15. dōṣadhātumalakṣayavr̥ddhivijñānīyādhyāyaḥ

Adhikarana 1 (1-2) · Śloka 2

অথাতো দোষধাতুমলক্ষযবৃদ্ধিবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| দোষা বাতাদযঃ, ধাতবো রসাদয উপধাতবশ্চ, মলাঃ পুরীষাদযঃ; তেষাং ক্ষযবৃদ্ধিবিজ্ঞানং যস্মিন্নস্তি স তথা| অন্যে তু ‘মলশব্দাগ্রে আদিশব্দো লুপ্তো দ্রষ্টব্যঃ, তেন স্তন্যার্তবগর্ভাদযোঽপি ধাতবো গৃহ্যন্তে’ ইতি বদন্তি||১-২||

Adhikarana 2 (3) · Śloka 3

দোষধাতুমলমূলং হি শরীরং, তস্মাদেতেষাং লক্ষণমুচ্যমানমুপধারয ||৩||

কুতঃ পুনরেষাং ক্ষযবৃদ্ধী বক্তব্যে ইত্যাহ- দোষেত্যাদি| হি যস্মাদর্থে, যস্মাচ্ছরীরং দোষাদিমূলং; যথা বৃক্ষাদীনাং সম্ভবস্থিতিপ্রলযেষু মূলং প্রধানং, তথা শরীরস্য বাতাদয ইত্যর্থঃ||৩||

Adhikarana 3 (4(1)) · Śloka 4

তত্র প্রস্পন্দনোদ্বহনপূরণবিবেকধারণলক্ষণো বাযুঃ পঞ্চধা প্রবিভক্তঃ শরীরং ধারযতি (১) |৪|

দোষধাতুমলাদীনাং সাম্যক্ষযবৃদ্ধযঃ স্বভাবাখ্যলিঙ্গেন কর্মাখ্যলিঙ্গেন চ জ্ঞেযাঃ, তস্মাত্ সাম্যাদিজ্ঞানে এতল্লিঙ্গদ্বযং বাচ্যং; তথাহি - বাতস্য স্বভাবাখ্যং লিঙ্গং ‘রূক্ষঃ শীত’(নি. অ. ১) ইত্যাদি বাতব্যাধৌ বক্ষ্যতে; পিত্তস্য তু ‘পিত্তং তীক্ষ্ণং দ্রবং’(সূ. অ. ২১) ইত্যাদি ব্রণপ্রশ্নে; তথা কফস্য ‘শ্লেষ্মা শীতো গুরুঃ’(সূ. অ. ২১) ইত্যাদি; এবং ধাতুমলযোরপি স্বভাবাখ্যং লিঙ্গং দর্শনীযম্; ইহ তু দোষাদীনাং কর্মাখ্যং লিঙ্গং দর্শযন্নাহ- তত্র প্রস্পন্দনেত্যাদি| প্রস্পন্দনং শরীরস্য চলনম্, ইদং ব্যানস্য কর্ম; উদ্বহনমিন্দ্রিযার্থানাং ধারণম্, উদানস্য কর্ম; পূরণমাহারেণ, প্রাণস্য কর্ম; বিবেকো রসমূত্রপুরীষাণাং পৃথক্করণং, সমানস্য কর্ম; শুক্রমূত্রাদীনাং বেগকালে কর্ষণমবেগকালে ধারণম্ , অপানস্য| পঞ্চধা প্রবিভক্ত ইতি প্রাণোদানসমানব্যানাপানভেদেন| অন্যে তু সামান্যং সর্ববাযূনাং প্রস্পন্দনাদিকর্ম আহুঃ; প্রস্পন্দনং শ্বাসপ্রশ্বাসাদিভাবেন চলনম্, উদ্বহনং দোষধাতুমলানামিত ইতো নযনং, পূরণম্ আহাররসাদীনাং স্বেষু স্বেষ্বাশযেষু নযনং, বিবেকঃ পূর্ববদত্রাপি, ধারণং শরীরযন্ত্রস্য | কথমিত্যাহ- পঞ্চধা প্রবিভক্ত ইত্যাদি||৪(১)||

Adhikarana 4 (4(2)) · Śloka 4

রাগপক্ত্যোজস্তেজোমেধোষ্মকৃত্ পিত্তং পঞ্চধা প্রবিভক্তমগ্নিকর্মণাঽনুগ্রহং করোতি; (২) |৪|

প্রকৃতিস্থস্য পিত্তস্য কর্ম নির্দেষ্টুমাহ- রাগেত্যাদি| কৃচ্ছব্দো রাগাদিভিঃ প্রত্যেকং সম্বধ্যতে| রাগকৃত্ রসস্য রঞ্জকাগ্নিসঞ্জ্ঞং পিত্তং; পক্তিকৃত্ আহারস্য পাচকাগ্নিসঞ্জ্ঞং পিত্তং; ওজঃকৃত্ সাধকাগ্নিসঞ্জ্ঞং পিত্তম্, ওজো হৃদিস্থং সোমাত্মকং; তেজঃকৃত্ আলোচকাগ্নিসঞ্জ্ঞং পিত্তং, তেজো দৃষ্টিঃ, তদুক্তং- “তেজো দৃষ্টিরিতি খ্যাতং তেজঃ শুক্রং প্রকীর্তিতম্”- ইতি; মেধাকৃত্ মেধা গ্রন্থাকর্ষণসামর্থ্যং, তস্যা অপি সাধকাগ্নিসঞ্জ্ঞমেব পিত্তং কারকম্; ঊষ্মকৃত্ ত্বক্স্থং পিত্তং ভ্রাজকাগ্নিসঞ্জ্ঞম্, ঊষ্মা শরীরস্যৌষ্ণ্যম্| পঞ্চধা প্রবিভক্তমিতি পাচকরঞ্জকসাধকালোচকভ্রাজকভেদেন| অগ্নিকর্মণেতি রাগাদি যদগ্নিকর্ম তেন কৃত্বেত্যর্থঃ| অনুগ্রহম্ উপকারং করোতি, ‘শরীরস্য’ ইত্যনুবর্ততে| অন্যে তু তেজঃশব্দেন বর্ণপ্রকাশিনীং ত্বক্স্থাং দীপ্তিমাহুঃ; “ইদং চ রাগাদিকর্ম সামান্যং সর্বপিত্তানাম্” ইতি বদন্তি||৪(২)||-

Adhikarana 5 (4) · Śloka 4

সন্ধিসংশ্লেষণস্নেহনরোপণপূরণবলস্থৈর্যকৃচ্ছ্লেষ্মা পঞ্চধা প্রবিভক্ত উদককর্মণাঽনুগ্রহং করোতি ||৪||

প্রকৃতিস্থস্য কফস্য কর্ম নির্দিশন্নাহ- সন্ধীত্যাদি| কৃচ্ছব্দঃ সন্ধিসংশ্লেষণাদিভিঃ প্রত্যেকং সম্বধ্যতে| সন্ধিসংশ্লেষণকৃত্ সন্ধিবন্ধনং করোতি; যদ্যপি সন্ধিসংশ্লেষণং শ্লেষ্মকর্ম ব্রণপ্রশ্নেঽপ্যুক্তং, তথাঽপীহ তদ্বচনং ব্যানস্য সন্ধিচারিত্বাত্তস্যাপি সন্ধিশ্লেষণং কর্মেতি শঙ্কানিরাসার্থম্| স্নেহনকৃদিতি শরীরস্য স্নৈগ্ধ্যং করোতি, স্নিগ্ধত্বাত্| রোপণকৃত্ ব্রণস্য, সৌম্যত্বাত্| পূরণকৃত্ শরীরস্য, বহুত্বান্মূর্তত্বাচ্চ| বলকৃত্ পুষ্টিকৃত্| স্থৈর্যকৃত্ ত্রিকসন্ধিদার্ঢ্যকৃত্, কফস্থানানাং স্বকার্যসামর্থ্যং বা| পঞ্চধা প্রবিভক্ত আশযভেদেন আমাশযোরঃশিরঃকণ্ঠসন্ধিভেদেনেত্যর্থঃ| অন্যে তু তস্যৈব কফস্যাশযভেদেন পঞ্চধাভিন্নস্য শ্লেষকক্লেদকবোধকতর্পকাবলম্বকনামান্যাহুঃ | কেচিদত্র কফকর্মসু বৃংহণং তর্পণং চ পঠন্তি, ব্যাখ্যানযন্তি চ- “বৃংহণঃ শরীরস্য, দ্রবত্বমূর্তিমত্ত্বাভ্যাং; তর্পণঃ তৃপ্তিজনকো ধাতূনাম্”||৪||

Adhikarana 6 (5(1)) · Śloka 5

রসস্তুষ্টিং প্রীণনং রক্তপুষ্টিং চ করোতি, রক্তং বর্ণপ্রসাদং মাংসপুষ্টিং জীবযতি চ, মাংসং শরীরপুষ্টিং মেদসশ্চ, মেদঃ স্নেহস্বেদৌ দৃঢত্বং পুষ্টিমস্থ্নাং চ, অস্থীনি দেহধারণং মজ্জ্ঞঃ পুষ্টিং চ, মজ্জা স্নেহং বলং শুক্রপুষ্টিং পূরণমস্থ্নাং চ করোতি, শুক্রং ধৈর্যং চ্যবনং প্রীতিং দেহবলং হর্ষং বীজার্থং চ; (১) |৫|

ইদানীং ধাতূনাং প্রকৃতিস্থানাং প্রাকৃতং কর্ম নির্দিশন্নাহ- রসস্তুষ্টিমিত্যাদি| ধৈর্যং শৌর্যং শূরত্বম্, অত এব ক্লীবা অধীরাঃ; চ্যবনং শীঘ্রত্বেনাবস্রংসনং, প্রীতিং স্নেহং প্রমদাসু; দেহবলমুত্সাহোপচযলক্ষণং; হর্ষং পুনরুত্কণ্ঠাজননং প্রমদাস্বেব; বীজার্থং চেতি বীজপ্রযোজনং, যথা- ঋতুক্ষেত্রাদিসম্পত্তৌ বীজমঙ্কুরজননং স্যাত্, এবং শুক্রমপি গর্ভজনকমিত্যর্থঃ| অন্যে ত্বন্যথা পঠন্তি- “রসঃ প্রীণযতি, রক্তং জীবযতি, মাংসং লেপযতি, মেদঃ স্নেহযতি, অস্থি ধারযতি, মজ্জা অস্থীনি পূরযতি, শুক্রং ধৈর্যচ্যবনং প্রীতিদেহবলহর্ষবীজার্থকৃত্”- ইতি; ব্যাখ্যানযন্তি চ- “রসঃ প্রীণযতি ধাতূংস্তর্পযতীত্যর্থঃ, রক্তং জীবযতি প্রাণানুবর্তনং করোতি, মাংসং লেপযতি অস্থ্যাদীন্, মেদঃ স্নেহযতি স্নেহাত্, অস্থি ধারযতি শরীরমিত্যর্থঃ, ধৈর্যচ্যবনমিতি ধৈর্যস্য চ্যবনং ধৈর্যচ্যবনং চ্যুতিঃ প্রমদাসু বিষয ইত্যর্থঃ”| অযং পাঠো নিবন্ধকারৈঃ সাদরং পঠিতঃ||৫(১)||

Adhikarana 7 (5(2)) · Śloka 5

পুরীষমুপস্তম্ভং বায্বগ্নিধারণং চ, বস্তিপূরণবিক্লেদকৃন্মূত্রং, স্বেদঃ ক্লেদত্বক্সৌকুমার্যকৃত্; (২) |৫|

অত ঊর্ধ্বং মলানাং প্রাকৃতং কর্মোচ্যতে- পুরীষমিত্যাদি| ‘করোতি’ ইত্যনুবর্ততে| উপস্তম্ভঃ অবষ্টম্ভঃ শরীরধারণমিত্যর্থঃ| কেচিত্ পুরীষকর্মসু প্রীণনং পঠন্তি, ন ত্বাচার্যাঃ| কশ্চিদাচার্যোঽত্রোপস্তম্ভং ন পঠতি| বস্তির্মূত্রাশযঃ, তস্য পূরণং, বিক্লেদমার্দ্রত্বং চ, মূত্রং করোতীত্যর্থঃ| অন্যে তু ‘ক্লেদবিবেকজং বস্তিপূরণকৃন্মূত্রং’ ইতি পঠন্তি, ক্লেদবিবেকজমিতি ক্লেদ আর্দ্রত্বং স চাহারস্য, তস্য বিবেকাত্ পৃথক্ত্বাজ্জাতং মূত্রম্| কেচিত্ ‘স্বেদঃ ক্লেদযতি’ ইতি পঠন্তি||৫(২)||-

Adhikarana 8 (5) · Śloka 5

রক্তলক্ষণমার্তবং গর্ভকৃচ্চ, গর্ভো গর্ভলক্ষণং, স্তন্যং স্তনযোরাপীনত্বজননং জীবনং চেতি ||৫||

অত উপধাতূনাং প্রাকৃতং কর্মাহ- রক্তলক্ষণমিত্যাদি| রক্তলক্ষণমার্তবমিতি রক্তস্য যানি লক্ষণানি তান্যস্য সম্ভবন্তীতি স্বভাবকথনম্| গর্ভকৃচ্চেতি প্রাকৃতকর্মকথনম্| চকারাদ্রক্তকর্মাপি জীবনসঞ্জ্ঞং করোতি| কেচিদাচার্যা “রক্তলক্ষণমার্তবং যথোক্তমকৃত্রিমং গর্ভকৃচ্চ” ইতি পঠন্তি, ব্যাখ্যানযন্তি চ- “যথোক্তমিতি ‘শশাসৃক্প্রতিমং যচ্চ যদ্বা লাক্ষারসোপমম্’- (শা. অ. ২) ইত্যাদ্যুক্তলক্ষণম্, অকৃত্রিমমিতি বাতপিত্তকফৈরধঃপ্রসৃতৈরষ্টধাঽঽর্তবদূষকৈরসৃগ্দররূপতযা বা কৃতং কৃত্রিমং, ন কৃত্রিমমকৃত্রিমং শুদ্ধং, গর্ভকৃদ্ভবতীত্যর্থঃ”| গর্ভো গর্ভলক্ষণমিতি ‘স্তনযোঃ শ্যাবমুখতা’ (শা. অ. ৩) ইত্যাদিকং ‘করোতি’ ইত্যধ্যাহারঃ| স্তন্যমিত্যাদি আপীনত্বজননং মাংসলত্বজননম্| জীবনং বালানাং, তেষামেব স্ত্রীক্ষীরসাত্ম্যত্বাত্||৫||

Adhikarana 9 (6) · Śloka 6

তত্র বিধিবত্ পরিরক্ষণং কুর্বীত ||৬||

প্রকৃতিস্থানাং রক্ষণমাহ- তত্রেত্যাদি| তত্রেতি তেষু বাতাদিষু প্রকৃতিস্থেষু| বিধিবত্ বিধিনোপপন্নং; বিধিরত্র স্বাস্থ্যবৃত্তিকঃ | পরিরক্ষণং সর্বতো রক্ষণম্||৬||

Adhikarana 10 (7) · Śloka 7

অত ঊর্ধ্বমেষাং ক্ষীণলক্ষণং বক্ষ্যামঃ | তত্র, বাতক্ষযে মন্দচেষ্টতাঽল্পবাক্ত্বমপ্রহর্ষো মূঢসঞ্জ্ঞতা চ, পিত্তক্ষযে মন্দোষ্মাগ্নিতা নিষ্প্রভতা চ, শ্লেষ্মক্ষযে রূক্ষতাঽন্তর্দাহ আমাশযেতরশ্লেষ্মাশযশূন্যতা সন্ধিশৈথিল্যং (তৃষ্ণা দৌর্বল্যং প্রজাগরণং) চ ||৭||

অত ঊর্ধ্বমিত্যাদি| কেচিদত্র “ক্ষযঃ পুনরেষামতিসংশোধনাতিসংশমনবেগবিধারণাসাত্ম্যান্নমনস্তাপব্যাযামানশনাতিমৈথুনৈর্ভবতি”- ইতি ক্ষযকারণানি পঠন্তি| “এতানি প্রাযো বাযোর্বৃদ্ধিং কুর্বন্তি, পিত্তকফযোস্তু ক্ষযমিতি; তস্মাদ্যথাসম্ভবং কারণং জ্ঞেযং; নাস্মিন্ পাঠে প্রযোজনম্” ইত্যাচার্যা বদন্তি| তত্রেত্যাদি| মন্দচেষ্টতা মন্দকাযব্যাপারতা| অপ্রহর্ষঃ অতুষ্টিঃ| মূঢসঞ্জ্ঞতা নষ্টসম্যগ্জ্ঞানতা| চকারাত্ প্রাকৃতকর্মহানিস্তদ্বিরোধিনশ্চ শ্লেষ্মণঃ প্রাকৃতকর্মবৃদ্ধিরিতি চকারঃ সমুচ্চিনোতি| এবং পিত্তাদিক্ষযেষ্বপি চকারপ্রযোজনং জ্ঞেযম্| পিত্তক্ষয ইত্যাদি নিষ্প্রভতা প্রভাহানিঃ| শ্লেষ্মক্ষয ইত্যাদি আমাশযো যত্রাশিতাদি পচ্যতে, ইতরাশযা উরঃকণ্ঠশিরঃসন্ধয ইতি; শ্লেষ্মাশযশূন্যতেতি কৃতে সতি আমাশযো লব্ধঃ, যদামাশযস্য পৃথগুপাদানং তদ্বিশেষেণ শূন্যতাখ্যাপনার্থম্| কেচিচ্ছিরঃশব্দং সূত্রে পঠন্তি, শিরসোঽপি সর্বেন্দ্রিযাধিষ্ঠানত্বেন প্রাধান্যাত্ পৃথগভিধানম্||৭||

Adhikarana 11 (8) · Śloka 8

তত্র স্বযোনিবর্ধনান্যেব প্রতীকারঃ ||৮||

দোষক্ষযে চিকিত্সামাহ- তত্রেত্যাদি| স্বযোনিবর্ধনান্যেবেতি শীতরূক্ষাদীনি| প্রতীকারশ্চিকিত্সিতম্| ন পুনঃ স্বযোনিবর্ধনান্যপি কটুকাদীনি, কুতঃ? ভূযস্ত্বেনান্যদোষপ্রকোপণত্বাত্| তথাচোক্তং- “বাতক্ষযে শীতরূক্ষৈর্ন ত্বন্যৈঃ কটুকাদিভিঃ| পিত্তক্ষযেঽপি কটুকৈরুষ্ণৈর্ন লবণাদিভিঃ|| ক্ষীরাদিভিঃ স্নিগ্ধশীতৈঃ প্রতিকুর্যাত্ কফক্ষযে”- ইতি| অন্যে তু ব্যাখ্যানযন্তি- “স্বযোনিবর্ধনানীতি স্বযোনিরাত্মহেতুঃ; তত্র বাযোর্বাযুরেব হেতুঃ, পিত্তস্যাগ্নির্হেতুঃ, কফস্য হেতুরাপঃ; বাতক্ষযে বাতবর্ধনানি, পিত্তক্ষযে পিত্তবর্ধনানি, কফক্ষযে কফবর্ধনানি” ইতি| “কফস্য যোনী রসঃ, পিত্তস্য রক্তম্” ইত্যপরে; রসরক্তযোরপি বর্ধনান্যাপ্যতৈজসদ্রব্যাণীতি স এবার্থঃ||৮||

Adhikarana 12 (9) · Śloka 9

রসক্ষযে হৃত্পীডাকম্পশূন্যতাস্তৃষ্ণা চ, শোণিতক্ষযে ত্বক্পারুষ্যমম্লশীতপ্রার্থনা সিরাশৈথিল্যং চ, মাংসক্ষযে স্ফিগ্গণ্ডৌষ্ঠোপস্থোরুবক্ষঃকক্ষাপিণ্ডিকোদরগ্রীবাশুষ্কতা রৌক্ষ্যতোদৌ গাত্রাণাং সদনং ধমনীশৈথিল্যং চ, মেদঃক্ষযে প্লীহাভিবৃদ্ধিঃ সন্ধিশূন্যতা রৌক্ষ্যং মেদুরমাংসপ্রার্থনা চ, অস্থিক্ষযেঽস্থিশূলং দন্তনখভঙ্গো রৌক্ষ্যং চ, মজ্জক্ষযেঽল্পশুক্রতা পর্বভেদোঽস্থিনিস্তোদোঽস্থিশূন্যতা চ, শুক্রক্ষযে মেঢ্রবৃষণবেদনাঽশক্তির্মৈথুনে চিরাদ্বা প্রসেকঃ প্রসেকে চাল্পরক্তশুক্রদর্শনম্ ||৯||

ইদানীং ধাতুক্ষযং দর্শযতি- রসক্ষয ইত্যাদি| হৃচ্ছব্দঃ পীডাদিভিঃ শূন্যতান্তৈঃ প্রত্যেকং সম্বধ্যতে| তৃষ্ণা উদকপানাভিলাষঃ| চকারপ্রযোজনং দোষক্ষযপ্রস্তাবে দর্শিতম্| অন্যে তু “রসক্ষযে হৃত্পীডা কম্পঃ শোষঃ শূন্যতা তৃষ্ণা চ” ইতি পঠন্তি, ব্যাখ্যানযন্তি চ- “শোষঃ শরীরস্য, শূন্যতা আমাশযস্য মনসো বা ইতি,” শেষং সমম্| শোণিতক্ষয ইত্যাদি| অম্লশীতপ্রার্থনেতি শোণিতক্ষযে সতি বাতবৃদ্ধৌ তত্প্রত্যনীকাম্লরসেচ্ছা, তথা রক্তস্য দ্রবত্বাত্তত্ক্ষযে তেজোবৃদ্ধৌ শীতপ্রার্থনাঽপি; কেচিত্ “অগ্নীষোমীযত্বাদ্রক্তস্য তত্তুল্যগুণযোরম্লশীতযোঃ প্রার্থনা ” ইতি বদন্তি| চকারাদ্বহ্নিমান্দ্যাদিকং চ শোণিতবর্ণনীযোক্তমপ্যত্র দ্রষ্টব্যম্| মাংসক্ষয ইত্যাদি| স্ফিচৌ কটিপ্রোথৌ, গণ্ডৌ গল্লৌ, উপস্থো যোনিঃ, ঊরুঃ লোকে ‘জঙ্ঘা’ ইতি ব্যাখ্যাতা, বক্ষঃ উরঃ, পিণ্ডিকা জানুগুল্ফযোরন্তরং; শুষ্কশব্দঃ স্ফিগাদিভিঃ প্রত্যেকং সম্বধ্যতে| মেদঃক্ষয ইত্যাদি রৌক্ষ্যং ত্বচঃ| মেদুরমাংসপ্রার্থনেতি মেদুরং স্নিগ্ধতমং; প্রার্থনা অভিলাষঃ| অস্থিক্ষয ইত্যাদি| রৌক্ষ্যং দেহস্য দন্তনখানাং চ; দন্তাদীনামস্থিমযত্বাদ্ভঙ্গঃ | মজ্জক্ষয ইত্যাদি| পর্বভেদো গ্রন্থিপীডা; অস্থিশূন্যতা রিক্ততা, পূরণাভাবাত্| শুক্রক্ষয ইত্যাদি| চিরাদ্বা প্রসেক ইতি কথঞ্চিত্ প্রবৃত্তাবপি চিরকালেন ক্ষরণম্; অল্পরক্তশুক্রদর্শনং শুক্রং ক্ষীণং মজ্জমিশ্রমল্পরক্তত্বমৃচ্ছতি; অন্যে তু “অল্পশুক্ররক্তদর্শনমিতি ধাতুক্ষযাত্ কুপিতো বাযুঃ শোণিতমল্পশুক্রমিশ্রং নিঃস্রাবযতি” ইতি; মেঢ্রবৃষণবেদনেতি শুক্রস্য সর্বশরীরব্যাপিনোঽপি বিশেষাধারত্বান্মেঢ্রবৃষণনির্দেশঃ||৯||

Adhikarana 13 (10) · Śloka 10

তত্রাপি স্বযোনিবর্ধনদ্রব্যোপযোগঃ (প্রতীকারঃ ) ||১০||

চিকিত্সাসূত্রং নির্দিশন্নাহ- তত্রাপীত্যাদি| স্বযোনিবর্ধনমপি সমানেন দ্রব্যেণ সমানগুণেন সমানগুণভূযিষ্ঠেন বা| সমানেন দ্রব্যেণ যথা- রক্তং রক্তেন বর্ধতে, মাংসং মাংসেন, মেদো মেদসা, অস্থি তরুণসঞ্জ্ঞকেনাস্থ্না, মজ্জা মজ্জ্ঞা, শুক্রং শুক্রেণ; সমানগুণেন যথা- রক্তক্ষযে তৈজসদ্রব্যোপযোগঃ, তেজোগুণভূযিষ্ঠদ্রব্যোপযোগো বেত্যাদি বোদ্ধব্যম্| দ্রব্যগ্রহণমুপলক্ষণং, তেন কর্মাপি যদ্যস্য ধাতোরভিবৃদ্ধিকরং তত্ক্ষযে তত্ সেব্যম্| তত্র স্বযোনিদ্রব্যাণামববোধার্থং ধাতুমলোপধাতুষু শ্লোকাঃ কথ্যন্তে- “যদ্যপি পঞ্চভূতানাং বাচ্যঃ পাকো দ্বিধা পুনঃ| তথাঽপ্যপাং প্রধানত্বাদ্রসঃ সৌম্যোঽভিধীযতে|| অতিরিক্তা গুণা রক্তে বহ্নের্মাংসে তু পার্থিবাঃ| মেদস্যম্বুভুবোরস্থ্নি পৃথিব্যনিলতেজসাম্|| মজ্জ্ঞি শুক্রে চ সোমস্য মূত্রেঽম্বুশিখিনোর্গুণাঃ| ভুবো বিশ্যার্তবে ত্বগ্নেঃ প্রস্বেদস্তন্যযোরপাম্|| ইতি ধাতুমলেষূক্তা গুণাঃ প্রাধান্যতঃ স্থিতাঃ| প্রাযেণ ভূগুণা গর্ভে স্তোকা হ্যন্যগুণা অপি”- ইতি||১০||

Adhikarana 14 (11) · Śloka 11

পুরীষক্ষযে হৃদযপার্শ্বপীডা সশব্দস্য চ বাযোরূর্ধ্বগমনং কুক্ষৌ সঞ্চরণং চ, মূত্রক্ষযে বস্তিতোদোঽল্পমূত্রতা চ; অত্রাপি স্বযোনিবর্ধনদ্রব্যোপযোগঃ | স্বেদক্ষযে স্তব্ধরোমকূপতা ত্বক্শোষঃ স্পর্শবৈগুণ্যং স্বেদনাশশ্চ; তত্রাভ্যঙ্গঃ স্বেদোপযোগশ্চ ||১১||

মলক্ষযং দর্শযন্নাহ- পুরীষক্ষয ইত্যাদি| কুক্ষিরত্র জঠরম্| অত্র চিকিত্সাসূত্রং নির্দিশন্নাহ- অত্রাপীত্যাদি| পুরীষক্ষযে মাষকুল্মাষাদীনাং, মূত্রক্ষযে ইক্ষুত্রপুসাদীনামুপযোগঃ| স্বেদক্ষয ইত্যাদি| স্পর্শবৈগুণ্যং স্পর্শহানিঃ| চিকিত্সামাহ- তত্রাভ্যঙ্গ ইত্যাদি| চকারাত্ স্বেদজননকুক্কুটবরাহাদিমাংসোপযোগশ্চাভ্যন্তরো লভ্যতে||১১||

Adhikarana 15 (12) · Śloka 12

আর্তবক্ষযে যথোচিতকালাদর্শনমল্পতা বা যোনিবেদনা চ; তত্র সংশোধনমাগ্নেযানাং চ দ্রব্যাণাং বিধিবদুপযোগঃ | স্তনক্ষযে স্তনযোর্ম্লানতা স্তন্যাসম্ভবোঽল্পতা বা; তত্র শ্লেষ্মবর্ধনদ্রব্যোপযোগঃ | গর্ভক্ষযে গর্ভাস্পন্দনমনুন্নতকুক্ষিতা চ; তত্র প্রাপ্তবস্তিকালাযাঃ ক্ষীরবস্তিপ্রযোগো মেদ্যান্নোপযোগশ্চেতি ||১২||

উপধাতুক্ষযমাহ- আর্তবক্ষয ইত্যাদি| যথোচিতকালো মাসি মাসি ত্র্যহস্রবণম্| চিকিত্সামাহ- তত্র সংশোধনমিত্যাদি| “সংশোধনমিহ সামান্যম্” ইতি কেচিত্; “সংশোধনমিহ বমনং ন বিরেকঃ” ইত্যপরে, কুতঃ? বিরেচনেন হি পিত্তক্ষযাদার্তবস্য ক্ষয এব স্যাদিতি, বমনেন তু সৌম্যধাতৌ নির্হৃতে আগ্নেযধাতৌ বৃদ্ধে আর্তবমাপ্যায্যতে| আগ্নেযানাং চ দ্রব্যাণামিতি তিলমাষসুরাশুক্তাদীনাম্| স্তন্যক্ষয ইত্যাদি| ম্লানতা অনুন্নতিঃ| চিকিত্সামাহ- তত্র শ্লেষ্মবর্ধনেত্যাদি| স্তন্যস্য রসজত্বাত্| গর্ভক্ষয ইত্যাদি| অত্র চিকিত্সামাহ- তত্রেত্যাদি| প্রাপ্তবস্তিকালাযা ইতি প্রাপ্তাষ্টমমাসাযা ইত্যর্থঃ| মেদ্যান্নোপযোগ ইতি স্নিগ্ধান্নোপযোগঃ; “মেধ্যাণ্ডোপযোগ” ইত্যন্যে পঠন্তি, “মেধ্যাণ্ডানি বৃষ্যাণ্ডানি, বস্তমত্স্যাণ্ডাদীনি” ইতি চ ব্যাখ্যানযন্তি||১২||

Adhikarana 16 (13) · Śloka 13

অত ঊর্ধ্বমতিবৃদ্ধানাং দোষধাতুমলানাং লক্ষণং বক্ষ্যামঃ | বৃদ্ধিঃ পুনরেষাং স্বযোনিবর্ধনাত্যুপসেবনাদ্ভবতি | তত্র, বাতবৃদ্ধৌ বাক্পারুষ্যং কার্শ্যং কার্ষ্ণ্যং গাত্রস্ফুরণমুষ্ণকামি(ম)তা নিদ্রানাশোঽল্পবলত্বং গাঢবর্চস্ত্বং চ; পিত্তবৃদ্ধৌ পীতাবভাসতা সন্তাপঃ শীতকামিত্বমল্পনিদ্রতা মূর্চ্ছা বলহানিরিন্দ্রিযদৌর্বল্যং পীতবিণ্মূত্রনেত্রত্বং চ; শ্লেষ্মবৃদ্ধৌ শৌক্ল্যং শৈত্যং স্থৈর্যং গৌরবমবসাদস্তন্দ্রা নিদ্রা সন্ধিবিশ্লেষশ্চ ||১৩||

অত ঊর্ধ্বমিত্যাদি| গাঢবর্চস্ত্বং চেতি চকারোঽযং বাতস্য প্রকৃতিকর্মণোঽতিশযত্বং সমুচ্চিনোতি, এবং পিত্তকফরসাদিষ্বপি চকারপ্রযোজনম্| বাক্পারুষ্যং বচনকার্কশ্যং, কেচিদ্বাক্পারুষ্যং ন পঠন্তি| কার্শ্যং মাংসক্ষযঃ| কার্ষ্ণ্যং কৃষ্ণত্বং শরীরে| অল্পবলত্বম্ উত্সাহহানিঃ| পিত্তবৃদ্ধাবিত্যাদি| অল্পনিদ্রতা কিঞ্চিত্ স্নিগ্ধত্বাত্ পিত্তস্য| মূর্চ্ছা সর্বেন্দ্রিযশক্তেস্তিরস্কারঃ| বলহানিরিহ ওজোহানিঃ, সন্তাপাত্তত্ক্ষযোপপত্তেঃ| শ্লেষ্মবৃদ্ধাবিত্যাদি| শৌক্ল্যশৈত্যে ত্বগাদীনাম্| স্থৈর্যং গাত্রাণাং স্তম্ভঃ| অবসাদঃ চিত্তদেহযোর্গ্লানিঃ| তন্দ্রা নিদ্রাভেদঃ| সন্ধিবিশ্লেষঃ অত্যন্তবৃদ্ধেন বিষ(ঘ)টনম্| ‘সন্ধ্যস্থিশ্লিষ্টতা ’ ইতি কেচিত্ পঠন্তি, ব্যাখ্যানযন্তি চ- ‘কফোপচিতত্বাত্ সুষ্ঠু সঙ্ঘট্টনং সন্ধ্যস্থ্নোর্ভবতি’ ইতি| ‘অধ্যস্থিশ্লিষ্টতা’ ইতি ক্বচিত্ পাঠঃ||১৩||

Adhikarana 17 (14) · Śloka 14

রসোঽতিবৃদ্ধো হৃদযোত্ক্লেদং প্রসেকং চাপাদযতি; রক্তং রক্তাঙ্গাক্ষিতাং সিরাপূর্ণত্বং চ; মাংসং স্ফিগ্গণ্ডৌষ্ঠোপস্থোরুবাহুজঙ্ঘাসু বৃদ্ধিং গুরুগাত্রতাং চ; মেদঃস্নিগ্ধাঙ্গতামুদরপার্শ্ববৃদ্ধিং কাসশ্বাসাদীন্ দৌর্গন্ধ্যং চ; অস্থ্যধ্যস্থীন্যধিদন্তাংশ্চ; মজ্জা সর্বাঙ্গনেত্রগৌরবং চ; শুক্রং শুক্রাশ্মরীমতিপ্রাদুর্ভাবং চ ||১৪||

ধাতূনামতিবৃদ্ধিং দর্শযন্নাহ- রসোঽতিবৃদ্ধ ইত্যাদি| হৃদযোত্ক্লেদং হৃল্লাসম্, অন্যে ছর্দিমাহুঃ| প্রসেকং লালাস্রাবমিত্যর্থঃ| আপাদযতীতি ক্রিযাপদং গর্ভো জঠরাভিবৃদ্ধিং স্বেদং চেত্যন্তং যাবদনুবর্ততে| অধ্যস্থীনি অধিকাস্থীনি| অধিদন্তানিতি অধিকান্ দন্তান্; চকারাত্ কেশনখযোরপ্যতিবৃদ্ধির্জ্ঞেযা| শুক্রমিত্যাদি|- অতিপ্রাদুর্ভাবমিতি অতিপ্রবৃত্তিং শুক্রস্যেত্যর্থঃ||১৪||

Adhikarana 18 (15) · Śloka 15

পুরীষমাটোপং কুক্ষৌ শূলং চ; মূত্রং মূত্রবৃদ্ধিং মুহুর্মুহুঃ প্রবৃত্তিং বস্তিতোদমাধ্মানং চ; স্বেদস্ত্বচো দৌর্গন্ধ্যং কণ্ডূং চ ||১৫||

মলানামতিবৃদ্ধিং দর্শযন্নাহ- পুরীষমিত্যাদি| আটোপম্ আধ্মানং, ক্ষোভমিত্যন্যে| মূত্রমিত্যাদি| আধ্মানমিহ বস্তেরেব||১৫||

Adhikarana 19 (16) · Śloka 16

আর্তবমঙ্গমর্দমতিপ্রবৃত্তিং দৌর্গন্ধ্যং চ; স্তন্যং স্তনযোরাপীনত্বং মুহুর্মুহুঃ প্রবৃত্তিং তোদং চ; গর্ভো জঠরাভিবৃদ্ধিং স্বেদং চ ||১৬||

উপধাতূনামতিবৃদ্ধিং নির্দেষ্টুমাহ- আর্তবমিত্যাদি| অঙ্গমর্দো বেদনাবিশেষঃ| দৌর্গন্ধ্যং পিত্তধর্মত্বাদার্তবস্য, তদুক্তং- “ঈষত্কৃষ্ণং বিগন্ধং চ” (শা. অ. ৩) ইত্যাদি; “দৌর্বল্যম্” ইত্যন্যে পঠন্তি| চকারাদ্রক্তগুল্মাদীনপি||১৬||

Adhikarana 20 (17) · Śloka 17

তেষাং যথাস্বং সংশোধনং ক্ষপণং চ ক্ষযাদবিরুদ্ধৈঃ ক্রিযাবিশেষৈঃ প্রকুর্বীত ||১৭||

চিকিত্সাসূত্রং নির্দিশন্নাহ- তেষামিত্যাদি| যথাস্বং যদ্যদস্যাত্মীযম্| ক্ষপণমত্র সংশমনম্| ক্ষযাদবিরুদ্ধৈঃ ক্রিযাবিশেষৈরিতি তন্ত্রান্তরোক্তৈঃ| তথাহি- “ছিন্নাবিশ্বাদিভির্বাযুং, পিত্তং ক্ষৌদ্রফলত্রিকৈঃ| কফং গুডার্দ্রকাদ্যৈশ্চ জযেদ্দোষাবিরোধিভিঃ”- ইতি| অন্যে ত্বেবং পঠন্তি- “তেষাং ক্ষপণমবিরুদ্ধৈঃ ক্রিযাবিশেষৈঃ কুর্বীত”| ক্রিযাবিশেষৈরিতি ক্রিযাঃ সংশোধনসংশমনাহারাচারাখ্যাঃ||১৭||

Adhikarana 21 (18) · Śloka 18

পূর্বঃ পূর্বোঽতিবৃদ্ধত্বাদ্বর্ধযেদ্ধি পরং পরম্ | তস্মাদতিপ্রবৃদ্ধানাং ধাতূনাং হ্রাসনং হিতম্ ||১৮||

স্বযং তাবদেতে বৃদ্ধা অনর্থকরাঃ, পরম্পরযা বর্ধিতাঃ পূর্বপরধাতুভিরপি মহানর্থকারিণ ইতি দর্শযন্নাহ- পূর্ব ইত্যাদি| হি যস্মাদর্থে| হ্রাসনমিতি হ্রাসোঽত্র বৃদ্ধের্হানিঃ| পূর্বঃ পূর্ব ইত্যাদ্যুপলক্ষণম্| তেন পরোঽপি বৃদ্ধঃ প্রতিস্রোতঃসরিদ্বন্ধঃ(ধ)স্থলাপ্লাবনন্যাযেন পূর্বং বর্ধযতি, তথা পরোঽপি ক্ষীণঃ পূর্বং ক্ষপযতি, তথা পূর্বঃ ক্ষীণঃ পরং ক্ষপযতি| কেচিদমুং শ্লোকং ‘যস্য ধাতুক্ষযাদ্বাযুঃ’ ইত্যাদিশ্লোকস্যাগ্রে পঠন্তি||১৮||

Adhikarana 22 (19) · Śloka 19

বললক্ষণং বলক্ষযলক্ষণং চাত ঊর্ধ্বমুপদেক্ষ্যামঃ | তত্র রসাদীনাং শুক্রান্তানাং ধাতূনাং যত্ পরং তেজস্তত্ খল্বোজস্তদেব বলমিত্যুচ্যতে, স্বশাস্ত্রসিদ্ধান্তাত্ ||১৯||

বললক্ষণমিত্যাদি| পরম্ উত্কৃষ্টং, তেজ ইব তেজঃ, তেজো ঘৃতং বা, ঘৃতং যথা কৃত্স্নক্ষীরস্নেহস্তথৈবৌজোঽপি কৃত্স্নধাতুস্নেহ ইত্যর্থঃ; “যত্ পরং তেজ ইতি যদুত্কৃষ্টং সারঃ” ইত্যন্যে ব্যাখ্যানযন্তি| তত্ খল্বোজস্তদেব বলমিত্যুচ্যত ইতি, ইযং চাভেদোক্তিশ্চিকিত্সৈক্যার্থা, পরমার্থস্তু বলৌজসোর্ভেদ এব; যথা ভেদস্তদুচ্যতে- সর্বধাতুস্নেহভূতস্যোপচযলক্ষণস্যৌজসো রূপরসৌ বীর্যাদি চ বিদ্যতে, বলস্য তু ভারহরণাদিশক্তিগম্যস্য রসবীর্যবর্ণাদিগুণা ন বিদ্যন্তে, অতোঽনযোর্ভেদোঽস্ত্যেবেতি; তথাচ বলৌজসোর্ভেদো বেদোত্পত্তাবধ্যাযে উক্তঃ- “প্রাণিনাং পুনর্মূলমাহারো বলবর্ণৌজসাং চ”(সূ. অ. ১)- ইতি| তন্ত্রান্তরে তু ওজঃশব্দেন রসোঽপ্যুচ্যতে, জীবশোণিতমপ্যোজঃশব্দেনামনন্তি কেচিত্, ঊষ্মাণমপ্যোজঃশব্দেনাপরে বদন্তি||১৯||

Adhikarana 23 (20) · Śloka 20

তত্র বলেন স্থিরোপচিতমাংসতা সর্বচেষ্টাস্বপ্রতিঘাতঃ স্বরবর্ণপ্রসাদো বাহ্যানামাভ্যন্তরাণাং চ করণানামাত্মকার্যপ্রতিপত্তির্ভবতি ||২০||

বলস্য প্রাকৃতং কর্ম নির্দেষ্টুমাহ- তত্র বলেনেত্যাদি| স্থিরোপচিতমাংসতেতি এতত্সর্বধাতুসারোপচযলক্ষণেন বলেন; সর্বচেষ্টাস্বিতি কাযবাঙ্মনোব্যাপারেষু, অপ্রতিঘাতোঽপ্রতিহতশক্তিত্বম্, এতদ্ভারহরণাদিশক্তিলক্ষণেন বলেন; স্বরবর্ণপ্রসাদ ইতি প্রসাদো নৈর্মল্যম্; এতদুভযাত্মকেন বলেন| বাহ্যানামিত্যাদি|- বাহ্যানাং করণানাং কর্মেন্দ্রিযাণাম্, আভ্যন্তরাণাং বুদ্ধীন্দ্রিযাণাম্| আত্মকার্যপ্রতিপত্তিঃ স্বকীযকার্যাববোধো ভবতি; ‘প্রতিপত্তিরত্রানুষ্ঠানম্’ ইত্যন্যে| তত্র বাহ্যানাং বাক্পাণিপাদপাযূপস্থানামাত্মকার্যাণি বচনাদানগমনবিসর্গানন্দনানি, আভ্যন্তরাণাং করণানাং শ্রোত্রত্বক্চক্ষুর্জিহ্বানাসিকানামাত্মকার্যাণি শব্দস্পর্শরূপরসগন্ধগ্রহণানি; এতদপ্যুভযাত্মকেন বলেন| কেচিদন্যথা ব্যাখ্যানযন্তি- “বাহ্যানাং শ্রোত্রত্বক্চক্ষুর্জিহ্বানাসিকাবাক্পাণিপাদপাযূপস্থানাম্, আভ্যন্তরাণাং মনোবুদ্ধিপ্রভৃতীনাং, বলকারণভূতমোজঃ” ইতি||২০||

Adhikarana 24 (21-22) · Śloka 22

ভবন্তি চাত্র- ওজঃ সোমাত্মকং স্নিগ্ধং শুক্লং শীতং স্থিরং সরম্ | বিবিক্তং মৃদু মৃত্স্নং চ প্রাণাযতনমুত্তমম্ ||২১|| দেহঃ সাবযবস্তেন ব্যাপ্তো ভবতি দেহিনঃ | তদভাবাচ্চ শীর্যন্তে শরীরাণি শরীরিণাম্ ||২২||

বলচিকিত্সার্থং স্বচিকিত্সার্থমপি চ প্রাকৃতৈর্গুণৈর্নির্দিশন্নাহ- ওজ ইত্যাদি| সোমাত্মকং সৌম্যম্| স্নিগ্ধং স্নেহগুণযুক্তম্| শুক্লম্ অতিশ্বেতম্| যত্তু চরকে- “হৃদি তিষ্ঠতি যচ্ছুদ্ধং রক্তমীষত্ সপীতকম্” (সূ. অ. ১৭)- ইত্যাদিশ্লোকেনৌজস্ত্রিবর্ণং পঠিতং; তত্র হি শুদ্ধগ্রহণেন শুক্লমুক্তম্, অতঃ শুক্লপীতরক্তবর্ণাস্ত্রয উক্তাঃ; অত্রাপ্যোজসস্ত্রয এব বর্ণাঃ, যেনাত্র ‘শুক্রমোজঃ’ ইতি পঠিতং, শুক্রৌজসোরভেদাদপরং তৈলক্ষৌদ্রবর্ণদ্বযং প্রাপ্তং; তেনাত্রাপি শুক্লরক্তপীতবর্ণাস্ত্রয এবৌজস উক্তাঃ; ন চাত্র শুক্রৌজসোর্ভেদোঽঙ্গীকর্তব্যঃ, তস্মিন্ সত্যষ্টধাতুত্বং স্যাত্, তস্মাদ্রসাদিধাতুস্নেহপরম্পরাহৈতুকঃ স্নেহঃ শুক্রং, ক্ষীরস্থঘৃতমিবাভিন্নমোজঃ শুক্রেণ| অপরে শুক্লস্থানে শুক্রং পঠন্তি; যুক্তং চৈতত্ শুক্রবর্ণেনৈবৌজোবর্ণানাং নির্দিষ্টত্বাত্| শীতং শীতবীর্যম্| স্থিরং শরীরাবযবস্থৈর্যকারি| সরং প্রসরণশীলম্| অন্যে ত্বত্র ‘রসং’ ইতি পঠন্তি, ‘প্রধানরসকল্পনযা মধুরম্’ ইতি ব্যাখ্যানযন্তি চ| বিবিক্তং শ্রেষ্ঠৈর্গুণৈর্যুক্তম্; অন্যে পুনর্বিবিক্তং প্রত্যগ্রমাহুঃ, ততঃ প্রত্যগ্রৈরেবান্নাদিভিরাপ্যাযনম্| মৃদু কোমলম্| মৃত্স্নং চেতি পিচ্ছিলম্| চকারাদ্গুর্বাদযো গুণা অনুক্তাঃ সমুচ্চীযন্তে| প্রাণানাম্ অগ্নীষোমাদীনাম্, আযতনং স্থানম্| উত্তমং শ্রেষ্ঠম্| তত্র বলেনেত্যাদিবাক্যেন স্থিতৌ হেতুত্বং প্রতিপাদযতি| দেহ ইত্যাদি| তেন ওজসা| ভবতি উত্পদ্যতে| ইদানীং প্রলযে তস্যৈব হেতুত্বং দর্শযন্নাহ- তদভাবাদিত্যাদি| শীর্যন্তে বিনশ্যন্তি| অযং পাঠোঽভাবাত্ সমগ্রো ন লিখিতঃ||২১-২২||

Adhikarana 25 (23) · Śloka 23

অভিঘাতাত্ক্ষযাত্কোপাচ্ছোকাদ্ধ্যানাচ্ছ্রমাত্ক্ষুধঃ | ওজঃ সঙ্ক্ষীযতে হ্যেভ্যো ধাতুগ্রহণনিঃসৃতম্ | তেজঃ সমীরিতং তস্মাদ্বিস্রংসযতি দেহিনঃ ||২৩||

ইদানীমভিঘাতাদিভির্হেতুভিরোজসঃ ক্ষযং নির্দিশন্নাহ- অভিঘাতাদিত্যাদি| এভ্যোঽভিঘাতাদিহেতুভ্যঃ| ধাতুগ্রহণমিতি ধাতবো গৃহ্যন্তে যৈস্তানি ধাতুগ্রহণানি ধাতুবাহীনি স্রোতাংসি, তেভ্যো নিঃসৃতং নির্গতং সর্বধাতুস্নেহপরম্পরারূপেণ; অথবা ধাতুগ্রহণং হৃদযং ধাতুবহস্রোতসাং স্থানত্বাত্, তস্মাদ্ধৃদযান্নিঃসৃতং, স্রোতসো মুখৈরেব| অন্যৈস্তু হৃদযমেব ধাতূন্ গৃহ্ণাতীতি ধাতুগ্রহণশব্দেনৈব হৃদযমুচ্যতে| তেজঃ পিত্তং, সমীরিতং সম্যক্প্রেরিতং ‘বাতেন’ ইতি শেষঃ| তস্মাত্ হৃদযাত্; বিস্রংসযতি চ্যাবযতি||২৩||

Adhikarana 26 (24) · Śloka 24

তস্য বিস্রংসো ব্যাপত্ ক্ষয ইতি (ত্রযো দোষাঃ;) লিঙ্গানি ভবন্তি সন্ধিবিশ্লেষো গাত্রাণাং সদনং দোষচ্যবনং ক্রিযাসন্নিরোধশ্চ বিস্রংসে, স্তব্ধগুরুগাত্রতা বাতশোফো বর্ণভেদো গ্লানিস্তন্দ্রা নিদ্রা চ ব্যাপন্নে, মূর্চ্ছা মাংসক্ষযো মোহঃ প্রলাপো মরণমিতি চ ক্ষযে ||২৪||

তস্যৌজসঃ ক্ষযভেদান্ সাধ্যাসাধ্যজ্ঞানার্থং স্বলক্ষণৈর্নির্দিশন্নাহ- তস্যেত্যাদি| বিস্রংসঃ স্থানাচ্চ্যুতিরভিঘাতাদিভিরেব| ব্যাপদন্যথাপত্তিঃ, সা দুষ্টদোষদূষ্যসংসর্গাত্| ক্ষযঃ স্বপ্রমাণাত্ শোকধ্যানক্ষযাদিভিঃ| ‘লিঙ্গানি ব্যাপন্নস্য ভবন্তি’ ইতি কেচিত্ পঠন্তি; ব্যাপন্নস্য দোষদূষিতস্য| বিস্রংসাদীনামোজঃক্ষযভেদানাং কিং লিঙ্গমিত্যাহ- সন্ধিবিশ্লেষ ইত্যাদি| সন্ধিবিশ্লেষঃ সন্ধীনাং বিষটনম্| দোষচ্যবনং স্বস্থানাদ্বাতাদীনাং ভ্রংশঃ, অন্যে “দোষৈঃ কৃত্বা চ্যবনমোজসঃ” ইতি বদন্তি, “দোষচ্যবনং মলানাং চ্যবনম্” ইতি কেচিত্| ক্রিযাণাং কাযবাঙ্মানসীনাং সন্নিরোধঃ; “ক্রিযাশব্দাগ্রে নঞ্ লুপ্তো দ্রষ্টব্যঃ; নঞ্ ঈষদর্থে, তেন ক্রিযাণামীষত্সন্নিরোধঃ” ইত্যন্যে ব্যাচক্ষতে| চকারাদ্বলস্য প্রাকৃতকর্মহানিঃ| এবং ব্যাপত্তৌ ক্ষযে চ চকারপ্রযোজনম্| এতানি বিস্রংসে লিঙ্গানি ভবন্তীতি যোজ্যম্| স্তব্ধগুরুগাত্রতেতি স্তব্ধগুরুভ্যাং গাত্রতেতি সম্বধ্যতে; স্তব্ধগাত্রতা জান্বাদেরনমনসামর্থ্যম্| বর্ণভেদো গৌরাদিবর্ণান্যত্বম্| গ্লানিঃ অপ্রহর্ষঃ| তন্দ্রা ইন্দ্রিযার্থেঽকর্মণ্যতা| ব্যাপন্নে ‘লিঙ্গানি ভবন্তি’ ইত্যনুবর্ততে| মূর্চ্ছেত্যাদি মূর্চ্ছা বিজ্ঞানেন্দ্রিযনিরোধঃ| মোহঃ বৈচিত্ত্যম্| প্রলাপঃ অসম্বদ্ধভাষণম্| ক্ষযে ‘লিঙ্গানি ভবন্তি’ ইত্যনুবর্ততে||২৪||

Adhikarana 27 (25-27) · Śloka 28

ভবন্তি চাত্র- ত্রযো দোষা বলস্যোক্তা ব্যাপদ্বিস্রংসনক্ষযাঃ | বিশ্লেষসাদৌ গাত্রাণাং দোষবিস্রংসনং শ্রমঃ ||২৫|| অপ্রাচুর্যং ক্রিযাণাং চ বলবিস্রংসলক্ষণম্ | গুরুত্বং স্তব্ধতাঽঙ্গেষু গ্লানির্বর্ণস্য ভেদনম্ ||২৬|| তন্দ্রা নিদ্রা বাতশোফো বলব্যাপদি লক্ষণম্ | মূর্চ্ছা মাংসক্ষযো মোহঃ প্রলাপোঽজ্ঞানমেব চ ||২৭|| পূর্বোক্তানি চ লিঙ্গানি মরণং চ বলক্ষযে |২৮|

গদ্যোক্তমেবার্থং শ্লোকৈরাহ- ভবন্তি চাত্রেত্যাদি| ত্রযো দোষাঃ তিস্রো বিকৃতযঃ| বিশ্লেষসাদাবিত্যাদি| পূর্বোক্তানি বিস্রংসব্যাপদোর্লিঙ্গানীত্যর্থঃ||২৫-২৭||

Adhikarana 28 (28) · Śloka 28

তত্র বিস্রংসে ব্যাপন্নে চ ক্রিযাবিশেষৈরবিরুদ্ধৈর্বলমাপ্যাযযেত্ ; ইতরং তু মূঢসঞ্জ্ঞং বর্জযেত্ ||২৮||

চিকিত্সাসূত্রং নির্দিশন্নাহ- তত্রেত্যাদি| ক্রিযাবিশেষৈ রসাযনবাজীকরণাদিভিঃ| অবিরুদ্ধৈরগ্ন্যাদ্যবিরুদ্ধৈঃ| বলং শক্ত্যুপচযলক্ষণম্| আপ্যাযযেত্ বর্ধযেত্| ক্ষীণস্যাবস্থাযাং বর্জনমাহ- ইতরং ত্বিত্যাদি|- ইতরং ক্ষীণং বর্জযেত্| কিম্ভূতং বর্জযেদিত্যাহ- মূঢসঞ্জ্ঞং নষ্টসঞ্জ্ঞং, পূর্বং মোহস্যোক্তত্বাত্| মূঢসঞ্জ্ঞং বর্জযেদিত্যেতস্যাগ্রে কেচিত্ সুশ্রুতাধ্যাযিনঃ “তেজোঽপ্যাগ্নেযং ক্রমশঃ পচ্যমানানাং ধাতূনামভিনির্বৃত্তমন্তরস্থং স্নেহজাতং বসাখ্যং স্ত্রীণাং বিশেষতো ভবতি; তেন মার্দবসৌকুমার্যমৃদ্বল্পরোমতোত্সাহদৃষ্টিস্থিতিপক্তিকান্তিদীপ্তযো ভবন্তি; তত্ কষাযতিক্তগুরুশীতরূক্ষবিষ্টম্ভিবেগবিঘাতব্যবাযব্যাযামব্যাধিকর্ষণৈ(র্শনৈ)শ্চ বিক্রিযতে; তস্যাপি পারুষ্যবর্ণভেদতোদনিষ্প্রভত্বানি বিস্রংসনে ভবন্তি, কার্শ্যং মন্দাগ্নিতাঽধস্তির্যক্চ প্রচ্যুতির্ব্যাপত্তৌ, দৃষ্ট্যগ্নিবলহান্যনিলপ্রকোপমরণানি ক্ষযে| তত্র স্নেহপানাভ্যঙ্গপ্রদেহপরিষেকস্নিগ্ধলঘ্বন্নানি ক্ষযাদৃতে বিদধীত” ইত্যমুং পঠন্তি| অযং তু পাঠো ন পঠনীযঃ, কুতঃ? নিবন্ধকারৈরনার্ষীকৃতত্বাত্ ||২৮||

Adhikarana 29 (29-31) · Śloka 31

দোষধাতুমলক্ষীণো বলক্ষীণোঽপি বা নরঃ | স্বযোনিবর্ধনং যত্তদন্নপানং প্রকাঙ্ক্ষতি ||২৯|| যদ্যদাহারজাতং তু ক্ষীণঃ প্রার্থযতে নরঃ | তস্য তস্য স লাভে তু তং তং ক্ষযমপোহতি ||৩০|| যস্য ধাতুক্ষযাদ্বাযুঃ সঞ্জ্ঞাং কর্ম চ নাশযেত্ | প্রক্ষীণং চ বলং যস্য নাসৌ শক্যশ্চিকিত্সিতুম্ ||৩১||

দোষেত্যাদি| স্বযোনিবর্ধনম্ আত্মকারণবর্ধনং যদন্নপানং তদভিলষতি| যদ্যদিত্যাদি| আহারজাতমাহারসমূহম্| কেচিদাচার্যা অমুং শ্লোকং ন পঠন্তি| কেচিত্ সুশ্রুতাধ্যাযিনোঽত্র দোষধাত্বাদিক্ষযবিনাশার্থং দেযমন্নাদিকং পঠন্তি- “যবান্ মুদ্গান্ হরেণূংশ্চ রূক্ষং চ লঘুভোজনম্| কষাযকটুতিক্তং চ বাতক্ষীণোঽভিকাঙ্ক্ষতি|| তিলমাষকুলত্থাদি পিষ্টান্নবিকৃতিং তথা| মস্তুশুক্তাম্লতক্রাণি পিত্তক্ষীণস্তথা দধি|| মাংসং মাহিষবারাহমাজং গুডগুরূণি চ| শ্লেষ্মক্ষীণোঽভিলষতি ক্ষীরস্বপ্নদধীনি চ|| ইক্ষুং মাংসরসং মন্থং মধু সর্পির্গুডোদকম্| অসৃঙ্মাংসং যবাগূং চ রসক্ষীণোঽভিবাঞ্ছতি|| দ্রাক্ষাদাডিমযুক্তানি সস্নেহলবণানি চ| রক্তসিদ্ধানি মাংসানি রক্তক্ষীণোঽভিকাঙ্ক্ষতি||অম্লানি দধিসিদ্ধানি তথা ষাডবকানি চ| স্থূলক্রব্যাদমাংসানি মাংসক্ষীণোঽভিকাঙ্ক্ষতি|| মেদঃসিদ্ধানি মাংসানি গ্রাম্যানূপৌদকানি চ| সক্ষারাণি বিশেষেণ মেদঃক্ষীণোঽভিকাঙ্ক্ষতি|| রসান্ সুসিদ্ধান্ সাস্থীনি মাংসানীহাভিকাঙ্ক্ষতি|| অস্থিক্ষীণস্তথা মাংসং মজ্জাস্থিস্নেহসংযুতম্| স্বাদ্বম্লসংযুতং দ্রব্যং মজ্জক্ষীণোঽভিকাঙ্ক্ষতি|| মযূরকুক্কুটাণ্ডানি হংসসারসযোস্তথা| গ্রাম্যানূপৌদকানাং চ শুক্রক্ষীণোঽভিকাঙ্ক্ষতি|| যবানি যবকান্নানি শাকানি বিবিধানি চ| মাযূরং মাষযূষং চ বর্চঃক্ষীণোঽভিকাঙ্ক্ষতি|| পেযামিক্ষুরসং ক্ষীরং সগুডং বদরোদকম্| মূত্রক্ষীণোঽভিলষতি ত্রপুসৈর্বারুকাণি চ|| অভ্যঙ্গং মর্দনং মদ্যং নিবাতশযনাসনম্| গুরুপ্রাবরণং চৈব স্বেদক্ষীণোঽভিকাঙ্ক্ষতি|| কট্বম্ললবণাম্লানি বিদাহীনি গুরূণি চ| ফলশাকানুপানানি স্ত্রী বাঞ্ছত্যার্তবক্ষযে|| মৃগাজাবিবরাহাণাং গর্ভান্ বাঞ্ছতি সংস্কৃতান্| বসাশূল্যপ্রকারাদীন্ ভোক্তুং গর্ভপরিক্ষযে|| সুরাশাল্যন্নমাংসানি গোক্ষীরং শর্করাং তথা| আসবং দধি হৃদ্যানি ক্ষযে স্তন্যস্য বাঞ্ছতি” ইতি| যস্যেত্যাদি ‘ইতরং তু মূঢসঞ্জ্ঞং বর্জযেত্’ ইত্যনেনৈবাস্যোক্তার্থত্বাত্ কেচিদমুং ন পঠন্তি, “সর্বধাতুক্ষযব্যাপকত্বাদ্ভিন্নবিষযোঽযং শ্লোকঃ,তস্মাত্ পঠনীযঃ” ইত্যন্যে||২৯-৩১||

Adhikarana 30 (32) · Śloka 32

রসনিমিত্তমেব স্থৌল্যং কার্শ্যং চ | তত্র শ্লেষ্মলাহারসেবিনোঽধ্যশনশীলস্যাব্যাযামিনো দিবাস্বপ্নরতস্য চাম এবান্নরসো মধুরতরশ্চ শরীরমনুক্রামন্নতিস্নেহান্মেদো জনযতি, তদতিস্থৌল্যমাপাদযতি ; তমতিস্থূলং ক্ষুদ্রশ্বাসপিপাসাক্ষুত্স্বপ্নস্বেদগাত্রদৌর্গন্ধ্যক্রথনগাত্রসাদগদ্গদত্বানি ক্ষিপ্রমেবাবিশন্তি, সৌকুমার্যান্মেদসঃ সর্বক্রিযাস্বসমর্থঃ, কফমেদোনিরুদ্ধমার্গত্বাচ্চাল্পব্যবাযো ভবতি, আবৃতমার্গত্বাদেব শেষা ধাতবো নাপ্যাযন্তেঽত্যর্থমতোঽল্পপ্রাণো ভবতি, প্রমেহপিডকাজ্বরভগন্দরবিদ্রধিবাতবিকারাণামন্যতমং প্রাপ্য পঞ্চত্বমুপযাতি, সর্ব এব চাস্য রোগা বলবন্তো ভবন্ত্যাবৃতমার্গত্বাত্ স্রোতসাম্; অতস্তস্যোত্পত্তিহেতুং পরিহরেত্ | উত্পন্নে তু শিলাজতুগুগ্গুলুগোমূত্রত্রিফলালোহরজোরসাঞ্জনমধুযবমুদ্গকোরদূষকশ্যামাকোদ্দালকাদীনাং বিরূক্ষণচ্ছেদনীযানাং চ দ্রব্যাণাং বিধিবদুপযোগো ব্যাযামো লেখনবস্ত্যুপযোগশ্চেতি ||৩২||

রসনিমিত্তমিত্যাদি| চকারান্মধ্যশরীরত্বং চ| ননু, কথমেক এব রসঃ পরস্পরবিরুদ্ধযোঃ স্থৌল্যকার্শ্যযোর্হেতুরিত্যত আহ- তত্রেত্যাদি| অধ্যশনশীলস্যেতি অজীর্ণভোজনাভ্যাসিন ইত্যর্থঃ| ননু, মেদস্বিনো দীপ্তাগ্নিত্বে কথমামরসসম্ভবঃ? নৈষ দোষঃ, দীপ্তাগ্নিত্বেঽপ্যধ্যশনশীলত্বাদামরসো ভবতি| তর্হি কথং রসশ্চাপক্বশ্চেতি বিরোধনীযবচনং? ন হ্যপক্বো রসব্যপদেশং লভতে| সত্যং, জাঠরেণাগ্নিনা রসঃ কদ্ভাবেন কৃত এব, কিন্তু ধাত্বগ্নিভিরপাকাদাম ইত্যুচ্যতে| শরীরমনুক্রামন্নিতি তং তং শরীরদেশং গচ্ছন্নিত্যর্থঃ| মেদো জনযতি বিশিষ্টাহারবশাদদৃষ্টবশান্মেদসাঽঽবৃতমার্গত্বাচ্চ ধাতুদ্বযমতিক্রম্য মেদ এব বর্ধযতি| তদতিস্থৌল্যমাপাদযতীতি তত্ মেদঃ, আপাদযতি করোতি| ক্রথনং স্বপতঃ কণ্ঠে ঘুর্ঘুরারবঃ, অন্যে ত্বকস্মাচ্ছ্বাসাবরোধং ক্রথনং কথযন্তি| গদ্গদত্বম্ অব্যক্তবচনত্বম্| ক্ষিপ্রমেবাবিশন্তীতি এতে ক্ষুদ্রশ্বাসাদযস্তং স্থূলং শীঘ্রমেব প্রবিশন্তি, স্থূলে ভবন্তীত্যর্থঃ| শেষধাতবো নাপ্যাযন্তেঽত্যর্থমিতি শেষধাতবোঽস্থ্যাদযঃ| বাতবিকারাণামিতি অত্র বাতবিকারা মেদঃকৃতমার্গাবরণনিমিত্তবাতকোপবিকারা ইত্যর্থঃ| অন্যতমমিতি এষামেকম্| পঞ্চত্বমুপযাতীতি মরণমুপগচ্ছতীত্যর্থঃ| তস্য চিকিত্সামাহ- অত ইত্যাদি| তস্যোত্পত্তিহেতুং পরিহরেদিত্যনেন নিদানপরিবর্জনেনানাগতাবাধচিকিত্সোক্তা| উত্পন্নে জাতে পুনরিত্যর্থঃ| উদ্দালকাদীনামিতি উদ্দালক আরণ্যকোদ্রবঃ, আদিশব্দাদ্গবেধুকাদীনাং গ্রহণম্| বিরূক্ষণচ্ছেদনীযানামিতি বিরূক্ষণং মেদোঘ্নং, ছেদনীযং স্রোতোবিশোধনীযম্| বিধিবদুপযোগ ইতি পুরুষাগ্নিবলমাত্রাবিধানবানুপযোগ ইত্যর্থঃ| লেখনবস্ত্যুপযোগশ্চ লেখনবস্তযশ্চিকিত্সিতোক্তাঃ, “ত্রিফলাক্বাথগোমূত্রক্ষৌদ্রক্ষারসমন্বিতাঃ| ঊষকাদিপ্রতীবাপা বস্তযো লেখনাঃ স্মৃতাঃ” (চি. অ. ৩৮) ইতি| চকারাদ্ব্যাযামাদযো মৃদবঃ কাঙ্কাযনসক্তবশ্চ||৩২||

Adhikarana 31 (33) · Śloka 33

তত্র পুনর্বাতলাহারসেবিনোঽতিব্যাযামব্যবাযাধ্যযনভযশোকধ্যানরাত্রিজাগরণপিপাসাক্ষু ত্কষাযাল্পাশনপ্রভৃতিভিরুপশোষিতো রসধাতুঃ শরীরমননুক্রামন্নল্পত্বান্ন প্রীণাতি, তস্মাদতিকার্শ্যং ভবতি; সোঽতিকৃশঃ ক্ষুত্পিপাসাশীতোষ্ণবাতবর্ষভারাদানেষ্বসহিষ্ণুর্বাতরোগপ্রাযোঽল্পপ্রাণশ্চ ক্রিযাসু ভবতি, শ্বাসকাসশোষপ্লীহোদরাগ্নিসাদগুল্মরক্তপিত্তানামন্যতমমাসাদ্য মরণমুপযাতি, সর্ব এব চাস্য রোগা বলবন্তো ভবন্ত্যল্পপ্রাণত্বাত্; অতস্তস্যোত্পত্তিহেতুং পরিহরেত্ | উত্পন্নে তু পযস্যাশ্বগন্ধাবিদারিগন্ধাশতাবরীবলাতিবলানাগবলানাং মধুরাণামন্যাসাং চৌষধীনামুপযোগঃ, ক্ষীরদধিঘৃতমাংসশালিষষ্টিকযবগোধূমানাং চ, দিবাস্বপ্নব্রহ্মচর্যাব্যাযামবৃংহণবস্ত্যুপযোগশ্চেতি ||৩৩||

কার্শ্যনিমিত্তং দর্শযন্নাহ- তত্র পুনরিত্যাদি| বাতলাহারসেবিন ইতি অতিরূক্ষাহারসেবিনঃ| অতিব্যাযামেত্যাদি অতিশব্দো ব্যাযামাদিভিঃ প্রত্যেকং সম্বধ্যতে| ক্ষযো ধাতুক্ষযঃ| উপশোষিতো রসধাতুরিতি অতিরূক্ষীকৃতোঽল্পীকৃতশ্চ| ন প্রীণাতি ঈষত্প্রীণাতীত্যর্থঃ| সোঽতিকৃশ ইত্যনেনোপচযলক্ষণবলাভাবো দর্শিতঃ| বাতরোগপ্রায ইতি বাতরোগবহুল ইত্যর্থঃ| অল্পপ্রাণশ্চ ক্রিযাসু ভবতীতি কাযবাঙ্মানসীষু ক্রিযাসু বিষযেঽল্পশক্তির্ভবতি; এতেন শক্তিলক্ষণবলাভাব উক্তঃ| শোষো রাজযক্ষ্মা| উত্পন্নে ত্বিতি ‘কার্শ্যে’ ইতি শেষঃ| পযস্যা অর্কপুষ্পী, ক্ষীরকাকোলীত্যন্যে| বিদারিগন্ধা শালিপর্ণী| মধুরাণামিত্যাদি ঋদ্ধিবৃদ্ধিজীবকাদীনাম্| বৃংহণবস্ত্যুপযোগশ্চেতি বৃংহণবস্তির্যথা- “বৃংহণদ্রব্যনিঃক্বাথাস্তত্কল্কস্নেহসৈন্ধবৈঃ| যুক্তাঃ খজপ্রমথিতা বস্তযো বৃংহণা মতাঃ” (চি. অ. ৩৮) ইতি| চকারাত্ সন্তর্পণমপি লঘু কর্তব্যম্||৩৩||

Adhikarana 32 (34) · Śloka 34

যঃ পুনরুভযসাধারণান্যাসেবেত তস্যান্নরসঃ শরীরমনুক্রামন্ সমান্ ধাতূনুপচিনোতি, সমধাতুত্বান্মধ্যশরীরো ভবতি সর্বক্রিযাসু সমর্থঃ ক্ষুত্পিপাসাশীতোষ্ণবাতবর্ষাতপসহো বলবাংশ্চ, স সততমনুপালযিতব্য ইতি ||৩৪||

মধ্যশরীরস্য হেতুং গুণং চ দর্শযন্নাহ- যঃ পুনরিত্যাদি| উভযসাধারণানি নাতিস্নিগ্ধরূক্ষাণি স্বাস্থ্যবৃত্তিকানি দ্রব্যাণি ষষ্টিকরক্তশালিলাবকদাডিমতণ্ডুলীযকাদীনি, অদিবাস্বপ্নাদীংশ্চ বিহারবিশেষান্| সর্বক্রিযাসু সমর্থ ইত্যনেনৈব বলবত্ত্বে লব্ধে যদ্বলবাংশ্চেতি করোতি তন্নিযমার্থম্; এবম্ভূতাহারবিহারসেবী বলবানেব ভবতীত্যর্থঃ| মধ্যশরীরস্য চিকিত্সামাহ- স সততমনুপালযিতব্য ইতি ‘স্বস্থবৃত্তানুবর্তনেন’ ইতি শেষঃ||৩৪||

Adhikarana 33 (35) · Śloka 35

ভবন্তি চাত্র- অত্যন্তগর্হিতাবেতৌ সদা স্থূলকৃশৌ নরৌ | শ্রেষ্ঠো মধ্যশরীরস্তু কৃশঃ স্থূলাত্তু পূজিতঃ ||৩৫||

তযোর্দ্বযোঃ কৃশস্থূলযোর্দোষবত্ত্বেঽপি স্থূলস্যাতিশযদোষবত্ত্বং মধ্যশরীরস্য চ গুণবত্ত্বং নির্দেষ্টুমাহ- অত্যন্তেত্যাদি| কুতঃ স্থূলাত্ কৃশঃ পূজিতঃ? উচ্যতে- স্থূলস্য ক্রিযাঽক্ষমত্বাত্, অতিশযেন ব্যাধিপীডনাচ্চ||৩৫||

Adhikarana 34 (36) · Śloka 36

দোষঃ প্রকুপিতো ধাতূন্ ক্ষপযত্যাত্মতেজসা | ইদ্ধঃ স্বতেজসা বহ্নিরুখাগতমিবোদকম্ ||৩৬||

দোষাদীনাং ক্ষযবৃদ্ধ্যোরেকত্র নির্দেশেঽপি দোষা এব ধাতুমলক্ষযহেতব ইতি দর্শযন্নাহ- দোষ ইত্যাদি| দোষো বাতপিত্তকফসঞ্জ্ঞকঃ| ধাতূনিতি ধাতুশব্দোঽত্র সমেষু মলেষ্বপি বর্ততে, দেহধারণসামর্থ্যাত্; অথবা ধাতুশব্দ উপলক্ষণম্, তেন মলা অপি প্রাপ্যন্তে| ক্ষপযতীতি ক্ষপণং বৃদ্ধিসাম্যযোঃ হ্রাসঃ| আত্মতেজসেতি আত্মশক্ত্যা| তত্র পিত্তং কটুকোষ্ণত্বাদ্ধাতূন্ ক্ষপযতি, বাযুশ্চ শোষণহেতুত্বাত্, কফো মার্গাবরোধকত্বাত্| ইদ্ধো দীপ্তঃ| উখাগতং স্থালীস্থম্||৩৬||

Adhikarana 35 (37) · Śloka 37

বৈলক্ষণ্যাচ্ছরীরাণামস্থাযিত্বাত্তথৈব চ | দোষধাতুমলানাং তু পরিমাণং ন বিদ্যতে ||৩৭||

কুতঃ পুনঃ পলাদিমানেন দোষাদীনাং প্রমাণং ন নির্দিষ্টমিত্যাহ- বৈলক্ষণ্যাদিত্যাদি|- বৈলক্ষণ্যাত্ বিসদৃশত্বাত্, বিসদৃশত্বং চাত্র বাতাদিপ্রকৃতি-রসরক্তাদিসার-সংহনন-দীর্ঘহ্রস্বাদিকাযভেদেন| অস্থাযিত্বাত্তথৈব চেতি অনবস্থিতত্বাত্, অস্থাযিত্বং চ দ্বিবিধেঽপি কালে নিত্যগ আবস্থিকেঽপি চ; তত্র নিত্যগে প্রাতঃ শ্লেষ্মোপচীযতে মধ্যাহ্নে পিত্তমিত্যাদি প্রত্যহমাহ্নিকচযাদিভেদেন, তথা হেমন্তে শ্লেষ্মোপচীযতে গ্রীষ্মে বাযুরিত্যাদ্যার্তবচযাদিভেদেন; তথাঽঽবস্থিকেঽপি বাল্যে শ্লেষ্মাঽভিবর্ধতে, তথা বাল্যে শুক্রাল্পত্বং কন্যানামার্তবস্তন্যাভাবঃ, যুবসু পিত্তমুপচীযতে, বৃদ্ধেষু বাযুরিত্যাদিনা| পরিমাণমিতি স্বং সর্বতো মানং ন বিদ্যতে; তেন কস্যচিদেব ক্বচিদেব মানং কর্তুং শক্যতে, ন সর্বত ইত্যর্থঃ||৩৭||

Adhikarana 36 (38) · Śloka 38

এষাং সমত্বং যচ্চাপি ভিষগ্ভিরবধার্যতে | ন তত্ স্বাস্থ্যাদৃতে শক্যং বক্তুমন্যেন হেতুনা ||৩৮||

ননু, দোষাদীনাং পলাদিমানং বিনা সাম্যং কথং জ্ঞেযমিত্যাহ- এষামিত্যাদি| এষামিতি দোষধাতুমলানাম্| ন তদিত্যাদি তদপি সাম্যং; স্বাস্থ্যাদৃতে স্বাস্থ্যং বিনা||৩৮||

Adhikarana 37 (39) · Śloka 39

দোষাদীনাং ত্বসমতামনুমানেন লক্ষযেত্ | অপ্রসন্নেন্দ্রিযং বীক্ষ্য পুরুষং কুশলো ভিষক্ ||৩৯||

ক্ষযবৃদ্ধিভেদাত্মকমসাম্যমনুমানেন দর্শযন্নাহ- দোষাদীনামিত্যাদি| দোষাদীনামিতি আদিশব্দেন ধাতুমলানাং গ্রহণম্| তুশব্দঃ পুনরর্থে| অসমতাং ক্ষযবৃদ্ধিলক্ষণাম্| ‘অপ্রসন্নেন্দ্রিযং’ ইত্যত্র ‘অপ্রসন্নতনুং’ ইতি যন্ন কৃতং তদিন্দ্রিযাধিষ্ঠানানামিন্দ্রিযশক্তীনাং চ প্রসন্নত্বং বোধযতি| বীক্ষ্যেত্যনেন বর্ণাদি সর্বমুক্তং ভবতি| ‘বীক্ষ্য’ ইত্যত্র ‘জ্ঞাত্বা’ ইত্যেকে পঠন্তি||৩৯||

Adhikarana 38 (40) · Śloka 40

(স্বস্থস্য রক্ষণং কুর্যাদস্বস্থস্য তু বুদ্ধিমান্) | ক্ষপযেদ্বৃংহযেচ্চাপি দোষধাতুমলান্ ভিষক্ | তাবদ্যাবদরোগঃ স্যাদেতত্সাম্যস্য লক্ষণম্ ||৪০||

অসাম্যং বৃদ্ধিক্ষযাত্মকমিত্যনুমানেন প্রতিপাদ্য কিং কুর্যাদিত্যাহ- ক্ষপযেদিত্যাদি|- ক্ষপযেদিতি বৃদ্ধান্ দোষধাতুমলান্ হ্রাসযেদিত্যর্থঃ| বৃংহযেদিতি তানেব ক্ষীণান্ বর্ধযেত্| ক্ষপণবৃংহণযোর্মাত্রাবধিং দর্শযন্নাহ- তাবদিত্যাদি| কুতঃ পুনরারোগ্যমবধিরিত্যাহ- এতত্ সাম্যস্য লক্ষণমিত্যাদি| অযং পাঠঃ সমগ্রোঽভাবান্ন লিখিতঃ||৪০||

Adhikarana 39 (41) · Śloka 41

সমদোষঃ সমাগ্নিশ্চ সমধাতুমলক্রিযঃ | প্রসন্নাত্মেন্দ্রিযমনাঃ স্বস্থ ইত্যভিধীযতে ||৪১||

দোষাদিসাম্যং স্বাস্থ্যং, তদ্দর্শযিতুমাহ- সমদোষ ইত্যাদি| ননু, দ্বিবিধেঽপি কালে নিত্যং দোষচযাদ্যনুবন্ধাত্ কথং সমদোষত্বং? তথাহি নিত্যগে- আহ্নিকে তাবত্ প্রাতঃ কফঃ কুপ্যতি, মধ্যাহ্নে পিত্তমিত্যাদি; তথাঽঽর্তবেঽপি হেমন্তে কফশ্চীযতে বসন্তে স এব কুপ্যতীতি; তথাঽঽবস্থিকে চ কালে ‘বালে(ল্যে)বিবর্ধতে শ্লেষ্মা’(সূ. অ. ৩৫) ইত্যাদ্যুক্তত্বাত্| উচ্যতে- দোষচযাদেরল্পত্বাদতদ্ব্যপদেশ ইতি, একতণ্ডুলাভ্যবহারেঽনশনব্যপদেশবত্| অন্যে ত্বেবং বদন্তি- “আর্তবে চযাদৌ স্বস্থবৃত্তোক্তবিধিভিরাহোরাত্রিকে পুনরনাগতাবাধোক্তদন্তধাবনাদিবিধানেন দোষাণাং সাম্যমুপপন্নমেব” ইতি| সমধাতুমলক্রিয ইতি সমা ধাতুমলানাং ক্রিযা যস্য স তথা| ক্রিযা স্বপ্নজাগরণাদিকেতি কেচিদ্ভিন্নং ক্রিযাশব্দং ব্যাখ্যানযন্তি| প্রসন্নাত্মেন্দ্রিযমনা ইতি আত্মা দেহঃ, অন্যে কর্মাত্মা বদ্ধপুরুষঃ; তস্য নির্বিকারস্যাপি শরীরগুণদোষাভ্যাং বদ্ধত্বমাচার্যৈর্বহুধোক্তম্ , অস্মাভির্গ্রন্থগৌরবভযান্নোচ্যতে| ইন্দ্রিযাণি ভৌতিকাধিষ্ঠানশক্তিরূপাণি, মনস্ত্বিন্দ্রিযানুগ্রাহকমন্তঃকরণম্| এবম্ভূতঃ পুরুষঃ স্বস্থ ইত্যভিধীযতে ‘পূর্বাচার্যৈঃ’ ইতি শেষঃ| দোষসাম্যেনৈবাগ্ন্যাদিসাম্যং লব্ধং তত্ কিং পৃথগাচার্যঃ প্রাহ? উচ্যতে, ন দোষৈঃ সমা অগ্ন্যাদযো ভবিতুমর্হন্তীতি; কুতঃ? পৃথক্চিকিত্সিতত্বাত্; পিত্তহরণমপি সর্পিরজাপযশ্চাগ্নিং বর্ধযতি| অত্র শ্রীমাধবঃ প্রাহ- “লব্ধাশ্চেত্ সমদোষত্বে সমাগ্নিত্বাদযস্তদা| পৃথগুক্তাঃ কিমর্থং তে ভক্তিরেষা নিরর্থকা”- ইতি; সমাধানমাহ- “দোষেঽভ্যস্তে যতো ভিন্নাঃ পৃথগুক্তা অতস্তু তে| প্রকৃত্যা তাদৃশাঃ কেচিদত্যর্থং বা ন দূষণম্”- ইতি| ‘দোষাদীনাং ত্বসমতাম্’ ইত্যাদিশ্লোকং ‘বৈলক্ষণ্যাচ্ছরীরাণাম্’ ইত্যাদিশ্লোকাগ্রে কেচিদন্যথা পঠন্তি| তথাহি, “পলাদিমানাভাবাত্ কথমেষাং সাম্যং জ্ঞেযমিত্যাহ- ‘দোষাদীনাং তু সমতামনুমানেন লক্ষযেত্’ ইতি শ্লোকার্ধমেব দোষসাম্যজ্ঞানার্থং পঠন্তি| যেনানুমানেন সমতা জ্ঞেযা তদেব দর্শযন্নাহ- এষাং সমত্বং যচ্চাপীত্যাদি| এতেন সাম্যকার্যেণ স্বাস্থ্যেন দোষাণাং সমতা জ্ঞাতব্যেত্যর্থঃ| অতোঽনন্তরং ‘সমদোষঃ সমাগ্নিশ্চ’ ইত্যাদি পঠন্তি| ব্যাখ্যানং চাস্য পূর্বমেবোক্তম্| ইদানীং স্বস্থপ্রতিপালনাযাস্বস্থস্য চ স্বাস্থ্যকরণাযাহ- ‘স্বস্থস্য রক্ষণং কুর্যাদস্বস্থস্য তু বুদ্ধিমান্| ক্ষপযেদ্বৃংহযেচ্চাপি’ ইত্যাদি;” ঈদৃশং কৃত্বা কেচিত্ পাঠক্রমং পঠন্তি||৪১||

Adhikarana puShpikA · Śloka 15

ইতি সুশ্রুতসংহিতাযাং সূত্রস্থানে দোষধাতুমলক্ষযবৃদ্ধিবিজ্ঞানীযো নাম পঞ্চদশোঽধ্যাযঃ ||১৫||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে দোষধাতুমলক্ষযবৃদ্ধিবিজ্ঞানীযো নাম পঞ্চদশোঽধ্যাযঃ||১৫||