8. śastrāvacāraṇīyādhyāyaḥ

Adhikarana 1 (1-2) · Śloka 2

অথাতঃ শস্ত্রাবচারণীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| শস্ত্রাণামবচারণং শস্ত্রাবচারণং, তদ্যস্মিন্নধ্যাযেঽস্তি স শস্ত্রাবচারণীযঃ, তং ব্যাখ্যাস্যামঃ||১-২||

Adhikarana 2 (3) · Śloka 3

বিংশতিঃ শস্ত্রাণি, তদ্যথা- মণ্ডলাগ্রকরপত্রবৃদ্ধিপত্রনখশস্ত্রমুদ্রিকোত্পলপত্রকার্ধধারসূচীকুশপত্রাটীমুখ- শরারিমুখান্তর্মুখত্রিকূর্চককুঠারিকাব্রীহিমুখারাবেতসপত্রকবডিশদন্তশঙ্ক্বেষণ্য ইতি ||৩||

কিযন্তি পুনস্তানি শস্ত্রাণীত্যাহ- বিংশতিরিত্যাদি| শস্ত্রাণি মণ্ডলাগ্রাদীনি; মণ্ডলাগ্রে দ্বে সূচ্যস্তিস্রঃ, ইত্যাদ্যবযবান্তরভেদেন তু বহূন্যপি স্যুঃ| তানি নামভির্নির্দেষ্টুমাহ- তদ্যথা মণ্ডলাগ্রেত্যাদি| ‘তেষাং নামভিরেবাকৃতযঃ প্রাযেণ ব্যাখ্যাতাঃ’, তথা ‘তত্র নখশস্ত্রৈষণ্যাবষ্টাঙ্গুলে’ ইত্যাদিবাক্যেন শস্ত্রাণামাকারং প্রমাণং চ যদ্যপ্যগ্রে বক্ষ্যতি, তথাঽপীহৈব পরতন্ত্রোক্তং শস্ত্রাকারপ্রমাণলক্ষণং সুখাববোধার্থমুপদেক্ষ্যামঃ| মণ্ডলাগ্রমিতি মণ্ডলমিবাগ্রং যস্য তন্মণ্ডলাগ্রং, তচ্চ দ্বিবিধম্| তথাহি- “যদগ্রে মণ্ডলং বৃত্তং ক্ষুরসংস্থানমেব চ| মণ্ডলাগ্রস্য জানীযাত্ প্রমাণং তু ষডঙ্গুলম্”- ইতি| দ্বিধা মণ্ডলাগ্রং- ষডঙ্গুলপ্রমাণমেকং বৃত্তমুখং, দ্বিতীযং ক্ষুরাকারম্| করপত্রমিতি করবত্ পত্রং যস্য তত্ করপত্রং, যথা করোঽঙ্গুলিভিরাচিতো ভবতি তদ্বদ্যত্ কণ্টকৈরাচিতং স্যাত্তত্ করপত্রমুচ্যতে; অন্যে তু করপত্রশস্ত্রং করপত্রাকারমেব, তচ্চ দ্বাদশাঙ্গুলং তন্ত্রান্তরবচনাত্; ননু, যদি তন্ত্রান্তরাদ্দ্বাদশাঙ্গুলং করপত্রমুচ্যতে তর্হি স্বতন্ত্রে বিরোধঃ, কুতঃ? স্বতন্ত্রে করপত্রস্যানির্দিষ্টপ্রমাণত্বাত্; `শেষাণি তু ষডঙ্গুলানি’- ইত্যনেন বাক্যেন ষডঙ্গুলমেব করপত্রং স্যান্ন দ্বাদশাঙ্গুলম্| নৈবং, ‘তেষাং নামভিরেবাকৃতযঃ প্রাযেণ ব্যাখ্যাতাঃ’- ইত্যস্মাত্ সূত্রাত্ প্রাযঃশব্দোঽনুবর্ততে, তেনাযমর্থঃ- শেষাণি প্রাযেণ ষডঙ্গুলানি, এবং শস্ত্রমানেঽন্যত্রাপ্যবিরোধঃ| বৃদ্ধিপত্রমিতি বৃদ্ধেঃ পত্রমিব বৃদ্ধিপত্রং; তচ্চ দ্বিবিধম্- একমঞ্চিতাগ্রং, দ্বিতীযং প্রযতাগ্রং; দ্বে অপি সপ্তাঙ্গুলপ্রমাণে, দ্বযোরপি “অর্ধপঞ্চাঙ্গুলং বৃন্তং কার্যং সার্ধাঙ্গুলং ফলম্”- ইতি; অনযোর্মধ্যেঽঞ্চিতাগ্রং বৃদ্ধিপত্রং ক্ষুরমাহুঃ | নখশস্ত্রমিতি নখানাং ছেদনায শস্ত্রং নখশস্ত্রং, তস্য ফলং দ্ব্যঙ্গুলাযামমেকাঙ্গুলবিস্তৃতম্| মুদ্রিকাং স্বযমেবাগ্রে বক্ষ্যতি| উত্পলপত্রমিব পত্রমস্যেত্যুত্পলপত্রকং, তথা চ তন্ত্রান্তরং, “তুল্যমুত্পলপত্রেণ তীক্ষ্ণধারং সমাহিতম্| ষডঙ্গুলং প্রমাণেন শস্ত্রমুত্পলপত্রকম্|| তত্ফলং ত্র্যঙ্গুলাযামং কার্যমঙ্গুলবিস্তৃতম্”- ইতি| অর্ধধারমিতি অর্ধে ধরা যস্য তদর্ধধারং, বক্রধারমিতি প্রসিদ্ধং; তচ্চাষ্টাঙ্গুলাযতম্, উরস্যঙ্গুলবিস্তারং, দ্ব্যঙ্গুলফলম্; অন্যে তু ‘অধ্যর্ধধারম্‘ ইতি পঠন্তি, অধিকমর্ধে ধারা যস্য তদধ্যর্ধধারম্| সূচী অগ্রে বক্ষ্যতে| কুশপত্রমিতি কুশপত্রতুল্যং কুশপত্রং; তন্মানমাহ- “দ্ব্যঙ্গুলং রুচকং বিদ্যাদ(ত্ত্র্য)ঙ্গুলং ফলমুচ্যতে| বৃন্তং স্যাত্ত্র্য(দ্ব্য)ঙ্গুলং মধ্যে কুশপত্রস্য লক্ষণম্” ইতি| আটী(টা) মুখমিতি আটী(টা) জলবর্ধনী নাম পক্ষিবিশেষঃ, তন্মুখবন্মুখং যস্য তদাটীমুখং; তথা চোক্তং-“বৃন্তং সপ্তাঙ্গুলং বিদ্যাত্তস্যাগ্রে ফলমিষ্যতে| আটী(টা)মুখপ্রকারং হি ফলমঙ্গুষ্ঠমাযতম্- আটী(টা)মুখং বিজানীযাত্তত্স্রাবণবিধৌ মতম্”- ইতি| শরারিমুখমিতি শরারিদীর্ঘচঞ্চুঃ পক্ষিবিশেষঃ, স দ্বিবিধঃ- ধবলস্কন্ধোঃ রক্তশীর্ষশ্চ, ধবলস্কন্ধস্য ‘শরারী(রিঃ)’ ইতি সঞ্জ্ঞা, তন্মুখবন্মুখং যস্য তচ্ছরারিমুখং, তস্য শস্ত্রস্য লোকে কর্তরীতি সঞ্জ্ঞা; তাং চ দ্বাদশাঙ্গুলাং চলত্পাশাং কুর্যাত্| অন্তর্মুখমিতি মধ্যমুখং, তল্লক্ষণমাহ- “অষ্টা(সপ্তা)ঙ্গুলং প্রমাণেন জিহ্মাধারেণ চাপ্লুতম্| শস্ত্রমন্তর্মুখং নাম চন্দ্রার্ধমিব চোদ্গতম্”- ইতি| ত্রিকূর্চকমিতি ত্রযঃ কূর্চা যস্য তত্ ত্রিকূর্চকম্ ; অত্র তন্ত্রান্তরং- “অঙ্গুলানি তথাঽষ্টৌ চ শস্ত্রং কার্যং ত্রিকূর্চকম্| ফলৈরন্তর্মুখাকারৈরঙ্গুলৈরন্বি(রাচি)তং ত্রিভিঃ|| একৈকস্য ফলস্যৈষামন্তরং ব্রীহিসম্মিতম্| বৃন্তং পঞ্চাঙ্গুলাযামং কার্যং রুচকভূষিতম্”- ইতি| কুঠারিকেতি কুঠারতুল্যা কুঠারিকা, অত্র তন্ত্রান্তরং “কুঠারিকাযা বৃন্তং স্যাত্ সার্ধসপ্তাঙ্গুলাযতম্| ফলমর্ধাঙ্গুলাযামং গোদন্তসদৃশং সমম্”- ইতি| ব্রীহিমুখমিতি ব্রীহিমুখমিব মুখং যস্য তদ্ব্রীহিমুখম্; অত্র ভোজঃ- “শস্ত্রং ব্রীহিমুখং কার্যমঙ্গুলানি ষডাযতম্| দ্ব্যঙ্গুলং তস্য বৃন্তং স্যাত্তত্ফলং চতুরঙ্গুলম্| তন্মুখং ব্রীহিবিস্তারং তনুসঙ্গূ(মূ)ঢকণ্টকম্”- ইতি| আরেতি আরেব আরা, আরা চর্মকারাণাং শস্ত্রম্; অত্র তন্ত্রান্তরম্- “আরা হ্যষ্টাঙ্গুলাযামা কর্তব্যা তু বিশাম্পতে?| তিলপ্রমাণং তু ফলং তস্যাঃ কার্যং সমাহিতম্| দূর্বাঙ্কুরপরীণাহং বৃন্তং গোপুচ্ছসন্নিভম্-” ইতি| বেতসপত্রমিতি বেতসপত্রমিব বেতসপত্রম্; অত্র ভোজ,- “তীক্ষ্ণমঙ্গুলবিস্তারং চতুরঙ্গুলমাযতম্| অঙ্গুলানি তু চত্বারি বৃন্তং কার্যং বিজানতা-” ইতি| বডিশমিতি বডিশতুল্যং বডিশং, বডিশং মত্স্যবেধনমাহুঃ| অত্র তন্ত্রান্তরং- “বডিশে চাপি কর্তব্যে প্রমাণেন ষডঙ্গুলে | স্বানতং তু তযোরেকমেকং নাত্যানতং ভবেত্|| অর্ধপঞ্চাঙ্গুলং বৃন্তং শেষং কার্যং মুখং তযোঃ| অর্ধচন্দ্রাকৃতি বক্ত্রং (মুখং) কার্যং নাত্যানতস্য তু|| স্বানতং নামযেত্তত্র বডিশং চ ভিষগ্বরঃ| বৃন্তাগ্রযোরন্তরং স্যাদ্যাবদর্ধাঙ্গুলং ম(মি)তম্” ইতি| দন্তশঙ্কুরিতি কপালিকাশর্করাদিদন্তদোষহরণায শঙ্কুর্দন্তশঙ্কুঃ; অত্র ভোজঃ- “কার্যঃ ষডঙ্গুলযামো দন্তশঙ্কুর্বিজানতা | শঙ্কুবচ্চ মুখং তস্য কার্যমর্ধাঙ্গুলাযতম্|| চতুরস্রং সমং চৈব তীক্ষ্ণধারং সমাহিতম্| বৃন্তাগ্র তস্য কর্তব্যং শস্ত্রব্রীহিমুখাকৃতি|| কপালিকাং শর্করাং চ দন্তস্থাং তেন শোধযেত্”- ইতি| এষণীতি ‘এষ্যতে অনযা’ ইতি এষণী; অত্র তন্ত্রান্তরং- “ব্রণৈস্তাসাং পরীণাহো মুখং গণ্ডূপদাকৃতি”- ইতি||৩||

Adhikarana 3 (4) · Śloka 4

তত্র মণ্ডলাগ্রকরপত্রে স্যাতাং ছেদনে লেখনে চ, বৃদ্ধিপত্রনখশস্ত্রমুদ্রিকোত্পলপত্রকার্ধধারাণি ছেদনে ভেদনে চ, সূচীকুশপত্রাটী(টা)মুখশরারিমুখান্তর্মুখত্রিকূর্চকানি বিস্রাবণে, কুঠারিকাব্রীহিমুখারাবেতসপত্রকাণি ব্যধনে সূচী চ, বডিশং দন্তশঙ্কুশ্চাহরণে, এষণ্যেষণে আনুলোম্যে চ, সূচ্যঃ সীবনে; ইত্যষ্টবিধে কর্মণ্যুপযোগঃ শস্ত্রাণাং ব্যাখ্যাতঃ ||৪||

তেষাং বিষযভেদমষ্টবিধে কর্মণি দর্শযিতুমাহ- তত্রেত্যাদি| তত্র তেষু মধ্যে, স্যাতাং ভবেতাম্| চকারঃ কর্মান্তরং সমুচ্চিনোতি| বৃদ্ধিপত্রেত্যাদি| চকারাল্লেখনে চ| সূচী চেতি চকারঃ কুশপত্রোত্পলপত্রকাদীংশ্চ ব্যধনে সমুচ্চিনোতি| ননু, উভযত্রাপ্যেকার্থত্বাত্ কিমর্থং যন্ত্রশস্ত্রযোর্মধ্যে বডিশস্য পাঠঃ? উচ্যতে, যন্ত্রপঠিতং বডিশং যথাযোগপরিণাহদৈর্ঘ্যং, শস্ত্রপঠিতং তু ষডঙ্গুলমেব তীক্ষ্ণকণ্টকমুখমেবেত্যদোষঃ| এষণীতি আনুলোম্যমত্র বিস্রাবণমভিপ্রেতং, ন তু ঋজুকরণং; কস্মাত্? ঋজুকরণস্য শস্ত্রকর্মস্বনির্দিষ্টত্বাত্; যদি কথঞ্চিত্ স্যাত্, তদা শস্ত্রকর্মণাং নবত্বপ্রসঙ্গঃ, তস্মাদাদ্য এব পক্ষো ন্যায্য ইতি; চকারাদ্ব্যধনেঽপি| ননু, এষণী যন্ত্রশস্ত্রযোঃ পঠ্যতে, প্রযোজনং চোভযত্রাপ্যেষণমেব, তস্মাদুভযপাঠে কো বিশেষঃ? উচ্যতে- যন্ত্রপঠিতাযা এষণ্যা আকৃতির্গণ্ডূপদমুখী, প্রমাণং তু যথাযোগপরিণাহদৈর্ঘ্যং; শস্ত্রেষু পুনরেষণ্যাঃ প্রমাণমষ্টাঙ্গুলম্, আকৃতিস্তু তীক্ষ্ণকণ্টকযবপত্রমুখী চেত্যদোষঃ| দ্ব্যঙ্গুলাদিভেদেন সূচীনাং বহুত্বাত্ ‘সূচ্য’ ইতি বহুত্বেন নির্দেশঃ||৪||

Adhikarana 4 (5) · Śloka 5

তেষামথ যথাযোগং গ্রহণসমাসোপাযঃ কর্মসু বক্ষ্যতে- তত্র বৃদ্ধিপত্রং বৃন্তফলসাধারণে ভাগে গৃহ্ণীযাত্, ভেদনান্যেবং সর্বাণি, বৃদ্ধিপত্রং মণ্ডলাগ্রং চ কিঞ্চিদুত্তানেন পাণিনা লেখনে বহুশোঽবচার্যং, বৃন্তাগ্রে বিস্রাবণানি, বিশেষেণ তু বালবৃদ্ধসুকুমারভীরুনারীণাং রাজ্ঞাং রাজমা(পু)ত্রাণাং চ ত্রিকূর্চকেন বিস্রাবযেত্, তলপ্রচ্ছাদিতবৃন্তমঙ্গুষ্ঠপ্রদেশিনীভ্যাং ব্রীহিমুখং, কুঠারিকাং বামহস্তন্যস্তামিতরহস্তমধ্যমাঙ্গুল্যাঽঙ্গুষ্ঠবিষ্টব্ধযাঽভিহন্যাত্ , আরাকরপত্রৈষণ্যো মূলে, শেষাণি তু যথাযোগং গৃহ্ণীযাত্ ||৫||

তেষামিত্যাদি| বৃন্তফলসাধারণে ভাগে ইতি বৃন্তফলযোর্মধ্যদেশ ইত্যর্থঃ| এবম্ ইত্যমেব, যথা বৃদ্ধিপত্রং বৃন্তফলযোর্মধ্যদেশে গৃহ্যতে তথা ভেদনান্যপীত্যেবংশব্দার্থঃ| বহুশ ইতি বহূন্ বারান্, ‘সকৃদপহরত্’ (সূ. অ.৫) ইত্যস্যাপবাদঃ| বৃন্তাগ্রে বারঙ্গাগ্রে, ‘গৃহ্ণীযাত্’ ইত্যধ্যাহারঃ| তলপ্রচ্ছাদিতবৃন্তমিতি হস্ততলপিহিতবৃন্তম্; অঙ্গুষ্ঠপ্রদেশিনীভ্যাং `গৃহ্ণীযাত্’ ইত্যধ্যাহারঃ| অঙ্গুষ্ঠবিষ্টব্ধযেতি অঙ্গুষ্ঠাগ্রে বিষ্টম্ভিতবেগযা| মূলং, ত্সরু, বারঙ্গং, বৃন্তমিতি পর্যাযাঃ| যথাযোগমিতি যোগানতিক্রমেণ| তদ্যথা- কানিচিদ্বৃন্তাগ্রে, কানিচিদ্বৃন্তমধ্যে, কানিচিদ্বৃন্তমূলে, কর্মযোগাপেক্ষযেত্যর্থঃ||৫||

Adhikarana 5 (6) · Śloka 6

তেষাং নামভিরেবাকৃতযঃ প্রাযেণ ব্যাখ্যাতাঃ ||৬||

সঙ্ক্ষেপেণ শস্ত্রাকারং দর্শযন্নাহ- তেষাং নামভিরিত্যাদি| তেষাং শস্ত্রাণাম্, আকৃতযো লক্ষণানি, নামভিরেব প্রাযেণ ব্যাখ্যাতাঃ||৬||

Adhikarana 6 (7) · Śloka 7

তত্র নখশস্ত্রৈষণ্যাবষ্টাঙ্গুলে , সূচ্যো বক্ষ্যন্তে, (প্রদেশিন্যগ্রপর্বপ্রদেশপ্রমাণা মুদ্রিকা, দশাঙ্গুলা শরারিমুখী সা চ (যা সা) কর্তরীতি কথ্যতে) | শেষাণি তু ষডঙ্গুলানি ||৭||

তেষাং প্রমাণানি দর্শযন্নাহ- তত্র নখশস্ত্রেত্যাদি| অন্যে তু নখশস্ত্রস্থানে নখবর্ধনীতি পঠন্তি ব্যাখ্যানযন্তি চ- নখবর্ধনী নখচ্ছেদনী| সূচ্যো বক্ষ্যন্ত ইতি অষ্টবিধশস্ত্রকর্মীযে (সূ. অ. ২৫) ‘দ্ব্যঙ্গুলা ত্র্যঙ্গুলা’ ইত্যাদিনা সূচ্যো বক্ষ্যন্ত ইতি| এতস্যাগ্রে মুদ্রিকাকর্তরীশস্ত্রযোঃ কেচিন্মানং পঠন্তি| তদুচ্যতে- “প্রদেশিন্যগ্রপর্বপ্রদেশপ্রমাণা, মুদ্রিকা, দশাঙ্গুলা শরারিমুখী সা চ (যা সা ) কর্তরীতি কথ্যতে”- ইতি| শেষাণীতি নির্দিষ্টপ্রমাণেভ্যো নখবর্ধন্যেষণীসূচীভ্যোঽন্যানি শেষাণি||৭||

Adhikarana 7 (8) · Śloka 8

তানি সুগ্রহাণি, সুলোহানি, সুধারাণি, সুরূপাণি, সুসমাহিতমুখাগ্রাণি, অকরালানি, চেতি শস্ত্রসম্পত্ ||৮||

প্রমাণাকারাভ্যাং শস্ত্রাণি নির্দিশ্য শেষশস্ত্রগুণসম্পদং দর্শযিতুমাহ- তানি সুগ্রহাণীত্যাদি| সুগ্রহাণি শোভনবারঙ্গাণি | সুলোহানি শোভনলোহানি| সুধারাণি শোভনধারাণি| সুসমাহিতমুখানি পিণ্ডীকৃতমুখানি, অন্যে তু সুষ্ঠু সম্যগাহিতং মুখং যেষাং তানি তথোক্তানি| অকরালানি অদন্তুরাণি| শস্ত্রসম্পত্ শস্ত্রগুণঃ||৮||

Adhikarana 8 (9) · Śloka 9

তত্র বক্রং, কুণ্ঠং, খণ্ডং, খরধারম্, অতিস্থূলম্, অত্যল্পম্, অতিদীর্ঘম্, অতিহ্রস্বম্, ইত্যষ্টৌ শস্ত্রদোষাঃ | অতো বিপরীতগুণমাদদীত, অন্যত্র করপত্রাত্; তদ্ধি খরধারমস্থিচ্ছেদনার্থম্ ||৯||

শস্ত্রদোষান্নির্দিশন্নাহ- তত্র বক্রমিত্যাদি| কুণ্ঠং স্থূলধারত্বেনারোমবাহি| খণ্ডম্ অসমগ্রম্| খরধারং কর্কশধারম্| অত্যল্পম্ অতিতনু | অতো বিপরীতমিতি বক্রাদিশস্ত্রেভ্যো বিপরীতগুণম্, ঋজুতীক্ষ্ণসকলমসৃণধারাদিগুণম্| কিং সর্বাণ্যেব বিপরীতগুণান্যাদদীতেত্যাহ- অন্যত্র করপত্রাদিতি| কুতঃ পুনরেতত্? তদ্ধীত্যাদি|- তচ্ছব্দো যস্মাদর্থে, হিশব্দো হেতৌ, যস্মাত্ করপত্রমস্থিচ্ছেদনার্থমতো হেতোঃ খরধারম্||৯||

Adhikarana 9 (10) · Śloka 10

তত্র ধারা ভেদনানাং মাসূরী, লেখনানামর্ধমাসূরী, ব্যধনানাং বিস্রাবণানাং চ কৈশিকী, ছেদনানামর্ধকৈশিকীতি ||১০||

অষ্টবিধে কর্মণি সুকর্মনিষ্পাদকত্বেন যথা শস্ত্রাণাং সুধারত্বং ভবতি তথা নির্দিশন্নাহ- তত্র ধারেত্যাদি| ভেদনানাং বৃদ্ধিপত্রনখশস্ত্রাদীনাম্| মাসূরী মসূরদলধারাতন্বী | লেখনানাং মণ্ডলাগ্রাদীনাম্| অর্ধমাসূরী মসূরদলধারার্ধতন্বী | ব্যধনানাং কুঠারিকাদীনাম্| বিস্রাবণানাং সূচীকুশপত্রাদীনাম্| কৈশিকী কেশপ্রমাণা| ছেদনানামিতি অত্র ছেদনানি বৃদ্ধিপত্রাদীন্যেব, তানি যদা ছেদনে প্রযুজ্যন্তে তদা তেষাং ধারা অর্ধকৈশিকী অর্ধকেশপ্রমাণা তন্বী কর্তব্যা||১০||

Adhikarana 10 (11) · Śloka 11

বডিশং দন্তশঙ্কুশ্চানতাগ্রে | তীক্ষ্ণকণ্টকপ্রথমযবপত্রমুখ্যেষণী (গণ্ডূপদাকারমুখী চ) ||১১||

আহরণে এষণে চ শস্ত্রাণাং ধারাবিশেষং দর্শযন্নাহ- বডিশং দন্তশঙ্কুরিত্যাদি| অত্র আনতাগ্রে ইতি বডিশস্যৈব বিশেষণং, ন দন্তশঙ্কোঃ, কুতঃ? শঙ্কুতুল্যত্বেনৈব তস্যানতত্বদর্শনাত্| এষণী ত্রিবিধা ভবতি তীক্ষ্ণকণ্টকমুখী, প্রথমযবপত্রমুখী, গণ্ডূপদাকারমুখী চ| অন্যে তু ‘তীক্ষ্ণকণ্টকপ্রথমযবপত্রমুখে’ ইতি পঠন্তি, ব্যাখ্যানযন্তি চ- এতদ্বিশেষণদ্বযং বডিশদন্তশঙ্ক্বোঃ; তেন তীক্ষ্ণকণ্টকমুখং বডিশং, প্রথমযবপত্রমুখো দন্তশঙ্কুঃ, প্রথমযবপত্রমুখত্বেন দন্তশঙ্কোর্মুখতনুত্বমাকারশ্চ কথিতঃ, তেন গণ্ডূপদাকারমুখী চেতি চকারাদেতদ্বিশেষণদ্বযমেষণ্যামপি সম্বধ্নন্তি| অন্যে তু ‘তত্র ধারা ভেদনানাং মাসূরী’ ইত্যাদিগ্রন্থং ‘এষণী গণ্ডূপদাকারমুখী চ’ ইতি যাবন্ন পঠন্তি||১১||

Adhikarana 11 (12) · Śloka 12

তেষাং পাযনা ত্রিবিধা ক্ষারোদকতৈলেষু | তত্র ক্ষারপাযিতং শরশল্যাস্থিচ্ছেদনেষু, উদকপাযিতং মাংসচ্ছেদনভেদনপাটনেষু, তৈলপাযিতং সিরাব্যধনস্নাযুচ্ছেদনেষু ||১২||

তত্র পাযনাযাস্তীক্ষ্ণত্বাদযো গুণাঃ কর্মবিশেষোত্কর্ষহেতবো ভবন্তীতি তামাহ- তেষাং পাযনেত্যাদি| পাযনা পাতুং প্রযোজনা, সা চ লৌহকারাণাং প্রসিদ্ধা কেচিত্ ক্ষারতৈলপাযনযোরনার্ষত্বমাচক্ষতে| ক্ষারাদিপাযনানাং কর্মবিশেষবিষযং দর্শযন্নাহ- তত্র ক্ষারপাযিতমিত্যাদি||১২||

Adhikarana 12 (13) · Śloka 13

তেষাং নিশানার্থং শ্লক্ষ্ণশিলা মাষবর্ণা; ধারাসংস্থাপনার্থং শাল্মলীফলকমিতি ||১৩||

সুধারাণীতি প্রাগুক্তং, কথং ধারা শোভনা কর্তব্যেত্যত্রাহ- তেষামিত্যাদি| শ্লক্ষ্ণা অকর্কশা| ধারাসংস্থাপনার্থং স্থিরীকরণার্থম্| ফলকং পট্টকম্| তত্রানিশিতধারাণাং নিশানার্থং শ্লক্ষ্ণশিলা, নিশিতানাং সংস্থাপনার্থং শাল্মলীফলকম্| অন্যে তু ‘তেষাং নিশানী শ্লক্ষ্ণশিলিকা মাষযূষপ্রভা, ধারাসংস্থাপনং শাল্মলীফলকম্’ ইতি পঠন্তি, ব্যাখ্যানযন্তি চ- শ্লক্ষ্ণশিলিকা নাপিতশিলিকা, মাষযূষপ্রভা কৃষ্ণকপিলেত্যর্থঃ||১৩||

Adhikarana 13 (14) · Śloka 14

ভবতি চাত্র- যদা সুনিশিতং শস্ত্রং রোমচ্ছেদি সুসংস্থিতম্ | সুগৃহীতং প্রমাণেন তদা কর্মসু যোজযেত্ ||১৪||

কথং পুনঃ শস্ত্রং সংস্থাপিতধারং জ্ঞাতব্যমিত্যাহ- ভবতি চাত্রেত্যাদি| যদা শস্ত্রং রোমচ্ছেদি ভবতি তদা সুনিশিতং ভবতি যাবদ্রোমাণি ন ছিনত্তি তাবন্নিশাতব্যমিত্যর্থঃ| সুসংস্থিতং শোভনাকারম্| সুগৃহীতং গ্রহণং শস্ত্রাণাং প্রাগুক্তং, তদ্যথা- ‘বৃদ্ধিপত্রং বৃন্তফলসাধারণে ভাগে গৃহ্ণীযাত্’- ইত্যাদি| প্রমাণেনেতি প্রমাণেন লক্ষিতং, শস্ত্রপ্রমাণং ‘তেষাং নখশস্ত্রৈষণ্যাবষ্টাঙ্গুলে’- ইত্যাদি| অন্যে তু সুগৃহীতং প্রমাণেনেতি প্রমাণেন সুগৃহীতমিতি ব্যাখ্যানযন্তি; তত্র বৃদ্ধিপত্রাদি বৃন্তফলসাধারণভাগাদিগ্রহণপ্রমাণেনেত্যর্থঃ| কেচিত্ ‘রোমচ্ছেদি’ ইত্যস্য স্থানে ‘রোমবাহি - ইতি পঠন্তি||১৪||

Adhikarana 14 (15) · Śloka 15

অনুশস্ত্রাণি তু ত্বক্সারস্ফটিককাচকুরুবিন্দজলৌকোগ্নিক্ষারনখগোজীশেফালিকাশাকপত্রকরীরবালাঙ্গুলয ইতি ||১৫||

অশস্ত্রাবচারণীযেষু শিশুপ্রভৃতিষ্বলাভাদ্বা শস্ত্রাণাং তত্কর্মসাধকদ্রব্যান্তরেণ শস্ত্রাতিদেশং কুর্বন্নাহ- অনুশস্ত্রাণীত্যাদি| অনুশস্ত্রাণি হীনশস্ত্রাণি শস্ত্রসদৃশানি বা| ত্বক্সারঃ বংশঃ; কুরুবিন্দঃ পাষাণবিশেষঃ, যেন নিশিতানি লোহানি তীক্ষ্ণানি ভবন্তি, অন্যে তু কুরুবিন্দং লোহিতাশ্ম রত্নপ্রধানং; গোজী গোজিহ্বা, অন্যে শাখোটকমাহুঃ; শেফালিকা রক্তবৃন্তা শারদকুসুমা; শাকো মহাবৃক্ষঃ কর্কশপত্রঃ; পত্রশব্দো গোজীপ্রভৃতিভিঃ সহ প্রত্যেকং সম্বধ্যতে; করীরঃ অঙ্কুরঃ||১৫||

Adhikarana 15 (16-18) · Śloka 19

শিশূনাং শস্ত্রভীরূণাং শস্ত্রাভাবে চ যোজযেত্ | ত্বক্সারাদিচতুর্বর্গং ছেদ্যে ভেদ্যে চ বুদ্ধিমান্ ||১৬|| আহার্যচ্ছেদ্যভেদ্যেষু নখং শক্যেষু যোজযেত্ | বিধিঃ প্রবক্ষ্যতে পশ্চাত্ ক্ষারবহ্নিজলৌকসাম্ ||১৭|| যে স্যুর্মুখগতা রোগা নেত্রবর্ত্মগতাশ্চ যে | গোজীশেফালিকাশাকপত্রৈর্বিস্রাবযেত্তু তান্ ||১৮|| এষ্যেষ্বেষণ্যলাভে তু বালাঙ্গুল্যঙ্কুরা হিতাঃ |১৯|

তেষাং বিষযমাহ- শিশূনামিত্যাদি| ত্বক্সারাদিচতুর্বর্গমিতি বংশস্ফটিককাচকুরুবিন্দানি| আহার্যচ্ছেদ্যভেদ্যেষু নখং শক্যেষ্বিতি আহার্যাদিষু নখশক্যেষু নখং প্রযোজযেদিত্যর্থঃ| নেত্রবর্ত্ম নেত্রপক্ষ্ম| এষ্যেষ্বেষণ্যলাভে ত্বিত্যাদি এষ্যেষু শল্যেষু এষণ্যা অলাভে বালাদযো হিতাঃ||১৬-১৮||-

Adhikarana 16 (19) · Śloka 19

শস্ত্রাণ্যেতানি মতিমান্ শুদ্ধশৈক্যাযসানি তু | কারযেত্ করণপ্রাপ্তং কর্মারং কর্মকোবিদম্ ||১৯||

ইদানীং শস্ত্রাণাং গুণসম্পত্কারণং বক্তুমাহ- শস্ত্রাণ্যেতানীত্যাদি| কারযেত্ কর্তুং প্রযোজযেত্| কঃ কর্তুং প্রযোজযেত্? বুদ্ধিমান্ বৈদ্য ইত্যর্থঃ| কং? কর্মারং লৌহকারম্| কিংবিশিষ্টং কর্মারং? করণপ্রাপ্তং; করণে প্রাপ্তং স্বকর্মণি নিপুণমিত্যর্থঃ| পুনঃ কিংবিশিষ্টং? কর্মকোবিদং কর্মপণ্ডিতং, যতঃ স্বকর্মণি নিপুণমত এব কর্মকোবিদম্| কানি কারযেত্? শস্ত্রাণি| এতানি পূর্বোক্তানি কিম্ভূতানি শস্ত্রাণি কারযেদিত্যাহ- শুদ্ধশৈক্যাযসানি ত্বিতি; শুদ্ধং মলরহিতং, শৈক্যং তীক্ষ্ণম্; অন্যে তু শৈক্যাযসানি সারমযলৌহঘটিতানি| কেচিচ্ছ্লোকার্ধমন্যথা পঠন্তি;- “কারযেত্ করণৈঃ প্রোক্তৈঃ কর্মারৈঃ কর্মকোবিদৈঃ”- ইতি, ব্যাখ্যানযন্তি চ- করণৈরুপকরণৈঃ; শেষং সমম্||১৯||

Adhikarana 17 (20) · Śloka 20

প্রযোগজ্ঞস্য বৈদ্যস্য সিদ্ধির্ভবতি নিত্যশঃ | তস্মাত্ পরিচযং কুর্যাচ্ছস্ত্রাণাং গ্রহণে সদা ||২০||

প্রযোগজ্ঞস্যেত্যাদি| প্রযোগঃ প্রকৃষ্টো যোগঃ, যোজনা, তজ্জ্ঞস্য| সিদ্ধিঃ আরোগ্যসম্পাদনম্| নিত্যশঃ সর্বদা| পরিচযং শস্ত্রগ্রহণাভ্যাসম্| অন্যে ‘প্রমাণজ্ঞস্য বৈদ্যস্য’- ইতি পঠন্তি; প্রমাণজ্ঞস্য শস্ত্রগ্রহণমানজ্ঞস্য||২০||

Adhikarana puShpikA · Śloka 8

ইতি সুশ্রুতসংহিতাযাং সূত্রস্থানে শস্ত্রাবচারণীযো নামাষ্টমোঽধ্যাযঃ ||৮||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে শস্ত্রাবচারণীযো নামাষ্টমোঽধ্যাযঃ||৮||