19. vraṇitōpāsanīyādhyāyaḥ

Adhikarana 1 (1-2) · Śloka 2

অথাতো ব্রণিতোপাসনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

ব্রণিতস্য সঞ্জাতব্রণস্য, উপাসনং সেবনং, তচ্চ গৃহশয্যাসনাদিকং, তদ্বিদ্যতে যস্মিন্ স তথা||১-২||

Adhikarana 2 (3) · Śloka 3

ব্রণিতস্য প্রথমমেবাগারমন্বিচ্ছেত্; তচ্চাগারং প্রশস্তবাস্ত্বাদিকং কার্যম্ ||৩||

শয্যাসনাদিকং গৃহস্থস্য কার্যমিতি প্রাগেব গৃহং নির্দেষ্টুমাহ- ব্রণিতস্য প্রথমমেবেত্যাদি| ‘ব্রণিনঃ’ ইত্যন্যে পঠন্তি| তচ্চাগারং প্রশস্তবাস্ত্বাদিকং কার্যম্||৩||

Adhikarana 3 (4) · Śloka 4

প্রশস্তবাস্তুনি গৃহে শুচাবাতপবর্জিতে | নিবাতে ন চ রোগাঃ স্যুঃ শারীরাগন্তুমানসাঃ ||৪||

যতস্তস্মিস্তথাভূতে স্থিতস্য ব্রণিনঃ শারীরাদযো রোগা ন ভবেযুরিতি দর্শযিতুমাহ- প্রশস্তবাস্তুনীত্যাদি| প্রশস্তবাস্তুনি গৃহ ইতি বাস্তুশব্দেন দেশঃ কথ্যতে, তেন প্রশস্তদেশে গৃহ ইত্যর্থঃ, প্রশস্তত্বং চ দেশস্য প্রাঙ্নিম্নত্বমুদঙ্নিম্নত্বং কৃষ্ণমৃত্তিকত্বং সুবর্ণমৃত্তিকত্বং বেত্যাদিকং; ‘গৃহসন্নিবেশার্থা ভূমিস্তদধিষ্ঠাতৃপুরুষো বা বাস্তুশব্দেনোচ্যতে’ ইত্যন্যে; তস্য প্রশস্তত্বং হি মর্মাদিরহিতত্বম্||৪||

Adhikarana 4 (5) · Śloka 5

তস্মিঞ্ শযনমসম্বাধং স্বাস্তীর্ণং মনোজ্ঞং প্রাক্শিরস্কং সশস্ত্রং কুর্বীত ||৫||

শযনস্থস্য ব্রণিনঃ সব্রণান্যঙ্গানি সুখমাসত ইতি তদেব নির্দিশন্নাহ- তস্মিন্নিত্যাদি| তস্মিন্নিতি অগারে| অসম্বাধম্ অসঙ্কটম্ , স্বাস্তীর্ণং শোভনৈরাস্তরণৈস্তূলীগণ্ডোপধানৈরাচ্ছাদনৈশ্চাচ্ছাদিতং, মনোজ্ঞং রমণীযং, সশস্ত্রং শস্ত্রসহিতং হিংস্রনিবারণার্থম্||৫||

Adhikarana 5 (6) · Śloka 6

সুখচেষ্টাপ্রচারঃ স্যাত্ স্বাস্তীর্ণে শযনে ব্রণী | প্রাচ্যাং দিশি স্থিতা দেবাস্তত্পূজার্থং চ তচ্ছিরঃ ||৬||

ইত্থম্ভূতস্য শযনস্য গুণমাহ- সুখচেষ্টাপ্রচারঃ স্যাদিত্যাদি| চেষ্টাপ্রচার ইতি শযনপরিবর্তনাদিগতিঃ||৬||

Adhikarana 6 (7) · Śloka 7

তস্মিন্ সুহৃদ্ভিরনুকূলৈঃ প্রিযংবদৈরুপাস্যমানো যথেষ্টমাসীত ||৭||

তস্মিঞ্শযনে যথা ব্রণিতেন স্থাতব্যং তথোপদিশন্নাহ- তস্মিন্নিত্যাদি| সুহৃদ্ভিরিতি মিত্রৈঃ| অনুকূলৈরিতি অত্মনোঽনুম(গ)তবর্তিভিরিত্যর্থঃ| উপাস্যমানঃ সেব্যমানঃ||৭||

Adhikarana 7 (8) · Śloka 8

সুহৃদো বিক্ষিপন্ত্যাশু কথাভির্ব্রণবেদনাঃ | আশ্বাসযন্তো বহুশঃ স্বনুকূলাঃ প্রিযংবদাঃ ||৮||

সুহৃদুপাসনফলমাহ- সুহৃদ ইত্যাদি| বিক্ষিপন্তি বিশেষেণ প্রেরযন্তি স্ফোটযন্তীত্যর্থঃ; কথাঃ পূর্বপুরুষবৃত্তান্তপ্রবন্ধরচনাঃ ; আশ্বাসযন্তঃ সান্ত্বযন্তঃ||৮||

Adhikarana 8 (9) · Śloka 9

ন চ দিবানিদ্রাবশগঃ স্যাত্ ||৯||

শযনে দোষবন্তমাচারং পরিহরন্নাহ- ন চেত্যাদি||৯||

Adhikarana 9 (10) · Śloka 10

দিবাস্বপ্নাদ্ব্রণে কণ্ডূর্গাত্রাণাং গৌরবং তথা | শ্বযথুর্বেদনা রাগঃ স্রাবশ্চৈব ভৃশং ভবেত্ ||১০||

কথঞ্চিদ্দিবাস্বপ্নে কৃতে দোষমাহ- দিবাস্বপ্নাদিত্যাদি| অত্র কণ্ডূগৌরবে কফকৃতে, শ্বযথুবেদনে বাতকৃতে, রাগঃ পিত্তজনিতঃ, স্রাবো রক্তকৃতঃ, এতেন দিবাস্বপ্নস্যাখিলদোষকর্তৃত্বমুক্তম্||১০||

Adhikarana 10 (11) · Śloka 11

উত্থানসংবেশনপরিবর্তনচঙ্ক্রমণোচ্চৈর্ভাষণাদ্যাস্বাত্মচেষ্টাস্বপ্রমত্তো ব্রণং সংরক্ষেত্ ||১১||

সর্বাস্ববস্থাসু ব্রণসংরক্ষা করণীযেতি দর্শযন্নাহ- উত্থানেত্যাদি| সংবেশনং বিশ্রমণং, পরিবর্তনং বামদক্ষিণকঠ্যোর্বিলোটনং, চঙ্ক্রমণং গতাগতম্, আত্মচেষ্টাসূত্থানাদিকাস্বেব, অপ্রমত্তঃ ‘ব্রণী’ ইতি শেষঃ||১১||

Adhikarana 11 (12) · Śloka 12

স্থানাসনং চঙ্ক্রমণং দিবাস্বপ্নং তথৈব চ | ব্রণিতো ন নিষেবেত শক্তিমানপি মানবঃ ||১২||

চতুর্বিধামপি ব্রণিনঃ কাযচেষ্টাং নিযমযন্নাহ- স্থানাসনমিত্যাদি| স্থানম্ ঊর্ধ্বীভূতস্য স্থিতিঃ, আসনম্ উপবিষ্টস্য স্থিতিঃ| “স্থানাসনং চঙ্ক্রমণং যানযানাতিভাষণম্| ব্রণবান্ন নিষেবেত শক্তিমানপি মানবঃ” ইতি কেচিত্ পঠন্তি| যানযানং রথাদিগমনম্||১২||

Adhikarana 12 (13) · Śloka 13

উত্থানাদ্যাসনং স্থানং শয্যা চাতিনিষেবিতা | প্রাপ্নুযান্মারুতাদঙ্গরুজস্তস্মাদ্বিবর্জযেত্ ||১৩||

উত্থানাদীনামতিনিষেবণাদ্দোষমাহ- উত্থানেত্যাদি||১৩||

Adhikarana 13 (14) · Śloka 14

গম্যানাং চ স্ত্রীণাং সন্দর্শনসম্ভাষণসংস্পর্শনানি দূরত এব পরিহরেত্ ||১৪||

সামান্যাচারান্নিযম্য বিশিষ্টং স্পর্শাশ্রযং বিহারমতিদোষকরং পৃথগেব নির্দিশন্নাহ- গম্যানামিত্যাদি| গম্যা গমনার্হা গ্রাম্যধর্মযোগ্যা ইত্যর্থঃ, তাশ্চ ভার্যাবেশ্যাচেটীপ্রভৃতযঃ| সন্দর্শনাদিষু সংশব্দ আভিমুখ্যার্থঃ||১৪||

Adhikarana 14 (15) · Śloka 15

স্ত্রীদর্শনাদিভিঃ শুক্রং কদাচিচ্চলিতং স্রবেত্ | গ্রাম্যধর্মকৃতান্দোষান্ সোঽসংসর্গেঽপ্যবাপ্নুযাত্ ||১৫||

কস্মাদ্গম্যস্ত্রীণাং সন্দর্শনাদি পরিহর্তব্যমিত্যাহ- স্ত্রীদর্শনাদিভিরিত্যাদি||১৫||

Adhikarana 15 (16) · Śloka 16

নবধান্যমাষতিলকলাযকুলত্থনিষ্পাবহরিতকশাকাম্ললবণকটুকগুডপিষ্টবিকৃতিবল্লূরশুষ্কশাকাজাবিকানূপৌদক- মাংসবসাশীতোদককৃশরাপাযসদধিদুগ্ধতক্রপ্রভৃতীনি পরিহরেত্ ||১৬||

অতিদোষকরমাহারং নিযমযন্নাহ- নবধান্যেত্যাদি| কলাযোঽত্র ত্রিপুটকঃ, এতেন হরেণুসতীনকযোরপ্রতিষেধঃ; নিষ্পাবশব্দেনাত্র রাজশিম্বী; হরিতকমিতি “কুঠেরশিগ্রুসুরসসুমুখাসুরিভূস্তৃণাঃ| মূলকং চুক্রিকা চেতি বর্গং হরিতকং বিদু”- ইতি| অত্রাম্লাদযস্ত্রযো রসাঃ| গুডপিষ্টবিকৃতিরিতি বিকৃতিশব্দো গুডপিষ্টাভ্যাং সহ সম্বধ্যতে| বল্লূরং শুষ্কমাংসম্| অজাবিকানূপৌদকমাংসবসেতি অজাবিকে প্রসিদ্ধে; আনূপশব্দো দ্বিবিধঃ- ব্যুত্পাদিতোঽব্যুত্পাদিতশ্চ, তত্রাব্যুত্পাদিতঃ পঞ্চসু কূলচরাদিষু বর্ততে, অত্র তু ব্যুত্পাদিত এব গ্রাহ্যাঃ, তদেবাহ- অনুগতা আপো যস্মিন্ সোঽনূপো দেশঃ, তচ্চারিণস্ত্বানূপাঃ; তে চ কূলচরাঃ প্লবাশ্চেতি| ঔদকশব্দেন পুনরত্র কোশস্থাঃ পাদিনো মত্স্যাশ্চোচ্যন্তে| বসা শুদ্ধমাংসস্নেহঃ কৃশরা তিলতণ্ডুলমাষৈঃ কৃতা যবাগূঃ| পাযসং ক্ষীরসিদ্ধাস্তণ্ডুলাঃ| অন্যে তু ‘অজাঙ্গলবিকারানূপৌদকমাংসং’ ইতি পঠন্তি| যদ্যপি জাঙ্গলবর্গোঽষ্টবিধস্তথাঽপ্যত্র জঙ্ঘালবিষ্কিরৌ জাঙ্গলশব্দেনোচ্যেতে; কুতঃ? তযোঃ প্রধানতমত্বাত্, যথা লবণশব্দস্যা(ব্দেনা)বিশেষোক্তাবপি প্রধানত্বাত্ সৈন্ধবং গৃহ্যতে তদ্বত্, তেনাত্র জঙ্ঘালবিষ্কিরৌ বিহাযান্যেষাং জাঙ্গলানাং প্রতিষেধ ইতি| আনূপৌদকযোরপ্যজাঙ্গলত্বাদেব নিষেধে সিদ্ধে পুনরুপাদানং তন্মাংসানামত্যর্থং দোষবত্ত্বপ্রতিপাদনার্থম্, অজাঙ্গলমাংসবিকারেতি নিষেধমুখেন বিধিপ্রণযনং জঙ্ঘালবিষ্কিরযোরপ্যবস্থাযামুপযোগখ্যাপনার্থমিতি| প্রভৃতিগ্রহণাদ্বরকোদ্দালকাদীনাং পরিহারঃ||১৬||

Adhikarana 16 (17) · Śloka 17

তক্রান্তো নবধান্যাদির্যোঽযং বর্গ উদাহৃতঃ | দোষসঞ্জননো হ্যেষ বিজ্ঞেযঃ পূযবর্ধনঃ ||১৭||

এষাং ভিন্নজাতীযানামপি দোষকরত্বং প্রতিপাদযন্নাহ- তক্রান্ত ইত্যাদি| ননু ‘তক্রপ্রভৃতীতি পরিহরেত্’ ইত্যত্র প্রভৃতিগ্রহণাদ্বরকোদ্দালকাদীনাং গ্রহণম্, অতস্তেষামপি দ্ষসঞ্জননত্বং চাস্তে এবং পূযবর্ধনত্বং চ, তত্ কথং তক্রান্তো নবধান্যাদিরিতি বিচ্ছেদঃ কৃতঃ| উচ্যতে- বরকাদিভ্যো নবধান্যাদীনাং তক্রান্তানামত্যর্থং দোষসঞ্জননত্বপূযবর্ধনত্বপ্রতিপাদনার্থমিতি| ননু নবধান্যাদৌ বর্গে কেচিদ্বাতহরাঃ কেচিচ্চ পিত্তহরাঃ কেচিচ্চ কফহরাস্তত্ কথমুচ্যতে ‘দোষসঞ্জনন’ ইতি? নৈষ দোষঃ, যতোঽত্র দোষশব্দেন ব্রণদুষ্টিরেবোচ্যতে; যদ্যপি ব্রণদুষ্টিরপি দুষ্টৈরেব দোষৈঃ ক্রিযতে তথাঽপি ন দোষঃ, কস্মাত্? নিদানদ্রব্যাণাং ত্রিবিধত্বাত্; তদ্যথা- কিঞ্চিদ্ দ্রব্যং দোষকারি কিঞ্চিদ্ব্যাধিকারি, কিঞ্চিদুভযকারীতি, কিং বহুনোক্তেন; অত্র নিবন্ধকারৈর্বহুধা জল্পিতং, তচ্চাস্মাভির্বিস্তরভযান্ন দর্শিতমিতি||১৭||

Adhikarana 17 (18) · Śloka 18

মদ্যপশ্চ মৈরেযারিষ্টাসবসীধুসুরাবিকারান্ পরিহরেত্ ||১৮||

তত্র বিশিষ্টবিষযেঽতিদোষকরত্বাদ্বিশিষ্টং পানদ্রব্যং চাগ্রীকৃত্য নিষেধার্থমাহ- মদ্যপশ্চেত্যাদি| শস্ত্রকর্মাদাবেকবারং মদ্যপস্য মদ্যপানমভিহিতম্, অত্র তু ব্রণে সতি নিষেধ এব| মৈরেযং সুরাসবযোরেকস্মিন্ ভাজনে সন্ধানম্| অরিষ্টমভযারিষ্টাদি| আসবাঃ পলাসক্ষারোদকাসবাদযো মহাকুষ্ঠাদ্যভিহিতাঃ| সীধুঃ সস্যকঃ, সোঽপি নানাপ্রকারঃ পক্বরসিকশীতরসিকাদিভেদেন| সুরা লোহিতবর্ণা পিষ্টকিণ্বকল্কেন কিঞ্চিত্ কলুষা| অত্র কেচিদাচার্যা এবং ব্রুবতে- “যানি মদ্যান্যম্লাদিগুণযুক্তানি ভবন্তি তানি সর্বাণ্যেব ব্রণিভির্ন পাতব্যানি, যানি পুনর্দ্রাক্ষারসোদ্ভবানি মদ্যান্যম্লাদিগুণবিপরীতগুণানি রক্তপিত্তাদিষ্বভিমতানি তানি চ ব্রণিতস্যাবস্থাযাং কদাচিদ্দাতব্যানীত্যযং গ্রন্থকর্তুরভিপ্রায” ইতি||১৮||

Adhikarana 18 (19) · Śloka 19

মদ্যমম্লং তথা রূক্ষং তীক্ষ্ণমুষ্ণং চ বীর্যতঃ | আশুকারি চ তত্ পীতং ক্ষিপ্রং ব্যাপাদযেদ্ব্রণম্ ||১৯||

কুতঃ পুনর্মৈরেযাদযঃ পরিহরণীযা ইত্যাহ- মদ্যমিত্যাদি||১৯||

Adhikarana 19 (20) · Śloka 20

বাতাতপরজোধূমাবশ্যাযাতিসেবনাতিভোজনানিষ্টভোজনশ্রবণদর্শনের্ষ্যামর্ষভযশোকধ্যানরাত্রিজাগরণবিষমাশন- শযনোপবাসবাগ্ব্যাযামস্থানচঙ্ক্রমণশীতবাতবিরুদ্ধাধ্যশনাজীর্ণমক্ষিকাদ্যা বাধাঃ পরিহরেত্ ||২০||

আভ্যন্তরাশ্রযাবাহারবিহারৌ নিযম্য বাহ্যানপি পরিহরন্নাহ - বাতাতপেত্যাদি| ঈর্ষ্যা পরসম্পত্তিষ্বসহিষ্ণুতা| অমর্ষঃ ক্রোধঃ| ধ্যানম্ অনবরতকার্যাকার্যচিন্তনম্| বিষমাশনশযনমিতি বিষমশব্দোঽশনশযনাভ্যাং সহ প্রত্যেকং সম্বধ্যতে; বহুস্তোকাকালভোজনং বিষমাশনং, রাত্রিজাগরণং দিবাস্বপ্নশ্চ বিষমশযনং; তত্র বিষমাশযনং নিষিদ্ধমপি পুনরত্যন্তাপথ্যকারিত্বেন নিযমার্থম্| শীতো বাতঃ| বিরুদ্ধাশনং সমমধুঘৃতাদিকম্||২০||

Adhikarana 20 (21-22) · Śloka 22

ব্রণিনঃ সম্প্রতপ্তস্য কারণৈরেবমাদিভিঃ | ক্ষীণশোণিতমাংসস্য ভুক্তং সম্যঙ্ন জীর্যতি ||২১|| অজীর্ণাত্ পবনাদীনাং বিভ্রমো বলবান্ ভবেত্ | ততঃ শোফরুজাস্রাবদাহপাকানবাপ্নুযাত্ ||২২||

কুতঃ পুনরেতে পরিহার্যা ইত্যাহ- ব্রণিন ইত্যাদি| সম্প্রতপ্তস্যেতি সম্যক্প্রকারেণ তাপিতস্য| পবনাদীনামিতি বাতপিত্তকফানামিত্যর্থঃ| বিভ্রমো ব্যাপদ্বিশেষঃ, বাতাদীনাং স্থানান্তরগমনং বা| শোফরুজে বাতস্য, আস্রাবঃ কফস্য, দাহপাকৌ পিত্তস্যেতি||২১-২২||

Adhikarana 21 (23) · Śloka 23

সদা নীচনখরোম্ণা শুচিনা শুক্লবাসসা শান্তিমঙ্গলদেবতাব্রাহ্মণগুরুপরেণ ভবিতব্যমিতি | তত্ কস্য হেতোঃ? হিংসাবিহারাণি হি মহাবীর্যাণি রক্ষাংসি পশুপতিকুবেরকুমারানুচরাণি মাংসশোণিতপ্রিযত্বাত্ ক্ষতজনিমিত্তং ব্রণিনমুপসর্পন্তি, সত্কারার্থং জিঘাংসূনি বা কদাচিত্ ||২৩||

আধিদৈবিকং বিশিষ্টমাগন্তুবাধং পরিজিহীর্ষুরাহ- সদেত্যাদি শান্ত্যাদিপরেণ শান্ত্যাদিরতেনেত্যর্থঃ| শিষ্যহিতার্থং গুরুঃ স্বযমেব প্রশ্নং কুর্বন্নাহ- তদিত্যাদি| তত্ নীচনখরোমাদিকরণম্| অন্যে ‘অপি তত্ কস্য হেতোঃ’ ইতি পঠন্তি; ‘অপিশব্দোঽত্র সানুনযপ্রশ্নে’ ইতি চ ব্যাখ্যানযন্তি| শিষ্যহিতত্বেন স্বযমেব হেতুসাকাঙ্ক্ষং প্রশ্নং কৃত্বা সহেতুমুত্তরমাহ- হিংসাবিহারাণীত্যাদি| হিংসাবিহারাণি বধক্রীডনানিঃ অন্যে তু ‘হিংসার্থং বিহারশ্চেষ্টা যেষাং তানি হিংসাবিহারাণি’| হি যস্মাদর্থে, যস্মাত্ ক্ষতজনিমিত্তং ব্রণিনমুপসর্পন্তি, তস্মান্নীচনখাদীনা ভবিতব্যমিতি| হিস্থানেঽন্যে তুশব্দং যস্মাদর্থে পঠন্তি| রক্ষাংসি পশুপতি কুবেরকুমারানুচরাণি মহেশ্বরধনদকার্তিকেযানুগানি তদাদেশকারীণীত্যর্থঃ| ক্ষতজনিমিত্তং শোণিতার্থম্| সত্কারার্থং জিঘাংসূনি বা কদাচিত্ সত্কারার্থং পূজার্থমাযুষ্মন্তং ব্রণিনমুপসর্পন্তি গতাযুষং তু জিঘাংসূনীতি; অন্যে ত্বন্যথা ব্যাখ্যানযন্তি- ‘কদাচিদ্বা জিঘাংসূনি হন্তুমিচ্ছূন্যুপসর্পন্তি সত্কারার্থম্’ ইতি||২৩||

Adhikarana 22 (24) · Śloka 24

ভবতি চাত্র | তেষাং সত্কারকামানাং প্রযতেতান্তরাত্মনা | ধূপবল্যুপহারাংশ্চ ভক্ষ্যাংশ্চৈবোপহারযেত্ ||২৪||

তেষাং সত্কারদানাযাহ- তেষামিত্যাদি| তেষামনুচরাণাং পূজাভিলাষিণাং, প্রযতেতান্তরাত্মনা বিশিষ্টো বৈদ্যো ধূপাদীনুপহারযেত্ দাপযেদিত্যর্থঃ| বলিঃ পশুবর্জিতা পূজা, উপহারঃ সপশুর্বলিঃ||২৪||

Adhikarana 23 (25-26) · Śloka 26

তে তু সন্তর্পিতা আত্মবন্তং ন হিংস্যুঃ | তস্মাত্ সততমতন্দ্রিতো জনপরিবৃতো নিত্যং দীপোদকশস্ত্রস্রগ্দামপুষ্পলাজাদ্যলঙ্কৃতে বেশ্মনি সম্পন্মঙ্গলমনোঽনুকূলাঃ কথাঃ শৃণ্বন্নাসীত ||২৫|| সম্পদাদ্যনুকূলাভিঃ কথাভিঃ প্রীতমানসঃ | আশাবান্ ব্যাধিমোক্ষায ক্ষিপ্রং সুখমবাপ্নুযাত্ ||২৬||

তেষাং তর্পণফলমাহ- তে ত্বিত্যাদি| আত্মবন্তং রক্ষাংসি হিংসিতুং ন শক্নুবন্তি| আত্মবত্তা তু নীচনখরোমাদিভির্ভবতি| অতন্দ্রিতঃ অনলসঃ| স্রক্ মূর্ধার্হা পুষ্পমালা, দাম গ্রৈবেযকাদিপুষ্পাভরণং, পুষ্পাণি অগ্রথিতানি; আদিশব্দাচ্চন্দনাদর্শবীণাদযঃ| সম্পন্মঙ্গলমনোঽনুকূলা ইতি অনুকূলশব্দঃ সম্পদাদিভিঃ প্রত্যেকং সম্বধ্যতে| সম্পদাদ্যনুকূলত্বাচ্ছ্রবণফলমাহ- সম্পদাদ্যনুকূলাভিরিত্যাদি||২৫-২৬||

Adhikarana 24 (27) · Śloka 27

ঋগ্যজুঃসামাথর্ববেদাভিহিতৈরপরৈশ্চাশীর্বিধানৈরুপাধ্যাযা ভিষজশ্চ সন্ধ্যযো রক্ষাং কুর্যুঃ ||২৭||

অপরামপি কর্তব্যতামাহ- ঋগ্যজুরিত্যাদি| আশীর্বিধানৈঃ আশীঃকরণৈঃ, আশীর্বাদৈরিত্যর্থঃ| উপাধ্যাযাঃ পুরোহিতাঃ||২৭||

Adhikarana 25 (28) · Śloka 28

সর্ষপারিষ্টপত্রাভ্যাং সর্পিষা লবণেন চ | দ্বিরহ্নঃ কারযেদ্ধূপং দশরাত্রমতন্দ্রিতঃ ||২৮||

মক্ষিকাদিভ্যো রাক্ষসাদিভ্যশ্চ রক্ষার্থং ধূপমাহ- সর্ষপারিষ্টেত্যাদি| অরিষ্টপত্রং নিম্বপত্রম্| লবণেন সৈন্ধবেন| দ্বিরহ্ন ইতি দিনস্য বারদ্বযং প্রাতঃ সাযং চ দশরাত্রম্| সর্ষপাদিরক্ষোঘ্ননিহতৌজাংসি রক্ষাংসি নৈব পুনর্ব্রণিনমুপসর্পন্তি||২৮||

Adhikarana 26 (29) · Śloka 29

ছত্রামতিচ্ছত্রাং লাঙ্গূ(ঙ্গ)লীং জটিলাং ব্রহ্মচারিণীং লক্ষ্মীং গুহামতিগুহাং বচামতিবিষাং শতবীর্যাং সহস্রবীর্যাং সিদ্ধার্থকাংশ্চ শিরসা ধারযেত্ ||২৯||

ছত্রামিত্যাদি| ছত্রাতিচ্ছত্রে দ্রোণপুষ্পীদ্বযং; লাঙ্গূলী কপিকচ্ছুঃ; জটিলা মাংসী; ব্রহ্মচারিণী মুণ্ডিতিকা, পত্তঙ্গকাষ্ঠমিত্যপরে; লক্ষ্মীঃ শমী, লক্ষ্মণেত্যন্যে, বিষ্ণুক্রান্তেত্যপরে; গুহাতিগুহে শালপর্ণীপৃশ্নিপর্ণ্যৌ; শতবীর্যা শতাবরী, নীলদূর্বেত্যন্যে; সহস্রবীর্যা শ্বেতদূর্বা; সিদ্ধার্থকাঃ সর্ষপাঃ||২৯||

Adhikarana 27 (30) · Śloka 30

ব্যজ্যেত বালব্যজনৈর্ব্রণং ন চ বিঘট্টযেত্ | ন তুদেন্ন চ কণ্ডূযেচ্ছযানঃ পরিপালযেত্ ||৩০||

অন্যদপ্যাহ- ব্যজ্যেতেত্যাদি| বালব্যজনৈঃ চামরৈঃ| ন চ বিঘট্টযেত্ ন চালযেত্| ন তুদেত্ ন ব্যথযেত্| ন কণ্ডূযেত্ ন খর্জূযেত্, নখবিষভযাত্| শযানং স্বপন্তম্| কেচিদমুং ন পঠন্তি||৩০||

Adhikarana 28 (31) · Śloka 31

অনেন বিধিনা যুক্তমাদাবেব নিশাচরাঃ | বনং কেশরিণঽঽক্রান্তং বর্জযন্তি মৃগা ইব ||৩১||

এতস্য রক্ষোঘ্নবিধেঃ ফলং দর্শযন্নাহ- অনেনেত্যাদি||৩১||

Adhikarana 29 (32-35) · Śloka 35

জীর্ণশাল্যোদনং স্নিগ্ধমল্পমুষ্ণং দ্রবোত্তরম্ | ভুঞ্জানো জাঙ্গলৈর্মাংসৈঃ শীঘ্রং ব্রণমপোহতি ||৩২|| তণ্ডুলীযকজীবন্তীসুনিষণ্ণকবাস্তুকৈঃ | বালমূলকবার্তাকপটোলৈঃ কারবেল্লকৈঃ ||৩৩|| সদাডিমৈঃ সামলকৈর্ঘৃতভৃষ্টৈঃ সসৈন্ধবৈঃ | অন্যৈরেবঙ্গুণৈর্বাঽপি মুদ্গাদীনাং রসেন বা ||৩৪|| শক্তূন্ বিলেপীং কুল্মাষাঞ্জলং চাপি শৃতং পিবেত্ |৩৫|

আহারবিধিবিধেযমধিকৃত্যাহ- জীর্ণশাল্যোদনমিত্যাদি| জীর্ণশাল্যোদনমিতি নবধান্যনিষেধাদেব পুরাণশালির্লব্ধঃ পুনর্জীর্ণগ্রহণং প্রপুরাণনিষেধার্থং; তেন বর্ষোষিতং গ্রাহ্যম্| দ্রবোত্তরমিতি দ্রবঃ উত্তরো যস্মিন্ স দ্রবোত্তরঃ, দ্রবপ্রধান ইতি কেচিদ্ব্যাখ্যানযন্তি; ইদং চ ব্যাখ্যানং গযদাসাচার্যো ন মন্যতে, কস্মাত্? ব্রণিনাং তোযপাননিষেধাত্| তদুক্তং- “ব্রণে চ মধুমেহে চ পানীযং মন্দমাচরেত্”(সূ. অ. ৪৫)- ইতি, তথা ভোজেঽপি “ব্রণোদরাস্থাপনপীডিতানাং প্রমেহিণাং ছর্দ্যতিসারিণাং চ| দ্রবং ন দদ্যাদথবাঽপি কোষ্ণং স্বল্পং হিতং ভেষজসংস্কৃতং চ”- ইতি; তথা দ্বাদশাশনপ্রবিচারেঽপি- “প্রক্লিন্নদেহান্ ব্রণিনঃ শুষ্কৈর্মেহিন এব চ”(উ. তং. ৬৪) ইতি, তস্মাত্ দ্রবাদুত্তরো দ্রবোত্তরো দ্রবহীনো মূর্তপ্রধান ইতি ব্যাখ্যেযম্| জাঙ্গলমাংসভোজনমপি রোপণকালে দাতব্যং, “মাংসং মাংসেন বর্ধতে” ইতিবচনাত্| জীবন্তী ডোডিকা, সুনিষণ্ণকঃ শিরিবালিকা, চতুষ্পর্ণীত্যন্যে| ঘৃতভৃষ্টৈরিতি এতেন ঘৃতেনৈব সংস্কারো বিধেযো নান্যৈরিতি| সসৈন্ধবৈরিতি সৈন্ধবমেব লবণেষু গ্রাহ্যম্| অন্যৈরেবঙ্গুণৈর্বেতি স্বাস্থ্যাবৃত্তিকৈর্ব্রণ্যৈশ্চ বেত্রাগ্রমণ্ডূকপর্ণীকর্কোটকপ্রভৃতিভিঃ| মুদ্গাদীনাং রসেন বেতি শমীধান্যেষু নিষেধবর্জং মুদ্গাদযঃ| রসেন যূষেণ| শক্তূনিতি যথাসাত্ম্যং, যবসাত্ম্যানাং যবশক্তবঃ, শাল্যাদিসাত্ম্যানাং তল্লাজশক্তব ইতি| বিলেপী স্বল্পদ্রবা বহুসিক্থা| কুল্মাষা যবপিষ্টমযা উত্স্বিন্নাঃ||৩২-৩৫||

Adhikarana 30 (35-37) · Śloka 37

দিবা ন নিদ্রাবশগো নিবাতগৃহগোচরঃ | ব্রণী বৈদ্যবশে তিষ্ঠঞ্ শীঘ্রং ব্রণমপোহতি ||৩৫|| (ব্রণে শ্বযথুরাযাসাত্ স চ রাগশ্চ জাগারাত্ | তৌ চ রুক্ চ দিবাস্বাপাত্তাশ্চ মৃত্যুশ্চ মৈথুনাত্) ||৩৬|| এবংবৃত্তসমাচারো ব্রণী সম্পদ্যতে সুখী | আযুশ্চ দীর্ঘমাপ্নোতি ধন্বন্তরিবচো যথা ||৩৭||

যথোক্তাহারাচারানুবর্তিনো ব্রণিতস্য ফলোপদর্শনপরং শ্লোকদ্বযমাহ- দিবেত্যাদি| নিবাতগৃহগোচর ইতি বাতরহিতাগারবিষযঃ, তত্স্থাযীত্যর্থঃ| এবমনেন প্রকারেণ বৃত্তঃ প্রাপ্তঃ সম্যগাচার আহারো বিহারশ্চ যেন; অথবা, এবমনেন প্রকারেণ বৃত্তস্য সমাচারঃ সমাচরণং ব্যবহরণং যস্য স এবংবৃত্তসমাচারঃ| সম্পদ্যতে সুখীতি সুখীভবতীত্যর্থঃ| যথেতি সত্যম্| কশ্চিদাচার্যস্ত্বনযোঃ শ্লোকযোর্মধ্যেঽমুং শ্লোকং পঠতি- “ব্রণে শ্বযথুরাযাসাত্ স চ রাগশ্চ জাগরাত্| তৌ চ রুক চ দিবাস্বাপাত্তাশ্চ মৃত্যুশ্চ মৈথুনাত্”- ইতি| ব্যাখ্যানযতি চ- স চ শ্বযথুঃ রাগশ্চ রক্ততা চ জাগরাদ্রাত্রিজাগরাদ্ভবতঃ, তৌ চেতি শ্বযথুরাগৌ রুক্ ব্যথা চ দিবাস্বপ্নাদ্ভবন্তি, তা ইতি শ্বযথুরাগরুজো মৃত্যুশ্চ মৈথুনাত্ সম্ভবন্তীত্যর্থঃ| শ্রীগযদাসাচাযপ্রভৃতযস্তু দ্বাবেব শ্লোকৌ মন্যন্তে| ইমং চ কস্মিংশ্চিত্ পুস্তকে প্রমাদপঠিতং দৃষ্ট্বা কশ্চিদেবাবিচিতপাঠব্যাখ্যাতা ব্যাখ্যানযতি| অস্মিংশ্চাঙ্গীক্রিযমাণে নির্ণীতপাঠব্যাখ্যাতৃভিঃ শ্রীগযদাসপ্রভৃতিভিঃ সহ বিরোধঃ স্যাত্, তস্মাদযং ন পঠনীয ইতি||৩৫-৩৭||

Adhikarana puShpikA · Śloka 19

ইতি সুশ্রুতসংহিতাযাং সূত্রস্থানে ব্রণিতোপাসনীযো নামৈকোনবিংশোঽধ্যাযঃ ||১৯||

ইতি শ্রীডল্হ(হ্ল)ণবিরচিতাযাং সুশ্রুতব্যাখ্যাযাং নিবন্ধসঙ্গ্রহাখ্যাযাং সূত্রস্থানে একোনবিংশোঽধ্যাযঃ||১৯||