Adhikarana 1 (1-2) · Śloka 2
অথাতো বিশিখানুপ্রবেশনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो विशिखानुप्रवेशनीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অথাত ইত্যাদি| বিশিখাঽত্র কর্মমার্গঃ, বিশিখাযা(যাং) অনুপ্রবেশনং তদধিকৃত্য কৃতোঽধ্যাযো বিশিখানুপ্রবেশনীযঃ; তং ব্যাখ্যাস্যামঃ||১-২||
Adhikarana 2 (3) · Śloka 3
অধিগততন্ত্রেণোপাসিততন্ত্রার্থেন দৃষ্টকর্মণা কৃতযোগ্যেন শাস্ত্রং নিগদতা রাজানুজ্ঞাতেন নীচনখরোম্ণা শুচিনা শুক্লবস্ত্রপরিহিতেন ছত্রবতা দণ্ডহস্তেন সোপানত্কেনানুদ্ধতবেশেন সুমনসা কল্যাণাভিব্যাহারেণাকুহকেন বন্ধুভূতেন ভূতানাং সুসহাযবতা বৈদ্যেন বিশিখাঽনুপ্রবেষ্টব্যা ||৩||
अधिगततन्त्रेणोपासिततन्त्रार्थेन दृष्टकर्मणा कृतयोग्येन शास्त्रं निगदता राजानुज्ञातेन नीचनखरोम्णा शुचिना शुक्लवस्त्रपरिहितेन छत्रवता दण्डहस्तेन सोपानत्केनानुद्धतवेशेन सुमनसा कल्याणाभिव्याहारेणाकुहकेन बन्धुभूतेन भूतानां सुसहायवता वैद्येन विशिखाऽनुप्रवेष्टव्या ||३||
🔊 Audio coming soon
যাদৃশস্য বৈদ্যস্য কর্মমার্গপ্রবেশাধিকারস্তাদৃশং বক্তুমাহ- অধিগততন্ত্রেণেত্যাদি| অধিগততন্ত্রেণ পঠিতশাস্ত্রেণ| উপাসিততন্ত্রার্থেন গুরুপার্শ্বাদভ্যস্তশাস্ত্রার্থেন, দৃষ্টকর্মণা দৃষ্টচ্ছেদ্যাদিস্নেহাদিকর্মণা, কৃতযোগ্যেন কৃতকর্মাভ্যাসেন, শাস্ত্রং নিগদতা পাঠার্থাভ্যাং নিযমেনাদেশেন শাস্ত্রং বদতা, এতেন স্বাবর্তিতশাস্ত্রতা উক্তা ভবতি; অন্যে তু ‘শাস্ত্রার্থং নিগদতা’ ইতি পঠন্তি, ‘শাস্ত্রাণি নিগদতা’ ইত্যপরে| রাজানুজ্ঞাতেন রাজ্ঞা অভিমতেন, রাজা হি প্রজাপালনতত্পরঃ, তত্প্রমাদাদ্বৈদ্যপ্রতিরূপকা রাষ্ট্রং চরন্তি কণ্টকভূতা লোকস্য, তস্মাদ্রাজ্ঞা পরীক্ষ্যানুজ্ঞাতেন বিশিখাঽনুপ্রবেষ্টব্যেতি| কর্মজ্ঞতাং শাস্ত্রজ্ঞতাং চ বৈদ্যস্যাভিধায বাহ্যবেশমধিকৃত্যাহ- নীচনখরোম্ণেত্যাদি| ক্লৃপ্তত্বান্নীচমল্পং নখং রোম চ যস্য তেন; নীচনখত্বাচ্ছুচিতা কর্মসৌকর্যং চ, নীচরোমত্বাদার্জবং, রসবত্যামবাধ ইত্যপরে| শুচিনেতি বাহ্যস্নানাদিশৌচযুক্তেন, কুতঃ? বাহ্যবেশাধিকারাত্; বাহ্যশৌচাযোগাল্লোকে বিগর্হণীযঃ, অন্তঃশৌচং তু সুমনসেত্যনেনৈব বোদ্ধব্যম্| শুক্লবস্ত্রপরিধানং মঙ্গলার্থং শৌচার্জবার্থং বা| ছত্রবতা আতপরজোবর্ষাপন্নগাদিনিষেধার্থং ছত্রযুক্তেন| দণ্ডহস্তেন দণ্ডোঽবলম্বনদণ্ডঃ, তস্য ধারণং স্খলিতাদিনিষেধার্থম্| সোপানত্কেন প্রাণিহিতাসহিতেন, প্রাণিহিতাধারণং কণ্টকাদিনিষেধার্থম্| অনুদ্ধতবেশেন সাধুজনবেশেন, এতেনাযুক্তকাযবেশনিষেধঃ; অন্যে তু নানাবস্ত্রাঙ্গরাগমাল্যানুলেপনবিচিত্রভূষণাদিভিরুদ্ধতো বেশঃ, অতো বিপর্যযেণানুদ্ধত ইতি মন্যন্তে | কাযং নিযম্য মনো নিযমযন্নাহ- সুমনসা শোভনমনসা, অক্রৌর্যাদিগুণযুক্তমনসেত্যর্থঃ; দৌর্মনস্যং তু যাত্রাযাং ন প্রশস্যত ইতি সুমনসা ভবিতব্যম্| বাচং নিযমযন্নাহ- কল্যাণাভিব্যাহারেণেতি|- কল্যাণং মঙ্গলম্, অভিব্যাহারো ভাষিতং, যস্য স তথা; তচ্চ সর্বজনহৃদযগ্রহণার্থম্| কাযবাঙ্মনঃসু ত্রিষ্বপি নিযমযন্নাহ- অকুহকেনেতি; কুহকঃ শাস্ত্রহীনঃ পরমবিশ্বাসকারকো মাযাবী, ন কুহকোঽকুহকঃ; অন্যে ত্বকুহকেন অবিস্মাপকেন, দম্ভাদ্যযোগাদবিস্মাপককাযাদিবেশেনেত্যর্থঃ| সুসহাযবতা সাধুসহাযেন, অন্যথাঽন্তঃপুরচারিণো বৈদ্যস্য সহাযদোষেণ দোষঃ স্যাত্; সহাযশ্চাত্মরক্ষার্থমাতুরপরিচর্যার্থং চ| ননু, প্রাণিনাং জীবতামেব সদ্যস্করুধিরোপদেশাত্ কথং ‘বন্ধুভূতেন ভূতানাম্’ ইত্যুক্তং? সত্যং, বিধিপ্রাপিতত্বাদদোষঃ, আলম্ভযোগে পশুহননবত্||৩||
Adhikarana 3 (4) · Śloka 4
ততো দূতনিমিত্তশকুনমঙ্গলানুলোম্যেনাতুরগৃহমভিগম্য, উপবিশ্য, আতুরমভিপশ্যেত্ স্পৃশেত্ পৃচ্ছেচ্চ | ত্রিভিরেতৈর্বিজ্ঞানোপাযৈ রোগাঃ প্রাযশো বেদিতব্যা ইত্যেকে; তত্তু ন সম্যক্, ষড্বিধো হি রোগাণাং বিজ্ঞানোপাযঃ, তদ্যথা- পঞ্চভিঃ শ্রোত্রাদিভিঃ প্রশ্নেন চেতি ||৪||
ततो दूतनिमित्तशकुनमङ्गलानुलोम्येनातुरगृहमभिगम्य, उपविश्य, आतुरमभिपश्येत् स्पृशेत् पृच्छेच्च | त्रिभिरेतैर्विज्ञानोपायै रोगाः प्रायशो वेदितव्या इत्येके; तत्तु न सम्यक्, षड्विधो हि रोगाणां विज्ञानोपायः, तद्यथा- पञ्चभिः श्रोत्रादिभिः प्रश्नेन चेति ||४||
🔊 Audio coming soon
ততো দূতনিমিত্তেত্যাদি| গমনায প্রশ্নায বা আগতঃ পুরুষো দূতঃ, নিমিত্তমনুকূলং সুরভিবাতাদি, শকুনং পক্ষিবিশেষপ্রশস্তবাক্যাদি, মঙ্গলং স্বস্তিকপূর্ণকুম্ভাদি, এষামনুলোম্যেন প্রশস্ততযেত্যর্থঃ| ত্রিভিরেতৈরিত্যাদি ত্রিভিরেতৈর্বিজ্ঞানোপাযৈরনন্তরোক্তৈর্দর্শনস্পর্শনপ্রশ্নৈঃ| হিশব্দো যস্মাদর্থে| শ্রোত্রাদিভিরিতি আদিশব্দাত্ত্বঙ্নেত্ররসনঘ্রাণানি গৃহ্যন্তে||৪||
Adhikarana 4 (5) · Śloka 5
তত্র শ্রোত্রেন্দ্রিযবিজ্ঞেযা বিশেষা রোগেষু ব্রণাস্রাববিজ্ঞানীযাদিষু বক্ষ্যন্তে- ‘তত্র সফেনং রক্তমীরযন্ননিলঃ সশব্দো নির্গচ্ছতি’(সূ. অ.২৬) ইত্যেবমাদযঃ, স্পর্শনেন্দ্রিযবিজ্ঞেযাঃ শীতোষ্ণশ্লক্ষ্ণকর্কশমৃদুকঠিনত্বাদযঃ (স্পর্শবিশেষা ) জ্বরশোফাদিষু, চক্ষুরিন্দ্রিযবিজ্ঞেযাঃ শরীরোপচযাপচযাযুর্লক্ষণবলবর্ণবিকারাদযঃ, রসনেন্দ্রিযবিজ্ঞেযাঃ প্রমেহাদিষু রসবিশেষাঃ, ঘ্রাণেন্দ্রিযবিজ্ঞেযা অরিষ্টলিঙ্গাদিষু ব্রণানামব্রণানাং চ গন্ধবিশেষাঃ, প্রশ্নেন চ বিজানীযাদ্দেশং কালং জাতিং সাত্ম্যমাতঙ্কসমুত্পত্তিং বেদনাসমুচ্ছ্রাযং বলমন্তরগ্নিং বাতমূত্রপুরীষাণাং প্রবৃত্তিমপ্রবৃত্তিং কালপ্রকর্ষাদীংশ্চ বিশেষান্ | আত্মসদৃশেষু বিজ্ঞানাভ্যুপাযেষু তত্স্থানীযৈর্জানীযাত্ ||৫||
तत्र श्रोत्रेन्द्रियविज्ञेया विशेषा रोगेषु व्रणास्रावविज्ञानीयादिषु वक्ष्यन्ते- ‘तत्र सफेनं रक्तमीरयन्ननिलः सशब्दो निर्गच्छति’(सू. अ.२६) इत्येवमादयः, स्पर्शनेन्द्रियविज्ञेयाः शीतोष्णश्लक्ष्णकर्कशमृदुकठिनत्वादयः (स्पर्शविशेषा ) ज्वरशोफादिषु, चक्षुरिन्द्रियविज्ञेयाः शरीरोपचयापचयायुर्लक्षणबलवर्णविकारादयः, रसनेन्द्रियविज्ञेयाः प्रमेहादिषु रसविशेषाः, घ्राणेन्द्रियविज्ञेया अरिष्टलिङ्गादिषु व्रणानामव्रणानां च गन्धविशेषाः, प्रश्नेन च विजानीयाद्देशं कालं जातिं सात्म्यमातङ्कसमुत्पत्तिं वेदनासमुच्छ्रायं बलमन्तरग्निं वातमूत्रपुरीषाणां प्रवृत्तिमप्रवृत्तिं कालप्रकर्षादींश्च विशेषान् | आत्मसदृशेषु विज्ञानाभ्युपायेषु तत्स्थानीयैर्जानीयात् ||५||
🔊 Audio coming soon
তত্র শ্রোত্রেত্যাদি| শব্দেন্দ্রিযবিজ্ঞেযা বিশেষাঃ সন্তি রোগেষু, তে ব্রণাস্রাববিজ্ঞানীযাদিষু বক্ষ্যন্তে ইতি সম্বন্ধঃ| শরীরোপচযেত্যাদি উপচযঃ স্থৌল্যম্, অপচযঃ কার্শ্যং, বলমত্রোত্সাহঃ| ননু প্রমেহাদিষু রসা মধুরাদযো মক্ষিকাপিপীলিকাদ্যুপসর্পণেন ভিষগ্ভিরনুমেযাঃ, তত্ কথং রসনেন্দ্রিযবিজ্ঞেযা ইতি? উচ্যতে, নাত্র ভিষজাং রসনেন্দ্রিযং কিন্তু পিপীলিকাদীনামিত্যদোষঃ| অরিষ্টলিঙ্গাদিষু যে ব্রণানামব্রণানাং চ গন্ধবিশেষাস্তে ঘ্রাণেন্দ্রিযবিজ্ঞেযা ইতি সম্বন্ধঃ| দেশস্ত্রিবিধো জাঙ্গলানূপসাধারণভেদাত্| জাতিশব্দো ব্রাহ্মণাদিষু বর্ততে| কালো দ্বিবিধো নিত্যগ আবস্থিকশ্চ; নিত্যগঃ ঋতুলক্ষণঃ; আবস্থিকো দ্বিবিধঃ- স্বস্থস্য বাল্যাদিভেদেন, ব্যাধিতস্য জ্বরারম্ভাদিকালাবস্থযা চ| সাত্ম্যমিতি যদ্যস্য সেবিতং সত্ সুখায সম্পদ্যতে তত্তস্য সাত্ম্যং; তচ্চ দ্বিবিধং চেষ্টাখ্যমাহারাখ্যং চ; চেষ্টাখ্যং কাযবাঙ্মনোভেদাত্ত্রিবিধম্, আহারাখ্যং রসভেদাত্ ষড্বিধম্| আতঙ্কসমুত্পত্তিমিতি সমুত্পত্তিঃ কারণমুচ্যতে, তচ্চ বলবদ্বিগ্রহাদি| বেদনাসমুচ্ছ্রাযমিতি বেদনা বাতাদিবেদনাস্তোদাদযঃ, তাসাং সমুচ্ছ্রায উদ্গতিঃ| বলং ব্যাযামগম্যা শক্তিঃ| অন্তরগ্নিমিতি কীদৃশোঽন্তরগ্নিঃ? সমো বিষমো মন্দো বা| বাতমূত্রপুরীষাণামিত্যত্রাদিশব্দো লুপ্তো জ্ঞেযঃ, তেনার্তবাধোগতরক্তপিত্তাদীনাং গ্রহণম্| কালপ্রকর্ষাদীংশ্চ বিশেষানিতি কিযান্ কলোঽস্মিন্ ব্যাধাবুত্পন্ন ইত্যাদীন্ ভেদান্, চকারাদ্গুহ্যদেশপ্রবৃত্তপূযাদীনাং গ্রহণম্| অন্যে তু ‘দেশকালজাতিসাত্ম্যং’ ইতি সমাসান্তং পঠন্তি, সাত্ম্যশব্দো দেশাদিভিঃ সহ প্রত্যেকং সম্বধ্যতে; দেশস্ত্রিবিধো জাঙ্গলাদিভেদেন, তদ্বৈপরীত্যেন দেশসাত্ম্যমিত্যাদি ব্যাখ্যানযন্তি| অপরে তু ‘দেশকালজাতং’ ইতি পঠন্তি, ব্যাখ্যানযন্তি চ- জাতশব্দো দেশকালাভ্যাং সহ প্রত্যেকং সম্বধ্যতে; দেশো ভূমিরাতুরশ্চ; কস্মিন্ দেশে জাঙ্গলেঽনূপে সাধারণে বাঽযং দোষঃ সঞ্চিতঃ? কস্মিন্ প্রকুপিতঃ? কস্মিন্নযং ব্যাধিরুত্পন্ন? ইতি; তথা, আতুরেঽপি গলাদৌ কস্মিন্নবযবে শ্লেষ্মস্থানে পিত্তস্থানে বা?| আত্মসদৃশেষু দোষসদৃশেষু, বিজ্ঞানাভ্যুপাযেষু ষড্বিধেষু শ্রোত্রত্বক্চক্ষূরসনঘ্রাণপ্রশ্নেষু| তত্র বাতসদৃশেষু বিজ্ঞানাভ্যুপাযেষু পঞ্চেন্দ্রিযপ্রশ্নেষু ব্রণে সশব্দফেনরক্তানিলাদিনির্গমনং শ্রবণেন্দ্রিযগ্রাহ্যং, পারুষ্যরৌক্ষ্যাদিকং ত্বগিন্দ্রিযগ্রাহ্যং, ভস্মকপোতাস্থিসবর্ণত্বং চক্ষুরিন্দ্রিযগ্রাহ্যং, কটুগন্ধলাজগন্ধাদিত্বং ঘ্রাণেন্দ্রিযগ্রাহ্যং, কষাযরসত্বং রসনেন্দ্রিযগ্রাহ্যং, তোদনভেদনচ্ছেদনাদিবেদনাবিশেষাঃ প্রশ্নগ্রাহ্যাঃ; পিত্তসদৃশেষু বিজ্ঞানাভ্যুপাযেষু শ্বযথুব্রণাদীনামৌষ্ণ্যং ত্বগিন্দ্রিযগ্রাহ্যং, নীলপীতবর্ণত্বং চক্ষুরিন্দ্রিযগ্রাহ্যং, কট্বম্লরসত্বং রসনেন্দ্রিযগ্রাহ্যং, তীক্ষ্ণাতসীগন্ধত্বং ঘ্রাণেন্দ্রিযগ্রাহ্যম্, ওষচোষপরিদাহাদিকা বেদনাবিশেষাঃ প্রশ্নগ্রাহ্যাঃ; শ্লেষ্মসদৃশেষু বিজ্ঞানাভ্যুপাযেষু স্নিগ্ধপৈচ্ছিল্যাদিকং ত্বগিন্দ্রিযগ্রাহ্যং, শ্বেতত্বং চক্ষুরিন্দ্রিযগ্রাহ্যং, মাধুর্যাদি রসনেন্দ্রিযগ্রাহ্যং, বিস্রগন্ধাদিত্বং ঘ্রাণেন্দ্রিযগ্রাহ্যং, কণ্ডূগুরুত্বাদিবেদনাবিশেষাঃ প্রশ্নগ্রাহ্যা ইতি| বৈদ্যো জানীযাদিতি কান্? ব্যাধীন্; অধিকারবশাদক্ষরৈরনুক্তানপি; কেষু সত্সু? ষড্বিধেষ্বপি বিজ্ঞানাভ্যুপাযেষ্বাত্মসদৃশেষু বাতপিত্তশ্লেষ্মসদৃশেষু; কৈর্জানীযাত্? তত্স্থানীযৈঃ তেষাং শব্দাদীনাং স্থানানি শ্রোত্রাদীনি, তেষ্বধিকৃতৈঃ শব্দস্পর্শরূপরসগন্ধৈঃ তত্স্থানীযৈঃ; এতেনৈতদুক্তং- বাতাদিলিঙ্গৈরাযুর্বেদেষ্বনির্দিষ্টনামধেযানপি ব্যাধীন্ কুশাগ্রমতির্বৈদ্যো জানীযাদিতি| পঞ্জিকাকারস্তু দর্শনাদিপরীক্ষাং ত্রিবিধামেব পঠতি| ‘মিথ্যাদৃষ্টা বিকারা হি’ ইত্যাদিশ্লোকান্তে “তস্মাত্ পরীক্ষ্যাঃ সততং ভিষজা সিদ্ধিমিচ্ছতা| যুক্ত্যৈব ব্যাধযঃ সর্বৈঃ(র্বে) প্রমাণৈর্দর্শনাদিভিঃ”- ইতি শ্লোকমধীতে, ব্যাখ্যানযতি চ- দর্শনাদিভিরিত্যেবং কর্তব্যে যত্ ‘প্রমাণৈঃ’ ইত্যধিকং করোতি, তদধিকপ্রমাণপ্রাপ্ত্যর্থং, তেন গন্ধরসশব্দানামপ্যবরোধঃ; যে ত্বত্রাক্ষরৈঃ ষড্বিধামপি পরীক্ষাং পঠন্তি, তেষাং সম্যক্ শাস্ত্রাববোধো নাস্তীতি ভাষতে| ‘আত্মসদৃশেষু বিজ্ঞানাভ্যুপাযেষু তত্স্থানীযৈর্জানীযাত্’ ইত্যপি ন পঞ্জিকাকারঃ পঠতি||৫||
Adhikarana 5 (6) · Śloka 6
এবমভিসমীক্ষ্য সাধ্যান্ সাধযেত্, যাপ্যান্ যাপযেত্, অসাধ্যান্নৈবোপক্রমেত, পরিসংবত্সরোত্থিতাংশ্চ বিকারান্ প্রাযশো বর্জযেত্ ||৬||
एवमभिसमीक्ष्य साध्यान् साधयेत्, याप्यान् यापयेत्, असाध्यान्नैवोपक्रमेत, परिसंवत्सरोत्थितांश्च विकारान् प्रायशो वर्जयेत् ||६||
🔊 Audio coming soon
এবমিত্যাদি| সাধ্যং দ্বিবিধং- সুসাধ্যং, দুঃসাধ্যং চ; অসাধ্যং দ্বিবিধং- যাপ্যং, প্রত্যাখ্যেযং চ| পরিসংবত্সরেত্যাদি পরিসংবত্সরোত্থিতাঃ সংবত্সরাতীতাঃ সর্বর্তু চ মহাবলা যে তান্ পরিবর্জযেদিতি; যদি হ্যেকদোষজাস্তে ভবেযুরেবং তেষাং তদ্দোষপ্রশমনর্তুষু প্রশমো ভবেদল্পতা বা, স চ ন ভবতি, তেন তেষাং ত্রিদোষজত্বাধিগমঃ, অতস্তান্ পরিবর্জযেত্; অথবা সংবত্সরেণোত্তরোত্তরধাত্বনুক্রমাদসাধ্যত্বং প্রাযশঃ| প্রাযশো বাহুল্যেন, নাবশ্যতযা; তেন কেচিদ্রক্তগুল্মাদযঃ সংবত্সরানন্তরমুপক্রমযোগ্যা ভবন্তি, অর্দিতস্তু ত্রিভির্বর্ষৈঃ সাধ্য ইতি||৬||
Adhikarana 6 (7) · Śloka 7
ভবতি চাত্র- মিথ্যাদৃষ্টা বিকারা হি দুরাখ্যাতাস্তথৈব চ | তথা দুষ্পরিমৃষ্টাশ্চ মোহযেযুশ্চিকিত্সকম্ ||৭||
भवति चात्र- मिथ्यादृष्टा विकारा हि दुराख्यातास्तथैव च | तथा दुष्परिमृष्टाश्च मोहयेयुश्चिकित्सकम् ||७||
🔊 Audio coming soon
মিথ্যাদৃষ্টা ইতি রোগিণো বিকারা যে মিথ্যাদৃষ্টা অসম্যগ্দৃষ্টাঃ, তথা দুরাখ্যাতা রোগিণা ন যাথাতথ্যেনোক্তাঃ, তথা দুষ্পরিমৃষ্টাঃ দুষ্পরিমর্শিতাঃ , তে চিকিত্সকং মোহযেযুঃ, এবমবিজ্ঞাতা যে রোগাস্তান্ পরিবর্জযেত্||৭||
Adhikarana 7 (8) · Śloka 8
তত্র সাধ্যা অপি ব্যাধযঃ প্রাযেণৈষাং দুশ্চিকিত্স্যতমা ভবন্তি | তদ্যথা- শ্রোত্রিযনৃপতিস্ত্রীবালবৃদ্ধভীরুরাজসেবককিতবদুর্বলবৈদ্যবিদগ্ধব্যাধিগোপকদরিদ্রকৃপণক্রোধনানামনাত্মবতামনাথানাং চ; এবং নিরূপ্য চিকিত্সাং কুর্বন্ ধর্মার্থকামযশাংসি প্রাপ্নোতি ||৮||
तत्र साध्या अपि व्याधयः प्रायेणैषां दुश्चिकित्स्यतमा भवन्ति | तद्यथा- श्रोत्रियनृपतिस्त्रीबालवृद्धभीरुराजसेवककितवदुर्बलवैद्यविदग्धव्याधिगोपकदरिद्रकृपणक्रोधनानामनात्मवतामनाथानां च; एवं निरूप्य चिकित्सां कुर्वन् धर्मार्थकामयशांसि प्राप्नोति ||८||
🔊 Audio coming soon
তত্র সাধ্যা ইত্যাদি| শ্রোত্রিযস্য বেদার্থপরিপালনপরস্য নিত্যং স্নানাদিভির্ব্যাধিপরিবৃদ্ধিঃ; নৃপতেরপি স্বাতন্ত্র্যাদ্যত্কিঞ্চনকারিত্বাত্, অন্যে তু সৌকুমার্যাত্ ক্রিযাঽসহত্বাত্; স্ত্রীণাং লজ্জযা বেগাদ্যুপরোধাদ্গুহ্যব্যাধেরপ্রকাশনাচ্চ; বালবৃদ্ধযোর্বিরেচনাদিক্রিযাযোগ্যত্বেনাল্পক্রিযত্বাত্, অন্যে তু বালবৃদ্ধবনিতাঃ সুকুমারশরীরত্বাদ্ভেষজাসহিষ্ণবঃ; ভীরুরল্পসত্ত্বত্বান্ন শক্নোতি সোঢুং ক্রিযাং; রাজসেবকস্য রাজাযত্তত্বাত্; কিতবস্য ব্যসনিত্বাত্, কিতবো দ্যূতকারঃ; দুর্বলস্য বালবৃদ্ধযোরিব; বৈদ্যবিদগ্ধস্যাভিমানেন নির্দিষ্টান্যথাকারিত্বাত্, বৈদ্যবিদগ্ধো বৈদ্যাভিমানী, পল্লবগ্রাহীত্যর্থঃ; ব্যাধিগোপকস্য ব্যাধেরকথনাদেব; দরিদ্রস্য দ্রব্যাভাবত্বে ঔষধাভাবাত্; কৃপণস্য লোভেন ভৈষজ্যানুপাদানাত্; ক্রোধনস্য কোপেন রোগপরিবৃদ্ধেঃ; অনাত্মবতোঽপথ্যাচরণত্বাত্, অনাত্মবান্ অজিতেন্দ্রিযঃ; অনাথানাং পরিচারকাভাবাত্, অনাথা একাকিনঃ||৮||
Adhikarana 8 (9) · Śloka 9
ভবতি চাত্র- স্ত্রীভিঃ সহাস্যাং সংবাসং পরিহাসং চ বর্জযেত্ | দত্তং চ তাভ্যো নাদেযমন্নাদন্যদ্ভিষগ্বরৈঃ ||৯||
भवति चात्र- स्त्रीभिः सहास्यां संवासं परिहासं च वर्जयेत् | दत्तं च ताभ्यो नादेयमन्नादन्यद्भिषग्वरैः ||९||
🔊 Audio coming soon
ইদানীং বৈদ্যস্য বিশিখাযামন্তঃপুরচারিণঃ প্রমাদদোষদ্বারং নিযমযন্নাহ,- ভবতি চাত্রেত্যাদি| সহাস্যামেকত্র স্থিতিং, সংবাসং প্রতিবেশবাসিতাং, পরিহাসং হাস্যম্| অন্নাদন্যদিতি অন্নমন্নপানদ্রব্যং গৃহ্ণীযাত্, তস্য বৃত্তিহেতুত্বাত্; রাজ্ঞাঽনুমতং তু সর্বমেব গৃহ্ণীযাদিতি| সংবাসমিত্যত্র কেচিত্ সংবাদমিতি পঠন্তি||৯||
Adhikarana puShpikA · Śloka 10
ইতি সুশ্রুতসংহিতাযাং সূত্রস্থানে বিশিখানুপ্রবেশনীযো নাম দশমোঽধ্যাযঃ ||১০||
इति सुश्रुतसंहितायां सूत्रस्थाने विशिखानुप्रवेशनीयो नाम दशमोऽध्यायः ||१०||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে বিশিখানুপ্রবেশনীযো নাম দশমোঽধ্যাযঃ সমাপ্তঃ||১০||