Adhikarana 1 (1-2) · Śloka 2
অথাতো দ্রব্যবিশেষবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो द्रव्यविशेषविज्ञानीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথাত ইত্যাদি| দ্রব্যস্য বিশেষো ভেদঃ পার্থিবাদিকঃ||১-২||
Adhikarana 2 (3) · Śloka 3
তত্র পৃথিব্যপ্তেজোবায্বাকাশানাং সমুদাযাদ্দ্রব্যাভিনির্বৃত্তিঃ, উত্কর্ষস্ত্বভিব্যঞ্জকো ভবতি- ইদং পার্থিবমিদমাপ্যমিদং তৈজসমিদং বাযব্যমিদমাকাশীযমিতি ||৩||
तत्र पृथिव्यप्तेजोवाय्वाकाशानां समुदायाद्द्रव्याभिनिर्वृत्तिः, उत्कर्षस्त्वभिव्यञ्जको भवति- इदं पार्थिवमिदमाप्यमिदं तैजसमिदं वायव्यमिदमाकाशीयमिति ||३||
🔊 Audio coming soon
তত্র সর্বেষামেব দ্রব্যাণাং পঞ্চভূতাভিনির্বৃত্তত্বাত্ পৃথগ্দ্রব্যাণাং পৃথিব্যাদ্যারব্ধানাং পরমার্থভেদো নাস্তীত্যুত্কর্ষোপাধিভেদং দর্শযন্নাহ- তত্রেত্যাদি| সমুদাযাত্ সমবাযাত্| দ্রব্যাভিনির্বৃত্তির্দ্রব্যজন্ম| অভিব্যঞ্জকো জ্ঞাপকঃ||৩||
Adhikarana 3 (4(1)) · Śloka 4
তত্র স্থূলসান্দ্রমন্দস্থিরগুরুকঠিনং গন্ধবহুলমীষত্কষাযং প্রাযশো মধুরমিতি পার্থিবং; তত্ স্থৈর্যবলগৌরবসঙ্ঘাতোপচযকরং বিশেষতশ্চাধোগতিস্বভাবমিতি(১) |৪|
तत्र स्थूलसान्द्रमन्दस्थिरगुरुकठिनं गन्धबहुलमीषत्कषायं प्रायशो मधुरमिति पार्थिवं; तत् स्थैर्यबलगौरवसङ्घातोपचयकरं विशेषतश्चाधोगतिस्वभावमिति(१) |४|
🔊 Audio coming soon
তত্র প্রভূতং দ্রব্যাভিব্যক্তিকারণং পৃথিব্যাদিভূতগুণোত্কর্ষং নির্দিশন্নাহ- তত্র স্থূলেত্যাদি| স্থূলঃ সূক্ষ্মবিপরীতঃ, সান্দ্রস্তনুবিপর্যযঃ, মন্দস্তীক্ষ্ণবিপর্যযঃ, সরবিপরীতঃ স্থিরঃ, গুরুশ্চিরপাকী, কঠিনো মৃদুবিপরীতঃ| পার্থিবস্য লক্ষণাভিধানেন গুণবত্ত্বমভিধায ক্রিযাবত্ত্বং দর্শযন্নাহ- তত্র স্থৈর্যেত্যাদি| স্থৈর্যমচলত্বং, সঙ্ঘাতঃ কাঠিন্যম্, উপচযো বৃংহণম্||৪(১)||
Adhikarana 4 (4 (2)) · Śloka 4
শীতস্তিমিতস্নিগ্ধমন্দগুরুসরসান্দ্রমৃদুপিচ্ছিলং রসবহুলমীষত্কষাযাম্ললবণং মধুররসপ্রাযমাপ্যং; তত্ স্নেহনহ্লাদনক্লেদনবন্ধনবিষ্যন্দনকরমিতি;(২) |৪|
शीतस्तिमितस्निग्धमन्दगुरुसरसान्द्रमृदुपिच्छिलं रसबहुलमीषत्कषायाम्ललवणं मधुररसप्रायमाप्यं; तत् स्नेहनह्लादनक्लेदनबन्धनविष्यन्दनकरमिति;(२) |४|
🔊 Audio coming soon
ইদানীমাপ্যদ্রব্যমব্গুণোত্কর্ষেণ ভিন্নং দর্শযন্নাহ- শীতমিত্যাদি| স্তিমিতমার্দ্রং, জডমিত্যন্যে| আপ্যস্য লক্ষণাভিধানেন গুণবত্ত্বমভিধায ক্রিযাবত্ত্বং দর্শযন্নাহ- তত্ স্নেহনেত্যাদি| হ্লাদনং সুখোত্পাদনং, ক্লেদনমার্দ্রভাবঃ, বন্ধনং সংহত্যাপাদনং, বিষ্যন্দনং দ্রবস্রুতিঃ||৪ (২)||
Adhikarana 5 (4(3)) · Śloka 4
উষ্ণতীক্ষ্ণসূক্ষ্মরূক্ষখরলঘুবিশদং রূপবহুলমীষদম্ললবণং কটুকরসপ্রাযং বিশেষতশ্চোর্ধ্বগতিস্বভাবমিতি তৈজসং; তদ্দহনপচনদারণতাপনপ্রকাশনপ্রভাবর্ণকরমিতি;(৩) |৪|
उष्णतीक्ष्णसूक्ष्मरूक्षखरलघुविशदं रूपबहुलमीषदम्ललवणं कटुकरसप्रायं विशेषतश्चोर्ध्वगतिस्वभावमिति तैजसं; तद्दहनपचनदारणतापनप्रकाशनप्रभावर्णकरमिति;(३) |४|
🔊 Audio coming soon
আগ্নেযদ্রব্যলক্ষণং তদ্ভূতগুণোত্কর্ষেণ দর্শযন্নাহ- উষ্ণেত্যাদি| তীক্ষ্ণং রাজিকামরিচাদিবত্, সূক্ষ্মং স্রোতোনুসরণশীলং, বিশদং পিচ্ছিলবিপরীতম্| তস্য ক্রিযাবত্ত্বং দর্শযন্নাহ- দহনেত্যাদি| দহনং ভস্মসাত্করণং, পচনমাহারাদিপাকঃ, দারণং ব্রণাদেঃ, তাপনং শরীরাদিসন্তাপনং, প্রকাশনমভিব্যক্তিঃ, প্রভা তেজঃ, বর্ণো গৌরাদিঃ||৪(৩)||
Adhikarana 6 (4(4)) · Śloka 4
সূক্ষ্মরূক্ষখরশিশিরলঘুবিশদং স্পর্শবহুলমীষত্তিক্তং বিশেষতঃ কষাযমিতি বাযবীযং; তদ্বৈশদ্যলাঘবগ্লপনবিরূক্ষণবিচারণকরমিতি;(৪) |৪|
सूक्ष्मरूक्षखरशिशिरलघुविशदं स्पर्शबहुलमीषत्तिक्तं विशेषतः कषायमिति वायवीयं; तद्वैशद्यलाघवग्लपनविरूक्षणविचारणकरमिति;(४) |४|
🔊 Audio coming soon
বাযুগুণোত্কর্ষাদ্বাযব্যং দ্রব্যবিশেষং দর্শযন্নাহ- সূক্ষ্মেত্যাদি| খরং কর্কোটকফলবত্, শিশিরং শীতং, বিশদং ধূলিবত্| তস্যৈব কর্ম দর্শযন্নাহ- তদ্বৈশদ্যেত্যাদি| গ্লপনমবৃষ্যত্বং, বিচারণং মনসোঽনেকবিকল্পকারণং; ‘বিচরণকরম্’ ইত্যন্যে পঠন্তি, তত্র গতিবিশেষকরমিত্যর্থঃ; ‘বিধারণম্’ ইত্যন্যে||৪(৪)||
Adhikarana 7 (4(5)) · Śloka 4
শ্লক্ষ্ণসূক্ষ্মমৃদুব্যবাযিবিশদবিবিক্তমব্যক্তরসং শব্দবহুলমাকাশীযং; তন্মার্দবশৌষির্যলাঘবকরমিতি(৫) ||৪||
श्लक्ष्णसूक्ष्ममृदुव्यवायिविशदविविक्तमव्यक्तरसं शब्दबहुलमाकाशीयं; तन्मार्दवशौषिर्यलाघवकरमिति(५) ||४||
🔊 Audio coming soon
আকাশগুণোত্কর্ষেণাকাশীযং দ্রব্যবিশেষং দর্শযন্নাহ- শ্লক্ষ্ণেত্যাদি| শ্লক্ষ্ণং মসৃণং, মৃদু কোমলং, ব্যবাযীতি সমস্তদেহং ব্যাপ্য পশ্চাত্ পাকং গচ্ছতি বিষমদ্যবত্, বিবিক্তং পৃথগ্ভূতম্, অবযবদ্বারেণ শূন্যমিত্যন্যে, অব্যক্তরসং মধুরাদিরসবিশেষানুপলব্ধেঃ| তস্য কর্মাণি নির্দিশন্নাহ- তন্মার্দবেত্যাদি| শৌষির্যং ছিদ্রভাবঃ ||৪(৫)||
Adhikarana 8 (5) · Śloka 5
অনেন নিদর্শনেন নানৌষধীভূতং জগতি কিঞ্চিদ্দ্রব্যমস্তীতি কৃত্বা তং তং যুক্তিবিশেষমর্থং চাভিসমীক্ষ্য স্ববীর্যগুণযুক্তানি দ্রব্যাণি কার্মুকাণি ভবন্তি | তানি যদা কুর্বন্তি স কালঃ, যত্ কুর্বন্তি তত্ কর্ম, যেন কুর্বন্তি তদ্বীর্যং, যত্র কুর্বন্তি তদধিকরণং, যথা কুর্বন্তি স উপাযঃ, যন্নিষ্পাদযন্তি তত্ ফলমিতি ||৫||
अनेन निदर्शनेन नानौषधीभूतं जगति किञ्चिद्द्रव्यमस्तीति कृत्वा तं तं युक्तिविशेषमर्थं चाभिसमीक्ष्य स्ववीर्यगुणयुक्तानि द्रव्याणि कार्मुकाणि भवन्ति | तानि यदा कुर्वन्ति स कालः, यत् कुर्वन्ति तत् कर्म, येन कुर्वन्ति तद्वीर्यं, यत्र कुर्वन्ति तदधिकरणं, यथा कुर्वन्ति स उपायः, यन्निष्पादयन्ति तत् फलमिति ||५||
🔊 Audio coming soon
ইদানীং সর্বস্যৈব জগতঃ স্থাবরজঙ্গমাখ্যস্য পাঞ্চভৌতিকত্বেন সর্বমৌষধং ক্রিযাগুণযোগাদিভির্দর্শযন্নাহ- অনেনেত্যাদি| নানৌষধিভূতমিতি অনৌষধিভূতং দ্রব্যং নাস্তীতি সম্বন্ধঃ| যুক্তিবিশেষমিতি যুক্তিবিশেষো যোজনাবিশেষস্তোযাগ্নিসংস্কারবাসনভাবনামাত্রাকালাদ্যপেক্ষঃ| অর্থং চেতি| অর্থঃ প্রযোজনং নানাব্যাধিনির্ঘাতনং, বীর্যং শক্তিঃ শীতোষ্ণাদযো বাঽষ্টৌ শক্তিমন্তো গুণাঃ, গুণা গুর্বাদযঃ, অন্যে তু বীর্যপ্রধানা গুণা বীর্যগুণাস্তে পুনঃ সরত্বাদযঃ| কার্মুকাণি কার্যকরাণি| তানি দ্রব্যাণি যদা যস্মিন্ কালে, ক্রিযাং কুর্বন্তি স কালঃ; কালশ্চ সংবত্সরাত্মা ঋত্বাখ্যঃ শীতোষ্ণবর্ষলক্ষণশ্চাতুরাবস্থিকশ্চাভিপ্রেতঃ| যদিত্যাদি কর্মশব্দেনাত্র ভেষজদ্রব্যব্যাপারঃ শোধনাদিরুক্তঃ| যেনেত্যাদি| বীর্যমিতি শক্তিঃ| যত্রেত্যাদি| অধিকরণমিতি পঞ্চমহাভূতশরীরিসমবাযিলক্ষণঃ পুরুষোঽধিকরণম্| যথেত্যাদি| যেন স্বরসকল্কশৃতশীতফাণ্টঘৃততৈললেহমোদকোত্কারিকাদিপ্রকারেণ কুর্বন্তি স উপাযঃ| যদিতি স্বাস্থ্যমস্বাস্থ্যং বা||৫||
Adhikarana 9 (6-9) · Śloka 9
তত্র, বিরেচনদ্রব্যাণি পৃথিব্যম্বুগুণভূযিষ্ঠানি, পৃথিব্যাপো গুর্ব্যঃ, তানি গুরুত্বাদধো গচ্ছন্তি, তস্মাদ্বিরেচনমধোগুণভূযিষ্ঠমনুমানাত্ ; বমনদ্রব্যাণ্যগ্নিবাযুগুণভূযিষ্ঠানি, অগ্নিবাযু হি লঘূ, লঘুত্বাচ্চ তান্যূর্ধ্বমুত্তিষ্ঠন্তি, তস্মাদ্বমনমপ্যূর্ধ্বগুণভূযিষ্ঠম্; উভযগুণভূযিষ্ঠমুভযতোভাগম্; আকাশগুণভূযিষ্ঠং সংশমনং; সাঙ্গ্রাহিকমনিলগুণভূযিষ্ঠম্, অনিলস্য শোষণাত্মকত্বাত্; দীপনমগ্নিগুণভূযিষ্ঠং, তত্সমানত্বাত্; লেখনমনিলানলগুণভূযিষ্ঠং; বৃংহণং পৃথিব্যম্বুগুণভূযিষ্ঠম্; এবমৌষধকর্মাণ্যনুমানাত্ সাধযেত্ ||৬|| ভবন্তি চাত্র- ভূতেজোবারিজৈর্দ্রব্যৈঃ শমং যাতি সমীরণঃ | ভূম্যম্বুবাযুজৈঃ পিত্তং ক্ষিপ্রমাপ্নোতি নির্বৃতিম্ ||৭|| খতেজোঽনিলজৈঃ শ্লেষ্মা শমমেতি শরীরিণাম্ | বিযত্পবনজাতাভ্যাং বৃদ্ধিমভ্যেতি মারুতঃ ||৮|| আগ্নেযমেব যদ্দ্রব্যং তেন পিত্তমুদীর্যতে | বসুধাজলজাতাভ্যাং বলাসঃ পরিবর্ধতে ||৯||
तत्र, विरेचनद्रव्याणि पृथिव्यम्बुगुणभूयिष्ठानि, पृथिव्यापो गुर्व्यः, तानि गुरुत्वादधो गच्छन्ति, तस्माद्विरेचनमधोगुणभूयिष्ठमनुमानात् ; वमनद्रव्याण्यग्निवायुगुणभूयिष्ठानि, अग्निवायु हि लघू, लघुत्वाच्च तान्यूर्ध्वमुत्तिष्ठन्ति, तस्माद्वमनमप्यूर्ध्वगुणभूयिष्ठम्; उभयगुणभूयिष्ठमुभयतोभागम्; आकाशगुणभूयिष्ठं संशमनं; साङ्ग्राहिकमनिलगुणभूयिष्ठम्, अनिलस्य शोषणात्मकत्वात्; दीपनमग्निगुणभूयिष्ठं, तत्समानत्वात्; लेखनमनिलानलगुणभूयिष्ठं; बृंहणं पृथिव्यम्बुगुणभूयिष्ठम्; एवमौषधकर्माण्यनुमानात् साधयेत् ||६|| भवन्ति चात्र- भूतेजोवारिजैर्द्रव्यैः शमं याति समीरणः | भूम्यम्बुवायुजैः पित्तं क्षिप्रमाप्नोति निर्वृतिम् ||७|| खतेजोऽनिलजैः श्लेष्मा शममेति शरीरिणाम् | वियत्पवनजाताभ्यां वृद्धिमभ्येति मारुतः ||८|| आग्नेयमेव यद्द्रव्यं तेन पित्तमुदीर्यते | वसुधाजलजाताभ्यां बलासः परिवर्धते ||९||
🔊 Audio coming soon
তত্রেত্যাদি| গুরুত্বাদিতি গুরুত্বলঘুত্বে চেহ প্রভাববিশেষাধিষ্ঠিতে ত্রিবৃতাদিমদনফলাদিদ্রব্যসমবেতে গ্রাহ্যে, ন তু গুরুত্বলঘুত্বমাত্রে; অন্যথা মত্স্যপিষ্টান্নমসূরাদীনাং বিরেচকত্বং কপিঞ্জললাবাদীনাং চ বামনীযত্বং স্যাত্| অধো গচ্ছন্তি উপলাদিবত্| অধোগুণভূযিষ্ঠং পৃথিব্যম্বুগুণভূযিষ্ঠমিত্যর্থঃ| বমনেত্যাদি ঊর্ধ্বমুত্তিষ্ঠন্তীতি ধূমবজ্জ্বালাবচ্চ| বমনদ্রব্যমূর্ধ্বগুণভূযিষ্ঠম্ অগ্নিবাযুগুণভূযিষ্ঠমিত্যর্থঃ| উভযগুণভূযিষ্ঠমিতি বিরেচনবমননির্দিষ্টভূতচতুষ্টযগুণভূযিষ্ঠমিত্যর্থঃ| সংশমনমিতি “ন শোধযতি যদ্দোষান্ সমান্নোদীরযত্যপি| সমীকরোতি ক্রুদ্ধাংশ্চ তত্ সংশমনমুচ্যতে” ইতি| লেখনং কফমেদসোঃ| নির্বৃতিঃ শান্তিঃ||৬-৯||
Adhikarana 10 (10) · Śloka 10
এবমেতদ্গুণাধিক্যং দ্রব্যে দ্রব্যে বিনিশ্চিতম্ | দ্বিশো বা বহুশো বাঽপি জ্ঞাত্বা দোষেষু চাচরেত্ ||১০||
एवमेतद्गुणाधिक्यं द्रव्ये द्रव्ये विनिश्चितम् | द्विशो वा बहुशो वाऽपि ज्ञात्वा दोषेषु चाचरेत् ||१०||
🔊 Audio coming soon
এবমিত্যাদি| এবমনেন প্রকারেণ| এতত্ পূর্বোক্তম্| দ্বিশ ইতি দ্বযোর্দ্বযোর্দোষযোঃ| বহুশ ইতি বহূনাং দোষাণামিত্যর্থঃ| দোষেষু চাচরেদিতি চকারাদ্রোগেষ্বপ্যেবমাচরেদিতি সমুচ্চীযতে||১০||
Adhikarana 11 (11) · Śloka 11
তত্র য ইমে গুণা বীর্যসঞ্জ্ঞকাঃ শীতোষ্ণস্নিগ্ধরূক্ষমৃদুতীক্ষ্ণপিচ্ছিলবিশদাস্তেষাং তীক্ষ্ণোষ্ণাবাগ্নেযৌ, শীতপিচ্ছিলাবম্বুগুণভূযিষ্ঠৌ , পৃথিব্যম্বুগুণভূযিষ্ঠঃ স্নেহঃ, তোযাকাশগুণভূযিষ্ঠং মৃদুত্বং, বাযুগুণভূযিষ্ঠং রৌক্ষ্যং, ক্ষিতিসমীরণগুণভূযিষ্ঠং বৈশদ্যং; বিপাকাবুক্তগুণৌ | তত্র, উষ্ণস্নিগ্ধৌ বাতঘ্নৌ, শীতমৃদুপিচ্ছিলাঃ পিত্তঘ্নাঃ, তীক্ষ্ণরূক্ষবিশদাঃ শ্লেষ্মঘ্নাঃ গুরুপাকো বাতপিত্তঘ্নঃ, লঘুপাকঃ শ্লেষ্মঘ্নঃ | তেষাং মৃদুশীতোষ্ণাঃ স্পর্শগ্রাহ্যাঃ, পিচ্ছিলবিশদৌ চক্ষুঃস্পর্শাভ্যাং, স্নিগ্ধরূক্ষৌ চক্ষুষা, তীক্ষ্ণো মুখে দুঃখোত্পাদনাত্ | গুরুপাকঃ সৃষ্টবিণ্মূত্রতযা কফোত্ক্লেশেন চ, লঘুর্বদ্ধবিণ্মূত্রতযা মারুতকোপেন চ | তত্র তুল্যগুণেষু ভূতেষু রসবৈশেষ্যমুপলক্ষযেত্ | তদ্যথা- মধুরো গুরুশ্চ পার্থিবঃ, মধুরঃ স্নিগ্ধশ্চাপ্য ইতি ||১১||
तत्र य इमे गुणा वीर्यसञ्ज्ञकाः शीतोष्णस्निग्धरूक्षमृदुतीक्ष्णपिच्छिलविशदास्तेषां तीक्ष्णोष्णावाग्नेयौ, शीतपिच्छिलावम्बुगुणभूयिष्ठौ , पृथिव्यम्बुगुणभूयिष्ठः स्नेहः, तोयाकाशगुणभूयिष्ठं मृदुत्वं, वायुगुणभूयिष्ठं रौक्ष्यं, क्षितिसमीरणगुणभूयिष्ठं वैशद्यं; विपाकावुक्तगुणौ | तत्र, उष्णस्निग्धौ वातघ्नौ, शीतमृदुपिच्छिलाः पित्तघ्नाः, तीक्ष्णरूक्षविशदाः श्लेष्मघ्नाः गुरुपाको वातपित्तघ्नः, लघुपाकः श्लेष्मघ्नः | तेषां मृदुशीतोष्णाः स्पर्शग्राह्याः, पिच्छिलविशदौ चक्षुःस्पर्शाभ्यां, स्निग्धरूक्षौ चक्षुषा, तीक्ष्णो मुखे दुःखोत्पादनात् | गुरुपाकः सृष्टविण्मूत्रतया कफोत्क्लेशेन च, लघुर्बद्धविण्मूत्रतया मारुतकोपेन च | तत्र तुल्यगुणेषु भूतेषु रसवैशेष्यमुपलक्षयेत् | तद्यथा- मधुरो गुरुश्च पार्थिवः, मधुरः स्निग्धश्चाप्य इति ||११||
🔊 Audio coming soon
তত্রেত্যাদি| ইমে বক্ষ্যমাণাঃ| বিপাকযোর্মধুরকটুকযোঃ প্রাগুক্তা গুণাঃ| তত্রোষ্ণেত্যাদি উষ্ণস্নিগ্ধৌ বীর্যসঞ্জ্ঞৌ গুণৌ| তেষামষ্টানাং বীর্যাণাং মধ্যে| মুখে দুঃখোত্পাদনাদিতি অত্র চার্থো দ্রষ্টব্যঃ, তেন ঘ্রাণদুঃখোত্পাদনাচ্চেতি দ্রষ্টব্যম্| স্নিগ্ধশ্চেতি চাকারাদ্গুরুশ্চ||১১||
Adhikarana 12 (12) · Śloka 12
ভবতি চাত্র- গুণা য উক্তা দ্রব্যেষু শরীরেষ্বপি তে তথা | স্থানবৃদ্ধিক্ষযাস্তস্মাদ্দেহিনাং দ্রব্যহেতুকাঃ ||১২||
भवति चात्र- गुणा य उक्ता द्रव्येषु शरीरेष्वपि ते तथा | स्थानवृद्धिक्षयास्तस्माद्देहिनां द्रव्यहेतुकाः ||१२||
🔊 Audio coming soon
গুণা ইত্যাদি| গুণা বিংশতিরধিকা বা| স্থানং দোষধাতুমলসাম্যেনাবস্থানং, বৃদ্ধির্দোষাদেরাধিক্যং, ক্ষযঃ হ্রাসো দোষাদীনাম্| দ্রব্যহেতুকাঃ পাঞ্চভৌতিকদ্রব্যহেতুকাঃ||১২||
Adhikarana puShpikA · Śloka 41
ইতি সুশ্রুতসংহিতাযাং সূত্রস্থানে দ্রব্যবিশেষবিজ্ঞানীযো নামৈকচত্বারিংশত্তমোঽধ্যাযঃ ||৪১||
इति सुश्रुतसंहितायां सूत्रस्थाने द्रव्यविशेषविज्ञानीयो नामैकचत्वारिंशत्तमोऽध्यायः ||४१||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে একচত্বারিংশত্তমোঽধ্যাযঃ||৪১||