Adhikarana 1 (1-2) · Śloka 2
অথাতঃ শিষ্যোপনযনীযমধ্যাযং ব্যাখ্যাস্যামঃ ||১||
যথোবাচ ভগবান্ ধন্বন্তরিঃ ||২||
View original
अथातः शिष्योपनयनीयमध्यायं व्याख्यास्यामः ||१||
यथोवाच भगवान् धन्वन्तरिः ||२||
অথাত ইত্যাদি| যথোবাচ ভগবান্ ধন্বন্তরিরিতি প্রত্যধ্যাযং বোদ্ধব্যম্| অথশব্দোঽত্র পূর্বাধ্যাযাদানন্তর্যে, অতঃশব্দো হেত্বর্থে, স চ হেতুঃ পূর্বাধ্যাযে বিস্তরেণ ব্যাখ্যাতঃ; এবং প্রত্যধ্যাযং অথাতঃশব্দৌ জ্ঞাতব্যৌ| শিষ্যোপনযনীযমিতি শিষ্যস্য উপনযনং দীক্ষা, তদধিকৃত্য কৃতোঽধ্যাযঃ শিষ্যোপনযনীযস্তং তথা; অন্যে তু উপনযনমাত্মবত্তযা অর্থী(ঙ্গী)করণম্| যদ্যপি ব্রাহ্মণাদযঃ প্রাগুপনীতাঃ, তথাঽপ্যাযুর্বেদপঠনারম্ভে পুনরুপনযনং, যথা ঋগ্যজুঃসামান্যধীত্য অথর্বারম্ভে পুনর্ব্রতাবতরণং ধনুর্বেদারম্ভে চ, তদ্বদত্রাপি||১-২||
Adhikarana 2 (3) · Śloka 3
ব্রাহ্মণক্ষত্রিযবৈশ্যানামন্যতমমন্বযবযঃশীলশৌর্যশৌচাচারবিনযশক্তিবলমেধাধৃতিস্মৃতিমতিপ্রতিপত্তিযুক্তং তনুজিহ্বৌষ্ঠদন্তাগ্রমৃজুবক্ত্রাক্ষিনাসং প্রসন্নচিত্তবাক্চেষ্টং ক্লেশসহং চ ভিষক্ শিষ্যমুপনযেত্ |
অতো বিপরীতগুণং নোপনযেত্ ||৩||
View original
ब्राह्मणक्षत्रियवैश्यानामन्यतममन्वयवयःशीलशौर्यशौचाचारविनयशक्तिबलमेधाधृतिस्मृतिमतिप्रतिपत्तियुक्तं तनुजिह्वौष्ठदन्ताग्रमृजुवक्त्राक्षिनासं प्रसन्नचित्तवाक्चेष्टं क्लेशसहं च भिषक् शिष्यमुपनयेत् |
अतो विपरीतगुणं नोपनयेत् ||३||
ব্রাহ্মণক্ষত্রিযবৈশ্যানামিত্যাদি| ব্রাহ্মণাদিষু মধ্যে অন্যতমমেকতমম্| অন্বযাদিযুক্তং; তত্র, অন্বযঃ আযুর্বেদাধ্যাযিকুলম্, অন্যে বংশশুদ্ধিমাহুঃ; বযোঽত্র বাল্যং তারুণ্যং বা; শীলং শাস্ত্রার্থানুসারিণোঽবিপরীতস্বভাবঃ; শৌর্যং শূরত্বং, সর্বত্রাবিষাদিতা; শৌচং শুচিতা, তচ্চ দ্বিবিধং বাহ্যমাভ্যন্তরং চ, তত্র বাহ্যং স্নানাদিকম্, আভ্যন্তরং মনঃশুদ্ধিঃ; আচারঃ কুলদেশাদ্যনুগতং লৌকিকং বিধানম্, অন্যে তু কাযবাঙ্মানসিকং শুভব্যাপারলক্ষণং ত্রিবিধমাহুঃ, শ্রুতিস্মৃতিবিহিতানুষ্ঠানমিত্যেকে; বিনযঃ ইন্দ্রিযবশিত্বং; শক্তিঃ উত্সাহশক্তিঃ; বলং ক্রিযানির্বর্তনক্ষমতা, অন্যে শক্তিবলযোর্বিপর্যযমাহুঃ; মেধা গ্রন্থাবধারণকর্ষণসামর্থ্যং; ধৃতিঃ মনঃসন্তুষ্টিঃ, অন্যে নিযমাত্মিকাং বুদ্ধিমাহুঃ; স্মৃতিঃ পূর্বানুভূতস্য স্মরণম্, অর্থধারণশক্তিরিত্যন্যে; মতিঃ অনাগতার্থোদ্দেশঃ, ত্রিকালবিষযা বুদ্ধিরিত্যন্যে; প্রতিপত্তিঃ অর্থাববোধপ্রাগল্ভ্যমনুষ্ঠানং বা| তনুজিহ্বৌষ্ঠদন্তাগ্রমিতি তনুশব্দো জিহ্বাদিভিঃ প্রত্যেকং সম্বধ্যতে, ‘তনুজিহ্বৌষ্ঠদন্তং’ ইত্যেকে পঠন্তি| প্রসন্নচিত্তবাক্চেষ্টমিতি প্রসন্নশব্দোঽপি চিত্তাদিভিঃ সহ প্রত্যেকং সম্বধ্যতে; চেষ্টা কাযপরিস্পন্দঃ| ক্লেশসহং দুঃখসহম্| উপনযেত্ দীক্ষেত্| অত ইতি অত এবঙ্গুণবিশিষ্টাচ্ছিষ্যাত্, বিপরীতগুণং বিসদৃশগুণং, নোপনযেত্ ন দীক্ষেত্| অন্বযাদিযুক্তং শিষ্যমুপনযেদিত্যুক্তে গুণহীনস্য নিষেধে সিদ্ধে পুনর্নিষেধবচনং নিযমার্থং, তেন বিপরীতগুণং নোপনযেদেব||৩||
Adhikarana 3 (4) · Śloka 4
উপনযনীযং তু ব্রাহ্মণং প্রশস্তেষু তিথিকরণমুহূর্তনক্ষত্রেষু প্রশস্তাযাং দিশি শুচৌ সমে দেশে চতুর্হস্তং চতুরস্রং স্থণ্ডিলমুপলিপ্য গোমযেন, দর্ভৈঃ সংস্তীর্য রত্নপুষ্পলাজভক্তৈর্দেবতাঃ পূজযিত্বা বিপ্রান্ ভিষজশ্চ, তত্রোল্লিখ্যাভ্যুক্ষ্য চ দক্ষিণতো ব্রহ্মাণং স্থাপযিত্বাঽগ্নিমুপসমাধায, খদিরপলাশদেবদারুবিল্বানাং সমিদ্ভিশ্চতুর্ণাং বা ক্ষীরিবৃক্ষাণাং (ন্যগ্রোধোদুম্বরাশ্বত্থমধূকানাং) দধিমধুঘৃতাক্তাভির্দার্বীহৌমিকেন বিধিনা সপ্রণবাভির্মহাব্যাহৃতিভিঃ স্রুবেণাজ্যাহুতীর্জুহুযাত্, ততঃ প্রতিদৈবতমৃষীংশ্চ স্বাহাকারং কুর্যাত্, শিষ্যমপি কারযেত্ ||৪||
View original
उपनयनीयं तु ब्राह्मणं प्रशस्तेषु तिथिकरणमुहूर्तनक्षत्रेषु प्रशस्तायां दिशि शुचौ समे देशे चतुर्हस्तं चतुरस्रं स्थण्डिलमुपलिप्य गोमयेन, दर्भैः संस्तीर्य रत्नपुष्पलाजभक्तैर्देवताः पूजयित्वा विप्रान् भिषजश्च, तत्रोल्लिख्याभ्युक्ष्य च दक्षिणतो ब्रह्माणं स्थापयित्वाऽग्निमुपसमाधाय, खदिरपलाशदेवदारुबिल्वानां समिद्भिश्चतुर्णां वा क्षीरिवृक्षाणां (न्यग्रोधोदुम्बराश्वत्थमधूकानां) दधिमधुघृताक्ताभिर्दार्वीहौमिकेन विधिना सप्रणवाभिर्महाव्याहृतिभिः स्रुवेणाज्याहुतीर्जुहुयात्, ततः प्रतिदैवतमृषींश्च स्वाहाकारं कुर्यात्, शिष्यमपि कारयेत् ||४||
শিষ্যগুণসম্পদমভিধায, উপনযনবিধিং বক্তুমাহ- উপনযনীযং ত্বিত্যাদি|- উপনযনীযম্ উপনযনার্হং পূর্বোদিতগুণসম্পন্নং ব্রাহ্মণং শিষ্যং ভিষক্ স্বাহাকারং কারযেদিতি সম্বন্ধঃ| কদা কারযেদিত্যাহ- প্রশস্তেষ্বিত্যাদি| কিং কৃত্বেত্যাহ- প্রশস্তাযামিত্যাদি, তদনু রত্নপুষ্পেত্যাদি, ততশ্চ তত্রোল্লিখ্যেত্যাদি, তদনন্তরমগ্নিমুপসমাধায খদিরাদীনাং ক্ষীরিবৃক্ষাণাং বা দধিমধুঘৃতাক্তাভিঃ সমিদ্ভিঃ কৃত্বা দার্বীহৌমিকেন বিধিনা জুহুযাত্, তথা সপ্রণবাভির্মহাব্যাহৃতিভিরুপলক্ষিতাঃ স্রুবেণ কৃত্বা আজ্যাহুতীরেব জুহুযাদিতি সম্বন্ধঃ| অন্যে তু ‘উপনযনীযস্তু ব্রাহ্মণঃ’ ইতি পঠন্তি, ব্যাখ্যানযন্তি চ- উপনযনীয ইতি কর্তরি প্রযোগঃ; তেন উপনেতা ব্রাহ্মণ ইদমিদং কৃত্বা আজ্যাহুতীর্জুহুযাদিতি ক্রিযাপদেন সম্বন্ধঃ| প্রাক্ ব্রাহ্মণগ্রহণং বর্ণেষু মধ্যে তস্য শ্রেষ্ঠত্বাত্| প্রশস্তেষু তিথিকরণমুহূর্তনক্ষত্রেষ্বিতি তিথযঃ প্রতিপদাদ্যাঃ, করণানি বববালবাদীনি, মুহূর্তাস্ত্রিংশত্ শিবাদ্যা অনিলপর্যন্তাঃ, নক্ষত্রাণি অশ্বিনীপ্রভৃতীনি; এষাং প্রশস্তত্বং জ্যোতিঃশাস্ত্রবিদাং বচনাদুন্নেযম্| প্রশস্তাযাং দিশি প্রাচ্যামুদীচ্যাং বা| চতুরস্রং চতুষ্কোণম্| গোমযেন গোপুরীষেণ| স্থণ্ডিলং ব্রতসাধনপিণ্ডিকাং, গোচর্মমাত্রভূপ্রদেশঃ স্থণ্ডিলমিত্যন্যে; একে চতুর্হস্তস্থানে ‘গোচর্মমাত্রং’ ইতি পঠিত্বা গোচর্মমাত্রস্থণ্ডিলযোর্ব্যাখ্যানং কুর্বন্তি- গোচর্মমাত্রং চতুর্হস্তপ্রমাণং, স্থণ্ডিলং সংস্কৃতা ভূঃ| তত্রেতি তস্মিন্ স্থণ্ডিলে; উল্লিখ্য ঊর্ধ্বমুখীং লেখাং কৃত্বা; অভ্যুক্ষ্য জলেন সিক্ত্বা| অগ্নিমুপসমাধায সন্নিধানে আরোপ্য| চতুর্ণাং বা ক্ষীরিবৃক্ষাণামিতি ন্যগ্রোধোদুম্বরাশ্বত্থমধূকানাম্| দার্বীহৌমিকেন বিধিনেতি দার্বীহোমপ্রোক্তকল্পেন; দার্বীহৌমিকো বিধিস্তু ব্রাহ্মণানাং ছন্দোবিদাং প্রসিদ্ধঃ| সপ্রণবাভিঃ সোঙ্কারাভিঃ, মহাব্যাহৃতিভিঃ ভূঃ স্বাহেত্যাদিভিঃ; তথাহি- ॐ ভূঃ স্বাহা, ॐ ভুবঃ স্বাহা, ॐ স্বঃ স্বাহা, ॐ ভূর্ভুবঃ স্বঃ স্বাহা, ইতি| স্রুবেণাজ্যাহুতীর্জুহুযাদিতি দারুহস্তকেন ঘৃতাহুতীর্দদ্যাত্| প্রতিদৈবতমৃষীংশ্চেতি চকারাত্ ঋষীংশ্চেত্যত্রাপি প্রতিশব্দঃ সম্বধ্যতে; তেন প্রতিদৈবতং প্রতিঋষীনিত্যর্থঃ| তত্র প্রতিদৈবতং ব্রহ্মণে স্বাহা, প্রজাপতযে স্বাহা, অশ্বিভ্যাং স্বাহা, ইন্দ্রায স্বাহা; প্রতিঋষীনিতি ধন্বন্তরযে স্বাহা, ভরদ্বাজায স্বাহা, আত্রেযায স্বাহা, ইত্যাদি||৪||
Adhikarana 4 (5) · Śloka 5
ব্রাহ্মণস্ত্রযাণাং বর্ণানামুপনযনং কর্তুমর্হতি, (রাজন্যো দ্বযস্য, বৈশ্যো বৈশ্যস্যৈবেতি;) শূদ্রমপি কুলগুণসম্পন্নং মন্ত্রবর্জমনুপনীতমধ্যাপযেদিত্যেকে ||৫||
View original
ब्राह्मणस्त्रयाणां वर्णानामुपनयनं कर्तुमर्हति, (राजन्यो द्वयस्य, वैश्यो वैश्यस्यैवेति;) शूद्रमपि कुलगुणसम्पन्नं मन्त्रवर्जमनुपनीतमध्यापयेदित्येके ||५||
ব্রাহ্মণস্ত্রযাণামিত্যাদি| অন্যে ত্বস্যাগ্রে ‘রাজন্যো দ্বযস্য, বৈশ্যো বৈশ্যস্যৈব’ ইতি পঠন্তি, স চ নিবন্ধৈরনার্ষীকৃতঃ| শূদ্রমপি কুলগুণসম্পন্নমিত্যাদি কুলগুণসম্পন্নমিতি সম্পন্নশব্দঃ কুলগুণাভ্যাং প্রত্যেকং সম্বধ্যতে, কুলসম্পন্নমাযুর্বেদাধ্যাযিকুলসংযুক্তং, গুণসম্পন্নং বযঃশৌচাদিশিষ্যগুণসংযুক্তম্| অনুপনীতং দীক্ষারহিতম্| ‘শূদ্রমপি গুণসম্পন্নং মন্ত্রবর্জমুপনীযাধ্যাপযেদিত্যেকে’ ইতি কেচিত্ পঠন্তি||৫||
Adhikarana 5 (6) · Śloka 6
ততোঽগ্নিং ত্রিঃ পরিণীযাগ্নিসাক্ষিকং শিষ্যং ব্রূযাত্- কামক্রোধলোভমোহমানাহঙ্কারের্ষ্যাপারুষ্যপৈশুন্যানৃতালস্যাযশস্যানি হিত্বা, নীচনখরোম্ণাশুচিনা কষাযবাসসা সত্যব্রতব্রহ্মচর্যাভিবাদনতত্পরেণাবশ্যং ভবিতব্যং, মদনুমতস্থানগমনশযনাসনভোজনাধ্যযনপরেণ ভূত্বা মত্প্রিযহিতেষু বর্তিতব্যম্; অতোঽন্যথা তে বর্তমানস্যাধর্মো ভবতি, অফলা চ বিদ্যা, ন চ প্রাকাশ্যং প্রাপ্নোতি ||৬||
View original
ततोऽग्निं त्रिः परिणीयाग्निसाक्षिकं शिष्यं ब्रूयात्- कामक्रोधलोभमोहमानाहङ्कारेर्ष्यापारुष्यपैशुन्यानृतालस्यायशस्यानि हित्वा, नीचनखरोम्णाशुचिना कषायवाससा सत्यव्रतब्रह्मचर्याभिवादनतत्परेणावश्यं भवितव्यं, मदनुमतस्थानगमनशयनासनभोजनाध्ययनपरेण भूत्वा मत्प्रियहितेषु वर्तितव्यम्; अतोऽन्यथा ते वर्तमानस्याधर्मो भवति, अफला च विद्या, न च प्राकाश्यं प्राप्नोति ||६||
ততোঽগ্নিমিত্যাদি| ত্রিঃ পরিণীয ত্রীন্ বারান্ প্রদক্ষিণীকৃত্য, অগ্নিসাক্ষিকং শিষ্যং ব্রূযাদিতি অগ্নিসাক্ষিকং যথা স্যাদেবং শিষ্যং ব্রূযাত্| কিং ব্রূযাদিত্যাহ- কামাদীন্ হিত্বা পরিত্যজ্য, মত্প্রিযহিতেষু বর্তিতব্যমিতি|- কামঃ বিশিষ্টস্ত্রীবিষযস্পর্শসঙ্কল্পঃ, অথবা শব্দাদিষু গ্রহণপ্রবৃত্তির্বা, স্ববান্ধবকৃতস্নেহো বা কামঃ; ক্রোধঃ পরস্যাপকারপূর্বকং হৃদযোত্তেজঃ; লোভঃ পরস্বগ্রহণেচ্ছা; মোহস্তু তত্ত্বজ্ঞানে মূঢতা, সা পুনস্ত্রিভিঃ কারণৈঃ- অজ্ঞানাত্, সংশযজ্ঞানাত্, মিথ্যাজ্ঞানাচ্চ; মানঃ সর্বত্রোত্কর্ষেণাত্মনো জ্ঞানং; কার্যেঽপরামর্শতোঽহমিতি প্রবৃত্তিরহঙ্কারঃ; ঈর্ষ্যা পরসম্পত্তাবসহিষ্ণুতা; পারুষ্যং বাগ্রূক্ষতা; পৈশুন্যং সূচকতা; অনৃতমসত্যং; আলস্যং কর্মণ্যনুত্সাহঃ; অযশস্যানি বাচ্যস্থানপ্রবর্তনানি; হিত্বা পরিত্যজ্য| নীচনখরোম্ণেতি ক্লৃপ্তত্বান্নীচমল্পং নখাদি যস্য স তথা, তেন| সত্যব্রতব্রহ্মচর্যাভিবাদনতত্পরেণেতি তত্পরশব্দঃ সত্যাদিভিঃ প্রত্যেকং সম্বধ্যতে; ব্রহ্মচর্যং সমস্তেন্দ্রিযসংযমঃ| অবশ্যমিতি নান্যথেত্যর্থঃ| মদনুমতানি মযাঽনুজ্ঞাতানি মত্কথিতানীত্যর্থঃ; স্থানাদিপরেণ ভূত্বা তন্নিষ্ঠেন ভূত্বা| প্রাকাশ্যং প্রসিদ্ধিম্||৬||
Adhikarana 6 (7) · Śloka 7
অহং বা ত্বযি সম্যগ্বর্তমানে যদ্যন্যথাদর্শী স্যামেনোভাগ্ভবেযমফলবিদ্যশ্চ ||৭||
View original
अहं वा त्वयि सम्यग्वर्तमाने यद्यन्यथादर्शी स्यामेनोभाग्भवेयमफलविद्यश्च ||७||
শিষ্যপ্রবৃত্তিমাত্মবিষযে নিযম্য, শিষ্যবিষযে আত্মপ্রবৃত্তিং নিযমযন্নাহ- অহং বেত্যাদি| যদ্যন্যথাদর্শী স্যাম্ অন্যপ্রকারদর্শী ভবেযং, তদা এনোভাগ্ভবেযং পাপভাজনং ভবামীত্যর্থঃ||৭||
Adhikarana 7 (8) · Śloka 8
দ্বিজগুরুদরিদ্রমিত্রপ্রব্রজিতোপনতসাধ্বনাথাভ্যুপগতানাং চাত্মবান্ধবানামিব স্বভৈষজৈঃ প্রতিকর্তব্যম্, এবং সাধু ভবতি; ব্যাধশাকুনিকপতিতপাপকারিণাং চ ন প্রতিকর্তব্যম্; এবং বিদ্যা প্রকাশতে মিত্রযশোধর্মার্থকামাংশ্চ প্রাপ্নোতি ||৮||
View original
द्विजगुरुदरिद्रमित्रप्रव्रजितोपनतसाध्वनाथाभ्युपगतानां चात्मबान्धवानामिव स्वभैषजैः प्रतिकर्तव्यम्, एवं साधु भवति; व्याधशाकुनिकपतितपापकारिणां च न प्रतिकर्तव्यम्; एवं विद्या प्रकाशते मित्रयशोधर्मार्थकामांश्च प्राप्नोति ||८||
শিষ্যস্য আতুরে প্রবৃত্তিং নিযমযন্নাহ- দ্বিজেত্যাদি| প্রব্রজিতাঃ তপস্বিনঃ, উপনতাঃ সন্নিধানে প্রণযযুক্তাঃ, সাধবঃ সত্পুরুষাঃ; অনাথাঃ একাকিনঃ, অভ্যুপগতা দূরাদাযাতাঃ সন্তোঽঙ্গীকৃতাঃ ; এষাং প্রতিকর্তব্যং প্রতিবিধাতব্যম্| এবং সাধু ভবতি অনেন প্রকারেণ শোভনং ভবতি| ইদানীমপ্রবৃত্তিং দর্শযন্নাহ- ব্যাধেত্যাদি|- ব্যাধাদিষু সত্যপ্যর্থলাভে ন প্রতিকর্তব্যম্| ব্যাধা বাগুরিকাদযঃ, শাকুনিকাঃ পক্ষিণাং হন্তারঃ, পতিতাঃ স্বকীযাচারভ্রষ্টাঃ, পাপকারিণঃ গুরুতল্পগাদযঃ| ন প্রতিকর্তব্যং নোপচরণীযম্| এবং বিদ্যা প্রকাশতে অনেন প্রকারেণ বিদ্যা স্বযমেব প্রকাশং যাতি, কেচিত্ ‘প্রকাশ্যতে’ ইতি পঠন্তি||৮||
Adhikarana 8 (9-10) · Śloka 10
ভবতশ্চাত্র- কৃষ্ণেঽষ্টমী তন্নিধনেঽহনী দ্বে শুক্লে তথাঽপ্যেবমহর্দ্বিসন্ধ্যম্ |
অকালবিদ্যুত্স্তনযিত্নুঘোষে স্বতন্ত্ররাষ্ট্রক্ষিতিপব্যথাসু ||৯||
শ্মশানযানাদ্যতনাহবেষু মহোত্সবৌত্পাতিকদর্শনেষু |
নাধ্যেযমন্যেষু চ যেষু বিপ্রা নাধীযতে নাশুচিনা চ নিত্যম্ ||১০||
View original
भवतश्चात्र- कृष्णेऽष्टमी तन्निधनेऽहनी द्वे शुक्ले तथाऽप्येवमहर्द्विसन्ध्यम् |
अकालविद्युत्स्तनयित्नुघोषे स्वतन्त्रराष्ट्रक्षितिपव्यथासु ||९||
श्मशानयानाद्यतनाहवेषु महोत्सवौत्पातिकदर्शनेषु |
नाध्येयमन्येषु च येषु विप्रा नाधीयते नाशुचिना च नित्यम् ||१०||
ইদানীমনধ্যযনকালমাহ- কৃষ্ণে ইত্যাদি| কৃষ্ণেঽষ্টমীতি কৃষ্ণপক্ষে যা অষ্টমী, তন্নিধনে কৃষ্ণপক্ষাবসানে, অহনী দ্বে চতুর্দশ্যমাবস্যে; শুক্লে শুক্লপক্ষেঽপি, তথা তেনৈব প্রকারেণ, নাধ্যেযমিতি; তেনাত্রাপি অষ্টমীচতুর্দশীপৌর্ণমাসীষু নাধ্যেযমিতি| তত্প্রতিপদোস্তু পাঠনিষেধঃ ‘অন্যেষু চ যেষু বিপ্রা নাধীযতে’ ইত্যনেন গম্যতে; অন্যে তু প্রতিপদাবন্যথা গৃহীতুং ব্যাখ্যানযন্তি- তন্নিধনে ইতি কৃষ্ণপক্ষাবসানে অহনি নাধ্যেযং, তেন অমাবাস্যা গৃহীতা; অহনী দ্বে ইতি কৃষ্ণপক্ষাবসানসমীপে যৌ দ্বৌ দিবসৌ তযোরপি নাধ্যেযং, তেন চতুর্দশীপ্রতিপদৌ| অহানি নিযম্য অহরবযবান্নিযন্তুমাহ- অহর্দ্বিসন্ধ্যমিতি|- অহনি দ্বযোঃ সন্ধ্যযোর্নাধ্যেযমিতি| অকালবিদ্যুত্স্তনযিত্নুঘোষে ইতি অকালশব্দো বিদ্যুত্স্তনযিত্নুঘোষাভ্যাং সহ সম্বধ্যতে; অকালবিদ্যুত্ অনার্তবা বিদ্যুত্; বিদ্যুদ্গ্রহণমুপলক্ষণং, তেনাকালিকী বৃষ্টির্গৃহ্যতে, অকালবৃষ্টিঃ অনৃতুবৃষ্টিঃ, সা তু হেমন্তশিশিরযোঃ; তথা চোক্তং- ‘‘পৌষাদিচতুরো মাসান্ স্মৃতা বৃষ্টিরকালিকী’’- ইতি; অকালস্তনযিত্নুঘোষ ইতি অনৃতুমেঘগর্জিতম্, অন্যে সন্ধ্যামেঘগর্জিতমাচক্ষতে| স্বতন্ত্ররাষ্ট্রক্ষিতিপব্যথাস্বিতি স্বশব্দস্তন্ত্রাদিভিঃ প্রত্যেকং সম্বধ্যতে; তেনাত্মীযলোকদেশভূপপীডাসু| শ্মশানযানাদ্যতনাহবেষ্বিতি শ্মশানং মৃতমর্ত্যদাহস্থানং, যানং হস্ত্যাদি, অদ্যতনং বধস্থানম্ , আহবঃ সঙ্গ্রামঃ| মহোত্সবৌত্পাতিকদর্শনেষ্বিতি মহোত্সবাঃ শক্রোত্সবাদযঃ; তথাহি- ভাদ্রপদপৌর্ণমাস্যাং শক্রস্য মহোত্সবঃ, আশ্বিন্যাং কৌমুদীমহোত্সবঃ, উত্তরাযণসঙ্ক্রান্তৌ কুবেরমহোত্সবঃ, চৈত্রশুক্লত্রযোদশ্যাং মদনমহোত্সবঃ, ইত্যাদযঃ; উত্পাতঃ অনিষ্টসূচকনিমিত্তং নির্ঘাতাদি; অন্যে তূত্পাতং ত্রিবিধমাচক্ষতে- ভৌমম্, আন্তরিক্ষং, দিব্যমিতি; তেষু মধ্যে ভৌম উত্পাতঃ স্থিরাজাতঃ, আন্তরিক্ষো গন্ধর্বপুরেন্দ্রচাপাদি, দিব্যো গ্রহনক্ষত্রবৈকৃতমুত্পাতাদিশ্চ; উত্পাত এব ঔত্পাতিকঃ| অনুক্তসঙ্গ্রহার্থমাহ- নাধ্যেযমন্যেষু চেত্যাদি| তে চ কালবিশেষাশ্ছন্দোগানাং বচনাদেবাবগন্তব্যা ইতি| অন্যে ত্বত্র উচ্ছিষ্টাদিভোজবচনমাশ্রযন্তি| কৃষ্ণাষ্টমীতি কেচিত্ পঠন্তি||৯-১০||
Adhikarana puShpikA · Śloka 2
ইতি সুশ্রুতসংহিতাযাং সূত্রস্থানে শিষ্যোপনযনীযো নাম দ্বিতীযোঽধ্যাযঃ ||২||
View original
इति सुश्रुतसंहितायां सूत्रस्थाने शिष्योपनयनीयो नाम द्वितीयोऽध्यायः ||२||
ইতি শ্রীডল্হ(হ্ল)ণবিরচিতাযাং সুশ্রুতব্যাখ্যাযাং নিবন্ধসঙ্গ্রহাখ্যাযাং সূত্রস্থানে দ্বিতীযোঽধ্যাযঃ||২||