27. śalyāpanayanīyādhyāyaḥ

Adhikarana 1 (1-3) · Śloka 3

অথাতঃ শল্যাপনযনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| শল্যং দ্বিবিধমববদ্ধমনববদ্ধং চ ||৩||

অববদ্ধমনববদ্ধং চেতি তত্রাববদ্ধং বিশেষেণাঽঽসক্তম্; অন্যে তু “অস্থ্যাদিপ্রবিষ্টমববদ্ধম্ , ইতরদনববদ্ধম্” ইতি মন্যন্তে||১-৩||

Adhikarana 2 (4) · Śloka 4

তত্র সমাসেনানববদ্ধশল্যোদ্ধরণার্থং পঞ্চদশ হেতূন্ বক্ষ্যামঃ | তদ্যথা- স্বভাবঃ, পাচনং, ভেদনং, দারণং, পীডনং, প্রমার্জনং, নির্ধ্মাপনং, বমনং, বিরেচনং, প্রক্ষালনং, প্রতিমর্শঃ, প্রবাহণম্, আচূষণম্, অযস্কান্তো, হর্ষশ্চেতি ||৪||

তত্রানববদ্ধস্যৈব প্রথমমঙ্গীকৃতস্য পরিসঙ্খ্যায হেতূন্ পরিহরণে দর্শযন্নাহ- তত্রেত্যাদি| তত্রেতি তযোর্মধ্যে| স্বভাবঃ প্রকৃতিঃ; পাচনমিতি অপক্বশল্যস্য পাচনদ্রব্যৈঃ পাকবিধানং; ভেদনমিতি বৃদ্ধিপত্রাদিভিঃ শস্ত্রৈঃ স্ফোটনং; দারণমিতি চিরবিল্বাদিভির্মিশ্রকোক্তৈরৌষধৈর্বিদারণং; পীডনমিতি ‘দ্রব্যাণাং পিচ্ছিলানাং’(সূ. অ.৩৭) ইত্যাদিমিশ্রকোক্তৈর্দ্রব্যৈঃ কৃত্বা পীড্যতে যত্; প্রমার্জনমিতি বালবস্ত্রাভিঃ প্রোঞ্ছনং; নির্ধ্মাপনমিতি প্রধমনম্, এতদুক্তং ভবতি পিপ্পলীকট্ফলাদিচূর্ণস্য নাড্যা নাসান্তঃপ্রাপণং; প্রতিমর্শঃ অঙ্গুল্যাদিঘর্ষণং; প্রবাহণং বি(নি)কুন্থনম্; আচূষণং মুখশৃঙ্গৈঃ কৃত্বা যচ্চূষ্যতে; অযস্কান্তঃ পাষাণবিশেষঃ, যদ্যপ্যযস্কান্ত ইতি সামান্যেনোপাত্তস্তথাঽপ্যত্র কর্ষকো গ্রাহ্যঃ; হর্ষস্তুষ্টিঃ||৪||

Adhikarana 3 (5) · Śloka 5

তত্রাশ্রুক্ষবথূদ্গারকাসমূত্রপুরীষানিলৈঃ স্বভাববলপ্রবৃত্তৈর্নযনাদিভ্যঃ পততি | মাংসাবগাঢং শল্যমবিদহ্যমানং পাচযিত্বা প্রকোথাত্তস্য পূযশোণিতবেগাদ্গৌরবাদ্বা পততি | পক্বমভিদ্যমানং ভেদযেদ্দারযেদ্বা | ভিন্নমনিরস্যমানং পীডনীযৈঃ পীডযেত্ পাণিভির্বা | অণূন্যক্ষশল্যানি পরিষেচনাধ্মাপনৈর্বালবস্ত্রপাণিভিঃ প্রমার্জযেত্ | আহারশেষশ্লেষ্মহীনাণুশল্যানি শ্বসনোত্কাসনপ্রধমনৈর্নির্ধমেত্ | অন্নশল্যানি বমনাঙ্গুলিপ্রতিমর্শপ্রভৃতিভিঃ | বিরেচনৈঃ পক্বাশযগতানি | ব্রণদোষাশযগতানি প্রক্ষালনৈঃ | বাতমূত্রপুরীষগর্ভসঙ্গেষু প্রবাহণমুক্তম্ | মারুতোদকসবিষরুধিরদুষ্টস্তন্যেষ্বাচূষণমাস্যেন বিষাণৈর্বা | অনুলোমমনববদ্ধমকর্ণমনল্পব্রণমুখমযস্কান্তেন | হৃদ্যবস্থিতমনেককারণোত্পন্নং শোকশল্যং হর্ষেণেতি ||৫||

স্বভাবাদিহেতোর্বিষযমাহ- তত্রাশ্রুক্ষবথূদ্গারেত্যাদি| তত্র তেষাং পঞ্চদশানাং মধ্যে| এতৈরশ্রুপ্রভৃতিভিঃ স্বভাববলং স্বভাবশক্তিঃ, ততঃ প্রবৃত্তৈরাগতৈর্হেতুভির্নযনাদিভ্যঃ শরীরপ্রদেশেভ্যো রজঃপ্রভৃতি শল্যং পততীত্যর্থঃ| পাচনবিষযমাহ- মাংসাবগাঢমিত্যাদি| অবগাঢম্ অভ্যন্তরগতম্| অবিদহ্যমানম্ অপচ্যমানম্| প্রকোথাত্তস্যেতি পূতিভাবান্মাংসস্যেত্যর্থঃ| ভেদনদারণযোর্বিষযমাহ- পক্বমিত্যাদি| পীডনবিষযমাহ- ভিন্নমিত্যাদি| অনিরস্যমানম্ অনিষ্ক্রামন্তম্| প্রমার্জনবিষযমাহ- অণূনীত্যাদি| অক্ষাণি ইন্দ্রিযাণি| পরিষেচনং ধারাভিষেচনম্| আধ্মাপনম্ অক্ষিষু মুখমারুতস্য প্রাপণম্| নির্ধ্মাপনবিষযমাহ- আহারশেষত্যাদি|- ভুঞ্জানস্য নাসান্তরাদিস্থিতমন্নমাহারশেষঃ| হীনানাং পতিতানাং ভ্রষ্টানাং শল্যানামল্পাবযবা হীনাণুশল্যান্যুচ্যন্তে| শ্বসনং শ্বাসঃ, উত্কাস উত্কৃষ্টং কাসনম্| নির্ধমেত্ নিষ্কাসযেত্| বমনপ্রতিমর্শযোর্বিষযমাহ- অন্নশল্যানীত্যাদি| অন্নশল্যং বমনেন পততি, অঙ্গুলিপ্রতিমর্শেন চ; অঙ্গুলিপ্রতিমর্শঃ অঙ্গুল্যাদিঘর্ষণম্| বিরেচনবিষযং দর্শযন্নাহ- বিরেচনৈঃ পক্বাশযগতানীতি|- পক্বাশযগতানি ‘শল্যানি’ ইতি শেষঃ| প্রক্ষালনবিষযমাহ- ব্রণেত্যাদি| ব্রণদোষঃ পূযঃ, স এব শল্যং, ব্রণাশযগতান্যন্যান্যপি শল্যানীত্যর্থঃ| প্রবাহণবিষযমাহ- বাতেত্যাদি| সঙ্গঃ অপ্রবৃত্তিঃ| চূষণবিষযমাহ- মারুতেত্যাদি| অযস্কান্তবিষযমাহ- অনুলোমমিত্যাদি| হর্ষবিষযমাহ- হৃদ্যবস্থিতমিত্যাদি| কেচিদনববদ্ধশল্যহরণমধ্যে ভেদনদারণপীডনবমনবিরেচনপ্রক্ষালনানি ন মন্যন্তে, তেষাং মতে ভেদনদারণযোরববদ্ধশল্যবিষযত্বং, পীডনাদীনাং চতুর্ণাং যথাসম্ভবমুক্তেষ্বেবান্তর্ভাবঃ||৫||

Adhikarana 4 (6) · Śloka 6

সর্বশল্যানাং তু মহতামণূনাং বা দ্বাবেবাহরণহেতূ ভবতঃ- প্রতিলোমোঽনুলোমশ্চ ||৬||

পঞ্চগতীনাং শল্যানামপি সর্বেষামমার্গমার্গভেদেন দ্বিবিধমাহরণং দর্শযন্নাহ- সর্বশল্যানামিত্যাদি| প্রবেশমার্গেণৈবাহরণং প্রতিলোমং, তদ্বিপরীতং চানুলোমম্||৬||

Adhikarana 5 (7) · Śloka 7

তত্র প্রতিলোমমর্বাচীনমানযেত্ , অনুলোমং পরাচীনম্ ||৭||

প্রতিলোমানুলোমাহরণযোর্বিষযমাহ- তত্রেত্যাদি| তত্রেতি তযোর্মধ্যে| অর্বাচীনমিতি নাতিদূরপ্রবেশাত্, নিবিষ্টশল্যদ্বারাপেক্ষযা কাযস্য পূর্বার্ধস্থিতং শল্যমার্বাচীনমুচ্যতে| তত্তু শল্যং প্রতিলোমমানযেত্| কোঽর্থঃ? পাশ্চাত্যেঽর্বাচীনদেশে আনযেত্, প্রবেশমার্গেণৈবানযেত্; অনুলোমেন পরার্ধেন নির্হ্রিযমাণমবিদ্ধমপি বহুতরং প্রদেশং বেধযেত্; তত্র মরণমুপদ্রবা বা ভবন্তি| অনুলোমমিত্যাদি| পরাচীনমিতি দূরপ্রবিষ্টং; কাযস্য পরার্ধনির্গতং শল্যমুচ্যতে| তচ্ছল্যমনুলোমমানযেত্| কোঽর্থঃ? অগ্রেতনে পরাচীনে প্রদেশে আনযেত্||৭||

Adhikarana 6 (8) · Śloka 8

উত্তুণ্ডিতং ছিত্ত্বা নির্ঘাতযেচ্ছেদনীযমুখম্ ||৮||

যদা ত্বনতিবেগাচ্ছল্যমগ্রেতনপ্রদেশেন নির্গতমুত্তুণ্ডিতমুখং চ ভবতি তদা তস্য শল্যস্য ছেদনীযমুখস্য ছেদ্যপ্রদেশজটিতস্য পরাচীনানুলোমহরণে কীদৃশং বিধানমিতি দর্শযন্নাহ- উত্তুণ্ডিতমিত্যাদি| উত্তুণ্ডিতমূর্ধ্বং নিঃসরন্মুখমিব| নির্ঘাতযেদিতি ইতস্ততশ্চালযেদ্ধস্তেন মুদ্গরাদিনা বা; ততশ্চানুলোমমাহরেত্| ছেদনীযমুখমিতি কণ্টকখর্জূরীপত্রপ্রভৃতিকম্, এতেনোত্তুণ্ডিতং ছেদনীযমুখং পরান্নির্গতমুখং ছেদ্যপ্রদেশজটিতং চ শল্যং পরাচীনানুলোমাহরণবিষয ইত্যুক্তং ভবতি||৮||

Adhikarana 7 (9) · Śloka 9

ছেদনীযমুখান্যপি কুক্ষিবক্ষঃকক্ষাবঙ্ক্ষণপর্শুকান্তরপতিতানি চ হস্তশক্যং যথামার্গেণ হস্তেনৈবাপহর্তুং প্রযতেত ||৯||

কিং ছেদনীযমুখস্য সর্বত্রাযং বিধির্নেত্যাহ- ছেদনীযেত্যাদি| বক্ষ ইতি হৃদযম্| হস্তেনাহর্তুং যচ্ছক্যতে শল্যং তত্ হস্তশক্যম্| যথামার্গেণেতি প্রবেশমার্গেণেত্যর্থঃ| হস্তেনৈবেতি হস্তেনৈবোদ্ধরেত্, ন কদাচিন্মুদ্গরাদিভিশ্চালযেত্| প্রযতেত প্রযত্নং কুর্বীত| অন্যে তু ‘অচ্ছেদনীযমুখানি তু’ ইত্যাদি পাঠং পঠন্তি, ব্যাখ্যানযন্তি চ- ন কেবলমনুত্তুণ্ডিতান্যনির্ঘাত্যমুখান্যপীতি সমুচ্চীযতে তুশব্দেন, তানি কুক্ষ্যাদিপতিতানি সর্বাণ্যেবাচ্ছেদ্যত্বাদনির্ঘাত্যাহরণীযানি | এতেনৈতদুক্তং ভবতি- পরাচীনানামপি শল্যানামনুলোমমাহরণীযানামপি প্রতিলোমমেবাহরণং কর্তব্যম্, অনুলোমাহরণে কুক্ষ্যাদিষু মহান্ ছেদানুবন্ধো ভবেত্| পর্শুকান্তরপতিতানি চেত্যস্যাগ্রে, “অনুত্তুণ্ডিতশল্যানি ছেদনীযমুখানি চ| অনির্ঘাত্যানি জানীযাদ্ভূযশ্ছেদানুবন্ধতঃ”- ইতি ভোজসংহিতোক্তং কেচিত্ পাঠং পঠন্তি, স চ প্রমাদপাঠঃ, নিবন্ধেষ্বদর্শনাত্||৯||

Adhikarana 8 (10) · Śloka 10

হস্তেনৈবাপহর্তুমশক্যং বিশস্য শস্ত্রেণ যন্ত্রেণাপহরেত্ ||১০||

হস্তেনাপহর্তুমশক্যে শল্যে কিং বিধানমিতি দর্শযতি- হস্তেনেত্যাদি| বিশস্য ছিত্ত্বা শস্ত্রেণেত্যর্থঃ| কেচিত্ ‘হস্তেন চাহর্তুমশক্যে অবিশস্য যন্ত্রেণাপহরেত্’ ইতি পাঠং মন্যন্তে| তেষাং মতে অবিশস্য অচ্ছিত্ত্বেত্যর্থঃ, হস্তেন চেতি চকারেণ যন্ত্রাহরণাশক্যস্য শল্যস্য বিশস্যেত্যুপলভ্যতে||১০||

Adhikarana 9 (11) · Śloka 11

ভবতি চাত্র- শীতলেন জলেনৈনং মূর্চ্ছন্তমবসেচযেত্ | সংরক্ষেদস্য মর্মাণি মুহুরাশ্বাসযেচ্চ তম্ ||১১||

শল্যাহরণে উপদ্রবচিকিত্সাসূত্রং নির্দিশন্নাহ- শীতলেনেত্যাদি| এনমিতি শল্যাতুরম্| অবসেচযেদিতি সিঞ্চেদিত্যর্থঃ| আশ্বাসযেদিতি ক্ষীরতর্পণাদিদানেন| বাহুল্যেনামুং পাঠং কেচিন্ন পঠন্তি| গযদাসেন তু পঠিত্বাঽযং পাঠোঽত্রান্তরে ব্যাখ্যাতঃ, যুক্তশ্চাযং, তস্মাত্ পঠনীয এব||১১||

Adhikarana 10 (12) · Śloka 12

ততঃ শল্যমুদ্ধৃত্য নির্লোহিতং ব্রণং কৃত্বা স্বেদার্হমগ্নিঘৃতপ্রভৃতিভিঃ সংস্বেদ্যাবদহ্য প্রদিহ্য সর্পির্মধুভ্যাং বদ্ধ্বাঽঽচারিকমুপদিশেত্ | (সিরাস্নাযুবিলগ্নং শলাকাদিভির্বিমোচ্যাপনযেত্; শ্বযথুগ্রস্তবারঙ্গং সমবপীড্য শ্বযথুং; দুর্বলবারঙ্গং কুশাদিভির্বদ্ধ্বা|) ||১২||

হৃতে শল্যে পশ্চাত্কর্ম দর্শযন্নাহ- তত ইত্যাদি| নির্লোহিতমিতি অরুধিরবন্তম্ | সংস্বেদ্যেতি অতিনিঃসৃতশোণিতমবেদনং সুখোষ্ণেন ঘৃতেন, তদিতরমগ্নিনা সংস্বেদ্যেতি সম্বন্ধঃ| অবদহ্যেতি অগ্নিকৃত্যান্ ব্রণান্ দগ্ধ্বেত্যর্থঃ| প্রদিহ্যেতি লেপযিত্বা, অস্বেদ্যমতিস্রুতশোণিতং চ| অত্র কেচিত্ ‘অবদহ্য’ ইতি ন পঠন্তি, ‘প্রদিহ্য’ ইত্যস্য স্থানে ‘তর্পযিত্বা’ ইতি পঠন্তি| অত্র কেচিদ্গড্ডুরিকাপ্রবাহেণ ভোজোক্তং ‘সিরাস্নাযুবিলগ্নং শলাকাভির্বিমোচ্যাপনযেত্, শ্বযথুগ্রস্তবারঙ্গং সমবপীড্য শ্বযথুং, দুর্বলবারঙ্গং কুশাদিভির্বদ্ধ্বা’ ইতি পাঠং পঠন্তি, প্রবাহপঠিতা ব্যাখ্যানযন্তি চ- বারঙ্গং শস্ত্রনালম্, অবপীড্য শ্বযথুমপনযেদিতি সম্বন্ধঃ; কুশাদিভিঃ বধ্বা ‘অপনযেত্’ ইত্যত্রাপি যোজ্যতে; কুশা বংশবেত্রাদিকম্বী| অযং চ বিধিস্তন্ত্রান্তরাদবসেযো ন সুশ্রুতসংহিতাযামস্তি, তন্ত্রান্তরদর্শনালসৈস্ত্বত্রৈবানীয লিখিত ইত্যত্র ন পঠনীয এব||১২||

Adhikarana 11 (13) · Śloka 13

হৃদযমভিতো বর্তমানং শল্যং শীতজলাদিভিরুদ্বেজিতস্যাপহরেদ্যথামার্গং; দুরুপহরমন্যতোঽপবাধ্যমানং পাটযিত্বোদ্ধরেত্ ||১৩||

বক্ষঃপতিতেষু বিশেষবিধিমাহ- হৃদযমিত্যাদি| হৃদযমভিতো বর্তমানমিতি হৃদযসমীপে স্থিতমিত্যর্থঃ| উদ্বেজিতস্য উদ্বিগ্নহৃদযস্য, শীতজলাদুদ্বেজনং চ ক্লমপরিহারায| যথামার্গমিতি যেনৈব মার্গেণ প্রবিষ্টং তেনৈবাপহরেদিত্যর্থঃ| তেনাশক্যে উপাযান্তরং দর্শযন্নাহ- দুরুপহরমিত্যাদি| দুঃখেনোপহ্রিযতে তদ্দুরুপহরম্| অন্যত ইতি অন্যস্মিন্নপি প্রদেশে| অপবাধ্যমানমিতি মর্মপীডাকরং, ‘শল্যং’ ইতি শেষঃ| পাটযিত্বেতি দারযিত্বেত্যর্থঃ||১৩||

Adhikarana 12 (14) · Śloka 14

অস্থিবিবরপ্রবিষ্টমস্থিবিদষ্টং বাঽবগৃহ্য পাদাভ্যাং যন্ত্রেণাপহরেত্, অশক্যমেবং বা বলবদ্ভিঃ সুপরিগৃহীতস্য যন্ত্রেণ গ্রাহযিত্বা শল্যবারঙ্গং প্রবিভুজ্য ধনুর্গুণৈর্বদ্ধ্বৈকতশ্চাস্য পঞ্চাঙ্গ্যামুপসংযতস্যাশ্বস্যবক্ত্রকবিকে বধ্নীযাত্, অথৈনং কশযা তাডযেদ্যথোন্নামযঞ্ শিরো বেগেন শল্যমুদ্ধরতি; দৃঢাং বা বৃক্ষশাখামবনম্য তস্যাং পূর্ববদ্বদ্ধ্বোদ্ধরেত্ ||১৪||

অববদ্ধশল্যস্য হস্তেনাপহর্তুমশক্যস্য নির্হরণোপাযং দর্শযন্নাহ- অস্থীত্যাদি| অস্থিবিবরপ্রবিষ্টমিতি অস্থিচ্ছিদ্রান্তর্গতম্| বিদষ্টমিতি অত্যাসক্তম্| সুপরিগৃহীতস্য আতুরস্যেত্যর্থঃ| প্রবিভুজ্য বক্রীকৃত্য| ধনুর্গুণৈরিতি মুর্বার্কসূত্রমযৈঃ| একত একস্মিন্ প্রদেশে| অস্যেতি শল্যবতো নরস্য| পঞ্চাঙ্গ্যামিতি বন্ধবিশেষে| উপসংযতস্য বদ্ধস্য| অশ্বস্য ঘোটকস্য, বক্ত্রং মুখং, তত্র কবিকা কটকং, তত্র বধ্নীযাত্ শল্যমিতি সম্বন্ধঃ| এনম্ অশ্বং, কশযা সট্টযা, উন্নামযন্নিতি উচ্চৈঃ কুর্বন্| পক্ষান্তরমাহ- দৃঢাং বা বৃক্ষশাখামিত্যাদি| অবনম্য নমযিত্বা, তস্যামিতি বৃক্ষশাখাযাম্| অন্যে তু ‘দৃঢাং’ ইত্যস্য স্থানে ‘পঞ্চাঙ্গী’ ইতি মন্যন্তে; তত্র পঞ্চাঙ্গীং পঞ্চভিঃ শাখান্তরৈর্যুতাং শাখাং বদন্তি| অপরে তু পঞ্চাঙ্গীং প্লক্ষাশ্বত্থোদুম্বরন্যগ্রোধবেতসানামিতি কথযন্তি| অন্যে ত্বেবং পঠন্তি ‘অশক্যমেবং বা বলবদ্ভিঃ সুপরিগৃহীতস্য যন্ত্রেণ গ্রাহযিত্বা শল্যবারঙ্গং প্রবিভুজ্য ধনুর্গুণৈর্বদ্ধ্বৈকতোঽশ্ববক্ত্রকবিকে বধ্নীযাত্, অথৈনং কশযা তাডযেদ্যথোন্নামযঞ্ছিরো বেগেন শল্যমুদ্ধরতি, নামিতাযাং পঞ্চাঙ্গ্যাং বৃক্ষশাখাযাং বা পূর্ববদ্বদ্ধ্বোদ্ধরেত্’ ইতি||১৪||

Adhikarana 13 (15) · Śloka 15

অদেশোত্তুণ্ডিতমষ্ঠীলাশ্মমুদ্গরাণামন্যতমস্য প্রহারেণ বিচাল্য যথামার্গমেব যন্ত্রেণ ||১৫||

কুক্ষ্যাদ্যচ্ছেদনীযপ্রদেশোত্তুণ্ডিতানামস্থ্যাদিবিদষ্টানাং যথামার্গাপহরণোপাযং দর্শযন্নাহ- অদেশেত্যাদি| যথামার্গমেব যন্ত্রেণেতি ‘অপহরেত্’ ইতি শেষঃ| ‘অস্থিদেশোত্তুণ্ডিতং’ ইত্যন্যে পঠন্তি||১৫||

Adhikarana 14 (16) · Śloka 16

বিমৃদিতকর্ণানি কর্ণবন্ত্যনাবাধকরদেশোত্তুণ্ডিতানি পুরস্তাদেব ||১৬||

কর্ণবতামাহরণং চ দর্শযন্নাহ- বিমৃদিতেত্যাদি| কর্ণবদ্যচ্ছল্যং তদনাবাধকরপ্রদেশোত্তুণ্ডিতং যদা ভবতি তদা বিমৃদিতকর্ণিকং কৃত্বা, কোঽর্থঃ? সঙ্কুচিতকর্ণিকং কৃত্বা, পুরস্তাদেব কোঽর্থঃ? অগ্রেতনে প্রদেশে এব, ‘আকর্ষযেত্’ ইতি শেষঃ||১৬||

Adhikarana 15 (17) · Śloka 17

জাতুষে কণ্ঠাসক্তে কণ্ঠে নাডীং প্রবেশ্যাগ্নিতপ্তাং চ শলাকাং, তযাঽবগৃহ্য শীতাভিরদ্ভিঃ পরিষিচ্য স্থিরীভূতং শল্যমুদ্ধরেত্ ||১৭||

জাতুষশল্যস্য বিধানং দর্শযন্নাহ- জাতুষ ইত্যাদি| জাতুষে লাক্ষামযে| কণ্ঠাসক্তে গললগ্নে| নাডীমিতি তাম্রাদিরচিতনলিকাং, স্থিরীভূতামুত্পন্নগাঢতাম্| শিশবো জাতুষৈঃ শল্যৈঃ ক্রীডন্তি, তে যদা প্রমাদান্নিগিলন্তি তদাঽযং বিধির্বেদিতব্যঃ| অন্যে তু জাতুষাণি সিরাদিষ্বেব ঘ(জ)টিতানি মন্যন্তে||১৭||

Adhikarana 16 (18) · Śloka 18

অজাতুষং তু জতুমধূচ্ছিষ্টপ্রলিপ্তযা শলাকযা পূর্বকল্পেনেত্যেকে ||১৮||

অজাতুষে কণ্ঠাসক্তে বিধিমাহ- অজাতুষমিত্যাদি| জতু লাক্ষা, মধূচ্ছিষ্টং সিক্থকম্, পূর্বকল্পেনেতি শীতোদকস্থিরীভূতমিত্যর্থঃ||১৮||

Adhikarana 17 (19) · Śloka 19

অস্থিশল্যমন্যদ্বা তির্যক্কণ্ঠাসক্তমবেক্ষ্য কেশোণ্ডুকং দৃঢৈকদীর্ঘসূত্রবদ্ধং দ্রবভক্তোপহিতং পাযযেদাকণ্ঠাত্ পূর্ণকোষ্ঠং চ বামযেত্, বমতশ্চ শল্যৈকদেশসক্তং জ্ঞাত্বা সূত্রং সহসা ত্বাক্ষিপেত্; মৃদুনা বা দন্তধাবনকূর্চকেনাপহরেত্ প্রণুদেদ্বাঽন্তঃ | ক্ষতকণ্ঠায চ মধুসর্পিষী লেঢুং প্রযচ্ছেত্ত্রিফলাচূর্ণং বা মধুশর্করামিশ্রম্ ||১৯||

অস্থ্যাদিশল্যস্যাত্যন্তং কণ্ঠাসক্তস্যাহরণমুদ্দিশন্নাহ- অস্থিশল্যমিত্যাদি| কেশোণ্ডুকং বালকৃতং বিটুকম্| উপহিতং সহিতম্| সহসা ত্বাক্ষিপেদিতি শল্যনির্গমনার্থম্| দন্তধাবনকূর্চকেনেতি দন্তধাবনানাং করঞ্জকাদীনাং কুট্টিতাগ্রং কূর্চকং, তেনাপহরেদিত্যর্থঃ| প্রণুদেদ্বাঽন্তরিতি বহিরনির্গচ্ছদন্তঃ প্রণুদেত্ প্রবেশযেদিত্যর্থঃ| ‘কেশোন্দুকং’ ইত্যাদি কেচিত্ পাঠং পঠন্তি| আহৃতকণ্ঠশল্যস্য পশ্চাত্কর্ম দর্শযন্নাহ- ক্ষতকণ্ঠাযেত্যাদি||১৯||

Adhikarana 18 (20) · Śloka 20

উদকপূর্ণোদরমবাক্শিরসমবপীডযেদ্ধুনীযাদ্বামযেদ্বা ভস্মরাশৌ বা নিখনেদামুখাত্ ||২০||

উদকং যদাঽন্তর্নিবিষ্টং জলমৃতাদীনামুদরে ভবতি তদা তস্যাপহরণোপাযং দর্শযন্নাহ- উদকেত্যাদি| অবাক্শিরসমধোমুখীকৃতম্, অবপীডযেদুদরং, ধুনীযাত্ কম্পযেত্, বামযেত্ ঘর্ষণৈরবাক্শিরসমেব, নিখনেত্ প্রবেশযেত্, আমুখাদিতি মুখপর্যন্তম্||২০||

Adhikarana 19 (21) · Śloka 21

গ্রাসশল্যে তু কণ্ঠাসক্তে নিঃশঙ্কমনববুদ্ধং স্কন্ধে মুষ্টিনাঽভিহন্যাত্, স্নেহং মদ্যং পানীযং বা পাযযেত্ ||২১||

কণ্ঠাসক্তগ্রাসাহরণোপাযমাহ- গ্রাসশল্যে ইত্যাদি| অনববুদ্ধমিতি অজ্ঞাতং যথা ভবতি| অভিহন্যাদিতি প্রহারং দদ্যাদিত্যর্থঃ||২১||

Adhikarana 20 (22) · Śloka 22

বাহুরজ্জুলতাপাশৈঃ কণ্ঠপীডনাদ্বাযুঃ প্রকুপিতঃ শ্লেষ্মাণং কোপযিত্বা স্রোতো নিরুণদ্ধি, লালাস্রাবং ফেনাগমনং সঞ্জ্ঞানাশং চাপাদযতি; তমভ্যজ্য সংস্বেদ্য শিরোবিরেচনং তস্মৈ তীক্ষ্ণং বিদধ্যাদ্রসং চ বাতঘ্নং দদ্যাদিতি ||২২||

বাহুরজ্জবাদিপীডিতকণ্ঠপ্রকুপিতবাযুশ্লেষ্মাপহরণোপাযমাহ- বাহ্বিত্যাদি| পাশশব্দো বাহ্বাদিভিঃ সহ প্রত্যেকং সম্বধ্যতে| কেচিদমুং পাঠং ন পঠন্তি||২২||

Adhikarana 21 (23-26) · Śloka 26

ভবন্তি চাত্র- শল্যাকৃতিবিশেষাংশ্চ স্থানান্যাবেক্ষ্য বুদ্ধিমান্ | তথা যন্ত্রপৃথক্ত্বং চ সম্যক্ শল্যমথাহরেত্ ||২৩|| কর্ণবন্তি তু শল্যানি দুঃখাহার্যাণি যানি চ | আদদীত ভিষক্ তস্মাত্তানি যুক্ত্যা সমাহিতঃ ||২৪|| এতৈরুপাযৈঃ শল্যং তু নৈব নির্যাত্যতে যদি | মত্যা নিপুণযা বৈদ্যো যন্ত্রযোগৈশ্চ নির্হরেত্ ||২৫|| শোথপাকৌ রুজশ্চোগ্রাঃ কুর্যাচ্ছল্যমনাহৃতম্ | বৈকল্যং মরণং চাপি তস্মাদ্যত্নাদ্বিনির্হরেত্ ||২৬||

শল্যাকৃতীনামানন্ত্যাদনুক্তমপি কর্তব্যং দর্শযন্নাহ- শল্যাকৃতীত্যাদি| স্থানানি শিরোঽক্ষিকর্ণনাসাহৃদযাদীনি| কর্ণবতাং দুরাহরত্বং দর্শযন্নাহ- কর্ণবন্তীত্যাদি| আদদীতেতি সঙ্গৃহ্ণীযাদিত্যর্থঃ| যুক্ত্যেতি যোগেন, ন তু হীনযোগাতিযোগমিথ্যাযোগৈঃ| সমাহিতঃ সাবধানঃ| অবশ্যং নির্হরণীযস্য শল্যস্যোক্তৈঃ প্রকারৈরনাহরণেঽনুক্তোপাযমনুক্তযন্ত্রকরণসূত্রমুদ্দিশন্নাহ- এতৈরিত্যাদি| নৈব নির্যাত্যতে যদীতি নৈব নিষ্কাস্যতে যদীত্যর্থঃ| মত্যা নিপুণযা বৈদ্য ইতি মত্যা নিপুণযা স্বকর্মণি প্রবীণযা বুদ্ধ্যা যুক্তঃ| যন্ত্রযোগৈশ্চ নির্হরেদিতি যোগৈঃ সংযোগৈঃ, যোগৈশ্চেতি চকারাদনুক্তগুণাদিবন্ধনাদি সমুচ্চীযতে| শল্যস্যানাহরণে দোষং দর্শযন্নাহ- শোথপাকাবিত্যাদি| অমুং শ্লোকং কেচিদত্র ন পঠন্তি, ন্যাযচন্দ্রিকাযাং তু পঠিতত্বাদবশ্যং পঠনীয এব||২৩-২৬||

Adhikarana puShpikA · Śloka 27

ইতি সুশ্রুতসংহিতাযাং সূত্রস্থানে শল্যাপনযনীযো নাম সপ্তবিংশতিতমোঽধ্যাযঃ ||২৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে সপ্তবিংশতিতমোঽধ্যাযঃ||২৭||