18. vraṇālēpanabandhavidhyadhyāyaḥ

Adhikarana 1 (1-3) · Śloka 3

অথাতো ব্রণালেপনবন্ধবিধিমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| আলেপ আদ্য উপক্রমঃ , এষ সর্বশোফানাং সামান্যঃ প্রধানতমশ্চ, তং চ প্রতিরোগং বক্ষ্যামঃ- ততো বন্ধঃ প্রধানং, তেন শুদ্ধির্ব্রণরোপণমস্থিসন্ধিস্থৈর্যং চ ||৩||

অথাত ইত্যাদি| এষ আলেপঃ| নন্বেষ আলেপ আদ্য উপক্রমঃ কথং? দ্বিব্রণীযেঽপতর্পণস্যাদ্যত্বেন পঠিতত্বাত্; উচ্যতে- ঔষধদ্রব্যেভ্যো বহিরন্তঃপ্রমার্জনেভ্য আলেপ আদ্য ইত্যর্থঃ; আদ্যসমীপত্বাচ্ছ্রেষ্ঠত্বাদ্বাঽঽলেপ আদ্য ইত্যুচ্যতে| সর্বশোফানাং সামান্য ইতি বাতাদিশোফানাং তুল্যঃ, আলেপত্বেনাভেদাত্| প্রধানতমশ্চ সর্বোপক্রমেভ্যঃ আশুপীডাহরত্বাত্| তং চ প্রতিরোগং বক্ষ্যাম ইতি তমালেপং, প্রতিরোগং রোগে রোগে, বক্ষ্যামঃ কথযিষ্যামঃ, অস্মিন্ স্থানে চিকিত্সিতে চ| ততঃ তস্মাদালেপাত্| অস্থিসন্ধিস্থৈর্যং চেতি অস্থ্নঃ সন্ধের্দার্ঢ্যং ‘ভবতি’ ইত্যাধ্যাহারঃ| কেচিদাচার্যা ইমং ন পঠন্তি||১-৩||

Adhikarana 2 (4) · Śloka 4

তত্র প্রতিলোমমালিম্পেত্ | প্রতিলোমে হি সম্যগৌষধমবতিষ্ঠতেঽনুপ্রবিশতি রোমকূপান্ স্বেদবাহিভিশ্চ সিরামুখৈর্বীর্যং প্রাপ্নোতি ||৪||

ইদানীমালেপাবচারণং তত্ফলং চ নির্দেষ্টুমাহ- তত্রেত্যাদি| প্রতিলোমমালিম্পেদিতি লোমাভিমুখমালিম্পেত্| হি যস্মাদর্থে| অবতিষ্ঠতে অবস্থিতিং করোতি, অনুপ্রবিশতি চ ‘ঔষধং’ ইত্যনুবর্ততে||৪||

Adhikarana 3 (5) · Śloka 5

ন চ শুষ্যমাণমুপেক্ষেত, অন্যত্র পীডযিতব্যাত্ | শুষ্কো হ্যপার্থকো রুক্করশ্চ ||৫||

আলেপস্যাবস্থাযাং কর্তব্যতামাহ- ন চেত্যাদি| অন্যত্র পীডযিতব্যাদিতি পীডনদ্রব্যৈর্মিশ্রকোক্তৈর্যো ব্রণঃ পীডনীযো ভবতি তস্মাদন্যত্র শুষ্যমাণং নোপেক্ষেতেত্যর্থঃ| হি যস্মাদর্থে| অপার্থকো নিষ্ফলঃ||৫||

Adhikarana 4 (6) · Śloka 6

স ত্রিবিধঃ- প্রলেপঃ, প্রদেহ, আলেপশ্চ | প্রলেপপ্রদেহযোরন্তরং - তত্র প্রলেপঃ শীতস্তনুরবিশোষী বিশোষী বা; প্রদেহস্তূষ্ণঃ শীতো বা বহলোঽবহুরবিশোষী চ; মধ্যমোঽত্রালেপঃ | তত্র, রক্তপিত্তপ্রসাদকৃদালেপঃ; প্রদেহো বাতশ্লেষ্মপ্রশমনঃ শোধনো রোপণঃ শোফবেদনাপহশ্চ; তস্যোপযোগঃ ক্ষতাক্ষতেষু; যস্তু ক্ষতেষূপযুজ্যতে স ভূযঃ ‘কল্ক’ ইতি সঞ্জ্ঞাং লভতে নিরুদ্ধালেপনসঞ্জ্ঞঃ; তেনাস্রাবসন্নিরোধো মৃদুতা পূতিমাংসাপকর্ষণমনন্তর্দোষতা ব্রণশুদ্ধিশ্চ ভবতি ||৬||

তদ্ভেদানাহ- স ত্রিবিধ ইত্যাদি| প্রলেপপ্রদেহযোর্বাস্তবাভেদেঽপি ব্যাবহারিকং ভেদং দর্শযন্নাহ- তত্র প্রলেপ ইত্যাদি| অন্তরং ভেদঃ, স্থানাসনবত্| প্রলেপং লক্ষণৈর্নির্দিশন্নাহ- প্রলেপ ইত্যাদি| অবিশোষী অপীডযিতব্যে ব্রণশোফে, বিশোষী পীডযিতব্যে; এতেন যেন কল্কেন চন্দনবল্লিপ্যতে স প্রলেপঃ; অন্যে ‘শীতস্তনুঃ’ ইত্যাদিলক্ষণং প্রদেহস্য ইতি বদন্তি| লক্ষণৈঃ প্রদেহং নির্দিশন্নাহ- প্রদেহ ইত্যাদি| উষ্ণঃ শীতো বেতি বিষযাপেক্ষযা; তত্র বাতবহুলে কফবহুলে বা উষ্ণঃ, পিত্তরক্তবহুলে শীতঃ| বহলঃ স্থূলঃ, এতেন যস্তু কল্কঃ পিণ্ডীকৃত্য ব্রণস্যোপরি দীযতে স প্রদেহঃ| ‘উষ্ণঃ শীতো বা’ ইত্যাদিলক্ষণং ‘প্রলেপস্য’ ইতি কেচিন্মন্যন্তে| লক্ষণান্তরং নির্দিশ্য কার্যভেদং নির্দিশন্নাহ- তত্রেত্যাদি| তত্রেতি তযোর্মধ্যে| কেচিদত্রালেপনস্থানে ‘প্রদেহ’ ইতি পঠন্তি, অন্যে তু প্রদেহস্থানে আলেপং পঠন্তি| আলেপস্য সামান্যবিষযং দর্শযন্নাহ- তস্যেত্যাদি| ক্ষতাক্ষতেষু ব্রণব্রণশোফেষ্বিত্যর্থঃ| বিষযান্তরেণালেপস্য নামান্তরমাহ- যস্ত্বিত্যাদি| তুশব্দোঽবধারণে| ভূযঃশব্দোঽত্র পুনরর্থে| নিরুদ্ধা নিষিদ্ধা| অন্যে ত্বত্র ‘নিরোধ্যালেপনসঞ্জ্ঞাং’ ইতি পঠন্তি; তত্রাপি স এবার্থঃ| কল্কসঞ্জ্ঞস্যালেপস্য কর্ম আহ- তেনেত্যাদি| আস্রাবসন্নিরোধ ইতি আস্রাবো রক্তাদ্যাস্রাবঃ| অনন্তর্দোষতেতি দোষোঽত্র পূযঃ, তেনাভ্যন্তরপূযবর্জিতত্বম্| ব্রণশুদ্ধিশ্চেতি দোষদুষ্টিনিবৃত্তিঃ; চকারাদ্ব্রণরোপণস্য গ্রহণম্||৬||

Adhikarana 5 (7-10) · Śloka 10

অবিদগ্ধেষু শোফেষু হিতমালেপনং ভবেত্ | যথাস্বং দোষশমনং দাহকণ্ডূরুজাপহম্ ||৭|| ত্বক্প্রসাদনমেবাগ্র্যং মাংসরক্তপ্রসাদনম্ | দাহপ্রশমনং শ্রেষ্ঠং রুজাকণ্ডূবিনাশনম্ ||৮|| মর্মদেশেষু যে রোগা গুহ্যেষ্বপি তথা নৃণাম্ | সংশোধনায তেষাং হি কুর্যাদালেপনং ভিষক্ ||৯|| (ষড্ভাগং পৈত্তিকে স্নেহং চতুর্ভাগং তু বাতিকে | অষ্টভাগং তু কফজে স্নেহমাত্রাং প্রদাপযেত্) ||১০||

আলেপস্যাত্মবিষযে কালাবধিমাহ- অবিদগ্ধেষ্বিত্যাদি| অবিদগ্ধেষ্বালেপনং হিতং, বিদগ্ধেষু পুনঃ প্রদেহ এব, যস্য ‘উপনাহ’ ইতি সঞ্জ্ঞান্তরম্| যথাস্বং দোষশমনমিতি বাতাদিদোষেষু মধ্যে যদালেপনং দ্রব্যগুণাপেক্ষযা যস্য দোষস্য শমনং ভবেত্ তত্ তত্র হিতমিত্যর্থঃ| দাহকণ্ডূরুজাপহমিতি দাহঃ পিত্তস্য, কণ্ডূঃ কফস্য, রুজা বাতস্য, এতা অপহন্তি| দূষ্যপ্রসাদনত্বমালেপস্য নির্দেষ্টুমাহ- ত্বক্প্রসাদনমেবাগ্র্যমিতি|- অগ্র্যং প্রধানম্| দাহকণ্ডূরুজাপহমিতি পূর্বস্মিন্নেব শ্লোকে দাহাদীনাং পঠিতত্বাদিহ পুনঃ পাঠো দূষ্যকৃতা অপি দাহাদযো ভবন্তীতি বোধনার্থম্||৭-১০||

Adhikarana 6 (11) · Śloka 11

তস্য প্রমাণং মহিষার্দ্রচর্মোত্সেধমুপদিশন্তি ||১১||

তনুত্বমালেপস্য গুণঃ, তনুত্বং কিং প্রমাণমিত্যাহ- তস্যেত্যাদি| প্রদেহস্তু মহিষার্দ্রচর্মোচ্ছ্রাযাপেক্ষযা স্থূল ইতি| যে তু তনুত্বং প্রদেহগুণং মন্যতে, তেষাং মতে প্রদেহস্যৈতত্ প্রমাণম্||১১||

Adhikarana 7 (12-15) · Śloka 15

ন চালেপং রাত্রৌ প্রযুঞ্জীত , মা ভূচ্ছৈত্যবিহতোষ্মণস্তদনির্গমাদ্বিকারপ্রবৃত্তিরিতি ||১২|| প্রদেহসাধ্যে ব্যাধৌ তু হিতমালেপনং দিবা | পিত্তরক্তাভিঘাতোত্থে সবিষে চ বিশেষতঃ ||১৩|| ন চ পর্যুষিতং লেপং কদাচিদবচারযেত্ | উপর্যুপরি লেপং চ ন কদাচিত্ প্রদাপযেত্ ||১৪|| ঊষ্মাণং বেদনাং দাহং ঘনত্বাজ্জনযেত্ স হি | ন চ তেনৈব লেপেন প্রদেহং দাপযেত্ পুনঃ | শুষ্কভাবাত্স নির্বীর্যো যুক্তোঽপি স্যাদপার্থকঃ ||১৫||

বিশিষ্টে কালে আলেপাবচারণবিধিনিষেধে, কথঞ্চিত্ক্রিযমাণে চ দোষমাহ- ন চেত্যাদি| এতেনাস্য বিধিঃ সূচ্যতে; তেন বাতশ্লৈষ্মিকাপাকিশোথে রাত্রৌ প্রদেহ উপযোক্তব্যঃ, তথা বিদহ্যমানে শোথে প্রদেহো দেয এব, ক্ষতেষু কল্কোঽপি রাত্রৌ দাতব্য ইতি, তথা পিত্তজে শোথে বাতপিত্তজে চ শতধৌতঘৃতাভ্যঙ্গাদি দাতব্যমিতি| শৈত্যাবিহতোষ্মণ ইতি ‘শোফস্য’ ইতি শেষঃ| তদনির্গমাত্ শোফোষ্মানিঃসরণাত্| বিকারপ্রবৃত্তির্বিকারাভিবৃদ্ধিঃ| শৈত্যরুদ্ধরোমকূপত্বাদনির্গচ্ছন্নূষ্মা আলেপেনান্তর্নীতোঽত্যর্থং শোফং পচতীত্যর্থঃ| স্বেদবাহিভিঃ সিরামুখৈশ্চ বীর্যং প্রাপ্নোতীত্যত ঊর্ধ্বং বহুষু প্রতিষু নিবন্ধপাঠক্রমাদ্ব্যতিক্রমেণ পাঠক্রমোঽধিকশ্চ পাঠো দৃশ্যতে; স উচ্যতে- “তস্য প্রমাণং মহিষার্দ্রচর্মোত্সেধমুপদিশন্তি| ন চ শুষ্যমাণমুপেক্ষেতান্যত্র পীডযিতব্যাত্; শুষ্কো হ্যপার্থো রুক্করশ্চ| স ত্রিবিধ আলেপঃ প্রদেহো লেপশ্চ| তেষামন্তরং- আলেপঃ শীতস্তনুরবিশোষী বিশোষী চ, প্রদেহস্তূষ্ণঃ শীতো বা বহুলো বহুরবিশোষী চ, মধ্যমো লেপ ইতি| বিশেষতো রক্তপিত্তপ্রসাদকৃদালেপঃ; প্রলেপো বাতশ্লেষ্মপ্রশমনঃ শোধনো রোপণঃ শোফবেদনাপহশ্চ, তস্যোপযোগঃ ক্ষতাক্ষতেষু; যস্তু ক্ষতেষূপযুজ্যতে স ভূযঃ ‘কল্ক’ ইতি সঞ্জ্ঞা লভতে নিরুদ্ধালেপনসঞ্জ্ঞঃ, তেনাস্রাবসন্নিরোধো মৃদুতা পূতিমাংসাপকর্ষণমনন্তর্দোষতা ব্রণশুদ্ধিশ্চ ভবতি| উভযগুণো লেপঃ| ন চালেপং রাত্রৌ প্রযুঞ্জীত, মাভূচ্ছৈত্যবিহতোষ্মণস্তদনির্গমাদ্বিকারপ্রবৃত্তিরিতি| ত্বক্প্রসাদনমেবাগ্র্যং মাংসরক্তপ্রসাদনম্| দাহপ্রশমনং শ্রেষ্ঠং তোদকণ্ডূবিনাশনম্|| মর্মদেশেষু যে রোগা গুহ্যেষ্বপি তথা নৃণাম্| সংশোধনায তেষাং হি কুর্যাদালেপনং ভিষক্|| অবিদগ্ধেষু শোথেষু হিতমালেপনং ভবেত্| যথাস্বং দোষশমনং দাহকণ্ডূবিনাশনম্|| ষড্ভাগং পৈত্তিকে স্নেহং চতুর্ভাগং তু বাতিকে| অষ্টভাগং তু কফজে স্নেহমাত্রাং প্রদাপযেত্”- ইতি| অযং পাঠো বর্তমানেষু পুস্তকেষু সর্বেষ্বেব পঠ্যত ইত্যস্মাভিঃ ক্রমমাত্রং দর্শিতং; ন ত্বযং পঠনীযঃ; পঠনীযঃ পুনঃ প্রাক্তনপাঠ এব, সর্বপূর্বাচার্যসম্মতত্বাত্||১২-১৫||

Adhikarana 8 (16) · Śloka 16

অত ঊর্ধ্বং ব্রণবন্ধনদ্রব্যাণ্যুপদেক্ষ্যামঃ; তদ্যথা- ক্ষৌমকার্পাসাবিকদুকূলকৌশেযপত্রোর্ণচীনপট্টচর্মান্তর্বল্কলালাবূশকললতাবিদলরজ্জুতূলফলসন্তানিকালৌহানীতি ; তেষাং ব্যাধিং কালং চাবেক্ষ্যোপযোগঃ; প্রকরণতশ্চৈষামাদেশঃ ||১৬||

ইদানীং ব্রণবন্ধবিধিঃ প্রস্তূযতে, স চ দ্রব্যাধীনঃ, অতস্তান্যেব প্রাগুপদেষ্টুমাহ- ক্ষৌমেত্যাদি| ক্ষৌমম্ অতসীতন্তুভির্ব্যূতং, অন্যে বস্ত্রান্তরমাহুঃ; কার্পাসং কার্পাসতন্তুরচিতম্; আবিকম্ উরভ্ররোমব্যূতং; দুকূলং পট্টবস্ত্রম্, অন্যে বল্কলমাহুঃ; কৌশেযং কোশকারকৃমিলালোদ্ভূতং, যত্ ‘ত্রসর’ ইতি লোকে; পত্রোর্ণো রল্লূকাখ্যঃ কম্বলঃ, অন্যে তু ‘যৈর্হরিতাদীনি দেবাঙ্গান্যুপ্যন্তে তে পত্রোর্ণাঃ’, ‘ধৌতকৌশেযম্’ ইত্যপরে, ‘মাগধপৌণ্ড্রকাদিদেশেষু নাগবৃক্ষাদযশ্চত্বারো বৃক্ষাস্তত্পত্রেভ্যো জাতৈর্হরিততন্তুভিরূর্ণারূপৈর্বযতে যত্তত্ পত্রোর্ণম্’ ইত্যেকে; চীনপট্টং চীনদেশ এবোত্পদ্যতে, তদ্দেশজনাস্তু ‘চীনযুগপট্টম্’ ইতি বদন্তি, স চ পত্রোর্ণস্যৈব ভেদঃ, অন্যে নেত্রমাহুঃ; চর্ম এণাদীনাম্, অপরে চর্মবদ্বন্ধনদ্রব্যম্, অথবা সুবর্ণপিষ্টিকালিপ্তচর্মতন্তুভিস্তুরুষ্কৈর্যানি বযন্তে তানি চর্মশব্দেনোচ্যন্তে; বাহ্যবল্কলমন্ত্যং চ ত্যক্ত্বা মধ্যং যদ্গৃহ্যতে তদন্তর্বল্কলম্; অলাবূশকলং তুম্বীফলকর্পরিকা; লতাবিদলং শ্যামলতাদিপাটিতার্ধং; কেচিদ্বিদলশব্দং চর্মাদিভিঃ সহ সম্বধ্নন্তি, অন্যে তু বিদলশব্দেন বংশবেত্রাদিকম্বিকামাহুঃ; লতাশব্দেন চ শ্যামলতাদীনাং গ্রহণং; রজ্জুর্মুঞ্জবল্বজাদিবলিতঃ; তূলফলং শাল্মলীফলাদি; সন্তানিকা ক্ষীরসন্তানিকা, অন্যে ‘কুশলসন্তানিকা’ ইতি পঠন্তি, কুশলসন্তানিকা কোলিকবৃত্তিঃ দ্বিত্রিতন্তুরচিতা ‘বয’ ইতি লোকে প্রসিদ্ধা, মর্কটবাসং কেচিদাহুঃ; লোহানি সুবর্ণত্রপুসীসাদীনি| ক্ব পুনস্তেষামুপযোগ ইত্যাহ- তেষামিত্যাদি| তেষাং ক্ষৌমাদীনাম্| ব্যাধিং কালং চাবেক্ষ্যোপযোগ ইতি তত্র বাতশ্লৈষ্মিকং ব্যাধিং কালং চ শীতমবেক্ষ্য ব্রণবন্ধনদ্রব্যাণাং ঘনানামুপযোগঃ, রক্তপৈত্তিকং ব্যাধিমুষ্ণং চ কালমবেক্ষ্য তনূনামুপযোগঃ, চকারাদ্গাঢস্থানমবেক্ষ্য ঘনানামুপযোগঃ, শিথিলস্থানমবেক্ষ্য তনূনামুপযোগ ইতি| বর্গোক্তানাং ব্রণবন্ধনদ্রব্যাণাং সঙ্ক্ষেপেণাদেশমাহ- প্রকরণতশ্চৈষামাদেশ ইতি|- প্রকরণতঃ প্রকরণমবেক্ষ্য, এষাং ব্রণবন্ধনদ্রব্যাণামাদেশনং; তদ্যথা- সর্পাদিদষ্টস্যারিষ্টাবন্ধো রক্ষা(জ্বা)দিভিঃ, রক্তাতিপ্রবৃত্তৌ রক্তনিবৃত্ত্যর্থং সন্তানিকযা বধ্নীযাত্, পাটিতশ্যামলতাদ্যৈর্ভগ্নসন্ধানায বন্ধঃ কর্তব্যঃ, লৌহৈঃ সুবর্ণাদিভির্দন্তান্ বধ্নীযাত্, ত্রপ্বাদিভিরর্বুদগ্রন্থ্যাদীন্, অলাবুশকলেন শিরোব্রণান্ বধ্নীযাত্; এবমন্যেষামপি যথার্হমাদেশনম্||১৬||

Adhikarana 9 (17) · Śloka 17

তত্র কোশদামস্বস্তিকানুবেল্লিতমু(প্র)তোলীমণ্ডলস্থগিকাযমকখট্বাচীনবিবন্ধবিতানগোফণাঃ পঞ্চাঙ্গী চেতি চতুর্দশ বন্ধবিশেষাঃ | তেষাং নামভিরেবাকৃতযঃ প্রাযেণ ব্যাখ্যাতাঃ ||১৭||

ইদানীং বন্ধবিশেষান্ সঙ্খ্যযা নির্দেষ্টুমাহ- তত্র কোশেত্যাদি| এষামাকারং নির্দেষ্টুমাহ- তেষামিত্যাদি| প্রাযোগ্রহণান্নাম্নৈব সর্বেষামাকৃতীর্বক্তুং ন শক্যতে, তস্মাত্ পরতন্ত্রোক্তলক্ষণমপ্যত্রৈব সম্যগাকৃতিবিজ্ঞানায শ্লোকৈরুপদেক্ষ্যামঃ| তদ্যথা- “পূরযিত্বৌষধৈর্বন্ধঃ ক্রিযতে কোশকাকৃতিঃ| কোশকাখ্যঃ স বিজ্ঞেযো, বৈদ্যৈর্বন্ধনবর্জিতঃ|| দামাকৃতিং চতুষ্পাদাং দামাখ্যং, স্বস্তিকং পুনঃ| স্বস্তিকাকৃতিমাসীব্য , পশ্চাদাবেষ্ট্য বধ্যতে|| অনুবেল্লিতং তদ্বিদ্যাত্, মুতোলীলক্ষণং শৃণু| বহ্বঙ্ঘ্রির্মুটিকাকারো জালবদ্বহুরন্ধ্রকঃ|| মুতোলীবন্ধ এষ স্যাত্ সঞ্জ্ঞান্তরমতঃ শৃণু| গোতুণ্ডিকাং চালনীং চ তামেবাহুর্ভিষগ্বরাঃ|| মণ্ডলং বেষ্টনাকারং বিদধ্যাত্, স্থগিকাং পুনঃ | স্থগিকামিব চাপূর্য ভেষজৈঃ পট্টকেন চ|| বধ্যতে মণ্ডলাকারো যমলব্রণযোস্তু যঃ| বন্ধং যমকনামানং ভিষজো বর্ণযন্তি তম্|| খট্বাকারশ্চতুষ্পাদঃ খট্বাবন্ধঃ প্রকীর্তিতঃ| চীনবন্ধং বিজানীযাচ্চীরাভির্বহুভির্বৃতম্| বিবন্ধো বিবিধো বন্ধঃ স চ ষট্চীন্ধি(রি)কাযুতঃ || জ্ঞেযো বিতানসঞ্জ্ঞস্তু বিতানাকারসংযুতঃ| পাষাণগুডকোত্ক্ষেপকারিণীং গোফণাং বিদুঃ|| তদাকৃতিং ভিষক্কুর্যাদ্গোফণাং, পঞ্চকম্বিভিঃ| পঞ্চাঙ্গীং তু বৃতাং কুর্যাত্ সন্ধানায চিকিত্সকঃ”- ইতি||১৭||

Adhikarana 10 (18) · Śloka 18

তত্র কোশমঙ্গুষ্ঠাঙ্গুলিপর্বসু বিদধ্যাত্, দাম সম্বাধেঽঙ্গে, সন্ধিকূর্চকভ্রূস্তনান্তরতলকর্ণেষু স্বস্তিকং, অনুবেল্লিতং শাখাসু, গ্রীবামেঢ্রযোঃ মু(প্র)তোলীং, বৃত্তেঽঙ্গে মণ্ডলম্, অঙ্গুষ্ঠাঙ্গুলিমেঢ্রাগ্রেষু স্থগিকাং, যমলব্রণযোর্যমকং, হনুশঙ্খগণ্ডেষু খট্বাম্, অপাঙ্গযোশ্চীনং, পৃষ্ঠোদরোরঃসু বিবন্ধং, মূর্ধনি বিতানং, চিবুকনাসৌষ্ঠাংসবস্তিষু গোফণাং, জত্রুণ ঊর্ধ্বং পঞ্চাঙ্গীমিতি; যো বা যস্মিন্ শরীরপ্রদেশে সুনিবিষ্টো ভবতি তং তস্মিন্ বিদধ্যাত্ ||১৮||

বন্ধবিষযমাহ- তত্রেত্যাদি| তত্রেতি চতুর্দশবন্ধেষু মধ্যে| পর্বশব্দোঽঙ্গুষ্ঠাঙ্গুলিভিঃ সহ সম্বধ্যতে| দাম সম্বাধেঽঙ্গে ইতি সঙ্কটেঽঙ্গে| সন্ধিকূর্চকভ্রূস্তনান্তরতলকর্ণেষ্বিতি ক্ষিপ্রমর্মোপরিষ্টাদুভযতঃ কূর্চকঃ, পাদাঙ্গুষ্ঠাঙ্গুল্যোর্মধ্যে ক্ষিপ্রমিতি মর্ম; ভ্রূস্তনান্তরমিতি অন্তরশব্দঃ প্রত্যেকং সম্বধ্যতে; তলমিহ হস্তপাদতলম্| শাখাস্বিতি শাখাসু সক্থিবাহুষু| বাহুপার্শ্বোদরোরুপৃষ্ঠাদিকং বৃত্তমঙ্গম্| অঙ্গুষ্ঠাঙ্গুলিমেঢ্রাগ্রেষ্বিতি অগ্রশব্দোঽত্রাঙ্গুষ্ঠাদিভিঃ সহ প্রত্যেকং সম্বধ্যতে| হনুশঙ্খগণ্ডেষ্বিতি হনুর্মুখসন্ধিঃ, শঙ্খো ভ্রূকর্ণযোরন্তরং, গণ্ডো গল্লঃ| অপাঙ্গযোশ্চীনমিতি অপাঙ্গযোর্নেত্রান্তপ্রদেশযোঃ| হৃদযোর্ধ্বং স্তনযোর্মধ্যং গ্রীবামূলাদধস্তাদুরঃ| মূর্ধা মস্তকম্| চিবুকনাসৌষ্ঠাংসবস্তিষু গোফণামিতি চিবুকমোষ্ঠাধো মাংসাস্থিপিণ্ডিকা , অংসো বাহুশিরঃ, বস্তির্মূত্রাশযঃ| জত্রুণ ঊর্ধ্বং গ্রীবামূলাদুপরি| আদ্যসূত্রাত্ ‘বিদধ্যাত্’ ইতি ক্রিযাপদং সর্বত্রানুবর্ততে| উক্তং দেশনিযমং প্রযোজনবশেন ব্যভিচারযন্নাহ- যো বেত্যাদি| সুনিবিষ্টঃ শোভনাকারঃ||১৮||

Adhikarana 11 (19) · Śloka 19

যন্ত্রণমূর্ধ্বমধস্তির্যক্ চ ||১৯||

বন্ধো মৃদুসমাবগাঢভেদাত্ত্রিবিধঃ, স চ যন্ত্রণমন্তরেণ ন সম্ভবতি, অতো যন্ত্রণং নির্দেষ্টুমাহ- যন্ত্রণমূর্ধ্বমধস্তির্যক্ চেতি| যন্ত্রণং পট্টগ্রন্থের্বন্ধনং, তচ্চোর্ধ্বাদিভেদেন ত্রিপ্রকারং, ব্রণাকৃতীনাং নানাবিধত্বাত্| চকার ঊর্ধ্বাদিভেদানেব সমুচ্চিনোতি||১৯||

Adhikarana 12 (20) · Śloka 20

তত্র ঘনাং কবলিকাং দত্ত্বা বামহস্তপরিক্ষেপমৃজুমনাবিদ্ধমসঙ্কুচিতং মৃদু পট্টং নিবেশ্য বধ্নীযাত্ | ন চ ব্রণস্যোপরি কুর্যাদ্গ্রন্থিমাবাধকরং চ ||২০||

বন্ধাবচারণং নির্দিশন্নাহ- তত্রেত্যাদি|- তত্রেতি বাক্যোপক্রমে| ঘনাং কবলিকামিতি ঔষধবস্ত্রযোরন্তরে যা দীযতে ঔষধসংস্থাপনার্থমৌদুম্বরাদিত্বক্ পত্রাণি বা, সা ‘কবলিকা’ ইত্যুচ্যতে; অন্যে দ্বিগুণচতুর্গুণমৃদুকর্পটবিরচিতাং কবলিকামাহুঃ| বামহস্তপরিক্ষেপমিতি বামহস্তপরিক্ষেপাদ্দৃষ্ট্যা রচিতো বন্ধো মঙ্গলমাবহতি; অন্যে তু ‘পট্টে বামহস্তপরিক্ষিপ্তে দক্ষিণহস্তেন সাধু বন্ধো নিষ্পদ্যতে’ ইত্যাচক্ষতে; অপরে তু বামদক্ষিণপরিক্ষেপাবুভাবপি বিষযে কর্তব্যৌ,ক্রিযাসৌকর্যার্থং তু বামহস্তপরিক্ষেপ উক্তঃ| ঋজুত্বং সন্নিবেশবিশেষাপেক্ষম্| অনাবিদ্ধম্ অনাকুলিতম্, অসঙ্কীর্ণমিত্যপরে| অসঙ্কুচিতং বলিবর্জিতম্| মৃদু কোমলম্| বামহস্তপরিক্ষেপর্জুত্বাদিগুণযুক্তং পট্টং নিবেশ্য সংস্থাপ্য বধ্নীযাদিত্যর্থঃ| আবাধকারং চেতি আ সমন্ততঃ পীডাকরং গ্রন্থিং ন কুর্যাদিত্যর্থঃ| স চ বামদক্ষিণপার্শ্বযোস্তথা পৃষ্ঠেঽপি ক্রিযমাণঃ স্বপ্নাবাধকরঃ স্যাদিতি||২০||

Adhikarana 13 (21) · Śloka 21

ন চ বিকেশিকৌষধে অতিস্নিগ্ধে অতিরূক্ষে বিষমে বা কুর্বীত; যস্মাদতিস্নেহাত্ ক্লেদো, রৌক্ষ্যাচ্ছেদো, দুর্ন্যাসাদ্ব্রণবর্ত্মাবঘর্ষণমিতি ||২১||

তত্রৌষধকল্কব্রণবর্ত্যোঃ স্নিগ্ধাদিভাবং নিযমযন্নাহ- ন চেত্যাদি| বিকেশিকৌষধে ইতি তিলকল্কমধুঘৃতাক্তবস্ত্রস্য সূত্রস্য বা বর্তির্বিকেশিকা, সা চ পূতিমাংসোত্সঙ্গগতিপূযগর্ভেষু ব্রণেষু নিক্ষিপ্যতে; ঔষধমিহ ঔষধকল্কঃ, স চ কেবলকল্কঃ পূতিমাংসোত্সঙ্গগত্যস্থ্যন্তরপূযবর্জিতেষু ব্রণেষু দীযতে; এতদ্বিপর্যযব্রণেষু পুনর্বিকেশিকৌষধকল্কযোরুভযোরপ্যুপযোগঃ| বিষমে দুর্ন্যস্তে; অন্যে ‘বিষমে’ ইতি ন পঠন্তি| বিকেশিকৌষধযোরতিস্নিগ্ধাতিরূক্ষদুর্ন্যস্তযোর্দোষং বক্তুমাহ- যস্মাদতিস্নেহাত্ ক্লেদ ইতি|- ক্লেদো ব্রণস্যার্দ্রত্বম্| ছেদঃ সংহতযোর্ব্রণৌষ্ঠযোর্দ্বিধাকরণম্| দুর্ন্যাসাত্ দুষ্প্রবেশাত্| ব্রণবর্ত্ম ব্রণমুখম্| গযদাসাচার্যস্ত্বন্যথাঽঽপাতনিকাং গৃহীত্বা পাঠমন্যথা পঠতি- “অতিস্নেহাতিরূক্ষযোর্বিকেশিকৌষধযোর্দোষং যুক্তিযুক্তস্নেহতো গুণং চ বক্তুমাহ- কস্মাত্? অতিস্নেহাত্ ক্লেদো রৌক্ষ্যাচ্ছেদো যুক্তস্নেহাত্ সম্যগুপরোহ” ইতি||২১||

Adhikarana 14 (22) · Śloka 22

তত্র ব্রণাযতনবিশেষাদ্বন্ধবিশেষস্ত্রিবিধো ভবতি- গাঢঃ, সমঃ, শিথিল ইতি ||২২||

ইদানীমুক্তসঙ্খ্যকমপি বন্ধং ব্রণাকৃতিবিশেষেণ ত্রিবিধং দর্শযন্নাহ- তত্রেত্যাদি| ব্রণাযতনবিশেষাদিতি ব্রণানামাযতনং স্থানমঙ্গপ্রত্যঙ্গাদিকং, তদ্বিশেষাদ্গাঢাদযো বন্ধবিশেষা ভবন্তি| ননু, দোষকালবিশেষাদপ্যগ্রে বন্ধবিশেষাণাং দর্শিতত্বাদ্দোষকালাবপ্যত্র বাচ্যাবিতি? উচ্যতে, দোষকালৌ হি ব্রণাযতনবিশেষমাত্রকরাবিতি ন পৃথগুক্তৌ; অন্যে তু ব্রণাযতনবিশেষাদিত্যস্যাগ্রে চকারো লুপ্তো দ্রষ্টব্য ইতি পঠন্তি, তেনানুক্তদোষকালবিশেষোঽপি লভ্যতে, তস্মাদপি বন্ধবিশেষা ভবন্তি| ব্রণাযতনবিশেষাদিতি অন্যেঽন্যথা ব্যাখ্যানযন্তি ‘ব্রণানাং বাতাদ্যারব্ধানাং বিশেষাত্তথাঽঽযতনানাং স্থানানামঙ্গপ্রত্যঙ্গাদিকানাং কালবিশেষাত্ত্রযো বন্ধবিশেষা ভবন্তি” ইতি| ‘ব্রণাযতনং ব্রণাকারো ব্রণসন্নিবেশ’ ইত্যন্যে ব্যাচক্ষতে; ইদং চাসঙ্গতমেবেতি||২২||

Adhikarana 15 (23) · Śloka 23

পীডযন্নরুজো গাঢঃ সোচ্ছ্বাসঃ শিথিলঃ স্মৃতঃ | নৈব গাঢো ন শিথিলঃ সমো বন্ধঃ প্রকীর্তিতঃ ||২৩||

গাঢাদিবন্ধানাং লক্ষণং নির্দিশন্নাহ- পীডযন্নরুজো গাঢ ইতি|- গাঢো বন্ধঃ পীডযন্নপ্যবগাঢমানোঽপি ন রুজতি| সোচ্ছ্বাসঃ অনবগাঢকঃ||২৩||

Adhikarana 16 (24) · Śloka 24

তত্র স্ফিক্কুক্ষিকক্ষাবঙ্ক্ষণোরুশিরঃসু গাঢঃ, শাখাবদনকর্ণকণ্ঠমেঢ্রমুষ্কপৃষ্ঠপার্শ্বোদরোরঃসু সমঃ, অক্ষ্ণোঃ সন্ধিষু চ শিথিল ইতি ||২৪||

প্রাগেব ব্রণাযতনবিশেষাদ্বন্ধবিশেষং নির্দিশন্নাহ- তত্রেত্যাদি| স্ফিচৌ কটিপ্রোথৌ, বঙ্ক্ষণ ঊরুসন্ধিঃ, মঢ্রো মেহনং, মুষ্কোঽণ্ডকোষঃ||২৪||

Adhikarana 17 (25) · Śloka 25

তত্র পৈত্তিকং গাঢস্থানে সমং বধ্নীযাত্, সমস্থানে শিথিলং, শিথিলস্থানে নৈব; এবং শোণিতদুষ্টং চ; শ্লৈষ্মিকং শিথিলস্থানে সমং, সমস্থানে গাঢং, গাঢস্থানে গাঢতরং; এবং বাতদুষ্টং চ ||২৫||

দোষবিশেষাদ্বন্ধবিশেষং নির্দেষ্টুমাহ- তত্রেত্যাদি||২৫||

Adhikarana 18 (26) · Śloka 26

তত্র পৈত্তিকং শরদি গ্রীষ্মে দ্বিরহ্নো বধ্নীযাত্, রক্তোপদ্রুতমপ্যেবং; শ্লৈষ্মিকং হেমন্তবসন্তযোস্ত্র্যহাত্ , বাতোপদ্রুতমপ্যেবম্ | এবমভ্যূহ্য বন্ধবিপর্যযং চ কুর্যাত্ ||২৬||

কালবিশেষাদপি বন্ধবিশেষং দর্শযন্নাহ- তত্রেত্যাদি| দ্বিরহ্নো বধ্নীযাদিতি দিবসস্য মধ্যে দ্বৌ বারৌ বধ্নীযাদিত্যর্থঃ| এবমভ্যূহ্যেতি এবমনেন প্রকারেণ, অভ্যূহ্য স্বযমপি বিতর্ক্য, বন্ধবিপর্যযং বন্ধস্যান্যথাত্বমবস্থাবশাত্ কুর্যাদিতি| তদ্যথা- পিত্তশ্লৈষ্মিকং দ্ব্যহাদ্বধ্নীযাত্ প্রাতর্গ্রীষ্মশরদোঃ, হেমন্তে পৈত্তিকমহরহঃ, বর্ষাদিষ্বপি শ্লৈষ্মিকং দ্ব্যহে সাযমিতি||২৬||

Adhikarana 19 (27) · Śloka 27

তত্র, সমশিথিলস্থানেষু গাঢং বদ্ধে বিকেশিকৌষধনৈরর্থক্যং শোফবেদনাপ্রাদুর্ভাবশ্চ, গাঢসমস্থানেষু শিথিলং বদ্ধে বিকেশিকৌষধপতনং পট্টসঞ্চারাদ্ব্রণবর্ত্মাবঘর্ষণমিতি; গাঢশিথিলস্থানেষু সমং বদ্ধে চ গুণাভাব ইতি ||২৭||

গাঢাদিস্থানেঽপ্যন্যথাকৃতানাং বন্ধানাং দোষং বক্তুমাহ- তত্রেত্যাদি| চকারোঽত্র রাগং সমুচ্চিনোতি; গাঢবন্ধদোষোঽযম্||২৭||

Adhikarana 20 (28) · Śloka 28

অবিপরীতবন্ধে বেদনোপশান্তিরসৃক্প্রসাদো মার্দবং চ ||২৮||

যথোচিতবন্ধগুণমাহ- অবিপরীতবন্ধ ইত্যাদি||২৮||

Adhikarana 21 (29) · Śloka 29

অবধ্যমানো দংশমশকতৃণকাষ্ঠোপলপাংশুশীতবাতাতপপ্রভৃতিভির্বিশেষৈরভিহন্যতে ব্রণঃ, বিবিধবেদনোপদ্রুতশ্চ দুষ্টতামুপৈতি, আলেপনাদীনি চাস্য বিশোষমুপযান্তি ||২৯||

বন্ধব্যতিরেকে দোষং বক্তুমাহ- অবধ্যমান ইত্যাদি| দংশো বনমক্ষিকা, উপলঃ পাষাণঃ, পাংশুর্ধূলিঃ, আতপো ঘর্মঃ| দুষ্টতামুপৈতি বৈকৃতং যাতি||২৯||

Adhikarana 22 (30-31) · Śloka 31

চূর্ণিতং মথিতং ভগ্নং বিশ্লিষ্টমতিপাতিতম্ | অস্থিস্নাযুসিরাচ্ছিন্নমাশু বন্ধেন রোহতি ||৩০|| সুখমেবং ব্রণী শেতে সুখং গচ্ছতি তিষ্ঠতি | সুখং শয্যাসনস্থস্য ক্ষিপ্রং সংরোহতি ব্রণঃ ||৩১||

বন্ধস্যাত্যন্তগুণং দর্শযন্নাহ- চূর্ণিতমিত্যাদি| চূর্ণিতং বহুধা খণ্ডীকৃতং, মথিতং বিলোডিতং, ভগ্নং কাণ্ডভগ্নং, বিশ্লিষ্টং সন্ধিচ্যুতম্, অতিপাতিতং স্থানাচ্চ্যুতমবলম্বমানম্| ছিন্নশব্দোঽস্থ্যাদিভিঃ প্রত্যেকং সম্বধ্যতে| চূর্ণিতাদিষু গমনাগমনস্থানশযনেষ্বপি চতুর্ষু বন্ধঃ প্রশস্ত ইত্যাহ- সুখমিত্যাদি| শেতে স্বপিতি, তিষ্ঠতি ঊর্ধ্বীভূত আস্তে, শয্যাসনস্থস্য সুখং ‘ভবতি’ ইত্যধ্যাহারঃ||৩০-৩১||

Adhikarana 23 (32) · Śloka 32

অবন্ধ্যাঃ পিত্তরক্তাভিঘাতবিষনিমিত্তা যদা শোফদাহপাকরাগতোদবেদনাভিভূতাঃ ক্ষারাগ্নিদগ্ধাঃ পাকাত্ প্রকুথিতপ্রশীর্ণমাংসাশ্চ ভবন্তি ||৩২||

যেষু বন্ধ এবানর্থকরস্তান্ দর্শযন্নাহ- অবন্ধ্যা ইত্যাদি| নিমিত্তশব্দঃ পিত্তাদিভিঃ সহ প্রত্যেকং সম্বধ্যতে| কদা পুনরেতেঽবন্ধনীযা ইত্যাহ- যদেত্যাদি| তোদাখ্যৈব বেদনা তযাঽভিভূতা বাতানুবিদ্ধা ইত্যর্থঃ| অত্র বন্ধেনাত্যর্থং তোদোত্পত্তিরেব স্যাত্, তস্মান্ন বন্ধঃ কর্তব্য ইতি| ‘তোদদাহাভিভূতা’ ইত্যন্যে পঠন্তি| ‘যদা চ শোফতোদদাহরাগপাকবেদনাভিভূতা’ ইতি কেচিত্ পঠন্তি| পাকাত্ প্রকুথিতপ্রশীর্ণমাংসাশ্চ ভবন্তীতি যে ব্রণাঃ পাকাত্ প্রতিস্রস্তমাংসাশ্চ ভবন্তি তেঽপি ন বন্ধ্যা ইত্যর্থঃ||৩২||

Adhikarana 24 (33-35) · Śloka 35

কুষ্ঠিনামগ্নিদগ্ধানাং পিডকা মধুমেহিনাম্ | কর্ণিকাশ্চোন্দুরুবিষে বিষজুষ্টাশ্চ যে ব্রণাঃ ||৩৩|| মাংসপাকে ন বধ্যন্তে গুদপাকে চ দারুণে | স্ববুদ্ধ্যা চাপি বিভজেত্কৃত্যাকৃত্যাংশ্চ বুদ্ধিমান্ ||৩৪|| দেশং দোষং চ বিজ্ঞায ব্রণং চ ব্রণকোবিদঃ | ঋতূংশ্চ পরিসঙ্খ্যায ততো বন্ধান্নিবেশযেত্ ||৩৫||

উক্তানুক্তমর্থং সুখপাঠার্থং শ্লোকৈর্নির্দিশন্নাহ- কুষ্ঠিনামিত্যাদি| কুষ্ঠিপ্রভৃতীনাং মাংসপাকে সতি ব্রণা ন বধ্যন্তে| মধুমেহিনাং পিডকা ইতি গুদপাকে চ দারুণ ইতি বন্ধো ন কার্য ইত্যর্থঃ| কৃত্যাকৃত্যান্ সাধ্যাসাধ্যান্ | দেশং স্ফিক্কুক্ষিকক্ষাদিকম্| দোষং বাতাদিকম্| ব্রণকোবিদো ব্রণবিদ্বান্ ঋতূন্ শীতোষ্ণসাধারণান্| পরিসঙ্খ্যায সম্যগ্বুদ্ধ্বা| নিবেশযেত্ কুর্যাদিত্যর্থঃ||৩৩-৩৫||

Adhikarana 25 (36-45) · Śloka 45

ঊর্ধ্বং তির্যগধস্তাচ্চ যন্ত্রণা ত্রিবিধা স্মৃতা | যথা চ বধ্যতে বন্ধস্তথা বক্ষ্যাম্যশেষতঃ ||৩৬|| ঘনাং কবলিকাং দত্ত্বা মৃদু চৈবাপি পট্টকম্ | বিকেশিকামৌষধং চ নাতিস্নিগ্ধং সমাচরেত্ ||৩৭|| প্রক্লেদযত্যতিস্নিগ্ধা তথা রূক্ষা ক্ষিণোতি চ | যুক্তস্নেহা রোপযতি দুর্ন্যস্তা বর্ত্ম ঘর্ষতি ||৩৮|| বিষমং চ ব্রণং কুর্যাত্ স্তম্ভযেত্ স্রাবযেত্তথা | যথাব্রণং বিদিত্বা তু যোগং বৈদ্যঃ প্রযোজযেত্ ||৩৯|| পিত্তজে রক্তজে বাঽপি সকৃদেব পরিক্ষিপেত্ | অসকৃত্ কফজে বাঽপি বাতজে চ বিচক্ষণঃ ||৪০|| তলেন প্রতিপীড্যাথ স্রাবযেদনুলোমতঃ | সর্বাংশ্চ বন্ধান্ গূঢান্তান্ সন্ধীংশ্চ বিনিবেশযেত্ ||৪১|| ওষ্ঠস্যাপ্যেষ সন্ধানে যথোদ্দিষ্টো বিধিঃ স্মৃতঃ | বুদ্ধ্যোত্প্রেক্ষ্যাভিযুক্তেন তথা চাস্থিষু জানতা ||৪২|| উত্তিষ্ঠতো নিষণ্ণস্য শযনং চাধিগচ্ছতঃ | গচ্ছতো বিবিধৈর্যানৈর্নাস্য দুষ্যতি স ব্রণঃ ||৪৩|| যে চ স্যুর্মাংসসংস্থা বৈ ত্বগ্গতাশ্চ তথা ব্রণাঃ | সন্ধ্যস্থিকোষ্ঠলপ্রাপ্তাশ্চ সিরাস্নাযুগতাস্তথা ||৪৪|| তথাঽবগাঢগম্ভীরাঃ সর্বতো বিষমস্থিতাঃ | নৈতে সাধযিতুং শক্যা ঋতে বন্ধাদ্ভবন্তি হি ||৪৫||

কেচিত্ সুশ্রুতাধ্যাযিনো গদ্যোক্তস্যার্থস্য ব্যক্ত্যর্থং সঙ্গ্রহশ্লোকান্ পঠন্তি- ঊর্ধ্বমিত্যাদি| বিষমং চ ব্রণং কুর্যাদিতি বৈষম্যমিহ নিম্নোন্নতত্বেন| স্তম্ভযেত্ স্রাবযেত্তথেতি স্তম্ভনং স্রাবণং চেহ পূযস্যৈবেতি| সকৃদেব পরিক্ষিপেদিতি একবারমেব পট্টেন বেষ্টযেদিতি| সর্বাংশ্চ বন্ধানিত্যাদি সর্বান্ বন্ধান্ সন্ধীংশ্চ সর্বান্ বন্ধান্ সন্ধীংশ্চ সর্বান্ গুপ্তান্তান্ বিনিবেশযেত্ বিনিযোজযেত্ কুর্যাদিত্যর্থঃ| ওষ্ঠস্যেত্যাদি|- এষ যথোদ্দিষ্টো বিধিরোষ্ঠস্যাপি সন্ধানে স্মৃতঃ| বুদ্ধ্যোত্প্রেক্ষ্যেত্যাদি| অভিযুক্তেন জানতা বৈদ্যেন বুদ্ধ্যাঽভ্যূহ্যাস্থিষ্বপি সন্ধানায যথোদ্দিষ্টো বিধিঃ কর্তব্য ইতি| তথেত্যাদি| অবগাঢতযা গম্ভীরা ইত্যর্থঃ| গযদাসাচার্যেণাযং পাঠোঽনার্ষ এব কৃতঃ, তন্মতানুসারিণা ব্রহ্মদেবেন ক্বচিদ্ব্যাখ্যাতঃ, তাভ্যাং গৃহীতত্বাদস্মাভির্লিখিতো ব্যাখ্যাতশ্চ ক্বচিদিতি||৩৬-৪৫||

Adhikarana puShpikA · Śloka 18

ইতি সুশ্রুতসংহিতাযাং সূত্রস্থানে ব্রণালেপনবন্ধবিধির্নামাষ্টাদশোঽধ্যাযঃ ||১৮||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানেঽষ্টাদশোঽধ্যাযঃ||১৮||