34. yuktasēnīyādhyāyaḥ

Adhikarana 1 (1-2) · Śloka 2

অথাতো যুক্তসেনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

যুক্তসেনীযমিতি যুক্তা সেনা যস্য স যুক্তসেনো রাজেত্যর্থঃ; তমধিকৃত্য কৃতোঽধ্যাযো যুক্তসেনীযঃ||১-২||

Adhikarana 2 (3-4) · Śloka 4

নৃপতের্যুক্তসেনস্য পরানভিজিগীষতঃ | ভিষজা রক্ষণং কার্যং যথা তদুপদেক্ষ্যতে ||৩|| বিজিগীষুঃ সহামাত্যৈর্যাত্রাযুক্তঃ প্রযত্নতঃ | রক্ষিতব্যো বিশেষেণ বিষাদেব নরাধিপঃ ||৪||

যুক্তসেনস্যেতি সজ্জসেনস্য, গজতুরগরথপদাতিলক্ষণচতুরঙ্গবলস্যেত্যর্থঃ| অন্যে যুক্তসেনস্য মিলিতসেনস্যেতি কথযন্তি| পরান্ শত্রূন্; অভিজিগীষতঃ জেতুমিচ্ছত ইত্যর্থঃ| বিজিগীষুঃ জেতুমিচ্ছুঃ| সহামাত্যৈরিতি ক্রমাগতৈঃ পুরুষৈঃ সহেত্যর্থঃ| যাত্রাযুক্ত ইতি দত্তপ্রযাণ ইত্যর্থঃ| রক্ষিতব্য ইতি সর্বেভ্য আগন্তুমৃত্যুভ্যঃ| বিশেষেণ অতিশযেন| বিষং স্থাবরং, জঙ্গমং, কৃত্রিমং চ||৩-৪||

Adhikarana 3 (5) · Śloka 5

পন্থানমুদকং ছাযাং ভক্তং যবসমিন্ধনম্ | দূষযন্ত্যরযস্তচ্চ জানীযাচ্ছোধযেত্তথা ||৫||

বিষপ্রযোগভেদং চিকিত্সার্থং দর্শযন্নাহ- পন্থানমিত্যাদি| পন্থানং মার্গং; স চ বিষেণ দূষিতোঽশ্বাদিখুরক্ষুণ্ণরেণুনা রোমকূপনাসাবিবরাদিষু প্রবিশন্ বিকারং জনযতি| ছাযামিতি বিষেণ বৃক্ষাদিদূষণাচ্ছাযাদোষঃ, দ্রব্যস্বভাবাদ্বা ছাযামপি বিষং দূষযতি; যদ্বা ভল্লাতকচ্ছাযা তত্ক্ষণাচ্ছোফকারিণীতি| ভক্তম্ ওদনাদিকম্| যবসং বুসাদি| দূষযন্তি বিকৃতিং কুর্বন্তি| অরযঃ শত্রবঃ| তচ্চেতি পন্থাদি| জানীযাত্ ‘লিঙ্গৈঃ কৃত্বা’ ইতি শেষঃ| শোধযেত্ চিকিত্সেত্|||৫||

Adhikarana 4 (6) · Śloka 6

তস্য লিঙ্গং চিকিত্সা চ কল্পস্থানে প্রবক্ষ্যতে |৬|

কিং তল্লিঙ্গং কা বা চিকিত্সেত্যাহ- তস্যেত্যাদি|৬|-

Adhikarana 5 (6) · Śloka 7

একোত্তরং মৃত্যুশতমথর্বাণঃ প্রচক্ষতে ||৬|| তত্রৈকঃ কালসংযুক্তঃ শেষা আগন্তবঃ স্মৃতাঃ |৭|

ননু যদ্যকালমৃত্যুরস্তি তদা বিষাদিভ্যো নৃপতিরক্ষণং যুক্তং, বিষভক্ষকস্য লিঙ্গচিকিত্সে চ যুক্তে, অথ নাস্ত্যকালমৃত্যুস্তদা কিং নিষ্ফলপ্রযাসেনেত্যাশঙ্ক্যাকালমৃত্যুং প্রমাণৈঃ সাধযন্নাদাবাগমমেব প্রমাণমাহ- একোত্তরমিত্যাদি| একেনাধিকং মৃত্যুশতমথর্বাণোঽথর্ববেদবিদঃ পুরুষাঃ, প্রচক্ষতে কথযন্তি| তত্রৈকঃ কালসংযুক্তঃ ইতি তত্র তেষাং মৃত্যূনাং মধ্যে একঃ কালসংযুক্তঃ কালমৃত্যুরিত্যর্থঃ| শেষা আগন্তবঃ স্মৃতা ইতি শেষা উর্বরিতা আগন্তবোঽপমৃত্যবঃ স্মৃতাঃ কথিতাঃ ইত্যর্থঃ| তত্র গর্ভবর্ষেণ সহৈকোত্তরশতবর্ষৈরেকোত্তরশতং মৃত্যবঃ পূর্যন্তে; ততঃ শতাদর্বাগকালমৃত্যবঃ, শতাদনন্তরং কালমৃত্যুরিতি কেচিন্মন্যন্তে| অপরে ব্রুবতে- ‘শতশব্দোঽত্রাসঙ্খ্যাবাচকঃ, উত্তরশব্দস্তু প্রধানবাচকঃ; তেনাসঙ্খ্যা মৃত্যবঃ, কারণানামসঙ্খ্যেযত্বাত্; একশ্চ মৃত্যুঃ প্রধানং, স চ কালমৃত্যুঃ কথ্যতে| ননু, যো যস্মিন্ কালে ম্রিযতে স তস্য কালমৃত্যুরেব, তত্ কথমকালমৃত্যুরিত্যুচ্যতে? তথা চোক্তং- “নাকালে ম্রিযতে কশ্চিন্নাস্তি মৃত্যুরকালজঃ যো যস্মিন্ ম্রিযতে কালে মৃত্যুকালঃ স তস্য হি- ” ইতি| ব্যাসভট্টারকেণাযুক্তং- “নাকালে ম্রিযতে কচ্চিদ্বিদ্ধঃ শরশতৈরপি| কালপ্রাপ্তস্য কৌন্তেয! বজ্রাযন্তে তৃণান্যপি”- ইতি| নৈতদস্তি, উপমানাদিপ্রমাণৈর্বহুধাঽঽচার্যৈরকালমৃত্যোঃ স্থাপিতত্বাত্| তথাচ- “যথা বর্ষমকালে চ যথা পুষ্পং যথা ফলম্| যথা স্যাদ্দীপনির্বাণমকালে মরণং তথা”- ইতি| ব্যাসবচনমপ্যর্জুনপ্রোত্সাহকমকালমৃত্যুস্থাপকং দৃশ্যতে; তথাহি- “জলমগ্নির্বিষং শস্ত্রং স্ত্রিযো রাজকুলানি চ| অকালমৃত্যবো হ্যেতে তেভ্যো বিভ্যতি পণ্ডিতাঃ”- ইতি| অন্যৈরপ্যুক্তং;- “কালঃ সুরৈরপি হি বঞ্চযিতুং ন শক্যো বক্ষ্যে বিধানমপমৃত্যুবিনাশনায| মৃত্যুর্ভবেদ্যদি কথঞ্চন নাপমৃত্যুর্ব্যর্থাস্তদা চরকসুশ্রুতবাগ্ভটাদ্যাঃ”- ইতি| তস্মাত্ কালাকালযোর্মৃত্যুর্ভবত্যেবেতি| অপরে, ‘শেষা আগন্তবঃ স্মৃতাঃ’ ইত্যস্যাগ্রতঃ, “বিষ্বগ্বাতাদিভির্যদ্বদ্দীপস্তৈলাদিসংযুতঃ| নির্বাত্যতে ক্ষণাদ্দেহী তথৈবাগন্তুমৃত্যুভিঃ”- ইতি শ্লোকং পঠন্তি, ব্যাখ্যানযন্তি চ- বিষ্বগ্বাতঃ প্রবলবাতঃ| আদিশব্দেন শলভাদিনিপাতঃ কথ্যতে||৬||-

Adhikarana 6 (7) · Śloka 8

দোষাগন্তুজমৃত্যুভ্যো রসমন্ত্রবিশারদৌ ||৭|| রক্ষেতাং নৃপতিং নিত্যং যত্তৌ বৈদ্যপুরোহিতৌ |৮|

অথর্ববেদোঽকালামৃত্যুপ্রশমনহেতুঃ, তদঙ্গানি চ বৈদ্যপুরোহিতৌ পঠতঃ, অতস্তযো রাজরক্ষণে ব্যাপারং দর্শযন্নাহ- দোষেত্যাদি| দোষাঃ বাতাদযঃ, আগন্তবো বিষাভিঘাতাদযঃ| রসমন্ত্রবিশারদাবিতি যথাসঙ্খ্যেন রসবিশারদো বৈদ্যঃ, মন্ত্রবিশারদঃ পুরোধাঃ| তত্র কেচিত্ ‘রসবিশারদ’ ইত্যত্রাদিশব্দলোপাদ্রসবীর্যবিপাকবিশারদঃ; অথবা রসশব্দেন রসবন্তি দ্রব্যাণি কথ্যন্তে, তেষাং বিশারদঃ, অথবা রসশব্দোঽত্র বিষবাচকঃ তদ্বিশারদ ইতি কথযন্তি| বিশারদঃ পণ্ডিতঃ| মন্ত্রাণামৃগ্যজুঃসামোক্তানামথর্ববেদোক্তানাং চেত্যর্থঃ| যত্তৌ যত্নপরৌ||৭||

Adhikarana 7 (8) · Śloka 9

ব্রহ্মা বেদাঙ্গমষ্টাঙ্গমাযুর্বেদমভাষত ||৮|| পুরোহিতমতে তস্মাদ্বর্তেত ভিষগাত্মবান্ |৯|

পুরোহিতো বেদানধীতে, বৈদ্যস্তু তদঙ্গমাযুর্বেদমিতি বৈদ্যাত্ পুরোধসঃ প্রাধান্যং দর্শযন্নাহ- ব্রহ্মেত্যাদি| ব্রহ্মা আযুর্বেদমভাষত, কিংবিশিষ্টম্? অষ্টাঙ্গং; পুনঃ কিংবিশিষ্টং? বেদাঙ্গম্| বর্তেত ব্যবহরেদিত্যর্থঃ| আত্মবান্ বুদ্ধিমান্||৮||-

Adhikarana 8 (9) · Śloka 10

সঙ্করঃ সর্ববর্ণানাং প্রণাশো ধর্মকর্মণাম্ ||৯|| প্রজানামপি চোচ্ছিত্তির্নৃপব্যসনহেতুতঃ |১০|

সর্বপ্রজানাং রাজাযত্তা স্থিতিরিতি রাজরক্ষণং যত্নেন কার্যমিতি দর্শযন্নাহ- সঙ্কর ইত্যাদি|| সঙ্করঃ একত্বং ব্রাহ্মণাশূদ্রাদীনাং বর্ণানাং দণ্ডাভাবেনাচারলোপাত্| ধর্মকর্মণামিতি বর্ণানামেব ধর্মস্য কর্মণামন্যেষামপি| অন্যে তু ‘ধর্মিকর্মণাম্’ ইতি পঠন্তি, তত্র ধর্মযোগাদাশ্রমাশ্চত্বারো ধর্মিণঃ, ব্রহ্মচারিগৃহস্থবানপ্রস্থযতযশ্চত্বার আশ্রমাঃ, তত্কর্মণাং প্রাণাশঃ| প্রজানামুচ্ছিত্তিরিতি দণ্ডাভাবেন কৃষিপাশুপাল্যবাণিজ্যরাজোপসেবানামভাবাদুচ্ছিত্তিরুচ্ছেদো ভবতীত্যর্থঃ| নৃপব্যসনহেতুত ইতি বর্ণসঙ্করাদযোঽনর্থা রাজব্যসনাত্ কারণাদ্ভবন্তি, তস্মাদ্রাজা যত্নেন রক্ষণীয ইত্যর্থঃ| অন্যে ‘নৃপব্যসনহেতুকা’ ইতি পঠন্তি; তত্র উচ্ছিত্তিরিতি সম্বধ্যতে||৯||-

Adhikarana 9 (10-11) · Śloka 12

পুরুষাণাং নৃপাণাং চ কেবলং তুল্যমূর্তিতা ||১০|| আজ্ঞা ত্যাগঃ ক্ষমা ধৈর্যং বিক্রমশ্চাপ্যমানুষঃ | তস্মাদ্দেবমিবাভীক্ষ্ণং বাঙ্মনঃকর্মভিঃ শুভৈঃ ||১১|| চিন্তযেন্নৃপতিং বৈদ্যঃ শ্রেযাংসীচ্ছন্ বিচক্ষণঃ |১২|

রাজ্ঞো মনুজত্বে সমানেঽপ্যমানুষানুবর্তিভির্গুণের্দেবত্বং সাধযন্নাহ- পুরুষাণামিত্যাদি| কেবলং নিশ্চিতং, মূর্তিরাকৃতিঃ; আজ্ঞা অনুল্লঙ্ঘনীয আদেশঃ, ত্যাগঃ কীর্তিধর্মার্থং বহুপ্রকারো বিত্তবিসর্গঃ, ক্ষামা সর্বংসহতা, ধৈর্যং ব্যসনেষু ধীরতা, বিক্রমঃ পরাক্রমঃ, অমানুষঃ এষ গুণসমূহো মানুষেষু ন সম্ভবতীত্যর্থঃ| তস্মাদিত্যাদি|- অভীক্ষ্ণমনবরতং, তস্মাত্ কারণাদ্দেবমিব নৃপতিং বৈদ্যশ্চিন্তযেদিতি সম্বন্ধঃ| কৈঃ কৃত্বা চিন্তযেদিত্যাহ- বাঙ্মনঃ কর্মভিঃ শুভৈরিতি|- শুভৈঃ শোভনৈরিত্যর্থঃ||১০-১১||

Adhikarana 10 (12-14) · Śloka 15

স্কন্ধাবারে চ মহতি রাজগেহাদনন্তরম্ ||১২|| ভবেত্সন্নিহিতো বৈদ্যঃ সর্বোপকরণান্বিতঃ | তত্রস্থমেনং ধ্বজবদ্যশঃখ্যাতিসমুচ্ছ্রিতম্ ||১৩|| উপসর্পন্ত্যমোহেন বিষশল্যামযার্দিতাঃ | স্বতন্ত্রকুশলোঽন্যেষু শাস্ত্রার্থেষ্ববহিষ্কৃতঃ ||১৪|| বৈদ্যো ধ্বজ ইবাভাতি নৃপতদ্বিদ্যপূজিতঃ |১৫|

বৈদ্যস্য সন্ততোপযোগিত্বাদুচিতপ্রদেশবাসং নির্দিশন্নাহ- স্কন্ধাবার ইত্যাদি| স্কন্ধাবারে কটকে| মহতি গুরুতরে| অনন্তরমিতি অব্যবধানে অন্তরাযবর্জিতে| সর্বোপকরণান্বিত ইতি যন্ত্রশস্ত্রক্ষারৌষধাগদাদিযুক্তঃ| তত্রেত্যাদি|- তত্রস্থং রাজগৃহসমিপস্থম্| এনমিতি বৈধম্| ধ্বজবত্ পতাকাবত্| নির্মলগুণকীর্তনং যশঃ, খ্যাতিঃ স্বাভাবিকী স্তুতিঃ, সমুচ্ছ্রিতং বৃদ্ধিঙ্গতম্| উপসর্পন্তি সমীপং গচ্ছন্তি| অমোহেন নিশ্চিন্তমনসা| বিষশল্যামযার্দিতা ইতি অর্দিতাঃ পীডিতাঃ; তেন বিষার্দিতাঃ শল্যার্দিতা আমযার্দিতাশ্চেত্যর্থঃ| বৈদ্যং বহুশ্রুতং স্তুবন্নাহ- স্বতন্ত্রেত্যাদি| কুশলঃ প্রবীণঃ| অবহিষ্কৃত ইতি নাত্যন্তমকুশলঃ| নৃপতদ্বিদ্যপূজিত ইতি নৃপৈস্তদ্বিদ্যৈশ্চ পূজিতঃ সম্মানিতঃ, তদ্বিদ্যৈঃ বৈদ্যৈরিত্যর্থঃ||১২-১৪||-

Adhikarana 11 (15-16) · Śloka 17

বৈদ্যো ব্যাধ্যুপসৃষ্টশ্চ ভেষজং পরিচারকঃ ||১৫|| এতে পাদাশ্চিকিত্সাযাঃ কর্মসাধনহেতবঃ | গুণবদ্ভিস্ত্রিভিঃ পাদৈশ্চতুর্থো গুণবান্ ভিষক্ ||১৬|| ব্যাধিমল্পেন কালেন মহান্তমপি সাধযেত্ |১৭|

পাদচতুষ্টযং চিকিত্সাসাধকং দর্শযন্নাহ- বৈদ্য ইত্যাদি| ব্যাধ্যুপসৃষ্টো রোগী; পরিচারকঃ শুশ্রূষকঃ পুরুষঃ| কর্মসাধনহেতব ইতি আরোগ্যহেতব ইত্যর্থঃ||১৫-১৬||-

Adhikarana 12 (17) · Śloka 18

বৈদ্যহীনাস্ত্রযঃ পাদা গুণবন্তোঽপ্যপার্থকাঃ ||১৭|| উদ্গাতৃহোতৃব্রহ্মাণো যথাঽধ্বর্যুং বিনাঽধ্বরে |১৮|

বৈদ্যস্য প্রাধান্যং দর্শযন্নাহ- বৈদ্যেত্যাদি| অপার্থকা নিষ্ফলাঃ| উদ্গাতা সামাবিত্, হোতা ঋগ্বেদবিত্, ব্রহ্মা তু ত্রযীবিত্, অধ্বর্যুর্যর্বেদবিদুপাধ্যাযঃ সর্বেষামুপদেষ্টা| অধ্বরে যজ্ঞে||১৭||

Adhikarana 13 (18) · Śloka 19

বৈদ্যস্তু গুণবানেকস্তারযেদাতুরাং সদা ||১৮|| প্লবং প্রতিতরৈর্হীনং কর্ণধার ইবাম্ভসি |১৯|

পাদত্রযব্যতিরেকেঽপি বৈদ্যক্রিযাযাঃ সাফল্যং দর্শযন্নাহ- বৈদ্যস্ত্বিত্যাদি| প্লবং নাবং, প্রতিতরৈরন্তঃপ্রবিষ্টজলোত্ক্ষেপকৈঃ পুরুষৈঃ| কর্ণধারো নৌকাযা নেতা||১৮||

Adhikarana 14 (19-20) · Śloka 21

তত্ত্বাধিগতশাস্ত্রার্থো দৃষ্টকর্মা স্বযঙ্কৃতী ||১৯|| লঘুহস্তঃ শুচিঃ শূরঃ সজ্জোপস্করভেষজঃ | প্রত্যুত্পন্নমতির্ধীমান্ ব্যবসাযী বিশারদঃ ||২০|| সত্যধর্মপরো যশ্চ স ভিষক্ পাদ উচ্যতে |২১|

বৈদ্যাদীনাং গুণানাহ- তত্ত্বেত্যাদি| তত্ত্বাধিগতশাস্ত্রার্থ ইতি যথাবদধীতশাস্ত্রো যথাবজ্জ্ঞাততদর্থশ্চেত্যর্থঃ| দৃষ্টকর্মেতি ছেদ্যাদৌ স্নেহাদৌ চ কুশল ইত্যর্থঃ| স্বযঙ্কৃতী স্বপ্রজ্ঞযা চিকিত্সাযাং প্রবৃত্তঃ| লঘুহস্ত ইতি ছেদ্যাদিক্রিযাসু বেপনাদিদোষরহিতঃ| শুচিরিতি বাহ্যাভ্যন্তরশৌচযুক্তঃ| শূরো বিষাদরহিতঃ| সজ্জোপস্করভেষজ ইতি সজ্জানি প্রগুণান্যুপস্তরাণ্যগ্রোপহরণীযপঠিতানি যন্ত্রশস্ত্রাদীনি ভেষজানি চ যস্য স তথা| প্রত্যুত্পন্নমতিঃ যোঽবস্থাসু ন মুহ্যতি| ধীমানিতি অনুক্তদুরুক্তোহাপোহলক্ষণবুদ্ধিযুক্তঃ| ব্যবসাযী বিষমাবস্থাস্বপি চিকিত্সাং কুর্বন্ন মুহ্যতি; অন্যে উত্সাহীতি মন্যন্তে| বিশারদঃ পণ্ডিতঃ, কৃচ্ছ্রপদমাত্রেষু ন মুহ্যতি| সত্যধর্মপর ইতি সত্যং মিথ্যাভাষণনিবৃত্তিঃ; ধর্মঃ অনেকসাধনসাধ্যঃ||১৯-২০||

Adhikarana 15 (21) · Śloka 22

আযুষ্মান্ সত্ত্ববান্ সাধ্যো দ্রব্যবানাত্মবানপি ||২১|| আস্তিকো বৈদ্যবাক্যস্থো ব্যাধিতঃ পাদ উচ্যতে |২২|

আযুষ্মানিত্যাদি|- আযুষ্মান্ দীর্ঘাযুঃ| সত্ত্ববান্ ক্লেশসহিষ্ণুঃ| সাধ্যঃ সাধ্যব্যাধিযুক্ত ইত্যর্থঃ| আত্মবান্ অলোলুপঃ| আস্তিক ইতি দত্তমস্তি হুতমস্তি পরলোকোঽস্ত্যেবং মতির্যস্য স আস্তিকঃ| বৈদ্যবাক্যস্থো বৈদ্যবচনকর ইত্যর্থঃ||২১||-

Adhikarana 16 (22-23) · Śloka 23

প্রশস্তদেশসম্ভূতং প্রশস্তেঽহনি চোদ্ধৃতম্ ||২২|| যুক্তমাত্রং মনস্কান্তং গন্ধবর্ণরসান্বিতম্ | দোষঘ্নমগ্লানিকরমবিকারি বিপর্যযে | সমীক্ষ্য দত্তং কালে চ ভেষজং পাদ উচ্যতে ||২৩||

প্রশস্তদেশসম্ভূতমিত্যাদি|- যুক্তমাত্রং যুক্তপ্রমাণম্| মনস্কান্তং মনঃপ্রিযম্| দোষঘ্নমিতি দোষশব্দেন বাতাদয উচ্যন্তে তদ্দূষিতা ধাতুমলাশ্চ, অথবা দোষহরং দুষ্টিং হরত্যদুষ্টং ন চ কোপযতি| অগ্লানিকরং হর্ষক্ষযং ন করোতীত্যর্থঃ| অবিকারি বিপর্যয ইতি বিপর্যযে ব্যাপত্তাবপ্যল্পবিকারং নির্বিকারং বা| সমীক্ষ্য দত্তমিতি কিমভিসমীক্ষ্য? আতুরোপক্রমোক্তান্ পরীক্ষ্যানাযুরাদীন্ দেশান্তান্, কালাবস্থাঃ পূর্বাহ্ণাদিকা বা||২২-২৩||

Adhikarana 17 (24) · Śloka 24

স্নিগ্ধোঽজুগুপ্সুর্বলবান্ যুক্তো ব্যাধিতরক্ষণে | বৈদ্যবাক্যকৃদশ্রান্তঃ পাদঃ পরিচরঃ স্মৃতঃ ||২৪||

স্নিগ্ধ ইতাদি| স্নিগ্ধঃ প্রীতিযুক্তঃ| অজুগুপ্সুরিতি অনিন্দকঃ; এতেন কষ্টব্যাধাববস্থাস্বপ্যাতুরং ন নিন্দতীত্যর্থঃ| বলবানিতি বলবত্ত্বাত্ সর্বক্লেশসহঃ| যুক্তো ব্যাধিতরক্ষণ ইতি যুক্তো নিপুণঃ, এতেন ব্যাধিতস্য রক্ষণে তত্পর ইত্যর্থঃ| বৈদ্যবাক্যকৃদিতি বৈদ্যবাক্যমবিকল্পং করোতীত্যর্থঃ| অশ্রান্তঃ ইতি খদেরহিতঃ| ‘পাদৈশ্চতুর্ভিঃ সম্পূর্ণৈরেভিঃ কর্ম প্রসিধ্যতি’ ইতি কেচিদধ্যাযান্তে পঠন্তি| এতচ্চ ন পঠনীযং, সর্বেষু নিবন্ধেষ্বদর্শনাত্||২৪||

Adhikarana puShpikA · Śloka 34

ইতি সুশ্রুতসংহিতাযাং সূত্রস্থানে যুক্তসেনীযো নাম চতুস্ত্রিংশত্তমোঽধ্যাযঃ ||৩৪||

ইতি শ্রীডল্হ(হ্ণ)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং সূত্রস্থানে চতুস্ত্রিংশত্তমোঽধ্যাযঃ||৩৪||