Adhikarana 1 (1-2) · Śloka 2
অথাতঃ সংশোধনসংশমনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातः संशोधनसंशमनीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
সংশোধনং সংশমনং চাধিকৃত্য কৃতোঽধ্যাযঃ সংশোধনসংশমনীযঃ, তস্যারম্ভমিত্যর্থঃ||১-২||
Adhikarana 2 (3) · Śloka 3
মদনকুটজজীমূতকেক্ষ্বাকুধামার্গবকৃতবেধনসর্ষপবিডঙ্গপিপ্পলীকরঞ্জপ্রপুন্নাড কোবিদারকর্বুদারারিষ্টাশ্বগন্ধাবিদুলবন্ধুজীবকশ্বেতাশণপুষ্পীবিম্বীবচামৃগের্বারবশ্চিত্রা চেত্যূর্ধ্বভাগহরাণি | তত্র, কোবিদারপূর্বাণাং ফলানি, কোবিদারাদীনাং মূলানি ||৩||
मदनकुटजजीमूतकेक्ष्वाकुधामार्गवकृतवेधनसर्षपविडङ्गपिप्पलीकरञ्जप्रपुन्नाड कोविदारकर्बुदारारिष्टाश्वगन्धाविदुलबन्धुजीवकश्वेताशणपुष्पीबिम्बीवचामृगेर्वारवश्चित्रा चेत्यूर्ध्वभागहराणि | तत्र, कोविदारपूर्वाणां फलानि, कोविदारादीनां मूलानि ||३||
🔊 Audio coming soon
প্রাগ্দ্রব্যসঙ্গ্রহণীযাধ্যাযে ব্যাধিপ্রত্যনীকা দ্রব্যগণা উক্তাঃ, সংশোধনসংশমনীযে তু দোষপ্রত্যনীকপ্রাযাঃ পঞ্চকর্মোপযোগিনঃ শোধনদ্রব্যসঙ্গ্রহগণা বাতাদিশমনদ্রব্যগণাশ্চ কথযিতব্যা ইতি; তত্র দ্বিবিধং সংশোধনং- বমনং বিরেচনং চ; তত্র বমনপূর্বকত্বাদ্বিরেচনস্য প্রথমং বমনদ্রব্যগণমভিধাতুমাহ- মদনেত্যাদি| জীমূতকো দেবদালী, ইক্ষ্বাকুঃ কটুকালাবূঃ, ধামার্গবঃ পীতপুষ্পা কোষাতকী, কৃতবেধনঃ কোষাতকীভেদঃ, সর্ষপাঃ শ্বেতসর্ষপা বিশেষেণ বমনার্হাঃ, কোবিদারঃ কাঞ্চনারঃ, কর্বুদারঃ শ্লেষ্মান্তকঃ ‘ববহার’ ইতি ‘লিহূসাডক’ ইতি চ দেশভাষযা প্রসিদ্ধঃ, অরিষ্টো নিম্বঃ, বিদুলো বেতসঃ, বন্ধুজীবো মধ্যাহ্নপুষ্পকঃ ‘মরুনীযা’ ইতি লোকে, শ্বেতা শ্বেতবচা, শণপুষ্পী শণসদৃশবিটপঃ ‘সণহুলী’ ইতি লোকে, বিম্বী কিন্দুরিকা, বচা দ্বিতীযাঽরুণা, মৃগের্বারুরিন্দ্রবারুণী, চিত্রা চিত্রাণ্ডিকা পটোলফলাকারফলা আরণ্যকচণ্ডকেত্যর্থঃ, অন্যে দ্রবন্তীমাহুঃ| শেষং প্রসিদ্ধম্| ঊর্ধ্বভাগহরাণি বমনকরাণীত্যর্থঃ| এষাং মধ্যে কানিচিদ্দ্রব্যাণি সাক্ষাদ্বামযন্তি কানিচিদ্বমনদ্রব্যমিলিতানি| কেচিদাচার্যা ‘দ্বাবিংশতিদ্রব্যাণি’ ইত্যত্র গণে নিযমমাহুঃ| এষাভবযববিভাগমাহ- তত্রেত্যাদি||৩||
Adhikarana 3 (4) · Śloka 4
বিবৃতাশ্যামাদন্তীদ্রবন্তীসপ্তলাশঙ্খিনীবিষাণিকাগবাক্ষীচ্ছগলান্ত্রীস্নুক্সু বর্ণক্ষীরীচিত্রককিণিহীকুশকাশতিল্বককম্পিল্লকরম্যকপাটলাপূগহরীতক্যা মলকবিভীতকনীলিনীচতুরঙ্গুলৈরণ্ডপূতীকমহাবৃক্ষসপ্তচ্ছদার্কা জ্যোতিষ্মতী চেত্যধোভাগহরাণি | তত্র তিল্বকপূর্বাণাং মূলানি , তিল্বকাদীনাং পাটলান্তানাং ত্বচঃ, কম্পিল্লকফলরজঃ, পূগাদীনামেরণ্ডান্তানাং ফলানি, পূতীকারগ্বধযোঃ পত্রাণি, শেষাণাং ক্ষীরাণীতি ||৪||
विवृताश्यामादन्तीद्रवन्तीसप्तलाशङ्खिनीविषाणिकागवाक्षीच्छगलान्त्रीस्नुक्सु वर्णक्षीरीचित्रककिणिहीकुशकाशतिल्वककम्पिल्लकरम्यकपाटलापूगहरीतक्या मलकबिभीतकनीलिनीचतुरङ्गुलैरण्डपूतीकमहावृक्षसप्तच्छदार्का ज्योतिष्मती चेत्यधोभागहराणि | तत्र तिल्वकपूर्वाणां मूलानि , तिल्वकादीनां पाटलान्तानां त्वचः, कम्पिल्लकफलरजः, पूगादीनामेरण्डान्तानां फलानि, पूतीकारग्वधयोः पत्राणि, शेषाणां क्षीराणीति ||४||
🔊 Audio coming soon
বিরেচনদ্রব্যাণি নির্দিশন্নাহ- ত্রিবৃদিত্যাদি| ত্রিবৃত্ রক্তমূলা ‘নিসোতৃ’ ইতি লোকেঃ; শ্যামা কৃষ্ণমূলা ত্রিবৃত্; দন্তী দন্তিনী; দ্রবন্তী দন্তীভেদঃ ‘সংবরী’ ইতি লোকে; সপ্তলা সাতলা সেহুণ্ডভেদঃ, অপরে বুধ্নামাহুঃ; শঙ্খিনী যবতিক্তাভেদঃ, শ্বেতবুধ্নেত্যপরে; বিষাণিকা মেষশৃঙ্গী; গবাক্ষী শ্বেতপুষ্পেন্দ্রবারুণী; ছগলান্ত্রী বৃদ্ধদার(রু)কঃ; স্নুক্ সেহুণ্ডঃ; সুবর্ণক্ষীর্যনন্তাসদৃশপত্রা ‘হিযাবলি ’ ইতি লোকে, ‘কঙ্গুষ্ঠ’ ইত্যপরে; কিণিহী কটভী; তিল্বকঃ স্বল্পরোধ্রঃ; কম্পিল্লকো রোচনিকঃ স্বনামখ্যাতঃ; রম্যকো দ্রেক্কা ‘বকাইণি’ ইতি লোকে, পটোলমূলমিত্যপরে; নীলিনী নীলবুধ্না(হ্না), ‘শ্রীফলিকা’ ইতি লোকে; চতুরঙ্গুলঃ কিরমালকঃ, অত্রৈকে চতুরঙ্গুলস্থানে ‘পঞ্চাঙ্গুল’ ইতি পঠন্তি, তেষাং মতে পঞ্চাঙ্গুল এরণ্ডঃ, অন্যে তু পঞ্চাঙ্গুলশব্দেন পটোলফলসদৃশফলাং লতাং স্নিগ্ধপত্রাং শারদফলামাহুঃ; পূতীকশ্চিরবিল্বঃ; মহাবৃক্ষঃ সেহুণ্ডভেদঃ, তস্য ক্ষীরম্, এতেন ন পুনরুক্তদোষঃ; সপ্তচ্ছদঃ সপ্তপর্ণঃ; জ্যোতিষ্মতী কাকমর্দনিকা| অধোভাগহরাণীতি বিরেচনানীত্যর্থঃ| শেষং সুগমম্| এষামবযববিভাগমাহ- তত্রেত্যাদি||৪||
Adhikarana 4 (5) · Śloka 5
কোশাতকী সপ্তলা শঙ্খিনী দেবদালী কারবেল্লিকা চেত্যুভযতোভাগহরাণি | এষাং স্বরসা ইতি ||৫||
कोशातकी सप्तला शङ्खिनी देवदाली कारवेल्लिका चेत्युभयतोभागहराणि | एषां स्वरसा इति ||५||
🔊 Audio coming soon
উভযভাগহরাণি নির্দিশন্নাহ- কোশাতকীত্যাদি| কোশাতকী ঘোষকঃ; সপ্তলা স্নুহীভেদঃ, অপরে শ্রীফলিকামাহুঃ; দেবদালী স্বনামখ্যাতা, ‘দেবলী’ ইতি লোকে| উভযতোভাগহরাণীতি বমনানি বিরেচনানি চেত্যর্থঃ| এতানি কোশাতকীপ্রভৃতীনি নিযমেনোভযতোভাগহরাণি, গবাক্ষীপ্রভৃতীনাং পূর্বোক্তানাং তু পত্রাদিবিশেষেণ কদাচিদ্বামকত্বং কদাচিদ্বিরেচকত্বমিতি ন তেষামুভযতোভাগহরত্বম্| এষাং কোশাতক্যাদীনাং কিং গৃহ্যত ইত্যাহ- এষামিত্যাদি| তত্র স্বরসগ্রহণং কষাযাদিনিবারণার্থম্||৫||
Adhikarana 5 (6) · Śloka 6
পিপ্পলীবিডঙ্গাপামার্গশিগ্রুসিদ্ধার্থকশিরীষমরিচকরবীরবিম্বীগিরিকর্ণিকাকিণিহীবচাজ্যোতিষ্মতী- করঞ্জার্কালর্কলশুনাতিবিষাশৃঙ্গবেরতালীশতমালসুরসার্জকেঙ্গুদীমেষশৃঙ্গীমাতুলুঙ্গীমুরঙ্গীপীলু- জাতীশালতালমধূকলাক্ষাহিঙ্গুলবণমদ্যগোশকৃদ্রসমূত্রাণীতি শিরোবিরেচনানি | তত্র করবীরপূর্বাণাং ফলানি, করবীরাদীনামর্কান্তানাং মূলানি, তালীশপূর্বাণাং কন্দাঃ, তালীশাদীনামর্জকান্তানাং পত্রাণি, ইঙ্গুদীমেষশৃঙ্গ্যোস্ত্বচঃ, মাতুলুঙ্গীমুরঙ্গীপীলুজাতীনাং পুষ্পাণি, শালতালমধূকানাং সারাঃ, হিঙ্গুলাক্ষে নির্যাসৌ, লবণানি পার্থিববিশেষাঃ; মদ্যান্যাসুতসংযোগাঃ, শকৃদ্রসমূত্রে মলাবিতি ||৬||
पिप्पलीविडङ्गापामार्गशिग्रुसिद्धार्थकशिरीषमरिचकरवीरबिम्बीगिरिकर्णिकाकिणिहीवचाज्योतिष्मती- करञ्जार्कालर्कलशुनातिविषाशृङ्गवेरतालीशतमालसुरसार्जकेङ्गुदीमेषशृङ्गीमातुलुङ्गीमुरङ्गीपीलु- जातीशालतालमधूकलाक्षाहिङ्गुलवणमद्यगोशकृद्रसमूत्राणीति शिरोविरेचनानि | तत्र करवीरपूर्वाणां फलानि, करवीरादीनामर्कान्तानां मूलानि, तालीशपूर्वाणां कन्दाः, तालीशादीनामर्जकान्तानां पत्राणि, इङ्गुदीमेषशृङ्ग्योस्त्वचः, मातुलुङ्गीमुरङ्गीपीलुजातीनां पुष्पाणि, शालतालमधूकानां साराः, हिङ्गुलाक्षे निर्यासौ, लवणानि पार्थिवविशेषाः; मद्यान्यासुतसंयोगाः, शकृद्रसमूत्रे मलाविति ||६||
🔊 Audio coming soon
শিরোবিরেচনদ্রব্যাণি নির্দেষ্টুমাহ- পিপ্পলীত্যাদি| অপামার্গঃ শিখরী ‘অন্ধডক’ ইতি লোকে; শিগ্রুঃ শোভাঞ্জনকঃ; সিদ্ধার্থঃ সর্ষপঃ; শিরীষো বিষঘাতী স্বনামখ্যাতঃ;করবীরঃ ‘কণবীর’ ইতি লোকে; বিম্বী কুন্দুরুকা; গিরিকর্ণিকা সেফন্দঃ; কিণিহী কটভী; জ্যোতিষ্মতী ককুন্দনী; অর্কালকৌ অর্কদ্বযং; শৃঙ্গবেরং শুণ্ঠী; তালীশং তালীশপত্রং; তমালং তমালপত্রং, পত্রকমিতি লোকে; সুরসা ‘তুলসী’ ইতি লোকে; অর্জকঃ কুঠেরকঃ; ইঙ্গুদী ইঙ্গুকঃ; মেষশৃঙ্গী মেঢশৃঙ্গঃ পুত্রঞ্জীবকসদৃশপত্রো বৃক্ষঃ, অন্যে কর্কটশৃঙ্গমাহুঃ; মাতুলুঙ্গী সুরভিফলা বনজাঽরণ্যবীজপূরকঃ; মুরঙ্গী রক্তকুসুমঃ শোভাঞ্জনকঃ, পীলুর্মধুরফলঃ ‘পীলু’ ইতি লোকে; জাতী মালতী; শকৃদ্রসো গোমযরসঃ; মূত্রং গোমূত্রম্| শিরোবিরেচনানীতি নস্যপ্রযোগেণ শিরস্থং শ্লেষ্মাণং বিরেচযন্তি স্রাবযন্তীত্যর্থঃ| শেষং প্রসিদ্ধম্| এষামবযববিভাগমাহ- তত্রেত্যাদি| নির্যাসৌ স্বরসাবিত্যর্থঃ| লবণানি পার্থিববিশেষা ইতি পৃথিব্যা অবযববিশেষাঃ, এতেন স্বরূপেণৈব লবণানি গ্রাহ্যাণীত্যুক্তম্| মদ্যান্যাসুতসংযোগা ইতি সন্ধানকসংযোগো মদ্যম্, অত এব তদপি স্বরূপেণৈব গ্রাহ্যম্| শকৃদ্রসমূত্রে মলাবিতি এতে মলৌ, তস্মাদেতে অপি স্বরূপেণ গ্রাহ্যে||৬||
Adhikarana 6 (7) · Śloka 7
সংশমনান্যত ঊর্ধ্বং বক্ষ্যামঃ- তত্র ভদ্রদারুকুষ্ঠহরিদ্রাবরুণমেষশৃঙ্গীবলাতিবলার্তগলকচ্ছুরাশল্লকীকুবেরাক্ষীবীরতরুসহচরাগ্নিমন্থ- বত্সাদন্যেরণ্ডাশ্মভেদকালর্কার্কশতাবরীপুনর্নবাবসুকবশিরকাঞ্চনকভার্গীকার্পাসীবৃশ্চিকালীপত্তূরবদরযবকোলকুলত্থপ্রভৃতীনি বিদারিগন্ধাদিশ্চ দ্বে চাদ্যে পঞ্চমূল্যৌ সমাসেন বাতসংশমনো বর্গঃ ||৭||
संशमनान्यत ऊर्ध्वं वक्ष्यामः- तत्र भद्रदारुकुष्ठहरिद्रावरुणमेषशृङ्गीबलातिबलार्तगलकच्छुराशल्लकीकुबेराक्षीवीरतरुसहचराग्निमन्थ- वत्सादन्येरण्डाश्मभेदकालर्कार्कशतावरीपुनर्नवावसुकवशिरकाञ्चनकभार्गीकार्पासीवृश्चिकालीपत्तूरबदरयवकोलकुलत्थप्रभृतीनि विदारिगन्धादिश्च द्वे चाद्ये पञ्चमूल्यौ समासेन वातसंशमनो वर्गः ||७||
🔊 Audio coming soon
সংশোধনমভিধায সংশমনং নির্দিশন্নাহ- ভদ্রদার্বিত্যাদি| সংশমনানীতি সম্যক্ শমযতীতি সংশমনং, সম্যক্ত্বং চ দুষ্টদোষস্যানির্হরণপূর্বকং শমনম্, অদুষ্টস্যানুদীরণং চ; ব্যাধিসংশমনং তু প্রস্তুতব্যাধেঃ সংশমনমপ্রস্তুতব্যাধেরনুদীরণম্| তদুক্তং- “ন শোধযতি যদ্দোষান্ সমান্নোদীরযত্যপি| সমীকরোতি চ ক্রুদ্ধান্ তত্ সংশমনমুচ্যতে” ইতি| দোষশব্দোঽত্র দোষেষু দোষকার্যেষু ব্যাধিষ্বপি চ বর্ততে, কার্যে কারণোপচারাত্| মেষশৃঙ্গী মেঢশৃঙ্গঃ, পুত্রঞ্জীবকতরুসদৃশপত্রো বৃক্ষঃ, অন্যে কর্কটশৃঙ্গমাহুঃ; বলাতিবলে শুক্লপীতপুষ্পং বলাদ্বযং; আর্তগলঃ ককুভঃ, কেচিদার্তগলং কণ্টকীবৃক্ষমাচক্ষতে; কচ্ছুরা কুঙ্কুমর্দনিকা, ‘কচ্ছুরা শূকশিম্বিঃ’ ইত্যন্যে; কুবেরাক্ষী কাষ্ঠপাটলা, পো(পে)টিকেত্যন্যে; বীরতরুর্বিল্বনাসিকা, শর ইত্যন্যে; সহচরঃ কণ্টশেলিযাকঃ; অগ্নিমন্থঃ ‘অগ্নিবধূঃ’ ইতি পূর্বদেশে প্রসিদ্ধঃ; বত্সাদনী গুডূচী, বীর্যেণ গুডূচী বাতং হন্তি, রসেন কফপিত্তে; অশ্মভেদকঃ পাষাণভেদকঃ, বসুকঃ শিবমল্লিকা, বকপুষ্পমিতি লোকে; বশিরঃ সূর্যাবর্তঃ, অপামার্গ ইত্যপরে; কাঞ্চনকো ধত্তূরকঃ, ‘কর্চূর’ ইত্যন্যে পঠন্তি, কর্চূরঃ শটী; কার্পাসী বনকার্পাসিকা, কার্পাসবিটপসদৃশী; বৃশ্চিকালী বৃশ্চিযাকঃ; পত্তূরঃ কুচন্দনম্| শেষং প্রসিদ্ধং, পূর্বং ব্যাখ্যাতং চ| প্রভৃতিগ্রহণান্মাষতিলাতসীপ্রভৃতীনাং গ্রহণম্| সমাসেন সঙ্ক্ষেপেণ, বিস্তরেণ ত্বন্নপানাদ্যনিলহরগ্রহণশ্রুতিপ্রতিপাদিতং যাবদ্ভূজলানলগুণবহুলং দ্রব্যং বাতসংশমনমিতি||৭||
Adhikarana 7 (8) · Śloka 8
চন্দনকুচন্দনহ্রীবেরোশীরমঞ্জিষ্ঠাপযস্যাবিদারীশতাবরীগুন্দ্রাশৈবলকহ্লারকুমুদোত্পলকন্দ(দ)লীদূর্বামূর্বাপ্রভৃতীনি কাকোল্যাদিঃ সারিবাদিরঞ্জনাদিরুত্পলাদির্ন্যগ্রোধাদিস্তৃণপঞ্চমূলমিতি সমাসেন পিত্তসংশমনো বর্গঃ ||৮||
चन्दनकुचन्दनह्रीबेरोशीरमञ्जिष्ठापयस्याविदारीशतावरीगुन्द्राशैवलकह्लारकुमुदोत्पलकन्द(द)लीदूर्वामूर्वाप्रभृतीनि काकोल्यादिः सारिवादिरञ्जनादिरुत्पलादिर्न्यग्रोधादिस्तृणपञ्चमूलमिति समासेन पित्तसंशमनो वर्गः ||८||
🔊 Audio coming soon
পিত্তসংশমনং নির্দিশন্নাহ- চন্দনেত্যাদি| চন্দনং শ্রীখণ্ডং; কুচন্দনং রক্তচন্দনং; হ্রীবেরং বালকং; পযস্যা ক্ষীরকাকোলী; বিদারী বিদারীকন্দঃ; শৈবলং শৈবালং; কহ্লারং রক্তোত্পলং ‘বৃহত্পত্রিকা’ ইতি লোকে, অন্যে সৌগন্ধিকোত্পলং; কুমুদোত্পলং শ্বেতোত্পলং, কন্দলী শ্বেতশ্লক্ষ্ণবহুপুটকন্দবিশেষঃ ‘সর্পচ্ছত্রকম্’ ইতি লোকে; মূর্বা কন্দলীসদৃশস্বল্পবিটপঃ ‘হধোড’ ইতি লোকে| প্রভৃতিগ্রহণাদনুক্তমপি মধুরতিক্তকষাযং দ্রব্যং গ্রাহ্যম্| সমাসগ্রহণেন ত্বন্নপানাদৌ পিত্তহরত্বেন যদন্যদপ্যুদিতং খভূমিজলানিলভূযিষ্ঠং তদপি পিত্তশমনং গ্রাহ্যম্| ননু, চন্দনকুচন্দনে সারিবাদৌ, পযস্যা কাকোল্যাদৌ, উত্পলাদীন্যুত্পলাদিগণে পঠিতান্যেব, তত্কথং পৃথঙ্নির্দেশ ইতি? ব্রূমঃ, সমস্তব্যস্তানাং ত্রিচতুরাণাং গুণবিশেষজ্ঞাপনায পৃথক্ পাঠঃ| যষ্টীমধুকং তু শীতকষাযাদিকল্পনযা পিত্তং শমযতি বামনীযদ্রব্যসংযুতং তু বামনীযমিতি ন দোষঃ||৮||
Adhikarana 8 (9) · Śloka 9
কালেযকাগুরুতিলপর্ণীকুষ্ঠহরিদ্রাশীতশিবশতপুষ্পাসরলারাস্নাপ্রকীর্যোদকীর্যেঙ্গুদীসুমনা- কাকাদনীলাঙ্গলকীহস্তিকর্ণমুঞ্জাতকলামজ্জকপ্রভৃতীনি বল্লীকণ্টকপঞ্চমূল্যৌ পিপ্পল্যাদির্বৃহত্যাদির্মুষ্ককাদির্বচাদিঃ সুরসাদিরারগ্বধাদিরিতি সমাসেন শ্লেষ্মসংশমনো বর্গঃ ||৯||
कालेयकागुरुतिलपर्णीकुष्ठहरिद्राशीतशिवशतपुष्पासरलारास्नाप्रकीर्योदकीर्येङ्गुदीसुमना- काकादनीलाङ्गलकीहस्तिकर्णमुञ्जातकलामज्जकप्रभृतीनि वल्लीकण्टकपञ्चमूल्यौ पिप्पल्यादिर्बृहत्यादिर्मुष्ककादिर्वचादिः सुरसादिरारग्वधादिरिति समासेन श्लेष्मसंशमनो वर्गः ||९||
🔊 Audio coming soon
কফসংশমনং নির্দিশন্নাহ- কালেযকেত্যাদি| কালেযকঃ কৃষ্ণবর্ণচন্দনবিশেষো ‘মলযাদ্রিচন্দনম্’ ইতি লোকে; তিলপর্ণী হুলহুলঃ; শীতশিবং কর্পূরং, শতপুষ্পাভেদমেকে, গবেধুকেত্যপরে; সরলা ত্রিবৃত্; প্রকীর্যা কণ্টকী বিটপকরঞ্জঃ; উদকীর্যা চিরবিল্বঃ; ইঙ্গুদী ইঙ্গুকঃ, ‘পুত্রঞ্জীবক’ ইত্যন্যে; সুমনা জাতী; কাকাদনী হিংস্রা; লাঙ্গলকী কলিকারিকা; হস্তিকর্ণো গজকর্ণাকারৈকপত্রঃ, ‘ভূপলাশ’ ইতি লোকে, রক্তৈরণ্ড ইত্যন্যে; মুঞ্জাতকঃ; স্বনামখ্যাতঃ স্বল্পকন্দ উত্তরাপথে; লামজ্জকমুশীরভেদঃ| কেষাঞ্চিদত্র পিপ্পল্যাদিবচাদিপঠিতানাং পুনর্বচনং বিশেষেণ কফসংশমনত্বদর্শনার্থং; মুঞ্জাতকস্য বাতপিত্তহরত্বেঽপি শ্লেষ্মহরত্বেন প্রাযস্ত্রিদোষহরত্বং দর্শযন্তি| প্রভৃতিগ্রহণাদনুক্তকটুতিক্তকষাযাণামুপসংহারঃ| সমাসেনেতি বিস্তরেণ ত্বন্নপানাদৌ তথা তেজোঽনিলাকাশগুণভূযিষ্ঠমনুক্তমপি দ্রব্যং কফসংশমনমিতি||৯||
Adhikarana 9 (10) · Śloka 10
তত্র সর্বাণ্যেবৌষধানি ব্যাধ্যগ্নিপুরুষবলান্যভিসমীক্ষ্য বিদধ্যাত্ | তত্র, ব্যাধিবলাদধিকমৌষধমুপযুক্তং তমুপশম্য ব্যাধিং ব্যাধিমন্যমাবহতি; অগ্নিবলাদধিকমজীর্ণং বিষ্টভ্য বা পচ্যতে; পুরুষবলাদধিকং গ্লানিমূর্চ্ছামদানাবহতি সংশমনম্; এবং সংশোধনমতিপাতযতি | হীনমেভ্যো দত্তমকিঞ্চিত্করং ভবতি | তস্মাত্ সমমেব বিদধ্যাত্ ||১০||
तत्र सर्वाण्येवौषधानि व्याध्यग्निपुरुषबलान्यभिसमीक्ष्य विदध्यात् | तत्र, व्याधिबलादधिकमौषधमुपयुक्तं तमुपशम्य व्याधिं व्याधिमन्यमावहति; अग्निबलादधिकमजीर्णं विष्टभ्य वा पच्यते; पुरुषबलादधिकं ग्लानिमूर्च्छामदानावहति संशमनम्; एवं संशोधनमतिपातयति | हीनमेभ्यो दत्तमकिञ्चित्करं भवति | तस्मात् सममेव विदध्यात् ||१०||
🔊 Audio coming soon
অতঃপরং সংশোধনসংশমনদ্রব্যমাত্রাং নিযমযন্নাহ- তত্রেত্যাদি| সর্বাণীতি সংশোধনানি সংশমনানি চেত্যর্থঃ| ব্যাধ্যগ্নিপুরুষাণাং চ বলং শক্তিমভিসমীক্ষ্য ন্যূনাধিকভাবেন, বিদধ্যাত্ কুর্যাত্| ব্যাধিশব্দেন দোষা রোগাশ্চ| তেষাং ব্যাধ্যাদীনাং বলাদিকমনপেক্ষ্য ভেষজপ্রযোগে ক্রিযমাণে ব্যাধ্যাদিবলাধিকে দোষং নির্দিশন্নাহ- তত্রেত্যাদি| বিষ্টভ্য বা পচ্যত ইতি চিরকালং স্থিরীভূয শূলাদিকং কৃত্বেত্যর্থঃ| গ্লানিঃ শরীরশৈথিল্যং, মূর্চ্ছা চেতনাচ্যুতিঃ, মদো মদ্যমত্তস্যেব; আবহতি করোতি| শমনমিতি সংশমনৌষধমিত্যর্থঃ| সংশোধনদোষমাহু- এবং সংশোধনমিতি|-এবমেতদ্দোষং সংশোধনমপি করোতীত্যর্থঃ| অতিপাতযতি অতিপাতনমপ্যধিকং করোত্যাতুরবলস্যেত্যর্থঃ| ব্যাধিবলন্যূনাযা ঔষধমাত্রাযা দানে দোষমাহ- হীনেত্যাদি| অকিঞ্চিত্করং ন কিঞ্চিত্ করোতি অনর্থকমিত্যর্থঃ; অন্যেঽকিঞ্চিত্করমল্পার্থকরমিত্যাহুঃ; নঞ্ ঈষদর্থে| সিদ্ধিহেতুমুপাধিং দর্শযন্নাহ- তস্মাদিত্যাদি| সমমেব রোগাদিসমবলমিত্যর্থঃ||১০||
Adhikarana 10 (11) · Śloka 11
ভবন্তি চাত্র- রোগে শোধনসাধ্যে তু যো ভবেদ্দোষদুর্বলঃ | তস্মৈ দদ্যাদ্ভিষক্ প্রাজ্ঞো দোষপ্রচ্যাবানং মৃদু ||১১||
भवन्ति चात्र- रोगे शोधनसाध्ये तु यो भवेद्दोषदुर्बलः | तस्मै दद्याद्भिषक् प्राज्ञो दोषप्रच्यावानं मृदु ||११||
🔊 Audio coming soon
দুর্বলস্য বলবচ্ছোধনং ন কর্তব্যমিত্যাহ- রোগ ইত্যাদি| যো ভবেদ্দোষদুর্বলঃ যঃ পুরুষো দৌষৈর্দুর্বলো ন তূপবাসাদিভিঃ; যস্মাদ্দোষদুর্বলে দোষহরণাদেব বলং ভবতি, উপবাসাদিকৃশে ত্বপহৃতেঽপি দোষে বলং ন ভবতি| দোষপ্রচ্যাবনং বিরেচনম্| মৃদ্বিতি মৃদুবীর্যং চতুরঙ্গুলবিরেকাদি||১১||
Adhikarana 11 (12-13) · Śloka 13
চলে দোষে মৃদৌ কোষ্ঠে নেক্ষেতাত্র বলং নৃণাম্ | অব্যাধিদুর্বলস্যাপি শোধনং হি তদা ভবেত্ ||১২|| স্বযং প্রবৃত্তদোষস্য মৃদুকোষ্ঠস্য শোধনম্ | ভবেদল্পবলস্যাপি প্রযুক্তং ব্যাধিনাশনম্ ||১৩||
चले दोषे मृदौ कोष्ठे नेक्षेतात्र बलं नृणाम् | अव्याधिदुर्बलस्यापि शोधनं हि तदा भवेत् ||१२|| स्वयं प्रवृत्तदोषस्य मृदुकोष्ठस्य शोधनम् | भवेदल्पबलस्यापि प्रयुक्तं व्याधिनाशनम् ||१३||
🔊 Audio coming soon
অবস্থাবিশেষেণাব্যাধিদুর্বলেঽপি শোধনং দর্শযন্নাহ- চল ইত্যাদি| চলে ইতি স্বস্থানাচ্চলিত ইত্যর্থঃ| অত্রেতি চলে দোষে| মৃদৌ কোষ্ঠ ইত্যস্যামবস্থাযামিত্যর্থঃ| অব্যাধিদুর্বলস্যাপি উপবাসাদিদুর্বলস্যাপি, হি যস্মাদর্থে, তদা ভবেত্ ‘হিতম্’ ইত্যধ্যাহারঃ| ‘অব্যাধিদুর্বলস্যাপী’ ইত্যত্র কেচিত্ ‘অব্যাপদ্দুর্বলস্যাপি’ ইতি পঠন্তি| অব্যাপচ্ছোধনং হিতং তদা ভবতীত্যর্থঃ; অব্যাপচ্ছোধনং তদুচ্যতে শূলাদীনি যন্ন করোতি| অত্রান্তরে কেচিত্ পঠন্তি- স্বযমিত্যাদি| ন চাযং সর্বনিবন্ধেষু দৃশ্যত ইতি||১২-১৩||
Adhikarana 12 (15) · Śloka 14
ব্যাধ্যাদিষু তু মধ্যেষু ক্বাথস্যাঞ্জলিরিষ্যতে | বিডালপদকং চূর্ণং দেযঃ কল্কোঽক্ষসম্মিতঃ ||১৪||
व्याध्यादिषु तु मध्येषु क्वाथस्याञ्जलिरिष्यते | बिडालपदकं चूर्णं देयः कल्कोऽक्षसम्मितः ||१४||
🔊 Audio coming soon
ব্যাধ্যগ্নিপুরুষেষু মধ্যমবলেষু কিযন্মাত্রমৌষধং দদ্যাদিত্যাহ- ব্যাধ্যাদিষ্বিত্যাদি| মধ্যেষু মধ্যমবলেষু| ক্বাথস্যাঞ্জলিরিষ্যত ইতি ক্বাথগ্রহণাচ্ছৃতশীতফাণ্টানাং, ন তু স্বরসক্ষীরযোঃ, তে হি গুরুত্বাদল্পপ্রমাণে প্রযোক্তব্যে| অঞ্জলিশ্চত্বারি পলানি| বিডালপদকং কর্ষ ইত্যর্থঃ| অক্ষসম্মিত ইতি কর্ষপ্রমাণ ইত্যর্থঃ, কল্কো দ্রবপিষ্টঃ| এতেন ব্যাধ্যাদিষু হীনবলেষ্বঞ্জল্যাদযোঽপ্যপকর্ষণীযাঃ, তেষামেবাধিকে বলে তূত্কর্ষণীযা ইতি| অনুবাসনাস্থাপনশিরোবিরেচনাদীনামন্যত্র মাত্রোদ্দেশঃ কার্য ইতি||১৫||
Adhikarana puShpikA · Śloka 39
ইতি সুশ্রুতসংহিতাযাং সূত্রস্থানে সংশোধনসংশমনীযো নামৈকোনচত্বারিংশোঽধ্যাযঃ ||৩৯||
इति सुश्रुतसंहितायां सूत्रस्थाने संशोधनसंशमनीयो नामैकोनचत्वारिंशोऽध्यायः ||३९||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে একোনচত্বারিংশত্তমোঽধ্যাযঃ||৩৯||