28. viparītāviparītavraṇavijñānīyādhyāyaḥ

Adhikarana 1 (1-3) · Śloka 3

অথাতো বিপরীতাবিপরীতব্রণবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| ফলাগ্নিজলবৃষ্টীনাং পুষ্পধূমাম্বুদা যথা | খ্যাপযন্তি ভবিষ্যত্ত্বং তথা রিষ্টানি পঞ্চতাম্ ||৩||

নিযতানিযতভেদেন দ্বিবিধমরিষ্টং প্রকাশযিতুমাহ- ফলাগ্নীত্যাদি| অত্র যথা পুষ্পং ফলস্য ভবিষ্যত্ত্বং খ্যাপযতি, কোঽর্থঃ? পুষ্পং ফলং ভবিষ্যতীতি; যথা চ ধূমোঽগ্নিং খ্যাপযতি, যথাঽম্বুদো জলবৃষ্টিম্, এবমরিষ্টানি পঞ্চতাং মৃত্যুং খ্যাপযন্তি; ‘ভাবিনীম্’ ইতি শেষঃ| অরিষ্টান্যত্র মরণলক্ষণানি| ননু, অত্র কিমর্থং পুষ্পধূমাম্বুদা ইতি বহবো দুষ্টান্তা উক্তাঃ? একেনৈব গতার্থত্বাত্| উচ্যতে, পুষ্পাম্বুদৌ হেতূ ফলজলবৃষ্ট্যোর্জ্ঞাপকাবনিযতৌ, ন হ্যবশ্যং কারণেন কার্যং কর্তব্যমেব; ইত্যনেনানিযতদৃষ্টান্তেন দূতদিনিমিত্তজমরিষ্টমনিযতমুক্তং; ধূমাত্ কার্যাদগ্নেঃ কারণস্য যজ্ জ্ঞানং তন্নিযতম্, এতেন নিযতদৃষ্টান্তেন দোষজমরিষ্টং নিযতমুক্তম্; ইত্যনিযতনিযতভেদেন দ্বিবিধমরিষ্টং প্রকাশযন্তি বহবো দৃষ্টান্তা ইতি ন দোষঃ||১-৩||

Adhikarana 2 (4) · Śloka 5

তানি সৌক্ষ্ম্যাত্ প্রমাদাদ্বা তথৈবাশু ব্যতিক্রমাত্ | গৃহ্যন্তে নোদ্গতান্যজ্ঞৈর্মুমূর্ষোর্ন ত্বসম্ভবাত্ ||৪|| ধ্রুবং তু মরণং রিষ্টে... |৫|

অবশ্যমেবারিষ্টস্য মরণভবনং দর্শযন্নাহ- তানীত্যাদি| মুমূর্ষোঃ মর্তুমিচ্ছোঃ প্রাণিন উদ্গতান্যপি প্রকটিতান্যপ্যরিষ্টান্যজ্ঞৈর্মনুষ্যৈর্ন গৃহ্যন্তে ন জ্ঞাযন্তে| কুতো হেতোরিত্যাহ- সৌক্ষ্ম্যাদিতি; পরমাণুবত্| প্রমাদাদ্বেতি মদিরামদমত্তস্য বস্তুন্যবিমর্শ ইব| আশু ব্যতিক্রমাদিতি যদৈবারিষ্টমুত্পন্নং তদৈব মরণাদিতি, উত্পলশতপত্রব্যতিভেদবত্; অন্যে ত্বাশুব্যতিক্রমং যদৈবারিষ্টমুত্পন্নং তদৈব নিবর্তত ইতি মন্যন্তে| ন ত্বসম্ভবাদিতি ন পুনরসম্ভবান্ন গৃহ্যন্তে, অপিতু সম্ভবন্ত্যপ্যরিষ্টান্যুক্তৈঃ কারণৈরজ্ঞৈর্ন গৃহ্যন্ত ইত্যভিপ্রাযঃ| দোষজমরিষ্টমধিকৃত্য অরিষ্টেন মরণস্য নিযতত্বং দর্শযন্নাহ- ধ্রুবমিত্যাদি||৪||

Adhikarana 3 (5) · Śloka 5

... ব্রাহ্মণৈস্তত্ কিলামলৈঃ | রসাযনতপোজপ্যতত্পরৈর্বা নিবার্যতে ||৫||

রিষ্টেঽপি মরণনিবৃত্তিমুপাযবিশেষৈরাহ- ব্রাহ্মণৈরিত্যাদি| কিলশব্দোঽত্রাগমার্থং সূচযতি; এবং কিল আগমে প্রতিপাদিতমিত্যর্থঃ| অমলৈরিতি রাগাদিদোষরহিতৈঃ| ব্রাহ্মণেভ্যোঽপরানপি দর্শযন্নাহ- রসাযনতপোজপ্যেত্যাদি|- রসাযনপরা ইতি স্বভাবব্যাধিনিবারণবিশিষ্টৌষধচিন্তকাঃ, তে রসবীর্যৌষধপ্রভাবেণ মরণং নিবারযন্তি| তথা তপঃপরাঃ তপস্বিনঃ, তেঽপি বিশিষ্টতপঃপ্রভাবেণ মরণং নিবারযন্তি | জপ্যপরাঃ সিদ্ধমন্ত্রচিন্তকাঃ, তেঽপি মন্ত্রশক্তিযুক্তাঃ পঞ্চত্বং নিষেধযন্তি | এতচ্চ নিযতানিযতরিষ্টবিষযং জ্ঞেযম্||৫||

Adhikarana 4 (6) · Śloka 6

নক্ষত্রপীডা বহুধা যথা কালং বিপচ্যতে | তথৈবারিষ্টপাকং চ ব্রুবতে বহবো জনাঃ ||৬||

কথং পুনঃ কালান্তরে পঞ্চবিংশতিবর্ষাদাবরিষ্টপীডা ভবতীত্যাহ- নক্ষত্রেত্যাদি|- বিপচ্যতে ফলতীত্যর্থঃ| পাকঃ ফলম্||৬||

Adhikarana 5 (7) · Śloka 7

অসিদ্ধিমাপ্নুযাল্লোকে প্রতিকুর্বন্ গতাযুষঃ | অতোঽরিষ্টানি যত্নেন লক্ষযেত্ কুশলো ভিষক্ ||৭||

অরিষ্টাপরিজ্ঞানদোষং দর্শযন্নাহ- অসিদ্ধিমিত্যাদি|অসিদ্ধিং ধর্মার্থকামাদীনাং হানিম্||৭||

Adhikarana 6 (8) · Śloka 8

গন্ধবর্ণরসাদীনাং বিশেষাণাং স্বভাবতঃ | বৈকৃতং যত্ তদাচষ্টে ব্রণিনঃ পক্বলক্ষণম্ ||৮||

অস্য তন্ত্রস্য শল্যত্বাত্তত্র চ ব্রণস্য প্রাধান্যাত্তস্যৈবারিষ্টানি প্রাঙ্নির্দেষ্টুমাহ- গন্ধেত্যাদি | গন্ধবর্ণরসাদীনামিতি আদিগ্রহণেন শব্দস্পর্শযোরপি সঙ্গ্রহঃ; এতেন পঞ্চাপীন্দ্রিযার্থা উক্তা ভবন্তি, রূপস্য বর্ণগ্রহণেন গৃহীতত্বাত্| স্বভাবতঃ প্রকৃতিতো যদ্বৈকৃতমন্যথাত্বং, তদাচষ্টে তত্ কথযতি, ব্রণিনঃ পুরুষস্য, পক্বলক্ষণং পাতলক্ষণং, যথা পক্বং ফলং পতত্যেব তথাঽসাবপি ব্রণী পতত্যেবেত্যর্থঃ||৮||

Adhikarana 7 (9) · Śloka 10

কটুস্তীক্ষ্ণশ্চ বিস্রশ্চ গন্ধস্তু পবনাদিভিঃ | লোহগন্ধিস্তু রক্তেন ব্যামিশ্রঃ সান্নিপাতিকঃ ||৯|| লাজাতসীতৈলসমাঃ কিঞ্চিদ্বিস্রাশ্চ গন্ধতঃ | জ্ঞেযাঃ প্রকৃতিগন্ধাঃ স্যুঃ ... |১০|

তত্র প্রাকৃতং গন্ধং দর্শযন্নাহ- কটুরিত্যাদি| অত্র লাজাতসীতৈলসমাস্ত্রযো গন্ধা যথাসঙ্খ্যেন বাতপৈত্তিক-বাতশ্লৈষ্মিক-পিত্তশ্লৈষ্মিকা দ্বন্দ্বজা জ্ঞেযাঃ| এতে ত্রযোঽপীষদ্বিস্রাশ্চ স্বভাবাজ্জ্ঞেযাঃ| অতসীশব্দেনাতসীতৈলং, তৈলং তিলতৈলম্| জ্ঞেযাঃ প্রকৃতিগন্ধাঃ স্যুরিতি জ্ঞাতব্যাঃ প্রকৃতিগন্ধা ভবেযুরিতি| ‘কটুস্তীব্রশ্চ’ ইতি কেচিত্ পঠন্তি||৯||-

Adhikarana 8 (10-12) · Śloka 12

... রতোঽন্যদ্গন্ধবৈকৃতম্ ||১০|| মদ্যাগুর্বাজ্যসুমনাপদ্মচন্দনচম্পকৈঃ | সগন্ধা দিব্যগন্ধাশ্চ মুমূর্ষূণাং ব্রণাঃ স্মৃতাঃ ||১১|| শ্ববাজিমূষিকধ্বাঙ্ক্ষপূতিবল্লূরমত্কুণৈঃ | সগন্ধাঃ পঙ্কগন্ধাশ্চ ভূমিগন্ধাশ্চ গর্হিতাঃ ||১২||

বিকৃতিগন্ধান্ দর্শযন্নাহ- অত ইত্যাদি| অতোঽন্যদ্গন্ধবৈকৃতমিতি অত এভ্যঃ পূর্বোক্তেভ্যঃ কট্বাদিপ্রাকৃতগন্ধেভ্যোঽন্যদ্গন্ধবৈকৃতম্| তানেব বিকৃতগন্ধানাহ- মদ্যেত্যাদি| সুমনা জাতী, সগন্ধাঃ সমগন্ধাঃ| দিব্যগন্ধা ইতি অপরোঽপি য উত্তমগন্ধঃ| মুমূর্ষূণামিতি মর্তুমিচ্ছূনাং প্রাণিনাম্| শ্বা কুক্কুরঃ, ধ্বাঙ্ক্ষঃ কাকঃ, পূতিবল্লূরং পূযসহিতং শুষ্কমাংসং, মত্কুণাঃ শয্যাদিজাঃ ক্ষুদ্রকীটাঃ, এতৈঃ সমানগন্ধা ইত্যর্থঃ||১০-১২||

Adhikarana 9 (13-15) · Śloka 15

কুঙ্কুমধ্যামকঙ্কুষ্ঠসবর্ণাঃ পিত্তকোপতঃ | ন দহ্যন্তে ন চূষ্যন্তে ভিষক্ তান্ পরিবর্জযেত্ ||১৩|| কণ্ডূমন্তঃ স্থিরাঃ শ্বেতাঃ স্নিগ্ধাঃ কফনিমিত্ততঃ | দূযন্তে বাঽপি দহ্যন্তে ভিষক্ তান্ পরিবর্জযেত্ ||১৪|| কৃষ্ণাস্তু যে তনুস্রাবা বাতজা মর্মতাপিনঃ | স্বল্পামপি ন কুর্বন্তি রুজং তান্ পরিবর্জযেত্ ||১৫||

বর্ণান্নির্দেষ্টুমাহ- কুঙ্কুমেত্যাদি| ধ্যাম ঈষত্কৃষ্ণঃ| ন দহ্যন্তে ন দাহযুক্তা ভবন্তি| চূষ্যন্ত ইতি চূষণমিব বেদনাবিশেষঃ| পিত্তবর্ণে সতি যত্ পিত্তবেদনা দাহাদিকা ন ভবন্তি, তদ্বৈকৃতং বর্ণস্য| কেচিত্ “শ্যামাকুঙ্কুমকঙ্কুষ্ঠসবর্ণাঃ পিত্তদোষতঃ| ন দহ্যন্তে ন দূযন্তে ভিষক্ তান্ পরিবর্জযেত্”- ইতি পাঠং পঠন্তি, ব্যাখ্যানযন্তি চ- শ্যামা প্রিযঙ্গুঃ, কঙ্কুষ্ঠং সুবর্ণক্ষীরিনির্যাসঃ, ন দহ্যন্তে নাতিতপ্যন্তে ন দূযন্তে ন পরিতপ্যন্তে কিন্তু পরিতাপমাত্রযুক্তা ভবন্তি” ইতি| স চ নিবন্ধেষু ন দৃশ্যতে; যত্র তু দৃশ্যতে, তত্র গড্ডরিকাপ্রবাহঃ, তস্মাত্ পূর্বঃ পাঠো ন্যায্যঃ| কণ্ডূমন্ত ইত্যাদিকাঃ কফেন, তেষাং দাহরুজে বর্ণবৈকৃতং; দূযন্তে ইতি পীডাং কুর্বন্তি| কৃষ্ণাশ্চেত্যাদি যে বাতজা ব্রণাঃ কৃষ্ণাস্তনুস্রাবা মর্মতাপিনশ্চ যদা স্বল্পামপি পীডাং ন কুর্বন্তি তদা বাতজে বর্ণবৈকৃতম্| অত্র রসবৈকৃতং যদ্যপি নোক্তং তথাঽপি বাতপিত্তকফব্রণেষু যথাক্রমং কষাযকটুমধুরেষু পিপীলিকাদ্যুপসর্পণাদনুক্তমপি জ্ঞেযং, গন্ধবর্ণরসাদীনামিত্যত্রোদ্দেশসূত্রে রসস্যোক্তত্বাত্||১৩-১৫||

Adhikarana 10 (16) · Śloka 17

ক্ষ্বেডন্তি ঘুর্ঘুরাযন্তে জ্বলন্তীব চ যে ব্রণাঃ | ত্বঙ্মাংসস্থাশ্চ পবনং সশব্দং বিসৃজন্তি যে ||১৬|| যে চ মর্মস্বসম্ভূতা ভবন্ত্যত্যর্থবেদনাঃ |১৭|

শব্দবৈকৃতং দর্শযন্নাহ- ক্ষ্বেডন্তীত্যাদি| ক্ষ্বেডন্তি খটখটাশব্দং কুর্বন্তি| ঘুর্ঘুরাযন্ত ইতি শ্বমার্জারাদীনাং কোপাদন্তর্গতশব্দো ঘুর্ঘুরাশব্দ উচ্যতে| জ্বলন্তীবেতি জ্বলন্ত ইব দৃশ্যন্তে| ত্বঙ্মাংসস্থানাং ব্রণানাং সশব্দপবনবাহিত্বং শব্দবৈকৃতং, কোষ্ঠগতানাং তু সশব্দপবনবাহিত্বং প্রকৃতিরেব||১৬||

Adhikarana 11 (17) · Śloka 18

দহ্যন্তে চান্তরত্যর্থং বহিঃ শীতাশ্চ যে ব্রণাঃ ||১৭|| দহ্যন্তে বহিরত্যর্থং ভবন্ত্যন্তশ্চ শীতলাঃ |১৮|

স্পর্শবৈকৃতমধিকৃত্যাহ- দহ্যন্তে ইত্যাদি||১৭||-

Adhikarana 12 (18-19) · Śloka 19

শক্তিধ্বজরথাঃ কুন্তবাজিবারণগোবৃষাঃ ||১৮|| যেষু চাপ্যবভাসেরন্ প্রাসাদাকৃতযস্তথা | চূর্ণাবকীর্ণা ইব যে ভান্তিচানবচূর্ণিতাঃ ||১৯||

আকৃতিবিশেষবৈকৃতমধিকৃত্যাহ- শক্তীত্যাদি| শক্তিরাযুধবিশেষঃ, ধ্বজঃ পতাকাদণ্ডঃ| যেষু ব্রণেষু| অবভাসেরন্ শোভন্তে| প্রাসাদো দেবতানরেন্দ্রাণামধিষ্ঠানম্, আকৃতিরত্র রূপমেব| রূপং চ পঞ্চেন্দ্রিযার্থমধ্যে| অপরমপি রূপবিশেষমাহ- চূর্ণাবকীর্ণা ইত্যাদি| অত্রাপি সামান্যাকারেণ রূপমেব বোদ্ধব্যম্||১৮-১৯||

Adhikarana 13 (20) · Śloka 20

প্রাণমাংসক্ষযশ্বাসকাসারোচকপীডিতাঃ | প্রবৃদ্ধপূযরুধিরা ব্রণা যেষাং চ মর্মসু ||২০||

গন্ধাদিবৈকৃতং সমাপ্য, উপদ্রবাসাধ্যত্বং প্রসঙ্গতো যুক্ত্যাগতং দর্শযন্নাহ- প্রাণেত্যাদি| প্রাণক্ষযঃ শক্তিলক্ষণবলক্ষযঃ, মাংসক্ষয উপচযলক্ষণবলক্ষযঃ||২০||

Adhikarana 14 (21) · Śloka 21

ক্রিযাভিঃ সম্যগারব্ধা ন সিদ্ধ্যন্তি চ যে ব্রণাঃ | বর্জযেত্তানপি প্রাজ্ঞঃ সংরক্ষন্নাত্মনো যশঃ ||২১||

অনুক্তমপ্যশেষারিষ্টমুপগৃহ্ণন্নাহ- ক্রিযাভিরিত্যাদি||২১||

Adhikarana puShpikA · Śloka 28

ইতি সুশ্রুতসংহিতাযাং সূত্রস্থানে বিপরীতাবিপরীতব্রণবিজ্ঞানীযো নামাষ্টাবিংশতিতমোঽধ্যাযঃ ||২৮||

ইতি শ্রীডল্হ(হ্ল)ণবিরচিতাযাং সুশ্রুতব্যাখ্যাযাং নিবন্ধসঙ্গ্রহাখ্যাযাং সূত্রস্থানেঽষ্টাবিংশতিতমোঽধ্যাযঃ||২৮||