29. viparītāviparītadūtaśakunasvapnanidarśanīyādhyāyaḥ

Adhikarana 1 (1-2) · Śloka 2

অথাতো বিপরীতাবিপরীতস্বপ্ননিদর্শনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| স্বপ্নশব্দানন্তরং লুপ্তাদিশব্দনির্দেশান্নক্ষত্রবেলাতিথিনিমিত্তশকুনানিলদেশবৈদ্যবাগ্দেহমনশ্চেষ্টা অপি গৃহ্যন্তে||১-২||

Adhikarana 2 (3-4) · Śloka 4

দূতদর্শনসম্ভাষা বেষাশ্চেষ্টিতমেব চ | ঋক্ষং বেলা তিথিশ্চৈব নিমিত্তং শকুনোঽনিলঃ ||৩|| দেশো বৈদ্যস্য বাগ্দেহমনসাং চ বিচেষ্টিতম্ | কথযন্ত্যাতুরগতং শুভং বা যদি বাঽশুভম্ ||৪||

অত্রাধ্যাযে নির্দেশ্যান্ দূতাদীনুপদর্শযন্নাহ- দূতেত্যাদি| দূতশব্দোঽত্র দর্শনসম্ভাষবেশচেষ্টিতৈঃ সহ সম্বধ্যতে| গমনায প্রশ্নায বাঽঽগতঃ পুরুষো দূতঃ| চেষ্টা চাত্র কাযকৃতো ব্যাপারঃ, ঋক্ষাণি আর্দ্রাদীনি, বেলা মধ্যাহ্নাদিকাঃ, তিথযঃ চতুর্থ্যাদযঃ, নিমিত্তং সর্পাদিদর্শনং , দেশো বৈদ্যস্য ভূমিভাগঃ, বাগ্দেহমনসাং চ বিচেষ্টিতমপি বৈদ্যস্যৈব| আতুরগতমিতি আতুরাশ্রিতমিত্যর্থঃ| স্বপ্নাঃ পশ্চান্নির্দেশ্যাঃ||৩-৪||

Adhikarana 3 (5-6) · Śloka 7

পাখ(ষ)ণ্ডাশ্রমবর্ণানাং সপক্ষাঃ কর্মসিদ্ধযে | ত এব বিপরীতাঃ স্যুর্দূতাঃ কর্মবিপত্তযে ||৫|| নপুংসকং স্ত্রী বহবো নৈককার্যা অসূযকাঃ | গর্দভোষ্ট্ররথপ্রাপ্তাঃ প্রাপ্তা বা স্যুঃ পরম্পরাঃ ||৬|| বৈদ্যং য উপসর্পন্তি দূতাস্তে চাপি গর্হিতাঃ |৭|

প্রথমং দূতদর্শনমধিকৃত্যাহ- পাখণ্ডেত্যাদি| পাখ(ষ)ণ্ডাঃ কাপালিকাদযঃ, আশ্রমা ব্রহ্মচারিগৃহস্থবানপ্রস্থযতযঃ, বর্ণা ব্রাহ্মণাদযঃ| সপক্ষা ইতি তদ্যথা- কাপালী কাপালিকস্য, ব্রহ্মচারী ব্রহ্মচারিণঃ, বিপ্রো বিপ্রস্যেত্যাদযঃ| কর্মসিদ্ধযে কার্যসিদ্ধ্যর্থম্| | ত এব বিপরীতা ইতি কাপালিকস্য ব্রহ্মচারী, ব্রহ্মচারিণঃ কাপালীত্যাদি| কর্মবিপত্তযে ইতি চিকিত্সিতনাশায| নপুংসকমিতি ন পুমান্ ন চ স্ত্রী| স্ত্রীতি যোষিদিত্যর্থঃ| বহব ইতি প্রভূতা ইত্যর্থঃ| নৈককার্যা ইতি নৈকস্মিন্ কার্যে যে দূতাঃ সমাগতা ইত্যর্থঃ| অসূযকা ইতি পরস্পরং কলহং কুর্বাণাঃ| গর্দভোষ্ট্ররথপ্রাপ্তা ইতি গর্দভোষ্ট্রযুক্তেন রথেনাগতা ইত্যর্থঃ| প্রাপ্তা বা স্যুঃ পরম্পরা ইতি আগতা বা ভবেযুঃ, পরম্পরা পঙ্ক্তিঃ, এতেন পঙ্ক্তিং কৃত্বা যদাঽঽগচ্ছন্তো ভবন্তীত্যুক্তম্| বৈদ্যং য উপসর্পন্তীত্যাদি যে দূতা এবঙ্গুণবিশিষ্টা বৈদ্যমুপসর্পন্তি সমীপমাগচ্ছন্তি , তে গর্হিতা এবেতি সম্ভাবনীযাঃ| অত্র চশব্দ এবকারার্থঃ, অপিশব্দঃ সম্ভাবনাযাম্||৫-৬||-

Adhikarana 4 (7-8) · Śloka 8

পাশদণ্ডাযুধধরাঃ পাণ্ডুরেতরবাসসঃ ||৭|| আর্দ্রজীর্ণাপসব্যৈকমলিনোদ্ধ্বস্তবাসসঃ | ন্যূনাধিকাঙ্গা উদ্বিগ্না বিকৃতা রৌদ্ররূপিণঃ ||৮||

বেষমধিকৃত্যাহ- পাশেত্যাদি| পাশো দীর্ঘঃ পশূনাং বন্ধনো রজ্জুবলযঃ, দণ্ডো লৌহাদিবলযৈর্নিবদ্ধো দীর্ঘনিষ্ঠুরকাষ্ঠযষ্টিঃ, আযুধানি খড্গশক্ত্যাদীনি| পাণ্ডুরেতরবাসস ইতি কৃষ্ণপীতরক্তবস্ত্রাঃ| আর্দ্রজীর্ণাপসব্যৈকমলিনোদ্ধ্বস্তবাসস ইতি আর্দ্রং স্তিমিতং, জীর্ণং পুরাতনম্, অপসব্যং দক্ষিণাশ্রিতমুত্তরীযবাসঃ, একম্ একবস্ত্রধারিণং, মলিনমধৌতং, উদ্ধ্বস্তং পাটিতং বস্ত্রম্| ন্যূনাধিকাঙ্গা ইতি ন্যূনা হস্তাদ্যবযবৈর্হীনাঃ; অধিকাঙ্গা ইতি একবিংশত্যঙ্গুল্যাদিযুক্তাঃ| উদ্বিগ্না ইতি ভীতাঃ| বিকৃতা ইতি পঙ্গুকুব্জবামনাদযঃ| রৌদ্ররূপিণ ইতি ভৈরবোদ্ধতকর্কশাঃ (ভযাবহরূপিণঃ )||৭-৮||

Adhikarana 5 (9) · Śloka 9

রূক্ষনিষ্ঠুরবক্তারস্ত্বমঙ্গল্যাভিধাযিনঃ |৯|

দূতসম্ভাষামধিকুর্বন্নাহ- রূক্ষেত্যাদি| রূক্ষং মৈত্রীরহিতং বচঃ, নিষ্ঠুরং কঠোরবচনম্| অমঙ্গল্যাভিধাযিন ইতি গতভৃতনষ্টরুদিতেত্যাদিবচনমমঙ্গলম্|৯|-

Adhikarana 6 (9-14) · Śloka 15

ছিন্দন্তস্তৃণকাষ্ঠানি স্পৃশন্তো নাসিকাং স্তনম্ ||৯|| বস্ত্রান্তানামিকাকেশনখরোমদশাস্পৃশঃ | স্রোতোবরোধহৃদ্গণ্ডমূর্ধোরঃকুক্ষিপাণযঃ ||১০|| কপালোপলভস্মাস্থিতুষাঙ্গারকরাশ্চ যে | বিলিখন্তো মহীং কিঞ্চিন্মুঞ্চন্তো লোষ্টভেদিনঃ ||১১|| তৈলকর্দমদিগ্ধাঙ্গা রক্তস্রগনুলেপনাঃ | ফলং পক্বমসারং বা গৃহীত্বাঽন্যচ্চ তদ্বিধম্ ||১২|| নখৈর্নখান্তরং বাঽপি করেণ চরণং তথা | উপানচ্চর্মহস্তা বা বিকৃতব্যাধিপীডিতাঃ ||১৩|| বামাচারা রুদন্তশ্চ শ্বাসিনো বিকৃতেক্ষণাঃ | যাম্যাং দিশি প্রাঞ্জলযো বিষমৈকপদে স্থিতাঃ ||১৪|| বৈদ্যং য উপসর্পন্তি দূতাস্তে চাপি গর্হিতাঃ |১৫|

চেষ্টিতমধিকৃত্যাহ- ছিন্দন্ত ইত্যাদি| বস্ত্রান্তো দশাহীনস্য বস্ত্রস্যান্তম্, অনামিকা পবিত্রাঙ্গুলিঃ, কেশা মস্তকবালাঃ, রোমাণি শরীরোদ্ভবা বালাঃ, দশাঃ সদশস্য বস্ত্রস্য প্রান্তাঃ| স্রোতোবরোধেত্যাদি স্রোতোবরোধাদিষু নিক্ষিপ্তপাণযঃ; স্রোতঃ কর্ণাদিছিদ্রম্, অবরোধঃ স্কন্ধদেশঃ, হৃত্ কমলমুকুলাকারমধোমুখং, গণ্ডো গল্লঃ, মূর্ধা মস্তকম্, উরঃ কণ্ঠহৃদযান্তরালঃ, কুক্ষির্বঙ্ক্ষণপার্শ্বান্তরালঃ| কপালোপলেত্যাদি| করশব্দঃ কপালাদিভিঃ প্রত্যেকং সম্বধ্যতে, তেন কপালাদিকরা ইত্যাদি বোদ্ধব্যং; কপালো মৃদ্ভাণ্ডখণ্ডঃ, উপলঃ পাষাণঃ, ভস্মেতি দগ্ধকাষ্ঠাদিক্ষারঃ, অস্থি হড্ডং, তুষা ধান্যাদিত্বচঃ, অঙ্গারোঽভস্মসাত্কৃতো দগ্ধকাষ্ঠখণ্ডঃ| বিলিখন্তো মহীমিতি বিলিখন্তো নখাদিনা বিদারযন্তঃ পৃথিবীমিত্যর্থঃ| কিঞ্চিন্মুঞ্চন্ত ইতি কিঞ্চিদ্বস্তু হস্তেন গৃহীতং মুঞ্চন্তঃ| লোষ্টভেদিন ইতি মৃত্পিণ্ডস্ফোটনশীলা ইত্যর্থঃ| দিগ্ধাঙ্গা ইতি লিপ্তাঙ্গা ইত্যর্থঃ| রক্তস্রগনুলেপনা রক্তমালাধারিণো রক্তবিলেপনাশ্চেত্যর্থঃ| ফলমিত্যাদি| অসারমিতি অভ্যন্তরসারবর্জিতম্| অন্যচ্চ তদ্বিধমিতি অন্যদপি বস্তু পক্বমসারং চ| নখৈর্নখান্তরং বাঽপি করেণ চরণং তথেত্যত্র 'গৃহীত্বা' ইতি সম্বন্ধঃ| উপানদিত্যাদি|- উপানত্ পাদহিতা, চর্মহস্তা বেতি চর্মমযসট্টাদিধারিণঃ| বিকৃতব্যাধিপীডিতা ইতি গলত্কুষ্ঠাদিবিকৃতব্যাধিপীডিতাঃ| বামাচারা ইতি বিপরীতব্যবহারাঃ| শ্বাসিন ইতি শ্রমজনিতশ্বাসযুক্তাঃ | বিকৃতেক্ষণা ইতি পুষ্পিতনেত্রাদযঃ| যাম্যাং দিশি দক্ষিণস্যাং দিশি, প্রাঞ্জলযঃ প্রসারিতাঞ্জলযঃ| বিষমৈকপদে স্থিতা ইতি বিষমে একস্মিন্ স্থানে ঊর্ধ্বীভূতাঃ| উপসর্পন্তি সমীপং গচ্ছন্তি||৯-১৪||

Adhikarana 7 (15-16) · Śloka 17

দক্ষিণাভিমুখং দেশে ত্বশুচৌ বা হুতাশনম্ | জ্বলযন্তং পচন্তং বা ক্রূরকর্মণি চোদ্যতম্ ||১৫|| নগ্নং ভূমৌ শযানং বা বেগোত্সর্গেষু বাঽশুচিম্ | প্রকীর্ণকেশমভ্যক্তং স্বিন্নং বিক্লবমেব বা ||১৬|| বৈদ্যং য উপসর্পন্তি দূতাস্তে চাপি গর্হিতাঃ |১৭|

চেষ্টিতমেব চেতি চকারেণানুক্তাঽপি বৈদ্যচেষ্টা সমুচ্চীযতে, তাং দূতদর্শনে নির্দিশন্নাহ- দক্ষিণেত্যাদি|- দক্ষিণাভিমুখমিতি দক্ষিণদিঙ্মুখম্| দেশে পদেশে| অশুচৌ অপবিত্রে| হুতাশনং জ্বলযন্তম্ অগ্নিং জ্বালযন্তম্| পচন্তমিতি পাকং কুর্বাণম্| ক্রূরকর্মণি পশুবধাদিকে| উদ্যন্তমুদ্যমং কুর্বাণম্| 'ক্ষুরকর্মণি' ইত্যেকে পঠন্তি, তত্র মুণ্ডনাদিকর্মণ্যুদ্যমং কুর্বাণমিত্যর্থঃ| বেগোত্সর্গেষ্বিতি মূত্রপুরীষোত্সর্গেষু| অশুচিমিতি অপবিত্রম্| প্রকীর্ণকেশং বিমুক্তকেশম্| অভ্যক্তং তৈলাদিনা| স্বিন্নং প্রস্বেদসহিতম্| বিক্লবং বিহ্বলম্| বৈদ্যং য উপসর্পন্তীত্যাদি ইত্থম্ভূতং বৈদ্যং যে দূতা উপসর্পন্তি তে গর্হিতা নিন্দিতা ভবন্তীত্যর্থঃ||১৫-১৬||-

Adhikarana 8 (17) · Śloka 18

বৈদ্যস্য পৈত্র্যে দৈবে বা কার্যে চোত্পাতদর্শনে ||১৭|| মধ্যাহ্নে চার্ধরাত্রে বা সন্ধ্যযোঃ ... |১৮|

বেলামধিকৃত্যাহ- বৈদ্যস্যেত্যাদি| পৈত্র্যে পিতৃকার্যে| দৈবে দেবকার্যে| উত্পাতদর্শন ইতি উত্পাতানাং ভূমিদিব্যান্তরীক্ষাণাং দর্শনে||১৭||-

Adhikarana 9 (18) · Śloka 18

... কৃত্তিকাসু চ | আর্দ্রাশ্লেষামঘামূলপূর্বাসু ভরণীষু চ ||১৮||

নক্ষত্রমধিকৃত্যাহ- কৃত্তিকাস্বিত্যাদি||১৮||

Adhikarana 10 (19) · Śloka 19

চতুর্থ্যাং বা নবম্যাং বা ষষ্ঠ্যাং সন্ধিদিনেষু চ | বৈদ্যং য উপসর্পন্তি দূতাস্তে চাপি গর্হিতাঃ ||১৯||

তিথিমধিকৃত্যাহ- চতুর্থ্যামিত্যাদি| সন্ধিদিনানি দেবপ্রেতকার্যাহাণি||১৯||

Adhikarana 11 (20-22) · Śloka 23

স্বিন্নাভিতপ্তা মধ্যাহ্নে জ্বলনস্য সমীপতঃ | গর্হিতাঃ পিত্তরোগেষু দূতা বৈদ্যমুপাগতাঃ ||২০|| ত এব কফরোগেষু কর্মসিদ্ধিকরাঃ স্মৃতাঃ | এতেন শেষং ব্যাখ্যাতং বুদ্ধ্বা সংবিভজেত্তু তত্ ||২১|| রক্তপিত্তাতিসারেষু প্রমেহেষু তথৈব চ | প্রশস্তো জলরোধেষু দূতবৈদ্যসমাগমঃ ||২২|| বিজ্ঞাযৈবং বিভাগং তু শেষং বুধ্যেত পণ্ডিতঃ |২৩|

বিশিষ্টরোগেষু বিশিষ্টবেলাদি দর্শযন্নাহ- স্বিন্নেত্যাদি| স্বিন্নাভিতপ্তা দূতা জ্বলনস্য সমীপতঃ সন্নিধানাদ্যদা বৈদ্যং মধ্যাহ্ন উপসর্পন্তি তদা গর্হিতা ইতি সম্বন্ধঃ| এতেন শেষমিত্যাদি শেষং বাতরোগে শীতপ্রবাতাদিষ্বিতি জ্ঞেযম্, অশুভমিত্যর্থঃ| রক্তপিত্তেত্যাদি| জলরোধেষু জলনিরোধযুক্তপ্রদেশেষু| বিজ্ঞাযেত্যাদি| শেষং বুধ্যেতেতি উদাবর্তমূত্রকৃচ্ছ্রাদৌ জলবেগদর্শনাদিকং প্রশস্তমিতি জানীযাত্||২০-২২||-

Adhikarana 12 (23-26) · Śloka 26

শুক্লবাসাঃ শুচির্গৌরঃ শ্যামো বা প্রিযদর্শনঃ ||২৩|| স্বস্যাং জাতৌ স্বগোত্রো বা দূতঃ কার্যকরঃ স্মৃতঃ | গোযানেনাগতস্তুষ্টঃ পাদাভ্যাং শুভচেষ্টিতঃ ||২৪|| স্মৃতিমান্ বিধিকালজ্ঞঃ স্বতন্ত্রঃ প্রতিপত্তিমান্ | অলঙ্কৃতো মঙ্গলবান্ দূতঃ কার্যকরঃ স্মৃতঃ ||২৫|| স্বস্থং প্রাঙ্মুখমাসীনং সমে দেশে শুচৌ শুচিম্ | উপসর্পতি যো বৈদ্যং স চ কার্যকরঃ স্মৃতঃ ||২৬||

অথাবিপরীতদূতদর্শনাদিকং নির্দিশন্নাহ- শুক্লবাসা ইত্যাদি| গোযানেনেতি বৃষভারূঢো বৃষভযুক্তযানারূঢো বেত্যর্থঃ; অন্যে তু 'গোযানেন পশুযানেন' ইত্যর্থমাহুঃ, গোশব্দস্য পশুবাচিত্বাত্; এতেন যাম্যাদিযানখরোষ্ট্রাদিকবর্জমশ্বাদিযানমুক্তম্| স্বতন্ত্রঃ স্বপ্রধানঃ| প্রতিপত্তিমানিতি প্রতিপত্তিরত্র জ্ঞানং প্রগল্ভতা বা| শুক্লবাসাঃ শুচির্গৌর ইত্যাদিদর্শনমুক্তম্| শুভচেষ্টিত ইত্যনেন চেষ্টোক্তা| অলঙ্কৃত ইতি বেষ উক্তঃ| সম্ভাষশ্বাত্র বিপরীতসম্ভাষবিপর্যযাদনুক্তোঽপি জ্ঞেযঃ| তথাহি, তত্র 'রূক্ষনিষ্ঠুরবক্তার' ইত্যুক্তম্, অত্র তু তদ্বিপর্যযেণ 'স্নিগ্ধকোমলাভিধাযিন' ইত্যবিপরীতসম্ভাষো জ্ঞেযঃ| তথা বেলানক্ষত্রতিথীনামুক্তানামেব বিপরীতত্বং, ততোঽন্যদবিপরীতত্বমিতি| কথম্ভূতং বৈদ্যমুপসর্পন্ দূতঃ কার্যকারী ভবতীত্যাহ- স্বস্থমিত্যাদি| স্বস্থম্ আধিব্যাধিবর্জিতম্, আসীনমুপবিষ্টং, শুচৌ পবিত্রে দেশে, শুচিং বৈদ্যম্, ইত্থম্ভূতং বৈদ্যং যো দূত উপসর্পতি স কার্যকারী ভবতি| কেচিন্নিবন্ধকারা অমুং পাঠং ন পঠন্তি||২৩-২৬||

Adhikarana 13 (27-31) · Śloka 32

মাংসোদকুম্ভাতপত্রবিপ্রবারণগোবৃষাঃ | শুক্লবর্ণাশ্চ পূজ্যন্তে প্রস্থানে দর্শনং গতাঃ ||২৭|| স্ত্রী পুত্রিণী সবত্সা গৌর্বর্ধমানমলঙ্কৃতা | কন্যা মত্স্যাঃ ফলং চামং স্বস্তিকং মোদকা দধি ||২৮|| হিরণ্যাক্ষতপাত্রং বা রত্নানি সুমনো নৃপঃ | অপ্রশান্তোঽনলো বাজী হংসশ্চাপঃ শিখী তথা ||২৯|| ব্রহ্মদুন্দুভিজীমূতশঙ্খবেণুরথস্বনাঃ | সিংহগোবৃষনাদাশ্চ হ্রে(হে)ষিতং গজবৃংহিতম্ ||৩০|| শস্তং হংসরুতং নৄণাং কৌশিকং চৈব বামতঃ | প্রস্থানে যাযিনঃ শ্রেষ্ঠা বাচশ্চ হৃদযঙ্গমাঃ |৩২|

অথাবিপরীতলক্ষণান্যাহ- মাংসেত্যাদি| মাংসমামমত্র| উদকুম্ভ ইতি অত্রোদকুম্ভশব্দেন পূর্ণো রিক্তশ্চ ঘটো গৃহ্যতে; তত্রাতুরগৃহে প্রবিশন্ পূর্ণঃ, আতুরগৃহান্নিঃসরন্ রিক্ত ইতি গৃহ্যতে| আতপত্রং ছত্রম্| বৃষো বৃষভঃ| শুক্লবর্ণাঃ পদার্থাঃ কার্পাসাস্থিতক্রভস্মক্ষারাদিব্যতিরিক্তাঃ সুমনোদধ্যক্ষতমৌক্তিকাদযঃ| পূজ্যন্তে শ্লাঘ্যন্তে| গতাঃ প্রাপ্তাঃ| বর্ধমানং শরাবঃ, অন্যে তু বিশিষ্টমেব দর্পণং মঙ্গল্যার্থং চষকং বা বর্ধমানমাচক্ষতে | অলঙ্কৃতা কন্যা ভূষণবতী কন্যা| কেচিত্ ‘বর্ধমানাঃ স্বলঙ্কৃতা' ইতি পঠন্তি, ব্যাখ্যানযন্তি চ- আলেপনধবলত্বাদিস্বলঙ্কৃতাঃ শরাবা বর্ধমানা ইতি| স্বস্তিকং মুক্তাদামবিশেষঃ, অন্যে স্বস্তিকং স্বস্তিকাকারং দূর্বাশকলমণ্ডিতং ধবলং দর্পণসক্তং মৃন্মযং গোমযকৃতং বা মঙ্গল্যমবতারণকার্থং কুর্বতে মাঙ্গলিককৃত্স্ত্রিযঃ| মোদকা লড্ডুকাঃ| হিরণ্যং স্বর্ণম্, অন্যে কপর্দকান্যাহুঃ; অক্ষতা লাজাঃ, অন্যেঽক্ষতানি যবধান্যান্যাহুঃ; পাত্রং তণ্ডুলভৃতশরাবাদিকম্| অন্যে তু ‘অক্ষতপাত্রম্' ইত্যেকমেব তণ্ডুলভৃতশরাবমিচ্ছন্তি| রত্নানি মাণিক্যাদীনি| সুমন ইতি শোভনমানসমিত্যর্থঃ, ‘বৈদ্যস্য' ইতি শেষঃ| নৃপঃ পৃথ্বীপতিঃ, অন্যে তু ‘শোভনচিত্তো রাজা' ইত্যাহুঃ| অপ্রশান্তোঽনলঃ প্রজ্বলিতবৈশ্বানরঃ| বাজী ঘোটকঃ| চাষঃ করটাসঃ| শিখী মযূরঃ| ব্রহ্মদুন্দুভীত্যাদি|- ব্রহ্মেতি বেদঃ, দুন্দুভিঃ নিঃস্বানঃ, জীমূতো মেঘঃ, এতেষাং স্বনাঃ শব্দাঃ শস্তাঃ| সিংহেত্যাদি| হ্রেষিতং বাজিধ্বনিঃ| গজবৃংহিতং হস্তিস্বনঃ| রুতং শব্দঃ| রুতশব্দঃ কৌশিকং চেত্যত্রাপি সম্বন্ধনীযঃ, তেনোলূকস্য রুতমিত্যর্থঃ| যাযিন ইতি গচ্ছন্তঃ পুরুষাঃ; বিপরীতং নিমিত্তং পশ্চাদ্দর্শনীযম্||২৭-৩১||

Adhikarana 14 (32-40) · Śloka 40

পত্রপুষ্পফলোপেতান্ সক্ষীরান্নীরুজো দ্রুমান্ | আশ্রিতা বা নভোবেশ্মধ্বজতোরণবেদিকাঃ ||৩২|| দিক্ষু শান্তাসু বক্তারো মধুরং পৃষ্ঠতোঽনুগাঃ | বামা বা দক্ষিণা বাঽপি শকুনাঃ কর্মসিদ্ধযে ||৩৩|| শুষ্কেঽশনিহতেঽপত্রে বল্লীনদ্ধে সকণ্টকে | বৃক্ষেঽথবাঽশ্মভস্মাস্থিবিট্তুষাঙ্গারপাংশুষু ||৩৪|| চৈত্যবল্মীকবিষমস্থিতা দীপ্তখরস্বরাঃ | পুরতো দিক্ষু দীপ্তাসু বক্তারো নার্থসাধকাঃ ||৩৫|| পুন্নামানঃ খগা বামাঃ স্ত্রীসঞ্জ্ঞা দক্ষিণাঃ শুভাঃ | দক্ষিণাদ্বামগমনং প্রশস্তং শ্বশৃগালযোঃ | বামং নকুলচাষাণাং নোভযং শশসর্পযোঃ ||৩৬|| ভাসকৌশিকযোশ্চৈব ন প্রশস্তং কিলোভযম্ | দর্শনং বা রুতং বাঽপি ন গোধাকৃকলাসযোঃ ||৩৭|| দূতৈরনিষ্টৈস্তুল্যানামশস্তং দর্শনং নৃণাম্ | কুলত্থতিলকার্পাসতুষপাষাণভস্মনাম্ ||৩৮|| পাত্রং নেষ্টং তথাঽঙ্গারতৈলকর্দমপূরিতম্ | প্রসন্নেতরমদ্যানাং পূর্ণং বা রক্তসর্ষপৈঃ ||৩৯|| শবকাষ্ঠপলাশানাং শুষ্কাণাং পথি সঙ্গমাঃ | নেষ্যন্তে পতিতান্তস্থদীনান্ধরিপবস্তথা ||৪০||

শকুনান্ নির্দিশন্নাহ- পত্রেত্যাদি| নীরুজ ইতি কৃমিদাবাগ্ন্যাদ্যনুপহতান্| আশ্রিতশব্দো নভঃপ্রভৃতিভিঃ সহ প্রত্যেকং সম্বধ্যতে| নভ আকাশং, বেশ্ম গৃহং, ধ্বজা পতাকা দেবাদীনাং, তোরণমার্দ্রবংশাদিরচিতং প্রতোল্যাকারং, বেদিকা ইতি বিবাহাদিনিমিত্তমামেষ্টকাদিরচিতশ্চতুরকঃ| দিক্ষু শান্তাস্বিতি পূর্বাসূত্তরাসু চেত্যর্থঃ; অন্যে তু আলিঙ্গিতাঽবধূমিতদীপ্তবর্জিতাস্বিত্যাচক্ষতে| বক্তার ইতি শব্দাযমানাঃ| পৃষ্ঠতোঽনুগা ইতি পৃষ্ঠপ্রদেশানুগতা ইত্যর্থঃ| বিপরীতাঞ্ শকুনান্নির্দিশন্নাহ- শুষ্কে ইত্যাদি| অশনিহতে বজ্রহতে| অপত্রে পত্ররহিতে| বল্লিনদ্ধে লতাবেষ্টিতে| সকণ্টকে কণ্টকসহিতে| ইত্থম্ভূতে বৃক্ষে ‘আশ্রিতা' ইত্যধ্যাহারঃ| অশ্মা পাষাণঃ| ভস্ম রক্ষা| বিট্ বিষ্ঠা| তুষা ধান্যত্বচঃ| পাংশুঃ ধূলিঃ| চৈত্যং শ্মশানবৃক্ষঃ| দীপ্তস্বরাঃ কুস্বরাঃ চিচীচীকারাদযঃ, খরস্বরাঃ উত্কটশব্দাঃ| দিক্ষু দীপ্তাস্বিতি আগ্নেযযাম্যনৈরৃতীষু| পুন্নামানঃ খগা বামা ইতি পুন্নামধেযাঃ পক্ষিণো বামপার্শ্বে বক্তারঃ শুভাঃ; তদ্যথা- হংসকারণ্ডবচক্রবাকাদযঃ| স্ত্রীসঞ্জ্ঞা দক্ষিণাঃ শুভা ইতি কোকিলাবলাকাদযঃ স্ত্রীসঞ্জ্ঞা দক্ষিণপার্শ্ববর্তিনঃ শুভাঃ| এতেন স্ত্রীপুংসঞ্জ্ঞাঃ পক্ষিণ ইত্থমেব শুভাঃ, অন্যথা অশুভাঃ, ইতি পরমার্থতো বিপরীতশকুনমেব কথিতং ভবতি| পূর্বানুক্তবিপরীতনিমিত্তং নির্দিশন্নাহ- দক্ষিণাদিত্যাদি| অত্রাপি তদ্বিপর্যযেণ দক্ষিণগমনং প্রশস্তমিত্যুক্তং ভবতি| নোভযমিতি উভযমপি বামদক্ষিণমপি গমনং ন প্রশস্তমিত্যর্থঃ| ভাসেত্যাদি ভাসো গোকুলচারী গৃধ্রবিশেষঃ| উভযমিতি বামদক্ষিণমিতি| দর্শনং বা রুতমিত্যাদি| কৃকলাসঃ ‘কণ্টিকাযা' ইতি লোকে; পূর্বদেশীযাস্তু গিরিগিটমাচক্ষতে| গোধাকৃকলাসযোর্দর্শনং রুতং বামতো দক্ষিণতঃ পুরতঃ পৃষ্ঠতো বা ন প্রশস্তমিতি| দূতৈরনিষ্টৈরিত্যাদি| অনিষ্টৈরিতি নপুংসকগর্দভোষ্ট্ররথপ্রাপ্তাদিভিস্তুল্যানাং সমানানামন্যেষামপি নৃণাং দর্শনং প্রস্থানে ন প্রশস্তম্| কুলত্থেত্যাদি| কুলত্থাদীনাং পাত্রমঙ্গারাদিপূরিতং চ নেষ্টং ন প্রশস্তমিত্যর্থঃ| প্রসন্নেতরমদ্যানামিত্যাদি| প্রসন্না মদ্যস্যোপর্যচ্ছো ভাগঃ; তদিতরেষাং মদ্যানাং পূর্ণমপ্রশস্তং, তথা রক্তসর্ষপপূর্ণং চ ন প্রশস্তম্| শবকাষ্ঠেত্যাদি শবাদীনাং পথি মার্গে সঙ্গমাঃ সংযোগা ন প্রশস্তাঃ| শবো মৃতকঃ| কাষ্ঠং দারু, পলাশং পর্ণম্| ‘শুষ্কাণাং' ইত্যত্র স্থানে কেচিত্ ‘রূঢানাং' ইতি পঠন্তি| তেষাং মতে রূঢানাং পুরাণানামিত্যর্থঃ| নেষ্যন্তে ন প্রশস্যন্তে| পতিতাঃ পঞ্চ মহাপাতকিনঃ| অন্তঃস্থাঃ চণ্ডালাদযঃ| দীনো নিরুত্সাহঃ||৩২-৪০||

Adhikarana 15 (41) · Śloka 41

মৃদুঃ শীতোঽনুকূলশ্চ সুগন্ধিশ্চানিলঃ শুভঃ | খরোষ্ণোঽনিষ্টগন্ধশ্চ প্রতিলোমশ্চ গর্হিতঃ ||৪১||

অনিলং নির্দিশন্নাহ- মৃদুরিত্যাদি| অনুকূলঃ পৃষ্টানুগামী| প্রতিলোমঃ অভিমুখঃ||৪১||

Adhikarana 16 (42-43) · Śloka 43

গ্রন্থ্যর্বুদাদিষু সদা ছেদশব্দস্তু পূজিতঃ | বিদ্রধ্যুদরগুল্মেষু ভেদশব্দস্তথৈব চ ||৪২|| রক্তপিত্তাতিসারেষু রুদ্ধশব্দঃ প্রশস্যতে | এবং ব্যাধিবিশেষেণ নিমিত্তমুপধারযেত্ ||৪৩||

রোগবিশেষাদপি নিমিত্তবিশেষমনুক্তং নির্দিশন্নাহ- গ্রন্থীত্যাদি| ব্যাধিবিশেষেণ অনুক্তেন ব্যাধিভেদেনেত্যর্থঃ| নিমিত্তমিতি শুভাশুভসূচকম্| অন্যে তু- "এবং ব্যাধিবিশেষেণ নিমিত্তমুপধারযেত্" ইত্যমুং পাঠমন্যথা পঠন্তি ব্যাখ্যানযন্তি চ, স চাভাবান্ন লিখিতঃ||৪২-৪৩||

Adhikarana 17 (44) · Śloka 44

তথৈবাক্রুষ্টহাকষ্টমাক্রন্দরুদিতস্বনাঃ | ছর্দ্যাং বাতপুরীষাণাং শব্দো বৈ গর্দভোষ্ট্রযোঃ ||৪৪||

সামান্যং শব্দনিমিত্তং দর্শযন্নাহ- তথৈবেত্যাদি| আক্রুষ্টমাক্রোশঃ আক্রুষ্টাদিভিঃ স্বনশব্দঃ প্রত্যেকং সম্বধ্যতে| হাকষ্টংশব্দঃ খেদার্থঃ| আক্রন্দ আক্রোশস্বনঃ| অমুং শ্লোকং বাহুল্যেন ন পঠন্তি| পঞ্জিকাকারগযদাসেন তু বিশিষ্টপাঠশুদ্ধিকারেণ লিখিতো ব্যাখ্যাতশ্চেত্যত্রাপি লিখিতঃ||৪৪||

Adhikarana 18 (45) · Śloka 45

প্রতিষিদ্ধং তথা ভগ্নং ক্ষুতং স্খলিতমাহতম্ | দৌর্মনস্যং চ বৈদ্যস্য যাত্রাযাং ন প্রশস্যতে ||৪৫||

বৈদ্যস্যাপি গেহে বাগাদিচেষ্টিতং দর্শযন্নাহ- প্রতীত্যাদি| প্রতিষিদ্ধমিতি নিষেধবচনং ‘মাগচ্ছ' ইত্যাদিকং, ভগ্নং কীলকাদিভঙ্গবচনং, ক্ষুতং ছিক্কিতং; ত্রযমেতদ্বাগ্বিচেষ্টিতম্| ‘ভগ্নং' ইত্যস্য স্থানে কেচিত্ ‘লগ্নং' ইতি পঠন্তি, ব্যাখ্যানযন্তি চ- লগ্নং বস্ত্রাদিসঙ্গঃ| স্খলিতমাহতমেতত্ কাযবিচেষ্টিতম্| স্খলিতং লুণ্ঠনং পাদাদেঃ, আহতমিতি আহননম্| দৌর্মনস্যং চিত্তবিচেষ্টিতম্||৪৫||

Adhikarana 19 (46) · Śloka 46

প্রবেশেঽপ্যেতদুদ্দেশাদবেক্ষ্যং চ তথাঽঽতুরে | প্রতিদ্বারং গৃহে চাস্য পুনরেতন্ন গণ্যতে ||৪৬||

বৈদ্যগৃহবিধিমাতুরগৃহেঽপ্যতিদিশন্নাহ- প্রবেশে ইত্যাদি| এতত্ পূর্বোক্তং শুভাশুভনিমিত্তং, প্রবেশেঽপ্যবেক্ষ্যং দ্রষ্টব্যম্| উদ্দেশাত্ সঙ্ক্ষেপাত্| আতুরে আতুরগৃহে| প্রতিদ্বারং দ্বারং প্রতি| গৃহে গৃহাভ্যন্তরে, অস্য আতুরস্য, এতত্ পূর্বোক্তং নিমিত্তং, ন গণ্যতে ন মন্যত ইত্যর্থঃ| কেচিত্ ‘প্রতিদ্বারং গৃহং চাস্য' ইত্যাদি পাঠং মন্যন্তে| প্রতিশব্দো লক্ষণা(ণেঽ)র্থে; তেন দ্বারং লক্ষীকৃত্য, গৃহং চ লক্ষীকৃত্যেতি| অত্রোদ্দেশাত্ সঙ্ক্ষেপাদাতুরেঽপ্যবেক্ষ্যমিতি সম্বন্ধঃ||৪৬||

Adhikarana 20 (47-48) · Śloka 48

কেশভস্মাস্থিকাষ্ঠাশ্মতুষকার্পাসকণ্টকাঃ | খট্বোর্ধ্বপাদা মদ্যাপো বসা তৈলং তিলাস্তৃণম্ ||৪৭|| নপুংসকব্যঙ্গভগ্ননগ্নমুণ্ডাসিতাম্বরাঃ | প্রস্থানে বা প্রবেশে বা নেষ্যন্তে দর্শনং গতাঃ ||৪৮||

আতুরগৃহে গতস্য যাত্রোন্মুখস্য চ বৈদ্যস্য বিপরীতনিমিত্তং দর্শযন্নাহ- কেশভস্মেত্যাদি| মুণ্ডা মুণ্ডিতমুণ্ডাঃ| অসিতাম্বরা রক্তবস্ত্রাঃ||৪৭-৪৮||

Adhikarana 21 (49-52) · Śloka 53

ভাণ্ডানাং সঙ্করস্থানাং স্থানাত্ সঞ্চারণং তথা | নিখাতোত্পাটনং ভঙ্গঃ পতনং নির্গমস্তথা ||৪৯|| বৈদ্যাসনাবসাদো বা রোগী বা স্যাদধোমুখঃ | বৈদ্যং সম্ভাষমাণোঽঙ্গং কুড্যমাস্তরণানি বা ||৫০|| প্রমৃজ্যাদ্বা ধুনীযাদ্বা করৌ পৃষ্ঠং শিরস্তথা | হস্তং চাকৃষ্য বৈদ্যস্য ন্যসেচ্ছিরসি চোরসি ||৫১|| যো বৈদ্যমুন্মুখঃ পশ্যন্নুন্মার্ষ্টি স্বাঙ্গমাতুরঃ | ন স সিধ্যতি বৈদ্যো বা গৃহে যস্য ন পূজ্যতে ||৫২|| ভবনে পূজ্যতে বাঽপি যস্য বৈদ্যঃ স সিধ্যতি |৫৩|

এতত্পুনরাতুরগৃহেঽপি গণ্যত ইত্যাহ- ভাণ্ডানামিত্যাদি| ভাণ্ডানাম্ উপকরণদ্রব্যাণাম্| সঙ্করস্থানাং মিলিতানাম্| সঞ্চারণম্ ইতস্ততো নযনম্| নিখাতস্য ভাণ্ডস্যোত্পাটনমুদ্ধরণমিত্যর্থঃ| ভঙ্গঃ স্ফুটনম্| পতনং হস্তাদেরধোভ্রংশঃ| নির্গমো গৃহাভ্যন্তরাদ্বাহ্যতো গমনম্| অবসাদো ভঙ্গঃ| বৈদ্যং সম্ভাষমাণো বৈদ্যেন সহালাপং কুর্বাণোঽঙ্গং প্রমৃজ্যাত্, কুড্যং ভিত্তিং বা আস্তরণানি প্রচ্ছাদনবস্ত্রাণি বা প্রমৃজ্যাত্ প্রোঞ্ছযেদিত্যর্থঃ| ধুনীযাত্ কম্পযেত্| কানিত্যাহ- করৌ পৃষ্ঠং শিরস্তথা| ন্যসেত্ নিক্ষিপেত্| উন্মুখঃ ইতি ঊর্ধ্বমুখঃ| উন্মার্ষ্টি ঊর্ধ্বং প্রোচ্ছতি| কেচিদ্বৃদ্ধাঃ পঠন্তি- ন স সিধ্যতীত্যাদি||৪৯-৫২||-

Adhikarana 22 (53) · Śloka 54

শুভং শুভেষু দূতাদিষ্বশুভং হ্যশুভেষু চ ||৫৩|| আতুরস্য ধ্রুবং তস্মাদ্দূতাদীন্ লক্ষযেদ্ভিষক্ |৫৪|

দূতাদেঃ শুভাশুভস্য যথাসঙ্খ্যং শুভাশুভমেব ফলং নির্দিশন্নাহ- শুভমিত্যাদি||৫৩||-

Adhikarana 23 (54-66) · Śloka 66

স্বপ্নানতঃ প্রবক্ষ্যামি মরণায শুভায চ ||৫৪|| সুহৃদো যাংশ্চ পশ্যন্তি ব্যাধিতো বা স্বযং তথা | স্নেহাভ্যক্তশরীরস্তু করভব্যালগর্দভৈঃ ||৫৫|| বরাহৈর্মহিষৈর্বাঽপি যো যাযাদ্দক্ষিণামুখঃ | রক্তাম্বরধরা কৃষ্ণা হসন্তী মুক্তমূর্ধজা ||৫৬|| যং চাকর্ষতি বদ্ধ্বা স্ত্রী নৃত্যন্তী দক্ষিণামুখম্ | অন্তাবসাযিভির্যো বাঽঽকৃষ্যতে দক্ষিণামুখঃ ||৫৭|| পরিষ্বজেরন্ যং বাঽপি প্রেতাঃ প্রব্রজিতা(ন)স্তথা | মুহুরাঘ্রাযতে যস্তু শ্বাপদৈর্বিকৃতাননৈঃ ||৫৮|| পিবেন্মধু চ তৈলং চ যো বা পঙ্কেঽবসীদতি | পঙ্কপ্রদিগ্ধগাত্রো বা প্রনৃত্যেত্ প্রহসেত্তথা ||৫৯|| নিরম্বরশ্চ যো রক্তাং ধারযেচ্ছিরসা স্রজম্ | যস্য বংশো নলো বাঽপি তালো বোরসি জাযতে ||৬০|| যং বা মত্স্যো গ্রসেদ্যো বা জননীং প্রবিশেন্নরঃ | পর্বতাগ্রাত্ পতেদ্যো বা শ্বভ্রে বা তমসাঽঽবৃতে ||৬১|| হ্রিযেত স্রোতসা যো বা যো বা মৌণ্ড্যমবাপ্নুযাত্ | পরাজীযেত বধ্যেত কাকাদ্যৈর্বাঽভিভূযতে ||৬২|| পতনং তারকাদীনাং প্রণাশং দীপচক্ষুষোঃ | যঃ পশ্যেদ্দেবতানাং বা প্রকম্পমবনেস্তথা ||৬৩|| যস্য ছর্দির্বিরেকো বা দশনাঃ প্রপতন্তি বা | শাল্মলীং কিংশুকং যূপং বল্মীকং পারিভদ্রকম্ ||৬৪|| পুষ্পাঢ্যং কোবিদারং বা চিতাং বা যোঽধিরোহতি | কার্পাসতৈলপিণ্যাকলোহানি লবণং তিলান্ ||৬৫|| লভেতাশ্নীত বা পক্বমন্নং যশ্চ পিবেত্ সুরাম্ | স্বস্থঃ স লভতে ব্যাধিং ব্যাধিতো মৃত্যুমৃচ্ছতি ||৬৬||

দূতাদিশেষং স্বপ্নং দর্শযন্নাহ- স্বপ্নানিত্যাদি| নিদ্রোপপ্লুতেন রজোযুক্তেন মনসা বিষযগ্রহণং স্বপ্নঃ| সুহৃদ্দৃষ্টাঃ স্বপ্না নিমিত্তমাত্রমেব; স্বযং দৃষ্টাস্তু প্রকৃত্যাদিবর্জং গুরুতরাঃ| অশুভস্বপ্নান্নিদর্শযন্নাহ- স্নেহেত্যাদি| করভাদিষ্বারুহ্য তৈলাভ্যক্তশরীরঃ সন্ যো যাযাদ্গচ্ছেত্; অনেন দুঃস্বপ্নেন ষণ্মাসৈর্ম্রিযতে পরং রাজযক্ষ্মণা রোগেণ| অন্তাবসাযিভিঃ চাণ্ডালৈঃ| পরিষ্বজেরন্ আলিঙ্গেযুঃ| প্রব্রজিতাঃ শৈবপাশুপতাদযঃ| মুহুর্বারংবারম্| আঘ্রাযতে চুম্ব্যতে, ‘ভক্ষ্যতে' ইত্যন্তে| শ্বাপদৈঃ ব্যাঘ্রাদিভিঃ| পিবেন্মধু চ তৈলং চেতি মধু পুষ্পরসঃ| চকারদ্বযাদেকৈকশঃ পানমত্র জ্ঞেযম্; কেচিদত্র মধু মদ্যমিত্যাহুঃ; তন্ন, কেবলস্য মদ্যস্য পানং প্রশস্তং স্বপ্নাধ্যাযশাস্ত্রেষু কথিতং; যত্র তু সুরাপানমশোভনমিত্যুক্তং, তত্র সুরা পিষ্টমযী গ্রাহ্যা| পঙ্কেঽবসীদতীতি পঙ্কে কর্দমে, অবসীদতি ব্রুডতীত্যর্থঃ, পঙ্কাবসাদস্তু সদ্যোমৃত্যুকরঃ| রক্তাং স্রজং রক্তপুষ্পমালাম্| গ্রসেদিতি গিলতীত্যর্থঃ| জননীং প্রবিশেদিতি মাতুরুদরে প্রবিশতীত্যর্থঃ| শ্বভ্রে বিবরে| তমসাঽঽবৃতে অন্ধকারবেষ্টিতে| হ্রিযেত নীযেত, স্রোতসা নাড্যা| মৌণ্ড্যং কৃত্তকেশতা| পরাজীযেত পরাজিতো ভবতীত্যর্থঃ| বধ্যেত বন্ধনং প্রাপ্নুযাদিত্যর্থঃ| তারকাদীনামিতি আদিগ্রহণাচ্চন্দ্রাদিগ্রহণম্| প্রণাশং দীপচক্ষুষোরিতি স্বপ্নেঽকস্মাদ্দীপং নষ্টং পশ্যতি, স্বচক্ষুষী বিগলিতে পশ্যতীত্যর্থঃ| দেবতানাং প্রকম্পমিতি দেবতানাং দেবতাপ্রতিমানাং কম্পমিত্যর্থঃ| অবনেঃ পৃথিব্যাঃ| যূপো যজ্ঞপশুবন্ধনকাষ্ঠং , পারিভদ্রকো নিম্ববৃক্ষঃ, কোবিদারঃ কাঞ্চনারঃ| লৌহানি লোহমযানি বস্তূনি| পক্বমন্নং সিদ্ধমিত্যর্থঃ; কেচিদন্নস্থানে ‘মাংসং' ইতি পঠন্তি| সুরা পিষ্টমযী ন তু মদ্যং, তস্য শোভনত্বাত্| ঋচ্ছতি প্রাপ্নোতীত্যর্থঃ||৫৪-৬৬||

Adhikarana 24 (67) · Śloka 67

যথাস্বং প্রকৃতিস্বপ্নো বিস্মৃতো বিহতস্তথা | চিন্তাকৃতো দিবা দৃষ্টো ভবন্ত্যফলদাস্তু তে ||৬৭||

বিফলান্ স্বপ্নাননরিষ্টভূতান্ দর্শযন্নাহ- যথাস্বমিত্যাদি| স্বস্যাঃ প্রকৃতেরনতিক্রমেণ যথাস্বং, যথা- বাতপ্রকৃতৌ ‘বিযতি গচ্ছতি সম্ভ্রমেণ চ; (শা. অ. ৪), পিত্তপ্রকৃতৌ ‘সম্পশ্যেদপি চ হুতাশবিদ্যুদুল্কাঃ' (শা. অ. ৪), শ্লেষ্মপ্রকৃতৌ ‘প্রসুপ্তঃ সন্ কমলহংসচক্রবাকান্ সম্পশ্যেদপি চ জলাশযান্ মনোজ্ঞান্' (শা. অ. ৪)| বিস্মৃতোঽতিশযেন ন স্মৃতঃ| বিহতঃ পূর্বং বিরূপো দৃষ্টঃ স চানন্তরং বিশিষ্টেন স্বপ্নেন হতঃ| উক্তং চ- “অকল্যাণমপি স্বপ্নং দৃষ্ট্বা তত্রৈব যঃ পুনঃ| সৌম্যং পশ্যেচ্ছুভাকারং তস্য বিদ্যাচ্ছুভং ফলম্”- (চ. ই. অ. ৫) ইতি| তথাগ্রহণাত্ সুস্বপ্নং দৃষ্ট্বাঽস্বপতাং সদ্যঃফলত্বং মহাফলত্বং চ সূচ্যতে| অন্যে তু ‘বিহিতশ্চ যঃ' ইতি পঠন্তি| দিবাদৃষ্ট ইতি 'স্বপ্নঃ' ইতি শেষঃ| ভবন্ত্যফলদাস্তু তে ইতি তুশব্দশ্চকারার্থঃ, তেনাতিহ্রস্বাতিদীর্ঘপ্রথমযামদৃষ্টাশ্চাফলাঃ সমুচ্চীযন্তে| ‘ভবত্যফল এব স' ইতি কেচিত্ পঠন্তি||৬৭||

Adhikarana 25 (68-70) · Śloka 71

জ্বরিতানাং শুনা সখ্যং কপিসখ্যং তু শোষিণাম্ | উন্মাদে রাক্ষসৈঃ প্রেতৈরপস্মারে প্রবর্তনম্ ||৬৮|| মেহাতিসারিণাং তোযপানং স্নেহস্য কুষ্ঠিনাম্ | গুল্মেষু স্থাবরোত্পত্তিঃ কোষ্ঠে, মূর্ধ্নি শিরোরুজি ||৬৯|| শষ্কুলীভক্ষণং ছর্দ্যামধ্বা শ্বাসপিপাসযোঃ | হারিদ্রং ভোজনং বাঽপি যস্য স্যাত্ পাণ্ডুরোগিণঃ ||৭০|| রক্তপিত্তী পিবেদ্যস্তু শোণিতং স বিনশ্যতি |৭১|

উত্তরতন্ত্রপঠিতবিশিষ্টব্যাধিষু বিশিষ্টমেব স্বপ্নদর্শনারিষ্টং দর্শযন্নাহ- জ্বরিতানামিত্যাদি| শুনা সখ্যমিতি কুক্কুরেণ সহ মৈত্র্যং, কপিসখ্যমিতি বানরমৈত্র্যম্| প্রবর্তনশব্দ উন্মাদাপস্মারাভ্যাং সহ প্রত্যেকং সম্বধ্যতে| গুল্মেষু গুল্মরোগেষু, স্থাবরোত্পত্তির্বৃক্ষোত্পত্তিঃ, কোষ্ঠে উদরে| মূর্ধ্নি মস্তকে স্থাবরোত্পত্তিঃ, শিরোরুজি মস্তকব্যথাযাম্| ছর্দ্যাং ‘চণকাদিপিষ্টকৃতা সতিলা তৈলভৃষ্টা শষ্কুলীত্যুচ্যতে, তস্যা ভক্ষণম্| অধ্বা মার্গঃ, তত্র গমনং, শ্বাসপিপাসযোঃ| হারিদ্রমিতি হরিদ্রারক্তভোজনভক্ষণমিত্যর্থঃ||৬৮-৭০||

Adhikarana 26 (71-74) · Śloka 74

স্বপ্নানেবংবিধান্ দৃষ্ট্বা প্রাতরুত্থায যত্নবান্ ||৭১|| দদ্যান্মাষাংস্তিলাংল্লোহং বিপ্রেভ্যঃ কাঞ্চনং তথা | জপেচ্চাপি শুভান্ মন্ত্রান্ গাযত্রীং ত্রিপদাং তথা ||৭২|| দৃষ্ট্বা তু প্রথমে যামে স্বপ্যাদ্ ধ্যাত্বা পুনঃ শুভম্ | জপেদ্বাঽন্যতমং বেদং ব্রহ্মচারী সমাহিতঃ ||৭৩|| ন চাচক্ষীত কস্মৈচিদ্দৃষ্ট্বা স্বপ্নমশোভনম্ | দেবতাযতনে চৈব বসেদ্রাত্রিত্রযং তথা | বিপ্রাংশ্চ পূজযেন্নিত্যং দুঃস্বপ্নাত্ প্রবিমুচ্যতে ||৭৪||

অশুভস্বপ্নদর্শনে কিঞ্চিচ্চিকিত্সিতমাহ- স্বপ্নানিত্যাদি| প্রথমে যামে প্রথমপ্রহরে| দৃষ্ট্বা বিলোক্য দুঃস্বপ্নম্| স্বপ্যাত্ শযীত| কিং কৃত্বা? ধ্যাত্বা শুভং কল্যাণমিত্যর্থঃ| যদ্যপি প্রথমযামলক্ষ্য(দৃষ্ট) স্বপ্নস্য নিষ্ফলত্বং কথিতং, তথাঽপি দুঃস্বপ্নভযাদযং বিধিঃ কর্তব্যঃ| অন্যতমম্ একতমম্| সমাহিতঃ সাবধানঃ| ন চাচক্ষীত ন চ কথযেত্||৭১-৭৪||

Adhikarana 27 (75-81) · Śloka 81

অত ঊর্ধ্বং প্রবক্ষ্যামি প্রশস্তং স্বপ্নদর্শনম্ | দেবান্ দ্বিজান্গোবৃষভান্ জীবতঃ সুহৃদো নৃপান্ ||৭৫|| সমিদ্ধমগ্নিং সাধূংশ্চ নির্মলানি জলানি চ | পশ্যেত্ কল্যাণলাভায ব্যাধেরপগমায চ ||৭৬|| মাংসং মত্স্যান্ স্রজঃ শ্বেতা বাসাংসি চ ফলানি চ | লভেত ধনলাভায ব্যাধেরপগমায চ ||৭৭|| মহাপ্রাসাদসফলবৃক্ষবারণপর্বতান্ | আরোহেদ্দ্রব্যলাভায ব্যাধেরপগমায চ ||৭৮|| নদীনদসমুদ্রাংশ্চ ক্ষুভিতান্ কলুষোদকান্ | তরেত্ কল্যাণলাভায ব্যাধেরপগমায চ ||৭৯|| উরগো বা জলৌকো বা ভ্রমরো বাঽপি যং দশেত্ | আরোগ্যং নির্দিশেত্তস্য ধনলাভং চ বুদ্ধিমান্ ||৮০|| এবং রূপাঞ্ শুভান্ স্বপ্নান্ যঃ পশ্যেদ্ব্যাধিতো নরঃ | স দীর্ঘাযুরিতি জ্ঞেযস্তস্মৈ কর্ম সমাচরেত্ ||৮১||

অত ঊর্ধ্বমিত্যাদি| সুহৃদো মিত্রাণি| সমিদ্ধমগ্নিং প্রজ্বলিতং বহ্নিম্| কল্যাণলাভাযেতি শুভবস্তুপ্রাপ্তয ইত্যর্থঃ| অপগমো নিবৃত্তিঃ| নদ্যো গঙ্গাদ্যাঃ, নদাঃ শোণাদ্যাঃ প্রসিদ্ধাঃ, ক্ষুভিতান্ প্রচলিতান্ বৃদ্ধিং গতানিত্যর্থঃ, কলুষোদকান্ যত এব ক্ষুভিতানত এবাপ্রশস্তোদকানিত্যর্থঃ| উরগঃ সর্পঃ, দশেদ্ভক্ষযেত্||৭৫-৮১||

Adhikarana puShpikA · Śloka 29

ইতি সুশ্রুতসংহিতাযাং সূত্রস্থানে বিপরীতাবিপরীতস্বপ্ননিদর্শনীযো নামৈকোনত্রিংশত্তমোঽধ্যাযঃ ||২৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে একোনত্রিংশত্তমোঽধ্যাযঃ||২৯||