Adhikarana 1 (1-2) · Śloka 2
অথাতঃ কর্ণব্যধবন্ধবিধিমধ্যাযং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
View original
अथातः कर्णव्यधबन्धविधिमध्यायं व्याख्यास्यामः ||१||
यथोवाच भगवान् धन्वन्तरिः ||२||
অত্রাধিকারানুবৃত্তিঃ সম্বন্ধহেতুঃ| কথং? স্বস্থাধিকারঃ; স্বস্থস্য নির্দোষশরীরস্য কর্ণব্যধঃ কর্তব্যঃ| তদুক্তং ভোজে- “কালেষ্বেতেষ্বদোষাণাং বালানাং কর্ণযোর্ব্যধে| সহ গাত্রৈর্বিবর্ধন্তে কর্ণপাল্যশ্চ খানি চ” ইতি| তস্মাদত্র স্বস্থবৃত্তানুবৃত্তিরেব সম্বন্ধকারণম্| পঞ্চৈব হি সম্বন্ধকারণান্যুক্তানি; তদ্যথা- অধিকারানুবৃত্তিঃ, শেষত্বং, তাদর্থ্যং, জাত্যভেদো, নামসঙ্কীর্তনং চেতি| ভবতি চাত্র- “তাদর্থ্যং জাত্যভেদশ্চ শেষত্বং নামকীর্তনম্| অধিকারানুবৃত্তিশ্চ পঞ্চ সম্বন্ধহেতবঃ”- ইতি||১-২||
Adhikarana 2 (3) · Śloka 3
রক্ষাভূষণনিমিত্তং বালস্য কর্ণৌ বিধ্যেতে |
তৌ ষষ্ঠে মাসি সপ্তমে বা শুক্লপক্ষে প্রশস্তেষু তিথিকরণমুহূর্তনক্ষত্রেষু কৃতমঙ্গলস্বস্তিবাচনং ধাত্র্যঙ্কে কুমারধরাঙ্কে বা কুমারমুপবেশ্য বালক্রীডনকৈঃ প্রলোভ্যাভিসান্ত্বযন্ ভিষগ্বামহস্তেনাকৃষ্য কর্ণং দৈবকৃতে ছিদ্র আদিত্যকরাবভাসিতে শনৈঃ শনৈর্দক্ষিণহস্তেনর্জু বিধ্যেত্, প্রতনুকং সূচ্যা, বহলমারযা, পূর্বং দক্ষিণং কুমারস্য, বামং কুমার্যাঃ; ততঃ পিচুবর্তিং প্রবেশযেত্ ||৩||
View original
रक्षाभूषणनिमित्तं बालस्य कर्णौ विध्येते |
तौ षष्ठे मासि सप्तमे वा शुक्लपक्षे प्रशस्तेषु तिथिकरणमुहूर्तनक्षत्रेषु कृतमङ्गलस्वस्तिवाचनं धात्र्यङ्के कुमारधराङ्के वा कुमारमुपवेश्य बालक्रीडनकैः प्रलोभ्याभिसान्त्वयन् भिषग्वामहस्तेनाकृष्य कर्णं दैवकृते छिद्र आदित्यकरावभासिते शनैः शनैर्दक्षिणहस्तेनर्जु विध्येत्, प्रतनुकं सूच्या, बहलमारया, पूर्वं दक्षिणं कुमारस्य, वामं कुमार्याः; ततः पिचुवर्तिं प्रवेशयेत् ||३||
কিন্নিমিত্তং বালস্য কর্ণৌ বিধ্যেদিত্যাহ- রক্ষেত্যাদি| রক্ষাভূষণনিমিত্তমিতি নিমিত্তশব্দো রক্ষাভূষণাভ্যাং সহ প্রত্যেকং সম্বধ্যতে; অন্যে তু রক্ষণার্থং ভূষণানি রক্ষাভূষণানি,তন্নিমিত্তমিত্যর্থঃ| যদ্যপি বিদ্ধকর্ণত্বাদ্ব্রণিনি বালে রক্তমাংসপ্রিযত্বাদ্রক্ষোভযমস্ত্যেব, তথাঽপি ব্রণস্যাল্পকালত্বাদ্দৈবকৃতচ্ছিদ্রত্বাদ্বা রক্ষণার্থং ভবতি| কস্মিন্ কালে কর্ণস্য ব্যধঃ কর্তব্য ইত্যাহ- তৌ ষষ্ঠে মাসি সপ্তমে বা শুক্লপক্ষ ইতি; তাবিতি তৌ কর্ণৌ, ষষ্ঠে মাসে সপ্তমে বেতি নাযং জন্মকালাদূর্ধ্বং কিন্তু সংবত্সরাদের্ভাদ্রপদাদ্যঃ ষষ্ঠো মাসো মাঘঃ সপ্তমঃ ফাল্গুনস্তযোর্মধ্য একস্মিন্নিতি| মঙ্গলং গীতাদি| স্বস্তিবাচনমাশীর্বাদোচ্চারণম্| ধাত্র্যঙ্কে ইতি ধাত্রী কুমারস্য স্তনপাযিনী স্ত্রী তস্যা অঙ্কে, কুমারধরাঙ্কে বেতি বালগ্রাহিপুরুষস্যোত্সঙ্গে| বালক্রীডনকৈরিতি কৃত্রিমহস্ত্যশ্ববলীবর্দশুকাদিভিঃ| অস্যাগ্রে‘ভক্ষ্যবিশেষৈর্বা’ ইতি কেচিত্ পঠন্তি, ভক্ষ্যবিশেষৈর্মোদকাদিভিঃ| দৈবকৃতে ছিদ্র ইতি প্রাক্তনজন্মকর্মকৃতে ইত্যর্থঃ| ঋজু অবক্রম্| কর্ণবিশেষেণ সূচীবিশেষবিষযং নিযমযন্নাহ- প্রতনুকং সূচ্যেতি|- প্রকর্ষেণ তনুং কর্ণং সূচ্যা বিধ্যেদিত্যর্থঃ; বহলমারযেতি স্থূলকর্ণমারযা বিধ্যেদিত্যর্থঃ; আরা চর্মকারাণাং চর্মভেদনং শস্ত্রং, বহলং কঠিনমিতি লক্ষ্মণটিপ্পণকেনোক্তম্| পুরুষস্ত্রীভেদেন প্রাক্কর্ণব্যধনে প্রশস্তত্বেন বিশেষমাহ- পূর্বং দক্ষিণমিত্যাদি| কর্ণে বিদ্ধে সতি কিং কার্যমিত্যাহ- তত ইত্যাদি| বিদ্ধ্বা চ পিচুবর্তিং প্রবেশযেত্||৩||
Adhikarana 3 (4) · Śloka 4
শোণিতবহুত্বেন বেদনযা চান্যদেশবিদ্ধমিতি জানীযাত্, নিরুপদ্রবতযা তদ্দেশবিদ্ধমিতি ||৪||
View original
शोणितबहुत्वेन वेदनया चान्यदेशविद्धमिति जानीयात्, निरुपद्रवतया तद्देशविद्धमिति ||४||
অন্যদেশবিদ্ধস্য বিজ্ঞানোপাযমাহ- শোণিতবহুত্বেনেত্যাদি| দৈবকৃতচ্ছিদ্রবিদ্ধস্য বিজ্ঞানমাহ- নিরুপদ্রবতযেত্যাদি| তদ্দেশবিদ্ধমিতি দৈবকৃতচ্ছিদ্রবিদ্ধং, 'জানীযাত্' ইত্যনুবর্ততে||৪||
Adhikarana 4 (5) · Śloka 5
তত্রাজ্ঞেন যদৃচ্ছযা বিদ্ধাসু সিরাসু কালিকামর্মরিকালোহিতিকাসূপদ্রবা ভবন্তি |
তত্র, কালিকাযাং জ্বরো দাহঃ শ্বযথুর্বেদনা চ ভবতি; মর্মরিকাযাং বেদনা জ্বরো গ্রন্থযশ্চ; লোহিতিকাযাং মন্যাস্তম্ভাপতানকশিরোগ্রহকর্ণশূলানি ভবন্তি |
তেষু যথাস্বং প্রতিকুর্বীত ||৫||
View original
तत्राज्ञेन यदृच्छया विद्धासु सिरासु कालिकामर्मरिकालोहितिकासूपद्रवा भवन्ति |
तत्र, कालिकायां ज्वरो दाहः श्वयथुर्वेदना च भवति; मर्मरिकायां वेदना ज्वरो ग्रन्थयश्च; लोहितिकायां मन्यास्तम्भापतानकशिरोग्रहकर्णशूलानि भवन्ति |
तेषु यथास्वं प्रतिकुर्वीत ||५||
সিরাসু দোষং বক্তুমাহ- তত্রাজ্ঞেনেত্যাদি| জ্ঞেন তু কালিকালোহিতিকযোবর্ণেনৈব পরিহারঃ কর্তব্যঃ, মর্মরিকাযাস্তু বর্ণানুক্তৌ দৈবকৃতচ্ছিদ্রব্যধনেনেতি| প্রত্যেকমুপদ্রবান্ বক্তুমাহ- তত্র কালিকাযাং জ্বর ইত্যাদি| কালিকাদিব্যধোপদ্রবচিকিত্সামাহ- তেষু যথাস্বমিত্যাদি| তেষু জ্বরাদিষু ব্যাধিষু; যথাস্বং প্রতিকুর্বীতেতি যস্য জ্বরাদিব্যাধের্যঃ প্রতীকারস্তেন তং প্রতিকুর্বীতেত্যর্থঃ||৫||
Adhikarana 5 (6) · Śloka 6
ক্লিষ্টজিহ্মাপ্রশস্তসূচীব্যধাদ্গাঢতরবর্তিত্বাদ্দোষসমুদাযাদপ্রশস্তব্যধাদ্বা যত্র সংরম্ভো বেদনা বা ভবতি তত্র বর্তিমুপহৃত্যাশু মধুকৈরণ্ডমূলমঞ্জিষ্ঠাযবতিলকল্কৈর্মধুঘৃতপ্রগাঢৈরালেপযেত্তাবদ্যাবত্ সুরূঢ ইতি; সুরূঢং চৈনং পুনর্বিধ্যেত্; বিধানং তু পূর্বোক্তমেব ||৬||
View original
क्लिष्टजिह्माप्रशस्तसूचीव्यधाद्गाढतरवर्तित्वाद्दोषसमुदायादप्रशस्तव्यधाद्वा यत्र संरम्भो वेदना वा भवति तत्र वर्तिमुपहृत्याशु मधुकैरण्डमूलमञ्जिष्ठायवतिलकल्कैर्मधुघृतप्रगाढैरालेपयेत्तावद्यावत् सुरूढ इति; सुरूढं चैनं पुनर्विध्येत्; विधानं तु पूर्वोक्तमेव ||६||
কালিকাদিব্যধাদন্যথাঽপি ব্যাপদং তচ্চিকিত্সাং চ নির্দিশন্নাহ- ক্লিষ্টজিহ্মাপ্রশস্তেত্যাদি| ক্লিষ্টা অমনোজ্ঞা, জিহ্মা বক্রতমা, অপ্রশস্তা যথোক্তগুণহীনা| দোষসমুদাযাদিতি দোষপ্রকোপাত্| অপ্রশস্তব্যধাদ্বেতি অদৈবকৃতচ্ছিদ্রে ব্যধাদ্ গর্হিতশস্ত্রাদিব্যধাদ্বা| সংরম্ভঃ শ্বযথুঃ| কেচিত্ 'ক্লিষ্টজিহ্মাপ্রশস্তসূচীব্যধাদ্গাঢতরবর্তিত্বাত্' ইতি ন পঠন্তি, ‘দোষসমুদাযাত্' ইত্যাদি চ পঠন্তি, ‘সুরূঢং চৈনং পুনর্বিধ্যেত্' ইতি চ ন পঠন্তি||৬||
Adhikarana 6 (7) · Śloka 7
তত্র সম্যগ্বিদ্ধমামতৈলেন পরিষেচযেত্, ত্র্যহাত্ত্র্যহাচ্চ বর্তিং স্থূলতরাং দদ্যাত্, পরিষেকং চ তমেব ||৭||
View original
तत्र सम्यग्विद्धमामतैलेन परिषेचयेत्, त्र्यहात्त्र्यहाच्च वर्तिं स्थूलतरां दद्यात्, परिषेकं च तमेव ||७||
দুর্বিদ্ধে ব্যাপচ্চিকিত্সাং প্রতিপাদ্য সম্যগ্বিদ্ধে চিকিত্সামাহ- তত্রেত্যাদি| আমতৈলেনেতি অপক্বতৈলেন, তিলকল্কনিষ্পীডনেন মুষ্টিতঃ পরিস্রুতেনেত্যর্থঃ; তমেবেতি আমতৈলপরিষেকমেবেত্যর্থঃ||৭||
Adhikarana 7 (8) · Śloka 8
অথ ব্যপগতদোষোপদ্রবে কর্ণে বর্ধনার্থং লঘু বর্ধনকং কুর্যাত্ ||৮||
View original
अथ व्यपगतदोषोपद्रवे कर्णे वर्धनार्थं लघु वर्धनकं कुर्यात् ||८||
গতোপদ্রবে কর্ণে বর্ধনোপাযমাহ- অথেত্যাদি| লঘুবর্ধনকমিতি দোষবিশেষাদপামার্গনিম্বকার্পাসাদীনাং কাষ্ঠানামন্যতমস্য, অথবা সীসকাদিঘটিতং ধত্তূরপুষ্পাকৃতিং কুর্যাত্||৮||
Adhikarana 8 (9) · Śloka 9
এবং বিবর্ধিতঃ কর্ণশ্ছিদ্যতে তু দ্বিধা নৃণাম্ |
দোষতো বাঽভিঘাতাদ্বা সন্ধানং তস্য মে শৃণু ||৯||
View original
एवं विवर्धितः कर्णश्छिद्यते तु द्विधा नृणाम् |
दोषतो वाऽभिघाताद्वा सन्धानं तस्य मे शृणु ||९||
এবমিত্যাদি| দোষত ইতি দোষশব্দো ব্যাধিষ্বপি বর্ততে, তেন দোষৈর্বাতাদিভিস্তজ্জনিতব্যাধিভির্বেত্যর্থঃ| অভিঘাতাদ্বেতি পতনপীডনাদিভিঃ||৯||
Adhikarana 9 (10) · Śloka 10
তত্র সমাসেন পঞ্চদশকর্ণবন্ধাকৃতযঃ |
তদ্যথা- নেমিসন্ধানক উত্পলভেদ্যকো বল্লূরক আসঙ্গিমো গণ্ডকর্ণ আহার্যো নির্বেধিমো ব্যাযোজিমঃ কপাটসন্ধিকোঽর্ধকপাটসন্ধিকঃ সঙ্ক্ষিপ্তো হীনকর্ণো বল্লীকর্ণো যষ্টিকর্ণঃ কাকৌষ্ঠক ইতি |
তেষু, পৃথুলাযতসমোভযপালির্নেমিসন্ধানকঃ, বৃত্তাযতসমোভযপালিরুত্পলভেদ্যকঃ; হ্রস্ববৃত্তসমোভযপালির্বল্লূরকঃ; অভ্যন্তরদীর্ঘৈকপালিরাসঙ্গিমঃ; বাহ্যদীর্ঘৈকপালির্গণ্ডকর্ণঃ; অপালিরুভযতোঽপ্যাহার্যঃ; পীঠোপমপালিরুভযতঃ ক্ষীণপুত্রিকাশ্রিতো নির্বেধিমঃ, স্থূলাণুসমবিষমপালির্ব্যাযোজিমঃ; অভ্যন্তরদীর্ঘৈকপালিরিতরাল্পপালিঃ কপাটসন্ধিকঃ; বাহ্যদীর্ঘৈকপালিরিতরাল্পপালিরর্ধকপাটসন্ধিকঃ |
তত্র দশৈতে কর্ণবন্ধবিকল্পাঃ সাধ্যাঃ ; তেষাং স্বনামভিরেবাকৃতযঃ প্রাযেণ ব্যাখ্যাতাঃ সঙ্ক্ষিপ্তাদযঃ পঞ্চাসাধ্যাঃ |
তত্র শুষ্কশষ্কুলিরুত্সন্নপালিরিতরাল্পপালিঃ সঙ্ক্ষিপ্তঃ ; অনধিষ্ঠানপালিঃ পর্যন্তযোঃ ক্ষীণমাংসো হীনকর্ণঃ; তনুবিষমাল্পপালির্বল্লীকর্ণঃ; গ্রথিতমাংসস্তব্ধসিরাততসূক্ষ্মপালির্যষ্টিকর্ণঃ; নির্মাংসসঙ্ক্ষিপ্তাগ্রাল্পশোণিতপালিঃ কাকৌষ্ঠক ইতি |
বদ্ধেষ্বপি তু শোফদাহরাগপাকপিডকাস্রাবযুক্তা ন সিদ্ধিমুপযান্তি ||১০||
View original
तत्र समासेन पञ्चदशकर्णबन्धाकृतयः |
तद्यथा- नेमिसन्धानक उत्पलभेद्यको वल्लूरक आसङ्गिमो गण्डकर्ण आहार्यो निर्वेधिमो व्यायोजिमः कपाटसन्धिकोऽर्धकपाटसन्धिकः सङ्क्षिप्तो हीनकर्णो वल्लीकर्णो यष्टिकर्णः काकौष्ठक इति |
तेषु, पृथुलायतसमोभयपालिर्नेमिसन्धानकः, वृत्तायतसमोभयपालिरुत्पलभेद्यकः; ह्रस्ववृत्तसमोभयपालिर्वल्लूरकः; अभ्यन्तरदीर्घैकपालिरासङ्गिमः; बाह्यदीर्घैकपालिर्गण्डकर्णः; अपालिरुभयतोऽप्याहार्यः; पीठोपमपालिरुभयतः क्षीणपुत्रिकाश्रितो निर्वेधिमः, स्थूलाणुसमविषमपालिर्व्यायोजिमः; अभ्यन्तरदीर्घैकपालिरितराल्पपालिः कपाटसन्धिकः; बाह्यदीर्घैकपालिरितराल्पपालिरर्धकपाटसन्धिकः |
तत्र दशैते कर्णबन्धविकल्पाः साध्याः ; तेषां स्वनामभिरेवाकृतयः प्रायेण व्याख्याताः सङ्क्षिप्तादयः पञ्चासाध्याः |
तत्र शुष्कशष्कुलिरुत्सन्नपालिरितराल्पपालिः सङ्क्षिप्तः ; अनधिष्ठानपालिः पर्यन्तयोः क्षीणमांसो हीनकर्णः; तनुविषमाल्पपालिर्वल्लीकर्णः; ग्रथितमांसस्तब्धसिराततसूक्ष्मपालिर्यष्टिकर्णः; निर्मांससङ्क्षिप्ताग्राल्पशोणितपालिः काकौष्ठक इति |
बद्धेष्वपि तु शोफदाहरागपाकपिडकास्रावयुक्ता न सिद्धिमुपयान्ति ||१०||
ইদানীং সন্ধেযস্য সন্ধানাযাসন্ধেযস্য পরিহারায চাহ- তত্রেত্যাদি| সমাসেন সঙ্ক্ষেপেণ, বিস্তরেণ তু কর্ণবন্ধা অমিতাঃ, যদ্যপি পঞ্চদশসু কর্ণেষু মধ্যে দশৈব বন্ধ্যাঃ, তথাঽপি বন্ধ্যবাহুল্যাদবন্ধ্যেষ্বপি বন্ধশব্দো বর্ততে; যথা 'ছত্রিণো যান্তি' ইত্যত্র ছত্রিবাহুল্যাদচ্ছত্রিষ্বপি ছত্রিব্যপদেশঃ| 'তত্র সমাসেন পঞ্চদশ কর্ণাকৃতয' ইত্যন্যে পঠন্তি| তানেব বন্ধান্নামভির্নির্দিশন্নাহ- তদ্যথা- নেমিসন্ধানক ইত্যাদি| তদ্যথেতি নিদর্শনে| তত্রামী বন্ধবিকল্পাঃ নিত্যকর্মদর্শনাদভ্যাসাচ্চ জাযন্তে| যদ্যপ্যেষাং নামভিরেবাকৃতযঃ প্রাযেণ ব্যাখ্যাতাস্তথাঽপি লক্ষণসূত্রং নির্দিশন্নাহ- তেষু পৃথুলাযতেত্যাদি| পৃথুলে বিস্তীর্ণে, আযতে দীর্ঘে, সমে তুল্যে, ইত্থম্ভূতে দ্বে পাল্যৌ যস্য স তথা; পালিঃ কর্ণলতিকা| নেমিঃ চক্রধারা, তদ্বত্ সন্ধানং যস্য স নেমিসন্ধানকঃ| বল্লূরক ইতি বল্লূরং শুষ্কমাংসং, শুষ্কমাংসবদনেকধা বিপাট্য যঃ সন্ধীযতে স বল্লূরকঃ| `সমুন্নতসমোভযপালিঃ' ইত্যেকে পঠন্তি| এতত্ কর্ণবন্ধত্রযং সমোভযপালিবিষযতযা জ্ঞেযম্| অভ্যন্তরদীর্ঘৈকেত্যাদি যস্ত্বভ্যন্তরদীর্ঘৈকপালিঃ কথঞ্চিচ্ছিন্নো ভবতি তস্যেতরপাল্যভাবাদ্বাহ্যপালিমূলে ব্যাসঙ্গ আসঙ্গিমঃ| গণ্ডকর্ণ ইতি সানুবন্ধকপোলমাংসমুত্কৃত্য বাহ্যদীর্ঘপাল্যগ্রভাগঃ সন্ধীযতে যস্মিন্ স গণ্ডকর্ণঃ| এতদ্বন্ধদ্বযমেকপালিকম্| অপালিরিতি ঈষত্পালিঃ| উভযতো গণ্ডপ্রদেশাত্ সানুবন্ধমাংসমাহৃত্য পাল্যাকারং কৃত্বা সন্ধানং যস্য ক্রিযতে স আহার্যঃ| পীঠোপমপালিরিতি যস্য তু পালিদ্বযং মূলত এব ছিন্নং ভবতি স পীঠোপমপালিঃ, নির্বেধিম ইতি বেধেন নিষ্পন্ন ইত্যর্থঃ, পালিদ্বযহীনং কর্ণং পুত্রিকাযা উপরি বিদ্ধ্বা নিষ্পাদনীয ইত্যর্থঃ; ইদমপালিকং কর্ণবন্ধদ্বযম্| স্থূলাণুসমেত্যাদি স্থূলাণুত্বাভ্যামেকা পালিঃ সমা, অপরা বিষমা, তে উল্লিখ্য নানাপ্রকারযোজনাদ্ব্যাযোজিম ইতি| অভ্যন্তরদীর্ঘৈকপালিরিতি অভ্যন্তরদীর্ঘৈকপালিরিতরাল্পপাল্যা সহ বহিঃ সন্ধানাত্ কপাটবত্সন্ধানং যত্র স কপাটসন্ধিকঃ| অর্ধকপাটসন্ধিক ইতি বাহ্যদীর্ঘৈকপালিরিতরাল্পপাল্যা সহাভ্যন্তরসন্ধানেনার্ধকপাটবদ্যত্র সন্ধীযতে সোঽর্ধকপাটসন্ধিকঃ| ইদং কর্ণবন্ধত্রযং বিষমোভযপালিকম্| তত্রেত্যাদি তত্র তেষু পঞ্চদশসু কর্ণবন্ধবিকল্পেষু মধ্যে| তেষামাকারজ্ঞানমধিকৃত্যাহ- তেষাং নামভিরেবেত্যাদি| শেষাণাং পরিহারার্থমাহ- সঙ্ক্ষিপ্তাদয ইত্যাদি| তেষাং লক্ষণমাহ- তত্র শুষ্কেত্যাদি| শুষ্কশষ্কুলিরিতি শুষ্কবাহ্যপাল্যধিষ্ঠানঃ, ইতরাল্পপালিরিতি ইতরা গণ্ডদেশানুগতা অল্পা পালির্যস্য স তথা| অনধিষ্ঠানপালিরিতি অল্পত্বেন অবিদ্যমানে অধিষ্ঠানপালী যস্য স তথা, পর্যন্তযোশ্চেতি গণ্ডবাহ্যপার্শ্বযোঃ| বিষমা তনুত্বস্থূলত্বাভ্যাম্| ত এতে পঞ্চ কর্ণবন্ধাঃ সপালযোঽপ্যসাধ্যাঃ, অসাধ্যা ইতি সাধনাযাশক্যাঃ; কেচিদমুং পাঠং ন পঠন্তি| এতেষাং পঞ্চানামসাধ্যত্বে হেতুমাহ- বদ্ধেষ্বপীত্যাদি| অন্যে তু শোফাদ্যুপদ্রবোপেতানাং পূর্বেষাং দশানাং বন্ধানাং সাধ্যানামপ্যসাধ্যত্বমাহুঃ||১০||
Adhikarana 10 (11) · Śloka 11
ভবন্তি চাত্র- যস্য পালিদ্বযমপি কর্ণস্য ন ভবেদিহ |
কর্ণপীঠং সমে মধ্যে তস্য বিদ্ধ্বা বিবর্ধযেত্ ||১১||
View original
भवन्ति चात्र- यस्य पालिद्वयमपि कर्णस्य न भवेदिह |
कर्णपीठं समे मध्ये तस्य विद्ध्वा विवर्धयेत् ||११||
গদ্যোক্তানাং কর্ণবন্ধানাং মধ্যে নির্বেধিমস্য সন্ধানসূত্রমাহ- যস্যেত্যাদি| ইহেতি কর্ণবন্ধমধ্যে| কর্ণপীঠং পুত্রিকোপরিপ্রদেশম্||১১||
Adhikarana 11 (12) · Śloka 12
বাহ্যাযামিহ দীর্ঘাযাং সন্ধিরাভ্যন্তরো ভবেত্ |
আভ্যন্তরাযাং দীর্ঘাযাং বাহ্যসন্ঘিরুদাহৃতঃ ||১২||
View original
बाह्यायामिह दीर्घायां सन्धिराभ्यन्तरो भवेत् |
आभ्यन्तरायां दीर्घायां बाह्यसन्घिरुदाहृतः ||१२||
ব্যাযোজিমকপাটসন্ধিকার্ধকপাটসন্ধিকানাং সন্ধানসূত্রমাহ- বাহ্যাযামিত্যাদি| যদা বাহ্যা পালির্দীর্ঘা ভবেত্তদা আভ্যন্তরঃ সন্ধিঃ কর্তব্য ইত্যর্থঃ, আভ্যন্তরা চ পালির্যদা দীর্ঘা স্যাত্তদা বাহ্যসন্ধির্বিধেয ইতি; বাহ্যাযাং গণ্ডাদ্দূরবর্তিন্যাং পাল্যাং দীর্ঘাযাম্, আভ্যন্তরো গণ্ডসন্নিকৃষ্টো গণ্ডসংশ্রযী বেত্যর্থঃ| "কপাটসন্ধিকার্ধকপাটসন্ধিকযোরেবেদং সন্ধানসূত্রং, ন তু ব্যাযোজিমস্য" ইত্যন্যে||১২||
Adhikarana 12 (13) · Śloka 13
একৈব তু ভবেত্ পালিঃ স্থূলা পৃথ্বী স্থিরা চ যা |
তাং দ্বিধা পাটযিত্বা তু ছিত্ত্বা চোপরি সন্ধযেত্ ||১৩||
View original
एकैव तु भवेत् पालिः स्थूला पृथ्वी स्थिरा च या |
तां द्विधा पाटयित्वा तु छित्त्वा चोपरि सन्धयेत् ||१३||
ইদানীমাসঙ্গিমস্য সন্ধানসূত্রমাহ- একৈবেত্যাদি| "বল্লূরকস্যেদং সন্ধানসূত্রং সম্ভাব্যতে" ইত্যন্যে বদন্তি||১৩||
Adhikarana 13 (14) · Śloka 14
গণ্ডাদুত্পাট্য মাংসেন সানুবন্ধেন জীবতা |
কর্ণপালীমপালেস্তু কুর্যান্নির্লিখ্য শাস্ত্রবিত্ ||১৪||
View original
गण्डादुत्पाट्य मांसेन सानुबन्धेन जीवता |
कर्णपालीमपालेस्तु कुर्यान्निर्लिख्य शास्त्रवित् ||१४||
আহার্যস্য সন্ধিসূত্রং নির্দেষ্টুমাহ- গণ্ডাদুত্পাঠ্যেত্যাদি| সানুবন্ধেনেতি গণ্ডপ্রদেশলগ্নেনেত্যর্থঃ| জীবতেতি শোণিতসহিতেনেত্যর্থঃ| অন্যে তু "গণ্ডকর্ণস্যাপ্যেতত্ সন্ধানসূত্রম্" ইতি বদন্তি||১৪||
Adhikarana 14 (15) · Śloka 15
অতোঽন্যতমং বন্ধং চিকীর্ষুরগ্রোপহরণীযোক্তোপসম্ভৃতসম্ভারং বিশেষতশ্চাত্রোপহরেত্ সুরামণ্ডং ক্ষীরমুদকং ধান্যাম্লং কপালচূর্ণং চেতি |
ততোঽঙ্গনাং পুরুষং বা গ্রথিতকেশান্তং লঘু ভুক্তবন্তমাপ্তৈঃ সুপরিগৃহীতং চ কৃত্বা, বন্ধমুপধার্য, ছেদ্যভেদ্যলেখ্যব্যধনৈরুপপন্নৈরুপপাদ্য, কর্ণশোণিতমবেক্ষ্য দুষ্টমদুষ্টং বেতি; তত্র বাতদুষ্টে ধান্যাম্লোষ্ণোদকাভ্যাং পিত্তদুষ্টে শীতোদকপযোভ্যাং শ্লেষ্মদুষ্টে সুরামণ্ডোষ্ণোদকাভ্যাং প্রক্ষাল্য কর্ণৌ, পুনরবলিখ্যানুন্নতমহীনমবিষমং চ কর্ণসন্ধিং সন্নিবেশ্য, স্থিতরক্তং সন্দধ্যাত্ |
ততো মধুঘৃতেনাভ্যজ্য পিচুপ্রোতযোরন্যতরেণাবগুণ্ঠ্য সূত্রেণানবগাঢমনতিশিথিলং চ বদ্ধ্বা কপালচূর্ণেনাবকীর্যাচারিকমুপদিশেত্, দ্বিব্রণীযোক্তেন চ বিধানেনোপচরেত্ ||১৫||
View original
अतोऽन्यतमं बन्धं चिकीर्षुरग्रोपहरणीयोक्तोपसम्भृतसम्भारं विशेषतश्चात्रोपहरेत् सुरामण्डं क्षीरमुदकं धान्याम्लं कपालचूर्णं चेति |
ततोऽङ्गनां पुरुषं वा ग्रथितकेशान्तं लघु भुक्तवन्तमाप्तैः सुपरिगृहीतं च कृत्वा, बन्धमुपधार्य, छेद्यभेद्यलेख्यव्यधनैरुपपन्नैरुपपाद्य, कर्णशोणितमवेक्ष्य दुष्टमदुष्टं वेति; तत्र वातदुष्टे धान्याम्लोष्णोदकाभ्यां पित्तदुष्टे शीतोदकपयोभ्यां श्लेष्मदुष्टे सुरामण्डोष्णोदकाभ्यां प्रक्षाल्य कर्णौ, पुनरवलिख्यानुन्नतमहीनमविषमं च कर्णसन्धिं सन्निवेश्य, स्थितरक्तं सन्दध्यात् |
ततो मधुघृतेनाभ्यज्य पिचुप्रोतयोरन्यतरेणावगुण्ठ्य सूत्रेणानवगाढमनतिशिथिलं च बद्ध्वा कपालचूर्णेनावकीर्याचारिकमुपदिशेत्, द्विव्रणीयोक्तेन च विधानेनोपचरेत् ||१५||
অতঃ পরং বন্ধবিধিঃ| অগ্রোপহরণীযোক্তোপসম্ভৃতসম্ভারমিতি অগ্রোপহরণীযোক্তো যন্ত্রশস্ত্রাদিরুপ সমীপে সম্ভৃতঃ সম্যক্কৃত্বা ধৃতঃ সম্ভারঃ সমূহো যত্র| সুরামণ্ডং মদ্যস্যোপর্যচ্ছভাগং, কপালচূর্ণং নবমৃন্মযভাণ্ডখণ্ডচূর্ণম্| ততোঽঙ্গনাং পুরুষং বেতি অঙ্গনাযা ভূষণপ্রাধান্যাত্ প্রাঙ্নির্দেশঃ| গ্রথিতকেশান্তমিতি গ্রথিতকেশাবযবম্, অন্যথা কেশব্যাকুলতযা কর্মাভিঘাতঃ স্যাদ্বন্ধবিশ্লেষো বা| লঘুভুক্তবন্তমিতি ভুক্তবান্ শস্ত্রকর্মপীডাং সহতে, আহারলঘুত্বাদ্বেদনযা রাত্রিজাগরিতবতোঽপি নাজীর্ণবাধা স্যাত্| আপ্তৈঃ সুপরিগৃহীতং চ কৃত্বেতি আপ্তৈর্হিতৈঃ| বন্ধমুপধার্যেতি অযং বন্ধোঽত্র কর্তব্য ইতি নিশ্চিত্য| ছেদ্যাদ্যৈরুপপন্নৈরিতি যুক্তৈঃ| উপপাদ্যেতি সংযোজ্য, সন্নিবেশ্য আরোপ্য, সন্দধ্যাত্ সন্ধানং কুর্যাত্| পিচুপ্রোতযোরিতি তূলকর্পটযোরিত্যর্থঃ| অবগুণ্ঠ্যেতি আবেষ্ঠ্য| আচারিকমিতি আহারবিহারাখ্যম্| দ্বিব্রণীযোক্তেন বিধানেনেতি আলেপনাদিনা||১৫||
Adhikarana 15 (16) · Śloka 16
ভবতি চাত্র- বিঘট্টনং দিবাস্বপ্নং ব্যাযামমতিভোজনম্ |
ব্যবাযমগ্নিসন্তাপং বাক্শ্রমং চ বিবর্জযেত্ ||১৬||
View original
भवति चात्र- विघट्टनं दिवास्वप्नं व्यायाममतिभोजनम् |
व्यवायमग्निसन्तापं वाक्श्रमं च विवर्जयेत् ||१६||
পরিহার্যাণ্যুপদিশন্নাহ- বিঘট্টনমিত্যাদি| বিঘট্টনং চালনম্||১৬||
Adhikarana 16 (17) · Śloka 17
ন চাশুদ্ধরক্তমতিপ্রবৃত্তরক্তং ক্ষীণরক্তং বা সন্দধ্যাত্ |
স হি বাতদুষ্টে রক্তে রূঢোঽপি পরিপুটনবান্, পিত্তদুষ্টে দাহপাকরাগবেদনাবান্, শ্লেষ্মদুষ্টে স্তব্ধঃ কণ্ডূমান্, অতিপ্রবৃত্তরক্তে শ্যাবশোফবান্, ক্ষীণোঽল্পমাংসো ন বৃদ্ধিমুপৈতি ||১৭||
View original
न चाशुद्धरक्तमतिप्रवृत्तरक्तं क्षीणरक्तं वा सन्दध्यात् |
स हि वातदुष्टे रक्ते रूढोऽपि परिपुटनवान्, पित्तदुष्टे दाहपाकरागवेदनावान्, श्लेष्मदुष्टे स्तब्धः कण्डूमान्, अतिप्रवृत्तरक्ते श्यावशोफवान्, क्षीणोऽल्पमांसो न वृद्धिमुपैति ||१७||
পরিহার্যসামান্যাদন্যদপি বিরুদ্ধং প্রতিপাদযন্নাহ- ন চেত্যাদি| অশুদ্ধরক্তমিতি দুষ্টরক্তম্| অতিপ্রবৃত্তরক্তমিতি শুদ্ধরক্তমপি যদাঽতিপ্রবৃত্তং স্যাত্তদা ন সন্ধেযম্| অশুদ্ধরক্তসন্ধানে দোষমাহ- স হি বাতদুষ্টে ইত্যাদি| পরিপুটনং ত্বচ উচ্চটনং, মিশ্রকাধ্যাযোক্তঃ সশোফঃ কর্ণলতিকারোগো বা| অতিপ্রবৃত্তরক্তস্য সন্ধানে দোষমাহ- অতিপ্রবৃত্তরক্তে ইতি; অতিস্রবদ্রক্তে ইত্যর্থঃ| শ্যাবশোফোঽত্র বাতকৃতঃ| ক্ষীণকর্ণস্য সন্ধানে দোষমাহ- ক্ষীণ ইত্যাদি| ক্ষীণোঽত্র শুদ্ধরক্তাতিপ্রবৃত্ত্যা; ন তু দোষোপদ্রবৈঃ, সদোষোপদ্রববর্ধনে ছিদ্যত এব||১৭||
Adhikarana 17 (18-19) · Śloka 19
(আমতৈলেন ত্রিরাত্রং পরিষেচযেত্, ত্রিরাত্রাচ্চ পিচুং পরিবর্তযেত্) |
স যদা সুরূঢো নিরুপদ্রবঃ সবর্ণো ভবতি তদৈনং শনৈঃ শনৈরভিবর্ধযেত্ |
অতোঽন্যথা সংরম্ভদাহপাকরাগবেদনাবান্, পুনশ্ছিদ্যতে বা ||১৮||
অথাস্যাপ্রদুষ্টস্যাভিবর্ধনার্থমভ্যঙ্গঃ |
তদ্যথা- গোধাপ্রতুদবিষ্কিরানূপৌদকবসামজ্জানৌ পযঃ সর্পিস্তৈলং গৌরসর্ষপজং চ যথালাভং সম্ভৃত্যার্কালর্কবলাতিবলানন্তাপামার্গাশ্বগন্ধাবিদারিগন্ধাক্ষীরশুক্লাজলশূকমধুরবর্গপযস্যাপ্রতিবাপং তৈলং বা পাচযিত্বা স্বনুগুপ্তং নিদধ্যাত্ ||১৯||
View original
(आमतैलेन त्रिरात्रं परिषेचयेत्, त्रिरात्राच्च पिचुं परिवर्तयेत्) |
स यदा सुरूढो निरुपद्रवः सवर्णो भवति तदैनं शनैः शनैरभिवर्धयेत् |
अतोऽन्यथा संरम्भदाहपाकरागवेदनावान्, पुनश्छिद्यते वा ||१८||
अथास्याप्रदुष्टस्याभिवर्धनार्थमभ्यङ्गः |
तद्यथा- गोधाप्रतुदविष्किरानूपौदकवसामज्जानौ पयः सर्पिस्तैलं गौरसर्षपजं च यथालाभं सम्भृत्यार्कालर्कबलातिबलानन्तापामार्गाश्वगन्धाविदारिगन्धाक्षीरशुक्लाजलशूकमधुरवर्गपयस्याप्रतिवापं तैलं वा पाचयित्वा स्वनुगुप्तं निदध्यात् ||१९||
দ্বিব্রণীযোক্তসামান্যবিধিমুদ্দিশ্য বিশেষবিধিং নির্দিশন্নাহ- আমতৈলেনেত্যাদি| প্রতুদাঃ লট্বাদযঃ শ্রেষ্ঠত্বাত্, বিষ্কিরা লাবাদযঃ, আনূপা বরাহমহিষাদযঃ, ঔদকা রোহিতমত্স্যাদযঃ, এষাং বসামজ্জানৌ, বসা মাংসস্নেহঃ| গৌরসর্ষপজস্থানে ‘রাজসর্ষপজং’ ইতি কেচিত্ পঠন্তি, রাজসর্ষপাঃ শ্বেতসর্ষপাঃ| বসামজ্জাসর্পির্গৌরসর্ষপতৈলমেতত্স্নেহচতুষ্টযমর্কাদিকল্কমাবাপ্য চতুর্গুণেন দুগ্ধেনৈব পচনীযমিতি| অন্যে ত্বত্র সর্পির্ন পঠন্তি| অপরে বসাদিস্নেহচতুষ্টযং পরং পঠন্তি নতু পযঃ, দ্রবানুক্তৌ চ জলং চতুর্গুণং বদন্তি স্নেহপাকে; ‘যদাঽন্যত্রাপি কেবলং দুগ্ধং স্যাত্তদা স্নেহাচ্চতুর্গুণং দুগ্ধং, যদা পুনরন্যোঽপি দ্রবো ভবেত্তদা স্নেহসমমেব দুগ্ধং কার্যম্’ ইত্যাচার্যা ভাষন্তে| যথালাভং সম্ভৃত্যেতি যস্য যস্য লাভস্তং তমেকত্র কৃত্বেত্যর্থঃ; এতেন দ্বিত্রাণামপি গ্রহণমুক্তম্ | অলর্কো মন্দারঃ, অনন্তা উত্পলসারিবা, বিদারিগন্ধা শালপর্ণী, ক্ষীরশুক্লা ক্ষীরবিদারী; জলশূকো জলনীলিকা, জলান্তর্বর্তী রোমযুক্তঃ সবিষপ্রাণী বা, জলশূকো জলসংস্থস্তৃণসক্তো জন্তুবিরচিতঃ শূকসঙ্ঘাতবান্ নিবাসোঽন্দুক ইত্যন্যে, `জলচারী কৃষ্ণকীট’ ইতি লক্ষ্মণটীপ্পণকেনোক্তং; মধুরবর্গঃ কাকোল্যাদিঃ, পযস্যা বিদারীভেদঃ, কেচিদর্কপুষ্পীত্যাহুঃ; অন্যে মধুরবর্গং পযস্যাং চ ন পঠন্তি| তৈলং বেতি তিলতৈলং বা পচেত্, একৈকং বা| স্বনুগুপ্তমিতি নিরুপদ্রবস্থান ইত্যর্থঃ||১৮-১৯||
Adhikarana 18 (20) · Śloka 20
স্বেদিতোন্মর্দিতং কর্ণং স্নেহেনৈতেন যোজযেত্ |
অথানুপদ্রবঃ সম্যগ্বলবাংশ্চ বিবর্ধতে ||২০||
View original
स्वेदितोन्मर्दितं कर्णं स्नेहेनैतेन योजयेत् |
अथानुपद्रवः सम्यग्बलवांश्च विवर्धते ||२०||
অস্য তৈলস্যাবচারণমাহ- স্বেদিতোন্মর্দিতমিত্যাদি||২০||
Adhikarana 19 (21) · Śloka 21
যবাশ্বগন্ধাযষ্ট্যাহ্বৈস্তিলৈশ্চোদ্বর্তনং হিতম্ |২১|
View original
यवाश्वगन्धायष्ट्याह्वैस्तिलैश्चोद्वर्तनं हितम् |२१|
অভ্যক্তস্যোদ্বর্তনমাহ- যবেত্যাদি|২১|-
Adhikarana 20 (21) · Śloka 22
শতাবর্যশ্বগন্ধাভ্যাং পযস্যৈরণ্ডজীবনৈঃ ||২১||
তৈলং বিপক্বং সক্ষীরমভ্যঙ্গাত্ পালিবর্ধনম্ |২২|
View original
शतावर्यश्वगन्धाभ्यां पयस्यैरण्डजीवनैः ||२१||
तैलं विपक्वं सक्षीरमभ्यङ्गात् पालिवर्धनम् |२२|
কর্ণপালিবিবৃদ্ধ্যর্থমপরং তৈলমাহ- শতাবর্যশ্বগন্ধাভ্যামিত্যাদি| শতাবর্যাদিকল্কেন স্নেহচতুর্থাংশেন কেবলক্ষীরেণ চতুর্গুণেন তৈলমত্র পচনীযম্| পযস্যা অর্কপুষ্পী| জীবনৈঃ কাকোল্যাদিদ্রব্যৈঃ||২১||
Adhikarana 21 (22-23) · Śloka 23
যে তু কর্ণা ন বর্ধন্তে স্বেদস্নেহোপপাদিতাঃ ||২২||
তেষামপাঙ্গদেশে তু কুর্যাত্ প্রচ্ছানমেব তু |
বাহ্যচ্ছেদং ন কুর্বীত ব্যাপদঃ স্যুস্ততোধ্রুবাঃ ||২৩||
View original
ये तु कर्णा न वर्धन्ते स्वेदस्नेहोपपादिताः ||२२||
तेषामपाङ्गदेशे तु कुर्यात् प्रच्छानमेव तु |
बाह्यच्छेदं न कुर्वीत व्यापदः स्युस्ततोध्रुवाः ||२३||
এবমপ্যবর্ধমানানাং কর্ণানাং বর্ধনোপাযং দর্শযন্নাহ- যে ত্বিত্যাদি| উপপাদিতাঃ সংযোজিতাঃ| অপাঙ্গদেশে ত্বিতি কর্ণপুত্রিকাযা অধঃ| তুশব্দ এবার্থঃ| প্রচ্ছানমেব ত্বিতি এবশব্দ ঈষদর্থে, ঈষচ্ছেদনং; তুশব্দোঽযমপ্যর্থঃ, তেন কর্ণপুত্রিকাযা অধ এব ছেদনং, তদপীষদেব কার্যমিত্যুক্তং ভবতি| তেষামপাঙ্গচ্ছেদ্যং হি কার্যমাভ্যন্তরং ভবেত্’ ইতি কেচিত্ পঠন্তি, অপাঙ্গপুত্রিকাযা অধঃ কর্ণানুকূলমাভ্যন্তরং ছেদ্যং প্রচ্ছযেদ্বা| বাহ্যচ্ছেদং কর্ণবাহ্যলতিকাচ্ছেদম্| ব্যাপদঃ কর্ণলতিকাত্রুটনাদযঃ; ‘ব্যাধযঃ স্যুঃ’ ইত্যন্যে পঠন্তি||২২-২৩||
Adhikarana 22 (24) · Śloka 24
বদ্ধমাত্রং তু যঃ কর্ণং সহসৈবাভিবর্ধযেত্ |
আমকোশী সমাধ্মাতঃ ক্ষিপ্রমেব বিমুচ্যতে ||২৪||
View original
बद्धमात्रं तु यः कर्णं सहसैवाभिवर्धयेत् |
आमकोशी समाध्मातः क्षिप्रमेव विमुच्यते ||२४||
অরূঢকর্ণস্য বর্ধনে দোষমাহ- বদ্ধমাত্রমিত্যাদি| আমকোশীতি অসম্যগ্রূঢমধ্যঃ| কেচিদমুং ন পঠন্তি||২৪||
Adhikarana 23 (25) · Śloka 25
জাতরোমা সুবর্ত্মা চ শ্লিষ্টসন্ধিঃ সমঃ স্থিরঃ |
সুরূঢোঽবেদনো যশ্চ তং কর্ণং বর্ধযেচ্ছনৈঃ ||২৫||
View original
जातरोमा सुवर्त्मा च श्लिष्टसन्धिः समः स्थिरः |
सुरूढोऽवेदनो यश्च तं कर्णं वर्धयेच्छनैः ||२५||
কীদৃশঃ পুনর্বর্ধনীযস্তমাহ- জাতরোমেত্যাদি| সুবর্ত্মেতি শোভনচ্ছিদ্রঃ, শ্লিষ্টসন্ধিঃ; সংলগ্নসন্ধিঃ; সমো নিম্নোন্নতত্বরহিতঃ, স্থিরো দৃঢঃ||২৫||
Adhikarana 24 (26) · Śloka 26
অমিতাঃ কর্ণবন্ধাস্তু বিজ্ঞেযাঃ কুশলৈরিহ |
যো যথা সুবিশিষ্টঃ স্যাত্তং তথা বিনিযোজযেত্ |
(কর্ণপাল্যামযান্নৄণাং পুনর্বক্ষ্যামি সুশ্রুত! |
কর্ণপাল্যাং প্রকুপিতা বাতপিত্তকফাস্ত্রযঃ(১) ||২৬||
দ্বিধা বাঽপ্যথ সংসৃষ্টাঃ কুর্বন্তি বিবিধা রুজঃ |
বিস্ফোটঃ স্তব্ধতা শোফঃ পাল্যাং দোষে তু বাতিকে(২) ||২৬||
দাহবিস্ফোটজননং শোফঃ পাকশ্চ পৈত্তিকে |
কণ্ডূঃ সশ্বযথুঃ স্তম্ভো গুরুত্বং চ কফাত্মকে(৩) ||২৬||
যথাদোষং চ সংশোধ্য কুর্যাত্তেষাং চিকিত্সিতম্ |
স্বেদাভ্যঙ্গপরীষেকৈঃ প্রলেপাসৃগ্বিমোক্ষণৈঃ(৪) ||২৬||
মৃদ্বীং ক্রিযাং বৃংহণীযৈর্যথাস্বং ভোজনৈস্তথা |
য এবং বেত্তি দোষাণাং চিকিত্সাং কর্তুমর্হতি(৫) ||২৬||
অত ঊর্ধ্বং নামলিঙ্গৈর্বক্ষ্যে পাল্যামুপদ্রবান্ |
উত্পাটকশ্চোত্পুটকঃ শ্যাবঃ কণ্ডূযুতো ভৃশম্(৬) ||২৬||
অবমন্থঃ সকণ্ডূকো গ্রন্থিকো জম্বুলস্তথা |
স্রাবী চ দাহবাংশ্চৈব শৃণ্বেষাং ক্রমশঃ ক্রিযাম্(৭) ||২৬||
অপামার্গঃ সর্জরসঃ পাটলালকুচত্বচৌ |
উত্পাটকে প্রলেপঃ স্যাত্তৈলমেভিশ্চ পাচযেত্(৮) ||২৬||
শম্পাকশিগ্রুপূতীকান্ গোধামেদোঽথ তদ্বসাম্ |
বারাহং গব্যমৈণেযং পিত্তং সর্পিশ্চ সংসৃজেত্(৯) ||২৬||
লেপমুত্পুটকে দদ্যাত্তৈলমেভিশ্চ সাধিতম্ |
গৌরীং সুগন্ধাং সশ্যামামনন্তাং তণ্ডুলীযকম্(১০) ||২৬||
শ্যাবে প্রলেপনং দদ্যাত্তৈলমেভিশ্চ সাধিতম্ |
পাঠাং রসাঞ্জনং ক্ষৌদ্রং তথা স্যাদুষ্ণকাঞ্জিকম্(১১) ||২৬||
দদ্যাল্লেপং সকণ্ডূকে তৈলমেভিশ্চ সাধিতম্ |
ব্রণীভূতস্য দেযং স্যাদিদং তৈলং বিজানতা(১২) ||২৬||
মধুকক্ষীরকাকোলীজীবকাদ্যৈর্বিপাচিতম্ |
গোধাবরাহসর্পাণাং বসাঃ স্যুঃ কৃতবৃংহণে(১৩) ||২৬||
প্রলেপনমিদং দদ্যাদবসিচ্যাবমন্থকে |
প্রপৌণ্ডরীকং মধুকং সমঙ্গাং ধবমেব চ(১৪) ||২৬||
তৈলমেভিশ্চ সম্পক্বং শৃণু কণ্ডূমতঃ ক্রিযাম্ |
সহদেবা বিশ্বদেবা অজাক্ষীরং সসৈন্ধবম্ |
এতৈরালেপনং দদ্যাত্তৈলমেভিশ্চ সাধিতম্(১৫) ||২৬||
গ্রন্থিকে গুটিকাং পূর্বং স্রাবযেদবপাট্য তু |
ততঃ সৈন্ধবচূর্ণং তু ঘৃষ্ট্বা লেপং প্রদাপযেত্(১৬) ||২৬||
লিখিত্বা তত্স্রুতং ঘৃষ্ট্বা চূর্ণৈর্লোধ্রস্য জম্বুলে |
ক্ষীরেণ প্রতিসার্যৈনং শুদ্ধং সংরোপযেত্ততঃ(১৭) ||২৬||
মধুপর্ণী মধূকং চ মধুকং মধুনা সহ |
লেপঃ স্রাবিণি দাতব্যস্তৈলমেভিশ্চ সাধিতম্(১৮) ||২৬||
পঞ্চবল্কৈঃ সমধুকৈঃ পিষ্টৈস্তৈশ্চ ঘৃতান্বিতৈঃ |
জীবকাদ্যৈঃ সসর্পিষ্কৈর্দহ্যমানং প্রলেপযেত্)(১৯) ||২৬||
View original
अमिताः कर्णबन्धास्तु विज्ञेयाः कुशलैरिह |
यो यथा सुविशिष्टः स्यात्तं तथा विनियोजयेत् |
(कर्णपाल्यामयान्नॄणां पुनर्वक्ष्यामि सुश्रुत! |
कर्णपाल्यां प्रकुपिता वातपित्तकफास्त्रयः(१) ||२६||
द्विधा वाऽप्यथ संसृष्टाः कुर्वन्ति विविधा रुजः |
विस्फोटः स्तब्धता शोफः पाल्यां दोषे तु वातिके(२) ||२६||
दाहविस्फोटजननं शोफः पाकश्च पैत्तिके |
कण्डूः सश्वयथुः स्तम्भो गुरुत्वं च कफात्मके(३) ||२६||
यथादोषं च संशोध्य कुर्यात्तेषां चिकित्सितम् |
स्वेदाभ्यङ्गपरीषेकैः प्रलेपासृग्विमोक्षणैः(४) ||२६||
मृद्वीं क्रियां बृंहणीयैर्यथास्वं भोजनैस्तथा |
य एवं वेत्ति दोषाणां चिकित्सां कर्तुमर्हति(५) ||२६||
अत ऊर्ध्वं नामलिङ्गैर्वक्ष्ये पाल्यामुपद्रवान् |
उत्पाटकश्चोत्पुटकः श्यावः कण्डूयुतो भृशम्(६) ||२६||
अवमन्थः सकण्डूको ग्रन्थिको जम्बुलस्तथा |
स्रावी च दाहवांश्चैव शृण्वेषां क्रमशः क्रियाम्(७) ||२६||
अपामार्गः सर्जरसः पाटलालकुचत्वचौ |
उत्पाटके प्रलेपः स्यात्तैलमेभिश्च पाचयेत्(८) ||२६||
शम्पाकशिग्रुपूतीकान् गोधामेदोऽथ तद्वसाम् |
वाराहं गव्यमैणेयं पित्तं सर्पिश्च संसृजेत्(९) ||२६||
लेपमुत्पुटके दद्यात्तैलमेभिश्च साधितम् |
गौरीं सुगन्धां सश्यामामनन्तां तण्डुलीयकम्(१०) ||२६||
श्यावे प्रलेपनं दद्यात्तैलमेभिश्च साधितम् |
पाठां रसाञ्जनं क्षौद्रं तथा स्यादुष्णकाञ्जिकम्(११) ||२६||
दद्याल्लेपं सकण्डूके तैलमेभिश्च साधितम् |
व्रणीभूतस्य देयं स्यादिदं तैलं विजानता(१२) ||२६||
मधुकक्षीरकाकोलीजीवकाद्यैर्विपाचितम् |
गोधावराहसर्पाणां वसाः स्युः कृतबृंहणे(१३) ||२६||
प्रलेपनमिदं दद्यादवसिच्यावमन्थके |
प्रपौण्डरीकं मधुकं समङ्गां धवमेव च(१४) ||२६||
तैलमेभिश्च सम्पक्वं शृणु कण्डूमतः क्रियाम् |
सहदेवा विश्वदेवा अजाक्षीरं ससैन्धवम् |
एतैरालेपनं दद्यात्तैलमेभिश्च साधितम्(१५) ||२६||
ग्रन्थिके गुटिकां पूर्वं स्रावयेदवपाट्य तु |
ततः सैन्धवचूर्णं तु घृष्ट्वा लेपं प्रदापयेत्(१६) ||२६||
लिखित्वा तत्स्रुतं घृष्ट्वा चूर्णैर्लोध्रस्य जम्बुले |
क्षीरेण प्रतिसार्यैनं शुद्धं संरोपयेत्ततः(१७) ||२६||
मधुपर्णी मधूकं च मधुकं मधुना सह |
लेपः स्राविणि दातव्यस्तैलमेभिश्च साधितम्(१८) ||२६||
पञ्चवल्कैः समधुकैः पिष्टैस्तैश्च घृतान्वितैः |
जीवकाद्यैः ससर्पिष्कैर्दह्यमानं प्रलेपयेत्)(१९) ||२६||
কর্ণপালিচ্ছেদবিশেষেণ কর্ণসন্ধিবন্ধানামপরিমিতত্বাদনুক্তমপি প্রকারং দর্শযন্নাহ- অমিতা ইত্যাদি| `সুবিশিষ্ট’ ইত্যত্র কেচিত্ ‘সুনিবিষ্টঃ’ ইতি পঠন্তি| কেচিদত্রৈবাধ্যাযে কর্ণপাল্যামযান্ পরিপোটাদীন্ পঠন্তি, অন্যে তু সলিঙ্গচিকিত্সিতান্ মিশ্রকচিকিত্সিতে পঠন্তি; তাংশ্চ তত্রৈব ব্যাখ্যাস্যামঃ| অন্যে তু সুশ্রুতাধ্যাযিনোঽত্র `কর্ণপাল্যামযানন্যান্ বক্ষ্যামি চতুরঃ পৃথক্’ ইত্যাদিকং গ্রন্থং সচিকিত্সিতং পঠন্তি, স ত্বাচার্যৈরনার্ষীকৃতঃ; তস্মান্ন পঠনীযঃ| অপরে পুনরত্রৈবোত্পাটকাদীন্ সচিকিত্সিতান্ পঠন্তি, অমুমপি পাঠমনার্ষমাচার্যা বর্ণযন্তি, অতোঽযমপি ন পঠিতব্যঃ||২৬||
Adhikarana 25 (27-31) · Śloka 31
বিশ্লেষিতাযাস্ত্বথ নাসিকাযা বক্ষ্যামি সন্ধানবিধিং যথাবত্ |
নাসাপ্রমাণং পৃথিবীরুহাণাং পত্রং গৃহীত্বা ত্ববলম্বি তস্য ||২৭||
তেন প্রমাণেন হি গণ্ডপার্শ্বাদুত্কৃত্য বদ্ধং ত্বথ নাসিকাগ্রম্ |
বিলিখ্য চাশু প্রতিসন্দধীত তত্ সাধুবন্ধৈর্ভিষগপ্রমত্তঃ ||২৮||
সুসংহিতং সম্যগতো যথাবন্নাডীদ্বযেনাভিসমীক্ষ্য বদ্ধ্বা |
প্রোন্নম্য চৈনামবচূর্ণযেত্তু পতঙ্গযষ্টীমধুকাঞ্জনৈশ্চ ||২৯||
সঞ্ছাদ্য সম্যক্ পিচুনা সিতেন তৈলেন সিঞ্চেদসকৃত্তিলানাম্ |
ঘৃতং চ পায্যঃ স নরঃ সুজীর্ণে স্নিগ্ধো বিরেচ্যঃ স যথোপদেশম্ ||৩০||
রূঢং চ সন্ধানমুপাগতং স্যাত্তদর্ধশেষং তু পুনর্নিকৃন্তেত্ |
হীনাং পুনর্বর্ধযিতুং যতেত সমাং চ কুর্যাদতিবৃদ্ধমাংসাম্ ||৩১||
View original
विश्लेषितायास्त्वथ नासिकाया वक्ष्यामि सन्धानविधिं यथावत् |
नासाप्रमाणं पृथिवीरुहाणां पत्रं गृहीत्वा त्ववलम्बि तस्य ||२७||
तेन प्रमाणेन हि गण्डपार्श्वादुत्कृत्य बद्धं त्वथ नासिकाग्रम् |
विलिख्य चाशु प्रतिसन्दधीत तत् साधुबन्धैर्भिषगप्रमत्तः ||२८||
सुसंहितं सम्यगतो यथावन्नाडीद्वयेनाभिसमीक्ष्य बद्ध्वा |
प्रोन्नम्य चैनामवचूर्णयेत्तु पतङ्गयष्टीमधुकाञ्जनैश्च ||२९||
सञ्छाद्य सम्यक् पिचुना सितेन तैलेन सिञ्चेदसकृत्तिलानाम् |
घृतं च पाय्यः स नरः सुजीर्णे स्निग्धो विरेच्यः स यथोपदेशम् ||३०||
रूढं च सन्धानमुपागतं स्यात्तदर्धशेषं तु पुनर्निकृन्तेत् |
हीनां पुनर्वर्धयितुं यतेत समां च कुर्यादतिवृद्धमांसाम् ||३१||
বিশ্লেষিতাযা ইত্যাদি| বিশ্লেষিতাযা ইতি ছিন্নাযাঃ| পৃথিবীরুহাণাং বৃক্ষাণাম্| তস্যেতি ছিন্ননাসিকস্য পুরুষস্য| তেন প্রমাণেনেতি বৃক্ষপত্রপ্রমাণেন| উত্কৃত্যেতি ঊর্ধ্বং ছেদযিত্বা| বদ্ধমিতি সংলগ্নং যথা স্যাত্, ‘মাংসং’ ইতি শেষঃ| তদিতি নাসিকাগ্রম্| সাধুবন্ধৈরিতি শোভনবন্ধৈঃ কৃত্বা| অপ্রমত্তঃ সাবধানঃ| সুসংহিতমিত্যাদি| সুসংহিতং সম্যগভিসমীক্ষ্য, নাডীদ্বযেন যথাবদ্বদ্ধ্বা, প্রোন্নম্য চ প্রকৃষ্টং যথা স্যাদেবমুত্থাপ্য, এনাং নাসিকামবচূর্ণযেদিতি সম্বন্ধঃ| নাডীদ্বযমত্র নলকৃতমেরণ্ডপত্রনালকৃতং বা, ন তু সীসকাদিবী(বী)টিকা; কুতঃ? সা হি গুরুত্বাদধো গচ্ছতি| পতঙ্গং রক্তচন্দনম্, অঞ্জনং রসাঞ্জনম্| সিতেন শুক্লেন| তৈলেনেত্যুক্তে তিলতৈলং লব্ধং, তিলানামিতি যত্ কৃতং তত্ প্রতিনিধিতৈলনিষেধার্থম্| পায্যঃ পাযযিতব্যঃ| সুজীর্ণে ভোজনে| অন্যে ত্বেবং পঠন্তি-"ছিন্নাং তু নাসিকাং দৃষ্ট্বা বযঃস্থস্য শরীরিণঃ| নাসানুরূপং সঞ্চ্ছিদ্য পত্রং গণ্ডে নিবেশযেত্"- ইত্যাদি||২৭-৩১||
Adhikarana 26 (32) · Śloka 32
নাডীযোগং বিনৌষ্ঠস্য নাসাসন্ধানবদ্বিধিম্ |
য এবমেব জানীযাত্ স রাজ্ঞঃ কর্তুমর্হতি ||৩২||
View original
नाडीयोगं विनौष्ठस्य नासासन्धानवद्विधिम् |
य एवमेव जानीयात् स राज्ञः कर्तुमर्हति ||३२||
অতশ্ছিন্নস্যৌষ্ঠস্য সন্ধানমাহ- নাডীযোগমিত্যাদি| ওষ্ঠস্য সন্ধানবিধির্নাসাসন্ধানবত্ কর্তব্যঃ; পরং নাডীযোগং বিনা| অর্হতি যোগ্যো ভবতি| ইদং নাসাসন্ধানৌষ্ঠসন্ধানসূত্রং পূর্বাচার্যৈরনার্ষীকৃতমপি জেজ্জটগযদাসাদিভিরঙ্গীকৃতং সুবোধত্বাচ্চ ন ব্যাখ্যাতং, তৈরঙ্গীকৃতত্বাদস্মাভিরপি সঙ্গৃহীতং, সুবোধমপি চ বৈদ্যপুত্রবোধার্থং ব্যাখ্যাতম্| দাক্ষিণাত্যাস্তু ভিষজঃ কর্ণস্যোপরি কোটিব্যধমত্র পঠন্তি| সোঽপ্যত্রাপ্রসিদ্ধেরনার্ষঃ||৩২||
Adhikarana puShpikA · Śloka 16
ইতি সুশ্রুতসংহিতাযাং সূত্রস্থানে কর্ণব্যধবন্ধবিধির্নাম ষোডশোঽধ্যাযঃ ||১৬||
View original
इति सुश्रुतसंहितायां सूत्रस्थाने कर्णव्यधबन्धविधिर्नाम षोडशोऽध्यायः ||१६||
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে ষোডশোঽধ্যাযঃ||১৬||