Adhikarana 1 (1-2) · Śloka 2
অথাতো হিতাহিতীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो हिताहितीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথাত ইত্যাদি| হিতাহিতান্যধিকৃত্য কৃতোঽধ্যাযো হিতাহিতানি বাঽস্মিন্ বিদ্যন্ত ইতি হিতাহিতীযঃ||১-২||
Adhikarana 2 (3) · Śloka 3
যদ্বাযোঃ পথ্যং তত্ পিত্তস্যাপথ্যমিত্যনেন হেতুনা ন কিঞ্চিদ্দ্রব্যমেকান্তেন হিতমহিতং বাঽস্তীতি কেচিদাচার্যা ব্রুবতে | তত্তু ন সম্যক্; ইহ খলু যস্মাদ্দ্রব্যাণি স্বভাবতঃ সংযোগতশ্চৈকান্তহিতান্যেকান্তাহিতানি হিতাহিতানি চ ভবন্তি ||৩||
यद्वायोः पथ्यं तत् पित्तस्यापथ्यमित्यनेन हेतुना न किञ्चिद्द्रव्यमेकान्तेन हितमहितं वाऽस्तीति केचिदाचार्या ब्रुवते | तत्तु न सम्यक्; इह खलु यस्माद्द्रव्याणि स्वभावतः संयोगतश्चैकान्तहितान्येकान्ताहितानि हिताहितानि च भवन्ति ||३||
🔊 Audio coming soon
প্রথমং পরমতমেব দর্শযন্নাহ- যদ্বাযোঃ পথ্যমিত্যাদি| যদ্বাযোঃ পথ্যং তত্ পিত্তস্যাপথ্যমিতি তৈলকাঞ্জিকমিত্যাদি| ইতিশব্দোঽযমাদ্যর্থঃ| একান্তেন সাতত্যেন কিঞ্চিদপি দ্রব্যং হিতং নাস্তি, পিত্তস্যাপথ্যত্বাত্; তথৈকান্তেনাহিতমপি নাস্তি, বাযোঃ পথ্যত্বাত্| বাশব্দোঽত্র সমুচ্চযার্থঃ| পরমতনিষেধার্থং স্বমতমাহ- তত্ত্বিত্যাদি| ইহেতি সৌশ্রুতে তন্ত্রে| খলু নিশ্চযেন| স্বভাবতঃ প্রকৃতিতঃ; যা সর্বাবস্থাস্বপরিত্যাজ্যা সা দ্রব্যস্য প্রকৃতিঃ; যথা- বহ্নেরুষ্ণত্বম্, অপাং দ্রবত্বমিত্যাদি| সংযোগত ইতি সংযোগঃ একদ্বিত্র্যাদিদ্রব্যেণ সংহতীভাবঃ| চকারেণ সংযোগেষ্বপি স্বভাবোঽপি হেতুত্বেন সমুচ্চীযতে, তথা দেশকালমাত্রাসংস্কারাশ্চ স্বভাবানুসম্বদ্ধাঃ সমুচ্চীযন্তে||৩||
Adhikarana 3 (4) · Śloka 4
তত্র ,একান্তহিতানি জাতিসাত্ম্যাত্ সলিলঘৃতদুগ্ধৌদনপ্রভৃতীনি; একান্তাহিতানি তু দহনপচনমারণাদিষু প্রবৃত্তান্যনলক্ষারবিষাদীনি, সংযোগাদপরাণি বিষতুল্যানি ভবন্তি; হিতাহিতানি তু যদ্বাযোঃ পথ্যং তত্ পিত্তস্যাপথ্যমিতি ||৪||
तत्र ,एकान्तहितानि जातिसात्म्यात् सलिलघृतदुग्धौदनप्रभृतीनि; एकान्ताहितानि तु दहनपचनमारणादिषु प्रवृत्तान्यनलक्षारविषादीनि, संयोगादपराणि विषतुल्यानि भवन्ति; हिताहितानि तु यद्वायोः पथ्यं तत् पित्तस्यापथ्यमिति ||४||
🔊 Audio coming soon
একান্তহিতান্যেব প্রথমং দর্শযন্নাহ- তত্রৈকান্তহিতানীত্যাদি| তত্রেতি হিতাহিতদ্রব্যেষু মধ্যে| জাতিসাত্ম্যাদিতি মনুষ্যজাতিসাত্ম্যাত্| আত্মনা দেহেন সহ স্থিতং দ্রব্যমবিকারি সাত্ম্যং; যদুক্তং- “আত্মা যহ্যভিমতো দেহ আত্মনা সহ যত্ স্থিতম্| ন কুর্যাদ্বিকৃতিং দ্রব্যমুপযুক্তং কথঞ্চন|| সাত্ম্যমিত্যুচ্যতে তত্তু” ইতি| প্রভৃতিগ্রহণাদ্যবগোধূমাদযঃ| একান্তাহিতানি দর্শযন্নাহ- একান্তাহিতানীত্যাদি| এতান্যগ্নিক্ষারবিষাদীন্যেকান্তাহিতানি স্বস্থানাং, রোগিণাং তু রোগমাত্রাদ্যপেক্ষযা হিতান্যেবেতি| সংযোগাদিত্যাদি| অন্যে ত্বেবং পঠন্তি- ‘তেষামেব সংযোগতস্ত্বপরাণি’ ইতি, ব্যাখ্যানযন্তি চ- একান্তাহিতানীতি সম্বধ্যতে, তুশব্দশ্চার্থঃ; তেন স্বভাবসংযোগানুষক্তৈর্দেশাদিভিরপ্যেকান্তাহিতানি ভবন্তি| হিতাহিতানি দর্শযন্নাহ- হিতাহিতানি ত্বিত্যাদি| অস্যার্থঃ প্রাগেবাত্রৈবাধ্যাযে ব্যাখ্যাতঃ||৪||
Adhikarana 4 (5) · Śloka 5
অতঃ সর্বপ্রাণিনামযমাহারার্থং বর্গ উপদিশ্যতে; তদ্যথা- রক্তশালিষষ্টিককঙ্গুক্রমুকুন্দকপাণ্ডুকপীতকপ্রমোদককালকাসনকপুষ্পককর্দমকশকুনাহৃতসুগন্ধককলম- নীবারকোদ্রবোদ্দালকশ্যামাকগোধূমযববৈণবৈণহরিণকুরঙ্গমৃগমাতৃকাশ্বদংষ্ট্রাকরালক্রকরকপোতলাবতিত্তিরিকপিঞ্জলবর্তীরবর্তিকা মুদ্গবনমুদ্গমকুষ্ঠকলাযমসূরমঙ্গল্যচণকহরেণ্বাঢকীসতীনাশ্চিল্লিবাস্তুকসুনিষণ্ণকজীবন্তীতণ্ডুলীযকমণ্ডূকপর্ণ্যঃ, গব্যং ঘৃতং, সৈন্ধবং, দাডিমামলকমিত্যেষ বর্গঃ সর্বপ্রাণিনাং সামান্যতঃ পথ্যতমঃ ||৫||
अतः सर्वप्राणिनामयमाहारार्थं वर्ग उपदिश्यते; तद्यथा- रक्तशालिषष्टिककङ्गुक्रमुकुन्दकपाण्डुकपीतकप्रमोदककालकासनकपुष्पककर्दमकशकुनाहृतसुगन्धककलम- नीवारकोद्रवोद्दालकश्यामाकगोधूमयववैणवैणहरिणकुरङ्गमृगमातृकाश्वदंष्ट्राकरालक्रकरकपोतलावतित्तिरिकपिञ्जलवर्तीरवर्तिका मुद्गवनमुद्गमकुष्ठकलायमसूरमङ्गल्यचणकहरेण्वाढकीसतीनाश्चिल्लिवास्तुकसुनिषण्णकजीवन्तीतण्डुलीयकमण्डूकपर्ण्यः, गव्यं घृतं, सैन्धवं, दाडिमामलकमित्येष वर्गः सर्वप्राणिनां सामान्यतः पथ्यतमः ||५||
🔊 Audio coming soon
অত ইত্যাদি| রক্তশালিঃ স্বনাম্না প্রসিদ্ধঃ| ষষ্টিকো গৌরষষ্টিকঃ| কঙ্গুকো গৌরকৃষ্ণষষ্টিকঃ| মুকুন্দকঃ কৃষ্ণষষ্টিকঃ| পাণ্ডুকঃ পাণ্ডুকশালিঃ, স চ পাণ্ডুতুষযুক্তঃ| সুগন্ধকো দেবশালিঃ| কলমঃ শালিবিশেষঃ, ‘কলাবিঃ’ ইতি লোকে প্রসিদ্ধঃ| এতে ষষ্টিকাদযঃ শূকধান্যেষু| নীবারঃ প্রসাদি(তি)কাধান্যমধ্যে রক্তশূকো ভবতি, ‘তুলজীধান্যম্’ ইতি লোকে প্রসিদ্ধঃ| উদ্দালক আরণ্যকোদ্রবঃ| বৈণবো বেণুযবঃ| নীবারাদযস্তু কুধান্যেষু| এণঃ কৃষ্ণমৃগঃ| হরিণস্তাম্রবর্ণো মৃগঃ| কুরঙ্গঃ ‘চতুরঙ্গ’ ইতি লোকে প্রসিদ্ধঃ| মৃগমাতৃকা স্বল্পা পৃথূদরা চতুরঙ্গস্ত্রী| শ্বদংষ্ট্রা চতুর্দংষ্ট্রোঽতিদুষ্টঃ, ‘কর্কটক’ ইতি লোকে| করালঃ কস্তূরীমৃগঃ| তিত্তিরিঃ কৃষ্ণতিত্তিরিঃ| কপিঞ্জলো গৌরতিত্তিরিঃ| বর্তীরঃ ‘ঘর্ঘর’ ইতি লোকে; বর্তিকা তদ্ভেদঃ| এণাদযো জাঙ্গলমৃগমাংসেষু| লাবাদযো জাঙ্গলপক্ষিষু| মঙ্গল্যাঃ পাণ্ডুবর্ণা মসূরাঃ| হরেণুঃ সতীনভেদো বর্তুলকলাযঃ| আঢকী তুবরী| সতীনো বর্তুলকঃ| মুদ্গাদযো বৈদলসূপ্যেষু| চিল্লী ক্ষেত্রবাস্তুকঃ| বাস্তুকঃ টঙ্কবাস্তুকঃ| সুনিষণ্ণকঃ শিরিবালিকা, চতুষ্পর্ণীত্যপরে| জীবন্তী ডোডিকা| মণ্ডূকপর্ণী ব্রাহ্মী| চিল্লীপ্রভৃতীনি শাকেষু| গব্যং ঘৃতং স্নেহেষু| সৈন্ধবং লবণেষু| আমলকদাডিমৌ ফলেষু| ননু, নীবারকোদ্রবোদ্দালকাদীনাং বাতকরত্বাদ্বাতাহিতত্বং স্যাত্, তত্ কথং হিতানীত্যুচ্যন্তে? নৈবম্; অল্পবাতকরত্বাদদোষকরত্বব্যপদেশ ইতি||৫||
Adhikarana 5 (6) · Śloka 6
তথা ব্রহ্মচর্যনিবাতশযনোষ্ণোদকস্নাননিশাস্বপ্নব্যাযামাশ্চৈকান্ততঃ পথ্যতমাঃ ||৬||
तथा ब्रह्मचर्यनिवातशयनोष्णोदकस्नाननिशास्वप्नव्यायामाश्चैकान्ततः पथ्यतमाः ||६||
🔊 Audio coming soon
আহারমৈকান্তিকং নির্দিশ্য বিহারং নির্দিশন্নাহ- তথেত্যাদি| ব্রহ্মচর্যং স্ত্রীসেবানিবৃত্তিঃ| ব্যাযামঃ স্বস্থস্য মাত্রযা কালে চ পথ্যতমঃ| ব্যাযামাশ্চেতি চকারাদ্বেগাবিধারণাদীনাং গ্রহণম্||৬||
Adhikarana 6 (7) · Śloka 7
একান্তহিতান্যেকান্তাহিতানি তু প্রাগুপদিষ্টানি, হিতাহিতানি তু যদ্বাযোঃ পথ্যং তত্ পিত্তস্যাপথ্যমিতি ||৭||
एकान्तहितान्येकान्ताहितानि तु प्रागुपदिष्टानि, हिताहितानि तु यद्वायोः पथ्यं तत् पित्तस्यापथ्यमिति ||७||
🔊 Audio coming soon
একান্তেত্যাদি|- একান্তহিতানি সলিলাদীনি| একান্তাহিতানি অগ্ন্যাদীনি; এতানি পূর্বং কথিতানি| হিতাহিতানি ত্বিতি তুশব্দশ্চার্থে, তেন হিতাহিতানি চ প্রাগুপদিষ্টানি| কানি পুনস্তানি হিতাহিতানি প্রাগুপদিষ্টানীত্যাহ- যদ্বাযোঃ পথ্যং তত্ পিত্তস্যাপথ্যমিতি||৭||
Adhikarana 7 (8) · Śloka 8
সংযোগতস্ত্বপরাণি বিষতুল্যানি ভবন্তি | তদ্যথা- বল্লীফলকবককরীরাম্লফললবণকুলত্থপিণ্যাকদধিতৈলবিরোহিপিষ্টশুষ্কশাকাজাবিকমাংসমদ্যজাম্ববচিলিচিমমত্স্যগোধাবরাহাংশ্চ নৈকধ্যমশ্নীযাত্ পযসা ||৮||
संयोगतस्त्वपराणि विषतुल्यानि भवन्ति | तद्यथा- वल्लीफलकवककरीराम्लफललवणकुलत्थपिण्याकदधितैलविरोहिपिष्टशुष्कशाकाजाविकमांसमद्यजाम्बवचिलिचिममत्स्यगोधावराहांश्च नैकध्यमश्नीयात् पयसा ||८||
🔊 Audio coming soon
সংযোগতস্ত্বিত্যাদি| বিষতুল্যানীতি বিষতুল্যত্বেনৈকান্তাহিতত্বমুক্তম্| কুতঃ? স্বস্থে বিষস্যেকান্তাহিতত্বাত্| তান্যেব দর্শযন্নাহ- তদ্যথেত্যাদি| বল্লীফলং কূষ্মাণ্ডাদিবল্লীজম্, অন্যে শিম্ব্যাদিমাহুঃ; কবকং ছত্রকং, ‘ছত্রকভেদং সুখণ্ডকসঞ্জ্ঞম্’ ইত্যন্যে; করীরো বংশাঙ্কুর; অম্লফলানি আম্রাতকাদীনি; বিরোহি বিগতরোহং চণকাদিকমঙ্কুরিতং চ; পিষ্টং তণ্ডুলপিষ্টং; জাম্ববং জম্বূফলং; চিলিচিমমত্স্যঃ শকলী লোহিতাক্ষঃ সর্বতো লোহিতরাজিঃ প্রাযো ভূমৌ চরতি স্থলমীনসঞ্জ্ঞকঃ | নৈকধ্যং নৈকস্মিন্ কালে| এতানি বল্লীফলাদীনি বরাহান্তানি সমস্তব্যস্তান্যপি পযসা সহ নাশ্নীযাত্| কেচিদেতস্য বর্গস্যান্তে ‘অজাঙ্গলং মাংসং স্বস্থানামন্যত্র রোগোপসৃষ্টেভ্যঃ’ ইতি পঠন্তি, ব্যাখ্যানযন্তি চ- অজাঙ্গলং মাংসং জলেশযানূপাদিভেদেন পঞ্চপ্রকারম্||৮||
Adhikarana 8 (9) · Śloka 9
রোগং সাত্ম্যং চ দেশং চ কালং দেহং চ বুদ্ধিমান্ | অবেক্ষ্যাগ্ন্যাদিকান্ ভাবান্ রোগবৃত্তেঃ প্রযোজযেত্ ||৯||
रोगं सात्म्यं च देशं च कालं देहं च बुद्धिमान् | अवेक्ष्याग्न्यादिकान् भावान् रोगवृत्तेः प्रयोजयेत् ||९||
🔊 Audio coming soon
বিরুদ্ধস্যাপি ক্বচিত্ প্রযোগং দর্শযন্নাহ- রোগমিত্যাদি| রোগম্ উদরাদিকম্| সাত্ম্যম্ অষ্টবিধং জাত্যাতুরৌষধান্নরসদেশর্তূদকমেদতঃ | দেশমানূপাদিকম্| কালং শীতোষ্ণবর্ষলক্ষণম্| দেহং স্থূলকৃশমধ্যভেদভিন্নম্| অগ্ন্যাদিকান্ ভাবানিতি অগ্ন্যাদিকান্ পদার্থান্| আদিশব্দাত্ প্রকৃতিবযোবলসত্ত্বাদি গৃহ্যতে| রোগবৃত্তেঃ রোগিণ ইত্যর্থঃ| এতেন বুদ্ধিমানূহাপোহবিতর্কানুগতধীযুক্তো বৈদ্যো রোগাদীনবেক্ষ্যৈকান্তাহিতমপি রোগিণঃ প্রযোজযেদিতি| তদ্যথা- উদরিণস্তিলমাত্রবিষভক্ষণং কৃষ্ণসর্পদষ্টেক্ষুকাণ্ডভক্ষণং চেত্যাদিকং বোদ্ধব্যম্||৯||
Adhikarana 9 (10-12) · Śloka 12
অবস্থান্তরবাহুল্যাদ্রোগাদীনাং ব্যবস্থিতম্ | দ্রব্যং নেচ্ছন্তি ভিষজ ইচ্ছন্তি স্বস্থরক্ষণে ||১০|| দ্বযোরন্যতরাদানে বদন্তি বিষদুগ্ধযোঃ | দুগ্ধস্যৈকান্তহিততাং বিষমেকান্ততোঽহিতম্ ||১১|| এবং যুক্তরসেষ্বেষু দ্রব্যেষু সলিলাদিষু | একান্তহিততাং বিদ্ধি বত্স সুশ্রুত নান্যথা ||১২||
अवस्थान्तरबाहुल्याद्रोगादीनां व्यवस्थितम् | द्रव्यं नेच्छन्ति भिषज इच्छन्ति स्वस्थरक्षणे ||१०|| द्वयोरन्यतरादाने वदन्ति विषदुग्धयोः | दुग्धस्यैकान्तहिततां विषमेकान्ततोऽहितम् ||११|| एवं युक्तरसेष्वेषु द्रव्येषु सलिलादिषु | एकान्तहिततां विद्धि वत्स सुश्रुत नान्यथा ||१२||
🔊 Audio coming soon
তস্মাদ্ধিতাহিতত্বেন ব্যবস্থিতং দ্রব্যং নাস্তীত্যাহ- অবস্থান্তরবাহুল্যাদিত্যাদি| অবস্থান্তরবাহুল্যাত্ অবস্থাবিশেষাণাং প্রাচুর্যাত্| কেষামবস্থাবিশেষা ইত্যাহ- রোগাদীনাম্| আদিশব্দাত্ সাত্ম্যদেশাদীনাং গ্রহণম্| ব্যবস্থিতং দ্রব্যং নেচ্ছন্তীতি হিতমেবেদমহিতমেবেদমিতি বৈদ্যা নেচ্ছন্তি, অবস্থাবিশেষবাহুল্যাত্| কিং সর্বত্রৈব ব্যবস্থিতং দ্রব্যং নেচ্ছন্তীত্যাহ- ইচ্ছন্তি স্বস্থরক্ষণ ইতি|- স্বস্থরক্ষণে পুনর্ব্যবস্থিতং দ্রব্যং বৈদ্যা ইচ্ছন্ত্যেবেতি| অমুমেবার্থং দর্শযন্নাহ- দ্বযোরিত্যাদি| দ্বযোঃ স্বস্থরোগিণোঃ| অন্যতরাদান ইতি সামান্যোক্তাবপি স্বস্থস্যৈব গ্রহণম্| তেন বিষদুগ্ধযোর্মধ্যে স্বস্থে দুগ্ধস্যৈকান্তহিততাং ভিষজো বদন্তি, বিষং পুনরেকান্ততোঽহিতমিতি বদন্তি| এবং যুক্তরসেষ্বেষ্বিতি এবমনেন স্বস্থোপযোগপ্রকারেণ| বিদ্ধি জানীহি| নান্যথেতি নাস্বস্থোপযোগপ্রকারেণ||১০-১২||
Adhikarana 10 (13) · Śloka 13
অতোঽন্যান্যপি সংযোগাদহিতানি বক্ষ্যামঃ- নববিরূঢধান্যৈর্বসামধুপযোগুডমাষৈর্বা গ্রাম্যানূপৌদকপিশিতাদীনি নাভ্যবহরেত্; ন পযোমধুভ্যাং রোহিণীশাকং জাতুকশাকং বাঽশ্নীযাত্, বলাকাং বারুণীকুল্মাষাভ্যাং, কাকমাচীং পিপ্পলীমরিচাভ্যাং; নাডীভঙ্গশাককুক্কুটদধীনি চ নৈকধ্যং; মধু চোষ্ণোদকানুপানং; পিত্তেন চামমাংসানি; সুরাকৃশরাপাযসাংশ্চ নৈকধ্যং; সৌবীরকেণ সহ তিলশষ্কুলীং; মত্স্যৈঃ সহেক্ষুবিকারান্; গুডেন কাকমাচীং, মধুনা মূলকং, গুডেন বারাহং মধুনা চ সহ বিরুদ্ধং; ক্ষীরেণ মূলকম্, আম্রজাম্ববশ্বাবিচ্ছূকরগোধাশ্চ; সর্বাংশ্চ মত্স্যান্ পযসা, বিশেষেণ চিলিচিমং; কদলীফলং তালফলেন পযসা দধ্না তক্রেণ বা; লকুচফলং পযসা দধ্না মাষসূপেন বা, প্রাক্ পযসঃ পযসোঽন্তে বা ||১৩||
अतोऽन्यान्यपि संयोगादहितानि वक्ष्यामः- नवविरूढधान्यैर्वसामधुपयोगुडमाषैर्वा ग्राम्यानूपौदकपिशितादीनि नाभ्यवहरेत्; न पयोमधुभ्यां रोहिणीशाकं जातुकशाकं वाऽश्नीयात्, बलाकां वारुणीकुल्माषाभ्यां, काकमाचीं पिप्पलीमरिचाभ्यां; नाडीभङ्गशाककुक्कुटदधीनि च नैकध्यं; मधु चोष्णोदकानुपानं; पित्तेन चाममांसानि; सुराकृशरापायसांश्च नैकध्यं; सौवीरकेण सह तिलशष्कुलीं; मत्स्यैः सहेक्षुविकारान्; गुडेन काकमाचीं, मधुना मूलकं, गुडेन वाराहं मधुना च सह विरुद्धं; क्षीरेण मूलकम्, आम्रजाम्बवश्वाविच्छूकरगोधाश्च; सर्वांश्च मत्स्यान् पयसा, विशेषेण चिलिचिमं; कदलीफलं तालफलेन पयसा दध्ना तक्रेण वा; लकुचफलं पयसा दध्ना माषसूपेन वा, प्राक् पयसः पयसोऽन्ते वा ||१३||
🔊 Audio coming soon
অতোঽন্যান্যপীত্যাদি| নববিরূঢধান্যৈরিতি নববিরূঢধান্যাদিভিঃ সহ গ্রাম্যাদীনাং মাংসাদীনি নাশ্নীযাদিত্যর্থঃ| নবধান্যাদিভিঃ সমস্তৈর্ব্যস্তৈরপি গ্রাম্যাদীনাং পিশিতাদীনি বিরুদ্ধানীতি| বিরূঢং বিগতাঙ্কুরমঙ্কুরিতং চ| রোহিণীশাকং কটুকাশাকম্| জাতুকশাকং পৌষ্করশাকম্| বলাকাং বারুণীকুল্মাষাভ্যামিতি বলাকা বকভেদঃ; বারুণী মদ্যাপরপর্যাযঃ, কুল্মাষ উত্স্বিন্নমাষাদিঃ; আভ্যাং সহ বলাকাং নাশ্নীযাদিতি যোজ্যম্| কাকমাচীমিত্যাদি পিপ্পলীমরিচাভ্যাং সহ কাকমাচীং নাশ্নীযাদিতি যোজনীযম্| নাডীভঙ্গশাকং নাডীপল্লবশাকং, কুক্কুটস্তাম্রচূডঃ; এতানি দ্বিশস্ত্রিশোঽপি বা নাশ্নীযাত্| মধু চেতি ন হিতমিত্যর্থঃ| পিত্তং কালখণ্ডলগ্নম্| সুরা মদ্যভেদঃ, কৃশরা তিলতণ্ডুলমাষৈঃ কৃতা যবাগূঃ, পাযসং ক্ষীরসিদ্ধাস্তণ্ডুলাঃ অমূন্যপি ত্রিশো দ্বিশো বাঽপি বিরুদ্ধানি| সৌবীরকেণেতি সৌবীরকং কাঞ্জিকবিশেষো বিরেচনাধিকারে বক্ষ্যতে| ইক্ষুবিকারান্ গুডাদীন্| গুডেন কাকমাচীমিত্যাদি| অন্যে ত্বেবং পঠন্তি- ‘গুডেন কাকমাচীং, মধুনা মূলকং, বারাহং ক্ষীরেণ মূলকং চ’ অপরে ত্বেবং পঠন্তি- ‘গুডেন কাকমাচীং, মধুনা মূলকং, বারাহং চ’; চকারাত্ ‘মধুন’ ইতি পদং বারাহেণ কাকমাচ্যা চ সহ সম্বধ্নন্তি| আম্রজাম্ববেত্যাদি ‘নৈকধ্যমশ্নীযাত্’ ইতি বাক্যশেষঃ| শ্বাবিত্ সেহিকা| সর্বাংশ্চ মত্স্যানিত্যাদি, ননু সর্বাংশ্চ মত্স্যান্ পযসা’ ইত্যনেনৈব চিলিচিমমত্স্যবিরোধঃ সিদ্ধঃ তত্ কিমর্থং বল্লীফলাদিষু চিলিচিমত্স্যস্য পযসা বিরোধপাঠ ইত্যাহ- বিশেষেণ চিলিচিমমিতি| কদলীফলমিত্যাদি তালাদিভিঃ সহ কদলীফলং নাশ্নীযাদিত্যর্থঃ| লকুচেত্যাদি দধ্যাদিভিঃ সহ লকুচফলং নাশ্নীযাদিত্যর্থঃ| কেচিদত্র ‘মধুনা ঘৃতেন চ’ ইতি পঠন্তি, লকুচফলং নাশ্নীযাদিতি চ ব্যাখ্যানযন্তি| অযং পাঠো বর্তমানাসু বহুষু প্রতিষু পঠ্যতে, ন তু নিবন্ধেষু, তস্মান্ন পঠনীয ইতি| প্রাক্ পযসঃ পযসোঽন্তে বেতি ‘লকুচফলং নাশ্নীযাত্’ ইতি শেষঃ||১৩||
Adhikarana 11 (14) · Śloka 14
অতঃ কর্মবিরুদ্ধান্ বক্ষ্যামঃ- কপোতান্ সর্ষপতৈলভৃষ্টান্নাদ্যাত্; কপিঞ্জলমযূরলাবতিত্তিরিগোধাশ্চৈরণ্ডদার্ব্যগ্নিসিদ্ধা এরণ্ডতৈলসিদ্ধা বা নাদ্যাত্; কাংস্যভাজনে দশরাত্রপর্যুষিতং সর্পিঃ; মধু চোষ্ণৈরুষ্ণে বা; মত্স্যপরিপচনে শৃঙ্গবেরপরিপচনে বা সিদ্ধাং কাকমাচীং; তিলকল্কসিদ্ধমুপোদিকাশাকং; নারিকেলেন বরাহবসাপরিভৃষ্টাং বলাকাং; ভাসমঙ্গারশূল্যং নাশ্নীযাদিতি ||১৪||
अतः कर्मविरुद्धान् वक्ष्यामः- कपोतान् सर्षपतैलभृष्टान्नाद्यात्; कपिञ्जलमयूरलावतित्तिरिगोधाश्चैरण्डदार्व्यग्निसिद्धा एरण्डतैलसिद्धा वा नाद्यात्; कांस्यभाजने दशरात्रपर्युषितं सर्पिः; मधु चोष्णैरुष्णे वा; मत्स्यपरिपचने शृङ्गवेरपरिपचने वा सिद्धां काकमाचीं; तिलकल्कसिद्धमुपोदिकाशाकं; नारिकेलेन वराहवसापरिभृष्टां बलाकां; भासमङ्गारशूल्यं नाश्नीयादिति ||१४||
🔊 Audio coming soon
সংযোগবিরুদ্ধানভিধায কর্মবিরুদ্ধান্ বক্তুমাহ- অত ইত্যাদি| কর্মশব্দেনাত্র সংস্কারোঽভিপ্রেতঃ| এরণ্ডদার্ব্যগ্নিসিদ্ধা ইতি এরণ্ডদারুহরিদ্রাগ্নিসিদ্ধাঃ; ‘এরণ্ডদার্বগ্নিসিদ্ধা’ ইত্যন্যে পঠন্তি, ‘এরণ্ডকাষ্ঠবহ্নিনা সিদ্ধাঃ’ ইতি চ ব্যাখ্যানযন্তি| নাদ্যাত্ ন খাদেত্| দশরাত্রপর্যুষিতমিতি দশনিশাদিনানি নিবাসিতম্| মধু চোষ্ণৈরিতি উষ্ণৈরুষ্ণস্পর্শদ্রব্যৈঃ, উষ্ণস্পর্শত্বং চাগ্ন্যাদিজনিতং জ্ঞেযম্| উষ্ণে উষ্ণকালে গ্রীষ্মে শরদি চেত্যর্থঃ| মত্স্যপরিপচন ইতি পরিপচনং পাত্রমুচ্যতে| নারিকেলেনেত্যাদি বরাহবসাপরিভৃষ্টাং বলাকাং নারিকেলেণ সহ নাশ্নীযাদিত্যর্থঃ| ভাসমিতি ভাসো গৃধ্রবিশেষঃ স্বল্পতুণ্ডো ধূসরবর্ণঃ| যচ্ছূলেন বিদ্ধ্বা অঙ্গারেষু পক্বং তদঙ্গারশূল্যম্||১৪||
Adhikarana 12 (15) · Śloka 15
অতো মানবিরুদ্ধান্ বক্ষ্যামঃ- মধ্বম্বুনী মধুসর্পিষী মানতস্তুল্যে নাশ্নীযাত্; স্নেহৌ মধুস্নেহৌ জলস্নেহৌ বা বিশেষাদান্তরীক্ষোদকানুপানৌ ||১৫||
अतो मानविरुद्धान् वक्ष्यामः- मध्वम्बुनी मधुसर्पिषी मानतस्तुल्ये नाश्नीयात्; स्नेहौ मधुस्नेहौ जलस्नेहौ वा विशेषादान्तरीक्षोदकानुपानौ ||१५||
🔊 Audio coming soon
জলস্নেহাবিত্যাদি আন্তরীক্ষোদকানুপানৌ বিশেষতো মধুস্নেহৌ জলস্নেহৌ বা নাশ্নীযাত্| তদেবং স্বভাবাপথ্যসংযোগকালসংস্কারমানৈঃ পঞ্চপ্রকারাণি বিরুদ্ধানি নির্দিষ্টানি||১৫||
Adhikarana 13 (16) · Śloka 16
অত ঊর্ধ্বং রসদ্বন্দ্বানি রসতো বীর্যতো বিপাকতশ্চ বিরুদ্ধানি বক্ষ্যামঃ- তত্র মধুরাম্লৌ রসবীর্যবিরুদ্ধৌ, মধুরলবণৌ চ, মধুরকটুকৌ চ সর্বতঃ, মধুরতিক্তৌ রসবিপাকাভ্যাং, মধুরকষাযৌ চ, অম্ললবণৌ রসতঃ, অম্লকটুকৌ রসবিপাকাভ্যাম্, অম্লতিক্তাবম্লকষাযৌ চ সর্বতঃ, লবণকটুকৌ রসবিপাকাভ্যাং, লবণতিক্তৌ লবণকষাযৌ চ সর্বতঃ, কটুতিক্তৌ রসবীর্যাভ্যাং কটুকষাযৌ চ, তিক্তকষাযৌ রসতঃ ||১৬||
अत ऊर्ध्वं रसद्वन्द्वानि रसतो वीर्यतो विपाकतश्च विरुद्धानि वक्ष्यामः- तत्र मधुराम्लौ रसवीर्यविरुद्धौ, मधुरलवणौ च, मधुरकटुकौ च सर्वतः, मधुरतिक्तौ रसविपाकाभ्यां, मधुरकषायौ च, अम्ललवणौ रसतः, अम्लकटुकौ रसविपाकाभ्याम्, अम्लतिक्तावम्लकषायौ च सर्वतः, लवणकटुकौ रसविपाकाभ्यां, लवणतिक्तौ लवणकषायौ च सर्वतः, कटुतिक्तौ रसवीर्याभ्यां कटुकषायौ च, तिक्तकषायौ रसतः ||१६||
🔊 Audio coming soon
অত ঊর্ধ্বমিত্যাদি| মধুরলবণৌ চেতি চকারেণ রসবীর্যবিরুদ্ধাবিতি সমুচ্চীযতে| সর্বত ইতি রসবীর্যবিপাকতঃ; এবং সর্বত্র রসদ্বন্দ্বপ্রকরণে সর্বতঃশব্দো ব্যাখ্যাতব্যঃ| মধুরকষাযৌ চেতি চকারেণ ইমাবপি রসবিপাকাভ্যাং বিরুদ্ধাবিতি সমুচ্চীযতে| কটুকষাযৌ চেতি চকারাদেতাবপি রসবীর্যাভ্যাং বিরুদ্ধাবিতি| মধুরাম্লাবিত্যাদিপাঠেন দধিশর্করাদিদ্বন্দ্বেষূপযোগার্হেষু ন বিরোধঃ, অন্যেষু চানূপযোগার্হেষু বিরোধ ইতি সূচিতম্| শ্রীগযদাসাদয আচার্যা অমুং পাঠমনার্ষং বর্ণযন্তি; কস্মাত্? ‘আদৌ মধুরমশ্র্নীযাত্’ (সূ. অ.৪৬) ইত্যাদিনা সর্বরসাভ্যবহারস্য স্বস্থানামুক্তত্বাত্, ‘ন চৈকরসসেবাযাং’ ইত্যাদিনা চৈকরসসেবাযা নিষিদ্ধত্বাত্; তস্মান্ন পঠনীয এবাযং গ্রন্থ ইতি| শ্রীব্রহ্মদেবস্ত্বার্ষানার্ষচিন্তামকুর্বন্নমুং গ্রন্থং পঠতি ব্যাখ্যানযতি চ| তত্পঠিতব্যাখ্যাত্বাত্ সর্বমতদর্শিভিরস্মাভিরপি লিখিতঃ ক্বচিদ্ব্যাখ্যাতশ্চেতি||১৬||
Adhikarana 14 (17) · Śloka 17
তরতমযোগযুক্তাংশ্চ ভাবানতিস্নিগ্ধানতিরূক্ষানত্যুষ্ণানতিশীতানিত্যেবমাদীন্ বিবর্জযেত্ ||১৭||
तरतमयोगयुक्तांश्च भावानतिस्निग्धानतिरूक्षानत्युष्णानतिशीतानित्येवमादीन् विवर्जयेत् ||१७||
🔊 Audio coming soon
অতিশযগুণযোগযুক্তা মাহিষক্ষীরাদিপদার্থা হিতা অপি স্বস্থানামেকান্তাহিতা ভবন্তীতি দর্শযন্নাহ- তরতমেত্যাদি| তরতমযোগযুক্তাংশ্চ ভাবানিতি অতিশযস্নেহাদিগুণসহিতানি দ্রব্যাণীত্যর্থঃ| তানেবাতিশযগুণযুক্তান্ বিবৃণ্বন্নাহ- অতিস্নিগ্ধানিত্যাদি| তস্মান্মাহিষং দুগ্ধং গব্যাদতিশযস্নিগ্ধং স্বস্থস্য সমাগ্নের্বর্জ্যম্, অস্বস্থস্য চ তীক্ষ্ণাগ্নেঃ সেব্যমিত্যাদি দ্রষ্টব্যম্| যুক্তাংশ্চেতি চকারোঽতিশযগুণযুক্তানামপি পথ্যতমাযুষ্যতমবৃষ্যতমানাং সেবনং সমুচ্চিনোতি, এষামেকান্তহিতত্বাত্; এভ্যোঽন্যেঽতিশযগুণযুক্তাঃ স্বাভাবাদেবৈকান্তাহিতা ইতি| এবমাদীনিত্যাদিশব্দাদন্যেঽপি বীর্যসঞ্জ্ঞকা গুণাঃ পিচ্ছিলবিশদতীক্ষ্ণমৃদবো গৃহ্যন্তে, তথা গুরুলঘুবীর্যং চ| অন্যে তু ‘আদিশব্দাদুক্তেভ্যোঽন্যেঽপি সর্বে গুণা গৃহ্যন্তে’ ইতি বদন্তি||১৭||
Adhikarana 15 (18) · Śloka 18
ভবন্তি চাত্র- বিরুদ্ধান্যেবমাদীনি বীর্যতো যানি কানিচিত্ | তান্যেকান্তাহিতান্যেব শেষং বিদ্যাদ্ধিতাহিতম্ ||১৮||
भवन्ति चात्र- विरुद्धान्येवमादीनि वीर्यतो यानि कानिचित् | तान्येकान्ताहितान्येव शेषं विद्याद्धिताहितम् ||१८||
🔊 Audio coming soon
অমুমেবার্থং সুখবোধার্থং সঙ্গৃহ্যাহ- বিরুদ্ধানীত্যাদি| বীর্যত ইতি বীর্যশব্দেনাত্র স্নিগ্ধাদযোঽষ্টৌ গুণা উচ্যন্তে; অথবা বিংশতিগুণাঃ ষড্রসা অপ্যুচ্যন্তে, ‘যেন কুর্বন্তি তদ্বীর্যম্’ (সূ. অ.৪১) ইতি বচনাত্| এবমাদীনীত্যুক্তে যানি কানিচিদিতি যত্ কৃতং তত্তন্ত্রান্তরোক্তাশেষবিরুদ্ধোপগ্রহার্থম্| অন্যে ত্বাদিশব্দাত্তন্ত্রান্তরোক্তানি দেশকালমাত্রাদিবিরুদ্ধানি লভ্যন্ত ইতি মন্যন্তে| শেষম্ অতোঽন্যন্মাষাদি হিতাহিতং জানীযাত্, কস্যচিদ্দোষস্য প্রকোপত্বাত্ কস্যচিদ্দোষস্য হরত্বাদিতি||১৮||
Adhikarana 16 (19) · Śloka 19
ব্যাধিমিন্দ্রিযদৌর্বল্যং মরণং চাধিগচ্ছতি | বিরুদ্ধরসবীর্যাণি ভুঞ্জানোঽনাত্মবান্নরঃ ||১৯||
व्याधिमिन्द्रियदौर्बल्यं मरणं चाधिगच्छति | विरुद्धरसवीर्याणि भुञ्जानोऽनात्मवान्नरः ||१९||
🔊 Audio coming soon
কিং পুনর্বিরুদ্ধং ভুক্তং করোতীত্যাহ- ব্যাধিমিত্যাদি| ব্যাধিমিতি ষাণ্ড্যান্ধ্যবিসর্পদকোদরবিস্ফোটকোন্মাদভগন্দরাদিকম , ইন্দ্রিযদৌর্বল্যম্ ইন্দ্রিযাধিষ্ঠানদৌর্বল্যমিন্দ্রিযশক্তিদৌর্বল্যং বা, অধিগচ্ছতি প্রাপ্নোতি| বিরুদ্ধরসবীর্যাণি ভুঞ্জান ইতি রসগ্রহণং দ্রব্যবীর্যপরিহারার্থং, তেনোষ্ণস্যাপি দুগ্ধস্য প্রযোগো ভবতি; ক্ষীরদ্রব্যস্য হ্যুষ্ণত্বং তদ্গতমধুররসশৈত্যেন বিরোধিনাঽপি ন দুষ্যতি, এবমুষ্ণপানীযস্যাপীতি| অনাত্মবান্ অবুদ্ধিমান্| অন্যে ‘রসবীর্যাদীন্’ ইতি পঠন্তি| তেষাং মতে বিপাকযোরপি গুরুলঘুসঞ্জ্ঞযোর্বিরোধো বর্জনীয ইতি| পূর্বপ্রতিপাদিতাধ্যাযার্থপিণ্ডদর্শনপরঃ শ্লোকোঽযং; তেনাস্মিন্নধ্যায এব যানি বিরুদ্ধানি দ্রব্যাণ্যুক্তানি তেষ্বেব রসবীর্যবিরোধো জ্ঞেযো, ন পুনরিহানুক্তানি যানি তেষ্বিতি||১৯||
Adhikarana 17 (20) · Śloka 20
যত্কিঞ্চিদ্দোষমুত্ক্লেশ্য ভুক্তং কাযান্ন নির্হরেত্ | রসাদিষ্বযথার্থং বা তদ্বিকারায কল্পতে ||২০||
यत्किञ्चिद्दोषमुत्क्लेश्य भुक्तं कायान्न निर्हरेत् | रसादिष्वयथार्थं वा तद्विकाराय कल्पते ||२०||
🔊 Audio coming soon
ন কেবলং বিরুদ্ধভোজনমেব ব্যাধিহেতুঃ, অপি তু হিতাহিতাদীন্যপীতি দর্শযন্নাহ- যদিত্যাদি| যত্কিঞ্চিদিত্যনেন অশেষমেবাহিতং সঙ্গৃহীতম্| দোষং বাতাদিকম্| উত্ক্লেশ্য প্রকোপ্য| ন নির্হরেদিতি মদনফলত্রিবৃতাদিবদূর্ধ্বমধো বা নাকর্ষেত্, তদ্বিকারায কল্পত ইতি সম্বন্ধনীযম্; কল্পতে সম্পদ্যতে| ন কেবলং দোষকরমেব ব্যাধযে ভবতি, অপি তু রসাদিধাতুদুষ্টিকরমপি ব্যাধযে ভবতীত্যাহ- রসাদিষ্বিত্যাদি| রসাদিষ্বযথার্থং বেতি রসাদিধাতুষ্বযথার্থং প্রযোজনবিরুদ্ধং রসাদীনাং জীবনাদিপ্রযোজনবিরোধি রসাদিধাতুদূষণকরমিত্যর্থঃ| দোষদুষ্টিকারিত্বেন ধাতুদূষণকরত্বং ন লভ্যতে, বিশিষ্টশক্তিত্বাদ্দ্রব্যাণাং; তথাহি- কানিচিদ্দোষদুষ্টিকরাণি, কানিচিদ্ধাতুদুষ্টিকরাণীতি; তানি চাত্র ন কথযিষ্যামো বিস্তরভযাত্| অন্যে তু ব্যাখ্যানযন্তি- রসাদিষ্বিতি আদিশব্দাদ্বীর্যবিপাকযোর্গ্রহণং; তেন রসবীর্যবিপাকেষু যদ্ভুক্তং সদযথার্থমনর্থকরং বা ভবতি, তদ্বিকারস্য কল্পতে| জৈজ্ঝটাচার্যস্ত্বমুং শ্লোকমনার্ষং কথযতি, গযদাসাচার্যেণ চাযমঙ্গীকৃতঃ, অতোঽস্মাভিরপি লিখিতো ব্যাখ্যাতশ্চ||২০||
Adhikarana 18 (21) · Śloka 21
বিরুদ্ধাশনজান্ রোগান্ প্রতিহন্তি বিরেচনম্ | বমনং শমনং বাঽপি পূর্বং বা হিতসেবনম্ ||২১||
विरुद्धाशनजान् रोगान् प्रतिहन्ति विरेचनम् | वमनं शमनं वाऽपि पूर्वं वा हितसेवनम् ||२१||
🔊 Audio coming soon
বিরুদ্ধাশনাদুত্পন্নানাং রোগাণাং চিকিত্সাসূত্রমুদ্দিশন্নাহ- বিরুদ্ধাশনজানিত্যাদি| প্রতিহন্তি বিরেচনমিতি বিরুদ্ধাশনজব্যাধিপ্রত্যনীকং বিরেচনং প্রতিশব্দেন দ্যোত্যতে; তেন কুষ্ঠব্যাধিপ্রত্যনীকং বিরেচনং বিরুদ্ধাশনজং কুষ্ঠং হন্তি, এবমন্যত্রাপি যোজনীযম্| বমনং শমনং বাঽপীতি তত্র বিরেকবমনে বহুদোষাণাং প্রাণবতাং চ, ইতরেষাং তু শমনমিতি| শমনলক্ষণমুচ্যতে- “ন শোধযতি যদ্দোষান্ সমান্নোদীরযত্যপি| সমীকরোতি ক্রুদ্ধাংশ্চ তত্ সংশমনমুচ্যতে”- ইতি| পূর্বং বা হিতসেবনমিতি সুবর্ণলোহাদিবিরোধিরোগহরং পূর্বমেব সেবেত| তদুক্তং “ন সজ্জতে হেমপাঙ্গে বিষং পদ্মদলেঽম্বুবত্” (চ. চি. অ. ২৩)| ‘পূর্বং বা হিতভোজনম্’ ইত্যন্যে পঠন্তি||২১||
Adhikarana 19 (22) · Śloka 22
সাত্ম্যতোঽল্পতযা বাঽপি দীপ্তাগ্নেস্তরুণস্য চ | স্নিগ্ধব্যাযামবলিনাং বিরুদ্ধং বিতথং ভবেত্ ||২২||
सात्म्यतोऽल्पतया वाऽपि दीप्ताग्नेस्तरुणस्य च | स्निग्धव्यायामबलिनां विरुद्धं वितथं भवेत् ||२२||
🔊 Audio coming soon
বিরুদ্ধাশনং কুর্বতোঽপি কস্যচিত্ কুতো বিরুদ্ধাশনজা দোষা ন ভবন্তীত্যাহ- সাত্ম্যত ইত্যাদি| সাত্ম্যাদিভির্হেতুভির্বিরুদ্ধং বিতথং নিষ্ফলং ভবতীতি পিণ্ডার্থঃ| স্নিগ্ধব্যাযামবলিনামিতি স্নিগ্ধব্যাযামাভ্যাং বলিনামিতি সম্বধ্যতে| তেনাযমর্থঃ- স্নিগ্ধদ্রব্যাভ্যবহারবলিনাং বলবদগ্নিত্বাদ্বিরুদ্ধং নিষ্ফলং ভবতি| কেচিত্ ‘বলিনাম্’ ইতি পদং ভিন্নং মন্যন্তে| তেনাযমর্থঃ- স্নিগ্ধানাং ব্যাযামিনাং বলিনাং চ বিরুদ্ধং বিতথং ভবেদিতি| সাত্ম্যতোঽল্পতযেত্যাদিশ্লোকস্যাগ্রে কেচিদমুং শ্লোকং পঠন্তি- “ব্যাযামশীলো বলবান্ শিশুশ্চ স্নিগ্ধোঽগ্নিমাংশ্চাপি মহাশনশ্চ| আপ্নোতি রোগান্ন বিরুদ্ধজাতানভ্যাসতো বাঽল্পতযা চ জন্তুঃ” ইতি; অযং চ ন পঠনীযঃ, সর্বনিবন্ধকারৈরপঠিতত্বাত্||২২||
Adhikarana 20 (23-29) · Śloka 29
অথ বাতগুণান্ বক্ষ্যামঃ- পূর্বঃ সমধুরঃ স্নিগ্ধো লবণশ্চৈব মারুতঃ | গুরুর্বিদাহজননো রক্তপিত্তাভিবর্ধনঃ ||২৩|| ক্ষতানাং বিষজুষ্টানাং ব্রণিনঃ শ্লেষ্মলাশ্চ যে | তেষামেব বিশেষেণ সদা রোগবিবর্ধনঃ ||২৪|| বাতলানাং প্রশস্তশ্চ শ্রান্তানাং কফশোষিণাম্ | মধুরশ্চাবিদাহী চ কষাযানুরসো লঘুঃ | দক্ষিণো মারুতঃ শ্রেষ্ঠশ্চক্ষুষ্যো বলবর্ধনঃ ||২৫|| রক্তপিত্তপ্রশমনো ন চ বাতপ্রকোপণঃ | বিশদো রূক্ষপরুষঃ খরঃ স্নেহবলাপহঃ ||২৬|| পশ্চিমো মারুতস্তীক্ষ্ণঃ কফমেদোবিশোষণঃ | সদ্যঃ প্রাণক্ষযকরঃ শোষণস্তু শরীরিণাম্ ||২৭|| উত্তরো মারুতঃ স্নিগ্ধো মৃদুর্মধুর এব চ | কষাযানুরসঃ শীতো দোষাণাং চাপ্রকোপণঃ ||২৮|| তস্মাচ্চ প্রকৃতিস্থানাং ক্লেদনো বলবর্ধনঃ | ক্ষীণক্ষযবিষার্তানাং বিশেষেণ তু পূজিতঃ ||২৯||
अथ वातगुणान् वक्ष्यामः- पूर्वः समधुरः स्निग्धो लवणश्चैव मारुतः | गुरुर्विदाहजननो रक्तपित्ताभिवर्धनः ||२३|| क्षतानां विषजुष्टानां व्रणिनः श्लेष्मलाश्च ये | तेषामेव विशेषेण सदा रोगविवर्धनः ||२४|| वातलानां प्रशस्तश्च श्रान्तानां कफशोषिणाम् | मधुरश्चाविदाही च कषायानुरसो लघुः | दक्षिणो मारुतः श्रेष्ठश्चक्षुष्यो बलवर्धनः ||२५|| रक्तपित्तप्रशमनो न च वातप्रकोपणः | विशदो रूक्षपरुषः खरः स्नेहबलापहः ||२६|| पश्चिमो मारुतस्तीक्ष्णः कफमेदोविशोषणः | सद्यः प्राणक्षयकरः शोषणस्तु शरीरिणाम् ||२७|| उत्तरो मारुतः स्निग्धो मृदुर्मधुर एव च | कषायानुरसः शीतो दोषाणां चाप्रकोपणः ||२८|| तस्माच्च प्रकृतिस्थानां क्लेदनो बलवर्धनः | क्षीणक्षयविषार्तानां विशेषेण तु पूजितः ||२९||
🔊 Audio coming soon
হিতস্যাপি বাতস্য দিক্সংযোগাদহিতত্বং স্যাদিতি বাতগুণান্ নির্দিশন্নাহ- অথ বাতগুণান্ বক্ষ্যাম ইত্যাদি| “বাতস্য দক্ষিণোত্তরগতস্য দোষহরত্বেন হিতত্বং, পূর্বপশ্চিমবাতস্যাহিতত্বম্, অতো হিতাহিতীযাধ্যাযপরিসমাপ্তৌ বাতস্য গুণোপবর্ণনং নির্দেষ্টুমাহ- অথ বাতগুণানিত্যাদি” ইত্যন্যে| ‘তেষামেব বিশেষেণ ব্রণক্লেদবিবর্ধনঃ’ ইত্যন্যে পঠন্তি| খরঃ প্রচণ্ডবেগঃ| অন্যে ত্বাহারদ্রব্যপ্রকরণাদিতরসংযোগোঽপ্রস্তুত ইত্যমুং বাতগুণোপবর্ণনগ্রন্থং ন পঠন্ত্যেব| গযদাসাচার্যস্ত্বস্মিন্ হিতাহিতীযাধ্যাযপাঠে পূর্বোক্তং পাঠং কিযন্তং পরিত্যজ্যান্যং চ পাঠং কিযন্তং নিক্ষিপ্য পূর্বোক্তপাঠক্রমব্যতিক্রমেণ চ পঠতি| যাবতা পাঠেন ব্যতিক্রমস্তাবন্তং দর্শযন্নাহ- “বল্লীফলকবককরীরাম্লফললবণকুলত্থপিণ্যাকদধিতিলতৈলবিরোধি- শুষ্কশাকাজাবিকমাংসমদ্যজাম্ববচিলিচিমমত্স্যগোধাবরাহাংশ্চ নৈকধ্যমশ্নীযাত্ পযসা, প্রাক্ পযসোঽন্তে বা| কপোতাংশ্চ সর্ষপতৈলভৃষ্টান্নাদ্যাত্| কপিঞ্জলমযূরলাবতিত্তিরিগোধাশ্চৈরণ্ডদার্ব্য(র্ব)গ্নিসিদ্ধা এরণ্ডতৈলসিদ্ধা বা| মধুঘৃতে সমধৃতে| মধু চান্তরীক্ষোদকানুপানম্| কাংস্যভাজনে দশরাত্রপর্যুষিতং সর্পিঃ| মধু চোষ্ণমুষ্ণেন বা| দধি মদ্যং বা| পিত্তেন সহ মাংসানি পক্বানি, আমানি চ কেবলান্যপি| সুরাকৃশরাপাযসাংশ্চ নৈকধ্যমশ্নীযাত্| সৌবীরকেণ সহ তিলশষ্কুলীঃ| তক্রেণ সহ মধুঘৃতমত্স্যগোধাপৃষতমাংসানি | মধুনা গোধাম্| মত্স্যান্ ক্ষৌদ্রাসবেন, পৃষতমাংসং বা তেনৈব| তথা মৈরেযমাধ্বীকাভ্যাং বালোপোদক্যা বা মত্স্যান্| নেক্ষুবিকৃতীঃ সর্বা মত্স্যৈঃ সহ| সর্পির্গুডকাকমাচীমধুমূলকানি নৈকধ্যম্ | মধুনা বারাহং, দধ্না কৌক্কুটং, মদ্যেন বলাকাং, তিলকল্কেন চোপোদিকাং সিদ্ধাম্| ন পিপ্পলীং মত্স্যবসযা, প্রিযঙ্গ্বনুলিপ্তো ন পাযসমশ্নীযাত্ ইতি| অস্যাগ্রে চ ‘তরতমযোগযুক্তাংশ্চ ভাবান্’ ইত্যাদিসূত্রাণি পঠতি, তানি চ পূর্বসূত্রৈরেব সমানানীতি নেহ প্রদর্শিতানি||২৩-২৯||
Adhikarana puShpikA · Śloka 20
ইতি সুশ্রুতসংহিতাযাং সূত্রস্থানে হিতাহিতীযো নাম বিংশোঽধ্যাযঃ ||২০||
इति सुश्रुतसंहितायां सूत्रस्थाने हिताहितीयो नाम विंशोऽध्यायः ||२०||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে বিংশতিতমোঽধ্যাযঃ||২০||