25. aṣṭavidhaśastrakarmīyādhyāyaḥ

Adhikarana 1 (1-4) · Śloka 5

অথাতোঽষ্টবিধশস্ত্রকর্মীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| ছেদ্যা ভগন্দরা গ্রন্থিঃ শ্লৈষ্মিকস্তিলকালকঃ | ব্রণবর্ত্মার্বুদান্যর্শশ্চর্মকীলোঽস্থিমাংসগম্ ||৩|| শল্যং জতুমণির্মাংসসঙ্ঘাতো গলশুণ্ডিকা | স্নাযুমাংসসিরাকোথো বল্মীকং শতপোনকঃ ||৪|| অধ্রুষশ্চোপদংশাশ্চ মাংসকন্দ্যধিমাংসকঃ |৫|

তত্র পূর্বং ছেদ্যকর্মণ এব দর্শিতত্বাত্তদ্ভেদমেব দর্শযন্নাহ- ছেদ্যা ভগন্দরা ইত্যাদি| গ্রন্থিঃ শ্লৈষ্মিক ইতি আমো ন তু পক্বঃ| তিলকালক ইতি ক্ষুদ্ররোগপরিপঠিতঃ; ন তু শূকদোষোক্তঃ, তস্যাসাধ্যত্বাত্| ব্রণবর্ত্মেতি ক্লিন্নো ব্রণৌষ্ঠঃ| অর্বুদানি সর্বাণি| অর্শো বাতিকং শ্লৈষ্মিকং চ| চর্মকীল ইতি গুদপার্শ্ববর্তী মাংসাঙ্কুরঃ| স্নায্বাদিভিঃ সহ কোথশব্দঃ প্রত্যেকং সম্বধ্যতে, কোথঃ পূতীভাবঃ| শতপোনক ইতি শূকদোষপঠিতঃ; অন্যে তু “ভগন্দরগ্রহণেনাপ্যুপাত্তস্য শতপোনকস্য পুনরুপাদানমত্যন্তচ্ছেদনার্থম্, অনন্যপ্রতীকারত্বাত্”||১-৪||

Adhikarana 2 (5-8) · Śloka 8

ভেদ্যা বিদ্রধযোঽন্যত্র সর্বজাদ্গ্রন্থযস্ত্রযঃ ||৫|| আদিতো যে বিসর্পাশ্চ বৃদ্ধযঃ সবিদারিকাঃ | প্রমেহপিডকাঃ শোফঃ স্তনরোগোঽবমন্থকাঃ ||৬|| কুম্ভীকানুশযী নাড্যো বৃন্দৌ পুষ্করিকাঽলজী | প্রাযশঃ ক্ষুদ্ররোগাশ্চ পুপ্পুটৌ তালুদন্তজৌ ||৭|| তুণ্ডিকেরী গিলাযুশ্চ পূর্বং যে চ প্রপাকিণঃ | বস্তিস্তথাঽশ্মরীহেতোর্মেদোজা যে চ কেচন ||৮||

ভেদ্যবিষযং দর্শযন্নাহ- ভেদ্যা ইত্যাদি| গ্রন্থযস্ত্রয ইতি বাতপিত্তকফজাঃ| আদিতো যে বিসর্পাশ্চেতি বাতপিত্তশ্লেষ্মজাঃ| বিদারিকা ক্ষুদ্ররোগেষু| অবমন্থক ইতি শূকদোষেষু| বৃন্দাবিতি একবৃন্দো বৃন্দশ্চ কণ্ঠগতরোগেষু| পুষ্করিকা শূকদোষেষু| পুপ্পুটৌ তালুদন্তজাবিতি তালুপুপ্পুটো দন্তপুপ্পুটশ্চ| পূর্বং যে চ প্রপাকিণ ইতি ভগন্দরাদযঃ| বস্তিস্তথাঽশ্মরীহেতোরিতি অশ্মরীনিমিত্তমেব বস্তির্ভেদ্যো নান্যহেতোঃ, অভেদে ধ্রুবমরণাদ্ভেদে চ সংশযাত্||৫-৮||

Adhikarana 3 (9) · Śloka 10

লেখ্যাশ্চতস্রো রোহিণ্যঃ কিলাসমুপজিহ্বিকা | মেদোজো দন্তবৈদর্ভো গ্রন্থির্বর্ত্মাধিজিহ্বিকা ||৯|| অর্শাংসি মণ্ডলং মাংসকন্দী মাংসোন্নতিস্তথা |১০|

লেখ্যবিষযং দর্শযন্নাহ- লেখ্যাশ্চতস্র ইত্যাদি| চতস্রো রোহিণ্যঃ ইতি বাতপিত্তশ্লেষ্মসন্নিপাতোত্থাঃ, রক্তজাঃ পুনরেকান্তাসাধ্যত্বাদিহ নোক্তাঃ| বর্ত্ম ইতি ব্রণবর্ত্ম নেত্রবর্ত্ম চেত্যর্থঃ| মণ্ডলং কণ্ডূকুষ্ঠাদীনাম্| মাংসকন্দী স্বল্পমাংসাঙ্কুরঃ||৯||-

Adhikarana 4 (10) · Śloka 10

বেধ্যাঃ সিরা বহুবিধা মূত্রবৃদ্ধির্দকোদরম্ ||১০||

বেধ্যবিষযং দর্শযন্নাহ- বেধ্যা ইত্যাদি||১০||

Adhikarana 5 (11) · Śloka 11

এষ্যা নাড্যঃ সশল্যাশ্চ ব্রণা উন্মার্গিণশ্চ যে |১১|

এষ্যবিষযং দর্শযন্নাহ- এষ্যা ইত্যাদি| এষ্যা ইতি লোহাদিশলাকযাঽন্তরন্বেষণীযা ইত্যর্থঃ, শল্যস্থিতিজ্ঞানার্থং, সুখেনাপকর্ষণায চ| উন্মার্গী তির্যগ্গতিঃ|১১|-

Adhikarana 6 (11) · Śloka 12

আহার্যাঃ শর্করাস্তিস্রো দন্তকর্ণমলোঽশ্মরী ||১১|| শল্যানি মূঢগর্ভাশ্চ বর্চশ্চ নিচিতং গুদে |১২|

আহার্যবিষযং দর্শযন্নাহ- আহার্যা ইত্যাদি| আহার্যা আকর্ষণীযাঃ| শর্করাস্তিস্র ইতি মূত্রশর্করা পাদশর্করা দন্তশর্করা চেতি||১১||-

Adhikarana 7 (12-15) · Śloka 16

স্রাব্যা বিদ্রধযঃ পঞ্চ ভবেযুঃ সর্বজাদৃতে ||১২|| কুষ্ঠানি বাযুঃ সরুজঃ শোফো যশ্চৈকদেশজঃ | পাল্যামযাঃ শ্লীপদানি বিষজুষ্টং চ শোণিতম্ ||১৩|| অর্বুদানি বিসর্পাশ্চ গ্রন্থযশ্চাদিতশ্চ তে | ত্রযস্ত্রযশ্চোপদংশাঃ স্তনরোগা বিদারিকা ||১৪|| সু(শু)ষিরো গলশালূকং কণ্টকাঃ কৃমিদন্তকঃ | দন্তবেষ্টঃ সোপকুশঃ শীতাদো দন্তপুপ্পুটঃ ||১৫|| পিত্তাসৃক্কফজাশ্চৌষ্ঠ্যাঃ ক্ষুদ্ররোগাশ্চ ভূযশঃ |১৬|

বিস্রাব্যবিষযং দর্শযন্নাহ- স্রাব্যা ইত্যাদি||১২-১৫||-

Adhikarana 8 (16) · Śloka 17

সীব্যা মেদঃসমুত্থাশ্চ ভিন্নাঃ সুলিখিতা গদাঃ ||১৬|| সদ্যোব্রণাশ্চ যে চৈব চলসন্ধিব্যপাশ্রিতাঃ |১৭|

সীব্যবিষযং দর্শযন্নাহ- সীব্যা ইত্যাদি| মেদঃসমুত্থা ইতি যে কেচন মেদোভববিকারাঃ| ভিন্না ইতি বিদীর্ণা ইত্যর্থঃ| সুলিখিতা গদা ইতি নিরবশেষলিখিতা ইত্যর্থঃ| ব্যপাশ্রিতা ইতি বিশেষেণাশ্রিতা ইত্যর্থঃ| ‘সাধ্যাঃ’ ইতি কেচিত্ পঠন্তি||১৬||-

Adhikarana 9 (17) · Śloka 18

ন ক্ষারাগ্নিবিষৈর্জুষ্টা ন চ মারুতবাহিনঃ ||১৭|| নান্তর্লোহিতশল্যাশ্চ... |১৮|

অথ কে ন সীব্যা ইত্যাহ- ন ক্ষারেত্যাদি||১৭||

Adhikarana 10 (18) · Śloka 18

... তেষু সম্যগ্বিশোধনম্ |১৮|

তেষু কিং কর্তব্যমিত্যাহ- তেষ্বিত্যাদি|১৮|-

Adhikarana 11 (18-19) · Śloka 19

পাংশুরোমনখাদীনি চলমস্থি ভবেচ্চ যত্ ||১৮|| অহৃতানি যতোঽমূনি পাচযেযুর্ভৃশং ব্রণম্ | রুজশ্চ বিবিধাঃ কুর্যুস্তস্মাদেতান্ বিশোধযেত্ ||১৯||

কান্ বিশোধযেদিত্যাহ- পাংশ্বিত্যাদি| অন্যে ‘তৃণাদীনি’ ইতি পঠন্তি| কস্মাদেতে বিশোধ্যা ইত্যাহ- অহৃতানীত্যাদি||১৮-১৯||

Adhikarana 12 (20-26) · Śloka 26

ততো ব্রণং সমুন্নম্য স্থাপযিত্বা যথাস্থিতম্ | সীব্যেত্ সূক্ষ্মেণ সূত্রেণ বল্কেনাশ্মন্তকস্য বা ||২০|| শণজক্ষৌমসূত্রাভ্যাং স্নায্বা বালেন বা পুনঃ | মূর্বাগুডূচীতানৈর্বা সীব্যেদ্বেল্লিতকং শনৈঃ ||২১|| সীব্যেদ্গোফণিকাং বাঽপি সীব্যেদ্বা তুন্নসেবনীম্ | ঋজুগ্রন্থিমথো বাঽপি যথাযোগমথাপি বা ||২২|| দেশেঽল্পমাংসে সন্ধৌ চ সূচী বৃত্তাঽঙ্গুলদ্বযম্ | আযতা ত্র্যঙ্গুলা ত্র্যস্রা মাংসলে চাঽপি পূজিতা ||২৩|| ধনুর্বক্রা হিতা মর্মফলকোশোদরোপরি | ইত্যেতাস্ত্রিবিধাঃ সূচীস্তীক্ষ্ণাগ্রাঃ সুসমাহিতাঃ ||২৪|| কারযেন্মালতীপুষ্পবৃন্তাগ্রপরিমণ্ডলাঃ | নাতিদূরে নিকৃষ্টে বা সূচীং কর্মণি পাতযেত্ ||২৫|| দূরাদ্রুজো ব্রণৌষ্ঠস্য সন্নিকৃষ্টেঽবলুঞ্চনম্ ||২৬||

তত্র সপ্তানাং ছেদ্যাদিকর্মণামবচারণস্যান্যত্র দর্শিতত্বাত্ সীব্যস্য পুনরত্রৈব বিস্তরেণ নির্দিশন্নাহ- ততো ব্রণমিত্যাদি| সমুন্নম্য উন্নতং কৃত্বা| অশ্মন্তকঃ অম্ললোটকসদৃশো বৃক্ষঃ| ক্ষৌমমিতি ক্ষুমা অতসী তস্যা ইদং ক্ষৌমম্| স্নাযুরিতি শণাকার উপধাতুবিশেষঃ, যেন ধনূংষি নহ্যন্তে| মূর্বা চৌরস্নাযুঃ, যযা পূর্বদেশে গুণান্ কুর্বন্তি ধনুষাম্| অন্যে কোবিদারসদৃশযুগ্মপত্রাং লতাবিশেষাং মূর্বামাচক্ষতে| তানৈরিতি তন্তুভিরিত্যর্থঃ| বেল্লিতকং বক্রম্| গোফণিকাং গোফণাকারাম্| তুন্নসেবনীমিতি যথা বস্ত্রং পাটিতং তন্তুবাযকাঃ সন্দধতি তদ্বত্তুন্নসেবনীং সীব্যেত্| ঋজুগ্রন্থিমিতি ঋজুগ্রন্থেঃ সদৃশো বন্ধো যস্যাং সেবন্যাং সা ঋজুগ্রন্থিঃ| ত্র্যস্রেতি ত্রিধারেত্যর্থঃ| ফলকোষঃ অণ্ডকোষঃ| সুসমাহিতাঃ ইতি সুহস্তা ইত্যর্থঃ| পরিমণ্ডলা ইতি বর্তুলা ইত্যর্থঃ| সন্নিকৃষ্টে নিকট ইত্যর্থঃ| অবলুচ্চনমিতি ত্রুটনমিত্যর্থঃ||২০-২৬||-

Adhikarana 13 (27-28) · Śloka 28

অথ ক্ষৌমপিচুচ্ছন্নং সুস্যূতং প্রতিসারযেত্ | প্রিযঙ্গ্বঞ্জনযষ্ট্যাহ্বরোধ্রচূর্ণৈঃ সমন্ততঃ ||২৭|| শল্লকীফলচূর্ণৈর্বা ক্ষৌমধ্যামেন বা পুনঃ | ততো ব্রণং যথাযোগং বদ্ধ্বাঽঽচারিকমাদিশেত্ ||২৮||

সীবনস্য পশ্চাত্কর্ম দর্শযন্নাহ- অথ ক্ষৌমেত্যাদি| ক্ষৌমেণ অতসীবস্ত্রেণ, পিচুনা কার্পাসতূলেন, আভ্যাং দ্বাভ্যাং ছন্নমিত্যর্থঃ| সুস্যূতমিতি ‘সম্যক্সীবিতম্’ ইতি লোকে| প্রতিসারযেত্ অবচূর্ণযেদিত্যর্থঃ| অবচূর্ণনদ্রব্যাণ্যাহ- প্রিযঙ্গ্বঞ্জনেত্যাদি| অঞ্জনং সৌবীরাঞ্জনম্| সমন্তত ইতি সর্বত্রেত্যর্থঃ| ক্ষৌমধ্যামেনেতি অতসীভববস্ত্রভস্মনা| আচারিকমাদিশেদিতি ব্রণিতোপাসনীযোক্তমাচারং কথযেদিত্যর্থঃ| কেচিদিহ ছেদ্যাদীনি গদ্যেনৈব পঠন্তি যাবত্ ‘বদ্ধ্বাঽঽচারিকমাদিশেত্’ ইতি||২৭-২৮||

Adhikarana 14 (29) · Śloka 29

এতদষ্টবিধং কর্ম সমাসেন প্রকীর্তিতম্ | চিকিত্সিতেষু কার্ত্স্ন্যেন বিস্তরস্তস্য বক্ষ্যতে ||২৯||

সঙ্ক্ষেপোক্তিরিযং, বিস্তরোঽস্য বক্ষ্যত ইতি দর্শযন্নাহ- এতদিত্যাদি| অষ্টগ্রহণং পুনর্যদিহ কৃতং তচ্চরকোক্তষট্সঙ্খ্যানিরাকরণার্থম্ ||২৯||

Adhikarana 15 (30) · Śloka 30

হীনাতিরিক্তং তির্যক্ চ গাত্রচ্ছেদনমাত্মনঃ | এতাশ্চতস্রোঽষ্টবিধে কর্মণি ব্যাপদঃ স্মৃতাঃ ||৩০||

তত্রাষ্টানামপি কর্মণাং ব্যাপদং দর্শযন্নাহ- হীনাতিরিক্তমিত্যাদি| গাত্রচ্ছেদনমাত্মনঃ ইতি শস্ত্রকর্ম কুর্বতঃ স্বশরীর ছেদনমিত্যর্থঃ| চতস্রো ব্যাপদ ইতি; অন্যে তু ‘এতা হি তিস্র’ ইতি পঠন্তি; স তু প্রমাদপাঠঃ||৩০||

Adhikarana 16 (31) · Śloka 31

অজ্ঞানলোভাহিতবাক্যযোগভযপ্রমোহৈরপরৈশ্চ ভাবৈঃ | যদা প্রযুঞ্জীত ভিষক্ কুশস্ত্রং তদা স শেষান্ কুরুতে বিকারান্ ||৩১||

ব্যাপদো হেতূন্ দর্শযন্নাহ- অজ্ঞানেত্যাদি| অহিতবাক্যযোগঃ শত্রুবচনপ্রযোগঃ| প্রমোহে বৈচিত্ত্যম্ | অপরৈশ্চ ভাবৈরিতি প্রযোজনব্যগ্রত্বাদিভিরিত্যর্থঃ| কুশস্ত্রমিতি ঈষচ্ছস্ত্রম্| স শেষানিতি স ইতি বৈদ্যঃ শেষান্ অপরানিত্যর্থঃ||৩১||

Adhikarana 17 (32) · Śloka 32

তং ক্ষারশস্ত্রাগ্নিভিরৌষধৈশ্চ ভূযোঽভিযুঞ্জানমযুক্তিযুক্তম্ | জিজীবিষুর্দূরত এব বৈদ্যং বিবর্জযেদুগ্রবিষাহিতুল্যম্ ||৩২||

প্রাগুক্তাজ্ঞানাদিদোষদূষিতং বৈদ্যং প্রত্যাতুরঃ কিং কুর্যাদিত্যাহ- তং ক্ষারশস্ত্রাগ্নিভিরিত্যাদি| তং তথাবিধং ভিষক্ছদ্মচরম্| অযুক্তিযুক্তং যথা ভবতীত্যর্থঃ| জিজীবিষুঃ জীবিতুমিচ্ছুঃ| দূরত এব বৈদ্যং বিবর্জযেদিতি তস্মৈ দর্শনমপি ন দদ্যাত্||৩২||

Adhikarana 18 (33) · Śloka 33

তদেব যুক্তং ত্বতি মর্মসন্ধীন্ হিংস্যাত্ সিরাঃ স্নাযুমথাস্থি চৈব | মূর্খপ্রযুক্তং পুরুষং ক্ষণেন প্রাণৈর্বিযুঞ্জ্যাদথবা কদাচিত্ ||৩৩||

হীনব্যাপদমভিধাযাতিরিক্তশস্ত্রব্যাপদং দর্শযন্নাহ- তদেবেত্যাদি|- তদেব শস্ত্রং, যুক্তং প্রযুক্তং, তু পুনরর্থে, অতীতি অতিশযেন, প্রাণৈর্বিযুঞ্জ্যাদিতি প্রাণৈঃ সহ বিযোগং কারযেদিত্যর্থঃ||৩৩||

Adhikarana 19 (34-35) · Śloka 35

ভ্রমঃ প্রলাপঃ পতনং প্রমোহো বিচেষ্টনং সংলযনোষ্ণতে চ | স্রস্তাঙ্গতা মূর্চ্ছনমূর্ধ্ববাতস্তীব্রা রুজো বাতকৃতাশ্চ তাস্তাঃ ||৩৪|| মাংসোদকাভং রুধিরং চ গচ্ছেত্ সর্বেন্দ্রিযার্থোপরমস্তথৈব | দশার্ধসঙ্খ্যেষ্বপি বিক্ষতেষু সামান্যতো মর্মসু লিঙ্গমুক্তম্ ||৩৫||

মর্মসন্ধিসিরাস্নায্বস্থিপঞ্চানাং ছেদনাত্ পঞ্চপ্রকারামতিরিক্তশস্ত্রব্যাপদং দর্শযিত্বেদানীং তেষ্বেব মর্মাদিষু বিদ্ধেষু যানি লিঙ্গানি ভবন্তি তানি সামান্যেন দর্শযন্নাহ- ভ্রম ইত্যাদি|- ভ্রমঃ চক্রারূঢস্যেব| প্রলাপঃ অসম্বদ্ধভাষণম্| পতনম্ অনূর্ধ্বস্থিতিঃ| প্রমোহঃ নৈবাত্যন্তং চিত্তনাশঃ| বিচেষ্টনং বিগতকাযপরিস্পন্দনম্| সংলযনং সুষুপ্তাবস্থস্যেব চিত্তস্যাকর্মণ্যতা| উষ্ণতা শরীরস্য পরিতাপঃ| স্রস্তাঙ্গতা শরীরশৈথিল্যম্| মূর্চ্ছনং চেতনাচ্যুতিঃ| ঊর্ধ্ববাত ইতি শ্বাসোঽত্রাভিপ্রেতো ন রোগবিশেষঃ| মাংসোদকাভং মাংসধাবনজলসদৃশম্| উপরমো নিবৃত্তিঃ| দশার্ধসঙ্খ্যেষ্বিতি ‘তদেব যুক্তং’ ইত্যাদিশ্লোকোক্তেষু মর্মসন্ধিশিরাস্নায্বস্থিষু পঞ্চসু ক্ষতেষু বিদ্ধেষু||৩৪-৩৫||

Adhikarana 20 (36-39) · Śloka 39

সুরেন্দ্রগোপপ্রতিমং প্রভূতং রক্তং স্রবেদ্বৈ ক্ষততশ্চ বাযুঃ | করোতি রোগান্ বিবিধান্ যথোক্তাংশ্ছিন্নাসু ভিন্নাস্বথবা সিরাসু ||৩৬|| কৌব্জ্যং শরীরাবযবাবসাদঃ ক্রিযাস্বশক্তিস্তুমুলা রুজশ্চ | চিরাদ্ব্র্রণো রোহতি যস্য চাপি তং স্নাযুবিদ্ধং মনুজং ব্যবস্যেত্ ||৩৭|| শোফাতিবৃদ্ধিস্তুমুলা রুজশ্চ বলক্ষযঃ পর্বসু ভেদশোফৌ | ক্ষতেষু সন্ধিষ্বচলাচলেষু স্যাত্ সন্ধিকর্মোপরতিশ্চ লিঙ্গম্ ||৩৮|| ঘোরা রুজো যস্য নিশাদিনেষু সর্বাস্ববস্থাসু ন শান্তিরস্তি | তৃষ্ণাঙ্গসাদৌ শ্বযথুশ্চ রুক্ চ তমস্থিবিদ্ধং মনুজং ব্যবস্যেত্ ||৩৯||

অমর্মবিদ্ধসিরাদিলিঙ্গং দর্শযন্নাহ- সুরেন্দত্যাদি| সুরেন্দ্রগোপপ্রতিমমিতি ইন্দ্রগোপকীটসন্নিভমিত্যর্থঃ| যথোক্তানিতি শোণিতবর্ণনীযোক্তশিরোরোগাধিমন্থাদীন্| কৌব্জ্যমিত্যাদি কৌব্জ্যমিতি অন্তর্বহিরাযামজং দ্বিধা| অবযবাবসাদ ইতি অবযবস্য স্বকর্মণ্যসামর্থ্যম্| ক্রিযাস্বশক্তিরিতি সামান্যেন সর্বশরীরস্য, ক্রিযাশ্চাত্রোত্ক্ষেপণাপক্ষেপণপ্রসারণাকুঞ্চনলক্ষণাঃ| তুমুলা গহনাঃ; অন্যে তু “বাতপিত্তশ্লেষ্মজনিতা একত্র ব্যাকুলীভূতবেদনাস্তুমুলা উচ্যন্তে” ইতি বদন্তি| ব্যবস্যেত্ জানীযাদিত্যর্থঃ| শোফাতিবৃদ্ধিরিত্যাদি শোফঃ প্রসিদ্ধঃ| পর্বস্বিতি সন্ধিষু| ভেদঃ স্ফুটনমিব| চলেষ্বিতি শাখাহনুকরগ্রীবাসু চলাঃ সন্ধযঃ||৩৬-৩৯||

Adhikarana 21 (40) · Śloka 40

যথাস্বমেতানি বিভাবযেচ্চ লিঙ্গানি মর্মস্বভিতাডিতেষু |৪০|

সিরাদীনাং মর্মরহিতানাং বিদ্ধলক্ষণমভিধায সিরাদিমর্মবিদ্ধলক্ষণমতিদেশেন দর্শযন্নাহ- যথাস্বমিত্যাদি| চকারোঽযং ভিন্নক্রমে এতানি চেত্যত্র দ্রষ্টব্যঃ, তেন ন কেবলং ভ্রমপ্রলাপাদীনি পূর্বোক্তানি , কিন্তু অবমর্মবিদ্ধসিরাদিলিঙ্গান্যপি যথাস্বং বোদ্ধব্যানীত্যর্থঃ|৪০|-

Adhikarana 22 (40) · Śloka 40

স্পর্শং ন জানাতি বিপাণ্ডুবর্ণো যো মাংসমর্মণ্যভিতাডিতঃ স্যাত্ ||৪০||

অনুক্তস্য মাংসস্য মর্মবিদ্ধলক্ষণং দর্শযন্নাহ- স্পর্শমিত্যাদি| সিরাদিবন্মাংসমপি পূর্বং কুতো ন নির্দিষ্টমিতি চেত্? কেবলমাংসবিদ্ধস্যাব্যাপকত্বাত্| কেচিদাচার্যা ভ্রমপ্রলাপাদীনি লিঙ্গানি সদ্যঃপ্রাণহরাদীনাং মর্মণাং মন্যন্তে, অত এব তেষাং মতে দশার্ধসঙ্খ্যেষ্বিত্যত্র সদ্যঃপ্রাণহরকালান্তরপ্রাণহরবিশল্যপ্রাণহরবৈকল্যকররুজাকরাখ্যেষু পঞ্চসু মর্মস্বিতি ব্যাখ্যানং, তথা তেষাং মতে যানি সিরাদীনাং ‘সুরেন্দ্রগোপপ্রতিমাং’ ইত্যাদিলক্ষণান্যুক্তানি তান্যপি সিরাদিমর্মবিদ্ধেষু জ্ঞাতব্যানি, ন পুনর্মর্মরহিতসিরাদিবিদ্ধেষু, অত এব তেষাং মতে ‘যথাস্বমেতানি বিভাবযেচ্চ’ ইত্যত্র ন চকারার্থং কথযন্তি, কিন্তু সুরেন্দ্রগোপপ্রতিমমিত্যাদ্যুক্তলক্ষণেষ্বন্তর্ভাবযন্তি যথাস্বমিত্যাদিপাঠম্||৪০||

Adhikarana 23 (41) · Śloka 41

আত্মানমেবাথ জঘন্যকারী শস্ত্রেণ যো হন্তি হি কর্ম কুর্বন্ | তমাত্মবানাত্মহনং কুবৈদ্যং বিবর্জযেদাযুরভীপ্সমানঃ ||৪১||

অতিরিক্তশস্ত্রব্যাপদমভিধায বৈদ্যস্যৈবাত্মগাত্রচ্ছেদনব্যাপদং দর্শযন্নাহ- আত্মানমেবেত্যাদি| আত্মানমেবেতি স্বাঙ্গমেবেত্যর্থঃ; শস্ত্রগ্রহণধারণাবচারণানভিজ্ঞত্বাদ্ধিনস্তীত্যর্থঃ| জঘন্যকারী অতিহীনকর্মকারী| তং তথাবিধং কুবৈদ্যম্| আত্মবান্ বুদ্ধিমান্, ‘আতুর’ ইতি শেষঃ| আত্মহনম্ আত্মচ্ছেদিনম্, আত্মতুদম্ ইতি কেচিত্ পঠন্তি| আযুঃ জীবিতম্||৪১||

Adhikarana 24 (42) · Śloka 42

তির্যক্ প্রণিহিতে শস্ত্রে দোষাঃ পূর্বমুদাহৃতাঃ | তস্মাত্ পরিহরন্ দোষান্ কুর্যাচ্ছস্ত্রনিপাতনম্ ||৪২||

তির্যক্শস্ত্রপ্রণিধানকর্মব্যাপদং দর্শযন্নাহ- তির্যক্প্রণিহিত ইত্যাদি| দোষাঃ পূর্বমুদাহৃতা ইতি অগ্রোপহরণীযাধ্যাযে ‘সিরাস্নাযুচ্ছেদনম্’ (সূ. অ.৫) ইত্যাদযো দোষাঃ| দোষপরিহারং দর্শযন্নাহ- তস্মাদিত্যাদি||৪২||

Adhikarana 25 (43) · Śloka 44

মাতরং পিতরং পুত্রান্ বান্ধবানপি চাতুরঃ | অপ্যেতানভিশঙ্কেত বৈদ্যে বিশ্বাসমেতি চ ||৪৩|| বিসৃজত্যাত্মনাঽঽত্মানং ন চৈনং পরিশঙ্কতে |৪৪|

ইদানীং বৈদ্যং প্রত্যাতুরেণ কিং কর্তব্যমিত্যাহ- মাতরমিত্যাদি| অত্র শ্লোকে প্রথমোঽপিশব্দঃ সমুচ্চযে, দ্বিতীযস্তু সম্ভাবনাযাম্| বিসৃজতি দদাতি| আত্মনা স্বযমেব| আত্মানং শরীরম্| এনং বৈদ্যম্||৪৩||-

Adhikarana 26 (44) · Śloka 44

তস্মাত্ পুত্রবদেবৈনং পালযেদাতুরং ভিষক্ ||৪৪||

বৈদ্যেনৈবংবিধে আতুরে বিশ্বস্তে যত্ কর্তব্যং তদাহ- তস্মাদিত্যাদি| এমাতুরমিত্যত্র সম্বন্ধঃ| সাধ্বেকপুত্রবত্ পালযেদিত্যর্থঃ||৪৪||

Adhikarana 27 (45) · Śloka 45

ধর্মার্থৌ কীর্তিমিত্যর্থং সতাং গ্রহণমুত্তমম্ | প্রাপ্নুযাত্ স্বর্গবাসং চ হিতমারভ্য কর্মণা ||৪৫||

সম্যক্পালনে মহদেব ফলং ভবতীতি দর্শযন্নাহ- ধর্মার্থাবিত্যাদি| সতাং গ্রহণমুত্তমমিতি শিষ্টানাং মধ্যে গ্রহণমুপাদানমুত্তমং ভবতীত্যর্থঃ||৪৫||

Adhikarana 28 (46) · Śloka 46

কর্মণা কশ্চিদেকেন দ্বাভ্যাং কশ্চিত্ত্রিভিস্তথা | বিকারঃ সাধ্যতে কশ্চিচ্চতুর্ভিরপি কর্মভিঃ ||৪৬||

সাধ্যোঽপি ব্যাধিরনেককর্মসাধ্যো ভবতীতি দর্শযন্নাহ- কর্মণেত্যাদি| কর্মণেতি ছেদ্যাদিকেন স্নেহাদিকেন বা; অপিশব্দাত্ পঞ্চাদিভিরপি| কেচিত্ ‘ধর্মার্থৌ’ ইত্যাদিশ্লোকমধ্যাযান্তে পঠন্তি||৪৬||

Adhikarana puShpikA · Śloka 25

ইতি সুশ্রুতসংহিতাযাং সূত্রস্থানেঽষ্টবিধশস্ত্রকর্মীযো নাম পঞ্চবিংশোঽধ্যাযঃ ||২৫||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে পঞ্চবিংশতিতমোঽধ্যাযঃ||২৫||