34. yuktasēnīyādhyāyaḥ

Adhikarana 1 (1-2) · Śloka 2

অথাতো যুক্তসেনীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3-4) · Śloka 4

নৃপতের্যুক্তসেনস্য পরানভিজিগীষতঃ | ভিষজা রক্ষণং কার্যং যথা তদুপদেক্ষ্যতে ||৩|| বিজিগীষুঃ সহামাত্যৈর্যাত্রাযুক্তঃ প্রযত্নতঃ | রক্ষিতব্যো বিশেষেণ বিষাদেব নরাধিপঃ ||৪||

Adhikarana 3 (5) · Śloka 5

পন্থানমুদকং ছাযাং ভক্তং যবসমিন্ধনম্ | দূষযন্ত্যরযস্তচ্চ জানীযাচ্ছোধযেত্তথা ||৫||

Adhikarana 4 (6) · Śloka 6

তস্য লিঙ্গং চিকিত্সা চ কল্পস্থানে প্রবক্ষ্যতে |৬|

Adhikarana 5 (6) · Śloka 7

একোত্তরং মৃত্যুশতমথর্বাণঃ প্রচক্ষতে ||৬|| তত্রৈকঃ কালসংযুক্তঃ শেষা আগন্তবঃ স্মৃতাঃ |৭|

Adhikarana 6 (7) · Śloka 8

দোষাগন্তুজমৃত্যুভ্যো রসমন্ত্রবিশারদৌ ||৭|| রক্ষেতাং নৃপতিং নিত্যং যত্তৌ বৈদ্যপুরোহিতৌ |৮|

Adhikarana 7 (8) · Śloka 9

ব্রহ্মা বেদাঙ্গমষ্টাঙ্গমাযুর্বেদমভাষত ||৮|| পুরোহিতমতে তস্মাদ্বর্তেত ভিষগাত্মবান্ |৯|

Adhikarana 8 (9) · Śloka 10

সঙ্করঃ সর্ববর্ণানাং প্রণাশো ধর্মকর্মণাম্ ||৯|| প্রজানামপি চোচ্ছিত্তির্নৃপব্যসনহেতুতঃ |১০|

Adhikarana 9 (10-11) · Śloka 12

পুরুষাণাং নৃপাণাং চ কেবলং তুল্যমূর্তিতা ||১০|| আজ্ঞা ত্যাগঃ ক্ষমা ধৈর্যং বিক্রমশ্চাপ্যমানুষঃ | তস্মাদ্দেবমিবাভীক্ষ্ণং বাঙ্মনঃকর্মভিঃ শুভৈঃ ||১১|| চিন্তযেন্নৃপতিং বৈদ্যঃ শ্রেযাংসীচ্ছন্ বিচক্ষণঃ |১২|

Adhikarana 10 (12-14) · Śloka 15

স্কন্ধাবারে চ মহতি রাজগেহাদনন্তরম্ ||১২|| ভবেত্সন্নিহিতো বৈদ্যঃ সর্বোপকরণান্বিতঃ | তত্রস্থমেনং ধ্বজবদ্যশঃখ্যাতিসমুচ্ছ্রিতম্ ||১৩|| উপসর্পন্ত্যমোহেন বিষশল্যামযার্দিতাঃ | স্বতন্ত্রকুশলোঽন্যেষু শাস্ত্রার্থেষ্ববহিষ্কৃতঃ ||১৪|| বৈদ্যো ধ্বজ ইবাভাতি নৃপতদ্বিদ্যপূজিতঃ |১৫|

Adhikarana 11 (15-16) · Śloka 17

বৈদ্যো ব্যাধ্যুপসৃষ্টশ্চ ভেষজং পরিচারকঃ ||১৫|| এতে পাদাশ্চিকিত্সাযাঃ কর্মসাধনহেতবঃ | গুণবদ্ভিস্ত্রিভিঃ পাদৈশ্চতুর্থো গুণবান্ ভিষক্ ||১৬|| ব্যাধিমল্পেন কালেন মহান্তমপি সাধযেত্ |১৭|

Adhikarana 12 (17) · Śloka 18

বৈদ্যহীনাস্ত্রযঃ পাদা গুণবন্তোঽপ্যপার্থকাঃ ||১৭|| উদ্গাতৃহোতৃব্রহ্মাণো যথাঽধ্বর্যুং বিনাঽধ্বরে |১৮|

Adhikarana 13 (18) · Śloka 19

বৈদ্যস্তু গুণবানেকস্তারযেদাতুরাং সদা ||১৮|| প্লবং প্রতিতরৈর্হীনং কর্ণধার ইবাম্ভসি |১৯|

Adhikarana 14 (19-20) · Śloka 21

তত্ত্বাধিগতশাস্ত্রার্থো দৃষ্টকর্মা স্বযঙ্কৃতী ||১৯|| লঘুহস্তঃ শুচিঃ শূরঃ সজ্জোপস্করভেষজঃ | প্রত্যুত্পন্নমতির্ধীমান্ ব্যবসাযী বিশারদঃ ||২০|| সত্যধর্মপরো যশ্চ স ভিষক্ পাদ উচ্যতে |২১|

Adhikarana 15 (21) · Śloka 22

আযুষ্মান্ সত্ত্ববান্ সাধ্যো দ্রব্যবানাত্মবানপি ||২১|| আস্তিকো বৈদ্যবাক্যস্থো ব্যাধিতঃ পাদ উচ্যতে |২২|

Adhikarana 16 (22-23) · Śloka 23

প্রশস্তদেশসম্ভূতং প্রশস্তেঽহনি চোদ্ধৃতম্ ||২২|| যুক্তমাত্রং মনস্কান্তং গন্ধবর্ণরসান্বিতম্ | দোষঘ্নমগ্লানিকরমবিকারি বিপর্যযে | সমীক্ষ্য দত্তং কালে চ ভেষজং পাদ উচ্যতে ||২৩||

Adhikarana 17 (24) · Śloka 24

স্নিগ্ধোঽজুগুপ্সুর্বলবান্ যুক্তো ব্যাধিতরক্ষণে | বৈদ্যবাক্যকৃদশ্রান্তঃ পাদঃ পরিচরঃ স্মৃতঃ ||২৪||

Adhikarana puShpikA · Śloka 34

ইতি সুশ্রুতসংহিতাযাং সূত্রস্থানে যুক্তসেনীযো নাম চতুস্ত্রিংশত্তমোঽধ্যাযঃ ||৩৪||