ಅಥ ವತ್ಸ! ತದೇತದಧ್ಯೇಯಂ ಯಥಾ ತಥೋಪಧಾರಯ ಮಯಾ ಪ್ರೋಚ್ಯಮಾನಂ- ಅಥ ಶುಚಯೇ ಕೃತೋತ್ತರಾಸಙ್ಗಾಯಾವ್ಯಾಕುಲಾಯೋಪಸ್ಥಿತಾಯಾಧ್ಯಯನಕಾಲೇ ಶಿಷ್ಯಾಯ ಯಥಾಶಕ್ತಿ ಗುರುರುಪದಿಶೇತ್ ಪದಂ ಪಾದಂ ಶ್ಲೋಕಂ ವಾ; ತೇ ಚ ಪದಪಾದಶ್ಲೋಕಾ ಭೂಯಃ ಕ್ರಮೇಣಾನುಸನ್ಧೇಯಾಃ, ಏವಮೇಕೈಕಶೋ ಘಟಯೇದಾತ್ಮನಾ ಚಾನುಪಠೇತ್; ಅದ್ರುತಮವಿಲಮ್ಬಿತಮವಿಶಙ್ಕಿತಮನನುನಾಸಿಕಂ ಸುವ್ಯಕ್ತಾಕ್ಷರಮಪೀಡಿತವರ್ಣಮಕ್ಷಿಭ್ರುವೌಷ್ಠಹಸ್ತೈರನಭಿನೀತಂ ಸುಸಂಸ್ಕೃತಂ ನಾತ್ಯುಚ್ಚೈರ್ನಾತಿನೀಚೈಶ್ಚ ಸ್ವರೈಃ ಪಠೇತ್ | ನ ಚಾನ್ತರೇಣ ಕಶ್ಚಿದ್ವ್ರಜೇತ್ ತಯೋರಧೀಯಾನಯೋಃ ||೫೪||
अथ वत्स! तदेतदध्येयं यथा तथोपधारय मया प्रोच्यमानं- अथ शुचये कृतोत्तरासङ्गायाव्याकुलायोपस्थितायाध्ययनकाले शिष्याय यथाशक्ति गुरुरुपदिशेत् पदं पादं श्लोकं वा; ते च पदपादश्लोका भूयः क्रमेणानुसन्धेयाः, एवमेकैकशो घटयेदात्मना चानुपठेत्; अद्रुतमविलम्बितमविशङ्कितमननुनासिकं सुव्यक्ताक्षरमपीडितवर्णमक्षिभ्रुवौष्ठहस्तैरनभिनीतं सुसंस्कृतं नात्युच्चैर्नातिनीचैश्च स्वरैः पठेत् | न चान्तरेण कश्चिद्व्रजेत् तयोरधीयानयोः ||५४||
🔊 Audio coming soon
ಇದಾನೀಂ ಪ್ರಕೃತಮಧ್ಯಯನಂ ಪ್ರಸ್ತೌತಿ- ಅಥ ವತ್ಸೇತ್ಯಾದಿ| ಅಥೇತಿ ಆಹ್ನಿಕಾದ್ಯಾವಶ್ಯಕಾದಾನನ್ತರ್ಯೇ, ಆವಶ್ಯಕಮಾಹ್ನಿಕಂ ಕೃತ್ವೇತ್ಯರ್ಥಃ| ಶುಚಯೇ ಕೃತಾಹ್ನಿಕತ್ವೇನ ಪವಿತ್ರಾಯ| ಕೃತೋತ್ತರಾಸಙ್ಗಾಯ ಗೃಹೀತೋತ್ತರೀಯವಸ್ತ್ರಾಯ| ಅವ್ಯಾಕುಲಾಯ ಏಕಚಿತ್ತಾಯ| ಉಪಸ್ಥಿತಾಯ ಸಮೀಪಸ್ಥಿತಾಯ, ದೂರಸ್ಥಿತಾವನ್ತರಾಯಸಮ್ಭವಃ; ಉಪಸ್ಥಿತಾಯ ಅಭಿವಾದನಾನನ್ತರಂ ಕೃತೋಪಸ್ಥಾನಾಯೇತ್ಯನ್ಯೇ| ಅಧ್ಯಯನಕಾಲೇ ಪ್ರಾತರಾದಾವನಧ್ಯಯನವರ್ಜಿತೇ| ಶಿಷ್ಯಾಯ ಉಪನಯನವಿಧಾನೇನಾಗ್ನಿಸಾಕ್ಷಿಕಮನುಶಿಷ್ಟಾಯ| ಯಥಾಶಕ್ತಿ ಶಿಷ್ಯಸ್ಯ ಶಕ್ತ್ಯನತಿಕ್ರಮೇಣ| ಪದಂ ಪಾದಂ ಶ್ಲೋಕಂ ವೇತಿ ಅನೇನ ತ್ರಿವಿಧಾಂ ಗ್ರಹಣಶಕ್ತಿಂ ಸ್ಥಾಪಯತಿ; ತೇನ ಹೀನಶಕ್ತಯೇ ಪದಂ, ತಚ್ಚ ಪದಂ ಸ್ವಾದ್ಯನ್ತಂ ತ್ಯಾದ್ಯನ್ತಂ ವಾ; ತಥಾಹಿ- “ಶುಚಯೇ ಕೃತೋತ್ತರಾಸಙ್ಗಾಯ” ಇತ್ಯಾದಿ ಸ್ವಾದ್ಯನ್ತಂ ಭವತಿ, ಉಪದಿಶ್ಯತೇ ಇತಿ ತ್ಯಾದ್ಯನ್ತಂ; ಮಧ್ಯಮಶಕ್ತಯೇ ಪಾದಂ ಶ್ಲೋಕಚತುರ್ಥಾಂಶಮ್; ಉತ್ತಮಶಕ್ತಯೇ ಶ್ಲೋಕಂ ಚತುಷ್ಪಾದಪರಿಪೂರ್ಣಮ್| ತೇ ಚ ಪದಪಾದಶ್ಲೋಕಾ ಉಪದಿಷ್ಟಾಃ, ಭೂಯಃ ಪುನಃ ಪುನಃ, ಅನುಕ್ರಮೇಣ, ಸನ್ಧೇಯಾಃ ಸನ್ಧಾನೀಯಾಃ; ತಥಾಹಿ- ಪದೇನ ಪಾದಃ ಸನ್ಧಾನೀಯಃ, ಪದಪಾದಾಭ್ಯಾಂ ಶ್ಲೋಕಃ ಸನ್ಧಾನೀಯಃ| ಏವಮೇಕೈಕಶೋ ಘಟಯೇತ್ ಅನೇನ ಪ್ರಕಾರೇಣ ಏಕಮೇಕಂ ಶಿಷ್ಯಂ ಪ್ರತಿ ಯೋಜನಿಕಾಂ ಕಾರಯೇತ್| ಆತ್ಮನಾ ಚಾನುಪಠೇತ್ ಪಠತಃ ಶಿಷ್ಯಸ್ಯ ಪಶ್ಚಾದಾಚಾರ್ಯಃ ಸ್ವಯಂ ಪಠೇತ್| ಶಿಷ್ಯಸ್ಯ ಸುಖಪಠನಾರ್ಥಮ | ಕಾಯಮನೋಭ್ಯಾಂ ಶಿಷ್ಯಂ ನಿಯಮ್ಯ ಪಾಠೇ ವಾಚಿ ನಿಯನ್ತುಮಾಹ- ಅದ್ರುತಮಿತ್ಯಾದಿ|- ಅದ್ರುತಮ್ ಅಸನ್ನಿಕೃಷ್ಟವರ್ಣಪದಪಾದೋಚ್ಚಾರಣಮ್| ಅವಿಲಮ್ಬಿತಂ ನಾತಿವಿಸ್ರಸ್ತಮ್| ಅಶಙ್ಕಿತಂ ತ್ರಾಸರಹಿತಮ್| ಅನನುನಾಸಿಕಂ ಡಞಣನಮಾನ್ ವರ್ಜಯಿತ್ವಾ ನಾಸಿಕೋಚ್ಚರಿತವರ್ಜ್ಯಮ್| ಅಪೀಡಿತವರ್ಣಂ ವರ್ಣಮಪೀಡಯನ್| ಅಕ್ಷಿಭ್ರುವೌಷ್ಠಹಸ್ತೈರನಭಿನೀತಮ್ ಅಕ್ಷ್ಯಾದಿಭಿರ್ನರ್ತಕ ಇವಾಭಿನಯಂ ನ ಕುರ್ಯಾದಿತ್ಯರ್ಥಃ| ಸುಸಂಸ್ಕೃತಮ್ ಅಕ್ಲಿಷ್ಟವರ್ಣಶ್ರುತಿಕಮ್| ನಾತ್ಯುಚ್ಚೈರ್ನಾತಿನೀಚೈರಿತಿ ಏತೇನೈತದುಕ್ತಂ- ಮಧ್ಯಮೇನ ಸ್ವರೇಣ ಪಠೇತ್| ನ ಚಾನ್ತರೇಣೇತ್ಯಾದಿ ತಯೋರ್ಗುರುಶಿಷ್ಯಯೋರ್ಮಧ್ಯೇ ನ ಕಶ್ಚಿದ್ಗಚ್ಛೇದಿತ್ಯರ್ಥಃ| ಅನ್ಯೇ ತ್ವನ್ಯಥಾ ಪಠನ್ತಿ ವ್ಯಾಖ್ಯಾನಯನ್ತಿ ಚ- ಶಾಸ್ತ್ರಮುದ್ದಿಶ್ಯ ತಸ್ಯ ಸಮ್ಪ್ರದಾನಾಯಾಹ- ಅಥ ವತ್ಸೇತ್ಯಾದಿ|- ವತ್ಸ ಸುಶ್ರುತ ಇತಿ ಗಮ್ಯತೇ, ಶಾಸ್ತ್ರಪ್ರಶ್ನೇ ತಸ್ಯಾಧಿಕೃತತ್ವಾತ್| ಕಸ್ಮೈ ತದ್ದೇಯಮಿತ್ಯಾಹ- ಶುಚಯ ಇತ್ಯಾದಿ||೫೪||
Adhikarana 22 (55) · Śloka 55
ಭವತಶ್ಚಾತ್ರ | ಶುಚಿರ್ಗುರುಪರೋ ದಕ್ಷಸ್ತನ್ದ್ರಾನಿದ್ರಾವಿವರ್ಜಿತಃ | ಪಠನ್ನೇತೇನ ವಿಧಿನಾ ಶಿಷ್ಯಃ ಶಾಸ್ತ್ರಾನ್ತಮಾಪ್ನುಯಾತ್ ||೫೫||
भवतश्चात्र | शुचिर्गुरुपरो दक्षस्तन्द्रानिद्राविवर्जितः | पठन्नेतेन विधिना शिष्यः शास्त्रान्तमाप्नुयात् ||५५||
🔊 Audio coming soon
ಪಠತಃ ಶಿಷ್ಯಸ್ಯ ಶಾಸ್ತ್ರಾನ್ತಾವಾಪ್ತಿಹೇತುಮಾಹ- ಭವತಶ್ಚಾತ್ರೇತ್ಯಾದಿ| ಶುಚಿಃ ಬಾಹ್ಯಾಭ್ಯನ್ತರಶೌಚಯುಕ್ತಃ| ಗುರುಪರಃ ಗುರುಕಾರ್ಯರತಃ| ದಕ್ಷಃ ನಿತ್ಯಾಭಿಯುಕ್ತಃ| ತನ್ದ್ರಾ ಆಲಸ್ಯಮ್||೫೫||
Adhikarana 23 (56) · Śloka 56
ವಾಕ್ಸೌಷ್ಠವೇಽರ್ಥವಿಜ್ಞಾನೇ ಪ್ರಾಗಲ್ಭ್ಯೇ ಕರ್ಮನೈಪುಣೇ | ತದಭ್ಯಾಸೇ ಚ ಸಿದ್ಧೌ ಚ ಯತೇತಾಧ್ಯಯನಾನ್ತಗಃ ||೫೬||
वाक्सौष्ठवेऽर्थविज्ञाने प्रागल्भ्ये कर्मनैपुणे | तदभ्यासे च सिद्धौ च यतेताध्ययनान्तगः ||५६||
🔊 Audio coming soon
ಅಧ್ಯಯನಾನ್ತಗಃ ಶಿಷ್ಯಃ ಕಿಂ ಕುರ್ಯಾದಿತ್ಯಾಹ- ವಾಗಿತ್ಯಾದಿ| ವಾಕ್ಸೌಷ್ಠವೇ ಅತಿಸ್ಪಷ್ಟವಾಕ್ತ್ವೇ| ಪ್ರಾಗಲ್ಭ್ಯೇ ಧಾರ್ಷ್ಟ್ಯೇ; ಪ್ರಾಗಲ್ಭ್ಯಾನ್ಮಹತೋಽಪಿ ರೋಗಾನ್ ಸಾಧ್ಯಾನುತ್ಸಾಹೀ ಸಾಧಯತಿ| ತದಭ್ಯಾಸೇ ಕರ್ಮಾಭ್ಯಾಸೇ, ಚಶಬ್ದಾತ್ ಕರ್ಮದರ್ಶನೇಽಪಿ| ಸಿದ್ಧೌ ಚೇತಿ ಆರಬ್ಧಾಭಿಪ್ರೇತಾರ್ಥಸಾಧನಂ ಸಿದ್ಧಿಃ; ಚಕಾರೋಽತ್ರಾಸಾಧ್ಯಾನಾಮನಾರಮ್ಭಮನುಕ್ತಂ ಸಮುಚ್ಚಿನೋತಿ||೫೬||
Adhikarana puShpikA · Śloka 3
ಇತಿ ಸುಶ್ರುತಸಂಹಿತಾಯಾಂ ಸೂತ್ರಸ್ಥಾನೇಽಧ್ಯಯನಸಮ್ಪ್ರದಾನೀಯೋ ನಾಮ ತೃತೀಯೋಽಧ್ಯಾಯಃ ||೩||
इति सुश्रुतसंहितायां सूत्रस्थानेऽध्ययनसम्प्रदानीयो नाम तृतीयोऽध्यायः ||३||
🔊 Audio coming soon
ಇತಿ ಶ್ರೀಡಲ್ಹ(ಹ್ಲ)ಣವಿರಚಿತಾಯಾಂ ಸುಶ್ರುತವ್ಯಾಖ್ಯಾಯಾಂ ನಿಬನ್ಧಸಙ್ಗ್ರಹಾಖ್ಯಾಯಾಂ ಸೂತ್ರಸ್ಥಾನೇ ತೃತೀಯೋಽಧ್ಯಾಯಃ||೩||