5. agrōpaharaṇīyādhyāyaḥ

Adhikarana 1 (1-2) · Śloka 2

অথাতোঽগ্রোপহরণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাতোঽগ্রোপহরণীযমিতি| কর্মণোঽগ্রে প্রথমতঃ, উপহরণং যন্ত্রাদিসম্ভারস্য, তদধিকৃত্য কৃতোঽধ্যাযঃ অগ্রোপহরণীযঃ||১-২||

Adhikarana 2 (3) · Śloka 3

ত্রিবিধং কর্ম- পূর্বকর্ম, প্রধানকর্ম, পশ্চাত্কর্মেতি; তদ্ব্যাধিং প্রত্যুপদেক্ষ্যামঃ ||৩||

পূর্বকর্মেত্যাদি তত্রৈকে- “লঙ্ঘনাদি বিরেকান্তং পূর্বকর্ম ব্রণস্য চ| পাটনং রোপণং যচ্চ প্রধানং কর্ম তত্ স্মৃতম্| বলবর্ণাগ্নিকার্যং তু পশ্চাত্কর্ম সমাদিশেত্’’- ইতি; অন্যে তু সংশোধ্যস্য পাচনস্নেহনস্বেদনানি পূর্বকর্ম, বমনবিরেচনবস্তিনস্যসিরামোক্ষণানি প্রধানং কর্ম, পেযাদ্যন্নসংসর্জনং পশ্চাত্কর্ম; অপরে তু চযাদীনাং পূর্বরূপান্তানামাতঙ্কোত্পত্তেঃ প্রাগ্যত্ ক্রিযতে তত্ পূর্বকর্ম, আতঙ্কোত্পত্তৌ যত্ তত্ প্রধানং কর্ম, নিবৃত্তাতঙ্কস্যানুবন্ধোপচরণায যত্ তত্ পশ্চাত্কর্ম| ইদং তত্ পূর্বকর্মেত্যাদি ইহ কথং নোদাহ্রিযত ইতি প্রষ্টুরুত্তরমাহ- তদ্ব্যাধিমিত্যাদি|- তদিতি ত্রিবিধং কর্ম ব্যাধিং ব্যাধিং প্রত্যুপদেক্ষ্যামঃ; ন ইহ, গ্রন্থগৌরবভযাত্||৩||

Adhikarana 3 (4) · Śloka 4

অস্য তু শাস্ত্রস্য শস্ত্রকর্মপ্রাধান্যাচ্ছস্ত্রকর্মৈব তাবত্ পূর্বমুপদেক্ষ্যামস্তত্সম্ভারাংশ্চ ||৪||

ননু, ছেদ্যাদীনাং কর্মণাং তত্সম্ভারাণামেব চাত্র পূর্বমুপাদানং, কুতো ন স্নেহাদীনাং তত্কর্মণাং চেত্যাহ- অস্য তু শাস্ত্রস্যেত্যাদি||৪||

Adhikarana 4 (5) · Śloka 5

তচ্চ শস্ত্রকর্মাঽষ্টবিধং; তদ্যথা- ছেদ্যং, ভেদ্যং, লেখ্যং, বেধ্যম্, এষ্যম্, আহার্যং, বিস্রাব্যং, সীব্যমিতি ||৫||

তত্তু শস্ত্রনির্বর্ত্যং কর্ম নিযতাকৃতিবিশেষেণ নানাবিধপ্রযোজনেন ভিন্নং প্রদর্শযন্নাহ- তচ্চ শস্ত্রকর্মেত্যাদি| ছেদ্যং নিঃশেষতশ্ছেদনীযমর্শঃপ্রভৃতি; ভেদ্যং ভেদনীযং, বিদ্রধ্যাদি; লেখ্যং লেখনীযং, রোহিণ্যাদি; বেধ্যম্ অল্পমুখৈঃ শস্ত্রৈর্ব্যধনীযং সিরাদি; বেধ্যস্থানে ‘ব্যধ্যং’ ইত্যেকে পঠন্তি; এষ্যম্ এষণীযং, নাড্যাদি; আহার্যম্ আহরণীযং, শর্করাদি; বিস্রাব্যং বিস্রাবণীযং, তচ্চ বিদ্রধিকুষ্ঠাদি; সীব্যং সীবনীযং, তচ্চ ‘‘সীব্যা মেদঃসমুত্থাশ্চ ভিত্ত্বা সুলিখিতা গদাঃ’’ (সূ. অ.২৫) ইতি| যদ্যপি ছেদ্যাদযঃ শব্দা ব্যাধিবাচকাঃ , তথাঽপ্যভেদোপচারাচ্ছস্ত্রকর্মব্যপদেশং লভন্তে| এষণাহরণে শস্ত্রকর্মণি যদ্যপি কেচিন্ন মন্যন্তে, তথাঽপি ছিত্ত্বা ভিত্ত্বাঽপ্যেষণাহরণে ক্রিযেতে, অতোঽত্র শস্ত্রকর্মণি নির্দিষ্টে||৫||

Adhikarana 5 (6) · Śloka 6

অতোঽন্যতমং কর্ম চিকীর্ষতা বৈদ্যেন পূর্বমেবোপকল্পযিতব্যানি ভবন্তি, তদ্যথা- যন্ত্রশস্ত্রক্ষারাগ্নিশলাকাশৃঙ্গজলৌকালাবূজাম্ববৌষ্ঠপিচুপ্রোতসূত্রপত্রপট্টমধুঘৃতবসাপযস্তৈল- তর্পণকষাযালেপনকল্কব্যজনশীতোষ্ণোদককটাহাদীনি, পরিকর্মিণশ্চ স্নিগ্ধাঃ স্থিরা বলবন্তঃ ||৬||

অতোঽন্যতমমিত্যাদি| -অতঃ এষাং মধ্যে, অন্যতমম্ একতমং, কর্ম ছেদ্যাদিকং, চিকীর্ষতা কর্তুমিচ্ছতা, পূর্বমেবোপকল্পযিতব্যানি সমীপমানেতব্যানি| জাম্ববৌষ্ঠং জম্বুফলসদৃশমুখাগ্রা কৃষ্ণপাষাণরচিতা বর্তিঃ, পিচুঃ ‘তুলং’ ইতি লোকে, প্রোতং কর্পটং, পট্টঃ ব্রণবন্ধনদ্রব্যং, তর্পণং জলপ্লুতং শক্তুক্ষীরাদি, কষাযঃ ঔষধক্বথিতমুদকং, ব্যজনং বংশাদিরচিতং, কটাহো লৌহাদিনির্মিতঃ; আদিশব্দাত্ কবলিকামৃত্কপালকলসস্থালীশযনাসনাদি| যন্ত্রাদিষু মধ্যে কানিচিদুপকরণানি কর্মাঙ্গানি, কানিচিদ্ ব্যাপত্প্রশমনানি| পরিকর্মিণশ্চেতি ন কেবলং যন্ত্রাদীন্যেবোপকল্পযিতব্যানি কিন্তু পরিকর্মিণশ্চ সর্বকর্মণাং কর্তারঃ পরিচারকাঃ; কিংবিশিষ্টাস্তে? স্নিগ্ধা অনুরক্তাঃ, স্থিরাঃ অচলাঃ, বলবন্তঃ সর্বকার্যেষু সমর্থাঃ||৬||

Adhikarana 6 (7) · Śloka 7

ততঃ প্রশস্তেষু তিথিকরণমুহূর্তনক্ষত্রেষু দধ্যক্ষতান্নপানরত্নৈরগ্নিং বিপ্রান্ ভিষজশ্চার্চযিত্বা, কৃতবলিমঙ্গলস্বস্তিবাচনং লঘুভুক্তবন্তং প্রাঙ্মুখমাতুরমুপবেশ্য , যন্ত্রযিত্বা , প্রত্যঙ্মুখো বৈদ্যো মর্মসিরাস্নাযুসন্ধ্যস্থিধমনীঃ পরিহরন্, অনুলোমং শস্ত্রং নিদধ্যাদাপূযদর্শনাত্ , সকৃদেবাপহরেচ্ছস্ত্রমাশু চ; মহত্স্বপি চ পাকেষু দ্ব্যঙ্গুলান্তরং ত্র্যঙ্গুলান্তরং বা শস্ত্রপদমুক্তম্ ||৭||

ততঃ প্রশস্তেষ্বিত্যাদি|- ততঃ যন্ত্রাদিসম্ভারোপকল্পনানন্তরম্| তিথযঃ প্রতিপদাদযঃ, করণানি ববাদীনি, মুহূর্তাঃ ত্রিংশচ্ছিবাদ্যাঃ, নক্ষত্রাণি অশ্বিনীপ্রভৃতীনি; প্রশস্তত্বং চৈষাং জ্যোতিঃশাস্ত্রবিদাং বচনাজ্জ্ঞেযম্| অক্ষতানি যবধান্যানি, রত্নানি মাণিক্যমৌক্তিকাদীনি| কৃতবলিমঙ্গলস্বস্তিবাচনমিতি বলিঃ পূজোপহারঃ, মঙ্গলং গীতাদি, স্বস্তিবাচনমাশীর্বাদোচ্চারণং, কৃতশব্দো বলিপ্রভৃতিভিঃ সহ প্রত্যেকং সম্বধ্যতে| মর্মাণি সপ্তোত্তরশতভেদভিন্নানি, সিরাঃ সপ্তশতভেদভিন্নাঃ, নবশতভেদভিন্নাঃ স্নাযবঃ, সন্ধযঃ দশোত্তরদ্বিশতভেদভিন্নাঃ, অস্থীনি শতত্রযভেদভিন্নানি, ধমন্যঃ নাভিপ্রভবাশ্চতুর্বিংশতিভেদভিন্নাঃ; এতাঃ পরিত্যজন্| অনুলোমমিতি লোমানুকূল্যেন, যেনৈবাবর্তেন লোমানি সন্তি তেনৈবাবর্তেনেত্যর্থঃ; প্রতিলোমং তু লোমভিরেব প্রতিহতধারং শস্ত্রং কুণ্ঠীভবতি ব্যথাং চোত্পাদযতি| নিদধ্যাত্ প্রবেশযেত্| কিযদ্দূরং শস্ত্রং নিদধ্যাদিত্যাহ- আপূযদর্শনাদিতি| সকৃত্ একবারং, ন পুনঃ পুনরিত্যর্থঃ| আশু চেতি চশব্দ এবার্থঃ, তেনোভযত্রাপি নিযমঃ; এতেন সকৃদেব শস্ত্রমপহরেত্, আশ্বেব শস্ত্রমপহরেদিত্যুক্তম্| শস্ত্রং প্রণিদধ্যাদিত্যত্র শস্ত্রপ্রণিধানমাত্রমুক্তম্, অপহরেচ্ছস্ত্রমাশু চেত্যত্র শস্ত্রশব্দ আশ্বপহরণক্রিযযা সম্বধ্যত ইতি ন পৌনরুক্ত্যম্| ইদানীং সুদূরশস্ত্রপাতেঽনর্থং সম্ভাবযন্নবধিমাহ- মহত্স্বপি চ পাকেষ্বিত্যাদি| অন্তরশব্দোঽযমবকাশবাচী; তেন শস্ত্রপদং শস্ত্রস্থানং দ্ব্যঙ্গুলাবকাশং ত্র্যঙ্গুলাবকাশং বেত্যুক্তং; তত্র দ্ব্যঙ্গুলাবকাশং নাত্যবগাঢে, ত্র্যঙ্গুলাবকাশমবগাঢে ইতি| কেচিদন্তরশব্দং ন পঠন্তি||৭||

Adhikarana 7 (8) · Śloka 8

তত্রাযতো বিশালঃ সমঃ সুবিভক্তো নিরাশ্রয ইতি ব্রণগুণাঃ ||৮||

ব্রণকর্মণি প্রশস্তমাকৃতিবিশেষৈরাহ - তত্রেত্যাদি|- তত্রেতি শস্ত্রকর্মণি, এতে আযতত্বাদযো ব্রণগুণাঃ| আযতো দীর্ঘঃ; বিশালো বিস্তীর্ণঃ; সম ইতি সমপাকঃ, অসমপাকো হি কিঞ্চিত্পক্বঃ কিঞ্চিদপক্বঃ শস্ত্রপাতনায সুখো ন ভবতি| অন্যে তু বিশালশব্দেন চতুরস্রমাচক্ষতে, সমশব্দেন বৃত্তম্| তদুক্তম্- “আযতশ্চতুরস্রো বৃত্তস্ত্রিপুটক ইতি ব্রণাকৃতিসমাসঃ” (সূ. অ.২২)- ইতি; ইহ চতস্রো ব্রণাকৃতযো ব্রণগুণত্বেন কর্মণি নির্দিষ্টাঃ| অন্যে তু সমো গোমূত্রসর্পণবন্ন বিষমগতিঃ| স চ আযতে ব্রণে সম ইতি বিশেষণম্| সুবিভক্তঃ সুব্যক্তঃ, সুষ্ঠু পৃথগ্ভূতসকলাবযবঃ| নিরাশ্রযঃ জিহ্বাদন্তসন্ধ্যাদ্যপ্রাপ্যদেশমনাশ্রিতঃ| অন্যে ত্বন্যথা ব্যাখ্যানযন্তি- বৈদ্যকৃতব্রণগুণানাহ- তত্রাযত ইত্যাদি|- সমো নিম্নোন্নতত্বরহিতঃ| সুবিভক্তো হীনাতিদোষত্যক্তঃ| ইত্থম্ভূতে বৈদ্যকৃতে ব্রণে কল্ককষাযাদ্যবচারণং সুখং ক্রিযতে| অতো বিপরীতা ব্রণদোষাঃ| শেষং সুগমম্||৮||

Adhikarana 8 (9) · Śloka 9

ভবতশ্চাত্র- আযতশ্চ বিশালশ্চ সুবিভক্তো নিরাশ্রযঃ | প্রাপ্তকালকৃতশ্চাপি ব্রণঃ কর্মণি শস্যতে ||৯||

অমুমেবার্থং শ্লোকেন স্ফুটীকুর্বন্নাহ- আযতশ্চেত্যাদি| এবং বিধো ব্রণঃ শস্ত্রকর্মণি প্রশস্যতে| আযতশ্চ বিশালশ্চেতি দ্বিচকারেণ আযতোঽপি বিশালোঽপি আযতবিশল ইতি প্রতিপাদ যতি| নিরাশ্রযো মর্মাদ্যনাশ্রিতঃ; ‘নিরাশয’ ইত্যন্যে, তত্রাননুষঙ্গীত্যর্থঃ| প্রাপ্তকালকৃতশ্চাপীতি যুক্তে কালে কৃতঃ; এতেন শস্ত্রক্ষারাগ্নিসাধ্যো বালবৃদ্ধযোরপ্রাপ্তকালঃ, তযোর্ব্রণে শস্ত্রাদিনিষেধাত্; অথবা শীতকালেঽগ্নিসাধ্যো ব্রণঃ, গ্রীষ্মে স এবা প্রাপ্তকালঃ| অন্যে তু ‘যুক্তকালকৃতঃ’ ইতি পঠন্তি; তত্র সমপাক ইত্যাচক্ষতে, যুক্তকালকৃতঃ সম্যক্পাককৃতপ্রতিক্রিয ইত্যপরে| আযতশ্চ বিশালশ্চেত্যাদিশ্লোকং কেচিন্ন পঠন্তি||৯||

Adhikarana 9 (10) · Śloka 10

শৌর্যমাশুক্রিযা শস্ত্রতৈক্ষ্ণ্যমস্বেদবেপথু | অসম্মোহশ্চ বৈদ্যস্য শস্ত্রকর্মণি শস্যতে ||১০||

অথ যে বৈদ্যগুণাঃ শস্ত্রকর্মণি তানাহ- শৌর্যমিত্যাদি| এতে শৌর্যাদযো গুণা বৈদ্যস্য শস্ত্রকর্মণি শ্লাঘ্যন্তে| শৌর্যং নির্ভযত্বং, ভযভীতো হি সাধ্যমপি ব্রণমবগাঢমূলং নারভতে, আরব্ধং বা অবশেষযতি| আশুক্রিযা লঘুহস্ততা শীঘ্রং শস্ত্রকর্মকরণম্, আশুক্রিযযাঽঽতুরস্য চিরং ক্লমো ন ভবতি| শস্ত্রতৈক্ষ্ণ্যং সুনিশিতত্বং সুধারত্বং চ, তেন রুজা ন ভবতি| অসম্মোহঃ অসম্মূঢতা, স চামপক্বব্রণপরিজ্ঞানে তথা প্রাপ্তানুষ্ঠানে চ; ব্রণচ্ছেদাদিষু রক্তাদিদর্শনেঽসম্মোহ ইত্যন্যে| অমুমপি শ্লোকং কেচিন্ন পঠন্তি||১০||

Adhikarana 10 (11-12) · Śloka 12

একেন বা ব্রণেনাশুধ্যমানে নাঽন্তরা বুদ্ধ্যাঽবেক্ষ্যাপরান্ ব্রণান্ কুর্যাত্ ||১১|| ভবতি চাত্র- যতো যতো গতিং বিদ্যাদুত্সঙ্গো যত্র যত্র চ | তত্র তত্র ব্রণং কুর্যাদ্যথা দোষো ন তিষ্ঠতি ||১২||

অশুদ্ধাবন্যেঽপি ব্রণাঃ কার্যা ইত্যাহ- একেন বা ব্রণেনেত্যাদি| না পুরুষঃ| অন্তরা মধ্যে| ভবতি চাত্রেত্যাদি| গতিং নাডীম্| উত্সঙ্গ ইবোত্সঙ্গঃ ব্রণাশযে হি চিরকালপূযাবস্থানেনামমবদারিতমন্তঃপ্রদেশান্তরং নিম্নমুত্সঙ্গতুল্যত্বাদুত্সঙ্গ ইত্যুচ্যতে; উত্ ঊর্ধ্বং পূযস্য সঙ্গ উত্সঙ্গ ইত্যন্যে| যথা দোষো ন তিষ্ঠতীতি| দোষোঽত্র পূযঃ; পূযাবস্থানাদ্ বাতাদযো দোষা অনুবধ্নন্তীতি পূয এব দোষশব্দেনোচ্যতে, কারণে কার্যোপচারাত্||১১-১২||

Adhikarana 11 (13-15) · Śloka 15

তত্র ভ্রূগণ্ডশঙ্খললাটাক্ষিপুটৌষ্ঠদন্তবেষ্টকক্ষাকুক্ষিবঙ্ক্ষণেষু তির্যক্ ছেদ উক্তঃ ||১৩|| (চন্দ্রমণ্ডলবচ্ছেদান্ পাণিপাদেষু কারযেত্ | অর্ধচন্দ্রাকৃতীংশ্চাপি গুদে মেঢ্রে চ বুদ্ধিমান্) ||১৪|| অন্যথা তু সিরাস্নাযুচ্ছেদনম্, অতিমাত্রং বেদনা, চিরাদ্ব্রণসংরোহো, মাংসকন্দীপ্রাদুর্ভাবশ্চেতি ||১৫||

তির্যক্ছেদো ব্যাপত্সূক্তঃ (সূ. অ.২৫), তস্য বিশিষ্টবিষযে প্রতিপ্রসবং কুর্বন্নাহ- তত্র ভ্রূগণ্ডেত্যাদি|- গণ্ডঃ কপোলঃ, অক্ষিপুটঃ অক্ষিবর্ত্ম, দন্তবেষ্টকো দন্তবেষ্টনমাংসং, কক্ষা বাহুমূলং, কুক্ষিঃ উদরং, বঙ্ক্ষণম্ ঊরুসন্ধিঃ| (চন্দ্রমণ্ডলবচ্ছেদানিত্যাদি সুগমম্|) অন্যথা ত্বিত্যাদি| মাংসকন্দীপ্রাদুর্ভাবঃ কন্দাকারমাংসাঙ্কুরসম্ভবঃ, কন্দ এব কন্দী, অল্পত্বাত্| ‘অন্যথা তু’ ইত্যত্র ‘অন্যত্র তু’ ইতি কেচিত্ পঠন্তি ব্যাখ্যানযন্তি চ- অন্যত্র যদি ছেদনং ক্রিযতে ইত্যর্থঃ| ‘ছেদনং’ ইত্যত্র চ ‘ক্ষণনং’ ইতি পঠন্তি, ক্ষণনং হিংসনম্||১৩-১৫||

Adhikarana 12 (16) · Śloka 16

মূঢগর্ভোদরার্শোঽশ্মরীভগন্দরমুখরোগেষ্বভুক্তবতঃ কর্ম কুর্বীত ||১৬||

ভুক্তবতঃ কর্ম কুর্বীতেত্যুক্তং, তস্য বিষযান্তরে প্রতিষেধং দর্শযন্নাহ- মূঢগর্ভেত্যাদি|- মূঢগর্ভাদিষু ষট্স্বন্নপূর্ণকোষ্ঠত্বাদ্যন্ত্রদানাদিভিঃ কষ্টং মরণং বা প্রাপ্নোত্যাতুরঃ, অনিলশ্চ প্রকোপমেতি; মুখরোগেষ্বাহারোঽঙ্গুল্যাদিপীডনেন ঘৃণযা চ নিষ্কাশিতঃ কর্মঘাতং করোতি||১৬||

Adhikarana 13 (17) · Śloka 17

ততঃ শস্ত্রমবচার্য,শীতাভিরদ্ভিরাতুরমাশ্বাস্য, সমন্তাত্ পরিপীড্যাঙ্গুল্যা, ব্রণমভিমৃদ্য(জ্য), প্রক্ষাল্য কষাযেণ প্রোতেনোদকমাদায , তিলকল্কমধুসর্পিঃপ্রগাঢামৌষধযুক্তাং নাতিস্নিগ্ধাং নাতিরূক্ষাং বর্তিং প্রণিদধ্যাত্; ততঃ কল্কেনাচ্ছাদ্য, ঘনাং কবলিকাং দত্ত্বা, বস্ত্রপট্টেন বধ্নীযাত্; বেদনারক্ষোঘ্নৈর্ধূপৈর্ধূপযেত্, রক্ষোঘ্নৈশ্চ মন্ত্রৈ রক্ষাং কুর্বীত ||১৭||

ইদানীং ব্রণক্রমবিধানমাহ- ততঃ শস্ত্রমিত্যাদি| ততঃ অনন্তরং শস্ত্রকর্ম কৃত্বা; আশ্বাস্য শস্ত্রকর্মজনিতখেদমপনীয, মূর্চ্ছাদিপ্রতিবন্ধার্থং; সমন্তাত্ পরিপীড্য সর্বত্র পরিপীডযিত্বা, স্রাবনির্গমনার্থং; ব্রণমভিমৃদ্য ব্রণমর্দনং কৃত্বা, শস্ত্রপদসমীকরণার্থং; ‘ব্রণমভিমৃজ্য’- ইতি কেচিত্ পঠন্তি, বালাস্থিগত্যুত্সঙ্গাদিবিজ্ঞানার্থমিতি চ ব্যাখ্যানযন্তি; প্রক্ষাল্য কষাযেণ সপ্তরাত্রং সদ্যোব্রণবিহিতেন, তদূর্ধ্বং যথাস্বদোষহরৌষধসিদ্ধেন কষাযেণ; বস্ত্রেণোদকমাদায ব্রণান্তর্গতং; তিলকল্কমধুসর্পিঃপ্রগাঢাং তিলকল্কাদিভিরত্যর্থলিপ্তাম্; ঔষধযুক্তাং মিশ্রকোক্তা ‘(অ)জগন্ধাঽজশৃঙ্গী চ’ (সূ. অ.৩৭) ইত্যাদিসংশোধনৌষধযুক্তাং; বর্তিং প্রণিদধ্যাত্ প্রবেশযেত্; কল্কেন সদ্যোব্রণৌষধপিণ্ডেন; কবলিকা ব্রণকল্কৌষধাচ্ছাদনদ্রব্যং, সা চৌষধস্বরসনিঃসরণনিবারণার্থং ভগ্নোক্তপলাশোদুম্বরাদীনাং ত্বক্পত্রাদিকৃতা, অন্যে দ্বিগুণচতুর্গুণমৃদুকর্পটবিরচিতাং কবলিকামাহুঃ, ভৃষ্টযবশক্তুভির্ঘৃতাক্তাং ঘনাং কবলিকাং দদ্যাদিত্যপরে| বেদনারক্ষোঘ্নৈরিতি বেদনাঘ্নানি রুজাঘ্নানি হিঙ্গুলবণাদীনি, রক্ষোঘ্নানি রাক্ষসঘ্নানি বচাদীনি, তৈঃ||১৭||

Adhikarana 14 (18) · Śloka 18

ততো গুগ্গুল্বগুরুসর্জরসবচাগৌরসর্ষপচূর্ণৈর্লবণনিম্বপত্রবিমিশ্রৈরাজ্যযুক্তৈর্ধূপযেত্ | আজ্যশেষেণ চাস্য প্রাণান্ সমালভেত ||১৮||

ধূপনদ্রব্যাণ্যাহ- ততো গুগ্গুল্বিত্যাদি| ন কেবলং ব্রণং ধূপযেত্ শযনাদ্যপি ব্রণদৌর্গন্ধ্যাপগমার্থং নীলমক্ষিকাদিপরিহারার্থং চ; অন্যথা নীলমক্ষিকোপসর্পণাদ্ব্রণে ক্রিমযঃ পতন্তি| আজ্যশেষেণেত্যাদি|- আজ্যশেষেণ ধূপনদ্রব্যেভ্য আজ্যমিশ্রেভ্যঃ পরিশিষ্টেন ঘৃতেন| প্রাণশব্দেনাত্র হৃদযাদয উচ্যন্তে, প্রাণাধিষ্ঠানত্বাত্; তান্ সমালভেত ম্রক্ষযেদভ্যঞ্জযেদিত্যর্থঃ, প্রাণাপ্যাযনার্থম্||১৮||

Adhikarana 15 (19-33) · Śloka 33

উদকুম্ভাচ্চাপো গৃহীত্বা প্রোক্ষযন্ রক্ষাকর্ম কুর্যাত্; তদ্বক্ষ্যামঃ- ||১৯|| কৃত্যানাং প্রতিঘাতার্থং তথা রক্ষোভযস্য চ | রক্ষাকর্ম করিষ্যামি ব্রহ্মা তদনুমন্যতাম্ ||২০|| নাগাঃ পিশাচা গন্ধর্বাঃ পিতরো যক্ষরাক্ষসাঃ | অভিদ্রবন্তি যে যে ত্বাং ব্রহ্মাদ্যা ঘ্নন্তু তান্ সদা ||২১|| পৃথিব্যামন্তরীক্ষে চ যে চরন্তি নিশাচরাঃ | দিক্ষু বাস্তুনিবাসাশ্চ পান্তু ত্বাং তে নমস্কৃতাঃ ||২২|| পান্তু ত্বাং মুনযো ব্রাহ্মযা দিব্যা রাজর্ষযস্তথা | পর্বতাশ্চৈব নদ্যশ্চ সর্বাঃ সর্বে চ সাগরাঃ ||২৩|| অগ্নী রক্ষতু তে জিহ্বাং প্রাণান্ বাযুস্তথৈব চ | সোমো ব্যানমপানং তে পর্জন্যঃ পরিরক্ষতু ||২৪|| উদানং বিদ্যুতঃ পান্তু সমানং স্তনযিত্নবঃ | বলমিন্দ্রো বলপতির্মনুর্মন্যে মতিং তথা ||২৫|| কামাংস্তে পান্তু গন্ধর্বাঃ সত্ত্বমিন্দ্রোঽভিরক্ষতু | প্রজ্ঞাং তে বরুণো রাজা সমুদ্রো নাভিমণ্ডলম্ ||২৬|| চক্ষুঃ সূর্যো দিশঃ শ্রোত্রে চন্দ্রমাঃ পাতু তে মনঃ | নক্ষত্রাণি সদা রূপং ছাযাং পান্তু নিশাস্তব ||২৭|| রেতস্ত্বাপ্যাযযন্ত্বাপো রোমাণ্যোষধযস্তথা | আকাশং খানি তে পান্তু দেহং তব বসুন্ধরা ||২৮|| বৈশ্বানরঃ শিরঃ পাতু বিষ্ণুস্তব পরাক্রমম্ | পৌরুষং পুরুষশ্রেষ্ঠো ব্রহ্মাঽঽত্মানং ধ্রুবো ভ্রুবৌ ||২৯|| এতা দেহে বিশেষেণ তব নিত্যা হি দেবতাঃ | এতাস্ত্বাং সততং পান্তু দীর্ঘমাযুরবাপ্নুহি ||৩০|| স্বস্তি তে ভগবান্ ব্রহ্মা স্বস্তি দেবাশ্চ কুর্বতাম্ | (স্বস্তি তে চন্দ্রসূর্যৌ চ স্বস্তি নারদপর্বতৌ) | স্বস্ত্যগ্নিশ্চৌব বাযুশ্চ স্বস্তি দেবাঃ সহেন্দ্রগাঃ ||৩১|| পিতামহকৃতা রক্ষা স্বস্ত্যাযুর্বর্ধতাং তব | ঈতযস্তে প্রশাম্যন্তু সদা ভব গতব্যথঃ ||৩২|| ইতি স্বাহা | এতৈর্বেদাত্মকৈর্মন্ত্রৈঃ কৃত্যাব্যাধিবিনাশনৈঃ | মযৈবং কৃতরক্ষস্ত্বং দীর্ঘমাযুরবাপ্নুহি ||৩৩||

ইদানীং ব্রণিতস্য শোণিতপূযাদিসম্ভবাদ্রক্ষোভযপরিহারার্থং রক্ষাকর্ম নিদর্শযন্নাহ- উদকুম্ভাচ্চেত্যাদি|- উদকুম্ভাত্ পানীযকুম্ভাত্, আপঃ জলং, গৃহীত্বা আদায, প্রোক্ষযন্ প্রমার্জযন্| রক্ষাকর্মনির্দিষ্টপদানাং মন্ত্রত্বাদ্বিবরণং ন করণীযমিতি কেচিত্; অন্যে তু ব্যাখ্যানযন্তি|- কৃত্যানামিতি কুপিতমন্ত্রিণোঽভিচারকর্মজনিতা রাক্ষসী ‘কৃত্যা’ ইত্যুচ্যতে| প্রতিঘাতার্থং নিবারণার্থম্, অত্র ‘পরিরক্ষার্থং’ ইতি কেচিত্ পঠন্তি| তথা রক্ষোভযস্য চেতি রাক্ষসভযস্য চ প্রতিঘাতার্থমিত্যর্থঃ| ব্রহ্মা তদনুমন্যতামিতি তদ্রক্ষাকর্ম ব্রহ্মা অঙ্গীকরোতু| নাগা ইত্যাদি| যে যে নাগাদযস্ত্বামভিদ্রবন্তি পীডযন্তি তান্ ব্রহ্মাদ্যা দেবা ঘ্নন্ত্বিতি পিণ্ডার্থঃ| তত্র নাগাঃ বাসুক্যাদযঃ, পিশাচাঃ পিশিতাশনাঃ, গন্ধর্বাঃ দেবগাযনা হাহাহূহূপ্রভৃতযঃ, পিতরঃ অগ্নিষ্বাত্তাদযঃ, যক্ষাঃ ধনদাদযঃ, রক্ষসাঃ রাবণপ্রভৃতযঃ| দিক্ষ্বিত্যত্র যে চরন্তীতি সম্বধ্যতে| বাস্তুনিবাসাঃ গৃহভূমিনিবাসিনঃ| প্রাণানিতি অগ্নিঃ সোমো বাযুঃ সত্ত্বং রজস্তমঃ পঞ্চেন্দ্রিযাণি ভূতাত্মেতি প্রাণাঃ, অত্র দ্বাদশপ্রাণেষু মধ্যে সামান্যবাতবাচ্যোঽপি বাতশব্দঃ প্রাণাখ্যে বাতবিশেষে বর্ততে; কুতঃ? চতুর্ণাং ব্যানাদীনামগ্রে বক্ষ্যমাণত্বাত্| সোমঃ চন্দ্রমাঃ| তে তব| পর্জন্যঃ বৃষ্টিমান্ মেঘঃ, ইন্দ্র ইত্যন্যে| স্তনযিত্নবঃ মেঘাঃ| বলপতিরিতি ইন্দ্রস্য বিশেষণম্| মনুঃ প্রজাপতিঃ, মন্যে গ্রীবাপশ্চিমভাগাশ্রিতে দ্বে সিরে ‘মন্যে’ ইত্যুচ্যেতে, মতিং তথা স এব মনুর্মতিং রক্ষত্বিতি সম্বন্ধঃ; ‘তথা মনুর্মতিং রক্ষতু’ ইত্যহং মন্যে, ইতি ব্যাখ্যানযন্তি কেচিত্| সত্ত্বং গুণবিশেষঃ| মনঃ চিত্তম্| রূপমিহ লাবণ্যং বিবক্ষিতং, যত্পর্যাযঃ সৌন্দর্যম্| ছাযা প্রভাভেদঃ; তদুক্তম্- “আসন্না লক্ষ্যতে ছাযা প্রভা দূরাত্ প্রকাশতে” (চ. ই. অ. ৭)- ইতি| রেতঃ শুক্রম্, আপঃ পানীযানি, আপ্যাযযন্তু বর্ধযন্তু| খানি স্রোতাংসি, ইন্দ্রিযাণীত্যন্যে| পরাক্রমঃ সামর্থ্যম্| পৌরুষং মেঢ্রং, পুরুষশ্রেষ্ঠঃ নারাযণঃ| আত্মানং জীবম্| ধ্রুবঃ তারাবিশেষঃ| এতাঃ পূর্বোক্তা দেবতাঃ, নিত্যাঃ সততস্থিতাঃ| স্বস্তি তে ভগবান্ ব্রহ্মেতি স্বস্তি মঙ্গলং, ভগবান্ বিশিষ্টজ্ঞানবান্, দেবাঃ সহেন্দ্রগা ইন্দ্রানুযাযিন ইত্যর্থঃ| পিতামহঃ ব্রহ্মা| ঈতযঃ অন্নাদিক্ষযহেতবোঽতিবৃষ্ট্যাদযঃ; তদুক্তম্- “অতিবৃষ্টিরনাবৃষ্টির্মূষিকাঃ শলভাঃ খগাঃ| স্বচক্রং পরচক্রং চ সপ্তৈতা ঈতযঃ স্মৃতাঃ”- ইতি||১৯-৩৩||

Adhikarana 16 (34) · Śloka 34

ততঃ কৃতরক্ষমাতুরমাগারং প্রবেশ্য, আচারিকমাদিশেত্ ||৩৪||

ইদানীং কৃতরক্ষস্যেতিকর্তব্যতাং দর্শযন্নাহ- ততঃ কৃতরক্ষমিত্যাদি| আগারং গৃহম্, আচারিকং দ্বিবিধমাহারবিহারলক্ষণং ব্রণিতোপাসনীযনির্দিষ্টম্||৩৪||

Adhikarana 17 (35) · Śloka 35

ততস্তৃতীযেঽহনি বিমুচ্যৈবমেব বধ্নীযাদ্বস্ত্রপট্টেন; ন চৈনং ত্বরমাণোঽপরেদ্যুর্মোক্ষযেত্ ||৩৫||

নচৈনমিতি এনং ব্রণং, ত্বরমাণঃ শীঘ্রীভবন্, অপরেদ্যুঃ দ্বিতীযদিবসে, ন মোক্ষযেত্| ‘ততস্তৃতীযেঽহনি বিমুচ্য প্রক্ষাল্য কষাযেণৈবমেব বধ্নীযাদ্বস্ত্রপট্টেন’ ইতি কেচিত্ পঠন্তি| কষাযেণ সদ্যোব্রণোক্তানাং দ্রব্যাণাং ক্বাথেন, এবমেব পূর্ববত্||৩৫||

Adhikarana 18 (36) · Śloka 36

দ্বিতীযদিবসপরিমোক্ষণাদ্বিগ্রথিতো ব্রণশ্চিরাদুপসংরোহতি, তীব্ররুজশ্চ ভবতি ||৩৬||

দ্বিতীযে দিবসে মোক্ষণাদ্দোষং বক্তুমাহ- দ্বিতীযেত্যাদি| বিগ্রথিতঃ গ্রন্থিতঃ| অন্যে তু বিগ্রথিত ইত্যত্র বিশব্দস্য স্থানে হিশব্দং পঠন্তি ব্যাখ্যানযন্তি চ- হিশব্দো যস্মাদর্থে, যস্মাদ্ গ্রথিতঃ সম্যগনঙ্কুরিতো গ্রন্থিভূতস্তস্মান্ন সংরোহতি; উগ্রবেদনশ্চ ব্রণো ভবতীত্যর্থঃ||৩৬||

Adhikarana 19 (37) · Śloka 37

অত ঊর্ধ্বং দোষকালবলাদীনবেক্ষ্য কষাযালেপনবন্ধাহারাচারান্ বিদধ্যাত্ ||৩৭||

অত ঊর্ধ্বমিত্যাদি| অত ঊর্ধ্বং তৃতীযদিবসানন্তরং, দোষাঃ বাতাদযঃ, কালঃ হেমন্তাদিকঃ, বলং হীনমধ্যমোত্তমম্, আদিশব্দাদ্ বযঃসাত্ম্যাদীনি, অবেক্ষ্য পরীক্ষ্য, বিদধ্যাত্ কুর্যাত্ যাবদ্ব্রণসংরোহণং ভবতি| অন্যে ত্বন্যথা পঠন্তি- ‘অত ঊর্ধ্বং দোষকালবলাদীন্যবেক্ষ্য কষাযাদীন্ বিদধ্যাত্’- ইতি, ব্যাখ্যানযন্তি চ- অত ঊর্ধ্বমিতি তৃতীযবন্ধাদনন্তরং চতুর্থবন্ধে দোষাদীনি পরীক্ষ্য কষাযাদীন্ বিদধ্যাত্; কষাযাদীনিত্যাদিশব্দাত্ কল্কস্নেহাদীনাং গ্রহণম্||৩৭||

Adhikarana 20 (38) · Śloka 38

ন চৈনং ত্বরমাণঃ সান্তর্দোষং রোপযেত্; স হ্যল্পেনাপ্যপচারেণাভ্যন্তরমুত্সঙ্গং কৃত্বা ভূযোঽপি বিকরোতি ||৩৮||

ন চৈনমিত্যাদি| সান্তর্দোষম্ অভ্যন্তরপূযসহিতম্| অল্পেনাপ্যপচারেণেতি স্তোকেনাপি বিরুদ্ধকর্মণা| ভূযঃ পুনঃ| বিকরোতি বিকৃতিং যাতি||৩৮||

Adhikarana 21 (39) · Śloka 39

ভবন্তি চাত্র- তস্মাদন্তর্বহিশ্চৈব সুশুদ্ধং রোপযেদ্ব্রণম্ | রূঢেঽপ্যজীর্ণব্যাযামব্যবাযাদীন্ বিবর্জযেত্ | হর্ষং ক্রোধং ভযং চাপি যাবত্ স্থৈর্যোপসম্ভবাত্ ||৩৯||

ভবন্তি চাত্রেত্যাদি| সুশুদ্ধমিতি বহিরভ্যন্তরং চ| তত্রাভ্যন্তরশুদ্ধিলক্ষণং বাতাদিবেদনাপগমঃ; বহিঃশুদ্ধিলক্ষণং বিশুদ্ধবর্ণরসস্থানগন্ধাশ্চত্বারঃ| কেচিত্ ‘হর্ষং ক্রোধং ভযং’ ইত্যাদি শ্লোকং ন পঠন্তি, ব্যবাযাদীনিত্যাদিশব্দাচ্চ ভযহর্ষাদীনি গৃহ্ণন্তি||৩৯||

Adhikarana 22 (40) · Śloka 40

হেমন্তে শিশিরে চৈব বসন্তে চাপি মোক্ষযেত্ | ত্র্যহাদ্দ্ব্যহাচ্ছরদ্গ্রীষ্মবর্ষাস্বপি চ বুদ্ধিমান্ ||৪০||

ননু, কিং সর্বদৈব ত্র্যহান্মোক্তব্যোঽথ কিঞ্চিদন্তরেণেত্যাহ - হেমন্তে শিশিরে চৈবেত্যাদি| হেমন্তাদিষু ত্র্যহান্মোক্ষযেত্, তেষু শীতত্বেন শীঘ্রপাকভযাভাবাত্| শরদাদিষু দ্ব্যহান্মোক্ষযেত্, তেষামুষ্ণত্বেন শীঘ্রপাকাগমভযাত্| হেমন্তে শিশিরে চৈবেতি এবশব্দো হেমন্তশিশিরযোস্ত্র্যহে এব মোক্ষ ইতি নিযমতি, চকারস্তু পৈত্তিকব্রণস্য নিযমং ব্যভিচারযতি; তেন পৈত্তিকস্য হেমন্তশিশিরযোর্যথার্হং মোক্ষ ইতি| বসন্তে চাপীতি অপিশব্দাদ্ বৈশাখস্যোষ্ণত্বাত্ কদাচিদ্ দ্বযহেঽপি মোক্ষঃ সর্বব্রণানাং; তথা পৈত্তিকস্য দ্বিরহ্নো বন্ধ ইতি চ সমুচ্চিনোতি| শরদ্গ্রীষ্মবর্ষাস্বপি চেতি অপিচগ্রহণং ক্বচিদ্ দ্ব্যহমোক্ষণবিধিমপি ব্যভিচারযতি, তেন পৈত্তিকং ব্রণং গ্রীষ্মে একস্মিন্নেব দিনে দ্বৌ বারৌ বধ্নীযাত্| অন্যে তু শিশিরগ্রহণমপাস্য ‘হেমন্তে চ বসন্তে চ প্রাবৃট্কালে চ মোক্ষযেত্’ ইতি পঠন্তি; তন্ন, পঞ্জিকযা দূষিতত্বাত্| ননু, হেমন্তাদযঃ শরদাদযশ্চ ন সমানাস্তত্ কথং তেষু তুল্যকালং ব্রণমোক্ষণম্? উচ্যতে, ত্র্যহাদেব দ্ব্যহাদেবেতি নিযমো ন কৃতঃ, তেন হেমান্তাদীনাং শরদাদীনাং চোত্কর্ষাপকর্ষান্ সমীক্ষ্য ব্রণমোক্ষণং কর্তব্যমিত্যদোষঃ||৪০||

Adhikarana 23 (41) · Śloka 41

অতিপাতিষু রোগেষু নেচ্ছেদ্বিধিমিমং ভিষক্ | প্রদীপ্তাগারবচ্ছীঘ্রং তত্র কুর্যাত্ প্রতিক্রিযাম্ ||৪১||

ননু, কথং সর্বত্রৈব সম্ভৃতসম্ভারস্য ছেদ্যাদি কর্তব্যমুতান্যথাঽপীত্যাহ- অতিপাতিষ্বিত্যাদি| অতিপাতিষু আশুকারিষু| অথবা, অতিপাতিষু রোগেষু বন্ধকালাদিনিযমব্যভিচারার্থ এবাযং শ্লোক ইতি||৪১||

Adhikarana 24 (42) · Śloka 42

যা বেদনা শস্ত্রনিপাতজাতা তীব্রা শরীরং প্রদুনোতি জন্তোঃ | ধৃতেন সা শান্তিমুপৈতি সিক্তা কোষ্ণেন যষ্টীমধুকান্বিতেনা ||৪২||

শস্ত্রপাতেঽবস্থাং চিকিত্সিতুমাহ- যা বেদনেত্যাদি| প্রদুনোতি উপতাপযতি; ক্বচিত্ ‘প্রতনোতি’ ইতি পাঠঃ, তত্র ব্যাপ্নোতীত্যর্থঃ||৪২||

Adhikarana puShpikA · Śloka 5

ইতি সুশ্রুতসংহিতাযাং সূত্রস্থানেঽগ্রোপহরণীযো নাম পঞ্চমোঽধ্যাযঃ ||৫||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানেঽগ্রোপহরণীযো নাম পঞ্চমোঽধ্যাযঃ||৫||