5. agrōpaharaṇīyādhyāyaḥ

Adhikarana 1 (1-2) · Śloka 2

অথাতোঽগ্রোপহরণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

ত্রিবিধং কর্ম- পূর্বকর্ম, প্রধানকর্ম, পশ্চাত্কর্মেতি; তদ্ব্যাধিং প্রত্যুপদেক্ষ্যামঃ ||৩||

Adhikarana 3 (4) · Śloka 4

অস্য তু শাস্ত্রস্য শস্ত্রকর্মপ্রাধান্যাচ্ছস্ত্রকর্মৈব তাবত্ পূর্বমুপদেক্ষ্যামস্তত্সম্ভারাংশ্চ ||৪||

Adhikarana 4 (5) · Śloka 5

তচ্চ শস্ত্রকর্মাঽষ্টবিধং; তদ্যথা- ছেদ্যং, ভেদ্যং, লেখ্যং, বেধ্যম্, এষ্যম্, আহার্যং, বিস্রাব্যং, সীব্যমিতি ||৫||

Adhikarana 5 (6) · Śloka 6

অতোঽন্যতমং কর্ম চিকীর্ষতা বৈদ্যেন পূর্বমেবোপকল্পযিতব্যানি ভবন্তি, তদ্যথা- যন্ত্রশস্ত্রক্ষারাগ্নিশলাকাশৃঙ্গজলৌকালাবূজাম্ববৌষ্ঠপিচুপ্রোতসূত্রপত্রপট্টমধুঘৃতবসাপযস্তৈল- তর্পণকষাযালেপনকল্কব্যজনশীতোষ্ণোদককটাহাদীনি, পরিকর্মিণশ্চ স্নিগ্ধাঃ স্থিরা বলবন্তঃ ||৬||

Adhikarana 6 (7) · Śloka 7

ততঃ প্রশস্তেষু তিথিকরণমুহূর্তনক্ষত্রেষু দধ্যক্ষতান্নপানরত্নৈরগ্নিং বিপ্রান্ ভিষজশ্চার্চযিত্বা, কৃতবলিমঙ্গলস্বস্তিবাচনং লঘুভুক্তবন্তং প্রাঙ্মুখমাতুরমুপবেশ্য , যন্ত্রযিত্বা , প্রত্যঙ্মুখো বৈদ্যো মর্মসিরাস্নাযুসন্ধ্যস্থিধমনীঃ পরিহরন্, অনুলোমং শস্ত্রং নিদধ্যাদাপূযদর্শনাত্ , সকৃদেবাপহরেচ্ছস্ত্রমাশু চ; মহত্স্বপি চ পাকেষু দ্ব্যঙ্গুলান্তরং ত্র্যঙ্গুলান্তরং বা শস্ত্রপদমুক্তম্ ||৭||

Adhikarana 7 (8) · Śloka 8

তত্রাযতো বিশালঃ সমঃ সুবিভক্তো নিরাশ্রয ইতি ব্রণগুণাঃ ||৮||

Adhikarana 8 (9) · Śloka 9

ভবতশ্চাত্র- আযতশ্চ বিশালশ্চ সুবিভক্তো নিরাশ্রযঃ | প্রাপ্তকালকৃতশ্চাপি ব্রণঃ কর্মণি শস্যতে ||৯||

Adhikarana 9 (10) · Śloka 10

শৌর্যমাশুক্রিযা শস্ত্রতৈক্ষ্ণ্যমস্বেদবেপথু | অসম্মোহশ্চ বৈদ্যস্য শস্ত্রকর্মণি শস্যতে ||১০||

Adhikarana 10 (11-12) · Śloka 12

একেন বা ব্রণেনাশুধ্যমানে নাঽন্তরা বুদ্ধ্যাঽবেক্ষ্যাপরান্ ব্রণান্ কুর্যাত্ ||১১|| ভবতি চাত্র- যতো যতো গতিং বিদ্যাদুত্সঙ্গো যত্র যত্র চ | তত্র তত্র ব্রণং কুর্যাদ্যথা দোষো ন তিষ্ঠতি ||১২||

Adhikarana 11 (13-15) · Śloka 15

তত্র ভ্রূগণ্ডশঙ্খললাটাক্ষিপুটৌষ্ঠদন্তবেষ্টকক্ষাকুক্ষিবঙ্ক্ষণেষু তির্যক্ ছেদ উক্তঃ ||১৩|| (চন্দ্রমণ্ডলবচ্ছেদান্ পাণিপাদেষু কারযেত্ | অর্ধচন্দ্রাকৃতীংশ্চাপি গুদে মেঢ্রে চ বুদ্ধিমান্) ||১৪|| অন্যথা তু সিরাস্নাযুচ্ছেদনম্, অতিমাত্রং বেদনা, চিরাদ্ব্রণসংরোহো, মাংসকন্দীপ্রাদুর্ভাবশ্চেতি ||১৫||

Adhikarana 12 (16) · Śloka 16

মূঢগর্ভোদরার্শোঽশ্মরীভগন্দরমুখরোগেষ্বভুক্তবতঃ কর্ম কুর্বীত ||১৬||

Adhikarana 13 (17) · Śloka 17

ততঃ শস্ত্রমবচার্য,শীতাভিরদ্ভিরাতুরমাশ্বাস্য, সমন্তাত্ পরিপীড্যাঙ্গুল্যা, ব্রণমভিমৃদ্য(জ্য), প্রক্ষাল্য কষাযেণ প্রোতেনোদকমাদায , তিলকল্কমধুসর্পিঃপ্রগাঢামৌষধযুক্তাং নাতিস্নিগ্ধাং নাতিরূক্ষাং বর্তিং প্রণিদধ্যাত্; ততঃ কল্কেনাচ্ছাদ্য, ঘনাং কবলিকাং দত্ত্বা, বস্ত্রপট্টেন বধ্নীযাত্; বেদনারক্ষোঘ্নৈর্ধূপৈর্ধূপযেত্, রক্ষোঘ্নৈশ্চ মন্ত্রৈ রক্ষাং কুর্বীত ||১৭||

Adhikarana 14 (18) · Śloka 18

ততো গুগ্গুল্বগুরুসর্জরসবচাগৌরসর্ষপচূর্ণৈর্লবণনিম্বপত্রবিমিশ্রৈরাজ্যযুক্তৈর্ধূপযেত্ | আজ্যশেষেণ চাস্য প্রাণান্ সমালভেত ||১৮||

Adhikarana 15 (19-33) · Śloka 33

উদকুম্ভাচ্চাপো গৃহীত্বা প্রোক্ষযন্ রক্ষাকর্ম কুর্যাত্; তদ্বক্ষ্যামঃ- ||১৯|| কৃত্যানাং প্রতিঘাতার্থং তথা রক্ষোভযস্য চ | রক্ষাকর্ম করিষ্যামি ব্রহ্মা তদনুমন্যতাম্ ||২০|| নাগাঃ পিশাচা গন্ধর্বাঃ পিতরো যক্ষরাক্ষসাঃ | অভিদ্রবন্তি যে যে ত্বাং ব্রহ্মাদ্যা ঘ্নন্তু তান্ সদা ||২১|| পৃথিব্যামন্তরীক্ষে চ যে চরন্তি নিশাচরাঃ | দিক্ষু বাস্তুনিবাসাশ্চ পান্তু ত্বাং তে নমস্কৃতাঃ ||২২|| পান্তু ত্বাং মুনযো ব্রাহ্মযা দিব্যা রাজর্ষযস্তথা | পর্বতাশ্চৈব নদ্যশ্চ সর্বাঃ সর্বে চ সাগরাঃ ||২৩|| অগ্নী রক্ষতু তে জিহ্বাং প্রাণান্ বাযুস্তথৈব চ | সোমো ব্যানমপানং তে পর্জন্যঃ পরিরক্ষতু ||২৪|| উদানং বিদ্যুতঃ পান্তু সমানং স্তনযিত্নবঃ | বলমিন্দ্রো বলপতির্মনুর্মন্যে মতিং তথা ||২৫|| কামাংস্তে পান্তু গন্ধর্বাঃ সত্ত্বমিন্দ্রোঽভিরক্ষতু | প্রজ্ঞাং তে বরুণো রাজা সমুদ্রো নাভিমণ্ডলম্ ||২৬|| চক্ষুঃ সূর্যো দিশঃ শ্রোত্রে চন্দ্রমাঃ পাতু তে মনঃ | নক্ষত্রাণি সদা রূপং ছাযাং পান্তু নিশাস্তব ||২৭|| রেতস্ত্বাপ্যাযযন্ত্বাপো রোমাণ্যোষধযস্তথা | আকাশং খানি তে পান্তু দেহং তব বসুন্ধরা ||২৮|| বৈশ্বানরঃ শিরঃ পাতু বিষ্ণুস্তব পরাক্রমম্ | পৌরুষং পুরুষশ্রেষ্ঠো ব্রহ্মাঽঽত্মানং ধ্রুবো ভ্রুবৌ ||২৯|| এতা দেহে বিশেষেণ তব নিত্যা হি দেবতাঃ | এতাস্ত্বাং সততং পান্তু দীর্ঘমাযুরবাপ্নুহি ||৩০|| স্বস্তি তে ভগবান্ ব্রহ্মা স্বস্তি দেবাশ্চ কুর্বতাম্ | (স্বস্তি তে চন্দ্রসূর্যৌ চ স্বস্তি নারদপর্বতৌ) | স্বস্ত্যগ্নিশ্চৌব বাযুশ্চ স্বস্তি দেবাঃ সহেন্দ্রগাঃ ||৩১|| পিতামহকৃতা রক্ষা স্বস্ত্যাযুর্বর্ধতাং তব | ঈতযস্তে প্রশাম্যন্তু সদা ভব গতব্যথঃ ||৩২|| ইতি স্বাহা | এতৈর্বেদাত্মকৈর্মন্ত্রৈঃ কৃত্যাব্যাধিবিনাশনৈঃ | মযৈবং কৃতরক্ষস্ত্বং দীর্ঘমাযুরবাপ্নুহি ||৩৩||

Adhikarana 16 (34) · Śloka 34

ততঃ কৃতরক্ষমাতুরমাগারং প্রবেশ্য, আচারিকমাদিশেত্ ||৩৪||

Adhikarana 17 (35) · Śloka 35

ততস্তৃতীযেঽহনি বিমুচ্যৈবমেব বধ্নীযাদ্বস্ত্রপট্টেন; ন চৈনং ত্বরমাণোঽপরেদ্যুর্মোক্ষযেত্ ||৩৫||

Adhikarana 18 (36) · Śloka 36

দ্বিতীযদিবসপরিমোক্ষণাদ্বিগ্রথিতো ব্রণশ্চিরাদুপসংরোহতি, তীব্ররুজশ্চ ভবতি ||৩৬||

Adhikarana 19 (37) · Śloka 37

অত ঊর্ধ্বং দোষকালবলাদীনবেক্ষ্য কষাযালেপনবন্ধাহারাচারান্ বিদধ্যাত্ ||৩৭||

Adhikarana 20 (38) · Śloka 38

ন চৈনং ত্বরমাণঃ সান্তর্দোষং রোপযেত্; স হ্যল্পেনাপ্যপচারেণাভ্যন্তরমুত্সঙ্গং কৃত্বা ভূযোঽপি বিকরোতি ||৩৮||

Adhikarana 21 (39) · Śloka 39

ভবন্তি চাত্র- তস্মাদন্তর্বহিশ্চৈব সুশুদ্ধং রোপযেদ্ব্রণম্ | রূঢেঽপ্যজীর্ণব্যাযামব্যবাযাদীন্ বিবর্জযেত্ | হর্ষং ক্রোধং ভযং চাপি যাবত্ স্থৈর্যোপসম্ভবাত্ ||৩৯||

Adhikarana 22 (40) · Śloka 40

হেমন্তে শিশিরে চৈব বসন্তে চাপি মোক্ষযেত্ | ত্র্যহাদ্দ্ব্যহাচ্ছরদ্গ্রীষ্মবর্ষাস্বপি চ বুদ্ধিমান্ ||৪০||

Adhikarana 23 (41) · Śloka 41

অতিপাতিষু রোগেষু নেচ্ছেদ্বিধিমিমং ভিষক্ | প্রদীপ্তাগারবচ্ছীঘ্রং তত্র কুর্যাত্ প্রতিক্রিযাম্ ||৪১||

Adhikarana 24 (42) · Śloka 42

যা বেদনা শস্ত্রনিপাতজাতা তীব্রা শরীরং প্রদুনোতি জন্তোঃ | ধৃতেন সা শান্তিমুপৈতি সিক্তা কোষ্ণেন যষ্টীমধুকান্বিতেনা ||৪২||

Adhikarana puShpikA · Śloka 5

ইতি সুশ্রুতসংহিতাযাং সূত্রস্থানেঽগ্রোপহরণীযো নাম পঞ্চমোঽধ্যাযঃ ||৫||