33. avāraṇīyādhyāyaḥ

Adhikarana 1 (1-2) · Śloka 2

অথাতোঽবারণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অবারণীযমিতি বারণং চিকিত্সা, ন বিদ্যতে বারণং যেষাং তে অবারণা ব্যাধযঃ, তানধিকৃত্য কৃতোঽধ্যাযোঽবারণীযঃ; এতেনাসাধ্যব্যাধীনধিকৃত্য কৃতোঽধ্যাযোঽবারণীয ইত্যর্থঃ||১-২||

Adhikarana 2 (3) · Śloka 3

উপদ্রবৈস্তু যে জুষ্টা ব্যাধযো যান্ত্যবার্যতাম্ | রসাযনাদ্বিনা বত্স! তান্ শৃণ্বেকমনা মম ||৩||

উপদ্রবৈরিতি যঃ পূর্বোত্পন্নং ব্যাধিং জঘন্যকালজাতো ব্যাধিরুপসৃজতি স তন্মূল এবোপদ্রবসঞ্জ্ঞঃ; জঘন্যকালজাত ইতি পশ্চাত্কালজাত ইত্যর্থঃ| উপদ্রবৈস্ত্বিতি তুশব্দোঽত্রাবধারণার্থঃ, তেনেদমবধারযতি- পূর্বাধ্যাযেঽরিষ্টৈর্মরণমভিহিতম্, অত্র তূপদ্রবৈরিতি| কেচিত্ ‘উপদ্রবৈশ্চ’ ইতি তুশব্দস্থানে চকারং পঠন্তি, চকারস্তু লক্ষণেঽর্থে, তেনোপদ্রবৈর্লক্ষণৈর্জুষ্টা ইত্যর্থঃ; জুষ্টাঃ সহিতাঃ| রসাযনাদ্বিনেতি রসাযনেন হ্যসাধ্যো ব্যাধিরপি প্রাযঃ সাধ্যতে| একমনাঃ সাবধানঃ| মমেতি মম পার্শ্বাত্| ‘ব্যাধযো যান্ত্যসাধ্যতাম্’ ইতি কেচিত্ পঠন্তি||৩||

Adhikarana 3 (4) · Śloka 5

বাতব্যাধিঃ প্রমেহশ্চ কুষ্ঠমর্শো ভগন্দরম্ | অশ্মরী মূঢগর্ভশ্চ তথৈবোদরমষ্টমম্ ||৪|| অষ্টাবেতে প্রকৃত্যৈব দুশ্চিকিত্স্যা মহাগদাঃ |৫|

প্রথমং মূলব্যাধযো ভবন্তি পশ্চাদুপদ্রবা ইতি মূলব্যাধীন্ দর্শযতি- বাতব্যাধিরিত্যাদি|- বাতব্যাধিরত্র মহাবাতব্যাধিরভিপ্রেতো মহচ্ছব্দলোপাত্| অষ্টাবেত ইত্যত্র দ্বিতীযং পুনরষ্টগ্রহণং সর্বেষাং তুল্যত্বখ্যাপনার্থম্; অন্যে ত্বন্যথা সমাদধতি, তত্তু বিস্তরভযান্ন লিখিতম্| প্রকৃত্যৈব স্বভাবেনৈব| মহাগদা ইতি মারণাত্মকত্বাদসাধ্যত্বাচ্চ মহত্ত্বমেষামিতি| ‘অষ্টাবেতে মহান্তস্তু ব্যাধযো দুস্তরাঃ সদা’- ইতি কেচিত্ পঠন্তি||৪||-

Adhikarana 4 (5-6) · Śloka 6

প্রাণমাংসক্ষযঃ শোষস্তৃষ্ণা চ্ছর্দির্জ্বরস্তথা ||৫|| অতীসারশ্চ মূর্চ্ছা চ হিক্কা শ্বাসস্তথৈব চ | এতৈরুপদ্রবৈর্জুষ্টান্ সর্বানেব বিবর্জযেত্ ||৬||

যৈরুপদ্রবৈর্জুষ্টা অসাধ্যা ভবন্তি বাতব্যাধ্যাদযো রোগাস্তানুপদ্রবানাহ- প্রাণমাংসক্ষয ইত্যাদি|- উত্সাহোপচযক্ষয ইত্যর্থঃ| চকারত্রযং বক্ষ্যমাণশোফত্বক্স্বাপাদীনাং সমুচ্চযার্থম্| এতৈরুপদ্রবৈর্জুষ্টা ইত্যত্র বহুবচনং ত্রিভির্বা জুষ্টা ইতি খ্যাপনার্থম্| অন্যে ‘প্রাণমাংসক্ষযশ্বাসতৃষ্ণাশোষবমীজ্বরৈঃ| মূর্চ্ছাতিসারহিক্কাভিঃ পুনশ্চৈতৈরুপদ্রবৈঃ|| বর্জনীযা বিশেষেণ ভিষজা সিদ্ধিমিচ্ছতা’- ইতি পঠন্তি||৫-৬||

Adhikarana 5 (7) · Śloka 7

শূনং সুপ্তত্বচং ভগ্নং কম্পাধ্মাননিপীডিতম্ | নরং রুজার্তমন্তশ্চ বাতব্যাধির্বিনাশযেত্ ||৭||

প্রতিব্যাধিনিযতং বিশিষ্টমরিষ্টং দর্শযন্নাহ- শূনমিত্যাদি| শূনাদ্যুপদ্রবসহিতং পুরুষং বাতব্যাধির্বিনাশযেদিতি সম্বন্ধঃ| সুপ্তত্বচং বধিরত্বচম্, ভগ্নং বাতেন ত্রুটিতম্| রুজার্তমন্তশ্চেতি অন্তর্মধ্যে রুজার্তং গম্ভীরবেদনাপীডিতং; কেচিত্ ‘নরং রুজার্তিমন্তং চ’ ইতি পঠন্তি; তত্র রুজা তোদাদিলক্ষণা, অর্তিঃ শূলঃ||৭||

Adhikarana 6 (8) · Śloka 8

যথোক্তোপদ্রবাবিষ্টমতিপ্রস্রুতমেব বা | পিডকাপীডিতং গাঢং প্রমেহো হন্তি মানবম্ ||৮||

যথোক্তোপদ্রবাবিষ্টমিতি মক্ষিকোপসর্পণাদযঃ শ্লৈষ্মিকাণাং, বৃষণাবদরণাদযঃ পৈত্তিকানাং, হৃদ্গ্রহাদযো বাতিকানাং, তৈরাবিষ্টং সংযুক্তং মানবং প্রমেহো হন্তি| অতিপ্রস্রুতমিতি সুষ্ঠু স্রবন্মূত্রম্| পিডকাপীডিতমিতি পিডকাঃ শরাবিকাকচ্ছপিকাদযঃ| গাঢম্ অতিশযেন||৮||

Adhikarana 7 (9) · Śloka 9

প্রভিন্নপ্রস্রুতাঙ্গং চ রক্তনেত্রং হতস্বরম্ | পঞ্চকর্মগুণাতীতং কুষ্ঠং হন্তীহ কুষ্ঠিনম্ ||৯||

প্রভিন্নমিত্যাদি|- প্রভিন্নপ্রস্রুতাভ্যাং সহাঙ্গশব্দঃ প্রত্যেকং সম্বধ্যতে| হতস্বরমিতি নষ্টস্বরম্| পঞ্চকর্মগুণাতীতমিতি অত্র বমনাদীনাং পঞ্চকর্মণামপ্রাপ্তফলমিত্যেকে; তত্তু ন সম্যক্, যতঃ পঞ্চশব্দেন পঞ্চমধাত্ববস্থিতং কুষ্ঠমুক্তং; তত্র কর্মাণি সংশোধনসংশমনাভ্যঙ্গগুগ্গুলুশিলাজতুপ্রভৃতীনি, তেষাং গুণাঃ ফলানি, তেভ্যোঽতীতম্; এতদুক্তং ভবতি- অস্থিগতকুষ্ঠং সংশোধনাদিভিরপ্যপ্রাপ্তবিশেষং কুষ্ঠিনং হন্তি| অন্যে তু ‘পূর্বরূপক্রিযযা সহ রসাদিধাতূনাং চতুর্ণাং ক্রিযাসমূহঃ পঞ্চকর্মাণি’ ইতি মন্যন্তে| তদ্যথা- পূর্বরূপেষু সংশোধনমুভযতঃ সেবেত; ত্বক্প্রাপ্তে শোধনালেপনানি, অত্র ত্বক্শব্দেন রসোঽভিধীযতে; এবং শোণিতমাংসমেদসামপি চিকিত্সিতং নির্দিষ্টং দর্শনীযমিতি| ইহেতি অস্মিন্ শাস্ত্রে||৯||

Adhikarana 8 (10) · Śloka 10

তৃষ্ণারোচকশূলার্তমতিপ্রস্রুতশোণিতম্ | শোফাতীসারসংযুক্তমর্শোব্যাধির্বিনাশযেত্ ||১০||

তৃষ্ণেত্যাদি| তৃষ্ণারোচকাদ্যুপদ্রবসহিতং পুরুষমর্শোব্যাধির্বিনাশযেদিতি সম্বন্ধঃ||১০||

Adhikarana 9 (11) · Śloka 11

বাতমূত্রপুরীষাণি ক্রিমযঃ শুক্রমেব চ | ভগন্দরাত্ প্রস্রবন্তি যস্য তং পরিবর্জযেত্ ||১১||

বাতেত্যাদি||১১||

Adhikarana 10 (12) · Śloka 12

প্রশূননাভিবৃষণং রুদ্ধমূত্রং রুগন্বিতম্ | অশ্মরী ক্ষপযত্যাশু সিকতা শর্করান্বিতা ||১২||

প্রশূননাভীত্যাদ্যুপদ্রবসহিতং পুরুষমশ্মরী ক্ষপযতি বিনাশযতি| আশু শীঘ্রম্| সিকতাশর্করান্বিতেতি সিকতা বালুকা, তত্সদৃশা যা শর্করা তযা সহিতাঽশ্মরীত্যর্থঃ||১২||

Adhikarana 11 (13) · Śloka 13

গর্ভকোষপরাসঙ্গো মক্কল্লো যোনিসংবৃতিঃ | হন্যাত্ স্ত্রিযং মূঢগর্ভে যথোক্তাশ্চাপ্যুপদ্রবাঃ ||১৩||

গর্ভেত্যাদি| গর্ভকোষপরাসঙ্গপ্রভৃত্যুপদ্রবাঃ স্ত্রিযং হন্যুর্বিনাশযেযুঃ, কস্মিন্ সতি? মূঢগর্ভে; গর্ভকোষপরাসঙ্গ ইতি গর্ভাশযস্য পরঃ শ্রেষ্ঠ আসঙ্গোঽতিশযেন নিরোধ ইত্যর্থঃ; অন্যে তু স্বস্থানাত্ পরস্থানং গত্বা গর্ভস্য সঙ্গো নিরোধ উত্পদ্যতে, অনেন প্রকারেণ ‘পরাসঙ্গ’ ইতি কথযন্তি | মক্কল্ল ইতি গর্ভিণীব্যাকরণোক্তো জ্ঞেযঃ; তত্রাপ্রজাতাযাশ্চেতি চকারান্ন কেবলং প্রজাতাযাঃ, অপ্রজাতাযা অপি মক্কল্লো ভবতি, তথা গর্ভাশযাচ্চ্যুতগর্ভাযা যোনিদ্বারসক্তগর্ভাশযাশ্চ রক্তং স্রুতমন্তঃস্থিতং পচ্যমানং মক্কল্লসঞ্জ্ঞং ভবতীতি জ্ঞেযম্| যোনিসংবৃতিঃ যোনিসঙ্কোচনম্| যথোক্তাশ্চাপ্যুপদ্রবা ইতি আক্ষেপককাসশ্বাসভ্রমাদযো মূঢগর্ভনিদানে পঠিতাঃ| ‘হন্যুঃ স্ত্রিযং মূঢগর্ভাং’ ইতি কেচিত্ পঠন্তি| মূঢগর্ভাং মূঢগর্ভসহিতাম্||১৩||

Adhikarana 12 (14) · Śloka 14

পার্শ্বভঙ্গান্নবিদ্বেষশোফাতীসারপীডিতম্ | বিরিক্তং পূর্যমাণং চ বর্জযেদুদরার্দিতম্ ||১৪||

পার্শ্বেত্যাদি| পার্শ্বো ভজ্যতেঽনেনেতি পার্শ্বভঙ্গো বেদনাবিশেষঃ| বিরিক্তং পূর্যমাণং চেতি বিরেচনদ্রব্যৈর্বহুশো বিরিক্তং পুনঃ পূর্যমাণমুদরার্দিতং বর্জযেদিতি||১৪||

Adhikarana 13 (15-18) · Śloka 18

যস্তাম্যতি বিসঞ্জ্ঞশ্চ শেতে নিপতিতোঽপি বা | শীতার্দিতোঽন্তরুষ্ণশ্চ জ্বরেণ ম্রিযতে নরঃ ||১৫|| যো হৃষ্টরোমা রক্তাক্ষো হৃদি সঙ্ঘাতশূলবান্ | নিত্যং বক্ত্রেণ চোচ্ছ্বস্যাত্তং জ্বরো হন্তি মানবম্ ||১৬|| হিক্কাশ্বাসপিপাসার্তং মূঢং বিভ্রান্তলোচনম্ | সন্ততোচ্ছ্বাসিনং ক্ষীণং নরং ক্ষপযতি জ্বরঃ ||১৭|| আবিলাক্ষং প্রতাম্যন্তং নিদ্রাযুক্তমতীব চ | ক্ষীণশোণিতমাংসং চ নরং নাশযতি জ্বরঃ ||১৮||

কাযচিকিত্সাব্যাধীনুপদ্রবৈরসাধ্যান্ নির্দিশন্নাহ- যস্তাম্যতীত্যাদি| যস্তাম্যতি মুহুর্মুহুর্মূর্চ্ছাং গচ্ছতি| বিসঞ্জ্ঞঃ শেতে সঞ্জ্ঞারহিতঃ স্বপিতীত্যর্থঃ| নিপতিতোঽপি বেতি ‘সঞ্জ্ঞারহিতঃ’ ইতি শেষঃ| শীতার্দিতো ‘বহিঃ’ ইতি শেষঃ| অন্তরুষ্ণশ্চেতি অন্তর্দাহযুক্তঃ| হৃষ্টরোমা উদ্ধর্ষিতরোমা| হৃদি সঙ্ঘাতশূলবানিতি অষ্ঠীলাবত্সংহতবস্তুশূলবানিত্যর্থঃ; অন্যে তু মহাশূলবানিতি মন্যন্তে| নিত্যং বক্ত্রেণ চোচ্ছ্বস্যাদিতি সর্বদা মুখেনোর্ধ্বং শ্বাসং কুর্যাদিত্যর্থঃ| তং জ্বরো হন্তি মানবমিতি তং মানবং জ্বরো হন্তি বিনাশযতীত্যর্থঃ| হিক্কেত্যাদি| মূঢং ব্যামোহযুক্তমনসম্| বিভ্রান্তলোচনমুচ্চলিতাক্ষম্ | ক্ষপযতি জ্বর ইতি ‘তত্ক্ষণাদেব’ ইতি শেষঃ| আবিলাক্ষমিত্যাদি| আবিলাক্ষম্ ওদনমণ্ডবদশ্রুপূর্ণেক্ষণম্| প্রতাম্যন্তং প্রকর্ষেণ মোহং গচ্ছন্তম্| অতীব চেতি অহর্নিশমিত্যর্থঃ| ইত্থম্ভূতমাবিলাক্ষতাদ্যুপদ্রবসহিতং নরং নাশযতি জ্বর ইতি সম্বন্ধঃ||১৫-১৮||

Adhikarana 14 (19) · Śloka 19

শ্বাসশূলপিপাসার্তং ক্ষীণং জ্বরনিপীডিতম্ | বিশেষেণ নরং বৃদ্ধমতীসারো বিনাশযেত্ ||১৯||

অত্র বিশেষেণ বৃদ্ধমিতি অবৃদ্ধমপ্যেবম্ভূতং বিনাশযেত্, বৃদ্ধং পুনর্বিশেষেণাতিশযেনেত্যর্থঃ; ইত্থম্ভূতং নরং শ্বাসাদ্যুপদ্রবসহিতমতিসারো বিনাশযেদিতি সম্বন্ধঃ| ‘ক্ষীণং জ্বরনিপীডিতম্’ ইত্যত্র স্থানে ‘ক্ষীণং বিম্বিশীপীডিতং’ ইতি পঠন্তি কেচিত্| অত্র বিম্বিশীশব্দেন প্রবাহিকোচ্যতে, ভেডেনাত্রোক্তং- ‘প্রবাহিকামিতি বিদুর্বিম্বিশীং ত্বপরে বুধাঃ’- ইতি||১৯||

Adhikarana 15 (20) · Śloka 20

শুক্লাক্ষমন্নদ্বেষ্টারমূর্ধ্বশ্বাসনিপীডিতম্ | কৃচ্ছ্রেণ বহু মেহন্তং যক্ষ্মা হন্তীহ মানবম্ ||২০||

কৃচ্ছ্রেণ বহুমেহন্তমিতি কৃচ্ছ্রেণ কষ্টেন, বহু মেহন্তং ক্ষরন্তং, ‘মলং’ ইতি শেষঃ| এতেনাহারস্যাতিশযমলীভাবঃ কথিতঃ, যস্য চাতিশযমলো নিষ্পদ্যতে তস্য মাংসরক্তক্ষযো ভবতি, স পুনরসাধ্যো ভবতি, ইত্থম্ভূতং নরং শুক্লাক্ষত্বাদ্যুপদ্রবসহিতং যক্ষ্মা হন্তীতি সম্বন্ধঃ| ইহেতি অস্মিন্ শাস্ত্রে||২০||

Adhikarana 16 (21) · Śloka 21

শ্বাসশূলপিপাসান্নবিদ্বেষগ্রন্থিমূঢতাঃ | ভবন্তি দুর্বলত্বং চ গুল্মিনো মৃত্যুমেষ্যতঃ ||২১||

শ্বাসেত্যাদি| গ্রন্থিমূঢতেতি গুল্মস্যাদর্শনম্| এতে শ্বাসাদ্যুপদ্রবা ভবন্তি, কস্যেত্যাহ- গুল্মিনো মৃত্যুমেষ্যত ইতি|- গুল্মিনো গুল্মযুক্তস্য পুরুষস্য, মৃত্যুং মরণম্, এষ্যতো গমিষ্যত ইত্যর্থঃ||২১||

Adhikarana 17 (22) · Śloka 22

আধ্মাতং বদ্ধনিষ্যন্দং ছর্দিহিক্কাতৃডন্বিতম্ | রুজাশ্বাসসমাবিষ্টং বিদ্রধির্নাশযেন্নরম্ ||২২||

আধ্মাতমিত্যাদি| বদ্ধনিষ্যন্দং বদ্ধমূত্রং রুদ্ধপূযগতিকং বা| কাযচিকিত্সাযাং যদ্যপি বিদ্রধির্ন পঠিতঃ, তথাঽপীহ গুল্মানন্তরমুপদ্রবৈঃ সোঽপ্যসাধ্যো ভবতীতি পঠিতঃ| সমাবিষ্টমিতি সহিতং নরং, বিদ্রধির্নাশযেদিতি সম্বন্ধঃ||২২||

Adhikarana 18 (23) · Śloka 23

পাণ্ডুদন্তনখো যশ্চ পাণ্ডুনেত্রশ্চ মানবঃ | পাণ্ডুসঙ্ঘাতদর্শী চ পাণ্ডুরোগী বিনশ্যতি ||২৩||

পাণ্ড্বিত্যাদি| পাণ্ডু শব্দেন শ্বেতত্বমভিদীযতে| দন্তনখযোঃ পাণ্ডুতাঽস্থিগতদোষেণ, নেত্রপাণ্ডুতা পাণ্ডুসঙ্ঘাতদর্শিত্বং চ মজ্জগতদোষেণ| পাণ্ডুসঙ্ঘাতদর্শী চেতি পাণ্ডূনাং শ্বেতদ্রব্যাণাং সঙ্ঘাতঃ সমূহঃ, তং সর্বাসু দিক্ষু পশ্যতীত্যর্থঃ||২৩||

Adhikarana 19 (24) · Śloka 24

লোহিতং ছর্দযেদ্যস্তু বহুশো লোহিতেক্ষণঃ | রক্তানাং চ দিশাং দ্রষ্টা রক্তপিত্তী বিনশ্যতি ||২৪||

লোহিতমিত্যাদি| বহুশ ইতি বহুবারম্| লোহিতেক্ষণ ইতি রক্তনেত্রঃ, এতচ্চ পূর্ববন্মজ্জগতদোষেণেতি| রক্তানাং চ দিশাং দ্রষ্টেতি এতদপি মজ্জগতদোষেণ| ‘রক্তানাং চ দিশাং দ্রষ্টা’ ইত্যত্র কেচিত্ ‘লোহিতোদ্গারদর্শী চ’ ইতি পঠন্তি| তত্রোদ্গারেঽপি লোহিতাগমত্বেন লোহিতোদ্গারঃ, লোহিতদর্শিত্বং চ মজ্জগতদোষেণৈব, লোহিতং রক্তং চ সর্বং বস্তু পশ্যতীত্যর্থঃ| ‘লোহিতোত্করদর্শী’ ইত্যন্যে পঠন্তি; ব্যাখ্যানযন্তি চ- লোহিতং সর্বং বস্তু পশ্যতীত্যর্থঃ| ‘লোহিতাকারদর্শী চ’ ইত্যপরে পঠন্তি||২৪||

Adhikarana 20 (25) · Śloka 25

অবাঙ্মুখস্তূন্মুখো বা ক্ষীণমাংসবলো নরঃ | জাগরিষ্ণুরসন্দেহমুন্মাদেন বিনশ্যতি ||২৫||

অবাগিত্যাদি|- অবাঙ্মুখস্তু অধোমুখঃ, উন্মুখো বেতি ঊর্ধ্বমুখঃ| বলশব্দেনাত্রোত্সাহঃ কথ্যতে| জাগরিষ্ণুঃ জাগরণশীলঃ| অন্যে ‘অবাঞ্চী বাঽপ্যুদঞ্চী বা’ ইতি পঠন্তি, তত্রাপি স এবার্থঃ||২৫||

Adhikarana 21 (26) · Śloka 26

বহুশোঽপস্মরন্তং তু প্রক্ষীণং চলিতভ্রুবম্ | নেত্রাভ্যাং চ বিকুর্বাণমপস্মারো বিনাশযেত্ ||২৬||

বহুশ ইত্যাদি| বহুশো বহুবারান্| অপস্মরন্তম্ অপস্মারবেগবন্তম্| প্রক্ষীণং ‘পুরুষম্’ ইতি শেষঃ| নেত্রাভ্যাং চ বিকুর্বাণমিতি নেত্রদ্বযং বিকৃতিযুক্তং করোতীত্যর্থঃ| ইত্থম্ভূতং পুরুষমপস্মারবেগাদ্যুপদ্রবসহিতমপস্মারো বিনাশযেদিতি সম্বন্ধঃ| য এতে কাযচিকিত্সারোগোপদ্রবাস্তে সমস্তা এবাসাধ্যা ইতি জ্ঞেযাঃ||২৬||

Adhikarana puShpikA · Śloka 33

ইতি সুশ্রুতসংহিতাযাং সূত্রস্থানেঽবারণীযো নাম ত্রযস্ত্রিংশত্তমোঽধ্যাযঃ ||৩৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে ত্রযস্ত্রিংশত্তমোঽধ্যাযঃ||৩৩||