Adhikarana 1 (1-2) · Śloka 2
অথাতো দ্রব্যসঙ্গ্রহণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो द्रव्यसङ्ग्रहणीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
দ্রব্যাণাং সঙ্গ্রহঃ সঙ্ক্ষেপঃ, তমধিকৃত্য কৃতোঽধ্যায ইত্যর্থঃ; বিস্তরস্তু চিকিত্সিতে কথ্যতে| তদুক্তং- “সমাসেন গণা হ্যেতে প্রোক্তাস্তেষাং তু বিস্তরম্| চিকিত্সিতেষু বক্ষ্যামি জ্ঞাত্বা দোষবলাবলম্”- ইতি||১-২||
Adhikarana 2 (3) · Śloka 3
সমাসেন সপ্তত্রিংশদ্দ্রব্যগণা ভবন্তি ||৩||
समासेन सप्तत्रिंशद्द्रव्यगणा भवन्ति ||३||
🔊 Audio coming soon
তত্রাদাবধ্যাযস্য পিণ্ডার্থং নির্দিশন্নাহ- সমাসেনেত্যাদি|- সমাসেন সঙ্ক্ষেপেণ| গণ্যন্ত ইতি গণাঃ সমূহাঃ| তত্র দ্বাত্রিংশদনিযতাবযবাঃ, পুনঃ পঞ্চ পঞ্চাবযবাঃ| কেচিত্ পঞ্চত্রিংশদিতি পঠন্তি (ত্রিংশদ্বাঽঽমলকাদীনি বিহাযেতি)||৩||
Adhikarana 3 (4-5) · Śloka 5
তদ্যথা- বিদারিগন্ধা বিদারী বিশ্বদেবা সহদেবা শ্বদংষ্ট্রা পৃথক্পর্ণী শতাবরী সারিবা কৃষ্ণসারিবা জীবকর্ষভকৌ মহাসহা ক্ষুদ্রসহা বৃহত্যৌ পুনর্নবৈরণ্ডো হংসপাদী বৃশ্চিকাল্যৃষভী চেতি ||৪|| বিদারীগন্ধাদিরযং গণঃ পিত্তানিলাপহঃ | শোষগুল্মাঙ্গমর্দোর্ধ্বশ্বাসকাসবিনাশনঃ ||৫||
तद्यथा- विदारिगन्धा विदारी विश्वदेवा सहदेवा श्वदंष्ट्रा पृथक्पर्णी शतावरी सारिवा कृष्णसारिवा जीवकर्षभकौ महासहा क्षुद्रसहा बृहत्यौ पुनर्नवैरण्डो हंसपादी वृश्चिकाल्यृषभी चेति ||४|| विदारीगन्धादिरयं गणः पित्तानिलापहः | शोषगुल्माङ्गमर्दोर्ध्वश्वासकासविनाशनः ||५||
🔊 Audio coming soon
তত্র প্রথমং দোষক্রমেণাদ্যং গণং নির্দিশন্নাহ- তদ্যথেত্যাদি| বিদারিগন্ধা শালপর্ণী, বিদারী বিপাদিককন্দঃ কোহলাকারো লোহিতকুসুমঃ, স চ দ্বিবিধঃ- দীর্ঘকন্দো বহুক্ষীরঃ, হস্তিপাদকোঽল্পক্ষীর ইতি| বিশ্বদেবা গাঙ্গেরুকী প্রসিদ্ধা, ‘গুডশর্করা (গুলশকরী)’ ইতি পূর্বদেশে, অন্যে সিতকুসুমাং বলামাহুঃ| সহদেবী বলাভেদঃ পীতপুষ্পা ‘কাঙ্কসী’ ইতি লোকে; অন্যে বলাং নীলপুষ্পামাহুঃ| শ্বদংষ্ট্রা গোক্ষুরকঃ| পৃশ্নিপর্ণী পৃথক্পর্ণী ‘পীঠবনী’ ইতি লোকে| শতাবরী সূক্ষ্মপত্রা ‘শতাউরী’ ইতি লোকে| সারিবা জম্বূপত্রা, দুগ্ধগর্ভা বল্লী স্বনামপ্রসিদ্ধা| কৃষ্ণসারিবা ছিলহেণ্টাপত্রসদৃশচ্ছদা চন্দনগন্ধা ‘কালবেলী’ ইতি লোকে; কেচিত্ কৃষ্ণসারিবাং ন পঠন্তি| জীবকঃ কূর্চশীর্ষকঃ স্বনামখ্যাতঃ| ঋষভকো বৃষভকঃ, অযমপি স্বনামখ্যাতঃ| মহাসহা মাষপর্ণী| ক্ষুদ্রসহা মুদ্গপর্ণী| বৃহত্যৌ সূক্ষ্মফলা স্থূলফলা চ| পুনর্নবা বর্ষাভূঃ ‘সাটডী’ ইতি লোকে| এরণ্ডঃ স্বনামপ্রসিদ্ধঃ| হংসপাদী মধুশ্রবা হংসপদাকারপত্রা পীতপুষ্পা জলযু(মু)ক্তদেশজাতা ‘হংসপাঈ’ ইতি লোকে প্রসিদ্ধা| বৃশ্চিকালী কণ্টকিতমেষশৃঙ্গযুগাকারফলা পাঠাপত্রা ঈষদ্রোমশা শ্বেতপুষ্পগুচ্ছা দক্ষিণাবর্তবল্লী মেষশৃঙ্গীভেদঃ; বৃশ্চিযাশাকমন্যে| ঋষভী কপিকচ্ছুঃ| শৃগালবিন্নামেকে বিদারিগন্ধাদৌ পঠন্তি, তামপঠনীযামেকে মন্যন্তে, অন্যে পৃথক্পর্ণীভেদং দীর্ঘপত্রাং সিংহপুচ্ছামাহুঃ| শোষো রাজযক্ষ্মা, অঙ্গমর্দঃ স্ফুটনিকা| পিত্তানিলহরত্বেন দোষপ্রত্যনীকতোক্তা, শোষাদিনাশকত্বেন ব্যাধিপ্রত্যনীকত্বং চোক্তম্, এবং দোষযোরুক্তযোর্ব্যাধিষু চোক্তেষ্ববস্থাকালদেশাদিভেদেন সমস্তৈরেতৈরর্ধৈর্যথালাভং লব্ধৈর্বা শৃতশীতফাণ্টস্বরসকল্কচূর্ণগুটিকোত্কারিকারসক্রিযালেপপ্রদেহপরিষেকাবগাহনঘৃততৈলাদীনি যথাযোগং সাধনীযানি| এবমন্যেষ্বপি গণেষু যোজ্যম্| যেষাং জীবকর্ষভকাদিদ্রব্যাণামন্নপানাদৌ গুণো ন নির্দিষ্টঃ, তেষাং সমুদিতস্য গণস্য গুণাভিধানেনৈব পৃথগ্দ্রব্যগুণো জ্ঞাতব্য ইতি||৪-৫||
Adhikarana 4 (6-7) · Śloka 7
আরগ্বধমদনগোপঘোণ্টাকণ্টকীকুটজপাঠাপাটলামূর্বেন্দ্রযবসপ্তপর্ণনিম্বকুরুণ্টকদাসীকুরুণ্টক- গুডূচীচিত্রকশার্ঙ্গ(র্ঙ্গে)ষ্টাকরঞ্জদ্বযপটোলকিরাততিক্তকানি সুষবী চেতি ||৬|| আরগ্বধাদিরিত্যেষ গণঃ শ্লেষ্মবিষাপহঃ | মেহকুষ্ঠজ্বরবমীকণ্ডূঘ্নো ব্রণশোধনঃ ||৭||
आरग्वधमदनगोपघोण्टाकण्टकीकुटजपाठापाटलामूर्वेन्द्रयवसप्तपर्णनिम्बकुरुण्टकदासीकुरुण्टक- गुडूचीचित्रकशार्ङ्ग(र्ङ्गे)ष्टाकरञ्जद्वयपटोलकिराततिक्तकानि सुषवी चेति ||६|| आरग्वधादिरित्येष गणः श्लेष्मविषापहः | मेहकुष्ठज्वरवमीकण्डूघ्नो व्रणशोधनः ||७||
🔊 Audio coming soon
আরগ্বধেত্যাদি| আরগ্বধঃ কিরমালকঃ; মদনঃ পিণ্ডীতকঃ, ‘মযণফল’ ইতি লোকে; গোপঘোণ্টা কর্কোটী, বদরভেদ ইত্যন্যে, ‘গ্রামকোলিকা’ ইতি প্রসিদ্ধা, পূগভেদমপরে; কণ্টকী বিকঙ্কতঃ বৃক্ষকণ্টকারিকেতি প্রসিদ্ধা, ‘কাঙ্কঈ’ ইতি লোকে; কুটজ ইন্দ্রবৃক্ষঃ; পাঠা অবিদ্ধকরণী, ‘পাঢ’ ইতি লোকে; পাটলা বসন্তদূতী স্বনামপ্রসিদ্ধা; মূর্বা ধনুর্গুণোপযোগ্যা, ‘দূধ উ’ ইতি লোকে, অন্যে চোরস্নাযুমাহুঃ; ইন্দ্রযবঃ কুটজফলং; সপ্তপর্ণঃ শাল্মলীসদৃশপর্ণো গজমদগন্ধপুষ্পঃ শরদি বিকসনশীল উচ্চৈর্বৃক্ষঃ ‘সাতবন’ ইতি লোকে; নিম্বঃ প্রসিদ্ধঃ; কুরুণ্টকঃ পীতপুষ্পঃ, ‘কণ্টাশেলুআ’ ইতি লোকে; নীলপুষ্পঃ স এব দাসীকুরুণ্টকঃ; গুডূচী প্রসিদ্ধা; চিত্রকঃ প্রসিদ্ধঃ; শার্ঙ্গ(র্ঙ্গে)ষ্টা কাকজঙ্ঘা ‘বিকসবনী’ ইতি লোকে, কাকমাচীত্যন্যে, অন্যে তু শার্ঙ্গষ্টা কাকতিক্তা গৌরবর্তুলাবগুণ্ঠিতফলা ‘চিরপোটিকা’ ইতি প্রসিদ্ধা, ‘ভুরুদাকা’ ইতি পূর্বদেশে, কাকাদনীত্যপরে, সা চ গুঞ্জেতি প্রসিদ্ধা; করঞ্জদ্বযমিতি একশ্চিরবিল্বঃ, দ্বিতীযঃ কণ্টকী বিটপকরঞ্জঃ; পটোলঃ কুলকঃ স্বনামখ্যাতঃ; কিরাততিক্তকো ভূনিম্বঃ; সুষবী কারবেল্লকঃ, অন্যে তু পানীযবল্লীমাহুঃ||৬-৭||
Adhikarana 5 (8-9) · Śloka 9
সালসারাজকর্ণখদিরকদরকালস্কন্ধক্রমুকভূর্জমেষশৃঙ্গতিনিশচন্দনকুচন্দনশিংশপা- শিরীষাসনধবার্জুনতালশাকনক্তমালপূতীকাশ্বকর্ণাগুরূণি কালীযকং চেতি ||৮|| সালসারাদিরিত্যেষ গণঃ কুষ্ঠবিনাশনঃ | মেহপাণ্ড্বামযহরঃ কফমেদোবিশোষণঃ ||৯||
सालसाराजकर्णखदिरकदरकालस्कन्धक्रमुकभूर्जमेषशृङ्गतिनिशचन्दनकुचन्दनशिंशपा- शिरीषासनधवार्जुनतालशाकनक्तमालपूतीकाश्वकर्णागुरूणि कालीयकं चेति ||८|| सालसारादिरित्येष गणः कुष्ठविनाशनः | मेहपाण्ड्वामयहरः कफमेदोविशोषणः ||९||
🔊 Audio coming soon
সালসারেত্যাদি| সালঃ শঙ্কুঃ, তস্য সারঃ সালসারঃ; অজকর্ণঃ সর্জঃ সালভেদ এব; খদিরো গাযত্রী স্বনামখ্যাতঃ; কদরঃ খদিরাকারঃ শ্বেতসারঃ; ক্রমুকঃ পূগঃ, কেচিত্ ‘ক্রমুগ’ ইতি পঠন্তি, অত্রাপি স এবার্থঃ, বৃক্ষরোধ্র ইত্যন্যে সারাধিকারাত্; ভূর্জো মৃদুত্বক্ স্বনামখ্যাতঃ, কেচিত্ ভূর্জস্থানে ‘স্ফূর্জক’ ইতি পঠন্তি, তত্র স্ফূর্জকঃ শ্যোনাকনাম্না প্রসিদ্ধঃ, (লকুচাকারপত্রকাণ্ডঃ ); মেষশৃঙ্গঃ কর্কটশৃঙ্গঃ, স চ পুত্রঞ্জীবকসদৃশস্তরুবিশেষঃ; তিনিশঃ স্যন্দনঃ, ‘সাদণ’ ইতি লোকে প্রসিদ্ধঃ; চন্দনং শ্রীচন্দনং ‘শ্রীখণ্ড’ ইতি প্রসিদ্ধং; কুচন্দনং রক্তচন্দনং; শিংশপা কৃষ্ণসারা ‘সীসঈ’ ইতি লোকে; শিরীষো বিষঘাতী, ‘শিরস’ ইতি লোকে; অসনো বীজকঃ পূর্বদেশে প্রসিদ্ধঃ; ধবঃ শকটাখ্যঃ স্বনামপ্রসিদ্ধঃ; অর্জুনঃ ককুভঃ; তালঃ স্বনামখ্যাতঃ; শাকঃ পূর্বদেশে প্রসিদ্ধো মহাখরপত্রঃ; নক্তমালো বৃহত্করঞ্জঃ; পূতীকঃ চিরবিল্বঃ; অশ্বকর্ণো গন্ধমুণ্ডোঽশ্বত্থসদৃশঃ পূর্বদেশে প্রসিদ্ধঃ; অগুরু স্বনামখ্যাতং; কালীযকং ‘মলেন্দ্রীচন্দনম্’ ইতি প্রসিদ্ধম্| বিনাশনহরণবিশোষণানামর্থভেদমাহুঃ- তত্র কুষ্ঠবিনাশনো মূলোচ্ছেদনঃ, হরণো মেহপাণ্ড্বাদেঃ সংশমনত্বেন নির্মূলনত্বেন বা, শোষণঃ কফমেদসোর্দ্রবস্নিগ্ধযোঃ||৮-৯||
Adhikarana 6 (10-11) · Śloka 11
বরুণার্তগলশিগ্রুমধুশিগ্রুতর্কারীমেষশৃঙ্গীপূতীকনক্তমালমোরটাগ্নিমন্থসৈরেযকদ্বযবিম্বীবসুকবসিরচিত্রক- শতাবরীবিল্বাজশৃঙ্গীদর্ভা বৃহতীদ্বযং চেতি ||১০|| বরুণাদির্গণো হ্যেষ কফমেদোনিবারণঃ | বিনিহন্তি শিরঃশূলগুল্মাভ্যন্তরবিদ্রধীন্ ||১১||
वरुणार्तगलशिग्रुमधुशिग्रुतर्कारीमेषशृङ्गीपूतीकनक्तमालमोरटाग्निमन्थसैरेयकद्वयबिम्बीवसुकवसिरचित्रक- शतावरीबिल्वाजशृङ्गीदर्भा बृहतीद्वयं चेति ||१०|| वरुणादिर्गणो ह्येष कफमेदोनिवारणः | विनिहन्ति शिरःशूलगुल्माभ्यन्तरविद्रधीन् ||११||
🔊 Audio coming soon
বরুণেত্যাদি| বরুণস্তিক্তসারঃ শাকদ্রুমঃ ‘বরুণ’ ইতি লোকে; আর্তগলঃ ককুভঃ সুগন্ধমূলঃ ‘কবহা (কৌহা)’ ইতি নাম্না পূর্বদেশে প্রসিদ্ধাঃ; শিগ্রুঃ শোভাঞ্জনকঃ; মধুশিগ্রূ রক্তশোভাঞ্জনকঃ; তর্কারী অরণিকা; মেষশৃঙ্গী কর্কটশৃঙ্গী; পূতীকশ্চিরবিল্বঃ; নক্তমালো বৃহত্করঞ্জঃ; মোরটোঽঙ্কোল্লপুষ্পো ‘মোইহর ’ ইতি লোকে, হস্তিকর্ণপলাশ ইত্যন্যে; অগ্নিমন্থস্তেজোবৃক্ষঃ পূর্বদেশে ‘আগথ’ ইতি প্রসিদ্ধঃ; সৈরেযকদ্বযং রক্তপুষ্পনীলপুষ্পকণ্টশেলুআদ্বযং; বিম্বী ওষ্ঠোপমফলা ‘তিণ্ডুরিকা’ ইতি প্রসিদ্ধা; চিত্রকঃ প্রসিদ্ধঃ; শতাবরী প্রসিদ্ধা; বসুকো বুকঃ ‘বকপুষ্প’ ইতি লোকে; অন্যে তু বসুকোঽর্কঃ; বশিরো মর্কটপিপ্পলী তৃণজাতিঃ ‘অপামার্গ’ ইতি প্রসিদ্ধঃ; বিল্বঃ শ্রীফলঃ; অজশৃঙ্গী ছগলবিষাণিকা উত্তমারণী ‘মেণ্ঢিকা’ ইতি লোকে; দর্ভঃ কুশঃ; বৃহতীদ্বযং কণ্টকারিকাদ্বযম্- একা স্থূলফলা, দ্বিতীযা হ্রস্বফলা||১০-১১||
Adhikarana 7 (12-13) · Śloka 13
বীরতরুসহচরদ্বযদর্ভবৃক্ষাদনীগুন্দ্রানলকুশকাশাশ্মভেদকাগ্নিমন্থমোরটাবসুকবসিরভল্লূককুরণ্টিকেন্দীবরকপোতবঙ্কাঃ শ্বদংষ্ট্রা চেতি ||১২|| বীরতর্বাদিরিত্যেষ গণো বাতবিকারনুত্ | অশ্মরীশর্করামূত্রকৃচ্ছ্রাঘাতরুজাপহঃ ||১৩||
वीरतरुसहचरद्वयदर्भवृक्षादनीगुन्द्रानलकुशकाशाश्मभेदकाग्निमन्थमोरटावसुकवसिरभल्लूककुरण्टिकेन्दीवरकपोतवङ्काः श्वदंष्ट्रा चेति ||१२|| वीरतर्वादिरित्येष गणो वातविकारनुत् | अश्मरीशर्करामूत्रकृच्छ्राघातरुजापहः ||१३||
🔊 Audio coming soon
বীরেত্যাদি| বীরতরুঃ শরঃ, অন্যে তু বীরতরুঃ ‘বেল্লন্তর’ ইতি নাম্না প্রসিদ্ধো জাঙ্গলদেশে নর্মদাতটে চর্মণ্বতীনদীসমীপে চ, তল্লক্ষণমুচ্যতে- “বেল্লন্তরুর্জগতি বীরতরুঃ প্রসিদ্ধঃ শ্বেতাসিতারুণবিলোহিতপীতপুষ্পঃ| আদারিতুল্যকুসুমঃ শমিসূক্ষ্মপত্রঃ স্যাত্ কণ্টকী বিজলদেশজ এষ বৃক্ষঃ-” ইতি; সহচরদ্বযং কণ্টশেলুদ্বযং; দর্ভঃ প্রসিদ্ধঃ; বৃক্ষাদনী বন্দাকঃ ‘কবলেখূ’ ইতি লোকে, বৃক্ষকলম্বুকমপরে; গুন্দ্রা পাদরকভেদো ‘গোদর’ ইতি লোকে; নলো দূর্বাকারাঙ্কুরোঽন্তঃশুষিরঃ স্বনামখ্যাতঃ; কুশো হ্রস্বদর্ভঃ; কাশঃ চামরপুষ্পঃ; অশ্মভেদকঃ পাষাণভেদকঃ, অগ্নিমন্থঃ তেজোবৃক্ষঃ; ‘অঙ্গেশূর’ ইতি লোকে; মোরটোঽঙ্কোল্লপুষ্পঃ, হস্তিকর্ণপলাশ ইত্যেকে, ইক্ষুমূলমিত্যপরে; বসুকো বুকঃ ‘বকপুষ্প’ ইতি লোকে; বসিরঃ অপামার্গঃ, সূর্যাবর্তভেদ ইত্যেকে; ভল্লূকঃ শ্যোনাকঃ ‘শোণা’ ইতি লোকে; কুরণ্টিকা কৃষ্ণসূক্ষ্মফলা ‘সিরিবালিকা’ ইতি লোকে; ইন্দীবরোঽপি তদ্ভেদো দীর্ঘপত্রো বহুলপুষ্পঃ; কপোতবঙ্কা সুবর্চলা, অন্যে ‘শিরীষসদৃশপত্রা স্বল্পবিটপা’ ইতি দ্রব্যান্তরমাহুঃ; শ্বদংষ্ট্রা গোক্ষুরকঃ| অশ্মরী বস্তিপাষাণঃ, সৈব বাতভিন্না শর্করা, মূত্রাঘাতো মূত্রাবরোধঃ; রুজাশব্দো রোগবচনঃ, স চাশ্মর্যাদিষু প্রত্যেকং সম্বধ্যতে||১২-১৩||
Adhikarana 8 (14-15) · Śloka 15
লোধ্রসাবরলোধ্রপলাশকুটন্নটাশোকফঞ্জীকট্ফলৈলবালুকশল্লকীজিঙ্গিনীকদম্বসালাঃ কদলী চেতি ||১৪|| এষ রোধ্রাদিরিত্যুক্তো মেদঃকফহরো গণঃ | যোনিদোষহরঃ স্তম্ভী বর্ণ্যো বিষবিনাশনঃ ||১৫||
लोध्रसावरलोध्रपलाशकुटन्नटाशोकफञ्जीकट्फलैलवालुकशल्लकीजिङ्गिनीकदम्बसालाः कदली चेति ||१४|| एष रोध्रादिरित्युक्तो मेदःकफहरो गणः | योनिदोषहरः स्तम्भी वर्ण्यो विषविनाशनः ||१५||
🔊 Audio coming soon
রোধ্রেত্যাদি| রোধ্রো লাক্ষাপ্রসাদনো রক্তঃ; সাবরলোধ্রঃ শ্বেতস্থূলত্বক্; পলাশঃ কিংশুকঃ; কুটন্নটঃ স্যোনাকঃ; অশোকো লোহিতকুসুমঃ স্বনামখ্যাতঃ; ফঞ্জী ভার্গী; কট্ফলঃ ‘কাযফল’ ইতি লোকে; এলবালুকং হরিবালুকং কৃষ্ণগন্ধিকট্ফলসদৃশং; শল্লকী গজভক্ষ্যা ‘সাল’ ইতি লোকে; জিঙ্গিনী গুডমজ্জনিকা, ‘গুলদুণি’ ইতি লোকে, পূর্বদেশে স্বনামপ্রসিদ্ধা; কদম্বো বৃক্ষকদম্বঃ; সালঃ সর্জঃ; কদলী রম্ভা স্বনামপ্রসিদ্ধা| স্তম্ভী অতিসারাদেঃ স্তম্ভনঃ||১৪-১৫||
Adhikarana 9 (16-17) · Śloka 17
অর্কালর্ককরঞ্জদ্বযনাগদন্তীমযূরকভার্গীরাস্নেন্দ্রপুষ্পীক্ষুদ্রশ্বেতামহাশ্বেতাবৃশ্চিকাল্যলবণাস্তাপসবৃক্ষশ্চেতি ||১৬|| অর্কাদিকো গণো হ্যেষ কফমেদোবিষাপহঃ | কৃমিকুষ্ঠপ্রশমনো বিশেষাদ্ব্রণশোধনঃ ||১৭||
अर्कालर्ककरञ्जद्वयनागदन्तीमयूरकभार्गीरास्नेन्द्रपुष्पीक्षुद्रश्वेतामहाश्वेतावृश्चिकाल्यलवणास्तापसवृक्षश्चेति ||१६|| अर्कादिको गणो ह्येष कफमेदोविषापहः | कृमिकुष्ठप्रशमनो विशेषाद्व्रणशोधनः ||१७||
🔊 Audio coming soon
অর্কেত্যাদি| অর্কো রক্তপুষ্পঃ প্রসিদ্ধঃ; অলর্কো মন্দারকঃ, যস্য ক্ষীরং ন বিনশ্যতি; করঞ্জদ্বযং বৃক্ষবিটপকরঞ্জৌ; নাগদন্তী দন্তিনী; মযূরকোঽপামার্গঃ; ভার্গী স্বনামখ্যাতা; রাস্না সুরভী স্বনামখ্যাতা; ইন্দ্রপুষ্পী কণ্টকী কৃষ্ণপুষ্পকরঞ্জঃ, ‘কলিকারিকা’ ইত্যন্যে; ক্ষুদ্রশ্বেতা শ্বেতস্যন্দা শ্বেতপুষ্পা ‘সেফন্দ’ ইতি লোকে; মহাশ্বেতা নীলপুষ্পঃ সেফন্দঃ, ‘বন্ধ্যাকর্কোটিকা’ ইত্যন্যে; বৃশ্চিকালী বৃশ্চিযাকঃ; অলবণা জ্যোতিষ্মতী বর্তুলপক্বরক্তফলা, পীততৈলা ‘কাকমর্দনীকা’ ইতি লোকে প্রসিদ্ধা; তাপসবৃক্ষঃ ইঙ্গুদঃ, পুত্রঞ্জীবক ইত্যন্যে||১৬-১৭||
Adhikarana 10 (18-19) · Śloka 19
সুরসাশ্বেতসুরসাফণিজ্ঝকার্জকভূস্তৃণসুগন্ধকসুমুখকালমালকুঠেরককাসমর্দক্ষবকখরপুষ্পাবিডঙ্গকট্ফল- সুরসীনির্গুণ্ডীকুলাহলোন্দুরুকর্ণিকাফঞ্জীপ্রাচীবলকাকমাচ্যো বিষমুষ্টিকশ্চেতি ||১৮|| সুরসাদির্গণো হ্যেষ কফহৃত্ কৃমিসূদনঃ | প্রতিশ্যাযারুচিশ্বাসকাসঘ্নো ব্রণশোধনঃ ||১৯||
सुरसाश्वेतसुरसाफणिज्झकार्जकभूस्तृणसुगन्धकसुमुखकालमालकुठेरककासमर्दक्षवकखरपुष्पाविडङ्गकट्फल- सुरसीनिर्गुण्डीकुलाहलोन्दुरुकर्णिकाफञ्जीप्राचीबलकाकमाच्यो विषमुष्टिकश्चेति ||१८|| सुरसादिर्गणो ह्येष कफहृत् कृमिसूदनः | प्रतिश्यायारुचिश्वासकासघ्नो व्रणशोधनः ||१९||
🔊 Audio coming soon
সুরসেত্যাদি| সুরসে দ্বে শ্বেতকৃষ্ণকুসুমে তে চ লোকে ‘তুলসী’ ইতি প্রসিদ্ধে; ফণিজ্ঝকস্তীক্ষ্ণগন্ধো ‘মরুবক’ ইতি লোকে, অন্যে ত্বনেনৈব নাম্না প্রসিদ্ধঃ; অর্জকো বর্বরিকাকারো লঘুমঞ্জরীকঃ সূক্ষ্মপত্রো নির্গন্ধঃ শ্বেতকুঠেরকঃ; ভূস্তৃণো গুদাকনামধেযো, দ্রোণপুষ্পীসদৃশঃ; সুগন্ধকো দ্রোণপুষ্পঃ; অন্যে তু ভূস্তৃণং রোহিষং, সুগন্ধকো বৃহত্সুগন্ধতৃণং; সুমুখো রাজিকা, অন্যে তু বনবর্বরিকা ‘সৌহা’ ইতি নাম্না জেজীভুক্তৌ প্রসিদ্ধা; কালমালঃ কৃষ্ণমল্লিকা ‘বর্বরিকা’ ইতি লোকে; কাসমর্দঃ স্বনামখ্যাতঃ; ক্ষবকঃ ক্ষবথুকারঃ ফণিজ্ঝকাকারঃ ‘চিহ্বরিযাক’ ইতি পারিযাত্রে প্রসিদ্ধঃ, ‘ছিঙ্কিনী’ ইতি লোকে; খরপুষ্পঃ তস্যৈব ভেদঃ, বোবৈকামপরে, মরুবকমন্যে; বিডঙ্গঃ প্রসিদ্ধঃ; কট্ফলঃ সোমবল্কঃ ‘কাযফল’ ইতি লোকে; সুরসী কপিত্থসদৃশপত্রা ‘বিল্বনাসী’ ইতি লোকে প্রসিদ্ধা, শ্বেতনির্গুণ্ডীত্যন্যে; নির্গুণ্ডী নীলনির্গুণ্ডী; কুলাহলঃ ‘মুণ্ডিকা’ ইতি প্রসিদ্ধঃ; উন্দুরুকর্ণিকা মূষিককর্ণিকা ‘উন্দুরী’ ইতি লোকে, উন্দুরকর্ণীং দ্রবন্তীমাহুরন্যে, অপরে দন্তিনীমাহুঃ, ‘উন্দুরকর্ণা’ ইত্যেকে পঠন্তি, তত্রাপি স এবার্থঃ; ফঞ্জী ভার্গী; প্রাচীবলো মত্স্যাক্ষকঃ, ‘কাকজঙ্ঘা, নদীপিপ্পলী বা’ ইত্যপরে, কেচিদাচার্যা এবং বদন্তি- যদ্যপি প্রাচীবলশব্দেন কাকজঙ্ঘা গণ্ডদূর্বা জলপিপ্পলী চোচ্যতে, তথাঽপ্যত্র কাকজঙ্ঘৈব, কাকমাচীসান্নিধ্যাদ্বাতকফকৃমিবাধির্যহরত্বাচ্চ; কাকমাচী মৃষ্টফলা স্বনামপ্রসিদ্ধা; বিষমুষ্টিকো দ্রেক্কা ‘রাজনিম্ব’ ইতি প্রসিদ্ধঃ, বৃহদলম্বুষামপরে, কর্কোটীমন্যে| কৃমিসূদন ইতি কৃমিঘ্ন ইত্যর্থঃ||১৮-১৯||
Adhikarana 11 (20-21) · Śloka 21
মুষ্ককপলাশধবচিত্রকমদনবৃক্ষকশিংশপাবজ্রবৃক্ষাস্ত্রিফলা চেতি ||২০|| মুষ্ককাদির্গণো হ্যেষ মেদোঘ্নঃ শুক্রদোষহৃত্ | মেহার্শঃপাণ্ডুরোগাশ্মশর্করানাশনঃ পরঃ ||২১||
मुष्ककपलाशधवचित्रकमदनवृक्षकशिंशपावज्रवृक्षास्त्रिफला चेति ||२०|| मुष्ककादिर्गणो ह्येष मेदोघ्नः शुक्रदोषहृत् | मेहार्शःपाण्डुरोगाश्मशर्करानाशनः परः ||२१||
🔊 Audio coming soon
মুষ্ককেত্যাদি| মুষ্ককঃ ক্ষারবৃক্ষঃ ‘মোখক’ ইতি লোকে; পলাশঃ কিংশুকঃ; ধবঃ স্বনামপ্রসিদ্ধঃ; চিত্রকোঽপি স্বনাম্নৈব প্রসিদ্ধঃ; মদনঃ পিণ্ডীতকঃ; বৃক্ষকঃ কুটজঃ; ‘মদনবৃক্ষ’ ইত্যন্যে পঠন্তি, মদনবৃক্ষ ইত্যত্র বৃক্ষশব্দনির্দেশঃ ফলপ্রতিষেধার্থমিতি ব্যাখ্যানযন্তি; শিংশপা কৃষ্ণসারা স্বনামখ্যাতা; বজ্রবৃক্ষঃ ‘সেহুণ্ড’ ইতি লোকে; ত্রিফলা হরীতক্যামলকবিভীতকানি||২০-২১||
Adhikarana 12 (22-23) · Śloka 23
পিপ্পলীপিপ্পলীমূলচব্যচিত্রকশৃঙ্গবেরমরিচহস্তিপিপ্পলীহরেণুকৈলাজমোদেন্দ্রযবপাঠাজীরকসর্ষপ- মহানিম্বফলহিঙ্গুভার্গীমধুরসাতিবিষাবচাবিডঙ্গানি কটুরোহিণী চেতি ||২২|| পিপ্পল্যাদিঃ কফহরঃ প্রতিশ্যাযানিলারুচীঃ | নিহন্যাদ্দীপনো গুল্মশূলঘ্নশ্চামপাচনঃ ||২৩||
पिप्पलीपिप्पलीमूलचव्यचित्रकशृङ्गवेरमरिचहस्तिपिप्पलीहरेणुकैलाजमोदेन्द्रयवपाठाजीरकसर्षप- महानिम्बफलहिङ्गुभार्गीमधुरसातिविषावचाविडङ्गानि कटुरोहिणी चेति ||२२|| पिप्पल्यादिः कफहरः प्रतिश्यायानिलारुचीः | निहन्याद्दीपनो गुल्मशूलघ्नश्चामपाचनः ||२३||
🔊 Audio coming soon
পিপ্পলীত্যাদি| চব্যং হস্তিপিপ্পলীমূলং স্বনামখ্যাতং; শৃঙ্গবেরং শুণ্ঠী; হস্তিপিপ্পলী গজপিপ্পলী; অজমোদা স্বনামখ্যাতা, অন্যে যবানিকামাহুঃ; মহানিম্বফলমিতি মহানিম্বো দ্রেক্কা ‘পর্বতনিম্ব’ ইতি লোকে; মধুরসা মূর্বা| আমপাচন ইতি আমলক্ষণং যথা- “জঠরানলদৌর্বল্যাদবিপক্বস্তু যো রসঃ| স আমসঞ্জ্ঞকো দেহে সর্বদোষপ্রকোপকঃ”- ইতি| শেষং প্রসিদ্ধম্||২২-২৩||
Adhikarana 13 (24-25) · Śloka 25
এলাতগরকুষ্ঠমাংসীধ্যামকত্বক্পত্রনাগপুষ্পপ্রিযঙ্গুহরেণুকাব্যাঘ্রনখশুক্তিচণ্ডাস্থৌণেযকশ্রীবেষ্টক- চোচচোরকবালুকগুগ্গুলুসর্জরসতুরুষ্ককুন্দুরুকাগুরুস্পৃক্কোশীরভদ্রদারুকুঙ্কুমানি পুন্নাগকেশরং চেতি ||২৪|| এলাদিকো বাতকফৌ নিহন্যাদ্বিষমেব চ | বর্ণপ্রসাদনঃ কণ্ডূপিডকাকোঠনাশনঃ ||২৫||
एलातगरकुष्ठमांसीध्यामकत्वक्पत्रनागपुष्पप्रियङ्गुहरेणुकाव्याघ्रनखशुक्तिचण्डास्थौणेयकश्रीवेष्टक- चोचचोरकवालुकगुग्गुलुसर्जरसतुरुष्ककुन्दुरुकागुरुस्पृक्कोशीरभद्रदारुकुङ्कुमानि पुन्नागकेशरं चेति ||२४|| एलादिको वातकफौ निहन्याद्विषमेव च | वर्णप्रसादनः कण्डूपिडकाकोठनाशनः ||२५||
🔊 Audio coming soon
এলেত্যাদি| ধ্যামকং কত্তৃণং ‘রোহিষ’ ইতি লোকে; ত্বক্ বরাঙ্গং ‘গুডতজ’ ইতি লোকে; পত্রং পত্রকং; নাগপুষ্পং নাগকেশরম্, অন্যে নাগকেশরপুষ্পসমপুষ্পো মহাতরুরিত্যাহুঃ; হরেণুকা রেণুকা; ব্যাঘ্রনখো বৃহন্নখঃ, বৃহন্নখীত্যন্যে; শুক্তিস্তদ্ভেদোঽল্পনখঃ; চণ্ডা স্বনামখ্যাতেষত্কৃষ্ণা চোরকভেদঃ অজমোদাকারা; স্থৌণেযকং থুণেরকঃ; শ্রীবেষ্টকঃ সরলচোপঃ ‘গুগ্গুলী’ ইতি লোকে; চোচস্ত্বগ্ভেদো বনবাসিকাত্বক্; চোরকঃ স্বনামখ্যাতঃ, গ্রন্থিপর্ণকভেদো গ্রন্থিপর্ণাকার এব; সর্জঃ সর্জরসঃ ‘রাল’ ইতি প্রসিদ্ধঃ; অন্তলোপাত্; রসঃ গন্ধরসঃ ‘বোল’ ইতি লোকে; তুরুষ্কঃ সিহ্লকঃ; কুন্দুরকঃ শল্লকীচোপঃ; স্পৃক্কা কুটিলপুষ্পা সুগন্ধিদ্রব্যমৌত্তরাপথিকং; ভদ্রদারু দেবদারু; পুন্নাগঃ সুরপর্ণিকা, সুঙ্গন্ধিপুষ্পা দক্ষিণাপথে ‘সুরপতি’(সুরঙ্গী)নাম্না প্রতীতা; কেশরং বকুলং, কেচিত্ সমুদিতং ব্যাখ্যানযন্তি- পুন্নাগকেশরং পদ্মকেশরমিত্যর্থঃ; অন্যে ত্বেবং পঠন্তি- “পুন্নাগনাগকেশরং চ” ইতি, পুন্নাগং দেববল্লভং রাজচম্পকমিতি লোকে, নাগকেশরং স্বনামপ্রসিদ্ধম্| কোঠনাশন ইতি অত্র কোঠলক্ষণমুচ্যতে- “বরটীদষ্টসঙ্কাশঃ কণ্ডূমান্ লোহিতোঽস্রকফপিত্তাত্| ক্ষিপ্রোত্পাদবিনাশঃ কোঠ ইতি নিগদ্যতে সদ্ভিঃ”- ইতি||২৪-২৫||
Adhikarana 14 (26-28) · Śloka 28
বচামুস্তাতিবিষাভযাভদ্রদারূণি নাগকেশরং চেতি ||২৬|| হরিদ্রাদারুহরিদ্রাকলশীকুটজবীজানি মধুকং চেতি ||২৭|| এতৌ বচাহরিদ্রাদী গণৌ স্তন্যবিশোধনৌ | আমাতিসারশমনৌ বিশেষাদ্দোষপাচনৌ ||২৮||
वचामुस्तातिविषाभयाभद्रदारूणि नागकेशरं चेति ||२६|| हरिद्रादारुहरिद्राकलशीकुटजबीजानि मधुकं चेति ||२७|| एतौ वचाहरिद्रादी गणौ स्तन्यविशोधनौ | आमातिसारशमनौ विशेषाद्दोषपाचनौ ||२८||
🔊 Audio coming soon
বচেত্যাদি| ভদ্রদারু দেবদারু| কলশী পৃশ্নিপর্ণী| দোষপাচনাবিতি আমসংসৃষ্টানাং দোষাণাং পাচনৌ||২৬-২৮||
Adhikarana 15 (29-30) · Śloka 30
শ্যামামহাশ্যামাত্রিবৃদ্দন্তীশঙ্খিনীতিল্বককম্পিল্লকরম্যকক্রমুকপুত্রশ্রেণীগবাক্ষী- রাজবৃক্ষকরঞ্জদ্বযগুডূচীসপ্তলাচ্ছগলান্ত্রীসুধাঃ সুবর্ণক্ষীরী চেতি ||২৯|| উক্তঃ শ্যামাদিরিত্যেষ গণো গুল্মবিষাপহঃ | আনাহোদরবিড্ভেদী তথোদাবর্তনাশনঃ ||৩০||
श्यामामहाश्यामात्रिवृद्दन्तीशङ्खिनीतिल्वककम्पिल्लकरम्यकक्रमुकपुत्रश्रेणीगवाक्षी- राजवृक्षकरञ्जद्वयगुडूचीसप्तलाच्छगलान्त्रीसुधाः सुवर्णक्षीरी चेति ||२९|| उक्तः श्यामादिरित्येष गणो गुल्मविषापहः | आनाहोदरविड्भेदी तथोदावर्तनाशनः ||३०||
🔊 Audio coming soon
শ্যামেত্যাদি| শ্যামা শ্বেতা ত্রিবৃতা; মহাশ্যামা বৃদ্ধদারকঃ; ত্রিবৃত্ রক্তমূলা ত্রিবৃত্ ‘নিশোত্র’ ইতি লোকে; দন্তী দন্তিনী; শঙ্খিনী যবতিক্তাভেদঃ, ‘শ্বেতবুধ্না’ ইত্যেকে; তিল্বকো রোধ্রঃ, অন্যে তিল্বকো রোধ্রাকারো বৃহত্পত্রো রক্তত্বক্কো বৈরেচনিকঃ; কম্পিল্লকো রোচনিকা, স্বনামখ্যাতঃ; রম্যকো দ্রেক্কা ‘মহানিম্ব’ ইতি লোকে প্রসিদ্ধঃ, পটোলমূলমিত্যেকে; ক্রমুকঃ পূগফলং; পুত্রশ্রেণী দ্রবন্তী এরণ্ডসদৃশফলপত্রাঽল্পবিটপা ‘শম্বরী’ ইতি লোকে; গবাক্ষী ইন্দ্রবারুণী; রাজবৃক্ষঃ কিরমালকঃ; করঞ্জদ্বযং বৃক্ষবিটপকরঞ্জৌ; গুডূচী প্রসিদ্ধা; সপ্তলা সাতলা স্নুহীভেদঃ; ছগলান্ত্রী বৃদ্ধদার(রু)কভেদঃ, বুধ্নাভেদ ইত্যপরে; সুধা সেহুণ্ডঃ; সুবর্ণক্ষীরী অনন্তাসদৃশপত্রা, কঙ্গুষ্ঠমিত্যপরে||২৯-৩০||
Adhikarana 16 (31-32) · Śloka 32
বৃহতীকণ্টকারিকাকুটজফলপাঠা মধুকং চেতি ||৩১|| পাচনীযো বৃহত্যাদির্গণঃ পিত্তানিলাপহঃ | কফারোচকহৃদ্রোগমূত্রকৃচ্ছ্ররুজাপহঃ ||৩২||
बृहतीकण्टकारिकाकुटजफलपाठा मधुकं चेति ||३१|| पाचनीयो बृहत्यादिर्गणः पित्तानिलापहः | कफारोचकहृद्रोगमूत्रकृच्छ्ररुजापहः ||३२||
🔊 Audio coming soon
বৃহতীত্যাদি| মূলে স্পষ্ট এব||৩১-৩২||
Adhikarana 17 (33-34) · Śloka 34
পটোলচন্দনকুচন্দনমূর্বাগুডূচীপাঠাঃ কটুরোহিণী চেতি ||৩৩|| পটোলাদির্গণঃ পিত্তকফারোচকনাশনঃ | জ্বরোপশমনো ব্রণ্যশ্ছর্দিকণ্ডূবিষাপহঃ ||৩৪||
पटोलचन्दनकुचन्दनमूर्वागुडूचीपाठाः कटुरोहिणी चेति ||३३|| पटोलादिर्गणः पित्तकफारोचकनाशनः | ज्वरोपशमनो व्रण्यश्छर्दिकण्डूविषापहः ||३४||
🔊 Audio coming soon
পটোলেত্যাদি| কুচন্দনং রক্তচন্দনং; মূর্বা দুধৌডঃ, ‘চৌরস্নাযুক’ ইত্যেকে| ব্রণেভ্যো হিতো ব্রণ্যঃ| শেষং সুখবোধম্||৩৩-৩৪||
Adhikarana 18 (35-36) · Śloka 36
কাকোলীক্ষীরকাকোলীজীবকর্ষভকমুদ্গপর্ণীমাষপর্ণীমেদামহামেদাচ্ছিন্নরুহা কর্কটশৃঙ্গীতুগাক্ষীরীপদ্মকপ্রপৌণ্ডরীকর্ধিবৃদ্ধিমৃদ্বীকাজীবন্ত্যো মধুকং চেতি ||৩৫|| কাকোল্যাদিরযং পিত্তশোণিতানিলনাশনঃ | জীবনো বৃংহণো বৃষ্যঃ স্তন্যশ্লেষ্মকরস্তথা ||৩৬||
काकोलीक्षीरकाकोलीजीवकर्षभकमुद्गपर्णीमाषपर्णीमेदामहामेदाच्छिन्नरुहा कर्कटशृङ्गीतुगाक्षीरीपद्मकप्रपौण्डरीकर्धिवृद्धिमृद्वीकाजीवन्त्यो मधुकं चेति ||३५|| काकोल्यादिरयं पित्तशोणितानिलनाशनः | जीवनो बृंहणो वृष्यः स्तन्यश्लेष्मकरस्तथा ||३६||
🔊 Audio coming soon
কাকোলীত্যাদি| কাকোলী বীরা স্বনাম্না প্রসিদ্ধা, ক্ষীরকাকোলী তদ্ভেদঃ স্বনামখ্যাত; জীবকঃ স্বনামপ্রসিদ্ধঃ; ঋষভঃ স্বনামখ্যাতঃ; মুদ্গপর্ণী ‘মুগবনী’ ইতি লোকে; মাষপর্ণী ‘মাষবনী’ ইতি লোকে, ‘অরণ্যমাষস্তম্ব’ ইত্যেকে; মেদা মহামেদা চ স্বনামখ্যাতা; ছিন্নরুহা গুডূচী; তুগাক্ষীরী বংশলোচনা; পদ্মকং পদ্মকাষ্ঠং; প্রপৌণ্ডরীকং স্বনামখ্যাতং যষ্টীমধুদ্রব্যাদীষত্স্থূলং মধুররসং নেত্রাশ্চ্যোতনার্হং দ্রব্যম্, অন্যে শ্রীপুষ্পমাহুঃ; মৃদ্বীকা দ্রাক্ষা; জীবন্তী ‘ডোডিকা’ ইতি লোকে, লতাঽর্কফলাকারসক্ষীরফলা, অন্যে সুবর্ণজীবন্তীমাহুঃ| জীবনঃ প্রাণধারণঃ, বৃংহণঃ শরীরবৃদ্ধিকরঃ| শেষং সুবোধম্||৩৫-৩৬||
Adhikarana 19 (37-38) · Śloka 38
ঊষকসৈন্ধবশিলাজতুকাসীসদ্বযহিঙ্গূনি তুত্থকং চেতি ||৩৭|| ঊষকাদিঃ কফং হন্তি গণো মেদোবিশোষণঃ | অশ্মরীশর্করামূত্রকৃচ্ছ্রগুল্মপ্রণাশনঃ ||৩৮||
ऊषकसैन्धवशिलाजतुकासीसद्वयहिङ्गूनि तुत्थकं चेति ||३७|| ऊषकादिः कफं हन्ति गणो मेदोविशोषणः | अश्मरीशर्करामूत्रकृच्छ्रगुल्मप्रणाशनः ||३८||
🔊 Audio coming soon
ঊষকেত্যাদি| ঊষকঃ ক্ষারমৃত্তিকা বারাণসীসমীপে বডহরদেশে বাহুল্যেন ভবতি, অন্যে তদ্ভবং দ্রব্যান্তরমাহুঃ; কাসীসদ্বযং কাসীসং ভস্মসদৃশং কিঞ্চিদম্ললবণরসং, দ্বিতীযং পুষ্পকাসীসমীষত্পীতং তুবররসং তদ্ভেদ এব; তুত্থকং কর্পরিকাতুত্থং ‘খপরিযা’ ইতি লোকে, অন্যে মযূরগ্রীবমাহুঃ| শেষং সুবোধম্||৩৭-৩৮||
Adhikarana 20 (39-40) · Śloka 40
সারিবামধুকচন্দনকুচন্দনপদ্মককাশ্মরীফলমধূকপুষ্পাণ্যুশীরং চেতি ||৩৯|| সারিবাদিঃ পিপাসাঘ্নো রক্তপিত্তহরো গণঃ | পিত্তজ্বরপ্রশমনো বিশেষাদ্দাহনাশনঃ ||৪০||
सारिवामधुकचन्दनकुचन्दनपद्मककाश्मरीफलमधूकपुष्पाण्युशीरं चेति ||३९|| सारिवादिः पिपासाघ्नो रक्तपित्तहरो गणः | पित्तज्वरप्रशमनो विशेषाद्दाहनाशनः ||४०||
🔊 Audio coming soon
সারিবেত্যাদি| চন্দনং রক্তচন্দনম্; অন্যে পদ্মমিতি পঠন্তি, তত্র পদ্মং পদ্মপুষ্পম্| শেষং সুবোধম্||৩৯-৪০||
Adhikarana 21 (41-42) · Śloka 42
অঞ্জনরসাঞ্জননাগপুষ্পপ্রিযঙ্গুনীলোত্পলনলদনলিনকেশরাণি মধুকং চেতি ||৪১|| অঞ্জনাদির্গণো হ্যেষ রক্তপিত্তনিবর্হণঃ | বিষোপশমনো দাহং নিহন্ত্যাভ্যন্তরং ভৃশম্ ||৪২||
अञ्जनरसाञ्जननागपुष्पप्रियङ्गुनीलोत्पलनलदनलिनकेशराणि मधुकं चेति ||४१|| अञ्जनादिर्गणो ह्येष रक्तपित्तनिबर्हणः | विषोपशमनो दाहं निहन्त्याभ्यन्तरं भृशम् ||४२||
🔊 Audio coming soon
অঞ্জনমিত্যাদি| অঞ্জনং সৌবীরাঞ্জনং; রসাঞ্জনং দারুহরিদ্রাক্বাথেন কৃত্রিমং, অন্যে ত্বেবং বদন্তি- রসাঞ্জনং দ্বিবিধং- স্রোতোঽঞ্জনং কৃষ্ণপাষাণাকৃতি ধাতুদ্রব্যম্, অন্যদ্দারুহরিদ্রাক্বাথেন কৃত্রিমং পীতলোহিতম্, অত্র ধাতুদ্রব্যমেব সৌবীরাঞ্জনসাহচর্যাত্; নাগপুষ্পং নাগকেশরং; নলদং মাংসী; নলিনকেশরাণি পদ্মকেশরাণি| শেষং সুবোধম্||৪১-৪২||
Adhikarana 22 (43-44) · Śloka 44
পরূষকদ্রাক্ষাকট্ফলদাডিমরাজাদনকতকফলশাকফলানি ত্রিফলা চেতি ||৪৩|| পরূষকাদিরিত্যেষ গণোঽনিলবিনাশনঃ | মূত্রদোষহরো হৃদ্যঃ পিপাসাঘ্নো রুচিপ্রদঃ ||৪৪||
परूषकद्राक्षाकट्फलदाडिमराजादनकतकफलशाकफलानि त्रिफला चेति ||४३|| परूषकादिरित्येष गणोऽनिलविनाशनः | मूत्रदोषहरो हृद्यः पिपासाघ्नो रुचिप्रदः ||४४||
🔊 Audio coming soon
পরূষকেত্যাদি| পরূষকো ধন্বপত্রকঃ স্বনাম্নৈব প্রসিদ্ধঃ, স দ্বিবিধো বৃক্ষবিটপভেদাত্; কট্ফলঃ সোমবল্কঃ ‘কাযফল’ ইতি লোকে; রাজাদনঃ ক্ষীরিকা; কতকফলং স্বনামখ্যাতং শশকপুরীষপ্রতিমফলমম্বুপ্রসাদনং; শাকফলানি শাকো মসৃণকর্কশোদরপৃষ্ঠদলো বৃক্ষবিশেষঃ, তস্য ফলানি| সর্বেষাং ফলানি গ্রাহ্যাণি| শেষং সুবোধম্||৪৩-৪৪||
Adhikarana 23 (45-47) · Śloka 47
প্রিযঙ্গুসমঙ্গাধাতকীপুন্নাগনাগপুষ্পচন্দনকুচন্দনমোচরসরসাঞ্জনকুম্ভীকস্রোতোজপদ্মকেসরযোজনবল্ল্যো দীর্ঘমূলা চেতি ||৪৫|| অম্বষ্ঠাধাতকীকুসুমসমঙ্গাকট্বঙ্গমধুকবিল্বপেশিকাসাবররোধ্রপলাশনন্দীবৃক্ষাঃ পদ্মকেশরাণি চেতি ||৪৬|| গণৌ প্রিযঙ্গ্বম্বষ্ঠাদী পক্বাতীসারনাশনৌ | সন্ধানীযৌ হিতৌ পিত্তে ব্রণানাং চাপি রোপণৌ ||৪৭||
प्रियङ्गुसमङ्गाधातकीपुन्नागनागपुष्पचन्दनकुचन्दनमोचरसरसाञ्जनकुम्भीकस्रोतोजपद्मकेसरयोजनवल्ल्यो दीर्घमूला चेति ||४५|| अम्बष्ठाधातकीकुसुमसमङ्गाकट्वङ्गमधुकबिल्वपेशिकासावररोध्रपलाशनन्दीवृक्षाः पद्मकेशराणि चेति ||४६|| गणौ प्रियङ्ग्वम्बष्ठादी पक्वातीसारनाशनौ | सन्धानीयौ हितौ पित्ते व्रणानां चापि रोपणौ ||४७||
🔊 Audio coming soon
প্রিযঙ্গ্বিত্যাদি| সমঙ্গাঽঞ্জলিকারিকা ‘লজ্জালুঃ’ ইতি লোকে; পুন্নাগস্তুঙ্গঃ স্বনামখ্যাতঃ, অন্যে সুরপর্ণিকা সুগন্ধিপুষ্পা দক্ষিণাপথে সুরপতী(সুরঙ্গী)তি প্রসিদ্ধা; নাগপুষ্পং নাগকেশরং; চন্দনং রক্তচন্দনং; কুচন্দনং মলযাদ্রিচন্দনং ; মোচরসঃ শাল্মলীচুপঃ; রসাঞ্জনং দার্বীক্বাথসমুদ্ভবং স্বনামখ্যাতং; কুম্ভীকঃ শ্লক্ষ্ণত্বক্কো রোমশঃ কুম্ভীনামা বৃক্ষো যস্য ত্বগ্ বস্ত্রাকারা ভবতি, অন্যে পাটলামাহুঃ, অপরে স্বল্পবিটপমাহুঃ; স্রোতোজং সৌবীরাঞ্জনং; পদ্মকেশরং স্বনামখ্যাতং; যোজনবল্লী মঞ্জিষ্ঠা; দীর্ঘমূলা দুরালভা, শালিপর্ণীত্যপরে| অম্বষ্ঠেত্যাদি|- অম্বষ্ঠা মাচিকা ‘সাঙ্কুরড’ ইতি পশ্চিমে প্রসিদ্ধা, পাঠা ইত্যপরে; ধাতকীকুসুমং ধাতকীপুষ্পং; সমঙ্গাঽঞ্জলিকারিকা ‘লজ্জালুঃ’ ইতি লোকে; কট্বঙ্গোঽরলুকঃ; বিল্বপেশিকা বালবিল্বগিরঃ; মহারোধ্রং কেচিত্ পঠন্তি; সাবররোধ্রো লোধ্রস্তস্যৈব গ্রাহিত্বাত্, নেতরস্তস্য বিরেচনত্বাত্; পলাশঃ কিংশুকঃ; নন্দীবৃক্ষঃ কাশ্মরী, অন্যে গর্দভাণ্ডমাহুঃ; পদ্মকেশরং স্বনামখ্যাতম্| সন্ধানীযাবিতি ভগ্নসন্ধানকারকৌ||৪৫-৪৭||
Adhikarana 24 (48-49) · Śloka 49
ন্যগ্রোধোদুম্বরাশ্বত্থপ্লক্ষমধুককপীতনককুভাম্রকোশাম্রচোরকপত্রজম্বূদ্বযপ্রিযাল- মধূকরোহিণীবঞ্জুলকদম্ববদরীতিন্দুকীসল্লকীরোধ্রসাবররোধ্রভল্লাতকপলাশা নন্দীবৃক্ষশ্চেতি ||৪৮|| ন্যগ্রোধাদির্গণো ব্রণ্যঃ সঙ্গ্রাহী ভগ্নসাধকঃ | রক্তপিত্তহরো দাহমেদোঘ্নো যোনিদোষহৃত্ ||৪৯||
न्यग्रोधोदुम्बराश्वत्थप्लक्षमधुककपीतनककुभाम्रकोशाम्रचोरकपत्रजम्बूद्वयप्रियाल- मधूकरोहिणीवञ्जुलकदम्बबदरीतिन्दुकीसल्लकीरोध्रसावररोध्रभल्लातकपलाशा नन्दीवृक्षश्चेति ||४८|| न्यग्रोधादिर्गणो व्रण्यः सङ्ग्राही भग्नसाधकः | रक्तपित्तहरो दाहमेदोघ्नो योनिदोषहृत् ||४९||
🔊 Audio coming soon
ন্যগ্রোধেত্যাদি| ন্যগ্রোধো বটঃ; উদুম্বরঃ প্রসিদ্ধঃ; অশ্বত্থঃ পিপ্পলঃ; প্লক্ষঃ পর্কটী; মধুকং প্রসিদ্ধং; কপীতন আম্রাতকঃ; ককুভঃ অর্জুনঃ; আম্রাঃ প্রসিদ্ধঃ; কোশাম্রঃ স্বনামখ্যাতঃ; চোরকপত্রো লাক্ষাবৃক্ষঃ; জম্বূদ্বযমেকা রাজজম্বূর্বৃহত্ফলা, দ্বিতীযা কাকজম্বূঃ স্বল্পফলা, দ্বযগ্রহণাদ্ভূমিজম্ব্বাস্তৃতীযাযাঃ প্রতিষেধঃ; প্রিযালঃ চারদ্রুমঃ; মধূকো গুডপুষ্পো ‘মহুবা’ ইতি লোকে; রোহিণী কট্ফলঃ; বঞ্জুলো বেতসঃ; কদম্বঃ প্রসিদ্ধঃ; বদরী প্রসিদ্ধা; তিন্দুকী তিন্দুকবৃক্ষঃ, ‘টিম্বরুযণি’ ইতি লোকে; নন্দীবৃক্ষোঽত্র প্ররোহী গর্দভাণ্ডঃ ‘পার্শ্বপিপ্পল’ ইতি লোকে| শেষং প্রসিদ্ধম্||৪৮-৪৯||
Adhikarana 25 (50-51) · Śloka 51
গুডূচীনিম্বকুস্তুম্বুরুচন্দনানি পদ্মকং চেতি ||৫০|| এষ সর্বজ্বরান্ হন্তি গুডূচ্যাদিস্তু দীপনঃ | হৃল্লাসারোচকবমীপিপাসাদাহনাশনঃ ||৫১||
गुडूचीनिम्बकुस्तुम्बुरुचन्दनानि पद्मकं चेति ||५०|| एष सर्वज्वरान् हन्ति गुडूच्यादिस्तु दीपनः | हृल्लासारोचकवमीपिपासादाहनाशनः ||५१||
🔊 Audio coming soon
গুডূচীত্যাদি| কুস্তুস্বুরুঃ ধান্যকং, চন্দনং রক্তচন্দনম্| হৃল্লাসস্থূত্করণম্| শেষং প্রসিদ্ধম্||৫০-৫১||
Adhikarana 26 (52-53) · Śloka 53
উত্পলরক্তোত্পলকুমুদসৌগন্ধিককুবলযপুণ্ডরীকাণি মধুকং চেতি ||৫২|| উত্পলাদিরযং দাহপিত্তরক্তবিনাশনঃ | পিপাসাবিষহৃদ্রোগচ্ছর্দিমূর্চ্ছাহরো গণঃ ||৫৩||
उत्पलरक्तोत्पलकुमुदसौगन्धिककुवलयपुण्डरीकाणि मधुकं चेति ||५२|| उत्पलादिरयं दाहपित्तरक्तविनाशनः | पिपासाविषहृद्रोगच्छर्दिमूर्च्छाहरो गणः ||५३||
🔊 Audio coming soon
উত্পলেত্যাদি| উত্পলং নীলোত্পলং, রক্তোত্পলং লোহিতোত্পলং, কুমুদং শ্বেতোত্পলং, সৌগন্ধিকং নীলোত্পলাকারবর্ণমুত্পলং সুগন্ধি চ, কুবলযমীষন্নীলধবলং, পুণ্ডরীকং শ্বেতপদ্মং, মধুকং যষ্টীমধুকম্||৫২-৫৩||
Adhikarana 27 (54-55) · Śloka 55
মুস্তাহরিদ্রাদারুহরিদ্রাহরীতক্যামলকবিভীতককুষ্ঠহৈমবতীবচাপাঠাকটুরোহিণীশার্ঙ্গষ্টাতিবিষাদ্রাবিডীভল্লাতকানি চিত্রকশ্চেতি ||৫৪|| এষ মুস্তাদিকো নাম্না গণঃ শ্লেষ্মনিষূদনঃ | যোনিদোষহরঃ স্তন্যশোধনঃ পাচনস্তথা ||৫৫||
मुस्ताहरिद्रादारुहरिद्राहरीतक्यामलकबिभीतककुष्ठहैमवतीवचापाठाकटुरोहिणीशार्ङ्गष्टातिविषाद्राविडीभल्लातकानि चित्रकश्चेति ||५४|| एष मुस्तादिको नाम्ना गणः श्लेष्मनिषूदनः | योनिदोषहरः स्तन्यशोधनः पाचनस्तथा ||५५||
🔊 Audio coming soon
মুস্তেত্যাদি| হৈমবতী শ্বেতবচা; বচা স্বনামখ্যাতাঽরুণবর্ণা; শার্ঙ্গ(র্ঙ্গে)ষ্টা কাকতিক্তা গৌরবর্তুলাবগুণ্ঠিতফলা ‘চিরপোটিকা’ ইতি প্রসিদ্ধা, ‘ঝঝরুষ’ ইতি পূর্বদেশে, কাকজঙ্ঘামন্যে, কাকমাচীত্যপরে; দ্রাবিডী এলা| স্তন্যশোধন ইতি স্ত্রীক্ষীরপ্রসাদনঃ| শেষং প্রসিদ্ধম্||৫৪-৫৫||
Adhikarana 28 (56-57) · Śloka 57
হরীতক্যামলকবিভীতকানীতি ত্রিফলা ||৫৬|| ত্রিফলা কফপিত্তঘ্নী মেহকুষ্ঠবিনাশনী | চক্ষুষ্যা দীপনী চৈব বিষমজ্বরনাশনী ||৫৭||
हरीतक्यामलकबिभीतकानीति त्रिफला ||५६|| त्रिफला कफपित्तघ्नी मेहकुष्ठविनाशनी | चक्षुष्या दीपनी चैव विषमज्वरनाशनी ||५७||
🔊 Audio coming soon
হরীতকীত্যাদি| ত্রিফলা প্রসিদ্ধা| ত্রিফলাত্রিকটুকযোর্যথালাভপরিভাষা ন ব্যাপ্রিযতে অত এবানযোর্গ্রন্থকারেণ সঞ্জ্ঞা কৃতেতি||৫৬-৫৭||
Adhikarana 29 (58-59) · Śloka 59
পিপ্পলীমরিচশৃঙ্গবেরাণীতি ত্রিকটুকম্ ||৫৮|| ত্র্যূষণং কফমেদোঘ্নং মেহকুষ্ঠত্বগামযান্ | নিহন্যাদ্দীপনং গুল্মপীনসাগ্ন্যল্পতামপি ||৫৯||
पिप्पलीमरिचशृङ्गवेराणीति त्रिकटुकम् ||५८|| त्र्यूषणं कफमेदोघ्नं मेहकुष्ठत्वगामयान् | निहन्याद्दीपनं गुल्मपीनसाग्न्यल्पतामपि ||५९||
🔊 Audio coming soon
পিপ্পলীত্যাদি| ত্বগামযান্ কুষ্ঠাদীন্| শেষং প্রসিদ্ধম্||৫৮-৫৯||
Adhikarana 30 (60-61) · Śloka 61
আমলকীহরীতকীপিপ্পল্যশ্চিত্রকশ্চেতি ||৬০|| আমলক্যাদিরিত্যেষ গণঃ সর্বজ্বরাপহঃ | চক্ষুষ্যো দীপনো বৃষ্যঃ কফারোচকনাশনঃ ||৬১||
आमलकीहरीतकीपिप्पल्यश्चित्रकश्चेति ||६०|| आमलक्यादिरित्येष गणः सर्वज्वरापहः | चक्षुष्यो दीपनो वृष्यः कफारोचकनाशनः ||६१||
🔊 Audio coming soon
আমলকীত্যাদি| মূলে স্পষ্ট এব||৬০-৬১||
Adhikarana 31 (62-63) · Śloka 63
ত্রপুসীসতাম্ররজতসুবর্ণকৃষ্ণলোহানি লোহমলশ্চেতি ||৬২|| গণস্ত্রপ্বাদিরিত্যেষ গরক্রিমিহরঃ পরঃ | পিপাসাবিষহৃদ্রোগপাণ্ডুমেহহরস্তথা ||৬৩||
त्रपुसीसताम्ररजतसुवर्णकृष्णलोहानि लोहमलश्चेति ||६२|| गणस्त्रप्वादिरित्येष गरक्रिमिहरः परः | पिपासाविषहृद्रोगपाण्डुमेहहरस्तथा ||६३||
🔊 Audio coming soon
ত্রপ্বিত্যাদি| ত্রপু বঙ্গং, সীসং নাগং, তাম্রং প্রসিদ্ধং, রজতং রূপ্যং, সুবর্ণং প্রসিদ্ধং, কৃষ্ণলোহং তীক্ষ্ণলোহং, লোহমলঃ প্রসিদ্ধঃ ‘কাট’ ইতি লোকে| গরঃ কৃত্রিমং বিষম্||৬২-৬৩||
Adhikarana 32 (64-65) · Śloka 65
লাক্ষারেবতকুটজাশ্বমারকট্ফলহরিদ্রাদ্বযনিম্বসপ্তচ্ছদমালত্যস্ত্রাযমাণা চেতি ||৬৪|| কষাযতিক্তমধুরঃ কফপিত্তার্তিনাশনঃ | কুষ্ঠক্রিমিহরশ্চৈব দুষ্টব্রণবিশোধনঃ ||৬৫||
लाक्षारेवतकुटजाश्वमारकट्फलहरिद्राद्वयनिम्बसप्तच्छदमालत्यस्त्रायमाणा चेति ||६४|| कषायतिक्तमधुरः कफपित्तार्तिनाशनः | कुष्ठक्रिमिहरश्चैव दुष्टव्रणविशोधनः ||६५||
🔊 Audio coming soon
লাক্ষেত্যাদি| আরেবতঃ কিরমালকঃ; কুটজ ইন্দ্রযবঃ; অশ্বমারকঃ করবীরঃ; কট্ফলঃ সোমকল্কলঃ ‘কাযফল’ ইতি লোকে; সপ্তচ্ছদঃ সপ্তপর্ণঃ ‘সাতবন’ ইতি লোকে; মালতী জাতী; ত্রাযমাণা স্বনামপ্রসিদ্ধা| কেচিদত্র ত্রিফলাং পঠন্তি| শেষং প্রসিদ্ধম্||৬৪-৬৫||
Adhikarana 33 (66-67) · Śloka 67
পঞ্চ পঞ্চমূলান্যত ঊর্ধ্বং বক্ষ্যামঃ | - তত্র ত্রিকণ্টকবৃহতীদ্বযপৃথক্পর্ণ্যো বিদারিগন্ধা চেতি কনীযঃ ||৬৬|| কষাযতিক্তমধুরং কনীযঃ পঞ্চমূলকম্ | বাতঘ্নং পিত্তশমনং বৃংহণং বলবর্ধনম্ ||৬৭||
पञ्च पञ्चमूलान्यत ऊर्ध्वं वक्ष्यामः | - तत्र त्रिकण्टकबृहतीद्वयपृथक्पर्ण्यो विदारिगन्धा चेति कनीयः ||६६|| कषायतिक्तमधुरं कनीयः पञ्चमूलकम् | वातघ्नं पित्तशमनं बृंहणं बलवर्धनम् ||६७||
🔊 Audio coming soon
পঞ্চেত্যাদি| ত্রিকণ্টকো গোক্ষুরকঃ, বিদারিগন্ধা শালপর্ণী| কনীযঃ লঘুপঞ্চমূলমিত্যর্থঃ| কেচিদ্গোক্ষুরকস্থান এরণ্ডং পঠন্তি||৬৬-৬৭||
Adhikarana 34 (68-69) · Śloka 69
বিল্বাগ্নিমন্থটিণ্টুকপাটলাঃ কাশ্মরী চেতি মহত্ ||৬৮|| সতিক্তং কফবাতঘ্নং পাকে লঘ্বগ্নিদীপনম্ | মধুরানুরসং চৈব পঞ্চমূলং মহত্ স্মৃতম্ ||৬৯||
बिल्वाग्निमन्थटिण्टुकपाटलाः काश्मरी चेति महत् ||६८|| सतिक्तं कफवातघ्नं पाके लघ्वग्निदीपनम् | मधुरानुरसं चैव पञ्चमूलं महत् स्मृतम् ||६९||
🔊 Audio coming soon
বিল্বেত্যাদি| অগ্নিমন্থঃ ‘অগ্নিবধূ’ ইতি লোকে, টুণ্টুকঃ স্যোনাকঃ| মহত্ মহত্পঞ্চমূলমিত্যর্থঃ||৬৮-৬৯||
Adhikarana 35 (70-71) · Śloka 71
অনযোর্দশমূলমুচ্যতে ||৭০|| গণঃ শ্বাসহরো হ্যেষ কফপিত্তানিলাপহঃ | আমস্য পাচনশ্চৈব সর্বজ্বরবিনাশনঃ ||৭১||
अनयोर्दशमूलमुच्यते ||७०|| गणः श्वासहरो ह्येष कफपित्तानिलापहः | आमस्य पाचनश्चैव सर्वज्वरविनाशनः ||७१||
🔊 Audio coming soon
অনযোরিত্যাদি| তস্য গুণমাহ- গণ ইত্যাদি||৭০-৭১||
Adhikarana 36 (72- 74) · Śloka 74
বিদারীসারিবারজনীগুডূচ্যোঽজশৃঙ্গী চেতি বল্লীসঞ্জ্ঞঃ ||৭২|| করমর্দীত্রিকণ্টকসৈরীযকশতাবরীগৃধ্রনখ্য ইতি কণ্টকসঞ্জ্ঞঃ ||৭৩|| রক্তপিত্তহরৌ হ্যেতৌ শোফত্রযবিনাশনৌ | সর্বমেহহরৌ চৈব শুক্রদোষবিনাশনৌ ||৭৪||
विदारीसारिवारजनीगुडूच्योऽजशृङ्गी चेति वल्लीसञ्ज्ञः ||७२|| करमर्दीत्रिकण्टकसैरीयकशतावरीगृध्रनख्य इति कण्टकसञ्ज्ञः ||७३|| रक्तपित्तहरौ ह्येतौ शोफत्रयविनाशनौ | सर्वमेहहरौ चैव शुक्रदोषविनाशनौ ||७४||
🔊 Audio coming soon
বিদারী বিদারীকন্দঃ, রজনী হরিদ্রা, ‘রঞ্জনী’ ইত্যন্যে পঠন্তি, রঞ্জনী শিরহলকঃ; অজশৃঙ্গী মেঢিকা, কর্কটশৃঙ্গীত্যপরে| বল্লীসঞ্জ্ঞঃ ‘পঞ্চমূলম্ ’ ইতি শেষঃ| করমর্দী ক্ষীরফলা ‘করমদী’ ইতি লোকে; ত্রিকণ্টঃ গোক্ষুরকঃ; সৈরেযকঃ কণ্টসেলিযাকঃ; গৃধ্রনখী হিংস্রা| কণ্টকসঞ্জ্ঞঃ ‘পঞ্চমূলম্’ ইতি শেষঃ| “বল্লীজং পঞ্চমূলং তু প্রশস্তং কফনাশনম্| সৃষ্টমূত্রানিলহরং বৃষ্যমিন্দ্রিযবোধনম্|| কণ্টকাখ্যং পঞ্চমূলং কফানিলহরং পরম্| মধুরানুরসং চৈব পক্বাশযবিশোধনম্-” ইত্যন্যে পঠন্তি||৭২- ৭৪||
Adhikarana 37 (75-76) · Śloka 76
কুশকাশনলদর্ভকাণ্ডেক্ষুকা ইতি তৃণসঞ্জ্ঞকঃ ||৭৫|| মূত্রদোষবিকারং চ রক্তপিত্তং তথৈব চ | অন্ত্যঃ প্রযুক্তঃ ক্ষীরেণ শীঘ্রমেব বিনাশযেত্ ||৭৬||
कुशकाशनलदर्भकाण्डेक्षुका इति तृणसञ्ज्ञकः ||७५|| मूत्रदोषविकारं च रक्तपित्तं तथैव च | अन्त्यः प्रयुक्तः क्षीरेण शीघ्रमेव विनाशयेत् ||७६||
🔊 Audio coming soon
কুশেত্যাদি| কুশো হ্রস্বো মৃদুঃ সূচীপত্রঃ, কাশশ্চমরপত্রঃ, নলঃ স্বনাম্না খ্যাতঃ; দর্ভঃ পৃথুলঃ খরপত্রো দীর্ঘঃ; কাণ্ডেক্ষুকা মহতী খগালী, অন্যে ইক্ষুমেবাহুঃ, অন্যে তু পঠন্তি ‘কাণ্ডশ্চ’ ইতি, তত্র কাণ্ডঃ শরঃ| অন্ত্যস্তৃণপঞ্চমূলমিত্যর্থঃ||৭৫-৭৬||
Adhikarana 38 (77) · Śloka 77
এষাং বাতহরাবাদ্যাবন্ত্যঃ পিত্তবিনাশনঃ | পঞ্চকৌ শ্লেষ্মশমনাবিতরৌ পরিকীর্তিতৌ ||৭৭||
एषां वातहरावाद्यावन्त्यः पित्तविनाशनः | पञ्चकौ श्लेष्मशमनावितरौ परिकीर्तितौ ||७७||
🔊 Audio coming soon
যে প্রতিপঞ্চকং গুণশ্লোকং ন পঠন্তি তেষাং মতে পঞ্চকানাং গুণানেকেনৈব শ্লোকেন বক্তুমাহ- এষামিত্যাদি| আদ্যাবিতি লঘুপঞ্চমূলমহাপঞ্চমূলৌ, অন্ত্যস্তৃণপঞ্চমূলমিত্যর্থঃ, ইতরৌ মধ্যৌ বল্লীসঞ্জ্ঞঃ কণ্টকসঞ্জ্ঞকশ্চেত্যর্থঃ||৭৭||
Adhikarana 39 (78) · Śloka 78
ত্রিবৃতাদিকমন্যত্রোপদেক্ষ্যামঃ ||৭৮||
त्रिवृतादिकमन्यत्रोपदेक्ष्यामः ||७८||
🔊 Audio coming soon
কেচিদত্র বৃদ্ধাঃ পঠন্তি- ত্রিবৃদাদিকমিত্যাদি||৭৮||
Adhikarana 40 (79) · Śloka 79
সমাসেন গণা হ্যেতে প্রোক্তাস্তেষাং তু বিস্তরম্ | চিকিত্সিতেষু বক্ষ্যামি, ... |৭৯|
समासेन गणा ह्येते प्रोक्तास्तेषां तु विस्तरम् | चिकित्सितेषु वक्ष्यामि, ... |७९|
🔊 Audio coming soon
অযমেষাং সঙ্ক্ষেপ ইতি দর্শযন্নাহ- সমাসেনেত্যাদি||৭৯||-
Adhikarana 41 (79-80) · Śloka 80
... জ্ঞাত্বা দোষবলাবলম্ ||৭৯|| এভির্লেপান্ কষাযাংশ্চ তৈলং সর্পীংষি পানকান্ | প্রবিভজ্য যথান্যাযং কুর্বীত মতিমান্ ভিষক্ ||৮০||
... ज्ञात्वा दोषबलाबलम् ||७९|| एभिर्लेपान् कषायांश्च तैलं सर्पींषि पानकान् | प्रविभज्य यथान्यायं कुर्वीत मतिमान् भिषक् ||८०||
🔊 Audio coming soon
কিমেভির্গণৈঃ কর্তব্যমিত্যাহ- জ্ঞাত্বেত্যাদি| দোষবলাবলমিতি দোষাদিবলাবলমিত্যর্থঃ, তেন সর্বেষামেব পরীক্ষাণামবরোধঃ কৃতো ভবতি| কষাযশব্দেনাত্র শৃতশীতস্বরসফাণ্টকল্কভেদাঃ পঞ্চোচ্যন্তে| পীযন্ত ইতি পানকা যূষমণ্ডাদযঃ কথ্যন্তে, কষাযাংশ্চেতি চকারাদনুক্তা গুডাদিসংস্কারাঃ সমুচ্চীযন্তে||৭৯-৮০||
Adhikarana 42 (81) · Śloka 81
ধূমবর্ষানিলক্লেদৈঃ সর্বর্তুষ্বনভিদ্রুতে | গ্রাহযিত্বা গৃহে ন্যস্যেদ্বিধিনৌষধসঙ্গ্রহম্ ||৮১||
धूमवर्षानिलक्लेदैः सर्वर्तुष्वनभिद्रुते | ग्राहयित्वा गृहे न्यस्येद्विधिनौषधसङ्ग्रहम् ||८१||
🔊 Audio coming soon
অত্র কেচিদ্বৃদ্ধাঃ পঠন্তি- ধূমেত্যাদি| এতদুক্তং ভবতি- বিধিনৌষধসঙ্গ্রহং গ্রাহযিত্বা ধূমাদিভিরনুপদ্রুতে গৃহে নিক্ষিপেদিতি||৮১||
Adhikarana 43 (82) · Śloka 82
সমীক্ষ্য দোষভেদাংশ্চ ভিন্নান্ মিশ্রান্ ভিন্নান্ প্রযোজযেত্ | পৃথঙ্মিশ্রান্ সমস্তান্বা গণং বা ব্যস্তসংহতম্ ||৮২||
समीक्ष्य दोषभेदांश्च भिन्नान् मिश्रान् भिन्नान् प्रयोजयेत् | पृथङ्मिश्रान् समस्तान्वा गणं वा व्यस्तसंहतम् ||८२||
🔊 Audio coming soon
কথমেতে দ্রব্যগণা যোজ্যা ইত্যাহ- সমীক্ষ্যেত্যাদি| অযমর্থঃ- দোষভেদান্ পৃথক্ কোঽর্থঃ? ভিন্নান্ দৃষ্ট্বা, গণান্ ভিন্নান্ অমিশ্রান্ প্রযোজযেত্| মিশ্রান্ বা কোঽর্থঃ? দ্বন্দ্বান্ দোষভেদান্ বা সমীক্ষ্য মিশ্রান্ গণান্ প্রযোজযেত্| সমস্তান্ বা দোষভেদান্ সমীক্ষ্য সংযুক্তাংস্ত্রীনেব প্রযোজযেদিতি| গণেনাপি গণস্য সংযোগোঽভিপ্রেতঃ| তদুক্তং- “বর্গমপি বর্গেণ সহ যোজযেত্” ইতি| অযং চার্থঃ প্রতিগণং চকারকরণাল্লভ্যতে| একস্যৈব গণস্য যথাঽবচারণং করণীযং তথা নির্দিশন্নাহ- গণং বেত্যাদি| ব্যস্তং দ্বিত্রিচতুরাদিদ্রব্যযোগঃ, সংহতং সমস্তদ্রব্যযোগঃ| ইযং পুনঃ পরিভাষা গণবিষযৈব জ্ঞেযা নান্যযোগেষু| কেচিত্ পুনরিমাং পরিভাষাং নাধীযত ইতি||৮২||
Adhikarana puShpikA · Śloka 38
ইতি সুশ্রুতসংহিতাযাং সূত্রস্থানে দ্রব্যসঙ্গ্রহণীযো নামাষ্টত্রিংশোঽধ্যাযঃ ||৩৮||
इति सुश्रुतसंहितायां सूत्रस्थाने द्रव्यसङ्ग्रहणीयो नामाष्टत्रिंशोऽध्यायः ||३८||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানেঽষ্টত্রিংশত্তমোঽধ্যাযঃ||৩৮||